အခန်း (၂၃၁-၂၃၂)

အခန်း (၂၃၁) - လောကကြီးအတွင်း မဟာရှေးဟောင်းကျမ်း ပြန်လည်ပေါ်ထွက်လာခြင်း၊ လေပြင်းခန်းမ နိုးထလာပြီ

လူအများ၏ စူးစိုက်ကြည့်နေသော အကြည့်များအောက်ဝယ် မဟာရှေးဟောင်းတောရိုင်းကျောက်တိုင်အတွင်းမှ ဝူယွမ်၏ ပုံရိပ်သည် တဖြည်းဖြည်း ချဉ်းကပ်ထွက်ပေါ်လာခဲ့သည်။

“သူ ထွက်လာပြီ၊ သူ ထွက်လာပြီဟေ့”

ဝူယွမ်ကို မြင်လိုက်ရသည့် ခဏ လူတိုင်း ရင်ထဲမှ အလုံးကြီး ကျသွားသကဲ့သို့ သက်ပြင်းချနိုင်ကြတော့သည်။

“နင်ကတော့ အားလုံးကို ထိတ်လန့်တုန်လှုပ်အောင် လုပ်တာပဲ၊ ဘာမှမဖြစ်ဘူးမလား” ယင်းဟွမ်ဟွမ်က အပေါ်မှနေ၍ သူမ၏ ရင်ဘတ်လေးကို ဖိကာ အော်ဟစ်မေးမြန်းလိုက်သည်။

“အဟမ်း... ကျွန်တော် အဆင်ပြေပါတယ်၊ အားလုံးကို စိတ်ပူအောင် လုပ်မိသွားပြီ... အရာအားလုံး အဆင်ပြေသွားပါပြီ၊ ကျွန်တော် မဟာရှေးဟောင်းကျမ်းကို နားလည်သဘောပေါက်သွားပါပြီ”

ဝူယွမ်သည် မိမိကို ဝိုင်းရံထားသော ထောင်သောင်းချီသည့် လူအုပ်ကြီးကို ကြည့်ကာ ခေတ္တ မှင်တက်သွားမိသည်။ သိုင်းပညာတစ်ခုကို နားလည်သဘောပေါက်ရုံမျှဖြင့် ဤမျှအထိ ဟိုးလေးတကျော် ဖြစ်သွားလိမ့်မည်ဟု သူ မထင်မှတ်ထားခဲ့ပေ။

“သူ တကယ်ပဲ နားလည်သွားတာလား”

“နားလည်သွားတာ ကောင်းတာပေါ့”

“ငါ့သက်တမ်းတစ်လျှောက်မှာ မဟာရှေးဟောင်းကျမ်း ကမ္ဘာပေါ် ပြန်လည်ပေါ်ထက်လာတာကို မြင်တွေ့ရလိမ့်မယ်လို့ တစ်ခါမှ မတွေးထားဖူးခဲ့ဘူး”

ဝူယွမ်၏ အတည်ပြုချက်ကို ကြားလိုက်ရပြီးနောက် လူတိုင်းသည် အထူးတလည် စိတ်လှုပ်ရှားသွားကြပြီး အထူးသဖြင့် တောင်ဂိုဏ်း၏ အဆင့်မြင့်အဖွဲ့ဝင်များမှာ ပို၍ပင် အပြင်းအထန် ခံစားနေကြရသည်။

မဟာရှေးဟောင်းကျမ်း၏ အစွမ်းထက်ပုံကို သူတို့ ကောင်းကောင်းသိရှိကြသည်မဟုတ်ပါလား။ ဤကျမ်းကို နားလည်သဘောပေါက်သူ ပေါ်ထွက်လာခြင်းသည် တောင်ဂိုဏ်းအတွက် မယုံကြည်နိုင်လောက်အောင် အစွမ်းထက်သည့် ပါရမီရှင်တစ်ဦး ပိုင်ဆိုင်လိုက်ရခြင်းပင် ဖြစ်သည်။

“ဟို... ဂိုဏ်းချုပ်ကြီးနဲ့ အကြအကဲတို့ခင်ဗျာ၊ နောက်ထပ် ပြောစရာတစ်ခု ရှိပါသေးတယ်... ကျွန်တော် မဟာရှေးဟောင်းကျမ်းကို နားလည်သွားတာတင်မကဘဲ ဒီမဟာရှေးဟောင်းတောရိုင်းကျောက်တိုင်ကိုပါ ယူသွားရမလို ဖြစ်နေတယ်...” ဝူယွမ်က စကားပြောရန် ခက်ခဲနေသော်လည်း ပြောရမည်ဖြစ်၍ အနည်းငယ် ထစ်ငေါ့ကာ ဆိုလိုက်သည်။

ကျောက်တိုင်ကြီးကို ယူဆောင်သွားရန်မှာ တောင်ဂိုဏ်း၏ သဘောတူညီချက်ကို ရရှိရန် လိုအပ်ပေသည်။

“မင်း ဘာပြောလိုက်တာလဲ” ဝူတောင်က မိမိနားကို မိမိ မယုံကြည်နိုင်ဖြစ်ကာ ပြန်မေးလိုက်သည်။

ဝူယွမ်က “ကျွန်တော် မဟာရှေးဟောင်းတောရိုင်းကျောက်တိုင်ကို ယူသွားချင်တာပါ၊ အတိအကျ ပြောရရင် ကျောက်တိုင်ကြီးကိုယ်တိုင်က ကျွန်တော်နဲ့အတူ လိုက်ခဲ့ချင်နေတာပါ”

“မဖြစ်နိုင်တာ၊ ဒီကျောက်တိုင်ကြီးက ဒီနေရာမှာ တည်ရှိနေတာ နှစ်ပေါင်းမရေတွက်နိုင်တော့ဘူး... ငါတို့ အကြီးအကဲတွေအားလုံး ဝိုင်းကြိုးစားရင်တောင် လက်မတစ်ဝက်စာတောင် ရွှေ့လို့မရတာ၊ သူက ဘယ်လိုလုပ် မင်းနောက် လိုက်မှာလဲ” အကြီးအကဲတစ်ဦးက အံ့အားသင့်စွာ ဟစ်အော်လိုက်သည်။

ဝူယွမ်၏ စကားသည် တကယ့်ကို တုန်လှုပ်ဖွယ်ရာပင်။ မဟာရှေးဟောင်းတောရိုင်းကျောက်တိုင်၏ တည်ရှိမှုသည် တောင်ဂိုဏ်းတည်ထောင်ခြင်း၏ အခြေခံအုတ်မြစ်ပင် ဖြစ်သည်။ ဤနေရာ၌ ဂိုဏ်းတည်ထောင်ခဲ့ခြင်းမှာလည်း ဤကျောက်တိုင်ကြီးကို ရှာဖွေတွေ့ရှိခဲ့သောကြောင့် ဖြစ်သည်။

ဝူယွမ်၏ အရည်အချင်းနှင့် ဂုဏ်သိက္ခာက အကြီးအကဲများပင် မရွှေ့နိုင်သည့် ကျောက်တိုင်ကြီးကို မည်သို့ယူဆောင်နိုင်မည်နည်းဟု လူတိုင်းက သံသယဝင်နေကြသည်။

ဝုန်း... ရုတ်တရက်ဆိုသလို မဟာရှေးဟောင်းတောရိုင်းကျောက်တိုင်ကြီးက စတင်တုန်ခါလာပြီး တောင်ထိပ်တစ်ခုလုံး အပြင်းအထန် လှုပ်ခါသွားသည်။ စိမ်းဖန့်ဖန့်အလင်းရောင်များ ကျောက်တိုင်ကိုယ်ထည်မှ ထွက်ပေါ်လာပြီး မြေပြင်ပေါ်မှ တဖြည်းဖြည်းချင်း မြင့်တက်လာခဲ့သည်။

ကျောက်တိုင်ကိုယ်ထည်ပေါ်ရှိ မြေသားဟောင်းများ ကွာကျသွားပြီးနောက် ခဏအတွင်းမှာပင် ကျောက်တိုင်ကြီးက သေးငယ်သွားကာ အလွန်ချောမွေ့ပြီး သက်ဝင်လှုပ်ရှားလာသည်။ ယခင်ကကဲ့သို့ ခြောက်သွေ့အက်ကွဲနေသော ကန္တာရဆန်သည့် ပုံစံမျိုး မဟုတ်တော့ပေ။

ထိုနောက်တွင် အလင်းတစ်ချက် လက်သွားကာ ကျောက်တိုင်ကြီးသည် သေးငယ်သော ကျောက်တိုင်ငယ်လေးအဖြစ် ပြောင်းလဲသွားပြီး ဝူယွမ်၏ ရှေ့မှောက်တွင် ဝဲပျံနေတော့သည်။

ထိုအခြင်းအရာက “ငါကိုယ်တိုင် သူ့နောက်ကို လိုက်သွားဖို့ ဆန္ဒရှိတယ်” ဟူသော အဓိပ္ပာယ်ကို ဖော်ဆောင်နေသည်။

“ဂိုဏ်းချုပ်ကြီး...” လူတိုင်းက ဆုံးဖြတ်ချက်ပေးရန် ယင်းရွှမ်းဇီကို ကြည့်လိုက်ကြသည်။

“အရှင်... အရှင်က တကယ်ပဲ ဝူယွမ်နောက်ကို လိုက်သွားဖို့ ဆန္ဒရှိတာလားခင်ဗျာ” ယင်းရွှမ်းဇီက အလွန်တည်ကြည်လေးနက်သော မျက်နှာထားဖြင့် ကျောက်တိုင်ကြီးကို တရိုတ‌သေ ဦးညွှတ်ဂါရဝပြုကာ မေးမြန်းလိုက်သည်။

ဝူယွမ်ရှေ့ရှိ ကျောက်တိုင်ငယ်လေးပေါ်တွင် အသက်ကြီးကြီး ပုံရိပ်တစ်ခု ရုတ်တရက် ပေါ်ထွက်လာပြီး ယင်းရွှမ်းဇီကို ကြည့်ကာ -

“ဟုတ်တယ်၊ အခုကစပြီး ငါက ဝူယွမ်ရဲ့ ကျောက်တိုင်ပဲ... မင်းတို့က ငါ့ကို နှစ်ပေါင်းများစွာ စောင့်ရှောက်ခဲ့ကြတာဆိုတော့ ဒါဟာ ကံကြမ္မာတစ်ခုပဲလို့ ဆိုရမယ်၊ မင်းတို့ ဘာကို လိုချင်နေကြလဲဆိုတာ ငါသိပါတယ်... မဟာရှေးဟောင်းကျမ်းက ငါဖန်တီးထားတဲ့ သိုင်းပညာဖြစ်သလို ငါကိုယ်တိုင်လည်း ဒါကို ပြန့်ပွားစေချင်တယ်၊ ဒါကြောင့် ဒီကျမ်းကို မင်းတို့ကို ပေးသနားခဲ့မယ်”

“ဒါပေမဲ့ ဒီသိုင်းပညာက အရမ်းအစွမ်းထက်လွန်းတယ်၊ လူတိုင်း ကျင့်ကြံလို့မရဘူး... ပါရမီမရှိဘဲ ကျင့်ကြံမယ်ဆိုရင် ဒါဟာ ကောင်းကျိုးထက် ဘေးဒုက္ခကိုပဲ ပေးလိမ့်မယ်”

“ငါ ဒီနေရာမှာ အရင်လိုပဲ ကျောက်တိုင်တစ်ခု ချန်ထားခဲ့မယ်၊ စမ်းသပ်မှုကို အောင်မြင်သူတွေပဲ ဒီကျမ်းကို ရနိုင်လိမ့်မယ်... ဒါပေမဲ့ ဒီတစ်ခါ စမ်းသပ်မှုက အရင်ကလို ခက်ခဲမှာမဟုတ်တော့ဘဲ နားလည်သဘောပေါက်နိုင်တဲ့ လူအရေအတွက်လည်း ပိုများလာလိမ့်မယ်”

မဟာရှေးဟောင်းတောရိုင်းကျောက်တိုင်ကြီး စကားပြောပြီးသည်နှင့် မြေဆီလွှာရောင် အလင်းတန်းများ ကျဆင်းလာကာ ကျောက်တိုင်ကြီး ထွက်ပေါ်လာသော နေရာ၌ ကျောက်တိုင်အသစ်တစ်ခု ပြန်လည်ပေါ်ပေါက်လာခဲ့သည်။ ၎င်းပေါ်တွင်လည်း “မဟာရှေးဟောင်းကျမ်း” ဟူသော စာလုံးကြီး လေးလုံးကို ထင်ရှားစွာ မြင်တွေ့နေရသည်။

တောင်ဂိုဏ်း၏ အဆင့်မြင့်အဖွဲ့ဝင်များမှာ ထိုကျောက်တိုင်ကို ကြည့်ကာ မျက်လုံးများအတွင်း ပြင်းပြသော အလိုဆန္ဒများ ဖြစ်ပေါ်လာကြသည်။ ဤသည်မှာ သူတို့ အမှန်တကယ် လိုလားတောင့်တနေသော အရာပင်။

ယင်းရွှမ်းဇီသည်လည်း အနည်းငယ် စိတ်လှုပ်ရှားနေမိသည်။

“ကျေးဇူးတင်ပါတယ် အရှင်... အရှင် နေမှာလား၊ သွားမှာလားဆိုတာ အရှင်ရဲ့ ဆန္ဒအတိုင်းပါပဲ၊ ကျွန်တော်တို့ တောင်ဂိုဏ်းဟာ အရှင့်ကို အမှီပြုပြီး တည်ထောင်ခဲ့တာပါ... အရှင်ရှိလို့သာ တောင်ဂိုဏ်းရှိနေတာမို့ တောင်ဂိုဏ်းဟာ အရှင့်ရဲ့ အမွေအနှစ်၊ ကျွန်တော်တို့ဟာ အရှင့်ရဲ့ တပည့်တွေလို့တောင် ဆိုနိုင်ပါတယ်”

“ဒါတင်မကသေးဘူး၊ အရှင် လိုက်သွားမယ့် ဝူယွမ်ဟာလည်း ကျွန်တော်တို့ တောင်ဂိုဏ်းရဲ့ တပည့်ပဲလေ... အဆုံးမှာတော့ ကျွန်တော်တို့အားလုံးဟာ မိသားစုတစ်ခုတည်းမို့ ဘယ်နေရာမှာပဲ ရှိရှိ အတူတူပါပဲ”

ယင်းရွှမ်းဇီသည် အလွန်လိမ္မာပါးနပ်စွာ ပြောဆိုတတ်ပေသည်။ ကျောက်တိုင်ကြီး၏ နောက်ခံသမိုင်းကြောင်းမှာ အလွန်နက်ရှိုင်းလှပြီး သူတို့ ထိန်းချုပ်နိုင်သော အရာမဟုတ်ပေ။

အကယ်၍ ကျောက်တိုင်ကြီးက ထွက်သွားချင်သည်ဆိုပါက မည်သူမျှ တားဆီးနိုင်မည်မဟုတ်ကြောင်း သူ၏ ကျင့်ကြံမှုအဆင့်အရ ကောင်းကောင်း သိမြင်ထားသည်။

“ဟဲဟဲ... တယ်တော်တဲ့ လူငယ်လေးပဲ၊ မင်းလည်း ငါ့ရဲ့ သိုင်းပညာကို ကျင့်ကြံကြည့်သင့်တယ်... ဒါက မင်းအတွက် အများကြီး အထောက်အကူ ဖြစ်စေလိမ့်မယ်” ယင်းရွှမ်းဇီ၏ စကားကို ကျောက်တိုင်ကြီးက အလွန်သဘောကျသွားပုံရသည်။ အထူးသဖြင့် “တောင်ဂိုဏ်းဟာ အရှင့်ရဲ့ အမွေအနှစ်” ဆိုသော စကားကြောင့်ပင်။

ကျောက်တိုင်ကြီးမှ အလင်းများ ထွက်ပေါ်လာပြီး စာလုံးကြီးလေးလုံးက ယင်းရွှမ်းဇီ၏ ရှေ့မှောက်သို့ ပျံသန်းရောက်ရှိလာသည်။

“မဟာရှေးဟောင်းကျမ်း”

ယင်းရွှမ်းဇီသည် မိမိရှေ့ရှိ ရှေးဟောင်းအလင်းစာလုံးများကို ကြည့်ကာ ငေးမောနေမိသည်။

ငယ်စဉ်က တစ်ကြိမ်တစ်ခါမျှ မအောင်မြင်ခဲ့သော အိပ်မက်တစ်ခု၊ သူ၏ ပါရမီကြောင့် မဟုတ်ဘဲ ဘိုးဘေးအဆောင်မရှိခဲ့သောကြောင့်သာ ကျရှုံးခဲ့ရသော ဖြစ်ရပ်တစ်ခု၊

သို့သော် ယခုအခါတွင်မူ အရာအားလုံး ပြောင်းလဲသွားခဲ့ချေပြီ။

“ကျေးဇူးတင်ပါတယ် အရှင်” ယင်းရွှမ်းဇီက အလွန်ဝမ်းသာသွားကာ ထိုစာလုံးများကို သူ၏ စိတ်အာရုံအတွင်းသို့ စီးဝင်စေလိုက်သည်။

သူသည် ယခုအခါ ပြန်လည်၀င်စားခြင်းအဆင့် သို့ ရောက်နေပြီဖြစ်သော်လည်း ဤကဲ့သို့ အစွမ်းထက်သော မဟာရှေးဟောင်းကျမ်းကို ရရှိခြင်းသည် သူ၏ ကျင့်ကြံမှုကို နောက်ထပ် အဆင့်တစ်ခုသို့ တိုးတက်စေရန် များစွာ အထောက်အကူပြုမည်မှာ သေချာပေသည်။

“ဂုဏ်ယူပါတယ် ဂိုဏ်းချုပ်ကြီး” ဘေးပတ်ဝန်းကျင်မှ အကြီးအကဲများသည် အားကျစိတ်များဖြင့် ကြည့်နေကြသော်လည်း ဂိုဏ်းချုပ်ကြီး ပိုမိုအစွမ်းထက်လာခြင်းမှာ တောင်ဂိုဏ်းအတွက် ကောင်းကျိုးဖြစ်၍ အားလုံး ဝမ်းသာနေကြသည်။

“ဂိုဏ်းချုပ်... မဟာရှေးဟောင်းကျမ်းရဲ့ ကျောက်တိုင်က အခုကစပြီး ဒီမှာပဲ ရှိနေမှာပါ၊ တပည့်တွေကို အခုပဲ စမ်းသပ်ကြည့်ခိုင်းလို့ ရပါတယ်၊ အများကြီး နားလည်သဘောပေါက်သွားကြလိမ့်မယ်လို့ ကျွန်တော် ယုံကြည်တယ်” ဝူယွမ်က ပြုံးရွှင်စွာ ပြောလိုက်သည်။

ထို့နောက်တွင် စမ်းသပ်မှုများ စတင်ခဲ့သည်။ လေပြင်းခန်းမမှ ဂူမို၊ ချန်ကျန်းနှင့် ဝူတောင်တို့ ဦးဆောင်ကာ လင်းတုန်အပါအဝင် တပည့်ရင်းများက စတင်ကျင့်ကြံလိုက်ကြသည်။

မဟာရှေးဟောင်းတောရိုင်းကျောက်တိုင်၏ စိတ်ဝိညာဉ်ဖြစ်သော “အရှင်ကြီး” ကိုယ်တိုင်က ကူညီဖေးမပေးသောကြောင့် ယခင်ကထက် ပိုလွယ်ကူလာခဲ့သည်။

ရက်အနည်းငယ် ကြာပြီးနောက် - အကြီးအကဲ ဂူမိုက ပထမဆုံး နိုးထလာကာ မဟာရှေးဟောင်းကျမ်းကို အောင်အောင်မြင်မြင် နားလည်သွားခဲ့သည်။ ထို့နောက်တွင် လင်းတုန်၊ ချန်ကျန်းနှင့် ဝူတောင်တို့လည်း တစ်ဦးပြီးတစ်ဦး အောင်မြင်ခဲ့ကြသည်။

ပထမဆုံးဝင်ရောက်သူ ဆယ်ဦးအနက် ခြောက်ဦးအထိ အောင်မြင်ခဲ့ခြင်းမှာ တောင်ဂိုဏ်း၏ သမိုင်းတစ်လျှောက် မကြုံစဖူးသော အောင်မြင်မှုပင် ဖြစ်သည်။ ဤရလဒ်ကြောင့် လေပြင်းခန်းမသည် အခြားခန်းမကြီး သုံးခုထက်ပင် ကျော်လွန်ကာ ထိပ်ဆုံးသို့ ရောက်ရှိသွားတော့မည်မှာ မြေကြီးလက်ခတ်မလွဲပေ။

“ကျေးဇူးတင်ပါတယ် အရှင်... ကျွန်တော်တို့ လေပြင်းခန်းမကို ကယ်တင်ပေးလို့ ကျေးဇူးတင်ပါတယ်” ဂူမိုနှင့် အခြားသူများမှာ အလွန်အမင်း စိတ်လှုပ်ရှားစွာဖြင့် ဒူးထောက်ကာ ကျောက်တိုင်ကြီးကို ဂါရဝပြုလိုက်ကြသည်။

ယနေ့မှစ၍ လေပြင်းခန်းမက လောကကြီးတွင် ပြန်လည်မြင့်မားလာပြီး အစွမ်းအထက်ဆုံး ခန်းမတစ်ခုအဖြစ် အသစ်တစ်ဖန် ပြန်လည်နိုးထလာခဲ့လေပြီ။

အခန်း (၂၃၂) - ဟုန်ယာတုန်၏ လာရောက်လည်ပတ်မှုနှင့် ယင်းဟွမ်ဟွမ် လာခေါ်ခြင်း(၁)

“တင်း... ဆိုင်းအင်ဝင်ရမည့်နေရာ အသစ်ပြန်လည် ပြောင်းလဲပြီးပါပီ၊ နောက်ထပ် ဆိုင်းအင်၀င်ရမည့်နေရာ- သားရဲတစ်သောင်းတောင်တန်း”

မဟာရှေးဟောင်းကျောက်တိုင် ပြန်လည်နိုးထလာမှုသည် တောင်ဂိုဏ်းတစ်ခုလုံးကို လှုပ်ခတ်သွားစေပြီး တပည့်များ၏ စိတ်ဓာတ်ကို သွေးကြွတက်ကြွလာစေသည်။ တစ်ဂိုဏ်းလုံးတွင် စိတ်ကြွဆေးတစ်လုံး ထိုးခံလိုက်ရသကဲ့သို့ အသက်ဝင်လှုပ်ရှားနေပြီး လေထုမှာလည်း အလွန်ပင် စည်ကားသိုက်မြိုက်နေတော့သည်။

အထူးသဖြင့် လေပြင်းခန်းမပင် ဖြစ်သည်၊

ယခင်က အမြဲတမ်း အနှိမ်ခံခဲ့ရသော်လည်း ယခုအခါတွင်မူ သူတို့၌ အင်အားကြီးမားသော နောက်ခံတစ်ခု ရှိနေပြီဖြစ်သည်။ အကြီးအကဲ ‘ကန္တာရ’ သည် လေပြင်းခန်းမ၌ တရားဝင် အခြေစိုက်နေထိုင်ပြီး မဟာရှေးဟောင်းကျမ်းကို ဟောပြောပို့ချရန် စီစဉ်နေသဖြင့် လေပြင်းခန်းမသည် ဂိုဏ်းအတွင်း ရေပန်းအစားဆုံး ခန်းမတစ်ခု ချက်ချင်း ဖြစ်လာခဲ့သည်။

လေပြင်းခန်းမမှ တပည့်များသည်လည်း ဤအခွင့်အရေးကို တွေ့ကာ ယခင်ကထက် ပိုမိုပြင်းထန်စွာ လေ့ကျင့်လာကြသည်။ မဟာရှေးဟောင်းကျမ်းက အချိန်တန်လျှင် အခြားခန်းမ သုံးခု၏ ထူးခြားသော ကျမ်းစာများကဲ့သို့ပင် လူအများ ပိုမိုနားလည်သဘောပေါက်နိုင်မည့် အရာတစ်ခု ဖြစ်လာတော့ပေမည်။

အဓိကတပည့်ဖြစ်လာသူတိုင်းအတွက် အခွင့်အလမ်းတစ်ခု ရှိနေလေပြီ။

နေသားကျစပြုလာသော နေ့စဉ်ဘဝများထဲတွင် လူတိုင်းသည် မိမိတို့၏ လေ့ကျင့်မှု၌ စိတ်ရောကိုယ်ပါ နှစ်မြှုပ်ထားကြသော်လည်း ယခုတစ်ကြိမ်တွင်မူ သူတို့၏ တက်ကြွမှုမှာ ယခင်ကထက် သိသိသာသာ ပိုမြင့်မားနေခဲ့သည်။

တောင်ဂိုဏ်း၏ အထွတ်အထိပ်တောင်ကုန်း၊ ယင်းရွှမ်းဇီ၏ နေအိမ်၌၊

ဝူယွမ်သည် အကြီးအကဲ ကန္တာရကို ခေါ်ဆောင်လာပြီး ယင်းရွှမ်းဇီနှင့် သီးသန့်တွေ့ဆုံဆွေးနွေးခဲ့သည်။ ယင်းရွှမ်းဇီသည် မဟာရှေးဟောင်းကျောက်တိုင်နှင့် ပတ်သက်၍ အချို့ကို နားလည်ထားပြီး ကမ္ဘာခြားနတ်ဆိုးများ၏ တည်ရှိမှုကိုလည်း သိထားသော်လည်း မဟာရှေးဟောင်းကျောက်တိုင်က မည်သည့်အရာကို နှိမ်နင်းထားသည်ကိုမူ အတိအကျ မသိပေ။ ထို့ကြောင့် သူက ဤအကြောင်းအရာအပေါ် အလွန်ပင် စိတ်ဝင်စားနေမိသည်။

မဟာရှေးဟောင်းကျောက်တိုင်သည် ဝူယွမ်က ကျောက်တိုင်အတွင်းရှိ ပုံးကွယ်နေသော ဘေးအန္တရာယ်များကို ဖြေရှင်းပေးခဲ့သဖြင့် လွတ်လပ်စွာ လှုပ်ရှားနိုင်ပြီဖြစ်ကြောင်းနှင့် လေပြင်းခန်းမ၌သာ အမြဲတမ်း တည်ရှိနေရန် မလိုအပ်တော့ကြောင်းကို ယင်းရွှမ်းဇီအား ပြောကြားခဲ့သည်။

ထို့ပြင် တောင်ဂိုဏ်းကို သူ၏ ကိုယ်ပိုင်အမွေအနှစ်ဂိုဏ်းအဖြစ် သတ်မှတ်ကာ အမြဲတမ်း ကာကွယ်စောင့်ရှောက်သွားမည်ဖြစ်ကြောင်း အာမခံချက်ပေးခဲ့သဖြင့် ယင်းရွှမ်းဇီမှာ စိတ်အေးသွားခဲ့ရသည်။ တစ်ချိန်တည်းမှာပင် ယင်းရွှမ်းဇီကလည်း မဟာရှေးဟောင်းကျောက်တိုင် လိုအပ်သမျှကို တောင်ဂိုဏ်းအနေဖြင့် အစွမ်းကုန် ပံ့ပိုးပေးမည်ဟု ကတိပြုခဲ့သည်။

“ဂိုဏ်းချုပ်... အကြီးအကဲ ကန္တာရဆီမှာ ဝိညာဉ်ဆေးပင်တွေကို စိုက်ပျိုးတဲ့ နည်းလမ်းတွေ ရှိတယ်၊ အဲဒီ မသေမျိုးအနှစ်သာရ ရှေးဟောင်းသစ်ပင်ကို သူ့ရဲ့ ကျောက်တိုင်ကမ္ဘာထဲကို ပြောင်းရွှေ့စိုက်ပျိုးလိုက်မယ်ဆိုရင် ရက်အနည်းငယ်အတွင်းမှာပဲ မသေမျိုးအနှစ်သာရ ဝိညာဉ်သစ်သီးတွေ ရလာမှာပါ၊ ဒါဆိုရင် ကျွန်တော်တို့ တောင်ဂိုဏ်းတပည့်တွေရဲ့ ခွန်အားကို အလျင်အမြန် မြှင့်တင်ပေးနိုင်ဖို့ လုံလောက်သွားပြီ၊”

ဝူယွမ်က ယင်းရွှမ်းဇီကို ပြောလိုက်သည်။ အကြီးအကဲ ကန္တာရ ရှိနေပြီဖြစ်သဖြင့် သူ၏ ဝှက်ဖဲများကို သွယ်ဝိုက်သောနည်းဖြင့် အသုံးပြုနိုင်ပြီဖြစ်သည်။ သူက တောင်ဂိုဏ်းကို မိမိ၏ ကိုယ်ပိုင်အင်အားစုတစ်ခုကဲ့သို့ သတ်မှတ်ထားသဖြင့် ဂိုဏ်း၏ ဖွံ့ဖြိုးတိုးတက်မှုကို အရှိန်မြှင့်တင်ရန် လိုအပ်နေခဲ့သည်။

ရှေးဟောင်းကျောက်တိုင် ကမ္ဘာအတွင်းရှိ မသေမျိုးအနှစ်သာရ ရှေးဟောင်းသစ်ပင်မှာ ဒုတိယမြောက် မသေမျိုးအနှစ်သာရ မျိုးစေ့ကို မထုတ်လုပ်နိုင်သေးပေ။ ထို့ကြောင့် ဝူယွမ်က တောင်ဂိုဏ်း၏ သစ်ပင်ကို အရင်စမ်းသပ်ရန် စီစဉ်ခဲ့ခြင်းဖြစ်ပြီး၊ ကမ္ဘာသစ်ပင်နှင့် ပေါင်းစပ်လိုက်ပါက မသေမျိုးအနှစ်သာရ ဝိညာဉ်သီးများ သီးပွင့်လာနိုင်မလားဆိုသည်ကို သိလိုနေသည်။

“အကြီးအကဲ ကန္တာရကသာ လိုလားတယ်ဆိုရင် ကျွန်တော်တို့ တောင်ဂိုဏ်းဘက်က ဘာမဆို လိုက်လျောဖို့ အသင့်ပါပဲ၊ ဒါဟာ လုံးဝ ပြဿနာမရှိပါဘူး၊” ယင်းရွှမ်းဇီက လွယ်လွယ်ကူကူပင် သဘောတူလိုက်သည်။ သူ့အမြင်တွင် မဟာရှေးဟောင်းကျောက်တိုင်နှင့် ရင်းနှီးကျွမ်းဝင်မှုရှိရန်မှာ အရာအားလုံးထက် အရေးကြီးနေလေသည်ာ

“ဒါဆိုရင် စလိုက်ကြရအောင်၊”

ဝူယွမ်က အားရ၀မ်းသာဖြစ်ကာ ပြောလိုက်ပြီး ကမ္ဘာသစ်ပင်မှ ထွက်ရှိလာမည့် မသေမျိုးအနှစ်သာရ ဝိညာဉ်သစ်သီးမှာ မည်သည့် ပုံစံ ဖြစ်လာမည်ကို သူစိတ်လှုပ်ရှားစွာ စောင့်မျှော်နေမိသည်။ ဝူယွမ်က မဟာရှေးဟောင်းကျောက်တိုင်ကို ဝိညာဉ်ချိတ်ပိတ်ခြင်း အစီအရင်အတွင်းသို့ ချက်ချင်း ထားလိုက်သည်။

“ဂိုဏ်းချုပ်... ဒီဝိညာဉ်ချိတ်ပိတ်ခြင်း အစီအရင်ကိုလည်း ခဏလောက် ငှားသုံးပါရစေဦး၊”

အစီအရင်အတွင်းရျိ ဆယ်မီတာခန့် မြင့်မားနေပြီဖြစ်သော မသေမျိုးအနှစ်သာရ ရှေးဟောင်းသစ်ပင်ဆီသို့ မဟာရှေးဟောင်းကျောက်တိုင်က အတင်းအဓမ္မ ဝင်ရောက်သွားပြီး သစ်ပင်ကို သူ၏ ကမ္ဘာအတွင်းသို့ လွှဲပြောင်းရယူလိုက်လေသည်။

မူလက ခြောက်သွေ့နေသော ရှေးဟောင်းကမ္ဘာသည် ယခုအခါ မြက်ခင်းပြင်အဖြစ် ပြောင်းလဲနေပြီဖြစ်ပြီး ကမ္ဘာသစ်ပင်၏ အကိုင်းအခက်များမှာ နေရာအနှံ့ ပျံ့နှံ့နေသည်။ ထိုမြက်ခင်းပြင်ပေါ်သို့ မသေမျိုးအနှစ်သာရ ရှေးဟောင်းသစ်ပင် ရုတ်တရက် ရောက်ရှိလာသောအခါ အသင့်စောင့်နေသော ကျောက်တိုင်ဝိညာဉ်လေး ‘ကန္တာရတိမ်’ က သူ၏ အကိုင်းအခက်များဖြင့် သစ်ပင်ကို ရစ်ပတ်ကာ ပေါင်းစပ်လိုက်တော့သည်။

ကမ္ဘာသစ်ပင်နှင့် မသေမျိုးအနှစ်သာရ ရှေးဟောင်းသစ်ပင် ပေါင်းစပ်သွားချိန်တွင် ကန္တာရတိမ်က ထိုသစ်ပင်၏ တည်ဆောက်ပုံကို ဆန်းစစ်လေ့လာနေခဲ့သည်။ ခဏအကြာတွင် အကိုင်းတစ်ခုပေါ်၌ လုံးဝန်းစိုပြည်သော အသီးတစ်လုံး ပေါ်ထွက်လာခဲ့သည်။

“သခင်... အောင်မြင်သွားပြီ၊ မသေမျိုးအနှစ်သာရ ဝိညာဉ်သစ်သီး သီးလာပါပြီ၊ ကျွန်တော် စွမ်းအင်တွေကို စုပ်ယူပြီး ဒီအသီးတွေကို အမြန်ဆုံး ဖြစ်တည်လာအောင် လုပ်ပေးနိုင်ပါတယ်၊” ကန္တာရတိမ်က ဝူယွမ်ထံသို့ ဝမ်းသာအားရဖြစ်နေသည့် အသံဖြင့် စိတ်ချင်းဆက်သွယ် ပြောကြားလာသည်။

“ကန္တာရ... ကန္တာရတိမ်... ဒါဆိုရင် စုပ်ယူလိုက်ကြတော့၊ ဒီအစီအရင်က တောင်ဂိုဏ်းရဲ့ ဝိညာဉ်ကြောကနေ စွမ်းအင်တွေကို စုစည်းပေးထားတာဆိုတော့ ပေါကြွယ်ဝတဲ့ စွမ်းအင်တွေ ရှိနေတယ်၊” ဝူယွမ်က ဝိညာဉ်နှစ်ခုလုံးကို စိတ်ချင်းဆက်သွယ်၍ ညွှန်ကြားလိုက်သည်။

ထို့နောက် သူက ယင်းရွှမ်းဇီကို ဝမ်းသာအားရ ပြန်ပြောပြလိုက်လေသည်၊ “ဂိုဏ်းချုပ်... အကြီးအကဲ ကန္တာရက မသေမျိုးအနှစ်သာရ ရှေးဟောင်းသစ်ပင်ကို အောင်အောင်မြင်မြင် စိုက်ပျိုးနိုင်ခဲ့ပါပြီ၊ စွမ်းအင်တွေကို စုပ်ယူပြီး ဝိညာဉ်သစ်သီးတွေ အမြန်သီးပွင့်လာအောင် လုပ်နေပါတယ်၊ အစီအရင်ထဲက စွမ်းအင်တွေကို သုံးခွင့်ပေးထားလို့ အခုပဲ အသီးတွေ စသီးနေပါပြီ၊”

ဝူယွမ် စကားပြောနေစဉ်မှာပင် အလင်းတန်းတစ်ခု လက်ခနဲ ဖြစ်သွားပြီး ကျောက်တိုင်အတွင်းမှ မသေမျိုးအနှစ်သာရ ဝိညာဉ်သစ်သီး တစ်ထောင်ကျော်ခန့်ကို တောင်ပုံရာပုံ ထုတ်ယူပြသလိုက်သည်။ ဤအသီးများသည် ကမ္ဘာသစ်ပင်က သူ၏ ကိုယ်ပိုင်စွမ်းအင်ကို သုံး၍ ဖန်တီးလိုက်ခြင်း ဖြစ်လေသည်။

“ဘာ... ဒီလောက်တောင် မြန်တယ်လား၊”

ယင်းရွှမ်းဇီမှာ အံ့အားသင့်လွန်းသဖြင့် ဆွံ့အသွားရပြီး ရှေ့မှ အသီးတစ်ထောင်ကျော်ကို ကြည့်ကာ အံ့ဩတုန်လှုပ်နေသော မျက်နှာပေးမျိုး ဖြစ်သွားသည်။

“နတ်ဘုရားလက်နက်ပဲ... ဒါက တကယ့်ကို နတ်ဘုရားလက်နက်ပဲ၊” သူ၏ ရင်ထဲတွင်လည်း တအံ့တဩ ရေရွတ်နေမိသည်။

မဟာရှေးဟောင်းကျောက်တိုင် အစွမ်းထက်မှန်း သူသိသော်လည်း ဤမျှအထိ စွမ်းဆောင်နိုင်လိမ့်မည်ဟု မမျှော်လင့်ထားခဲ့ပေ။

“ဂိုဏ်းချုပ်... သိပ်ပြီးတော့ ဝမ်းမသာလိုက်ပါနဲ့ဦး၊ ပေးဆပ်ရတဲ့ တန်ဖိုးလည်း ရှိတယ်၊ ဟိုမှာ ကြည့်လိုက်ပါဦး၊”

ဝူယွမ်က ဝိညာဉ်တံဆိပ်ခတ်နှိပ်ခြင်း အစီအရင်သို့ ညွှန်ပြလိုက်ရာ စွမ်းအင်များမှာ မဟာရှေးဟောင်းကျောက်တိုင်အတွင်းသို့ ရူးသွပ်ဖွယ်ရာ စီးဝင်နေသည်ကို တွေ့လိုက်ရသည်။

“ဆေးမြစ်က ပြန်ဖြည့်လို့ ရပါတယ်၊ ဒါပေမဲ့ မသေမျိုးအနှစ်သာရ ဝိညာဉ်သစ်သီးတွေ ရင့်မှည့်ဖို့ကတော့ အချိန်အများကြီး ပေးရတာလေ၊ အခု ပေးဆပ်လိုက်ရတဲ့ စွမ်းအင်ပမာဏလောက်ကတော့ ဘာမှ မဟုတ်ပါဘူး၊”

ယင်းရွှမ်းဇီမှာ စိတ်လှုပ်ရှားနေသည့်အရှိန် မပြေသေးသဖြင့် အစီအရင်မှ စွမ်းအင် အနည်းငယ် ဆုံးရှုံးသွားခြင်းကို ဂရုမစိုက်နိုင်တော့ပေ။ သူက အပြင်ဘက်ရှိ အကြီးအကဲကို ချက်ချင်း အမိန့်ပေးလိုက်‌တော့သည်၊ “အကြီးအကဲမု... ဂိုဏ်းရဲ့ဘဏ္ဍာတိုက်ကို ချက်ချင်းသွားပြီး နိဗ္ဗာန်သလင်းကျောက်တွေ အားလုံးကို ထုတ်ယူခဲ့၊ အစီအရင်ထဲက စွမ်းအင်တွေကို အမြန်ဆုံး ပြန်ဖြည့်တင်းလိုက်ပါ၊”

အမှန်တကယ်တွင် စွမ်းအင်များမှာ ပျောက်ကွယ်သွားခြင်း မဟုတ်ဘဲ အသွင်ပြောင်းသွားခြင်းသာ ဖြစ်သည်။ ကမ္ဘာသစ်ပင်၏ အသွင်ပြောင်းမှုကြောင့် စုပ်ယူရန် ခက်ခဲသော သဘာဝစွမ်းအင်များသည် မသေမျိုးအနှစ်သာရ ဝိညာဉ်သီးများအဖြစ် ပြောင်းလဲသွားပြီး၊ ထိုအသီးကို စားသုံးခြင်းဖြင့် ထိုစွမ်းအင်များကို အလွယ်တကူ ရရှိနိုင်တော့မည် ဖြစ်သည်။ ဤသည်မှာ အလွန်ပင် တွက်ခြေကိုက်သော ကိစ္စပင် မဟုတ်ပါလား။

“ဂိုဏ်းချုပ်... အခုဆိုရင် မသေမျိုးအနှစ်သာရ ဝိညာဉ်သစ်သီးတွေကို အမြောက်အမြား ထုတ်ပေးနိုင်ပြီ၊ ဂိုဏ်းတိုက်ပွဲမှာ ပါဝင်မယ့် တပည့်တွေကို အဓိကထားပြီး လေ့ကျင့်ပေးလို့ ရပါပြီ၊ အဲဒီအချိန်ကျရင် ယွမ်ဂိတ်ကတပည့်တွေကို ဒုက္ခပေးဖို့ လုံလောက်သွားမှာ အသေချာပဲ”

ဝူယွမ်က ကောက်ကျစ်သော အပြုံးမျိုးပြုံးရင်း ပြောလိုက်လေသည်။ ဝူယွမ်၏ စကားကို ကြားသောအခါ ယင်းရွှမ်းဇီသည်လည်း ပြုံးမိသွားတော့သည်။ တောင်ဂိုဏ်းသည် နောက်ဆုံးတွင် အမှန်တကယ် နိုးထလာတော့မည် ဖြစ်သည်။

ပြင်ပကမ္ဘာမှ စွမ်းအင်များ အဆက်မပြတ် ရရှိနေခြင်း၊ မကြာမီက ရရှိထားသော ကမ္ဘာခြားနတ်ဆိုးဘုရင်ကိုလည်း စွမ်းအင်အရင်းအမြစ်အဖြစ် အသုံးပြုနိုင်ခြင်းတို့ကြောင့် ကမ္ဘာသစ်ပင်က အရှိန်အဟုန်ဖြင့် ကြီးထွားလာပြီး ခဏချင်းအတွင်းမှာပင် ဝိညာဉ်သီး သောင်းနှင့်ချီ၍ ထုတ်လုပ်ပေးနိုင်လာသည်။ ရှေးဟောင်းကျောက်တိုင် ကမ္ဘာတစ်ခုလုံးထဲတွင် ကမ္ဘာသစ်ပင်၏ စိမ်းလန်းသော အကိုင်းအခက်များ၌ ဝင်းမှည့်မွှေးပျံ့သော အသီးများမှာ ဝေဆာနေတော့သည်။

ဤမျှ များပြားသော အသီးများကို ဝူယွမ် ကိုယ်တိုင် ခူးယူနေစရာ မလို၊ ကန္တာရတိမ်တိုက်က စိတ်ကူးလိုက်ရုံဖြင့် သိမ်းဆည်းပေးနိုင်သည်။ သို့သော် ဝူယွမ်သည် ဤမျှ များပြားသော သစ်သီးများအားလုံးကို တောင်ဂိုဏ်းအား ပေးမည်မဟုတ်ပေ၊ ထိုသို့ပေးလိုက်ပါက အလွန်ပင် ထူးဆန်းနေပေလိမ့်မည်။

ယွမ်ဂိတ်က နှစ်ပေါင်းများစွာ စိုက်ပျိုးခဲ့သော မသေမျိုးအနှစ်သာရ ရှေးဟောင်းသစ်ပင်ပင်လျှင် တစ်ကြိမ်သီးလျှင် အသီးအနည်းငယ်သာ ထွက်ရှိသော်လည်း၊ ကမ္ဘာသစ်ပင်ကမူ စိတ်ကူးလိုက်ရုံဖြင့် သောင်းနှင့်ချီ၍ ထုတ်ပေးနိုင်သည်။ စွမ်းအင်သာ လုံလောက်ပါက သိန်းနှင့်ချီ၍ပင် ထုတ်လုပ်နိုင်စွမ်း ရှိသည်။ ထို့ကြောင့် ဝူယွမ်က ဆယ်ရက်လျှင် တစ်ကြိမ် အသီးတစ်ထောင်စီသာ ယင်းရွှမ်းဇီအား ပေးအပ်ရန် ဆုံးဖြတ်လိုက်သည်။ ဤပမာဏသည်ပင် အမာခံတပည့်များ လေ့ကျင့်ရန် လုံလောက်တာထက်ပိုနေပီ ဖြစ်သည်။

မသေမျိုးအနှစ်သာရ ဝိညာဉ်သစ်သီး၏ အာနိသင်သည် နိဗ္ဗာန်အဆင့် ငါးအထက်ရှိသူများအတွက် အထိရောက်ဆုံး ဖြစ်သည်။ ထိုအဆင့်အောက်ရှိသူများအတွက်မူ အနည်းငယ် ဖြုန်းတီးရာ ရောက်နိုင်သဖြင့် သူတို့မှာ ဆေးမြစ်အတွင်း၌သာ အဓိက လေ့ကျင့်ကြရလေသည်။