အခန်း (၃၆၃-၃၆၄)
Vol. 37 Ch. 363-364
အခန်း(363)
စုန့်ဝေ့ အခန်းတံခါးဝသို့ ဝင်တော့မည့် အခိုက်အတန့်မှာပင် စုန့်စစ်ယွီက သူ့အား လျင်မြန်စွာ တားဆီးလိုက်လေသည်။
ထို့နောက် စုန့်ဝေ့အနေဖြင့် မည်သည့်အရာများဖြစ်နေကြောင်းကို မသိမီမှာပင် သူမက သူ့ကို အခန်းတံခါးဝသို့ ဆွဲခေါ်သွားပြီးနောက် ဝမ်လိန်အား အလျင်အမြန် လှမ်းပြောလိုက်လေ၏။
“ခဏစောင့်ဦး၊ ကျွန်မနဲ့ အဖေ ဆွေးနွေးစရာရှိလို့!”
ထိုသို့ပြောပြီးနောက် သူမက စုန့်ဝေ့အား အခန်းထဲသို့ ဆွဲခေါ်သွားခဲ့ပြီး သားအဖနှစ်ဦး တိုးတိုးတိတ်တိတ် စကားပြောဆိုကြလေသည်။
အခန်းထဲသို့ ရောက်သည့်အချိန်တွင် စုန့်ဝေ့က မျက်မှောင်ကြုတ်လိုက်ပြီး စုန့်စစ်ယွီအား ရှုပ်ထွေးဖြင့် ကြည့်လိုက်သည်။
“ဘာလို့ ဒီလောက်တောင် ပြာယာခတ်နေရတာလဲ.. ဝမ်လိန်ကို အရင်ဆုံး နှင်ထုတ်လိုက်တာက ပိုမကောင်းဘူးလား”
ဝမ်လိန်ကိုသာ နှင်ထုတ်လိုက်ပါက သူမ၏လက်ထဲတွင်လည်း ငွေကြေးတစ်ပြားတစ်ချပ်မှ ကျန်ရှိတော့မည် မဟုတ်ပါချေ။ စုန့်စစ်ယွီမှာ ဤအချက်ကို စိတ်ထဲ၌ တွေးတောနေမိပြီး ဦးနှောက်ကို အစွမ်းကုန် အလုပ်ပေးလိုက်သည်။
နောက်ဆုံးတွင်တော့ ကောင်းမွန်သော အကြံတစ်ခုကို အမှန်တကယ်ပင် ရရှိသွားခဲ့လေသည်။
သူမက ပြောဆိုလိုက်သည်။
“အဖေ... ဒီပိုက်ဆံကို ဝမ်လိန်ကို လုံးဝ မပေးပါနဲ့!”
စုန့်ဝေ့သည်လည်း သေချာပေါက် မပေးချင်ပါချေ။ သို့သော် ယခုအချိန်တွင် သူ့အတွက် ဖိအားများ ရှိနေသည် မဟုတ်ပါလား။
သူက သူ၏အလုပ်ကို အဆုံးရှုံးမခံနိုင်သောကြောင့် ထိုပိုက်ဆံကို ပေးရန် ဆုံးဖြတ်ခဲ့ခြင်းဖြစ်ပေ၏။
စုန့်ဝေ့က သူ၏အခက်အခဲများကို ရှင်းပြတော့မည့်အချိန်တွင် စုန့်စစ်ယွီက ဆက်လက်ပြောဆိုလိုက်သည်။
“အဖေ...ကျွန်မအရင်က ပြောခဲ့တာတွေကို မေ့သွားပြီလား.. ကျွန်မက အတိတ်ဘဝကနေ ပြန်လည်မွေးဖွားလာသူဖြစ်လို့ နောက်ထပ်ဖြစ်လာမယ့် အခြေအနေတွေကို အကုန်သိနေတယ်”
လွန်ခဲ့သော အချိန်က စုန့်ဝေ့နှင့် ဤကိစ္စကို ပြောဆိုခဲ့စဉ်တွင် အဓိက အကြောင်းအရာများမှာ သူမ၏ ကိုယ်ရေးကိုယ်တာ ကိစ္စများအပေါ်၌သာ ဗဟိုပြုနေခဲ့ခြင်း ဖြစ်ပေသည်။
ဥပမာအားဖြင့် သူမက လူမှုအဖွဲ့အစည်း၏ အနာဂတ် ဖွံ့ဖြိုးတိုးတက်မှုနှင့် အပြောင်းအလဲများကို စုန့်ဝေ့အား ပြောပြခဲ့ခြင်း မရှိပါချေ။
ယခုအချိန်က ထိုအကြောင်းများကို အကြောင်းပြချက်အဖြစ် အသုံးပြုကာ သူ၏ပိုက်ဆံပေးလိုသော စိတ်ကူးကို ဖျက်သိမ်းခိုင်းရန်အတွက် အကောင်းဆုံးအချိန်ဖြစ်ပေမည်။
စုန့်ဝေ့၏ တုံ့ပြန်မှုမှာ အလွန်ပင် လျင်မြန်လွန်းပေသည်။ သူက တစ်စုံတစ်ခုကို ချက်ချင်းပင် ရိပ်မိလိုက်ပြီး စုန့်စစ်ယွီအား လေးနက်သော မျက်နှာအမူအရာဖြင့် လှမ်းကြည့်လိုက်လေသည်။
“မင်း ဘာကို ဆိုလိုတာလဲ.. မကြာခင်မှာ ကြီးမားတဲ့ အပြောင်းအလဲတွေ ဖြစ်လာတော့မှာလား?”
စုန့်ဝေ့တွင် အမှန်တကယ် ထက်မြက်သော ဦးနှောက်ရှိပါသော်လည်း သူ မည်မျှပင် ထက်မြက်သည်ဖြစ်စေ သူ၏ သမီးအရင်းက သူ့အပေါ် ပြန်လည်၍ အကွက်ဆင်လိမ့်မည်ဟုတော့ တစ်ခါမျှ မတွေးတောခဲ့ဖူးပါချေ။
စုန့်စစ်ယွီလည်း ရိုးသားသည့်အမူအရာဖြင့် ခေါင်းညိတ်ပြလိုက်ပြီး ဝန်ခံလိုက်လေသည်။
“ဟုတ်တယ် အဖေ၊ ကျွန်မ အမှန်အတိုင်း ပြောပြပါ့မယ်.. နောက်ထပ် နှစ်နှစ်မပြည့်ခင်မှာပဲ တက္ကသိုလ်ဝင်ခွင့်စာမေးပွဲတွေ ပြန်လည်စတင်လာတော့မှာ.. အဲဒီနောက်မှာ ပုဂ္ဂလိက စီးပွားရေးလုပ်ငန်းတွေလည်း ပြန်လည်ပြီး စတင်လာကြလိမ့်မယ်
အခုရှိနေတဲ့ နိုင်ငံပိုင်စက်ရုံတွေကတော့ ပုဂ္ဂလိက စီးပွားရေးရဲ့ ဖိအားပေးမှုကို ခံရပြီး ဝန်ထမ်းလျှော့ချမှု လှိုင်းလုံးကြီးတွေနဲ့ ကြုံတွေ့ရလိမ့်မယ်!”
“ပြီးတော့ အခု အဖေလုပ်နေတဲ့ စက်ယန္တရားစက်ရုံကလည်း နောက်ဆုံးမှာ ဒေဝါလီခံရပြီး ပျက်စီးသွားလိမ့်မယ်”
စုန့်စစ်ယွီ၏ စကားများမှာ တစ်ဝက်က အမှန်ဖြစ်ပြီး တစ်ဝက်က အလိမ်အညာများပင် ဖြစ်ပေသည်။
နောက်ထပ် နှစ်နှစ်ထဲတွင် သူမပြောသကဲ့သို့ တက္ကသိုလ်ဝင်ခွင့်စာမေးပွဲများနှင့် စီးပွားရေး ပြုပြင်ပြောင်းလဲမှုများမှာ အမှန်တကယ်ပင် ဖြစ်ပေါ်လာလိမ့်မည်။
သို့သော်လည်း ဝန်ထမ်းလျှော့ချမှု လှိုင်းလုံးကြီးမှာ အနည်းဆုံး ၁၉၉၀ ပြည့်နှစ်များ အစောပိုင်း သို့မဟုတ် နောက်ထပ် ဆယ်နှစ်ကျော်ကြာမှသာ ဖြစ်ပေါ်လာမည့် အခြေအနေ ဖြစ်ပေသည်။
ထပ်ပြောရလျှင် ထိုအချိန်တွင် နိုင်ငံပိုင်လုပ်ငန်း အမြောက်အမြားက အမှန်တကယ်ပင် ခေတ်စနစ်ကို မမီတော့ဘဲ ပျက်စီးခဲ့ကြရသည်။
သို့သော် စုန့်ဝေ့ အလုပ်လုပ်နေသော စက်ယန္တရားစက်ရုံကတော့ ဆယ်စုနှစ်ပေါင်းများစွာအထိ ဆက်လက်လည်ပတ်နေခဲ့ပြီး နောက်ပိုင်းခေတ်ကာလအချိန်များအထိလည်း ပိတ်သိမ်းခြင်း သို့မဟုတ် ဝန်ထမ်းအမြောက်အမြား လျှော့ချခြင်းမျိုး မရှိခဲ့ပါချေ။
စုန့်စစ်ယွီ ယခုကဲ့သို့ ပြောဆိုလိုက်ခြင်းမှာ ရည်ရွယ်ချက် တစ်ခုတည်းသာ ရှိပေသည်။
ဤသည်မှာ စုန့်ဝေ့အနေဖြင့် ဤအလုပ်ကို မည်မျှပင် ကြိုးစားလုပ်ကိုင်နေပါစေ နောက်ထပ် နှစ်နှစ်သာ လုပ်နိုင်တော့မည်ဟူသောအချက်ကို သိရှိသွားစေရန်ပင်။
နှစ်နှစ်ကြာလျှင် စက်ရုံက ပျက်စီးသွားမည်ဖြစ်၍ သူ၏အလုပ်မှာလည်း အလိုအလျောက် ပြုတ်သွားပေလိမ့်မည်။
ထိုအချိန်တွင် အလုပ်ပြုတ်သွားမည်ဖြစ်၍ နောက်ထပ် နှစ်နှစ်သာ လုပ်နိုင်တော့မည့် အလုပ်တစ်ခုအတွက် ဝမ်လိန်အား အဘယ်ကြောင့် ယွမ်ငါးရာမျှ အကုန်အကျခံကာ ဖြုန်းတီးနေရပါမည်နည်း။
ဤယွမ်ငါးရာဆိုသည်မှာ စုန့်ဝေ့၏ တစ်နှစ်ကျော်စာ လစာငွေပင် ဖြစ်ပေသည်။ စားဝတ်နေရေးနှင့် တခြားသော အထွေထွေ အသုံးစရိတ်များကို ဖယ်ထုတ်လိုက်ပါက သူက နှစ်နှစ်အတွင်း ယွမ်ငါးရာ ပြည့်အောင်ပင် စုဆောင်းနိုင်လိမ့်မည် မဟုတ်ပါချေ။
ဤသို့ ကြည့်မည်ဆိုပါက ဝမ်လိန်အား ယွမ်ငါးရာ အမှန်တကယ် ပေးလိုက်ရမည်မှာ အရှုံးကြီး ရှုံးပေလိမ့်မည်။
သို့သော်လည်း...
“စစ်ယွီ... မင်းပြောတာတွေက တကယ်ပဲလား.. မင်း အဲဒါတွေကို သေသေချာချာမှတ်မိရဲ့လား”
စုန့်ဝေ့သည်ကား ယခင်က အငယ်တန်းခေါင်းဆောင်တစ်ဦး ဖြစ်ခဲ့ဖူးသကဲ့သို့ အင်ဂျင်နီယာတစ်ဦးလည်း ဖြစ်ခဲ့သည်။
ထို့ကြောင့် စက်ရုံတစ်ခုလုံး၏ ဖွံ့ဖြိုးတိုးတက်မှုနှင့် စကေးချဲ့ထွင်မှု အစီအစဉ်များအပေါ် အတိုင်းအတာတစ်ခုအထိ နားလည်သဘောပေါက်သူ ဖြစ်ပေသည်။
သူတို့၏စက်ရုံမှာ ယခုအချိန်တွင် အလွန်ကောင်းမွန်စွာမူလည်ပတ်နေပြီး တစ်နိုင်ငံလုံးရှိ အလုပ်ဌာနများနှင့် ပူးပေါင်းဆောင်ရွက်နေခြင်း ဖြစ်ပေသည်။
ဒီလောက်ထိအလွယ်တကူ ရှုံးနိမ့်သွားဖို့ဆိုတာက တကယ်ပဲ ဖြစ်နိုင်ပါ့မလား။
ထို့ကြောင့် သူက ဤကိစ္စက ဖြစ်နိုင်မဖြစ်နိုင်ကို အနည်းငယ် သံသယဝင်မိလေသည်။ အထူးသဖြင့် သူ၏ စုန့်စစ်ယွီအပေါ် ယုံကြည်စိတ်ချရမှုမှာလည်း ယခင်ကကဲ့သို့ မမြင့်မားတော့ပါချေ။
စုန့်ဝေ့က သူမကို သံသယဝင်နေသည်ကို မြင်ချိန်တွင် စုန့်စစ်ယွီတစ်ယောက် ပြာယာခတ်နေသော အမူအရာကိုသာ လုပ်ပြနိုင်နေခဲ့လေ၏။။
“အဖေ! ကျွန်မ တကယ်ပြောနေတာ .. ကျွန်မက အဖေ့ရဲ့ သမီးအရင်းပဲလေ၊ ဒီကိစ္စနဲ့ ပတ်သက်ပြီး အဖေ့ကို လိမ်ပြောစရာ အကြောင်းမရှိပါဘူး
ပြီးတော့ စဉ်းစားကြည့်ပါဦး၊ ဒီလို အရေးကြီးတဲ့အချိန်မှာ အဖေ့ကို လိမ်ပြောလို့ ကျွန်မအတွက် ဘာအကျိုးရှိမှာလဲ”
“ဘာပဲဖြစ်ဖြစ် အဖေက သမီးအတွက်ကြောင့်နဲ့ ဒီပိုက်ဆံကို ပေးဖို့ပြင်ဆင်နေတာကို ကျွန်မသိပါတယ်.. ကျွန်မက ဒါကို စိတ်မကောင်းဖြစ်နေရတာ ၊ အဖေ့ကို ဘယ်လိုလုပ် လိမ်ရဲပါ့မလဲ...”
ထိုသို့ပြောပြီးနောက် စုန့်စစ်ယွီက ဝမ်းနည်းသွားရသကဲ့သို့ ဟန်ဆောင်ကာ ခေါင်းကို ငုံ့ထားလိုက်လေသည်။ စုန့်ဝေ့လည်း ထိုသည်ကို မြင်လျှင် သံသယရှိနေဆဲ ဖြစ်သော်လည်း စိတ်နှလုံးက အနည်းငယ် ပျော့ပြောင်းသွားခဲ့ရချေပြီ။
မှန်ပေသည်။ လက်ရှိ ပုံမှန်အခြေအနေအရဆိုလျှင် သမီးဖြစ်သူ စုန့်စစ်ယွီက ဝမ်လိန်၏ကိစ္စကို ငွေပေး၍ ဖြေရှင်းနိုင်ရန် အလိုလားဆုံး ဖြစ်သင့်ပေ၏။ သူမဘက်မှ တကူးတက တားဆီးနေရန်မှာ အမှန်တကယ်ပင် မလိုအပ်ပါချေ။
သူမ ပြောသကဲ့သို့ အခြေအနေများကသု အမှန်တကယ် မဖြစ်လာနိုင်ပါက ဤသို့လုပ်ဆောင်နေရန် လုံးဝမလိုအပ်သည် မဟုတ်ပါလား။
သို့သော် အကယ်၍ ဝမ်လိန်ကို ပိုက်ဆံသာ မပေးခဲ့ပါက သူက စက်ရုံအထိလာ၍ ပြဿနာရှာမည်ကို သူ စိုးရိမ်နေမိသည်။
သူ၏ အလုပ်ကတော့...
စုန့်ဝေ့၏ မျက်ခုံးများက တွန့်ချိုးလိုက်၊ ပြေလျော့လိုက်နှင့် တုံ့ဆိုင်းနေသည်ကို မြင်ရသည့်အချိန်တွင် စုန့်စစ်ယွီက တစ်ဖက်လူ မည်သည့်အရာကို တွေးတောနေကြောင်း သေချာပေါက် ခန့်မှန်းမိလိုက်ပြီး ပြတ်သားစွာပင် ပြောဆိုလိုက်လေသည်။
“အဖေ... အဖေ နှစ်နှစ်ပတ်လုံး အလုပ်သွားလုပ်ရင်တောင် ယွမ်ငါးရာ ပြည့်အောင် မစုနိုင်ဘူးနော်၊ အခု ယွမ်ငါးရာကို ဒီအတိုင်း ဖြုန်းတီးပစ်ရတော့မှာ
အခု အလုပ်မသွားတော့ဘူးဆိုရင် အဖေလည်း အနားယူလို့ရသလို၊ ဒီယွမ်ငါးရာကိုလည်း ချွေတာပြီးသား ဖြစ်သွားလိမ့်မယ်.. ဘယ်ဟာက ပိုပြီး သင့်တော်မယ်လို့ အဖေ ထင်လဲ”
စက်ရုံမှ ထုတ်ပယ်ခံရသော ဝန်ထမ်းများအနေဖြင့် ဤနေရာတွင် ဆက်လက် မနေထိုင်နိုင်တော့လျှင်လည်း ပို၍ပင် လွယ်ကူသေးသည်။
အိမ်တစ်လုံးကို တိုက်ရိုက် ဝယ်လိုက်ရုံပင်!
ထို့နောက် စုန့်စစ်ယွီက နောက်ပိုင်းအချိန်တွင် အိမ်ခြံမြေတန်ဖိုးများက အဆပေါင်း ထောင်ချီ၍ မြင့်တက်လာမည့်အကြောင်းကို စုန့်ဝေ့အား အနည်းငယ် ပြောပြလိုက်သောကြောင့် စုန့်ဝေ့တစ်ယောက် ကြောင်အမ်းသွားရပြန်သည်။
ကောင်းပြီလေ...
စုန့်စစ်ယွီ ပြောသည်ကို နားထောင်ပြီးနောက် စုန့်ဝေ့သည်လည်း သေသေချာချာ ပြန်လည်စဉ်းစားကြည့်ခဲ့ပြီး အမှန်တရားဖြစ်ကြောင်း ယုံကြည်လာခဲ့သည်။
မည်သို့ပင်ဖြစ်စေ ယခုအချိန်တွင် သူသည်လည်း အလုပ်ခွင်တွင် အလွန်ပင် စိတ်ပျက်အားလျော့နေရပြီဖြစ်၍ ဤအတိုင်း အဆုံးသတ်လိုက်ခြင်းက ပို၍ကောင်းပေလိမ့်မည်။
အနည်းဆုံးတော့ သူက မာန်မာနရှိရှိနှင့် ထွက်ခွာသွားနိုင်မည်ဖြစ်ကာ နောက်ပိုင်းတွင် အလုပ်ထုတ်ခံရသည့် အဖြစ်မျိုးထက် သာလွန်ပေလိမ့်မည်။
ထို့ကြောင့် စုန့်ဝေ့က စုန့်စစ်ယွီကို ယုံကြည်ရန် ရွေးချယ်လိုက်ပြီး ပြောဆိုလိုက်လေသည်။
“ကောင်းပြီ... ဒီကိစ္စကို တော့ မင်းသဘောအတိုင်းပဲပေါ့”
“ဒါပေမဲ့ စစ်ယွီ.. နောက်နှစ်နှစ်မှာ တက္ကသိုလ်ဝင်ခွင့်စာမေးပွဲတွေ ပြန်စတော့မယ်လို့ မင်းပြောခဲ့တာဆိုတော့.. မင်းအနေနဲ့ စာမေးပွဲကို တိုက်ရိုက်ဖြေဆိုတာက ပိုကောင်းမယ်လို့ ငါထင်တယ်
မင်း စိတ်နှစ်ပြီး သေသေချာချာ ပြန်လည်လေ့လာမယ်ဆိုရင် နောက်ဆုံးမှာ ကောင်းမွန်တဲ့ တက္ကသိုလ်တစ်ခုကို သေချာပေါက် တက်နိုင်မှာပဲ”
“မင်းရဲ့ အတိတ်ဘဝက အခွင့်အလမ်းတွေနဲ့ ကြုံတွေ့မှုတွေကိုတော့ လောလောဆယ် မစဉ်းစားပါနဲ့ဦး
ငါတို့ တစ်လှမ်းချင်းစီပဲ သွားကြရအောင် ဒါဆိုရင်လည်း နောက်ဆုံးမှာ တူညီတဲ့ပန်းတိုင်ကို ရောက်နိုင်မှာပါ!”
စုန့်ဝေ့က ဤအခွင့်အရေးကို အသုံးချကာ စုန့်စစ်ယွီအား လက်ရှိအခြေအနေကို လက်ခံရန် အလေးအနက် ဆက်လက်နားချနေပေသည်။
သူမက ဘဝလမ်းကြောင်းပေါ်သို့ ပြန်လည်တက်လှမ်းလိုသော်လည်း၊ ယခုအချိန်တွင် ဖြတ်လမ်းသို့လိုက်ရန်မှာ လုံးဝမဖြစ်နိုင်တော့ပေ။
စုန့်ဝေ့အနေဖြင့် သမီးဖြစ်သူအား စာမေးပွဲကိုသာ ရိုးရိုးသားသား ဖြေဆိုစေလိုသည်။
အနည်းဆုံးတော့ တက္ကသိုလ်ကျောင်းသူတစ်ဦး ဖြစ်လာပြီးနောက်တွင် အခွင့်အရေးတို့က ကျဉ်းမြောင်းနေတော့မည် မဟုတ်ပါချေ။
*
အခန်း(364)
သူတို့အနေဖြင့် ရိုးသားသည့်နည်းလမ်းကိုအသုံးပြုမည်ဆိုပါက အတိတ်ဘဝကလောက် မကောင်းနိုင်လျှင်ပင် သာမန်လူများထက်စာလျှင်တော့ သေချာပေါက် ပိုကောင်းနေပေလိမ့်မည်။
မည်သို့ပင်ဖြစ်စေ အိမ်ခြံမြေကိစ္စက စုန့်စစ်ယွီပြောသကဲ့သို့သာ ဖြစ်လာမည်ဆိုပါက သူ၏လက်ထဲတွင်လည်း ငွေအနည်းငယ် ရှိနေသေးသည့်အတွက်ကြောင့် တခြားလူများ မသိသေးခင်မှာ အိမ်များကို ထပ်မံဝယ်ယူထားနိုင်သည်။
ထို့အတွက် နောက်ပိုင်းတွင်ဆိုလျှင် မည်သည့်အရာကိုမျှ လုပ်စရာမလိုဘဲ ဖျက်သိမ်းလျော်ကြေးငွေ အမြောက်အမြား ရရှိနိုင်မည် မဟုတ်ပါလား။
သို့ဖြစ်၍ သူတို့မိသားစု၏ ဘဝက နောက်ပိုင်းတွင် သေချာပေါက် ဆိုးရွားမည်မဟုတ်ပါချေ။
ယခု လိုအပ်သည်မှာ သမီးဖြစ်သူ စုန့်စစ်ယွီအနေဖြင့် ပိုမိုလက်တွေ့ကျလာရန်နှင့် လေထဲတိုက်အိမ်ဆောက်ခြင်းများကို ရပ်တန့်ရန်သာ ဖြစ်ပေသည်။
သူ၏နှစ်သိမ့်စကားများကို နားထောင်ပြီးနောက် စုန့်စစ်ယွီကတော့ ထိုသို့မတွေးပါချေ။
သူမက တက္ကသိုလ်ဝင်ခွင့်ဖြေလျှင် တက္ကသိုလ်ကျောင်းသူတစ်ဦးသာ ဖြစ်လာလိမ့်မည်။ အရာရှိတစ်ဦး၏လက်အောက်တွင် အလုပ်လုပ်နေရခြင်း မဟုတ်ပေ။
သူမရဲ့ အချိန်တွေကို စာပြန်လေ့လာနေတာနဲ့ ဖြုန်းတီးမနေနိုင်ဘူး။ ဒါက လုံးဝကို အချိန်ဖြုန်းရုံသက်သက်ပဲ!
သို့သော် စုန့်ဝေ့၏ ရှေ့တွင်တော့ သူမက သူ၏စကားကို ငြင်းပယ်ရန် ရည်ရွယ်ချက်မရှိသောကြောင့် ရိုးသားဖြူစင်သကဲ့သို့ ဟန်ဆောင်ကာ ပြောဆိုလိုက်လေသည်။
“ကောင်းပါပြီအဖေ...ကျွန်မ အဖေ့စကားကို နားထောင်ပါ့မယ်.. မနက်ဖြန်ကစပြီး စာတွေကို သေချာပေါက် ပြန်လေ့လာပါ့မယ်!”
စုန့်ဝေ့ာ သူမ လက်ခံလိုက်သည်ကိုမြင်လိုက်ရသည့်အချိန်မှသာ ပျော်ရွှင်စွာ ပြုံးနိုင်ခဲ့လေ၏။
နောက်ဆုံးတွင် သူက သက်ပြင်းတစ်ချက်ချကာ ပြောဆိုလိုက်သည်။
“စစ်ယွီ.. အဖေက မင်းကို ဘယ်တော့မှ ဒုက္ခပေးမှာမဟုတ်ဘူးဆိုတာကို မင်းသိထားရမယ်”
စုန့်စစ်ယွီက ပြုံးပြလိုက်သော်လည်း မည်သည့်စကားကိုမျှပြန်မပြောခဲ့ပါချေ။
သူမကို ဒုက္ခမပေးဘူး ဟုတ်လား?
ဒါဆို ခုနတုန်းက သူမကို လီရှို့လီ ရိုက်နှက်နေတုန်းက သူ ဘာလုပ်နေခဲ့တာလဲ။
သူမ အရိုက်ခံရတာက သူမအတွက် ကောင်းကျိုးရှိလို့ပါဆိုပြီး ပြောချင်နေတာတော့ မဟုတ်ဘူးမလား။
စုန့်ဝေ့၏ ဤစကားများက စုန့်စစ်ယွီအား သူ၏အပေါ် ထပ်မံ၍ စိတ်ပျက်ရွံရှာသွားစေခဲ့သည်။
အဆုံးသတ်တွင် သူတို့နှစ်ဦးက မည်သည်ကိုမျှ ထပ်မပြောတော့ဘဲ ဝမ်လိန်ကို တွေ့ရန်အတွက် အပြင်သို့ လျင်မြန်စွာ ထွက်လာခဲ့ကြလေ၏။
ဝမ်လိန်အနေဖြင့် စုန့်ဝေ့က သူ့အတွက် ပိုက်ဆံသွားယူပေးမည်ကို စိတ်ကျေနပ်စွာဖြင့် စောင့်ဆိုင်းနေဆဲပင်။
သို့သော်လည်း ထိုသားအဖနှစ်ဦး ပြန်ထွက်လာသည့်အချိန်တွင် သူ့ကို စောင့်ကြိုနေသည့် သတင်းမှာ စုန့်ဝေ့က သူ့အား ငွေပေးရန် ငြင်းဆိုလိုက်ခြင်းဖြစ်လိမ့်မည်ဟု မည်သူက ထင်မှတ်ထားပါမည်နည်း။
“ဘာ! မင်း ခုနတုန်းက ငါ့ကို ယွမ်ငါးရာ ပေးမယ်လို့ သဘောတူပြီးပြီ မဟုတ်ဘူးလား ..အခုမှ ဘာလို့ မပေးနိုင်တော့တာလဲ၊ စုန့်ဝေ့... လူဆိုတာ ကတိမတည်လို့ မရဘူးလေ၊
မင်း ဒီလိုလုပ်မယ်ဆိုရင် ငါ တကယ်ပဲ ဒေါသထွက်မိတော့မယ်.. ငါ မင်းရဲ့ စက်ရုံအထိသွားပြီး ပြဿနာရှာတော့မှာ!”
သို့သော် ဝမ်လိန်က သူ၏ အပိုင်ကွက်ဟု ယူဆထားသောအရာဖြင့် ထပ်မံခြိမ်းခြောက်လိုက်ပါသော်လည်း သူ၏အရှေ့မှ စုန့်ဝေ့က တုန်လှုပ်ခြင်းမရှိတော့ပါချေ။
မတိုင်မီကကဲ့သို့ ချက်ချင်း အလျှော့ပေးခြင်းမျိုးလည်း လုံးဝမရှိတော့ဘဲ ပြောဆိုလိုက်သည်။
“မင်း ပြဿနာရှာချင်တယ်ဆိုရင်လည်း သွားရှာလိုက်တော့”
ဝမ်လိန်က စုန့်ဝေ့အား အရူးတစ်ယောက်ကို ကြည့်သကဲ့သို့ မျက်လုံးအပြူးသားဖြင့် စိုက်ကြည့်နေခဲ့သည်။
စုန့်ဝေ့ကတော့ ရူးသွားပြီ။
တကယ်ကြီး ရူးသွားပြီပဲ!
မဟုတ်ရင် သူက ဒီလိုစကားမျိုး ဘယ်လိုပြောထွက်ပါ့မလဲ။ သူက သူ့ရဲ့ အလုပ်ကိုတောင် တကယ်ကြီး ဂရုမစိုက်တော့ဘူးလား။
“မင်းမှာ တခြားပြောစရာ ရှိသေးလား.. ဘာမှမရှိတော့ရင်လည်း ပြန်တော့ ၊ မနက်ဖြန်မနက် စက်ရုံအထိလာပြီး ပြဿနာရှာမယ်ဆိုရင်လည်း ငါ အချိန်မရွေး စောင့်ကြိုနေမယ်”
ထိုသို့ပြောပြီးနောက် စုန့်ဝေ့က တံခါးကိုဖွင့်လိုက်ပြီး ဝမ်လိန်အား ထွက်သွားနိုင်ကြောင်း အချက်ပြလိုက်လေသည်။
သူက အမှန်တကယ်ပြောနေခြင်းဖြစ်ကြောင်းကို မြင်ရသည့်အချိန် ဝမ်လိန်မှာ စုန့်ဝေ့အား အံကြိတ်၍ စိုက်ကြည့်နေရုံသာ တတ်နိုင်ခဲ့ပြီး ရက်စက်ကြမ်းတမ်းစွာဖြင့် ပြောဆိုလိုက်လေသည်။
“စုန့်ဝေ့... မင်း တကယ်ပဲ ဒီလိုလုပ်နိုင်တယ်ပေါ့၊ စောင့်နေလိုက်ဦး .. ငါ မင်းကို သေချာပေါက် ပညာပေးပြမယ်!”
သူ့ရဲ့အလုပ်က ပြုတ်သွားပြီ!
ဒါကြောင့် စုန့်ဝေ့ရဲ့အလုပ်လည်း သေချာပေါက် ပြုတ်သွားရမယ်။
မဟုတ်ရင် သူ ဒီဒေါသကို ဘယ်လိုမှ ဖြေဖျောက်နိုင်မှာ မဟုတ်ဘူး!
နောက်ဆုံးတွင် ဝမ်လိန်က ဒေါသတကြီးဖြင့် ထွက်ခွာသွားခဲ့လေ၏။
သို့သော်လည်း သူ၏ထွက်ခွာခြင်းမှာ ခေတ္တမျှသာဖြစ်ပြီး မနက်ဖြန် စက်ရုံဂိတ်ဝတွင် သေချာပေါက် ပြန်လည်တွေ့ဆုံကြလိမ့်မည်ကို လူတိုင်း သိရှိနေခဲ့ကြပေသည်။
စုန့်ဝေ့သည်ကား ဤအလုပ်ကို ဆက်မလုပ်တော့ရန် ဆုံးဖြတ်ထားခဲ့သော်လည်း မနက်ဖြန်တွင် သူ ရင်ဆိုင်ရမည့် အခြေအနေများကို တွေးမိသည့်အခိုက်တွင် စိတ်မသက်မသာ ဖြစ်နေရဆဲပင် ။
လီရှို့လီသည်လည်း ကိစ္စရပ်များမှာ နောက်ဆုံးတွင် ဤသို့ ဖြစ်သွားလိမ့်မည်ဟု မထင်မှတ်ထားခဲ့ပါချေ။
သူမက စုန့်ဝေ့အား စိုးရိမ်ပူပန်သော မျက်နှာအမူအရာဖြင့် ကြည့်လိုက်လေသည်။
“လောင်စုန့်.. မနက်ဖြန်ကျရင် သူ တကယ်ကြီး စက်ရုံအထိလာပြီး ပြဿနာရှာတာကို စောင့်နေတော့မှာလား၊ ရှင့် အလုပ်ကို ထိခိုက်သွားရင် ဘယ်လိုလုပ်မလဲ”
အရေးအကြီးဆုံး အချက်မှာ အကယ်၍ စုန့်ဝေ့၏ အလုပ်သာ ပြုတ်သွားခဲ့ပါက သူမ မည်သို့လုပ်ရပါမည်နည်း။
သူမက ဤအသက်အရွယ်သို့ ရောက်မှ ဘဝအတွက် ပြေးလွှား ရုန်းကန်နေရမည်ကို မလိုလားပါချေ။
ဤသို့ဆိုလျှင် မည်မျှသနားစရာကောင်းလိုက်မည်နည်း!
သူမ၏ မျက်နှာပေါ်မှ စိုးရိမ်မှုများကို မြင်သည့်အချိန် စုန့်ဝေ့အနေဖြင့် သူမကို အမှန်အတိုင်း ပြောပြချင်ခဲ်သော်လည်း ပြန်လည်စဉ်းစားကြည့်ပြီးနောက်တွင် ဤသို့သာပြောခဲ့လေ၏။
“ဒီကိစ္စအတွက် ငါ့မှာ ကိုယ်ပိုင်အစီအစဉ်ရှိတယ် မင်း အေးအေးဆေးဆေးပဲ နေလိုက်”
ဤကာလထဲတွက် ဒုက္ခများကို အတူတကွ ကျော်ဖြတ်ခဲ့ကြသောကြောင့် လီရှို့လီအပေါ် သူ၏သဘောထားတို့က တိုးတက်လာခဲ့သော်လည်း၊ တစ်ဦးကိုတစ်ဦး စိတ်ရင်းအမှန်ဖြင့် ဆက်ဆံရန်ကတော့ မဖြစ်နိုင်သေးပါချေ။
သို့ဖြစ်၍ သူမအား အေးအေးဆေးဆေး နေခိုင်းပြီး နောက်ပိုင်းအချိန်တွင် အတူတကွ လက်တွဲနေထိုင်သွားခြင်းကသာ စုန့်ဝေ့ ပြသနိုင်သည့် အကြီးမားဆုံးသော စေတနာ ဖြစ်ပေသည်။
လီရှို့လီအနေဖြင့် ထိုစကားကို ကြားရသည့်အချိန်တွင် စိတ်အနည်းငယ် အေးသွားရသော်လည်း သူ၏ တိကျသော အစီအစဉ်ကို မသိရသောကြောင့် စိတ်မလုံခြုံသကဲ့သို့ ခံစားနေရဆဲပင်။
ထို့အပြင် စုန့်ဝေ့၏ ရှင်းပြမရသော စိတ်ပြောင်းလဲမှုမှာ ထိုကောင်မလေး စုန့်စစ်ယွီ၏ လွှမ်းမိုးမှုကြောင့်ဖြစ်ကြောင်း သူမ သေချာပေါက် အာမခံနိုင်ပေသည်။
ဒီကောင်မလေးသာ နောက်ထပ်ပြသနာ တစ်ခုခုရှာခဲ့ရင်တော့ သူမကို သေချာပေါက် သတ်ပစ်မိတော့မယ်!
နောက်ဆုံးတွင် ကိစ္စများကို ဆုံးဖြတ်လိုက်ကြပြီး နောက်တစ်နေ့မနက်စောစော၌ စုန့်ဝေ့က ရှားရှားပါးပါးဖြင့် သူ၏ အကောင်းဆုံး အဝတ်အစားများကို ထုတ်ဝတ်ကာ၊ သားရေဖိနပ်များကိုလည်း အကြိမ်ကြိမ် တောက်ပြောင်အောင် တိုက်ချွတ်ပြီး သပ်ရပ်အောင်ပြင်ဆင်လိုက်လေသည်။
ဤသည်မှာ သူ ယခင်က အင်ဂျင်နီယာအဖြစ် အလုပ်လုပ်ခဲ့စဉ်က ပုံစံမျိုးပင် ဖြစ်ပေသည်။
လီရှို့လီအနေဖြင့် ထိုသူက အဘယ်ကြောင့် ယနေ့တွင် ဤမျှအထိ သေသေသပ်သပ်ပြင်ဆင်နေကြောင်းကို နားမလည်ပါချေ။
သို့သော် စုန့်ဝေ့ မနေ့က ပြောထားသည့်စကားအရ သူတွက် ကိုယ်ပိုင်အစီအစဉ်ရှိပုံရသောကြောင့် ထပ်မံ၍ မမေးမြန်းတော့ပါချေ။
ထို့အစား စုန့်ဝေ့ အလုပ်သွားချိန်တွင် သူမလည်း ဈေးဝယ်ရန်အတွက် သူ့၏နောက်မှ လိုက်ပါထွက်ခွာခဲ့လေသည်။
ဟမ့်!
သူမက အိမ်တွင်နေ၍ စုန့်စစ်ယွီ၏ စိတ်ပျက်စရာ မျက်နှာအမူအရာကို မကြည့်ချင်ပါချေ။
ထိုကလေးမကို မြင်လိုက်တိုင်း တစ်ချက်လောက် ရိုက်ချင်စိတ် ပေါက်နေမိရသည်။
စုန့်ဝေ့နှင့် လီရှို့လီတို့ ထွက်ခွာသွားပြီးနောက် ဧည့်ခန်းတွင် ထိုင်နေသော စုန့်စစ်ယွီက ချက်ချင်းပင် ထရပ်လိုက်ပြီး အိမ်တံခါးကို လုံခြုံအောင် ပိတ်ဆို့လိုက်ကာ စုန့်ဝေ့၏ အခန်းထဲသို့ အလျှင်အမြန်ဝင်သွားခဲ့လေသည်။
သူမတွင် ရည်ရွယ်ချက် တစ်ခုတည်းသာ ရှိနေခဲ့သည်။
စုန့်ဝေ့၏ သီးသန့်ဘဏ္ဍာတိုက်လေး ရှိရာနေရာပင် ဖြစ်နေခဲ့လေ၏။
စုန့်စစ်ယွီတစ်ယောက် ဤတစ်ခေါက်စုန့်ဝေ့၏ဘဏ္ဍာတိုက်လေးကို ဖွင့်လိုက်သည့်အချိန်တွင် အနည်းငယ်မျှပင် တုံ့ဆိုင်းခြင်းမရှိတော့ပါချေ။
သူမက ထိုဘဏ္ဍာတိုက်ထဲရှိ ငွေကြေးအားလုံးကို ထုတ်ယူကာ သူမ၏ အိတ်ထဲသို့ ထိုးထည့်လိုက်လေသည်။
အကယ်၍ သူမအနေဖြင့် ဤငွေများကို ယခုအချိန်တွင် မယူလိုက်ပါက နောက်ပိုင်းတွင် ထပ်မံယူရန် အခွင့်အရေး လုံးဝရှိတော့မည် မဟုတ်ပေ။
မည်သို့ပင်ဖြစ်စေ ယနေ့မှစ၍ သူမက စုန့်ဝေ့၏ ရှေ့မှ လုံးဝကွယ်ပျောက်သွားတော့မည်ဖြစ်ကာ နောက်ထပ်တစ်ကြိမ် ပေါ်လာစရာအကြောင်းမရှိတော့ပါချေ။
ဤယွမ်ငါးရာသည်က ဖခင်နှင့် သမီးကြားရှိ သံယောဇဉ်ကို အဆုံးသတ်စေသည့် အရာအဖြစ် မှတ်ယူရပေလိမ့်မည်။
အိမ်အနှံ့ လိုက်လံရှာဖွေပြီးနောက် အိမ်တွင် တခြားငွေကြေးများ မရှိတော့သည်ကို သေချာမှသာ စုန့်စစ်ယွီတစ်ယောက် ယမန်နေ့က ထုပ်ပိုးထားသော သူမ၏ အထုပ်အပိုးများကို ကောက်ယူလျက် တံခါးကိုပိတ်ပြီး အလျင်အမြန် ထွက်ခွာသွားခဲ့လေသည်။
ဤတစ်ကြိမ်တွင်တော့ သူမက သူမကို သိရှိမည့်လူ မည်သူမျှ မရှိနိုင်သော နေရာတစ်ခုသို့ သွားပေတော့မည်။
သူမ၏ အနာဂတ်အတွက် အစွမ်းကုန် ကြိုးစားအားထုတ်ရန် စီစဉ်ထားပေသည်။
တက္ကသိုလ်တက်ရမယ် ဟုတ်လား။
လက်တွေ့ကျကျ နေထိုင်ရမယ် ဟုတ်လား။
သေလိုက်လေ!
ဤသည်က သူမ လိုအပ်သောဘဝမျိုး လုံးဝမဟုတ်ပါချေ။
နောက်ပိုင်းတစ်ချိန်တွင် သူမက အတိတ်ဘဝကကဲ့သို့ပင် ကြီးမြတ်သော ခေါင်းဆောင်တစ်ဦး သေချာပေါက် ဖြစ်လာရမည်။
ကံကောင်းစွာဖြင့် လွန်ခဲ့သော ရက်အနည်းငယ်က ဝမ်လိန်မှ သူမအတွက် ဆက်ဆံရေးကောင်းများ တည်ဆောက်ပေးနိုင်လိမ့်မည်ဟု ထင်မှတ်ခဲ့သောကြောင့် ရုံးတွင် ထောက်ခံစာတစ်စောင်ကို ကြိုတင်ထုတ်ယူထားခဲ့သည်။
သို့ဖြစ်၍ ယခုအချိန်တွင် သူမထံ ခိုင်လုံသော သက်သေခံချက်များနှင့် အချက်အလက်အမျိုးမျိုး ရှိနေခဲ့ပေပြီ။
ဤစာရွက်စာတမ်းများ ရှိနေသောကြောင့် သူမ အပြင်သို့ ထွက်ခွာသည့်အချိန်တွက် ယခင်တစ်ခေါက်ကကဲ့သို့ ပြေးလွှားပုန်းရှောင်နေရန် မလိုအပ်တော့ပါချေ။
ဤတစ်ကြိမ်တွင်တော့ သူမက အခွင့်အရေးကို လက်လွတ်မခံဘဲ အစွမ်းကုန် ကြိုးစားကြည့်ရပေမည်။