မသေနိုင်သောရေခဲနဂါးလေး၏ ‌အဆုံးသတ် (၂)

“ရှဲ... ရှဲ...” ရေခဲမီးတောက်များက ခန္ဓာကိုယ်ကို ထိတွေ့လိုက်သည်နှင့်၊ ရေခဲနဂါးလေး ၏ မျက်နှာပြင်ပေါ်ရှိ ပုံမှန်မဟုတ်ဘဲ ကြီးထွားနေသော အသားနုများနှင့် တစ်ရှူးများမှာ ချက်ချင်းပင် အသက်စွမ်းအင်များ ဆုံးရှုံးသွားသည်။

ထို့နောက် လောင်ကျွမ်းကာ ကြွပ်ဆတ်သွားပြီး၊ ပြင်းထန်သော နေရောင်အောက်ရှိ နှင်းများကဲ့သို့ အရည်ပျော်သွားကြလေသည်။

ရေခဲနဂါးလေးသည် လက်သည်းများဖြင့် အတိုက်ခံရချိန်ကထက် များစွာ ပိုမိုစူးရှပြီး မျှော်လင့်ချက်မဲ့နေသော အော်ဟစ်သံကြီး တစ်ခုကို ထုတ်လွှတ်လိုက်လေသည်။

ရေခဲနဂါးလေး၏ ရုန်းကန်မှုများမှာ အထွတ်အထိပ်အထိ ရောက်ရှိသွားပြီး၊ ထက်ရှသော လက်သည်းများဖြင့် ရေခဲပြင်ကို ရူးသွပ်စွာ ကုတ်ခြစ်ကာ နက်ရှိုင်းသော မြောင်းများကို ချန်ရစ်ခဲ့လေသည်။

သို့သော် ရန့်မြဲ့၏ ရေခဲမီးတောက်အပေါ် ထိန်းချုပ်မှုမှာ အလွန်အမင်း သိမ်မွေ့လှသည်။

ရေခဲနဂါးလေးအား ချက်ချင်း မသတ်ပစ်သလို၊ ပြင်ပမှ မည်သည့် ဝိညာဉ်စွမ်းအင်ကိုမျှ ဝါးမြိုခွင့်မပြုဘဲ၊ မျိုးရိုးဗီဇအဆင့်မှ မြစ်ဖျားခံလာသော 'မျိုးတုံးပျောက်ကွယ်ခြင်း’ စွမ်းအားကို တိုက်ဖျက်ရန်အတွက်၊

ရေခဲနဂါးလေး၏ ကိုယ်ပိုင် သိုလှောင်ထားသော မူလစွမ်းအင်များကို အဆက်မပြတ် လောင်ကျွမ်းရန် အတင်းအကျပ် တွန်းအားပေးနေနိုင်သည့် ပြီးပြည့်စုံသော လောင်ကျွမ်းခြင်း နယ်ပယ်တစ်ခုကို ဖန်တီးပိတ်‌လှောင်ထားလေသည်။

လင်းထျန်းလုံသည် အေးစက်စက် ရုပ်တုတစ်ခုကဲ့သို့ ဘေးတွင် မတ်မတ်ရပ်နေပြီး၊ သူ၏ ငွေပြာဘုရင်မျက်၀န်းများက စနစ် အချက်အလက်ပြ မျက်နှာပြင်ပေါ်ရှိ အချက်အလက်များ ရူးသွပ်စွာ လှုပ်ရှားနေမှုကို ရှင်းလင်းစွာ မြင်တွေ့နေရလေသည်။

ရေခဲနဂါးလေး ၏ အခြေအနေကို ကိုယ်စားပြုသော ဆိုင်းငံ့အေးခဲခြင်း အချက်အလက်မှာ ခန့်မှန်းချေ ကြာချိန် ယခင်က တစ်ခါမှ မရှိခဲ့ဖူးလောက်အောင် အမြန်နှုန်းဖြင့် မြင့်တက်သွားသည်ကို တွေ့လိုက်ရသည် -

ဆိုင်းငံ့အေးခဲခြင်း အခြေအနေ၊ ခန့်မှန်း ကြာချိန် - ၇ လ... ၁ နှစ်နှင့် ၃ လ... ၃ နှစ်... ၅ နှစ်နှင့် ၈ လ...

တိတ်ဆိတ်ပြီး ရက်စက်လှသော လောင်ကျွမ်းမှုအတွင်း အချိန်တွေ ကုန်ဆုံးသွားခဲ့သည်။ ရေခဲနဂါးလေး၏ အရှိန်အဝါမှာ လေလျှော့ခံရသော ပူဖောင်းတစ်ခုကဲ့သို့ လျင်မြန်စွာ ညှိုးနွမ်းသွားခဲ့သည်။

ရေခဲနဂါးလေး၏ ခွန်အားများ ကုန်လာကာ ရုန်းကန်မှုမှာ ပိုမိုအားနည်းလာပြီး၊ ဟိန်းဟောက်သံများမှာပင် အားအင်ကုန်ခမ်းနေသော အသက်ရှူသံများအဖြစ် ပြောင်းလဲသွားကာ၊ နောက်ဆုံးတွင် ကြားပင်မကြားရတော့ချေ။

ရေခဲနဂါးလေး၏ မျက်နှာပြင်ပေါ်ရှိ တောက်ပသော ရေခဲပြာရောင် အလင်းတန်းများမှာ လုံးဝလွင့်ပြယ်သွားပြီး၊ မိုးကြိုးပစ်ခံထားရသော သစ်ခြောက်တစ်ခုကဲ့သို့... မီးခိုးရောင်သန်းကာ သေခြင်းတရားနှင့် ကြုံတွေ့လိုက်ရကဲ့သို့ ငြိမ်သက်သွားလေတော့သည်။

အချက်အလက်ပြ မျက်နှာပြင်ပေါ်ရှိ ဂဏန်းများ (ဆိုင်းငံ့အေးခဲခြင်း အခြေအနေ၊ ခန့်မှန်း ကြာချိန် - ၁၆ နှစ်နှင့် ၁၀ လ) သို့ နောက်ဆုံး ခုန်တက်သွားသည့် အခိုက်အတန့်လေးမှာပင်...

တစ်ချိန်က မယုံနိုင်လောက်အောင် ခိုင်မာပြီး အကြံအစည်များဖြင့် ပြည့်နှက်နေခဲ့သော နဂါးလေး၏ ခန္ဓာကိုယ်မှာ ရေခဲမီးတောက်များအတွင်း ရုတ်တရက် တောင့်တင်းသွားခဲ့လေသည်။

ထို့နောက် သူ၏ တည်ရှိမှုကို ထောက်ပံ့ပေးနေသည့် နောက်ဆုံး စွမ်းအင်အနှစ်သာရ အရိပ်အယောင်လေးပါ လုံးဝ လောင်ကျွမ်းသွားသည့်အလား၊ ခွေကျသွားလေတော့သည်။

ရေခဲမီးတောက်များ လွင့်ပြယ်သွားခဲ့သည်။ မည်သည့် အကြွင်းအကျန်မျှ မကျန်ရစ်ခဲ့ပေ။

ရေခဲနဂါးလေး၏ ခန္ဓာကိုယ်မှာ အနည်းငယ်မျှပင် တက်ကြွနေခြင်း မရှိတော့ပေ...

ထိုအစား၊ နှစ်ပေါင်းတစ်သောင်းတိုင်အောင် ရာသီဥတုဒဏ် ခံထားရသော သဲပန်းပုရုပ်ထု တစ်ခုကဲ့သို့၊ တစ်လက်မချင်း အစိတ်စိတ်အမွှာမွှာ ဖြစ်သွားကာ နောက်ဆုံးတွင် အနက်ရောင် ဖုန်မှုန့်များ အဖြစ်သို့ ပြောင်းလဲသွားလေတော့သည်။

ဖုန်မှုန့်များ ဝိညာဉ်နယ်မြေ၏ ဘယ်သောအခါမျှ ရပ်တန့်မသွားသော အေးစက်သည့် လေပြင်းများက တိုက်ခတ်သွားပြီး၊ ရေခဲနဂါးလေး လုံးဝ မတည်ရှိခဲ့ဖူးသည့်အလား ဗလာဟင်းလင်းပြင်အတွင်းသို့ မျောလွင့် ပျောက်ကွယ်သွားလေတော့သည်။

မူလနေရာတွင် မိစ္ဆာအမြုတေ တစ်ခုသာ ကျန်ရစ်ခဲ့လေသည်။

အမြုတေမှာ လက်သီးဆုပ်ခန့် အရွယ်အစားရှိပြီး၊ အရည်အသွေးအကောင်းဆုံး နီလာကျောက်တစ်လုံးကဲ့သို့ ကြည်လင်တောက်ပနေကာ၊ အမြုတေအတွင်းတွင် အရည်ပုံစံ ရေခဲစွမ်းအင်များနှင့် ကြယ်ရောင်များ အဆက်မပြတ် စီးဆင်းနေပုံ ရလေသည်။

၎င်းသည် မြေပြင်မှ တစ်ပေခန့်အကွာတွင် တိတ်ဆိတ်စွာ လွင့်မြောနေပြီး၊ အလွန်အမင်း သန့်စင်သော်လည်း ထာဝရ မျိုးတုံးပျောက်ကွယ်ခြင်း အရိပ်အယောင်တစ်ခု ပါဝင်နေသည့် အေးစက်သော စွမ်းအင်လှိုင်းဂယက်တစ်ခုကို ထုတ်လွှတ်နေလေသည်။

[စနစ် အသိပေးချက်] ။ ။ ပိုင်ရှင်၏ လက်အောက်ခံ ဝံပုလွေသားရဲ ရန့်မြဲ့သည် ပါရမီရှင်အဆင့် မိစ္ဆာသားရဲ၊ ရေခဲနဂါးလေးကို အောင်မြင်စွာ ချေမှုန်းနိုင်ခဲ့ပါသည်။ စွမ်းရည် ကျဆင်းလာသည် - [သေဆုံးခြင်း ပုံဖျက်မှု (ရွှေရောင် · ဒဏ္ဍာရီအဆင့်)]။ စုပ်ယူမည်လား။

[သေမင်းအရိပ်ပုန်းကွယ်ခြင်း (ရွှေရောင် · ဒဏ္ဍာရီအဆင့်)] - ဒဏ္ဍာရီအဆင့် အထူးစွမ်းရည်တစ်ခု။ အသက်သွင်းလိုက်ပါက၊ ဘုရင်အဆင့်အောက် ကျင့်ကြံသူများကို မည့်သည့်အရာနှင့်မျှ မခွဲခြားနိုင်သော ခဏတာ ဆိုင်းငံ့သေဆုံးခြင်း အခြေအနေသို့ ဝင်ရောက်နိုင်သည်။ ကြာချိန် - ၂၄ နာရီ။

“သေမင်းအရိပ်ပုန်းကွယ်ခြင်း... တော်တော်လေးကောင်းတဲ့ အသက်ကယ်စွမ်းရည်ပဲ၊ ဒါပေမဲ့ ငါ့အကျင့်နဲ့မကိုက်ဘူး...”

လင်းထျန်းလုံသည် စွမ်းရည် ရှင်းလင်းချက်ကို ဖတ်ရှုလိုက်ချိန်တွင် ဒဏ္ဍာရီအဆင့် စွမ်းရည်ကိုမြင်လိုက်ရသော်ငြား သူ၏ နှလုံးသားမှာ ယခင်ကဲ့သို့မတုန်လှုပ်နေခဲ့ပေ။

ခွန်အားကို လိုက်စားပြီး၊ နှင်းဝံပုလွေအုပ်စုကို အုပ်စိုးကာ၊ ရန်သူများကို မျက်နှာချင်းဆိုင် ရင်ဆိုင်လေ့ရှိသော နှင်းဝံပုလွေဘုရင်တစ်ပါးအတွက်မူ... ဤကဲ့သို့သော ပုန်းအောင်းခြင်းနှင့် ကြောက်ရွံ့ခြင်းကို ကိုယ်စားပြုသော စွမ်းရည်မှာ သူ၏ ဘုရင်လမ်းစဉ်နှင့် ဆန့်ကျင်ဘက် ဖြစ်နေလေသည်။

အတွေးတစ်ချက်ဖြင့် သူ တိုက်ရိုက် စုပ်ယူရန်သာ ရွေးချယ်လိုက်သည် - “စုပ်ယူလိုက်... ငါ့ရဲ့ ပင်ကိုစွမ်းရည်တွေနဲ့ စွမ်းရည်တွေအတွက် အာဟာရအဖြစ် သုံးလိုက်တာ ပိုကောင်းတယ်...”

ရွှေရောင်စွမ်းရည်မှာ ချက်ချင်း ဝါးမြိုခံလိုက်ရကာ၊ ခမ်းနားကြီးမားပြီး သန့်စင်လှသော စွမ်းအင်ရေစီးကြောင်းတစ်ခု အဖြစ်သို့ ပြောင်းလဲသွားလေသည်။

စွမ်းအင်အများစုမှာ သူ၏ အဓိက သွေးမျိုးဆက်စွမ်းရည်ဖြစ်သော ငွေပြာရောင်သွေးမျိုးဆက် (ရွှေရောင် · ဘုရင်အဆင့်) အတွင်းသို့ စစီးဝင်သွာပြီး ရွှေရောင် ပုံသဏ္ဌာန်များကို ပိုမိုနက်ရှိုင်းသော အလင်းတန်းများဖြင့် ခပ်သဲ့သဲ့ တဖျတ်ဖျတ် လင်းလက်သွားစေသည်။

စွမ်းအင်အစိတ်အပိုင်းအနည်းငယ်မှာမူ သွေးဆာရူးသွပ်တိုက်ပွဲ (ခရမ်းရောင် · ပါရမီရှင်အဆင့်) ကဲ့သို့သော အခြားစွမ်းရည်များကို စွမ်းအင် ဖြည့်တင်းပေးလိုက်လေသည်။

တစ်ချိန်တည်းမှာပင် သူသည် နှင်းခဲဝိညာဉ်မသေမျိုးစွမ်းရည်၏ မူလလျှို့ဝှက်ချက် အချို့ ပါဝင်နေသော ရေခဲနဂါးလေး၏ အမြုတေကို သေချာ သိမ်းဆည်းလိုက်သည်။

၎င်းမှာ အနာဂတ်တွင် အထူး ဆေးရည်များ ဖော်စပ်ရန် သို့မဟုတ် လက်နက်များ သွန်းလုပ်ရန်အတွက် အသုံးဝင်လာနိုင်သည်ဟု တွေးလိုက်လေသည်။

လင်းထျန်းလုံသည် တိုက်ပွဲဝင် ပစ္စည်းများကို ကိုင်တွယ်ဖြေရှင်းပြီးနောက် သူ၏ စိတ်မှာ အနည်းငယ် ပြေလျော့သွားခဲ့လေသည်။

စွတ်ဖားပေါ်တွင်၊ တင်းမာသော မျက်နှာငယ်လေးများဖြင့် တိုက်ပွဲကို တစ်ချိန်လုံး စောင့်ကြည့်နေခဲ့ကြသော ရှောင်လန်နှင့် ရှောင်ယင်းတို့မှာတော့ တစ်ပြိုင်နက်တည်းနီးပါး အသက်ရှူမှားသွားခဲ့ကြသည်။

ကြယ်များကဲ့သို့ ကြည်လင်တောက်ပနေသော သူတို့၏ မျက်လုံးများထဲတွင်၊ တုန်လှုပ်မှုများ၊ မယုံကြည်နိုင်မှုများဖြင့် ပြည့်နှက်နေလေသည်။

“ပျောက်သွားပြီ... အဲဒါကြီးက ပျောက်သွားပြီလား... လုံးဝ ဥဿုံ ဖယ်ရှားခံလိုက်ရတာလား...”

ရှောင်ယင်းသည် သူမ၏ မျက်လုံးများကို အပြင်းအထန် ပွတ်သပ်လိုက်ကာ ပန်းရောင် နှုတ်ခမ်းငယ်လေးမှာလည်း အနည်းငယ် ပွင့်ဟနေလေသည်။

သူမဘေးရှိ ရှောင်လန်၏ လက်မောင်းကို အလိုအလျောက် ဆုပ်ကိုင်လိုက်ပြီး ကလေးသံလေးဖြင့် အလန့်တကြား အော်ဟစ်လိုက်လေသည်။

သူမသည် ငယ်ရွယ်သေးသော်လည်း၊ ခြေရာလက်ရာ တစ်ခုမျှ မကျန်ရစ်စေဘဲ လုံးဝ ဥဿုံ သုတ်သင်ရှင်းလင်းလိုက်သည့် ဤနည်းလမ်းမှာ၊ အခြေခံအားဖြင့် သာမန် သတ်ဖြတ်မှုတစ်ခုနှင့်မတူဘဲ ကွဲပြားခြားနားနေကြောင်းကို အလိုအလျောက် အာရုံခံမိလေသည်။

တစ်ချိန်က လောကအထွတ်အထိပ်သို့ ရောက်ရှိခဲ့ပြီး မုန်တိုင်းများစွာကို မြင်တွေ့ခဲ့ဖူးသော ရေခဲဧကရီ ပြန်လည်ဝင်စားခြင်းဖြစ်သည့် ရှောင်လန်အတွက်မူ၊ သူမ၏ နှလုံးသားထဲရှိ ဆူပွက်နေမှုများမှာ ရှောင်ယင်းထက် များစွာ ပိုမို ပြင်းထန်လှပေသည်။

“ဒါ ဘယ်လိုလုပ် ဖြစ်နိုင်မှာလဲ... ဒါက... ဒါက ဘယ်လို နည်းလမ်းမျိုးလဲ...”

သူမ၏ ရေခဲပြာရောင် မျက်လုံးများမှာ ရေခဲနဂါးလေး ပျောက်ကွယ်သွားခဲ့သည့် နေရာကိုသာ စူးစိုက်ကြည့်နေပြီး၊ ကြီးမားလှသော လှိုင်းလုံးကြီးတစ်ခု သူမအတွင်း၌ ဆူပွက်နေလေသည်။

“အဲဒါက ‘ထာဝရနှင်းခဲ နဂါးသခင်လေ... အနာဂတ်မှာ အဆင့်တူ ကျွမ်းကျင်သူ အများအပြားရဲ့ ဝိုင်းရံတိုက်ခိုက်တာကို ခံရချိန်မှာတောင်မှ၊ သူ့ရဲ့ ‘မသေနိုင်တဲ့’ စွမ်းရည်ကို အားကိုးပြီး အကြိမ်ကြိမ် ထွက်ပြေးနိုင်ခဲ့တာ...”

“အဲ့ကောင်ကြီးကို ကိုင်တွယ်ဖြေရှင်းဖို့ ခက်ခဲတာက ဒဏ္ဍာရီတစ်ခုလို ဖြစ်နေခဲ့တာကို... ဝံပုလွေဖေဖေက တကယ်ပဲ... အဲ့နဂါးရဲ့ တည်ရှိမှုကို ဒီလောက်အထိ.... အစအနတောင် မကျန်အောင် ဖျက်ဆီးပစ်လိုက်နိုင်တာလား...”

အတိတ်ဘ၀သို့ ပြန်လည်ရောက်ရှိလာသူ တစ်ဦးအနေဖြင့်၊ “ထာဝရနှင်းခဲ နဂါးသခင်” ကို သတ်ဖြတ်ရန် မည်မျှ ခက်ခဲကြောင်း သူမက အခြားသူများထက် ပိုမို ကောင်းစွာ သိရှိထားလေသည်။

ထိုရေခဲနဂါးမှာ ဆိုင်းငံ့သေဆုံးခြင်း သက်သက်ထက် များစွာ ပိုမိုနက်ရှိုင်းလှသည်...

နှင်းခဲဝိညာဉ်မသေမျိုး စွမ်းရည်မှာ အသက်စွမ်းအင်အနှစ်သာရနှင့် ဝိညာဉ်အမှတ်အသားများ၏ နက်ရှိုင်းသော လျှို့ဝှက်ချက်များနှင့် သက်ဆိုင်နေပြီး၊ ရေခဲနဂါးကို လုံး၀ ဥဿုံ ကြိတ်ချေပစ်ရန်မှာ အလွန်အမင်း ခက်ခဲလှပေသည်။

ဤအကြောင်းကြောင့်ပင်၊ သူမရှေ့ရှိ မြင်ကွင်းမှာ ဤမျှအထိ ကြောက်မက်ဖွယ် ကောင်းနေခြင်း ဖြစ်လေသည်။

ဝံပုလွေဖေဖေတစ်ဦးတည်း အစွမ်းထက်ရုံတင် မကဘဲ၊ ဦးလေးရန်မြဲ့သည်ပါ အစွမ်းထက် တားမြစ်နည်းလမ်းတစ်ခုနှင့် တူသော ဤမျှ အဖျက်စွမ်းအားကောင်းလွန်းသည့် နည်းလမ်းမျိုးကို အမှန်တကယ်ပင် ပိုင်ဆိုင်ထားသည်လော။

ပြန်လည်မွေးဖွားလာသော ဧကရီနှစ်ပါးမှာ အလိုအလျောက် အချင်းချင်း ကြည့်လိုက်မိကြပြီး၊ သူတို့ နှစ်ဦးလုံး၏ မျက်လုံးများထဲတွင် တူညီသော ထိတ်လန့်မှုနှင့် နက်ရှိုင်းစွာ အမြစ်တွယ်နေသော ရိုသေလေးစားမှုတို့ကို မြင်တွေ့လိုက်ကြရလေသည်။

လင်းထျန်းလုံ၏ လျင်မြန်၊ တိကျပြီး ရက်စက်လှသော ကိုင်တွယ်ဖြေရှင်းပုံနှင့်၊ ထိုလျှို့ဝှက်ဆန်းကြယ်လှသော 'သုတ်သင်ရှင်းလင်းခြင်း’ နည်းလမ်းတို့က၊ ဝံပုလွေဖေဖေအပေါ် သူတို့၏ အမြင်ကို၊ လုံးဝ အဆင့်သစ်တစ်ခုသို့ တိုးမြင့်ပေးလိုက်ပြန်သည်။

ရေခဲနဂါးလေး သေဆုံးသွားသော ဖြစ်စဉ်ကို မြင်လိုက်ရသောကြောင့် သူတို့နှစ်ဦးလုံး နှလုံးသားပင် အနည်းငယ် တုန်ခါသွားခဲ့ကြသည်။

လင်းထျန်းလုံသည် သူ၏ သမီးလေးများထံမှ တုန်လှုပ်မှု၊ အနည်းငယ် စိတ်မအေးမချမ်းမှုများဖြင့် ရောနှောနေသော အကြည့်များကို ခံစားလိုက်ရသည်။