အခန်း (၄၀၁-၄၀၂)

အခန်း (၄၀၁) အဲဒါ ဥက္ကဋ္ဌကတော်ပဲ

မင်ယွဲ့၏ တိုက်တွန်းအားပေးမှုသာ မရှိခဲ့လျှင် သူ၏ အစီအစဉ်များမှာ ဖုန်တက်နေသည့် စာမူဟောင်းများကဲ့သို့ သိမ်းဆည်းခြင်း ခံထားရပေလိမ့်မည်။

သူတို့ကဲ့သို့သော အခြေအနေမျိုးတွင် ထူးခြားသည့် အောင်မြင်မှုတစ်ခု ရရှိရန်မှာ အမှန် တကယ်ပင် ခဲယဉ်းလှသည် မဟုတ်ပါလား။

"ကောင်းပါပြီ... ကျွန်မအတွက် ဂုဏ်ယူစရာပါပဲ"

မင်ယွဲ့သည် ဝမ်းမြောက်ဝမ်းသာပင် သဘောတူလိုက်သည်။

လူတစ်စုသည် လမ်းမများတစ်လျှောက် လျှောက်လှမ်းခဲ့ကြသည်။ ရပ်ကွက်ဟောင်း၏ လမ်းမများမှာ ယခင်ကနှင့်မတူဘဲ လုံးဝ အသွင်ပြောင်းလဲနေပြီ ဖြစ်သည်။

အဆောက်အဦများ အလုံးစုံ ပြီးစီးသွားသည့်အခါ ပေါ်ထွန်းလာမည့် သာယာဝပြောမှု အငွေ့အအုံများကို ယခုကတည်းကပင် အာရုံခံစားနေရပြီ ဖြစ်သည်။

မင်ယွဲ့ အိမ်ပြန်ရောက်သည့်အခါ သူမ၏ တက်ဘလက်ကို ထုတ်ကြည့်လိုက်ရာ သူမ၏ ပန်းချီအကောင့်ထဲ၌ ကိုယ်ရေးကိုယ်တာ မက်ဆေ့ချ်များစွာ ရောက်ရှိနေသည်ကို အံ့အားသင့်ဖွယ် တွေ့လိုက်ရသည်။

စုံစမ်းကြည့်လိုက်သည့်အခါတစ်စုံတစ်ယောက်က သူမအား ကူးယူဖော်ပြမှု နှင့် မူပိုင်ခွင့် ချိုးဖောက်မှုများဖြင့် စွပ်စွဲထားကြောင်း သိလိုက်ရသည်။

ဤပြဿနာမှာ မင်ယွဲ့ ယခင်က တင်ခဲ့ဖူးသည့် ဗိုက်သားများ ပေါ်လွင်နေသော အမျိုးသားတစ်ဦး၏ ပန်းချီကားကြောင့် စတင်ခဲ့ခြင်း ဖြစ်သည်။

ထိုပုံကြောင့်ပင် မင်ယွဲ့၌ ပရိသတ်များစွာ တိုးပွားခဲ့သော်လည်း ယခုအခါတွင်မူ ဝေဖန်တိုက်ခိုက် သူများ ရုတ်တရက် ပေါ်ပေါက်လာခဲ့သည်။

စတင်စွပ်စွဲသူမှာ နာမည်ကြီး ပန်းချီဆရာတစ်ဦးဖြစ်ပြီး မင်ယွဲ့၏ ပန်းချီကားမှာ သူ၏ အိုင်ဒေါ ဖြစ်သူ 'ရန်ရန်' အတွက် သူရေးဆွဲထားသည့် ဇာတ်ကောင်ဒီဇိုင်းကို ခိုးယူထားခြင်းဖြစ်သည်ဟု စွပ်စွဲခဲ့သည်။

ထို့နောက်တွင်မူ ထိုပန်းချီဆရာ၏ ပရိသတ်များနှင့် 'ရန်ရန်' ၏ ပရိသတ်များမှာ မင်ယွဲ့၏ အကောင့်ထဲသို့ အလုံးအရင်းဖြင့် ဝင်ရောက်ကာ ဆဲဆိုတိုက်ခိုက်ကြတော့သည်။

မင်ယွဲ့သည် ဤအကောင့်ထဲသို့ မဝင်ဖြစ်သည်မှာ ကြာပြီဖြစ်သော်လည်း အခြေအနေများမှာ တဖြည်းဖြည်း ပိုမိုဆိုးရွားလာကာ ယခုအခါ ပေါက်ကွဲလုနီးပါး အခြေအနေသို့ ရောက်ရှိနေပြီ ဖြစ်သည်။

သူမသာ ဤအချိန်တွင် ပေါ်လာပါက လူအများ၏ တိုက်ခိုက်မှုကို ခံရနိုင်ချေ ရှိသည်။

သို့သော် မင်ယွဲ့သည် စိတ်ဓာတ်ခိုင်မာသူဖြစ်ရာ အင်တာနက်နောက်ကွယ်မှ ကီးဘုတ်သူရဲကောင်းများကို အနည်းငယ်မျှ ကြောက်ရွံ့ခြင်း မရှိပေ။

ရှောင်ယွဲ့ (Little Moon): "ရှင်တို့ရဲ့ ပရိသတ်တွေကို ထိန်းသိမ်းပေးကြပါဦး @ရန်ရန်ရဲ့ ပန်းချီဆရာလေး @ရန်ရန်"

မူလက မင်ယွဲ့သည် သူမ၏ ပန်းချီများကိုသာ အေးအေးဆေးဆေး တင်လေ့ရှိပြီး ပရိသတ် အနည်းငယ်သာ ရှိခဲ့သည်။

ယခုတစ်ကြိမ်တွင် တိုက်ခိုက်သူများစွာ ရှိနေသော်လည်း အများစုမှာ သူမကို မုန်းတီးသူများသာ ဖြစ်သည်။ မင်ယွဲ့က ထိုသူများကို တိုက်ရိုက် 'Tag' ခေါ်လိုက်ခြင်းမှာ လူအများ၏ အာရုံစိုက်မှုကို ပိုမိုရရှိစေခဲ့သည်။

"ရှောင်ယွဲ့... နောက်ဆုံးတော့ နင် ပေါ်လာပြီပဲ၊ ငါတို့ နင့်ကို ယုံကြည်တယ်"

မင်ယွဲ့သည် အွန်လိုင်းတွင် အလုပ်သိပ်မလုပ်သော်လည်း သူမ၏ ပရိသတ်များမှာမူ အစကတည်းက သူမကို ချစ်မြတ်နိုးသူများဖြစ်ရာ ယခုကဲ့သို့ အခက်အခဲကြုံချိန်တွင် အခိုင်အမာ ရပ်တည်ပေးကြသည်။

"အိုး... နောက်ဆုံးတော့ ပေါ်လာပြီပေါ့၊ ပြစ်ဒဏ်ခံရမှာ ကြောက်လို့ အင်တာနက်ပေါ်ကနေ ထွက်ပြေးသွားပြီ ထင်နေတာ"

ဟု ရန်ရန်၏ ပရိသတ်တစ်ဦးက လာရောက် မန့်ခဲ့သည်။

"သူ့လို ခိုးချတတ်တဲ့လူက ဒီလောက် ဝေဖန်ခံရရုံနဲ့ အင်တာနက်ပေါ်က ပျောက်သွားပါ့မလား၊ နင်တို့က သူ့ကို အထင်ကြီးလွန်းနေပြီ"

"ရန်ရန့်မှာ နင့်လို ပရိသတ်မျိုး ရှိနေတာ ရှက်စရာပဲ၊ ရန်ရန့်ပုံကို ဆွဲပေးလို့ ငါတို့ ဝမ်းသာပေမဲ့ နာမည်မရှိသေးတဲ့ ပန်းချီဆရာတစ်ယောက်ရဲ့ အလုပ်ကို ဘယ်လိုဖြစ်လို့ ခိုးချရတာလဲ"

......

မင်ယွဲ့မှာ စကားပင် မဆိုနိုင်တော့ဘဲ တစ် ချက်ချင်း ပြန်လည် တုံ့ပြန်လိုက်သည်။

"ကျွန်မက ရန်ရန့်ရဲ့ ပရိသတ် မဟုတ်ပါဘူး၊ ကိုယ့်ဘာသာကိုယ် လျှောက်မတွေးပါနဲ့"

"ကျွန်မ ခိုးချခြင်း ရှိ၊ မရှိ ဆိုတာက ရှင်တို့ ဆုံးဖြတ်ရမယ့် ကိစ္စမဟုတ်ဘူး"

"ကျွန်မက မူပိုင်ခွင့် ချိုးဖောက်တာလား၊ ဒါမှမဟုတ် တစ်စုံတစ်ယောက်က ကျွန်မဆီကနေ ငွေညှစ်ဖို့ ကြိုးစားနေတာလား"

မင်ယွဲ့၏ ပရိသတ်များကလည်း ဝိုင်းဝန်း အားပေးကြသည်။

"ရှောင်ယွဲ့က အားကောင်းမောင်းသန်ပဲ၊ ငါတို့ နင့်ကို အမြဲတမ်း ထောက်ခံသွားမှာပါ"

"ရှောင်ယွဲ့ရဲ့ ပန်းချီစွမ်းရည်က သိသိသာသာ ပိုကောင်းတာပဲ၊ ဟိုဘက်က ဘာတွေ လိမ်လည်ဖို့ ကြိုးစားနေတာလဲ မသိဘူး"

မင်ယွဲ့သည် ပရိသတ်များနှင့် တိုက်ရိုက် ရင်ဆိုင်လာသည့်အခါ သူမ၏ အင်အားမှာ ချက်ချင်းပင် သိသာထင်ရှားလာခဲ့သည်။

အိုင်ဒေါ 'ရန်ရန်' နှင့် နှိုင်းယှဉ်လျှင် အင်အားနည်းသေးသော်လည်း သူမ၏ တုံ့ပြန်မှုများမှာ ပြတ်သားလှသည်။

ရန်ရန်မှာမူ အစပိုင်းတွင် သေချင်ယောင်ဆောင်နေခဲ့သည်။ အကြောင်းမှာ ထိုပန်းချီဆရာလေးမှာ သူ၏ အမာခံပရိသတ် ဖြစ်သော်လည်း မင်ယွဲ့၏ ပန်းချီများမှာလည်း အလွန်လှပသောကြောင့် ဖြစ်သည်။

မည်သူက မည်သူ့ကို ခိုးချသည်ဖြစ်စေ ဤကိစ္စကြောင့် သူ၏ နာမည်ကြီးမှု ပိုမို တိုးတက်လာမည်ဆိုပါက သူက ဂရုမစိုက်ပေ။ သို့သော် မင်ယွဲ့က သူ့ကို တိုက်ရိုက် 'Tag' ခေါ်လာသည့်အခါတွင်မူ သူ တုံ့ပြန်ရန် လိုအပ်လာသည်။

အကျိုးအမြတ်ကို ချိန်ဆပြီးနောက် သူသည် ပန်းချီဆရာလေးဘက်မှ ရပ်တည်ရန် ဆုံးဖြတ် လိုက်သည်။

ရန်ရန်: "ပထမဆုံးအနေနဲ့ အားပေးကြတဲ့သူတွေကို ကျေးဇူးတင်ပါတယ်၊ ကျွန်တော့်ပုံကို ဆွဲပေးကြတာကို ကြိုဆိုပေမဲ့ မူပိုင်ခွင့်ကို လေးစားဖို့တော့ မမေ့ကြပါနဲ့ဦး"

ထိုစကားမှာ မင်ယွဲ့၏ အမည်ကို တိုက်ရိုက် မရည်ညွှန်းသော်လည်း သူမကို ဆိုလိုခြင်းဖြစ်ကြောင်း အထင်အရှားပင် ဖြစ်သည်။

ရန်ရန့်၏ သြဇာမှာ အလွန်ကြီးမားရာ သူ၏ မှတ်ချက်ကြောင့် ပရိသတ်များမှာ ပိုမို သောင်းကျန်းလာကြတော့သည်။

"ဘယ်လိုလူမျိုးက ငါတို့ အစ်ကို့ကို တိုက်ရိုက် 'Tag' ခေါ်ရဲတာလဲ"

"ငါတို့ အစ်ကိုက စိတ်သဘောထား အရမ်းကောင်းတာပဲ၊ ဒီလောက်ဖြစ်နေတာတောင် စိတ်မဆိုးဘူး”

"အစ်ကို... သူ့လို လူစားမျိုးက အစ်ကို့ကို ကြိုက်နေတာကို ကျေးဇူးတင်နေဖို့ မလိုပါဘူး၊ ရွံစရာကြီး"

မင်ယွဲ့သည် ထိုကိစ္စများကို ကြည့်ကာ ရယ်မောလိုက်မိသည်။

“တကယ့်ကို ကြည့်လို့ကောင်းတဲ့ မြင်ကွင်းပါပဲလား"

ရှောင်ယွဲ့: "ကိုယ့်ကိုယ်ကိုယ် အထင်မကြီးပါနဲ့ဦး၊ ကျွန်မက ရှင့်ရဲ့ ပရိသတ် မဟုတ်ပါဘူး @ရန်ရန်"

မင်ယွဲ့၏ ပြတ်သားပြီး ရိုင်းစိုင်းလှသော စကားများကြောင့် အွန်လိုင်းပေါ်တွင် ပွက်လောရိုက်သွားတော့သည်။

"ဒါ ဘာကောင်လဲ၊ ဒီလောက်တောင် မောက်မာရဲတာလား"

ရန်ရန်သည် ယခုအခါ ရိုက်ကွင်းတစ်ခုတွင် ရောက်ရှိနေသည်။

သူသည် အိုင်ဒေါတစ်ဦးအဖြစ် စတင်ခဲ့ပြီး ပရိသတ်အင်အား တောင့်တင်းသောကြောင့် ရုပ်ရှင်အဖွဲ့အချို့က သူ့ကို ငှားရမ်းကြခြင်း ဖြစ်သည်။ ယခုအခါ သူသည် မိတ်ကပ်လိမ်းသည့် အခန်းထဲတွင် ဒေါသတကြီးဖြင့် ပစ္စည်းများကို လွှင့်ပစ်နေသည်။

"ရန်ကော... အဆင့်မရှိတဲ့လူအတွက်နဲ့ စိတ်မဆိုးပါနဲ့၊ သူက အွန်လိုင်းပေါ်က နာမည်မရှိတဲ့ ပန်းချီဆရာတစ်ယောက်ပါ၊ တစ်ယောက်ယောက်က သူ့ကို အဆုံးမပေးပါလိမ့်မယ်"

ဟု လက်ထောက်က ချော့မော့ရင်း ကြမ်းပြင်ပေါ်မှ ပစ္စည်းများကို ကောက်လိုက် သည်။

ရန်ရန်သည် ဖုန်းကို ထုတ်ကြည့်လိုက်ပြီး ရုတ်တရက် ရယ်မောလိုက်မိသည်။ မင်ယွဲ့၏ မက်ဆေ့ချ်များမှာ ရန်ရန့်ပရိသတ်များ၏ ဆဲဆိုမှုများဖြင့် ပြည့်နှက်နေပြီ ဖြစ်သည်။

"ဒီလူ့ရဲ့ လည်ပင်း ဘယ်ဘက်ခြမ်းမှာ မှည့်တစ်လုံးရှိတယ်၊ အဲဒါ ငါတို့ အစ်ကိုမဟုတ်ဘူးလို့ နင် ပြောရဲသေးလား"

"ဒီလူ ဝတ်ထားတဲ့ အင်္ကျီက 'တာရှမ်း' တံဆိပ်လေ၊ ငါတို့ အစ်ကိုက အဲဒီတံဆိပ်ရဲ့ သံတမန်ဆိုတာ လူတိုင်းသိတယ်"

"နင် အခုချက်ချင်း တစ်ကမ္ဘာလုံးကို တောင်းပန်လိုက်စမ်း၊ မဟုတ်ရင် နင့်ရဲ့ ကိုယ်ရေးကိုယ်တာ အချက်အလက်တွေကို ငါတို့ ဖွင့်ချပစ်မယ်"

မင်ယွဲ့သည် ဆဲဆိုမှုများကို ကြည့်ကာ ရန်ရန်ကိုယ်တိုင်ကလည်း အဆင့်မရှိသလို သူ၏ ပရိသတ်များမှာလည်း ထိုနည်းတူပင်ဖြစ်ကြောင်း ခံစားလိုက်ရသည်။ သူမကတော့ အနည်းငယ်မျှ ကြောက်ရွံ့ခြင်း မရှိပေ။

"လည်ပင်းမှာ မှည့်ရှိတိုင်း ရှင့်တို့ အစ်ကိုလို့ ဘယ်သူပြောလဲ"

"ကမ္ဘာကြီးက လူတိုင်းပိုင်တာလေ၊ ရှင့်တို့ အစ်ကိုတစ်ယောက်တည်း ပိုင်တာ မဟုတ်ဘူး"

"ငါ့အကြောင်းကို ဖွင့်ချမလို့လား... လာခဲ့လေ၊ ငါက စံပြနိုင်ငံသားတစ်ယောက်အနေနဲ့ ရဲကို အကူအညီတောင်းမှာပေါ့"

မင်ယွဲ့သည် ခပ်စပ်စပ် တုံ့ပြန်မှုများစွာကို ရေးသားလိုက်သည်။ သူမ၏ ပရိသတ်များမှာလည်း သူမ၏ ရဲရင့်မှုကို ကြည့်ကာ အားတက်နေကြသည်။

ရှောင်ယွဲ့: "ငါက ငါ့အစ်ကို့ပုံကို ဆွဲတာ၊ နင်တို့အစ်ကို့ပုံကို ဆွဲတာမဟုတ်ဘူး"

ထိုသို့ပြောရင်း မင်ယွဲ့သည် ပန်းချီ၏ မူရင်းဓာတ်ပုံကို ပူးတွဲ တင်ပြလိုက်သည်။ ထိုဓာတ်ပုံမှာ မိုဟန်ကျီက WeChat Moments တွင် သူမတစ်ယောက်တည်း မြင်နိုင်ရန် တင်ခဲ့သော သူ၏ ဗိုက်သားဓာတ်ပုံ ဖြစ်သည်။

ထိုစဉ်က မိုဟန်ကျီ၏ အပြုအမူကို သူမက ရယ်စရာဟု ထင်ခဲ့သော်လည်း ယခုအခါတွင်မူ ထိုဓာတ်ပုံက သူမအတွက် အကြီးမားဆုံး သက်သေ ဖြစ်လာခဲ့သည်။

မိုဟန်ကျီသည် ဖျော်ဖြေရေးလောကမှ လူတစ်ဦး မဟုတ်သော်လည်း စီးပွားရေးလောကတွင် အလွန်ထင်ရှားသူ ဖြစ်သည်။

သူနှင့် မင်ယွဲ့တို့၏ စေ့စပ်ကြောင်းလမ်းမှုကို လူတိုင်း မှတ်မိနေကြဆဲပင်။ ဓာတ်ပုံထွက်လာသည့်အခါတွင်မူ အခြေအနေများမှာ လုံးဝ ပြောင်းလဲသွားတော့သည်။

"ဒါ ရှင်းယောင်လုပ်ငန်းစုက မစ္စတာမိုပဲ၊ သူ့ရဲ့ လည်ပင်းဘယ်ဘက်မှာလည်း မှည့်ရှိတာပဲဟ"

"နင်တို့တော့ သွားပြီ၊ ရန်ရန့်ကို သွားပုတ်လေလွင့် ပြောရင် ကိုယ်ရေးကိုယ်တာ ဖွင့်ချခံရရုံပဲ ရှိမယ်၊ ဒါပေမဲ့ မစ္စတာမိုကို သွားထိရင်တော့ နင်တို့ မိသားစုလိုက် ဒေဝါလီခံရလိမ့်မယ်"

"အလို... ရန်ရန့်ပရိသတ်တွေ မျက်နှာ ဘယ်နားသွားထားမလဲ မသိဘူး၊ အခုရော အဲဒါ ရှင့်တို့အစ်ကိုလို့ ပြောဦးမလား"

"မျက်နှာကို ဖြတ်ရိုက်ခံလိုက်ရတဲ့ ခံစားချက်က တကယ်ကို မိုက်တယ်ဟေ့"

ရန်ရန်၏ ပရိသတ်များမှာ မကျေမနပ်ဖြစ်ကာ ရမ်းသန်း တိုက်ခိုက်နေကြသော်လည်း အခြေအနေမှာ သူတို့ဘက်တွင် မရှိတော့ပေ။

ရှင်းယောင်လုပ်ငန်းစု၏ အများပြည်သူ ဆက်ဆံရေးဌာန (PR) သည်လည်း ဤသတင်းကို ချက်ချင်း သတိပြုမိသွားသည်။

"မစ္စတာမို... Weibo ပေါ်မှာ တစ်ယောက်ယောက်က မစ္စတာမိုရဲ့ ဗိုက်သားဓာတ်ပုံကို Photoshop နဲ့ ပြင်ပြီး တင်ထားပါတယ်"

ဟု ဝန်ထမ်းအချို့က တီးတိုး ပြောဆိုနေကြသည်။

လက်ထောက်လင်သည် တွေဝေနေမိသည်။ မစ္စတာမိုသည် ဤသို့သော ဓာတ်ပုံမျိုးကို ရိုက် မည့်သူ မဟုတ်ဟု သူ ထင်ထားခဲ့သည်။

သို့သော် ပန်းချီကားမှာ အလွန်လက်ရာမြောက်လှသဖြင့် ထိုပန်းချီဆရာမလေးအတွက် သူ စိုးရိမ်နေမိသည်။ မစ္စတာမိုက စိတ်ဆိုးပြီး သူမကို အပြတ်ရှင်းပစ်မည်လား။

မိုဟန်ကျီသည် Weibo ကို ဖွင့်ကြည့်လိုက် သည့်အခါ သူ၏ ဗိုက်သားဓာတ်ပုံကြီးကို မြင် လိုက်ရသဖြင့် ခေတ္တမျှ မှင်တက်သွားသည်။

သူသည် ရှက်ကြောက်တတ်သူ မဟုတ်သလို ဤဓာတ်ပုံမှာလည်း အဝတ်ဗလာ မဟုတ်သဖြင့် သူက ဂရုမစိုက်ပေ။ သို့သော် သူ၏ ဓာတ်ပုံက မိန်းကလေးများကြားတွင် ဤမျှ ရေပန်းစားနေလိမ့်မည်ဟု သူ မထင်ထားခဲ့ပါ။

ဤဓာတ်ပုံကို မင်ယွဲ့တစ်ယောက်တည်းသာ မြင်နိုင်ရန် တင်ခဲ့ခြင်းဖြစ်ရာ ယခု အွန်လိုင်းပေါ်သို့ ရောက်နေသည်မှာ မင်ယွဲ့ကိုယ်တိုင် တင်လိုက် ခြင်း ဖြစ်ကြောင်း သူ သိလိုက်သည်။

"မစ္စတာမို... အဲဒီ ရှောင်ယွဲ့ ဆိုတဲ့ အကောင့်ကို အရေးယူလိုက်ရမလား"

ဟု လက်ထောက်လင်က အသံတိုးတိုးဖြင့် မေးလိုက်သည်။

မိုဟန်ကျီက ဖုန်းကို ပိတ်လိုက်ပြီး အေးအေးလူလူပင် လက်ကာပြလိုက်သည်။

"ဘာမှ လုပ်စရာ မလိုဘူး"

လက်ထောက်လင်မှာ အံ့အားသင့်သွားသည်။

မစ္စတာမိုက ဤမျှ စိတ်သဘောထား ကြီးနေပါသလား။

"အဲဒါ ယွဲ့ယွဲ့ရဲ့ အကောင့်ပဲ၊ မင်း ထွက်သွားလို့ ရပြီ"

မိုဟန်ကျီ၏ စကားကြောင့် လက်ထောက်လင်မှာ သက်ပြင်းချနိုင်တော့သည်။ ဥက္ကဋ္ဌကတော် ကိုယ်တိုင် ဆွဲတာဆိုမှတော့ ပြဿနာ မရှိတော့ပြီ။

"ဒါဆို... ဒီဓာတ်ပုံက အစစ်ပေါ့"

ဟု သူ တွေးလိုက်သော်လည်း ဆက်မမေးရဲတော့ပေ။

လက်ထောက်လင်သည် PR ဌာနသို့ သွားကာ အခြေအနေကို ရှင်းပြလိုက်သည်။

"ရှောင်ယွဲ့က ဥက္ကဋ္ဌကတော်ပဲ၊ အားလုံး အလုပ် ပြန်လုပ်ကြတော့"

PR ဝန်ထမ်းများမှာ အံ့အားသင့်ကာ အော်ဟစ် လိုက်ကြသည်။

"ဟာ... မစ္စတာမိုနဲ့ ဥက္ကဋ္ဌကတော်တို့ရဲ့ သီးသန့်ဘဝက ဒီလောက်တောင် လှုပ်ခတ်စရာ ကောင်းတာလား"

"အာဏာရှင် ဥက္ကဋ္ဌကြီးနဲ့ ပန်းချီဆရာမလေးရဲ့ အချစ်ဇာတ်လမ်းက တကယ်ကို ရင်ခုန်စရာပဲ"

မိုဟန်ကျီသည် အွန်လိုင်းမှ မှတ်ချက်အချို့ကို ကိုယ်တိုင် ပြန်လည် ဖြေကြားလိုက်သည်။

"ဒါက Photoshop မဟုတ်ပါဘူး၊ ကျွန်တော့်ရဲ့ ကိုယ်ပိုင်ဓာတ်ပုံပါ"

"တောင်းပန်စရာ မလိုပါဘူး၊ ကျွန်တော် ရှောင်ယွဲ့ကို တကယ် သဘောကျပါတယ်"

မိုဟန်ကျီ၏ တုံ့ပြန်မှုကြောင့် အွန်လိုင်းတွင် ပိုမို ပွက်လောရိုက်သွားပြန်သည်။

မင်ယွဲ့နှင့် မိုဟန်ကျီကို အားပေးသူများမှာမူ ဝမ်းသာအားရ ဖြစ်နေကြသော်လည်း အချို့ကမူ ဤသည်မှာ ဟန်ဆောင်မှုသာ ဖြစ်သည်ဟု ထင်နေကြသည်။

မင်ယွဲ့သည် သူမ၏ အကောင့်ထဲသို့ ဝင်ကြည့်လိုက်သည့်အခါ မိုဟန်ကျီ၏ မှတ်ချက်တစ်ခုကို တွေ့လိုက်ရသည်။

"မင်းက ဒီလိုပုံစံမျိုးကို ကြိုက်တာလား၊ ငါကတော့ ၂၄ နာရီလုံး အဆင်သင့်ရှိနေပါတယ်"

လူအများမှာ မင်ယွဲ့၏ အကောင့်ထဲသို့ တိုးဝှေ့ဝင်ရောက်လာကြပြီး နောက်ပြောင်နေကြတော့သည်။

"အိုး... ဒါက ဖောက်ပြန်တာ မဟုတ်ဘူး၊ ဒါက တကယ့်ကို ရိုမန့်တစ် ဆန်လွန်းတာပဲ"

"နေပါဦး... ကျွန်တော် အရင် တန်းစီပါရစေ၊ အစ်မ... မစ္စတာမိုနဲ့ လမ်းခွဲဖြစ်ရင် ကျွန်မကို ထည့်စဉ်းစားပေးပါဦး၊ ကျွန်တော်က အရပ် ၁၈၇ စင်တီမီတာ ရှိတဲ့ အားကစားတက္ကသိုလ် ကျောင်းသားပါ"

အခန်း (၄၀၂) ကျွန်တော်က မင်းရဲ့ တစ်ဦးတည်းသော သစ္စာရှိနောက်လိုက်ပါ

"—အပေါ်ကလူက အခု Blind Date လုပ်နေတာလား၊ အဆင်ပြေသွားရင်လည်း သိရအောင် ကျွန်တော့်အကြောင်းလေး အရင်ပြောပြပါရစေ အစ်မ... ကျွန်တော့်ကို ကြည့်ပါဦး၊ ကျွန်တော့်မှာ ဟိုင်ချန်နဲ့ ယန်ကျင်း နှစ်နေရာလုံးမှာ အိမ်ပိုင်ရှိပါတယ်၊ ကြိုက်တဲ့နေရာမှာ နေလို့ရတယ် ကျွန်တော့်မိသားစုကလည်း စီးပွားရေးလုပ်တာဆိုတော့ အတော်လေး ချမ်းသာပါတယ်..."

"အွန်လိုင်းပေါ်က ကံကြမ္မာက ကျွန်တော်တို့ကို ဆုံစည်းပေးခဲ့တာပဲ၊ ဒီအဆက်အသွယ်လေးကို တန်ဖိုးထားပါရစေ အစ်မတို့... ကျွန်တော့်ကို ကြည့်လိုက်ပါ၊ ကျွန်တော်က ချစ်စရာကောင်းတဲ့ ခွေးပေါက်လေးလိုရော၊ ကြောက်စရာကောင်းတဲ့ ဝံပုလွေလိုရော ပုံစံမျိုးစုံ ဖြစ်ပေးနိုင်ပါတယ်၊ အစ်မတို့ လိုချင်တာ အကုန်ရှိတယ်..."

......

မှတ်ချက်ပေးသည့် ကဏ္ဍမှာ ရုတ်တရက် လားရာပြောင်းလဲသွားတော့သည်။

မိုဟန်ကျီကို ဝေဖန်ရာမှ မင်ယွဲ့ကို လမ်းခွဲရန် တိုက်တွန်းသည့်အဆင့်၊ ထို့နောက်တွင်မူ မိမိကိုယ်ကိုယ် အိပ်ဖော်အဖြစ် ကမ်းလှမ်းသည့် အဆင့်အထိ ပွက်လောရိုက်သွားခဲ့သည်။

ရုံးခန်းထဲတွင် ထိုင်နေသော မိုဟန်ကျီ၏ မျက်နှာမှာ မှောင်မှောင်မည်းမည်း ဖြစ်နေတော့သည်။

"လက်ထောက်လင်... ဝင်ခဲ့စမ်း"

လက်ထောက်လင်သည် ဖရဲသီးခင်းထဲမှ ဖျံတစ်ကောင်ကဲ့သို့ အကောင့်သုံးခုကြားတွင် ကူးလူးပျံနှံ့နေခဲ့သူ ဖြစ်သည်။

သူသည် အလုပ်အကိုင် ကျင့်ဝတ်ရှိသူပီပီ အလွန်အမင်း ရယ်ချင်နေသော်လည်း အောင့်ထားလိုက်ရသည်။ သူဌေး ခေါ်သံကြားသည့်အခါ သူသည် ပြုံးစိစိဖြစ်နေသော နှုတ်ခမ်းကို အတင်းထိန်းချုပ်ကာ တံခါးဖွင့်၍ ဝင်သွားလိုက်၏။

"မစ္စတာမို... ခေါ်တာလားခင်ဗျ"

"ဒီမှာ လျှောက်ပြောနေတဲ့ အကောင့်တွေအကုန်လုံးကို ပိတ်ပစ်လိုက်စမ်း"

မိုဟန်ကျီသည် စားပွဲပေါ်သို့ လက်ချောင်းများဖြင့် ခပ်ပြင်းပြင်း ခေါက်နေမိသည်။ သူ၏ စိတ်မအေးမှုကို ပြသနေခြင်းပင်။

"မစ္စတာမို... အဲဒါတွေက အပျော်သဘော နောက်ပြောင်နေကြတာပါ၊ အလေးအနက်မထားပါနဲ့ မစ္စတာမိုနဲ့ မင်ယွဲ့လေးကမှ တကယ့်အချစ် စစ်တွေပါဗျ"

ဟု လက်ထောက်လင်က အလျင်အမြန် ချော့မော့လိုက်သည်။

မိုဟန်ကျီသည် ဟောင်ဖျင်းနေကြသော ကလေးငယ်များကို ကြည့်ကာ မင်ယွဲ့က အလေးထားမည် မဟုတ်ကြောင်း သိသော်လည်း ဒေါသထွက်နေမိဆဲ ဖြစ်သည်။

လက်ထောက်လင်ကတော့ သက်ပြင်းသာ ချမိတော့သည်။ သူ၏ သူဌေးမှာ အင်တာနက် သိပ်သုံးလေ့မရှိသူဖြစ်ရာ ခေတ်ပေါ် ဟာသများနှင့် စကားပြောအဖွဲ့များ၏ သဘောသဘာဝကို အမှန်တကယ်ပင် နားမလည်ရှာပေ။

မိုဟန်ကျီ၏ မျက်လုံးများ ရုတ်တရက် ပြူးကျယ်သွားပြီး ဖုန်းကို တင်းတင်းဆုပ်ကိုင် လိုက်သည်။

"တစ်ယောက်ယောက်ကို 'ဇနီး' လို့ ခေါ်တာ ထားပါဦး၊ အခုဟာက အမျိုးသမီးတစ်ယောက်ကို 'ခင်ပွန်း' လို့ ဘယ်လိုလုပ် ခေါ်နိုင်ရတာလဲ၊ ဒါက ယဉ်ကျေးမှုကို စော်ကားတာပဲ"

လက်ထောက်လင်သည် သူ၏ တွန့်ချိုးသွားသော မျက်ခုံးများနှင့် ထိန်းမရသော ပြုံးချင်စိတ်ကို ဖုံးကွယ်ရန် ခေါင်းကို ငုံ့ထားလိုက်ရသည်။

မစ္စတာမို သဝန်တိုလာလျှင် တစ်ရုံးလုံး ချဉ်စော်နံတော့မည် မဟုတ်ပါလား။

မင်ယွဲ့မှာမူ ထိုမှတ်ချက်များကို ဒေါသတကြီး ပြန်လည်ဖြေကြားနေသော မိုဟန်ကျီကို ကြည့်ကာ ပို၍ပင် ရယ်မောနေမိသည်။

ရှောင်ယွဲ့: "ဒီည ကျွန်မရဲ့ အိပ်ရာကို လာနွေးပေးဖို့ ဘယ်လိုလဲ"

ထို့နောက် သူမသည် မိုဟန်ကျီ၏ အကောင့်မှ တင်ထားသော (မင်းက ဒီလိုပုံစံမျိုးကို ကြိုက်တာလား၊ ငါကတော့ ၂၄ နာရီလုံး အဆင်သင့်ရှိနေပါတယ်) ဆိုသည့် မှတ်ချက်ကို တိုက်ရိုက် 'Forward' လုပ်လိုက်သည်။

အထူးအကြောင်းကြားချက် အသံမြည်လာသည်နှင့် မိုဟန်ကျီသည် မင်ယွဲ့၏ Weibo ပို့စ်ကို ချက်ချင်း မြင်လိုက်ရသည်။

လက်ထောက်လင်သည် ရုံးခန်းအတွင်းရှိ လေထုမှာ ပေါ့ပါးသွားသည်ဟု ခံစားလိုက်ရသော်လည်း ဥက္ကဋ္ဌကြီးက သူ့ကို မေ့သွားပုံရသည်။

သူလည်း အတင်းအဖျင်းတွေကို ဆက်ဖတ်ချင်သေးသဖြင့် အပြင်ထွက်ခိုင်းရန်သာ မျှော်လင့်နေမိသည်။

"ကျွန်တော့်အတွက် ဂုဏ်ယူစရာပါပဲ... ချစ်ရတဲ့ ရှောင်ယွဲ့လေး"

ဤသို့ ပြန်လည်ရေးသားပြီးနောက်တွင်မူ မိုဟန်ကျီသည် စိတ်ကျေနပ်မှု အပြည့်ဖြင့် လန်းဆန်းသွားတော့သည်။ လက်ထောက်လင်မှာလည်း သူဌေး၏ ပျော်ရွှင်မှုကို အတိုင်းသား သိမြင်နေရသည်။

"မင်း ရှိနေသေးတာလား၊ အပြင်ထွက်ပြီး အလုပ်သွားလုပ်တော့"

မိုဟန်ကျီက လက်ကာပြလိုက်ရာ လက်ထောက်လင်သည် ချက်ချင်းပင် အပြင်သို့ ထွက်လာခဲ့ပြီး ဖုန်းကို ထုတ်ကြည့်လိုက် တော့သည်။

ရုံးခန်းအနီးတွင် ဝန်ထမ်းများ သွားလာနေသဖြင့် သူသည် အနားယူခန်းသို့ သွားလိုက်သည်။ သို့သော် အနားယူခန်းထဲတွင်လည်း ဝန်ထမ်းများမှာ ဤသတင်းကိုပင် စိတ်အားထက်သန်စွာ ဆွေးနွေးနေကြသည်ကို တွေ့လိုက်ရ၏။

"ဒီအတွဲကတော့ ငါတို့ကို အချိုတွေ ကျွေးပြန်ပြီ၊ တကယ့်ကို ပျော်စရာနေ့လေးပဲ"

"သူများတွေ အချစ်နယ်ကျွံနေတာကို ကြည့်ရတာ အချစ်ထက်တောင် ပိုချိုမြိန်သေးတယ်"

မိုဟန်ကျီသည် ဖုန်းကို ပျော်ရွှင်စွာ ကြည့်နေဆဲ ဖြစ်သည်။

"—ညီမတို့ရေ... မစ္စတာမို တင်တာကို ကြည့်ကြဦး၊ 'ချစ်ရတဲ့ ရှောင်ယွဲ့လေး' တဲ့၊ အဲဒါ ပန်းချီဆရာမလေးရဲ့ အကောင့်နာမည် မဟုတ်ဘူးလား"

"ဒါဆို ရှောင်ယွဲ့က မင်ယွဲ့လေးပေါ့၊ ငါကလည်း အတုံးလိုက် အတစ်လိုက်ပဲ... ဒါကိုတောင် မစဉ်းစားမိဘူး"

"ယန်ကျင်းတက္ကသိုလ်ကနေ ဘဏ္ဍာရေးနဲ့ နိုင်ငံခြားဘာသာစကား မဟာဘွဲ့ နှစ်ခုလုံးရထားတဲ့သူက ပန်းချီဆွဲတာ ဒီလောက် တော်လိမ့် မယ်လို့ ဘယ်သူထင်မှာလဲ"

"ဒီလောက် ငယ်ငယ်လေးနဲ့ နယ်ပယ်စုံမှာ ကျွမ်းကျင်နေတာ အံ့သြဖို့ကောင်းလိုက်တာ"

"—မင်းတို့ရဲ့ ချစ်ခြင်းတွေ ထာဝရ တည်မြဲပါစေ"

"အာ... မစ္စတာမိုက ငါ့ပို့စ်ကို 'Like' ပေးသွားတယ်၊ ငါ့ဘဝမှာ ဒီလောက် ကံကောင်းဖူးတာ ဒါပထမဆုံးပဲ၊ ဆုတောင် တစ်ခါမှ မပေါက်ဖူးဘူး၊ အရမ်းရင်ခုန်တာပဲ"

ဟု ပရိသတ်တစ်ဦးက အော်ဟစ်လိုက်သည်။

မိုဟန်ကျီသည် ထိုကံကောင်းသော ပရိသတ်ကို ငွေကျပ် (၁၀,၀၀၀) တန်ဖိုးရှိ ဆုတစ်ခုကို တိုက်ရိုက် ပေးအပ်လိုက်သည်။ ထိုအခါတွင်မူ မှတ်ချက်ပေးသည့် ကဏ္ဍမှာ ပိုမို ဆူညံသွားတော့သည်။

"မင်ယွဲ့လေးက တကယ်ကို မျက်စိပွင့်နားပွင့် ရှိတာပဲ၊ မစ္စတာမိုရဲ့ ခန္ဓာကိုယ်က တကယ်ကို မိုက်တယ်ဟ"

"ရှောင်ယွဲ့လေး... ကလေးက ဗိုက်ဆာနေပြီ၊ အစာကျွေးပါဦး"

မင်ယွဲ့မှာမူ ထိုမှတ်ချက်များကြောင့် မျက်နှာတွင် အစင်းကြောင်းများ ထင်သွားတော့သည်။

ရှောင်ယွဲ့: "ဒါ ငါ့အပိုင်ပဲ၊ နင်တို့ကို မပြနိုင်ဘူး"

မိုဟန်ကျီ: "ကျွန်တော်က မင်းရဲ့ တစ်ဦးတည်းသော သစ္စာရှိနောက်လိုက် ဖြစ်နေမှာပါ"

မိုဟန်ကျီ၏ စကားကြောင့် ဖန်သားပြင်ထက်တွင် အော်ဟစ်သံများနှင့် ကောင်းချီးပေးသံများ ပြည့်နှက်သွားသည်။

"မင်္ဂလာဆောင်ရင် ကျွန်တော့်ကို ဖိတ်ဖို့ မမေ့နဲ့ဦးနော်"

"ကျွန်တော် လူပျိုကြီးကတော့ ကြည့်ရင်းနဲ့ ငိုရမလို ရယ်ရမလိုပဲ၊ အမေကတော့ ကျွန်တော့်ကို အရူးထနေတယ် ထင်နေပြီ"

အွန်လိုင်းပေါ်မှ အပြန်အလှန် တုံ့ပြန်မှုများကြောင့် မိုဟန်ကျီ၏ ရင်ထဲတွင် စိတ်လှုပ်ရှားမှုများ တားမရ ဆီးမရ ဖြစ်ပေါ်လာသည်။

သူသည် အလုပ်စားပွဲကို ချက်ချင်း သိမ်းဆည်းပြီး လက်ထောက်လင်ကို မှာကြားစရာရှိသည်များ မှာကာ အလုပ်မှ စောစော ပြန်ခဲ့တော့သည်။

လက်ထောက်လင်သည် အမျိုးသားတစ်ဦးပီပီ သူ၏ သူဌေး ဤမျှ အလောတကြီး ထွက်သွားရခြင်း အကြောင်းရင်းကို ကောင်းကောင်း နားလည်သည်။ ချစ်သူ၏ ချိုမြိန်သော စကားသံများကို မည်သူက ငြင်းဆန်နိုင်ပါမည်နည်း။

အိမ်ပြန်ပြီး တစ်ယောက်ကိုတစ်ယောက် ဖက် တွယ်ထားချင်ကြသည်မှာ ဓမ္မတာပင်။

ရှင်းယောင်လုပ်ငန်းစု၏ PR ဌာနမှာလည်း အခြေအနေကို စောင့်ကြည့်ရင်း လူထု၏ သဘောထားမှာ သူတို့ဘက်တွင် ရှိနေသည်ကို သိရှိသွားသည်။ ထို့ကြောင့် ကုမ္ပဏီက ကံစမ်းမဲအစီအစဉ်တစ်ခုကို စတင်လိုက်သည်။

#လှပသောအချစ်များက_ကျွန်ုပ်တို့ကို_ဆုံစည်းပေးခဲ့သည်_ဘဝဆိုတာ_ခဏတာမို့_မင်းရဲ့_ကံပါသူနဲ့_ဆုံတွေ့ပါစေ#

ရှင်းယောင်းသည် ဤတစ်ကြိမ်တွင် အကြီးအကျယ် ရင်းနှီးမြှုပ်နှံလိုက်ပြီး မော်လ်ဒိုက်ကျွန်းသို့ နေစရိတ် စားစရိတ်ငြိမ်း ခရီးစဉ်များကို ဆုအဖြစ် ပေးအပ်ခဲ့သည်။

မိုဟန်ကျီ စတင် ချစ်သူရကတည်းက ရှင်းယောင်လုပ်ငန်းစု၏ Weibo အကောင့်မှာ ပိုမို တက်ကြွလာခဲ့သည်။ စင်စစ်တွင် ဤသည်မှာ ရှင်းယောင်းက ကြိုးပမ်းနေသည့် အပြောင်းအလဲတစ်ခု ဖြစ်သည်။

၎င်းသည် ပြည်သူများ၏ လိုအပ်ချက်နှင့်အညီ စတင်ခဲ့ပြီး လူမှုပတ်ဝန်းကျင် တိုးတက်မှုနှင့်အတူ ရင်ပေါင်တန်းခဲ့သော လုပ်ငန်းတစ်ခု ဖြစ်သည်။

ရှင်းယောင်းသည် ယခုအခါ မြင့်မြတ်လှသော စင်မြင့်ထက်တွင် ထိုင်နေသည့် ဘုရားတစ်ဆူကဲ့သို့ မဟုတ်ဘဲ ပြည်သူများထဲမှ ပေါက်ဖွားလာသော ပြည်သူ့လုပ်ငန်းတစ်ခုအဖြစ် ရပ်တည်လိုခြင်း ဖြစ်သည်။

မိုဟန်ကျီနှင့် မင်ယွဲ့တို့၏ ဆက်ဆံရေးကို အသုံးချကာ ရှင်းယောင်းသည် လူထုနှင့် ပိုမို နီးကပ်လာခဲ့သည်။

"ငါ ပေါက်ပြီ... ငါ ပေါက်ပြီ... ငါ့ရဲ့ အချစ်ကံဇာတ်လမ်းလည်း ပြောင်းလဲတော့မယ် ထင် တယ်"

"ငါလည်း ပေါက်တယ်ဟေ့၊ မဲမနှိုက်ခင် ဆယ်မိနစ်လောက် လက်ကို သေသေချာချာ ဆေးခဲ့တာ တကယ် အလုပ်ဖြစ်တယ်"

"ငါ ဘာလို့ မပေါက်ရတာလဲ၊ မနာလိုလိုက်တာ၊ မော်လ်ဒိုက်ကို သွားချင်လိုက်တာ"

ယခုအပိုင်းတွင် ခယ်ဟယ်၏ ရည်မှန်းချက်နှင့် မိုဟန်ကျီတို့ ဇနီးမောင်နှံ၏ အချိုမြိန်ဆုံး အချိန်များကို မြင်တွေ့ရပြီ ဖြစ်သည်။