တစ်ချက်တည်းဖြင့်သတ်ဖြတ်ခြင်း (၂)

“...”

ရှောင်လန်သည်လည်း လုံးဝ ဆွံ့အနေခဲ့သည်။

သမ၏ ကြည်လင်သော မျက်၀န်းများထဲတွင် ထိုငွေရောင် ပုံရိပ်နှင့် ပန်းထွက်နေသော သားရဲသွေးများသာ ရောင်ပြန်ဟပ်နေကာ၊ သူမ၏ ဦးနှောက်မှာ တွေးတောခြင်းများ လုံးဝနီးပါး ရပ်တန့်သွားခဲ့လေပြီ။

“ဘာ... ဘာတွေ ဖြစ်သွားတာလဲ...”

“အဲဒီ အမြန်နှုန်းက ဘာလဲ၊ အဲဒီ ခွန်အားက ဘာလဲ... အဲဒီ ရုတ်တရက် ပေါက်ကွဲထွက်လာတဲ့ အခြေအနေက... ဒါက ဝံပုလွေဖေဖေ ပိုင်ဆိုင်ထားတဲ့ သွေးမျိုးဆက်ရဲ့ တကယ့် စွမ်းအားအစစ်အမှန်လား... အဆင့်ကြီး တစ်ခုလုံးနီးပါးကို ကျော်လွန်ပြီးတော့... ချက်ချင်း သတ်ဖြတ်လိုက်တာလား...”

ကြီးမားသော တုန်လှုပ်မှုများက ပြန်လည်မွေးဖွားလာသော ဧကရီနှစ်ပါး၏ အသိဉာဏ်များကို ဆူနာမီလှိုင်းကြီး တစ်ခုကဲ့သို့ ရိုက်ခတ်သွားခဲ့သည်။

သူတို့၏ အတိတ်ဘဝများတွင် အစွမ်းထက်သော တည်ရှိမှုများစွာကို မြင်တွေ့ခဲ့ဖူးသော်လည်း၊ အဆင့်တူ တိုက်ပွဲတစ်ခုတွင်၊ မဟုတ်သေး၊ အဆင့်နိမ့်သူက အဆင့်မြင့်သူကို တိုက်ခိုက်ရာတွင်၊ ဤမျှ သပ်ရပ်ကာ၊ ထိရောက်ပြင်းထန်ပြီး အနုပညာဆန်လှသော ချက်ချင်းသတ်ဖြတ်မှုမျိုးကို သူတို့ တစ်ခါမှ မမြင်တွေ့ခဲ့ဖူးပေ။

ထို့အပြင် ဤအရာအားလုံးကို ပြုလုပ်ခဲ့သူမှာ သူတို့၏ ဝံပုလွေဖေဖေပင် ဖြစ်လေသည်။

ဖော်ပြ၍မရနိုင်သော လုံခြုံမှုနှင့် ဂုဏ်ယူမှု ခံစားချက်တစ်ခုက ယခင်က ကြောက်ရွံ့မှုနှင့် စိုးရိမ်ပူပန်မှု အားလုံးကို ချက်ချင်း လွင့်ပြယ်သွားစေခဲ့လေသည်။

ထိုအချိန်မှာပင် လင်းထျန်းလုံ၏ အသိစိတ် ပင်လယ်အတွင်းတွင် စနစ်အသိပေးချက်အသံများ ကြည်လင်စွာ ထွက်ပေါ်လာခဲ့သည်။

[စနစ် အသိပေးချက်] ။ ။ အဆင့်မြင့် ခြေလှမ်း၀က်ဘုရင်အဆင့် မိစ္ဆာသားရဲ၊ ကျောက်တောင်ဖွတ်နဂါးကို အောင်မြင်စွာ သတ်ဖြတ်နိုင်ခဲ့ပါသည်။ အတွေ့အကြုံရမှတ် အမြောက်အမြားကို ရရှိပါသည်။

[စနစ် အသိပေးချက်] ။ ။ အဆင့် ၂၉ သို့ တိုးတက်သွားပါပြီ။ ကိုယ်ပိုင်စွမ်းရည်များအားလုံး သိသိသာသာ မြင့်တက်လာပါပြီ။

[စနစ် အသိပေးချက်] ။ ။ ပင်ကိုစွမ်းရည် - သွေးဆာတိုက်ပွဲဟိန်းသံ (အဖြူရောင် · ငွေအဆင့်) သည် လုံလောက်သော စွမ်းအင်များကို စုပ်ယူပြီး သွေးဆာရူးသွပ်တိုက်ပွဲဟိန်းသံ (ခရမ်းရောင် ပါရမီရှင်အဆင့်) သို့ အဆင့်တက်သွားပါပြီ။ စွမ်းအား သိသိသာသာ မြင့်တက်လာပါပြီ။

[စနစ် အသိပေးချက်] ။ ။ ကျဆင်းလာသော ပင်ကိုစွမ်းရည် - ကျောက်တောင်နဂါးနှလုံးသား (ရွှေရောင် · ဒဏ္ဍာရီအဆင့်)။

ကျောက်တောင်နဂါးနှလုံးသား (ရွှေရောင် · ဒဏ္ဍာရီအဆင့်) - အထူး ခန္ဓာကိုယ်ကြံ့ခိုင်ရေး ပင်ကိုစွမ်းရည်တစ်ခု ဖြစ်ပြီး၊ ရှေးဟောင်း ဖွတ်နဂါးများ၏ သွေးမျိုးဆက်ပါဝင်သော မိစ္ဆာသားရဲများတွင်သာ နိုးထလာနိုင်ပါသည်။ အသက်စွမ်းအင်၊ အကာအကွယ်နှင့် မြေကြီးဒြပ်စင် စွမ်းအင်များနှင့် လိုက်ဖက်ညီမှုတို့ကို သိသိသာသာ မြှင့်တင်ပေးသည်။

[အသိပေးချက်] ။ ။ ဤပင်ကိုစွမ်းရည်မှာ ပိုင်ရှင်နှင့် လိုက်ဖက်ညီမှု မရှိသဖြင့် စုပ်ယူ၍မရနိုင်ပါ။[ငွေပြာရောင် သွေးမျိုးဆက် ပင်ကိုစွမ်းရည်သည် ဤပင်ကိုစွမ်းရည်ကို အလိုအလျောက် ဝါးမြိုလိုက်ပြီး၊ ‌ငွေပြာရောင် သွေးမျိုးဆက် ပင်ကိုစွမ်းရည်မှာ အနည်းငယ် စွမ်းအားမြင့်တက်လာပါပြီ။

[အာဏာစက်] - နှင်းဝံပုလွေမျိုးနွယ်စု၏ ကိုယ်ပိုင်စွမ်းရည် အားလုံး ၇၁ ရာခိုင်နှုန်း တိုးလာမည်။ (ယခင်က ၇၀ ရာခိုင်နှုန်း)

[ဘုရင်သွေး] - မိမိ၏ ကိုယ်ပိုင်စွမ်းရည် အားလုံး ၃၁ ရာခိုင်နှုန်း တိုးလာမည်။ (ယခင်က ၃၀ ရာခိုင်နှုန်း)

လင်းထျန်းလုံသည် အသိပေးချက်များကို လျင်မြန်စွာ ကြည့်ရှုလိုက်သည်။ “ဘာမှမရှိတာထက်တော့ ကောင်းတာပေါ့လေ...” ၎င်းအပေါ် သူ သိပ်ဂရုမစိုက်လှပေ။

ခြေလှမ်း၀က်ဘုရင်အဆင့် မိစ္ဆာသားရဲ တစ်ကောင်ထံမှ အဓိက ပင်ကိုစွမ်းရည်တစ်ခုက သူ၏ အခြေခံ စွမ်းအားမြှင့်တင်မှုကို ၁ ရာခိုင်နှုန်း လေးသာ တိုးလာစေခြင်းမှာ အမှန်တကယ်ပင် သိပ်တော့ အံ့သြစရာ မကောင်းလှပေ။

တကယ့် တိုက်ပွဲဆုလာဘ်မှာ မိစ္ဆာသားရဲအမြုတေပင် ဖြစ်လေသည်။

အတွေးတစ်ချက်ဖြင့် အလယ်အလတ် စိတ်ထိန်းချုပ်ခြင်းကို အသက်သွင်းလိုက်ရာ၊ ကြွယ်ဝသော မြေဝါရောင် အလင်းတန်းများ ထုတ်လွှတ်နေပြီး အံ့သြစရာကောင်းလောက်အောင် စွမ်းအင်များဖြင့် ပြည့်နှက်နေသည့် အမြုတေတစ်ခုကို ထိုဧရာမခေါင်းကြီးထဲမှ တိကျစွာ ထုတ်ယူလိုက်လေသည်။

[မိစ္ဆာသားရဲအမြုတေ (ကျောက်တောင်ဖွတ်နဂါး)] - ခြေလှမ်း၀က်ဘုရင်အဆင့် မိစ္ဆာသားရဲ တစ်ကောင်၏ အသက်စွမ်းအင်နှင့် ခွန်အားများတည်ရှိသော အမြုတေ ဖြစ်သည်။ စားသုံးလိုက်ပါက အောက်ပါ လက္ခဏာရပ်ကို နိုးထလာရန် အလွန် မြင့်မားသော အခွင့်အလမ်း ရှိသည်။

[ကျောက်သားခန္ဓာ (ရွှေရောင် · ဘုရင်အဆင့်)] - အထူး ကာကွယ်ရေး မြှင့်တင်မှု စွမ်းရည်တစ်ခု ဖြစ်ပြီး၊ အကာအကွယ်နှင့် ရုပ်ပိုင်းဆိုင်ရာ ခွန်အားကို ၄၀ ရာခိုင်နှုန်းအထိ သိသိသာသာ မြှင့်တင်ပေးနိုင်ကာ၊ အားကောင်းသော ရုပ်ပိုင်းဆိုင်ရာ ပျက်စီးဆုံးရှုံးမှု လျှော့ချပေးနိုင်သည့် အကျိုးသက်ရောက်မှုရှိသည်။

အကြေးခွံများ သို့မဟုတ် ကျောက်ချပ်ဝတ်ကဲ့သို့ လက္ခဏာရပ်များ ရှိသည့် ခန္ဓာကိုယ်အတွက်ဆိုလျှင် အကျိုးသက်ရောက်မှုမှာ နောက်ထပ် ၂၀ ရာခိုင်နှုန်း ထပ်တိုးလာမည် ဖြစ်သည်။

“ဒါက ရွှေရောင် စွမ်းရည်တစ်ခုပဲ၊ တကယ့် ပစ္စည်းကောင်းပဲ...”

လင်းထျန်းလုံ၏ အကြည့်များမှာ၊ ဘုရင်ကြီး၏ နတ်ဘုရားဆန်ဆန် စွမ်းအားများကို မြင်တွေ့ပြီးနောက် အလွန်အမင်း စိတ်လှုပ်ရှားနေသည့် အနီးအနားရှိ ထျန်းပင်းဆီသို့ ချက်ချင်း လှည့်သွားခဲ့သည်။ ဤအမြုတေမှာ ထျန်းပင်းအတွက် အထူး ဖန်တီးပေးထားသကဲ့သို့ပင်။

“ထျန်းပင်း...” လင်းထျန်းလုံသည် တိုးညင်းစွာ ဟိန်းဟောက်လိုက်လေသည်။

ထျန်းပင်းသည် ချက်ချင်း ပြေးလာပြီး ခေါင်းကို ရိုသေစွာ ငုံ့လိုက်ကာ လည်ချောင်းထဲမှ နာခံမှုရှိသော ညည်းတွားသံလေး တစ်ခုကို ထုတ်လွှတ်လိုက်သည်။

သူ၏ ဝံပုလွေမျက်လုံးများထဲတွင် လိုချင်တောင့်တမှုများဖြင့် ပြည့်နှက်နေလေသည်။

လင်းထျန်းလုံသည် အနည်းငယ်မျှပင် တွန့်ဆုတ်မနေဘဲ၊ ခမ်းနားလွန်းသော စွမ်းအင်များ ထုတ်လွှတ်နေသည့် လေးလံလှသော အမြုတေကို ထျန်းပင်း၏ ပါးစပ်ရှေ့သို့ စိတ်ထိန်းချုပ်ခြင်းကို အသုံးပြု၍ ပို့ပေးလိုက်လေသည်။

ထျန်းပင်းသည် ၎င်းကို တစ်လုတ်တည်းဖြင့် မြိုချလိုက်တော့သည်။

နောက်တစ်ခိုက်အတန့်တွင် အေးစက်သော အရှိန်အဝါများ ရောနှောနေသည့် အလွန်အမင်း ကြမ်းတမ်းလှသော မြေဝါရောင် စွမ်းအင်များမှာ ထျန်းပင်း၏ ခန္ဓာကိုယ်မှ ပေါက်ကွဲထွက်ပေါ်လာခဲ့သည်။

ထျန်းပင်းသည် နာကျင်မှုနှင့်သာယာမှု နှစ်မျိုးလုံး ရောယှက်နေသော ရှည်လျားသည့် ဟိန်းဟောက်သံကြီးကို ထုတ်လွှတ်လိုက်လေသည်။

သူ၏ တစ်ကိုယ်လုံးရှိ ရေခဲကြေးခွံချပ်ဝတ်တန်ဆာမှ အက်ကွဲသံများ ထွက်ပေါ်လာခဲ့သည်။

မူလက အဖြူရောင် ရေခဲကြေးခွံများပေါ်တွင်၊ ကျောက်တောင်ဖွတ်နဂါး၏ ကျောက်ချပ်ဝတ်များကဲ့သို့ ရှုပ်ထွေးသော ပုံသဏ္ဌာန်များ စတင် ပေါ်လာပြီး၊ အရောင်မှာလည်း စိမ်းပြာရောင်နှင့် မြေဝါရောင်တို့ ရောစပ်နေသည့်ဘက်သို့ တဖြည်းဖြည်း ပြောင်းလဲသွားလေသည်။

ထျန်းပင်း၏ ကြွက်သားများနှင့် အရိုးများမှာလည်း တကျွတ်ကျွတ်မြည်နေပြီး၊ ခန္ဓာကိုယ် အရွယ်အစားမှာ မျက်စိဖြင့်ပင်မြင်နိုင်သော အမြန်နှုန်းဖြင့် ကြီးမားလာကာ၊ သူ၏ အရှိန်အဝါမှာလည်း တည်ငြိမ်စွာ မြင့်တက်လာခဲ့လေသည်။

[စနစ် အသိပေးချက်] ။ ။ နှင်းဝံပုလွေအုပ်စုဝင် - ထျန်းပင်းသည် အထူး မိစ္ဆာသားရဲအမြုတေကို စားသုံးလိုက်ပါသည်။ လက်ရှိအဆင့်မှာ အဆင့် ၂၀ သို့ တိုးတက်သွားပြီး၊ ပါရမီရှင်အဆင့် မိစ္ဆာသားရဲ တစ်ကောင်အဖြစ် အောင်မြင်စွာ အဆင့်တက်လှမ်းသွားခဲ့ပါပြီ။ တိုက်ခိုက်ရေးစွမ်းအား သိသိသာသာ မြင့်တက်လာပါပြီ။

[စနစ် အသိပေးချက်] ။ ။ ပင်ကိုစွမ်းရည် - ရေခဲကြေးခွံချပ်ဝတ်တန်ဆာ (အဖြူရောင် ·ငွေအဆင့်) သည် လုံလောက်သော စွမ်းအင်များကို စုပ်ယူပြီး ထာ၀ရဗာဂျရာခန္ဓာ (ရွှေရောင် · ဘုရင်အဆင့်)သို့ အဆင့်တက်သွားပါသည်။ ရုပ်ပိုင်းဆိုင်ရာ ခွန်အားနှင့် ဘက်စုံကာကွယ်ရေး သိသိသာသာ မြင့်တက်လာခဲ့ပါသည်။

[စနစ် အသိပေးချက်] ။ ။ ပင်ကိုစွမ်းရည် - ပြင်းထန်သော ရေခဲဝိညာဉ် (ခရမ်းရောင် · ပါရမီရှင်အဆင့်)သည် စွမ်းအင်အမြောက်အမြားကို စုပ်ယူပြီး နှင်းမုန်တိုင်းတိုက်ပွဲဝိညာဉ် (ခရမ်းရောင် · ပါရမီရှင်အဆင့်) သို့ အဆင့်တက်သွားပါပြီ။

ကြမ်းတမ်းနှင်းစစ်ဝိညာဉ်ကို ခေါ်ယူပြီး စွမ်းအားမြှင့်တင်နိုင်ကာ၊ အချိန်တိုအတွင်း ကိုယ်ပိုင်စွမ်းရည်အားလုံးကို သိသိသာသာ မြှင့်တင်ပေးနိုင်ပြီး၊ အပိုကာကွယ်ရေးနှင့် ခုခံနိုင်စွမ်းများပါ ရရှိမည် ဖြစ်သည်။

[စနစ် အသိပေးချက်] ။ ။ နှင်းဝံပုလွေမျိုးနွယ်စုတွင် တတိယမြောက် ပါရမီရှင်အဆင့် မိစ္ဆာသားရဲတစ်ကောင် ထွက်ပေါ်လာခဲ့ပါပြီ။ ငွေပြာရောင် သွေးမျိုးဆက်၏ လက္ခဏာရပ်ဖြစ်သော “အာဏာစက်” အကျိုးသက်ရောက်မှုမှာ အားကောင်းလာပါပြီ။ လက်ရှိ ဆက်နွယ်ခြင်း အကျိုးသက်ရောက်မှု - နှင်းဝံပုလွေမျိုးနွယ်စု၏ ကိုယ်ပိုင်စွမ်းရည် အားလုံး ၇၂ ရာခိုင်နှုန်း တိုးလာမည်။

၎င်း၏ စွမ်းရည်များမှာမူ လောလောဆယ် ပြောင်းလဲမှု မရှိသေးပါ၊ (ပြင်းထန်သော မီးလျှံကိုက်ချက် (အဖြူရောင် · ငွေအဆင့်)၊ ဝင်ဆောင့်ခြင်း (အဖြူရောင် · ငွေအဆင့်)၊ နောက်ပိုင်းတွင် တိုက်ပွဲများ သို့မဟုတ် အခြားအရင်းအမြစ်များကို စားသုံးခြင်းမှတစ်ဆင့် အဆင့်တက်လှမ်းနိုင်မည် ဖြစ်သည်။

“ပြီးသွားပြီ...”

လင်းထျန်းလုံ၏ မျက်လုံးများထဲတွင် ကျေနပ်အားရမှု အရိပ်အယောင်တစ်ခု လျှပ်တစ်ပြက် ပေါ်လာခဲ့သည်။ ထျန်းပင်းသည် သူ၏ မျှော်လင့်ချက်များကို အမှန်တကယ်ပင် မဖျက်ဆီးခဲ့ချေ။ အောင်မြင်စွာ အဆင့်တက်လှမ်းနိုင်ခဲ့ပြီး ကြီးမားသော အကျိုးကျေးဇူးများကို ရရှိသွားခဲ့ချေပြီ။

ဤအခိုက်အတန့်တွင် ထျန်းပင်း၏ လက်သည်းများအားလုံးမှာ လေးလံလှသော ကျောက်အလင်းတန်းများ လင်းလက်နေပြီး၊ သူ၏ ပါးစပ်ထောင့်ရှိ အစွယ်များမှာ ပို၍ပင် ရက်စက်ကြမ်းကြုတ်မည့်ပုံ ပေါက်နေလေသည်။

ထျန်းပင်း၏ တစ်ကိုယ်လုံးကို စိမ်းပြာရောင်နှင့် မြေဝါရောင် ပုံသဏ္ဌာန်များ ယှက်နွယ်နေသည့် ထူထဲသော နှင်းခဲကျောက်ဆောင် ချပ်ဝတ်တန်ဆာ တစ်ခုက ဖုံးလွှမ်းထားပြီး၊ ငူ၏ အရှိန်အဝါမှာ ယခင်ကထက် နှစ်ဆကျော် ပိုမိုအားကောင်းလာခဲ့လေသည်။

ထျန်းပင်းသည် ခန္ဓာကိုယ်ကို ရိုသေစွာ နှိမ့်ချလိုက်ပြီး၊ လင်းထျန်းလုံအပေါ် အမြင့်မားဆုံးသော ရိုသေလေးစားမှုနှင့် ကျေးဇူးတင်မှုကို ဖော်ပြလိုက်လေသည်။

“ဝံပုလွေဖေဖေ...” ရှောင်ယင်းသည် နောက်ဆုံးတွင် တုန်လှုပ်မှုမှ သတိပြန်ဝင်လာပြီး ထျန်းပင်းကို စိတ်လှုပ်ရှားစွာ လက်ညှိုးထိုးပြလိုက်သည်။ “ဦးလေးထျန်းပင်း၊ သူပြောင်းလဲသွားပြီ... သူ ပိုပြီးတောင် အစွမ်းထက်လာသေးတယ်...”

ရှောင်လန်သည်လည်း အသက်ကို ပြင်းပြင်း ရှူသွင်းလိုက်ပြီး၊ ခမ်းနားလှသော အရှိန်အဝါများ ပြည့်နှက်နေသည့်ထျန်းပင်းကို ကြည့်လိုက်၊ ပြိုင်ဘက်မရှိ ခန့်ညားထည်ဝါလှသော လင်းထျန်းလုံကို ကြည့်လိုက် လုပ်နေလေသည်။

“မျိုးနွယ်စု တစ်ခုတည်းမှာတင် ပါရမီရှင်အဆင့် သုံးကောင်... ပြီးတော့ ဝံပုလွေဖေဖေ့ရဲ့ ခွန်အားကလည်း သာမန် ပါရမီရှင်အဆင့်ရဲ့ အတိုင်းအတာကို လုံးဝ ကျော်လွန်နေပြီ...”

“သူ ရှိနေရင်၊ ဒီတောအုပ်၊ မဟုတ်ဘူး... ဒီတောင်တန်းကြီး တစ်ခုလုံးမှာတောင်... ငါတို့ တကယ်ပဲ ငြိမ်းချမ်းစွာ ရှင်သန်နိုင်တော့မှာ...”

သို့သော် ဘုရင်ကြီး၏ ကြီးမားလှသော စွမ်းအားများနှင့် သူတို့၏ အပေါင်းအဖော် အဆင့်တက်လှမ်းမှုကြောင့် နှင်းဝံပုလွေအုပ်စုမှာ စိတ်လှုပ်ရှားနေကြပြီး၊ ကလေးမလေးနှစ်ဦး၏ နှလုံးသားထဲတွင် လုံခြုံမှုခံစားချက်များ ပြည့်နှက်နေစဉ်မှာပင် -

ဂျွတ်...

တစ်စုံတစ်ခု အက်ကွဲသွားသကဲ့သို့ အလွန်သိမ်မွေ့သော တိုးညှင်းသည့် အသံလေးတစ်ခုမှာ ဝိညာဉ်နယ်မြေအတွင်း ရုတ်တရက် ထွက်ပေါ်လာခဲ့သည်။

ထိုအသံ၏ အရင်းအမြစ်မှာ အခြားကမဟုတ်၊ ကျောက်တောင်ဖွတ်နဂါး၏ ခေါင်းပြတ်နေသော အလောင်းထံမှပဲ ဖြစ်၏။