အခန်း (၆၉၁-၆၉၃)

အခန်း (၆၉၁) - အရေးကြီးကိစ္စ သုံးရပ်

~ကမ္ဘာ့ချိတ်ဆက်မှုသည် "တောင်နှင့် ပင်လယ် ကမ္ဘာ" နှင့် "ကျယ်ပြန့်သော ကမ္ဘာ"တို့ကို လုံးဝ ဆက်သွယ်ပေးလိုက်တော့၏။

အသစ်စက်စက် ဖြစ်ပေါ်လာသော "နယ်နိမိတ် ဒေသ" သည် မတည်ငြိမ်သေးသော်လည်း၊ ၎င်း၏ ကျယ်ပြန့်သော ဟင်းလင်းပြင်နှင့် ကစဥ့်ကလျား ဖြစ်နေသော စွမ်းအင်များကို ရှင်းလင်းစွာ မြင်တွေ့နေရသည်။

ကမ္ဘာ့စွမ်းအားနှင့် "နယ်မြေများ ပင်လယ်" ၏ စွမ်းအင်များမှ မွေးဖွားလာခြင်း ဖြစ်သောကြောင့်၊ ၎င်းသည် အလွန် ထူးခြားထင်ရှားနေ၏။

လူတိုင်း၏ စိတ်အာရုံထဲတွင်၊ နယ်မြေများ ပင်လယ် အတွင်းမှ ထွက်ပေါ်လာသော အစွမ်းထက်သည့် ပင်လယ်သတ္တဝါကြီးများ ထိုဒေသအတွင်း ကူးခတ်သွားလာနေသည်ကို မှုန်ဝါးဝါး မြင်တွေ့လိုက်ရသည်။

၎င်းတို့၏ စွမ်းအားများသည် ကွဲပြားကြ၏။ အချို့သည် "ဟင်းလင်းပြင် လမ်းစဉ် နယ်ပယ်" မဟာစွမ်းအားရှင်များနှင့် ယှဉ်နိုင်ပြီး၊ အချို့မှာမူ "ပေါင်းစည်းခြင်း နယ်ပယ်" ဘိုးဘေးကြီးများ၏ အရှိန်အဝါမျိုး ပိုင်ဆိုင်ထားကြသည်။

၎င်းတို့သည် နယ်မြေများ ပင်လယ် အတွင်း၌ ကာလကြာရှည်စွာ နေထိုင်လာခဲ့ကြသူများ ဖြစ်သဖြင့်၊ အခြား ကမ္ဘာများမှ မည်သည့် ရက်စက်ကြမ်းကြုတ်သော သားရဲများနှင့်မဆို ယှဉ်လျှင် ပိုမို သန်မာကြ၏။

ဤနေရာသည် ကမ္ဘာနှစ်ခုလုံးမှ ကျင့်ကြံသူများ မိမိတို့၏ သက်ဆိုင်ရာ "ဝိညာဉ် ကမ္ဘာ" အတွက် တိုက်ပွဲဝင်ရမည့် စစ်မြေပြင် ဖြစ်လာတော့မည်ကို လူတိုင်း နားလည်လိုက်ကြ၏။

နယ်နိမိတ် ဒေသတွင် အသာစီး ရယူနိုင်သူသည် စစ်ပွဲကို လွှမ်းမိုးနိုင်မည် ဖြစ်ပြီး၊ အောင်နိုင်ခြေ ပိုမို မြင့်မားပေလိမ့်မည်။

နယ်မြေအရှင်သခင် အနေဖြင့်၊ နင်ချီသည် ကမ္ဘာလောကနှင့် တစ်သားတည်း စိတ်ချင်းဆက်သွယ်ထားပြီး ဖြစ်ရာ၊ "နက်ရှိုင်းသော သစ္စာတရား နယ်မြေ" ရှိ အခြားသူများထက် ပိုမို နက်ရှိုင်းသော ထိုးထွင်းသိမြင်မှုကို ရရှိထားသည်။

ယခု ဖြစ်ပေါ်နေသော နယ်နိမိတ် ဒေသသည် တစ်ခုတည်းသော နေရာ မဟုတ်ပေ။ အချိန်ကြာလာသည်နှင့် အမျှ၊ တောင်နှင့် ပင်လယ် ကမ္ဘာ နှင့် ကျယ်ပြန့်သော ကမ္ဘာ ကြားတွင် နောက်ထပ် ဆုံမှတ်များ ပေါ်ထွက်လာဦးမည် ဖြစ်ပြီး၊ စစ်ပွဲများ ပြည့်နှက်နေသော နယ်နိမိတ် ဒေသများ ပိုမို များပြားလာပေလိမ့်မည်။

နင်ချီ၏ အမြင်တွင်... လက်ရှိ ဖြစ်ပေါ်နေသော နယ်နိမိတ် ဒေသသည် "ပေါင်းစည်းခြင်း နယ်ပယ်" အထိ အစွမ်းထက်သူများကိုသာ လက်ခံနိုင်စွမ်း ရှိသေးသည်။

"တသားတည်းဖြစ်ခြင်း နယ်ပယ်" ကျင့်ကြံသူ အများအပြားအတွက်ကော... သူတို့ စစ်မြေပြင်သို့ မထွက်ရတော့ဘူးလား။

ဟုတ်၏။ သူတို့သည်သာ ကမ္ဘာနှစ်ခု စစ်ပွဲ၏ အဖြေကို အဆုံးအဖြတ် ပေးမည့် အစစ်အမှန် အင်အားစုများ ဖြစ်ကြ၏။

ထို့ကြောင့် "တသားတည်းဖြစ်ခြင်း နယ်ပယ်" ကျင့်ကြံသူများနှင့် ထိုထက် ပိုမို စွမ်းအားကြီးမားသူများကိုပါ လက်ခံနိုင်စွမ်း ရှိမည့်၊ ပိုမို တည်ငြိမ်ခိုင်မာသော နယ်နိမိတ် ဒေသများ မလွဲမသွေ ပေါ်ပေါက်လာဦးမည် ဖြစ်သည်။

ထိုအချိန်ကျမှသာ ကမ္ဘာနှစ်ခုကြား အစစ်အမှန် စစ်ပွဲကြီး စတင်ပေလိမ့်မည်။

သူတို့၏ စိတ်အာရုံထဲမှ မြင်ကွင်းများ ပျောက်ကွယ်သွားသည်နှင့် တပြိုင်နက်၊ "တောင်နှင့် ပင်လယ် ကမ္ဘာ့ဆန္ဒတော်" ၏ အသံသည် သူတို့၏ နှလုံးသားထဲတွင် နောက်တစ်ကြိမ် ပဲ့တင်ထပ်လာ၏။

“နယ်မြေ အသီးသီး... ပြင်ဆင်ကြတော့... ဂိုဏ်းတိုင်းက မိမိတို့ဆီမှာရှိတဲ့ 'မူလဝိညာဉ် နယ်ပယ်' နဲ့ အထက် ကျင့်ကြံသူ (၈၀) ရာခိုင်နှုန်းကို ဝိညာဉ်ကမ္ဘာ စစ်ပွဲဆီ မဖြစ်မနေ စေလွှတ်ရမယ်... ဂိုဏ်းမဲ့ ကျင့်ကြံသူတွေလည်း ပါဝင်ရမယ်…”

“ဘယ်ဂိုဏ်း၊ ဒါမှမဟုတ် ဘယ် ဂိုဏ်းမဲ့ ကျင့်ကြံသူကမဆို ငြင်းဆန်ခဲ့ရင်... ဝိညာဉ်ကမ္ဘာကြီးရဲ့ ကောင်းကင်ပြစ်ဒဏ် ချမှတ်ပြီး အားလုံး မှတ်လောက်သားလောက် ဖြစ်သွားအောင် စီရင်မယ်…”

“လိုအပ်လာရင် ကျင့်ကြံသူတွေကို ထပ်ပြီး ဆင့်ခေါ်ဦးမယ်... မင်းတို့အားလုံး မဖြစ်မနေ ပူးပေါင်း ဆောင်ရွက်ကြရမယ်…”

တောင်နှင့် ပင်လယ် ကမ္ဘာ့ဆန္ဒတော်သည် သတင်းစကား သုံးခုကို ထုတ်ပြန်လိုက်ပြီး၊ နယ်မြေအတွင်းရှိ မူလဝိညာဉ် နယ်ပယ်နှင့် အထက် ကျင့်ကြံသူတိုင်းထံသို့ ပျံ့နှံ့ ရောက်ရှိသွားသည်။

အခြေအနေကို နားလည်လိုက်သည်နှင့် တပြိုင်နက်၊ လူအများအပြား မျက်နှာ ဖြူဖပ်ဖြူရော် ဖြစ်ကုန်ကြ၏။

အထူးသဖြင့် ဂိုဏ်းငယ်လေးများနှင့် မည်သည့် အဖွဲ့အစည်းနှင့်မျှ မပတ်သက်သော ဂိုဏ်းမဲ့ ကျင့်ကြံသူများပင်။

ဂိုဏ်းကြီးများတွင် ကျင့်ကြံသူ အမြောက်အမြား ရှိသဖြင့်၊ ဂိုဏ်းစောင့်ရန် ထိပ်တန်း တိုက်ခိုက်ရေးသမား (၂၀) ရာခိုင်နှုန်းကို ချန်ထားရစ်နိုင်ကြ၏။ သို့သော် ဂိုဏ်းငယ်လေးများတွင်မူ မူလဝိညာဉ် နယ်ပယ် ကျင့်ကြံသူ အနည်းငယ်သာ ရှိတတ်သည်။

သူတို့၏ ဩဇာလွှမ်းမိုးမှု နည်းပါးရသည့်အထဲ၊ စစ်ပွဲသို့ ပါဝင်လိုက်ရလျှင် ပြန်လမ်းမဲ့သွားနိုင်ပြီး၊ ဂိုဏ်းတစ်ခုလုံး ပျက်သုဉ်းသွားမည့် အရေးနှင့် ကြုံတွေ့ရနိုင်၏။

ဂိုဏ်းမဲ့ ကျင့်ကြံသူများ အတွက်မူ ပြောစရာပင် မရှိတော့။ ယခုအခါ တောင်နှင့် ပင်လယ် ကမ္ဘာ့ဆန္ဒတော် ကိုယ်တိုင်က သူတို့ကို ပါဝင်ရန် အမိန့်ပေးလိုက်ပြီ ဖြစ်ရာ၊ ဤအမိန့်ကို ဖီဆန်လျှင် ဖြစ်လာမည့် အကျိုးဆက်မှာ ထင်ရှားလှသည်။

ထို့ကြောင့် ဂိုဏ်းငယ်လေးများနှင့် ဂိုဏ်းမဲ့ ကျင့်ကြံသူ အများအပြားသည် ယုံကြည်စိတ်ချရသော ဂိုဏ်းကြီးများနှင့် မဟာမိတ် ဖွဲ့ရန် ပြင်ဆင်လာကြ၏။ တစ်ကိုယ်တည်း လှုပ်ရှားခြင်းထက် လူအများနှင့် ပူးပေါင်းခြင်းက ပိုမို ဘေးကင်းမည် မဟုတ်ပါလော။

...

ဖူယောင် နယ်မြေ

ကြာရှည်စွာ ပျောက်ကွယ်နေခဲ့သော "ဖူချန်" သည် ဝိညာဉ်တောင်တန်း တစ်ခုပေါ်တွင် နိုးထလာသည်။ "ဝေဝူယာ" သည် သူ့ဘေးတွင် ရောက်ရှိနေပြီး ဖြစ်၏။

သူတို့ နှစ်ဦးစလုံးသည် တောင်နှင့် ပင်လယ် ကမ္ဘာ့ဆန္ဒတော်၏ ညွှန်ကြားချက်ကို လက်ခံ ရရှိထားကြသည်။ တစ်ယောက်ကို တစ်ယောက် ကြည့်လိုက်ကြရာ မျက်နှာထားများ တင်းမာ ခက်ထန်နေကြ၏။

ဂိုဏ်းမဲ့ ကျင့်ကြံသူများလည်း တိုက်ပွဲဝင်ရမည်တဲ့...

တောင်နှင့် ပင်လယ် ကမ္ဘာ့ဆန္ဒတော်သည် ဂိုဏ်းမဲ့များကိုပင် ချမ်းသာပေးခြင်း မရှိဘဲ၊ ကျယ်ပြန့်သော ကမ္ဘာနှင့် တိုက်ခိုက်မည့် နယ်နိမိတ် စစ်မြေပြင်သို့ ဆင့်ခေါ်လိုက်တော့၏။

ဖူချန်နှင့် ဝေဝူယာ တို့သည် အရိပ်ထဲတွင် ပုန်းအောင်းပြီး လွတ်လပ်စွာ ကျင့်ကြံ အားထုတ်နေ၍ မရတော့ကြောင်း နားလည်လိုက်ကြသည်။

ဆယ်စုနှစ် အတော်ကြာပြီးနောက်၊ ဖူချန်၏ စွမ်းအားသည် "ဟင်းလင်းပြင် လမ်းစဉ် နှောင်းပိုင်းအဆင့်"သို့ နောက်ဆုံးတွင် ရောက်ရှိလာခဲ့ပြီ ဖြစ်သည်။

သို့သော် သူ့မျက်နှာပေါ်တွင် ဂုဏ်ယူဝင့်ကြွားမှု အရိပ်အယောင် မတွေ့ရပေ။

နင်ချီသည် ဆယ်စုနှစ် အနည်းငယ် အတွင်း အကန့်အသတ်မဲ့ ဓားဂိုဏ်းကို ဦးဆောင်ကာ သွေးမိစ္ဆာ အဆင့်မြင့်ဂိုဏ်းကို ချေမှုန်းပြီး၊ ပေ့ရွှမ် နယ်မြေ တစ်ခုလုံးကို ပေါင်းစည်းခဲ့ကြောင်း ထောက်လှမ်းရေး သတင်းများ ရရှိခဲ့ချိန်ကတည်းက၊ ဖူချန် စိတ်ဓာတ်ကျနေခဲ့ခြင်း ဖြစ်၏။

ခေတ်ပြိုင် ပါရမီရှင် တစ်ဦး အနေဖြင့်၊ ဝေဝူယာ၏ လမ်းညွှန်မှုကို ရရှိထားသော်လည်း နင်ချီကို မည်သည့်အခါမျှ ကျော်ဖြတ်နိုင်မည် မဟုတ်ကြောင်း ဖူချန် သိနားလည်လိုက်သည်။

အထူးသဖြင့် မြောက်ပိုင်းနှင့် တောင်ပိုင်း နယ်မြေများတွင် ထိပ်တန်း အဆင့်မြင့်ဂိုဏ်းများ စစ်ဖြစ်မတတ် အခြေအနေများနှင့် ပဋိပက္ခ ရေစီးကြောင်းများ ပြင်းထန်နေချိန်တွင်၊ ဝေဝူယာ၏ အကြံပေးချက်အရ သူသည် တောင်ပိုင်း အစစ်အမှန် နယ်မြေ မှ ထွက်ပြေးတိမ်းရှောင်လာခဲ့ရ၏။

"ဆရာ... ကျွန်တော်တို့ အခု ဘာလုပ်ကြမလဲ..." ဖူချန် မေးလိုက်သည်။

ဖူချန်၏ စွမ်းအား တိုးတက်လာမှုကြောင့် အကျိုးကျေးဇူး ရရှိထားသော ဝေဝူယာ၏ ပုံရိပ်ယောင် ခန္ဓာကိုယ်သည် ပိုမို ပီပြင်လာသည်။ သူ သက်ပြင်းချလိုက်၏။

"ရှောင်ချန် ... မင်းရဲ့ ဂိုဏ်းမဲ့ ကျင့်ကြံသူ ဘဝကို အဆုံးသတ်ရတော့မယ် ထင်တယ်... ဝိညာဉ်ကမ္ဘာ စစ်ပွဲ စပြီ ဆိုတော့... ငါတို့ ရှောင်လွှဲလို့ မရတော့ဘူး..."

"ဒါပေမဲ့ မင်းရဲ့ ပါရမီနဲ့ ဆိုရင်... အင်မော်တယ် ဂိုဏ်း တစ်ခုခုကို ဝင်ဖို့ မခက်ခဲပါဘူး... စဉ်းစားကြည့်ပါ... ဖူယောင် နယ်မြေမှာ အင်မော်တယ် ဂိုဏ်းကြီး နှစ်ဂိုဏ်း ရှိတယ်... တစ်ခုခုကို ဝင်လိုက်ပါ..."

ဖူချန် မျက်မှောင်ကြုတ်လိုက်ပြီး မေးသည်။

"ဆရာ... နယ်နိမိတ် ဒေသက တကယ်ပဲ အဲဒီလောက် အန္တရာယ် များလား... ဂိုဏ်းမဲ့တွေ အတွက် လမ်းစ မရှိတော့ဘူးလား..."

ဝေဝူယာက ပြန်ဖြေလာသည်။

"ငါတို့ ဘာလို့ တောင်ပိုင်း အစစ်အမှန် နယ်မြေကနေ ဒီကို ထွက်ပြေးလာခဲ့ကြတာလဲ... ထိပ်တန်း အဆင့်မြင့်ဂိုဏ်း သုံးဂိုဏ်းကြားက ပဋိပက္ခတွေ ငါတို့ကို ထိခိုက်လာမှာ စိုးလို့လေ... ပေါင်းစည်းခြင်း နယ်ပယ် ဘိုးဘေးကြီးတွေပဲ ရှိတဲ့ ဂိုဏ်းသုံးဂိုဏ်းတောင် ငါတို့ကို ဖိအားပေးနိုင်ခဲ့တာ... ဝိညာဉ်ကမ္ဘာ စစ်ပွဲကြီး ဆိုရင် ဘယ်လောက်တောင် ကြောက်စရာ ကောင်းလိုက်မလဲ စဉ်းစားကြည့်..."

ဖူချန် ခေတ္တမျှ တိတ်ဆိတ်သွားပြီးနောက် ပြန်ဖြေလိုက်သည်။

"ကောင်းပါပြီလေ..."

ဝေဝူယာ က နှစ်သိမ့်လိုက်၏။

"မင်းက လွတ်လပ်မှုကို ကြိုက်ပြီး ချုပ်နှောင်တာကို မုန်းတယ် ဆိုတာ ငါ သိပါတယ်... ဒါပေမဲ့ အခြေအနေတွေ ပြောင်းလဲကုန်ပြီ... မင်း လိုက်လျောညီထွေ နေတတ်ရမယ်..."

"ပြီးတော့... ဝိညာဉ်ကမ္ဘာ စစ်ပွဲက အန္တရာယ်ချည်းပဲ ရှိတာ မဟုတ်ပါဘူး... အခွင့်အရေးတွေလည်း အများကြီး ရှိတယ်... မင်းအနေနဲ့ 'ပေါင်းစည်းခြင်း နယ်ပယ်' ဘိုးဘေးကြီး အမြန် ဖြစ်ချင်ရင်... စစ်ပွဲမှာ ပါဝင်တာက အမြန်ဆုံး လမ်းကြောင်းပဲ... ကျင့်ကြံသူ ဆိုတာ မိမိရဲ့ လမ်းစဉ်ကို သက်သေပြဖို့ မီးနဲ့ စမ်းသပ်ခံရတာ မျိုး ကြုံတွေ့ရစမြဲပဲ..."

ဖူချန် ခေါင်းညိတ်လိုက်သည်။

"ဆရာ... ကျွန်တော် ဘယ်ဂိုဏ်းကို ရွေးသင့်လဲ..."

ထိုအခါ၊ ဝေဝူယာ ခေတ္တမျှ စဉ်းစားလိုက်ကာ၊

"စိမ်းပြာ နက်ရှိုင်း အင်မော်တယ် ဂိုဏ်းကို ရွေးလိုက်ပါ... သူတို့က အဆင့်တက်တာ မကြာသေးတော့ သွေးသစ်လောင်းဖို့ လိုအပ်နေတယ်... မင်းလို ပါရမီရှင်မျိုးကို သူတို့ အထူး လိုလားနေမှာ သေချာတယ်..."

ဖူချန်၏ မျက်နှာထား ပြေလျော့သွားပြီး၊ ဝေဝူယာ၏ အစီအစဉ်ကို သဘောတူလိုက်သည်။

သို့သော် ရုတ်တရက် သူ ထပ်ပြောလာ၏။

"ဆရာ... ခဏလေး... တောင်ပိုင်း အစစ်အမှန် နယ်မြေ ဘက်က ထောက်လှမ်းရေး သတင်းတွေကို ကျွန်တော် အရင် စစ်ဆေးကြည့်ပါရစေဦး..."

ဝေဝူယာ ခေါင်းအနည်းငယ် ညိတ်လိုက်သည်။

နင်ချီ၏ လျင်မြန်သော တိုးတက်မှု အကြောင်း သိလိုက်ရပြီးကတည်းက၊ ဆယ်စုနှစ်များစွာ ကြာပြီးနောက်... မြောက်ပိုင်းနှင့် တောင်ပိုင်း နယ်မြေများ၏ လက်ရှိ အခြေအနေကို သူလည်း သိချင်နေမိ၏။

အခန်း (၆၉၂) - အရေးကြီးကိစ္စ သုံးရပ် (အပိုင်း ၂)

~ထိုစဉ်က ထိပ်တန်း အဆင့်မြင့်ဂိုဏ်းကြီး သုံးဂိုဏ်းတို့၏ တိုက်ပွဲ အခြေအနေ မည်သို့ ရှိခဲ့သနည်း... ဘယ်သူ နိုင်ပြီး ဘယ်သူ ရှုံးခဲ့သနည်း။

ထိုအချိန်မှစ၍ နင်ချီသည် နောက်ထပ် တိုးတက်မှုများ ရှိခဲ့သေးသလော။ သူသည် အကန့်အသတ်မဲ့ ဓားဂိုဏ်းကို ဦးဆောင်ပြီး ထိပ်တန်း အဆင့်မြင့်ဂိုဏ်းသစ် တစ်ခု ဖြစ်လာအောင် စွမ်းဆောင်နိုင်ခဲ့ပါသလော။

ဖူချန်သည် "ဆက်သွယ်ရေး ကျောက်စိမ်းလိပ်" ကို ထုတ်ယူလိုက်ပြီး၊ ယခင်က သတင်းပေးပို့ခဲ့ဖူးသူအား ချက်ချင်း ဆက်သွယ်လိုက်သည်။

တောင်နှင့် ပင်လယ် ကမ္ဘာ့ဆန္ဒတော်၏ ခြိမ်းခြောက် အမိန့်ပေးမှုကြောင့် ဟိုဘက်မှ သတင်းပေးမည့်သူသည်လည်း အသင့်ရှိနေပုံရပြီး ဖျတ်လတ်စွာ ပြန်လည် ဖြေကြားလာ၏။

ထို့ကြောင့် ဆယ်စုနှစ်များစွာ အတွင်း မြောက်ပိုင်းနှင့် တောင်ပိုင်း နယ်မြေများ၌ ဖြစ်ပျက်ခဲ့သော အရေးကြီး ဖြစ်ရပ်မှန်သမျှကို ဖူချန်ထံသို့ တစ်ဖန် ပြန်လည် ပေးပို့လာခဲ့သည်။

ဖူချန်သည် ပေးပို့လာသော သတင်းအချက်အလက်များကို ဂရုတစိုက် ဖတ်ရှုလိုက်ရာ... ယခင်တစ်ကြိမ်ကကဲ့သို့ပင် သူ၏ မျက်နှာထားသည် အမျိုးမျိုး ပြောင်းလဲသွားလေ၏။

ဝေဝူယာက စူးစမ်းလိုစိတ်ဖြင့် မေးလိုက်သည်။

“ဟိုဘက်မှာ ဘာတွေ ဖြစ်ပျက်ခဲ့လို့ မင်းမျက်နှာက အဲဒီလို ဖြစ်သွားရတာလဲ...”

ခေတ္တမျှကြာအောင် ဖူချန်သည် သူအလေးစားဆုံး ဆရာသခင်၏ စကားသံကိုပင် မကြားနိုင်တော့သကဲ့သို့၊ ကျောက်စိမ်းလိပ်ထဲမှ သတင်းစကားများထဲတွင် အချိန်ကြာမြင့်စွာ နစ်မြောနေမိ၏။

ဝေဝူယာ စိတ်မဆိုးမိပေ။ ဖူချန်သည် ပြီးခဲ့သော တစ်ကြိမ်ကထက် ပိုမို တွေဝေ မိန်းမောနေသည်ကို မြင်လိုက်ရသဖြင့်၊ တစ်စုံတစ်ခု ထူးခြားနေပြီ ဖြစ်ကြောင်း ချက်ချင်း အာရုံခံမိလိုက်သည်။

ဖြစ်နိုင်သည်မှာ... သူတို့ထက် အသက်များစွာ ငယ်ရွယ်သော နင်ချီက ကြီးမားသော ပြောင်းလဲမှုကြီး တစ်ရပ်ကို ထပ်မံ လုပ်ဆောင်လိုက်ပြန်ပြီ ဖြစ်သဖြင့်၊ ဖူချန် ဤကဲ့သို့ တုံ့ပြန်နေရခြင်း ဖြစ်ပေလိမ့်မည်။

အချိန်မည်မျှ ကုန်ဆုံးသွားသည် မသိ... ဖူချန်၏ လက်ထဲမှ ကျောက်စိမ်းလိပ်သည် မြေကြီးပေါ်သို့ 'ဘုတ်' ခနဲ ပြုတ်ကျသွားသည်။

သူသည် ဝေဝူယာကို ဗလာသက်သက် မျက်ဝန်းများဖြင့် ငေးကြည့်နေပြီး၊ လုံးဝ စိတ်ဓာတ်ကျသွားသည့်ပုံ ပေါက်နေ၏။

ထိုအခါ၊ ဝေဝူယာသည် မှော်စွမ်းအင်ကို အသုံးပြု၍ ကျောက်စိမ်းလိပ်ကို ကောက်ယူလိုက်ပြီး၊ သူ၏ "မူလဝိညာဉ် အာရုံ" ဖြင့် ဖတ်ရှု စစ်ဆေးလိုက်သည်။

ဝေဝူယာသည် "နက်ရှိုင်းသော သစ္စာတရား နယ်မြေ" မကွဲအက်မီ ခေတ်ကာလက၊ အင်မော်တယ် ဂိုဏ်းကြီး တစ်ခု၏ "သဟဇာတဖြစ်ခြင်း နယ်မြေ" အကြီးအကဲ တစ်ဦး ဖြစ်ခဲ့ဖူးသည်။ တောင်နှင့် ပင်လယ် ကမ္ဘာရှိ ကျင့်ကြံသူများ၏ အထွတ်အထိပ် အဆင့်သို့ ရောက်ရှိခဲ့ဖူးသူ ဖြစ်ပြီး၊ တိုက်ပွဲပေါင်းများစွာ ဆင်နွှဲခဲ့ဖူးသူ ဖြစ်၏။

သို့သော် ကျောက်စိမ်းလိပ်ထဲမှ သတင်းအချက်အလက်များကို မြင်လိုက်ရသောအခါ၊ ဝေဝူယာသည်လည်း ခေတ္တမျှ အာရုံလွတ်သွားရသည်။

“ဘာ... နင်ချီက စိမ်းပြာ နက်ရှိုင်း အင်မော်တယ်ဂိုဏ်းက စေလွှတ်လိုက်တဲ့ 'ပေါင်းစည်းခြင်း နယ်ပယ်' ဘုရင် လေးပါး အပါအဝင်... ပေါင်းစည်းခြင်း နယ်ပယ် ခုနစ်ယောက်ကို တစ်ယောက်တည်း သတ်ဖြတ်လိုက်တယ် ဟုတ်လား...”

“အဲဒီနောက် ယူဟွာ အဆင့်မြင့်ဂိုဏ်းကို ဖျက်ဆီးပစ်ပြီး... ကောင်းကင်တာရာ အဆင့်မြင့်ဂိုဏ်း တစ်ခုလုံးကို သူ့ဆီမှာ သစ္စာဆိုခိုင်းလိုက်တယ်တဲ့လား...”

နင်ချီက မြောက်ပိုင်းနှင့် တောင်ပိုင်း နယ်မြေများကို ပေါင်းစည်းပြီး၊ ဂိုဏ်းပေါင်းစုံ၏ "နက်ရှိုင်းသော သစ္စာတရား နယ်မြေအရှင်သခင်" အဖြစ် လေးစားခံရကြောင်း တွေ့လိုက်ရသောအခါ၊ ဝေဝူယာ၏ မျက်လုံးများထဲတွင် စူးရှသော အလင်းတန်းများ ဖြတ်သန်းသွားသည်။

“နက်ရှိုင်းသော သစ္စာတရား နယ်မြေအရှင်သခင်... တကယ့်ကို နယ်မြေအရှင်သခင် ပါလား...”

သူသည် ထိုစကားကို နှစ်ကြိမ်တိုင်တိုင် ရေရွတ်လိုက်၏။ သူ၏ လေသံတွင် အဆုံးမဲ့သော နာကြည်းမှုများ ပါဝင်နေသကဲ့သို့ပင်။

အတိတ်ကာလတုန်းက... သူ၏ ဂိုဏ်းသည် "နက်ရှိုင်းသော သစ္စာတရား နယ်မြေအရှင်သခင်" နေရာကို ရယူရန်အတွက် အခြား အင်မော်တယ် ဂိုဏ်းကြီး တစ်ခုနှင့် စစ်ခင်းခဲ့ကြသည်။

အင်မော်တယ် ဂိုဏ်းကြီး နှစ်ဂိုဏ်း အပြန်အလှန် တိုက်ခိုက် ဖျက်ဆီးကြရင်း၊ နယ်မြေတစ်ခုလုံး ကွဲအက်သွားသည်အထိ ဖြစ်ခဲ့ရသော်လည်း မရယူနိုင်ခဲ့သော အရာကို... နှစ်ပေါင်း သောင်းချီ ကြာမြင့်ပြီးနောက် လူငယ်လေး တစ်ယောက်က အလွယ်တကူ စွမ်းဆောင်သွားလိမ့်မည်ဟု ဘယ်သူ ထင်မှတ်ထားမိပါ့မလဲ။

"နယ်မြေအရှင်သခင်" ဆိုသော အဓိပ္ပာယ် အစစ်အမှန်က ဘာလဲ ဆိုတာကို ဖူချန် နားမလည်ပေ။ ထို့ကြောင့် သူ့ဆရာ ဘာလို့ ဒီလောက်ထိ စိတ်လှုပ်ရှားနေရသလဲ ဆိုသည်ကို သူ နားမလည်နိုင် ဖြစ်နေ၏။

သူ ဆက်မမေးမြန်းရသေးမီမှာပင်၊ ဝေဝူယာသည် ကျောက်စိမ်းလိပ်ကို ဆက်လက် စိုက်ကြည့်နေသည်ကို တွေ့လိုက်ရသည်။ သူ၏ မျက်လုံးများသည် လက်ထဲမှ ကျောက်စိမ်းလိပ်ကို အရည်ပျော်သွားစေမတတ် တောက်ပနေ၏။

“ဂိုဏ်းအသီးသီးရဲ့ အင်အားကို အသုံးပြုပြီး... ဂိုဏ်းတစ်ခုလုံးကို နေရာရွှေ့ပြောင်းတယ်... အကန့်အသတ်မဲ့ ဓားဂိုဏ်းကို နယ်မြေရဲ့ အလယ်ဗဟိုမှာ အခြေချတယ်...”

“နက်ရှိုင်းသော သစ္စာတရား မဟာမိတ်အဖွဲ့ကို တည်ထောင်တယ်... ဂိုဏ်းအသီးသီး ပူးပေါင်းကြတယ်...”

“နက်ရှိုင်းသော သစ္စာတရား နယ်မြေ ပြန်လည် ပေါ်ထွန်းလာတယ်... နှစ်ပေါင်း တစ်ရာ ကြာမှ ပြန်ကောင်းမယ့် ကိစ္စကို... ဟင်းလင်းပြင် ဝိညာဉ်ကြောတွေ ဖြည့်ဆည်းပြီး သုံးနှစ်အတွင်း အထွတ်အထိပ် ပြန်ရောက်အောင် လုပ်လိုက်တယ်...”

ဝေဝူယာသည် ဖတ်ရင်း တတွတ်တွတ် ရေရွတ်နေ၏။ နင်ချီနှင့် ပတ်သက်သော သတင်း တစ်ခုစီတိုင်းသည် သူ့ကို တုန်လှုပ်စေသည်။

ဂူအတွင်း၌ ဝေဝူယာ၏ အသံသည် ပဲ့တင်ထပ်နေ၏။

နောက်ဆုံးတွင်... ထို ဝိညာဉ်အဘိုးအို၏ ပုံရိပ်ယောင်သည် တောင့်ခဲသွားသည်ကို မြင်လိုက်ရသောအခါ၊ ဖူချန် လန့်ဖျပ်သွားပြီး မျက်ရည်များ ကျဆင်းလာသည်။

“ဆရာ... ဆရာ ဘာဖြစ်သွားတာလဲ...”

ဝေဝူယာသည် ယခင်ကထက် ပိုမို စိတ်လှုပ်ရှားနေ၏။ ဖူချန်သည် သူ့ဆရာကို ယခုလို ပုံစံမျိုးနှင့် တစ်ခါမှ မမြင်ဖူးခဲ့ပေ။

နင်ချီ၏ သတင်းများကို အသေအချာ ဖတ်ပြီးနောက်၊ ဖူချန်၏ စိတ်နှလုံး တုန်လှုပ်သွားပြီး၊ လိုက်မီချင်သော်လည်း အင်အားမရှိတော့သကဲ့သို့ ခံစားရသော်လည်း... ဝေဝူယာ ကဲ့သို့ စိတ်ထိန်းမရ ဖြစ်သည်အထိ မခံစားရပေ။

သူ့ဆရာ ဘာကြောင့် ဒီလို တုံ့ပြန်နေရသလဲ ဆိုတာ သူ နားမလည်။ သေချာတာ တစ်ခုကတော့... "နက်ရှိုင်းသော သစ္စာတရား နယ်မြေအရှင်သခင်" ဆိုသော ကိစ္စနှင့် သက်ဆိုင်နေမှာ သေချာသည်။

ဖူချန်သည် ဘေးတွင် ငြိမ်သက်စွာ ထိုင်ရင်း၊ အဘိုးအိုကြီး စိတ်ငြိမ်သက်လာမည့် အချိန်ကို စောင့်ဆိုင်းနေလိုက်၏။

အချိန် မည်မျှ ကြာသွားသည် မသိ... ဝေဝူယာသည် စိတ်တည်ငြိမ်စေရန် အသက်ပြင်းပြင်း ရှူလိုက်ပြီးနောက်၊ ဖူချန်၏ မျက်နှာချင်းဆိုင်တွင် ဝင်ထိုင်လိုက်သည်။

သူသည် ဖူချန်ကို စိုက်ကြည့်ပြီး ပြောလိုက်၏။

“ရှောင်ချန်... မင်းအပေါ် ..ထားရှိတဲ့ ငါ့ရဲ့ အကြီးမားဆုံး မျှော်လင့်ချက်က ဘာလဲဆိုတာ မင်းသိလား...”

ဖူချန် မျက်မှောင်ကြုတ်ပြီး နက်နက်နဲနဲ စဉ်းစားလိုက်သည်။ ယခင်က ဝေဝူယာသည် သူ့ကို ကျင့်ကြံခြင်း လမ်းစဉ်တွင်သာ လမ်းညွှန်ခဲ့ပြီး၊ ဖျတ်လတ်စွာ သန်မာလာစေရန် တိုက်တွန်းခဲ့၏။ ဖူချန် ထင်ခဲ့သည်မှာ ဝေဝူယာသည် သူ့အင်အားကို သုံးပြီး ကိုယ်ခန္ဓာ အစစ်အမှန် ပြန်လည် ရရှိလိုသည်ဟုသာ ထင်မြင်ခဲ့သည်။

သို့သော် ယခု ဆရာက ဤကဲ့သို့ မေးလာသောအခါ၊ ထိုအချက် မဟုတ်ကြောင်း သိသာနေ၏။

"နယ်မြေအရှင်သခင်" ကိစ္စက ဝေဝူယာအပေါ် ဘယ်လောက်ထိ သက်ရောက်မှု ရှိသလဲ ဆိုတာ စဉ်းစားရင်း၊ ဖူချန်က အကဲစမ်းကာ မေးကြည့်လိုက်ပါတော့သည်။

“ဆရာ... ဆရာ့ရဲ့ ဂိုဏ်းဟောင်းကို ကျွန်တော့်ကို ပြန်လည် တည်ထောင်စေပြီး... နက်ရှိုင်းသော သစ္စာတရား နယ်မြေအရှင်သခင် ဖြစ်စေချင်တာလား...”

ဝေဝူယာ ခေါင်းညိတ်လိုက်၏။

ထို့နောက်၊ ဖူချန်ကို သံယောဇဉ် မျက်ဝန်းများဖြင့် ကြည့်ကာ ပြောလိုက်သည်။

“မင်း ဒီအဖြေကို တွေးမိတယ် ဆိုကတည်းက... ငါ မင်းကို နှစ်ပေါင်းများစွာ သင်ကြားပေးခဲ့ရတာ အလကား မဖြစ်ဘူးပဲ...”

ဖူချန် ရုတ်တရက် သဘောပေါက်သွား၏။

သူ့ဆရာသည် "နယ်မြေအရှင်သခင်" နေရာအပေါ် ကြီးမားသော စွဲလမ်းမှု ရှိနေသည်မှာ အမှန်ပင်။

“ဆရာ... နယ်မြေအရှင်သခင် ဆိုတာ တကယ်တမ်း ဘာအဓိပ္ပာယ်လဲ... အရင်တုန်းက ဆရာ့ရဲ့ ဂိုဏ်းက တခြား အင်မော်တယ် ဂိုဏ်းနဲ့ ဘာကြောင့် တိုက်ခိုက်ခဲ့ရသလဲ ဆိုတာ ဆရာ တစ်ခါမှ မပြောပြဖူးဘူး... နယ်မြေအရှင်သခင် ဖြစ်ဖို့ တစ်ခုတည်း အတွက်နဲ့ တိုက်ခိုက်ခဲ့ကြတာလားဗျ...”

ဝေဝူယာက… ပြန်ဖြေလာသည်။

“ဟုတ်တယ်... ငါတို့က 'နက်ရှိုင်းသော သစ္စာတရား နယ်မြေအရှင်သခင်' ဆိုတဲ့ ဘွဲ့ထူးကို ရယူဖို့ စစ်ခင်းခဲ့ကြတာ... ဒါပေမဲ့ နောက်ဆုံးတော့ ဂိုဏ်းနှစ်ခုစလုံး ပျက်စီးပြီး... နယ်မြေကြီး ကွဲအက်သွားခဲ့ရတယ်...”

သူ ဆက်ပြောလာ၏။

“အခု.. နင်ချီက နယ်မြေအရှင်သခင် ဖြစ်လာပြီး... ဟိုတုန်းက အင်မော်တယ် ဂိုဏ်းကြီး နှစ်ဂိုဏ်း မလုပ်နိုင်ခဲ့တဲ့ အရာကို ပြီးမြောက်အောင် လုပ်ဆောင်သွားတာ... တကယ့်ကို ကြောက်စရာ ကောင်းလွန်းတယ်...”

နောက်ပိုင်းတွင် ဝေဝူယာသည် ဖုံးကွယ်ထားသော လျှို့ဝှက်ချက် အများအပြားကို ပြောပြခဲ့သည်။ ဥပမာ - နယ်မြေအရှင်သခင် နေရာကို ရရှိသူသည် "တောင်နှင့် ပင်လယ် ကမ္ဘာ့ဆန္ဒတော်"၏ မျက်နှာသာပေးမှုကို ရရှိပြီး၊ နယ်မြေတစ်ခုလုံး၏ စွမ်းအားကို ပိုင်ဆိုင်ရလိမ့်မည် ဟူသော ကောလာဟလများ အကြောင်း ဖြစ်၏။

သေချာသည်မှာ... ထိုစဉ်က သူတို့သည် ဤကောလာဟလ မှန်မမှန် အတည်မပြုနိုင်ခဲ့ကြပေ။

အမှန်တရားကို သိလိုလျှင်... လက်ရှိ နယ်မြေအရှင်သခင် ဖြစ်နေသူကို ကိုယ်တိုင် မေးမြန်းမှသာ ရပေလိမ့်မည်။

သို့သော် တစ်ဖက်လူက နယ်မြေအရှင်သခင် ဖြစ်နေမှတော့... သူတို့လို လူတွေကို ဒီလျှို့ဝှက်ချက်တွေ ထုတ်ပြောပြပါ့မလား။

နှစ်ဦးသား အမြင်ချင်း ဖလှယ်ပြီးနောက်၊ နောက်ဆုံးတွင် လက်တွေ့ဘဝသို့ ပြန်ရောက်လာကြ၏။

ဖူချန် မေးလိုက်သည်။

“ဆရာ... ဒါဆို ကျွန်တော် 'စိမ်းပြာ နက်ရှိုင်း အင်မော်တယ်ဂိုဏ်း'ကို သွားသင့်သေးလား...”

ဝေဝူယာ မျက်မှောင် အနည်းငယ် ကြုတ်လိုက်ပြီး ပြန်ပြောလာ၏။

“ထောက်လှမ်းရေး သတင်းတွေ အရ ဆိုရင်... စိမ်းပြာ နက်ရှိုင်း အင်မော်တယ်ဂိုဏ်းက ဘိုးဘေးကြီး 'စစ်ခုန်ချင်း' ဟာ လွန်ခဲ့တဲ့ ဆယ်စုနှစ်တွေတုန်းက အကန့်အသတ်မဲ့ ဓားဂိုဏ်းကို သွားပြီး ပြဿနာရှာခဲ့ဖူးတယ်... ဒါပေမဲ့ နောက်ဆုံးတော့ ရှုံးနိမ့်ပြီး ပြန်လာခဲ့ရတယ်... အပြင်းစား ဒဏ်ရာတွေ ရလာခဲ့ပုံပဲ…”

အခန်း (၆၉၃) - အရေးကြီးကိစ္စ သုံးရပ် (အပိုင်း ၃)

~“အဲဒီနောက်ကွယ်က အမှန်တရားက ဘာလဲဆိုတာ ငါ.. မသိဘူး... ငါ မင်းကို မေးချင်တာက... မင်း နက်ရှိုင်းသော သစ္စာတရား နယ်မြေကို ပြန်သွားဖို့ ဆန္ဒရှိရဲ့လား...”

ဖူချန်သည် မယုံကြည်နိုင်သကဲ့သို့ မျက်လုံးများ ပြူးကျယ်သွားပြီး ပြောလိုက်သည်။

“ဆရာ... ဆရာ ပြောချင်တာက စိမ်းပြာ နက်ရှိုင်း အင်မော်တယ်ဂိုဏ်းကို ဝင်တာထက် နင်ချီဆီကို သွားတာက ပိုကောင်းတယ်လို့ ဆိုလိုတာလား...”

“ဟုတ်တယ်...”

သူ့ဆရာက ဤကဲ့သို့ လုပ်ဆောင်ရန် တောင်းဆိုလိမ့်မည်ဟု ဖူချန် တစ်ခါမှ မထင်မှတ်ထားခဲ့ပေ။

အကယ်၍ သူသာ ကြိုတင်သိခဲ့လျှင်... ဒီလောက်ဝေးဝေး ထွက်ပြေးနေမှာ မဟုတ်ပေ။ နက်ရှိုင်းသော သစ္စာတရား လျှို့ဝှက်နယ်မြေမှာ ရှိနေကတည်းက နင်ချီဆီမှာ ခိုလှုံလိုက်ရုံသာ ရှိသည်။

အခုမှ ပြန်သွားရမှာက သူ့အတွက်တော့ အလွန် အရှက်ရစရာ ကောင်းလှ၏။

ဝေဝူယာက နှစ်သိမ့်လိုက်သည်။

“တကယ်တော့ မင်းနဲ့ နင်ချီကြားမှာ ကြီးမားတဲ့ ပဋိပက္ခ မရှိပါဘူး... အလွန်ဆုံးရှိလှ သူ့ရဲ့ ဂိုဏ်းတူညီငယ်တွေနဲ့ တစ်ခါ တိုက်ခိုက်ခဲ့ဖူးတာရယ်၊ သဟဇာတဖြစ်ခြင်း အဆင့်မြင့်ကျင့်စဉ်ကို ယူခဲ့တာရယ်ပဲ ရှိတာ...”

“နင်ချီရဲ့ ခရီးလမ်းတစ်လျှောက်ကို ငါ လေ့လာကြည့်သလောက်တော့... သူက သွေးအေးတဲ့လူ မဟုတ်ဘူး... သူ့ရန်သူတွေကိုဆိုရင်တော့ သူ ဘယ်တော့မှ လက်မနှေးဘူး... ဒါပေမဲ့ သူ့ကို မိတ်ဆွေဖွဲ့တဲ့သူတွေ၊ သူ့ဆီမှာ ခိုလှုံတဲ့သူတွေကတော့ အကျိုးကျေးဇူးတွေ အများကြီး ရကြတာချည်းပဲ...”

“မင်းဆီမှာရှိတဲ့ အဲဒီ အဆင့်မြင့်ကျင့်စဉ်ကိုပဲ သစ္စာခံတဲ့ လက်ဆောင်အဖြစ် အသုံးချလိုက်ပါ... ဘာပဲဖြစ်ဖြစ် ဒီနှစ်တွေမှာ မင်းရဲ့ စိတ်ထဲမှာ အဲဒီကျင့်စဉ်ကို နက်နက်ရှိုင်းရှိုင်း မှတ်သားထားပြီးသားပဲ... နင်ချီက သဘောထား သေးတဲ့လူ မဟုတ်ဘူးလို့ ငါယုံကြည်တယ်... သူ မင်းကို သေချာပေါက် လက်ခံလိမ့်မယ်...”

ဖူချန်၏ ရင်ထဲတွင်မူ မာနတရား အကြွင်းအကျန်များက မီးလျှံငယ်တစ်ခုအလား တောက်လောင်နေဆဲ ဖြစ်၏။

ဝေဝူယာက သက်ပြင်းချလိုက်သည်။

“ငါ မင်းကို ထာဝရ မကူညီနိုင်ဘူး... ငါ အလွန်ဆုံး လုပ်ပေးနိုင်တာက မင်းကို တသားတည်းဖြစ်ခြင်း နယ်ပယ် ရောက်အောင် ပံ့ပိုးပေးရုံပဲ... ဒါပေမဲ့ မင်းရဲ့ တိုးတက်မှု အရှိန်နဲ့ဆိုရင် အဲဒီအဆင့်ရောက်ဖို့ ဘယ်လောက်တောင် ကြာဦးမှာလဲ...”

“အခုအချိန်မှာ ပါရမီရှင်တွေ အများကြီး ပေါ်ထွက်နေပြီ... တစ်ချိန်က မင်းကို မယှဉ်နိုင်တဲ့သူတွေတောင် အခု မင်းကို ကျော်တက်ကုန်ကြပြီ... ဒါတွေအားလုံးက သူတို့ နင်ချီနောက်ကို လိုက်ခဲ့ကြလို့ပဲ...”

“ထပ်ပြီး တွေဝေနေဦးမယ်ဆိုရင်... မင်းဘဝရဲ့ အကြီးမားဆုံး အခွင့်အရေးကို လက်လွတ်ရလိမ့်မယ်... အခု.. နင်ချီဆီကို သွားမယ်ဆိုရင် မင်းမှာ သူ့အတွက် အသုံးဝင်တဲ့ တန်ဖိုး ရှိသေးတယ်... ဒါပေမဲ့ နောက်ထပ် ဆယ်စုနှစ်တွေလောက် ထပ်စောင့်လိုက်မယ် ဆိုရင်တော့ မင်းရဲ့ တန်ဖိုးက ဘာမှရှိမှာ မဟုတ်တော့ဘူး...”

ဝေဝူယာ၏ စိတ်ရင်းမှန်ဖြင့် တိုက်တွန်းချက်များက ဖူချန်၏ ရင်ထဲမှ မာနတရားများကို နောက်ဆုံးတွင် အရည်ပျော်သွားစေခဲ့သည်။

ဖူချန်သည် စိတ်ကို လျှော့ချလိုက်ပုံရပြီး ပြောလိုက်၏။

“ကောင်းပါပြီ ဆရာ... ဆရာ့ရဲ့ အကြံပေးချက်အတိုင်း ကျွန်တော် လုပ်ပါ့မယ်...”

ဝေဝူယာက ခေါင်းညိတ်လိုက်သည်။ သူ၏ မျက်နှာထားသည် ချက်ချင်းဆိုသလို အလွန် လေးနက်သွားပြီး၊ စူးရှသော အငွေ့အသက်များ ထွက်ပေါ်လာကာ ဖူချန်ကို ပြောလိုက်၏။

“နင်ချီက တစ်စုံတစ်ခုကို အာရုံခံမိနေတယ်လို့ ငါ အမြဲ ခံစားနေရတယ်... ဒါကြောင့် မင်း သွားတဲ့အခါ ငါ့ရဲ့ တည်ရှိမှုကို သူ သိသွားရင်တောင် ကိစ္စမရှိပါဘူး...”

ဖူချန်က အံ့အားသင့်စွာ အော်ဟစ်လိုက်သည်။

“ဆရာ... ကျွန်တော့်အတွက်နဲ့ ဆရာ့ကိုယ်ဆရာ အားလုံးကို ထုတ်ဖော်ပြသတော့မလို့လား...”

ဝေဝူယာက ပြောသည်။

“ပေါ်သွားလည်း ပေါ်သွားပါစေတော့... အခု အခြေအနေတွေကို ငါလည်း ခန့်မှန်းလို့ မရတော့ဘူး... ပုန်းအောင်းပြီး ကျုံ့ကျုံ့လေး နေနေမယ့်အစား... ကိုယ့်ကိုယ်ကိုယ် ထုတ်ဖော်လိုက်တာက ပိုပြီး စိတ်လှုပ်ရှားစရာ ကောင်းတဲ့ ဘဝတစ်ခု ဖြစ်လာနိုင်တယ်...”

“ဒါပေမဲ့ မင်းကို ငါ သတိပေးမယ်... မင်း တကယ်ပဲ သစ္စာခံရမယ်... ဘယ်တော့မှ နောက်ထပ် မာနတွေ ထားမနေနဲ့... ပြီးတော့ နောက်ထပ် တစ်ခုက...”

ဖူချန်၏ မျက်နှာထားသည်လည်း ပို၍ တည်ကြည်သွား၏။

“ဆရာက ကျွန်တော့်အတွက်နဲ့ ဆရာ့ကိုယ်ဆရာ ထုတ်ဖော်ပြသဖို့တောင် ဆန္ဒရှိနေမှတော့... ကျွန်တော် မလုပ်နိုင်တာ ဘာရှိမှာလဲ... စိတ်ချပါ ဆရာ...”

ဝေဝူယာက ဆက်ပြော၏။

“နက်ရှိုင်းသော သစ္စာတရား နယ်မြေအရှင်သခင် ဆိုတဲ့ အဓိပ္ပာယ်က နင်ချီအတွက် ဘယ်လောက်ထိ ကြီးမားသလဲဆိုတာ တခြားသူတွေ မသိရင်နေမယ်... မင်းကတော့ သိထားရမယ်... နင်ချီကို အပြည့်အဝ ရိုသေလေးစားမှုနဲ့ ဆက်ဆံပါ... သူက မင်းနဲ့ တစ်ဆင့်တည်း မဟုတ်တော့ဘူး...”

ဖူချန်က ခါးသက်သက်ဖြင့် ပြန်ဖြေလိုက်သည်။

“ကျွန်တော် နားလည်ပါပြီ...”

ထို့နောက်... သူတို့နှစ်ဦးသည် ဆယ်စုနှစ်ပေါင်းများစွာ ပုန်းအောင်းနေခဲ့သော ဝိညာဉ်တောင်တန်းကို စွန့်ခွာပြီး၊ နက်ရှိုင်းသော သစ္စာတရား နယ်မြေသို့ အလောတကြီး.. ပြန်ရောက်လာကြ၏။

...

နက်ရှိုင်းသော သစ္စာတရား နယ်မြေအတွင်း...

တောင်နှင့် ပင်လယ် ကမ္ဘာ့ဆန္ဒတော်၏ အမိန့်ကို ရရှိခဲ့ကြသော ဂိုဏ်းငယ်လေးများနှင့် ဂိုဏ်းမဲ့ ကျင့်ကြံသူ အားလုံးနီးပါးသည် ဖူချန်ကဲ့သို့ပင် တုံ့ပြန်ခဲ့ကြ၏။

လွန်ခဲ့သော နှစ်ပေါင်းများစွာက နင်ချီသည် မြောက်ပိုင်းနှင့် တောင်ပိုင်းကို ပေါင်းစည်းပြီး နယ်မြေအရှင်သခင် ဖြစ်လာချိန်တွင်၊ အတွင်း၌ အခြေချနေထိုင်သော ဂိုဏ်းငယ်လေးများနှင့် ဂိုဏ်းမဲ့ ကျင့်ကြံသူများကို ဝင်ရောက် စီမံခန့်ခွဲခြင်း မပြုခဲ့ပေ။

ယခုတွင်မူ သူတို့အားလုံးသည် နက်ရှိုင်းသော သစ္စာတရား မဟာမိတ်အဖွဲ့သို့ ဝင်ရောက်နိုင်ရန် အသည်းအသန် ကြိုးစားနေကြတော့သည်။

ထို့ကြောင့် ဂိုဏ်းမဲ့ ကျင့်ကြံသူများနှင့် ဂိုဏ်းငယ်လေးများသည် တစ်ဦးနှင့်တစ်ဦး ဆက်သွယ်ကြပြီး၊ တဖြည်းဖြည်း လူအုပ်ကြီး အဖြစ် ဖွဲ့စည်းကာ၊ နက်ရှိုင်းသော သစ္စာတရား နယ်မြေ၏ ဗဟိုချက်ရှိ မဟာမိတ် ဌာနချုပ်သို့ စုပေါင်း ချီတက်လာကြတော့၏။

...

နက်ရှိုင်းသော သစ္စာတရား မဟာမိတ် ဌာနချုပ်တွင်...

နင်ချီ ပေါ်ထွက်လာခြင်းက လူတိုင်းအတွက် လမ်းပြ ကြယ်တစ်ပွင့် ရရှိလိုက်သကဲ့သို့ ဖြစ်သွားသည်။

ပြင်းထန်သော တိုက်ပွဲဆိုင်ရာ စည်းမျဉ်းများကို ထုတ်ပြန်ပြီးနောက်၊ တောင်နှင့် ပင်လယ် ကမ္ဘာ့ဆန္ဒတော်သည် စစ်ပွဲတွင် ပါဝင်ခြင်းကြောင့် ရရှိမည့် အကျိုးကျေးဇူးများကိုပါ ကြေညာလိုက်၏။

စစ်ပွဲတွင် ပါဝင်သူများသည် ကျယ်ပြန့်သော ကမ္ဘာမှ ကျင့်ကြံသူများကို သတ်ဖြတ်ခြင်း သို့မဟုတ် နယ်မြေ သိမ်းပိုက်ခြင်းများ ပြုလုပ်နိုင်ပါက၊ ယင်းနှင့် ထိုက်တန်သော ဆုလာဘ်များကို ချီးမြှင့်မည် ဖြစ်၏။

ဆုလာဘ်များထဲတွင် အဖိုးတန်ဆုံးမှာ "စည်းမျဉ်း အပိုင်းအစ" များ ဖြစ်ကြပြီး၊ ၎င်းတို့ကို တိုက်ရိုက် အသုံးပြု၍ ထိုးထွင်းသိမြင်မှုကို ရယူနိုင်သည်။

ထို့ပြင် ထိုအပိုင်းအစများကို စုဆောင်းကာ မိမိ၏ ကျင့်ကြံမှုကို ဆေးကြော သန့်စင်ပြီး အဆင့်မြှင့်တင်ရန်အတွက်လည်း အသုံးပြုနိုင်သည်။

"ဟင်းလင်းပြင် လမ်းစဉ် ပြီးပြည့်စုံခြင်း အဆင့်" ရှိ မဟာစွမ်းအားရှင်များအတွက်မူ၊ ၎င်းက "ပေါင်းစည်းခြင်း နယ်ပယ်" သို့ တိုက်ရိုက် တက်လှမ်းနိုင်စေမည် ဖြစ်၏။

"ပေါင်းစည်းခြင်း နယ်ပယ်" ဘိုးဘေးကြီးများအတွက်မူ၊ ၎င်းက မိမိ၏ ရုပ်ခန္ဓာအတွင်း စည်းမျဉ်းများ ပိုမို ပေါင်းစပ်နိုင်စေမည် ဖြစ်ပြီး၊ ကျင့်ကြံမှု ပြီးပြည့်စုံနေသူများအတွက်မူ "တသားတည်းဖြစ်ခြင်း နယ်ပယ်" သို့ တက်လှမ်းနိုင်မည့် အခွင့်အလမ်းကို တိုးပွားစေမည် ဖြစ်၏။

တသားတည်းဖြစ်ခြင်း နယ်ပယ်သို့ တက်လှမ်းစဉ် ကြုံတွေ့ရမည့် "ကောင်းကင် ကပ်ဘေး" အတွင်း၌ပင် အသက်ရှင်သန်နိုင်စွမ်းကို မြင့်မားစေမည် ဖြစ်သည်။

အခြားသော ဆုလာဘ်များ ဖြစ်ကြသည့် ဆေးလုံးများ၊ ကောင်းကင်နှင့် မြေကြီး ရတနာများ၊ ကျင့်စဉ်များ၊ ဝိညာဉ် ရတနာများ အားလုံးကိုလည်း ရရှိနိုင်မည်ပင်။

"စည်းမျဉ်း အပိုင်းအစ" များကို အခြား မည်သည့် ရတနာမျိုးနှင့်မဆို လဲလှယ် အသုံးပြုနိုင်သည်။

တောင်နှင့် ပင်လယ် ကမ္ဘာ့ဆန္ဒတော်က ဆုလာဘ်များကို ကြေညာပြီးနောက်၊ ကျင့်ကြံသူများ၏ စိတ်ဓာတ်သည် သိသိသာသာ ပြောင်းလဲ တက်ကြွလာခဲ့၏။

သူတို့သည် တစ်သက်လုံး ကျင့်ကြံလာကြသည်မှာ မိမိကိုယ်ကိုယ်၊ အခြားသူများနှင့် ကောင်းကင်ဘုံတို့ကို အန်တု တိုက်ခိုက်လာကြခြင်း ဖြစ်၏။

ယခု ဝိညာဉ်ကမ္ဘာ စစ်ပွဲတွင် ပါဝင်ခြင်းမှာ အခြား ကမ္ဘာမှ သတ္တဝါများနှင့် တိုက်ခိုက်ရခြင်းသာ ဖြစ်ပြီး၊ အနည်းငယ် ပို၍ ကြမ်းတမ်း ခမ်းနားသွားခြင်းသာ ဖြစ်သည်။

ရှောင်လွှဲ၍ မရနိုင်မှတော့... အကောင်းဆုံး လိုက်လျောညီထွေ ဖြစ်အောင် ကြိုးစားခြင်းက ပို၍ ကောင်းမည် မဟုတ်ပါလော။

“ဒီ စစ်မြေပြင် နယ်မြေဟာ နောက်ထပ် ခြောက်လအတွင်းမှာ အပြည့်အဝ ပုံဖော် ပြီးစီးလိမ့်မယ်... မင်းတို့ အားလုံးမှာ ပြင်ဆင်ဖို့အတွက် ခြောက်လ အချိန်ရမယ်...”

တောင်နှင့် ပင်လယ် ကမ္ဘာ့ဆန္ဒတော်သည် နောက်ဆုံး သတင်းစကားကို ပေးပို့ပြီးနောက် လုံးဝ ပျောက်ကွယ်သွားခဲ့၏။

နင်ချီသည် လူတိုင်းကို ဝေ့ဝဲကြည့်လိုက်သည်။

လူတိုင်းသည်လည်း ခိုင်မာသော ဆုံးဖြတ်ချက်များဖြင့် နင်ချီကို စူးစိုက်ကြည့်နေကြပြီး၊ သူ၏ အမိန့်ကို စောင့်ဆိုင်းနေကြ၏။

နင်ချီက တည်ငြိမ်စွာ ပြောလိုက်သည်။

“လွန်ခဲ့တဲ့ ဆယ်စုနှစ်တွေကတည်းက... ကျွန်တော် ဝိညာဉ်ကမ္ဘာ စစ်ပွဲအတွက် ပြင်ဆင်ခဲ့တာကို ခင်ဗျားတို့အားလုံး မျက်မြင်ပါပဲ... အခုတော့ ကံကြမ္မာက သတ်မှတ်ထားတဲ့ အချိန်ကို ရောက်လာခဲ့ပြီ... ခင်ဗျားတို့မှာ မေးစရာ မေးခွန်းတွေ ရှိကြသေးလား...”

ရောက်ရှိနေသူ အားလုံးသည် တညီတညွတ်တည်း ခေါင်းခါလိုက်ကြ၏။

ထိုစဉ်၊ နျူတင်းထျန်က ပြောလိုက်သည်။

“မဟာမိတ် ခေါင်းဆောင်ကြီး... ခေါင်းဆောင်ကြီးရဲ့ ဦးဆောင်မှုအောက်မှာ ကျုပ်တို့ လိုအပ်တာတွေ အားလုံး ပြင်ဆင်ပြီးပါပြီ... အကန့်အသတ်မဲ့ ဓားဂိုဏ်းရဲ့ အကူအညီနဲ့ ကျုပ်တို့ရဲ့ ကျင့်ကြံမှုတွေကိုလည်း မြှင့်တင်ခဲ့ပြီးပါပြီ... ပွင့်ပွင့်လင်းလင်း ပြောရရင်... ကျုပ်တို့မှာ ဘာသံသယမှ မရှိတော့ပါဘူး... ကျုပ်တို့ရဲ့ တစ်ခုတည်းသော အတွေးကတော့... ဝိညာဉ်ကမ္ဘာ စစ်ပွဲမှာ ရန်သူတွေကို ပိုပြီး သတ်ဖြတ်နိုင်ဖို့ပါပဲ...”