အခန်း (၃၆၅-၃၆၆)

အခန်း(365)

စုန့်ဝေ့တစ်ယောက် ယနေ့က သူ၏ စက်ယန္တရားစက်ရုံ၌ နောက်ဆုံးသော အလုပ်လုပ်ရမည့်နေ့ ဖြစ်နိုင်ကြောင်းကို သိရှိထားခဲ့လေ၏။

ထို့အတွက်ကြောင့် ရည်ရွယ်ချက်ရှိရှိဖြင့် သေသေသပ်သပ်ပြင်ဆင်လာခဲ့ပြီး ဂုဏ်သိက္ခာရှိရှိဖြင့် ထွက်ခွာရန် ကြိုးပမ်းနေခဲ့သည်။

သူ စုန့်ဝေ့သည်က ဤစက်ယန္တရားစက်ရုံတွင် လုပ်သက် အနှစ်နှစ်ဆယ် ရှိခဲ့ပေပြီ။ သူက ရာထူးတိုးမြှင့်ခြင်း ခံရသင့်သူ ဖြစ်သော်လည်း လူယုတ်မာတစ်ယောက်၏ ထောင်ချောက်ဆင်မှုကြောင့် သာမန်ဝန်ထမ်းတစ်ဦးအဖြစ်သို့ လျှော့ချခံခဲ့ရ၏။

ဒါရိုက်တာရှုအနေဖြင့် သူ့အား အမြဲတ ပစ်မှတ်ထားကာ စက်ရုံမှ လုံးဝထွက်ခွာသွားရစေရန် အမြဲတစေ ကြိုးပမ်းနေခဲ့သည် မဟုတ်ပါလား။

ယခု ထိုသူက သူ့အား တကူးတက ပစ်မှတ်ထားနေရန် မလိုအပ်တော့ပါချေ။ သူကိုယ်တိုင်ပင် ဂုဏ်သိက္ခာရှိရှိဖြင့် ထွက်ခွာသွားမည်ဖြစ်သည်။

နောက်ပိုင်းကျလျှင် ထိုဒါရိုက်တာရှုအနေဖြင့် မည်သူ့ကို ထပ်မံ၍ ပစ်မှတ်ထားဦးမည်ကို သူ စောင့်ကြည့်ပေဦးမည်။

ဒါရိုက်တာရှု၏ အံ့အားသင့်သွားမည့် အမူအရာကို မြင်တွေ့ရမည့်အချိန်ကို တွေးမိပြီးနောက် စုန့်ဝေ့တစ်ယောက် ရုတ်တရက် စိတ်လက်ပေါ့ပါးသွားခဲ့ရလေသည်။

သို့သော် ကိစ္စရပ်များမှာ စီစဉ်ထားသည့်အတိုင်း ဖြစ်မလာခဲ့ပါချေ။

သူ စက်ရုံသို့ ရောက်ရှိပြီး မကြာမီမှာပင် အပြင်ဘက်ရှိ လုံခြုံရေးဝန်ထမ်း တစ်ဦး ရောက်ရှိလာခဲ့လေ၏။

ထိုသူက စုန့်ဝေ့၏ ဆွေမျိုးတော်စပ်သူဟု ပြောဆိုနေသည့်တစ်ယောက်က စုန့်ဝေအား တွေ့ဆုံလိုကြောင်းနှင့် အလွန်အမင်း ဆူညံအောင် ပြုလုပ်နေကြောင်း သတင်းပို့လာခဲ့လေသည်။

ထို့ကြောင့် သူက စုန့်ဝေ့အား အပြင်သို့ထွက်ကာ အခြေအနေကို ကြည့်ရှုရန် ပြောလာခဲ့၏။

စုန့်ဝေ့အနေဖြင့် ထိုသတင်းကို ကြားလိုက်ရသည်နှင့် ရောက်လာသူက ဝမ်လိန်ဖြစ်ကြောင်းကို သိလိုက်လေ၏။ ထိုသူက အတော်လေး စောစီးစွာ ရောက်လာခဲ့ပေပြီ။

စုန့်ဝေ့က သူ၏အလုပ်များကို ခေတ္တချထားလိုက်ပြီး စက်ရုံဂိတ်ဝသို့ ထွက်လာသည့်အချိန်တွင် ထောင့်တစ်နေရာတွင် ပုန်းကွယ်လျက် သူ့အား စောင့်ကြည့်နေသော ဒါရိုက်တာရှုက ထွက်ပေါ်လာခဲ့သည်။

သူက မျက်လုံးများကို မှေးစောင်းလျက် အသာပြုံးကာ ပြောဆိုလိုက်သည်။

“အိုက်ယား.. စုန့်ဝေ့၊ ကြည့်ပါဦး မင်းရဲ့ ဒီဆွေမျိုးကတော့.. အလုပ်ချိန်ကြီးမှန်း သိသိကြီးနဲ့ တကူးတက လာတွေ့နေတာပဲ..

သူက မင်းရဲ့ အလုပ်ကို နှောင့်နှေးသွားစေမယ်ဆိုတာကို မသိဘူးထင်တယ်၊ ဒီအတိုင်းဆိုရင်တော့ မင်းရဲ့လစာငွေထဲက ဖြတ်တောက်ရလိမ့်မယ်နော်!”

ခနလောက်လာတွေ့တဲ့လူနဲ့ စကားပြောဖို့ အပြင်ကို ခနထွက်တာကိုတောင်လစာအဖြတ်ခံရမယ် ဟုတ်လား?

စုန့်ဝေ့အနေဖြင့် စက်ရုံတွင် ဤကဲ့သို့သော စည်းကမ်းမျိုး တစ်ခါမျှ မကြားဖူးပါချေ။

သို့သော်လည်း ဒါရိုက်တာရှုက သူ့အား တမင်သက်သက် ပစ်မှတ်ထားနေခြင်းဖြစ်ကြောင်းကို သိရှိထားသောကြောင့် ထိုသူနှင့် အပိုစကားများ ပြောဆိုရန် ပျင်းရိနေခဲ့သည်။

သူက တည်ငြိမ်သော မျက်နှာအမူအရာဖြင့် ပြောလိုက်လေ၏။

“ဒါဆိုရင်လည်း ဖြတ်လိုက်ပေါ့”

ဘာ?

မမျှော်လင့်ဘဲ စုန့်ဝေ့က ပြန်လည် တုံ့ပြန်လာခြင်းမရှိဘဲ အလွန်ရိုးရှင်းစွာ လက်ခံလိုက်သည့်အတွက် ဒါရိုက်တာရှုတစ်ယောက် အံ့သြမင်သက်သွားရလေသည်။

ထို့နောက် သူက စုန့်ဝေ့အား ရှုပထွေးစွာ ကြည့်လာခဲ့သည်။

ဒီစုန့်ဝေ့က တစ်ခုခုမှားနေသလိုပဲ။ သူ ဘာဖြစ်နေတာလဲ။

စုန့်ဝေ့၏ ထူးဆန်းသော အပြုအမူ ကို အမှန်တကယ်ပင် သိလိုစိတ် ပြင်းပြနေသောကြောင့် ဒါရိုက်တာရှုသည်လည်း စုန့်ဝေ့၏ နောက်ဘက်မှ တိုက်ရိုက်ပင် လိုက်ပါသွားခဲ့လေသည်။

စုန့်ဝေ့အနေဖြင့် သူ၏လစာ ဖြတ်တောက်ခံရမည့်အရေးကိုပင် ဂရုမစိုက်ဘဲ ထွက်တွေ့ရသည့် ဆွေမျိုးဆိုသည်ာ မည်သို့သောလူမျိုးဖြစ်ကြောင်းကို သူ သိချင်နေခဲ့ပေသည်။

ရလဒ်အနေဖြင့် စက်ရုံဂိတ်ပေါက်ဝသို့ ရောက်ရှိချိန်တွင် အမျိုးသားတစ်ဦးက စုန့်ဝေ့၏ အင်္ကျီကော်လံကို ဆွဲကိုင်ထားသည်ကို မြင်လိုက်ရလေသည်။

ထိုသူက ဆဲဆိုကျိန်းမောင်း၍ ငိုကြွေးညည်းညူကာ ခေါင်းဆောင်များကို အပြင်သို့ထွက်လာပြီး သူ့အတွက် တရားမျှတအောင် ဆုံးဖြတ်ပေးရန် အော်ဟစ်နေခဲ့၏။

ဒါရိုက်တာရှုတစ်ယောက် သူ၏ရှေ့မှ မြင်ကွင်းကြောင့်အံ့အားသင့်သွားရပြန်သည်။ တစ်ဖက်လူမှာ စုန့်ဝေ့၏ ကောင်းမွန်သောဆွေမျိုးတစ်ဦး မဟုတ်ဘဲ ပြဿနာလာရှာသူသာဖြစ်ကြောင်းကို သူ လောင်းကြေးထပ်ရဲပေသည်။

ဒါရိုက်တာရှုအနေဖြင့် ဤကဲ့သို့သော ပွဲကောင်းတစ်ခုကို သေချာပေါက် လက်လွတ်ခံလိမ့်မည် မဟုတ်ပါချေ။

သို့ဖြစ်၍ လုံခြုံရေးဝန်ထမ်းက ထိုကိစ္စကို ခေါင်းဆောင်များထံသို့ တိုင်တန်းရမည်လား သို့မဟုတ် စုန့်ဝေ့ကိုသာ ကိုယ်တိုင်ဖြေရှင်းခိုင်းရမည်လားဟု တွေးတောကာ တုံ့ဆိုင်းနေချိန်တွင် ဒါရိုက်တာရှုက “တရားမျှတရေးသံတမန်” အသွင်ဖြင့် ချက်ချင်းပင် ရှေ့သို့ထွက်လာပြီး ဝမ်လိန်အား ပြောဆိုလိုက်လေသည်။

“ရဲဘော်.. ငါက ဒီစက်ရုံရဲ့ ခေါင်းဆောင်တစ်ယောက်ပဲ.. မင်းမှာ ဘယ်လိုအခက်အခဲပဲရှိရှိ ငါ့ကို ပြောပြနိုင်တယ်.. ငါ မင်းအတွက် ဆုံးဖြတ်ပေးပါ့မယ်!”

ဒါရိုက်တာရှု အရှေ့သို့ထွက်လာသည်ကို မြင်လျှင် ဝမ်လိန်၏ မျက်လုံးများက ချက်ချင်းပင် အရောင်တောက်ပသွားခဲ့လေသည်။

ဘေးနားတွင်ရှိနေသော စုန့်ဝေ့က ဤမြင်ကွင်းကို မည်သည့်ခံစားချက်မျှ မပါဘဲ ကြည့်နေခဲ့လေ၏။

သူ၏ မျက်ဝန်းများထဲတွင်လည်း ဤကဲ့သို့ ဖြစ်လာမည်ကို ကြိုတင်ခန့်မှန်းထားပြီးသားဖြစ်ကြောင်း အရိပ်အယောင်များပင် ထင်ဟပ်နေခဲ့လေသည်။

စုန့်ဝေ့က ဘာဖြစ်နေတာလဲ။ ဘာလို့ ဒီလောက်အထိ တည်ငြိမ်နေပြီး ဘာဆက်ဖြစ်တော့မယ်ဆိုတာကို ကြိုသိနေတဲ့ ပုံစံမျိုး ဖြစ်နေရတာလဲ။

ဒါရိုက်တာရှုတစ်ယောက် စိတ်ထဲမှ ရေရွတ်နေခဲ့သော်လည်း စုန့်ဝေ့ကို ပြင်းပြင်းထန်ထန် ထပ်မံထိုးနှက်နိုင်မည့် ဤကဲ့သို့သော အခွင့်အရေးကောင်းကို သူ လုံးဝ လက်လွတ်ခံမည် မဟုတ်ပါချေ။

ထို့ကြောင့် သူက “တရားမျှတရေးသံတမန်” အဖြစ် ဟန်ဆောင်ကာ ဝမ်လိန်၏ အဓိပ္ပါယ်မရှိသော တိုင်တန်းချက်များကို စိတ်ရှည်လက်ရှည် နားထောင်ပေးခဲ့လေသည်။

သူ၏ အလုပ်ပြုတ်သွားခဲ့ရကြောင်း၊ စုန့်ဝေ့က သူ့အား လျော်ကြေးပေးမည်ဟု ကတိပေးခဲ့သော်လည်း နောက်ဆုံးတွင် ငြင်းဆိုခဲ့ကြောင်း၊ ထိိသူက ကတိမတည်သူဖြစ်ပြီး ကိုယ်ကျင့်တရား ပျက်ပြားနေသူဖြစ်ကြောင်း စသည်ဖြင့် ပြောဆိုခဲ့လေသည်။

မျှတစွာ ပြောရလျှင် ဤလူ အလုပ်ပြုတ်သွားခြင်းမှာ သူ၏ ကိုယ်ပိုင်အမှားကြောင့်ပင် ဖြစ်ပေလိမ့်မည်။

စုန့်ဝေ့က သူ့ကို အလုပ်ဖြုတ်ပစ်ခဲ့ခြင်း မဟုတ်သည့်အတွက် စုန့်ဝေ့၏ အပြစ်လည်း မဟုတ်ပါချေ။

သို့သော်လည်း ဒါရိုက်တာရှုသည်လည်း တရားမျှတသောသူတစ်ဦး မဟုတ်နေခဲ့ပေ။ သူက စုန့်ဝေ့၏ ကိုယ်ကျင့်တရား ပျက်ပြားမှုကို အခွင့်ကောင်းယူကာ စုန့်ဝေ့ကို အလွန်အမင်း စိတ်ပျက်နေသော မျက်နှာအမူအရာဖြင့် ကြည့်လိုက်လေသည်။

“ရဲဘော်စုန့်ဝေ့.. ဒီကိစ္စနဲ့ ပတ်သက်ပြီး ရှင်းပြစရာ တစ်ခုခု ရှိနေသေးလား၊ မင်း သိတဲ့အတိုင်းပဲ.. ငါတို့ရဲ့စက်ရုံက စည်းကမ်းစနစ်အရမ်းတင်းကျပ်တဲ့ စက်ရုံကြီးတစ်ခုပဲ.. စက်ရုံက ဝန်ထမ်းတွေအတွက်ကတော့...”

သို့သော် ဒါရိုက်တာရှု၏ ခန့်ညားထည်ဝါသော မိန့်ခွန်းကြီး မပြီးဆုံးမီမှာပင် စုန့်ဝေ့က စိတ်မရှည်စွာဖြင့် ဖြတ်ပြောလိုက်လေသည်။

“ကျွန်တော့်မှာ ရှင်းပြစရာ ဘာမှမရှိပါဘူး.. စက်ရုံဘက်က ဘယ်လိုရလဒ်မျိုးပဲ ပေးပါစေ ကျွန်တော်လက်ခံလိုက်မယ်”

ဤသို့ဖြင့် သူက ခုခံကာကွယ်မှုကို လုံးဝပင် စွန့်လွှတ်လိုက်လေ၏!

ဘာတွေ ဖြစ်နေတာလဲ!

ဒါရိုက်တာရှုအနေဖြင့် သူ၏ဘဝတွင် ယနေ့လောက် ရှုပ်ထွေးသွားရသည့်နေ့မျိုး မရှိခဲ့ဖူးဟု ခံစားလိုက်ရသည်။ စုန့်ဝေ့က တစ်ခုခုတော့ အကြီးအကျယ် မှားနေပေပြီ။

“ဒါဆို မင်းပြောချင်တာက... စက်ရုံက ဘယ်လိုအပြစ်ဒဏ်မျိုးပဲ ပေးပါစေ မင်းက လက်ခံမယ်ပေါ့ ဟုတ်လား?”

ဒါရိုက်တာရှုက စုန့်ဝေ့အား မသေချာသကဲ့သို့ တစ်ချက်ကြည့်လိုက်လေသည်။ သို့သော် စုန့်ဝေ့မှာ တည်ငြိမ်အေးဆေးသော အမူအရာ အတိုင်းပင် ရှိနေဆဲပင်။

“အင်း... ဘယ်လိုအပြစ်ဒဏ်မျိုးပဲဖြစ်ဖြစ် ပေးလိုက်လို့ရတယ်”

“ဒါ မင်းကိုယ်တိုင် ပြောတာနော်!”

ဒါရိုက်တာရှုက စိတ်လှုပ်ရှားစွာဖြင့် ပြောဆိုလိုက်ပြီးနောက်၊ ဘေးဘက်မှ ကြောင်အစွာ ကြည့်နေသော လုံခြုံရေးဝန်ထမ်းအား လှမ်းကြည့်လိုက်လေသည်။

“မင်းလည်း ကြားတယ်မလား၊ ဒါ သူကိုယ်တိုင် ပြောတာနော်.. ဘယ်လိုအပြစ်ဒဏ်မျိုးကိုမဆို သူလက်ခံပါ့မယ်တဲ့!”

ကြောင်အမ်းနေသော လုံခြုံရေးဝန်ထမ်း: “အမ်... ဟုတ်၊ ဟုတ်တယ်...”

သို့သော် လုံခြုံရေးဝန်ထမ်းက စုန့်ဝေ့နှင့် မည်သည့်ရန်ငြိုးမျှ မရှိပါချေ။ စုန့်ဝေ့ ဤသို့ပြောသည်ကို မြင်ရသည့်အချိန်တွင် ထိုသူက စိတ်ကြည်လင်မှုမရှိဘဲ ပြောနေခြင်းဖြစ်မည်ဟု တွေးတောမိကာ ကြည့်မနေနိုင်ခဲ့ဘဲ တီးတိုးသတိပေးလိုက်လေသည်။

“အမ်.. ရဲဘော်စုန့်ဝေ့၊ ဒီကိစ္စကို တစ်ဖက်လူနဲ့ သေသေချာချာလေး ပြန်ဆွေးနွေးကြည့်ရင် မကောင်းဘူးလား...”

တစ်စုံတစ်ရာ ဖြေရှင်းချက်မျိုးရှိနိုင်သည် မဟုတ်ပါလား။

“ဆွေးနွေးနေဖို့ မလိုပါဘူး.. ငါနဲ့ သူ့ကြားမှာ ဆွေးနွေးစရာ ဘာမှမရှိဘူး”

စုန့်ဝေ့က အေးစက်သော မျက်နှာအမူအရာဖြင့် လုံခြုံရေးဝန်ထမ်း၏ အကြံပြုချက်ကို ထပ်မံငြင်းပယ်လိုက်ပြန်သည်။ ဤသည်ကို မြင်ချိန်တွင် လုံခြုံရေးဝန်ထမ်းလည်း ပုခုံးတစ်ချက်သာ တွန့်လိုက်ပြီး ဆက်လက်ဝင်ရောက်စွက်ဖက်ခြင်းမရှိတော့ပါချေ။

ဒါရိုက်တာရှုတစ်ယောက် စုန့်ဝေ့ ရုတ်တရက် သတိပြန်ဝင်လာပြီး နောင်တရသွားမည်ကို စိုးရိမ်သောကြောင့် ဝန်ထမ်းရေးရာရုံးမှ လုပ်ဖော်ကိုင်ဖက်များနှင့် ဆွေးနွေးသကဲ့သို့ ဟန်ဆောင်လျက် ရုံးခန်းသို့ အလျင်အမြန် ပြန်သွားခဲ့လေသည်။

ထို့နောက် ဝမ်းနည်းပူဆွေးသော မျက်နှာအမူအရာဖြင့် ဆုံးဖြတ်ချက်တစ်ခုကို ချမှတ်လိုက်လေသည်။

“ရဲဘော်စုန့်ဝေ့အနေဖြင့် လွန်ခဲ့သော ခြောက်လမှစ၍ ကျွန်ုပ်တို့၏ စက်ရုံ၌ အမှားအယွင်းများစွာ ကျူးလွန်ခဲ့သည့်အပြင် ယနေ့တွင်လည်း သူကိုယ်တိုင်က ကိုယ်ကျင့်တရားပျက်ပြားကြောင်းနှင့် ဆွေမျိုးသားချင်းများကို လှည့်ဖြားခဲ့ကြောင်း ဝန်ခံခဲ့သည့်အတွက်ကြောင့်၊ ကျွန်ုပ်တို့အနေဖြင့် ရဲဘော်စုန့်ဝေ့အား အလုပ်မှထုတ်ပယ်ရန် တညီတညွတ်တည်း ဆုံးဖြတ်လိုက်ပါသည်”

သူက စုန့်ဝေ့အတွက် အလုပ်ထုတ်ပယ်လွှာကို ယူလာပေးချိန်တွင် ထိုသူမှာ အလုပ်ရုံတွင် ကျန်ရှိနေသော သူ၏ပစ္စည်းများကို သိမ်းဆည်းပြီးစီးနေပေပြီ။

“ဟေး.. ရဲဘော်စုန့်ဝေ့၊ မင်းကတော့ တကယ့်ကို အမြင်မှန်ရနေတာပဲ.. ကိုယ့်ပစ္စည်းကိုယ်တောင် သိမ်းဆည်းပြီးပြီဆိုတော့၊ မင်းကိုယ်မင်း အလုပ်ထုတ်ခံရမယ်ဆိုတာကို အစောကြီးကတည်းက သိနေတာလား”

ဒါရိုက်တာရှုက လှောင်ပြောင်လိုသော လေသံဖြင့် ပြောဆိုလိုက်သော်လည်း တစ်ဖက်တွင် သူ၏နှလုံးသားထဲ၌ သံသယများစွာတို့က ပိုမိုနက်ရှိုင်းလာခဲ့လေသည်။

စုန့်ဝေ့က ဘာဖြစ်နေတာလဲ။

သူက စက်ယန္တရားစက်ရုံမှာ အလုပ်မလုပ်တော့ဘဲ ကောင်းကင်ဘုံကိုတက်ချင်နေတာလား။

*

အခန်း(366)

ယခုခေတ်ကာလတွင် အလုပ်အကိုင်ရှာဖွေရန်အတွက် လုံးဝမလွယ်ကူပါချေ။

ထို့အပြင် သူတို့စက်ရုံ၏ ဝန်ထမ်းခံစားခွင့်များမှာလည်း အလွန်အမင်း ကောင်းမွန်ကြောင်းကို သိထားရပေမည်။

သူက ယခုအချိန်တွင် သာမန်ဝန်ထမ်းတစ်ဦးသာ ဖြစ်နေလျှင်ပင် အနည်းဆုံး တစ်လလျှင် ယွမ်သုံး၊ လေးဆယ်ခန့် ရရှိနေသည့်အပြင် နေစရာ အိပ်ဆောင်လည်း ရှိနေသောကြောင့် မဆိုးလှပါချေ။

အကယ်၍ သူသာ ယခု အလုပ်ထုတ်ခံရပါက အလုပ်နှင့်လစာကို ဆုံးရှုံးရုံသာမကဘဲ သူနေထိုင်ရာ နေရာကိုပါ ပြန်လည်အပ်နှံရမည် မဟုတ်ပါလား။

သူ ဘာကို ကြိုးစားနေတာလဲ။

သူက တကယ်ကြီး ရူးသွပ်သွားပြီး သူ့ရဲ့ နှိပ်ကွပ်မှုဒဏ်ကို မခံနိုင်တော့လို့ ထွက်ခွာသွားတာများလား။

ဒါရိုက်တာရှုအနေဖြင့် ခဏကြာအောင် စဉ်းစားကြည့်လျှင်ပင် သူ့ကိုယ်သူ ထိုမျှအထိတော့ မုန်းတီးစရာမကောင်းဟု ထင်မိပေသည်။

ဒါရိုက်တာရှု၏ စကားကို ကြားပြီးနောက် စုန့်ဝေ့က ပြန်လှည့်ကြည့်လာခဲ့ကာ တစ်စုံတစ်ရာသော အကြောင်းပြချက်ကြောင့် ရုတ်တရက် ရယ်မောလိုက်လေသည်။

“ဘာကိုရယ်နေတာလဲ”

ဒါရိုက်တာရှုအနေဖြင်် သူ၏အပြုံးတွင် တစ်စုံတစ်ခု မှားယွင်းနေသည်ဟု ခံစားလိုက်ရသောကြောင့် မျက်မှောင်ကြုတ်၍ မေးမြန်းလိုက်သည်။

“စုန့်ဝေ့.. မင်း စိတ်ကျန်းမာရေး ချို့ယွင်းနေတာလား၊ စက်ရုံကနေ အလုပ်ထုတ်ခံရတာတောင် ရယ်နိုင်သေးတယ်ပေါ့.. မင်း မကြောက်ဘူးလား?

မနက်ဖြန်ကျရင်လမ်းဘေးမှာ အိပ်ရတော့မှာကိုရော မစိုးရိမ်ဘူးလား?”

ဒါရိုက်တာရှု၏ လှောင်ပြောင်ပြောဆိုမှုများကို ရင်ဆိုင်ရသည့်အချိန် စုန့်ဝေ့က နောက်ကွယ်တွင်အဓိပ္ပာယ်များရှိနေသောစကားဖြင့်သာ ပြန်လည်ပြောဆိုလိုက်လေသည်။

“ဒါရိုက်တာရှု ... စကားတစ်ခွန်း ရှိတာကို ခင်ဗျား ကြားဖူးလားတော့ မသိဘူး.. ဒီလောကကြီးမှာ မနက်ဖြန် ဘာတွေဖြစ်လာမယ်၊ ဘယ်လို အပြောင်းအလဲတွေ ဖြစ်လာမလဲဆိုတာ ဘယ်သူမှ ကြိုမသိနိုင်ဘူးလေ”

“ခင်ဗျားကတော့ စက်ရုံက အလုပ်ဆိုတာ တစ်သက်လုံး မြဲမယ့် သံထမင်းပန်းကန်လို့ ထင်နေမှာပေါ့၊

ခင်ဗျားရဲ့ အလုပ်က တစ်သက်လုံး တည်မြဲပါစေလို့ပဲ ကျွန်တော် ဆုတောင်းပေးပါတယ်..

ကျွန်တော့်ကိစ္စအတွက်တော့ ခင်ဗျား စိတ်ပူနေစရာ မလိုပါဘူး.. နောက်ပိုင်းကျရင် ကျွန်တော်က တခြားသူတွေထက် ပိုကောင်းအောင် နေထိုင်သွားမှာ၊ ခင်ဗျားထက်လည်း နိမ့်ကျသွားမှာ မဟုတ်ဘူး!”

ဒါရိုက်တာရှု: “?”

“မင်း ဘာတွေ ရူးကြောင်ကြောင် ပြောနေတာလဲ.. အလုပ်မရှိဘဲနဲ့ ငါ့ထက် ပိုကောင်းအောင် နေနိုင်မယ် ဟုတ်လား၊ ငါ့ကို နောက်နေတာလား!”

စုန့်ဝေ့ နောက်နေခဲ့သည်လား။

သေချာပေါက် မဟုတ်ပါချေ။

သို့သော် သူ၏သမီးမှာ အတိတ်ဘဝမှ ပြန်လည်မွေးဖွားလာသူဖြစ်ကြောင်း မည်သူ့ကိုမျှ ပြောပြ၍ မရနိုင်ပေ။ ထို့ကြောင့် ဒါရိုက်တာရှု၏ မယုံကြည်နိုင်သော အမူအရာ ကို မြင်လျှင် စုန့်ဝေ့တစ်ယောက် အားနည်းသူတစ်ယောက်အပေါ် သနားစရာကောင်းသော အကြည့်မျိုးဖြင့်သာ ကြည့်လိုက်ပြီးနောက် လှည့်ထွက်သွားခဲ့လေသည်။

မထွက်ခွာမီအချိန်တွင် သူက ဆက်လက်ပြောခဲ့ပြန်သည်။

“ဒါဆိုရင်တော့ ဖြစ်လာမဲ့ အခြေအနေတွေကို စောင့်ကြည့်ကြတာပေါ့.. နောက်ထပ် နှစ်နှစ်ကြာလို့ ကျွန်တော်တို့ ပြန်တွေ့တဲ့အချိန်ကျရင် ခင်ဗျားကို ဒါရိုက်တာရှု လို့ ဆက်ပြီး ခေါ်လို့နိုင်ပါစေလို့ မျှော်လင့်ပါတယ်”

ဒါတွေကရော ဘာတွေပြောနေတာလဲ?

ဒါရိုက်တာရှု၏ မျက်ခုံးများက တွန့်ချိုးသွားခဲ့သော်လည်း စုန့်ဝေ့ ပြောသွားသည့်စကားများကို သူ လုံးဝ နားမလည်နိုင်ခဲ့ပါချေ။

သူ့ကို နောက်ပိုင်းကျရင် စက်ရုံဒါရိုက်တာ မလုပ်နိုင်တော့ဘူးလို့ ဆိုလိုတာလား။

ဒါမှမဟုတ် စက်ရုံကြီးက နောင်ကျရင် ပျက်စီးသွားမယ်လို့ ပြောချင်နေလား။

လာနောက်နေတာလား။

သူတို့ စက်ယန္တရားစက်ရုံက ဒီလောက်တောင် ကြီးမားတာလေ။

တခြားဘယ်စက်ရုံပဲ အခြေအနေဆိုးနေပါစေ သူတို့ရဲ့စက်ရုံကတော့ အလှည့်ရောက်မှာ မဟုတ်ဘူး။

ဒီစုန့်ဝေ့ကတော့ တကယ်ကြီး ရူးသွားပြီပဲ။

နောက်ဆုံးတွင် ဒါရိုက်တာရှုက စုန့်ဝေ့၏ ပုံမှန်မဟုတ်သော အပြုအမူ များမှာ သူ၏ ဦးနှောက်တွင် တစ်စုံတစ်ခု ချို့ယွင်းနေခြင်းကြောင့်သာ ဖြစ်ရမည်ဟု ကောက်ချက်ချလိုက်လေသည်။

“စုန့်ဝေ့... ငါ မင်းကို အကြံပေးပါရစေ၊ တကယ်လို့ လူက တစ်ခုခု ဖြစ်နေပြီဆိုရင် ဆရာဝန်ဆီ သွားပြဖို့ မမေ့နဲ့ဦး

ဟိုတစ်ခါ စားသောက်ဆိုင်မှာ ငါတို့နဲ့တွေ့တဲ့ ဒေါက်တာကျိုးလေ၊ သူက ဆေးပညာ အတော်လေးကျွမ်းကျင်တာ!

မင်း အချိန်ရရင် သွားပြလိုက်ဦး၊ မဟုတ်ရင်တော့ မင်း နောက်ထပ် နှစ်နည်းနည်းလောက်တောင် ထပ်ပြီး ခံပါ့မလားလို့ ငါ စိုးရိမ်မိတယ်”

ဒါရိုက်တာရှုက စုန့်ဝေ့ကို စေတနာဖြင့် သတိပေးပြီးနောက် စက်ရုံထဲသို့ အလွန်လျင်မြန်သော ခြေလှမ်းများဖြင့် အပြေးအလွှား ပြန်ဝင်သွားခဲ့လေသည်။

သူသာ စုန့်ဝေ့နှင့် အတူအချိန်အနည်းငယ် ထပ်မံဖြုန်းနေမိပါက စုန့်ဝေ့၏ အရူးရောဂါများ ကူးစက်ခံရမည်ကို စိုးရိမ်နေခဲ့သည်။

မူလက ဥာဏ်ရည်ကောင်းမွန်ပုံရသော ဤလူက အဘယ်ကြောင့် ယခုအချိန်တွင်၊ အထူးသဖြင့် လွန်ခဲ့သော ခြောက်လထဲမှာ ပို၍ပင် တုံးအမိုက်မဲလာရသနည်း။

ဒါရိုက်တာရွှီ ပြန်လည်စဉ်းစားကြည့်လျှင် လင်းရန် ကျေးလက်သို့သွားကတည်းက အရာအားလုံးက တဖြည်းဖြည်းနှင့် ဆိုးရွားလာခဲ့ခြင်း ဖြစ်ကြောင်း တွေ့ရှိလိုက်ရလေသည်။

လင်းရန် သူတို့မိသားစု၏ ကံကောင်းခြင်းကြယ်ပွင့် ဖြစ်နေခဲ့ခြင်းများလား။

ဒါရိုက်တာရှုတစ်ယောက် တတွတ်တွတ် ရေရွတ်ရင်း စုန့်ဝေ့၏ အမြင်အာရုံထဲမှ ထွက်ခွာသွားခဲ့လေ၏။

စုန့်ဝေ့သည်ကား ကြီးမားသော ပြဿနာတစ်ခုကို ဖြေရှင်းနိုင်ခဲ့ပြီဖြစ်၍ စိတ်လက်ပေါ့ပါးနေခဲ့ပေသည်။

သူ အလုပ်ပြုတ်သွားခဲ့သော်လည်း မည်သည့် နောင်တ သို့မဟုတ် စိတ်ပျက်မှုမျိုးမျှ မခံစားရပါချေ။

မည်သို့ပင်ဖြစ်စေ သူက အိမ်ပြန်ရောက်လျှင် သမီးဖြစ်သူ စုန့်စစ်ယွီနှင့် တိုင်ပင်ကာ၊ မည်သည့်အိမ်ကို ဝယ်ယူခြင်းက ပို၍ကောင်းမွန်မည်ဖြစ်ပြီး နောင်အနာဂတ်တွင် တန်ဖိုးပိုမို မြင့်တက်လာနိုင်မည်ကို ဆွေးနွေးနိုင်တော့မည်။

နောက်ပိုင်းတွင် အိမ်ဝယ်ထားရုံဖြင့် ချမ်းသာကြွယ်ဝလာနိုင်မည်ဟူသော အတွေးဖြင့် စုန့်ဝေ့တစ်ယောက် အော်ဟစ်ရယ်မောမိလေသည်။

နောက်ထပ်နှစ်နှစ်ကြာလျှင် အရာအားလုံးက ရှင်းလင်းသွားပေလိမ့်မည်။

ဘေးနားတွင်ရှိနေသော ဝမ်လိန်တစ်ယောက် ဤမြင်ကွင်းကို ကြည့်ရင်း မင်သက်သွားရလေသည်။

စုန့်ဝေ့က တကယ်ကြီး ဒီအလုပ်ကိုတောင် အလိုမရှိတော့တာလား။

သူက ဘာလို့ နည်းနည်းလေးမှ ဒေါသမထွက်ရတာလဲ။

“စုန့်ဝေ့... မင်း!”

သူက စုန့်ဝေ့အား တားဆီးရန် ပါးစပ်ဟလိုက်ချိန်တွင် စုန့်ဝေ့က သူ့အား အေးစက်သော အကြည့်တစ်ချက် ပေးလိုက်ပြီး ပြောဆိုလိုက်လေသည်။

“ဝမ်လိန်... မင်း အခု ငါ့ရဲ့ အလုပ်ကို ဖျက်ဆီးခဲ့ပြီးပြီ၊ ဒါကြောင့် ငါတို့ မိသားစုနှစ်စုကြားက ကိစ္စတွေ အားလုံးပြီးစီးသွားပြီ

အခုကစပြီး မင်းလည်း မင်းလမ်းကိုမင်းသွား၊ ငါလည်း ငါ့လမ်းငါသွားမယ်.. ငါတို့ကြားမှာ နောက်ထပ် ဘာမှ ပတ်သက်စရာ မလိုတော့ဘူး”

ထိုသို့ပြောပြီးနောက် သူက ဝမ်လိန် ပြောချင်သည့်စကားများကို ဂရုမစိုက်တော့ဘဲ လှည့်ထွက်သွားခဲ့လေသည်။

“ဟေး!”

ဝမ်လိန်တစ်ယောက် အဖြစ်မှန်ကို လက်မခံနိုင်ဘဲ သူ့ကို တားဆီးရန် ကြိုးစားသော်လည်း နောက်ဆုံးတွင် စုန့်ဝေ့၏ နောက်ကျောက ပို၍ ဝေးကွာသွားသည်ကို ငေးကြည့်နေရုံသာ တတ်နိုင်နေခဲ့လေ၏။

စုန့်ဝေ့တစ်ယောက် အိမ်သို့ အလျင်အမြန် ပြန်လာခဲ့လေ၏။

မူလက သူ့အနေဖြင့် စုန့်စစ်ယွီနှင့် လီရှို့လီတို့ကို အိမ်ထဲရှိ ပစ္စည်းများအားလုံးကို သိမ်းဆည်းခိုင်းရန်နှင့် သမီးဖြစ်သူနှင့်အတူ မည်သည့်နေရာသို့ ပြောင်းရွှေ့သင့်သည်ကို ဆွေးနွေးရန် ကြံစည်ထားခဲ့သည်။

သို့သော် သူ တံခါးဖွင့်၍ ကြည့်လိုက်သည့်အချိန်တွင် ဗလာသက်သက်ဖြစ်နေသော အခန်းကိုသာ မြင်လိုက်ရပေသည်။

သူ အလုပ်ပြန်လာချိန်ကို ဆိုဖာပေါ်တွင် အမြဲတစေထိုင်စောင့်နေလေ့ရှိသော စုန့်စစ်ယွီကတော့ ပျောက်ကွယ်နေခဲ့ချေပြီ။

တစ်စုံတစ်ရာသော အကြောင်းပြချက်ကြောင့် စုန့်ဝေ့၏ နှလုံးသားထဲတွင် မကောင်းသော နိမိတ်တစ်ခုကို ရုတ်တရက် ခံစားလိုက်ရလေသည်။

သူ သူ့ကိုယ်သူ ပြန်လည်နှစ်သိမ့်ပေးမိသည်။

သမီးဖြစ်သူက အိမ်တွင်နေရသည်ကို ပျင်းရိသောကြောင့် အပြင်သို့ ခေတ္တထွက်၍ ကစားနေခြင်း သို့မဟုတ် လမ်းလျှောက်နေခြင်းသာ ဖြစ်ရမည် ။

နေ့လယ်စာစားချိန်တွင် သူမ ပြန်ရောက်လာလိမ့်မည်ပင်။

သို့သော် ထိုသို့တွေးနေခဲ့သော်လည်း သူ၏ခြေလှမ်းများက မထိန်းချုပ်နိုင်ဘဲ စုန့်စစ်ယွီ၏ အခန်းတံခါးဝသို့ ရောက်ရှိသွားခဲ့လေသည်။

သူက အရင်ဆုံး တံခါးကိုခေါက်ကာ အထဲသို့ လှမ်းခေါ်လိုက်လေသည်။

“စစ်ယွီ... အထဲမှာ ရှိလား”

စက္ကန့်အနည်းငယ် စောင့်ဆိုင်းသော်လည်း မည်သည့် တုံ့ပြန်မှုမျှ မရှိပါချေ။

ဤအခိုက်အတန့်တွင် စုန့်ဝေ့၏ ရင်ထဲမှ မကောင်းသော ခံစားချက်က ပို၍ပင် ပြင်းထန်လာခဲ့ချေပြီ။

နောက်ခဏတွင် သူ စုန့်စစ်ယွီ၏ အခန်းတံခါးကို ရုတ်တရက် တွန်းဖွင့်လိုက်လေသည်။

သူမ၏ အဝတ်အစားများနှင့် ထောင့်တစ်နေရာရှိ ခရီးဆောင်အိတ်မှာ ပျောက်ကွယ်နေသည်ကို မြင်လိုက်ရသည့်အချိန်တွင်တော့ စုန့်ဝေ့တစ်ယောက် မူးမေ့လဲကျလုနီးပါး ဖြစ်သွားရလေသည်။

စုန့်စစ်ယွီ ပျောက်သွားပြီ။ ခရီးဆောင်အိတ်လည်း မရှိတော့ပါချေ။

အကယ်၍ စုန့်ဝေ့အနေဖြင့် ဤအချိန်တွင်ပင် မည်သည့်အရာများဖြစ်သည်ကို ရိပ်မိခြင်းမရှိသေးပါက သူက အရူးတစ်ယောက်သာ ဖြစ်နေပေလိမ့်မည်။

သူ၏ရှေ့မှ မြင်ကွင်းက အလွန်ပင် ရှင်းလင်းလွန်းပေသည်။ ဤသည်မှာ စုန့်စစ်ယွီတစ်ယောက် နောက်တစ်ကြိမ် ပြန်လည်ထွက်ပြေးသွားပြီဟု ပြသနေခြင်းပင်။

သူမ ထပ်ပြီး ထွက်ပြေးသွားပြန်ပြီ!

ဒီကောင်မလေး!

သူမက ဘာလို့ ထပ်ပြီး ထွက်သွားရတာလဲ!

ပြီးတော့ သူမက ဘယ်ကို သွားနေတာလဲ။

စုန့်ဝေ့တစ်ယောက် သမီးဖြစ်သူ စုန့်စစ်ယွီအတွက် စတင်စိုးရိမ်ပူပန်နေချိန်တွင်ပင် တစ်စုံတစ်ခုကို ရုတ်တရက် သတိရလိုက်မိပြန်သည်။

မဟုတ်သေးဘူး!

မနေ့တုန်းက သူတို့သားအဖနှစ်ဦးက အနာဂတ်စီမံကိန်းများနှင့် ပတ်သက်၍ သေသေချာချာ ဆွေးနွေးခဲ့ကြသည်။ သို့သော် ယနေ့တွင်တော့ သူမက သူ မရှိသည့်အချိန်တွင် တိတ်တဆိတ် ထွက်ခွာသွားခဲ့ချေပြီ။

သို့ဆိုပါက သူမ ယမန်နေ့က ပြောခဲ့သော စကားများက အမှန်တရားများ ဖြစ်နေပါဦးမည်လား။

စုန့်ဝေ့တစ်ယောက် ဤအကြောင်းကို တွေးမိလိုက်သည်နှင့် အလွန်ပင် ထိတ်လန့်သွားရလေသည်။

အကယ်၍ သူမကသာ သူ့ကို လိမ်ညာခဲ့သည့်အတွက် ထွက်ပြေးသွားခဲ့မည်ဆိုပါက သူ ဒါရိုက်တာရှုနှင့် အပြင်းအထန် အချင်းများခဲ့ပြီး အလုပ်မှ ထွက်ခဲ့ခြင်းမှာ အမှားတစ်ခုသာ ဖြစ်နေလိမ့်မည် မဟုတ်ပါလား။

စုန့်စစ်ယွီ၏ ရုတ်တရက်ဆန်ပြီး အကြောင်းပြချက်မရှိ ထွက်ခွာသွားခဲ့သောကြောင့် သူမထံတွင် မည်သို့သော အခြေအနေမျိုး ထပ်မံဖြစ်ပွားခဲ့သည်ကို စုန့်ဝေ့အနေဖြင့် မစဉ်းစားနိုင်တော့ပါချေ။

ထို့အပြင် သူမ ယမန်နေ့က ပြောခဲ့သော စကားများထဲတွင် မည်သည့်အရာက အစစ်အမှန်ဖြစ်ပြီး မည်သည့်အရာက အတုအယောင် ဖြစ်နေကြောင်းကိုလည်း သူ မတွေးနိုင်တော့ပေ။