အာကာသ၀င်ပေါက် ပွင့်လာခဲ့ခြင်း၊ နောက်ဆုတ်မည်လော၊ ရှေ့ဆက်တိုးမည်လော (၃)

လေစွမ်းအားအပေါ် သူ၏ ထိန်းချုပ်မှုမှာလည်း အဆင့်သစ်တစ်ခုသို့ ရောက်ရှိသွားကာ၊ လေစီးကြောင်း အမြန်နှုန်းမြှင့်တင်ခြင်း စွမ်းရည်၏ အကျိုးသက်ရောက်မှုမှာလည်း ပိုမိုသွက်လက်ပြီး ကြာရှည်ခံလာပုံရကြောင်း ခံစားလိုက်ရလေသည်။

စစ်သူကြီး သုံးဦးစလုံးမှာ ခက်ခဲသော တိုက်ပွဲတစ်ခုအတွင်းသို့ အသီးသီး ကျရောက်နေကြလေသည်။

ချက်ချင်း ရှုံးနိမ့်သွားမည့် ပုံစံ မရှိသော်လည်း၊ တိုက်ပွဲကို မြန်မြန် အဆုံးသတ်ရန်လည်း မဖြစ်နိုင်ပေ။

ရေပြာကြေးခွံအစောင့်အရှောက်များက ဦးဆောင်ဖွဲ့စည်းထားသော အခြား ဝံပုလွေအုပ်စုဝင်များမှာ၊ ကျန်ရှိနေသော အစောင့်အရှောက်များ၏ တိုက်ခိုက်မှုကို ကြံ့ကြံ့ခံနိုင်ရန် စက်ဝိုင်းပုံစံ ဖွဲ့စည်းပုံတစ်ခုကို ဖွဲ့စည်းထားကြလေသည်။

စစ်မြေပြင်မှာ တစ်ခဏတာ အကြိတ်အနယ် ဖြစ်နေကြလေသည်။

စွတ်ဖားပေါ်တွင် ရှောင်လန်နှင့် ရှောင်ယင်းတို့မှာ အပြင်ဘက်ရှိ တိုက်ပွဲကို စိုးရိမ်တကြီး ကြည့်ရှုနေကြလေသည်။

“ဖေဖေ... ဦးလေးရန့်မြဲ့တို့ အရမ်း အားစိုက်ထုတ်နေရပုံပဲ...” ရှောင်ယင်းက စိုးရိမ်တကြီး ပြောလိုက်သည်။

ရှောင်လန်ကမူ တိုက်ပွဲအခြေအနေကို စူးရှသော မျက်လုံးများဖြင့် အကဲခတ်နေလေသည်။

က်ရုတ်တရက် သူမသည် အမိန့်များ အဆက်မပြတ် ပေးနေသော ညာဘက်ခြမ်းရှိ အစောင့်အရှောက် တပ်မှူးကို လက်ညှိုးထိုးပြလိုက်သည်

“ဖေဖေ။ အဲဒီ ရေခဲတုံးကြီးက တခြားသူတွေကို ကွပ်ကဲနေပုံပဲ... အဲ့ကောင်ရဲ့ အလင်းရောင်က ရေခဲတုံးအဖွဲ့ထဲမှာ အတောက်ပဆုံးပဲ...”

လင်းထျန်းလုံသည် အသာအယာ ခေါင်းညိတ်ပြလိုက်သည်။ သူ့ သမီးလေးများ၏ အကဲခတ်မှုများမှာ အလွန်တိကျလှပေသည်။

သူသည် စစ်မြေပြင်တစ်ခုလုံးကို ကြည့်ရှုရန် သူ၏ ငွေပြာဘုရင်မျက်၀န်း စွမ်းရည်ကို အသုံးပြုနေခဲ့ပြီး ဤအခွင့်အရေး...

အတိအကျဆိုရလျှင် သူ၏ စစ်သူကြီး သုံးဦး ဖိအားအောက်တွင် အဆင့်တက်လှမ်းနိုင်မည့် အခွင့်အရေးကို စောင့်ဆိုင်းနေခဲ့ခြင်း ဖြစ်လေသည်။ ယခုအခါ ဟန်ချက်ညီမှုကို သူ ဝင်ရောက် ဖြိုခွဲရန် အချိန်ကျရောက်လာပြီ ဖြစ်လေသည်။

သူ၏ အကြည့်များက ထိုအဆင့် ၂၄ ရေခဲအစောင့်အရှောက် တပ်မှူးပေါ်သို့ ရောက်သွာတော့‌သည်။

လင်းထျန်းလုံ လှုပ်ရှားလိုက်ချေပြီ။

သူသည် မျက်စိကျိန်းမတတ် တောက်ပနေသော မည်သည့်စွမ်းရည်ကိုမျှ အသုံးမပြုခဲ့ဘဲ၊ သူ၏ ညာဘက်လက်ဖဝါးကို ရိုးရှင်းစွာ မြှောက်လိုက်ခြင်းသာ ဖြစ်လေသည်။

သို့သော် ဤလှုပ်ရှားမှုနှင့်အတူ၊ သူ့ကို ဗဟိုပြုကာ မျက်စိဖြင့်မမြင်ရသော၊ နှလုံးခုန်မြန်သွားစေနိုင်လောက်သည့် ကြောက်မက်ဖွယ် ဖိအားတစ်ခု ရုတ်တရက် ပြန့်နှံ့သွားလေသည်။

ငွေပြာဘုရင်မျက်၀န်း၏ ရေခဲပြာရောင် အလင်းတန်းများမှာ အဆင့် ၂၄ ရေခဲအစောင့်အရှောက် တပ်မှူးအပေါ်သို့ ကျရောက်နေခဲ့သည်။

အသက်အန္တရာယ် အကျပ်အတည်းတစ်ခုကို အာရုံခံမိလိုက်သဖြင့်၊ အစောင့်အရှောက် တပ်မှူး၏ မျက်တွင်းများထဲရှိ ဝိညာဉ်မီးတောက်များမှာ ပြင်းထန်စွာ တုန်ခါသွားခဲ့လေသည်။

သူသည် ယင်းဖုန်းအား လိုက်လံဖမ်းဆီးနေခြင်းကို ချက်ချင်း စွန့်လွှတ်လိုက်ပြီး၊ ရေခဲဓားကို သူ၏ ခန္ဓာကိုယ်ရှေ့တွင် ကန့်လန့်ဖြတ် ကာထားလိုက်ကာ၊ ရေခဲသလင်းခန္ဓာကိုယ်မှာ လင်းလက်တောက်ပလာပြီး အစွမ်းကုန် ကာကွယ်ရန် ကြိုးစားလိုက်လေသည်။

သို့သော် နောက်ကျသွားခဲ့ပြီ ဖြစ်လေသည်။

လင်းထျန်းလုံ၏ လက်ဖဝါးမှာ နှေးကွေးပုံရသော်လည်း၊ တကယ်တမ်းတွင်မူ လျှပ်စီးတစ်တန်းသဖွယ် ရှေ့သို့ ရိုက်ချလာခဲ့ပြီ ဖြစ်သည်။

သူသည် ငွေပြာမိုးကြိုးလက်သည်း၊ ငွေပြာကောင်းကင်ဆုတ်ဖြဲလက်သည်း စသည့် လက်သည်းစွမ်းရည်များကို ကို အသုံးမပြုခဲ့ချေ။

သူ၏ သန့်စင်သော ခွန်အားနှင့် အမြန်နှုန်းကို အလယ်အလတ် စိတ်ထိန်းချုပ်ခြင်းဖြင့် ဖန်တီးထားသော မျက်စိဖြင့်မမြင်ရသည့် တိုက်ခိုက်မှုနှင့် ပေါင်းစပ်လိုက်ခြင်းသာ ဖြစ်လေသည်။

ဝုန်း...

တုံးအိအိနှင့် လေးလံလွန်းသော အသံကြီးတစ်ခု ထွက်ပေါ်လာခဲ့သည်။

အစောင့်အရှောက် တပ်မှူးမှာ မျက်စိဖြင့်မမြင်ရသော ဧရာမ သံတူကြီး တစ်လက်ဖြင့် ရိုက်နှက်ခံလိုက်ရသကဲ့သို့ ရှေ့တည့်တည့်မှ ထိမှန်သွားသည်။

နက်ရှိုင်းသော ရေခဲများဖြင့် ဖွဲ့စည်းထားသည့် အစောင့်အရှောက်၏ တစ်ကိုယ်လုံးမှာ ပင့်ကူအိမ်သဖွယ် အက်ကွဲကြောင်းများဖြင့် ချက်ချင်း ဖုံးလွှမ်းသွားလေတော့သည်။

အစောင့်အရှောက်၏ မျက်လုံးများထဲရှိ ဝိညာဉ်မီးတောက်များမှာ ပြင်းထန်စွာ တုန်ခါသွားပြီး၊ အော်ဟစ်သံတစ်ခု မထုတ်လွှတ်နိုင်မီမှာပင်၊ ရေခဲအပိုင်းအစပုံကြီး တစ်ခုအဖြစ် ဝုန်းခနဲ လုံးဝ အစိပ်စိပ်အမွှာမွှာ ဖြစ်သွားသည်။

အစောင့်အရှောက်၏ ဝိညာဉ်မီးတောက်များမှာလည်း သူနှင့်အတူ ကြေမွပျောက်ကွယ်သွားလေတော့သည်။

ခေါင်းဆောင်မှာ ချက်ချင်း သတ်ဖြတ်ခံလိုက်ရလေပြီ။ တင်းကြပ်သော ဖွဲ့စည်းပုံဖြင့် ပြီးပြည့်စုံစွာ ပူးပေါင်းဆောင်ရွက်နေခဲ့ကြသော ရေခဲအစောင့်အရှောက်များ အားလုံးဧ။ခ လှုပ်ရှားမှုများ တောင့်တင်းသွားကြသည်။

သူတို့၏ မျက်တွင်းများထဲရှိ ဝိညာဉ်မီးတောက်များမှာလည်း သိသာထင်ရှားသော ကစဉ့်ကလျား လှိုင်းဂယက်များကို ပြသလာလေသည်။ ပူးပေါင်းတိုက်ခိုက်ခြင်း ၏ အကျိုးသက်ရောက်မှုမှာ သိသိသာသာ အားနည်းသွားခဲ့ချေပြီ။

“အခုပဲ...” လင်းထျန်းလုံ၏ အတွေးမှာ စစ်သူကြီးသုံးဦး၏ နှလုံးသားများထဲတွင် စစ်စည်တစ်ခုကဲ့သို့ မြည်ဟည်းသွားလေသည်။

“အာဝူး...” ရန့်မြဲ့သည် အရင်ဦးဆုံး ပေါက်ကွဲထွက်လာခဲ့သည်။

သူ့အား ဖိနှိပ်ထားခဲ့သော စွမ်းအားများ ရုတ်တရက် အားနည်းသွားသည်ကို ခံစားလိုက်ရပြီး၊ ကြာမြင့်စွာ စုဆောင်းထားခဲ့သော တိုက်ပွဲအတွေ့အကြုံများနှင့် ရင်ဆိုင်ခဲ့ရသော ဖိအားများမှာ ဤအခိုက်အတန့်တွင် အချိုးအကွေ့တစ်ခုကို ရှာတွေ့သွားခဲ့လေသည်။

ရန့်မြဲ့၏ ခန္ဓာကိုယ်ပေါ်ရှိ ရေခဲကြေးခွံချပ်ဝတ်တန်ဆာမှာ ကြည်လင်ပြတ်သားသော အက်ကွဲသံတစ်ခုကို ထွက်ပေါ်လာပြီး၊ မူလက သလင်းကျောက်များကဲ့သို့ ကြည်လင်နေသော ရေခဲချပ်ဝတ်မှာ စတင် အသွင်ပြောင်းလာလေသည်။

ရေခဲချပ်၀တ်၏ အရောင်မှာ ပိုမိုနက်ရှိုင်းလာပြီး အေးစက်မာကျောသော သတ္တုအလင်းတန်းတစ်ခု ပေါ်လာလေသည်။

အကြေးခွံများ၏ ဖွဲ့စည်းပုံမှာလည်း ပိုမိုရှုပ်ထွေးပြီး အလွှာများ ပါဝင်လာကာ၊ ရန့်မြဲ့၏ ကာကွယ်ရေးစွမ်းအားမှာလည်း ရုတ်တရက် ထိုးတက်သွားခဲ့လေသည်။

တစ်ချိန်တည်းမှာပင်၊ သူ၏ မိစ္ဆာဝိညာဉ်ခွဲလက်သည်း စွမ်းရည်တွင် ပါဝင်နေသော ကြမ်းတမ်းသည့် အရှိန်အဝါမှာ ပြန့်ကျဲနေသော အနက်နှင့် အနီ ရောယှက်နေသည့် အရောင်မဟုတ်တော့ဘဲ၊ ခိုင်မာလုနီးပါးဖြစ်နေကာ အနီရောင်ရင့်ရင့် ရေခဲသလင်းများအဖြစ် စုစည်းသွားလေသည်။

ရုပ်ပိုင်းဆိုင်ရာ ဖျက်ဆီးနိုင်စွမ်း ပိုမိုအားကောင်းလာရုံသာမက၊ ဝိညာဉ်စွမ်းအင်အပေါ် တိုက်စားနိုင်စွမ်းမှာလည်း သိသိသာသာ မြင့်တက်လာခဲ့လေသည်။

[စနစ် အသိပေးချက်] ။ ။ပိုင်ရှင်၏ လက်အောက်ခံ နှင်းဝံပုလွေသားရဲ ရန့်မြဲ့သည် တိုက်ပွဲအတွင်း အဆင့်တက်လှမ်းသွားပါပြီ။

ရေခဲကြေးခွံချပ်ဝတ်တန်ဆာ (ခရမ်းရောင် ပါရမီရှင်အဆင့်) စွမ်းရည်မှာ ပိုမိုအားကောင်းလာပြီး၊ “ခိုင်ခံ့သော နံရံ” ဂုဏ်သတ္တိကို နားလည်သဘောပေါက်သွားပါပြီ။

မိစ္ဆာဝိညာဉ်ခွဲလက်သည်း (ခရမ်းရောင် ပါရမီရှင်အဆင့်) စွမ်းရည်မှာ ပိုမိုအားကောင်းလာပြီး၊ ‘ဝိညာဉ် တိုက်စားခြင်း' ဂုဏ်သတ္တိကို နားလည်သဘောပေါက်သွားပါသည်။

“အာဝူး...” ထျန်းပင်းသည်လည်း အားရပါးရ ဟိန်းဟောက်လိုက်လေသည်။

သူ၏ စည်းချက်မရှိ တိုက်ခိုက်မှုများကို ဟန့်တားနေခဲ့သော ဖွဲ့စည်းပုံမှာ ပျက်စီးသွားပြီဖြစ်ရာ၊ နှင်းမုန်တိုင်းတိုက်ပွဲဝိညာဉ် ပင်ကိုစွမ်းကည်၏ ကြမ်းတမ်းလွန်းသော စွမ်းအားများကို အမြင့်ဆုံး ကန့်သတ်ချက်အထိ တွန်းတင်ရန် အခွင့်အရေးကို ဆုပ်ကိုင်လိုက်လေသည်။

ကြမ်းတမ်းစွာ ဝင်ဆောင့်ခြင်း (အဖြူရောင် · ငွေအဆင့်) မှာ ကြမ်းတမ်းစွာ ဝင်ဆောင့်ခြင်း (ခရမ်းရောင် · ခြေလှမ်း၀က်ပါရမီရှင်အဆင့်) သို့ အဆင့်တက်သွားချေပြီ။

သူ၏ ဝင်ဆောင့်မှုမှာ နှင်းများပြိုကျသကဲ့သို့ တားဆီး၍မရနိုင်လောက်အောင် ဖြစ်နေပြီး၊ သူ့အရှေ့ရှိ အစောင့်အရှောက် သုံးကောင်ကို တိုက်ရိုက် လွင့်စင်သွားစေလေသည်။

သူ၏ အဓိက တိုက်ခိုက်ရေး စွမ်းရည်ဖြစ်သော ပြင်းထန်ရေခဲဝါးမြိုခြင်း အတွက်မူ၊ ရွှေရောင်ရင့်ရင့် ပုံသဏ္ဌာန်များမှာ ပိုမိုအသက်ဝင်လာပုံရပြီး၊ ဝါးမြိုခြင်း အကျိုးသက်ရောက်မှုမှာ ပိုမိုအားကောင်းလာခဲ့သည်။

သူ၏ ကိုက်ချက်ထဲတွင် ဝိညာဉ်ကို ဆုတ်ဖြဲပစ်နိုင်မည့် ကြမ်းတမ်းသော အော်ဟစ်သံ တစ်ခုပင် ပါဝင်နေလေသည်။

[စနစ် အသိပေးချက်]။ ။ ပိုင်ရှင်၏ လက်အောက်ခံ နှင်းဝံပုလွေသားရဲ ထျန်းပင်းသည် တိုက်ပွဲအတွင်း အဆင့်တက်လှမ်းသွားပါပြီ။

ကြမ်းတမ်းစွာ ဝင်ဆောင့်ခြင်း (အဖြူရောင် · ငွေအဆင့်) စွမ်းရည်မှာ ကြမ်းတမ်းစွာ ဝင်ဆောင့်ခြင်း (ခရမ်းရောင် · ခြေလှမ်း၀က်ပါရမီရှင်အဆင့်) သို့ အဆင့်တက်သွားပါပြီ။

ပြင်းထန်ရေခဲဝါးမြိုခြင်း (ခရမ်းရောင် ပါရမီရှင်အဆင့်) စွမ်းရည်မှာ ပိုမို အားကောင်းလာပြီး၊ “ဝိညာဉ် ဆုတ်ဖြဲခြင်း” ဂုဏ်သတ္တိကို နားလည်သဘောပေါက်သွားပါပြီ။

ဝှစ်... ယင်းဖုန်း၏ ပုံရိပ်မှာ မျက်စိဖြင့်မမြင်ရသော အစစ်အမှန် လေထုတစ်ခုအဖြစ်သို့ ပြောင်းလဲသွားလုနီးပါးပင်။

အစောင့်အရှောက်များ ကစဉ့်ကလျား ဖြစ်သွားသည့် အခိုက်အတန့်လေးမှာပင်၊ သူ၏ အမြန်နှုန်းမှာ အဆင့်သစ်တစ်ခုသို့ ရောက်ရှိသွားလေသည်။

လေစီးကြောင်း အမြန်နှုန်းမြှင့်တင်ခြင်း၏ အကျိုးသက်ရောက်မှုများမှာ ပိုမိုကြာရှည်ခံပြီး သွက်လက်လာသည်။

လေဓားသွားလက်သည်းမှာလည်း ကောင်းကင်နှင့် မြေကြီး ပြောင်းလဲသွားသကဲ့သို့သော ကြီးမားသည့် အပြောင်းအလဲတစ်ခုကို ဖြတ်သန်းသွားလေသည်။

ရမ်းယှက်လိုက်တိုင်း ထွက်ပေါ်လာသော စွမ်းအင်လှိုင်းများမှာ လေဓားသွား တစ်ခုတည်း မဟုတ်တော့ချေ။

ပိုမိုကြီးမားသော ဧရိယာကို လွှမ်းခြုံနိုင်သည့် အားကောင်းလွန်သော ဖြတ်တောက်နိုင်စွမ်းနှင့် အစွန်းရောက် အအေးဓာတ် ဂုဏ်သတ္တိ အရိပ်အယောင်လေးတစ်ခု ပါဝင်နေသည့် သေမင်းပိုက်ကွန်ကြီး တစ်ခုသဖွယ် ဖြစ်နေလေသည်။

[စနစ် အသိပေးချက်]။ ။ ပိုင်ရှင်၏ လက်အောက်ခံ နှင်းဝံပုလွေသားရဲ ယင်းဖုန်းသည် တိုက်ပွဲအတွင်း အဆင့်တက်လှမ်းသွားပါပြီ။

လေဓားသွားလက်သည်း (အဖြူရောင် · ငွေအဆင့်) စွမ်းရည်မှာ အစွန်းရောက် အရိပ်လေဓားသွား (ခရမ်းရောင် · ခြေလှမ်း၀က်ပါရမီရှင်အဆင့်) သို့ အဆင့်တက်သွားပါပြီ။

လေစီးကြောင်း အမြန်နှုန်းမြှင့်တင်ခြင်း (ခရမ်းရောင် ပါရမီရှင်အဆင့်) စွမ်းရည်မှာခည်း ပိုမိုအားကောင်းလာပါပြီ။

စစ်သူကြီးသုံးဦးလုံး တစ်ပြိုင်နက်တည်း အဆင့်တက်လှမ်းသွားကြပြီး၊ သူတို့၏ တိုက်ခိုက်ရေးစွမ်းအားများမှာလည်း ရုတ်တရက် ထိုးတက်သွားခဲ့လေသည်။

တိုက်ပွဲ အခြေအနေမှာ ချက်ချင်း ပြောင်းပြန်လှန်သွားခဲ့လေသည်။

ရန့်မြဲ့သည် ဖျက်ဆီး၍မရနိုင်သော ဒိုင်းလွှားကြီး တစ်ခုသဖွယ် ဖြစ်လာပြီး၊ မိစ္ဆာဝိညာဉ်ခွဲလက်သည်းဖြင့် ရမ်းယှက်လိုက်တိုင်း အနီရောင်ရင့်ရင့် ရေခဲသလင်း မုန်တိုင်းတစ်ခုကို ယူဆောင်လာလေသည်။

ထိုမုန်တိုင်း ထိမှန်သွားသော ရေခဲအစောင့်အရှောက်များမှာ ခန္ဓာကိုယ် အစိပ်စိပ်အမွှာမွှာ ဖြစ်သွားရုံသာမက၊ သူတို့၏ ဝိညာဉ်မီးတောက်များပင်လျှင် တစ်ခဏအတွင်း မှေးမှိန်သွားကြရလေသည်။

ထျန်းပင်းမှာတော့ ကြမ်းတမ်းသော ခံတပ်တံခါးဖျက် သစ်တုံးကြီး တစ်ခုအလား ပြောင်းလဲသွားပြီး၊ သူ၏ ကြမ်းတမ်းစွာ ဝင်ဆောင့်ခြင်းက ကျန်ရှိနေသော ဖွဲ့စည်းပုံကို အလွယ်တကူ ဆုတ်ဖြဲပစ်နိုင်လာသည်။

ပိုမိုအားကောင်းလာသော ပြင်းထန်ရေခဲဝါးမြိုခြင်းဖြင့် အစောင့်အရှောက်များကို ရေခဲအပိုင်းအစများအဖြစ် တစ်ကောင်ပြီးတစ်ကောင် ဆုတ်ဖြဲပစ်နေလေသည်။

ယင်းဖုန်းမှာ တစ္ဆေဆန်ဆန် လုပ်ကြံသတ်ဖြတ်သူ တစ်ဦးကဲ့သို့ဖြစ်လာပြီး၊ အစွန်းရောက် အရိပ်လေဓားသွားဖြင့် သေမင်းပိုက်ကွန်ကြီး တစ်ခုကို ယက်လုပ်ကာ ကစဉ့်ကလျား ဖြစ်နေသော ရန်သူများကို တိကျစွာ ရိတ်သိမ်းနေလေသည်။