အခန်း (၃၈၃-၃၈၄)

အပိုင်း (၃၈၃) မြူခိုးမြို့တော်၏ အခြေအနေ

လင်းယွမ်က လန်ယွဲ့ဟွာ၏ လေဆာရောင်ခြည် အားပြင်းမှုနှင့် စွမ်းအားအကြောင်းကို ဆက်လက် တွေးတောမနေတော့ဘဲ မြူခိုးမြို့တော်နှင့် ပတ်သက်သည့် ကိစ္စများကို ပြောင်းလဲ မေးမြန်းလိုက်သည်။

"ဒီလိုဆိုရင်... ဒီမှာ ပိတ်မိနေတာ တစ်လလောက် ရှိပြီပေါ့"

"ဟုတ်တယ်... အဲဒီလောက် ရှိပြီ" လင်းယာက ခေါင်းအနည်းငယ် ညိတ်ပြလိုက်သည်။

"ဒီသင်္ဘောက ထွက်လို့ မရတော့ဘူးလား"

လင်းယာက သက်ပြင်းတစ်ချက် ချလိုက်ရင်း "စောင့်ရဦးမယ်"

"စောင့်ရမယ်ဟုတ်လား"

"အမှန်ပဲ... မြူခိုးမြို့တော်က လူတွေကို ကျွန်မတို့ မေးကြည့်ပြီးပြီ... မြူခိုးမြို့တော်က ရေစီးကြောင်းနဲ့အတူ မျောနေတာတဲ့... တစ်နေ့နေ့ ရေစီးကြောင်း ပြောင်းပြန်လှည့်သွားတဲ့ အချိန်ကျရင် ရေစီးက ဦးတည်ရာ ပြောင်းသွားလိမ့်မယ်... အဲဒီအခါကျရင် ကျွန်မတို့ရဲ့ ဘုရင်မသင်္ဘောက ရေစီးကြောင်းရဲ့ တွန်းကန်အားနဲ့အတူ အပြင်ကို ပြန်ထွက်နိုင်မှာ"

ချိုးရင်ယွဲ့က မနေနိုင်တော့ဘဲ ဝင်မေးလိုက်သည်။ "ဒီလောက်တောင် ပြောနေမှတော့... မြူခိုးမြို့တော်က တကယ်တမ်း ဘယ်လို အခြေအနေမျိုးလဲ... ရှင် ဘယ်လောက် သိထားလဲ"

လင်းယွမ်ကလည်း လင်းယာကို ကြည့်လိုက်ပြီး မေးလိုက်သည်။ "လန်ယွဲ့ဟွာကရော ဘယ်ရောက်နေလဲ"

လင်းယာက လင်းယွမ်ကို တစ်ချက်ကြည့်လိုက်ပြီး ချိုးရင်ယွဲ့ဘက်သို့ ထပ်ကြည့်ကာ ပြောလိုက်သည်။ "ယွဲ့ဟွာက လူတချို့ခေါ်ပြီး မြူခိုးမြို့တော်ထဲကို ဝင်သွားပါတယ်... ရှင်တို့က လမ်းမှားပြီး ရောက်လာတာ မဟုတ်ဘဲ မြူခိုးမြို့တော်ကို တကူးတက လာရှာကြတာလား"

ချိုးရင်ယွဲ့က "ဒါကို ရှင် ဂရုစိုက်နေစရာ မလိုပါဘူး... မြူခိုးမြို့တော်က တကယ်တမ်း ဘယ်လို နေရာမျိုးလဲ... အထဲမှာ တကယ်ပဲ မြို့တစ်မြို့ ရှိနေတာလား" ဟု မေးလိုက်သည်။

"မြူခိုးမြို့တော်ဆိုတာ... တော်တော်လေးကို ထူးဆန်းတဲ့ နေရာတစ်ခုပဲ"

မြူခိုးမြို့တော်အကြောင်း ပြောလိုက်ချိန်တွင် လင်းယာ၏ မျက်နှာထက်၌လည်း ထူးဆန်းသော အရိပ်အယောင်တစ်ခု ပေါ်လာသည်။

"ဘယ်လို ထူးဆန်းတာလဲ" ချိုးရင်ယွဲ့က အလျင်စလို ဆက်မေးလိုက်သည်။

"အဲ့ဒါကရေပေါ်မှာ မျောနေတဲ့ ရေခဲကျွန်းကြီး တစ်ကျွန်းလေ... ကျွန်းပေါ်မှာ တစ်နှစ်ပတ်လုံး ရေခဲတွေ ဖုံးလွှမ်းနေပြီး အမြဲတမ်း မြူခိုးတွေ အုပ်ဆိုင်းနေတတ်တယ်"

"ကျွန်းပေါ်မှာ မြို့တစ်မြို့ တကယ် ရှိတယ်... အပြင်လူတွေက အဲဒီမြို့ကို မြူခိုးမြို့တော်လို့ ခေါ်ကြပေမယ့် အထဲမှာ နေတဲ့သူတွေကတော့ မြူရေခဲမြို့တော်လို့ ခေါ်ကြတယ်"

"အဲဒီမှာ ခေါင်းဆောင်တစ်ယောက် ရှိတယ်... မြူရေခဲမြို့တော်က ကျွန်းသူကျွန်းသားတွေကတော့ သူ့ကို မြူခိုးမြို့တော်ဘုရင် လို့ ခေါ်ကြတယ်"

"မြူခိုးမြို့တော်ဘုရင်... သူက အစွမ်းပိုင်ရှင်လား... ဘယ်လို အစွမ်းမျိုး ရှိတာလဲ" လင်းယွမ်က အလျင်အမြန် မေးလိုက်သည်။

လင်းယာက ခေါင်းခါပြလိုက်သည်။ "ကျွန်မတို့ထဲက ဘယ်သူမှ မြူခိုးမြို့တော်ဘုရင်ကို မမြင်ဖူးကြဘူး... သူက အရမ်း လျှို့ဝှက်ဆန်းကြယ်ပြီး သူ့ကို မြင်ဖူးတဲ့သူ အတော်လေး ရှားတယ်"

လင်းယွမ်က မျက်မှောင်အနည်းငယ် ကုတ်သွားပြီး မေးလိုက်သည်။ "သူ ကိုယ်တိုင် ထွက်မလာဘူးဆိုရင် ဒီကျွန်းကြီးကို ဘယ်လို စီမံအုပ်ချုပ်နေတာလဲ"

လင်းယာက "သူ့လက်အောက်က လူတွေက စီမံအုပ်ချုပ်ပေးတာပေါ့" ဟု ဖြေလိုက်သည်။

"မြူရေခဲမြို့တော်မှာ ရေခဲချပ်ဝတ်စစ်သည် လို့ခေါ်တဲ့ အင်အားကြီးမားတဲ့ တရားဥပဒေစိုးမိုးရေး အဖွဲ့တစ်ဖွဲ့ ရှိတယ်... ရေခဲချပ်ဝတ်စစ်သည် အားလုံးကို အစွမ်းပိုင်ရှင်တွေနဲ့ ဖွဲ့စည်းထားပြီး မြူရေခဲမြို့တော် တစ်ခုလုံးရဲ့ စည်းကမ်းသေဝပ်မှုကို ထိန်းသိမ်းဖို့ တာဝန်ယူထားကြတယ်"

လင်းယွမ်က ရုတ်တရက် မေးခွန်းတစ်ခုကို စဉ်းစားမိသွားသည်။ "မြူရေခဲမြို့တော်က လူတွေက ဘယ်ကနေ ရောက်လာကြတာလဲ"

ယုတ္တိကျကျ တွေးကြည့်မည်ဆိုလျှင် ဤကဲ့သို့ မျောပါနေသော ကျွန်းတစ်ကျွန်းသည် ရေလွှမ်းမိုးဘေးကြီး မတိုင်ခင်ကတည်းက ပေါ်လာနိုင်စရာ အကြောင်းမရှိပေ။ အများအားဖြင့် ရေလွှမ်းမိုးဘေးကြီး ဖြစ်ပြီးနောက်မှသာ ပေါ်ထွက်လာခြင်း ဖြစ်နိုင်ချေ များသည်။

ထိုသို့ဆိုလျှင် ၎င်း စတင်ပေါ်ပေါက်လာချိန်၌ လူသူကင်းမဲ့နေသော ကျွန်းပျက်ကြီး တစ်ကျွန်းသာ ဖြစ်ရပေမည်။

ယခုအချိန်တွင် မြူရေခဲမြို့တော် သို့မဟုတ် မြူခိုးမြို့တော် အဖြစ် ဖွံ့ဖြိုးတိုးတက်လာခဲ့ပြီ ဖြစ်ရာ ၎င်း၏ လူဦးရေမှာလည်း အနည်းအကျဉ်းတော့ မဟုတ်နိုင်တော့ပေ။

ထိုလူများက ဘယ်ကနေ ရောက်လာခဲ့ကြသနည်း။

ထိုစကားကို ကြားသောအခါ လင်းယာက ခေါင်းအနည်းငယ် ခါပြလိုက်သည်။ "ကျွန်မလည်း သေချာ မသိဘူး... ကျွန်မတို့ ဒီမှာ ပိတ်မိနေတဲ့ အချိန်မှာတင် ဒီမြို့ကြီးက ပေါ်နေနှင့်ပြီးနေပြီ"

"ဒါပေမဲ့ ယွဲ့ဟွာက လူတချို့ကို ခေါ်ပြီး မြူခိုးမြို့တော်ထဲ ဝင်သွားဖူးတယ်... သူ့အထင်တော့ ဒီကလူတွေက လမ်းမှားပြီး ဝင်လာမိတာ ဒါမှမဟုတ် တခြားလူတွေရဲ့ ဖမ်းဆီးခေါ်ဆောင်ခံရတာ ဖြစ်နိုင်တယ်လို့ ပြောဖူးတယ်"

"ဒါပေမဲ့ ကျွန်းပေါ်မှာ နေရာထိုင်ခင်း ကျဉ်းကျပ်လာလို့ အခုဆို အပြင်လူတွေကို ဖမ်းဆီးခေါ်ဆောင်တာမျိုး မလုပ်တော့ဘဲ... အပြင်လူ ဝင်တာကိုတောင် ကန့်သတ်လာကြပြီ"

"ကျွန်မတို့လည်း အစက မြူရေခဲမြို့တော်ထဲ ဝင်ချင်ခဲ့တာ... ဒါပေမဲ့ ရေရှည်နေထိုင်ဖို့ လုံလောက်တဲ့ အရင်းအမြစ်တွေ မရှိတာနဲ့... လောလောဆယ်တော့ သင်္ဘောပေါ်မှာပဲ ဆက်နေနေရတာ"

"ကျွန်မ သိရသလောက်တော့ အနီးနားက မြူခိုးမြို့တော်ရဲ့ ကျောက်ဆောင်တန်းတွေ ကြားမှာ ပိတ်မိနေတဲ့ သင်္ဘောတွေ မနည်းမနော ရှိတယ်"

"အားလုံးက မြူခိုးမြို့တော်ထဲ ဝင်ပြီး အမြဲတမ်း နေထိုင်သူတွေ ဖြစ်ချင်နေကြတာ"

လင်းယွမ်က ချိုးရင်ယွဲ့ကို ချက်ချင်း လှည့်ကြည့်လိုက်သည်။

ချိုးရင်ယွဲ့ကလည်း ချက်ချင်း စိတ်လှုပ်ရှားသွားပြီး လင်းယွမ်ကို ပြောလိုက်သည်။ "ကျွန်မ ပြောသားပဲ... ကျွန်မ အဖေလည်း သူတို့လိုပဲ ဒီမှာ ပိတ်မိနေတာ သေချာတယ်"

"ဒီရေပေါ်ကျွန်းကြီးက ရေပေါ်မှာ မျောပါနေနိုင်ပြီး ရေဘေးကနေ ရှောင်လွှဲနိုင်တယ်ဆိုတာ သူ သိသွားတော့... အမြဲတမ်း နေထိုင်သူဖြစ်ဖို့ နည်းလမ်း ရှာခဲ့တာပဲ ဖြစ်မယ်... သူ့အတွက် အရင်းအမြစ်တွေ လိုနေလို့ ကျွန်မကို ရှာပြီး အပြင်ကနေ စွမ်းအင်ကျောက်တုံးတွေ စုဆောင်းပေးခိုင်းတာနေမှာ"

ထိုသို့ပြောရင်း သူမက လင်းယာကို ကြည့်ကာ မေးလိုက်သည်။ "မြူခိုးမြို့တော်မှာ အမြဲတမ်း နေထိုင်နိုင်ဖို့ စွမ်းအင်ကျောက်တုံးတွေ အများကြီး လိုအပ်တာလား"

ထိုစကားကို ကြားသောအခါ လင်းယာက ခေါင်းအနည်းငယ် ညိတ်ပြလိုက်သည်။ "ဟုတ်တယ်... စွမ်းအင်ကျောက်တုံးတွေက တစ်ပိုင်းပေါ့... နောက်တစ်ချက်က အစွမ်းပိုင်ရှင် ဖြစ်မှသာ ဝင်ရောက်ခွင့် ရှိတာ"

"သာမန်လူတွေဆိုရင်... စွမ်းအင်ကျောက်တုံး အရင်းအမြစ်တွေ အလုံအလောက်စုဆောင်းနိုင်ရင်တောင်... မြူခိုးမြို့တော်က လက်ခံမှာ မဟုတ်ဘူး"

"ဒီမြူခိုးမြို့တော်က အကျယ်အဝန်း ဘယ်လောက်ရှိလဲ... စားနပ်ရိက္ခာ ထုတ်လုပ်တာမျိုးရော ရှိလား... ကိုယ့်ကိုယ်ကိုယ် ဖူလုံအောင် လုပ်နိုင်ရဲ့လား" လင်းယွမ်က မေးလိုက်သည်။

လင်းယာက ခေါင်းခါပြလိုက်သည်။ "အတိအကျ ဘယ်လောက်ကျယ်လဲ ဆိုတာတော့ ကျွန်မတို့လည်း မသိဘူး... ကျွန်းပေါ် အဝင်အထွက်က တင်းကျပ်သလို ကျွန်းပတ်လည်မှာလည်း ရေခဲချပ်ဝတ်စစ်သည်တွေ စောင့်ကြပ်နေကြတယ်"

"ဒါပေမဲ့ စားစရာတော့ မရှားလောက်ဘူး ထင်တယ်... အနည်းဆုံးတော့ သူတို့ဆီမှာ အစားအသောက် ပြတ်လပ်နေတာမျိုး ကျွန်မ မမြင်ဖူးဘူး... သုံးဆောင်ပစ္စည်းတွေကတော့ သိပ်မပေါများလှဘူး ထင်ရတယ်... ဥပမာပြောရရင် ဖိနပ်၊ ခြေအိတ်၊ အဝတ်အစား စတဲ့ ကုန်ပစ္စည်းတွေရဲ့ ဈေးနှုန်းက ဆန်နဲ့ အသားတွေထက် ပိုဈေးကြီးတယ်"

လင်းယွမ်၏ စိတ်ထဲတွင် လှုပ်ရှားသွားပြီး ဤမြူခိုးမြို့တော်၏ နည်းပညာ အဆင့်အတန်းသည် ထိုက်ယန်တောင်နှင့် သိပ်မကွာလှဟု ချက်ချင်း ခန့်မှန်းမိလိုက်သည်။

ခေတ်မီ စက်မှုလုပ်ငန်းများ မရှိတော့ဘဲ လူတိုင်းက တောခုတ်မီးရှို့ စိုက်ပျိုးရေး ခေတ်သို့ နောက်ကြောင်းပြန် လှည့်သွားကြပြီ ဖြစ်သည်။

ခေတ်မီ အဝတ်အစားများ၊ ဖိနပ်နှင့် ခြေအိတ်စသည့် အသုံးအဆောင်ပစ္စည်းများကို ထုတ်လုပ်နိုင်စွမ်း မရှိတော့သဖြင့် ကမ္ဘာပျက်ကပ် မတိုင်မီက ကျန်ရှိခဲ့သော ပစ္စည်းများကို လုယက်သိမ်းပိုက်ခြင်းဖြင့်သာ စုဆောင်း သိမ်းဆည်းနိုင်တော့သည်။

ထို့အပြင် လင်းယာ၏ ပြောဆိုချက်များအရ ဤမြူခိုးမြို့တော်သည် စစ်ရေးအင်အား တည်ဆောက်မှုကို ပိုမို အာရုံစိုက်ထားပုံ ရသည်။

အစွမ်းပိုင်ရှင်များကို အလုံးအရင်းဖြင့် စုဆောင်းနေသည့်အပြင် စွမ်းအင်ကျောက်တုံးများကဲ့သို့သော မဟာဗျူဟာမြောက် အရင်းအမြစ်များကိုလည်း နေရာအနှံ့ လိုက်လံ ရှာဖွေနေကြသည်။

လင်းယွမ်က ရေခဲချပ်ဝတ်စစ်သည်များနှင့် ပတ်သက်သည့် မေးခွန်းအချို့ကို ထပ်မေးခဲ့သော်လည်း လင်းယာထံတွင် ထိုကိစ္စနှင့် ပတ်သက်သည့် သတင်းအချက်အလက်များ မရှိပေ။

အပြင်လူများ ဖြစ်ကြသည့် သူတို့အနေဖြင့် မြူခိုးမြို့တော်၏ စည်းကမ်းများကို ဖောက်ဖျက်ရန် သတ္တိမရှိသည်မှာ ထင်ရှားလှပြီး မည်သည့် တိုက်ပွဲမျှလည်း ဖြစ်ပွားခဲ့ခြင်း မရှိပေ။

ထို့ကြောင့် မြူခိုးမြို့တော်၏ လက်နက်ကိုင် အင်အားစုများနှင့် ပတ်သက်၍ သူတို့၏ သိနားလည်မှုမှာ အကန့်အသတ် ရှိနေပြီး မှီငြမ်းကိုးကားစရာ သတင်းအချက်အလက် တစ်စုံတစ်ရာမျှ မရရှိခဲ့ပေ။

ရုတ်တရက် လင်းယွမ်က စကားလမ်းကြောင်း လွှဲလိုက်ပြီး မေးလိုက်သည်။ "မျိုးရိုးဗီဇမျိုးစေ့ ကို ခင်ဗျား သိလား"

ဤစကားကို ကြားလိုက်သည်နှင့် ချိုးရင်ယွဲ့ကလည်း လင်းယာ့ထံသို့ အလျင်အမြန် လှည့်ကြည့်လိုက်သည်။

လင်းယာ၏ မျက်နှာအမူအရာ အနည်းငယ် ပြောင်းလဲသွားပြီး တစ်စုံတစ်ခုကို ချက်ချင်း ရိပ်စားမိသွားသည်။

သူမက လင်းယွမ်တို့ နှစ်ယောက်ကို ချက်ချင်း သဘောပေါက်သွားသည့် အကြည့်ဖြင့် ကြည့်ကာ ပြောလိုက်သည်။ "ဒါဆိုရင် ရှင်တို့က မျိုးရိုးဗီဇမျိုးစေ့ကို နိုးထဖို့အတွက် ရောက်လာကြတာပေါ့"

"ဒီမှာ မျိုးရိုးဗီဇမျိုးစေ့ကို နိုးထစေနိုင်တဲ့ နည်းလမ်း တကယ် ရှိလို့လား" လင်းယွမ်က မျက်ခုံးပင့်လိုက်ပြီး ချက်ချင်း ထပ်မေးလိုက်သည်။

လင်းယာက ခေါင်းညိတ်ပြလိုက်သည်။ "အဲဒီလို ကောလာဟလတွေတော့ ထွက်နေတာပါပဲ... ကြားရသလောက်တော့ ရေခဲချပ်ဝတ်စစ်သည်တွေထဲမှာ မျိုးရိုးဗီဇမျိုးစေ့ကို နိုးထပြီးသား အင်အားကြီး အစွမ်းပိုင်ရှင် လေးယောက် ရှိတယ်လို့ ဆိုကြတယ်"

"ဒါတင်မကဘူး... ဒီမြူခိုးမြို့တော်ဘုရင် ဆိုတာလည်း မျိုးရိုးဗီဇမျိုးစေ့ကို နိုးထပြီးသား ထိပ်တန်း အစွမ်းပိုင်ရှင် တစ်ယောက် ဖြစ်တယ်လို့ ကြားရတယ်... သူက မျိုးရိုးဗီဇမျိုးစေ့ အဆင့်ကိုတောင် ကျော်လွန်နေပြီလို့လည်း ကောလာဟလတွေ ထွက်နေသေးတယ်"

"ဒီမှာ ပိတ်မိနေတဲ့ လူအတော်များများက ထွက်ပြေးဖို့ နည်းလမ်းမရှာကြတာဟာ တကယ်တော့... အဲ့ဒီ ကောလာဟလနဲ့လည်း သက်ဆိုင်တယ်"

"ဒါပေမဲ့ မျိုးရိုးဗီဇမျိုးစေ့ကို နိုးထစေမယ့် နည်းလမ်း ရရှိဖို့ဆိုတာကတော့... မျှော်လင့်ချက် တော်တော်လေး နည်းလိမ့်မယ်"

ချိုးရင်ယွဲ့က မနေနိုင်တော့ဘဲ မေးလိုက်သည်။ "ဘာဖြစ်လို့လဲ"

"ဘာလို့လဲဆိုတော့... မျိုးရိုးဗီဇမျိုးစေ့ နိုးထစေမယ့် နည်းလမ်းကို ရဖို့ဆိုရင်... အရင်ဆုံး မြူခိုးမြို့တော်ရဲ့ အမြဲတမ်း နေထိုင်သူ တစ်ယောက် ဖြစ်ဖို့ လိုအပ်လို့ပဲ"

"မြူခိုးမြို့တော်က လူဖြစ်မှသာ... မျိုးရိုးဗီဇမျိုးစေ့ နိုးထစေမယ့် နည်းလမ်းကို ရဖို့ အရည်အချင်း ပြည့်မီမှာ"

"မြူခိုးမြို့တော်ရဲ့ နေထိုင်သူတွေ အများကြီးထဲမှာ... မျိုးရိုးဗီဇမျိုးစေ့ နိုးထစေမယ့် နည်းလမ်းကို တကယ်တမ်း ရရှိထားတဲ့သူ ဘယ်နှယောက် ရှိလို့လဲ"

"အပြင်ပန်း ကြည့်ရသလောက်ဆို... ရေခဲချပ်ဝတ်စစ်သည်တွေထဲက ခေါင်းဆောင် လေးယောက်ပဲ ရှိသေးတယ်"

"ဒါကြောင့်မလို့ မျှော်လင့်ချက် နည်းတယ်လို့ ကျွန်မ ပြောတာပေါ့"

လင်းယာ၏ စကားကြောင့် ချိုးရင်ယွဲ့မှာ မျက်မှောင် အကြီးအကျယ် ကုတ်သွားသည်။

သူမက လက်မလျှော့လိုဘဲ ပြောလိုက်သည်။ "ဘယ်လိုပဲဖြစ်ဖြစ် မျှော်လင့်ချက် တစ်ခုတော့ ရှိနေတာပဲလေ"

လင်းယွမ်က ဘာမှ ဝင်မပြောသော်လည်း စိတ်ထဲတွင်မူ အခြားသော ခန့်မှန်းချက် တစ်ခု ရှိနေသည်။

မျိုးရိုးဗီဇမျိုးစေ့ ဆိုသည်မှာ တစ်မျိုးတည်းသာ ရှိသည်မဟုတ်ရာ ဤမြူရေခဲမြို့တော်၏ မျိုးရိုးဗီဇမျိုးစေ့ နိုးထစေသည့် နည်းလမ်းကိုလည်း မည်သူမဆို နားလည် သဘောပေါက်နိုင်မည် မဟုတ်လောက်ချေ။

အစွမ်းပိုင်ရှင် ကိုယ်တိုင်နှင့် ဤမျိုးရိုးဗီဇမျိုးစေ့တို့ ကိုက်ညီမှု ရှိမှသာ အသုံးဝင်နိုင်ချေ များသည်။

သူကိုယ်တိုင် ဆိုလျှင်ပင် စနစ်ထဲတွင် မျိုးရိုးဗီဇမျိုးစေ့ အများအပြား ရှိနေသော်လည်း စနစ်က သူနှင့် အသင့်တော်ဆုံးအဖြစ် တွဲဖက်ပေးထားသည်မှာ အသွင်တစ်ရာ မျောက်ဝံမိစ္ဆာ မျိုးရိုးဗီဇမျိုးစေ့ တစ်ခုသာ ဖြစ်သည်။

လင်းယွမ်၏ ခန့်မှန်းချက်အရ ဤမြူရေခဲမြို့တော်၏ မျိုးရိုးဗီဇမျိုးစေ့ နိုးထစေသည့် နည်းလမ်းသည် ရေခဲဓာတ် အစွမ်းပိုင်ရှင်များနှင့် ဆက်စပ်နေနိုင်ချေ များသည်။

ရေခဲဓာတ် အစွမ်းပိုင်ရှင်များ မဟုတ်ပါက ဤနေရာတွင် မျိုးရိုးဗီဇမျိုးစေ့ နိုးထလာရန် အလွန် ခက်ခဲလိမ့်မည်ဟု ခန့်မှန်းရသည်။

သို့သော်လည်း အသေအချာ ပြော၍တော့ မရပေ။ ယခုအချိန်အထိ ပြင်ပမှ မျိုးရိုးဗီဇမျိုးစေ့အဆင့် အစွမ်းပိုင်ရှင်များသည် မည်သည့် နည်းလမ်းဖြင့် မျိုးရိုးဗီဇမျိုးစေ့ကို ရရှိခဲ့ကြသနည်း ဆိုသည်ကို လင်းယွမ် မသိသေးပေ။

သူကိုယ်တိုင်ကတော့ မျိုးရိုးဗီဇမျိုးစေ့ကို တိုက်ရိုက် လဲလှယ် ရယူခဲ့ခြင်း ဖြစ်သည်။ ဖြစ်နိုင်သည်မှာ မြူခိုးမြို့တော်မှ မျိုးရိုးဗီဇမျိုးစေ့အဆင့် အစွမ်းပိုင်ရှင်များသည် ကိုယ်တိုင်လေ့ကျင့်နားလည် သဘောပေါက်ပြီးနောက် ခန္ဓာကိုယ်ထဲတွင် မျိုးရိုးဗီဇမျိုးစေ့များ အလိုအလျောက် ပေါက်ဖွားလာခြင်းပေလော။

လင်းယာသည် မေးသမျှကို ပွင့်ပွင့်လင်းလင်း ဖြေကြားကာ အတော်လေး ပူးပေါင်းပါဝင်မှု ရှိသောကြောင့် လင်းယွမ်နှင့် ချိုးရင်ယွဲ့တို့က နောက်ဆုံးတွင် ဘုရင်မသင်္ဘော၏ သင်္ဘောသား အားလုံးကို ပြန်လွှတ်ပေးလိုက်သည်။

နှစ်ဖက် နားလည်မှုလွဲမှားခြင်းများ ပြေလည်သွားသောအခါ လင်းယာမှာ သက်ပြင်းတစ်ချက် ချလိုက်မိသည်။

သူမသည် လန်ယွဲ့ဟွာ၏ အပ်နှင်းချက်အရ ဤနေရာတွင် ဘုရင်မသင်္ဘောကို စောင့်ရှောက်နေရခြင်း ဖြစ်သည်။

အကယ်၍ ဘုရင်မသင်္ဘောသာ တစ်ခုခု မှားယွင်းသွားပါက သူတို့၏ အခြေစိုက် စခန်းကို အပြီးတိုင် ဆုံးရှုံးလိုက်ရသည်နှင့် အတူတူပင် ဖြစ်သည်။

ထိုဆုံးရှုံးမှုက အလွန်ကြီးမားလွန်းလှပေသည်။ သူမသည် လန်ယွဲ့ဟွာ၏ ပိုးပန်းခြင်းကို ခံနေရသူ ဖြစ်လျှင်တောင်မှ ဤဆုံးရှုံးမှုကို တာဝန်ခံပေးနိုင်မည် မဟုတ်ပေ။

ရွှေချပ်ဝတ်စစ်သင်္ဘောပေါ်သို့ ပြန်ရောက်သောအခါ ချိုးရင်ယွဲ့က လင်းယွမ်၏ အနောက်မှ လိုက်လာခဲ့သည်။

သူမက ရုတ်တရက် စကားစလိုက်သည်။ "ကျွန်မတို့ ဘာဆက်လုပ်ကြမှာလဲ"

လင်းယွမ်က ခြေလှမ်း ရပ်တန့်သွားပြီး သူမဘက်သို့ လှည့်ကြည့်ကာ မေးလိုက်သည်။ "မင်းကရော ဘယ်လို လုပ်ဖို့ စီစဉ်ထားလဲ"

"ကျွန်မ မြူခိုးမြို့တော်ကို သွားပြီး အဖေ့ကို သွားရှာချင်တယ်"

"မင်းအဖေ ဘယ်မှာရှိလဲဆိုတာ မင်း သိလို့လား"

"အဖေ ကျွန်မဆီ စာရေးတုန်းက နေရာတစ်ခုကို ထည့်ရေးထားတယ်"

"ဘယ်နေရာလဲ"

"မြူခိုးတောအုပ်"

လင်းယွမ်က မျက်မှောင်ကုတ်သွားပြီး မေးလိုက်သည်။ "မင်းဆီမှာ မြူခိုးမြို့တော်ရဲ့ မြေပုံ ရှိလား... ဒီမြူခိုးတောအုပ်က ဘယ်နေရာမှာ ရှိတာလဲဆိုတာရော သိလား"

ချိုးရင်ယွဲ့က ခေါင်းခါပြလိုက်သည်။ "မရှိဘူး... အဖေကလည်း စာထဲမှာ ထည့်မရေးထားဘူး... စောစောက ကျွန်မ လင်းယာကို သီးသန့် မေးကြည့်သေးတယ်... သူကလည်း မြူခိုးမြို့တော်ထဲ မဝင်ဖူးတော့ သိထားတာ သိပ်မရှိဘူး"

လင်းယွမ်က ခဏမျှ စဉ်းစားလိုက်ပြီး ပြောလိုက်သည်။ "ငါတို့ ခဏလောက် ထပ်စောင့်ကြည့်ရအောင်... အဲ့ဒီ ဘုရင်မသင်္ဘောရဲ့ ခေါင်းဆောင် လန်ယွဲ့ဟွာ ပြန်ရောက်လာတဲ့အထိ စောင့်ပြီးမှ သူ့ဆီမှာ သတင်း ထပ်မေးကြည့်ကြတာပေါ့"

ထိုစကားကို ကြားသောအခါ ချိုးရင်ယွဲ့က အတန်ကြာ စဉ်းစားခန်း ဝင်သွားပြီးမှ ပြောလိုက်သည်။ "သူ ဘယ်တော့ ပြန်လာမလဲ ဆိုတာကိုလည်း မသိရသေးဘူးလေ"

"လင်းယာ ပြောပုံအရဆို... လန်ယွဲ့ဟွာက ပုံမှန်ဆိုရင် အပြင်တစ်ခါထွက်ရင် သုံးလေးငါးရက် ကြာတတ်တယ်တဲ့"

လင်းယွမ်က "ဒီနေရာအထိ ရောက်နေမှတော့... ဒီတစ်ရက် နှစ်ရက်လောက်ကို မစောင့်နိုင်စရာ အကြောင်းမရှိပါဘူး... ဒီလောက်ကြီး လောနေဖို့ မလိုသေးဘူးလေ" ဟု ပြောလိုက်သည်။

ချိုးရင်ယွဲ့က ခဏမျှ စဉ်းစားလိုက်ပြီး နောက်ဆုံးတွင် ခေါင်းညိတ်ကာ ပြောလိုက်သည်။ "ကောင်းပြီလေ... ဒါဆိုရင် ကျွန်မ နောက်ထပ် ရက်နည်းနည်း ထပ်စောင့်ကြည့်ဦးမယ်"

လင်းယွမ်က ပြုံးလိုက်ပြီး သင်္ဘောကပ္ပတိန် အခန်းဆီသို့ လှည့်ပြန်သွားခဲ့သည်။

အတန်ကြာပြီးနောက် ဟန်ရှန်းမန်က တံခါးခေါက်ပြီး ဝင်လာခဲ့သည်။

"ကိုလင်းယွမ်... ဟိုဘက်က အခြေအနေ ဘယ်လိုရှိလဲ" ဟန်ရှန်းမန်က မေးလိုက်သည်။

သူမက ခုနက ဟိုဘက်သို့ လိုက်မသွားခဲ့သဖြင့် သက်ဆိုင်ရာ သတင်းအချက်အလက်များကို မသိရသေးပေ။

လင်းယွမ်က လင်းယာ့ထံမှ ရရှိခဲ့သော သတင်းများကို တစ်ခေါက် ပြန်ပြောပြလိုက်ပြီး နောက်ဆုံးတွင် ပြောလိုက်သည်။ "မြူခိုးမြို့တော်ရဲ့ သခင်က မျိုးရိုးဗီဇမျိုးစေ့ကို အခိုင်အမာ ဖွဲ့စည်းနိုင်ပြီး မျိုးရိုးဗီဇမြေပုံကို ရေးဆွဲနိုင်တဲ့အထိ အဆင့်မြင့်တဲ့ အစွမ်းပိုင်ရှင်တစ်ယောက် ဖြစ်ရမယ်"

"ဒီမြူခိုးမြို့တော်ထဲမှာ... မျိုးရိုးဗီဇမျိုးစေ့ကို အခိုင်အမာ ဖွဲ့စည်းနိုင်တဲ့ နည်းလမ်း ရှိနေဖို့... အလားအလာ တော်တော်များတယ်"

"ဒါပေမဲ့... ဒီမျိုးရိုးဗီဇမျိုးစေ့ ဖွဲ့စည်းတဲ့ နည်းလမ်းကို... ရဖို့ဆိုတာတော့... မလွယ်ကူလောက်ဘူး ထင်တယ်"

ဟန်ရှန်းမန်က အနည်းငယ် စဉ်းစားခန်း ဝင်သွားပြီး မေးလိုက်သည်။ "လင်းယာ ပြောတဲ့စကားအရဆိုရင်... မြူခိုးမြို့တော်ရဲ့ အမြဲတမ်း နေထိုင်သူ ဖြစ်မှ... မျိုးရိုးဗီဇမျိုးစေ့ နိုးထစေမယ့် နည်းလမ်းကို ရရှိဖို့ အရည်အချင်း ပြည့်မီမှာဆို"

"ဒါဆိုရင် ကျွန်မတို့က... ချိုးရင်ယွဲ့ အဖေရဲ့ လမ်းကြောင်းကိုပဲ အားကိုးရတော့မှာလား"

ထိုစကားကို ကြားသောအခါ လင်းယွမ်က ပြုံးပြီး ခေါင်းခါပြလိုက်သည်။ "မသေချာသေးဘူး... ကျွန်တော့်ဆီမှာလည်း စွမ်းအင်ကျောက်တုံးတွေ ရှိနေတာပဲ... ဒီနေရာမှာ အမြဲတမ်း နေထိုင်သူ ဖြစ်ဖို့ လိုအပ်တဲ့ အဓိက သတ်မှတ်ချက်ကို ကျွန်တော်လည်း ဖြည့်ဆည်းပေးနိုင်တယ်လေ"

"အခု သေချာအောင် လုပ်ရမယ့် တစ်ခုတည်းသော ကိစ္စက... မြူခိုးမြို့တော်က လူဖြစ်မှ မျိုးရိုးဗီဇမျိုးစေ့ နိုးထခွင့် ရရှိမယ်ဆိုတာ တကယ် ဟုတ်မဟုတ် စုံစမ်းဖို့ပဲ"

"ဒါကို ဘယ်လို သေချာအောင် စုံစမ်းရမှာလဲ" ဟန်ရှန်းမန်က မနေနိုင်တော့ဘဲ မျက်မှောင်ကုတ်ကာ မေးလိုက်သည်။

လင်းယွမ်က ပြုံးလိုက်သည်။ "ဒီမြူခိုးမြို့တော်က အထက်လူကြီး တစ်ယောက်ယောက်ကို ဖမ်းပြီး မေးကြည့်လိုက်ရင် သိရမှာပေါ့"

ဟန်ရှန်းမန်က ခဏမျှ ကြောင်အသွားပြီး ချက်ချင်း ပြုံးစစဖြင့် ပြောလိုက်သည်။ "ဒါလည်း ဟုတ်တာပဲနော်"

"ဒါပေမဲ့ ကျွန်တော်က ဒီနည်းလမ်းကို သုံးဖို့ အစီအစဉ်မရှိဘူး" လင်းယွမ်က ခေါင်းခါပြလိုက်သည်။

ဟန်ရှန်းမန်က ထပ်ပြီး အံ့အားသင့်သွားသည်။ "ဒါဆိုရင် ကိုလင်းယွမ်ဆီမှာ ပိုကောင်းတဲ့ နည်းလမ်း ရှိလို့လား"

"အင်းပေါ့... အလွယ်ဆုံး နည်းလမ်းက ဒီမြူခိုးမြို့တော်ဘုရင်ကို ထွက်လာအောင် ဖိအားပေးပြီး ကျွန်တော်တို့နဲ့ သေချာ ဆွေးနွေးခိုင်းဖို့ပဲ"

ဆက်ရန်...

အပိုင်း(၃၈၄) ရွှေကြေးခွံချပ်ဝတ်

"မြူခိုးမြို့တော်သခင်ကို ထွက်လာအောင် ဖိအားပေးမယ် ဟုတ်လား... ကျွန်မတို့လူတွေလောက်နဲ့ ဖြစ်ပါ့မလား"

ဟန်ရှန်းမန်က အနည်းငယ် အံ့သြသွားပြီး သူမ၏ မျက်နှာတွင် ထိတ်လန့်သွားသည့် အရိပ်အယောင်များ ပေါ်လာကာ စကားပြောရန် ဟန်ပြင်ပြီးမှ ပြန်လည် မျိုသိပ်လိုက်သည်။

သူမက လင်းယွမ်၏ စွမ်းအားကို အသိအမှတ်ပြုထားသော်လည်း ဤမြူခိုးမြို့တော်က သေးငယ်လှသည်တော့ မဟုတ်ပေ။ ခုနလေးတင် ရရှိထားသည့် သတင်းများအရ မြူခိုးမြို့တော်တွင် အစွမ်းပိုင်ရှင်များသာ ဝင်ရောက် နေထိုင်ခွင့် ရှိသည်။

ဤမျှ ကြီးမားလှသည့် အစွမ်းပိုင်ရှင် အင်အားစုကြီးကို လင်းယွမ်က ဘယ်လောက်ပဲ စွမ်းစွမ်း တိုက်ရိုက် ရင်ဆိုင်ရန်မှာ အလွန် ခက်ခဲပေလိမ့်မည်။

ထို့ကြောင့် လင်းယွမ် ပြောလိုက်သည့် စကားအပေါ် သူမက မည်သို့ တုံ့ပြန်ရမည်ကိုပင် မသိဖြစ်သွားသည်။

စိတ်ထဲတွင်တော့ သူမက သဘောမတူသော်လည်း လင်းယွမ်၏ မျက်နှာကို ထောက်ထား၍ တိုက်ရိုက်ထုတ်ပြောရန်လည်း မဝံ့မရဲ ဖြစ်နေမိသည်။

သူမက စိတ်ထဲတွင် အကြံထုတ်လိုက်ပြီး မည်သို့ သွယ်ဝိုက်သော နည်းလမ်းဖြင့် ဖြောင်းဖြရမည်ကို စဉ်းစားနေလိုက်သည်။

သို့သော် လင်းယွမ်က ပြုံး၍ ခေါင်းယမ်းလိုက်ကာ "ကျွန်တော်တို့ လူတွေလောက်နဲ့တင်ဆိုရင်တော့ သေချာပေါက် မလောက်ဘူးလေ"

"ဒါပေမဲ့ ဒီမြူခိုးမြို့တော်မှာ ပိတ်မိနေတာ ကျွန်တော်တို့ ပဲ ရှိတာမှ မဟုတ်တာ"

ထိုစကားကို ကြားလိုက်ရချိန်တွင် ဟန်ရှန်းမန်၏ မျက်လုံးများက အရောင်လက်သွားပြီး လင်းယွမ်ကို ချက်ချင်း မော့ကြည့်လိုက်ရာ သူမ၏ လှပသော မျက်နှာလေးပေါ်တွင် စိတ်လှုပ်ရှားမှု အရိပ်အယောင်အချို့ ပေါ်လွင်လာသည်။

"ရှင့်သဘောကို ကျွန်မ နားလည်ပြီ... ဒီမှာ ပိတ်မိနေတဲ့ အစွမ်းပိုင်ရှင်တွေကို အသုံးချပြီး မြူခိုးမြို့တော်ကို အတူတူ တိုက်ခိုက်ဖို့ လုပ်မလို့မလား"

လင်းယွမ်က ခေါင်းအနည်းငယ် ညိတ်ပြလိုက်ပြီး "တိုက်ရိုက် တိုက်ခိုက်ဖို့ ဆိုတာလည်း မဟုတ်သေးဘူး... ဒီလူတွေ အားလုံးကို ကျွန်တော်တို့နဲ့ တစ်ဖွဲ့တည်း ဖြစ်အောင် စုစည်းပြီး မြူခိုးမြို့တော်ထဲဝင်မယ်ဆိုရင်... ပြောရေးဆိုခွင့် အလုံအလောက် ရှိလာလိမ့်မယ်"

"ဒီနည်းလမ်းက မဆိုးဘူးပဲ... လူများရင် ခွန်အားပိုကြီးတာပေါ့... ကျွန်မတို့ တစ်ယောက်တည်းဆိုရင် မလုံလောက်နိုင်ပေမယ့် အားလုံး မြူခိုးမြို့တော်ထဲကို အတူတူ ဝင်သွားမယ်ဆိုရင် တစ်ဖက်က လူအင်အား ဘယ်လောက်ပဲ များများ ကျွန်မတို့ရဲ့ လူအင်အားကို မြင်ရင် အနည်းနဲ့အများတော့ ချင့်ချိန်ရမှာ အသေအချာပဲ"

လင်းယွမ်က ခေါင်းညိတ်လိုက်ပြီး "အင်း... ပြီးရင် ကျွန်တော်က မြူခိုးမြို့တော် အနီးက ရေအောက်ကျောက်ဆောင်တွေကြားမှာ ပိတ်မိနေတဲ့ သင်္ဘောတွေကို တစ်ချက် သွားစစ်ဆေးကြည့်ဖို့ လိုတယ်... အသုံးချလို့ရမယ့် လူအင်အား ဘယ်လောက် ရှိလဲဆိုတာ ကြည့်ရမယ်"

ဟန်ရှန်းမန်က ချက်ချင်းပင် "ကျွန်မလည်း လိုက်ခဲ့မယ်"

လင်းယွမ်က ခေါင်းယမ်းလိုက်ကာ "မလိုဘူး... ခင်ဗျား နေခဲ့လိုက်... ကျွန်တော့်အတွက် ရွှေချပ်ဝတ်စစ်သင်္ဘောကို စောင့်ပေးဖို့ လိုတယ်"

"ဒီမှာ ချိုးရင်ယွဲ့တို့ ရှိနေတယ် မဟုတ်လား"

"သူတို့က ဘာပဲဖြစ်ဖြစ် အပြင်လူတွေဆိုတော့ အပြည့်အဝ ယုံကြည်လို့ မရဘူးလေ... ခင်ဗျား နေခဲ့ပြီး ကျွန်တော့်အတွက် နည်းနည်းလောက် စောင့်ကြည့်ပေးထားပါ"

"ပြီးတော့ ကျွန်တော် တစ်ယောက်တည်း သွားလာလှုပ်ရှားရတာက ပိုပြီး အဆင်ပြေလိမ့်မယ်"

"ကောင်းပြီလေ... ဒါဆို ဘယ်အချိန် စလှုပ်ရှားမှာလဲ"

"ဟို ဘုရင်မသင်္ဘောရဲ့ ကပ္ပတိန် ပြန်လာတာကို စောင့်ရမယ်"

"သူတို့ကို စောင့်ဦးမှာလား..." ဟန်ရှန်းမန်က နားမလည်နိုင်စွာဖြင့် မေးလိုက်သည်။

လင်းယွမ်က ပြုံးလိုက်ပြီး "သူတို့အဖွဲ့ကနေ အရင်စရမယ်"

သူ့ထံတွင် ကပ်ပါးမျိုးစေ့ အစွမ်း ရှိနေသောကြောင့် အချိန်ကျလာပါက သင်္ဘောတစ်စင်းပြီး တစ်စင်း လိုက်လံ ရှာဖွေကာ ထိုကပ္ပတိန်များကို တစ်ယောက်ပြီး တစ်ယောက် ထိန်းချုပ်လိုက်ရုံဖြင့် ဤလူများကို အလွယ်တကူ ထိန်းချုပ်နိုင်မည်မှာ သဘာဝပင် ဖြစ်သည်။

ထိုအချိန်ကျလျှင် ဤလူအင်အားများကို ခေါ်ဆောင်ကာ မြူခိုးမြို့တော်သို့ တိုက်ရိုက် သွားရောက်လိုက်ပါက မြူခိုးမြို့တော်သခင် ကိုယ်တိုင်ပင် ဤအင်အားစုကို အထင်သေးဝံ့မည် မဟုတ်ပေ။

လင်းယွမ်က ကိစ္စတစ်ခုကို အလွန် ရှင်းလင်းစွာ သဘောပေါက်ထားသည်။ မည်သည့်အချိန်တွင်မဆို အင်အားချင်း တူညီနေမှသာ စကားပြောဆိုခွင့် ရှိမည် ဖြစ်သည်။

သူ ယခု လုပ်ဆောင်ရမည့်အရာမှာ သူ့ကိုယ်သူ စားပွဲပေါ်တွင် ဝင်ရောက် ဆွေးနွေးနိုင်မည့် အခွင့်အရေးတစ်ခု ဖန်တီးယူရန်ပင် ဖြစ်သည်။

သူ၏ လူအင်အားများက ထိုက်ယန်တောင်တွင် ရှိနေသောကြောင့် ဆင့်ခေါ်ရန်မှာ သဘာဝအရ မဖြစ်နိုင်ချေ။

ထို့ကြောင့် လက်ရှိ လုပ်ဆောင်ရမည့်အရာမှာ မြူခိုးမြို့တော် အနီးတွင် ပိတ်မိနေသည့် သင်္ဘောခေါင်းဆောင်များကို အရင်ဆုံး ထိန်းချုပ်ထားရန်ပင် ဖြစ်သည်။

ဤဖရိုဖရဲ ဖြစ်နေသော အင်အားစုများကို စည်းလုံးညီညွတ်အောင် စုစည်းနိုင်မှသာ လုံလောက်သော ခြိမ်းခြောက်နိုင်စွမ်း တစ်ခုကို ဖန်တီးနိုင်မည် ဖြစ်ပြီး သူ့ကို ဆွေးနွေးပွဲ စားပွဲဝိုင်းသို့ တက်ရောက်နိုင်စေမည် ဖြစ်သည်။

ဤပထမခြေလှမ်းကတော့ ဘုရင်မသင်္ဘော၏ ကပ္ပတိန် ဖြစ်သော လန်ယွဲ့ဟွာကို အရင်ဆုံး ရှင်းလင်းပစ်ရန်ပင် ဖြစ်သည်။

သေချာပေါက်ပင် လန်ယွဲ့ဟွာ ပြန်မလာမီ အချိန်အတွင်း လင်းယွမ်ကလည်း အားလပ်နေမည်တော့ မဟုတ်ချေ။

သူက ရွှေချပ်ဝတ်စစ်သင်္ဘောပေါ်ရှိ ရွှေချပ်ဝတ် အကာအကွယ် သင်္ကေတကို အမြန်ဆုံး အပြည့်အဝ နားလည်သဘောပေါက်အောင် လေ့လာရဦးမည် ဖြစ်သည်။

တစ်ချိန်တည်းမှာပင် သင်္ကေတအစီအရင်၏ ဖွဲ့စည်းပုံ သဘောတရားကိုလည်း သေသေချာချာ လေ့လာရမည် ဖြစ်သည်။

ဤအရာများကို မည်သူကမျှ သင်ကြားပေးထားခြင်း မရှိသော်လည်း လင်းယွမ်ထံတွင် အသင့်ရှိနေသော ရွှေချပ်ဝတ် အကာအကွယ် သင်္ကေတအစီအရင်နှင့် ချိတ်ပိတ် သင်္ကေတအစီအရင်တို့ကို ကိုးကားစရာအဖြစ် အသုံးပြုနိုင်ပေသည်။

အဆိုးဆုံး အခြေအနေတွင်ပင် ဤသင်္ကေတအစီအရင် နှစ်ခုကို ပုံတူကူးချကာ လေ့လာသင်ယူနိုင်မည် ဖြစ်သည်။

အချိန်များက တဖြည်းဖြည်း ကုန်ဆုံးသွားပြီး လင်းယွမ်က ကပ္ပတိန် အခန်းထဲတွင်သာ အမြဲ ရှိနေကာ အပြင်သို့ ထွက်လာလေ့ သိပ်မရှိချေ။

တကယ်တမ်းတွင်မူ လင်းယွမ်က ရေအောက်သို့ တိတ်တဆိတ် ရေငုပ်သွားခဲ့သည်မှာ ကြာပြီ ဖြစ်ပြီး ရွှေချပ်ဝတ်စစ်သင်္ဘော၏ အောက်ခြေတွင် ရွှေချပ်ဝတ် အကာအကွယ် သင်္ကေတကို လေ့လာနေခြင်း ဖြစ်သည်။

သူ၏ အစွမ်းထက်လှသော စိတ်စွမ်းအင်များဖြင့် ရွှေချပ်ဝတ် အကာအကွယ် သင်္ကေတကို ပုံစံတူ ဖန်တီးလေ့လာရန်မှာ မခက်ခဲလှဟု မူလက ထင်မှတ်ထားခဲ့သည်။

သို့သော်လည်း တစ်ရက် ကြာမြင့်ပြီးနောက်မှသာ လင်းယွမ်က ရွှေချပ်ဝတ် အကာအကွယ် သင်္ကေတကို ခက်ခက်ခဲခဲ ဖော်ထုတ်နိုင်ခဲ့သည်။

"ဒီလောက်တောင် အချိန်ကြာသွားတာလား... သာမန် သင်္ကေတများ မဟုတ်လို့လား"

လင်းယွမ်က လက်ဝါးကို ဆန့်ထုတ်လိုက်ရာ သန္ဓေပြောင်းစွမ်းအင်များ လည်ပတ်သွားပြီး သူ၏ မျိုးရိုးဗီဇ ပြောင်းလဲသွားမှုနှင့်အတူ သန္ဓေပြောင်းစွမ်းအင်များက ရွှေဓာတ် အစွမ်းအဖြစ်သို့ ပြောင်းလဲသွားကာ သူ၏ အရေပြား မျက်နှာပြင်ပေါ်တွင် ရွှေရောင် မျဉ်းကြောင်းများ လျင်မြန်စွာ စုစည်းလာခဲ့သည်။

မျက်တောင်တစ်ခတ်အတွင်း ရွှေရောင် သင်္ကေတများ အောင်မြင်စွာ စုစည်းသွားပြီး သူ၏ လက်သီးဆုပ်ပေါ်တွင် လျင်မြန်စွာ ပုံဖော်သွားသည်။

"ဝုန်း"

သင်္ကေတများ လင်းလက်လာသည်နှင့်အမျှ လင်းယွမ်၏ လက်သီးဆုပ်ပေါ်တွင် ရွှေရောင် ချပ်ဝတ်များ ချက်ချင်း ဖုံးလွှမ်းသွားပြီး အရေပြား မျက်နှာပြင်တစ်ခုလုံး အပြည့် ဖြစ်သွားသည်။

လင်းယွမ်က ရွှေရောင် ချပ်ဝတ်ကို ကြည့်လိုက်သော်လည်း လက်ရှိတွင် ၎င်း၏ မာကျောမှု အတိုင်းအတာကို တိုက်ရိုက် ခံစားသိရှိနိုင်ခြင်း မရှိသေးပေ။

သူက ခဏမျှ စဉ်းစားလိုက်ပြီး စနစ် ချိတ်ဆက်ပြသမှုကို တိုက်ရိုက် ခေါ်ယူကာ အစွမ်းများ၏ ဖော်ပြချက်ကို ကြည့်ရှုလိုက်သည်။

ရွှေကြေးခွံချပ်ဝတ် - ရွှေဓာတ် အကာအကွယ် အစွမ်း

အရည်အသွေး - အစိမ်းရောင်

လိုအပ်ချက် - စိတ်စွမ်းအင် ၇ မှတ်၊ ခန္ဓာကိုယ်ကြံ့ခိုင်မှု ၈ မှတ်

အစွမ်းအာနိသင် - ဤအစွမ်းကို အသုံးပြုပါက ခန္ဓာကိုယ် မျက်နှာပြင်တွင် ရွှေရောင် အကာအကွယ် ချပ်ဝတ်ကို ဖြစ်ပေါ်စေနိုင်သည်။

သတိပြုရန် - ရွှေကြေးခွံချပ်ဝတ်သည် ရွှေကြေးခွံ ဆာဒင်းငါးဘုရင်၏ အစွမ်းမှ ဆင်းသက်လာခြင်း ဖြစ်ပြီး ဆာဒင်းငါးအုပ်ကို ကာကွယ်ရန် အကာအကွယ် သင်္ကေတအစီအရင်အဖြစ် ပေါင်းစပ် ဖွဲ့စည်းနိုင်သည်။

"အစိမ်းရောင်အဆင့် အစွမ်း ဖြစ်နေတာပဲ"

လင်းယွမ်က အစွမ်း ဖော်ပြချက်ကို မြင်လိုက်ရချိန်တွင် ရုတ်တရက် အလွန် အံ့အားသင့်သွားပြီး လန့်ဖြန့်သွားသည်။

သူ ကိုယ်တိုင်ပင် ဤသင်္ကေတကို နားလည်သဘောပေါက်ရန် တစ်ရက်တိတိ အချိန်ယူလိုက်ရသည်မှာ အံ့သြစရာတော့ မဟုတ်ပေ။

သင်္ကေတ၏ ရှုပ်ထွေးမှု အတိုင်းအတာအရ ဆိုရလျှင် ဤရွှေကြေးခွံချပ်ဝတ် သင်္ကေတက ယခင် သူ လေ့လာခဲ့ဖူးသော အဖြူရောင်အဆင့် သင်္ကေတများထက် အဆပေါင်းများစွာ ပိုမို ခက်ခဲနေသည်မှာ အမှန်ပင် ဖြစ်သည်။

"စနစ်ကတောင် သင်္ကေတအစီအရင်အဖြစ် ပေါင်းစပ်ဖွဲ့စည်းနိုင်တယ်လို့ အထူး မှတ်ချက်ပေးထားသေးတယ်"

လင်းယွမ်က နောက်ဆုံး မှတ်ချက်ကို ကြည့်ကာ စဉ်းစားနေသည့် ဟန်ပန် ပေါ်လွင်လာသည်။

ရွှေကြေးခွံချပ်ဝတ်၏ အကာအကွယ်ပေးနိုင်စွမ်းသည် ကျောက်အကြေးခွံအကာအကွယ်၊ မြစ်တစ်ရာ ပင်လယ်ပေါင်းဆုံ အစွမ်း ကဲ့သို့သော အဖြူရောင်အဆင့် အစွမ်းများထက် အဆပေါင်းများစွာ သာလွန်နေမည်မှာ သံသယဖြစ်ဖွယ် မရှိချေ။

သို့သော်လည်း ၎င်း၏ အစွမ်းအထက်ဆုံး အချက်မှာ သင်္ကေတအစီအရင်အဖြစ် ပေါင်းစပ်ဖွဲ့စည်းနိုင်သည့် ထူးခြားချက်ပင် ဖြစ်ပေလိမ့်မည်။

ထို့ကြောင့် လင်းယွမ်က ရွှေကြေးခွံချပ်ဝတ် သင်္ကေတအစီအရင်ကို မည်သို့ ပေါင်းစပ်ဖွဲ့စည်းရမည် ဆိုသည်ကို လျင်မြန်စွာ စတင် လေ့လာတော့သည်။

နာရီအနည်းငယ်ခန့် ကြာပြီးနောက်တွင် လင်းယွမ်က သင်္ကေတအစီအရင်၏ သဘောတရားကို ရှင်းလင်းစွာ နားလည်သွားခဲ့ပြီ ဖြစ်သည်။

ရွှေကြေးခွံချပ်ဝတ် သင်္ကေတတွင် ထူးခြားသော ဆက်စပ်မှု အမှတ်များ ရှိနေပြီး တူညီသော သင်္ကေတ နှစ်ခုကို အပြည့်အဝ တိကျစွာ ပေါင်းစပ်လိုက်ပါက ငါးအကြေးခွံများနှင့် တူညီသော သင်္ကေတအစီအရင် တစ်ခုကို ဖြစ်ပေါ်စေနိုင်သည်။

အကြေးခွံများကဲ့သို့ အစီအရီ ထပ်နေမှုများက ရွှေချပ်ဝတ်၏ အကာအကွယ်ပေးနိုင်သည့် ဧရိယာကို ကျယ်ပြန့်သွားစေရုံသာမက အကာအကွယ်ပေးနိုင်စွမ်းကိုလည်း အလွန်အမင်း တိုးမြှင့်ပေးနိုင်သည်။

လင်းယွမ်က ဝမ်းသာအားရ ဖြစ်သွားသည့်အပြင် သူ၏ အဖြူရောင်အဆင့် အစွမ်းများကိုပါ ချက်ချင်း ပြန်လည် ကြည့်ရှုလိုက်သည်။

ထိုအခါမှသာ သင်္ကေတတိုင်းက သင်္ကေတအစီအရင်အဖြစ် ပေါင်းစပ်ဖွဲ့စည်းနိုင်ခြင်း မဟုတ်ကြောင်းကို သူ သိရှိသွားတော့သည်။

အဖြူရောင်အဆင့် အစွမ်း သင်္ကေတများက အလွန် ရိုးရှင်းလွန်းပြီး သင်္ကေတ၏ ရှုပ်ထွေးမှု အတိုင်းအတာ မလုံလောက်သည့်အပြင် ဆက်စပ်မှု အမှတ်များ မရှိသောကြောင့် ထပ်တူကျသော သင်္ကေတများအဖြစ် ပေါင်းစပ်ဖွဲ့စည်းရန် အလွန် ခက်ခဲလှသည်။

သို့သော် ကြည့်ရှုနေရင်းဖြင့် လင်းယွမ်က ထူးခြားသော နေရာတစ်ခုကို တွေ့ရှိသွားခဲ့သည်။

ထိုအရာမှာ အဖြူရောင်အဆင့် သင်္ကေတများက ရိုးရှင်းပြီး အချင်းချင်း ပေါင်းစပ်၍ မရနိုင်သော်လည်း အစိမ်းရောင်အဆင့်ရှိ ရှုပ်ထွေးသော သင်္ကေတများကြားတွင် ထည့်သွင်းလိုက်ပါက တချို့နေရာများတွင် အံဝင်ခွင်ကျ ဖြစ်စွာ ပေါင်းစပ်သွားနိုင်ခြင်းပင် ဖြစ်သည်။

ဤသည်မှာ အပိုင်းအစ တစ်ခုကဲ့သို့ပင် ဖြစ်ပြီး ကွဲအက်နေသော ဟာကွက်များ များလေလေ ရိုးရှင်းသော အပိုင်းအစများကို အသုံးပြုကာ ဖြည့်စွက်ပေးနိုင်ပြီး သင်္ကေတအသစ်တစ်ခုကို ဖြစ်ပေါ်စေနိုင်လေလေ ဖြစ်သည်။

သို့သော် ထိုသို့ ပြုလုပ်လိုက်ပါက သင်္ကေတအသစ်၏ အာနိသင်နှင့် အသုံးဝင်မှုမှာမူ မသိနိုင်တော့ချေ။

ဤသည်ကို သင်္ကေတအစီအရင်အဖြစ် ပေါင်းစပ်နိုင်ခြင်း ရှိမရှိ အတည်ပြုနိုင်ရန်အတွက် အဆက်မပြတ် ပေါင်းစပ် စမ်းသပ်မှုများ ပြုလုပ်ရန် လိုအပ်ပေလိမ့်မည်။

လင်းယွမ်က သင်္ကေတအစီအရင်၏ လျှို့ဝှက်ချက်များကို တဖြည်းဖြည်း နားလည်လာပြီဟု ခံစားလိုက်ရသည်။

သင်္ကေတအစီအရင်များကို ပုံစံတူ ဖန်တီးရာတွင် အခက်ခဲဆုံး အပိုင်းမှာ စိတ်စွမ်းအင်ပင် ဖြစ်သည်။

သင်္ကေတအစီအရင်များက ရှုပ်ထွေးလေလေ စိတ်စွမ်းအင် လိုအပ်ချက်ကလည်း ပိုမို မြင့်မားလေလေ ဖြစ်သည်။

သေချာပေါက်ပင် ရိုးရှင်းသော နည်းလမ်းများလည်း ရှိသေးသည်။

ထိုအရာမှာ အစီအရင်များကို ရေးဆွဲလိုက်ပြီးနောက် စွမ်းအင်ကျောက်တုံးများကို စွမ်းအင်အရင်းအမြစ်အဖြစ် အသုံးပြုကာ အစီအရင်အတွက် စွမ်းအင်များ ထောက်ပံ့ပေးခြင်းပင် ဖြစ်သည်။

ဤသို့ ပြုလုပ်ခြင်းဖြင့် လူ၏ လုပ်အားကို အလွန်အမင်း လျှော့ချပေးနိုင်သည်။

လင်းယွမ်က ဤဘက်ပိုင်းဆိုင်ရာ အသိပညာများကို လေ့လာသင်ယူနေရင်း တစ်ဖက်မှလည်း ထူးဆန်းသော အတွေးအခေါ် အမျိုးမျိုး ထွက်ပေါ်လာခဲ့သည်။

မကြာမီတွင်ပင် ရွှေကြေးခွံချပ်ဝတ် သင်္ကေတအစီအရင်ကိုလည်း သူက အပြည့်အဝ နားလည်သဘောပေါက်သွားခဲ့ပြီး သင်္ဘောပေါ်သို့ ချက်ချင်း ပြန်တက်လာခဲ့သည်။

"ကိုလင်းယွမ်... ရှင် အထဲမှာ ရှိလား"

ချိုးရင်ယွဲ့က တံခါးဝသို့ ရောက်လာခဲ့သည်။

လင်းယွမ်က အခန်းတံခါးကို ဖွင့်လိုက်ပြီး ချိုးရင်ယွဲ့ကို ကြည့်ကာ မေးလိုက်သည်။ "ဘာဖြစ်လို့လဲ"

ချိုးရင်ယွဲ့က မျက်မှောင်ကြုတ်လိုက်ပြီး "နှစ်ရက်တောင် ရှိနေပြီ... ဘုရင်မသင်္ဘောရဲ့ ခေါင်းဆောင်က အခုထိ ပြန်မလာသေးဘူး... ကျွန်မတို့က ဘယ်အချိန်အထိ ထပ်စောင့်နေရဦးမှာလဲ"

လင်းယွမ်က ပြုံးလိုက်ပြီး "ဒီလောက် အချိန်အကြာကြီးတောင် စောင့်လာခဲ့ပြီးပြီပဲ... ဒီလောက် အချိန်လေးကိုများ ဘာဖြစ်လို့ လောနေရတာလဲ"

"ကျွန်မက အဖေ့ကို စောစောလေး ရှာတွေ့ချင်ရုံပါ... အဖေက ဒီနေရာအကြောင်းကို ပိုသိတယ်... ပိုပြီး သိနိုင်တဲ့ အကြောင်းအရာတွေလည်း ရှိကောင်း ရှိနိုင်တယ်လေ"

လင်းယွမ်က ခေါင်းညိတ်လိုက်ပြီး "ခင်ဗျားရဲ့ သဘောကို ကျွန်တော် နားလည်ပါတယ်... ဒါပေမဲ့ နောက်ထပ် တစ်ရက်လောက်ပဲ ထပ်စောင့်ကြည့်ပါ... တစ်ရက် နေလို့မှ လန်ယွဲ့ဟွာ ပြန်မလာသေးဘူးဆိုရင် ကျွန်တော် ခင်ဗျားကို မတားတော့ပါဘူး"

ချိုးရင်ယွဲ့က ထိုစကားကို ကြားသောအခါ ခေါင်းညိတ်ပြလိုက်ပြီးမှသာ ထွက်သွားတော့သည်။

လင်းယွမ်က ချိုးရင်ယွဲ့၏ ကျောပြင်ကို ကြည့်ကာ ပြုံးရုံသာ ပြုံးနေလိုက်သည်။

တကယ်တမ်းတွင် လက်ရှိ အချိန်၌ သူမက မြူခိုးမြို့တော်ကို သွားရောက် စူးစမ်းရှာဖွေမည် ဆိုလျှင်လည်း ရနိုင်မည် မဟုတ်ပေ။

လင်းယွမ်က လမ်းတစ်လျှောက်လုံး အားလုံး အတူတကွ ပူးပေါင်းဆောင်ရွက်လာခဲ့မှုများကို ထောက်ထားပြီး တစ်ဖက်လူကို စိတ်လိုက်မာန်ပါ မလုပ်ရန် စေတနာဖြင့် ဖြောင်းဖြနေခြင်းသာ ဖြစ်သည်။

အကယ်၍ နောက်ပိုင်းတွင်လည်း ချိုးရင်ယွဲ့က သူမ၏ ဆန္ဒအတိုင်းသာ ဆက်လက် လုပ်ဆောင်ပြီး သူမ၏ ဖခင်ကို ကိုယ်တိုင် သွားရှာမည်ဆိုပါက။

သူကလည်း တားဆီးနေမည် မဟုတ်ချေ။ သူတို့ဘက်တွင် လမ်းပြပေးမည့်သူ မရှိသေးသည့်အတွက် အချိန်ကိုက်ပင် မဟုတ်ပါလား။

လင်းယွမ်က ကင်းမျှော်စင်ပေါ်သို့ ရောက်လာပြီး ဟန်ရှန်းမန်ကို နှုတ်ဆက်လိုက်ကာ "ကင်းမျှော်စင်ကို ကျွန်တော် ခဏလောက် စောင့်ပေးထားမယ်... ခင်ဗျား ကပ္ပတိန် အခန်းထဲကို သွားပြီး အရင် နားလိုက်ပါဦး"

ဟန်ရှန်းမန်က ကြားလိုက်လျှင် "ကျွန်မ ဘာမှမဖြစ်ပါဘူး... ဒီကင်းမျှော်စင်ပေါ်မှာလည်း နားလို့ရတာပဲကို"

လင်းယွမ်က လက်ခါပြလိုက်ပြီး "သွားနားလိုက်ပါ... ဒီနေရာကို ကျွန်တော့်တာဝန်ထားလိုက်"

ဟန်ရှန်းမန်က သူ အားနာပြီး ပြောနေခြင်း မဟုတ်မှန်း သိလိုက်ရသဖြင့် ခေါင်းညိတ်ကာ ကျေးဇူးတင်စကား ဆိုလိုက်ပြီး ကင်းမျှော်စင်ပေါ်မှ ဆင်းကာ နားရန် ထွက်သွားတော့သည်။

လင်းယွမ်၏ အကြည့်များက ကင်းမျှော်စင်ပေါ်ရှိ ဒီဂရီ ၃၆၀ လှည့်လည်နိုင်သော ဒူးလေးမြှားကြီးထံသို့ ရောက်ရှိသွားသည်။

ချိတ်ပိတ် သင်္ကေတအစီအရင် မြှားများကို ဤဒူးလေးကြီးထဲမှနေ၍ ပစ်လွှတ်လိုက်ခြင်းပင် ဖြစ်သည်။

၎င်း၏ ပုံပန်းသဏ္ဍာန်က အရင် တီဗီဇာတ်လမ်းတွဲများထဲမှ ရှေးခေတ် မြို့သိမ်းတိုက်ပွဲများတွင် အသုံးပြုသော ဒူးလေးကြီးများနှင့် အနည်းငယ် ဆင်တူနေသည်။

တစ်ခုလုံးကို သတ္တုဖြင့် ပြုလုပ်ထားပြီး ဒူးလေး ကိုယ်ထည်ပေါ်တွင် ရှုပ်ထွေးသော ပန်းကနုတ် အဆင်တန်ဆာများကို ထွင်းထုထားသည်။

၎င်းက ချိတ်ပိတ် သင်္ကေတများ မဟုတ်ဘဲ ပေါက်ကွဲအားကို တိုးမြှင့်ပေးသည့် တစ်စုံတစ်ရာသော သင်္ကေတများသာ ဖြစ်သည်။

ပန်းကနုတ် အဆင်တန်ဆာများ၏ ချိုင့်ခွက်နေသော နေရာအချို့တွင် စွမ်းအင် ထောက်ပံ့ပေးရန်အတွက် စွမ်းအင်ကျောက်တုံးများကို မြှုပ်နှံထားသည်။

မြှားများကို တပ်ဆင်ရသည့် မြှားပြွန် နေရာတွင်လည်း သင်္ကေတများကို ထွင်းထုထားပြီး အလျင်ကို မြှင့်တင်ပေးသည့် သင်္ကေတ အမျိုးအစားများပင် ဖြစ်သည်။

လင်းယွမ်၏ လေ့လာမှု အဓိက အချက်က ဤအရာများ မဟုတ်ဘဲ ဒူးလေးဘေးရှိ ဧရာမ မြှားကြီးများ တစ်ချောင်းချင်းစီပင် ဖြစ်သည်။

ဤမြှားကြီးများက သတ္တု အမျိုးအစား မဟုတ်ဘဲ သစ်သား တစ်မျိုးမျိုးဖြင့် ပြုလုပ်ထားခြင်း ဖြစ်ကာ ၎င်း၏ မျက်နှာပြင်ပေါ်တွင် ရှုပ်ထွေးသော သင်္ကေတ အချို့ကို ထွင်းထုထားပြီး မြှားထိပ်ဖူး နေရာတွင် ချွန်ထက်သော မြှားခေါင်း မဟုတ်ဘဲ လက်သီးဆုပ်အရွယ်အစားခန့် ရှိသော စွမ်းအင်ကျောက်တုံး တစ်တုံးကို တပ်ဆင်ထားသည်။

ထိုစွမ်းအင်ကျောက်တုံးက ပန်းရောင် ဖြစ်ပြီး ၎င်း၏ မျက်နှာပြင်ပေါ်တွင် များပြားလှသော ချိတ်ပိတ် သင်္ကေတများကို ထွင်းထုထားသည်။

ဤချိတ်ပိတ် သင်္ကေတများ၏ စုတ်ချက်များက သပ်ရပ်လှပပြီး အလွန် သိမ်မွေ့ကာ ဆံပင်မွေးမျှင်များကဲ့သို့ သေးငယ်လှသည်။

လင်းယွမ်က သေချာ ဂရုတစိုက် ရေတွက်ကြည့်လိုက်ရာ ဤလက်သီးဆုပ်အရွယ်အစား ရှိသော စွမ်းအင်ကျောက်တုံးပေါ်တွင် ချိတ်ပိတ် သင်္ကေတ ကိုးခု တိတိကို မရမက ထွင်းထုထားခြင်း ဖြစ်သည်။

ဤချိတ်ပိတ် သင်္ကေတ ကိုးခုက ခေါင်းနှင့် အမြီး ဆက်စပ်နေပြီး တစ်သွေးတည်း တစ်သားတည်း ဖြစ်နေကာ သင်္ကေတအစီအရင် တစ်ခုအဖြစ် ပေါင်းစပ် ဖွဲ့စည်းထားသည်။

လင်းယွမ်က ဤသင်္ကေတအစီအရင်ကို ဖန်တီးခဲ့သူ၏ ဉာဏ်ရည် ထက်မြက်မှုနှင့် စုတ်ချက်များ၏ သိမ်မွေ့မှုတို့ကို စိတ်ထဲမှ တိတ်တဆိတ် ချီးကျူးလိုက်မိသည်။

ဤသည်က သေချာပေါက် သင်္ကေတ ဖန်တီးမှုဆိုင်ရာ သခင်အဆင့် လက်ရာတစ်ခုပင် ဖြစ်ပေလိမ့်မည်။

"ချိတ်ပိတ် သင်္ကေတအစီအရင်ကို စွမ်းအင်ကျောက်တုံးပေါ်မှာ တိုက်ရိုက် ထွင်းထုထားတာပဲ... နည်းနည်းလောက် လှုံ့ဆော်ပေးလိုက်ရုံနဲ့ ဧရာမ ချိတ်ပိတ် သင်္ကေတအစီအရင်ကြီးကို ချက်ချင်း ဖြစ်ပေါ်လာစေနိုင်တယ်"

"ချိတ်ပိတ်နိုင်တဲ့ အတိုင်းအတာကလည်း... ဒီစွမ်းအင်ကျောက်တုံးက ထောက်ပံ့ပေးနိုင်တဲ့ စွမ်းအင် အနည်းအများနဲ့ တိုက်ရိုက် ဆက်စပ်မှု ရှိနေတယ်"

လင်းယွမ်က စဉ်းစားခန်း ဝင်နေပြီးနောက် မြှားရိုးပေါ်ရှိ သင်္ကေတများကို တစ်ချက် ထပ်မံ လေ့လာကြည့်လိုက်သည်။

သူက အသစ် တွေ့ရှိမှု တစ်ခုကို ချက်ချင်း ရရှိသွားခဲ့သည်။ ဤမြှားရိုးပေါ်ရှိ သင်္ကေတများက ချိတ်ပိတ် သင်္ကေတများ မဟုတ်ဘဲ သူ တစ်ခါမှ မမြင်ဖူးခဲ့သည့် သင်္ကေတ အမျိုးအစားသစ် တစ်ခုပင် ဖြစ်သည်။

လင်းယွမ်က ချက်ချင်းပင် တစ်ချက် ဆွဲကြည့်လိုက်ရာ မကြာမီမှာပင် ဤသင်္ကေတ အမျိုးအစားကို အောင်မြင်စွာ ပုံတူကူးယူနိုင်ခဲ့သည်။

"ဝုန်း"

သူ၏ လက်ဖဝါးထဲတွင် ထိုသင်္ကေတကို စုစည်းလိုက်သည်နှင့် တစ်ပြိုင်နက် ဝုန်းခနဲ မြည်သံတစ်ချက် ထွက်ပေါ်လာပြီး လင်းယွမ်၏ လက်ဖဝါးထဲမှ အလင်းရောင်များ အပြင်းအထန် ထွက်ပေါ်လာခဲ့သည်။

သင်္ကေတများ လင်းလက်နေသော်လည်း အလင်းရောင်မှလွဲ၍ အခြား မည်သည့် ထူးခြားမှုမျှ ပေါ်ပေါက်လာခြင်း မရှိချေ။

လင်းယွမ်က သံသယ ဝင်သွားပြီး ရုတ်တရက် တစ်စုံတစ်ခုကို သတိရသွားကာ လိပ်ခွံစွမ်းအင်အကာအကွယ် သင်္ကေတကျောက်တုံး တစ်တုံးကို ချက်ချင်း ထုတ်ယူလိုက်ပြီး ထိုအလင်းတန်းထဲသို့ ထည့်လိုက်သည်။

"ရွှစ်"

လိပ်ခွံစွမ်းအင်အကာအကွယ် လှုံ့ဆော်ခံလိုက်ရပြီး ပုံမှန် လှုံ့ဆော်မှုထက် အဆပေါင်းများစွာ ပိုမို ကြီးမားသော လိပ်ခွံစွမ်းအင်အကာအကွယ် တစ်ခုက လင်းယွမ်၏ ပတ်လည်တွင် ချက်ချင်း ဖုံးလွှမ်းသွားတော့သည်။

လင်းယွမ်က ထိုမြင်ကွင်းကို မြင်လိုက်ရချိန်တွင် မနေနိုင်ဘဲ မျက်ခုံးပင့်လိုက်မိပြီး အံ့အားသင့် ဝမ်းသာသွားသည့် အရိပ်အယောင်များ ပေါ်လွင်လာသည်။

"ဒီမြှားရိုးပေါ်က... သင်္ကေတတွေက တခြား သင်္ကေတတွေရဲ့ အာနိသင်ကို ပိုပြီး ကြီးမားသွားအောင် ချဲ့ပေးနိုင်တဲ့အပြင်... သင်္ကေတကျောက်တုံးတွေကို လှုံ့ဆော်ပေးနိုင်တဲ့ အာနိသင်ပါ ရှိနေတာပဲ"

ဆက်ရန်...