အခန်း (၅၀၇-၅၀၈)

အပိုင်း (၅၀၇) ထူးဆန်းသောအရာ

မင်ယွဲ့ ပြသလိုက်သော အစွမ်းအစများကြောင့် နည်းပညာဌာနတစ်ခုလုံးက သူမအပေါ် အတိုင်းအထက်အလွန် ကြည်ညိုလေးစားသွားကြသည်။

သူတို့သည် နည်းပညာပိုင်းဆိုင်ရာ ကျွမ်းကျင်မှုကိုသာ တန်ဖိုးထားသူများဖြစ်ရာ အစပိုင်းတွင် မင်ယွဲ့အား မိန်းကလေးငယ်တစ်ဦးဖြစ်၍ လျှော့တွက်ခဲ့မိကြသည်။

သို့သော် ယခုမူ မင်ယွဲ့သည် သူတို့၏ အမြင်ကျဉ်းမြောင်းမှုကို ကောင်းကောင်းကြီး သင်ခန်းစာပေးလိုက်လေပြီ။

သုတေသနဌာနမှ ပထမဆုံးအသုတ် စိုက်ပျိုးထားသော ဟင်းသီးဟင်းရွက်များ အောင်မြင်စွာ ထွက်ရှိလာခဲ့ပြီးနောက် သုတေသနရလဒ်များကို ကော်မတီထံသို့ တရားဝင် တင်ပြလိုက်သည်။

"ဒီအပင်အာဟာရဓာတ်အရည်က ဘာကြီးလဲ ဓာတ်မြေဩဇာတော့ မဟုတ်ဘူးမလား"

တရားဝင် ကြေညာချက် ထွက်လာပြီးနောက်တွင်မူ လူအများက သံသယပွားကြသည်။

အကြောင်းမှာ ဈေးကွက်အတွင်းရှိ ကုန်ပစ္စည်းအများစုမှာ သူတို့၏ အာနိသင်ကို ချဲ့ကားကြော်ငြာလေ့ရှိကြပြီး အထူးသဖြင့် အွန်လိုင်းလောကတွင် အမှန်နှင့်အမှား ခွဲခြားရခက်လောက်အောင် ရောထွေးနေသောကြောင့် ဖြစ်သည်။

သုတေသနဌာန၏ သတင်းစာရှင်းလင်းပွဲတွင် စမ်းသပ်ချက်ရလဒ်များနှင့် အာဟာရရည်သုံး၍ စိုက်ပျိုးထားသော ထုတ်ကုန်ဓာတ်ပုံများကို ပြသခဲ့သော်လည်း အများပြည်သူ၏ ယုံကြည်မှုမှာ အားနည်းနေဆဲပင် ဖြစ်သည်။

"ဒါရိုက်တာမင်... ကျွန်တော်တို့ တစ်ခုခု လုပ် သင့်သလား"

ဟု ဝန်ထမ်းတစ်ဦးက မေးသည်။

၎င်းတို့မှာ ပုဂ္ဂလိက သုတေသနဌာန ဖြစ်သဖြင့် နိုင်ငံအတွက် အကျိုးပြုရန်သာမက အကျိုးအမြတ်ရရှိရန်လည်း အရေးကြီးသည်။

ထို့ကြောင့် ကုန်ပစ္စည်းအသစ် ထွက်ရှိလာလျှင် ကြော်ငြာခြင်းနှင့် အရောင်းမြှင့်တင်ခြင်းများ နောက်ကွယ်မှ လိုက်ပါရမည် ဖြစ်သည်။

"မလိုပါဘူး၊ ကောင်းတဲ့အရာက သူ့အလိုလို လူသိလာမှာပါ"

ဟု မင်ယွဲ့က အေးဆေးစွာ ဆိုသည်။

မင်ယွဲ့သည် ဤအရာမှ ချက်ချင်း ငွေဖော်ရန် အလျင်မလိုပေ။ သူမ ဖော်စပ်ထားသော အပင်အာဟာရရည်မှာ သဘာဝစစ်စစ်ဖြစ်ပြီး ဓာတုညစ်ညမ်းမှု လုံးဝကင်းစင်ကာ ဈေးကွက်ရှိ အခြားအရာများထက် အဆပေါင်းများစွာ ပိုမိုထိရောက်သည်။

တစ်နည်းအားဖြင့်ဆိုသော် အခြားသူများ ချဲ့ကားပြောဆိုနေသော အာနိသင်များကို မင်ယွဲ့၏ အာဟာရရည်က အမှန်တကယ် ဖြည့်ဆည်းပေးနိုင်ခြင်း ဖြစ်သည်။

မင်ယွဲ့သည် ဝေဖန်မှုများကို ဂရုမစိုက်ဘဲ ထိုအာဟာရရည်များကို ဒေသခံ စိုက်ပျိုးရေးသုတေသနဌာနနှင့် စိုက်ပျိုးရေးတက္ကသိုလ်များသို့ တိုက်ရိုက်ပေးပို့ကာ စမ်းသပ်ခိုင်းလိုက်သည်။

မကြာမီမှာပင် ၎င်း၏ ထူးကဲသော စွမ်းဆောင်ရည်ကြောင့် စိုက်ပျိုးရေးသမားများအကြား ရေပန်းစားလာပြီး သူမ၏ အစိမ်းရောင်ဟင်းသီးဟင်းရွက်များမှာလည်း ဈေးကွက်ထဲသို့ စတင်ဝင်ရောက်လာခဲ့သည်။

ချမ်းသာသူများမှာ ကျန်းမာရေးကို ပထမဦးစားပေးသူများဖြစ်ရာ မင်ယွဲ့နှင့် မိုဟန်ကျီတို့၏ အထက်တန်းလွှာ မိတ်ဆွေများကြားတွင်လည်း အလွန်ပင် လူကြိုက်များသွားခဲ့သည်။

လီအောက်ကျေးရွာ တစ်ဝိုက်ရှိ သစ်သီးခြံ၊ ဟင်းသီးဟင်းရွက်ခြံနှင့် ဆေးဘက်ဝင်အပင်ခြံများမှာလည်း မင်ယွဲ့အတွက် အမြတ်အစွန်းများ စတင်သယ်ဆောင်လာပေးနေပြီ ဖြစ်သည်။

မင်ယွဲ့၏ ဇီဝေရင်းနှီးမြှုပ်နှံမှုကုမ္ပဏီသည်လည်း တိကျသော အကဲခတ်မှုများကြောင့် ဘဏ္ဍာရေးလောကတွင် ထွန်းသစ်စကြယ်ပွင့် ဖြစ်လာခဲ့သည်။

စီမံကိန်းတစ်ခုသည် အလားအလာရှိပြီး အနာဂတ်တွင် အကျိုးအမြတ်ဖြစ်ထွန်းနိုင်သည်ဆိုလျှင် မင်ယွဲ့နှင့် သူမ၏အဖွဲ့က စေ့စပ်စွာ ဆွေးနွေးဆုံးဖြတ်ကြသည်။

ဘဏ္ဍာရေး ပါရမီရှင် မင်ယွဲ့နှင့် အသိဉာဏ်ကြီးမားသော ယွမ်ပေါ့တို့ ပေါင်းစပ်လိုက်သည့်အခါ ကုမ္ပဏီ၏ ရင်းနှီးမြှုပ်နှံမှု အောင်မြင်မှုနှုန်းမှာ အံ့မခန်း မြင့်မားနေလေတော့သည်။

လတ်တလောတွင် မင်ယွဲ့သည် စနစ် ဟင်းလင်းပြင်အတွင်း၌ အသိဉာဏ်ရှိ စက်ရုပ် တစ်ကောင် ဖန်တီးရန် အပြည့်အဝ အာရုံစိုက် နေသည်။

သူမသည် ပြည်တွင်းပြည်ပမှ စက်ရုပ်အမျိုးမျိုးကို ဝယ်ယူကာ ဖြုတ်ထုတ်ကြည့်ရှုခဲ့သော်လည်း ၎င်းတို့၏ ချစ်ပ်များနှင့် အသိဉာဏ်မှာ သူမ မျှော်မှန်းထားသလောက် ခေတ်မမီသေးသည်ကို တွေ့ရသည်။

ယခုအခါ ဟင်းလင်းပြင်ထဲရှိ မြေပြင်ပေါ်တွင် စက်မှုအစိတ်အပိုင်းများ၊ ပတ်လမ်းပြားများနှင့် ဝါယာကြိုးများမှာ ဖရိုဖရဲ ပြန့်ကျဲနေသည်။

မင်ယွဲ့သည် ထိုအမှိုက်ပုံကြီး၏ အလယ်တွင် တင်ပလ္လင်ခွေထိုင်ကာ ဝက်အူလှည့်တစ်ချောင်းဖြင့် စက်ရုပ်၏ ခေါင်းကို ဖြုတ်ထုတ်နေသည်။

"ဟေး--"

ယွမ်ပေါ့က လုံးဝန်းသော စက်ရုပ်ခေါင်းကို ဘောလုံးကဲ့သို့ ကန်ထုတ်လိုက်ရာ အခြားစက်မှုအကျွင်းအကျန်များကို ထိမှန်ကာ ကွဲအက်ကုန်သည်။ မသိသူများအဖို့မူ မင်ယွဲ့သည် စက်ရုပ်စစ်ပွဲတစ်ခုကို ဆင်နွှဲထားသည်ဟုပင် ထင်မှတ်ရပေလိမ့်မည်။

မင်ယွဲ့သည် လေ့လာမှုများစွာ ပြုလုပ်ပြီးနောက် ယွဲ့ဟန်နှင့် ယန်တာသုတေသနဌာနတို့ ပူးပေါင်းထုတ်လုပ်ထားသော နောက်ဆုံးပေါ် ချစ်ပ်ကို အသုံးပြု၍ စက်ရုပ်တစ်ကောင်ကို စတင် တည်ဆောက်တော့သည်။

သူမသည် မျက်မှန်တပ်ကာ လက်တစ်ဖက်မှ ကာကွယ်ရေးပစ္စည်းများကို ကိုင်ထားပြီး အခြားလက်တစ်ဖက်ဖြင့် စက်ရုပ်ငယ်လေးကို ဂဟေဆော်နေသည်။

မီးပွင့်များမှာ ဟင်းလင်းပြင်အတွင်း တဖျတ်ဖျတ် လွင့်စင်နေသည်။ အချိန်အတော်ကြာ အားထုတ်လိုက်ပြီးနောက်တွင်မူ သူမ နောက်ဆုံးတွင် အောင်မြင်သွားခဲ့သည်။

"ဒါက ဘာသံတုံးကြီးလဲ"

မင်ယွဲ့၏ မွေးနေ့နီးလာပြီဖြစ်သဖြင့် မိဘများမှာ မပြန်သေးဘဲ သူမနှင့်အတူ ဆင်နွှဲရန် စောင့်နေကြသည်။ မင်မိခင်သည် မင်ယွဲ့ အခန်းထဲမှ သယ်ထုတ်လာသော သံတုံးကြီးကို ကြည့်ကာ အံ့ဩတကြီး မေးလိုက်သည်။

"စက်ရုပ်လေ"

ဟု မင်ယွဲ့က ခပ်တိုတို ပြန်ဖြေသည်။

"ဒီစက်ရုပ်က ဘာလို့ ဒီလောက် ရုပ်ဆိုးနေရတာလဲ"

ဟု မင်ဖခင်က အနီးကပ်ကြည့်ကာ ပွင့်ပွင့်လင်းလင်း ဆိုလိုက်သည်။

"ဒါ ကျွန်မကိုယ်တိုင် လုပ်ထားတာလေ"

ချစ်ပ်မှာ နောက်ဆုံးဗားရှင်း မဟုတ်သေးသဖြင့် မင်ယွဲ့က ပုံပန်းသဏ္ဌာန်ကို အသားမပေးဘဲ လက်တွေ့စမ်းသပ်မှုအဖြစ်သာ ဖန်တီးထားခြင်း ဖြစ်သည်။ ခြေလက်အဆစ်များတွင် ဝါယာကြိုးများပင် ထွက်နေသေးသည်။

"ဪ... အေးပါ၊ ကြည့်ရင်းနဲ့ ချစ်စရာလေးပါပဲ"

ဟု မင်ဖခင်က မင်ယွဲ့လက်ရာဖြစ်ကြောင်း သိသည်နှင့် စကားကို ချက်ချင်း ပြောင်းပြောလိုက်သည်။

"သမီးကတော့ တကယ်ကို အံ့ဩစရာပဲ၊ စက်ရုပ်တွေတောင် လုပ်တတ်နေပြီ"

ဟု မင်မိခင်က ဂုဏ်ယူဝင့်ကြွစွာ ဆိုသည်။

လူကြီးနှစ်ဦး၏ မျှော်လင့်တကြီး အကြည့်များအောက်တွင် မင်ယွဲ့က စက်ရုပ်ကို မြေပြင်ပေါ် ချလိုက်သည်။

စက်ရုပ်ငယ်လေးမှာ အားလုံး၏ အံ့ဩမှုကြားတွင် ပုံစံမှာသာ သာမန်ဖြစ်သော်လည်း လှုပ်ရှားမှုမှာ အလွန်ပင် လျင်မြန်လှသည်။

"ရှောင်ယွဲ့... ပြန်လာခဲ့"

ဟု မင်ယွဲ့က အမိန့်ပေးလိုက်သည်။

စက်ရုပ်သည် ချက်ချင်း ရပ်တန့်သွားပြီး မင် ယွဲ့၏ ဘေးသို့ လည်ပြန်လှည့်လာသည်။

"ဟိုး... တကယ်ပဲ အံ့ဩစရာပဲ”

ဟု ဆိုကာ မင်ဖခင်က စိတ်ဝင်တစားဖြင့် စက်ရုပ်၏ ပြောင်ချောနေသော သံခေါင်းလေးကို ပွတ်သပ်လိုက်သည်။

“ထိုင်စမ်း"

ဟု သူက အမိန့်ပေးသော်လည်း စက်ရုပ်မှာ ကျောက်ရုပ်ကဲ့သို့ ငြိမ်သက်နေသည်။

"ရှင်က ခွေးလေ့ကျင့်ပေးနေတယ် ထင်လို့လား"

ဟု မင်မိခင်က ရယ်မောလိုက်သည်။

"ထိုင်လိုက်စမ်း"

ဟု မင်ယွဲ့က ပြောလိုက်သည့်အခါတွင်မူ ထူးဆန်းသော အဖြစ်အပျက်တစ်ခု ဖြစ်လာသည်။

ငြိမ်သက်နေသော စက်ရုပ်သည် ချက်ချင်းပင် ဆောင့်ကြောင့်ထိုင်ချလိုက်ပြီးနောက် ကြမ်းပြင်ပေါ်တွင် ခြေဆန့်ကာ သေသေချာချာ ထိုင်ချလိုက်လေသည်။

၎င်း၏ လှုပ်ရှားမှုမှာ လူတစ်ဦးကဲ့သို့ပင် ချောမွေ့ညင်သာလှသည်။

"ထူးဆန်းလိုက်တာ ယွဲ့ယွဲ့ရယ်၊ သူက ဘာလို့ သမီးစကားပဲ နားထောင်တာလဲ"

ဟု မင်ဖခင်က မျက်လုံးပြူးကာ မေးသည်။

"ကျွန်မရဲ့ အသံကိုပဲ မှတ်သားထားလို့ပါ၊ နောက်ကျရင် အဖေနဲ့ အမေ့အသံကိုပါ မှတ်ထားပေးမယ်လေ"

ဟု မင်ယွဲ့က ပြုံးလျက် ရှင်းပြသည်။

သူမ၏ ပုဂ္ဂိုလ်ရေးဆိုင်ရာ ရည်မှန်းချက်ဖြစ်သော အဆင့်မြင့် အသိဉာဏ်တု နည်းပညာမှာ ယခုအခါ လက်တွေ့ပုံဖော်လာနိုင်ပြီ ဖြစ်သည်။

"သူက အကုန်လုံးကို နားလည်နိုင်တာလား"

မင်ဖခင်က စက်ရုပ်ကို ထပ်မံ ထိတွေ့ကြည့်သော်လည်း စက်ရုပ်က မလှုပ်မယှက် ရှိနေသည်။

"အခုလောလောဆယ်တော့ အကုန်လုံး မရသေးဘူး၊ အချက်အလက်တွေကို ကိုယ်တိုင် ရေးသွင်းပေးရဦးမှာ သူက သင်ယူတတ်ဖို့လည်း လိုသေးတယ်"

ဟု မင်ယွဲ့က ဆိုသည်။

စက်ရုပ်များက သင်ယူတတ်ခြင်းမှာ အမှန်တကယ်ပင် စိတ်လှုပ်ရှားဖွယ်ရာ ကောင်းလှပေသည်။

အပိုင်း (၅၀၈) သတင်းကောင်း

ဤစက်ရုပ်ငယ်မှာ ကနဦးအဆင့် စမ်းသပ်ချက်မျှသာ ဖြစ်သဖြင့် အပြင်ပန်းသဏ္ဌာန်အားဖြင့် အနုစိတ်မွမ်းမံထားခြင်း မရှိသေးချေ။

နေရာအနှံ့တွင် ကြမ်းတမ်းခက်ထရော်နိုင်သော်လည်း နည်းပညာနားလည်သူများအဖို့မူ ထိုသံတုံးလေး၏ အတွင်းပိုင်း၌ ပုန်းကွယ်နေသော နက်ရှိုင်းသည့် အဆင့်အတန်းကို အာရုံခံမိကြပေလိမ့်မည်။

စက်ရုပ်ငယ်လေးမှာ စားပွဲများ၊ ကုလားထိုင်များနှင့် ဆိုဖာများကို ကျွမ်းကျင်စွာ ရှောင်ကွင်း၍ လှည့်ပတ်သွားလာနေသည်။

ဈေးကွက်အတွင်းရှိ စက်ရုပ်အများစုမှာ ဤသို့ ပြုလုပ်နိုင်ကြသော်လည်း မည်သည့်တုံ့ဆိုင်းမှုမျှမရှိဘဲ လူသားတစ်ဦးကဲ့သို့ ချောမွေ့သဘာဝကျစွာ လှုပ်ရှားနိုင်သူမှာမူ အလွန်ပင် ရှားပါးလှသည်။

"ငါ့အခန်းထဲကို ပြန်သွားတော့"

ဟု မင်ယွဲ့က အမိန့်ပေးစကား ဆိုလိုက်သည်။

စက်ရုပ်ငယ်သည် ချက်ချင်းပင် လှည့်ထွက်သွားပြီး အပေါ်ထပ်သို့ တက်လှမ်းသွားတော့သည်။

လှေကားထစ်များကို တက်လှမ်းရာတွင် မြေပြင်ညီ၌ လျှောက်လှမ်းနေသကဲ့သို့ပင် မည်

သည့်အခက်အခဲမျှ မရှိဘဲ ပေါ့ပါးလှသည်။

လှုပ်ရှားမှုတစ်လျှောက်တွင် သတ္တုချင်းပွတ်တိုက်သံ အနည်းငယ် ထွက်ပေါ်နေသော်လည်း ၎င်းမှာ ကြီးမားသော ပြဿနာမဟုတ်ချေ။

နောင်တွင် ပိုမိုကောင်းမွန်သော ကုန်ကြမ်းပစ္စည်းများကို အသုံးပြုခြင်းဖြင့် ဤအားနည်းချက်ကို ပြုပြင်နိုင်ပေသည်။

"သူက ဒီလောက် ပုပုလေးနဲ့ တံခါးကိုရော မှီပါ့မလား"

မင်မိခင်နှင့် မင်ဖခင်တို့မှာ စက်ရုပ်ငယ်လေး တစ်လှမ်းချင်း တက်လှမ်းသွားပြီး မင်ယွဲ့၏ အခန်းတံခါးဝတွင် ရပ်တန့်သွားသည်ကို စိတ် ဝင်တစား စောင့်ကြည့်နေကြသည်။

"ကြည့်နေလိုက်ပါ အဖေနဲ့အမေရဲ့၊ သူ လုပ်နိုင်ပါတယ်"

ဟု မင်ယွဲ့က ယုံကြည်မှုအပြည့်ဖြင့် ပြုံးလျက် ဆိုသည်။

စက်ရုပ်၏ အရွယ်အစားမှာ သေးငယ်သော်လည်း မင်ယွဲ့သည် ၎င်း၏ခြေထောက်များတွင် လိုအပ်သည့်အခါ အလိုအလျောက် ဆန့်ထွက်နိုင်သော ကိရိယာများကို တပ်ဆင်ထားခဲ့သည်။

စက်ရုပ်ငယ်လေးက တံခါးလက်ကိုင်ကို မှီအောင်ဆန့်၍ တံခါးဖွင့်လိုက်သည်ကို မြင်လိုက်ရသည့်အခါ မင်မိခင်မှာ အံ့အားသင့်လွန်းသဖြင့် ဆွံ့အသွားရတော့သည်။

"သမီးကတော့ တကယ်ကို အားမနေဘူးပဲ ဒဏ်ရာကနေ နိုးလာကတည်းက စီးပွားရေးတွေနဲ့ အလုပ်ရှုပ်နေတာ၊ အခုလည်း ဒါတွေကို ထပ် လုပ်နေပြန်ပြီ"

ဟု မိဘများက သမီးဖြစ်သူအတွက် ဂုဏ်ယူရင်းနှင့်ပင် ပင်ပန်းမည်ကို စိုးရိမ်နေကြသည်။

"ရပါတယ် အမေနဲ့အဖေရဲ့၊ သမီး အခု အကောင်းအတိုင်း ရှိနေတာပဲ မဟုတ်လား"

ဟု ဆိုကာ မင်ယွဲ့က မိခင်ဖြစ်သူ၏ လက်မောင်းကို ဖက်တွယ်လျက် ချွဲနွဲ့လိုက်သည်။

"သမီးရဲ့ မွေးနေ့ကို ဘယ်လိုကျင်းပဖို့ စဉ်းစားထားလဲ"

ကျေးရွာတွင်ဆိုလျှင်တော့ သူတို့ကိုယ်တိုင်ပင် အရာရာကို စီစဉ်ပေးနိုင်သော်လည်း ယခုမှာ ယန်ကျင်းမြို့တော်ကြီး ဖြစ်နေသည်။

သမီးဖြစ်သူတွင်လည်း အထက်တန်းလွှာ မိတ်ဆွေအပေါင်းအသင်းများစွာ ရှိနေသဖြင့် သူတို့မှာ အတွေ့အကြုံမရှိဘဲ ဝင်ရောက်စီစဉ်ပေးရန် ဝန်လေးနေမိကြသည်။

"သမီးက ရှီးရှန်းမှာ စံအိမ်တစ်ခု ဝယ်ထားတယ်လေ မွေးနေ့ပွဲကို အဲဒီမှာပဲ ကျင်းပဖို့ စဉ်းစားထားပါတယ် ကြိုတင်ပြင်ဆင်ဖို့ လွှတ်ထားပြီးသားပါ"

မင်ယွဲ့သည် အိမ်တွင် အနားယူနေစဉ်အတွင်း ဦးလေးကြီးလည်း ရှိနေသဖြင့် အိမ်ထိန်းများစွာ မလိုအပ်ချေ။

ထို့ကြောင့် သူမက ဝန်ထမ်းများကို ရှီးရှန်းစံအိမ်သို့ ကြိုတင်စေလွှတ်၍ ပြင်ဆင်ခိုင်းထားခြင်း ဖြစ်သည်။

"အေးလေ... သမီးမှာ ကိုယ်ပိုင်အစီအစဉ် ရှိရင် လည်း ပြီးတာပါပဲ"

ဟု မင်ဖခင်က စိတ်အေးသွားဟန်ဖြင့် ဆိုသည်။

"အဲဒီနေ့ကျရင် အဖေနဲ့အမေလည်း သမီးနဲ့အတူ လိုက်ရမယ်နော်"

"တို့တွေကတော့ မလိုက်တော့ပါဘူးကွယ် သမီး ပွဲကနေ ပြန်လာမှပဲ မိသားစုချင်း သီးသန့် ပြန် ကျင်းပကြတာပေါ့"

ဟု မင်မိခင်က ဆိုသည်။

သူတို့သည် ယန်ကျင်းတွင် အတန်ကြာ နေထိုင်ခဲ့ပြီး ယွမ်တင်းဗီလာနှင့် ရှီးရှန်းစံအိမ်တို့ကဲ့သို့ ကြီးကျယ်ခမ်းနားသော နေရာများကို မြင်ဖူးခဲ့ပြီ ဖြစ်သော်လည်း၊ အဆင့်မြင့်အရာရှိကြီးများနှင့် တွေ့ဆုံရမည့် ပွဲလမ်းသဘင်မျိုးကိုမူ ယခုတိုင် စိမ်းနေဆဲပင် ဖြစ်သည်။

သူတို့သည် သမီးဖြစ်သူ၏ လူမှုဆက်ဆံရေးကို အနှောင့်အယှက် မဖြစ်စေလိုသဖြင့် ရှောင်ဖယ်နေလိုကြခြင်း ဖြစ်သည်။

"အဖေနဲ့အမေက သမီး ဘာတွေလုပ်နေလဲဆိုတာကို သိထားသင့်တယ်လေ ပွဲမှာ ခဏလောက်ပဲ မျက်နှာပြပေးရုံပါပဲ၊ ဘာမှ ထပ်ပြီး ရှင်းပြနေစရာ မလိုပါဘူး"

"ကောင်းပါပြီ... ဒါဆိုလည်း သွားကြတာပေါ့"

သမီးဖြစ်သူ ယန်ကျင်းတွင် တစ်ဦးတည်း ရုန်းကန်နေရသည်ကို သိထားကြသဖြင့် သူမ၏ ပထမဆုံးသော ခမ်းနားသည့် မွေးနေ့ပွဲကို မလွဲမသွေ ပါဝင်ဆင်နွှဲပေးရန် ဆုံးဖြတ်လိုက်ကြသည်။

တစ်ဖက်တွင်လည်း မိုဟန်ကျီသည် မင်ယွဲ့အတွက် မွေးနေ့လက်ဆောင်ကို အသေအချာ ပြင်ဆင်နေသည်။

သူသည် လက်စွပ်ဒီဇိုင်းများကို စိတ်တိုင်းကျ ရွေးချယ်နေခဲ့သည်။

မင်ယွဲ့တွင် ကိုယ်ပိုင်ကျောက်မျက်ရတနာဆိုင် ရှိနေသဖြင့် လက်ဝတ်ရတနာ မရှားပါးသည်ကို သိသော်လည်း မိမိပေးသော လက်ဆောင်မှာမူ တန်ဖိုးချင်း မတူနိုင်ဟု သူယူဆသည်။

"မစ္စတာမို... 'မွန်းဘေး' အပန်းဖြေဥယျာဉ် တည်ဆောက်လို့ ပြီးပါပြီ"

ဟု လက်ထောက်လင်းက လာရောက်အစီရင်ခံသည်။

ထိုမြေနေရာကို မင်ယွဲ့နှင့် စတင်တွဲကတည်းက ဝယ်ယူခဲ့ခြင်းဖြစ်ပြီး အချိန်နှင့် ငွေကြေးများစွာ ရင်းနှီးမြှုပ်နှံထားခဲ့ခြင်း ဖြစ်သည်။

၎င်းမှာ ကလေးကစားကွင်း မဟုတ်ဘဲ လူကြီးများအတွက်သာ သီးသန့်ရည်ရွယ်သော အဆင့် မြင့် အပန်းဖြေကွင်းကြီး ဖြစ်သည်။

"ဒါဆိုရင်တော့ ယွဲ့ယွဲ့ရဲ့ မွေးနေ့မှာပဲ တရားဝင် ဖွင့်လှစ်လိုက်ကြတာပေါ့"

ဟု မိုဟန်ကျီက တည်ငြိမ်စွာပင် စီစဉ်လိုက်သည်။

မင်ယွဲ့၏ မွေးနေ့ ရောက်ရှိရန် ရေတွက်နေစဉ်မှာပင် အလင်းချစ်ပ် နည်းပညာမှာ အောင်မြင်စွာ ထွက်ပေါ်လာခဲ့လေပြီ။

#သတင်းထူး ယွဲ့ဟန်သုတေသနဌာနနှင့် ယန်ကျင်းသုတေသနဌာနတို့ ပူးပေါင်း၍ ကမ္ဘာ့အဆင့်မီ ချစ်ပ်အသစ်ကို တီထွင်နိုင်ခဲ့ပြီ ဖြစ်ရာ နိုင်ငံ၏ နည်းပညာကဏ္ဍမှာ ကမ္ဘာ့ထိပ်တန်းသို့ ရောက်ရှိသွားပြီ ဖြစ်သည်။

ဤသတင်းသည် နည်းပညာလောကတွင် အကြီးအကျယ် ဂယက်ရိုက်သွားစေခဲ့သည်။

အချက်အလက်ခေတ်တွင် ချစ်ပ်သည် အရာရာ၏ အသက်သွေးကြော ဖြစ်သည်။

အထူးသဖြင့် မင်ယွဲ့ သုတေသနပြုနေသော အသိဉာဏ်တု (AI) ကဏ္ဍအတွက် ဤချစ်ပ်မှာ အလွန်ပင် အရေးပါလှသည်။

နိုင်ငံခြားသားများ၏ နည်းပညာ ပိတ်ဆို့မှုကို ခါးစည်းခံနေရသော နိုင်ငံအတွက် ဤအောင်မြင်မှုမှာ ကြီးမားသော မျှော်လင့်ချက် ဖြစ်သည်။

သို့သော် သတင်းစာရှင်းလင်းပွဲ မစတင်မီမှာပင် ဝေဖန်ကန့်ကွက်သူများလည်း ရှိနေခဲ့သည်။

"မကြွားကြစမ်းပါနဲ့ ဒီလို သတင်းအတုတွေက နှစ်တိုင်း ကြားနေရတာပဲ"

"ဟုတ်ပ... နိုင်ငံခြားကို ကျော်တက်ပြီဆိုတာကြီးက ယုံရခက်လိုက်တာ"

သို့သော် မင်ယွဲ့၏ ပရိသတ်များနှင့် မျိုးချစ်စိတ်ရှိသူများကမူ ပြန်လည်တုံ့ပြန်ကြသည်။

"ငါတို့နိုင်ငံရဲ့ သိပ္ပံပညာ တိုးတက်တာကို ဘာလို့ ဒီလောက် အပျက်သဘော မြင်နေကြတာလဲ"

"ယွဲ့ဟန်သုတေသနဌာနက ထုတ်တဲ့ အပင်အာဟာရရည်ကြောင့် စိုက်ပျိုးရေးလောကမှာ ဘယ်လောက် အကျိုးရှိသွားလဲ သိရဲ့လား အဲဒီလောက် အစွမ်းထက်တဲ့ ဌာနက ထုတ်တာကို မယုံရဘူးလား"

အင်တာနက်ပေါ်တွင် ငြင်းခုံမှုများ ဆူညံနေစဉ် ယွဲ့ဟန်သုတေသနဌာနတွင်မူ နောက်ထပ် အောင်မြင်မှုများစွာလည်း ရှိနေခဲ့သည်။

ဆေးသုတ်နည်းပညာ စီမံကိန်းကို နိုင်ငံတော်သို့ လွှဲပြောင်းပေးခဲ့ပြီးနောက် ချန်ကွမ်းချွမ်သည်လည်း သုတေသန ရန်ပုံငွေ အလုံအလောက်ဖြင့် သူ၏ သုတေသနလုပ်ငန်းများကို အားတက်သရော ဆက်လက်လုပ်ဆောင်နေခဲ့သည်။

မင်ယွဲ့၏ ပုဂ္ဂိုလ်ရေးဆိုင်ရာ ရည်မှန်းချက်ဖြစ်သော နိုင်ငံတော်၏ နည်းပညာ အချုပ်အခြာအာဏာကို မြှင့်တင်ရန်ဟူသော အချက်မှာ တဖြည်းဖြည်းနှင့် လက်တွေ့ဖြစ်လာနေပြီ ဖြစ်သည်။