အခန်း ၅၃၆

အခန်း (၅၃၆) - လော့ထျန်းအဖွဲ့သို့ ချူခွေး ဝင်ရောက်ခြင်းနှင့် တိမ်ပြိုဂိုဏ်း ရောက်ရှိလာခြင်း

"ကိစ္စကြီးတစ်ခု ဟုတ်လား...."

လော့ချန် မျက်ခုံးတစ်ဖက်ကို ပင့်ရင်း မေးလိုက်သည်။

သူ၏ ထက်မြက်လှသော မျက်ဝန်းများဖြင့် ရှေ့တွင်ရှိနေသော လူကို စူးစမ်းကြည့်လိုက်သည်။ ချူခွေးသည် မကြာသေးမီကတင် ကျင့်စဉ်များဖြင့် သူ၏ ခန္ဓာကိုယ်ကို သန့်စင်ထားကြောင်း လော့ချန် အာရုံခံမိသော်လည်း၊ သူ၏ဘေးပတ်လည်တွင် ပြင်းထန်လှသော သွေးညှီနံ့များနှင့် သတ်ဖြတ်လိုသော အငွေ့အသက်များက လောင်ကျွမ်းသွားသော ပိုးသားတွင် စွဲကျန်နေသည့် အခိုးအလျှံများကဲ့သို့ ရစ်ဝဲနေဆဲ ဖြစ်သည်။ သူသည် မကြာသေးမီကတင် ကြီးမားသော သတ်ဖြတ်မှုတစ်ခုကို ပြုလုပ်ခဲ့သည်မှာ ထင်ရှားလှပေသည်။ သူကဲ့သို့သော ကျင့်ကြံသူတစ်ဦးကပင် ကိစ္စကြီးဟု တင်စားပြောဆိုလျှင် ၎င်းသည် သာမန်ကိစ္စရပ်တစ်ခု မဟုတ်သည်မှာ သေချာလှသည်။

"ပြောပါဦး.... ငါ နားထောင်နေပါတယ်...."

လော့ချန် တည်ငြိမ်စွာပင် တုံ့ပြန်လိုက်သည်။

ထိုအခါမှသာ ချူခွေး၏ အမူအရာက သိသိသာသာ ပေါ့ပါးသွားတော့သည်။ လော့ချန်က သူ၏စကားကို နားထောင်ရန် ဆန္ဒရှိနေလျှင် မျှော်လင့်ချက် ရှိနိုင်သေးသည်။ သူ အချိန်ဆွဲမနေတော့ဘဲ ပွင့်ပွင့်လင်းလင်းပင် တိုက်ရိုက်ပြောချလိုက်သည်။

"ငါ စဉ်းစားထားတာက.... မင်းနဲ့ငါ အင်အားချင်းပူးပေါင်းပြီး ဓားဂိုဏ်းနဲ့ ရန်သူ့မဟာမိတ်အဖွဲ့က ကျင့်ကြံသူတွေကို ပူးပေါင်းအမဲလိုက်ကြဖို့ပဲ၊ အဲဒီလိုလုပ်ပြီး တိမ်ပြိုဂိုဏ်းက ဆုလာဘ်အဖြစ် ထုတ်ပေးထားတဲ့ အထက်လမ်းစဉ် ရွှေအမြုတေဖွဲ့စည်းနည်းကို သွားပြီး လဲလှယ်ကြရအောင်...."

ထိုစကားကို ကြားလိုက်ရသည့်အခါ လော့ချန် တိုးညင်းစွာ ရယ်မောလိုက်ရင်း ခေါင်းကို ခါယမ်းလိုက်သည်။

"အဲဒါကို လဲလှယ်ဖို့အတွက် ဂုဏ်ထူးဆောင်မှတ် ဘယ်လောက်လိုအပ်လဲဆိုတာ မင်း တကယ်ကော သိရဲ့လား...."

"သိတယ်လေ...."

ချူခွေးက ယုံကြည်မှုအပြည့်ဖြင့် ပြန်ဖြေလိုက်သည်။

"ချီသန့်စင်အဆင့်ကျင့်ကြံသူ အယောက် ၁၀၀၀.... ဒါမှမဟုတ် အခြေတည်အဆင့်ကျင့်ကြံသူ အယောက် ၁၀၀ ပဲ၊ တကယ်လို့ ငါတို့က နှောင်းပိုင်းကျင့်ကြံသူတွေကိုပဲ အဓိကထားပြီး တိုက်ခိုက်ရင် ဂုဏ်ထူးဆောင်မှတ်တွေက ပိုပြီးတော့တောင် မြန်မြန်ရဦးမှာ၊ ဒါက အရမ်း လွယ်ကူတဲ့ ကိစ္စလို့ ပြောလို့ရတယ်"

"လွယ်ကူတယ် ဟုတ်လား...."

လော့ချန် ပို၍ကျယ်လောင်စွာ ရယ်မောလိုက်ရင်း ထိုသူအား လက်ညှိုးငေါက်ငေါက်ထိုးလိုက်တော့သည်။

"တကယ်လို့ အဲဒီလောက်တောင် လွယ်ကူနေရင် မင်း ဘာလို့ ငါ့ကို လာရှာနေဦးမှာလဲ...."

ချူခွေး၏ မျက်ဝန်းထဲတွင် ကူကယ်ရာမဲ့သော အရိပ်အယောင်တစ်ခု ဖြတ်ပြေးသွားခဲ့သည်။ ထိုကဲ့သို့သော အရာများကို နှုတ်ဖြင့် ပြောဆိုရန်မှာ လွယ်ကူသော်လည်း၊ အမှန်တကယ် လက်တွေ့လုပ်ဆောင်ရန်မှာမူ လုံးဝ တခြားစီ ဖြစ်ပေသည်။ စစ်ပွဲ၏ ကမောက်ကမဖြစ်မှုများကြားတွင်ပင် ဂိုဏ်းတိုင်းက နားလည်ထားကြသော မပြောမပြီးသည့် စည်းမျဉ်းများ ရှိနေခဲ့သည်။ ၎င်းမှာ ဘုရင်က ဘုရင်ချင်း၊ စစ်သူကြီးက စစ်သူကြီးချင်း၊ စစ်သည်က စစ်သည်ချင်း တိုက်ခိုက်ရမည်ဟူသော အချက်ပင် ဖြစ်သည်။

အကယ်၍ အခြေတည်အဆင့်နှောင်းပိုင်း ကျင့်ကြံသူတစ်ဦးက စည်းကမ်းများကို ဖောက်ဖျက်ကာ ချီသန့်စင်အဆင့် ကျင့်ကြံသူများကြားထဲသို့ ဝင်ရောက်သတ်ဖြတ်မည်ဆိုပါက၊ ၎င်းသည် သိုးအုပ်ထဲသို့ ကျားတစ်ကောင် ရောက်ရှိသွားသကဲ့သို့ ရက်စက်လှသော သွေးချောင်းစီးပွဲကြီး ဖြစ်လာပေလိမ့်မည်။ အမှန်တကယ်တွင် အခြေတည်အဆင့်စောပိုင်း ကျင့်ကြံသူတစ်ဦးပင်လျှင် ချီသန့်စင်အဆင့် ကျင့်ကြံသူ ဒါဇင်ပေါင်းများစွာကို အလွယ်တကူ သတ်ဖြတ်နိုင်စွမ်း ရှိပေသည်။ ထို့ကြောင့် ရွှေအမြုတေအဆင့် ကျင့်ကြံသူများက ထိုကဲ့သို့သော ဖရိုဖရဲအခြေအနေမျိုး ဖြစ်ပျက်လာရန် မည်သည့်အခါမျှ ခွင့်ပြုမည် မဟုတ်ပေ။ အကယ်၍ ထိုစည်းကို ကျော်ဖြတ်လိုက်မည်ဆိုပါက အခြေတည်အဆင့်ကျင့်ကြံသူများက ချီသန့်စင်အဆင့်ကျင့်ကြံသူများကို သတ်ဖြတ်ကြမည်၊ ရွှေအမြုတေအဆင့်ကျင့်ကြံသူများက အခြေတည်အဆင့်ကျင့်ကြံသူများကို ပြန်လည်အမဲလိုက်ကြမည်ဖြစ်ပြီး၊ နောက်ဆုံးတွင် ဝိညာဉ်သန္ဓေတည်အဆင့်ကျင့်ကြံသူများပင် ထိုသွေးစွန်းသော သံသရာထဲသို့ ဝင်ရောက်လာကြပေလိမ့်မည်။ ထိုသို့ဖြစ်လာပါက နှစ်ဖက်စလုံးတွင် လျှံပယ်နေသော တောင်ကုန်းအလွတ်များနှင့် နောက်လိုက်မရှိတော့သော စစ်သူကြီးများသာ ကျန်ရှိတော့မည် ဖြစ်သည်။ အဆုံးသတ်တွင် ထိုစစ်ပွဲက ဘာအဓိပ္ပာယ် ရှိတော့ပါမည်နည်း။

ထို့ကြောင့် စစ်ပွဲစည်းမျဉ်းများကို အဆင့်တူချင်းသာ တိုက်ခိုက်ရန် တိကျစွာ သတ်မှတ်ထားခြင်း ဖြစ်သည်။ အခြေတည်အဆင့် ကျင့်ကြံသူများသည် ချီသန့်စင်အဆင့် ကျင့်ကြံသူများကို အစုလိုက်အပြုံလိုက် သတ်ဖြတ်ခြင်း မပြုရန် တားမြစ်ထားသည်။ ချူခွေးကဲ့သို့သော လူတစ်ဦးအတွက် အခြားသော အခြေတည်အဆင့် ကျင့်ကြံသူတစ်ဦးနှင့် ရင်ဆိုင်ရသည်မှာ ကြီးမားသော စိန်ခေါ်မှု မဟုတ်သော်လည်း၊ သူတို့ထဲမှ တစ်ရာကျော်ကို အမဲလိုက်သတ်ဖြတ်ရန်မှာမူ နှုတ်ဖြင့် ပြောသလောက် မလွယ်ကူလှပေ။ ပို၍ဆိုးဝါးလှသည့်အချက်မှာ စစ်မြေပြင်တွင် "သူတပါး၏ သားကောင်ကို ကြားဖြတ်လုယူခြင်း" ဟူသော အန္တရာယ်က အမြဲတည်ရှိနေခြင်း ဖြစ်သည်။ သူသည် ရန်သူကို သေလုမြောပါးဖြစ်အောင် အားသွန်ခွန်စိုက် တိုက်ခိုက်ထားသော်လည်း၊ နောက်ဆုံးအချိန်တွင်မှ အခွင့်ကောင်းယူတတ်သော ဂိုဏ်းတပည့်အချို့က ရုတ်တရက် ရောက်ရှိလာကာ နောက်ဆုံးတိုက်ကွက်ဖြင့် သတ်ဖြတ်ပြီး ဂုဏ်ထူးဆောင်မှတ်ကို ကြားဖြတ်ယူသွားတတ်ကြသည်။ ဤသည်မှာ တစ်ကိုယ်တော် ကျင့်ကြံသူတစ်ဦး၏ ခါးသီးလှသော ကံကြမ္မာဖြစ်ပြီး၊ သူ၏ မကျေနပ်ချက်များကို မည်သည့်နေရာတွင်မျှ သွားရောက်ရင်ဖွင့်ခွင့် မရှိပေ။

ချူခွေး၏ မျက်နှာထက်တွင် ဖြတ်ပြေးသွားသော ထိုမကျေနပ်မှုများကို ကြည့်ရင်း လော့ချန်၏ နှုတ်ခမ်းထက်မှ အပြုံးက တဖြည်းဖြည်း မှေးမှိန်သွားခဲ့သည်။ သူ တည်ငြိမ်သော အသံဖြင့် ပြောလိုက်သည်။

"ချူခွေး.... မင်းကို အမှန်အတိုင်း ပြောရရင် နောက်ထပ် လအနည်းငယ်ကြာရင် ငါ ငါ့ရဲ့လူတွေကို ဦးဆောင်ပြီး စစ်မြေပြင်ရဲ့ နောက်တန်းဆီကို ထွက်ခွာတော့မှာ.... အဲဒီအချိန်ကျရင် ဒီစစ်ပွဲရဲ့ အရှုပ်အထုပ်တွေအားလုံးက ငါနဲ့ ဘာမှမသက်ဆိုင်တော့ဘူး"

ချူခွေး၏ မျက်နှာက ချက်ချင်းပင် ပျက်ယွင်းသွားခဲ့ပြီး မျက်ဝန်းထဲတွင် မယုံကြည်နိုင်မှုများ ရစ်ဝဲလာခဲ့သည်။

"ဘာတွေပြောနေတာလဲကွာ…. မဖြစ်နိုင်တာ.... ရေခဲခံတပ်က လက်အောက်ခံ အင်အားစု အနည်းဆုံးဖြစ်ပြီး စစ်မြေပြင် လူအင်အား အလိုအပ်ဆုံးပဲ၊ သူတို့က လော့ထျန်းအဖွဲ့ကို ဒီအတိုင်း အလွယ်တကူ ဆုတ်ခွာခွင့် ပေးလိမ့်မယ်လို့ မင်း ထင်နေတာလား...."

လော့ချန်က ခေါင်းကို အသာအယာ ခါယမ်းရင်း ပြန်လည်တုံ့ပြန်လိုက်သည်။

"ငါက အခု ရေခဲခံတပ်ရဲ့ အကြီးအကဲတစ်ယောက် ဖြစ်နေပြီ.... ငါ့ရဲ့ အဆင့်အတန်းက ရွှေအမြုတေအဆင့် ကျင့်ကြံသူတစ်ယောက်ထက် မနိမ့်ဘူး.... တကယ်လို့ ငါက ချီသန့်စင်အဆင့် ကျင့်ကြံသူတစ်ရာကို ငါနဲ့အတူ ခေါ်သွားဖို့ တောင်းဆိုရင် သူတို့ သဘောတူခွင့်ပြုမှာပဲ"

ချူခွေး အံ့ဩလွန်းသဖြင့် ပါးစပ်အဟောင်းသား ဖြစ်သွားခဲ့ရပြီး ဘာမှမပြောနိုင်တော့ပေ။ အမှန်တကယ်တွင် တန်ချန်ဇီဟူသော အမည်နာမသည် ရိုင်းစိုင်းလှသော ခွန်အား သို့မဟုတ် သွေးစွန်းသော သတ်ဖြတ်မှုများဖြင့် တည်ဆောက်ထားခြင်း မဟုတ်ပေ။ ၎င်းသည် သူ၏ ထူးချွန်လှသော ဆေးလုံးဖော်စပ်ခြင်း အတတ်ပညာဖြင့် ထုဆစ်ထားခြင်း ဖြစ်သည်။ မည်သည့်ဂိုဏ်းကြီးမဆို ထိုကဲ့သို့သော ကျင့်ကြံသူတစ်ဦးကို လိုလိုလားလားဖြင့် အရိုအသေပေးကြမည်မှာ သေချာလှသည်။ လော့ချန်ကဲ့သို့သော ဆေးဖော်ဆရာတစ်ဦးက စစ်မြေပြင်သို့ ရောက်ရှိနေရခြင်းကပင် လွန်စွာ ထူးဆန်းလှသော ကိစ္စတစ်ခု ဖြစ်ပေသည်။

ချူခွေး၏ မျက်နှာထက်မှ စိတ်ပျက်ရိပ်များကို မြင်တွေ့လိုက်ရပြီးနောက် လော့ချန် နောက်ဆုံးတွင် မေးမြန်းလိုက်သည်။

"မင်းရဲ့ အစွမ်းအစနဲ့ဆိုရင် အခြေတည်အဆင့်နှောင်းပိုင်း ကျင့်ကြံသူတွေနဲ့ အဖွဲ့တစ်ဖွဲ့ ဖွဲ့ပြီး ဂုဏ်ထူးဆောင်မှတ်တွေကို အလွယ်လေး ရှာလို့ရတာပဲ.... ဘာလို့ ငါ့ရဲ့ လော့ထျန်းအဖွဲ့ဆီကို ရည်ရွယ်ချက်ရှိရှိ လာရှာရတာလဲ...."

ချူခွေးက ခါးသီးစွာ ပြုံးလိုက်ရုံသာ တတ်နိုင်တော့သည်။

"မင်း ငါ့ကို အထင်ကြီးလွန်းနေပြီ၊ ဟုတ်ပါတယ်.... ငါ လူအများကြီးကို သိတာတော့ အမှန်ပဲ၊ ဒါပေမဲ့ သူတို့ထဲက အများစုက သာမန်အသိတွေပဲ၊ အကျိုးအမြတ် ရှိမယ့်အချိန်ဆိုရင်တော့ သူတို့က ငါ့ကို အလုအယက် လာရှာကြလိမ့်မယ်၊ ဒါပေမဲ့ အသက်အန္တရာယ် စိုးရိမ်ရတဲ့ စစ်ပွဲမျိုးမှာဆိုရင်ကော.... ဘယ်သူကမှ ငါ့ကို သူတို့ရဲ့ ကျောပြင်ကို အပ်ရဲမှာ မဟုတ်ဘူး.... ပြီးတော့ အမှန်အတိုင်း ပြောရရင် ငါကိုယ်တိုင်လည်း သူတို့ကို မယုံရဲဘူး"

လော့ချန် အနည်းငယ် နေရခက်စွာဖြင့် တိုးညင်းစွာ ရယ်မောလိုက်ရင်း

"ငါ စကားကို ကွေ့ဝိုက် မပြောတော့ဘူး.... ငါတို့ တချို့ကိစ္စတွေမှာ ဆက်ဆံဖူးတာ မှန်ပေမဲ့.... ငါတို့ရဲ့ ဆက်ဆံရေးက အဲဒီလောက်အထိ ရင်းနှီးတယ်လို့ ပြောလို့မရဘူး.... အဲဒီလိုဆိုရင်.... မင်းက ငါ့ကို ဘာလို့ ယုံကြည်ရတာလဲ...."

ဤကဲ့သို့သော အချိန်မျိုးတွင် လိမ်ညာလှည့်ဖြားသည့် စကားများထက် အမှန်တရားကသာ အနက်ရှိုင်းဆုံးသို့ ထိရှစေနိုင်ပေသည်။ ချူခွေးက ရှက်ကိုးရှက်ကန်းနှင့် ရယ်မောလိုက်ပြီးနောက်၊ လျင်မြန်စွာပင် တည်ငြိမ်လေးနက်သော လေသံဖြင့် ထပ်လောင်းပြောလိုက်သည်။

"ငါ မီးနတ်ဘုရားလော့ဆိုတဲ့ အမည်နာမကို ယုံကြည်ပြီး လေးစားတာပါ"

လော့ချန် အံ့ဩသွားပြီးနောက် နားလည်သဘောပေါက်သည့် အပြုံးတစ်ခုကို ပြသလိုက်သည်။ လောကသားများက သူ၏ မီးနတ်ဘုရားလော့ ဟူသော တာအိုအမည်နာမသည် သူ၏ မီးလျှံအတတ်ပညာများ ကျွမ်းကျင်မှုကြောင့် ပေးထားခြင်းဟု ထင်မှတ်ကြသော်လည်း၊ ၎င်းသည် အပြည့်အဝ မမှန်ကန်ပေ။ ထိုအမည်နာမတွင် မီး ဆိုသည့် စကားလုံးတင်မကဘဲ နတ်ဘုရား ဆိုသည့် အပိုင်းကလည်း အရေးပါလှပေသည်။ သူသည် နတ်ဘုရားတစ်ပါးကဲ့သို့ စင်ကြယ်သူတစ်ဦး မဟုတ်သော်လည်း၊ လိမ်ညာလှည့်ဖြားခြင်း၊ သစ္စာဖောက်ခြင်းနှင့် ရည်မှန်းချက်ကြီးမားခြင်းများဖြင့် ပြည့်နှက်နေသော ဤကျင့်ကြံခြင်းလောကတွင် သူသည် မိမိကိုယ်တိုင် သတ်မှတ်ထားသော ကိုယ်ကျင့်တရားစည်းများကို မည်သည့်အခါမျှ မချိုးဖျက်ဘဲ တင်းကြပ်စွာ ထိန်းသိမ်းထားသည့် လူအနည်းငယ်ထဲမှ တစ်ဦး ဖြစ်ပေသည်။

ချူခွေးက မည်သည့်အရာကိုမျှ ဖုံးကွယ်ခြင်းမရှိဘဲ ရိုးသားစွာ ပြောလိုက်သည်။

"ငါ မင်းရဲ့ အမူအကျင့်တွေကို သေချာ စောင့်ကြည့်ခဲ့ဖူးတယ်.... မင်းက မင်းရဲ့နောက်လိုက်တွေအပေါ်မှာ ရက်ရောပြီး၊ မင်းရဲ့ဘေးနားမှာ အတူရှိနေတဲ့ လူတွေအပေါ်မှာလည်း သစ္စာရှိတယ်.... ထောင်ဝမ်နဲ့ ဖြစ်ပျက်ခဲ့တဲ့ ကိစ္စမှာတောင်မှ မင်းတို့ရဲ့ ပူးပေါင်းဆောင်ရွက်မှုက သာမန်အရောင်းအဝယ် သဘောမျိုးပဲ ဖြစ်ပေမဲ့.... မင်း အဲဒီကတိကို အပြည့်အဝ တည်ခဲ့တာပဲ.... တကယ်လို့ ငါက ဒီစစ်မြေပြင်က လူပေါင်းသောင်းခြောက်ထောင်ထဲကနေ ငါ့ရဲ့နောက်ကျောကို ယုံကြည်စိတ်ချစွာ အပ်နှံနိုင်မယ့် လူတစ်ယောက်ကို ရွေးချယ်ရမယ်ဆိုရင်.... အဲဒါ မင်းပဲ ဖြစ်လိမ့်မယ်"

ထိုလူသည် စကားကို မည်သို့လှပအောင် ပြောရမည်ကို အသေအချာ သိရှိထားပြီး ထိုစွမ်းရည်ကို တုံ့ဆိုင်းခြင်းမရှိဘဲ အသုံးပြုခဲ့ခြင်း ဖြစ်သည်။ လော့ချန်အနေဖြင့်လည်း ထိုကဲ့သို့ ချီးကျူးခံရခြင်းအပေါ် ငြင်းပယ်ရန် အကြောင်းမရှိခဲ့ပေ။

ချူခွေးက ဆက်ပြောလိုက်သည်။

“ပြီးတော့ တကယ်လို့ ငါသာ လော့ထျန်းအဖွဲ့ထဲကို ဝင်ရောက်ခဲ့မယ်ဆိုရင်.... မင်းရဲ့ ကိုယ့်လူကိုယ် ကာကွယ်ပေးတတ်တဲ့ ကျော်ကြားမှုနဲ့တင် ငါ့ကို ဘေးကျပ်နံကျပ် အခြေအနေတွေမှာ ပစ်ထားပြီး သေခွင့်ပေးမှာ မဟုတ်ဘူးမလား...."

ထိုစကားလုံးများကို တည်ငြိမ်ပြီး ယုံကြည်မှုအပြည့်ရှိသော လေသံဖြင့် ပြောဆိုခဲ့ခြင်းဖြစ်ပြီး ၎င်းသည် အမှန်တရားလည်း ဖြစ်ပေသည်။ လော့ချန်သည် သူ၏လူများကို မျှတစွာ၊ သစ္စာရှိစွာ အမြဲ ဆက်ဆံခဲ့သည်။ သို့သော် ထိုစကားကြောင့် သူ ခဏမျှ စဉ်းစားရင်း တုံ့ဆိုင်းသွားခဲ့သည်။

"ဟမ်…. လော့ထျန်းအဖွဲ့ထဲကို ဝင်မယ် ဟုတ်လား...."

လော့ချန် ထိုစကားကို တိုးညင်းစွာ ထပ်ကျော့ရေရွတ်လိုက်မိသည်၊ သူ ယခုလေးတင် ကြားလိုက်ရသည့်အရာက နားကြားမှားခြင်း မဟုတ်ကြောင်း သေချာစေရန် ဖြစ်သည်။

ချူခွေးက ခိုင်မာစွာ ခေါင်းညိတ်ပြလိုက်သည်။

“ငါ လေးဂိုဏ်းရဲ့ ဂုဏ်ထူးဆောင်မှတ်လဲလှယ်တဲ့ စည်းမျဉ်းတွေကို သေချာလေ့လာပြီးပြီ.... တစ်ကိုယ်တော် ကျင့်ကြံသူတစ်ဦးက အမြုတေဖွဲ့စည်းနည်းကို လဲလှယ်ရင် အဲဒီလူတစ်ယောက်တည်းပဲ သုံးလို့ရတာ.... ဒါပေမဲ့ တကယ်လို့ လက်အောက်ခံ အင်အားစုတစ်ခုက လဲလှယ်မယ်ဆိုရင်တော့ အပြင်လူတွေကို လက်ဆင့်မကမ်းသရွေ့ အဖွဲ့အစည်းတစ်ခုလုံးက အတူတူ လေ့လာကျင့်ကြံခွင့် ရှိကြတယ်.... တစ်ကိုယ်တော် ကျင့်ကြံသူတစ်ဦးအနေနဲ့ ဂုဏ်ထူးဆောင်မှတ် တစ်သောင်းကို တစ်ယောက်တည်း ရှာဖို့ဆိုတာ မဖြစ်နိုင်သလောက်ပဲ၊ ဒါပေမဲ့ စည်းလုံးတဲ့ အဖွဲ့အစည်းတစ်ခုရဲ့ အင်အားနဲ့ဆိုရင်တော့ ဒါက အကောင်အထည်ဖော်နိုင်တဲ့ ကိစ္စတစ်ခု ဖြစ်လာလိမ့်မယ်.... ဒါကြောင့်လည်း ငါ မင်းဆီကို ရောက်လာရတာ"

‘ဩော်.... ဒါကြောင့်မို့ကိုး....’

ချူခွေးတစ်ယောက် ယခင်လို မိတ်ဆွေလော့၊ ညီအစ်ကိုလော့ သို့မဟုတ် လော့ချန်ဟု မခေါ်ဆိုဘဲ၊ ခေါင်းဆောင်လော့ဟု တလေးတစား ခေါ်ဆိုနေသည်မှာ မဆန်းတော့ပေ။

လော့ချန်အား ပိုမို၍ စိတ်ဝင်စားစေသည့်အချက်မှာ ချူခွေး၏ စည်းမျဉ်းများကို သေချာစွာ နားလည်ထားခြင်း ဖြစ်သည်။ အကယ်၍ အဖွဲ့အစည်းတစ်ခုက အင်အားစုအားလုံးကို စုစည်း၍ အထက်လမ်းစဉ် အမြုတေဖွဲ့စည်းခြင်းတစ်ခုအတွက် ဂုဏ်ထူးဆောင်မှတ်များကို ရှာဖွေမည်ဆိုပါက ခက်ခဲပါမည်လော။ ခက်ခဲမည်မှာ သေချာလှပေသည်။ သို့သော် ခက်ခဲခြင်း က လက်လှမ်းမမီနိုင်ခြင်းကို မဆိုလိုပေ။

လော့ချန်သည် သူ၏ စိတ်ထဲတွင် ယုံကြည်စိတ်ချရသော အသင်းဖော်များနှင့်အတူ စစ်မြေပြင်တွင် မည်မျှအထိ ခရီးပေါက်နိုင်မည်ကို စတင်တွက်ချက်နေစဉ်မှာပင်၊ ချူခွေးက အဖြေကို အသင့်ပေးအပ်လိုက်ပြီ ဖြစ်သည်။

"ငါ မင်းရဲ့ မီးလျှံမှော်အတတ်တွေကို မြင်ဖူးပါတယ်.... စွမ်းအားနဲ့ တိုက်ခိုက်နိုင်တဲ့ အတိုင်းအတာက ရန်သူတွေကို လွှမ်းမိုးထားနိုင်တာပဲ.... မင်း ဝေထော်ကို သတ်ခဲ့တဲ့ တိုက်ကွက်မှာတောင်မှ မင်းရဲ့ အစွမ်းအစအစစ်အမှန်ကို ချန်ထားခဲ့သေးတယ်ဆိုတာ ငါသိတယ်.... တကယ်လို့ မင်းနဲ့ငါသာ အင်အားချင်း ပူးပေါင်းလိုက်ရင် အခြေတည်အဆင့် ကျင့်ကြံသူ ဒါဇင်ဝက်လောက်ကလည်း ငါတို့ကို ယှဉ်နိုင်မှာ မဟုတ်ဘူး.... စစ်မြေပြင်မှာ မြန်မြန် လှုပ်ရှားပြီး၊ တိုက်ခိုက်ပြီးတာနဲ့ ချက်ချင်း ဆုတ်ခွာမယ်ဆိုရင်.... အကြိမ်အနည်းငယ်အတွင်းမှာတင် ဂုဏ်ထူးဆောင်မှတ် တစ်သောင်းက ငါတို့လက်ထဲကို အလွယ်တကူ ရောက်လာမှာပဲ"

သူ၏ လေသံက စကားလုံးတိုင်းတွင် ပိုမို၍ ပြတ်သားလာခဲ့သည်။ လော့ချန်၏ ခွန်အားအပေါ် သူထားရှိသော လေးစားမှုကို မည်သည့်အရာမျှ ဖုံးကွယ်ထားခြင်း မရှိပေ။ အခြားလူများက လော့ချန်၏ စွမ်းအားအနက်အရှိုင်းကို သေချာစွာ သဘောမပေါက်နိုင်ကြသော်လည်း၊ ချူခွေးကမူ သူနှင့် တိုက်ခိုက်ဖူးသဖြင့် ထိုတည်ငြိမ်သော ပုံစံ၏ နောက်ကွယ်တွင် မည်သည့်အရာများ ပုန်းကွယ်နေကြောင်း အသေအချာ သိရှိထားသည်။ အမှန်တကယ်တွင် လော့ချန်၏ မီးလျှံအတတ်များ၏ ကျယ်ပြန့်လှသော ဖျက်ဆီးနိုင်စွမ်းက အဆင့်နိမ့်ရန်သူများကို သတ်ဖြတ်ရာတွင် မှော်ရတနာများအပေါ် အလွန်အမင်း အမှီပြုနေရသော အခြေတည် အဆင့်နှောင်းပိုင်း ကျင့်ကြံသူများထက်ပင် ပိုမို၍ သေကြေပျက်စီးစေနိုင်စွမ်း ရှိပေသည်

ထိုအသိအမှတ်ပြုမှုများ၏ ရှေ့တွင် လော့ချန် တိတ်ဆိတ်နေခဲ့သည်။ သို့သော် ချူခွေးအတွက်မူ ထိုတိတ်ဆိတ်ခြင်းက သူ မျှော်လင့်နိုင်မည့် အကောင်းဆုံး တုံ့ပြန်မှု ဖြစ်ပေသည်။ ၎င်းသည် လော့ချန်အနေဖြင့် သူ၏ အဆိုပြုချက်ကို အလေးအနက်ထား၍ စတင်တွက်ချက်နေပြီဖြစ်ကြောင်း ဖော်ပြနေခြင်း ဖြစ်သည်။

ထိုတုံ့ဆိုင်းနေသော အခြေအနေကို မြင်တွေ့လိုက်ရသည့်အခါ ချူခွေးက အခွင့်အရေးကို လက်လွှတ်မခံဘဲ ထပ်မံ၍ ဖိအားပေးလိုက်သည်။

"ငါက ယာယီအကျိုးအမြတ်နောက်ကိုပဲ လိုက်တတ်တဲ့ လူမျိုး မဟုတ်ပါဘူး.... ဒီကိစ္စက ဘယ်လိုပဲ အဆုံးသတ်သွားပါစေ.... ငါတို့ ဒါကို စတင်လိုက်တာနဲ့ ငါ လော့ထျန်းအဖွဲ့ထဲကို အမြဲတမ်းအတွက် ဝင်ရောက်မှာ ဖြစ်ပြီး၊ မင်းက ငါ့ရဲ့ ခေါင်းဆောင် ဖြစ်လာလိမ့်မယ်.... မင်းအနေနဲ့ ငါ အရင်က ရန်ငြိုးဖွဲ့ခဲ့ဖူးတဲ့ ရန်သူတွေကို သဘောထားကြီးကြီးနဲ့ လက်ခံပေးနိုင်သရွေ့.... ငါ လော့ထျန်းအဖွဲ့ကို ဘယ်တော့မှ သစ္စာဖောက်မှာ မဟုတ်ဘူး.... ပြီးတော့ ငါတို့ အောင်မြင်ခဲ့မယ်ဆိုရင်.... မင်းရဲ့ ကျေးဇူးကို ငါ တစ်သက်လုံး မေ့မှာ မဟုတ်ဘူး"

လော့ချန်၏ မျက်ဝန်းများ အသာအယာ လှုပ်ရှားသွားခဲ့သည်။ ချူခွေးက မိမိကိုယ်ကိုယ် ရောင်းချနေခြင်းလော။ ရွှေအမြုတေအဆင့်သို့ တက်လှမ်းနိုင်မည့် အခွင့်အရေးတစ်ခုတည်းအတွက်နှင့် သူသည် မိမိကိုယ်ကိုယ် နှိမ့်ချကာ လော့ထျန်းအဖွဲ့ကဲ့သို့သော ဒုတိယတန်းစား အင်အားစုတစ်ခုထဲသို့ လိုလိုလားလား ဝင်ရောက်ရန် ဆုံးဖြတ်ခဲ့ခြင်း ဖြစ်သည်။ ချူခွေး၏ ခွန်အားနှင့် ဂုဏ်သတင်းအရဆိုလျှင် မည်သည့် ပထမတန်းစား အင်အားစုမဆို သူ့အား တုံ့ဆိုင်းခြင်းမရှိဘဲ ကြိုဆိုကြမည်ဖြစ်ပြီး၊ ဂိုဏ်းကြီးများပင်လျှင် ငြင်းပယ်ကြမည် မဟုတ်ပေ။

ထိုကမ်းလှမ်းချက်က လျစ်လျူရှုရန် အလွန်ပင် ကောင်းမွန်လွန်းလှသော်လည်း လော့ချန်ကို ခဏမျှ စဉ်းစားရန် တားဆီးနေသည့် အရာတစ်ခု ရှိနေဆဲ ဖြစ်သည်။

ထိုစဉ် ချူခွေး၏ အသံက လေထုထဲတွင် စူးရှစွာ ဖြတ်သန်းထွက်ပေါ်လာခဲ့သည်။

"လော့ချန်.... မင်းကော အဲဒီအမြုတေဖွဲ့စည်းနည်းပေါ်မှာ ဘာစိတ်ကူးမှ မရှိဘူးလို့ ငါ့ကို လာမပြောနဲ့နော်...."

ချူခွေးက မတ်မတ်ရပ်လိုက်ပြီး သူ၏ မေးခွန်းက လော့ချန်၏ နှလုံးသားအနက်ရှိုင်းဆုံးဆီသို့ တိုက်ရိုက် ရိုက်ခတ်သွားခဲ့သည်။ ထိုစကားလုံးများကို ကြားရသည့်အခါမှသာ လော့ချန် ဖြည်းညှင်းစွာ မော့ကြည့်လိုက်တော့သည်။ သူ၏ မျက်ဝန်းများသည် ချူခွေး၏ တောက်လောင်နေသော ကျားတစ်ကောင်ကဲ့သို့ ပြတ်သားလှသည့် မျက်ဝန်းများနှင့် ထိပ်တိုက် ဆုံတွေ့သွားခဲ့သည်။ သူ တိုးညင်းစွာ ပြန်ဖြေလိုက်သည်။

"ငါ့ကို လဝက်လောက် အချိန်ပေးကွာ...."

ချူခွေး အံ့ဩသွားပြီး ခဏမျှ ဆွံ့အသွားခဲ့ရသည်။ ထို့နောက်တွင်မူ သူ၏ မျက်နှာထက်တွင် ကျယ်ပြန့်သော အပြုံးတစ်ခု ပေါ်ထွက်လာခဲ့တော့သည်။

‘လဝက် ဟုတ်လား....’

ထိုမျှလောက်သော အချိန်ကိုမူ သူ စိတ်ရှည်စွာ စောင့်ဆိုင်းနိုင်ပေသည်။

....

လော့ချန်သည် အထက်လမ်းစဉ် အမြုတေဖွဲ့စည်းနည်းကို မက်မောခြင်း ရှိသည်မှာ သေချာလှပေသည်။ သို့မဟုတ်ပါက သူ၌ နဂါးဖီးနစ်နည်း ရှိနေခဲ့သော်လည်း ပိုမိုကောင်းမွန်သော နည်းတစ်ခုအတွက် ထောင်ဝမ်ကို သွားရောက်ရှာဖွေခဲ့လိမ့်မည် မဟုတ်ပေ။ ထိုစဉ်က ထောင်ဝမ်က သူ့အား ထိုကဲ့သို့သော နည်းမျိုး မပေးနိုင်ခဲ့သော်လည်း၊ သူတို့ဂိုဏ်း၏ စိီရင်စုသခင်နန်ရှန်း ကိုယ်တိုင်ရေးသားထားခဲ့သော အမြုတေဖွဲ့စည်းခြင်းဆိုင်ရာ မှတ်စုများကို ပေးအပ်ခဲ့ဖူးသည်။

နန်ရှန်းမှတ်တမ်းကို ဖတ်ရှုပြီးနောက်တွင်မှ လော့ချန်သည် အောက်လမ်းစဉ်၊ အလယ်လမ်းစဉ်နှင့် အထက်လမ်းစဉ် အမြုတေဖွဲ့စည်းခြင်းများအကြားမှ ကွာခြားချက်များကို အသေအချာ သဘောပေါက်သွားခဲ့ခြင်း ဖြစ်သည်။

အောက်လမ်းစဉ် နည်းလမ်းများသည် လေ့လာရန် လွယ်ကူသော်လည်း အားနည်းလှပေသည်။ ၎င်းသည် အောင်မြင်နိုင်မည့် အခွင့်အရေးကို အများဆုံး ဆယ်ရာခိုင်နှုန်းခန့်သာ မြှင့်တင်ပေးနိုင်သည်။ အလယ်လမ်းစဉ် နည်းလမ်းများကမူ နောက်ထပ် ဆယ်ရာခိုင်နှုန်းမှ နှစ်ဆယ်ရာခိုင်နှုန်းအထိ ထပ်မံမြှင့်တင်ပေးနိုင်သော်လည်း၊ အောင်မြင်မှုရလဒ်ကို အပြည့်အဝ အာမခံချက် မပေးနိုင်သေးပေ။ အထက်လမ်းစဉ် တစ်ခုတည်းသာလျှင် လုံးဝ သီးခြားကွဲပြားပြီး မြင့်မြတ်လှပေသည်။ ၎င်းကို နားလည်သဘောပေါက်ရန် အခက်ခဲဆုံး ဖြစ်သော်လည်း၊ တစ်ကြိမ်မျှ ကျွမ်းကျင်သွားခဲ့လျှင် အောင်မြင်နိုင်မည့် နှုန်းထားကို သုံးဆယ်ရာခိုင်နှုန်းမှ လေးဆယ်ရာခိုင်နှုန်းအထိ အဆမတန် မြှင့်တင်ပေးနိုင်စွမ်း ရှိပေသည်။

အချို့လူများအတွက် ထိုနှုန်းထားက များပြားလှသည်ဟု မထင်ရသော်လည်း၊ အကယ်၍ ၎င်းကို အခြေတည်အဆင့်နှင့် နှိုင်းယှဉ်ကြည့်မည်ဆိုပါက အားလုံး ရှင်းလင်းသွားလိမ့်မည် ဖြစ်သည်။ အခြေတည် ဆေးလုံးရှိသော ကျင့်ကြံသူတစ်ဦးသည် အမှန်တကယ် အောင်မြင်ရန် အခွင့်အရေး ရှိသော်လည်း၊ ထိုအရာမရှိပါက အရာအားလုံးက ပါရမီနှင့် ကံတရားအပေါ်တွင်သာ လုံးဝ မူတည်သွားခဲ့ရသည်။ လော့ချန်သည် ကံတရားကို မည်သည့်အခါမျှ ယုံကြည်လေ့မရှိသော လူမျိုး ဖြစ်သည်။ သူ၏ ကိုယ်ပိုင်ပါရမီနှင့် ပတ်သက်၍လည်း သူကိုယ်တိုင် အကောင်းဆုံး သိထားပြီး ဖြစ်သည်။

အဆုံးသတ်တွင် သူသည် အခြေတည်အဆင့်သို့ ကပ်သီးကပ်သတ် အောင်မြင်ရန်အတွက်ပင် အခြေတည်ဆေးငါးစုံအထိ အသုံးပြုခဲ့ရခြင်း ဖြစ်သည်။ ၎င်းသည် အခြေတည်အဆင့်မျှသာ ရှိသေးသည်။ သူ၏ အမြုတေကို ဖွဲ့စည်းရန်အတွက်မူ ထိုထက်မက ပိုမိုဆိုးဝါးလှပေလိမ့်မည်။ ထို့အပြင် ကျင့်ကြံခြင်းအဆင့် မြင့်မားလေလေ၊ ကျရှုံးမှုကြောင့် ခန္ဓာကိုယ်က ပြန်လည်ခံစားရမည့် ဘေးထွက်ဆိုးကျိုးက ပိုမို၍ ကြောက်မက်ဖွယ်ကောင်းလေလေ ဖြစ်သည်။ လော့ချန်သည် ယခုအကြိမ်တွင် ထပ်ခါတလဲလဲ ကျရှုံးမှုများကို မည်သို့မျှ အဖြစ်မခံနိုင်ပေ။ အကယ်၍ သူသည် အထက်လမ်းစဉ် အမြုတေဖွဲ့စည်းနည်းကို ရရှိနိုင်မည်ဆိုပါက ကံတရားက သူ့ဘက်သို့ ယိမ်းညွတ်လာနိုင်ပေလိမ့်မည်။

….

ကျောက်အိမ်လေးအတွင်းတွင် လော့ချန်သည် ကျင့်ကြံခြင်းမှ နိုးထလာခဲ့ပြီး၊ သူ၏လက်ထဲတွင် အထက်လမ်းစဉ် အမြုတေဖွဲ့စည်းနည်းရှိနေပါက အနာဂတ်တွင် အောင်မြင်နိုင်မည့် အခွင့်အလမ်းများကို စိတ်ထဲမှ တိုးညင်းစွာ တွက်ချက်နေခဲ့သည်။ သို့သော် အဆုံးသတ်တွင် အဖြေကမူ အပြည့်အဝ ရှင်းလင်းခြင်း မရှိသေးပေ။

သူသည် အခြေတည်အဆင့်၏ အထွတ်အထိပ်သို့ မရောက်ရှိသေးမချင်း၊ သူ၏ ကိုယ်ပိုင်အလားအလာ မည်မျှအထိ ရှိသည်ကို တိကျစွာ တိုင်းတာရန် မဖြစ်နိုင်သေးပေ။ အနည်းဆုံးတော့ ပြင်ပမှ ရရှိနိုင်သော အကူအညီအားလုံးကို အဆုံးစွန်အထိ အသုံးပြုပြီး၊ ထောက်ပံ့ပေးမည့် အချက်တိုင်းကို ၎င်းတို့၏ အကန့်အသတ်အထိ မြှင့်တင်ကာ၊ နည်းလမ်းမျိုးစုံဖြင့် သူ၏ အောင်မြင်မှုနှုန်းကို အမြင့်မားဆုံးဖြစ်အောင် ပြင်ဆင်ထားရမည် ဖြစ်သည်။

စစ်မြေပြင်နှင့် ပတ်သက်၍မူ ထိုရွေးချယ်မှုကို ပြုလုပ်ပြီးသည်နှင့် နောက်ပြန်လှည့်ရန် လမ်းမရှိတော့ပေ။ သူ၏ ကျင့်ကြံခြင်းခရီးလမ်းတစ်လျှောက်တွင် အရေးကြီးသော ရွေးချယ်မှုများနှင့် ကြုံတွေ့ရသည့် အကြိမ်တိုင်း၌ သူသည် မည်သည့်အခါမျှ တုံ့ဆိုင်းနေခဲ့ခြင်း မရှိပေ။ ဖူမျိုးနွယ်စုကို အမြစ်ပြတ်ချေမှုန်းခြင်း ဖြစ်စေ၊ ရှောင်ဟွမ်းတောင်ကို တိုက်ခိုက်ခြင်း ဖြစ်စေ၊ သို့မဟုတ် ချင်းဟွာမြစ်တွင် ရန်သူအပေါင်းကို ခုခံရင်ဆိုင်ခဲ့ခြင်း ဖြစ်စေ၊ ထိုအကြိမ်တိုင်းတွင် သူသည် ကြီးမားလှသော အန္တရာယ်များနှင့် ရင်ဆိုင်ခဲ့ရသော်လည်း နောက်ဆုံးတွင် အောင်ပွဲခံကာ ပေါ်ထွက်လာနိုင်ခဲ့သည်။

သာမန်လူလောကတွင် ဂုဏ်သတင်းနှင့် စည်းစိမ်ချမ်းသာများကို သက်စွန့်ဆံဖျား အမဲလိုက်ရင်း ရယူကြရသည်။ ကျင့်ကြံခြင်းလောကတွင်မူ ထိုအမှန်တရားက အဆပေါင်းရာချီ၍ ပိုမိုလေးလံလှပေသည်။ ကျင့်ကြံသူတစ်ဦး၏ လမ်းစဉ်ကို လျှောက်လှမ်းခြင်းသည် အခြားသူများကို ဆန့်ကျင်ခြင်း၊ ကောင်းကင်ဘုံကို ဆန့်ကျင်ခြင်းနှင့် အဓိကအားဖြင့် မိမိကိုယ်ကိုယ် ပြန်လည်ဆန့်ကျင် တိုက်ခိုက်ရခြင်း ဖြစ်ပေသည်။ အကယ်၍ သူသည် အရာအားလုံးကို ရင်းနှီးမြှုပ်နှံပြီး ထပ်ခါတလဲလဲ အလောင်းအစား မပြုလုပ်ခဲ့လျှင် နှစ်ပေါင်းနှစ်ဆယ်အတွင်း ဤကဲ့သို့သော မြင့်မားသည့်အဆင့်သို့ အဘယ်မှာ ရောက်ရှိလာနိုင်ပါမည်နည်း။ ကြောက်ရွံ့ခြင်း၊ တုံ့ဆိုင်းခြင်း၊ ရောင့်ရဲခြင်းနှင့် သာမန်မျှသာ နေထိုင်ခြင်း စသည့် အရာအားလုံးသည် မဟာတာအိုလမ်းစဉ်ကို လျှောက်လှမ်းလိုသော ကျင့်ကြံသူများ၏ လမ်းစဉ်တွင် မရှိသင့်သော အရာများ ဖြစ်ပေသည်။

သို့သော်လည်း လော့ချန်သည် အဆင်အခြင်မဲ့သော လူမိုက်တစ်ဦး မဟုတ်ပေ။ သူသည် အသက်ရှင်သန်နိုင်မည့် အခွင့်အရေး ရှစ်ဆယ်ရာခိုင်နှုန်းခန့် မရှိလျှင် မည်သည့်အခါမျှ လှုပ်ရှားလေ့မရှိပေ။ ထိုမျှလောက်သော သေချာမှုမရှိဘဲ မိမိကိုယ်ကိုယ် လုံးဝ ကူကယ်ရာမဲ့သော အခြေအနေမျိုးထဲသို့ သက်ဆင်းသွားစေလိမ့်မည် မဟုတ်ပေ။ ထိုမျှမက ရှေ့တွင်ရှိနေသော စစ်ပွဲအတွင်း၌ သူသည် လော့ထျန်းအဖွဲ့မှ ကျင့်ကြံသူများကို ပါဝင်ပတ်သက်စေမည် မဟုတ်ပေ။

အကြောင်းမူကား ဓားလှံဟူသည် မျက်စိမရှိသောကြောင့် ဖြစ်သည်။ လော့ထျန်းအဖွဲ့မှ ကျင့်ကြံသူများသည် တစ်ကိုယ်တော် ကျင့်ကြံသူများကြားတွင် အထူးချွန်ဆုံး ဖြစ်ကြသော်လည်း၊ ရာနှင့်ချီသော သို့မဟုတ် ထောင်နှင့်ချီသော အခြေတည်အဆင့် ကျင့်ကြံသူများ အပြင်းအထန် တိုက်ခိုက်ကြမည့် ဤကဲ့သို့သော အကြီးစားစစ်ပွဲကြီးသည် သူတို့အတွက်မူ အလွန်အမင်း အန္တရာယ်များလွန်းလှပေသည်။ ထို့ကြောင့် ယခုအကြိမ်တွင် သူနှင့် ချူခွေး နှစ်ဦးတည်းသာ စစ်မြေပြင်သို့ တက်လှမ်းကြမည် ဖြစ်သည်။

လော့ချန်သည် ချူခွေး၏ ခွန်အားကို အတိုင်းအတာတစ်ခုအထိ ကောင်းစွာ သဘောပေါက်ထားသည်။ ထိုလူသည် အခြေတည်အဆင့် (၉) တွင် ရှိနေပြီး၊ သူအသုံးပြုသော ချီထျန်းတုတ်မှော်ရတနာမှာလည်း ပြီးပြည့်စုံလုနီးပါးအထိ သန့်စင်ထားပြီး ဖြစ်သည်။ ထို့အပြင် သူသည် ခန္ဓာကိုယ်သန့်စင်ခြင်း ကျင့်စဉ် များတွင်လည်း ကျွမ်းကျင်လှပေသည်။ သူ ဖုံးကွယ်ထားဆဲဖြစ်သော အခြားသော အစွမ်းအစများ ရှိနေဦးမည်မှာ သံသယဖြစ်စရာမလိုသော်လည်း၊ လော့ချန်၏ ခန့်မှန်းချက်အရ ၎င်းတို့သည်လည်း လွန်စွာ အားကိုးထိုက်သော အရာများ ဖြစ်ကြလိမ့်မည်။ အဆုံးသတ်တွင် ထျန်းခွေးကျီ ဟူသော အမည်နာမသည် အချည်းနှီး ကျော်ကြားနေခြင်း မဟုတ်ဘဲ သွေးနှင့် စစ်ပွဲများကြားမှ ရယူထားခြင်း ဖြစ်သည်။ ချူခွေးသည် လွန်ခဲ့သော နှစ်များစွာအတွင်း မသန့်ရှင်းသော အလုပ်များစွာကို လုပ်ဆောင်ခဲ့ဖူးသည်။ တိုက်ခိုက်ရေး အတွေ့အကြုံအပိုင်းတွင်မူ သူသည် လော့ချန်ထက်ပင် သာလွန်နေနိုင်သည်။ ဂိုဏ်းကြီးခုနစ်ဂိုဏ်းမှ ဂိုဏ်းမျိုးဆက်များ ထွက်ပေါ်မလာသရွေ့ သူ မည်သူ့ကိုမျှ ကြောက်ရွံ့နေလိမ့်မည် မဟုတ်ပေ။

မိမိကိုယ်ကိုယ်နှင့် ပတ်သက်၍မူ လော့ချန် လုံးဝဥဿုံ ယုံကြည်မှု ရှိပေသည်။ ရန်သူကို အနိုင်တိုက်နိုင်ခြင်း ရှိ၊ မရှိမှာ တခြားကိစ္စတစ်ခု ဖြစ်သော်လည်း၊ အကယ်၍ ထွက်ပြေးတိမ်းရှောင်ရမည့် အခြေအနေမျိုး ရောက်ရှိလာပါက သူ မည်သူ့ကိုမျှ အရှုံးပေးလိမ့်မည် မဟုတ်ပေ။

"အစ်ကိုဝမ်သာ ဒီမှာရှိရင် သိပ်ကောင်းမှာပဲ၊ ငါတို့သုံးယောက်သာ အဖွဲ့ဖွဲ့နိုင်ရင် စစ်မြေပြင်မှာ ဘယ်သူကမှ တားနိုင်မှာ မဟုတ်ဘူး...."

လော့ချန် တိုးညင်းစွာ ရေရွတ်လိုက်မိသည်။

လော့ချန်၏ လျင်မြန်လှသော မှော်အတတ်ထုတ်ဖော်မှု စွမ်းရည်နှင့် ကျယ်ပြန့်သော ဖျက်ဆီးနိုင်စွမ်း၊ ဝမ်ယွမ်၏ သေစေနိုင်လောက်သော တိုက်ကွက်များနှင့် ချူခွေး၏ မြင့်မားလှသော ကျင့်ကြံခြင်းအဆင့်၊ စစ်မြေပြင်အတွေ့အကြုံတို့ ပေါင်းစပ်လိုက်ပါက သူတို့သုံးဦးသည် စစ်မြေပြင်တွင် ကြီးမားလှသော ဂုဏ်ထူးဆောင်မှတ်များကို အလွယ်တကူ ရိတ်သိမ်းနိုင်မည့် အင်အား ရှိကြပေသည်။

သို့သော် ဤလောကတွင် မည်သည့်အရာမျှ ပြီးပြည့်စုံခြင်း မရှိပေ။ ဝမ်ယွမ် အသက်ရှင်ကျန်ရစ်ခဲ့သော်လည်း သူနှင့် သွေးမိစ္ဆာတို့ ဆက်စပ်နေသည်ဟူသော ကောလာဟလများကြောင့် ယခုအချိန်တွင် လူပုံအလယ်၌ ပေါ်ပေါ်ထင်ထင် ထွက်လာရန် မဖြစ်နိုင်သေးပေ။ မည်သည့် ပေါ်ထွက်လာမှုမဆို လော့ထျန်းအဖွဲ့အပေါ်သို့ မလိုအပ်သော ပြဿနာများကိုသာ ဆွဲဆောင်လာလိမ့်မည် ဖြစ်သည်။

သွေးမိစ္ဆာအကြောင်းကို တွေးမိလိုက်သည့်အခါ လော့ချန် မျက်မှောင်ကြုတ်လိုက်မိသည်။ ထိုလူသည် ရွှေအမြုတေအတုအယောင်အဆင့် ကျင့်ကြံသူတစ်ဦး ဖြစ်သည်။ အကယ်၍ စစ်မြေပြင်၍သာ သူ့အား ဆုံတွေ့ခဲ့ပါက အိမ်မက်ဆိုးတစ်ခု ဖြစ်လာပေလိမ့်မည်။

‘ငါ ချူခွေးကို သေချာသတိပေးထားရမယ်’

အစီအစဉ်များကို စနစ်တကျ ပြင်ဆင်ပြီးနောက် မကြာသေးမီက ကျင့်ကြံခြင်းကြောင့် ခန္ဓာကိုယ်ထဲတွင် ကျန်ရှိနေသော နာကျင်မှုများနှင့် ပင်ပန်းနွမ်းနယ်မှုများက တဖြည်းဖြည်း ကွယ်ပျောက်သွားခဲ့သည်။ သူ အချိန်ဆွဲမနေတော့ဘဲ သွေးမိစ္ဆာအသွင်ပြောင်းလက်ညှိုးနှင့် သန့်စင်ခြင်းအတတ် နှစ်ခုစလုံးကို တစ်ပြိုင်နက်တည်း ပူးပေါင်းအသုံးပြုလိုက်ပြီး၊ ၎င်းတို့၏ စွမ်းအားများကို သူ၏ နဖူးပြင်ထက်မှ မှေးမှိန်နေသော မီးလျှံပုံသဏ္ဌာန် တံဆိပ်ဆီသို့ လမ်းညွှန်ပေးလိုက်သည်။

၎င်းသည် သူ ချူခွေးထံမှ လဝက်အချိန် တောင်းဆိုခဲ့ရခြင်း၏ အကြောင်းပြချက် ဖြစ်သည်၊ ထိုတံဆိပ်ကို အမြစ်ပြတ် လုံးဝဖျက်ဆီးပစ်ရန် ဖြစ်သည်။ လဝက်အချိန်ဆိုလျှင် လုံလောက်သင့်ပေသည်။ ထိုအမှတ်အသား လုံးဝကွယ်ပျောက်သွားပြီးနောက်မှသာ သူ မည်သည့် စိုးရိမ်ပူပန်မှုမျှမရှိဘဲ စစ်မြေပြင်သို့ စိတ်အေးချမ်းစွာ ခြေချနိုင်မည် ဖြစ်သည်။

ထို့ကြောင့် နေ့ရက်များသည် မှော်အတတ်လေ့ကျင့်ခြင်းနှင့် အာရုံစိုက်ကျင့်ကြံခြင်းများကြားတွင် တရွေ့ရွေ့ ကုန်ဆုံးသွားခဲ့သည်။ ထိုအချိန်အတောအတွင်း သူသည် ရွှေသဲကျွန်းမျော၏ စုဝေးပွဲသို့ တစ်ကြိမ်သာ သွားခဲ့ပြီး အရင်းအမြစ်အချို့ဝယ်ကာ ပြန်လည်ရောက်ရှိလာခဲ့သည်။

ဆယ်ရက်မြောက်နေ့တွင်မူ လော့ချန် ကျောက်အိမ်လေးထဲမှ လမ်းလျှောက်ထွက်လာခဲ့သည်။ သူတစ်ဦးတည်းမဟုတ်ဘဲ ကျွန်းပေါ်ရှိ များစွာသော ကျင့်ကြံသူများသည်လည်း ထိုအချိန်တွင် အိမ်များထဲမှ အသီးသီး ထွက်လာခဲ့ကြသည်။ လူတိုင်းသည် ကောင်းကင်ယံထက်ဆီသို့ တစ်ပြိုင်နက်တည်း မော့ကြည့်လိုက်ကြသည်။

အဝေးဆီမှ တိမ်တိုက်များနှင့် မြူခိုးများကို ဖြတ်သန်းလျက် ပြင်းထန်လှသော မိုးကြိုးသံများနှင့်အတူ ဧရာမ လှေပျံတစ်စင်းက ရောက်ရှိလာခဲ့သည်။ ၎င်းသည် အနည်းဆုံး ပေတစ်ထောင်ခန့်အထိ ရှည်လျားလှသော ဧရာမ လှေပျံတစ်စင်း ဖြစ်ပြီး ၎င်း၏ ကြီးကျယ်ခမ်းနားလှသော အရှိန်အဝါက ကြည့်ရှုနေသူတိုင်းကို အံ့အားသင့် ဆွံ့အသွားစေခဲ့တော့သည်။

"ဒါ.... ဒါ မှော်ရတနာအဆင့်ရှိတဲ့ လှေပျံကြီးပဲ...."

"တိမ်ပြိုဂိုဏ်းက အရေးပါတဲ့ အကြီးအကဲ တစ်ယောက်ယောက်ကို စေလွှတ်လိုက်တာ ဖြစ်ရမယ်၊ အဲဒီလိုလူမျိုးကြောင့်ပဲ ဒီလိုအရာကြီး ထွက်ပေါ်လာတာ...."

လူအုပ်ကြီးက တိုးညင်းစွာ ရေရွတ်ရင်း ဖရိုဖရဲ လှုပ်လှုပ်ရှားရှား ဖြစ်နေစဉ်မှာပင် ချူခွေးသည် လော့ချန်၏ ဘေးနားသို့ တိတ်ဆိတ်စွာ ရောက်လာခဲ့သည်။

"အဲဒီလှေပျံကြီးက ဗလာသက်သက် မဟုတ်ဘူး.... အထဲမှာ အစွမ်းထက်တဲ့ တိုက်ခိုက်ရေး ရုပ်သေးရုပ်တွေအပြည့် တင်ဆောင်လာတာ...."

သူ တိုးညင်းစွာ ပြောလိုက်သည်။ ထို့နောက် လော့ချန်၏ မျက်ဝန်းများကို သေချာစွာ စိုက်ကြည့်လိုက်ရင်း လေးနက်စွာ ထပ်ပြောလိုက်သည်။

"လော့ချန်.... ငါတို့ရဲ့ အချိန်ရောက်လာပြီ"

လော့ချန်နှင့် သူ၏စွန့်စားခန်းများ