ရေခဲပင်မသတ္တုကြောနှင့် ထူးဆန်းလွန်းသော ဝိညာဉ်ပုံရိပ် (၁)

ဝိညာဉ်နယ်မြေ၏ အနက်ထဲတွင် လေပြင်းများနှင့် နှင်းများမှာ မည်သည့်အခါမျှ ရပ်တန့်မသွားသော်ငြား၊ ၎င်းတို့အတွင်း ပြင်ပကမ္ဘာတ်ွု စိတ်ကူး၍ပင် မရနိုင်သော ကြွယ်ဝသည့် ဝိညာဉ်စွမ်းအင်များ ပါဝင်နေလေသည်။

လင်းထျန်းလုံသည် သွေးနံ့များနှင့် ယမ်းငွေ့ရနံ့များ ထူထပ်စွာ ပြန့်နှံ့နေသော ချောက်ကမ်းပါး အဝင်ဝမှနေ၍ ဝံပုလွေအုပ်စုကို ဦးဆောင်ကာ၊ ဝိညာဉ်စွမ်းအင်များ ပိုမိုတက်ကြွနေသည်ဟု အာရုံခံမိသော ဧရိယာဆီသို့ ဆက်လက်ချီတက်သွားလေသည်။

သူ၏ ငွေပြာဘုရင်မျက်ဝန်းများဖြင့် လွင့်ပျံနေသော နှင်းမုန်တိုင်းများကို ထိုးဖောက်၍၊ ရှေ့ရှိ ရေခဲတောင်ကုန်းနှင့် အက်ကွဲကြောင်းတိုင်းကို သတိဝီရိယဖြင့် စစ်ဆေးနေလေသည်။

လူသားများနှင့် ပဋိပက္ခ နှစ်ကြိမ်ကို ဆက်တိုက်ဆိုသလို ဖြတ်သန်းခဲ့ရပြီးနောက်၊ သတိပေါ့လျော့မှု အနည်းငယ်ကပင် အသက်အန္တရာယ် ဖြစ်စေနိုင်ကြောင်း သူကောင်း‌ကောင်းကြီး သိရှိထားလေသည်။

ဝံပုလွေအုပ်စုသည် ထိရောက်သော ကာကွယ်ရေး ဖွဲ့စည်းပုံတစ်ခုကို ထိန်းသိမ်းထားသည်။

ရန့်မြဲ့နှင့် ရေပြာကြေးခွံအစောင့်အရှောက်များမှာ စွတ်ဖား၏ ဘေးတစ်ဖက်တစ်ချက်စီမှ ကာကွယ်ထားပြီး၊ ထျန်းပင်းနှင့် ယင်းဖုန်းတို့မှာ ရှေ့မှ အလှည့်ကျ ကင်းထောက်နေကြလေသည်။

အချိန်ကာလတစ်ခုအထိ အိပ်စက်အပြီးတွင်၊ ရှောင်လန်နှင့် ရှောင်ယင်းတို့ ကလေးငယ်နှစ်ဦးလုံးမှာ သိသိသာသာ ပိုမိုလန်းဆန်းလာပုံ ရလေသည်။

လက်ရှိတွင် သူတို့ကိုသူတို့ နွေးထွေးသော ဝက်ဝံသားရေ စောင်များဖြင့် ရစ်ပတ်ထားကာ၊ သူတို့၏ ကြီးမားသော မျက်လုံးနှစ်စုံမှာ ဝိညာဉ်နယ်မြေအတွင်းရှိ ထူးဆန်းသော မြင်ကွင်းများကို သိချင်စိတ်အပြည့်ဖြင့် ကြည့်ရှုနေကြသည်။

(သလင်းကျောက်များကဲ့သို့ ကြည်လင်နေသော အပြာရောင် ရေခဲတိုင်များ၊ မှိန်ဖျော့ဖျော့ လင်းလက်နေသော မြေအောက် ဝိညာဉ်စမ်းရေများနှင့် နှင်းများအောက်မှ ရံဖန်ရံခါခေါင်းပြူထွက်လာပြီးနောက် လျင်မြန်စွာ ပြန်လည် ပြေးဝင်သွားတတ်ကြသည့် အမည်မသိ ရေခဲဒြပ်စင် သတ္တဝါငယ်လေးများ....)

“ဖေဖေ... ဒီက ရေခဲတိုင်တွေက လင်းထိန်နေတာပဲ...”

ရှောင်ယင်းသည် အရည်ပုံစံ အပြာရောင် အလင်းများ စီးဆင်းနေပုံရသည့် မလှမ်းမကမ်းရှိ ဧရာမရေခဲတိုင်ကြီး တစ်ခုကို လက်ညှိုးထိုးပြရင်း အံ့သြတကြီး တိုးညှင်းစွာ ပြောလိုက်သည်။

“အင်း... ဝိညာဉ်စွမ်းအင်တွေကလည်း အရမ်းကို သိပ်သည်းတာပဲ...” ရှောင်လန်သည်လည်း သဘောတူကြောင်း ထောက်ခံသည့်အနေဖြင့် ခေါင်းညိတ်လိုက်သည်။

အထူးသဖြင့် ဤနေရာရှိ ရေခဲဒြပ်စင် ဝိညာဉ်စွမ်းအင်များမှာ အလွန်သန့်စင်နေကြောင်းကို သူမခံစားနိုင်ပြီး၊ ၎င်းမှာ သူမ၏ ရေခဲနှလုံးသား သိုင်းကျမ်း ကျင့်ကြံခြင်းအတွက် ကြီးမားသော အထောက်အကူ ဖြစ်စေလိမ့်မည် ဖြစ်သည်။

လင်းထျန်းလုံသည် အနည်းငယ် ခေါင်းညိတ်လိုက်ပြီး သူ၏ အတွေးများမှတစ်ဆင့် ပြန်လည် ဖြေကြားလိုက်သည်။ “ဒီနေရာက တကယ်ကို ထူးခြားလွနခးတယ်... အားလုံး သတိထားကြပါ၊ ငါတို့ အရင်က မမြင်ဖူးသေးတဲ့ အန္တရာယ်တွေ ဒါမှမဟုတ်... အခွင့်အရေးတွေ ရှိနေနိုင်တယ်...”

သူ စကားပြောပြီးသည်နှင့် တစ်ပြိုင်နက်၊ ရှေ့မှ ကင်းထောက်ရန် တာဝန်ယူထားသော ယင်းဖုန်းထံမှ ရုတ်တရက် အရေးတကြီးသတိပေးသည့် အတွေးတစ်ခု ပြန်လည် ရောက်ရှိလာခဲ့လေသည်။

“ဘုရင်ကြီး၊ ရှေ့မှာ ပုံမှန်မဟုတ်တဲ့ စွမ်းအင်တုံ့ပြန်မှု တစ်ခုကို တွေ့ရှိထားပါတယ်... အဲဒါက အရမ်းအားကောင်းတယ်... ကြည့်ရတာ... သတ္တုကြောတစ်ခုနဲ့ တူတယ်...”

လင်းထျန်းလုံ စိတ်ဓာတ်များ တက်ကြွသွားပြီး သူ၏ ခြေလှမ်းများကို ချက်ချင်း အရှိန်တင်လိုက်လေသည်။

မြင့်မားသော ရေခဲတောင်ကြောတစ်ခုကို ဖြတ်ကျော်သွားပြီးနောက်၊ သူ၏ မျက်စိရှေ့ရှိ မြင်ကွင်းကြောင့် သူ၏ မျက်၀န်းများ အနည်းငယ် ကျုံ့ဝင်သွားခဲ့သည်။

အခြားနေရာများနှင့်ယှဉ်လျှင် ပွင့်လင်းသော ရေခဲချိုင့်ဝှမ်းတစ်ခု၏ အလယ်တွင်...

မြေပြင်မှာ သန့်စင်သော ရေခဲနှင့် နှင်းများ မဟုတ်တော့ဘဲ၊ နက်ရှိုင်းသော နီလာများကဲ့သို့ သလင်းကျောက်သတ္တုရိုင်း အပိုင်းအစကြီးများ မြင်တွေ့နေလေသည်။

ဤသတ္တုရိုင်းများမှာ အံ့သြဖွယ်ရာကောင်းလောက်သော အေးစက်မှုကို ထုတ်လွှတ်နေပြီး၊ ၎င်းတို့အတွင်း၌ ပါဝင်နေသော ရေခဲဒြပ်စင် ဝိညာဉ်စွမ်းအင်၏ သန့်စင်မှုမှာ၊ သူတို့ ယခင်က ရရှိခဲ့သော ရေခဲနှလုံးသား စိတ်ကူးယဉ်လမင်းသစ်သီးထက်ပင် များစွာ သာလွန်နေလေသည်။

[စနစ် အသိပေးချက်] ။ ။ အကြီးစား ရေခဲပင်မသတ္တုကြောကို ရှာဖွေတွေ့ရှိပါသည်။ အလွန်အမင်း သန့်စင်လှသော ရေခဲဒြပ်စင် မူလစွမ်းအင်များ ပါဝင်ပြီး၊ လက်နက်များ သွန်းလုပ်ခြင်း၊ ကျင့်ကြံခြင်း၊ သို့မဟုတ် အဆင့်မြင့် စွမ်းအင်အရင်းအမြစ်တစ်ခုအဖြစ် အသုံးပြုနိုင်ပါသည်။

“ရေခဲပင်မသတ္တုကြော...” လင်းထျန်းလုံ၏ နှလုံးသားထဲတွင် သာယာသော အံ့အားသင့်မှု လှိုင်းလုံးတစ်ခု ဆူပွက်လာခဲ့သည်။

ဤသည်မှာ သေချာပေါက် တန်ဖိုးကြီးမားလွန်းသော အရင်းအမြစ် တစ်ခုပင် ဖြစ်လေသည်။

ဝံပုလွေအုပ်စု၏ ခွန်အားကို မြှင့်တင်ရန် အသုံးပြုသည်ဖြစ်စေ၊ အနာဂတ်တွင် ဖြစ်လာနိုင်သော ကုန်သွယ်မှုများအတွက် အသုံးပြုသည်ဖြစ်စေ၊ ၎င်း၏ တန်ဖိုးမှာ မှန်းဆ၍မရနိုင်လောက်အောင် ကြီးမားလှပေသည်။

သို့သော် သူသည် ပိုမိုနီးကပ်စွာ သွားရောက်စစ်ဆေးရန် အမိန့်ပေးတော့မည့် အချိန်လေးမှာပင်...

နှင်းဝိညာဉ်မြေခွေး၏ ကောင်းချီးပေးမှုမှ ပေးစွမ်းထားသော ထက်မြက်လှသည့် ဝိညာဉ်အာရုံခံစားနိုင်စွမ်းကြောင့်၊ တစ်စုံတစ်ခုက သူ့ကို အရိပ်ထဲမှ ချောင်းကြည့်နေသကဲ့သို့ ကျောတွင် ဆူးများ စိုက်နေသည့်အလား ပြင်းထန်သော အကျပ်အတည်း သတိပေးချက်တစ်ခု သူ၏ နှလုံးသားထဲတွင် ရုတ်တရက် ပေါ်ထွက်လာခဲ့သည်။

အလိုအလျောက် တုံ့ပြန်မှုတစ်ခုကဲ့သို့ပင်။

သူ၏ ငွေပြာဘုရင်မျက်ဝန်းများမှ စူးရှသော အလင်းတန်းများ ချက်ချင်း ပေါက်ကွဲထွက်လာခဲ့ပြီး၊ သူ၏ ဘေးနှင့် အနောက်ဘက်ရှိ ပုံမှန်ဟု ထင်ရသော ရေခဲသလင်းတိုင်များရှိရာ ဧရိယာကို ပြင်းထန်စွာ စစ်‌ဆေးကြည့်လိုက်လေသည်။

“ဘယ်သူလဲ... ထွက်ခဲ့စမ်း...”

လင်းထျန်းလုံ၏ တိုးညှင်းသော ခြိမ်းခြောက်သံမှာ ရေခဲပြင်ပေါ်ကျရောက်လာသော တုံးအိအိ မိုးကြိုးသံတစ်ခုသဖွယ် စူးရှသော သတ်ဖြတ်လိုစိတ်များနှင့်အတူ တိုက်ခတ်သွားလေသည်။

ငွေပြာဘုရင်မျက်ဝန်း၏ ရေခဲပြာရောင် အလင်းတန်းများမှာ ရှာဖွေရေး မီးမောင်းကြီး တစ်ခုကဲ့သို့ ထိုရေခဲသလင်းတိုင် ဧရိယာတစ်လျှောက် လှည့်ပတ်စစ်ဆေးနေခဲ့သည်။

သူ၏ ထက်မြက်သော အကြည့်များမှာ ထင်ယောင်ထင်မှားများ၊ ပုံရိပ်ယောင်များ အားလုံးကို ထိုးဖောက်မြင်နေသည့်အလား ရှိလေသည်။

သို့သော် ထိုဧရိယာတွင် ရေခဲသလင်းကျောက်များမှ ရောင်ပြန်ဟပ်နေသော မှုန်ဝါးဝါးအလင်းရောင်များနှင့် လေတိုက်သံများမှလွဲ၍၊ မည်သည့် လှုပ်ရှားမှုမျှ မရှိခဲ့ပေ။

ရန့်မြဲ့နှင့် ထျန်းပင်းတို့မှာ စွတ်ဖားကို ချက်ချင်း ကာကွယ်လိုက်ကြပြီး၊ ရေပြာကြေးခွံအစောင့်အရှောက်များမှာလည်း ဖွဲ့စည်းပုံကို ဖြန့်ကြက်လိုက်ကြကာ ဝံပုလွေအုပ်စုမှာ ချက်ချင်းပင် တိုက်ပွဲဝင် အသင့်အနေအထားသို့ ရောက်ရှိသွားကြလေသည်။

ရှောင်လန်နှင့် ရှောင်ယင်းတို့သည်လည်း စိတ်ထဲတွင် တင်းမာနေပြီး အသက်ရှူအောင့်ထားလိုက်ကြသည်။

တိတ်ဆိတ်မှုမှာ စက္ကန့်အတော်ကြာသည်အထိ ကြာမြင့်သွားခဲ့သည်။ လင်းထျန်းလုံသည် နှင်းဝိညာဉ်မြေခွေး၏ ကောင်းချီးပေးမှုက အာရုံခံစားမှုမှားယွင်းနေချင်းလော၊ သို့မဟုတ် ဝိညာဉ်နယ်မြေ၏ ပတ်ဝန်းကျင် အနှောင့်အယှက်များလောဟု စတင် သံသယ ဝင်လာချိန်မှာပင် -

ဂျွတ်...

သဘာဝအတိုင်း ထွက်ပေါ်လာသည့် ရေခဲအက်ကွဲသံများနှင့် ကွဲပြားခြားနားသော အလွန်အမင်း သိမ်မွေ့သည့် ကြည်လင်ပြတ်သားသော အသံလေးတစ်ခုမှာ ဧရာမရေခဲသလင်းတိုင် တစ်ခု၏ အနောက်မှ ထွက်ပေါ်လာခဲ့သည်။

ယင်းနောက် ချက်ချင်းဆိုသလိုပင်၊ အေးခဲနေသော ပတ်ဝန်းကျင်နှင့် လုံးဝနီးပါး ပေါင်းစပ်ဝင်ရောက်နေသည့် မှုန်ဝါးဝါးဖြစ်နေပြီး အပြာရောင်ဖျော့ဖျော့ရှိသော ပုံရိပ်တစ်ခုမှာ၊ ရုပ်ဝတ္ထုမဟုတ်သည့် ပုံစံဖြင့် တစ္ဆေတစ်ကောင်သဖွယ် ရေခဲသလင်းတိုင် နောက်မှနေ၍ ဖြည်းညှင်းစွာ လျှောတိုက်ထွက်လာလေသည်။

ထိုပုံရိပ်၏ ရွေ့လျားပုံမှာ အလွန် ထူးဆန်းလှသည်... ၎င်းမှာ လမ်းလျှောက်နေခြင်း မဟုတ်ဘဲ၊ ရေခဲပြင်တစ်လျှောက် အသံတိတ် လျှောတိုက်လာခြင်းပင် ဖြစ်လေသည်။

[စနစ် အသိပေးချက်] ။ ။ အမည်မသိ ဝိညာဉ်ပုံရိပ်တည်ရှိမှုကို ရှာဖွေတွေ့ရှိပါသည်။ စွမ်းအင် တုံ့ပြန်မှု - အထူးဝိညာဉ်စွမ်းအင် အခြေအနေ၊ အဆင့်ကို တိကျစွာ သတ်မှတ်ရန် ခက်ခဲပြီး၊ အဆင့် ၄၀ မှ ၄၅ ကြား၊ ဒုတိယဘုရင်အဆင့် အလယ်အလတ်တွင် ရှိမည်ဟု ခန့်မှန်းရပါသည်။ အန္တရာယ် အဆင့် - အလွန် မြင့်မားပါသည်။

ထိုဝိညာဉ်ပုံရိပ်တည်ရှိမှု၏ ပုံသဏ္ဌာန်မှာ မတည်ငြိမ်လှပေ... တစ်ခါတစ်ရံတွင် အအေးဓာတ်များစုစည်းထားသော အစုအဝေးကြီး တစ်ခုနှင့် တူနေပြီး၊ တစ်ခါတစ်ရံတွင် လူသား သို့မဟုတ် သားရဲပုံစံ အရိပ်တစ်ခုကို ဝေဝါးဝေဝါး ပုံဖော်နေလေသည်။

တစ်ခုတည်းသော ရှင်းလင်းသည့် အရာမှာ ခေါင်းနေရာရှိ ရေခဲသလင်း မီးတောက်များကဲ့သို့ တဖျတ်ဖျတ် လင်းလက်နေသော တစ္ဆေဆန်ဆန် အပြာရောင်မျက်လုံး နှစ်လုံးပင် ဖြစ်ပြီး၊ လင်းထျန်းလုံနှင့် ဝံပုလွေအုပ်စုကို တိတ်တဆိတ် စောင့်ကြည့်နေလေသည်။

ဝိညာဉ်ပုံရိပ်သည် တိုက်ခိုက်မှု တစ်ခုကိုမျှ မပြုလုပ်ခဲ့သလို၊ သိသာထင်ရှားသော ရန်လိုမှုကိုလည်း မထုတ်လွှတ်ခဲ့ပေ။ သို့သော် အေးစက်ပြီး အသက်မဲ့နေသော ထိုအကြည့်က ဝံပုလွေအုပ်စုထံသို့ ကြီးမားလွန်းသော ဖိအားတစ်ခုကို ယူဆောင်လာခဲ့သည်။

ဤသည်မှာ အသားနှင့် သွေးများဖြင့် ဖွဲ့စည်းထားသော သတ္တဝါများ၏ စွမ်းအင်လုပ်ဆောင်ပုံနှင့် ကွဲပြားခြားနားသော အရာတစ်ခုပင် ဖြစ်လေသည်။

လင်းထျန်းလုံ၏ တစ်ကိုယ်လုံးရှိ ကြွက်သားများ တင်းမာသွားပြီး၊ ငွေပြာရောင်နိုးထခြင်း၏ စွမ်းအားများကို ပေါက်ကွဲထွက်ရန် အသင့်ပြင်ထားလိုကခလေသည်။

ဤဝိညာဉ်ပုံရိပ်တည်ရှိမှုထံမှ ကြီးမာသော ခြိမ်းခြောက်မှုတစ်ခုကို သူ အာရုံခံမိနေသည်... ထိုပုံရိပ်၏ စွမ်းအင်အဆင့်မှာ အနည်းဆုံး ဘုရင်အဆင့်၏ တံခါးဝကို ထိတွေ့နေပြီဖြစ်ပုံ ရလေသည်။

“ဒီနေရာကနေ... ထွက်သွား...” စိတ်ဝိညာဉ်ကို တိုက်ရိုက် သက်ရောက်မှုရှိသည့် အေးစက်ပြီး ပြတ်တောင်းပြတ်တောင်း ဖြစ်နေသော အတွေးတစ်ခုမှာ၊ လင်းထျန်းလုံနှင့် နှင်းဝံပုလွေများ အားလုံး၏ စိတ်ထဲသို့ အေးစက်စက် လေပြင်းတစ်ခုသဖွယ် တိုက်ခတ်ဝင်ရောက်လာသည်။

ထိုအ‌တွေးထဲတွင် မည်သည့်ခံစားချက်မျှ ပါဝင်ခြင်း မရှိချေ။

“ဒီသတ္တုကြောက... ငါ့ရဲ့... အိပ်စက်ရာ နေရာပဲ... ငါအိပ်စက်တာကို အနှောင့်အယှက် ပေးတဲ့သူတွေ... သေရမယ်...”

ဝိညာဉ်ပုံရိပ်၏ အတွေးများထဲတွင် ရှေးဟောင်းဆန်သော ခမ်းနားထည်ဝါမှု တစ်ခုနှင့် ငြင်းဆန်၍မရသော လေသံတစ်ခု ပါဝင်နေလေသည်။

တစ်ချိန်တည်းမှာပင် ကြီးမားကျယ်ပြန့်ပြီး အေးစက်လွန်းသော ဖိအားတစ်ခု စတင် ပြန့်နှံ့လာကာ၊ ပတ်ဝန်းကျင် အပူချိန်မှာလည်း ရုတ်တရက် ထိုးကျသွားပြီး၊ လေထုပင်လျှင် အေးခဲသွားတော့မည့်အလား ဖြစ်နေခဲ့သည်။

လင်းထျန်းလုံ၏ မျက်၀န်းများမှာ အဆုံးအထိ ကျုံ့ဝင်သွားခဲ့သည်။

“ထင်တဲ့အတိုင်းပဲ... အများအားဖြင့် ကြီးမားတဲ့ အခွင့်အရေးတွေက ကြီးမားတဲ့ အန္တရာယ်တွေနဲ့ အတူတူ လာတတ်တာပဲဒီရေခဲရိုးတွင်းခြင်ဆီ သတ္တုကြောမှာ အစောင့်ရှိနေတယ်”

“ပြီးတော့ အဲဒီ အစောင့်ရဲ့ ခွန်အားကလည်း ဒီလောက်တောင် ကြောက်စရာ ကောင်းနေတယ်တဲ့လား...”

ကြီးမားကျယ်ပြန့်ပြီး အေးစက်လှသော ဖိအားကြောင့် လင်းထျန်းလုံ၏ တစ်ကိုယ်လုံးရှိ အမွေးအမျှင်များ အလိုအလျောက် ထောင်မတ်သွားခဲ့ရသည်။

အဆင့် ၄၀ မှ ၄၅ ကြား၊ ဒုတိယဘုရင်အဆင့် အလယ်အလတ်...

ဤသည်မှာ လျှို့ဝှက်ဆန်းကြယ်သည့် နှင်းဝိညာဉ်မြေခွေးလေးမှလွဲ၍၊ သူ ယခင်က ကြုံတွေ့ခဲ့ဖူးသမျှထဲတွင် အစွမ်းထက်ဆုံးသော တည်ရှိမှုပင် ဖြစ်သည်။