အခန်း (၁၂၆၃-၁၂၆၄)

အခန်း (၁၂၆၃) - ရှရန်းယန်မီး

တောင်ပေါ်မှ ဆင်းလာစဉ် ဆူဂါအိုဟူသည် ဖန့်ချန်နှင့် ဆက်ဆံရေးပိုမိုကောင်းမွန်လာစေရန် ရည်ရွယ်ပြီး ဆန်းယွင်ဂိုဏ်းမှာ ဆန်းတောင်တွင် အခြေချစကာစဖြစ်၍ ချင်းယွမ်ဈေးနှင့် ပတ်သက်ပြီး နားမလည်သေးသည်ကို သိသဖြင့် သူသိထားသည့် စိတ်ဝင်စားစရာ အကြောင်းအရာများ ကို စိတ်အားထက်သန်စွာ ပြောပြနေသည်။

ဥပမာအားဖြင့် ဆန်းတောင်တွင် လာရောက်နေထိုင်သူများထဲမှ ပေါင်းစပ်ခြင်းအဆင့် သို့ ရောက်ရှိသူ အတော်များများ ရှိခဲ့ကြောင်း၊ အချို့မှာ အလားအလာကောင်းသဖြင့် ပိုမိုကြီးမားသော တောင်တန်းများက ခေါ်ယူသွားကြပြီး ဆန်းတောင်မှ ကျင့်ကြံသူအချို့နှင့် အဆက်အသွယ် ရှိနေသေးကြောင်း ပြောသည်။

ထိုကျင့်ကြံသူများသည် ဆန်းယွင်ဂိုဏ်းနှင့် ပဋိပက္ခ ဖြစ်ဖူးသူများ ဖြစ်သဖြင့် ဆူဂါအိုဟူက ဖန့်ချန်ကို သတိထားရန် သွယ်ဝိုက်၍ အရိပ်အမြွက် ပြောနေခြင်းဖြစ်သည်။

ချင်းယွမ်ဈေးတွင် ဝိညာဉ်တောင်ပေါင်း တစ်ထောင်ကျော် ရှိရာ ဆန်းတောင်မှာ အနိမ့်ဆုံးသာ ဖြစ်သည်။

ပိုမိုအစွမ်းထက်သော တောင်များတွင်မူ မသေမျိုးများ ရှိနေတတ်သည်။

အကယ်၍ ဆန်းယွင်ဂိုဏ်းနှင့် ရန်ငြိုးရှိသူများသည် ထို မသေမျိုးများနှင့် ပတ်သက်မှုရှိပါက လက်စားချေရန် သူတို့ကို ခိုင်းစေလိမ့်မည်ဟု သူက ယူဆသည်။

ထိုအချက်များနှင့် ပတ်သက်၍ ဖန့်ချန်သည် ပြုံး၍သာ ခေါင်းညိတ်ကာ မှတ်သားထားလိုက်သည်။

သူသည် ချင်းယွမ်ဈေးတွင် အခြေချရန် ရွေးချယ်ရသည့် အကြောင်းရင်းမှာ ထိုနေရာရှိ အင်အားစုများ၏ ဖွဲ့စည်းပုံကို ကြိုတင် စုံစမ်းထားပြီးဖြစ်သောကြောင့် ဖြစ်သည်။

ဤနေရာတွင် မသေမျိုးများ ရှိသော်လည်း အဆင့် (၁) မသေမျိုးများသာ ဖြစ်ပြီး အရေအတွက်အားဖြင့် ၃၀ ကျော်ခန့်သာ ရှိသည်။

နဂါးအိုကြီး ရှိနေသဖြင့် ထိုမသေမျိုး များသည် ဒုက္ခပေးရန် လာခဲ့လျှင်ပင် ခြိမ်းခြောက်လာကြမည် ဖြစ်သော်လည်း နောက်ဆုံးတွင် အရိုအသေဖြင့် ပြန်သွားကြရလိမ့်မည်။

ဆန်းတောင်မှ ကျင့်ကြံသူများသည် မသေမျိုး ကိုပင် မခေါ်နိုင်သလို၊ ကပ်ဘေးကျော်ဖြတ်ခြင်းအဆင့် တစ်ယောက်ကို ခေါ်နိုင်လျှင်ပင် အမြင့်ဆုံးဖြစ်ပေလိမ့်မည်။

ဆန်းတောင် တောင်ခြေတွင် အဆောက်အအုံဟောင်း တစ်ခုရှိသည်။

၎င်းကို ရှေးဟောင်းအဆောက်အအုံဟု ခေါ်နိုင်ရသည့် အကြောင်းရင်းမှာ အပေါ်တွင် မသေမျိုးစွမ်းအင် အနည်းငယ် ကျန်ရစ်နေသောကြောင့် ဖြစ်သည်။

ထိုအဆောက်အအုံသည် မသေမျိုး၏ ဖျက်ဆီးမှုကို ခံခဲ့ရဖူးကြောင်း သိသာသည်။

ဆူဂါအိုဟူသည် ထိုနေရာကို ကြည့်၍ ဖန့်ချန်ကို မိတ်ဆက်ပေးသည်။

"မိတ်ဆွေ ဖန့်၊ အဲဒီ ရှေးဟောင်းအဆောက်အအုံနာမည်က ထျန်းရှင်း ပါ"

"ဘာသမိုင်းကြောင်း ရှိလို့လဲ"

ဖန့်ချန်က အလွတ်သဘော မေးလိုက်သည်။

"သမိုင်းကြောင်းကို ပြောရရင်တော့ မသေးဘူးဗျ ကျုပ်တို့ ဆန်းတောင်ရဲ့ နာမည်အကြီးဆုံးနေရာက ဒီ ထျန်းရှင်း ပါပဲ"

"လွန်ခဲ့တဲ့ နှစ်ပေါင်း ၆,၀၀၀ က တက်လှမ်းခြင်းအဆင့် ရှိသူတစ်ယောက်က ဒီနေရာမှာ ကျင့်ကြံခဲ့တယ် မသေမျိုးအဆင့်ကို တက်လှမ်းတဲ့နေ့မှာပဲ ရန်သူတွေက လာရှာတယ် အဲဒီ ရန်သူက မသေမျိုးတစ်ယောက်ကို အကူအညီတောင်းခဲ့ပေမဲ့ ဒီလူသစ် မသေမျိုးက လက်တစ်ဖက်တည်းနဲ့ သတ်ပစ်လိုက်တယ် "

ဆူဂါအိုဟူက ပြုံး၍ ဆက်ပြောသည်။

"နောက်တော့ ဒီမသေမျိုး က ဒီနေရာကနေ ထွက်ခွာသွားပြီး ပြန်မလာတော့ဘူး အဲဒီကတည်းက ဒီနေရာက ပေါင်းစပ်ခြင်းအဆင့် အကြီးအကဲတွေ တရားကျင့်တဲ့နေရာ ဖြစ်လာတယ် သူတို့အားလုံးက ထျန်းရှင်း ကို အသုံးပြုပြီး ပေါင်းစပ်ခြင်းအဆင့်ကို အောင်မြင်ဖို့ ကြိုးစားကြပြီး အောင်မြင်သူတွေလည်း အများကြီး ရှိခဲ့တယ် "

"……"

ဖန့်ချန်၏ အမူအရာသည် ရှုပ်ထွေးသွားပြီး ထိုနေရာကို တစ်ချက်ကြည့်လိုက်ရာ ပေါင်းစပ်ခြင်းအဆင့် ကျင့်ကြံသူ အချို့ ထိုနေရာတွင် တရားကျင့်နေသည်ကို တွေ့လိုက်ရသည်။

"ဒီနေရာက မသေမျိုး ထွက်ပေါ်ခဲ့ဖူးပေမဲ့ ဒီနေရာကို အသုံးပြုပြီး ပေါင်းစပ်ခြင်းအဆင့် တက်လှမ်းတာက…… နောင်ရေးအတွက်လမ်းကို ပိတ်လိုက်တာ မဟုတ်ဘူးလား "

ဖန့်ချန်သည် ခေါင်းကို ဖြည်းညှင်းစွာ ခါလိုက်သည်။

ဆူဂါအိုဟူက အံ့သြသွားသည်။

"မိတ်ဆွေ ဖန့် အဲဒီလို ဘာလို့ ပြောရတာလဲ ပေါင်းစပ်ခြင်းအဆင့် အောင်မြင်ပြီဆိုရင် ကပ်ဘေးကျော်ဖြတ်ဖို့ အခွင့်အရေး ရှိတာပဲ ကပ်ဘေးကို မကျော်ဖြတ်နိုင်ရင်တောင် ပေါင်းစပ်ခြင်းအဆင့်ဆိုတာ အထက် ၃ ဆင့် အကြီးအကဲပဲ၊ ရှေ့ရေးက ကောင်းပါတယ်……"

"ဟုတ်သားပဲ……"

ဖန့်ချန် နားလည်လိုက်သည်

ဆူဂါအိုဟူသည် လေလွင့် ကျင့်ကြံသူဖြစ်ပြီး ချင်းယွမ်ဈေးရှိ ကျင့်ကြံသူများသည် နန်ချင်း ကြယ်တာရာနယ်မြေ တွင် အောက်ဆုံးအလွှာသာ ဖြစ်သည်။

သူတို့တွင် ဝေးလံသော နောင်ရေးအတွက် စဉ်းစားရန် စွမ်းအင်နှင့် အရင်းအမြစ် မရှိကြဘဲ လက်ရှိ အဆင့်ကိုသာ အာရုံစိုက်နေရသည်။

ပေါင်းစပ်ခြင်းအဆင့် မှ တာအိုပေါင်းစပ်ခြင်းအဆင့် သို့ တက်လှမ်းရာတွင် စွမ်းအင်နှင့် သက်တမ်း တိုးမြှင့်နိုင်သဖြင့် ပေါင်းစပ်ရမည့် တာအိုလမ်းစဉ် က အရေးမကြီးတော့ပေ။

အကယ်၍ ရွေးချယ်လိုက်သည့် လမ်းစဉ်က ပိုခက်ခဲလေ ပေါင်းစပ်ခြင်းအဆင့် အောင်မြင်ရန် ပိုမိုခက်ခဲလေ ဖြစ်သည်။

ထျန်းရှင်း ကဲ့သို့သော နေရာများသည် ပေါင်းစပ်ခြင်းအဆင့် ကျင့်ကြံသူများအတွက် သင့်တော်သည်ဟု ဆိုနိုင်သလို၊ သူတို့တွင် အခြားရွေးချယ်စရာ မရှိခြင်းကြောင့်လည်း ဖြစ်နိုင်သည်။

"မိတ်ဆွေ ဆူ၊ ချင်းယွမ်ဈေးမှာ ပေါင်းစပ်ခြင်းအဆင့်အတွက် သင့်တော်တဲ့နေရာတွေ များသလား"

ဖန့်ချန် မေးလိုက်သည်။

"များတာပေါ့၊ ဆန်းတောင်မှာတင် တစ်နေရာရှိတယ်၊ တခြားတောင်တွေမှာဆို ပိုတောင်များသေးတယ် ချင်းယွမ်ဈေးအပြင်ဘက်မှာလည်း အများကြီးပဲ ဒါပေမဲ့ ကျညပ်မှာတော့ အဲဒီလို အခွင့်အရေး မရှိတော့ပါဘူး ဒီဘဝမှာ စိတ်ဝိညာဥ်ထွက်ခွာခြင်းအဆင့် အထိ ရောက်ဖို့ပဲ လိုတော့တယ် အလယ်၃ ဆင့် ကို ဝင်ရောက်ခြင်းက ကျုပ်ရဲ့ အမြင့်ဆုံး အဆင့်ပဲ ဖြစ်ပါလိမ့်မယ် "

ဆူဂါအိုဟူသည် အစပိုင်းတွင် စိတ်လှုပ်ရှားစွာ ပြောသော်လည်း နောက်ဆုံးတွင် စိတ်မကောင်းဖြစ်သွားသည်။

ထို့နောက် စကားလမ်းကြောင်း လွှဲလိုက်ပြီး

"မိတ်ဆွေ ဖန့်က နောက်ခံကောင်းတယ်၊ အရင်းအမြစ်ရှိတယ်၊ နောင်တစ်ချိန်မှာ ပေါင်းစပ်ခြင်းအဆင့် အောင်မြင်ဖို့ အခွင့်အရေး ရှိမှာပါ"

ဟု ပြုံး၍ ပြောသည်။

ဖန့်ချန်သည် ထိုစကားထဲတွင် အလိုက်အထိုက် ပြောခြင်းနှင့် ချော့မော့ခြင်းတို့ ပါဝင်နေကြောင်း သိလိုက်သည်။

သူကိုယ်တိုင်ပင် တာအိုပေါင်းစပ်ခြင်းအဆင့် တက်လှမ်းနိုင်မည်ဟု မယုံကြည်ပေ။

"အကယ်၍ ဝမ်ချွမ်းမြစ်ကို ရွေးချယ်ပြီး တာအိုပေါင်းစပ်ခြင်းအဆင့် တက်လှမ်းမယ်ဆိုရင်…… ဟုတ်တယ်၊ ရှုံးနိမ့်ဖို့ အခွင့်အရေး ရှိတာပဲ ဒါပေမဲ့ ကိစ္စမရှိပါဘူး၊ ခြေတစ်လှမ်းချင်းစီပဲ သွားမယ်၊ အဆုံးအဖြတ်က ငါ့လက်ထဲမှာပဲ ရှိတယ် "

ဖန့်ချန် စိတ်ထဲတွင် တွေးလိုက်သည်။

ခဏအကြာတွင် လူအုပ်ကြီးသည် တောင်ခြေရှိ ဈေးသို့ ရောက်ရှိလာသည်။

ထိုဈေးသည် အလွန်ပင် ကြီးမားလှသည်။

အလယ်ပိုင်းဒေသရှိ ယုံအန်းမြို့ထက် ၁၀ ဆကျော် ကြီးမားသည်။

ယခုအချိန်သည် ချင်းယွမ်ဈေး၏ အကြီးစားဈေးပွဲတော် ရက်ဖြစ်သဖြင့် တောင်ပေါင်းထောင်ကျော်မှ ကျင့်ကြံသူများ ဆင်းလာကြရာ ဈေးမှာ ပုံမှန်ထက် ပိုမိုစည်ကားနေသည်။

လမ်းတိုင်းတွင် ပစ္စည်းရောင်းချသူများ ရှိပြီး ရောင်းချသည့် ပစ္စည်းများမှာ ကျင့်ကြံသူများ လိုအပ်သည့် ဆေးလုံးများ၊ ဝိညာဉ်ပစ္စည်းများစသည်တို့ ဖြစ်ကြသည်။

အလယ်ပိုင်းဒေသနှင့် မတူသည်မှာ ထိုနေရာတွင် ကျင့်ကြံသူ နှင့် သာမန်လူသားကို ကွဲပြားစွာ ခွဲခြားထားပြီး ဈေးအတွင်း သာမန်လူသားတစ်ယောက်မျှ မတွေ့ရပေ။

ဖန့်ကျစ်ရွှယ်တို့သည် ဆေးဆိုင်တစ်ဆိုင်သို့ ဝင်သွားကြသည်။

သူတို့သည် ဝိညာဉ်ကျောက်တုံးငယ်များကို အသုံးပြု၍ ဆေးများ ဝယ်ယူနေသည်ကို ကြည့်ပြီး ဆူဂါအိုဟူနှင့် တပည့်များမှာ အားကျနေကြသည်။

ဖန့်ချန်သာလျှင် ဖန့်ကျစ်ရွှယ်တို့က ဈေးသက်သာသဖြင့် ဝယ်နေကြကြောင်း သိသည်။

အကြောင်းရင်းမှာ နန်ချင်း ကြယ်တာရာနယ်မြေတွင် အရင်းအမြစ်များ ကြွယ်ဝသောကြောင့် အဆင့်နိမ့် ဆေးဝါးများ၏ ဈေးနှုန်းမှာ အလယ်ပိုင်းဒေသထက် သက်သာသည်။

သို့သော် အဆင့်မြင့် ပစ္စည်းများ၏ ဈေးနှုန်းမှာမူ တူညီနေဆဲ ဖြစ်သည်။

ထိပ်တန်း အရင်းအမြစ်များမှာ လိုအပ်ချက်များနေသည်ကို ပြသနေသည်။

"ဆရာ၊ ကျွန်တော်တို့လည်း ပစ္စည်းသွားဝယ်လိုက်ဦးမယ် "

ဆူဂါအိုဟူ၏ တပည့်လေးဦးက ခွင့်ပြုချက်တောင်းပြီးနောက် သိကျွမ်းသည့် ဆိုင်များဘက်သို့ သွားလိုက်ကြသည်။

"မိတ်ဆွေ ဖန့်၊ ကျွန်တော်တို့လည်း လှည့်ကြည့်ကြမလား "

ဆူဂါအိုဟူက အကြံပြုသည်။

ဖန့်ချန် ခေါင်းညိတ်ပြီး ဖန့်ကျစ်ရွှယ်တို့ကို မှာကြားလိုက်သည်။

ဆူဂါအိုဟူ ကြည့်နေသော ဝိညာဉ်ပစ္စည်းများသည် ဖန့်ချန် စိတ်မဝင်စားသဖြင့် သူသည် သတင်းအချက်အလက်များကိုသာ စုဆောင်းနေသည်။

သူသည် သူ၏ ကိုယ်ပွားများအတွက် လိုအပ်သော ပစ္စည်းများ သို့မဟုတ် ထိပ်တန်း ဝိညာဉ်ကျောက်တုံးများကို ရှာဖွေနေသည်။

ဝမ်ချွမ်းမြစ်သို့ မသွားနိုင်သော်လည်း သူ၏ ကိုယ်ပွားများအတွက် ကျင့်ကြံရန် လိုအပ်သည့် ပစ္စည်းများ ရရှိပါက တာအိုကျင့်စဉ် နယ်မြေကို ဖွင့်လှစ်ရန် တန်ဖိုးရှိနေသေးသည်။

"ဟင်၊ ဒီနေရာမှာလည်း နတ်ဘုရားရင်းမြစ် ရောင်းတာလား "

ဖန့်ချန်သည် ဆိုင်တစ်ဆိုင်ကို ဖြတ်သွားရင်း အံ့သြသွားသည်။

ထိုဆိုင်တွင် ရောင်းချနေသည်မှာ သူ အရင်က မြင်ဖူးသည့် နတ်ဘုရားရင်းမြစ် များဖြစ်သည်။

"မိတ်ဆွေ ဖန့်၊ ဒီဟာတွေကို စိတ်မဝင်စားပါနဲ့၊ ဒါက ပိုက်ဆံကုန်တတ်တဲ့ အရာတွေပါ "

ဆူဂါအိုဟူက စိတ်မကောင်းစွာဖြင့် ပြောသည်။

သူလည်း အရင်က ဒီအရာနှင့် ပတ်သက်ပြီး အမှတ်တရ ရှိခဲ့ပုံရသည်။

သူ့ကို သတိပေးပြီးနောက် ဆူဂါအိုဟူသည် အခြားဆိုင်သို့ သွားလိုက်သည်။

ဖန့်ချန်သည်လည်း အခွင့်အရေးယူ၍ သူ၏ ဝိညာဉ်စွမ်းအင်ဖြင့် ထိုနတ်ဘုရားရင်းမြစ်ကျောက် များကို စစ်ဆေးကြည့်လိုက်သည်။

"တကယ်ပဲ အလကားပါလား၊ တစ်လုံးမှ ကောင်းတာ မပါဘူး "

ဖန့်ချန် စိတ်ထဲတွင် တွေးရင်း ပြန်ထွက်ခါနီးတွင် ဆိုင်ထဲသို့ ကုန်ပစ္စည်းအသစ်များ ရောက်လာသည်ကို တွေ့လိုက်ရသည်။

ထိုထဲတွင် မီးတောင်ချော်ရည်ကဲ့သို့ အပြင်ပန်းတွင် သာမန်အတိုင်း ရှိနေသော်လည်း အတွင်းထဲတွင် ထူးခြားသည့် တစ်ခုခု ရှိနေသည်။

"ဒီအငွေ့အသက်…… ဒီပုံစံ…… ရှရန်းယန်မီး နဲ့ ဆင်တူတယ်……"

အခန်း (၁၂၆၄) - ကွမ်းယွမ်ထန်း

"တကယ်လို့သာ ဒါက တကယ်ပဲ ရှရန်းယန်မီး ဖြစ်မယ်ဆိုရင် ဖန့်ထျန်းဇွန် ရဲ့ ကျင့်ကြံခြင်းအဆင့်က နောက်ထပ် အနည်းငယ် တိုးလာဦးမှာပဲ ဘေးဒုက္ခဖြတ်ကျော်ခြင်း အဆင့် ကိုတောင် တက်လှမ်းနိုင်လိမ့်မယ် "

ဖန့်ချန်၏ စိတ်အာရုံမှာ အနည်းငယ် လှုပ်ရှားသွားသည်။

ဒါဟာ ကောင်းတဲ့ကိစ္စပဲ သူ၏ ထို ကိုယ်ပွား များက ပြင်ပ အရာလို့ ထင်ရပေမဲ့ တကယ်တမ်းကျတော့ သူ့ရဲ့ လမ်းစဉ် တွေ ဖြစ်ကြသည်။

ယခု သူသည် ပေါင်းစပ်ခြင်းအဆင့် သာ ဖြစ်သေးပေမဲ့ သူ၏ ခန္ဓာကိုယ်တွင် လမ်းစဉ်ဆယ်မျိုးကို ပေါင်းစပ်ထားပြီး ဖြစ်သည်။

ထိုအထဲမှ ဖန့်ထျန်းဇွန် နှင့် ဖန့်ရွှမ်ယန် တို့မှာ တာအိုပေါင်းစပ်ခြင်း အဆင့် တွေ ဖြစ်ကြသည့်အတွက် ဖန့်ချန်၏ စွမ်းအားမှာ အလွန်ထူးဆန်းနေသည်။

အဆင့်ကိုပဲ ကြည့်မည်ဆိုလျှင် သူသည် ပေါင်းစပ်ခြင်း အဆင့် ဖြစ်သော်လည်း နည်းလမ်းများကိုပဲ ယှဉ်ကြည့်မည်ဆိုပါက တစ်ဦးချင်းစီ တိုက်ခိုက်ရာတွင် ရှစ်မျက်နှာအရပ် ဓားကျမ်း ကို အသုံးမပြုဘဲနှင့်ပင် တာအိုပေါင်းစပ်ခြင်းအဆင့် အစောပိုင်း ကျင့်ကြံသူများကို အနိုင်ယူနိုင်သည်။

"ဆိုင်ရှင် ဒီနတ်ဘုရားရင်းမြစ်ကျောက် တွေက ဘယ်လောက်လဲ "

ဖန့်ချန်သည် ဆိုင်ထဲသို့ လျှောက်ဝင်သွားပြီး ကျောက်တုံးအနည်းငယ်ကို ကိုင်တွယ်ကြည့်ကာ မေးလိုက်သည်။

"ဒါတွေက အခုမှရောက်တဲ့ ပစ္စည်းတွေ၊ အဆင့်မသတ်မှတ်ရသေးဘူး၊ အခုလောလောဆယ် ရောင်းဖို့ မလွယ်သေးဘူး အဆင့်သတ်မှတ်ပြီးသား ကျောက်တုံးတွေကို ကြည့်ချင် ကြည့်နိုင်တယ် "

ဆိုင်ရှင်က စိတ်မပါ့တပါဖြင့် ပြောသည်။

မျက်စိရှေ့က လူက သူစိမ်းဖြစ်နေသလို၊ ဒီနားမှာ ဒီလိုကစားလေ့ရှိတဲ့ ကျင့်ကြံသူမျိုးလည်း မဟုတ်မှန်း သိသာတာကြောင့် အလကားကြည့်နေမည့်သူဟု သတ်မှတ်လိုက်သည်။

"ငွေပေးမယ့်သူကို မရောင်းဘူးလား "

ဖန့်ချန်က ပြုံး၍ ပြောသည်။

ဆိုင်ရှင်က မနေနိုင်ဘဲ ရယ်မောလိုက်သည်။

"ခင်ဗျား ဘယ်ကျောက်တုံးကို ကြိုက်လဲ၊ ဈေးတစ်ခု ခေါ်ကြည့် အဆင်ပြေတဲ့ ဈေးဆိုရင်တော့ ကျုပ်အဆုံးအဖြတ်ပေးပြီး အဆင့်မသတ်မှတ်ဘဲ တန်းရောင်းပေးနိုင်တယ် ဒါပေမဲ့ ခင်ဗျား ဈေးခေါ်ပြီး ကျုပ်က သဘောတူလိုက်တဲ့အခါ ခင်ဗျားက မဝယ်ဘူးဆိုရင်တော့ ကျုပ်ကို အပြစ်မတင် နဲ့"

"ဒီကျောက်တုံးကို အလယ်အလတ် ဝိညာဉ်ကျောက်တုံး တစ်တုံးနဲ့ ရောင်းမလား"

ဖန့်ချန်က ကျောက်တုံးတစ်ခုကို ညွှန်ပြကာ ပြောလိုက်သည်။

ဆိုင်ရှင်က တစ်ချက်ကြည့်လိုက်ပြီး အချိန်အနည်းငယ်ကြာအောင် စေ့စေ့စပ်စပ် ကြည့်ပြီးနောက် တိုက်ရိုက် ခေါင်းညိတ်သည်။

"ရောင်းမယ် "

ဖန့်ချန်က ငွေပေး၊ ကျောက်တုံးကို သိမ်းပြီး အရောင်းအဝယ်ကို ပြီးမြောက်စေသည်။

တစ်ခွန်းမှ အပိုစကားမပြောပေ။

ဆိုင်ရှင်က ထိုအပြုအမူကို မြင်တော့ အရင်က သဘောထားကို ချက်ချင်း ပြောင်းလဲလိုက်သည်။

မျက်နှာအမူအရာမှာ နူးညံ့သွားပြီး လက်နှစ်ဖက်ကို ယှဉ်ကာ ဂါရဝပြုသည်။

"အစ်ကိုကြီး စိတ်မရှိပါနဲ့၊ ဒီအလုပ်က ဒီလိုပါပဲ အမြဲတမ်း ကြည့်ချင်သလိုလိုနဲ့ မေးလိုက်၊ ကြည့်လိုက်၊ နောက်ဆုံး မဝယ်တဲ့သူတွေကိုပဲ တွေ့ရလွန်းလို့ပါ အခုလေးတင်ကလည်း အစ်ကိုကြီးကို သူစိမ်းဖြစ်နေတော့ အဲဒီလိုလူမျိုး ထင်သွားမိလို့ပါ"

ခဏရပ်ပြီးနောက် သူက စမ်းသပ်မေးမြန်းသည်။

"အစ်ကိုကြီး ဒီလမ်းမကြီးမှာ မလည်ပတ်ဖူးဘူး မဟုတ်လား "

ချင်းယွမ်ဈေး လို လမ်းမမျိုးတွေက အများကြီး ရှိသည်။

ဒီနေရာက ဆန်းတောင်နဲ့ နီးပြီး အဓိက အရောင်းအဝယ် လုပ်ရသူတွေကလည်း ဆန်းတောင်ကဲ့သို့သော အောက်ခြေအဆင့် ဝိညာဉ်တောင်များမှ ထွက်လာသည့် ကျင့်ကြံသူများ ဖြစ်သည်။

"ဖုန်းဆိုင်ရှင် သူက အစ်ကိုကြီးနဲ့ မရင်းနှီးတာက ပုံမှန်ပါပဲ၊ သူက ဆန်းယွင်ဂိုဏ်း ရဲ့ အကြီးကဲပါ "

ရုတ်တရက် ကျင့်ကြံသူတစ်စု ဆိုင်ထဲသို့ လျှောက်ဝင်လာကြသည်။

ခေါင်းဆောင်ဖြစ်သူသည် ဝိညာဥ်သန္ဓေသားအဆင့် ဖြစ်ပြီး ဘေးကလူများမှာလည်း ဝိညာဥ်သန္ဓေသား အဆင့် အစောပိုင်းမှ အလယ်ပိုင်းအထိ အသီးသီး ဖြစ်ကြသည်။

ဖန့်ချန်သည် ထိုလူကို အနည်းငယ် မှတ်မိသလိုရှိသည်။

သူသည် ဆန်းတောင်တွင် အတော်လေး နာမည်ကြီးသည့် လေလွင့် ကျင့်ကြံသူ တစ်ဦး ဖြစ်သည်။

"ဆန်းယွင်ဂိုဏ်းလား အော်၊ ဒီလိုကိုး "

ဖုန်း ဆိုင်ရှင်သည် ချက်ချင်း သဘောပေါက်သွားသည်။

ဆိုင်ရှင်တစ်ယောက် ဖြစ်သည့်အတွက် သူ့တွင်လည်း အနည်းငယ် နောက်ခံရှိပြီး ဆန်းတောင်တွင် ဂိုဏ်းသစ်တစ်ခု တိုးလာကြောင်း၊ ထိုဂိုဏ်းတွင် ပေါင်းစပ်ခြင်း အဆင့် ကျင့်ကြံသူ ရှိကြောင်း ကြားသိထားပြီး ဖြစ်သည်။

"အစ်ကိုကြီးက ဆန်းယွင်ဂိုဏ်းကမှန်း မသိလိုက်ဘူး၊ မသိနားမလည် ဖြစ်ရတာ ခွင့်လွှတ်ပေးပါ "

ဖုန်း ဆိုင်ရှင် က ပြုံးကာ ဂါရဝပြုသည်။

အခုလေးတင် ဖန့်ချန်၏ အကြောင်းကို ထုတ်ပြောလိုက်သည့် ဝိညာဥ်သန္ဓေသားအဆင့် နောက်ပိုင်း ကျင့်ကြံသူကလည်း ဂါရဝပြုသည်။

"အစ်ကိုကြီးကို ဘယ်လို ခေါ်ရမလဲ ကျွန်တော်က ဆန်းတောင်က ဝေချန် ပါ "

"ဖန့်ဝမ်လီ ပါ "

ဖန့်ချန်က ဂါရဝပြုသည်။

ဝေချန်က ဆိုင်ထဲက ကျောက်တုံးတွေကို တစ်ချက်ကြည့်ပြီး စိတ်ဝင်တစား မေးသည်။

"ဖန့်အစ်ကိုကြီးလည်း နတ်ဘုရားရင်းမြစ်ကျောတုံး တွေ ကို စိတ်ဝင်စားလို့လား ဒါဆိုရင် နောက်ပိုင်း အချင်းချင်း အကြံဉာဏ်တွေ ဖလှယ်ကြတာပေါ့ "

"အရင်က အနည်းငယ် ကစားဖူးပါတယ် ဒီနေ့က ဂိုဏ်းသားတွေကို ခေါ်ပြီး ဈေးတန်းကို အလည်လာရင်းနဲ့ အမှတ်တမဲ့ ဖြတ်သွားမိလို့ အလကား ဝယ်ကြည့်တာပါ "

ဖန့်ချန်က ပြုံး၍ ပြောသည်။

ဒီလိုလား၊ အမှတ်တမဲ့ ဝယ်ကြည့်တာပဲ ဖြစ်ပါလိမ့်မယ်။

ဖုန်းဆိုင်ရှင် က စိတ်ထဲတွင် အနည်းငယ် စိတ်ပျက်သွားသော်လည်း တစ်ဖက်လူကလည်း လက်မနှေးပေ။

ကျောက်တုံးတစ်တုံးကို ဝယ်တာတောင် အလယ်အလတ် ဝိညာဉ်ကျောက်တုံးတစ်တုံးဖြင့် တန်းပေးလိုက်တာဆိုတော့ ဒီနေ့ သူအမြတ်တော်တော် ရနိုင်ပါသေးသည်။

ဝေချန်က ဖန့်ချန်ကို ဒီအကြောင်းအရာမှာ သိပ်ကျွမ်းကျင်သူ မဟုတ်ဟု ထင်ကာ စကားအနည်းငယ် ပြောဆိုပြီးနောက် သူ၏ သူငယ်ချင်းများနှင့်အတူ ဆိုင်ထဲမှ ကျောက်တုံးများကို လေ့လာကြသည်။

ဖန့်ချန်လည်း သူတို့ကို မနှောင့်ယှက်တော့ဘဲ နောက်ထပ် ကျောက်တုံးအနည်းငယ်ကို လိုသလို ရွေးယူလိုက်သည်။

ဈေးနှုန်းအားလုံးမှာလည်း အလယ်အလတ် ဝိညာဉ်ကျောက်တုံးတစ်တုံးစီပင် ဖြစ်သည်။

ဖုန်းဆိုင်ရှင် လည်း တစ်ခုချင်းစီကို သဘောတူပြီး နှစ်ဦးနှစ်ဖက် ချောချောမောမောပင် အရောင်းအဝယ် ပြီးမြောက်သွားသည်။

ထိုအထဲတွင် ရှရန်းယန်မီး ဖြစ်နိုင်ခြေရှိသည့် ကျောက်တုံးလည်း ပါဝင်သည်။

အလယ်အလတ် ဝိညာဉ်ကျောက်တုံး အနည်းငယ်မျှဖြင့် ဒီလို အကျိုးအမြတ်ကို ရလိုက်သည့်အတွက် ဖန့်ချန်သည် ကျေနပ်စွာဖြင့် ဆိုင်ထဲမှ ထွက်ခွာလာခဲ့သည်။

အမှတ်တမဲ့ပင် ဆူဂါအိုဟူ သည်လည်း လက်နက်များ ရောင်းသည့်ဆိုင်မှ ပြုံးရွှင်စွာ ထွက်လာသည်ကို တွေ့ရသည်။

"ဒီနေ့ ကံကောင်းလိုက်တာ၊ ကျုပ်ရဲ့ အဝါရောင်အဆင့် ထိပ်တန်း လက်နက်က တိုက်ပွဲတွေကြောင့် နည်းနည်း ပျက်စီးသွားလို့ ပြင်ဖို့ ဝိညာဉ်ကျောက်တုံး ၅၀၀ လောက် ကုန်မယ် ထင်ထားတာ ဘယ်သူထင်မလဲ ဒီနေ့ ဆိုင်မှာ အထူးအစီအစဉ် ရှိနေလို့ ၁၀ ရာခိုင်နှုန်း လျှော့ပေးလိုက်တာ၊ ဝိညာဉ်ကျောက်တုံး ၅၀ သက်သာသွားတယ် "

ဆူဂါအိုဟူက ရယ်မောပြောဆိုသည်။

"ဒါဆိုလည်း ဂုဏ်ယူပါတယ် မိတ်ဆွေဆူ "

ဖန့်ချန်က ပြုံး၍ ဂါရဝပြုသည်။

ခဏရပ်ပြီးနောက်

"ဒီနားမှာ ဝိညာဉ်ဆေးဝါး သီးသန့် ရောင်းတဲ့ဆိုင်တွေ ရှိလား၊ အရမ်းကြီးပြီး ဆေးမျိုးစုံရှိတဲ့ ဆိုင်မျိုးဆိုရင် ပိုကောင်းပါတယ် "

ဆူဂါအိုဟူက စဉ်းစားလိုက်ပြီး စမ်းသပ်မေးမြန်းသည်။

"ဝိညာဉ်ဆေးဆိုင်တွေကတော့ ဒီမှာ အများကြီးပဲ ဒါပေမဲ့ မိတ်ဆွေဖန့် လိုချင်တဲ့ ဆေးဝါးက ဘယ်အဆင့်လဲ "

ဖန့်ချန်က စဉ်းစားလိုက်သည်။

ရွှမ်ယန်ခန္ဓာလေးဆင့် ၏ တတိယအဆင့်အတွက် လိုအပ်သည့် ဆေးဝါးများတွင် အချို့မှာ အဆင့်မမြင့်ပေ၊ အထောက်အကူပြု ဆေးဝါးများသာ ဖြစ်သည်။

အရင်ဆုံး ဒီနေရာမှာ ဝယ်လို့ရမရ ကြည့်ကြည့်ဦးမည်။

"မြေအဆင့် ဝိညာဉ်ဆေးဝါး ရောင်းတဲ့ဆိုင်ဆိုရင် လုံလောက်ပါပြီ "

ဖန့်ချန်က ပြောသည်။

"မြေအဆင့် ဝိညာဉ်ဆေးဝါး "

ရှုကောက်ဟူ၏ မျက်လုံးများမှာ အနည်းငယ် တုန်လှုပ်သွားသည်။

ဒီလိုအရာမျိုးက သူ့လို ဝိညာဥ်သန္ဓေသားအဆင့် ကျင့်ကြံသူအတွက် အလွန်ဝေးကွာလှသည်။

ရံဖန်ရံခါမှသာ နက်နဲအဆင့် ဆေးဝါးများကိုသာ ထိတွေ့ဖူးသည်။

ဒါဟာ ဆန်းယွင်ဂိုဏ်းက ပေါင်းစပ်ခြင်းအဆင့် ဂိုဏ်းချုပ်ကြီးက ဒီ ဖန့်အကြီးကဲ ကို ဝယ်ခိုင်းတာ ဖြစ်လိမ့်မည်။

ထိုသို့ တွေးမိသောအခါ ဆူဂါအိုဟူက အလေးအနက် စဉ်းစားကာ ပြောလိုက်သည်

"မြေအဆင့် ဝိညာဉ်ဆေးဝါးတွေ ရောင်းတဲ့ဆိုင်က အဓိက ဧရိယာနားမှာပဲ ရှိတယ် ဒီနားမှာတော့ ရှာလို့ မရဘူး ချင်းယွမ်ဈေးမှာ အကျော်ကြားဆုံး ဆေးဆိုင်ဆိုရင်တော့ ကွမ်းယွမ်ထန်း ကိုပဲ ပြောရမှာပါ"

"ကွမ်းယွမ်ထန်းက ချင်းယွမ်ဈေးထဲမှာပဲ ဝိညာဉ်ဆေးဆိုင်ပေါင်း ၂၀၀ ကျော် ရှိတယ် ချင်းယွမ်ဈေးအပြင်ဘက်မှာလည်း သူတို့ဆိုင်တွေ ရှိတယ် သူတို့ရဲ့ နောက်ကွယ်က အကြီးအကဲကတော့ ဆန်းတောင်က ရှုကွမ်းယွမ် အကြီးကဲ ပါ၊ သူကတော့ လွတ်လပ်သောမသေမျိုး တစ်ဦး ပါ "

ကွမ်းယွမ်ထန်း

ဖန့်ချန်က ခေါင်းညိတ်လိုက်ပြီး ဖန့်ကျစ်ရွှယ် တို့ကို ပြောပြရန် စိတ်ကူးကာ တစ်ယောက်တည်း ကွမ်းယွမ်ထန်းဘက်သို့ သွားကြည့်ရန် ဆုံးဖြတ်လိုက်သည်။

ထိုအချိန်တွင် မလှမ်းမကမ်းမှ ရန်ဖြစ်သံများကို ကြားလိုက်ရသည်။

ဆူဂါအိုဟူ အနည်းငယ် တုန်လှုပ်သွားပြီး ထိုနေရာသို့ အလျင်အမြန် ကြည့်လိုက်သည်။

အကြောင်းမှာ ထိုအသံများထဲတွင် သူ အလွန်ရင်းနှီးသည့် အသံများ ပါဝင်နေသည်။

ထိုအသံများသည် သူ၏ ဂိုဏ်းသားများ၏ အသံများပင် ဖြစ်သည်။

ဖန့်ချန်လည်း ထိုနေရာသို့ ကြည့်လိုက်သောအခါ ရဆူဂါအိုဟူ၏ ဂိုဏ်းသား ရွှေအမြုတေအဆင့် ကျင့်ကြံသူတစ်ဦးသည် အခြေခံတည်ဆောက်ခြင်းအဆင့် သုံးဦးနှင့်အတူ လူတစ်စုနှင့် အော်ဟစ် ရန်ဖြစ်နေသည်ကို တွေ့ရသည်။

"မိတ်ဆွေဖန့် ရှက်ဖို့ကောင်းလိုက်တာ "

ဆူဂါအိုဟူ၏ မျက်နှာတွင် အတင်းပြုံးနေသည့် အရိပ်အယောင်များ ပေါ်လာသည်။

"အဲဒီလူတွေနဲ့ ရန်ဖြစ်နေတာက ဆန်းတောင်က ကျင့်ကြံသူတွေနဲ့ တူတယ် "

ဖန့်ချန်က သတိပေးသည်။

ဆူဂါအိုဟူ ခေါင်းညိတ်လိုက်ပြီး ထိုကျင့်ကြံသူများကို ကြည့်လိုက်သည်။

မျက်နှာမှာ အနည်းငယ် မှိုင်းညှိုးသွားသည်။

"ဒါက ဆန်းတောင်က ဒွမ်း မိသားစုက ကျင့်ကြံသူတွေပဲ "

ဒီဒွမ်းမိသားစုတွင် ပေါင်းစပ်ခြင်းအဆင့် အဘိုးအို ရှိသည်။

အစောပိုင်းတုန်းက ဆန်းယွင်ဂိုဏ်းသို့ ကိုယ်တိုင် လာရောက်ခဲ့ဖူးသော်လည်း ကျောက်ျကျာင်လုံ ၏ ရိုက်နှက်ခြင်းကို ခံခဲ့ရပြီး အလွန်အရှက်ရခဲ့ဖူးသည်။

ဆူဂါအိုဟူ ဝင်မပါချင်ပေ။

အခု ဝင်သွားရင် အရှက်ရရုံပဲ ရှိလိမ့်မည်။

ဘာပဲဖြစ်ဖြစ် ဒါက စကားများရုံပဲ ရှိမှာပါ။

ဒါပေမဲ့... ခဏလောက် နားထောင်ကြည့်ပြီးနောက် တစ်ခုခု လွဲနေသလို ခံစားရသည်။

နှစ်ဦးနှစ်ဖက် ရန်ဖြစ်နေသည့် အကြောင်းအရာသည် ဆန်းယွင်ဂိုဏ်းနှင့် ပတ်သက်နေသလိုပင်။

စေ့စေ့ကြည့်လိုက်သောအခါ ဖန့်ကျစ်ရွှယ် တို့သည်လည်း လူအုပ်ကြားထဲတွင် ရှိနေကြောင်း တွေ့လိုက်ရသည်။

ဖန့်ကျစ်ရွှယ်နှင့် လန်ယာဝင်ချိုး တို့၏ မျက်နှာမှာ အလွန် မည်းမှောင်နေသည်။