မသေနိုင်သောရေခဲနဂါးလေး၏ ‌အဆုံးသတ် (၁)

ဝိညာဉ်နယ်မြေ၏ လေပြင်းများမှာ ရေခဲအပိုင်းအစများနှင့် ပါးလွှာသော ဝိညာဉ်စွမ်းအင်များကို သယ်ဆောင်ကာ ဝံပုလွေအုပ်စု၏ ယာယီစခန်းကို ဖြတ်သန်းလျက် အဆက်မပြတ် တိုက်ခတ်နေလေသည်။

ရေခဲနဂါးလေးမှာ စခန်း၏ အစွန်းတွင် မှောက်လျက် အနေအထားဖြင့် ရှိနေသည်။

မီးရဲရဲတောက်နေသော သံမဏိများကဲ့သို့ သူ၏ လည်ပင်းနှင့် ခြေလက်များကို ဖိညှစ်ထားသည့် မျက်စိဖြင့်မမြင်ရသည့် ငွေပြာရောင် စွမ်းအင်များဖြင့် ပြုလုပ်ထားသော ခြေကျင်းများဖြင့် ချုပ်နှောင်ခံထားရလေသည်။

ချုပ်နှောင်မှုမှ အေးစက်သော ခံစားချက်နှင့် ဝိညာဉ်ဖိအားတို့က သူ၏ ကျန်ရှိနေသော စိတ်ဆန္ဒများကို စက္ကန့်တိုင်းတွင် ညှဉ်းပန်းနှိပ်စက်နေလေသည်။

ထောင့်ဖြတ် နှစ်ပိုင်းပြတ်လုနီးပါး ဖြစ်သွားခဲ့သည့် သူ၏ ကျောပြင်ပေါ်ရှိ ကြောက်မက်ဖွယ်ကောင်းသော ဒဏ်ရာကြီးမှာ၊ နှင်းခဲဝိညာဉ်မသေမျိုးလက္ခဏာရပ်၏ အလိုအလျောက် တွန်းအားပေးမှုအောက်တွင် ဖြည်းညင်းစွာ လှုပ်ရှားနေလေသည်။

ရေခဲပြာရောင် အသားနုများနှင့် ကြေးခွံအသစ်များက အက်ကွဲကြောင်းကို ယှက်နွယ်ကာ ပိတ်ဆို့ရန် ကြိုးစားနေကြသော်ငြား....

လေဟာနယ် ဆုတ်ဖြဲခြင်း ဂုဏ်သတ္တိများ ပါဝင်သည့် ငွေပြာကောင်းကင်ဆုတ်ဖြဲလက်သည်းမှ ကျန်ရစ်နေသော ဖျက်ဆီးနိုင်စွမ်းအားကောင်းသည့် စွမ်းအင်များမှာ အပြင်းဆုံးဆုံးသော အဆိပ်များကဲ့သို့ လုပ်ဆောင်နေလေသည်။

၎င်းတို့သည် ကုသရေး လုပ်ငန်းစဉ်ကို အဆက်မပြတ် ဖျက်ဆီးပစ်နေပြီး၊ ဝိညာဉ်ကို ဆုတ်ဖြဲပစ်မတတ် နာကျင်မှုလှိုင်းများကို ယူဆောင်လာပေးလေသည်။

လင်းထျန်းလုံသည် တောင်တစ်လုံးကဲ့သို့ တည်ငြိမ်စွာ မတ်မတ်ရပ်နေပြီး၊ သူ၏ ငွေပြာဘုရင်မျက်၀န်းများဖြင့် အညံ့ခံထားသော မိစ္ဆာသားရဲကို အေးတိအေးစက် စစ်ဆေးနေလေသည်။

သူကို အသက်ရှင်ခွင့် ပေးထားခြင်းမှာ အကောင်းနှင့် အဆိုးကို ချိန်ဆပြီးနောက် အခုလေးတင် ချမှတ်ခဲ့သော ဆုံးဖြတ်ချက်တစ်ခု ဖြစ်လေသည်။

ဤကဲ့သို့သော ထူးဆန်းလှသည့် အသက်ကယ်စွမ်းရည်တစ်ခု ပါဝင်သော အသက်ရှင်နေသည့် နမူနာတစ်ခု၊

တစ်နည်းအားဖြင့် ဝံပုလွေအုပ်စု၏ အနာဂတ် ရှင်သန်နိုင်စွမ်းကို မသေမျိုးတစ်ယောက်ကဲ့သို့ အဆင့်မြှင့်တင်ပေးနိုင်မည့် နှင်းခဲဝိညာဉ်မသေမျိုး၏ လျှို့ဝှက်ချက်က၊ သုသေသနလုပ်ရန် သေချာပေါက် တန်ဖိုးကြီးမားလွန်းလှပေသည်။

၎င်းကိုသာ ထိန်းချုပ်နိုင်မည်ဆိုလျှင်၊ သေချာပေါက် ဖုံးကွယ်ထားသည့် နှင်း၀ံပု လွေအုပ်စု၏ အစွမ်းထက် ဝှက်ဖဲတစ်ခု ဖြစ်လာပေလိမ့်မည်။

အတွေးတစ်ချက်နှင့်အတူ၊ သူသည် ပင့်ကူမျှင်ကဲ့သို့ ပါးလွှာသော ငွေပြာရောင် စွမ်းအင်အမျှင်လေးတစ်ခုကို ခွဲထုတ်လိုက်လေသည်။

တိကျသေသပ်သော ခွဲစိတ်ကိရိယာ တစ်ခုကဲ့သို့ပင်၊ ငွေပြာရောင် စွမ်းအင်အမျှင်လေးသည် စွမ်းအင်စီးဆင်းမှု အားအကောင်းဆုံးဖြစ်သော ရေခဲနဂါးလေး၏ ဒဏ်ရာရှိရာ ဧရိယာဆီသို့ တိတ်ဆိတ်စွာ ရောက်ရှိသွားသည်။

ထို့နောက် ရေခဲနဂါးလေး၏ ပင်ကိုစွမ်းရည် အဓိက အလုပ်လုပ်ပုံကို ခွဲခြမ်းစိတ်ဖြာကာ၊ ပိုမိုနက်ရှိုင်းစွာ ထိန်းချုပ်ခြင်း သို့မဟုတ် သွေးကတိစာချုပ်တစ်ခုကို တည်ဆောက်ရန် အခွင့်အရေးတစ်ခုကို ရှာဖွေရန် ကြိုးစားလိုက်လေသည်။

သို့သော် ငွေပြာရောင် တော်ဝင်မျိုးနွယ်၏ အရှိန်အဝါများ ပါဝင်နေသော ထိုစွမ်းအင်အမျှင်လေးက ရေခဲနဂါးလေး၏ ခန္ဓာကိုယ်ကို ထိတွေ့လိုက်သည့် အခိုက်အတန့်လေးမှာပင် -

ရုတ်တရက် အပြောင်းအလဲတစ်ခု ဖြစ်ပေါ်လာခဲ့သည်။

ရေခဲနဂါးလေး၏ ဧရာမ ခန္ဓာကိုယ်ကြီးမှာ ပြင်းထန်စွာ တုန်ခါသွားခဲ့သည်။

၎င်းမှာ နာကျင်မှုကြောင့် မဟုတ်ဘဲ၊ သဲကန္တာရထဲတွင် ရေငတ်သေတော့မည့် ခရီးသွားတစ်ဦးက ချိုမြိန်သော အိုအေစစ်တစ်ခုကို ရုတ်တရက် ထိတွေ့မိလိုက်သည်နှင့် ပိုတူနေလေသည်။

ပြင်းထန်သော ဒဏ်ရာကြောင့် မှေးမှိန်နေခဲ့သော သူ၏ ခန္ဓာကိုယ်ပေါ်ရှိ ရေခဲပြာရောင် အကြေးခွံများမှာ၊ ထူးဆန်းသော အပြာရောင် အလင်းတန်းများ မျက်စိကျိန်းမတတ် ရုတ်တရက် ပေါက်ကွဲထွက်လာခဲ့သည်။

ကစဉ့်ကလျားဖြစ်ပြီး လောဘများ ပြည့်နှက်နေသည့် ကြီးမားသောဆွဲငင်အားကြီးတစ်ခု ရေခဲနဂါးလေး၏ ခန္ဓာကိုယ်အတွင်းမှ ပေါက်ကွဲထွက်လာခဲ့လေတော့သည်။

ဤဆွဲငင်အားက လင်းထျန်းလုံ စေလွှတ်လိုက်သော ငွေပြာရောင် စွမ်းအင်အမျှင်လေးကို ပထမဆုံး ရူးသွပ်စွာ ဖမ်းယူဝါးမြိုလိုက်သည်။

ဆာလောင်နေသော ဝေလငါးကြီး တစ်ကောင်က ပုစွန်လေး တစ်ကောင်ကို မျိုချလိုက်သကဲ့သို့ ချက်ချင်းပင် ချေဖျက် စုပ်ယူသွားလေတော့သည်။

ပို၍ပင် ထိတ်လန့်စရာကောင်းသည်မှာ၊ စွမ်းအင်ခြေကျင်းများကို ဖန်တီးထားသော ငွေပြာရောင် စွမ်းအားများသာမက၊ ပတ်ဝန်းကျင် လေထုထဲရှိ သိပ်သည်းပြီး သန့်စင်သော ဝိညာဉ်စွမ်းအင်များကပါ....

လေထုထဲတွင် မျက်စိဖြင့်မြင်နိုင်သော အပြာရောင်ဖျော့ဖျော့ ဝဲဂယက်များအဖြစ် ပြောင်းလဲသွားပြီး၊ ရေခဲနဂါးလေး၏ ခန္ဓာကိုယ်အတွင်း အတင်းအဓမ္မ ဆွဲငင်ခံလိုက်ရခြင်းပင် ဖြစ်လေသည်။

၎င်းမှာ မတော်တဆ အသက်ဝင်သွားသော 'ဝိညာဉ်စွမ်းအင်တွင်းနက်ကြီး’ တစ်ခုနှင့် တူနေလေသည်။

ပြင်းထန်သော ဒဏ်ရာကြောင့်၊ နှင်းခဲဝိညာဉ်မသေမျိုး စွမ်းရည်မှာ ထိန်းချုပ်မှုမဲ့နေသော ရူးသွပ်မှုအခြေအနေ တစ်ခုအတွင်း ကျရောက်သွားခဲ့ပြီး၊ မိမိကိုယ်ကို ကုသရန်အတွက် မိတ်ဆွေ၊ ရန်သူ မခွဲခြားဘဲ လက်လှမ်းမီသမျှ စွမ်းအင် အားလုံးကို အလိုအလျောက် ဝါးမြိုနေသည်။

ဝါးမြိုနေစဉ် စွမ်းအင်အရင်းအမြစ်၏ သဘာဝနှင့် ခြိမ်းခြောက်မှုတို့ကိုပင် လျစ်လျူရှုထားလေသည်။

“ဟင်...” အန္တရာယ်ကိုခံစားလိုက်ရသော လင်းထျန်းလုံ၏ မျက်၀န်းများမှာ ရုတ်တရက် အပ်ပေါက်အရွယ်အစားအထိ ကျုံ့ဝင်သွားပြီး၊ စွမ်းအင် ထောက်ပံ့မှုကို ချက်ချင်း ဖြတ်တောက်လိုက်လေသည်။

သို့သော် ရေခဲနဂါးလေး၏ အတွင်းရှိ ဝါးမြိုနေသော ဝဲဂယက်ကြီးမှာ ရပ်တန့်မသွားဘဲ၊ ငွေပြာရောင်စွမ်းအင်၏ အရည်အသွေးမြင့် စွမ်းအင်အာဟာရ အရသာကို မြည်းစမ်းမိသွားပြီးနောက်၊ ပို၍ပင် ရူးသွပ်လာပြီး ရက်စက်ကြမ်းကြုတ်လာလေတော့သည်။

ချုပ်နှောင်ထားသော ခြေကျင်းများ၏ အလင်းရောင်မှာလည်း မျက်စိဖြင့်မြင်နိုင်သော နှုန်းဖြင့် လျင်မြန်စွာ မှေးမှိန်သွားပြီး၊ ဝန်ပိနေသည့်အလား တစ်ရှဲရှဲ အသံများကို ထုတ်လွှတ်နေကာ၊ သီးသန့်ဆွဲငင်အား သပ်သပ်နှင့်ပင် အစိပ်စိပ်အမွှာမွှာဖြစ်ကာ ပြိုကျတော့မည့်အလား ဖြစ်နေလေသည်။

“ဝေါင်းး...” ရေခဲနဂါးလေးသည် တွန့်လိမ်နေရင်းမှ တိုးညှင်းသည့် ဟိန်းဟောက်သံ တစ်ခုကို ထုတ်လွှတ်လိုက်လေသည်။

ကြောက်ရွံ့မှုများဖ အညံ့ခံချင်စိတ်များဖြင့် ပြည့်နှက်နေခဲ့သော သူ၏ ဒေါင်လိုက် သူငယ်အိမ်များမှာ ယခုအခါတွင် သွေးရောင်လွှမ်းနေသော ကစဉ့်ကလျားဖြစ်မှုများဖြင့် လုံးဝ လွှမ်းမိုးခံလိုက်ရပြီဖြစ်သည်။

ကျန်ရှိနေသော အသိဉာဏ်များ အားလုံးမှာလည်း ပျောက်ဆုံးသွားခဲ့လေပြီ။ ရေခဲနဂါးလေး၏ ဧရာမခန္ဓာကိုယ်ကြီးမှာ တွန့်လိမ်ကာ ရူးသွပ်စွာရုန်းကန်နေလေသည်။

ဒဏ်ရာရှိ အသားနုအသစ်များမှာ အလွန်လျှင်မြန်လွန်းသော အရှိန်ဖြင့် ပုံပျက်ပန်းပျက် ကြီးထွား၊ ဖောင်းကားပြီး တွန့်လိမ်လာကာ၊ ငွေပြာရောင် ခြေကျင်းများကိုပင် လွှမ်းခြုံရန် ကြိုးစားလာလေသည်။

ရေခဲနဂါးလေး၏ ပုံသဏ္ဌာန်မှာ ထူးဆန်းပြီး ကြောက်မက်ဖွယ်ကောင်းလာကာ၊ စိတ်မအေးမချမ်း ဖြစ်စေနိုင်သော ကစဉ့်ကလျား အရှိန်အဝါ တစ်ခုကို ထုတ်လွှတ်နေလေသည်။

“ထိန်းချုပ်လို့ မရတော့ဘူးပဲ... စွမ်းရည် တန်ပြန်ရိုက်ခတ်မှုထင်တယ်...” လင်းထျန်းလုံ၏ နှလုံးသားထဲ၌ နောက်ဆုံး ကောက်ချက်ချလိုက်ချိန်တွင် ချက်ချင်း ရေခဲတစ်ခုကဲ့သို့ အေးစက်သွားခဲ့လေသည်။

ဤ နှင်းခဲဝိညာဉ်မသေမျိုး စွမ်းရည်မှာ အမှန်တကယ်ပင် ကောင်းကင်ဘုံကို ဆန့်ကျင်နိုင်သော်လည်း၊ ၎င်းတွင် သေချာပေါက် အားနည်းချက် ကြီးကြီးမားမားတစ်ခု ရှိနေလေသည်...

စွမ်းရည်၏ ကန့်သတ်ချက်ကို ကျော်လွန်သော ဒဏ်ရာကို ရရှိပြီးနောက်၊ အသက်ကို ကာကွယ်လိုသည့် ဗီဇကအရာအားလုံးကို လွှမ်းမိုးသွားမည်။

ထို့နောက် အသုံးပြုသူကို မည်သို့ဝါးမြိုရမည်ကိုသာ သိသော ရူးသွပ်သည့် မိစ္ဆာတစ်ကောင်အဖြစ် ပြောင်းလဲသွားစေကာ နောက်ဆုံးတွင် အသိဉာဏ်မဲ့သော စွမ်းအင်သတ္တဝါဆိုး တစ်ကောင်အဖြစ်သို့ အသွင်ပြောင်းသွားလဲသွားမည် ဖြစ်လေတော့သည်။

ထိုရေခဲနဂါးကို သိမ်းထားခြင်းမှာ နမူနာတစ်ခု သို့မဟုတ် အနာဂတ်တွင် ဖြစ်လာနိုင်သည့် အကူအညီတစ်ခု မဟုတ်တော့ပေ...

ထိုစွမ်းရည်မှာလည်း မိတ်ဆွေ၊ ရန်သူ မခွဲခြားဘဲ အချိန်မရွေး ပေါက်ကွဲထွက်လာနိုင်သည့် ဖျက်ဆီးနိုင်စွမ်းအားကောင်းသော ဗုံးတစ်လုံးသဖွယ် ဖြစ်နေပြီး၊ ရေခဲနဂါး၏ ပြန်လည်ကောင်းမွန်လာမှု အမြန်နှုန်းမှာလည်း ဝိညာဉ်နယ်မြေ ပတ်ဝန်းကျင်တွင် ဖြစ်သောကြောင့် အလွန်အမင်း မြန်ဆန်လာပြီ ဖြစ်လေသည်။

ရေခဲနဂါးသာ ပြန်လည်ကောင်းမွန်လာပါက ပထမဆုံး ထိခိုက်မည်မှာ အနီးအနားရှိ နှင်းဝံပုလွေအုပ်စုနှင့် ကာကွယ်စောင့်ရှောက်မှုကို လိုအပ်နေဆဲဖြစ်သော စွတ်ဖားပေါ်ရှိ အားနည်းလွန်းနေသေးသည့် ဧကရီနှစ်ပါးပင် ဖြစ်လေသည်။

အန္တရာယ်က ဖြစ်လာနိုင်သည့် အကျိုးအမြတ်များထက် များစွာ ပိုမိုကြီးမားနေလေသည်။

ဘုရင်တစ်ပါး၏ ဆုံးဖြတ်ချက်မှာ မျိုးနွယ်စုရှင်သန်မှုနှင့် အမြင့်ဆုံး အကျိုးစီးပွား ယှဉ်ပြိုင်လာမည်ဆိုလျှင် မျိုးနွယ်စုရှင်သန်နိုင်ဖို့ရာသာ ရွေးချယ်ရမည် ဖြစ်သည်။

သူ၏ မျက်လုံးများထဲမှ နောက်ဆုံး ချိန်ဆမှု အရိပ်အယောင်လေးမှာ ပျောက်ကွယ်သွားပြီး၊ နှစ်ပေါင်းတစ်သောင်းသက်တမ်းရှိ နက်ရှိုင်းသော ရေခဲပြင်ကဲ့သို့ ပြတ်သားသည့် သတ်ဖြတ်လိုစိတ်များက အစားထိုး ဝင်ရောက်လာခဲ့လေသည်။

တွန့်ဆုတ်နေခြင်းသည် ဘယ်သောအခါကမျှ ဘုရင်တစ်ပါး၏ လမ်းစဉ် မဟုတ်ခဲ့ပေ။

“ရန့်မြဲ့...” အေးစက်ပြီး၊ သံမဏိကဲ့သို့ ခိုင်မာကာ၊ ငြင်းဆန်၍မရသော အတွေးတစ်ခုမှာ၊ သတိဝီရိယ အမြင့်ဆုံး ရှိနေသော တပ်မှုးကြီး ရန့်မြဲ့၏ အသိစိတ်ထဲသို့ ထက်ရှသော ရေခဲချွန်တစ်ခုအလား ထိုးစိုက်ဝင်ရောက်သွားလေသည်။

ရန့်မြဲ့မှာ ကြာမြင့်စွာကတည်းက အသင့်ပြင်ထားပြီးပြီဖြစ်ရာ အမိန့်ရသည်နှင့် တစ်ပြိုင်နက် လှုပ်ရှားလိုက်လေသည်။

ခမ်းနားထည်ဝါသော ခန္ဓာကိုယ်ကြီးမှာ ရှေ့သို့ ခုန်ဝင်သွားပြီး၊ ရေခဲကြေးခွံချပ်ဝတ်တန်ဆာ (ခရမ်းရောင် ပါရမီရှင်အဆင့်)မှာ အလင်းတန်းများ တဖျတ်ဖျတ် လင်းလက်နေလေသည်။

ရန့်မြဲ့၏ ရင်ဘတ်မှာ ဖောင်းကားလာပြီး၊ သူ၏ ဧရာမပါးစပ်ကြီး ပွင့်လာခဲ့သည်။

ထို့နောက် ခန္ဓာကိုယ်ကို လောင်ကျွမ်းတိုက်ခိုက်ရန် မဟုတ်ဘဲ စွမ်းအင်တည်ရှိမှုများကို အထူး ရည်ရွယ်သည့် ရေခဲမီးတောက် တစ်ခုကို မှုတ်ထုတ်လိုက်လေသည်။

ဤရေခဲမီးတောက်မှာ ထူးဆန်းပြီး ပွင့်လင်းမြင်သာမှုရှိသော ဖြူဖျော့ဖျော့ အရောင်ရှိလေသည်။

၎င်းမှာ အလွန်အမင်း တိတ်ဆိတ်နေသော ပတ်ဝန်းကျင် အပူချိန်ကို သုည ဒီဂရီနီးပါးရှိသော အကြွင်းမဲ့ အေးခဲနယ်ပယ်တစ်ခုအဖြစ် ရုတ်တရက် ထိုးကျသွားစေသည်။

ရူးသွပ်စွာ ရုန်းကန်နေသော ရေခဲနဂါးလေးနှင့် သူ၏ ပတ်ဝန်းကျင်ရှိ လေဟာနယ်ကို ချက်ချင်း လွှမ်းခြုံကာ သီးသန့်အေးခဲထားလိုက်သည်။

ဤသည်မှာ နှင်းခဲဝိညာဉ်မသေမျိုး၏ အဓိက အလုပ်လုပ်ပုံ အပေါ် ငွေပြာဘုရင်မျက်၀န်း၏ ထိုးထွင်းသိမြင်နိုင်စွမ်းကို အသုံးပြုကာ လင်းထျန်းလုံ တီထွင်ထားသော ဖြေရှင်းနည်းပင် ဖြစ်သည်...

“မင်းက မင်းရဲ့ 'မသေနိုင်တဲ့’ အခြေအနေကို ထိန်းသိမ်းဖို့အတွက် စွမ်းအင်တွေကို ဝါးမြိုဖို့ အားကိုးနေတယ်ပေါ့လေ...”

“ဒါဆိုရင် ဝိညာဉ်စွမ်းအင် အနှစ်သာရကို လောင်ကျွမ်းစေတဲ့ ဒီရေခဲမီးတောက်ကို သုံးပြီး၊ မင်းရဲ့ အသက်ကို ထိန်းသိမ်းထားတဲ့ စွမ်းအင် အခြေခံအုတ်မြစ်ကို အသေးငယ်ဆုံး အဏုကြည့်မှန်ပြောင်းအဆင့်ကနေ လုံးဝ ပြာကျသွားအောင် လုပ်ပစ်လိုက်မယ်...”