အခန်း (၅၁၇-၅၁၈)

အပိုင်း (၅၁၇) လှူဒါန်းမှု

မင်ယွဲ့သည် ဘေးပတ်ဝန်းကျင်မှ လူများနှင့် စကားပြောဆိုနေစဉ် ရုတ်တရက် အကြည့်တစ်ချက်ကို ခံစားလိုက်ရသဖြင့် မော့ကြည့်လိုက်ရာ စိုးရိမ်ပူပန်မှုများ ပြည့်နှက်နေသည့် မျက်ဝန်းတစ်စုံနှင့် ဆုံတွေ့သွားလေသည်။

"ဟန်ကျီ..."

သူမ ထိုနေရာသို့ အပြေးမသွားနိုင်ခင်မှာပင် မိုဟန်ကျီက သူမထံသို့ ဦးအောင်ပြေးလာပြီး သူမ၏ ကိုယ်လုံးလေးကို တင်းကျပ်စွာ ပွေ့ဖက်လိုက်တော့သည်။

သူသည် ခရီးပန်းလာသည့်အသွင် ရှိသော်လည်း သူ၏ ကိုယ်သင်းနံ့မှာမူ လန်းဆန်းသန့်စင်မြဲ ဖြစ်သည်။ မင်ယွဲ့သည် သူ၏ ကျယ်ပြန့်သော ရင်ခွင်ထဲသို့ ခေါင်းတိုးဝင်လိုက်မိသည်။

"ယွဲ့ယွဲ့ရယ်..."

သူတို့နှစ်ဦးသည် စကားများစွာ ပြောရန်မလိုဘဲ တစ်ဦးကိုတစ်ဦး ကြည့်လိုက်ရုံ၊ ပွေ့ဖက်လိုက်ရုံဖြင့်ပင် နက်ရှိုင်းလှသော သံယောဇဉ်တို့ကို သိရှိနားလည်နေကြသည်။

"သွားကြစို့... ဒီလူငယ်လေးတွေရဲ့ ကမ္ဘာထဲကို ဝင်မရှုပ်ကြနဲ့ဦး"

ဟု ဘေးနားရှိ ပင်ပန်းနေသော ကယ်ဆယ်ရေးသမားများက ပြုံးလျက် ကျီစယ်ကာ ထွက်ခွာသွားကြသည်။

"ပင်ပန်းနေပြီလား"

ဟု မိုဟန်ကျီက တိုးတိုးလေးမေးရင်း မင်ယွဲ့၏ မျက်နှာလေးကို ယုယစွာ ပွတ်သပ်လိုက်သည်။

သူမ၏ ဖြူစင်သော ပါးပြင်ပေါ်ရှိ ဖုန်မှုန့်စွန်းထင်းမှုများကို သူ၏ လက်ချောင်းထိပ်လေးများဖြင့် ညင်သာစွာ ဖယ်ရှားပေးလိုက်သည်။

မှောင်မည်းနေသော ညဉ့်နက်သဘင်တွင် သူတို့နှစ်ဦးသည် လက်ချင်းတွဲလျက် တိတ်ဆိတ်စွာ ရပ်နေကြသော်လည်း ထိုတိတ်ဆိတ်မှုထဲတွင် နွေးထွေးသော အချစ်ရိပ်များ လွှမ်းခြုံနေလေသည်။

မင်ယွဲ့၏ ပင်ပန်းနွမ်းနယ်မှုကို သတိပြုမိသောအခါ မိုဟန်ကျီက သူမရှေ့၌ ဒူးထောက် ထိုင်ပေးလိုက်သည်။

မင်ယွဲ့သည်လည်း ဝန်လေးမနေဘဲ သူ၏ ကျောပေါ်သို့ ခိုနားလိုက်တော့သည်။ ဘေးသင့်ဒေသသို့ ရောက်ရှိလာကတည်းက သူမသည် ခဏတာမျှပင် အနားမယူခဲ့ရချေ။ မည်မျှပင် ကြံ့ခိုင်သော ခန္ဓာကိုယ်ရှိစေကာမူ ယခုမူ အားအင်ကုန်ခမ်းနေပြီ ဖြစ်သည်။

"ယွဲ့ယွဲ့”

ဟု မိုဟန်ကျီက ခေါ်လိုက်သော်လည်း ကျောပေါ်မှ မိန်းကလေးထံမှ ပုံမှန်အသက်ရှူသံလေးသာ ပြန်လည်ကြားရတော့သည်။

မင်ယွဲ့သည် မိမိအကျွမ်းတဝင်ရှိသော ရနံ့များအကြား၌ နှစ်ခြိုက်စွာ အိပ်ပျော်သွားခဲ့ပြီ ဖြစ်သည်။

မြို့တော်ဝန်သည် မိုဟန်ကျီ ယူဆောင်လာသော ကူညီထောက်ပံ့မှုများအတွက် ကျေးဇူးတင်စကား ဆိုချင်သော်လည်း မင်ယွဲ့မှာ အိပ်ပျော်နေသည်ကို မြင်တွေ့ရသဖြင့် အနားသို့မကပ်ဘဲ အဝေးမှသာ ခေါင်းညိတ်ပြလိုက်သည်။

ဤလူငယ်နှစ်ဦးသည် သူတို့၏ မင်္ဂလာပွဲအတွက် ပြင်ဆင်နေချိန်ဖြစ်သော်လည်း ဘေးဒုက္ခကြုံတွေ့ရချိန်တွင် အရာအားလုံးကို ထားရစ်ခဲ့ကာ ကူညီရန် ရောက်ရှိလာခြင်းမှာ အလွန်ပင် လေးစားဖွယ်ကောင်းလှသည်။

မင်ယွဲ့ နိုးထလာချိန်တွင် မွန်းလွဲပိုင်းသို့ ရောက်ရှိနေပြီ ဖြစ်သည်။ မိုဟန်ကျီက သူမအတွက် အသင့်ပြင်ပေးထားသော ခေါက်ဆွဲခြောက်တစ် ခွက်ကို ကမ်းပေးလိုက်သည်။

သူသည် သူမအား ပိုမိုကောင်းမွန်သော အစားအစာများ ကျွေးချင်သော်လည်း ဒုက္ခသည်များနှင့်အတူ ရှိနေချိန်တွင် ထိုသို့ပြုလုပ်ရန်မှာ မသင့်တော်သဖြင့် သူတို့နှင့်အတူတူပင် သောက်သုံးရန် ဆုံးဖြတ်ခဲ့ခြင်း ဖြစ်သည်။

သူတို့နှစ်ဦး အပြင်သို့ထွက်လာချိန်တွင် ကယ်ဆယ်ရေးအဖွဲ့များ ပိုမိုစုံလင်စွာ ရောက်ရှိနေပြီ ဖြစ်သလို မနေ့ညက ရွာသွန်းခဲ့သော မိုးရေများမှာလည်း ခြောက်သွေ့စပြုနေပြီ ဖြစ်သည်။

"မစ္စမင်... မစ္စတာမို... တကယ်ကို ကျေးဇူးတင်ပါတယ်"

ဟု မြို့တော်ဝန်က လေးလေးနက်နက် ဆိုသည်။

မင်ယွဲ့သည် သူမ၏ စက်ရုပ်များကို ဤနေရာ၌ပင် ဆက်လက်ကူညီရန် ထားရစ်ခဲ့ပြီး မိုဟန်ကျီနှင့်အတူ ပြန်လည်ထွက်ခွာရန် ပြင်ဆင်ကြသည်။

မင်ယွဲ့၏ လက်ချောင်းလေးများကို ဆုပ်ကိုင်ထားသော မိုဟန်ကျီ၏ လက်များပေါ်တွင် အပျက်အစီးများကြား ပစ္စည်းသယ်ယူစဉ်က ရရှိခဲ့သော ဒဏ်ရာအချို့ ရှိနေသော်လည်း သူကမူ မင်ယွဲ့အား ပြုံးပြနေဆဲပင်။

"နောက်ထပ် လိုအပ်တဲ့ ပစ္စည်းတွေကိုလည်း ဆက်ပြီး ပို့ပေးပါ့မယ်"

ဟု မင်ယွဲ့က ကတိပေးလိုက်သည်။

မြို့တော်ဝန်မှာ ကျေးဇူးတင်လွန်းသဖြင့် မျက်ရည်များ ဝဲနေရှာသည်။

"ကျေးဇူးတင်ပါတယ်"

ဟူသော စကားတစ်ခွန်းက သူ၏ ရင်ထဲမှ အသိအမှတ်ပြုမှုကို အပြည့်အဝ ဖော်ပြနိုင်ခြင်း မရှိသော်လည်း ထိုစကားကိုသာ ထပ်ခါတလဲလဲ ပြောနေမိသည်။

"ကျွန်မတို့အားလုံးက လူမျိုးတူ ညီအစ်ကိုမောင်နှမတွေပဲလေ... ဒါက လုပ်သင့် လုပ်ထိုက်တာပါ"

ဟု မင်ယွဲ့က ဆိုကာ ထွက်ခွာခဲ့သည်။

ကယ်ဆယ်ရေးစခန်းရှိ လူအပေါင်းသည်လည်း မင်ယွဲ့တို့ ထွက်ခွာသွားသည်ကို လိုက်လံပို့ဆောင်ကြသည်။

နေရောင်အောက်တွင် ရှည်လျားစွာ ထင်ဟပ်နေသော သူတို့နှစ်ဦး၏ အရိပ်များမှာ အလွန်ပင် ခန့်ညားထည်ဝါလှပေသည်။

ဘေးဒုက္ခအပြီး ပြန်လည်ထူထောင်ရေး ကာလတွင် မင်ယွဲ့သည် 'ယွဲ့ဟန်နည်းပညာ' နှင့် 'ချန်းယွဲ့ဖျော်ဖြေရေး' နာမည်တို့ဖြင့် ယွမ် သန်း ၁၀၀ စီကို ထပ်မံလှူဒါန်းခဲ့သည်။

သို့သော် အွန်လိုင်းပေါ်တွင်မူ အချို့သော ဝေဖန်တိုက်ခိုက်သူများက ချန်းယွဲ့ဖျော်ဖြေရေးမှ အနုပညာရှင်များ လှူဒါန်းမှုမရှိဟု အခြေအမြစ်မရှိ စွပ်စွဲလာကြသည်။

ချန်းယွဲ့ဖျော်ဖြေရေးသည် ထိုဝေဖန်မှုများကို နှုတ်ဆိတ်မနေဘဲ ကုမ္ပဏီနှင့် အနုပညာရှင် များ၏ လှူဒါန်းမှုစာရင်းကို အတိအလင်း ထုတ် ပြန်လိုက်သည်။

ပစ္စည်းတန်ဖိုး ယွမ် သန်း ၃၀ အပြင် အလှူငွေ သန်း ၁၀၀၊ ကျိုးချီ သန်း ၅၊ လျိုယဲ့ ၃ သန်း၊ ကျန်းယန် ၃ သန်းနှင့် လင်းကျိုး ၅ သိန်း စသည့် ရှည်လျားလှသော စာရင်းမှာ ဝေဖန်သူတို့၏ ပါးကို ရိုက်လိုက်သကဲ့သို့ပင် ဖြစ်သွားတော့သည်။

"ဟာဟား... တကယ်ကို ရယ်ရတယ် ချန်းယွဲ့ဖျော်ဖြေရေးက အားလုံးကို အကြည်လင်ဆုံး ချပြလိုက်တာပဲ"

"တချို့လူတွေက ဒါရိုက်တာမင်မှာ ကိုယ်ပိုင် ပရဟိတဖောင်ဒေးရှင်း ရှိတာကို မေ့နေကြပုံပဲ ဒီလောက် စေတနာရှင်မျိုးကိုတောင် ဆဲနေကြတာ တကယ် ရူးကြတာပဲ"

ဟု လူအများက ပြန်လည်တုံ့ပြန်ကြသည်။

ထိုစဉ် လူတစ်ဦးက ဗီဒီယိုတစ်ခုကို အွန်လိုင်းသို့ တင်လိုက်ရာ လူထု၏ စိတ်ဝင်စားမှုမှာ အထွတ်အထိပ်သို့ ရောက်ရှိသွားလေတော့သည်။

အပိုင်း (၅၁၈) ရှေ့ပြေးနိမိတ်

"ဟိုမှာကြည့်စမ်း... ဒါ ချန်းယွဲ့ဖျော်ဖြေရေးရဲ့ ဒါရိုက်တာမင် မဟုတ်လား သူ့ဘေးကဟာက စက်ရုပ်ပဲ ဖြစ်ရမယ်၊ ကျွန်တော် အရောင်းဆိုင်မှာ စမ်းသပ်ကြည့်တုန်းကလည်း ဒီအတိုင်းပဲဗျ"

"သူတို့တွေ ကယ်ဆယ်ရေးပစ္စည်းတွေနဲ့ ရောက်လာတုန်းက တကယ်ကို ခန့်ညားတာ အွန်လိုင်းမှာ လျှောက်ပြောနေတဲ့သူတွေ အခုတော့ ပါးစပ်ပိတ်သွားလောက်ပြီ"

"မစ္စတာမင်နဲ့ မစ္စတာမိုကတော့ တကယ့်ကို လိုက်ဖက်တဲ့ စုံတွဲပဲ နှစ်ယောက်စလုံးက လူမှုရေးတာဝန်သိတတ်တဲ့ စီးပွားရေးလုပ်ငန်းရှင်တွေပဲ ဗျာ"

အွန်လိုင်းပေါ်တွင် ချီးကျူးသံများ ပျံ့လွင့်နေလေသည်။

မင်ယွဲ့နှင့် သူမ၏ ကုမ္ပဏီမှာ တစ်သားတည်း ဖြစ်နေသဖြင့် သူမ၏ အပြုအမူတိုင်းသည် ကုမ္ပဏီ၏ ပုံရိပ်ကို တိုက်ရိုက် သက်ရောက် နေသည်။

ယခုတစ်ကြိမ်တွင် မင်ယွဲ့ကိုယ်တိုင် ကွင်းဆင်း၍ ကယ်ဆယ်ရေးလုပ်ငန်းများတွင် ပါဝင်ခဲ့ခြင်းမှာ မည်သည့်ကြော်ငြာထက်မဆို ပိုမိုထိရောက်သော သက်သေပြချက် ဖြစ်ခဲ့သည်။

စက်ရုပ်များ၏ လက်တွေ့အသုံးဝင်မှုကို မြင်တွေ့သွားကြသည့်အတွက် အော်ဒါမှာယူမှုများမှာ ဒီရေအလား တိုးပွားလာရာ ကျန်းဟန်မှာ စာချုပ်များ လက်မှတ်ထိုးရလွန်း၍ လက်ပင် နာကျင်လာရသည်။

"ဒါရိုက်တာမင်... တကယ်ပဲ တစ်ချက် လောက်တောင် လာမကြည့်တော့ဘူးလား"

ဟု ကျန်းဟင်က ဖုန်းဖြင့် မေးမြန်းသည်။

"ရှင်ရှိနေတာပဲ... ကျွန်မ ရှင့်ကို ယုံကြည်တယ်၊ ဆက်ပြီး ကြိုးစားထားဦးနော်"

ဟု မင်ယွဲ့က အလေးအနက် တိုက်တွန်းလိုက် သည်။

ယွမ်သန်းပေါင်းများစွာ တန်ဖိုးရှိသော စာချုပ်များကို သူမကိုယ်တိုင် လာရောက်စစ်ဆေးခြင်း မပြုဘဲ ယုံကြည်စွာ လွှဲအပ်ထားခြင်းမှာ ကျန်းဟန်အတွက် အလွန်ပင် ဂုဏ်ယူစရာ ဖြစ်ခဲ့ရသည်။

မကြာမီမှာပင် မိုဟန်ကျီသည် မင်္ဂလာစာအုပ် တစ်အုပ်ကို ကိုင်ဆောင်ကာ ရောက်ရှိလာပြီး

“ယွဲ့ယွဲ့... ဘယ်လို မင်္ဂလာပွဲမျိုးကို လိုချင်သလဲ"

ဟု ညင်သာစွာ မေးမြန်းသည်။

မိုဟန်ကျီ လက်ထပ်ခွင့်တောင်းပြီးကတည်းက မိသားစုနှစ်ဖက်စလုံးမှာ အလုပ်များနေကြပြီ ဖြစ်သည်။

မိုမိသားစုမှာလည်း သူတို့၏ သားဖြစ်သူ လက်ထပ်တော့မည်ဖြစ်ကြောင်း တစ်လောကလုံး သိစေရန် အားခဲထားကြသည်။

"ကျွန်မကတော့ တရုတ်ရိုးရာ မင်္ဂလာပွဲကိုပဲ သဘောကျတယ်"

ဟု မင်ယွဲ့က ဆိုသည်။

သူမသည် ရှေးဟောင်းယဉ်ကျေးမှုကို မြတ်နိုးသူဖြစ်ရာ မိမိ၏ ဘဝတစ်သက်တာ မင်္ဂလာပွဲကိုလည်း ရိုးရာအငွေ့အသက်များဖြင့် ကျင်းပလိုခြင်း ဖြစ်သည်။

"မင်းသဘောအတိုင်းပါပဲ၊ ကျန်တာကိုတော့ ကိုယ် စီစဉ်လိုက်မယ်"

ဟု မိုဟန်ကျီက သူမ၏ ပုခုံးကို ဖက်လျက် ဆိုသည်။

ထို့နောက် သူက ဆက်၍ "တရုတ်ရိုးရာအတိုင်းဆိုရင် ရှေးထုံးတမ်းစဉ်လာတွေဖြစ်တဲ့ 'စာသုံးစောင်နဲ့ အခမ်းအနား ခြောက်ရပ်' အတိုင်း စနစ်တကျ လုပ်ဆောင်ကြတာပေါ့"

ဟု အဆိုပြုသည်။

မင်ယွဲ့မှာ အနည်းငယ် အံ့ဩသွားရသည်။

ယနေ့ခေတ်တွင် ထိုမျှအထိ အသေးစိတ် လုပ်ဆောင်သူ ရှားပါးလှသည်။ သို့သော် သူမ၏ မိသားစုမှာ ကျေးလက်တွင် ရှိနေသဖြင့် အနည်းငယ် အခက်အခဲ ရှိနိုင်ကြောင်း ပြောပြရာ မိုဟန်ကျီက မင်မိသားစု တစ်စုလုံးကို ယန်ကျင်းသို့ ကြိုတင် ဖိတ်ခေါ်၍ စံအိမ်တွင် တည်းခိုစေရန် အကြံပြုခဲ့သည်။

လီအောက်ရွာရှိ မင်မိသားစုဝင်များ ခရီးထွက်ရန် ပြင်ဆင်နေကြသည်ကို မြင်သောအခါ ရွာသားများက စူးစမ်းကြတော့သည်။

"မင်အဘိုး... တစ်မိသားစုလုံး ဘယ်သွားကြမလို့လဲ"

"ယွဲ့ယွဲ့ရဲ့ မင်္ဂလာပွဲအတွက်လေ၊ သတို့သားဘက်က လူကြီးစုံရာနဲ့ ကြိုတင်တွေ့ချင်တယ်ဆိုလို့ သွားကြမလို့ပါ"

ဟု မင်ဒေါ်ဒေါ်က ပြုံးရွှင်စွာ ပြန်ပြောသည်။

ရွာသားများမှာ မင်ယွဲ့၏ သူဌေးကတော်ဖြစ်မည့် သတင်းကို ဝမ်းသာအားရ ဖြစ်နေကြသလို၊ သူမကိုယ်တိုင် ပိုင်ဆိုင်ထားသော ယန်ကျင်းရှိ မင်းညီမင်းသားများ နေထိုင်ခဲ့သည့် ရှေးဟောင်းအိမ်ကြီးနှင့် ကြီးမားလှသော အိမ်ခြံမြေများအကြောင်းကို ကြားသိရသည့်အခါတွင်မူ အံ့ဩ၍ မဆုံးနိုင်ကြချေ။

မင်ဖခင်က သူ ရိုက်ကူးထားသော ဗီဒီယိုများကို ပြသလိုက်သည့်အခါတွင်မူ မနာလိုသူများပင် ပါးစပ်ပိတ်သွားကြရတော့သည်။

မင်မိသားစု ယန်ကျင်းသို့ ရောက်ရှိလာချိန်တွင် မိုမိသားစုဝင် အားလုံးက လေဆိပ်၌ လာရောက်ကြိုဆိုကြသည်။

မိုဖခင်နှင့် အမြဲတမ်း တည်ကြည်လွန်းသော မိုအဘိုးတို့ပင်လျှင် ခမည်းခမက်များရှေ့တွင် ပြုံးရွှင်စွာဖြင့် ခရီးဦးကြိုပြုကြသည်။

ရှေးဟောင်းတရုတ်ရိုးရာ စားသောက်ဆိုင်ကြီးတွင် အတူတူ စားသောက်ကြရင်း မိုမိသားစုက မင်ယွဲ့အား အဆက်မပြတ် ချီးကျူးနေကြသဖြင့် မင်မိသားစုမှာ ဂုဏ်ယူလွန်း၍ မျက်နှာများပင် နီမြန်းနေရသည်။

မင်္ဂလာဦး အခမ်းအနားများ ဖြစ်သည့် လက်ဆောင်ပဏ္ဏာ ပေးပို့ခြင်း မှစ၍ မင်္ဂလာရက် သတ်မှတ်ခြင်းအထိ အဆင့်တိုင်းကို မိုမိသားစုက အထူးတလည် ဂရုစိုက် ဆောင်ရွက်ခဲ့သည်။

အွန်လိုင်းပေါ်တွင်လည်း မိုဟန်ကျီ ပေးပို့သော တန်ဖိုးကြီးလှသည့် မင်္ဂလာလက်ဆောင်များမှာ ဟိုးလေးတကျော် ဖြစ်သွားခဲ့သည်။

မင်ယွဲ့၏ ပရိသတ်များမှာလည်း သူတို့၏ စံပြနတ်သမီးလေး လက်ထပ်ရတော့မည်ဖြစ်၍ ဝမ်းသာအားရ ဆုတောင်းပေးနေကြလေသည်။

သို့သော် ဤပျော်ရွှင်စရာ ကာလအတွင်း မင်ယွဲ့၏ စိတ်ထဲ၌ ထူးဆန်းသော ကြိုတင်နိမိတ် တစ်ခုကို ခံစားနေရသည်။

မင်္ဂလာဆောင် ဓာတ်ပုံများ ရိုက်ကူးနေစဉ် သူမသည် ယွမ်ပေါ့ကို ပွေ့ချီကာ ပုံတစ်ပုံ ရိုက်ခဲ့သည်။ ယွမ်ပေါ့သည် မကြာသေးမီကစ၍ စကားပြောနည်းလာကာ အနည်းငယ် တိတ်ဆိတ်နေတတ်သည်။

သူမ မှတ်မိနေသည်မှာ... ယွမ်ပေါ့သည် သူမနှင့် စတင် ချိတ်ဆက်စဉ်က သူမအား 'ဘဝ၏ အထွတ်အထိပ်' သို့ ရောက်အောင် ကူညီပေးမည်ဟု ပြောခဲ့ခြင်း ဖြစ်သည်။

ယခုအခါ သူမတွင် မရေမတွက်နိုင်သော ပိုင်ဆိုင်မှုများ၊ အောင်မြင်သော လုပ်ငန်းများနှင့် ချစ်ရသူ မိုဟန်ကျီတို့ ရှိနေပြီ ဖြစ်ရာ ဘဝ၏ အထွတ်အထိပ်သို့ ရောက်ရှိနေပြီဟု ဆိုနိုင်သည်။

ယွမ်ပေါ့မှာ သူမအတွက် စနစ်တစ်ခုထက်မကဘဲ မိသားစုဝင်တစ်ဦးကဲ့သို့ ဖြစ်နေပြီဖြစ်ရာ ၎င်း ထွက်ခွာသွားမည်ကို သူမ အလွန်ပင် စိုးရိမ်နေမိလေတော့သည်။