ထူးဆန်းသော နှင်းဝိညာဉ်မြေခွေးလေး (၁)

“ဒါက...”

“ဝံပုလွေဖေဖေက အဲဒီ အကောင်ကြီးဆီက အကောင်းဆုံး ပစ္စည်းတွေကို သုံးပြီး... ငါတို့အတွက် ဒီအဆောင်တွေကို လုပ်ပေးတာလား...”

ဂရုစိုက်ခံရခြင်း ကာကွယ်စောင့်ရှောက်ခံရခြင်းတို့ကြောင့် နွေးထွေးသည့် ခံစားချက်တစ်ခုသည် ကလေးမလေးနှစ်ဦးလုံးကို ချက်ချင်း လွှမ်းခြုံသွားတော့သည်။

အစောပိုင်းက ကျန်ရှိနေခဲ့သော ကြောက်ရွံ့မှု အရိပ်အယောင်လေးမှာ ဤလက်ဆုပ်လက်ကိုင်ပြနိုင်သော ဂရုစိုက်မှုရှေ့တွင် လုံးဝ ပျောက်ကွယ်သွားခဲ့ချေပြီ။

“ဖေဖေက သမီးတို့အပေါ် အရမ်းကောင်းတာပဲ...” ရှောင်ယင်းက ကလေးသံလေးဖြင့် ပျော်ရွှင်စွာ ရယ်မောလိုက်ပြီး၊ လင်းထျန်းလုံ၏ နှာခေါင်းကိုထိရန် သူမ၏ လက်သေးသေးလေးကို ဆန့်ထုတ်လိုက်လေသည်။

ရှောင်လန်ကမူ စကားမပြောသော်လည်း၊ သူမ၏ ခေါင်းသေးသေးလေးကို အပြင်းအထန် ညိတ်လိုက်ပြီး၊ လင်းထျန်းလုံကို ကြည့်နေသော သူမ၏ မျက်လုံးကြီးများမှာ အားကိုးမှုများ၊ ဝမ်းသာပျော်ရွှင်မှုများဖြင့် တောက်ပနေလေသည်။

မည်သည့် သံသယ သို့မဟုတ် မယုံကြည်မှုမဆို ဤအခိုက်အတန့်တွင် အလွန် ရယ်စရာကောင်းနေပြီး အရေးမပါတော့သကဲ့သို့ ဖြစ်နေလေသည်။

သူတို့၏စိတ်ထဲတွင် လင်းထျန်းလုံအပေါ် အကြွင်းမဲ့ယုံကြည်မှုမှာ ကြာမြင့်စွာကတည်းက နက်ရှိုင်းစွာ အမြစ်တွယ်နေခဲ့ပြီ ဖြစ်လေသည်။

လင်းထျန်းလုံသည် သူ့သမီးလေးများ၏ မျက်နှာပေါ်တွင် ပြန်လည်ပွင့်လန်းလာသော အပြုံးများကို ကြည့်လိုက်ရင်း၊ သူတို့ လန့်သွားသောကြောင့် သူ၏ နှလုံးသားထဲတွင် ဖြစ်ပေါ်နေခဲ့သည့် နောက်ဆုံး အုံ့မှိုင်းမှုများမှာ လုံးဝ လွင့်ပြယ်သွားခဲ့လေပြီ။

“တကယ်ကို တန်ပါတယ်”

သူသည် တိုးညှင်းစွာ ဟိန်းဟောက်လိုက်ပြီး၊ စစ်မြေပြင်ကို ရှင်းလင်းရန်နှင့် ကျန်ရှိနေသော ဖွတ်နဂါး၏ ပစ္စည်းများကို ကိုင်တွယ်ဖြေရှင်းရန် ဝံပုလွေအုပ်စုကို အချက်ပြလိုက်လေသည်။

ရန့်မြဲ့သည် တိုးညှင်းစွာ ညည်းတွားလိုက်ပြီး၊ နှင်းဝံပုလွေ အနည်းငယ်အား ထိုကျောက်ချပ်ဝတ်မြေနဂါးများ၏ အလောင်းများကို ကျွမ်းကျင်စွာ ခွဲစိတ်ရန် ညွှန်ကြားလိုက်ရာ၊ သူတို့၏ ထက်ရှသော ဝံပုလွေလက်သည်းများဖြင့် နက်ရှိုင်းစွာ ပုန်းကွယ်နေသော စွမ်းအင်အမြုတေများကို တိကျစွာ ဆွဲထုတ်လာကြလေသည်။

[စနစ် အသိပေးချက်] ။ ။ မိစ္ဆာသားရဲအမြုတေ · ကျောက်ချပ်ဝတ်မြေနဂါး (အစိမ်းရောင် - ကြေးအဆင့်) ၃ ခုကို ရှာဖွေတွေ့ရှိပါသည်။

[မိစ္ဆာသားရဲအမြုတေ · ကျောက်ချပ်ဝတ် မြေနဂါး (အစိမ်းရောင် - ကြေးအဆင့်)] - စားသုံးပြီးနောက် အောက်ပါ စွမ်းရည်များကို နိုးထလာရန် အလွန်မြင့်မားသော အခွင့်အလမ်းရှိသည်

[ကျောက်သားအရေပြား (အစိမ်းရောင် - ကြေးအဆင့်)] - ရုပ်ပိုင်းဆိုင်ရာ အကာအကွယ်ကို အနည်းငယ် မြှင့်တင်ပေးနိုင်သည်။

[ကြီးမားသောခွန်အား (အစိမ်းရောင် - ကြေးအဆင့်)] - ခွန်အား ကိုယ်ပိုင်စွမ်းရည်ကို အနည်းငယ် မြှင့်တင်ပေးနိုင်သည်။

လင်းထျန်းလုံ၏ ငွေပြာဘုရင်မျက်ဝန်းများက မှိန်ဖျော့ဖျော့ မြေဝါရောင် အလင်းတန်းများ ထုတ်လွှတ်နေသည့် ထအမြုတေ သုံးခုကို ဝေ့ကြည့်လိုက်ရာ၊ အချက်အလက်များမှာ ချက်ချင်း ပေါ်လာခဲ့လေသည်။

၎င်းတို့ အားလုံးမှာ အခြေခံ ကာကွယ်ရေးနှင့် ခွန်အားအမျိုးအစား စွမ်းရည်များသာ ဖြစ်ကြသည်။

အနည်းဆုံး ထူးချွန်အဆင့်တွင် ရှိနေကြပြီး၊ ပါရမီရှင်အဆင့်သို့ တက်လှမ်းတော့မည့် သို့မဟုတ် တက်လှမ်းပြီးသားဖြစ်သော ရေပြာကြေးခွံအစောင့်အရှောက်များနှင့် ထျန်းပင်းတို့ အပါအဝင် သူ၏ လက်ရှိ လက်အောက်ငယ်သားများအတွက်မူ၊ ဤစွမ်းရည်များမှာ အလွန် သာမန်ဆန်လွန်းပြီး ထိရောက်မှု မရှိလှပေ။

“ လွှင့်ပစ်ဖို့ရာကလည်း အဆီတ၀င်း၀င်း၊ စားရမှာလည်း သဲတရှပ်ရှပ်...” လင်းထျန်းလုံသည် စိတ်ထဲမှ အကဲဖြတ်လိုက်သည်။

၎င်းတို့ကို အဓိက အဖွဲ့ဝင်များအား တိုက်ရိုက်စားသုံးခိုင်းခြင်းက အကျိုးအမြတ် အလွန် နည်းပါးလွန်းပြီး၊ အနာဂတ်တွင် ပိုမိုအစွမ်းထက်သော စွမ်းရည်များကို ရရှိရန် အခွင့်အရေးကိုပင် ဆုံးရှုံးသွားနိုင်လေသည်။

အနည်းငယ် တွေးတောပြီးနောက် သူသည် ခွဲဝေမှုများကို ပြုလုပ်လိုက်လေသည်။ သူသည် ‘ကြီးမားသောခွန်အား’ အမြုတေ နှစ်ခုကို ရေပြာကြေးခွံအစောင့်အရှောက် ခြောက်ကောင်အနက်မှ နှစ်ကောင်ဆီသို့ တိုက်ရိုက် ပစ်ပေးလိုက်လေသည်။

သူတို့သည် တိုက်ပွဲတစ်ခုကို အခုလေးတင် ဖြတ်သန်းထားခဲ့ရပြီး၊ ဤသန့်စင်သော ခွန်အားဖြည့်တင်းမှုမှာ ရိုးရှင်းသော်လည်း တိုက်ခိုက်ရေးစွမ်းအားအဖြစ် ချက်ချင်း အသွင်ပြောင်းနိုင်လေသည်။

[စနစ် အသိပေးချက်] ။ ။ ရေပြာကြေးခွံအစောင့်အရှောက် အဖွဲ့ဝင်တစ်ဦးသည် ‘ကြီးမားသောခွန်အား’ အမြုတေကို စားသုံးလိုက်သဖြင့် ခွန်အား အနည်းငယ် တိုးလာပါသည်။

ထို ‘ကျောက်သားအရေပြား’ အမြုတေနှင့် နောက်ပိုင်းတွင် အခြားသော မြေနဂါးအလောင်းများကို ကိုင်တွယ်ဖြေရှင်းရာမှ တွေ့ရှိလာနိုင်သည့် အလားတူ အဆင့်နိမ့်အမြုတေများနှင့် ပတ်သက်၍မူ၊ သူသည် ၎င်းတို့ အားလုံးကို စုဆောင်းထားရန် ရန့်မြဲ့ကို အမိန့်ပေးလိုက်လေသည်။

“ဒါတွေကို ပြန်ယူသွားပြီး၊ အသိုက်ထဲက အရွယ်ရောက်တော့မယ့် ကလေးတွေ အခြေခံအုတ်မြစ် တည်ဆောက်တဲ့ နေရာမှာ သုံးဖို့အတွက် သိမ်းထားလိုက်...” လင်းထျန်းလုံသည် စိတ်ချင်းဆက်သွယ်မှုမှတစ်ဆင့် ရန့်မြဲ့ကို အသိပေးလိုက်လေသည်။

ဤအခြေခံ အမြုတေများမှာ မျိုးနွယ်စုအတွင်းရှိ ထူးချွန်အဆင့်သို့ မရောက်ရှိသေးသော နှင်းဝံပုလွေငယ်များ၏ အခြေခံအုတ်မြစ်များကို ခိုင်မာစေရန်အတွက် ပစ္စည်းကောင်းများ ဖြစ်ကြလေသည်။

ရန့်မြဲ့သည် နားလည်ကြောင်း ပြသရန် တိုးညှင်းစွာ ညည်းတွားလိုက်ပြီး ‘ကျောက်သားအရေပြား’ အမြုတေကို သေချာ သိမ်းဆည်းလိုက်လေသည်။

တစ်ချိန်တည်းမှာပင် သူ၏အကြည့်များမှာ ဝိညာဉ်နယ်မြေ၏ ပိုမိုနက်ရှိုင်းသော နေရာများဆီသို့ လှည့်သွားခဲ့သည်။

အကျပ်အတည်းကို ယာယီ ဖြေရှင်းပြီးသွားပြီဖြစ်ရာ၊ သူတို့ မတော်တဆ ရောက်ရှိလာခဲ့သော ဤနေရာကို စူးစမ်းလေ့လာရန် အချိန်ကျရောက်လာပြီ ဖြစ်လေတော့သည်။

ဝိညာဉ်နယ်မြေ၏ အနက်ထဲတွင် အလင်းနှင့် အရိပ်များ မှုန်ဝါးနေပြီး၊ အဝေးတစ်နေရာမှ အမျိုးအမည်မသိ အရှိန်အဝါများ စီးဆင်းနေလေသည်။

လင်းထျန်းလုံသည် စူးစမ်းရှာဖွေလိုသော သူ၏ အကြည့်များကို ပြန်လည် ရုပ်သိမ်းလိုက်သည်။ လက်ရှိတွင် အရေးအကြီးဆုံးသော ကိစ္စမှာ တိုက်ပွဲကြီး တစ်ခုကို ဖြတ်သန်းထားခါစဖြစ်သော နှင်းဝံပုလွေအုပ်စုကို အမြန်ဆုံး အနားယူခွင့်၊ အင်အားဖြည့်တင်းခွင့် ပေးရန်ပင် ဖြစ်လေသည်။

သူသည် တိုးညှင်းစွာ ဟိန်းဟောက်လိုက်ပြီး အမိန့်တစ်ခုကို ထုတ်ပြန်လိုက်သည်။

ရန့်မြဲ့သည် နှင်းဝံပုလွေ အနည်းငယ်ကို ချက်ချင်း ဦးဆောင်ကာ ရှေ့ထွက်လာပြီး၊ ကျန်ရှိနေသော ကျောက်တောင်ဖွတ်နဂါး၏ ဧရာမခန္ဓာကိုယ်ကြီးကို စတင် ထိရောက်စွာ အပိုင်းပိုင်းဖြတ်တော့လေသည်။

ထက်ရှလှသော ဝံပုလွေလက်သည်းများက ဝိညာဉ်စွမ်းအင်များ ပြည့်နှက်နေသည့် အသားများကို အတုံးများအဖြစ် ဖြတ်တောက်လိုက်လေသည်။

လင်းထျန်းလုံသည် အခြားအကြေးခွံများနှင့်ယှဉ်လျှင် ပြန့်ပြူးသော ကျောက်တောင်ဖွတ်နဂါး၏ မူလအကြေးခွံများကို သဘာဝ ဒယ်အိုးများအဖြစ် အသုံးပြုရန်အတွက် အလယ်အလတ် စိတ်ထိန်းချုပ်ခြင်းဖြင့် လေထဲသို့ မတင်လိုက်လေသည်။

အဆင့်တက်ထားခါစဖြစ်ပြီး အရှိန်အဝါများ ဆူပွက်နေဆဲဖြစ်သော ထျန်းပင်းသည် တိုးညှင်းစွာ ညည်းတွားလိုက်ပြီး ရှေ့သို့ တစ်လှမ်းတိုးလာကာ၊ ကျောက်တောင်ဖွတ်နဂါး မူလအကြေးခွံဒယ်အိုး၏ အောက်ခြေကို တိကျစွာ လွှမ်းခြုံသွာမည့် အေးစက်သော လေငွေ့များကို စုစည်း မှုတ်ထုတ်လိုက်လေသည်။

သူ၏ စွမ်းအားထိန်းချုပ်မှုမှာ သိသိသာသာ ပိုမိုသိမ်မွေ့လာခဲ့ပြီ ဖြစ်သည်... ရေခဲမီးတောက်မှာ တည်ငြိမ်စွာ လောင်ကျွမ်းနေပြီး၊ မူလအကြေးခွံကို မပျက်စီးစေသလို အပူပေးရာတွင်လည်း ထိရောက်မှု မလျော့ကျစေခဲ့ပေ။

မကြာမီမှာပင် ကျောက်တောင်ဖွတ်နဂါး၏ အသားများမှာ ဒယ်အိုးထဲတွင် ဆူပွက်လာပြီး၊ မြေအနှစ်သာရနှင့် အသွေးအသားများထဲမှ ဝိညာဉ်စွမ်းအင်များ ရောနှောနေသည့် ထူးခြားသော ရနံ့တစ်ခုကို ထုတ်လွှတ်လာလေတော့သည်။

“ဖေဖေ... အရမ်းမွှေးတာပဲ...” ရှောင်ယင်းသည် သူမ၏ နှာခေါင်းလေးကို ပွတ်သပ်ရင်း မျှော်လင့်ချက် ကြီးစွာဖြင့် ကြည့်နေလေသည်။

ရှောင်လန်သည်လည်း ညင်သာစွာ ခေါင်းညိတ်လိုက်ပြီး၊ အလုပ်ရှုပ်နေသော ဝံပုလွေအုပ်စုကို ဝေ့ကြည့်လိုက်ကာ၊ တောင်တစ်လုံးကဲ့သို့ တည်ငြိမ်ပြီး လေးလံလွန်းသော အရှိန်အဝါများ ရှိလာပြီဖြစ်သည့် ထျန်းပင်းအပေါ်သို့ သူမ၏ အကြည့်များ ခဏတာ စွဲထင်သွားခဲ့သည်။

အသားစွပ်ပြုတ် ကျက်သွားသောအခါ လင်းထျန်းလုံသည် စွမ်းအင်အနှစ်သာရအများဆုံးသော အစိတ်အပိုင်းများကို သူ၏ သမီးလေးနှစ်ယောက်နှင့် ဝံပုလွေအုပ်စု၏ အဓိက အဖွဲ့ဝင်များထံသို့ ဂရုတစိုက် ခွဲဝေပေးလိုက်လေသည်။

အားလုံး အတူတကွထိုင်ကာ ခက်ခက်ခဲခဲ ရရှိထားသော ဤ ခြေလှမ်း၀က်ဘုရင်အဆင့် စားသောက်ပွဲကြီးကို သုံးဆောင်ကြလေသည်။

ကလေးမလေးနှစ်ဦးလုံးသည် အနားယူနေသည့် အချိန်လေးကို အခွင့်ကောင်းယူ၍ အသားစွပ်ပြုတ်သောက်ရင်း သဘာဝကျကျ စကားစမြည် ပြောဆိုနေကြလေသည်။

“ဦးလေးထျန်းပင်းက အခုဆိုရင် အချိန်မရွေး ပေါက်ကွဲထွက်လာနိုင်တဲ့ မီးတောင်ကြီးတစ်ခုနဲ့ တူနေပြီ၊ ပြီးတော့ သူက အရမ်းကို ခိုင်မာတောင့်တင်းတဲ့ ပုံစံလည်း ပေါက်တယ်နော်...” ရှောင်ယင်းက ရှောင်လန်ကို တိုးတိုးလေး ပြောလိုက်သည်။

ရှောင်လန်သည် မှိန်ဖျော့ဖျော့ ရွှေရောင်ရင့်ရင့် ပုံသဏ္ဌာန်များ ဖုံးလွှမ်းနေသည့် ထျန်းပင်း၏ ကြံ့ခိုင်လှသော ခန္ဓာကိုယ်ကြီးကို ကြည့်ရင်း တိုးညင်းစွာ ပြောလိုက်သည်

“အင်း... ဒီတစ်ခါ သူ့ရဲ့ အဆင့်တက်လှမ်းလာတဲ့ လမ်းကြောင်းက အရမ်းကို ရှင်းလင်းတယ်... အစွန်းရောက် ကာကွယ်ရေးနဲ့ သူ့ရဲ့ မွေးရာပါ ကြမ်းတမ်းတဲ့ ခွန်အား... တကယ်လို့ သူသာ ဒီလမ်းကြောင်းအတိုင်း ဆက်သွားမယ်ဆိုရင် သူ့ရဲ့ အလားအလာက တုန်လှုပ်စရာ ကောင်းလာလိမ့်မယ်...”

“အနာဂတ်မှာ ဦးလေးထျန်းပင်းက ဒဏ္ဍာရီထဲကလိုမျိုး၊ ဝင်ဆောင့်လိုက်ရုံနဲ့တင် တောင်တွေကို ကြေမွသွားစေနိုင်ပြီး မယိမ်းမယိုင်နဲ့ ခိုင်ခိုင်မာမာရပ်တည်နိုင်တဲ့ အစွမ်းထက်ဆုံး ကျွမ်းကျင်သူတွေထဲက တစ်ယောက် တကယ်ပဲ ဖြစ်လာနိုင်တယ်နော်...” ရှောင်ယင်း၏ လေသံမှာ အနာဂတ်တစ်ခုကို ကြိုတင်မြင်တွေ့ပြီးသည့်အလား သေချာနေခဲ့လေသည်။

ရှောင်လန်သည် နက်ရှိုင်းသော အကြည့်များဖြင့် အနည်းငယ် ခေါင်းညိတ်ပြလိုက်သည်။ သူမ၏ အတိတ်ဘဝ ဗဟုသုတများအပေါ် အခြေခံထားသော အလိုအလျောက် သိစိတ်များမှာလည်း ပိုမိုရှင်းလင်းလာခဲ့သည်။

“ဖြစ်နိုင်ရုံတင် မကဘူး... ငါ့အမြင်အရဆိုရင်၊ သူ အခုထုတ်ပြနေတဲ့ စွမ်းရည်တွေက ‘ရေခဲအရိုးစု’ ရဲ့ လွှမ်းမိုးနိုင်စွမ်းရှိတဲ့ လမ်းစဉ်နဲ့ အရမ်းကို လိုက်ဖက်ညီမှု ရှိနေတယ်... ကိုယ့်ကိုယ်ကိုယ် မသေနိုင်၊ ဖျက်ဆီးလို့မရတဲ့အထိ ကျင့်ယူရတဲ့ လမ်းစဉ်လေ...”

“တကယ်လို့ သူသာ ဝံပုလွေဖေဖေနဲ့အတူ ဆက်ပြီး ကြီးထွားလာမယ်ဆိုရင်၊ အနာဂတ်ရဲ့ ‘ရေခဲအရိုးစု မိစ္ဆာအင်ပါယာ’ က သူပဲ ဖြစ်လာဖို့ သေချာသလောက် ရှိနေပြီ...”

သူမ၏ ကောက်ချက်ချမှုထဲတွင် အနာဂတ်၌ ဖြစ်လာတော့မည့် အမှန်တရားတစ်ခုကို ပြောဆိုနေသကဲ့သို့ သေချာလုနီးပါး ခံစားချက်တစ်ခု ပါဝင်နေလေသည်။

ဤယုံကြည်ချက်မှာ ဝံပုလွေဖေဖေ၏ ပျိုးထောင်နိုင်စွမ်းကို ယုံကြည်မှုနှင့် ထျန်းပင်း ယခုပြသနေသော အခြေခံ စွမ်းအားများကို သူမ ထိုးထွင်းသိမြင်မှုတို့မှ မြစ်ဖျားခံလာခြင်း ဖြစ်လေသည်။

ထိုအချိန်မှာပင် -

“အာဝူး...”

ယာယီ စခန်း၏ ဘေးဘက်ရှိ မြူခိုးများထဲမှနေ၍ ကြည်လင်ပြီး ရှည်လျားကာ၊ ထူးခြားစူးရှလှသော ဟိန်းဟောက်သံ တစ်ခုရုတ်တရက် ထွက်ပေါ်လာခဲ့သည်။

ချက်ချင်းဆိုသလိုပင် အပြင်ဘက်ရှိ အမဲလိုက်နှင်းဝံပုလွေများထံမှ တိုးညှင်းသော ညည်းတွားသံ အချို့ ထွက်ပေါ်လာပြီး၊ တိုက်ခိုက်မည့် လေသံမျိုး မဟုတ်ဘဲ သတိဝီရိယရှိနေသည့် လေသံမျိုး ပါဝင်နေလေသည်။

ဤရုတ်တရက် ထွက်ပေါ်လာသော အသံကြောင့် ဝံပုလွေအုပ်စုမှာ ချက်ချင်း သတိဝီရိယ အမြင့်ဆုံး အခြေအနေသို့ ရောက်ရှိသွားခဲ့သည်။