အခန်း (၄၉၅-၄၉၆)
Vol. 50 Ch. 495-496
အခန်း (၄၉၅) ကျူးကျော်ဝင်ရောက်ခြင်း
လုံချန်းသည် အရိပ်အသွင်ပြောင်းခြင်း စွမ်းရည်ကို အသုံးပြုကာ သူ၏ ဝိညာဉ်ဓားပေါ်တွင် ရပ်လျက် ပင်လယ်ဓားပြသင်္ဘောဆီသို့ ပျံသန်းသွားသည်။ နှစ်ဖက်စလုံးမှ အပြန်အလှန် ပစ်ခတ်နေသော တိုက်ခိုက်မှုများကို သူ မထိမိအောင် သေချာ ရှောင်ရှားသွားသည်။
မကြာမီ သူသည် ပင်လယ်ဓားပြသင်္ဘော အနီးသို့ ရောက်ရှိသွားသော်လည်း ချက်ချင်း အတင်းဝင်ရောက်ရန် မကြိုးစားခဲ့ပေ။ သင်္ဘောကို ဝန်းရံထားသော အကာအကွယ်တွင် သူ အတင်းဝင်ရန် ကြိုးစားပါက သူ့ကို တားဆီးရန် သို့မဟုတ် ဒဏ်ရာရစေရန် ပြုလုပ်ထားသော အလားတူ ယန္တရားမျိုး ရှိနေမည်ကို သူ သေချာပေါက် သိနေသည်။
ထို့ကြောင့် လုံချန်းသည် ပိုမိုလွယ်ကူသော နည်းလမ်းကို ရွေးချယ်လိုက်သည်။ ပင်လယ်ဓားပြသင်္ဘော၏ အကာအကွယ်မှာ အမှန်တရားတာအိုဂိုဏ်း၏ သင်္ဘောကဲ့သို့ပင် တစ်ပိုင်းတစ်စ ကြည်လင်နေသည်။ ၎င်းမှာ အတွင်းရှိလူများက အပြင်ဘက်တွင် ဘာဖြစ်နေသည်ကို မြင်နိုင်ရန် ပြုလုပ်ထားခြင်း ဖြစ်သည်။
ထိုအကြည်ရောင် အကာအကွယ်ကြောင့်ပင် လုံချန်းသည် အခက်အခဲမရှိဘဲ သင်္ဘောအတွင်းပိုင်းကို မြင်နိုင်ပြီး နေရာရွှေ့ပြောင်းရန် လွယ်ကူသွားစေသည်။ သို့သော် လုံချန်းသည် ဝင်ရောက်ရန် အဘေးကင်းဆုံးနေရာကို ရှာဖွေလိုသည်။
ပင်လယ်ဓားပြများ မရှိသည့်နေရာကို ရှာရန် သူသည် သင်္ဘောပတ်လည်ကို ပျံသန်းကြည့်သည်။ ပင်လယ်ဓားပြအများစုမှာ သင်္ဘော၏ ရှေ့ပိုင်းတွင် စုဝေးနေကြသဖြင့် မကြာမီပင် သူ နေရာတစ်နေရာ ရှာတွေ့သွားသည်။ သင်္ဘော၏ အခြားသော အစိတ်အပိုင်းများတွင် အစေခံ အနည်းငယ်သာ ရှိနေကြသည်။
လုံချန်းသည် ထိုကဲ့သို့သော နေရာတစ်နေရာသို့ နေရာရွှေ့ပြောင်းလိုက်သည်။ သူသည် သင်္ဘော၏ အနောက်ဘက် အနောက်တောင်ပိုင်းသို့ ရောက်ရှိသွားသည်။
သင်္ဘောပေါ်သို့ ရောက်သည်နှင့် လုံချန်းသည် ဝိညာဉ်အာရုံကို အသုံးပြု၍ သင်္ဘောပေါ်ရှိ လူအားလုံး၏ တည်နေရာအား ရှာဖွေလိုက်သည်။ သူ ရင်ဆိုင်ရမည့် ရန်သူ မည်မျှရှိသည်ကို သိရန်ဖြစ်သည်။
သူ သတိပြုမိသလောက် သင်္ဘောပေါ်တွင် ပင်လယ်ဓားပြ ၅၀ နှင့် အထွေထွေ အလုပ်များလုပ်သည့် ကျွန် ၁၅၀ ခန့် ရှိနေသည်။
လုံချန်းသည် သူ့အတွက် ပြဿနာပေးနိုင်သည့် အစွမ်းထက်သော ပင်လယ်ဓားပြများကိုသာ အဓိက အာရုံစိုက်လိုသည်။ အားနည်းသောသူများကိုမူ ကြောက်ရွံ့မှုနှင့် အင်အားသုံး၍ ကိုင်တွယ်ရန် လွယ်ကူသော်လည်း ၎င်းမှာ အစွမ်းထက်သော ကျင့်ကြံသူများကို အရင်ဆုံး အပြတ်ရှင်းပြီးမှသာ ဖြစ်နိုင်ပေမည်။
ထိုသို့ဖြစ်ရန် မည်သူ့ကို သတ်ရမည်ကို သူ သိထားသည်။
သူ၏ အရိပ်အသွင်ပြောင်းခြင်း စွမ်းရည် မကုန်ဆုံးမီအတွင်း သူသည် သူ့အတွက် ခြိမ်းခြောက်မှုဖြစ်နိုင်သည့် ပင်လယ်ဓားပြ ကျင့်ကြံသူများဆီသို့ လျှောက်သွားလိုက်သည်။
အရိပ်အသွင်ပြောင်းခြင်း စွမ်းရည်က သူ့ကို ကိုယ်ပျောက်စေရုံသာမက အရှိန်အဝါကိုပါ ဖုံးကွယ်ပေးထားသဖြင့် အင်အားကွာခြားချက် အလွန်အမင်း မကြီးမားပါက အခြားသူများအနေဖြင့် သူ့အား ရှာတွေ့ရန် မဖြစ်နိုင်ပေ။ တစ်ခုတည်းသော အားနည်းချက်မှာ ဤစွမ်းရည်မှာ အချိန်အကြာကြီး မခံခြင်းပင် ဖြစ်သည်။
လုံချန်းသည် အမှန်တရားတာအိုဂိုဏ်း သင်္ဘောဘက်သို့ ကြည့်နေသော ပင်လယ်ဓားပြခေါင်းဆောင်၏ အနောက်တွင် ပေါ်လာသည်။
"ဆက်တိုက်ကြစမ်း။ သူတို့ရဲ့ ခုခံမှုကို ငါတို့ သေချာပေါက် ဖျက်ဆီးနိုင်ရမယ်။ ဆက်လုပ်၊ သူတို့ရဲ့ ခုခံမှုကို ဖောက်ထွက်နိုင်တာနဲ့ ရတနာတွေရော မိန်းမတွေရော ငါတို့ ရတော့မှာ။ မင်းတို့ လိုချင်တဲ့အရာအတွက် တိုက်ကြစမ်း။ ရှိသမျှ အရာအားလုံးကို သုံး။ အစေခံတွေကို အရှိန်မြှင့်ခိုင်းလိုက်၊ ငါတို့ရဲ့ တိုက်ခိုက်ရေးအစီအရင်က ပိုပြီး အားကောင်း..."
ပင်လယ်ဓားပြခေါင်းဆောင် စကားမဆုံးသေးမီမှာပင် ဓားတစ်စင်းက သူ၏နောက်ကျောမှ ထိုးဖောက်ဝင်ရောက်လာပြီး ရှေ့ဘက်သို့ ထွက်လာသည်။ လုံချန်းသည် ပင်လယ်ဓားပြခေါင်းဆောင်၏ အသက်အန္တရာယ်ရှိသော အရေးကြီးအင်္ဂါများကို တမင်တကာ ရှောင်လွှဲ၍ ထိုးလိုက်ခြင်း ဖြစ်သည်။
လုံချန်း သူ၏ဓားကို ပြန်ဆွဲထုတ်လိုက်သောအခါ ပင်လယ်ဓားပြခေါင်းဆောင်မှာ ဒူးထောက်လဲကျသွားသည်။
လုံချန်း၏ အရိပ်အသွင်ပြောင်းခြင်း စွမ်းရည်မှာလည်း ကုန်ဆုံးသွားပြီ ဖြစ်သော်လည်း သူ လုပ်ဆောင်ရမည့်အရာများကို လုပ်ဆောင်ပြီးသွားပြီ ဖြစ်သည်။ အစွမ်းထက်သော ကျင့်ကြံသူ အများစုမှာ မည်သူမျှ မသိလိုက်ဘဲ အသတ်ခံလိုက်ရပြီ ဖြစ်သည်။ ပင်လယ်ဓားပြခေါင်းဆောင် တစ်ယောက်သာ ကျန်တော့ပြီး ယခုမူ သူသည်လည်း ကိုင်တွယ်ခြင်း ခံလိုက်ရပြီ ဖြစ်သည်။
ကံကောင်းသည်မှာ ဤသင်္ဘောပေါ်ရှိ လူများ၏ ကျင့်ကြံခြင်းအဆင့်မှာ နိမ့်ပါးနေခြင်းပင်။ သူတို့သည် သင်္ဘော၏ ခုခံရေးနှင့် တိုက်ခိုက်ရေးအစီအရင်များကိုသာ အဓိက အားကိုးကြသည်။
သင်္ဘောပေါ်တွင် အသန်မာဆုံးဖြစ်သော ပင်လယ်ဓားပြ ခေါင်းဆောင်ပင်လျှင် ကောင်းကင်အဆင့် အလယ်အလတ် ကျင့်ကြံသူသာ ဖြစ်သည်။
လုံချန်းသည် လူအားလုံး၏ ရှေ့တွင် ကိုယ်ထင်ရှားလာသည်။
"ငါက ဒီသင်္ဘောရဲ့ ခေါင်းဆောင်သစ်ပဲ။ မင်းတို့အားလုံး အခုကစပြီး ငါ့အမိန့်ကို နားထောင်ရမယ်။ ဆန့်ကျင်တဲ့သူကတော့ သေရုံပဲ ရှိမယ်" လုံချန်းက ကြေညာလိုက်ပြီး သူ၏ဓားကို တစ်ချက်ဝှေ့ယမ်းကာ ပင်လယ်ဓားပြ ခေါင်းဆောင်၏ ညာဘက်လက်ကို ဖြတ်ချလိုက်သည်။
သူသည် ရပ်မနေဘဲ ခေါင်းဆောင်၏ အခြားလက်တစ်ဖက်ကိုပါ ထပ်မံ ဖြတ်ပစ်လိုက်သည်။
"မင်းလို ကောင်ကများ။ ငါတို့ခေါင်းဆောင်ကို လွှတ်စမ်း" ပင်လယ်ဓားပြတစ်ဦးသည် လုံချန်းဆီသို့ ပြေးလာသော်လည်း လုံချန်းက လေချွန်လိုက်ရုံမျှသာ ပြုလုပ်လိုက်သည်။ ဓားတစ်စင်း ပျံသန်းလာပြီး ထိုသူ၏ ခေါင်းကို ဖြတ်ချလိုက်လေတော့သည်။
"တခြား ဘယ်သူ သံသယရှိသေးလဲ။ ရှိရင် ရှေ့ကို တက်လာခဲ့။ ငါ မင်းတို့ကို တစ်ခါတည်း ကိုင်တွယ်ပေးချင်လို့။ တကယ်လို့ မင်းတို့ အနောက်မှာပဲ ငြိမ်ငြိမ်နေမယ်ဆိုရင်တော့ ငါ့ကို ထောက်ခံတယ်လို့ပဲ ငါ ယူဆလိုက်မယ်။ ဒါပေမဲ့ အဲဒီနောက်မှ ငါ့ကို သစ္စာဖောက်မယ့်သူ ရှိလာရင်တော့ သူတို့ရဲ့ သေခြင်းတရားက ဒီကောင်လို ရိုးရှင်းမှာ မဟုတ်ဘူး။ အခု ဆုံးဖြတ်ကြ" လုံချန်းက ဟိန်းဟောက်လိုက်သည်။
မည်သည့် ပင်လယ်ဓားပြမျှ မလှုပ်ရှားရဲဘဲ အနောက်တွင်သာ ငြိမ်သက်နေကြသည်။
"ကောင်းပြီ။ မင်းတို့ နားလည်သွားတာ ဝမ်းသာပါတယ်။ နောက်နောင်မှာလည်း ဒီလိုပဲ အမြော်အမြင် ရှိလိမ့်မယ်လို့ ငါ မျှော်လင့်တယ်" လုံချန်းက ပြုံးရင်း ပြောလိုက်သည်။
သူသည် ဒဏ်ရာရနေသော လူ၏ ရှေ့သို့ လျှောက်သွားသည်။
လုံချန်း ဝတ်ဆင်ထားသော မျက်နှာဖုံးကြားမှ သူ၏ မျက်လုံးများကိုသာ မြင်တွေ့နေရသည်။
"ငါ မင်းကို ဘာလို့ အခုထိ မသတ်သေးတာလဲဆိုတာ မင်း သိချင်လား" လုံချန်းက ခေါင်းဆောင်ကို မေးလိုက်သည်။
"မင်း... မင်း ငါ့ကို အနောက်ကနေ ခိုးတိုက်ခဲ့တာလေ၊ ပြီးတော့မှ ငါ့ကို အဲဒီလို လာပြောရဲသေးတယ်။ မင်းလို လူကြောက်က ငါ့ကို သတ်လိုက်စမ်းပါ။ အခုကျမှ သတ္တိရှိသလို ဟန်မဆောင်စမ်းနဲ့" ပင်လယ်ဓားပြ ခေါင်းဆောင်က အားနည်းသောအသံဖြင့် ပြောသည်။
"အထင်မမှားပါနဲ့။ ငါ မင်းကို အရှေ့ကနေ တိုက်ခဲ့ရင်တောင် ရလဒ်က အတူတူပါပဲ။ ဒါက ငါ့အချိန်တွေကို မဖြုန်းချင်လို့ပဲ။ ငါ အလျင်လိုနေတယ်" လုံချန်းက ဆိုလိုက်သည်။
လုံချန်းသည် ပင်လယ်ဓားပြများဘက်သို့ ပြန်လှည့်ကြည့်လိုက်သည်။
"တိုက်ခိုက်တာကို ရပ်ပြီး သင်္ဘောကို လှည့်လိုက်စမ်း။ ငါတို့ အခု ထွက်သွားမယ်။ အနောက်ကို ပြန်ဆုတ်ကြ" လုံချန်းက အမိန့်ပေးလိုက်သည်။
ပင်လယ်ဓားပြများသည် သူ၏ အမိန့်ကို လိုက်နာကာ တိုက်ခိုက်မှုများကို ရပ်တန့်လိုက်ကြသည်။ သင်္ဘောမှာ လှည့်ထွက်သွားပြီး ဆုတ်ခွာသွားလေတော့သည်။
အမှန်တရားတာအိုဂိုဏ်း သင်္ဘောပေါ်ရှိ လူများမှာ အံ့အားသင့်သွားကြသည်။ အထူးသဖြင့် သင်္ဘောပေါ်တွင် အလုပ်လုပ်နေသူများ ဖြစ်သည်။
အမှန်တရားတာအိုဂိုဏ်း သင်္ဘော၏ လုံခြုံရေးမှူးမှာ ဘာဖြစ်နေသည်ကို နားမလည်နိုင် ဖြစ်နေသည်။ တိုက်ပွဲက စရုံသာ ရှိသေးသည်။ ရန်သူက လှည့်ထွက်သွားသည်လော။ ဤကဲ့သို့ အခြေအနေမျိုး အမြန်ဆုံး ပြီးဆုံးသွားခြင်းမှာ ပထမဆုံးအကြိမ်ပင် ဖြစ်သည်။ အထူးသဖြင့် ရန်သူမှာ ပင်လယ်ဗဟိုပိုင်းမှ ပင်လယ်ဓားပြများ ဖြစ်နေချိန်တွင် ဖြစ်သည်။
သင်္ဘောကပ္ပတိန်မှာလည်း အံ့သြသွားသော်လည်း ရန်သူများ ဆုတ်ခွာသွားမှုကြောင့် သတိလက်လွတ် မဖြစ်ခဲ့ပေ။
သူသည် အခြားတစ်ဖက်မှ တိုက်ခိုက်မှုများ လာနိုင်သည်ကို သတိထားရင်း သင်္ဘောကို ဆက်လက် မောင်းနှင်စေသည်။ ပင်လယ်ဓားပြများ ဘာဖြစ်သွားသည်မှာ သူ့အတွက် အရေးမကြီးပေ။ သူတို့နောက်ကို လိုက်နေရန်လည်း မလိုအပ်ပေ။ သူ ဂရုစိုက်သည့် တစ်ခုတည်းသော အရာမှာ ခရီးစဉ်ကို သတ်မှတ်ထားသည့် အချိန်အတွင်း အပြီးသတ်နိုင်ရန်ပင် ဖြစ်သည်။
ပင်လယ်ဓားပြသင်္ဘောမှာ နောက်သို့ ဆုတ်ခွာလာသော်လည်း လုံချန်းမှာ ပင်လယ်ဓားပြ ခေါင်းဆောင်ကိုသာ အာရုံစိုက်နေဆဲ ဖြစ်သည်။
"ငါ့ကို သတ်လိုက်တော့" ခေါင်းဆောင်က လုံချန်းကို ထပ်မံ ပြောသည်။
"ဟင့်အင်း။ ငါ မင်းကို မသတ်ဘူး၊ ဒါပေမဲ့ မင်း ငါ့အတွက် အလုပ်လုပ်ပေးဖို့ တောင်းဆိုမယ်။ တကယ်လို့ မင်း အဲဒီလို လုပ်မယ်ဆိုရင် မင်း တောင်းသမျှ ရတနာတွေ အကုန် ရစေရမယ်။ နောက်ပြီး မင်းရဲ့ ခန္ဓာကိုယ်နဲ့ မင်းရဲ့ လက်တွေကို ပြန်ကောင်းစေမယ့် အသက်ပေးဆေးလုံး တစ်လုံးလည်း ငါ ပေးမယ်။ ဆုံးဖြတ်ချက်က မင်းလက်ထဲမှာပဲ" လုံချန်းက ခေါင်းခါရင်း ပြောလိုက်သည်။
"တစ္ဆေကျွန်း အကြောင်း ဘယ်သူ သိလဲ" လုံချန်းက အနောက်တွင် ရပ်နေသော ပင်လယ်ဓားပြများကို မေးလိုက်သည်။
ထိုစကားလုံး နှစ်လုံးမှာ ပင်လယ်ဓားပြများကို တုန်လှုပ်သွားစေရန် လုံလောက်သည်။ ပင်လယ်ဓားပြ ခေါင်းဆောင်ပင်လျှင် မှင်တက်သွားသည်။ သူတို့၏ မျက်နှာတွင် ကြောက်ရွံ့မှုများ ထင်ရှားစွာ ပေါ်လွင်နေသည်။
"မင်း ဘာလို့ တစ္ဆေကျွန်း အကြောင်းကို မေးနေတာလဲ" ပင်လယ်ဓားပြ ခေါင်းဆောင်က မေးသည်။
"ငါက တစ္ဆေကျွန်းက လာတာလေ။ အဲဒီကို ပြန်သွားချင်လို့။ မင်းတို့ ငါ့ကို အဲဒီအထိ လိုက်ပို့ပေးမယ်ဆိုရင် မင်းတို့ကို ဒီပင်လယ်ပြင်မှာ အင်အားအကြီးဆုံး ဖြစ်စေမယ့် ရတနာတွေ ငါ ပေးမယ်။ ငါတို့ တစ္ဆေကျောင်းတော်ရဲ့ စွမ်းအားကို မင်းတို့ သိပြီးသား ဖြစ်မှာပါ။ မင်းတို့ရဲ့ အကာအကွယ်က ငါ့ကို ဝင်မလာအောင် မတားနိုင်ခဲ့ဘူးဆိုတာကလည်း ငါ့ရဲ့ စွမ်းရည်ကို မင်းတို့ ခန့်မှန်းဖို့ လုံလောက်မှာပါ။ တကယ်လို့ မင်းတို့ ငါ့စကားကို နားမထောင်ဘူးဆိုရင်တော့ ငါ မင်းတို့ကို အကုန်သတ်ပြီး အစေခံတွေကို သုံးပြီး သင်္ဘောကို တစ္ဆေကျွန်းအထိ မောင်းခိုင်းရလိမ့်မယ်"
"မင်းတို့ပါရင်တော့ ငါက ကလေးတစ်ယောက်ကို လမ်းပြနေသလိုမျိုး လမ်းညွှန်ပြနေစရာ မလိုတော့လို့ ပိုလွယ်သွားတာပေါ့၊ မင်းတို့ ငါတို့ကျွန်း ဘယ်မှာလဲဆိုတာ သိပြီးသား ဖြစ်မှာပဲ။ ကဲ... မင်းတို့ရဲ့ အဖြေကို ပြောကြတော့" လုံချန်းက လူအားလုံးကို ဝေ့ကြည့်ရင်း ပြောလိုက်လေတော့သည်။
အခန်း (၄၉၆) ပင်လယ်ဓားပြဘုရင်
လုံချန်းသည် ပင်လယ်ဓားပြခေါင်းဆောင်အား အသက်ပေးဆေးလုံးကို ထုတ်ပြလိုက်သည်။
"ကျ... ကျုပ် ခင်ဗျားစကားကို နားထောင်ပါ့မယ်" ပင်လယ်ဓားပြခေ ါင်းဆောင်က သဘောတူလိုက်သည်။
"ကောင်းပြီ။ ရော့... ဒါက အသက်ကုသဆေးလုံးပဲ။ ဒါက မင်းရဲ့ ရင်ဘတ်က ဒဏ်ရာကို ပျောက်ကင်းစေလိမ့်မယ်၊ ဒါပေမဲ့ မင်းရဲ့လက်တွေကတော့ ပြန်ကောင်းလာမှာ မဟုတ်ဘူး။ အသက်ပေးဆေးလုံး ကသာ မင်းလက်တွေကို ပြန်ပေါက်စေနိုင်မှာ၊ အဲဒါကိုတော့ ငါ့ကို ကျွန်းကို ပြန်ပို့ပေးပြီးမှ မင်းကို ပေးမယ်" လုံချန်းက ပြောကာ ဆေးလုံးကို ခေါင်းဆောင်၏ ပါးစပ်ထဲသို့ ပစ်ထည့်လိုက်သည်။
ပင်လယ်ဓားပြခေါင်းဆောင် ဆေးကို မျိုချလိုက်သည်နှင့် တစ်ပြိုင်နက် သူ၏ ရင်ဘတ်ဒဏ်ရာမှာ စတင်ကျက်လာပြီး ပုခုံးမှ သွေးထွက်နေမှုများ ရပ်တန့်သွားသည်။ သို့သော် လက်များကတော့ ပြန်မပေါက်လာသေးပေ။ ယခု သူသည် လက်မဲ့ဘဝ ဖြစ်နေရှာသည်။
"ငါ့ကို တစ္ဆေကျွန်း အရောက် ပို့ပေးပြီးမှ မင်းလက်တွေကို ပြန်ရမှာ။ အဲဒီမတိုင်ခင်တော့ အဲဒါကို မေ့ထားလိုက်တော့" လုံချန်းက ခေါင်းခါရင်း ပြောလိုက်သည်။
"ခင်ဗျားစကားကို ကျုပ် နားထောင်ပါ့မယ်၊ ဒါပေမဲ့ ဒီသင်္ဘောကို တစ္ဆေကျွန်းနားအထိတော့ ကပ်လို့မရဘူး။ တစ်ကျွန်းလုံးကို ဝိုင်းထားတဲ့ တစ္ဆေအကာအကွယ်ကြောင့် အဲဒါက မဖြစ်နိုင်ဘူး။ တောင်းပန်ပါတယ်၊ ဒါပေမဲ့ အဲဒီအကာအကွယ်နားက တစ္ဆေတွေရဲ့ တိုက်ခိုက်မှုကို ဒီသင်္ဘောက မခံနိုင်ဘူး။ ခင်ဗျားကို အဲဒီအကာအကွယ်နားအထိတော့ ပို့ပေးနိုင်ပါတယ်၊ ဒါပေမဲ့ ထပ်တိုးသွားရင်တော့ ကျုပ်တို့သင်္ဘော ပျက်စီးပြီး ကျုပ်တို့အားလုံး သေရပါလိမ့်မယ်" ပင်လယ်ဓားပြ ခေါင်းဆောင်က ခေါင်းခါရင်း ရှင်းပြသည်။
"ငါ ပြောပြီးပြီလေ၊ ငါက တစ္ဆေကျောင်းတော်က လူပါဆို။ အရာအားလုံးကို ငါ ကိုင်တွယ်မယ်။ ငါ့ကို အဲဒီကိုသာ ပို့ပေးစမ်းပါ၊ မဟုတ်ရင် မင်းသင်္ဘောကို အခုချက်ချင်း ငါ ဖျက်ဆီးပစ်မယ်" လုံချန်းက ပြတ်ပြတ်သားသား ပြောလိုက်သည်။
"ကျုပ်... ခင်ဗျားမှာ သင်္ဘောကို တစ္ဆေတွေရန်ကနေ ကာကွယ်ပေးနိုင်တဲ့ နည်းလမ်း ရှိတာလား" ခေါင်းဆောင်က မေးသည်။
"တစ္ဆေကျောင်းတော်က လူတွေကတောင် ဝင်ဖို့နည်းလမ်း မရှိဘူးဆိုရင် မင်းကပဲ သိနေမှာလား။ ပါးစပ်ပိတ်ပြီး ငါခိုင်းတာသာ လုပ်စမ်းပါ။ မင်းတို့ အဲဒီတစ္ဆေအကာအကွယ်ကို ဘာအခက်အခဲမှမရှိဘဲ ဖြတ်ကျော်နိုင်စေရမယ်" လုံချန်းက ဆိုလိုက်သည်။
လုံချန်းမှာ လိမ်ညာနေခြင်း ဖြစ်သော်လည်း သူ၏စကားမှာ သူတို့ ယုံကြည်သွားလောက်အောင် ခိုင်မာနေသည်။ ထို့အပြင် သူသည် ဝိညာဉ်များနှင့် အပေးအယူ လုပ်ဖူးပြီးသားဖြစ်၍ သူတို့ကို မကြောက်ပေ။ ဝိညာဉ်များက သူ့ကို မထိခိုက်နိုင်ကြောင်း သူ သိထားသည်။
ပင်လယ်ဓားပြ ခေါင်းဆောင်မှာ ယုံကြည်သွားပုံရသည်။
"သင်္ဘောကို တောင်ဘက်ကို လှည့်လိုက်ကြ" သူ၏လူများကို အမိန့်ပေးလိုက်သည်။
လုံချန်းအနေဖြင့် တစ္ဆေကျွန်းသို့ ရောက်ရန် မည်မျှကြာမည်ကို မေးလိုသော်လည်း ယခု သူက တစ္ဆေကျောင်းတော် တပည့်တစ်ဦးအဖြစ် ဟန်ဆောင်ထားသဖြင့် ထိုကဲ့သို့သော မေးခွန်းမျိုးကို မမေးသင့်မှန်း သူ သိသည်။
သင်္ဘောသည် ဦးတည်ချက်ပြောင်းကာ တောင်ဘက်သို့ စတင် ခရီးနှင်တော့သည်။
လုံချန်းသည် ကုလားထိုင်တစ်လုံး ယူကာ သင်္ဘော၏ ရှေ့ပိုင်းတွင် ထိုင်လိုက်ပြီး သင်္ဘောတစ်စင်းလုံးကို စောင့်ကြည့်နိုင်ရန် ပင်လယ်ဘက်သို့ ကျောခိုင်းထားသည်။
ပင်လယ်ဓားပြခေါင်းဆောင်ကိုလည်း သူ့ရှေ့တွင် ထိုင်ခိုင်းထားသည်။ ထိုသူက သူ့နောက်ကွယ်တွင် မကောင်းသော အကြံအစည်များ မလုပ်နိုင်စေရန် ဖြစ်သည်။
ခေါင်းဆောင်တွင် မှန်ပြောင်းငယ်လေး တစ်ခုရှိပြီး သူသည် လုံချန်းရှေ့တွင် ထိုင်ရင်း ပင်လယ်ပြင်ကို စောင့်ကြည့်နေရသည်။
ခရီးစဉ်မှာ တစ်ဝက်ခန့် ရောက်လာချိန်တွင် လေတိုက်နှုန်း ပြောင်းလဲသွားသည်။
လေထုမှာလည်း ပိုမို အေးစိမ့်လာသည်။
"ငါတို့ သူတို့နယ်မြေထဲ ရောက်နေပြီ။ အရှိန်လျှော့လိုက်ကြ။ သူတို့ရဲ့ အာရုံစိုက်မှုကို မခံရအောင်လို့ပဲ၊ မဟုတ်ရင် ငါတို့ အချိန်ဖြုန်းသလို ဖြစ်နေလိမ့်မယ်" ပင်လယ်ဓားပြ ခေါင်းဆောင်က သူ၏လူများကို ပြောလိုက်သည်။
သင်္ဘောသည် သိသိသာသာ အရှိန်လျှော့သွားသည်။
လုံချန်းက ပတ်ဝန်းကျင်ကို စပ်စုသော မျက်လုံးများဖြင့် ကြည့်လိုက်သည်။ အနီးနားတွင် မည်သည့်တစ္ဆေကိုမျှ မတွေ့ရပေ။
"ဘာလို့ အရှိန်လျှော့တာလဲ" လုံချန်းက မေးလိုက်သည်။
"ငါတို့ ပင်လယ်ဓားပြဘုရင်ရဲ့ ပင်လယ်ပြင်ထဲ ရောက်နေတာ။ ဒီမှာ ငါတို့ ချိုးဖောက်လို့မရတဲ့ စည်းကမ်းတွေ ရှိတယ်။ တကယ်လို့ ပင်လယ်ဓားပြဘုရင်က စိတ်အနှောင့်အယှက်ဖြစ်သွားရင် ငါတို့ကို စကားတောင် လာပြောနေမှာ မဟုတ်ဘူး၊ သင်္ဘောကို ချက်ချင်း ဖျက်ဆီးပစ်လိမ့်မယ်။ ငါတို့ လုပ်နိုင်တာက ခေါင်းငုံ့ပြီး နေဖို့ပဲ" ခေါင်းဆောင်က ပြန်ဖြေသည်။
'ပင်လယ်ဓားပြဘုရင် ဟုတ်လား... ပင်လယ်ဓားပြတွေကြားမှာလည်း အဆင့်အတန်း ခွဲခြားမှု ရှိတာပဲ' လုံချန်း တွေးလိုက်သည်။
"ကောင်းပြီ။ စည်းကမ်းတွေကို လိုက်နာလိုက်" လုံချန်းက တိုးတိုးလေး ရေရွတ်လိုက်သည်။
ပင်လယ်ဓားပြ ခေါင်းဆောင်က ခေါင်းညိတ်လိုက်သော်လည်း အဝေးမှ တစ်ခုခုကို မြင်လိုက်ရသဖြင့် ရုတ်တရက် မတ်တပ်ရပ်လိုက်သည်။
ထိုသူ၏ မှင်တက်သွားသော မျက်နှာကို မြင်လိုက်ရသဖြင့် လုံချန်းလည်း မတ်တပ်ရပ်လိုက်သည်။ သူသည် ခေါင်းဆောင် ကြည့်နေသော အရပ်သို့ လှည့်ကြည့်လိုက်ရာ သင်္ဘောတစ်စင်းကို တွေ့လိုက်ရသည်။
"ဒါ ပင်လယ်ဓားပြဘုရင်ရဲ့ သင်္ဘောပဲ။ ဘာပဲဖြစ်ဖြစ် ခင်ဗျား ဘာမှ မပြောပါနဲ့။ ခင်ဗျားက တစ္ဆေကျောင်းတော်ကဆိုတာကို လုံးဝ လျှို့ဝှက်ထားရမယ်" ပင်လယ်ဓားပြ ခေါင်းဆောင်က လုံချန်းကို သတိပေးလိုက်သည်။
လုံချန်းမှာ ထိုသူ အဘယ်ကြောင့် ဤမျှ ကြောက်နေရသည်ကို နားမလည်ပေ။ တစ္ဆေကျောင်းတော်မှာ ဤနေရာတွင် အကြီးမားဆုံး အင်အားစု ဖြစ်သင့်သည်။ ပင်လယ်ဓားပြ ဘုရင်အနေဖြင့် တစ္ဆေကျောင်းတော်က တပည့်တစ်ဦးကို တိုက်ခိုက်ရန် စွန့်စားလိမ့်မည် မဟုတ်ပေ။
"ဘာလို့လဲ" သူက အဖြေပေးနိုင်မည့် တစ်ဦးတည်းသောသူဖြစ်သော ခေါင်းဆောင်ကို မေးလိုက်သည်။
"ပင်လယ်ဓားပြဘုရင်ရဲ့ ဇနီးနဲ့ ကလေးက တစ္ဆေကျောင်းတော် တပည့်တစ်ယောက်ရဲ့ လက်ချက်နဲ့ သေခဲ့ရတာ။ တစ္ဆေကျောင်းတော်က အင်အားကြီးလွန်းတော့ သူ ကလဲ့စားမချေနိုင်ခဲ့ဘူး။ ကြောက်လို့ ကျွန်းကိုလည်း မတိုက်ရဲဘူး၊ ဒါပေမဲ့ သူ့နှလုံးသားထဲမှာတော့ အမုန်းတရားတွေ ပြည့်နေတာ။ တကယ်လို့ ခင်ဗျားက တစ္ဆေကျောင်းတော်ကဆိုတာ သူ သိသွားရင် ခင်ဗျားကို ဘယ်လိုနည်းနဲ့မဆို သတ်ပစ်လိမ့်မယ်။ ငြိမ်ငြိမ်လေးပဲ နေပါ၊ ကျုပ်ပဲ ကိုင်တွယ်ပါ့မယ်။ သူ့ရှေ့မှာတော့ ခင်ဗျားက ကျုပ်ရဲ့ ဒုတိယခေါင်းဆောင်အဖြစ် ဟန်ဆောင်လိုက်ပါ" ပင်လယ်ဓားပြ ခေါင်းဆောင်က ပြောလိုက်သည်။
"သူ့ရဲ့ ကျင့်ကြံခြင်း အဆင့်က ဘယ်လောက်လဲ" လုံချန်းက စုံစမ်းလိုက်သည်။
"သူက ကောင်းကင် အဆင့် အထွတ်အထိပ်လို့ ပြောကြတယ်၊ ဒါပေမဲ့ အဲဒီထက် ပိုအားကောင်းရင်လည်း အားကောင်းနိုင်တယ်" ခေါင်းဆောင်က ပြန်ဖြေသည်။
"ကောင်းပြီလေ"
လုံချန်း ထိုအတိုင်း ဟန်ဆောင်ရန် သဘောတူလိုက်သည်။ တစ္ဆေကျောင်းတော်သို့ ရောက်ရန် နီးကပ်နေချိန်တွင် ကောင်းကင်အဆင့် အထွတ်အထိပ် ကျင့်ကြံသူတစ်ဦးနှင့် ထိပ်တိုက်ရင်ဆိုင်ခြင်းကို သူ မလိုလားပေ။
ပင်လယ်ဓားပြဘုရင်၏ သင်္ဘောမှာ လုံချန်းတို့ သင်္ဘောရှေ့တွင် ရပ်တန့်လိုက်သည်။
ဘုရင်၏ သင်္ဘောမှာ အခြားသင်္ဘောများထက် နှစ်ဆခန့် ပိုကြီးမားသည်။
အမှန်တကယ်ပင် ၎င်းမှာ အမှန်တရားတာအိုဂိုဏ်း၏ သင်္ဘောကြီးကဲ့သို့ပင် ကြီးမားလှသည်။
ပင်လယ်ဓားပြ ခေါင်းဆောင်သည် ချီစွမ်းအင်ကို အသုံးပြု၍ အသံအား ကျယ်လောင်စေလိုက်သည်။
"ပင်လယ်ဓားပြ ဘုရင်ကြီးကို ဂါရဝပြုပါတယ်" သူက ကြွေးကြော်လိုက်သည်။
"ဘီမင်၊ မင်း ငါ့နယ်မြေထဲမှာ ဘာလုပ်နေတာလဲ" အခြားသင်္ဘောပေါ်မှ ပင်လယ်ဓားပြဘုရင်က အော်မေးသည်။
ပင်လယ်ဓားပြ ခေါင်းဆောင်ကို ဓားပြများကြားတွင် ဘီမင်ဟု ခေါ်ကြသည်။
"ကျွန်တော်တို့ ပင်လယ်ရဲ့ အခြားတစ်ဖက်ကို သွားဖို့ ဒီနေရာကနေ ဖြတ်သွားတာပါ။ ကျွန်တော်တို့ရဲ့ ကျူးကျော်မှုကို ခွင့်လွှတ်ပေးဖို့ တောင်းပန်ပါတယ်" ခေါင်းဆောင် ဘီမင်က ပြန်ဖြေသည်။
"မင်း အချိန်ကိုက် ရောက်လာတာပဲ။ အရင်က မင်းဆီကို ငါ ဖိတ်ကြားစာ ပို့ခဲ့ပေမဲ့ မင်းက ကင်းလှည့်ထွက်နေလို့ မရခဲ့ဘူး။ ငါတို့နဲ့ ပူးပေါင်းစမ်း၊ ငါတို့ စစ်တိုက်တော့မယ်" ပင်လယ်ဓားပြဘုရင်က ပြတ်သားစွာ ပြောလိုက်သည်။
ဘီမင်မှာ ထိုစကားကြောင့် မှင်တက်သွားသည်။ ပင်လယ်ဓားပြဘုရင်၏ သင်္ဘောအနောက်မှ အခြားသော ဓားပြခေါင်းဆောင်များ၏ သင်္ဘောများစွာ ထွက်ပေါ်လာသည်ကို သူ နောက်ဆုံးတွင် သတိပြုမိလိုက်သည်။ ပင်လယ်ဓားပြဘုရင်မှာ တကယ်ပင် စစ်ပွဲအတွက် အဆင်သင့် ဖြစ်နေပုံရသည်။
'စစ်ပွဲ ဟုတ်လား။ သူက တစ္ဆေကျောင်းတော်ကို သွားတိုက်မှာလား' လုံချန်း တွေးတောနေမိသည်။
ဘီမင်သည်လည်း ထိုအရာကိုပင် တွေးနေခြင်း ဖြစ်သည်။
"ဘယ်သူနဲ့ စစ်တိုက်မှာလဲ" ဘီမင်က မေးလိုက်သည်။
"ပုန်ကန်တဲ့ ပင်လယ်ဓားပြတွေနဲ့ တိုက်မှာ။ ငတုံး ဓားပြခေါင်းဆောင် တစ်စုက ပုန်ကန်ဖို့ စီစဉ်နေတယ်ဆိုတဲ့ သတင်း ငါ ရထားတယ်။ အခု သူတို့ စုဝေးပြီး တိုင်ပင်နေကြတယ်။ အဲဒီပွဲကို ငါတို့ သွားဖျက်ဆီးကြမယ်။ မင်း သူတို့ဘက်က မဟုတ်ဘူးဆိုရင် ငါတို့နဲ့ လိုက်ခဲ့။ တကယ်လို့ မင်း သူတို့နဲ့ တစ်ဖွဲ့တည်းဆိုရင်တော့ ငါ မင်းကိုပါ အပြစ်ပေးရလိမ့်မယ်၊ အဲဒါကတော့... သေခြင်းတရားပဲ" ပင်လယ်ဓားပြဘုရင်က ကြေညာလိုက်သည်။
ဘီမင်သည် လုံချန်းကို ဇဝေဇဝါဖြင့် လှည့်ကြည့်လိုက်သည်။ သူသည် အခြားရွေးချယ်စရာ မရှိတော့ကြောင်း လုံချန်းကို ခေါင်းခါပြလိုက်သည်။
"တောင်းပန်ပါတယ်၊ ဒါပေမဲ့ ကျုပ်တို့ သူတို့နောက်ကို စစ်ပွဲထဲ လိုက်သွားဖို့ပဲ ရှိပါတော့တယ်။ တကယ်လို့ ငြင်းလိုက်ရင် ကျုပ်တို့သင်္ဘော ဖျက်ဆီးခံရပြီး သေရပါလိမ့်မယ်။ ပုန်ကန်သူတွေကို နှိမ်နင်းပြီးမှပဲ ခင်ဗျားသွားချင်တဲ့ နေရာကို ပို့ပေးနိုင်ပါတော့မယ်" ဘီမင်က လုံချန်းကို အသံနှိမ့်၍ ပြောလိုက်သည်။
လုံချန်း အလေးအနက် တွေးတောနေမိသည်။ ဤသည်မှာ သူ၏ခရီးစဉ် နှောင့်နှေးသွားပြီး အခြားသူများ၏ ပြဿနာထဲတွင် ပါဝင်ပတ်သက်ရမည်ဟု ဆိုလိုခြင်း ဖြစ်သည်။ သို့သော် သူ ထွက်သွား၍လည်း မရပေ။
သူသည် တစ္ဆေကျွန်းသို့ ရောက်ရန် ဤပင်လယ်ဓားပြများကို အားကိုးနေရသည်။ အကူအညီမပါဘဲ ဤပင်လယ်ပြင်ကျယ်ကြီးထဲတွင် ထိုကျွန်းကို ရှာတွေ့ရန်မှာ မဖြစ်နိုင်သလောက်ပင်။ အကယ်၍ သူသာ ထွက်သွားပါက ကျွန်းကို ရှာတွေ့နိုင်မည့် ကံကောင်းမှုအား စောင့်ရင်း အချိန်များစွာ ပို၍ ဖြုန်းတီးမိမည် ဖြစ်သည်။