အခန်း (၁၀၁-၁၀၂)

အခန်း ၁၀၁ - ဆေးလုံးဝယ်ယူခြင်း

နာရီဝက်ခန့်ကြာပြီးနောက် ချန်လော့ သည် မျက်လုံးများကိုဖွင့်လိုက်ပြီး နောက်ကျိနေသော လေပူများကို ရှည်လျားစွာ မှုတ်ထုတ်လိုက်လေ၏။

တုကျန်းပေးခဲ့သော ဆေးညွှန်းကို သူ နားလည်သဘောပေါက်သွားခဲ့ပြီ ဖြစ်သည်။ ပြုပြင်ဖော်စပ်သည့်နည်းလမ်းများမှာ လက်ရှိ ကျင့်ကြံခြင်းလောကနှင့် များစွာ ကွာခြားလှ၏။

ဆေးလုံးအချို့ကို ဖော်စပ်ရာတွင် မိစ္ဆာသားရဲများ၏ ကိုယ်တွင်းအမြုတေများကို အဓိကဆေးပစ္စည်းအဖြစ်လိုအပ်ပြီး အသေးစိတ် ဖော်စပ်သည့် နည်းစနစ်များအားလုံးမှာ ထိုမိစ္ဆာသားရဲ ကိုယ်တွင်းအမြုတေများကို ပြုပြင်စီရင်ခြင်းအပေါ်တွင်သာ အဓိကထားထားလေသည်။

မိစ္ဆာသားရဲပစ္စည်းများဖြင့် ဆေးဖော်စပ်သည့် နည်းလမ်းမှာ လက်ရှိကျင့်ကြံခြင်းလောကတွင် ပျောက်ကွယ်သွားခဲ့ပြီ ဖြစ်သည်။ ဆေးညွှန်းထဲတွင် ဖော်ပြထားသော မိစ္ဆာသားရဲများကို သူ ကြားပင် မကြားဖူးခဲ့ပေ။

နတ်ဘုရားရေကန် မသေမျိုးဂိုဏ်း၏ အဓိက ဆေးဖော်စပ်ခြင်းပညာရပ်မှာ ဆေးဖက်ဝင် ဂုဏ်သတ္တိများကို ပေါင်းစပ်အသုံးပြုခြင်းဖြစ်ပြီး ဆေးဝါးဗေဒဆိုင်ရာပေါင်းစပ်မှုများကို ထပ်တူကျစေကာ ဆေးလုံးများကို စုစည်းဖြစ်တည်စေခြင်း ဖြစ်သည်။ နှစ်ခုစလုံးမှာ ၎င်းတို့၏ အခြေခံသဘောတရားမှစ၍ အသုံးပြုသည့် ပစ္စည်းများအထိ လုံးဝ ကွဲပြားခြားနားနေ၏။

"ရှေးဟောင်းကျင့်ကြံသူတွေက အမဲလိုက်တာ များလွန်းလို့ မိစ္ဆာသားရဲတွေ မျိုးတုံးသွားကြတာလား"

ချန်လော့၏ စိတ်ထဲတွင် ခန့်မှန်းချက်တစ်ခု ရှိနေ၏။ သူ၏ အတွေးများကို စုစည်းပြီးနောက် ဤနည်းလမ်းများမှ အသုံးဝင်သောနည်းစနစ်အချို့ကို အကျဉ်းချုံး မှတ်သားလိုက်သည်။

သူသည် ဝိညာဉ်ချီကို အသုံးပြု၍ ဆေးမီးဖိုကို ပြန်လည်စတင်ရန် ပြင်လိုက်စဉ် သူ၏ ဝိညာဉ်ချီ စုပ်ယူမှုနှုန်းမှာ အလွန်တရာမြန်ဆန်လာကြောင်း ရုတ်တရက်တွေ့ရှိလိုက်ရပြီး ယခင်က သတိမထားမိခဲ့ဖူးသော ဝိညာဉ်ချီတစ်ခုကို ခံစားသိရှိလိုက်ရလေသည်။

မီးစွမ်းအင်သတ္တိပင် ဖြစ်လေ၏။

"ဟင် ငါ့ရဲ့ ပါရမီက ထပ်ပြောင်းသွားပြန်ပြီပဲ" ချန်လော့သည် သူ၏စိတ်ကို အမြန်တည်ငြိမ်စေပြီး သူ၏ ဝိညာဉ်အမြစ်ကို စတင် အာရုံခံကြည့်လိုက်၏။

သူ၏ မူလ ရေ၊ သစ်သား နှင့် လျှပ်စီး ဝိညာဉ်အမြစ်များမှာ ရှိနေဆဲဖြစ်သော်လည်း ထူးခြားသွားသည်မှာ ၎င်းတို့ဘေးတွင် မီးစွမ်းအင်သတ္တိဝိညာဉ်အမြစ်တစ်ခု ပေါ်လာခြင်းပင် ဖြစ်သည်။

ဤသည်က သူ့ကို ဝိညာဉ်အမြစ် သုံးခုမှ ဝိညာဉ်အမြစ် လေးခုသို့ ချက်ချင်း ပြောင်းလဲသွားစေခဲ့၏။ ဤရလဒ်ကြောင့် ချန်လော့မှာ ဆွံ့အသွားရလေသည်။

ဝိညာဉ်အမြစ်သုံးခုမှ ဝိညာဉ်အမြစ် နှစ်ခု သို့မဟုတ် ဝိညာဉ်အမြစ် တစ်ခုတည်းသို့ တိုးတက်သွားရမည် မဟုတ်ပါလော။ သူ၏ ပါရမီက မည်သို့လုပ်၍ ပိုဆိုးသွားရသနည်း။

သူ ဂိုဏ်းထဲသို့ စတင်ဝင်ရောက်စဉ်ကတည်းက သူ၏ ဝိညာဉ်အမြစ် သုံးခု ပါရမီမှာ အမြဲတမ်းမမှန်ကန်ကြောင်းနှင့် ဦးနှောက်များကို ပိုမိုစုပ်ယူလေလေ သူ၏ကိုယ်ပိုင်ပါရမီမှာ ပြောင်းလဲလာမည်ဖြစ်ကြောင်း ကြိုတင်ခံစားမိခဲ့သည်။

နောက်ဆုံးအကြိမ် ပြောင်းလဲမှုမှာ အလောင်းခြောက်၏ ဦးနှောက်ကို စုပ်ယူခဲ့စဉ်က ဖြစ်ပြီး ယခုတစ်ကြိမ် ပြောင်းလဲမှုမှာ ကျား မိစ္ဆာသားရဲ၏ ဦးနှောက်ကို စုပ်ယူပြီးနောက် ဖြစ်ပေါ်လာခြင်း ဖြစ်သည်။

နှစ်ကြိမ်စလုံးမှာ ထူးခြားသော ဦးနှောက်များနှင့် ပတ်သက်နေပြီး ဤသည်ကပင် ချန်လော့အား ပါရမီကို သက်ရောက်မှုရှိစေသည့် အဓိကအချက်ကို ဆုပ်ကိုင်မိစေခဲ့၏။

"ငါ့ရဲ့ ကျင့်ကြံခြင်းအရှိန်က မနှေးသွားပါဘူး၊ တကယ်တော့ တော်တော်လေးကို ပိုမြန်လာတာပဲ။"

သူ၏ ချီသန့်စင်ခြင်း အရှိန်ကို အာရုံခံကြည့်ပြီးနောက် ချန်လော့သည် မည်သည့် ဆိုးကျိုးသက်ရောက်မှုကိုမျှ မခံစားရပေ။ သူ၏ ဝိညာဉ်အမြစ်လေးခုမှာ ဂျူနီယာညီမ ဟွမ်ယင်း၏ ဝိညာဉ်အမြစ် လေးခုနှင့် မတူညီသော သဘောတရားတစ်ခု ဖြစ်ပုံရသည်။

ဂျူနီယာညီမ ဟွမ်ယင်း၏ ဝိညာဉ်အမြစ် လေးခုမှာ အလယ်အလတ်အဆင့်ဝိညာဉ်အမြစ် ပါရမီကို ကိုယ်စားပြုသော်လည်း သူ၏ ဝိညာဉ်အမြစ် လေးခုမှာ မျိုးရိုးဗီဇပြောင်းလဲခြင်းဖြစ်ပြီး ကျင့်ကြံခြင်းအရှိန်မှာ ဝိညာဉ်အမြစ်နှစ်ခု နှင့် ညီမျှလေသည်။

"ငါ့ရဲ့ ဝိညာဉ်အမြစ်ပါရမီကို ကျင့်ကြံခြင်းလောကရဲ့ သာမန်အသိတွေနဲ့ တွက်ဆလို့ မရနိုင်ဘူးထင်တယ်။"

၎င်းမှာ သူ၏ကျင့်ကြံခြင်းကို မထိခိုက်နိုင်ကြောင်း အတည်ပြုပြီးနောက် ချန်လော့သည် သူ၏ အာရုံကို ဆေးဖော်စပ်ခြင်းဘက်သို့ ပြန်လည်ပြောင်းလဲလိုက်၏။ ပါရမီနှင့် ပတ်သက်သည့် ပြဿနာကို သူ နားမလည်နိုင်သေးသဖြင့် နောင်တစ်ချိန် သူ၏အင်အားများ တိုးတက်လာမှသာ ၎င်း၏ အသေးစိတ်ပြောင်းလဲမှုများကို လေ့လာရန် စောင့်ဆိုင်းရတော့မည် ဖြစ်သည်။

ဝိညာဉ်ချီများ လှည့်ပတ်လာသည်နှင့်အမျှ ဆေးမီးဖိုမှာ အထက်သို့ တစ်ဖန် ပျံတက်သွားလေ၏။

မီးဝိညာဉ်အမြစ် ရှိလာသဖြင့် ချန်လော့၏ မီးထိန်းချုပ်မှု နည်းစနစ်များမှာ ပိုမို ပြည့်စုံလာပြီး သူ၏ ဝိညာဉ်ချီ ကုန်ဆုံးမှုမှာလည်း ထက်ဝက်ကျော် လျော့နည်းသွားလေသည်။

ဆေးဘုရင်တောင်ထွတ်မှ တပည့်ရွေးချယ်ရာတွင် မီးဝိညာဉ်အမြစ် ပါရှိသော တပည့်များကို အဓိက ထည့်သွင်းစဉ်းစားသည်မှာ အံ့သြဖွယ် မဟုတ်ပေ။ မီးစွမ်းအင်သတ္တိဝိညာဉ်အမြစ်ရှိသော ကျင့်ကြံသူများသည် ဆေးဖော်စပ်ရာတွင် ကြီးမားသော အားသာချက်များကို ပိုင်ဆိုင်ထားကြသည်မှာ အမှန်ပင် ဖြစ်၏။

"ဆေးတွေထဲ ဝင်သွားစမ်း။"

ချန်လော့က လက်ကို ဝေ့ယမ်းလိုက်၏။ လတ်ဆတ်သော ဆေးဖက်ဝင်အမယ်အသစ်တစ်စုံသည် ဆေးမီးဖိုထဲသို့ ကျဆင်းသွားပြီး ဆေးဖော်စပ်ခြင်းအချီသစ်တစ်ရပ်ကို စတင်လိုက်လေသည်။

နှစ်နာရီ ကြာပြီးနောက်

ချန်လော့သည် ဆေးမီးဖိုထဲမှ နီရဲရဲဆေးလုံး နှစ်လုံးကို ထုတ်ယူလိုက်၏။ တုကျန်းပေးခဲ့သော ရှေးဟောင်းဆေးညွှန်းကို စုပ်ယူပြီးနောက် ဆေးဖော်စပ်ခြင်း အသေးစိတ်အချက်အလက်များကို သူ အနည်းငယ် ပြုပြင်မွမ်းမံခဲ့သည်။

အကြိမ်ကြိမ် ကြိုးစားပြီးနောက် သူဖော်စပ်လိုက်သော ဆေးလုံးများမှာ နောက်ဆုံးတွင် အသုံးမကျသော ဆေးအကြွင်းအကျန်များ မဟုတ်တော့ပေ။

ပထမအကြိမ်နှင့် နှိုင်းယှဉ်ပါက ယခုတစ်ကြိမ် ဖော်စပ်ထားသော ဆေးလုံးများမှာ ပိုမိုပြည့်စုံပြီး ယန်ချီဆေးလုံး၏ အခြေခံ အာနိသင်များကို ပိုင်ဆိုင်နေပြီ ဖြစ်သည်။

သို့သော် ဆေးလုံး၏ အဆိပ်အတောက်များ အနည်းငယ်များပြားနေပြီး အလွန်အကျွံ စားသုံးမိပါက လူတစ်ယောက်၏ ပါရမီကို အလွယ်တကူ ထိခိုက်စေနိုင်ပေသည်။

"ဆေးလုံး ခုနစ်လုံးဆိုတော့ အရင်းပြန်ရတယ်လို့ သတ်မှတ်လို့ရပါတယ်။"

ချန်လော့သည် ထိုဆေးလုံး နှစ်လုံးကို ကြွေပုလင်းတစ်လုံးထဲသို့ ထည့်လိုက်၏။ အပြင်ဘက်တွင် ကောင်းကင်ယံမှာ ခပ်ရေးရေး လင်းလာနေပြီ ဖြစ်သည်။

တစ်ညလုံး ဆေးဖော်စပ်ခြင်းကြောင့် ယမန်နေ့က တောင်အောက်ဆင်းစဉ် ဝယ်လာခဲ့သော ဆေးဖက်ဝင်အမယ်သုံးထုပ်စလုံး ကုန်ဆုံးသွားခဲ့ပြီ ဖြစ်သည်။

အလဟဿဖြစ်သွားသော အစိတ်အပိုင်းများမှလွဲ၍ အကြီးမားဆုံးအမြတ်အစွန်းမှာ ဤဆေးလုံးအချို့ပင် ဖြစ်သည်။ ဆေးလုံး ခုနစ်လုံးအနက် တစ်လုံးမှာ လုံးဝအသုံးမဝင်သော အဆိပ်ဆေးလုံးဖြစ်ပြီး ကျန်ခြောက်လုံးမှာလည်း အပြစ်အနာအဆာများ ရှိနေသေး၏။

လက်ရှိ သူ၏ ဆေးဖော်စပ်ခြင်းအဆင့်မှာ ပြင်ပဦးနှောက်၏ ယခင်ဘဝ ကန့်သတ်ချက်သို့ ရောက်ရှိနေပြီ ဖြစ်သည်။ ချီသန့်စင်ခြင်းအဆင့် ရှိ ဆေးဖော်စပ်သူတစ်ဦးမှာ ဤအဆင့်လောက်သာ ရှိပေသည်။

"အခုဆို ငါက တရားဝင် ဆေးဖော်စပ်သူ တစ်ယောက် ဖြစ်သွားပြီပဲ။ ငါသာ ဆေးဘုရင်တောင်ထွတ်မှာဆိုရင် အတွင်းစည်းထဲကို အလွယ်လေး ဝင်လို့ရပြီ။"

ချန်လော့မှာ သူ၏ ဆေးဖော်စပ်ခြင်းအဆင့်ကို အလွန် ကျေနပ်နေဆဲ ဖြစ်သည်။ ဆေးညွှန်း မရှိဘဲနှင့်ပင် သူ၏ ကိုယ်ပိုင် ရှာဖွေစူးစမ်းမှုမှတစ်ဆင့် ယန်ချီဆေးလုံးဖော်စပ်သည့် နည်းလမ်းကို ပြောင်းပြန်စူးစမ်းနည်းဖြင့် ဖန်တီးနိုင်ခဲ့၏။

ဤစွမ်းရည်ဖြင့်သာ သူအပြင်ထွက်၍ ဆေးဖော်စပ်ခြင်းပါရမီရှင်ဟု ပြောလိုက်ပါက မည်သူမျှ ကန့်ကွက်နိုင်မည် မဟုတ်ပေ။

"ဒီဆေးလုံးတွေကို ဂျူနီယာညီမ ဟွမ်ယင်းရဲ့ လမ်းကြောင်းတွေကနေ လောလောဆယ် ရောင်းလို့မဖြစ်သေးဘူး၊ မသမာတဲ့စိတ်ရှိတဲ့ လူတစ်ယောက်ယောက်က အလွယ်တကူ ခြေရာခံမိသွားနိုင်တယ်။"

ချန်လော့သည် ဆေးလုံးများကို သိမ်းဆည်းလိုက်ပြီး ခဏတာ စဉ်းစားပြီးနောက် ငွေရှာရန် ဆေးလုံးများရောင်းချမည့် အကြံကို စွန့်လွှတ်လိုက်သည်။

ယခင်က သူ အဆောင်များပြုလုပ်စဉ်က ၎င်းမှာ သူ အစောပိုင်းကတည်းက သင်ယူခဲ့သော မိသားစု အမွေအနှစ်ဖြစ်သည်ဟု အကြောင်းပြနိုင်ခဲ့သည်။

ဤအခြေအနေမျိုးမှာ နတ်ဘုရားရေကန် မသေမျိုးဂိုဏ်းမှ တပည့်များအကြား အလွန် အတွေ့ရများပေသည်။ ကျင့်ကြံခြင်းပညာရပ်လေးခု အနက် အဆောင်တာအိုမှာ အကျယ်ပြန့်ဆုံး ပြန့်နှံ့နေသောစွမ်းရည်ဖြစ်ပြီး လေလွင့်ကျင့်ကြံသူ အများအပြားလည်း ၎င်းနှင့် ထိတွေ့မှု ရှိကြသည်။

သို့သော် ဆေးဖော်စပ်ခြင်းမှာမူ ကွဲပြားခြားနားလှသည်။ ဆေးလုံးများမှ ရရှိသော အကျိုးအမြတ်မှာ အဆောင်များထက် များစွာ သာလွန်ပေ၏။

ဆရာသမားမရှိသော ဆေးဖော်စပ်သူတစ်ဦး ရုတ်တရက်ပေါ်ထွက်လာခြင်းမှာ မရိုးသားသော ရည်ရွယ်ချက်ရှိသူများ၏ အာရုံစိုက်မှုကို ဆွဲဆောင်ရန် လုံလောက်နေပြီး ၎င်းမှာ ချန်လော့၏ မူလရည်ရွယ်ချက်နှင့် ကိုက်ညီမှု မရှိပေ။

"နောက်တစ်ခေါက် တာဝန်အတွက် တောင်အောက်ဆင်းတဲ့အခါ အခွင့်အရေး ရှာရမယ်။"

ချန်လော့သည် ရွေးချယ်စရာ အချို့ကို စဉ်းစားကြည့်သော်လည်း အားလုံးမှာ အနည်းငယ် အန္တရာယ်များပုံရသည်။ ထို့ကြောင့် လောလောဆယ်တွင် လုံခြုံရေးကိုသာ ဦးစားပေးရန်နှင့် သူ၏အဆင့်ကို ကျော်ဖြတ်နိုင်ရန် ဦးစွာ အာရုံစိုက်ရန် ဆုံးဖြတ်လိုက်သည်။

ကူးပြောင်းကုန်သွယ်ရေး ရင်ပြင်

ချန်လော့သည် နောက်ဆုံးတွင် ဂျူနီယာညီမ ဟွမ်ယင်းကို တွေ့လိုက်ရ၏။ ဤရက်ပိုင်း တံခါးပိတ် ကျင့်ကြံအပြီးတွင် ဂျူနီယာညီမ ဟွမ်ယင်း၏ အရှိန်အဝါမှာ အနည်းငယ်တိုးတက်လာပြီး ချီသန့်စင်ခြင်း ပဉ္စမအဆင့်တွင်သာ ရှိနေသေးသော်လည်း တူညီသော အဆင့်ရှိ တပည့်များစွာကို ကျော်လွန်နေပြီ ဖြစ်သည်။

"စီနီယာအစ်ကို ချန်၊ ဒီဘက်မှာ" ဟွမ်ယင်းက ချန်လော့ကို မြင်သည်နှင့် အဝေးမှ လက်ဝှေ့ယမ်း နှုတ်ဆက်လိုက်၏။

"ဂုဏ်ယူပါတယ်ဗျာ။" ချန်လော့က လျှောက်သွားရင်း ဟွမ်ယင်းကို ဂုဏ်ပြုစကား ဆိုလိုက်သည်။ ကျင့်ကြံသူတစ်ဦးအတွက် ကျင့်ကြံခြင်းအဆင့် တိုးတက်လာခြင်းထက် ပို၍ ဝမ်းမြောက်စရာကောင်းသော အရာမရှိပေ။

"တိုးတက်မှု သေးသေးလေးပါ၊ စီနီယာအစ်ကိုနဲ့တော့ မယှဉ်သာပါဘူး။" ဟွမ်ယင်းမှာလည်း အလွန် ဝမ်းသာနေကြောင်း သူမ၏ မျက်နှာပေါ်ရှိ အမူအရာမှတစ်ဆင့် မြင်တွေ့နိုင်ပေသည်။

"ဝိညာဉ်ဆေးပင် တွေ ဝယ်နေတုန်းပဲလား"

"မဝယ်တော့ဘူး၊ ဆေးဖော်တာကို လောလောဆယ် လက်လျှော့ထားလိုက်ပြီ။" ချန်လော့က ခေါင်းခါပြလိုက်သည်။

ယန်ချီဆေးလုံးကို အောင်မြင်စွာ ဖော်စပ်ပြီးနောက် သူ၏ အစီအစဉ် ပထမအဆင့် ပြီးဆုံးသွားကာ အုတ်မြစ်တည်ဆောက်ခြင်း ဆေးလုံးဖော်စပ်ရန်အတွက် အခြေခံအုတ်မြစ် ချနိုင်ခဲ့ပြီ ဖြစ်သည်။

နောက်ပိုင်း ဆေးဖော်စပ်ခြင်းများအတွက် ပိုမို ထူးချွန်သော ဆေးပညာရှင်၏ ဦးနှောက်ကို ရှာတွေ့သည်အထိ စောင့်ဆိုင်းရမည် ဖြစ်သည်။

လောလောဆယ်တွင် အရေးကြီးဆုံးအရာမှာ သူ၏အဆင့်ကို ထိုးဖောက်နိုင်ရန် ဖြစ်သည်။ ချီသန့်စင်ခြင်း ဆဋ္ဌမအဆင့်တွင် သူနေခဲ့ရသည်မှာ အနည်းငယ် ကြာမြင့်နေပြီဖြစ်ရာ ချီသန့်စင်ခြင်း နှောင်းပိုင်းအဆင့်သို့ ဝင်ရောက်ရန် အချိန်တန်ပြီ ဖြစ်လေ၏။

"လက်လျှော့လိုက်တာ ကောင်းပါတယ်။ စီနီယာအစ်ကိုရဲ့အဆောင်တာအို ပါရမီနဲ့ဆိုရင် အဲ့ဒီလမ်းစဉ်တစ်ခုတည်းကိုပဲ အာရုံစိုက်မယ်ဆိုရင် ဒုတိယအဆင့် အဆောင်ဆရာတောင် ဖြစ်လာနိုင်တယ်။"

ဟွမ်ယင်းလည်း သက်ပြင်းချလိုက်မိသည်။ ချန်လော့တစ်ယောက် နေ့စဉ် များပြားသောအရင်းအမြစ်များကို ရင်းနှီးမြှုပ်နှံနေသည်ကို ကြည့်ကာ သူမမှာ ရင်နာနေခဲ့ရခြင်း ဖြစ်သည်။

"မင်းဆီမှာ ဝိညာဉ်စုစည်းဆေးလုံး ရှိလား၊ ငါ တစ်လုံးလောက် ဝယ်ချင်လို့။" ချန်လော့သည် သူ၏ သိုလှောင်အိတ်ကို ထုတ်ယူကာ ဖူအန်း ပေးခဲ့သော ကျားဘုရင်အရိုးကို ကမ်းပေးလိုက်၏။

"ဒါနဲ့ လဲမယ်လေ။"

"အဲ့ဒါ ဖူအန်းရဲ့ ကျားဘုရင်အရိုး မဟုတ်လား သူက တုံးတော့မတုံးပါဘူးလေ။"

ဟွမ်ယင်းက နှာခေါင်းရှုံ့လိုက်၏။ ဖူအန်းထံတွင် ကျားဘုရင်အရိုး ရှိနေသည်ဆိုသော သတင်းကို သူမ သေချာပေါက် သိထားပြီးဖြစ်သည်။

ဖူအန်းက ချန်လော့ကို ရွေးချယ်ခဲ့ပြီးဖြစ်ရာ သူမအနေဖြင့် ဘာမှ ထပ်ပြောစရာ မရှိတော့ပေ။ သူမသာဆိုလျှင်လည်း ဤရွေးချယ်မှုကိုပင် ပြုလုပ်မည်သာ ဖြစ်သည်။

"ကျွန်မဆီမှာလည်း တစ်လုံးရှိတယ်၊ ရှင့်ကို လဲပေးမယ်။"

ဟွမ်ယင်းသည် သူမ၏ သိုလှောင်အိတ်ထဲတွင် မွှေနှောက်ရှာဖွေလိုက်ရာ အနက်ရောင်ပုလင်းငယ်တစ်လုံးကို အမြန်ပင် တွေ့ရှိသွား၏။ ၎င်းမှာ ဂိုဏ်း၏ ဆေးဘုရင်တောင်ကြားမှ ထုတ်လုပ်သော ဆေးလုံးဖြစ်ပြီး အရည်အသွေးမှာ အာမခံချက် ရှိပေသည်။

၎င်းနှင့် ယှဉ်လိုက်ပါက ချန်လော့ ဖော်စပ်ထားသော ယန်ချီဆေးလုံးမှာ တရားမဝင်အလုပ်ရုံ‌လေးတစ်ခုမှ ထွက်ပေါ်လာသော ထုတ်ကုန်တစ်ခုနှင့် တူနေတော့၏။

အခန်း ၁၀၂ - အဆင့်တက်ခြင်း

"ကောင်းပြီလေ။"

ချန်လော့ သည် ယန်ချီဆေးလုံး၏ ဈေးနှုန်းကို သိရှိထားသဖြင့် သူ၏လက်ထဲရှိ ကျားဘုရင်အရိုး ကို မဆိုင်းမတွပင် ကမ်းပေးလိုက်လေသည်။

"စီနီယာအစ်ကို၊ ဂိုဏ်းက မကြာသေးခင်ကမှ ပူးတွဲတာဝန်တစ်ခု ထပ်ချပေးထားတယ်။ ထျန်းမင်တောင်ထွတ်က စီနီယာအစ်ကိုတစ်ယောက် မိစ္ဆာနှိမ်နင်းရေးခရီးစဉ်မှာ အလယ်အလတ်အဆင့် လျှို့ဝှက်နယ်မြေတစ်ခုကို ရှာတွေ့ခဲ့တာလေ။ အုတ်မြစ်တည်ဆောက်ခြင်းအဆင့် အကြီးအကဲ တောင် သတိထားမိသွားပြီး အခုဆိုရင် အဓိက တောင်ထွတ်သုံးခုက လျှို့ဝှက်နယ်မြေကို ပူးပေါင်းရှာဖွေနေကြပြီ။ အဲ့ဒါကြောင့် စစ်ဆေးခြင်းအဆောင်တွေ ထပ်ပြီး ရှားပါးလာပြန်ပြီ။ ဒီရေစီးကြောင်းရှိနေတုန်း အစ်ကို အဆောင်တွေ ပိုဆွဲပြီး ငွေရှာလို့ရတယ်နော်။"

ချန်လော့ ထွက်ခွာရန် ပြင်နေသည်ကို မြင်သောအခါ ဟွမ်ယင်း က ချက်ချင်း ပြောလိုက်၏။

"လျှို့ဝှက်နယ်မြေ ဟုတ်လား" ချန်လော့ ရပ်တန့်သွား၏။

သူ၏ မူလအိမ်တည်ရှိခဲ့သော ယွဲ့နိုင်ငံမြေအောက်ဂူသင်္ချိုင်းကြီးကို သူ သတိရသွားသည်။ တစ်နည်းအားဖြင့်ဆိုရသော် သူ လွတ်မြောက်လာခဲ့သည့် ယွဲ့နိုင်ငံမြေအောက်ဂူသင်္ချိုင်းကြီးမှာလည်း ရှေးဟောင်းအမွေအနှစ်တစ်ခုပင် ဖြစ်ပြီး အလွန်ကြီးမားသော ရှေးဟောင်းအမွေအနှစ်ကြီးတစ်ခု ဖြစ်သည်။

မြေအောက်ဂူသင်္ချိုင်းကြီးအတွင်းရှိ ရေတွက်၍မရနိုင်သောသင်္ချိုင်းဂူများမှာ သူ၏ နားလည်နိုင်စွမ်းထက် ကျော်လွန်နေဆဲပင်။ နတ်ဘုရားရေကန် မသေမျိုးဂိုဏ်း၏ ရှေးဟောင်းမှတ်တမ်းများတွင်ပင် ၎င်းနှင့်သက်ဆိုင်သော အစီအရင်များနှင့် ပတ်သက်သည့် ဖော်ပြချက်များ မရှိပေ။

အစစ်အမှန်ပုဂ္ဂိုလ် ချန်ချင်း သူတို့ကို ခေါ်ဆောင်သွားခဲ့သော ဂူတွင်းပေါက်မှာ ကောင်းကင်နှင့်မြေပြင်ပြောင်းလဲမှုများအပြီးတွင် ပေါ်ထွက်လာခဲ့ခြင်း ဖြစ်သည်။ ၎င်းမှာ တာအိုက ငါးဆယ်၊ ကောင်းကင်ဘုံဆင့်ကဲပြောင်းလဲမှုက လေးဆယ့်ကိုးဆိုသည့် စကားနှင့်တူပြီး ဂူတွင်းပေါ်မှာတော့ လွတ်မြောက်သွားသော တစ် ပင် ဖြစ်သည်။

ထိုဂူတွင်းပေါက်သာ မရှိခဲ့ပါက မြေအောက်ဂူသင်္ချိုင်းကြီး၏ ပင်မဝင်ပေါက်ကိုပင် သူတို့ ရှာတွေ့နိုင်မည် မဟုတ်ကြောင်း ချန်လော့ ခန့်မှန်းမိသည်။

"အဲ့ဒါက ရှေးဟောင်းဂိုဏ်းတစ်ခုက ချန်ထားခဲ့တဲ့ အမွေအနှစ်တစ်ခုလေ။"

ချန်လော့ ရပ်တန့်သွားသည်ကို မြင်သောအခါ ဟွမ်ယင်းက သူ ဤတာဝန်ကို စိတ်ဝင်စားသည်ဟု ထင်မှတ်သွားသည်။

"စီနီယာအစ်ကို ဒီရှေးဟောင်းအမွေအနှစ်ကို စိတ်ဝင်စားလို့လား ကျွန်မဆီမှာ ရှေးဟောင်းအမွေအနှစ်တွေနဲ့ ပတ်သက်တဲ့ သတင်းအချက်အလက်တွေ အများကြီးရှိတယ်၊ အစ်ကို ဝယ်ချင်လို့လား"

"စိတ်မဝင်စားပါဘူး။"

ရှေးဟောင်းအမွေအနှစ်အကြောင်း ကြားလိုက်ရသောအခါ ချန်လော့သည် သူ၏ မူလအိမ်ရာကိုသာ သတိရမိခြင်း ဖြစ်သည်။

လျှို့ဝှက်နယ်မြေ ရှာဖွေရေးတွင် သူ လုံးဝ စိတ်မဝင်စားပေ။

ဝတ္ထုများနှင့် ပုံပြင်စာအုပ်များထဲရှိ ဇာတ်လိုက်များသည် လျှို့ဝှက်နယ်မြေများမှ ရန်သူအားလုံးကို သတ်ဖြတ်ကာပစ္စည်းများအပြည့်အမောက်ဖြင့် ပြန်လာနိုင်သည်ဆိုသော အချက်များနှင့် လှည့်စားမခံပါသင့်ပေ။

ကျင့်ကြံခြင်းလောကရှိ စစ်မှန်သော အမွေအနှစ်များမှာ ဧရာမကျင်းကြီးများသာ ဖြစ်သည်။ ရှေးခေတ်နှင့် ခေတ်သစ်ကျင့်ကြံခြင်းနည်းလမ်းများကြားတွင် ကြီးမားသောကွာခြားချက်များ ရှိပြီး အုတ်မြစ်တည်ဆောက်ခြင်းအဆင့် ကျင့်ကြံသူများပင် ထိုနေရာတွင် ကျဆုံးနိုင်ခြေရှိ၏။

ဝင်ရောက်သွားသော ချီသန့်စင်ခြင်းအဆင့် ကျင့်ကြံသူများမှာမူ ကိုယ့်ကိုယ်ကိုယ် အစာအဖြစ် သွားရောက်ဆက်သခြင်းသာ ဖြစ်သည်။

ကံကြမ္မာ၏ အလင်းရောင်ပါမလာပါက ဝင်သွားသူများအတွက် အသက်ဆယ်ချောင်းပင် လုံလောက်မည် မဟုတ်ပေ။

ထိုသို့သော သေချာပေါက် အသေခံမည့် စိတ်ဓာတ်မျိုးဖြင့် သွားမည့်အစား အိမ်မှာနေပြီး အဆောင် အနည်းငယ် ထပ်ဆွဲနေခြင်းက ပိုကောင်းပေသည်။ အမွေအနှစ်များမှ ရရှိသော ဝင်ငွေလောက် မများသော်လည်း ဘေးကင်းလုံခြုံ၏။

ကူးပြောင်းကုန်သွယ်ရေးရင်ပြင်မှ ထွက်ခွာလာပြီးနောက် ချန်လော့သည် နောက်ဘက်တောင်ရှိ ဂူသင်္ချိုင်းသို့ ပြန်လာခဲ့သည်။

"ငါဖော်စပ်တဲ့ဆေးလုံးတွေ ဘယ်တော့များမှ ဒီအရည်အသွေးကို ရောက်မလဲ မသိဘူး။"

အခန်းတွင်း၌။ချန်လော့သည် ဟွမ်ယင်း ပေးလိုက်သော အနက်ရောင်ကြွေပုလင်းကို ထုတ်ယူကာ အတွင်းရှိ နီရဲနေသော ဆေးလုံးကို လေ့လာကြည့်လိုက်၏။

သူဖော်စပ်ခဲ့သော ယန်ချီဆေးလုံးနှင့် မတူဘဲ ဤဆေးလုံးတွင် ရွှေရောင်အနားကွပ်ပါရှိရာ ၎င်းမှာ ပထမအဆင့် ဆေးလုံးဖြစ်ပြီး အပြစ်အနာအဆာကင်းကာ အဆိပ်အတောက် မရှိကြောင်း ပြသနေသည်။

ဤသည်မှာ ဂိုဏ်းရှိ ဆေးပညာရှင်များ၏ စံသတ်မှတ်ချက်ပင် ဖြစ်သည်။ ပြင်ပဈေးကွက်တွင် ရောင်းချပါက ဤဆေးလုံး၏ ဈေးနှုန်းမှာ အဆင့်နှစ်ဆင့်ခန့် ပိုမို မြင့်မားနိုင်ပေသည်။

သေချာသည်မှာ ချန်လော့ ဖော်စပ်ထားသော ယန်ချီဆေးလုံးသာဆိုလျှင် ဈေးပေါမည်ဖြစ်ပြီး လေလွင့်ကျင့်ကြံသူ အများစုမှာလည်း ထိုအမျိုးအစားကိုသာ သုံးစွဲကြသည်။

ပထမအဆင့် ဆေးလုံးမှာ လေလွင့်ကျင့်ကြံသူများအတွက် ဇိမ်ခံပစ္စည်းတစ်ခုဖြစ်ပြီး ထိုသို့သော ဆေးလုံးတစ်လုံး ရရှိရန်အတွက် မည်မျှ ကြိုးစားအားထုတ်ရမည်ကို မသိနိုင်ပေ။

ဤသည်မှာ ဂိုဏ်းကို အမှီပြုရခြင်း၏ အားသာချက်ပင် ဖြစ်သည်။

ဤယန်ချီဆေးလုံးကို ဖော်စပ်ခဲ့သော ဆေးပညာရှင်မှာ ဒုတိယအဆင့် ဆေးပညာရှင်အဆင့်သို့ ရောက်ရှိနေပြီ ဖြစ်နိုင်ပေသည်။

ပြင်ပတွင်ဆိုလျှင် သူတို့မှာ သခင်ကြီးအဆင့်ရှိ ပုဂ္ဂိုလ်များဖြစ်ကြပြီး သူတို့ ဖော်စပ်ထားသော ဆေးလုံးများကို ရရှိရန် ကြိုတင်ရက်ချိန်းယူရမည် ဖြစ်သည်။

ဆေးလုံးကို သောက်သုံးပြီးနောက် ချန်လော့သည် မျက်လုံးများကို မှိတ်ကာ တင်ပျဉ်ခွေထိုင်လိုက်ပြီး ဝူရှန်းကျင့်စဉ်သတ္တမအဆင့်၏ စိတ်ကျင့်စဉ်ကို တိတ်ဆိတ်စွာ လှည့်ပတ်လိုက်လေသည်။

ကျင့်စဉ်၏ အကြောင်းအရာများကို သူ အလွတ်ကျက်မှတ်ထားသည်မှာ ကြာပြီဖြစ်သည်။ ယခင်က ပထမအဆင့်မှ ၁၃ အဆင့်အထိ စိတ်ကျင့်စဉ်များအားလုံးကို ငွေကုန်ခံကာ ဝယ်ယူခဲ့ခြင်းမှာ ယခုအချိန်အတွက် လမ်းခင်းထားခြင်းပင် ဖြစ်သည်။

ဆေးလုံးသည် ခန္ဓာကိုယ်ထဲသို့ ရောက်ရှိသွားသည်နှင့် လျင်မြန်စွာ အရည်ပျော်သွားလေ၏။

ထို့နောက်နွေးထွေးသော ရေစီးကြောင်းအဖြစ် ပြောင်းလဲသွားကာ သူ၏ ကိုယ်လက်အင်္ဂါများနှင့် အရိုးများအတွင်းသို့ အလျင်အမြန် ပေါင်းစပ်ဝင်ရောက်သွားသည်။

သူ၏ ခန္ဓာကိုယ်တစ်ခုလုံးမှာ တက်ကြွလာပြီး အခန်းအတွင်းရှိ ဝိညာဉ်ချီများမှာ သူ၏ပတ်လည်တွင်အလိုအလျောက် စုရုံးလာကာ သူ၏ မွေးညင်းပေါက်များမှတစ်ဆင့် ခန္ဓာကိုယ်အတွင်းသို့ ဝင်ရောက်လာကြသည်။

သူ၏ စွမ်းအင်သတ္တိလေးခုပါသော ဝိညာဉ်အမြစ် သည်လည်း ဆေးလုံး၏ စွမ်းအင်များကို စတင်စုပ်ယူကာ အဆင့်တက်ရန် လိုအပ်သော ဝိညာဉ်စွမ်းအားအဖြစ် ပြောင်းလဲပေးလေသည်။

ယခင်က ရပ်တန့်နေခဲ့သော ချီသန့်စင်ခြင်း ဆဋ္ဌမအဆင့်မှာ စွမ်းအားများ နှစ်ကြိမ် လှည့်ပတ်ပြီးနောက် အလွယ်တကူ ကျော်ဖြတ်သွားနိုင်ခဲ့သည်။

ချီသန့်စင်ခြင်း သတ္တမအဆင့်

ချီသန့်စင်ခြင်း နှောင်းပိုင်းအဆင့်၏ ပိတ်ဆို့နေမှု ဆိုသည်မှာ ချန်လော့အတွက် လုံးဝ ပေါ်မလာခဲ့ပေ။

သူ၏ ဝိညာဉ်အမြစ် လေးခုအဖြစ် ပြောင်းလဲသွားပြီးနောက် သူ၏ ပါရမီမှာ ထပ်မံ မြင့်တက်လာခဲ့ပြီး အဆင့်မြင့် ဝိညာဉ်အမြစ် နှစ်ခု ရှိသော ပါရမီရှင်တစ်ဦးနှင့် ညီမျှနေပြီ ဖြစ်သည်။

ဆေးလုံး၏ စွမ်းအင်များ အလဟဿ မဖြစ်စေရန် ချန်လော့သည် အုတ်မြစ်တည်ဆောက်ခြင်းအဆင့် ကျင့်ကြံသူ နှစ်ဦး၏ ဦးနှောက်များကို အသုံးပြုလိုက်သည်။

သူတို့၏ ယခင်ဘဝအလိုအလျောက်တုံ့ပြန်မှုများကို အားကိုးခြင်းဖြင့် ဤပထမအဆင့် ယန်ချီဆေးလုံး၏အာနိသင်ကို သူ သေချာပေါက် အမြင့်ဆုံးအထိ အသုံးချနိုင်မည် ဖြစ်သည်။

ယန်ချီဆေးလုံး တစ်လုံးကို ချေဖျက်ရန်အတွက် အုတ်မြစ်တည်ဆောက်ခြင်းအဆင့် ကျင့်ကြံသူ နှစ်ဦး၏အလိုအလျောက်တုံ့ပြန်မှုများကို အသုံးပြုခြင်းမှာ ခြင်တစ်ကောင်ကို သတ်ရန် အမြောက်ကို အသုံးပြုခြင်းထက်ပင် ပို၍ အလွန်အကျွံ ဖြစ်နေပေသည်။

နှစ်နာရီ ကြာပြီးနောက် ဆေးလုံး၏ စွမ်းအင်များကို အပြည့်အဝသန့်စင်ပြီးသွားလေသည်။ ချန်လော့၏ ချီသန့်စင်ခြင်း သတ္တမအဆင့်မှာ အလွယ်တကူတည်ငြိမ်သွားပြီး ဝိညာဉ်စွမ်းအားများပင် ပိုလျှံနေသေး၏။

မကြာခင်တွင် ချီသန့်စင်ခြင်း အဋ္ဌမအဆင့်သို့ တက်လှမ်းရန်ပင် သူကြိုးစားနိုင်သေးသည်။

ချီသန့်စင်ခြင်း နှောင်းပိုင်းအဆင့်သို့ ရောက်ရှိပြီးနောက် ချန်လော့၏ ခန္ဓာကိုယ်အတွင်းရှိ ဝိညာဉ်ချီမြွေ များမှာ သုံးဆယ်အထိ ရောက်ရှိသွားလေသည်။

မူလ ကိုးခုမှ သုံးဆယ်အထိ တိုက်ရိုက် ခုန်တက်သွားခြင်း ဖြစ်သည်။ ထိုမျှကြီးမားသော ခုန်ပျံကျော်လွှားမှုက ချီသန့်စင်ခြင်း နှောင်းပိုင်းအဆင့်နှင့် ချီသန့်စင်ခြင်း အလယ်အလတ်အဆင့်အကြား အဘယ်ကြောင့် ဤမျှကြီးမားသော ကွာခြားချက် ရှိနေရသည်ကို ရှင်းပြနေပေသည်။

ချန်လော့သည် သူ၏ ပုံမှန်ဘဝကို ပြန်လည်စတင်လေ၏။

နေ့စဉ်နေ့တိုင်း ဂျူနီယာညီမ ဟွမ်ယင်းကို အဆောင်များကူညီရောင်းချခိုင်းခြင်းမှလွဲ၍ ကျန်အချိန်များကို ကျင့်ကြံခြင်းတွင်သာ ကုန်ဆုံးစေသည်။

သူသည် နံနက်ပိုင်းတွင် ခရမ်းရောင်ချီကို စုပ်ယူပြီး ညနေပိုင်းတွင် အလင်းရောင်ကို သန့်စင်ရာ ဤလုပ်ငန်းစဉ်အတွင်း သူ၏ ကျင့်ကြံခြင်းမှာ တည်ငြိမ်စွာ တိုးတက်လာလေသည်။

ချန်လော့ ချီသန့်စင်ခြင်း သတ္တမအဆင့်သို့ တက်လှမ်းသွားသည့် သတင်းကြောင့် ဂျူနီယာညီမ ဟွမ်ယင်းမှာ လုံးဝ ထုံကျဉ်သွားခဲ့ရ၏။

ယခုအခါ သူမသည် ချန်လော့နှင့် ယှဉ်ပြိုင်မည့် အကြံကို လုံးဝ စွန့်လွှတ်လိုက်ပြီဖြစ်ပြီး သူ၏ အင်္ကျီစကိုသာ တွယ်ကပ်ထားရန် ဆုံးဖြတ်လိုက်ရာ ၎င်းကပင် သူမအတွက် ဝိညာဉ်ကျောက်တုံးများစွာကို ရရှိစေခဲ့သည်။

ပူးတွဲတာဝန်မှာ အုတ်အော်သောင်းတင်း ဖြစ်သွားခဲ့ပြီး လျှို့ဝှက်နယ်မြေနှင့် ပတ်သက်သည့် သတင်းများမှာ နေ့စဉ်နှင့်အမျှ ပြန့်နှံ့နေလေ၏။ ယနေ့တွင် တစ်ယောက်ယောက်က လျှို့ဝှက်နယ်မြေအတွင်း အခွင့်အရေးတစ်ခု ရရှိကာ နာမည်ကြီးသွားသည်၊ မနက်ဖြန်တွင် နောက်တစ်ယောက်က အမွေအနှစ် နှင့် ရှေးဟောင်း လျှို့ဝှက်သိုင်းကျမ်းတစ်ခု ရရှိသွားသည် စသည်ဖြင့် ဖြစ်၏။

ရေပန်းစားဆုံးသတင်းမှာ ရှန်းဟော်တောင်ထွတ်၏ တပည့်ကြီးဖြစ်သော ဆုထျန်းယောင် အကြောင်းပင် ဖြစ်သည်။

ချန်လော့ တစ်ကြိမ် မြင်ဖူးခဲ့သော ဤ အပြင်စည်း ဆရာကြီးသည် လျှို့ဝှက်နယ်မြေအတွင်း အုတ်မြစ်တည်ဆောက်ခြင်းအဆင့် ဝိညာဉ်ပစ္စည်းတစ်ခုကို ရရှိခဲ့၏။

ထိုပစ္စည်းနှင့် သူ၏ ကိုယ်ပိုင် စုဆောင်းထားမှုများကိုအားကိုးကာ သူသည် အဟန့်အတားကို တစ်ဟုန်ထိုး ချိုးဖျက်နိုင်ခဲ့ပြီး အုတ်မြစ်တည်ဆောက်ခြင်းအဆင့် ကျင့်ကြံသူအဖြစ်သို့ တက်လှမ်းသွားခဲ့လေသည်။

ဤသတင်းသည် နတ်ဘုရားရေကန် မသေမျိုးဂိုဏ်းရှိ တပည့်များအားလုံးကို လှုံ့ဆော်ပေးလိုက်သလို ဖြစ်သွားသည်။ တရစပ် ကြားနေရသော ကံကောင်းသည့် အဖြစ်အပျက်များက ယခင်က တုံ့ဆိုင်းနေခဲ့သော တပည့်များကို ဆုံးဖြတ်ချက်ချရန် တွန်းအားပေးလိုက်လေ၏။

နေ့စဉ်နှင့်အမျှ လူများစွာသည် လျှို့ဝှက်နယ်မြေသို့ သွားရောက်ရန် ပူးတွဲတာဝန်ကို လျှောက်ထားကြရာ ချန်လော့၏ နာမည်ကြီးနေပြီဖြစ်သော စစ်ဆေးခြင်းအဆောင် လုပ်ငန်းမှာ ပိုမို စည်ကားလာပြီး သူ့အတွက် အနားယူချိန်ပင် မရှိတော့ပေ။

လျှို့ဝှက်နယ်မြေသို့ သွားရောက်သူတိုင်းသည် သူတို့ကိုယ်သူတို့ နောက်ထပ် ကံကြမ္မာ၏သားတော် ဖြစ်လာမည်ဟု ယုံကြည်နေကြသည်။

လျှို့ဝှက်နယ်မြေအတွင်း သေဆုံးသွားသူများ၏ အရိုးများကို မည်သူမျှ ဂရုမစိုက်ကြပေ။ သူတို့ အာရုံစိုက်နေသော ကံကြမ္မာ၏သားတော် များနှင့် နှိုင်းယှဉ်ပါက လျှို့ဝှက်နယ်မြေအတွင်း သေဆုံးသွားသူ အရေအတွက်မှာ အများဆုံးပင် ဖြစ်သည်။

လျှို့ဝှက်နယ်မြေ ရှာဖွေရေးဆိုသည်မှာ အသက်များစွာဖြင့် ရင်းနှီးရခြင်း ဖြစ်သည်။

အခွင့်အရေးများဆိုသည်မှာ မည်သို့ဖြစ်ဤမျှ လွယ်ကူစွာ ရနိုင်ပါမည်နည်း။

အချိန်များ ကုန်လွန်သွားကာ မျက်တောင်တစ်ခတ်အတွင်း လအနည်းငယ် ကြာမြင့်သွားခဲ့၏။

ချန်လော့နှင့် သူ၏အသုတ်တို့ ဂိုဏ်းထဲသို့ ဝင်ရောက်လာခဲ့သည်မှာ တရားဝင်တစ်နှစ် ပြည့်သွားခဲ့ပြီ ဖြစ်သည်။

တစ်နှစ်ကြာပြီးနောက် နတ်ဘုရားရေကန် မသေမျိုးဂိုဏ်း၏ ပတ်ဝန်းကျင်နှင့် အံမဝင်နိုင်သူ အများအပြားမှာ ထွက်ခွာရန် ဆုံးဖြတ်ခဲ့ကြ၏။

ဖူအန်း သည်လည်း ထိုအုပ်စုတွင် ပါဝင်ပြီး မထွက်ခွာမီချန်လော့ကို အထူးတလည် လာရောက်နှုတ်ဆက်ခဲ့သည်။ ချန်လော့သည် သူနှင့် စကားအနည်းငယ်သာ ပြောဆိုပြီးနောက် အဆောင်များကို ဆက်လက် ဆွဲနေခဲ့သည်။

လျှို့ဝှက်နယ်မြေ ရှာဖွေရေး အရှိန်အဟုန်မှာ ကျဆင်းသွားပြီဖြစ်ရာ ဤနောက်ဆုံး ကျန်ရစ်သော အရှိန်အဟုန်ကို အမိအရဖမ်း၍နောက်တစ်ကြိမ် ငွေရှာရန် သူ စီစဉ်ထားလေသည်။

စစ်ဆေးခြင်း အဆောင်များ ရောင်းချရာမှ ရရှိသောအရင်းအမြစ်များမှာ ချန်လော့၏ အိတ်ကပ်များအတွင်း ပြည့်လျှံနေပြီ ဖြစ်သည်။

လွန်ခဲ့သော ရက်အနည်းငယ်က သူသည် မသေမျိုးဆရာသခင် ဝူဝေထံသို့ သွားရောက်ခဲ့၏။

ထိုဆရာသခင်ထံမှ သူ၏ ဒုတိယမြောက် နတ်ဘုရားစွမ်းရည်ဖြစ်သော လေထိန်းချုပ်ခြင်းနည်းစနစ်ကို သင်ယူခဲ့သည်။

၎င်းမှာ မသေမျိုးကြိုးကြာငှက်၏ အကျွမ်းကျင်ဆုံး မွေးရာပါနတ်ဘုရားစွမ်းရည်ပင် ဖြစ်သည်။

"ငါ့ရဲ့ ဒုတိယမြောက် နတ်ဘုရားစွမ်းရည်။"

ချန်လော့သည် အခန်းတွင်း၌ တင်ပျဉ်ခွေထိုင်ကာ သူ၏ လက်ဝါးကို ဖြန့်လိုက်ရာ တုန်ခါနေသော လေဓားသွား တစ်ခု သူ၏လက်ထဲတွင် ပေါ်လာလေသည်။

ဤနတ်ဘုရားစွမ်းရည်ကို သင်ယူရသည်မှာ နတ်ဝိညာဉ်နည်းစနစ် ထက် များစွာ ပိုမို ချောမွေ့ခဲ့သည်။ ချန်လော့ ထိန်းချုပ်ထားသော အုတ်မြစ်တည်ဆောက်ခြင်းအဆင့် ဦးနှောက် နှစ်ခုအနက် တစ်ခုမှာယခင်ဘဝက လေထိန်းချုပ်ခြင်းနည်းစနစ်ကို ကျွမ်းကျင်သူတစ်ဦး ဖြစ်ခဲ့သည်။

ချန်လော့သည် ၎င်းကို အသုံးပြုနိုင်ရန်အတွက် အနည်းငယ်မျှသာ ပြုပြင်ပြောင်းလဲရန် လိုအပ်ခဲ့၏။

၎င်းကို အသုံးပြုရခြင်း၏ အကျိုးသက်ရောက်မှုမှာ ချန်လော့ ဂရုတစိုက်အတုခိုးထားသော နတ်ဝိညာဉ်နည်းစနစ်ထက်ပင် ပိုမို အားကောင်းနေလေသည်။

၎င်းမှာ အုတ်မြစ်တည်ဆောက်ခြင်းအဆင့် ကျင့်ကြံသူတစ်ဦး၏ ပြီးပြည့်စုံသော အသုံးပြုနည်းပင် ဖြစ်သည်။

ဝိညာဉ်စွမ်းအားအနည်းငယ် ကွာခြားမှုမှလွဲ၍ ချန်လော့၏ လေထိန်းချုပ်ခြင်းနည်းစနစ် အသုံးပြုမှုမှာ အုတ်မြစ်တည်ဆောက်ခြင်းအဆင့် ကျင့်ကြံသူတစ်ဦး၏ စံသတ်မှတ်ချက်သို့ ရောက်ရှိနေပြီ ဖြစ်ပေသည်။