အခန်း (၄၀၅-၄၀၆)

အခန်း (၄၀၅) ရှင် တကယ့်ကို အများကြီး တွေးနေတာပဲ

"ခဏလေး"

မိုဟန်ကျီသည် အပြင်ထွက်ရန် ပြင်ဆင်နေသော မင်ယွဲ့၏ ဖြူစင်နုနယ်သည့် လည်တိုင်လေး ပေါ်လွင်နေသည်ကို တွေ့လိုက်ရသဖြင့် အခန်းထဲသို့ အပြေးအလွှား ပြန်ဝင်ကာ ပုဝါတစ်ထည် ယူလာပေးခဲ့သည်။

သူသည် သူမ၏ လည်ပင်းတွင် ပုဝါကို သေသေချာချာ ပတ်ပေးပြီး ဖရိုဖရဲဖြစ်နေသော ဆံနွယ်လေးများကိုလည်း ကြင်နာစွာ သပ် တင်ပေးလိုက်၏။

"ကဲ... သွားလို့ရပြီ"

သူသည် မင်ယွဲ့၏ နဖူးပြင်ကို မြတ်နိုးစွာ နမ်းရှိုက်လိုက်ပြီးနောက် သူမ၏ လက်ကလေးကို ဆုပ်ကိုင်ကာ အပြင်သို့ ထွက်ခွာခဲ့ကြသည်။

ကျန်ကျွင်း ရွေးချယ်ထားသော နေရာမှာ အထက်တန်းလွှာများသာ လာရောက်လေ့ရှိသည့် ကလပ်တစ်ခု ဖြစ်ပြီး လုံခြုံမှုနှင့် လျှို့ဝှက်မှုမှာ အထူးပင် ကောင်းမွန်လှသည်။

၎င်းသည် ဟိတ်ဟန်ကြီးမားသော ခမ်းနားထည်ဝါမှုထက် လန်းဆန်းအေးချမ်းသည့် အပြင်အဆင်မျိုးဖြင့် ဖွဲ့စည်းထားရာ မင်ယွဲ့ စိတ်ထဲတွင် များစွာ သဘောကျမိသွားသည်။

ရိပ်သာထဲသို့ ဝင်လာစဉ် မိုဟန်ကျီကို မှတ်မိသူအချို့ ရှိသော်လည်း သူက မင်ယွဲ့ကို လက်တွဲထားသည်ကို မြင်လိုက်ရသည့်အခါ မည်သူမျှ နှောင့်ယှက်ခြင်း မပြုဘဲ လမ်းဖယ်ပေးခဲ့ကြသည်။

"နောက်ဆုံးတော့ ရောက်လာပြီပဲ... ကြိုဆိုပါတယ်"

မင်ယွဲ့ ရောက်ရှိလာခြင်းကို အားလုံးက နွေးထွေးစွာ ကြိုဆိုကြသည်။

"ဒါက ကိုယ့်ရဲ့ ချစ်သူပဲ၊ မင်းတို့နဲ့လည်း ဆုံဖူးပြီးသားဆိုတော့ တစ်ယောက်ချင်းစီ ထပ်မိတ် ဆက်မနေတော့ဘူး"

ဟု မိုဟန်ကျီက အကျဉ်းချုံး ပြောလိုက်သည်။

"မဟုတ်သေးပါဘူး... ငါတို့ရဲ့ မိုကောက စကားတွေ အရမ်းချိုနေပါလား၊ ငါတို့နဲ့ကျတော့ ဘာလို့ အဲဒီလို မပြောတာလဲ"

ဟု ကျန်ကျွင်းက စနောက်လိုက်ပြန်သည်။

မိုဟန်ကျီက သူ့ကို ခြေထောက်ဖြင့် တစ်ချက် ကန်လိုက်၏။

"အမလေး... ညီမလေးရေ ကြည့်ပါဦး၊ ဒီလူက အရမ်း ကြမ်းတမ်းတာပဲ ဒီနေ့ သူငယ်ချင်းကို ကန်တယ်၊ မနက်ဖြန်ကျရင် ဇနီးသည်ကိုပါ ကန်တော့မှာ"

ကျန်ကျွင်းသည် စကားကို လွတ်လွတ်လပ်လပ် ပြောဆိုတတ်သူ ဖြစ်သည်။

ကျန်းရှုယွီက မိုဟန်ကျီ၏ မျက်နှာ ပျက်သွားသည်ကို မြင်သဖြင့် ကျန်ကျွင်းကို တိတ်တဆိတ် တို့လိုက်သည်။

"ရပါတယ်... မိုဟန်ကျီက ကျွန်မကို မနိုင်ပါဘူး အားလုံးနဲ့ ဆုံရတာ ဝမ်းသာပါတယ်၊ ကျွန်မကို ယွဲ့ယွဲ့လို့ပဲ ခေါ်ပါ"

ဟု မင်ယွဲ့က ရယ်မောရင်း တုံ့ပြန်လိုက်ရာ မိုဟန်ကျီ၏ စိတ်အခြေအနေမှာ ချက်ချင်းပင် ကြည်လင်သွားတော့သည်။

"ကိုယ် မင်းကို ဘယ်တော့မှ မရိုက်ပါဘူး၊ သူ့အဓိပ္ပာယ်မရှိတဲ့ စကားတွေကို နားမယောင်နဲ့နော်"

ဟု မိုဟန်ကျီက သူမ၏ လက်ကို ညှစ်ကာ တိုးတိုးလေး ကပ်ပြောလိုက်သည်။

သူငယ်ချင်းများ စုံညီစွာ ဆုံတွေ့ကြသည့်အခါ စကားဝိုင်းမှာ စီးပွားရေးလောကအကြောင်းသို့ ရောက်ရှိသွားသည်။

"ပြီးခဲ့တဲ့ အပတ်က 'ဝေးကွမ်' က မစ္စတာဝေးနဲ့ ဆုံသေးတယ်၊ သူ ကြည့်ရတာ အတော်လေး အခြေအနေ ကောင်းနေပုံပဲ၊ တက်ကြွနေတာပဲ"

ဟု ကျန်းရှုယွီက ဆိုသည်။

သူမသည် ဝေးကွမ်လုပ်ငန်းစုကို ဝယ်ယူရန် စိတ်ဝင်စားခဲ့သော်လည်း အခြားတစ်ဦးက လက်ဦးမှု ယူသွားခဲ့သဖြင့် ထိုရင်းနှီးမြှုပ်နှံသူမှာ မည်သူနည်းဟု အစဉ်အမြဲ သိချင်နေခဲ့ခြင်း ဖြစ်သည်။

ဝေးကွမ်လုပ်ငန်းစု၏ အမည်ကို ကြားလိုက်ရသည့်အခါ မင်ယွဲ့သည် သောက်လက်စ အရည်ကို ခေတ္တ ရပ်တန့်လိုက်မိသည်။

မိုဟန်ကျီမှာမူ သူမ၏ လှုပ်ရှားမှုအသေးစိတ်ကို စောင့်ကြည့်နေသူ ဖြစ်ရာ သူမ၏ လက်ထဲမှ ဖန်ခွက်ကို ညင်သာစွာ ယူလိုက်သည်။

"အေးနေလို့လား... တစ်ခုခု အရင်စားလိုက်ဦး၊ ပြီးမှ ဆက်သောက်နော်"

ဟု ပြောကာ သူမ၏ လက်ကလေးများကို သူ၏ လက်ဖဝါးနွေးနွေးများဖြင့် ဆုပ်ကိုင်ထားပေးသည်။

"တကယ်တော့... အဲဒီတုန်းက ဝေးကွမ်လုပ်ငန်းစုမှာ ရင်းနှီးမြှုပ်နှံခဲ့တာ ကျွန်မပါ"

မင်ယွဲ့၏ စကားကြောင့် ကျန်ကျွင်းမှာ မှင်တက်သွားပြီး သူမကို နတ်ဘုရားမတစ်ပါးကဲ့သို့ စိုက်ကြည့်နေတော့သည်။

သူသည် မိုကောကို အားကျခဲ့ရာမှ ယခုအခါ စီးပွားရေးအမြင် ထက်မြက်လှသော မင်ယွဲ့ကိုပါ ထပ်မံ လေးစားသွားရပြန်သည်။

"ညီမလေး... အဲဒါ တကယ့်ကို တိုက်ဆိုင်တာပဲလား၊ ဘာလို့ ကုမ္ပဏီကို မဝယ်ဘဲ ရင်းနှီးမြှုပ်နှံမှုပဲ လုပ်ခဲ့တာလဲ"

ဟု ကျန်းရှုယွီက စူးစမ်းလိုက်သည်။

"သူ အဆောက်အဦပေါ်ကနေ ခုန်ချတော့မယ့် အချိန်မှာ ကျွန်မနဲ့ တိုက်တိုက်ဆိုင်ဆိုင် ဆုံခဲ့တာလေ၊ အဲဒါနဲ့ပဲ သူ့ကို ရင်းနှီးမြှုပ်နှံပေးမယ်လို့ ပြောလိုက်တာ၊ ဒီလောက်ပါပဲ"

ရှုပ်ထွေးလှသော စီးပွားရေး နည်းဗျူဟာများ မပါဝင်ဘဲ လူတစ်ယောက်၏ အသက်ကို ကယ်တင်လိုသည့် စိတ်ရင်းဖြင့်သာ လုပ်ဆောင်ခဲ့ခြင်း ဖြစ်သည်ဟု ဆိုသော်လည်း မင်ယွဲ့တွင်မူ ယွမ်ပေါ့၏ အကူအညီဖြင့် ဝေးကွမ်သည် တန်ဖိုးရှိသော လူတစ်ဦးဖြစ်ကြောင်း ကြိုတင် သိရှိထားသည့် ယုံကြည်ချက် ရှိနှင့်ပြီး ဖြစ်သည်။

"ညီမလေးက တကယ့်ကို စိတ်ထားကောင်းတာပဲ"

ဟု ကျန်ကျွင်းက လက်မထောင်ပြလိုက်သည်။ သို့သော် မင်ယွဲ့က ပြုံးလျက် ငြင်းဆိုလိုက်၏။

"ရှင် တကယ့်ကို အများကြီး တွေးနေတာပဲ... ကျွန်မက အဲဒီလောက်အထိ မွန်မြတ်တာ မဟုတ်ပါဘူး"

သူမသည် ဝေးကွမ်လုပ်ငန်းစု၏ အခြေအနေကို သေချာစွာ လေ့လာခဲ့ပြီးဖြစ်ကြောင်း၊ ဝေးကွမ်သည် ရန်ပုံငွေ ပြဿနာမှလွဲ၍ အခြား အားနည်းချက် မရှိသည့် ကုမ္ပဏီဖြစ်ကြောင်း ရှင်းပြလိုက်သည်။

ထို့ပြင် ဝေးကွမ်၏ စိတ်ဓာတ်ကို စမ်းသပ်ခဲ့ပြီးဖြစ်ရာ သူသည် သစ္စာဖောက်မည့်သူ မဟုတ်ကြောင်း သူမ အခိုင်အမာ ယုံကြည်ခဲ့ခြင်း ဖြစ်သည်။

"သူ့မှာ သွေးကင်ဆာဖြစ်နေတဲ့ သားလေး ရှိတယ်လေ၊ ဘယ်လိုလုပ် ပိုက်ဆံတွေ ယူပြီး ထွက်ပြေးမှာလဲ နောက်ပြီး... ကျွန်မမှာက ပိုက်ဆံတွေ အများကြီး ရှိနေတာပဲကို"

မင်ယွဲ့ မပြောလိုက်သည့် အချက်မှာမူ ယွမ်ပေါ့သည် ကမ္ဘာမြေ အဆုံးအထိ ရှာဖွေနိုင်စွမ်း ရှိသူဖြစ်ရာ မည်သူမျှ သူမ၏ လက်တွဲမှ လွတ်မြောက်နိုင်မည် မဟုတ်ခြင်းပင် ဖြစ် တော့သည်။

မင်ယွဲ့၏ စီးပွားရေး အမြင်နှင့် မိုဟန်ကျီ၏ ဂရုစိုက်မှုများမှာ တကယ့်ကို ကြည်နူးစရာပါပဲ။

အခန်း (၄၀၆) ပေါင်တော်ကို ဖက်တွယ်ခြင်း

"ဟားဟား... မရီးကတော့ တကယ့်ကို အံ့မခန်းပါပဲလား၊ ငါတို့မှာ ပိုက်ဆံတွေ အလျှံပယ် ရှိနေတာပဲ"

ကျန်ကျွင်းသည် မိမိပေါင်ကို မိမိရိုက်ကာ အားရပါးရ ရယ်မောလိုက်တော့သည်။

ကျန်းရှုယွီမှာမူ သူမ၏ အမှားကို သတိပြုမိသွားသည်။ အလွန်အမင်း သတိကြီးလွန်းခြင်းသည် တစ်ခါတစ်ရံ ကောင်းမွန်သော်လည်း တွေဝေတုံ့ဆိုင်းနေခြင်းက အကောင်းဆုံး အခွင့်အရေးများကို လက်လွတ် ဆုံးရှုံးစေတတ်သည် မဟုတ်ပါလား။

"ယွဲ့ဟွာနည်းပညာနဲ့ ဝေးကွမ်လုပ်ငန်းစုအပြင် ယွဲ့ယွဲ့မှာ တခြား စီးပွားရေးတွေ ရှိသေးလား"

ဟု မုန်ရှူ့က စူးစမ်းလိုက်သည်။

သူမက ပိုက်ဆံမရှားဟု ပြောနိုင်သည်ဆိုလျှင် ဤလုပ်ငန်းနှစ်ခုထက်မက ပိုင်ဆိုင်ထားမည်ကို သူ ရိပ်မိလိုက်ခြင်း ဖြစ်သည်။

"မပြောချင်လည်း ရပါတယ်"

ဟု မိုဟန်ကျီက မင်ယွဲ့၏ နားနားသို့ ကပ်ကာ တိုးတိုးလေး ဆိုသည်။

ထို့နောက် သူသည် ဝိုင်ဖန်ခွက်ကို မြှောက်ကာ အားလုံးကို ကြည့်လိုက်၏။

"အပြင်ထွက်ပြီး ပျော်ပါးနေတဲ့အချိန်မှာ အလုပ်အကြောင်းတွေ မပြောကြစို့နဲ့"

ကျန်ကျွင်းမှာ မှင်တက်သွားရသည်။

ဤစကားမျိုးကို အခြားသူပြောလျှင် မဆန်းသော်လည်း အလုပ်ကိုသာ ဖိလုပ်တတ်သည့် မိုကော၏ ပါးစပ်မှ ထွက်လာသည်မှာ အတော်ပင် ထူးဆန်းလှသည်။

မိုကောတစ်ယောက် အချစ်နတ်ဖမ်းစားခံလိုက်ရပြီမှာ အမှန်ပင်။

မင်ယွဲ့သည် မိုဟန်ကျီက သူမဘက်မှ ကာကွယ်ပေးနေသည်ကို သိသော်လည်း ဤအကြောင်းအရာများမှာ ဖုံးကွယ်ထားရမည့် လျှို့ဝှက်ချက်များ မဟုတ်ပေ။

သူမ၏ လုပ်ငန်းများမှာ မကြာမီ လူသိရှင်ကြား ဖြစ်လာတော့မည်ဖြစ်ရာ ယခု ပြောပြလိုက်ခြင်းက ပြဿနာမရှိဟု သူမ ယူဆသည်။

"တကယ်တော့... ကျွန်မ လက်အောက်မှာ လုပ်ငန်းအတော်များများ ရှိပါတယ်၊ အဆောက်အဦတွေ၊ ဈေးဝယ်စင်တာတွေ၊ အိမ်ခြံမြေ၊ စိုက်ပျိုးရေးခြံတွေနဲ့ သတ္တုတွင်းတွေ... အဲဒီလိုမျိုးတွေ အများကြီးပါပဲ"

မင်ယွဲ့က အကြမ်းဖျင်းမျှသာ ထုတ်ဖော်ပြောလိုက်သော်လည်း ထိုအချက်အလက်အနည်းငယ်မှာပင် လူအများကို အံ့အားသင့်စေရန် လုံလောက်လှသည်။

"မရီး... ကျွန်တော့်ကို မရီးရဲ့ ခြေထောက်ကို ဖက်တွယ်ခွင့်ပြုပါဦး"

ကျန်ကျွင်းသည် ရှက်ရွံ့ခြင်းကင်းစွာဖြင့် မင်ယွဲ့အနားသို့ တိုးကပ်လာသည်။

"ဒီနေ့ကစပြီး ကျွန်တော်က မရီးရဲ့ လက်ပါးစေပဲ၊ ခိုင်းတာအကုန် လုပ်ပါ့မယ်"

မုန်ရှု့သည် ကျန်ကျွင်း၏ ပုံစံကို ကြည့်ကာ မျက်နှာလွှဲလိုက်မိသော်လည်း ဤမိန်းကလေးမှာ ဤမျှအထိ ချမ်းသာကြွယ်ဝလိမ့်မည်ဟု အမှန် တကယ်ပင် မထင်ထားခဲ့ပေ။

သူတို့သည် ငွေကြေးကို ပဓာနမထားကြသဖြင့် ဟန်ကျီနှင့် မင်ယွဲ့တို့ ချစ်ကြိုက်သည့်အခါ မင်ယွဲ့မှာ သာမန် ကျောင်းသူလေးတစ်ဦးဟုသာ ထင်မှတ်ကာ ကောင်းချီးပေးခဲ့ကြခြင်း ဖြစ်သည်။

သို့သော် မင်ယွဲ့သည် သူတို့၏ အထင်အမြင်များကို အစဉ်အမြဲ ပြောင်းလဲပစ်နေခဲ့သည်။ သူမ၏ အရည်အချင်းမှသည် ပိုင်ဆိုင်မှုများအထိမှာ လောကအလယ်တွင် တုနှိုင်းမဲ့လှသည်။

ဤသည်မှာ အာဏာရှင် ဥက္ကဋ္ဌကြီးက သာမန်မိန်းကလေးတစ်ဦးကို ချစ်မြတ်နိုးမိသည့် ဇာတ်လမ်းမျိုး မဟုတ်ဘဲ ဂုဏ်ရည်ချင်း တူညီသော ထိပ်သီးနှစ်ဦး ဆုံစည်းခြင်းသာ ဖြစ် တော့သည်။

"ကဲ ပြောပါဦး... ရှင် ဘာလိုချင်လို့လဲ"

မင်ယွဲ့က သူမကို ဖားနေသော ကျန်ကျွင်းကို ပြုံးလျက် မေးလိုက်သည်။

"မရီးရဲ့ စိုက်ပျိုးရေးခြံက ဘယ်မှာလဲဟင်၊ ကျွန်တော် သွားလည်ချင်လို့ပါ"

သူသည် ချမ်းသာသော သူဌေးသားတစ်ဦး ဖြစ်သော်လည်း ယခုအခါတွင်မူ အောက်ကျနောက်ကျ ပုံစံမျိုး ဖမ်းနေတော့သည်။

သို့သော် သူတို့မှာ သူငယ်ချင်းများ ဖြစ်ကြရာ မင်ယွဲ့ကလည်း လိုလိုလားလားပင် ခွင့်ပြုလိုက်၏။

"လီယာစိုက်ပျိုးရေးခြံ လေ၊ ရှင် ကြိုက်တဲ့အချိန် သွားလို့ရပါတယ်၊ ကျွန်မ တာဝန်ခံရဲ့ ဖုန်းနံပါတ် ပေးလိုက်မယ်"

"လီယာစိုက်ပျိုးရေးခြံ”

အစဉ်အမြဲ တည်ငြိမ်လှသော မုန်ရှု့ပင်လျှင် မနေနိုင်တော့ဘဲ အော်ဟစ်မိသွားသည်။

၎င်းမှာ G နိုင်ငံရှိ အကြီးမားဆုံးသော စိုက်ပျိုးမြေကြီးဖြစ်ပြီး တရုတ်လူမျိုးတစ်ဦး ပိုင်ဆိုင်ထားခြင်းဖြစ်သည်ဟု သူ မထင်ထားခဲ့ပေ။ စီးပွားရေးလောကတွင် လျှို့ဝှက်ချက်မရှိဟု သူ ယုံကြည်ခဲ့သော်လည်း မင်ယွဲ့နှင့် တွေ့မှသာ လျှို့ဝှက်ချက်များမှာ နေရာအနှံ့ ရှိနေကြောင်း သိလိုက်ရတော့သည်။

"ဒါဆို... ယွဲ့ဟွာနည်းပညာ တည်ရှိတဲ့ ကယ်ပီတယ် အဆောက်အဦ ကလည်း ညီမလေးရဲ့ ကိုယ်ပိုင်အိမ်ခြံမြေပဲလား"

ဟု မုန်ရှု့က ချက်ချင်းပင် ဆက်စပ်တွေးတောလိုက်သည်။

"ဟုတ်ပါတယ်"

ကျန်ကျွင်းမှာ အသက်ရှူပင် မှားသွားရသည်။

ကယ်ပီတယ် အဆောက်အဦမှာ သာမန် ပိုင်ဆိုင်မှု မျိုး မဟုတ်ပေ။ သူသည် မိုဟန်ကျီကို ကြည့်ကာ

"မိုကော... မင်းကတော့ တကယ့်ကို ကံကောင်းတဲ့လူပဲ"

ဟု စိတ်ရင်းဖြင့် ဆိုလိုက်တော့သည်။

"မရီး... ကျွန်တော်ကတော့ မရီးရဲ့ အလိုလိုက်မှုကို ခံချင်တဲ့သူပဲ လုပ်တော့မယ်"

ဟု ကျန်ကျွင်းက ပြောင်ချော်ချော် ပြောလိုက် သည်။

"လျှောက်မပြောနဲ့... ငါ့ကိုပဲ သူက လစဉ် ထောက်ပံ့ပေးနေတာ"

မိုဟန်ကျီ၏ စကားကြောင့် အားလုံးမှာ မှင် တက်သွားရပြန်သည်။

"ဟန်ကျီ... မင်း ချစ်သူရရင် ပြောင်းလဲသွားမယ်ဆိုတာ ငါ သိပေမဲ့ ဒီလောက်အထိ 'အလိုလိုက်ခံရသူ' လို့ ပြောတဲ့အထိ ဖြစ်သွားလိမ့်မယ်လို့ မထင်ထားဘူး"

ဟု မုန်ရှု့က ရယ်မောရင်း ဆိုသည်။

"သူက ငါ့ဇနီးပဲလေ၊ ဘာပြောလို့ မရမှာလဲ ငါ့ဆီက အရာအားလုံးက သူ့အပိုင်ပဲ၊ သူကပဲ ငါ့ကို ထောက်ပံ့သွားမှာပေါ့"

ဟု မိုဟန်ကျီက ရှက်ရွံ့ခြင်းကင်းစွာ ဆိုလိုက် သည်။

"ကောင်းပါပြီ... ဒါဆိုရင် အိမ်ထောင်စုအတွက် ပိုက်ဆံရှာတဲ့ အလုပ်ကို ကျွန်မ တာဝန်ယူမယ်၊ ရှင်ကတော့ ခန့်ညားချောမောနေဖို့ပဲ တာဝန်ယူပေါ့"

ဟု မင်ယွဲ့ကလည်း အလိုက်သင့် နောက်ပြောင်လိုက်ရာ ဝိုင်းတော်သားများမှာ ပျော်ရွှင်စွာ ရယ်မောကြတော့သည်။

စကားဝိုင်းသည် မုန်ရှု့၏ လုပ်ငန်းခွင် အခက်အခဲများဆီသို့ ရောက်ရှိသွားသည်။ သူ၏ ကုန်စည်ပို့ဆောင်ရေး လမ်းကြောင်းမှာ စစ်ပွဲကြောင့် ပိတ်ဆို့နေပြီး ကုန်ပစ္စည်းများကို အချိန်မီ မပို့ဆောင်နိုင်ပါက စာချုပ်ဖောက်ဖျက်မှု ဖြစ်တော့မည်ဖြစ်သည်။

"ရှီလင် ပင်လယ်ပြင် အကြောင်း ရှင်တို့ သိလား"

ဟု မိုဟန်ကျီက ရုတ်တရက် မေးလိုက်သည်။

မုန်ရှု့က

“အဲဒီနေရာက ပုဂ္ဂလိကတစ်ဦးက ဝယ်ထားတာဆိုတော့ လမ်းကြောင်းအသစ်တွေ ရှိတယ်လို့ ကြားတယ်၊ ဒါပေမဲ့ ပိုင်ရှင်ကို ဘယ်လို ဆက် သွယ်ရမှန်း မသိတာ"

ဟု စိတ်ပျက်လက်ပျက် ဆိုလိုက်သည်။

"အဲ... ကျွန်မ ကူညီနိုင်ပါတယ်"

ဟု မင်ယွဲ့က လက်ကလေး ထောင်ပြလိုက် ပြန်သည်။

"မရီး... ရှီလင်ပင်လယ်ပြင်ကလည်း မရီးအပိုင်လို့တော့ မပြောနဲ့ဦးနော်"

ဟု ကျန်ကျွင်းက မျက်လုံးအပြူးသားဖြင့် မေးလိုက်သည်။

မင်ယွဲ့က

“အဲဒါ တကယ်ပဲ ကျွန်မအပိုင်ပါ၊ ရှင့်အနေနဲ့ ယုံကြည်တယ်ဆိုရင် ကျွန်မရဲ့ ပုဂ္ဂလိက သင်္ဘောအုပ်စုနဲ့ ကူညီပေးပါ့မယ်"

ဟု ဆိုလိုက်ရာ မုန်ရှု့မှာ ဝမ်းသာအားရဖြင့် သူမကို ဝိုင်ခွက်မြှောက်ကာ ကျေးဇူးတင်စကား ဆိုတော့သည်။

ပါတီပွဲအပြီးတွင် သူတို့နှစ်ဦး အိမ်သို့ ပြန်လာခဲ့ကြသည်။ အရက်အနည်းငယ် သောက်ထားသဖြင့် ယာဉ်မောင်းငှားကာ ပြန်လာခဲ့ခြင်း ဖြစ်သည်။

ညဉ့်နက်ပိုင်း၏ ရောင်စုံမီးများအကြား မင်ယွဲ့သည် ကားမှန်ကို ချကာ အပြင်ဘက်ရှိ အဆောက်အဦ နံရံကပ် ဖန်သားပြင်ကြီးထက်မှ သူမ ဒီဇိုင်းထုတ်ထားသော အဝတ်အထည်များကို ကြည့်နေမိသည်။

"ဟေးယိုး က အခုတလော ကြော်ငြာတွေ အတော်လေး သုံးနေတာပဲ"

ဟု မိုဟန်ကျီက သူမ၏ အကြည့်ကို သတိပြုမိကာ မှတ်ချက်ပေးလိုက်တော့သည်။