ရေပြာကြေးခွံ ဝံပုလွေတပ်စု ပေါ်ပေါက်လာခြင်း၊ ထိတ်လန့်သွားကြသော ဧကရီနှစ်ပါး (၄)

“တစ်နည်းအားဖြင့် ပြောရရင်... ငါ့ရဲ့ လေဟာနယ် ပင်ကိုစွမ်းရည်နဲ့ဆိုရင်၊ အဲဒီအချိန်ကျရင် ပထမဆုံးအကြိမ်အဖြစ် စစ်မှန်တဲ့ တိုက်ခိုက်ရေးစွမ်းအားကို ငါပိုင်ဆိုင်နိုင်တော့မှာပဲ...” ဤအတွေးကြောင့် သူမ၏ နှလုံးသားမှာ တုန်ခါသွားခဲ့ရသည်။

သို့သော်လည်း... “ဒါပေမဲ့ ဒီသုံးနှစ်အရွယ် ကလေး ခန္ဓာကိုယ်လေးက ငါ့ခွန်အားကို ဘယ်လောက်အထိများ ကန့်သတ်ထားဦးမလဲ မသိဘူး...” ဤအရာမှာ မသိရှိရသေးသော လျှို့၀ှက်ပုစ္စာတစ်ခုအဖြစ် ကျန်ရှိနေသေးလေသည်။

အခြားတစ်ဖက်တွင်မူ ရှောင်ယင်းမှာ သူမ၏ ခန္ဓာကိုယ်အတွင်းမှ အပြောင်းအလဲများကို ပိုမိုနက်ရှိုင်းစွာ ခံစားလိုက်ရပြီး အံ့အားသင့်နေလေသည်။

ထို “အရိပ်မြွေပါ” အမြုတေအတွင်းတွင် ပါဝင်နေသော ကြွယ်၀သည့် အရိပ်စွမ်းအင်များသည်၊ ခရမ်းရောင်အကျဉ်းထောင် မိစ္ဆာသိုင်းကျမ်း၏ သန့်စင်ခြင်းကို ခံရပြီးနောက်တွင်၊ နောက်ဆုံး ဉာဏ်စမ်းပဟေဋ္ဌိ အပိုင်းအစလေးတစ်ခုကဲ့သို့၊ သူမ၏ ကျင့်ကြံခြင်းနည်းစနစ်၏ မသိသာလှသော ချို့ယွင်းချက်လေးများနှင့် တစ်ဆို့နေမှုများကို ပြီးပြည့်စုံစွာ ပြုပြင်ပေးလိုက်ပုံ ရလေသည်။

ထိုဖြစ်ရပ်မှာ သူမ၏ ကျင့်ကြံခြင်းအမြန်နှုန်းကို အနည်းငယ်မျှသာ တိုးတက်စေသည်ဟု ထင်ရသော်လည်း၊ ရှောင်ယင်း၏ အတိတ်ဘဝက အမြင်အရ ကြည့်မည်ဆိုလျှင်တော့...

“ဒါက ကျင့်ကြံခြင်းလမ်းကြောင်းမှာ အမြင့်ဆုံးအထိသွားနိုင်ဖို့ ငါ့ရဲ့ အခြေခံအုတ်မြစ်ကို ဖြည့်ဆည်းပေးလိုက်တာပဲ... အချိန်စီးဆင်းမှု ချုပ်နှောင်ပိုးအိမ်က ပိုပြီးအားကောင်းလာပြီ... အဲ့တာရဲ့ အရေးပါမှုက ရိုးရှင်းတဲ့ အဆင့်တစ်ခုတိုးတက်သွားတာထပ် အများကြီးသာတယ်... ဝံပုလွေဖေဖေ့ရဲ့ လက်ဆောင်က အရမ်းကို တန်ဖိုးကြီးလွန်းသွားပြီ...”

သူမ ဝမ်းသာမှုအပြည့်ဖြင့် အတွေးများထဲတွင် နစ်မြုပ်နေစဉ်မှာပင်၊ ရုတ်တရက် သူမ၏ မျက်လုံးထောင့်မှနေ၍ မလှမ်းမကမ်းတွင် စိမ်းပြာရောင် သတ္တုအလင်းတန်းများ ရောင်ပြန်ဟပ်နေသည့် မြင့်မားသော ဧရာမသားရဲအရိပ်ကြီး ခြောက်ခုကို မြင်တွေ့လိုက်ရလေသည်။

“ဟင်...” ရှောင်ယင်းမှာ ထိတ်လန့်သွားပြီး သူမ၏ အာရုံများကို လျင်မြန်စွာ ပြန်လည်စုစည်းလိုက်ရာ၊ အသွင်ပြောင်းလဲမှု ပြီးစီးသွားကြပြီး ကြေးခွံများမှာ မာကြောလွန်းနေပုံရသည့် ရေပြာကြေးခွံ နှင်းဝံပုလွေခြောက်ကောင်ကို သူမ တွေ့လိုက်ရလေသည်။

သူမ တစ်ခဏတာမျှ လုံးဝ မှင်တက်သွားခဲ့သည်။

“ဒါက...” သူမ အလိုအလျောက် ရေရွတ်လိုက်မိသည်။

“ဘာဖြစ်လို့လဲ...” ရှောင်လန်သည်လည်း သူမ၏ဘေးမှ လှုပ်ရှားမှုကို ခံစားလိုက်ရပြီး ရှောင်ယင်း၏ အကြည့်နောက်သို့ လိုက်ကြည့်လိုက်သည်။

နောက်တစ်စက္ကန့်တွင် ရှောင်လန်၏ ပါးစပ်သေးသေးလေးမှာလည်း အလိုအလျောက် အနည်းငယ်ပွင့်ဟသွားပြီး၊ သူမ၏ မျက်နှာပေါ်တွင် အံ့အားသင့်မှုများဖြင့် ပြည့်နှက်သွားခဲ့သည်။

“ဘာတွေ ဖြစ်ကုန်တာလဲ... ငါတို့ ခဏလေးပဲ ကျင့်ကြံလိုက်သေးတာကို၊ ဘယ်လိုလုပ်ပြီး ငါတို့ဘေးမှာ အရမ်းကြမ်းတမ်းမယ့်ပုံ ပေါက်နေတဲ့ ဝံပုလွေအကောင်ကြီးတွေ... ခြောက်ကောင်တောင် ပေါ်လာရတာလဲ...”

သူမ၏ စိတ်ထဲတွင် သံသယများ ပြည့်နှက်သွားခဲ့သည်။ “နေဦး... သူတို့ရဲ့ အရှိန်အဝါက... နှင်းဝံပုလွေတွေနဲ့ တူနေတယ်နော်... ငါတို့ မျိုးနွယ်စုက ဝံပုလွေတွေများလား...”

ထိုရေပြာကြေးခွံ ဝံပုလွေသားရဲခြောက်ကောင်ထံမှ၊ ဗီဇပြောင်းလဲသွားသော်လည်း ရင်းနှီးနေသည့် အရှိန်အဝါ တစ်ခုကို သူမ ခံစားလိုက်ရသည်။

ထို့နောက် ချက်ချင်းဆိုသလိုပင် သူမ၏ အတိတ်ဘဝက မှတ်ဉာဏ်များ၏ အနက်ထဲတွင် မြှုပ်နှံထားပြီး လူတိုင်းကို တုန်လှုပ်သွားစေနိုင်သော အမည်နာမတစ်ခုက လျှပ်စီးတစ်ခုကဲ့သို့ သူမ၏ စိတ်ကို ရိုက်ခတ်သွားပြီး၊ ချက်ချင်း အသက်ရှူမှားသွားခဲ့ရလေသည်။

“ဘုရားရေ...” ရှောင်လန်သည် ရှောင်ယင်းနှင့် စိတ်ချင်းဆက်သွယ်နေရာမှ ရုတ်တရက် အော်ဟစ်လိုက်မိသည်။

“ငါတို့ရဲ့ အတိတ်ဘဝက မိစ္ဆာသားရဲမျိုးနွယ်စုထဲက ‘ကောင်းကင်ဘုံ’ ရဲ့ လက်အောက်မှာ လူတိုင်းကို ထိတ်လန့်တုန်ရင်စေခဲ့တဲ့ ‘အနက်ရောင် ချပ်ဝတ်တန်ဆာ ဝံပုလွေမြင်းတပ်’ ကို နင် မှတ်မိသေးလား...”

ထိုစကားလုံးများမှာ မှော်အတတ်တစ်ခုကို ပိုင်ဆိုင်ထားသည့်အလား၊ သူမ၏ ဘေးနားရှိ ရှောင်ယင်းကို ချက်ချင်း မှင်တက်သွားစေခဲ့ပြီး၊ သူမ၏ မျက်၀န်းများမှာလည်း အနည်းငယ် ကျုံ့ဝင်သွားခဲ့သည်။ “အနက်ရောင် ချပ်ဝတ်တန်ဆာ ဝံပုလွေမြင်းတပ်လား...”

အချိန်ကြာကြာ စဉ်းစားနေခြင်းပင် မရှိဘဲ သူမ ပြန်လည်ဖြေကြားလိုက်သည်။

“အတိတ်ဘဝတုန်းက မိစ္ဆာမျိုးနွယ်စုထဲမှာ နာမည်ဆိုးနဲ့ ကျော်ကြားခဲ့ပြီး၊ ဝိညာဉ်ခေတ်ရဲ့ လူသားသမိုင်း မှတ်တမ်းတွေမှာတောင် သွေးစွန်းခြေရာတစ်ခုကို ချန်ရစ်ထားနိုင်ခဲ့တဲ့ ‘ရေခဲအရိုးစု မိစ္ဆာအင်ပါယာ’ ရဲ့ လက်အောက်က ‘အစွမ်းထက်ဆုံး စက်ယန္တရားကြီး’ အကြောင်းကို ပြောနေတာလား...”

တစ်ခဏအတွင်းမှာပင် သူတို့၏ စိတ်ထဲတွင် အတိတ်ဘဝများမှ မှတ်ဉာဏ်အပိုင်းအစများ ဆူပွက်လာခဲ့သည်။

လူသား မဟာမိတ်တပ်ဖွဲ့များက ‘ရေခဲအရိုးစု မိစ္ဆာအင်ပါယာ’ ကို ဝိုင်းရံတိုက်ခိုက်ရန် အထပ်ထပ်အခါခါ စစ်ရေးအခင်းအကျင်းများ ပြင်ဆင်နေသည့် ထိုမြင့်မားလွန်းသော ကွမ်းလွမ်နှင်းတောင်ထိပ်ကြီးပေါ်ရှိ အဆုံးအဖြတ်ပေးမည့် တိုက်ပွဲတွင်ဖြစ်သည်။

အရေအတွက် သုံးရာနီးပါးရှိသော အနက်ရောင် ချပ်ဝတ်တန်ဆာ ဝံပုလွေမြင်းတပ်ကြီးမှာ တစ္ဆေများကဲ့သို့ ထိုတိုက်ပွဲတွင် ရုတ်တရက် ခုန်ထွက်လာခဲ့ပုံကိုပင် သူတို့ ပြန်လည် မြင်ယောင်မိသွားကြလေသည်။

အဖွဲ့ဝင်တိုင်းသည် ကြောက်မက်ဖွယ်ကောင်းသော ခြေလှမ်း၀က်ဧကရာဇ်အဆင့် စွမ်းအားများကို ပိုင်ဆိုင်ထားကြပြီး၊ ဖျက်ဆီး၍မရနိုင်သော စိမ်းပြာရောင် ကြေးခွံများ ဖုံးလွှမ်းနေကာ၊ စတင်တိုက်ခိုက်လိုက်သည်နှင့် ဖျက်ဆီးနိုင်စွမ်းအားကောင်းသော သံမဏိရေစီးကြောင်း တစ်ခုအဖြစ် ပြောင်းလဲသွားကြလေသည်။

အကြွင်းမဲ့ ရက်စက်ကြမ်းကြုတ်မှုများနှင့် လွှမ်းမိုးမှုများဖြင့်၊ သူတို့သည် လူသားမျိုးနွယ်၏ စနစ်တကျ ပြင်ဆင်ထားသော စစ်ရေးအခင်းအကျင်းများကို အလွယ်တကူ ချေမှုန်းပစ်လိုက်ကြပြီး၊ တိုက်ပွဲ၏ အခြေအနေကို တစ်ချက်တည်းဖြင့် ပြောင်းပြန်လှန်ပစ်လိုက်ကြလေသည်။

ထိုတိုက်ပွဲတွင် အနက်ရောင် ချပ်ဝတ်တန်ဆာ ဝံပုလွေမြင်းတပ် သည် မရေမတွက်နိုင်သော လူသားကျင့်ကြံသူများ၏ သွေးများဖြင့် ၎င်း၏ အကျော်ကြားဆုံးသော နာမည်ဆိုးကို သွန်းလုပ်၊ တည်ဆောက်နိုင်ခဲ့ခြင်း ဖြစ်လေသည်။

သို့သော်... ထိုကြောက်မက်ဖွယ်ကောင်းသော မှတ်ဉာဏ်များမှာ သူမရှေ့ရှိ မြင်ကွင်းနှင့် တစ်ခဏသာ ထပ်တူကျသွားခဲ့ပြီး၊ ရှောင်ယင်းက သူမ၏ ခေါင်းကို ရူးသွပ်စွာ ခါယမ်းလိုက်လေသည်။

သူမသည် နှုတ်ခမ်းများ မတွန့်ဘဲ မနေနိုင်အောင် ဖြစ်သွားခဲ့ပြီး၊ အရူးတစ်ယောက်ကို ကြည့်နေသည့် အကြည့်မျိုးဖြင့် ရှောင်လန်ကို လှမ်းကြည့်လိုက်လေသည်။

“ငါ ပြောမယ် ရှောင်လန်၊ နင် ကျင့်ကြံရင်းနဲ့ ဖောက်လွဲဖောက်ပြန်ဖြစ်ပြီး ဦးနှောက်များ ပျက်သွားပြီလား...”

“ငါတို့ ရှေ့က ဒီနှင်းဝံပုလွေတွေက၊ ဝံပုလွေဖေဖေ ပေးလိုက်တဲ့ သီးသန့် မိစ္ဆာသလင်းကျောက်တွေကို စားသုံးပြီး၊ သတ်မှတ်ထားတဲ့ သွေးမျိုးဆက် ဗီဇပြောင်းလဲမှုတွေ ဖြစ်ပေါ်လာလို့ ကာကွယ်ရေးမှာ အစွမ်းထက်တဲ့ အကြေးခွံတွေကို ရသွားတာ ရှင်းနေတာပဲလေ...”

“သူတို့က ကမ္ဘာကျော်တဲ့ အဲဒီ ‘အနက်ရောင် ချပ်ဝတ်တန်ဆာ ဝံပုလွေမြင်းတပ်’ နဲ့ ဘယ်နေရာများ တူနေလို့လဲ... အရောင်က စိမ်းပြာရောင် ဖြစ်နေတာကလွဲရင်၊ နည်းနည်းလေးတောင်မှ ဆက်စပ်မှု မရှိဘူး...”

သူမ၏ ဤကဲ့သို့ ကြိမ်းမောင်းခြင်း ခံလိုက်ရသဖြင့်၊ ရှောင်လန်သည်လည်း ရုတ်တရက် တုန်လှုပ်သွားခြင်းမှနေ၍ ချက်ချင်း သတိပြန်ဝင်လာခဲ့ပြီး ကိုယ့်ကိုယ်ကိုယ် လှောင်ပြောင်သည့် အပြုံးမျိုး မပြုံးဘဲ မနေနိုင်အောင် ဖြစ်သွားခဲ့သည်။

“အင်းလေ... ငါ ဘာဖြစ်သွားတာများလဲ...” သူမသည် သူမ၏ ကိုယ်ပိုင် နှလုံးသားကိုပင် ပြန်လည်ဆန်းစစ်မိလိုက်သည်။

“ဒီဘဝမှာ ပြန်လည်မွေးဖွားလာပြီးနောက်ပိုင်း၊ ဝံပုလွေဖေဖေ့ရဲ့ အရမ်းကောင်းမွန်လွန်းတဲ့ ကာကွယ်စောင့်ရှောက်မှုအောက်မှာ ဇိမ်ကျကျ နေနေရလို့၊ ငါ့ဆီမှာ လက်တွေ့မကျတဲ့ စိတ်ကူးယဉ် ခံစားချက်တွေများ ဖြစ်ပေါ်နေတာလား...”

သူမ၏ အတွေးများမှာ အနည်းငယ် ရယ်ချင်စရာကောင်းသည်ဟု ခံစားလိုက်ရသည်။

ရှင်းလင်းစွာပင်၊ ဝံပုလွေဖေဖေကဲ့သို့သော အစွမ်းထက်သည့် တည်ရှိမှုကြီးက သူမကို စောင့်ရှောက်ပေးနေပြီး နှင်းဝံပုလွေအုပ်စု တစ်ခုလုံးကလည်း သူမ၏ နောက်ခံအဖြစ် ရှိနေသည်ဖြစ်သည်။

ဘာကြောင့်များ သူမက အရာအားလုံးကို ပြောင်းပြန်လှန်ပစ်နိုင်သော အကျပ်အတည်းများ နေရာတိုင်းတွင် ပုန်းကွယ်နေသည့်အလား၊ သူမရှေ့ရှိ ဖြစ်ပျက်သွားသမျှ အရာတိုင်းကို အတိတ်ဘဝက အန္တရာယ်အများဆုံး သတင်းအချက်အလက်များနှင့် အလိုအလျောက် ဆက်စပ်မိနေရသနည်း။

ဧကရီနှစ်ပါးလုံး တိတ်တဆိတ်ဖြင့် မိမိကိုယ်ကိုယ် ဆန်းစစ်နေကြစဉ်မှာပင်၊ ဝံပုလွေခြောက်ကောင်လုံး အဆင့်တက်လှမ်းမှု ပြီးစီးသွားခဲ့သောကြောင့် ထျန်းပင်းမှာ သူ၏ စိတ်လှုပ်ရှားမှုများကို မထိန်းချုပ်နိုင်တော့ပေ။

ထျန်းပင်းသည် ကျယ်လောင်စွာ ဟိန်းဟောက်ကာ နောက်ခြေထောက်များကို အားပြုကာ မတ်တတ်ရပ်လိုက်ပြီး၊ သူ၏ ဧရာမလက်သည်းကြီးများကို အသုံးပြု၍ ရေပြာကြေးခွံ အစောင့်အရှောက် တစ်ကောင်ချင်းစီ၏ ခိုင်ခံ့သော ပခုံးများကို စိတ်အားထက်သန်စွာဖြင့် ပုတ်ပေးလိုက်လေသည်။

ထို့နောက် ထျန်းပင်းသည် ခေါင်းကို နောက်သို့ပစ်ကာ ဂုဏ်ယူမှုများနှင့် တိုက်ပွဲဝင်စိတ်ဓာတ်များ ပြည့်နှက်နေသည့် အစောပိုင်းကဟိန်းသံထက် ပိုမိုကြမ်းတမ်းလွန်းသော ရှည်လျားသည့် ဟိန်းဟောက်သံကြီးကို ထုတ်လွှတ်လိုက်လေတော့သည်။

“အာဝူး.......” (အခုကစပြီး ငါ့နောက်ကို လိုက်ခဲ့၊ ပြီးတော့ မြင်သမျှ အရာအားလုံးကို ကြိတ်ချေပစ်ကြ။)

ရေပြာကြေးခွံ အစောင့်အရှောက် ခြောက်ကောင်ကလည်း တိုးညင်းပြီး အားကောင်းလှသော ဝံပုလွေဟိန်းသံများဖြင့် ချက်ချင်း တုံ့ပြန်လိုက်ကြသည်။

သူတို့သည် ထျန်းပင်းကို ဗဟိုပြု၍ ရိုးရှင်းသော တြိဂံပုံစံ တိုက်ခိုက်ရေး ဖွဲ့စည်းပုံတစ်ခုကို လျင်မြန်စွာ ဖွဲ့စည်းလိုက်ကြသည်။

သူတို့၏ ပထမဆုံးအကြိမ် ပူးပေါင်းဆောင်ရွက်မှု ဖြစ်သော်လည်း၊ သူတို့၏ တူညီသောစွမ်းအင်များဖြင့် ဗီဇပြောင်းလဲပြီး သန်မာလာသော ခန္ဓာကိုယ်များနှင့်၊ နှင်းဝံပုလွေမျိုးနွယ်စု၏ မွေးရာပါ အမဲလိုက်ဗီဇတို့က၊ သူတို့နှင့် တစ်သားတည်းဖြစ်နေပြီး ဖျက်ဆီး၍မရနိုင်သော အစွမ်းထက်သည့် အရှိန်အဝါများကို ထုတ်လွှတ်နေလေသည်။

အသစ်တစ်ဖန် ပြန်လည်မွေးဖွားလာသော ဤအစွမ်းထက်လှသည့် ခံစားချက်ကြီးမှာ တောအုပ်ကွင်းပြင်လေးတွင် ရှင်းလင်းစွာ ပဲ့တင်ထပ်သွားခဲ့ပြီး၊ ရှောင်လန်နှင့် ရှောင်ယင်းတို့၏ နှလုံးသားထဲရှိ မလိုအပ်သော သံသယအနည်းငယ်ကိုလည်း ဖယ်ရှားပေးလိုက်လေသည်။

မည်သို့ပင်ဆိုစေကာမူ ဝံပုလွေအုပ်စု၏ ခွန်အားမှာ နောက်တစ်ကြိမ် တိုးတက်လာခဲ့ပြီဖြစ်ရာ၊ ၎င်းမှာ သေချာပေါက် ကြီးမားသော သတင်းကောင်းကြီး တစ်ခုပင် ဖြစ်လေသည်။

လင်းထျန်းလုံသည် ဤမြင်ကွင်းကို ကျေနပ်အားရစွာဖြင့် ကြည့်နေခဲ့လေသည်။ ရေပြာကြေးခွံ အစောင့်အရှောက်များကို အောင်မြင်စွာ ဖန်တီးနိုင်ခဲ့ခြင်းက ဝံပုလွေအုပ်စု၏ တိုက်ခိုက်ရေး ဗျူဟာကို ပိုမိုပြီးပြည့်စုံလာစေမည်ဟု ဆိုလိုခြင်းပင် ဖြစ်လေသည်။

သူ၏ ဧရာမ ဝံပုလွေခေါင်းကြီးကို အနည်းငယ် စောင်းလိုက်ရာ၊ သူ၏ အကြည့်များမှာ နောက်တစ်ကြိမ် ပြန်လည်စုစည်းမိသွားကြသည်။

မည်သည့်အချိန်ကတည်းကပင် ဖြစ်သည်မသိ သူတို့၏ လက်သေးသေးလေးများဖြင့် ဟန်အမူအရာများ ပြုလုပ်ကာ တစ်စုံတစ်ရာကို ဆွေးနွေးနေပုံရသည့် ကလေးငယ်နှစ်ဦးအပေါ်သို့ နောက်တစ်ကြိမ် ကျရောက်သွားလေတော့သည်။