လော့ချန်နှင့် သူ၏စွန့်စားခန်းများ

လူသားတစ်ယောက်ဟာ ကျင့်ကြံခြင်းလောကထဲကို ရောက်သွားတဲ့အခါ နတ်ဘုရားတစ်ပါးအဖြစ် တက်လှမ်းနိုင်ပါ့မလား….? သာမန်လူသားဘဝကနေ ကျင့်ကြံခြင်းလောကထဲကို ရုတ်တရက် ကူးပြောင်းသွားခဲ့တဲ့ လော့ချန်…။ ဇာတ်လမ်းအစမှာ လော့ချန်ဆိုတဲ့ လူငယ်လေးတစ်ယောက် တခြားကမ္ဘာတစ်ခုမှာ နိုးထလာပြီး ကျင့်ကြံခြင်းလောကထဲကို ရောက်ရှိသွားတာကနေ အစပြုထားပါတယ်။ လော့ချန်ဟာ သာမန်လူတစ်ယောက်ပါပဲ။ ပျော်ပျော်နေတတ်တယ်၊ အပေါင်းအသင်း မိတ်ဆွေတွေကို ခင်မင်တွယ်တာတယ်၊ လူလည်ကျတတ်၊ ကလိမ်ကျတတ်တဲ့ ဉာဉ်လေးလည်း ရှိတယ်။ သူဟာ တခြားသော ပါရမီရှင်တွေလို ထူးခြားတဲ့ သွေးမျိုးဆက် ဒါမှမဟုတ် အစွမ်းထက်တဲ့ နောက်ခံ ဆရာသမားတွေ မရှိပါဘူး။ ဒါပေမဲ့ တခြားသူတွေမှာမရှိတဲ့ စနစ် တစ်ခု သူ့ဆီ ပါလာခဲ့တယ်။ သူဟာ ဘယ်အရာကိုမဆို (ဥပမာ- ဆေးဖော်စပ်တာ၊ မှော်ပညာသုံးတာ၊ ဒါမှမဟုတ် ဓားသိုင်းလေ့ကျင့်တာ စသဖြင့်) ထပ်ခါတလဲလဲ လုပ်ဆောင်ရင် သူ့ရဲ့ ကျွမ်းကျင်မှုက တိုးလာပြီး ဘယ်တော့မှ နောက်ပြန်မကျတော့တဲ့ အဆင့်ကို ရောက်ရှိနိုင်ပါတယ်။ ဒီဝတ္ထုမှာ ထူးခြားတာက ဓားသိုင်းတွေ၊ တိုက်ခိုက်တာတွေချည်း မဟုတ်ဘဲ ဆေးဖော်စပ်တဲ့အပိုင်းကိုလည်း စိတ်ဝင်စားစရာ ဖတ်ရှုရမှာပါ။ ဒါ့အပြင် သေမျိုးကမ္ဘာကို ကျော်ဖြတ်ပြီး ကျင့်ကြံခြင်းလောက ကနေ တိုက်ရိုက်စတင်ထားတဲ့အတွက် အစပိုင်းမှာတည်းက ရင်ခုန်စိတ်လှုပ်ရှားစရာတွေနဲ့ ပြည့်နှက်နေမှာပါ။ ကျင့်ကြံခြင်းလောကရဲ့ လျှို့ဝှက်ချက်တွေ၊ အမိုက်စား ဆေးလုံးဖော်စပ်မှုတွေနဲ့ ဇာတ်ရှိန်တက်စရာ စွန့်စားခန်းတွေ ပါဝင်ပါတယ်။ လော့ချန်တစ်ယောက် ဒီခက်ခဲတဲ့ ကျင့်ကြံခြင်းလောကမှာ ဘယ်လိုတွေ ရုန်းကန်ရှင်သန်သွားမလဲ....။ လူတွေ လျစ်လျူရှုထားတဲ့ ဆေးဖော်ဆရာလေးဘဝကနေ ကျင့်ကြံခြင်းလောကရဲ့ ထိပ်သီးပိုင်းကို ဘယ်လိုတွေ တက်လှမ်းသွားမလဲဆိုတာ စောင့်မျှော်ဖတ်ရှုကြရအောင်။ "ထာဝရအသက်ရှည်ခြင်း လမ်းစဉ်က ဆေးအိုးထဲကနေ စတင်ခဲ့ပြီ...."