အခန်း (၁၂၄၁-၁၂၄၂)

အခန်း (၁၂၄၁) - ကျွယ်မင်နတ်ဘုရားနန်းတော်

လူအုပ်စုသည် ဟားတိုက် ရယ်မောလိုက်ကြသည်။

သူတို့သည် စုန့်ကျိလီ၏ ပုံစံကို မမြင်ရသော်လည်း သူ၏ လက်ရှိ အမူအရာကို စိတ်ကူးထဲတွင် မြင်ယောင်ကြည့်နိုင်ကြသည်။

စုန့်ကျိလီသည် ဂုဏ်ရှိန်ကြီးမားသော အဆင့် ၃ မသေမျိုး တစ်ပါးဖြစ်သော်လည်း ယနေ့ကဲ့သို့ ရယ်စရာကောင်းပြီး အဓိပ္ပာယ်မဲ့သော အခြေအနေမျိုးကို မကြုံဖူးပေ။

ဒီလူတွေက ဘာကို ရယ်နေကြတာလဲ သူတို့ ဘာကို ရယ်နေတာလဲ

ဝိညာဉ်သုတ်သင်ခြင်းဌာန ၏ နည်းလမ်းများက ဘယ်အချိန်ကတည်းက ဤမျှထိတိုင် တစ္ဆေစီးသကဲ့သို့ လျှို့ဝှက်နက်နဲသွားရတာလဲ

ဖန့်ချန်သည် ယွီထင်ကျဲတို့ အုပ်စုကို နှုတ်ဆက်လိုက်ပြီးနောက် စုန့်ကျိလီကို ကိုယ်တိုင် ခေါ်ဆောင်ကာ ယင်လောက ထဲသို့ ဝင်ရောက်သွားသည်။

မရဏလမ်း ပေါ်တွင် စုန့်ကျိလီသည် သူသည် ဝိညာဉ်တစ်ခု ဖြစ်သွားပြီ ဖြစ်ကြောင်း အတည်ပြုလိုက်နိုင်ပြီး လက်တွေ့ဘဝကိုလည်း လက်ခံလိုက်သည်။

"ငါ အစက မင်းရဲ့ နည်းလမ်းတွေကို အရမ်း အထင်သေးမိတယ် ယွီထင်ကျဲ အဆင့် ၄ တက်လှမ်းတာ မင်းနဲ့ ပတ်သက်နေတာလား ရေခဲတောင်အောက်က တစ်ယောက်က ငါထင်တာ မမှားရင် ကောင်းကင်ဓားဌာနရဲ့ ဒုတိယဌာနမှူး မဟုတ်လား ဓားသမားတွေက မပြည့်စုံတဲ့ မသေမျိုး တွေပဲလေ၊ ဘာလို့... အဆင့် ၄ ကို တက်လှမ်းနိုင်ရတာလဲ "

စုန့်ကျိလီသည် စိတ်ကို တည်ငြိမ်အောင် ပြုလုပ်ပြီးနောက် သူငယ်ချင်းဟောင်းတစ်ယောက်နှင့် ပုံမှန် စကားပြောသကဲ့သို့ ယဉ်ကျေးသော လေသံဖြင့် မေးလိုက်သည်။

"ဒီလိုလုပ်ရအောင်၊ ငါ မင်းကို မေးခွန်းတစ်ခု မေးမယ်၊ မင်းလည်း ငါ့ကို တစ်ခု ပြန်မေး၊ ဘယ်လိုလဲ၊ ဒါမှ တရားမျှတမှာ "

ဖန့်ချန် ရယ်မောလိုက်သည်

"ဝမ်ချုံစန်း ရဲ့ ကျန်ရှိနေတဲ့ ကိုယ်ပွားတွေက အခု ဘယ်မှာလဲ "

စုန့်ကျိလီ ခဏမျှ တိတ်ဆိတ်သွားပြီးနောက် ခေါင်းခါလိုက်သည်

"ငါ မသိဘူး သူက အမြဲတမ်း လျှို့ဝှက်စွာ လုပ်ဆောင်တတ်တဲ့သူ ဒီလောက် အရေးကြီးတဲ့ ကိစ္စမျိုးကို ငါ့ကို လာပြောမှာ မဟုတ်ဘူး "

"ကောင်းပြီ၊ မင်း အလှည့် "

"ယွီထင်ကျဲ အဆင့် ၄ တက်လှမ်းတာ မင်းနဲ့ ပတ်သက်နေတာလား "

"ငါ မသိဘူး "

ဖန့်ချန် ခေါင်းခါလိုက်ပြီးနောက် ထပ်မေးလိုက်သည်

"ဝမ်ချုံစန်း အစက ထိုက်ရီမသေမျိုးလမ်းကြောင်း ကို ဘယ်လို ရခဲ့တာလဲ "

စုန့်ကျိလီ ငေးသွားသည်။

ယွီထင်ကျဲ ဘယ်လို အဆင့် ၄ တက်သွားတာလဲဆိုတာကို သူ မသိတာ မဖြစ်နိုင်ပေ။

ဒီနေ့ သူ ရရှိခဲ့တဲ့ သတင်းတွေအရ ယွီထင်ကျဲက ဒီလူဆီမှာ အစောကြီးကတည်းက ခိုလှုံနေတာဆိုတာ သေချာသည်။

ဖြစ်နိုင်တာက သူသည် တစ်စုံတစ်ခုသော နည်းလမ်းဖြင့် ဒီလူ၏ ထိန်းချုပ်မှုကို ခံထားရခြင်း ဖြစ်နိုင်သည်။

မဟုတ်လျှင် ဂုဏ်ရှိန်ကြီးသော အဆင့် ၄ မသေမျိုးတစ်ပါးက ဝိညာဉ်သုတ်သင်ခြင်းဌာနအပေါ် ဘာကြောင့် ထိုမျှ သစ္စာရှိရမှာလဲ

သူ့ကို သတ်ပစ်ဖို့တောင် မတွန့်ဆုတ်ဘဲ မဟာမြေမသေမျိုးကို စော်ကားရဲခဲ့သည်။

ဒါဟာ နတ်မင်းနန်းတော်က ကောင်းကင်ဓားဌာနနှင့် ကျိုးရှန်းတောင် ကို ဖျက်ဆီးခဲ့တဲ့အတွက် လက်စားချေတာ ဖြစ်ရမယ်။

ဒီကိစ္စနဲ့ ယင်စိန့်ဂိုဏ်း နဲ့ ဘာမှ မဆိုင်ဘူး။

ယွီထင်ကျဲကို ဒီလောက်ထိ လုပ်ခိုင်းနိုင်တာက ရိုးရိုးရှင်းရှင်း အကျိုးအမြတ် လောဘတစ်ခုတည်းနဲ့ မဟုတ်တာ သေချာသည်။

ဤအချက်ကို တွေးမိသောအခါ စုန့်ကျိလီသည် သူ့အကြောင်းကို ဖြေရှင်းနိုင်မည့် အရေးကြီးသော မေးခွန်းအချို့ကို ဖြေပေးမှသာ သူ သိလိုသည့် အဖြေကို ရနိုင်မည်ဟု နားလည်လိုက်သည်။

ဆယ်စက္ကန့်ကျော်ကြာ တိတ်ဆိတ်စွာ တွေးတောပြီးနောက် ရှေ့တွင် မြစ်တစ်စင်း ထင်ရှားလာသည်ကို မြင်လိုက်ရသဖြင့် စုန့်ကျိလီက ရုတ်တရက် ပြောလိုက်သည်

"ဝမ်ချုံစန်း ထိုက်ရီမသေမျိုးလမ်းကြောင်း ရခဲ့တဲ့ အကြောင်းအရင်းကို ဘယ်သူမှ မသိဘူး ဒါပေမဲ့ နောက်ပိုင်းမှာ သူက အထက်သုံးနယ်မြေ က ပုဂ္ဂိုလ်ကြီးတွေရဲ့ ဖိနှိပ်ခြင်းကို ခံလိုက်ရတယ်"

"ထိုက်ရီမသေမျိုးလမ်းကြောင်းကိုလည်း အင်အားစုတွေက ခွဲဝေယူသွားကြတယ် ဒီနောက်ကွယ်မှာ အရိပ်အယောင်လေးတွေ ထွက်လာတယ်၊ ကျုပ်တို့ တပည့်ညီအစ်ကိုတွေကတော့ ဒီကိစ္စက အထက်သုံးနယ်မြေက ကျွယ်မင်နတ်ဘုရားနန်းတော် နဲ့ ပတ်သက်နေမယ်လို့ သံသယရှိကြတယ် "

ခဏရပ်ပြီးနောက်

"ရေခဲတောင်အောက်က တစ်ယောက်က ကောင်းကင်ဓားဌာနရဲ့ ဒုတိယဌာနမှူးလား "

စုန့်ကျိလီသည် ဖန့်ချန်ကို စူးစိုက်ကြည့်လိုက်သည်။

ကျွယ်မင်နတ်ဘုရားနန်းတော်

အထက်သုံးနယ်မြေနှင့် အောက်ခြောက်နယ်မြေမှာ မတူညီပေ။

အထက်သုံးနယ်မြေနှင့် သက်ဆိုင်သော ယင်မြို့များသည် ဖူတူလောက တွင်သာ ရှိကြသည်။

ထို့ကြောင့် ယင်လောက၏ လျှို့ဝှက်စောင့်ရှောက်ရေးဌာန သည် အထက်သုံးနယ်မြေထိ မရောက်နိုင်ဘဲ အသုံးဝင်သည့် သတင်းများကို မရနိုင်ခဲ့ပေ။

"ရေခဲတောင်အောက်က တစ်ယောက်က ဘယ်လိုလုပ် ကောင်းကင်ဓားဌာန ဒုတိယဌာနမှူး ဖြစ်နိုင်မှာလဲ သူတို့က လမ်းစဥ်မပြည့်တဲ့သူ တွေပဲ ဓားသမားတွေရဲ့ လမ်းကြောင်းက အဆင့် ၃ ဆိုရင်ပဲ အဆုံးသတ်ပြီ မင်း တကယ် မသိတာလား၊ ဒါမှမဟုတ် ဟန်ဆောင်နေတာလား "

ဖန့်ချန် ပြုံး၍ ပြောသည်

"ကျွယ်မင်နတ်ဘုရားနန်းတော်က ဘာအဖွဲ့အစည်းလဲ "

ဖန့်ချန်၏ အဖြေကို ရလိုက်သောအခါ စုန့်ကျိလီလည်း စိတ်သက်သာရာ ရသွားသည်။

ရေခဲတောင်အောက်က ဘယ်သူဖြစ်ဖြစ် သူ ဂရုမစိုက်တော့ပေ။

သူသာ အသက်ရှင်နေသေးရင် မေးကောင်း မေးမိဦးမည်၊ ယခု သူ သေသွားပြီ ဖြစ်ရာ ကောင်းကင်ဓားဌာန ဒုတိယဌာနမှူး မဟုတ်သရွေ့ သူနဲ့ ဘာမှ မဆိုင်တော့ပေ။

ဓားသမားတွေက အဆင့် ၃ နောက်ပိုင်းမှာ လမ်းစမရှိတော့ဘူးလို့ လူတိုင်း သိကြပြီး မပြည့်စုံသော မသေမျိုး လို့ ခေါ်ကြသည်။

သူ အရင်က ကောင်းကင်ဓားဌာနကို အသုံးပြုရတာ စိတ်ချရတယ်လို့ ခံစားရခြင်းမှာ ထိုအချက်ကြောင့် ဖြစ်သည်။

သာ၍ဆိုးသည်မှာ၊ ဓားသမားများအတွက် လမ်းစရှိနေပြီဆိုလျှင် ထိုကိစ္စမှာ လူသားနယ်မြေ ကိုးခုလုံး၏ အခြေအနေကို ပြောင်းလဲသွားစေမည့် ကိစ္စဖြစ်သည်။

လမ်းသစ် ပေါ်လာတာထက်ပင် ပိုမိုကြီးမားသော သက်ရောက်မှု ရှိသည်။

"ကျွယ်မင်နတ်ဘုရားနန်းတော်... က အထက်သုံးနယ်မြေမှာ ထိပ်တန်း အဖွဲ့အစည်းပဲ "

စုန့်ကျိလီက ပြောသည်

"သူတို့အကြောင်း အသေးစိတ်တော့ ငါလည်း မသိဘူး ငါက အခုထိ အထက်သုံးနယ်မြေကို မရောက်ဖူးသေးဘူး အောက်ခြောက်နယ်မြေနဲ့ မတူဘူး၊ အထက်သုံးနယ်မြေမှာ ကောင်းကင်နယ်မြေ တံခါး ရှိတယ် ဒီတံခါးကို ဖြတ်ဖို့ဆိုရင် ဖိတ်စာ ရရမယ်၊ မဟုတ်ရင် ကြီးမားတဲ့ ပေးဆပ်မှုနဲ့ ဖြတ်ရမယ် "

ကောင်းကင်နယ်မြေ တံခါး

လျှို့ဝှက်စောင့်ရှောက်ရေးဌာနမှာ ဒီလို သတင်းအချက်အလက်မျိုး ရှိကောင်း ရှိနိုင်မည်။

ဖန့်ချန် အရင်က ဒီကိစ္စကို အာရုံမစိုက်ခဲ့သဖြင့် အသေးစိတ် မလေ့လာဖြစ်ခဲ့ပေ။

"ဟုတ်ပြီ၊ ကျွယ်မင်နတ်ဘုရားနန်းတော်နဲ့ ပတ်သက်နေတယ်လို့ ပြောရတဲ့ အကြောင်းအရင်းက ဝမ်ချုံစန်းက အရင်တုန်းက ဖိတ်စာတစ်စောင် ရခဲ့လို့ပဲ ဖိတ်စာရှင်က ကျွယ်မင်နတ်ဘုရားနန်းတော်က အမျိုးသမီး ကျင့်ကြံသူ တစ်ဦးပဲ "

စုန့်ကျိလီ ဆက်ပြောသည်

"အဲဒီနောက်ပိုင်း ဝမ်ချုံစန်းရဲ့ ကျင့်စဉ်က တစ်နေ့ထက်တစ်နေ့ တိုးတက်လာပြီး အထက်သုံးနယ်မြေမှာတောင် နာမည်ရလာတယ် နောက်မှ သူက ထိုက်ရီမသေမျိုးလမ်းကြောင်းကို ကျင့်နေမှန်း သိသွားကြတာ"

"ထိပ်တန်း ဂိုဏ်းကြီးတွေတောင် ဒီလမ်းကြောင်းကို မပိုင်ဆိုင်ထားဘူး သူက ဘာနောက်ခံမှ မရှိတဲ့ အောက်ခြောက်နယ်မြေက လူတစ်ယောက် ဖြစ်လျက်နဲ့ ဒီလမ်းကြောင်းကို ပိုင်ဆိုင်ထားပြီး အဆင့် ၆ အထိ တက်လှမ်းနိုင်တာ၊ သူ အဖိနှိပ်ခံရတာ မဆန်းဘူး "

"မင်းနဲ့ သူနဲ့ မတည့်ဘူး ထင်တယ်နော် "

ဖန့်ချန် ပြုံး၍ ပြောသည်။

စုန့်ကျိလီက အေးဆေး ပြောသည်

"ထျန်းရှန်းဂိုဏ်း က ဝမ်ချုံစန်းကြောင့် ဝိညာဉ်နတ်ဘုရားဂိုဏ်းထဲမှာ အနှိပ်ခံနေရတာ သူက ဂိုဏ်းထဲက လူတွေတင်မကဘဲ အထက်သုံးနယ်မြေက လူတွေကိုပါ အများကြီး ရန်စခဲ့တာ ကျုပ်တို့ဂိုဏ်းက ဒီလောက်ထိ နိမ့်ကျနေရတာက ရွှီ ဆိုတဲ့လူကြောင့်တင် မဟုတ်ဘူး မင်းသာဆိုရင်လည်း သူ့နဲ့ မတည့်ဘူး "

"သူ့ရဲ့ ကိုယ့်ပွား ၃၆ ဆင့် က ထိုက်ရီမသေမျိုးရဲ့ နည်းလမ်းလား "

"မိတ်ဆွေဖန့်၊ ငါ့အလှည့် "

"ကောင်းပြီ၊ မေးပါ "

စုန့်ကျိလီက ဟန်ရွှေနတ်မီးလျှံ အကြောင်း မေးချင်သော်လည်း ထိုလူက ဖျက်ဆီးထားမှန်း သူ သိနေပြီ။

ရွှီချန်ရှီးတို့ပါ ဒီလူနဲ့ ပူးပေါင်းနေတာဆိုတော့ ထပ်မေးတာက အချိန်ဖြုန်းတာပဲ ဖြစ်မည်။

ခဏမျှ စဉ်းစားပြီးနောက် ဝမ်ချွမ်းမြစ်သို့ ရောက်ရှိလာချိန်တွင် စုန့်ကျိလီသည် သက်ပြင်းတစ်ချက်ချ၍ မေးလိုက်သည်

"ဟန်ရွှေနတ်မီးလျှံကို မင်း ခိုးသွားတာလား "

ထိုမေးခွန်းကို မေးပြီးနောက် စုန့်ကျိလီ၏ စိတ်ထဲတွင် ပေါ့ပါးသွားသကဲ့သို့ ခံစားလိုက်ရသည်။

"ဟုတ်တယ်၊ ငါ ခိုးသွားတာ အခု မင်း မေးခွန်းကို ဖြေလိုက်တော့ "

ဖန့်ချန် ရယ်မော၍ ပြောသည်။

"ကိုယ်ပွား ၃၆ ဆင့်... က ထျန်းရှန်းဂိုဏ်းရဲ့ နည်းလမ်း မဟုတ်ဘူး ဝမ်ချုံစန်း အထက်သုံးနယ်မြေကို မသွားခင်က ဒီလို နည်းလမ်းမျိုးကို ငါ မကြားဖူးဘူး အသေးစိတ်တော့ ငါ မသိဘူး၊ ဒါပေမဲ့ ထိုက်ရီမသေမျိုးလမ်းကြောင်းလိုပဲ ကျွယ်မင်နတ်ဘုရားနန်းတော်နဲ့ ပတ်သက်နေမယ်လို့ပဲ ထင်တယ် "

စုန့်ကျိလီ ပြုံး၍ ပြောသည်

"မိတ်ဆွေဖန့်ရဲ့ နည်းလမ်းတွေနဲ့ဆိုရင် အထက်သုံးနယ်မြေကို သွားပြီး စုံစမ်းတာ ခက်ခဲမှာ မဟုတ်ဘူး မိတ်ဆွေဖန့် ကျွယ်မင်နတ်ဘုရားနန်းတော်ကို သွားကြည့်ပါ ဝမ်ချုံစန်း အဲဒီမှာ ဘာတွေ ကြုံခဲ့ရလို့ အခုလို ထူးဆန်းသွားတာလဲဆိုတာ သိနိုင်ပါလိမ့်မယ် "

ခဏရပ်ပြီးနောက်

"မိတ်ဆွေဖန့်၊ ယွီထင်ကျဲတို့က ဘာကြောင့် မင်းဆီ ခိုလှုံသွားတာလဲ မင်း သူတို့ကို ဘာကောင်းကျိုးတွေ ပေးထားတာလဲ "

"မသိဘူး "

ဖန့်ချန် ခေါင်းခါလိုက်ပြီးနောက် စုန့်ကျိလီကို ခေါ်ဆောင်ကာ တံတားတစ်စင်းပေါ်သို့ ခြေချလိုက်ပြီး အချိန်အနည်းငယ်အတွင်း ရှန်ကျင်းမြို့တော် ရှိ လျှို့ဝှက်ကာကွယ်စောင့်ရှောက်ရေးဌာနသို့ ရောက်ရှိလာသည်။

စုန့်ကျိလီသည် လျှို့ဝှက်ကာကွယ်ရေးဌာန၏ တံဆိပ်ကြီးကို ကြည့်ကာ ပြုံးလိုက်သည်

"နတ်ရိုသေနန်းတော်က လျှို့ဝှက်စောင့်ရှောက်ရေးဌာနနဲ့ မင်းတို့ ဝိညာဉ်သုတ်သင်ခြင်းဌာနကြားက ဆက်စပ်မှုကို စုံစမ်းနေတာ ကြာပြီ ရတဲ့ သတင်းတွေအရ ဒီကိစ္စတွေ အကုန်လုံးက ဒီနေရာက ဖန့်အရှင် ဆိုတဲ့သူနဲ့ ပတ်သက်နေတယ် "

"ဒါပေမဲ့ ဝိညာဉ်သုတ်သင်ခြင်းဌာနက ဒီ ဖန့်အရှင် ဆိုတာ ဘယ်သူလဲဆိုတာကို သူတို့ကိုယ်တိုင်လည်း မသိကြဘူးဆိုတာကို သူတို့ သေချာနေကြတယ် "

"မိတ်ဆွေဖန့်၊ ခင်ဗျား ကျုပ်ကို ဒီနေရာ ခေါ်လာတာ ဘာလုပ်ဖို့လဲ "

သူ့မျက်နှာပေါ်က အပြုံးမှာ တဖြည်းဖြည်းနှင့် တောင့်တင်းလာသော်လည်း သူ၏ စိတ်တည်ငြိမ်မှုကို ထိန်းထားဆဲ ဖြစ်သည်။

သူ၏ အတွေးများကို မည်သူမျှ မမြင်နိုင်စေရန် ကြိုးစားနေသည်။

ဝိညာဉ်တစ်ခု ဖြစ်လာပြီး အစွမ်းများ ပျောက်ကွယ်သွားသည့်နောက်တွင် စိတ်ခံစားချက်များကို ထိန်းချုပ်နိုင်စွမ်းမှာ ယခင်ကဲ့သို့ အဆင်မပြေတော့ပေ။

အခန်း (၁၂၄၂) - ကျိုးကြောင်းဆီလျော်မှု

ဖန့်ချန်သည် စုန့်ကျိလီကို ခေါ်ဆောင်ကာ ရှကျီ ၏ ရုံးခန်းသို့ ရောက်လာချိန်တွင် သတင်းပို့ပြီး ထွက်လာသော လျှို့ဝှက်စောင့်ရှောက်ရေးဌာန မှ ဝန်ထမ်းအချို့နှင့် တိုးမိသည်။

သူတို့က ဖန့်ချန်ကို မြင်သည်နှင့် လေးစားစွာ အရိုအသေပေးကြသည်။

"သခင်လေး "

ဖန့်ချန် ခေါင်းညိတ်ပြလိုက်ပြီး စုန့်ကျိလီကို ခေါ်ကာ အခန်းထဲသို့ ဝင်သွားသည်။

ရှကျီက ၎င်းကို မြင်သည်နှင့် ရယ်မောလျက် ထိုင်ခုံမှ ထလာကာ

"စုန့်ကျိလီကိစ္စ ပြီးသွားပြီလား "

နောက်မှ လိုက်ပါလာသော စုန့်ကျိလီ၏ မျက်နှာမှာမူ ရှုပ်ထွေးနေသည်။

သူ၏ ကိစ္စများမှာ လျှို့ဝှက်စောင့်ရှောက်ရေးဌာန၏ အာရုံစိုက်ခြင်းကို ခံလိုက်ရပြီ ဖြစ်ရာ ယခုလို ရှုံးနိမ့်သွားခြင်းမှာ ပြောစရာပင် မလိုတော့ပေ။

"ငါ့အမှား မဟုတ်ဘူး " (ဆိုသည့် စိတ်ဖြင့် သူ ငြီးငွေ့နေမိသည်)။

"ဒီတစ်ယောက်ကတော့ စုန့်ကျိလီ ဆိုတဲ့ မိတ်ဆွေပဲ"

ဖန့်ချန်က မိတ်ဆက်ပေးသည်။

ရှကျီက စုန့်ကျိလီကို အပေါ်အောက် အကဲခတ်ကြည့်ပြီး

"ဒီမိတ်ဆွေ စုန့်က အဆင့် ၃ မသေမျိုး တစ်ပါးပဲ၊ ဝမ်ချုံစန်းရဲ့ ညီအစ်ကိုလည်း ဖြစ်တော့ သိထားတာတွေ အများကြီး ရှိမှာပဲ တရားစီရင်ရေးဌာန ကို ပို့ပြီး ကောင်းကောင်း မေးမြန်းလိုက်ရမလား "

"တရားစီရင်ရေးဌာနမှာ ရှိတဲ့ ရှန်းထူ အရှင် ချန်ရစ်ခဲ့တဲ့ တရားသူကြီးအဖွဲ့ရဲ့ နည်းလမ်းတွေက ထူးခြားတယ် သူတို့လက်ထဲမှာ ရက်အနည်းငယ်ကြာအောင် အသက်ဆက်နိုင်တဲ့ ဝိညာဉ်ဆိုတာ အလွန်ရှားတယ် "

စုန့်ကျိလီ၏ မျက်နှာမှာ ဖြူဖျော့သွားပြီး စကားကို မြိုသိပ်လိုက်သည်။

"မိတ်ဆွေ စုန့်က အခုတော့ သာမန် ဝိညာဉ်တစ်ပါးပဲ၊ လူ့လောကကိစ္စနဲ့ ဘာမှ မဆိုင်တော့ဘူး ဝိညာဉ်နတ်ဘုရားဂိုဏ်းအတွက် ဘာကိုမှ ဖုံးကွယ်ထားဖို့ စိတ်ကူးရှိမှာ မဟုတ်ဘူးလို့ ထင်တယ် အကုန်လုံး ထွက်ဆိုပြီးရင် ဝိညာဉ်လောကမှာ သာမန်ဘဝလေးနဲ့ အေးအေးဆေးဆေး နေသွားနိုင်ပါတယ်၊ ဒါလည်း ကောင်းမွန်တဲ့ အဆုံးသတ်တစ်ခုပါပဲ "

ဖန့်ချန်က ရယ်မော၍ ပြောသည်။

"ဟုတ်ပါတယ်၊ အခုတော့ ကျုပ် နဲ့ ဝိညာဉ်နတ်ဘုရားဂိုဏ်းနဲ့ ဘာမှ မပတ်သက်တော့ဘူး ဖုံးကွယ်ထားစရာလည်း ဘာမှ မရှိတော့ဘူး "

စုန့်ကျိလီ ခေါင်းညိတ်လိုက်သည်

"ဆိုရိုးစကားအတိုင်း အခြေအနေကို နားလည်သူက ဉာဏ်ကြီးရှင် ဆိုသလိုပဲ၊ ကျုပ်လည်း အခုတော့ သာမန် ဝိညာဉ်တစ်ပါး ဖြစ်နေပြီ၊ ဘာမှ လုပ်လို့မရတော့ဘူး အထက်လူကြီးတွေရဲ့ ကိစ္စတွေကို စဉ်းစားနေစရာ မလိုတော့ဘဲ ဒီနေရာမှာပဲ တည်ငြိမ်တဲ့ဘဝကို ဖြတ်သန်းချင်တော့တယ် "

"ကောင်းပြီ "

ရှကျီ ခေါင်းညိတ်လိုက်ပြီး အပြင်ဘက်ကို လှမ်းအော်လိုက်သည်

"ရှောင်ခဲ့ မင်း ဝင်လာခဲ့ စုန့်မိတ်ဆွေကို ဘေးခန်းခေါ်သွားပြီး စကားပြောပေးလိုက် ပြီးတော့ ငါတို့ရဲ့ နာမည်ကြီး ဝိညာဉ်လက်ဖက်ရည် တစ်ခွက်လောက် တိုက်လိုက်ဦး "

ကျန်းရှောင်ခဲ့ ဝင်လာပြီး ဖန့်ချန်နှင့် ရှကျီတို့ကို အရိုအသေပေးကာ စုန့်ကျိလီကို ပြုံးရွှင်စွာဖြင့် ဘေးခန်းသို့ ဖိတ်ခေါ်သွားသည်။

စုန့်ကျိလီသည် ဖန့်ချန်ကို တစ်ချက်ကြည့်လိုက်ပြီး ပြုံးရွှင်စွာဖြင့် ကျန်းရှောင်ခဲ့ နောက် လိုက်သွားသည်။

"သူ... သူ သိသမျှကို အကုန်လုံး အမှန်အတိုင်း ထုတ်ပြောလိမ့်မယ်လို့ မင်း သေချာလား "

ရှာကျိက ဖန့်ချန်ကို မေးလိုက်သည်။

"သေချာပေါက် မဟုတ်ဘူးပေါ့ ရှောင်ခဲ့ မေးပြီးသွားရင် တရားစီရင်ရေးဌာနကို တစ်ပတ် ပတ်ခိုင်းမယ် ပြီးရင် ယင်ချောင်စီဌာန ကို ပို့ပြီး ရှန်းထူချန်း ကိုယ်တိုင် စစ်ဆေးခိုင်းမယ် "

"အဲဒီနောက်မှာတော့ သူ့ကို ဖူတူလောက က ကျန်းကွမ်းမြို့ ကို ပို့ပြီး မယ်ျတာ်စီ ပို့ပေးမယ် ကျန်းကွမ်းက ဒီလိုကိစ္စမျိုးမှာ အလွန် ကျွမ်းကျင်တယ် "

ဖန့်ချန် ရယ်မော၍ ပြောသည်။

ရှကျီ ခဏမျှ တိတ်ဆိတ်သွားပြီးနောက် ခေါင်းညိတ်လိုက်သည်

"သူ ခံနိုင်ရည်ရှိပါစေလို့ပဲ ဆုတောင်းရမှာပေါ့ အဲဒီလို အကြိမ်ကြိမ် ဖြတ်သန်းပြီးရင်တော့ တခြား ယင်မိစ္ဆာတွေလိုပဲ အရူးတစ်ယောက် ဖြစ်သွားမှာပဲ "

"စုန့်ကျိလီ သေသွားပြီးရင် မဟာမြေမသေမျိုးနဲ့ နတ်မင်းနန်းတော်တို့ကြားမှာ တိုက်ပွဲတစ်ခု ဖြစ်လာလိမ့်မယ် ကျီထျန်းကျွင်း သိသွားရင်တော့ ကြားဝင်ဖျန်ဖြေပေးပြီး လုပ်ငန်းစဉ်ကို မြန်ဆန်စေဖို့ ကြိုးစားလိမ့်မယ် "

"မင်းရဲ့ လူတွေကို စောင့်ကြည့်ခိုင်းထား ကျီထျန်းကျွင်း အခုထိ မပေါ်လာဘဲ သူ့ရဲ့ ဇနီး နဲ့ သူ့ညီလေးကိုပဲ စေလွှတ်လာရင်တော့ သူတို့ကို တိုက်ရိုက် တိုက်ခိုက်လိုက် "

ဖန့်ချန်က ပြောသည်။

ရှကျီ ၏ မျက်ဝန်းများ အရောင်လက်သွားပြီး

"အဲဒီအခါ ယွီထင်ကျဲကို တိုက်ခိုက်ခိုင်းပြီး အပြစ်တွေကို နတ်မင်းနန်းတော်ဆီ ပုံချလိုက်ရမလား "

"ဖြစ်ကောင်း ဖြစ်နိုင်တယ်၊ ဒါပေမဲ့ ဒီအတိုင်းဆိုရင် ဘာသဲလွန်စမှ မထားခဲ့ရင်တောင် သူတို့ သံသယ ဝင်လာလိမ့်မယ်၊ သူတို့ ယုံမှာ မဟုတ်ဘူး "

"သူတို့သာ မယုံရင်တော့ မဟာမြေမသေမျိုးနဲ့ နတ်မင်းနန်းတော်တို့ရဲ့ တုံ့ပြန်မှုက ပိုပြင်းထန်လာလိမ့်မယ်၊ အဲဒီအခါ ငါတို့က အဆင့် ၅ မသေမျိုးနှစ်ပါးနဲ့ ရင်ဆိုင်ရလိမ့်မယ် "

"အဲဒီအချိန်ကျရင်တော့ တခြား အကြောင်းပြချက်နဲ့ပဲ တိုက်ခိုက်လိုက်ပါ၊ နတ်မင်းနန်းတော်ဆီ အထူးတလည် ပုံချနေစရာ မလိုဘူး "

ရှကျီ ခေါင်းညိတ်လိုက်ပြီးနောက်

"ဟွမ်ချင်းကျွဲ ရဲ့ အခြေအနေကို စုံစမ်းပြီးသွားပြီ သူက သုဿန်ပင်လယ် ကို သွားတာက ရှဲ့ကျစ် ကကျင့်ကြံသူတစ်ဦးရဲ့ အကြီးအကဲတစ်ယောက်ကို သွားတွေ့တာ၊ ဒါပေမဲ့ လမ်းမှာ တုံးသတ်မသေမျိုး ရဲ့ တိုက်ခိုက်ခြင်းကို ခံလိုက်ရတယ် တုံးသတ်မသေမျိုးက တစ်ယောက်ယောက်ရဲ့ ငှားရမ်းခြင်းကို ခံထားရတာ ဖြစ်မယ် "

"သူ့ကိုယ်ပေါ်မှာ အကြောင်းရင်းတွေ အများကြီး ကပ်ငြိနေပြီးသားမို့ ဘာမဆို လုပ်ဖို့ ဝန်မလေးတော့ဘူး လူ့လောက ကိုးခုမှာ အကျိုးအမြတ်အတွက် လူသတ်ဖို့ ဝန်မလေးတဲ့ လူတွေထဲက တစ်ယောက် ဖြစ်သွားပြီ "

"သူတို့ရဲ့ အခြေအနေက မကောင်းဘူး၊ သူနဲ့ အတူရှိနေတဲ့ တန့်ဌာနမှူးလည်း အပြင်းအထန် ဒဏ်ရာရသွားတယ် သူတို့သာ သုဿန်ပင်လယ်မှာ သေသွားရင်တော့ တစ်ခုတည်းသော သဲလွန်စက တုံးသတ်မသေမျိုးပဲ "

ခဏရပ်ပြီးနောက်

"ငါတို့ စာရင်းပေးပို့လိုက်တဲ့အခါ ပြဿနာတချို့ ဖြေရှင်းသွားတယ် ဟွမ်ချင်းကျွဲ က သူ့မျိုးနွယ်စုက အကြီးအကဲတွေနဲ့ အဆက်အသွယ် ရသွားပြီး ဟွမ်တောက်ကျင်း ကို ခေါ်သွားတာကို ငါတို့ လူတွေ မြင်လိုက်ရတယ် ပြီးတော့ တုံးသတ်မသေမျိုးတို့လည်း သုဿန်ပင်လယ်ကနေ ထွက်ခွာသွားကြတယ် "

"ဒါဆိုရင် ချင်းကျွဲ မိတ်ဆွေ အခု ဘေးကင်းသွားပြီပေါ့ "

"ယာယီပေါ့၊ အရင်းအမြစ်ကို မဖြေရှင်းနိုင်သရွေ့ သူက ဒီ ရှဲ့ကျစ် ကကျင့်ကြံသူတွေကို ဆက်ပြီး ဦးဆောင်နေရင်တော့ အလားတူ ပြဿနာမျိုး နောက်ထပ် ကြုံရဦးမှာပဲ "

(အရင်က မဟာမြေမသေမျိုးကို တာ့ဟွမ်မသေမျိုးလို့ ဘာသာပြန်ခဲ့တယ် နောက်အခန်းတွေမှာ မဟာမြေ မသေမျိုးပဲ ဆက်လက်သုံးသွားမယ်နော် )

ရှကျီက ပြောသည်။

"ဒါက ရေတိုစီမံကိန်း မဟုတ်ဘူး ချင်းကျွဲ မိတ်ဆွေ နောက်ပိုင်း ဘယ်လို ဆက်လုပ်မလဲဆိုတာပဲ ကြည့်ရမှာပေါ့ "

ဖန့်ချန် ရယ်မောလိုက်ပြီး

"ရှီဇီအန်း ဘက်မှာရော လှုပ်ရှားဖို့ အခွင့်အရေး ရှိမလား "

ရှကျီ၏ မျက်နှာပေါ်တွင် အပြုံးတစ်ခု ထွက်ပေါ်လာသည်

"မင်းကို ပြောဖို့ ပြင်နေတာပဲ ရှီဇီအန်းက နောက်ထပ် အချိန်အနည်းငယ်ကြာရင် ရှီမျိုးနွယ်စုရဲ့ ဘိုးဘေးပူဇော်ပွဲကို ဦးဆောင်ဖို့ သွားရမှာ အဲဒီနေရာက ရှီမျိုးနွယ်စုရဲ့ ဇာတိမြေ၊ ဝိညာဉ်စွမ်းအင်တွေ ခန်းခြောက်နေတဲ့ ကြယ်တစ်လုံးမှာ "

"ဒီလို နေရာမျိုးကို သာမန် ကျင့်ကြံသူတွေ မသွားချင်ကြဘူး၊ ဝိညာဉ်စွမ်းအင် ခန်းခြောက်နေလို့ ကြာကြာနေရင် ကိုယ့်ရဲ့ စွမ်းအင်တွေပါ ယိုစီးသွားနိုင်တယ် ငါတို့လူတွေ ရတဲ့ သတင်းအရ ရှီဇီအန်းက နတ်မင်းနန်းတော်က လူတွေကို ခေါ်သွားမှာ မဟုတ်ဘူး ရှီမျိုးနွယ်စုတွေပဲ တက်ရောက်မှာ "

"ဒါဆိုရင် ကောင်းတဲ့ အခွင့်အရေးပဲ စုန့်ကျိလီက ယွီထင်ကျဲလက်ချက်နဲ့ သေသွားတယ်၊ ပြီးတော့ ရှီဇီအန်းက မဟာမြေမသေမျိုးလက်ချက်နဲ့ သေသွားတယ်၊ ဒါဆိုရင် ကျိုးကြောင်းဆီလျော်တယ် မဟုတ်လား "

"ကျိုးကြောင်းဆီလျော်ပါတယ် "

ရှကျီ ပြုံး၍ ခေါင်းညိတ်လိုက်သည်

"မင်းက နတ်မင်းနန်းတော်က လူတွေကို ရှီဇီအန်းက မဟာမြေမသေမျိုးလက်ချက်နဲ့ သေတာပါလို့ ဘယ်လို ယုံအောင် လုပ်မှာလဲ "

"မဟာမြေမသေမျိုးက သွေးအသား မသေမျိုး၊ နဂါးအိုကြီးကလည်း သွေးအသား မသေမျိုးပဲလေ "

ဖန့်ချန်က ပြောသည်။

"အောင်မြင်သွားပြီ အခြေခံအားဖြင့် ပြဿနာ မရှိနိုင်ဘူး သူတို့ နောက်မှ သိသွားရင်တောင် နောက်ကျသွားပြီ "

ရှကျီ ခဏမျှ စဉ်းစားပြီးနောက် မျက်လုံးထဲတွင် အပြုံးတစ်ခု ဖြစ်ပေါ်လာသည်။

"ဟုတ်ပြီ၊ မင်း ကျွယ်မင်နတ်ဘုရားနန်းတော် အကြောင်း ကြားဖူးလား "

ဖန့်ချန် မေးလိုက်သည်။

ရှကျီ ခေါင်းခါလိုက်သည်

"မကြားဖူးဘူး "

"ဒါက အထက်သုံးနယ်မြေက အင်အားစုပဲ အထက်သုံးနယ်မြေကို ဝင်ဖို့ ဖိတ်စာ ဒါမှမဟုတ် မသေမျိုးကျောက်တုံး ကြီးမားတဲ့ ပမာဏ လိုတယ်တဲ့ မသေမျိုး ကျောက်တုံးက ငါတို့ အခု မပေးနိုင်သေးဘူး ဖိတ်စာကိုပဲ ပစ်မှတ်ထားရမှာ မင်း လူတွေကို သေချာ ဂရုစိုက်ခိုင်းထားပေးပါ "

"အထက်သုံးနယ်မြေက ဖိတ်စာလား ကောင်းပြီ၊ ငါ အကုန်လုံးကို အာရုံစိုက်ခိုင်းထားမယ် လျှို့ဝှက်စောင့်ရှောက်ရေးဌာနမှာ လူအင်အား နည်းနေသေးတယ် နောက်ထပ် နှစ်ထောင်ချီ လောက် အချိန်ပေးရင်တော့ ဒီလိုကိစ္စမျိုးက အလွယ်လေး ဖြစ်သွားလိမ့်မယ် "

တစ်နာရီကြာပြီးနောက်။

ကျန်းရှောင်ခဲ့ သည် စုန့်ကျိလီကို ခေါ်၍ အခန်းထဲ ပြန်ရောက်လာသည်။

သူတို့နှစ်ယောက်လုံး၏ မျက်နှာပေါ်တွင် ကျေနပ်သည့် အပြုံးများ ရှိနေသည်။

စုန့်ကျိလီသည် သူ ဒီတစ်ခါ လူမဆန်သည့် ဆက်ဆံခြင်းမျိုး ခံရမည်ဟု ထင်ထားခဲ့သည်။

တစ်ဖက်လူက အလွန် ယဉ်ကျေးလိမ့်မည်ဟု မထင်ခဲ့သဖြင့် သူ၏ စိတ်ထဲတွင် သက်သာရာ ရသွားသည်။

ကျန်းရှောင်ခဲ့ သည် မေးမြန်းထားသမျှကို မှတ်တမ်းတင်ကာ ဖန့်ချန်နှင့် ရှာကျိကို ပေးလိုက်သည်။

သူတို့နှစ်ယောက် လေ့လာကြည့်ရှုပြီးနောက် ကျန်းရှောင်ခဲ့ ကို ပြုံး၍ ပြောလိုက်သည်

"ကျန်းဌာနမှူးဆီ သွားအကြောင်းကြားလိုက်၊ စုန့်မိတ်ဆွေကို ခေါ်ပြီး တွေ့ဆုံဖို့ လုပ်ခိုင်းလိုက် "

"ဟုတ်ကဲ့ "

ကျန်းရှောင်ခဲ့ ခေါင်းညိတ်ပြီး ထွက်သွားသည်။

"ကျန်းဌာနမှူး "

စုန့်ကျိလီ ငေးသွားပြီး

"မိတ်ဆွေတို့၊ ဒီ ကျန်းဌာနမှူး ဆိုတာက..."

မိနစ် ၃၀ ကြာပြီးနောက်။

တရားစီရင်ရေးဌာန၏ ထောင်တွင်းအနက်ရှိုင်းဆုံးနေရာမှ စုန့်ကျိလီ၏ အလွန် ကြောက်မက်ဖွယ်ကောင်းသော အော်ဟစ်ဆဲဆိုသံများ ထွက်ပေါ်လာသည်။

"ဖန့်ဆိုတဲ့ကောင် မင်းမေ ဘိုးလိုက်...."