အခန်း (၄၉၉-၅၀၀)

အပိုင်း (၄၉၉) အပင်အာဟာရဖြည့်စွက်ရည်

မင်ယွဲ့၏ ပါးနပ်သော ကြားဝင်ကူညီမှုကြောင့် ကျိုးချီသည် ယခင်က ဆုံးရှုံးသွားသော စာချုပ်ထက် ပိုမိုမြင့်မားသည့် ဂုဏ်သရေရှိ ကိုယ်စားလှယ်နေရာကို ရရှိခဲ့လေသည်။

ဤဖြစ်ရပ်က ဝေဖန်တိုက်ခိုက်သူများကို ပါးစပ်ပိတ်သွားစေရုံသာမက ပရိသတ်များကိုလည်း အတိုင်းမသိ ဝမ်းမြောက်စေခဲ့သည်။

မင်ယွဲ့သည် ကြွယ်ဝချမ်းသာပြီး အာဏာရှိသလို၊ အမှတ်တံဆိပ် ပိုင်ရှင်များမှာလည်း ငွေကြေးချို့တဲ့သူများ မဟုတ်ကြပေ။

ကျိုးချီ၏ နောက်ဆုံးထွက် ကြော်ငြာများသည် မြို့ပြ၏ ဧရာမ စခရင်ကြီးများပေါ်တွင် တစ်ခုပြီးတစ်ခု ပေါ်ထွက်လာကာ သူ၏ ရေပန်းစားမှုမှာ အရှိန်အဟုန်မပျက် တိုးတက်နေခဲ့သည်။

'ဖီရာစိန်တွင်း' ၏ မိတ်ဖက်လုပ်ငန်းရှင်များသည် အဓိက ရင်းနှီးမြှုပ်နှံသူဖြစ်သော မင်ယွဲ့တွင် ဖျော်ဖြေရေး ကုမ္ပဏီတစ်ခု ရှိကြောင်း သိရှိသွားကြသည်။

ထို့ပြင် ပိုင်ရှင်အသစ် ပြောင်းလဲသွားကြောင်း ကြားသိရသဖြင့် သူမနှင့် ရင်းနှီးခွင့်ရရန် အခွင့်အရေးကို စောင့်စားနေခဲ့ကြသည်။

သို့သော် မင်ယွဲ့မှာ အမြဲတမ်း တရုတ်နိုင်ငံတွင်သာ ရှိနေသဖြင့် သူမနှင့် ဆက်သွယ်ရန် ခဲယဉ်းနေခဲ့သည်။ ယခုအကြိမ်တွင်မူ အခွင့်အရေးတစ်ရပ်ကို နောက်ဆုံး၌ ရှာဖွေတွေ့ရှိသွားကြပြီး ကောင်းမွန်သော ဆက်ဆံရေး တည်ဆောက်ရန်အတွက် အပြန်အလှန် ကမ်းလှမ်းမှုများ ပြုလုပ်လာကြတော့သည်။

မင်ယွဲ့၏ လက်အောက်တွင် နာမည်ကြီးပြီးသားသူ အနည်းငယ်သာ ရှိသော်လည်း ကျန်းယန်၊ လျိုယဲ့နှင့် ကျိုးချီတို့မှာ ထိပ်တန်း အမှတ်တံဆိပ် ကြော်ငြာများကို ရရှိထားကြပြီ ဖြစ်သည်။

ဝမ်ကျန်းသည်လည်း ကျန်ရှိနေသူများကို မျက်ကွယ်မပြုဘဲ အခွင့်အရေး ရသည်နှင့်အမျှ အလတ်တန်းစား အမှတ်တံဆိပ် စာချုပ်များကို ရယူပေးခဲ့သည်။

မိတ်ဖက် လုပ်ငန်းရှင်များသည် သူတို့၏ အဆင့်မြင့် ဇိမ်ခံပစ္စည်းများအတွက် လူသစ်များကို အသုံးပြုရန် တွန့်ဆုတ်နေကြသော်လည်း ကုမ္ပဏီ၏ အခြားသော ကုန်ပစ္စည်းများအတွက်မူ အဆင်ပြေနေဆဲပင် ဖြစ်သည်။

ထိပ်တန်း အမှတ်တံဆိပ်များပင် ဤအရှိန်အဟုန်ကို မတားဆီးနိုင်ခဲ့ပေ။ အမှတ်တံဆိပ် ပိုင်ရှင်များသည် မင်ယွဲ့နှင့် ရင်းနှီးလိုကြသဖြင့် သူမ၏ တောင်းဆိုချက်များကို လျစ်လျူမရှုရဲကြချေ။ ချန်ယွဲ့ဖျော်ဖြေရေးမှာ တစ်ဟုန်ထိုး တိုးတက်လာနေပြီး အနုပညာရှင် အသစ်အများအပြားလည်း ပေါ်ထွက်လာသည်။

အသစ်စက်စက် ဖျော်ဖြေရေး ကုမ္ပဏီတစ်ခုက ဤမျှကြီးမားသော ဈေးကွက်ဝေစုကို ရယူနိုင်ခြင်းမှာ ကုမ္ပဏီအငယ်စားများ၏ မနာလိုမှုကို ဖြစ်စေသလို ကုမ္ပဏီကြီးများအတွက်လည်း စိုးရိမ်ထိတ်လန့်စရာ ဖြစ်လာခဲ့သည်။

"လင်ကျင်း... ကြားတာတော့ မင်းတို့ ကုမ္ပဏီက အခုတလော ကြော်ငြာတွေ အများကြီး ရိုက်နေရတယ်ဆို ဝူချီတောင် ကြက်တောင်ရိုက်တံ ကြော်ငြာ ရိုက်လိုက်ရသေးတယ် 'အားကစားမင်းသားလေး' ဆိုပြီးတော့တောင် နာမည်ကြီးနေပြီ"

'Youth Trainees' ၏ ပထမပိုင်း ရိုက်ကူးပြီးနောက် ငါးရက်ကြာ အားလပ်ရက် ရခဲ့ကြသည်။ သူတို့ ပြန်ရောက်လာပြီး နှုတ်ဆက်နေကြစဉ် တစ်စုံတစ်ယောက်က ချဉ်းကပ်လာပြီး စကားနာထိုးလာသဖြင့် စိတ်အနှောင့်အယှက် ဖြစ်စရာ ကောင်းလှသည်။

"ဟုတ်တယ်၊ အဆင်ပြေပါတယ်"

ဟု လင်ကျင်းက ဝတ်ကျေဝတ်ကုန် ပြန်ဖြေလိုက်သည်။

"ဒါပဲလား... မင်းက ဒီလောက်နဲ့ပဲ ကျေနပ်နေတာလား"

ဟု ထိုလူက လင်ကျင်း၏ တုံ့ပြန်မှုကို မကျေမနပ် ဖြစ်သွားဟန်ဖြင့် ဆိုပြီး ကျန်းချင်းဘက်သို့ လှည့်လိုက်ပြန်သည်။

"ကျန်းချင်း... မင်းတို့က ကုမ္ပဏီတစ်ခုတည်းက၊ လေ့ကျင့်ရေးဆင်းတာလည်း အတူတူပဲ မင်းကတော့ ဒီမှာ ပြိုင်ပွဲဝင်ဖို့ အပင်ပန်းခံ ကြိုးစားနေရပြီး သူတို့ကတော့ ကြော်ငြာတစ်ခု ရိုက်ရုံနဲ့ တစ်ညတွင်းချင်း နာမည်ကြီးသွားကြတာ ဒါက မတရားဘူးလို့ မထင်ဘူးလား"

"မထင်ပါဘူး၊ ကျွန်တော်က ဒီလို အရည်အချင်းစစ် ပြိုင်ပွဲတွေကို သဘောကျလို့ပါ"

ကျန်းချင်းသည် စင်မြင့်ထက်ကို မြတ်နိုးသူ ဖြစ်သည်။ ကုမ္ပဏီက သူတို့အား ရွေးချယ်စဉ်ကတည်းက ပြိုင်ပွဲပုံစံကို ရှင်းပြထားပြီးသား ဖြစ်သည်။ ဤသည်မှာ သူတို့၏ ကိုယ်ပိုင်ရွေးချယ်မှုဖြစ်ရာ မည်သည့်အတွက်ကြောင့် မပျော်မရွှင် ဖြစ်နေရပါမည်နည်း။

"ချူရန်... မင်းက နာမည်ကြီးချင်လို့ ဖျော်ဖြေရေးလောကထဲ ဝင်လာတာ မဟုတ်လား မင်းတို့ ကုမ္ပဏီက ဒီလောက် အရည်အချင်းရှိတဲ့သူ သုံးယောက်ကို သေသေချာချာ မပျိုးထောင်ဘဲ အချိန်ဖြုန်းနေတာပဲ"

ထိုလူသည် သူတို့သုံးယောက်အတွက် မခံမရပ်နိုင်ဖြစ်ပေးနေသကဲ့သို့ ဟန်ဆောင်ပြောဆိုနေသည်။

အမှန်စင်စစ် သူသည် အခြားဖျော်ဖြေရေး ကုမ္ပဏီတစ်ခုမှ ဖြစ်သည်။ သူ၏ အထက်လူကြီးများက ဤသုံးယောက်၏ အလားအလာကို မြင်သဖြင့် သူတို့ကို မြှူဆွယ်ရန်နှင့် ကုမ္ပဏီအပေါ် စိတ်ဝမ်းကွဲအောင် လုပ်ရန် စေလွှတ် လိုက်ခြင်း ဖြစ်သည်။

"ချီးမွမ်းပေးတာ ကျေးဇူးတင်ပါတယ် ကုမ္ပဏီက ကျွန်တော်တို့ကို အကောင်းဆုံး ဆက်ဆံပါတယ် ကျွန်တော်တို့ရှေ့မှာ ဒီလိုစကားမျိုး နောက်ထပ် မပြောပါနဲ့တော့"

ဟု ချူရန်က ပြတ်သားစွာပင် တုံ့ပြန်လိုက်သည်။

ထိုလူသည် ဒေါသတကြီးဖြင့် လှည့်ထွက်သွားတော့သည်။ ဤ 'လူအ' သုံးယောက်မှာ သူပြောသမျှကို တစ်လုံးမျှ နားမဝင်ကြပေ။

ကုမ္ပဏီ၏ အမိန့်ကြောင့်သာ မဟုတ်ပါက သူသည် ဤလူများနှင့် စကားပြောနေမည် မဟုတ်ပေ။ တစ်နေ့လုံး လေ့ကျင့်ခန်းလုပ်နေရရုံနှင့်ပင် သူတို့မှာ ကျေနပ်နေကြသည်လား။

မင်ယွဲ့သည် မကြာသေးမီက 'ယွဲ့ဟန်' သုတေသနဌာနတွင်သာ အချိန်ကုန်ဆုံးနေလေ့ရှိပြီး တစ်ခါတစ်ရံ တစ်နေ့လုံးပင် ရှိနေတတ်သည်။

မိုဟန်ကျီသည် ယခင်က လူဟူသည် အလုပ်ကိုသာ အာရုံစိုက်သင့်သည်ဟု ယူဆခဲ့သော်လည်း မင်ယွဲ့နှင့် တွဲပြီးနောက်ပိုင်းတွင် သူကိုယ်တိုင် အလုပ်အပေါ် အလွန်အမင်း အာရုံစိုက်ရသည်ကို မနှစ်သက်တော့ကြောင်း သိလာရသည်။

သူ၏ ချစ်သူမိန်းကလေးမှာ အလုပ်ကိုသာ ရှေ့တန်းတင်နေသဖြင့် သူတို့နှစ်ဦး အတူတူရှိရန်နှင့် ချိန်းတွေ့ရန် အချိန်ပင် မရှိတော့ပေ။

"အံ့ဩစရာ သတင်းပဲ၊ ချစ်ပ်ပြားကို အောင်မြင်စွာ တပ်ဆင်နိုင်ခဲ့ပြီ”

"အလွန် တိကျတဲ့ စက်ကိရိယာကြီး တစ်ခုကို ဖန်တီးနိုင်ခဲ့ပြီ”

နှစ်ပေါင်းများစွာ ကြိုးစားအားထုတ်ခဲ့ပြီးနောက် သုတေသနဌာနသည် နောက်ဆုံးတွင် ရလဒ် ကောင်းများကို ရရှိခဲ့လေပြီ။

မင်ယွဲ့တွင် သုတေသနဌာန၌ သူမ၏ ကိုယ်ပိုင် သုတေသနခန်း ရှိသည်။ ပြီးခဲ့သည့်အကြိမ်က သူမသည် 'ဂုဏ်သတင်း အမှတ်' ၁၀,၀၀၀ ကို အသုံးပြု၍ အခြေခံ အပင်အာဟာရဖြည့်စွက်ရည် ဖော်မြူလာနှင့် အချောထည် ပစ္စည်းတစ်ခုကို ဝယ်ယူထားခဲ့သည်။

သူမသည် သုတေသနခန်းထဲတွင် နေ့မနား ညမနား အချိန်ယူ၍ သုတေသန ပြုလုပ်နေခဲ့သည်။ ဖော်မြူလာနှင့် အချောထည် နမူနာ ရှိနေသဖြင့် မင်ယွဲ့မှာ မလိုအပ်ဘဲ အချိန်ကုန်ခြင်းများမှ ကင်းဝေးခဲ့သည်။

စမ်းသပ်ပြွန်များကို ယူ၍ အဏုကြည့်မှန်ပြောင်းအောက်တွင် စစ်ဆေးကာ အထူးပြုလုပ်ထားသော ကိရိယာများဖြင့် အချက်အလက် အမျိုးမျိုးကို တိုင်းတာကြည့်ရှုသည်။ ဖော်မြူလာ၏ ၉၀ ရာခိုင်နှုန်းခန့်ကို တိကျစွာ ပုံတူကူးယူနိုင်ပြီးနောက်မှသာ အပင်များအပေါ်တွင် စတင် စမ်းသပ်ခဲ့သည်။

"ဒါရိုက်တာမင်... ဘာတွေလုပ်နေတာလဲ"

သုတေသနဌာနသည် အကျယ်အဝန်း ကြီးမားလှသည်။

မင်ယွဲ့သည် နောက်နောင်တွင် အနှောင့်အယှက် ဖြစ်မည်ကို စိုးသဖြင့် ပတ်ဝန်းကျင်ရှိ မြေကွက်အမြောက်အမြားကို ဝယ်ယူထားခဲ့ပြီး အချို့နေရာများကို စမ်းသပ်စိုက်ခင်းများအဖြစ် သတ်မှတ်ထားသည်။

သူမ မျိုးစေ့ချနေသည်ကို မြင်လိုက်ရသဖြင့် ဖြတ်သွားသော သုတေသနပညာရှင်တစ်ဦးက စပ်စုလိုက်ခြင်း ဖြစ်သည်။

မင်ယွဲ့သည် ယွဲ့ဟန် သုတေသနဌာန၏ ပိုင်ရှင်ဖြစ်ကြောင်း လူတိုင်းသိကြသဖြင့် သူမကို 'ဒါရိုက်တာမင်' ဟု ရိုသေစွာ ခေါ်ဝေါ်ကြသည်။

မိုဟန်ကျီမှာမူ ခဏခဏ လာလေ့မရှိသဖြင့် လူတိုင်းက သူ့ကို ရင်းနှီးမြှုပ်နှံသူ သို့မဟုတ် မင်

ယွဲ့၏ ရည်းစားအဖြစ်သာ သိရှိထားကြသည်။

"အပင်အာဟာရဖြည့်စွက်ရည်ကို သုတေသန လုပ်နေတာပါ"

ဟု မင်ယွဲ့က ဆိုသည်။

ထိုလူသည် အနည်းငယ် အံ့အားသင့်သွားပြီး အနားသို့ လှမ်းလာသည်။

“တကယ်တော့ ဈေးကွက်ထဲမှာ အပင်အာဟာရဖြည့်ရည်တွေ အများကြီး ရှိနေတာပဲလေ ဒါက သိပ်ပြီး ထူးခြားမယ် မထင်ဘူး"

အနည်းဆုံးတော့ ယခု သူတို့ သုတေသန ပြုလုပ်နေသည့် အလင်းသုံးချစ်ပ်များနှင့် ဉာဏ်ရည်တု (AI) တို့နှင့် ယှဉ်လျှင် ဤအရာမှာ အရေးပါမှု နည်းပါးသည်ဟု သူ ထင်မြင်မိသည်။

"သိပ္ပံနည်းကျ သုတေသနဆိုတာ နေရာတိုင်းမှာ ရှိပါတယ် နည်းပညာ တိုးတက်ဖို့အတွက်ရော နေ့စဉ်ဘဝအတွက်ပါ အရာရာတိုင်းက လိုအပ်တာပါပဲ၊ အကြီးအသေး ဆိုတာ မရှိပါဘူး"

ဟု မင်ယွဲ့က သူမ၏ အမြင်ကို ရှင်းပြလိုက်သည်။

သူမသည် အခြားသူများ၏ အမြင်ကို အတင်းအကျပ် ပြောင်းလဲရန် သို့မဟုတ် ဝေဖန် ရန် မကြိုးစားပေ။

လူတိုင်းတွင် မတူညီသော ရှုထောင့်များ ရှိကြသည်မှာ သဘာဝပင် ဖြစ်သည်။

သိပ္ပံပညာရှင် အများအပြားသည် မိမိတို့နိုင်ငံ၏ တိုးတက်မှုအတွက် ရည်ရွယ်ကာ နည်းပညာနယ်ပယ်တွင် ရှေ့တန်းရောက်သည့် နိုင်ငံဖြစ်လာစေရန် မျှော်လင့်ချက်ဖြင့် ကြိုးစားနေကြခြင်း ဖြစ်သည်။ ဤသည်မှာ လူတိုင်း လေးစားရမည့် အချက်ပင် ဖြစ်သည်။

သုတေသနဌာနသို့ အသစ်ရောက်လာသော လူငယ်များစွာမှာ မင်ယွဲ့ အလုပ်များနေသည်ကို မြင်သည့်အခါ ဝိုင်းဝန်းကူညီကြသည်။

သိသူများအဖို့ သိပ္ပံပညာရှင်များ သုတေသန လုပ်နေသည်ဟု ထင်ရသော်လည်း မသိသူများအဖို့မှာမူ လယ်ယာလုပ်ငန်း လုပ်ကိုင်နေကြသည်ဟု ထင်မှတ်မှားစရာပင်။

ရလဒ်မှာ မင်ယွဲ့ကို အကြာကြီး စောင့်ခိုင်းခြင်း မရှိခဲ့ပေ။ သူမ စိုက်ပျိုးထားသော ဟင်းသီးဟင်းရွက်များမှာ အလွန်ပင် လျင်မြန်စွာ ကြီးထွားလာခဲ့သည်။

သုတေသနပြုချက်များအရ အပင်များ၏ ကြီးထွားမှု သက်တမ်းမှာ တိုတောင်းသွားသလို ပိုးမွှားဒဏ်ကိုလည်း ခံနိုင်ရည်ရှိလာပြီး အာဟာရဓာတ် ပါဝင်မှုမှာလည်း သိသိသာသာ တိုးတက်လာခဲ့သည်။

"ဒါရိုက်တာမင်... တကယ်ပဲ အောင်မြင်သွားပြီ”

မင်ယွဲ့ကို မျိုးစေ့ချခြင်းနှင့် ပေါင်းသင်ခြင်းများတွင် ကူညီပေးခဲ့သော သုတေသနပညာရှင်မှာ ရလဒ်ကို မြင်လိုက်ရသည့်အခါ အတိုင်းမသိ ဝမ်းသာသွားသည်။

ရလဒ်၏ အတိုင်းအတာ မည်မျှပင် ရှိပါစေ၊ တစ်စုံတစ်ခုကို အောင်မြင်စွာ ဖန်တီးနိုင်ခြင်းကပင် ပျော်ရွှင်စရာ ကောင်းလှသည်။

"ပြီးသွားပြီ ဒီအာဟာရရည်က ဈေးကွက်ထဲက ပစ္စည်းတွေထက် အာနိသင် ၁၀ ဆ ပိုကောင်းတယ် ပြီးတော့ အပင်ကြီးထွားနှုန်း မြှင့်တင်ပေးတဲ့ အာနိသင်လည်း ပါဝင်တယ်"

ဟု မင်ယွဲ့က အနှစ်ချုပ်လိုက်ပြီးနောက် -

"အရေးကြီးဆုံးကတော့ ဒါက သဘာဝအတိုင်းဖြစ်ပြီး ညစ်ညမ်းမှု လုံးဝမရှိတာပဲ"

ယခုခေတ်တွင် လူနေမှုအဆင့်အတန်း မြင့်မားလာသည်နှင့်အမျှ လူတိုင်းသည် သဘာဝ အစားအစာများကိုသာ တောင့်တလာကြသည်။

လက်ရှိ ဈေးကွက်အတွင်းရှိ သဘာဝ အစားအစာများမှာ ဈေးနှုန်းကြီးမြင့်လှသလို ၎င်းတို့မှာ အမှန်တကယ် အော်ဂဲနစ် ဟုတ်မဟုတ်ကိုလည်း အတည်မပြုနိုင်ကြသေးပေ။

မင်ယွဲ့၏ အပင်အာဟာရဖြည့်စွက်ရည်မှာမူ ဟင်းသီးဟင်းရွက်များကို စစ်မှန်သော သဘာဝအတိုင်း ညစ်ညမ်းမှုကင်းစင်ကာ အာဟာရဓာတ် မြင့်မားစေရန် အာမခံပေးနိုင်သည်။

"ကဲ... အားလုံးပဲ လာကြ ငါ ကျွေးမွေးပြုစုပါ့မယ်"

မင်ယွဲ့သည် ထိုနေ့က ခူးဆွတ်ထားသော ဟင်းသီးဟင်းရွက်များကို လက်တွန်းလှည်းလေးဖြင့် ထမင်းစားဆောင်သို့ တွန်းယူသွားသည်။

သုတေသနဌာနမှာ မြို့လယ်နှင့် ဝေးကွာသဖြင့် စားသောက်ရန် သို့မဟုတ် ဈေးဝယ်ရန် အဆင်မပြေသောကြောင့် ပညာရှင်အားလုံးမှာ ထမင်းစားဆောင်တွင်သာ စားသောက်ကြရသည်။

သုတေသနဌာနမှ လူများမှာမူ မအံ့ဩကြတော့ပေ။

ဌာနအတွင်း စမ်းသပ်စိုက်ခင်းများ ရှိလာကတည်းက ထမင်းစားဆောင်တွင် သူတို့ကိုယ်တိုင် စိုက်ပျိုးထားသော ဟင်းသီးဟင်းရွက်များကို စားသုံးနေကြရခြင်း ဖြစ်သည်။

အားလပ်ချိန်တွင် သူတို့သည် ပန်းများ၊ အပင်များနှင့် ဟင်းသီးဟင်းရွက်များကို စိုက်ပျိုးခြင်းဖြင့် ကိုယ်လက်လှုပ်ရှားမှု ပြုလုပ်လေ့ရှိကြသည်။

သို့သော် မမျှော်လင့်ဘဲ မင်ယွဲ့သည် မီးဖိုချောင်ထဲသို့ တိုက်ရိုက်ဝင်သွားကာ အဓိက စားဖိုမှူးနေရာကို ရယူလိုက်သည်။ ယနေ့တွင် အာလူးများကို တူးဖော်ရရှိခဲ့သည်။

မင်ယွဲ့သည် မီးဖိုချောင်ရှိ စားဖိုမှူးအား ပါဝင်ပစ္စည်းများ ပြင်ဆင်ရန် ညွှန်ကြားလိုက်ပြီး အာလူးများကို လျင်မြန်စွာပင် အမြှောင်းလေးများ လှီးဖြတ်လိုက်သည်။

မင်ယွဲ့၏ ဓားအသုံးအနှုန်းမှာ အလွန်ပင် ပြောင်မြောက်လှသည်။ သူမသည် ကြက်သားများကို ခဏချင်းပင် လှီးဖြတ်လိုက်ပြီး အာလူးကြက်သားချက် ကို ပြင်ဆင်လိုက်ရာ ဟင်းပွဲ၏ အရောင်မှာ ရွှေအိုရောင် သန်းလျက် မွှေးရနံ့များမှာ တစ်ခန်းလုံး ပျံ့နှံ့သွားတော့သည်။

ထမင်းစားဆောင်တွင် စောင့်ဆိုင်းနေသူများသည် ပုံမှန်နှင့်မတူဘဲ ထူးကဲသော မွှေးရနံ့ကို ရရှိလိုက်ကြသဖြင့် သွားရည်များပင် ကျလာကာ ဗိုက်ထဲမှလည်း တဂွီဂွီနှင့် အသံများ ထွက်ပေါ်လာကြလေတော့သည်။

အပိုင်း (၅၀၀) ရှီးရှန်းစံအိမ်တော်

မိမိကိုယ်တိုင် စိုက်ပျိုးထားသော ဂေါ်ဖီထုပ်များကို လက်ဖြင့်ဆွဲဖဲ့ကာ အပူရှိန်ပြင်းပြင်းဖြင့် ကြော်လှော်လိုက်ရာ ဟင်းပွဲမှ ထွက်ပေါ်လာသော မွှေးရနံ့မှာ တစ်ခန်းလုံးကို လွှမ်းခြုံသွားတော့သည်။

ကြည်လင်တောက်ပနေသော ဂေါ်ဖီကြော်လေးမှာ ထမင်းပူပူနှင့် စားသုံးရန် အလွန်ပင် လိုက်ဖက်လှပေသည်။ မင်ယွဲ့သည် ဟင်းသီးဟင်းရွက် ဟင်းလျာအချို့ကို ဆက်တိုက်ချက်ပြုတ်ပြီးနောက် နောက်ဆုံးတွင် ပုစွန်ဆီပြန်ဟင်းတစ်အိုးကိုပါ အားဖြည့်ပြင်ဆင်လိုက်သည်။

ဟင်းပွဲများမှာ တစ်ပွဲပြီးတစ်ပွဲ ထွက်ပေါ်လာရာ အားလုံးမှာ ပန်းကန်ပြားအကြီးစားများဖြင့် တည်ခင်းထားခြင်း ဖြစ်သည်။ သုတေသနပညာရှင်များမှာမူ အံ့အားသင့်ကာ မှင်သက်နေကြတော့သည်။

စားဖိုမှူးဝတ်စုံဖြင့် သွက်လက်စွာ လှုပ်ရှားနေသော မင်ယွဲ့ကို ကြည့်ရင်း သူတို့၏ ဒါရိုက်တာကိုယ်တိုင် မိမိတို့အတွက် ကိုယ်တိုင်ကိုယ်ကျ ချက်ပြုတ်ပေးနေသည်ဟူသော အမှန်တရားကို မယုံကြည်နိုင်ဘဲ လက်ခံလိုက်ကြရသည်။

မီးဖိုထဲမှ လတ်လတ်ဆတ်ဆတ် ထွက်လာသော ဟင်းလျာများမှာ အငွေ့တထောင်းထောင်း ထလျက် ဆွဲဆောင်မှုရှိသော ရနံ့များဖြင့် ပြည့်နှက်နေသည်။ ပညာရှင်များမှာ နှာခေါင်းကို တရှုံ့ရှုံ့လုပ်ရင်း ဗိုက်ဆာစိတ်ကို မအောင့်နိုင်ကြတော့ပေ။

"အားမနာဘဲ အဝစားကြပါ"

မင်ယွဲ့သည် သုတေသနဌာနရှိ လူအားလုံးအတွက် မချက်ပြုတ်ပေးနိုင်သော်လည်း ယနေ့ သူမနှင့်အတူ ရှိနေသူများအတွက်မူ သူမကိုယ်တိုင် စိုက်ပျိုးထားသော ဟင်းသီးဟင်းရွက်များ၏ အရသာကို မြည်းစမ်းလိုသဖြင့် ကိုယ်တိုင်ပင် လက်စွမ်းပြလိုက်ခြင်း ဖြစ်သည်။

မင်ယွဲ့ စတင်စားသုံးသည်ကို မြင်သည်နှင့် အားလုံးက တူများကို အပြိုင်အဆိုင် ကိုင်ကာ မြိန်ယှက်စွာ စားသောက်ကြတော့သည်။

"အင်း... အရသာက တကယ့်ကို အံ့မခန်းပဲ..."

"...သိပ်ကောင်းတာပဲဗျာ..."

လူတိုင်းမှာ အစားအသောက်နှင့် အကြာကြီး ဝေးကွာနေသူများကဲ့သို့ပင် စကားပင် မပြောနိုင်ဘဲ အားပါးတရ စားသုံးနေကြပြီး ကြားထဲတွင်မှ ချီးမွမ်းစကားများ တတွတ်တွတ် ဆိုနေကြသည်။

"ငါတော့ ကံကောင်းတာပဲ၊ ဒီလို အရသာရှိတဲ့ ဟင်းတွေကို စားရတော့မယ်"

ချန်ကွမ်ချွမ်းသည် ထမင်းစားဆောင်ထဲသို့ ဝင်လာပြီး နှာခေါင်းကို ရှုံ့ကာ အနံ့ခံကြည့် လိုက်သည်။

သူ ပုံမှန်စားနေကျ ဟင်းလျာများနှင့် မတူသော ထူးခြားသည့် မွှေးရနံ့ကို ရရှိလိုက်သဖြင့် ခပ်မြန်မြန်ပင် ရှာဖွေလိုက်ရာ ဤထောင့်စွန်းနေရာကို တွေ့ရှိသွားတော့သည်။

"မင်းတို့တွေ ငါ့ကို မပြောဘဲ ခိုးစားနေကြတာကိုး"

ဟု ဆိုကာ ချန်ကွမ်ချွမ်းသည် လူငယ် ပညာရှင်များနှင့် ရင်းနှီးစွာပင် စနောက်လိုက်

သည်။

"ဆရာကြီး..."

အားလုံးက မော့ကြည့်လိုက်သော်လည်း သူတို့၏ လက်ထဲမှ တူများမှာမူ ရပ်တန့်မသွားပေ။ သူတို့၏ စားသောက်ပုံကို ကြည့်ရုံဖြင့်ပင် ယနေ့ စားပွဲပေါ်ရှိ ဟင်းလျာများမှာ မည်မျှ အရသာရှိကြောင်း ထင်ရှားလှသည်။

ချန်ကွမ်ချွမ်းသည် ပြတင်းပေါက်သို့သွားကာ ထမင်းဖြူတစ်ပန်းကန် ယူလာပြီး ဝင်ထိုင်လိုက်သည်။ ဟင်းတစ်လုပ် မြည်းစမ်းကြည့်လိုက်သည်နှင့် သူ၏ မျက်ဝန်းများမှာ တောက်ပသွားတော့သည်။

"ဒါကို ဘယ်သူချက်တာလဲ၊ အရမ်းကောင်းတာ ပဲ"

"ဒါရိုက်တာမင် ချက်တာပါ"

ဟု တစ်စုံတစ်ယောက်က ဖြေလိုက်သည်။

ချန်ကွမ်ချွမ်းသည် မင်ယွဲ့ကို အံ့ဩတကြီး ကြည့်လိုက်မိသည်။

မင်ယွဲ့၏ လက်ရာမှာ ဤမျှအထိ ပြောင်မြောက်လိမ့်မည်ဟု သူ မထင်ထားခဲ့ပေ။ သာမန် ဟင်းလျာလေးများကိုပင် အဆင့်မြင့် စားသောက်ဆိုင်ကြီးများတွင် စားနေရသကဲ့သို့ ခံစားချက်မျိုး ပေးနိုင်စွမ်း ရှိလေသည်။

"ဒါရိုက်တာမင်... အပင်အာဟာရရည်ကို အောင်မြင်အောင် ထုတ်လုပ်နိုင်ပြီဆိုတော့ လူထုကို အသိပေးသင့်ပြီ မဟုတ်လား"

ဟု တစ်ဦးက မေးမြန်းလာသည်။

အမှန်စင်စစ် သုတေသနမှာ ပြီးဆုံးသည်မှာ ကြာပြီဖြစ်သော်လည်း အပင်များအပေါ် လက်တွေ့စမ်းသပ်ရန် အချိန်ယူခဲ့ရခြင်း ဖြစ်သည်။

"စမ်းသပ်မှု အချက်အလက်တွေက လူထုကို ယုံကြည်စေဖို့အတွက် လောလောဆယ်မှာ အကန့်အသတ် ရှိနေပါသေးတယ် ဒါကြောင့် အရင်ဆုံး ပြည်တွင်းမှာပဲ အကြီးအကျယ် စိုက်ပျိုးကြည့်မယ် သဘာဝ ဟင်းသီးဟင်းရွက်တွေနဲ့ သစ်သီးဝလံတွေ ဈေးကွက်ထဲကို ရောက်လာတဲ့ အချိန်ကျမှပဲ ငါတို့ရဲ့ အာဟာရရည်အကြောင်းကို ကြေညာမယ်"

ဟု မင်ယွဲ့က သူမ၏ ရည်မှန်းချက်ကို ပြောပြလိုက်သည်။

ယခင်က 'လက်ဝဲကမ်း' ရေပူစမ်း အပန်းဖြေစခန်းသို့ သွားရောက်စဉ်က ပတ်ဝန်းကျင်၌ မပြုပြင်ရသေးသော မြေလွတ်မြေရိုင်းများကို သူမ သတိပြုမိခဲ့ရာ ၎င်းမှာ စိုက်ပျိုးရေးအတွက် အကောင်းဆုံးနေရာ ဖြစ်ပေလိမ့်မည်။

မင်ယွဲ့သည် လျင်မြန်စွာပင် အပင်အာဟာရရည်များကို ထိုနေရာသို့ ပေးပို့ကာ စနစ်တကျ စိုက်ပျိုးစေခဲ့သည်။

ထို့ပြင် အောက်ရွာ သည်လည်း ကျေးလက်ဒေသဖြစ်သဖြင့် ဤအာဟာရရည်မှာ ထိုနေရာတွင် ပို၍ပင် အသုံးဝင်ပေလိမ့်မည်။

မင်ယွဲ့သည် ရွာရှိ သူမနှင့် ရင်းနှီးသော လူငယ်အချို့ကို တာဝန်ပေးကာ ကုမ္ပဏီဝန်ထမ်းများ၏ ကြီးကြပ်မှုဖြင့် သဘာဝ ဟင်းသီးဟင်းရွက်များ၊ သစ်သီးပင်များနှင့် လက်ဖက်ပင်များကို အရှိန်အဟုန်ဖြင့် စိုက်ပျိုးစေခဲ့သည်။

ဤသုတေသန ပြီးဆုံးသွားသည့်နောက်တွင် မင်ယွဲ့သည် အဆင့်မြင့် အာဟာရရည်များကို ဆက်လက် ရှာဖွေရန် မလောတော့ပေ။

အရာရာတိုင်းမှာ တစ်ဆင့်ချင်းစီသာ သွားရမည် မဟုတ်ပါလား။ သူမသည် ဉာဏ်ရည်တု သုတေသနကိုသာ ပြန်လည် အာရုံစိုက်လိုက် တော့သည်။

【တင်း— အဆင့်မြင့် ဉာဏ်ရည်တု ဗဟုသုတ လက်ဆောင်ထုပ်အပေါ် သင်၏ နားလည်မှုမှာ အလယ်အလတ် အဆင့်သို့ ရောက်ရှိသွားပြီ ဖြစ်သည် သင်သည် ကျပန်းပိုင်ဆိုင်မှု ဆုလာဘ်တစ်ခုကို ရရှိပါသည်】

အချိန်အတော်ကြာ တိတ်ဆိတ်နေသော စနစ်၏ ဆုလာဘ်များမှာ သူမ၏ အသိဉာဏ်ထဲသို့ ပြန်လည် ဝင်ရောက်လာသည်။

တစ်ဖက်တွင်မူ ယွမ်ပေါ့သည် အာကာသဟင်းလင်းပြင်ထဲ၌ မုန့်များကို အားပါးတရ စားသုံးနေလေသည်။

မင်ယွဲ့သည် ပြီးခဲ့သည့်အကြိမ်က ရွှေတံဆိပ် ဆွတ်ခူးနိုင်ခဲ့သဖြင့် သူမ၏ ဂုဏ်သတင်းအမှတ်များမှာ အဆမတန် တိုးပွားလာရာ ယွမ်ပေါ့အပေါ်တွင်လည်း အလွန်ပင် ရက်ရောခဲ့သည်။

ယွမ်ပေါ့မှာ ယခုအခါ အလွန်ပင် ချမ်းသာနေပြီး နေ့စဉ်နှင့်အမျှ စနစ်၏ အွန်လိုင်းစတိုးမှ အဝတ်အစားနှင့် မုန့်များကို စိတ်ကြိုက် ဝယ်ယူနေလေတော့သည်။

【တင်း— စနစ်ဆုလာဘ်များ ဖြန့်ဝေပေးနေပါသည် သင်သည် ရှီရှန်းစံအိမ်တော်ကို ရရှိပါသည်】

မင်ယွဲ့သည် ၎င်းမှာ အိမ်ခြံမြေ ဖြစ်နေပြန်သဖြင့် အနည်းငယ် အံ့အားသင့်သွားသည်။

သူမ၏ လက်ထဲတွင် အိမ်များစွာ ရှိနေပြီဖြစ်ရာ အားလုံးတွင် နေထိုင်ရန်ပင် မဖြစ်နိုင်တော့ပေ။

"ယွမ်ပေါ့... ငါ့မှာ ရှိတဲ့ အိမ်တချို့ကို ရောင်းလိုက်ရင် ကောင်းမလား"

ဟု မင်ယွဲ့က မေးလိုက်သည်။

【ယွဲ့ယွဲ့... အိမ်ရောင်းလိုက်ရင် ပိုက်ဆံပဲ ရမှာလေ နင့်မှာက ပိုက်ဆံတွေ အများကြီး ရှိနေတာပဲ၊ ရောင်းတာ မရောင်းတာက နင့်အတွက် ဘာမှ ထူးခြားမှာ မဟုတ်ပါဘူး】

မင်ယွဲ့ ပြန်စဉ်းစားကြည့်လိုက်ရာ ယွမ်ပေါ့၏ စကားမှာ ကျိုးကြောင်းဆီလျော်လှသည်။

ရှီရှန်းစံအိမ်တော်သည် တောင်ကုန်းတစ်ခု၏ တစ်ဝက်ခန့်တွင် တည်ရှိသဖြင့် နေ့စဉ်နေထိုင်ရန် မလွယ်ကူသော်လည်း ပွဲလမ်းသဘင်များ ကျင်းပရန်အတွက်မူ အလွန်ပင် သင့်တော်လှပေသည်။

【ဟုတ်တယ်လေ... ပိုင်ဆိုင်မှုအချို့က လက်တွေ့အသုံးချဖို့ထက် ချမ်းသာကြွယ်ဝမှုရဲ့ သင်္ကေတအဖြစ် ရှိနေတာက ပိုပြီး အဓိပ္ပာယ်ရှိပါတယ်】

နောက်ဆုံးတွင် မင်ယွဲ့သည် အိမ်ရောင်းရန် အစီအစဉ်ကို လက်လျှော့လိုက်ပြီး သူမ၏ ကိုယ်ရေးအချက်အလက်များကို ကြည့်ရှုလိုက်သည်။

အိမ်ရှင် - မင်ယွဲ့

ဆွဲဆောင်မှု - ၉၃ (၁၀၀) 【ရင်သပ်ရှုမောဖွယ် အလှတရား】

အသက်မွေးဝမ်းကျောင်း - ၈၈ (၁၀၀) 【အောင်မြင်မှု အထွတ်အထိပ်】

ပိုင်ဆိုင်မှု - ၆၈၆,၅၇၉,၀၀၀,၀၀၀ (ခြောက်ရာရှစ်ဆယ့်ခြောက် ဘီလီယံ၊ ငါးရာခုနစ်ဆယ့်ကိုး သန်း)

ပိုင်ဆိုင်မှုစာရင်းတွင် ယွီဖုနေအိမ်၊ ဟိုင်ဖုအဆောက်အဦး၊ ဥယျာဉ်ဗီလာ၊ အာဖရိကသတ္တုတွင်း၊ မြို့လယ်ရှိ ဆိုင်ခန်းနှစ်ခန်း၊ ချန်တုန်းစီးပွားရေးလမ်းမ၊ ချွန်ဟဲအသိုင်းအဝိုင်း၊ မြို့တော်အဆောက်အဦး၊ လီယာလယ်ယာ၊ ဟွမ်ရှင်းအပန်းဖြေဥယျာဉ်၊ အာမန်ဝိုင်စက်ရုံ၊ ရှီလင်ပင်လယ်ပြင်၊ မန်လီကျွန်း၊ ရှေးဟောင်းအိမ်တော်၊ ယွမ်တင်းဗီလာ၊ ရှီရှန်းစံအိမ်တော်...

ရှယ်ယာများအနေဖြင့် ယွဲ့ဟွားနည်းပညာ ၇၅%၊ ဆောင်းမိုမီဒီယာ ၃၀%၊ ဝေကွမ်းအုပ်စု ၅၀%၊ ဟဲယိုအထည်အလိပ် ၁၅%၊ ရှီယန်ဖျော်ဖြေရေး ၈၀%၊ မင်ယွဲ့ရုပ်ရှင်ရုံစု ၈၂%၊ ယွဲ့ဟန်သုတေသနဌာန ၅၀%၊ ကျိဝေ့ရင်းနှီးမြှုပ်နှံမှု ၉၀%...

ရောလ်ရွိုက်စ်ကား၊ ပတ္တမြားနာရီ၊ ရှေးဟောင်းကြေးအိုးများ၊ ပင်လယ်ကူးသင်္ဘောကြီး...

【အလွန်အမင်း ကြွယ်ဝချမ်းသာသူ】

ဂုဏ်သတင်းအမှတ် - ၈၀၀,၀၀၀

ကျွမ်းကျင်မှု - 【လက်တွေ့အသုံးချ အတတ်ပညာများ】

အလယ်အလတ်အဆင့် - မိတ်ကပ်၊ ဘဏ္ဍာရေး၊ ကိုယ်လက်လှုပ်ရှားမှု၊ ဟက်ကာ၊ စီးပွားရေးစီမံခန့်ခွဲမှု၊ အဝတ်အထည်ဒီဇိုင်း၊ ရင်းနှီးမြှုပ်နှံမှု၊ လူကြီးလူကောင်းအတတ်ပညာ (တော်ဝင်အမူအရာ)၊ လက်ရေးလှ၊ ဖက်ရှင်ဒီဇိုင်း၊ ပန်းပု၊ ချစ်ပ်ပြား၊ ဉာဏ်ရည်တု

အဆင့်မြင့် - ချက်ပြုတ်ခြင်း၊ ပန်းချီ၊ ဆေးဖော်စပ်ခြင်း၊ ဂီတ၊ နိုင်ငံခြားဘာသာစကား၊ စူးကျိုးပန်းထိုး၊ ထွင်းထုခြင်း

အထူးပစ္စည်းများ - ၁၀*၁၀ မီတာ ကိုယ်ပိုင်ဟင်းလင်းပြင်၊ အတုအယောင် သင်ယူမှုအခန်း၊ အလိုအလျောက် ရုပ်ပုံဖမ်းကင်မရာ

လက်ရှိ စနစ်အဆင့် - အဆင့် ၅

မင်ယွဲ့သည် သူမ၏ ဂုဏ်သတင်းအမှတ်များကို စစ်ဆေးလိုက်ရာ အလွန်ပင် များပြားနေသည်ကို တွေ့ရသည်။

သူမ၏ ကိုယ်ပိုင်ဟင်းလင်းပြင်မှာလည်း သေးငယ်သည်မဟုတ်သော်လည်း ပစ္စည်းများဖြင့် ပြည့်နှက်နေပြီဖြစ်သည်။ သူမသည် စနစ်စတိုးကိုဖွင့်ကာ ဟင်းလင်းပြင်ကို အဆင့်မြှင့်တင်ရန် ရှာဖွေလိုက်သည်။

၁၀၂၀ သို့ မြှင့်တင်ရန် ဂုဏ်သတင်းအမှတ် ၁၀၀,၀၀၀၊ ၁၀၃၀ သို့ မြှင့်တင်ရန် ၃၀၀,၀၀၀ နှင့် ၁၀*၄၀ သို့ မြှင့်တင်ရန် ၈၀၀,၀၀၀ အသီးသီး လိုအပ်သည်။ ကျန်ရှိနေသည်များမှာမူ အမှတ်မလောက်သဖြင့် ပိတ်ထားဆဲဖြစ်သည်။

"ယွမ်ပေါ့... ဘာလို့ အဆင့်တက်လေလေ အမှတ်တွေ အများကြီး လိုလာရတာလဲ"

ဟု မင်ယွဲ့က ညည်းညူလိုက်သည်။

သူမ မိမိကိုယ်မိမိ ချမ်းသာပြီဟု ထင်မှတ်ထားသော်လည်း ယခုတော့ ပြန်၍ ဆင်းရဲသွားသကဲ့သို့ ခံစားရသည်။

【ယွဲ့ယွဲ့... အခြေခံလိုအပ်ချက်တွေအတွက်ကတော့ ဈေးသက်သာပေမဲ့ အဆင့်မြင့်လာလေလေ ပိုပြီး ဈေးကြီးလာတာ သဘာဝပဲလေအဆင့်မြှင့်မလားဆိုတာပဲ စဉ်းစားလိုက်ပါ】

မင်ယွဲ့သည် သွားကြိတ်ကာ အဆင့်မြှင့်ရန် ရွေးချယ်လိုက်သည်။ သို့သော် သူမသည် ၈၀၀,၀၀၀ လုံး အသုံးမပြုဘဲ ၁၀*၃၀ အထိသာ မြှင့်တင်လိုက်သည်။ အရေးပေါ် အခြေအနေများအတွက် အမှတ်အချို့ ချန်ထားလိုသောကြောင့် ဖြစ်သည်။

ကိုယ်ပိုင်ဟင်းလင်းပြင်ကို အဆင့်မြှင့်တင်ပြီးနောက် သူမ၏ ဂုဏ်သတင်းအမှတ်များမှာ ၅၀၀,၀၀၀ သို့ လျင်မြန်စွာ ကျဆင်းသွားတော့သည်။

သူမ၏ ပုဂ္ဂိုလ်ရေး ရည်မှန်းချက်များမှာ ကြီးမားလှသည်ဖြစ်ရာ နည်းပညာနယ်ပယ်တွင်သာမက လူမှုဘဝတွင်ပါ အောင်မြင်မှုအသစ်များ ရရှိရန် သူမ ဆက်လက် ကြိုးစားသွားပေဦးမည်။