ဓားနန်းဆောင် အစည်းအဝေး

တာဟဲစျေးမြို့တော်၏ အရှင်သခင်များ ဖြစ်ကြသော်လည်း ကျောက်စိမ်းအိုးဓားဂိုဏ်း၏ ဓားနန်းဆောင် သည် ပုံမှန်အားဖြင့် လူလုံးပြခဲလှသည်။

သူတို့၏ တာဝန်မှာ လစဉ် လခကောက်ခံခြင်းမျှသာဟု ထင်မှတ်ရပြီး ထိုအရာမှာ တစ်ကိုယ်တော်ကျင့်ကြံသူများအကြား မြည်တွန်တောက်တီးစရာ ဖြစ်လေ့ရှိသည်။

သူတို့ တည်ထောင်ထားသော ခေါင်းလောင်းရွှေအိုးရိပ်မြုံ စားသောက်ဆိုင်မှာမူ သာမန်အရက်ဆိုင်မျှသာ ဖြစ်သည်။

ခေါင်းလောင်းရွှေအိုးရိပ်မြုံမှာမူ လူစည်ကားလွန်းသဖြင့် အဝင်အထွက်ရှိသော ကျင့်ကြံသူများမှာ ထိုဆိုင်နှင့် ဓားဂိုဏ်းကို ဆက်စပ်တွေးတောမိရန် ခဲယဉ်းသည်။

ဓားနန်းဆောင်သည် တာဟဲစျေးမြို့တော်တွင် အမြင့်ဆုံးနှင့် အထင်ရှားဆုံး အဆောက်အအုံ ဖြစ်သော်လည်း ဒေသခံ ကျင့်ကြံသူများအတွက်မူ ဝိညာဉ်ဆေးနန်းဆောင် သို့မဟုတ် ရတနာနန်းဆောင် တို့လောက် အရေးမပါသကဲ့သို့ ရှိခဲ့သည်။

သို့သော် ယနေ့နောက်ပိုင်းတွင်မူ လူတိုင်းသည် ဓားနန်းဆောင်၏ မြင့်မားသော သြဇာအရှိန်အဝါကို မဖြစ်မနေ အသိအမှတ်ပြုကြရတော့မည်ဖြစ်သည်။

….

အဆုံးအဖြတ်စင်မြင့် ဖွင့်ပွဲအတွက် သုံးရက်သာ လိုတော့ချိန်တွင် ဓားနန်းဆောင်၌ အရေးကြီးသော အစည်းအဝေးတစ်ခု ကျင်းပနေသည်။

ဓားနန်းဆောင်အတွင်း၌ တည်ကြည်ပြတ်သားသော မျက်နှာထားနှင့် အမျိုးသားတစ်ဦးသည် ထိပ်ဆုံးနေရာတွင် ထိုင်နေသည်။ သူ ဝတ်ဆင်ထားသော ရွှေရောင်ဝတ်ရုံရှည်မှာ ရွှေအမြုတေအဆင့် ကျွမ်းကျင်သူတစ်ဦး၏ ဖိအားကို သိသိသာသာ ထုတ်လွှတ်နေသည်။

သူသည် ကျောက်စိမ်းအိုးဓားဂိုဏ်းမှ ရွှေအမြုတေအဆင့် ကျင့်ကြံသူ ဖန်ရင်ရှုံပင် ဖြစ်သည်။

နံဘေးတွင် အခြေခံတည်ဆောက်ခြင်းအဆင့် ကျင့်ကြံသူ (၈) ဦး ရှိနေပြီး၊ သူတို့ထဲတွင် ဂိုဏ်းမှ အထူးလိုက်ပါလာသည့် အတွင်းစည်းတပည့် (၇) ဦးနှင့် အပြင်စည်း တာဝန်ခံ မီယောင်တို့ ပါဝင်သည်။

ဖန်ရင်ရှုံ နှုတ်ဆိတ်နေစဉ် တာဝန်ခံ မီယောင် က ရိုသေစွာဖြင့် အစီရင်ခံစာ တင်ပြနေသည်။

"နှင်းကြာပန်း၊ ထိုက်ရှန်း၊ တောက်ပစမ်းရေ၊ လန်ချန်းနဲ့ ကျွန်တော်တို့ တာဟဲ ပူးပေါင်းထားတဲ့ စျေးမြို့တော်ငါးခု ကုန်စည်ပြပွဲ ကို မနက်ဖြန်မှာ စတင်ပါမယ်၊ မြို့တွင်း မှော်အစီအရင်တွေကိုလည်း အပြည့်အဝ ဖွင့်လှစ်ထားမှာပါ၊ မြို့ထဲဝင်ခွင့်အတွက် ဝိညာဉ်ကျောက်တုံး တစ်တုံး ကောက်ခံမှာဖြစ်ပြီး ပွဲကို (၇) ရက်တိုင်တိုင် ကျင်းပသွားမှာပါ"

"အဆုံးအဖြတ်စင်မြင့် ဖွင့်ပွဲပြီးရင်တော့ ဂိုဏ်းက သတ်မှတ်ထားတဲ့ လေလံပွဲကို စတင်ပါမယ်၊ ပါဝင်ခွင့်ကို ချီသန့်စင် နောက်ဆုံးအဆင့်နဲ့ ဝိညာဉ်သန္ဓေတည်အဆင့် အောက်မှာ ရှိသူတွေကိုပဲ ပေးပါမယ်၊ လော့ထျန်းဟုန်က တင်ဆက်သူအဖြစ် လုပ်ဆောင်မှာဖြစ်ပြီး အကြီးအကဲဖန်ရင်ရှုံကိုလည်း ကြီးကြပ်ပေးဖို့ တောင်းဆိုပါတယ်"

ဖန်ရင်ရှုံက ခေါင်းကို အနည်းငယ် ညိတ်ပြလိုက်သော်လည်း သူ၏ မျက်နှာထားမှာ တည်ကြည်မြဲ တည်ကြည်နေဆဲပင်။

လေလံပွဲကို ဝိညာဉ်သန္ဓေတည်အဆင့်အောက် ကျင့်ကြံသူများ ပါဝင်ခွင့်ပေးထားသော်လည်း ရွှေအမြုတေအဆင့် ကျင့်ကြံသူ အများအပြား လာရောက်ရန်မှာ မဖြစ်နိုင်သလောက်ပင်။ သူ ရရှိထားသော သတင်းများအရ အများဆုံး လေးငါးဦးခန့်သာ တက်ရောက်ပေလိမ့်မည်။ သူကိုယ်တိုင် ကြီးကြပ်မည်ဆိုပါက လုံလောက်သည်ထက်ပင် ပိုပေသေးသည်။

ဤအဆင့်ရှိ လေလံပွဲသည် အဓိကအားဖြင့် ချီသန့်စင်အဆင့်၊ အခြေခံတည်ဆောက်ခြင်းအဆင့် ကျင့်ကြံသူများကိုသာ ဦးတည်ထားခြင်း ဖြစ်သည်။

သူ၏ အကြည့်များမှာ အခန်းတွင်းသို့ ဝေ့ဝဲသွားသည်။ အတွင်းစည်း အခြေခံတည်ဆောက်ခြင်းအဆင့် တပည့်ဖြစ်သူ လော့ထျန်းဟုန်းက အလိုက်တသိ ရှေ့သို့ တိုးလာကာ ဆိုသည်။

"ထျန်းဟုန်းအနေနဲ့ ဒီပွဲ အောင်မြင်ဖို့ အစွမ်းကုန် တာဝန်ယူပါ့မယ်"

ဆက်လက်၍ လော့ထျန်းဟုန်းသည် လေလံတင်မည့် အဓိက ပစ္စည်းစာရင်းများကို ဖတ်ပြသည်။ ရှားပါးရတနာအချို့ကို တန်ဖိုးပေါ် မူတည်၍ လေလံအစဉ်အတိုင်း သေချာစွာ စီစဉ်ရမည်ဖြစ်သည်။ သို့မဟုတ်ပါက ပစ္စည်းများ မရောင်းရခြင်း သို့မဟုတ် စျေးနှိမ်ခံရခြင်းတို့ ဖြစ်ပေါ်ပါက ဂိုဏ်းအတွက် ဆုံးရှုံးမှု ဖြစ်ပေလိမည်။

"ဒီလေလံပွဲသာ အောင်မြင်ရင် ဒါကို အစဉ်အလာတစ်ခုအနေနဲ့ ၁၀ နှစ်တစ်ကြိမ် ကျင်းပသွားမယ်" ဟု ဖန်ရင်ရှုံက ကြေညာလိုက်သည်။

ဖန်ရင်ရှုံ၏ စကားကြောင့် တာဝန်ခံ လော့ထျန်းဟုန်းမှာ ပို၍ စိတ်လှုပ်ရှားလာတော့သည်။ ဤကဲ့သို့သော ပွဲမျိုးမှာ ကိုယ်ကျိုးအမြတ်လည်း များစွာ ရနိုင်သဖြင့် မည်သည့်အမှားအယွင်းမျှ မရှိစေရန် သူ ဆုံးဖြတ်လိုက်သည်။

ကံကောင်းသည်မှာ လော့မိသားစုသည် ကျောက်စိမ်းအိုးဓားဂိုဏ်းအတွင်း၌ ဤကဲ့သို့သော ကိစ္စရပ်များကို ကိုင်တွယ်ရာတွင် ဗဟုသုတ ကြွယ်ဝသူများအဖြစ် နာမည်ကျော်ခြင်းပင် ဖြစ်သည်။

"အဓိက အာရုံစိုက်ရမှာက အဆုံးအဖြတ်စင်မြင့် ဖွင့်ပွဲပဲ"

ဖန်ရင်ရှုံက သတိပေးလိုက်သည်။

တာဝန်ခံမီယောင်က အမြန်ခေါင်းညိတ်လိုက်သည်။

"ဖွင့်ပွဲအတွက် ပြင်ဆင်မှုတွေ အားလုံး ပြီးပါပြီ၊ အစီအစဉ်ကတော့ အခုအတိုင်းပါပဲ" ဟု ဆိုကာ စတင်ရှင်းပြတော့သည်။

တာဝန်ခံမီယောင်က ရှင်းပြသည်နှင့်အမျှ တာဟဲစျေးမြို့တော် အဆုံးအဖြတ်စင်မြင့် ပေါ်ပေါက်လာပုံ အသေးစိတ်များမှာလည်း ထွက်ပေါ်လာသည်။

ရန်ပုံငွေစတင်ခြင်းမှ တည်ဆောက်ရေးအထိ ဤတစ်ကြိမ်တွင် သူတို့သည် ပျံလွှားဂိုဏ်းမှ အစီအရင်ကျင့်ကြံသူများကို အသုံးမပြုဘဲ ဂိုဏ်းအတွင်းရှိ အစီအရင်ကျင့်ကြံသူများနှင့် အိုက်လောင်တောင်မှ ကျင့်ကြံသူများ၏ အကူအညီကိုသာ အပြည့်အဝ ရယူခဲ့ကြခြင်း ဖြစ်သည်။

ဖွင့်ပွဲမတိုင်မီ ပေးပို့ထားသော ဖိတ်ကြားလွှာများအပေါ် တုံ့ပြန်မှုများမှာလည်း အလွန်ကောင်းမွန်လှသည်။ အနီးနားရှိ ကျင့်ကြံခြင်းမိသားစု ဒါဇင်ပေါင်းများစွာနှင့် စျေးမြို့တော်ခုနှစ်မြို့မှ ကိုယ်စားလှယ်များ တက်ရောက်ကြမည်ဖြစ်သည်။

နောက်ဆုံးအနေဖြင့် ဖွင့်ပွဲအခမ်းအနားတွင် တင်ဆက်မည့် ဖျော်ဖြေရေးများကို ဆွေးနွေးကြသည်။

"ကကွက်နဲ့ သီချင်းပိုင်းကိုတော့ ပိုးပန်းပင်ဂိုဏ်းရဲ့ လက်အောက်ခံ ထျန်းရှန်းမျှော်စင်ကို တာဝန်ပေးထားပါတယ်၊ သူတို့က ဖွင့်ပွဲနဲ့ ကြားဖြတ်ဖျော်ဖြေမှုတွေကို တာဝန်ယူပါလိမ့်မယ်"

"လူနဲ့ သားရဲ တိုက်ပွဲကိုတော့ အဖွင့်ပွဲအနေနဲ့ သတ်မှတ်ထားပါတယ်၊ အဆင့် (၂) ရှိတဲ့ မိစ္ဆာသားရဲ သုံးကောင်ကို လွှတ်ပေးမှာပါ၊ အခြေခံအဆင့် ကျင့်ကြံသူ အချို့လည်း ပါဝင်ဖို့ စာရင်းပေးထားကြပါတယ်၊ အနိုင်ရသူဟာ မိစ္ဆာသားရဲဆီကရတဲ့ ပစ္စည်းတွေအပြင် အဆင့်မြင့် မှော်ဝင်လက်နက်၊ ချီတည်ငြိမ်ဆေးနဲ့ ကျွန်တော်တို့ဂိုဏ်းက သွန်းလုပ်တဲ့ ဓားအမြုတေ တစ်ခုကို ဆုအဖြစ် ရရှိပါမယ်"

"ဒေသခံအုပ်စုတွေရဲ့ ၁၈ ယောက် အသေခံတိုက်ပွဲကတော့ အသစ်ထည့်ထားတဲ့ အစီအစဉ်ပါ၊ ချီသန့်စင်အဆင့်တွေပဲ တိုက်ကြတာ ဆိုပေမဲ့ အသက်နဲ့ရင်းပြီး တိုက်ကြမှာဆိုတော့ အဆင့် (၂) လူနဲ့သားရဲတိုက်ပွဲလိုပဲ ရင်ခုန်စရာ ကောင်းမှာပါ"

ဤအချက်ကို ပြောသောအခါ အခြား အခြေခံတည်ဆောက်ခြင်းအဆင့် ကျင့်ကြံသူများ စိတ်ဝင်စားသွားကြသည်။

ဤကျင့်ကြံသူ အများစုမှာ လွန်ခဲ့သော နှစ်ပေါင်း ၂၀၀-၃၀၀ ခန့်အတွင်းမှ ကျော်ကြားလာသူများ ဖြစ်ကြသည်။ သူတို့အားလုံးမှာ တိုက်ခိုက်ခြင်းကို ဝါသနာပါသော ဓားကျင့်ကြံသူများ ဖြစ်ကြသော်လည်း မကြာသေးမီ နှစ်များအတွင်းတွင် သူတို့၏ တိုက်ပွဲအများစုမှာ မိစ္ဆာသားရဲများနှင့်သာ ဖြစ်သည်။ ကျင့်ကြံသူအချင်းချင်း တိုက်ခိုက်မှုမှာလည်း အပြန်အလှန် ပညာစမ်းသည့် အဆင့်မျှသာ ရှိတော့သည်။

ယခုကဲ့သို့ ကျင့်ကြံသူအချင်းချင်း အကြီးအကျယ် အသက်နှင့်ရင်း၍ တိုက်ခိုက်ကြသည်ကို မြင်တွေ့ရမည့် အခွင့်အရေးကို အားလုံးက စောင့်မျှော်နေကြသည်။

"စွန်းရှို့ဆီက ကြားတာတော့ ဒါက အုပ်စုနှစ်ခုကြား သာမန်အားပြိုင်မှုတင် မဟုတ်ဘူးဆို"

လော့ထျန်းဟုန်းက စပ်စုလိုက်သည်။

တာဝန်ခံမီယောင်က ခေါင်းညိတ်သည်။

"ဟုတ်ပါတယ်၊ တာကျန်းဂိုဏ်းရဲ့ နောက်ကွယ်မှာ လျန်ယွင်ကုန်သွယ်ရေးမဟာမိတ် ရှိနေတာလေ"

လျန်ယွင်ကုန်သွယ်ရေးမဟာမိတ် အမည်ကို ကြားလိုက်ရသောအခါ လော့ထျန်းဟုန်းနှင့် အခြားကျင့်ကြံသူ နှစ်ဦးမှာ အံ့အားသင့်သွားကြသည်။

"ဒါ လွန်ခဲ့တဲ့ နှစ်နှစ်ရာကမှ ထွက်ပေါ်လာတဲ့ တစ်ကိုယ်တော်ကျင့်ကြံသူတွေရဲ့ မဟာမိတ် မဟုတ်လား၊ သူတို့ထဲမှာ အခြေခံတည်ဆောက်ခြင်းအဆင့် ကျင့်ကြံသူ အယောက် ၂၀ ကျော်တောင် ရှိနေပြီလို့ ကြားတယ်"

အခြေခံတည်ဆောက်ခြင်းအဆင့် ၂၀ ကျော် ရှိခြင်းက သူတို့အား အင်အားကြီးအဖွဲ့အစည်းတစ်ခု ဖြစ်စေသည်။ ရွှေအမြုတေအဆင့် ခေါင်းဆောင်တစ်ဦးသာ လိုတော့ခြင်းဖြစ်ကာ ထိုသူသာရှိပါက အလယ်အလတ်အဆင့်ရှိသော ဂိုဏ်းတစ်ခုနှင့်ပင် ယှဉ်နိုင်ပေလိမည်။

"သူတို့က ဒီဈေးကွက်ကို အစောဆုံး ရောက်လာတဲ့အဖွဲ့ပဲ၊ သူတို့ကလည်း အသိတရား ရှိပါတယ်၊ ကျွန်တော်တို့ရဲ့ အဓိက အရင်းအမြစ်တွေကို လာမလုဘူး၊ ဒါကြောင့် ကျွန်တော်တို့လည်း မဝင်စွက်ဖက်ဘဲ သူတို့ကိုပဲ တိုက်ခိုက်ခိုင်းလိုက်တာ" ဟု တာဝန်ခံမီယောင်က ရှင်းပြသည်။

"ဒါဆိုရင် ဖိုရှန်းဂိုဏ်းက ရှုံးဖို့ သေချာနေပြီပေါ့"

"အဲ့ဒီလိုပဲ ပြောရမှာပဲ၊ နှစ်ဖက်စလုံးက တင်ထားတဲ့ လူစာရင်းကို ကျွန်တော် ကြည့်ပြီးပြီ၊ ဖိုရှန်းဂိုဏ်းက ပို့ထားတဲ့ ကျင့်ကြံသူတွေက သိပ်ပြီး ထူးခြားတာမျိုး မရှိဘူး"

တာဝန်ခံမီယောင်က လူစာရင်း ခုနစ်စောင်ကို ဝေပေးလိုက်ရာ အားလုံး ကြည့်၍ ရယ်မောလိုက်ကြတော့သည်။

ဖိုရှန်းဂိုဏ်း၏ လူစာရင်းမှာ သာမန်လူများဖြင့်သာ ပြည့်နေပြီး အချို့မှာ ချီသန့်စင်အဆင့် (၇) မျှသာ ရှိကြသည်။

ခဏမျှ စဉ်းစားပြီးနောက် တာဝန်ခံမီယောင်က သတိထားကာ ဖြည့်စွက်ပြောလိုက်သည်။

"ဒါပေမဲ့ ရလဒ်ကတော့ လုံးဝကြီး သေချာတာမျိုးတော့ မဟုတ်ဘူး၊ သူတို့က နေ့တိုင်း တောင်ပေါ်မှာ အသက်လုပြီး ရှင်သန်နေကြတဲ့ တစ်ကိုယ်တော်ကျင့်ကြံသူတွေလေ၊ သူတို့ဆီမှာ သေရဲတဲ့ သတ္တိတော့ ရှိကြမှာပဲ"

"အဲ့ဒါက ပိုကောင်းတာပေါ့၊ တိုက်ပွဲက ပိုပြင်းထန်လေလေ ပရိသတ်တွေ ပိုစိတ်လှုပ်ရှားလေလေပဲ"

လော့ထျန်းဟုန်းက ကျယ်လောင်စွာ ရယ်မောလိုက်သည်။

အခြားသူများလည်း ပြုံးပျော်နေကြပြီး လာမည့် တိုက်ပွဲများကို စိတ်အားထက်သန်စွာ စောင့်မျှော်နေကြသည်။

ထိုသို့ ပေါ့ပေါ့ပါးပါး ဖြစ်နေသော လေထုကို မကြိုက်ဟန်ဖြင့် ဖန်ရင်ရှုံက နှာခေါင်းရှုံ့လိုက်သည်။

"မီယောင်၊ ထျန်းကျောင်းကိုရော စီစဉ်ပြီးပြီလား"

တာဝန်ခံမီယောင်မှာ ချက်ချင်း ကိုယ်ကိုမတ်လိုက်ကာ အမြန်ခေါင်းညိတ်ပြသည်။

"အဲ့ဒီ မှော်ဝင်ရတနာကို ဖီးနစ်ကျတောင် အဆုံးအဖြတ်စင်မြင့်ရဲ့ အောက်မှာ နှစ်ပေါင်းတစ်ရာကြာ မြှုပ်နှံပြီး စွမ်းအင်သွင်းထားတာပါ၊ ဘာအမှားအယွင်းမှ ရှိမှာ မဟုတ်ပါဘူး"

ဖန်ရင်ရှုံ၏ အကြည့်မှာ တင်းမာသွားပြီး အလေးအနက် ပြောလိုက်သည်။

"အမှားအယွင်း မရှိစေနဲ့၊ တစ်ခုခု ဖြစ်လာရင် မင်းတို့ ဘယ်သူမှ တာဝန်ယူနိုင်မှာ မဟုတ်ဘူး"

အားလုံး အလိုအလျောက် ခေါင်းငုံ့သွားကြသည်။

အဆုံးအဖြတ်စင်မြင့်သည် ကျောက်စိမ်းအိုးနယ်မြေရှိ အဓိက စီးပွားရေးတစ်ခု ဖြစ်ရုံသာမက ဓားဂိုဏ်း၏ ဂုဏ်သတင်းနှင့် အနာဂတ်အတွက် အလွန်အရေးပါသော စီမံကိန်း ဖြစ်သည်။

ကျောက်စိမ်းအိုးဓားဂိုဏ်းသည် အဓိကအားဖြင့် ဆရာနှင့်တပည့် ဆက်ခံမှုအပေါ် အခြေခံထားသော ဂိုဏ်းဖြစ်သည်။ ဂိုဏ်းအတွင်း၌ မိသားစုငယ် အနည်းငယ်ရှိသော်လည်း သြဇာညောင်းမှု မရှိလှပေ။

အကြောင်းမှာ ဓားလမ်းစဉ်သည် ကျင့်ကြံသူ၏ ပါရမီအပေါ် အလွန်အမင်း မူတည်နေသောကြောင့်ဖြစ်သည်။

ထို့ကြောင့် ကျောက်စိမ်းအိုးနယ်မြေကို လွှမ်းမိုးထားနိုင်သော်လည်း ဓားပညာအတွက် အရည်အချင်းစစ်ဆေးမှုမှာ အလွန်တင်းကျပ်သဖြင့် တပည့်ဦးရေ တိုးတက်မလာခဲ့ပေ။

ရလဒ်အနေဖြင့် ဂိုဏ်းသည် ကျောက်စိမ်းအိုးနယ်မြေတစ်ခုလုံးကို ထိန်းချုပ်ရန် အခက်အခဲ ဖြစ်နေခဲ့သည်။

ဤအရာကို ဖြေရှင်းရန် ဂိုဏ်း၏ ထိပ်တန်းခေါင်းဆောင်များက အစီအစဉ်တစ်ခု ရေးဆွဲခဲ့ကြသည်။ ၎င်းမှာ နယ်မြေတစ်ခုလုံးတွင် အဆုံးအဖြတ်စင်မြင့်များကို အကောင်အထည်ဖော်ရန် ဖြစ်သည်။

ဤစင်မြင့်များသည် တိုက်ခိုက်ရေးဝါသနာပါသော ကျင့်ကြံသူများအတွက် တရားမျှတသော ယှဉ်ပြိုင်ရာနေရာ ဖြစ်လာမည်ဖြစ်သည်။

အနိုင်ရသူများသည် ကျော်ကြားမှု၊ ကျင့်ကြံခြင်း သယံဇာတများနှင့်အတူ အထူးချွန်ဆုံး ပါရမီရှင်များ စာရင်းတွင် နေရာရရှိမည်ဖြစ်သည်။

ထိုစာရင်းရှိ အဆင့်သတ်မှတ်ချက်များကို နှစ်စဉ် ပြုလုပ်သွားမည်ဖြစ်သည်။ ထိပ်တန်းအဆင့် ရရှိသူများသည် ဆုလာဘ်များ ရရှိမည့်အပြင် ကျောက်စိမ်းအိုးဓားဂိုဏ်းသို့ ဝင်ရောက်ခွင့် အခွင့်အရေးများလည်း ရရှိပေလိမည်။

ပါရမီ ထူးကဲသူများဆိုပါက ရွှေအမြုတေအဆင့် ကျင့်ကြံသူများ၏ တိုက်ရိုက်တပည့်အဖြစ် လက်ခံခြင်း ခံရကာ အခြေခံတည်ဆောက်ခြင်းအဆင့်သို့ တက်လှမ်းနိုင်ရန် အကူအညီများ ရရှိပေလိမ့်မည်။

ဤသည်မှာ ကျောက်စိမ်းအိုးဓားဂိုဏ်း၏ အစီအစဉ်ပင် ဖြစ်သည်။

ကျင့်ကြံသူ နည်းပါးလှသော ဓားဂိုဏ်းသည် ဤစင်မြင့်ကို အသုံးချပြီး ထူးချွန်သော ပါရမီရှင်များကို ရှာဖွေကာ အနာဂတ်တွင် ဂိုဏ်း၏ အင်အားကို တိုးချဲ့ရန် ရည်ရွယ်ထားခြင်း ဖြစ်သည်။

ထို့ကြောင့် ဤဖွင့်ပွဲအခမ်းအနား အောင်မြင်မှုသည် အနာဂတ် ဖွံ့ဖြိုးတိုးတက်မှုအတွက် အလွန် အရေးကြီးလှသည်။

အခြားသော ကိစ္စရပ်အချို့ကို ထပ်မံဆွေးနွေးပြီးနောက် ဓားနန်းဆောင် အစည်းအဝေးမှာ ပြီးဆုံးလုနီးပြီဖြစ်သည်။

အစည်းအဝေး မပြီးဆုံးခင် ဖန်ရင်ရှုံက နောက်ဆုံး အမိန့်တစ်ခု ထုတ်ပြန်လိုက်သည်။

"မြို့ပြင်မှာရှိတဲ့ သူခိုးသူဝှက်တွေကို သေချာ ထိန်းချုပ်ထား၊ တစ်ယောက်ချင်းစီ လိုက်ဖမ်းပြီး ရှင်းလင်းလိုက်၊ ဒီလို လူမိုက်တွေကြောင့် တာဟဲစျေးမြို့တော်ရဲ့ ဂုဏ်သတင်း ပျက်စီးတာကို ငါ လက်မခံနိုင်ဘူး"