အခန်း (၂၆၆)
Vol. 27 Ch. 266
အလင်းတိုင်သည် အလွန်တရာ သေးငယ်၍ သိမ်မွေ့သော်လည်း လက်မအရွယ်အစားရှိသော အစွန်းတစ်မှတ်ပေါ်တွင်သာ အစွမ်းကုန် စုစည်းထားသဖြင့် ကောင်းကင်ယံထက်၌ သေးငယ်သော အပေါက်ကလေးတစ်ခု ဖြစ်ပေါ်လာစေရန် ပြင်းထန်စွာ လောင်မြိုက်ထိုးဖောက်လိုက်တော့သည်။
ထိုအပေါက်ကလေး ပေါ်ပေါက်လာပြီးနောက် ချောက်ချားဖွယ်ကောင်းသော ရယ်မောသံတစ်ခုက တိမ်တိုက်များကြားဝယ် ပဲ့တင်ထပ်သွားသည်။ ထိုအပေါက်ငယ်လေးမှတစ်ဆင့် ထူးဆန်းသော တုန်ခါမှုလှိုင်းများ ပျံ့နှံ့လာ၏။
တစ်ချိန်တည်းမှာပင် သွေးရောင်လွှမ်းသော မျက်လုံးပေါင်း သောင်းနှင့်ချီ၍ အပင်ပေါကကလေးများအလား ထိုအပေါက်၏ ပတ်လည်တွင် ချက်ချင်းဆိုသလို အစီအရီ ပေါ်ထွက်လာကြသည်။ ထိုမျက်လုံးများမှ သွေးစိမ်းရှင်ရှင်များ စီးကျနေပြီး သိပ်သည်းလွန်းလှသဖြင့် ကောင်းကင်ယံ၏ ထောင့်တစ်နေရာတွင် ထူးဆန်းသော ပိုးမွှားလေးများ လာရောက်တွယ်ကပ်နေသကဲ့သို့ ထင်မှတ်ရသည်။
ထိုပိုးမွှားငယ်လေးများသည် အရူးအမူး တွန့်လိမ်လှုပ်ရှားနေကြရာ ကြည့်ရသူအပေါင်းအား ရွံရှာဖွယ်ရာ အတိဖြစ်စေသည်။ တကယ့်ကို ပျို့အန်ချင်စရာကောင်းလှသော မြင်ကွင်းပင်။
“ဟီးဟီးဟီးဟီး... နောက်ဆုံးတော့လည်း ငါပဲ ကောင်းကင်ယံကို အောင်နိုင်ပြီး အဆုံးစွန်သော အောင်ပွဲကို ရယူနိုင်ခဲ့ပြီ။ ဒီဂြိုလ်ဟာ ငါ့ရဲ့ တာအိုအရှင်သခင်လူဝင်စားအဖြစ် ဆင်းသက်ရာ နယ်မြေဖြစ်လာတော့မယ်”
“တကယ်ကို ထူးခြားပြီး ဝိညာဉ်စွမ်းအားတွေ ပြည့်နှက်နေတဲ့ ဂြိုလ်ပါလား”
“သနားစရာကောင်းတဲ့ ပုရွက်ဆိတ်လေးတွေ... နှစ်ပေါင်းသောင်းချီရုံသာ သက်တမ်းရှိတဲ့ ခဏတာ သတ္တဝါလေးတွေက ငါ့ရဲ့ အစွမ်းထက်လှတဲ့ ကံကြမ္မာလှိုင်းလုံးကြီးကို ဘယ်လိုများ ခုခံနိုင်ပါ့မလဲ”
သွေးစက်လက်ကျနေသော မျက်လုံးပေါင်း သောင်းချီတို့၏ အရှင်သခင်က အားရပါးရဖြင့် ရယ်မောလိုက်တော့သည်။ ၎င်းသည် ချက်ချင်းဆိုသလို ဆင်းသက်လာနိုင်ခြင်း မရှိသေးသော်လည်း ပွင့်ထွက်သွားသော ကောင်းကင်ယံကြီးကိုမူ မည်သို့မျှ ပြန်လည်ဖာထေး၍ မရနိုင်တော့ချေ။
ဤဂြိုလ်ကြီး၏ ကံကြမ္မာက ၎င်း၏ သွေးပင်လယ်အတွင်း၌သာ နစ်မြုပ်ရပေတော့မည်။
အရူးအမူး ရယ်မောသံများ ကြားထဲမှပင် ကောင်းကင်ယံထက်မှ သွေးပုပ်ကဲ့သို့ မည်းနက်ညစ်ညမ်းသော အရည်များ စီးကျလာသည်။ ထိုအရည်များသည် နဝမမြောက် ကောင်းကင်ဘုံမှ တည့်တည့်မတ်မတ် ကျဆင်းလာခြင်းဖြစ်ပြီး တစ်ချက်မျှ ကြည့်ရုံရုံဖြင့်ပင် ရွံရှာပျို့အန်ချင်စရာကောင်းသော အငွေ့အသက်များ ပြည့်နှက်နေသည်။
ယဲ့ဖျင်နှင့် နတ်ဘုရားသတ်တပ်ဖွဲ့ဝင် ၁၄ ဦးတို့၏ မျက်နှာများမှာ အထူးပင် တည်ကြည်လေးနက်သွားကြသည်။
“ကောင်းကင်ကြီး ပေါက်သွားပြီ...”
“ကောင်းကင်ယံကို အတွင်းဘက်ကနေ ဖျက်ဆီးလိုက်တာပဲ”
ရွှီရန်က အံ့အားသင့်စွာဖြင့် “ကောင်းကင်ယံ ဟုတ်လား” ဟု မေးလိုက်သည်။
လင်ဖုန်းက လေးနက်သော လေသံဖြင့် ရှင်းပြသည် “ဟုတ်တယ်။ ကောင်းကင်ယံဆိုတာ ကမ္ဘာမြေရဲ့ အကာအကွယ် ဒိုင်းလွှားနဲ့ အတူတူပဲ။ ပါရမီရှင်တွေ တိုက်ခိုက်နေကြတဲ့ တစ်ပါးဂြိုလ် စစ်တလင်းက ဘေးကင်းဇုန်ဆိုတာလည်း ဒီဒိုင်းလွှားရဲ့ အစိတ်အပိုင်းတစ်ခုပဲ။ ဒီဒိုင်းလွှား ရှိနေသရွေ့ နတ်ဘုရားအဆင့်အထက်မှာရှိတဲ့ မိစ္ဆာတွေက ဘေးကင်းဇုန်ထဲကို ခြေတစ်လှမ်းတောင် မချနိုင်ကြဘူး။ နတ်ဘုရားအဆင့်အောက်က မိစ္ဆာတွေက ဘေးကင်းဇုန်ထဲကို ကျူးကျောဝင်ရောက်နိုင်ပေမဲ့ သူတို့လည်းပဲ အမြဲတမ်း ပြန်နှင်ထုတ်ခံရတာပဲ”
“ကောင်းကင်ယံဆိုတာ ကမ္ဘာမြေရဲ့ ခိုင်ခံ့လှတဲ့ ဒိုင်းလွှားပေါ့”
“ဒါပေမဲ့ အခုတော့ အဲဒီဒိုင်းလွှားမှာ အပေါက်ကြီးတစ်ခု ပွင့်သွားပြီ”
“ဒါက ကပ်ဘေးအဆင့်ထက် သာလွန်တဲ့ နတ်ဘုရားအဆင့် မိစ္ဆာတစ်ကောင်ရဲ့ လက်ချက်ဖြစ်ရမယ်။ သူက ကမ္ဘာမြေထဲကို ညစ်ညမ်းမှုတွေ ထိုးသွင်းနေတာ။ ကမ္ဘာမြေရဲ့ ညစ်ညမ်းမှု အတိုင်းအတာက စစ်တလင်းက ညစ်ညမ်းဧရိယာတွေနဲ့ အတူတူ ဖြစ်သွားတဲ့အချိန်ကျရင် ဒီဒိုင်းလွှားကြီး တစ်ခုလုံး ပျက်စီးသွားလိမ့်မယ်”
“အဲဒီအခါကျရင်တော့ နတ်ဘုရားအဆင့် မိစ္ဆာတွေက ကမ္ဘာမြေထဲကို စိတ်တိုင်းကျ အလုံးအရင်းနဲ့ ဝင်လာကြတော့မှာ...”
ရွှီရန် စဉ်းစားခန်း ဝင်သွားသည်။
ဒါက သလင်းကျောက် အကာအကွယ် ယန္တရားမျိုးလား။
သူ နားလည်နိုင်ပါသော်လည်း တစ်ခုကိုမူ အလွန်သိချင်နေမိသည်။
“ဒီဒိုင်းလွှားက ဘယ်လိုဖြစ်လာတာလဲ ဒီလို နတ်ဘုရားအဆင့် ရတနာမျိုးကို ကမ္ဘာမြေက ဖန်တီးနိုင်တာ မဟုတ်ဘူး ထင်တယ်”
ရင်ကျပ်လှပသော အမျိုးသမီးကြီး ရှောင်ရွှေးက သက်ပြင်းတစ်ချက်ချရင်း “ဟူး... လျှို့ဝှက်ချက်တစ်ခု ငါပြောပြမယ်”
“တစ်ခါတုန်းက... ကမ္ဘာမြေကြီး ပျက်စီးတော့မယ့် ဘေးနဲ့ ရင်ဆိုင်ခဲ့ရစဉ်မှာ ထောင်သောင်းမကသော ဆန္ဒများနတ်ပေးစွမ်းရည် ပိုင်ဆိုင်တဲ့ စီနီယာတစ်ဦးက နှစ်ပေါင်းသောင်းချီ အသက်ရှိတဲ့ အမတစီနီယာတစ်ဦးနဲ့ ပူးပေါင်းခဲ့ကြတယ်။ သူတို့က ထောင်သောင်းမကတဲ့ ဆန္ဒရှိသူတွေရဲ့ ကံကြမ္မာနဲ့အတူ နှစ်ပေါင်းသောင်းချီ အမတစီနီယာရဲ့ တစ်သက်တာ သက်တမ်းတစ်ခုလုံးကို လိုလိုလားလား ယဇ်ပူဇော်ခဲ့ကြတယ်။ တစ်ချိန်တည်းမှာပဲ ဟွာရှက ကျင့်ကြံသူပေါင်း သောင်းနဲ့ချီကလည်း ဒီအကာအကွယ် ဒိုင်းလွှားကြီးကို တည်ဆောက်ဖို့အတွက် အသက်ပေးခဲ့ကြတာ...”
“ဒီဒိုင်းလွှားကြီး တည်ရှိခဲ့တာ နှစ်ပေါင်း ၁၈၀ တောင် ရှိပြီ။ ငါတို့ကတော့ ဒါကြီးကို ကျောက်ဆောင်တစ်ခုလို ခိုင်ခံ့နေမယ်လို့ ထင်ထားခဲ့တာ။ ဒါပေမဲ့ မမျှော်လင့်ဘဲ အတွင်းဘက်ကနေ တိုက်စားခံရပြီး အပေါက်ကြီး ဖြစ်သွားလိမ့်မယ်လို့ ဘယ်သူက ထင်မှာလဲ”
ရှောင်ရွှေး၏ လေသံမှာ အထူးပင် လေးလံနေတော့သည်။
ထိုခေတ်က ရှေ့ဆောင်စီနီယာများသည် နောက်နောင်နှစ်ပေါင်း ၁၈၀ ကြာ ရှင်သန်ခွင့်ရရှိရေးအတွက် သူတို့ကိုယ်ကို စတေးခဲ့ကြရခြင်းပင်။
သို့သော် ယခုအခါတွင်မူ ထိုဒိုင်းလွှားကြီးမှာ တစ်ပါးဂြိုလ်မိစ္ဆာ၏ ဖောက်ထွင်းဖျက်ဆီးခြင်းကို ခံလိုက်ရသည်။
လျိုယန်က ဒေါသတကြီး ဆဲရေးလိုက်သည်။
“တောက်... ဒီကောင်တွေလည်း ကြီးမားတဲ့ ပေးဆပ်မှုတွေ လုပ်ခဲ့ရမှာပဲ။ ဒါပေမဲ့ အဲဒီပေးဆပ်မှုကို သူတို့က ခံနိုင်ရည်ရှိပေမဲ့ ငါတို့ကတော့ အရှုံးမခံနိုင်ဘူး”
ဖြစ်နိုင်တာက သူတို့ဘက်က တစ်ထောင်ရှုံးချိန်မှာ ငါတို့ဘက်က သုံးရာလောက် ရှုံးသွားတာပဲ။
ရွှီရန်က အတော်ပင် အံ့အားသင့်သွားပြီး “ ထောင်သောင်းမကသော ဆန္ဒများနဲ့ နှစ်ပေါင်းသောင်းချီ အမတဆိုတဲ့ အမြစ်အရိုးအမျိုးအစားတွေ တကယ်ရှိတာပဲလား... ထောင်သောင်းမကသော ဆန္ဒများဆိုတာက လူအများကြီးရဲ့ သက်တမ်းကို ဒိုင်းလွှားတစ်ခုနဲ့ လဲလှယ်လိုက်တဲ့ သဘောလား”
လင်ဖုန်းက ခေါင်းညိတ်ပြလျက် “ဟုတ်တယ် အဲဒီတုန်းက တခြားနိုင်ငံတွေကိုလည်း လူအချို့ စတေးပေးဖို့ ငါတို့ တောင်းဆိုခဲ့ဖူးတယ်။ ဒါပေမဲ့ သူတို့က သာမန်အရပ်သားတွေကိုပဲ စတေးခဲ့ကြတာ။ ဒါကြောင့်လည်း သူတို့နိုင်ငံတွေမှာ ဘေးကင်းဇုန်ဆိုတာ မရှိတာပေါ့”
ဤအချက်အလက်များကို သူတို့သည် ကောင်းကင်ဘုံထိပ်သီးနန်းဆောင်ထံမှ မကြာသေးမီကမှ သိရှိခဲ့ရခြင်းပင်။
ရွှီရန် တိတ်ဆိတ်သွားတော့သည်။
“အဲဒီစီနီယာက သူကိုယ်တိုင် အထက်တန်းစားနတ်ဘုရားဖြစ်လာဖို့ ဆုမတောင်းခဲ့ဘူးလား”
“မဖြစ်နိုင်ဘူး ဘာလို့လဲဆိုတော့ ထူးခြားတဲ့ အကြောင်းအရင်းအချို့ကြောင့် ဂြိုလ်အဆင့် အကာအကွယ်ဒိုင်းလွှားကို ဖန်တီးနိုင်ခဲ့တာပဲ။ နှမြောဖို့ကောင်းတာက ကောင်းကင်ဘုံထိပ်သီးနန်းဆောင်က အဲဒီအကြောင်းတွေကို ငါတို့ကို အကုန်အစင် မပြောပြခဲ့တာပဲ”
ရွှီရန်က မျက်ခုံးတစ်ချက် ပင့်လိုက်သည်။
“အဓိကအချက်က ငါတို့ဆီမှာ နတ်ဘုရားတစ်ပါးတောင် ပေါ်ထွန်းခြင်း မရှိသေးတာပဲ။ အခုအချိန်အထိလည်း တစ်ပါးဂြိုလ်က သတ္တဝါတွေကို တားဆီးနိုင်တဲ့ စွမ်းအားမျိုး ငါတို့ မပိုင်ဆိုင်သေးဘူး”
လေးလံလှသော သက်ပြင်းချသံများစွာ မြေပြင်ထက်သို့ လွင့်စင်ကျလာသည်။
ထိုအထဲတွင် နောင်တတရားများ၊ အဆိုးမြင်စိတ်များနှင့် မိမိကိုယ်ကိုယ် လှောင်ပြောင်သံများ ရောယှက်နေတော့သည်။
တစ်သက်တာလုံး ကြိုးစားအားထုတ်ခဲ့သော ကျင့်ကြံခြင်းတာအိုမှာ အချည်းနှီး ဖြစ်သွားခြင်းပင်။
အသက်ငါးဆယ်နီးပါး ရှိလာခဲ့ပြီဖြစ်သော်လည်း နတ်ဘုရားအဆင့်သို့ တက်လှမ်းနိုင်မည့် မျှော်လင့်ချက်အရိပ်အယောင်ကိုကား မမြင်ရသေးချေ။
နောက်ထပ်နယ်ပယ်တစ်ခုသို့ ကူးပြောင်းရန်မှာ အဆုံးမရှိသော ချောက်ကမ္ဘာကြီးတစ်ခုက ခြားနားထားသကဲ့သို့ပင်။
ထိုအချိန်တွင် သူတို့၏နိုင်ငံ၊ သူတို့၏ မွေးရပ်မြေမှာလည်း တစ်ခါဖူးမျှ မကြုံဖူးသေးသော အကျပ်အတည်းကြီးနှင့် ရင်ဆိုင်နေရပြီဖြစ်ရာ မဝေးတော့သော အနာဂတ်ကာလတွင် အစွမ်းထက်ပြီး ထူးဆန်းအံ့သြဖွယ်ကောင်းသော နတ်ဘုရားများ တစ်ပါးပြီးတစ်ပါး ဟွာရှပြည်အတွင်းသို့ ကျူးကျော်ဝင်ရောက်လာကြတော့မည်ကို မြင်ယောင်ကြည့်နိုင်သည်။
မွေးရပ်မြေမှာ ညစ်ညမ်းသွားပြီး မြင့်မြတ်သောမြေကြီးမှာလည်း နစ်မြုပ်သွားရပေလိမ့်မည်။
ရဲဘော်ရဲဘက်များမှာလည်း တစ်ဦးပြီးတစ်ဦး အသက်ပေးဆပ်ကြရမည်ဖြစ်ပြီး သူတို့မှာမူ အစွမ်းထက်လှသော နတ်ဘုရားများကို ခုခံတားဆီးနိုင်စွမ်း မရှိကြချေ။
အလွန်တရာ မျှော်လင့်ချက်မဲ့နေသော အခြေအနေပင်။
နိုင်ငံတော် ပျက်စီးပြီး လူမျိုးတုံးမည့် ဘေးအန္တရာယ်ကြီးမှာ မကြာမီကာလအတွင်း ကျရောက်တော့မည်ဖြစ်ရာ ယဲ့ဖျင်နှင့် နတ်ဘုရားသတ်တပ်ဖွဲ့ဝင် ၁၄ ဦးတို့မှာ မျက်မှောင်များကို တင်းတင်းကြုတ်ထားကြသည်။ ပြင်းထန်သော နေရောင်ခြည်မှာ သူတို့အပေါ် ကျရောက်နေသော်လည်း သူတို့မှာမူ ရေခဲရုပ်ထုများအလား အေးစက်တောင့်တင်းနေကြတော့သည်။
...
ဤကဲ့သို့သော မျှော်လင့်ချက်မဲ့ခြင်းမျိုးကို ရွှီရန်မှာမူ လုံးဝခံစားမိခြင်း မရှိချေ။
ကျင့်ကြံခြင်းကို အရူးအမူး ဇောက်ချလုပ်ကိုင်သူအဖို့ မကျော်လွှားနိုင်သော အခက်အခဲဟူ၍ မရှိပေ။
မိစ္ဆာအားလုံးမှာ နတ်ဘုရားမူလဓာတ်များသာ ဖြစ်ကြသည်။
သူသည် လက်ခုပ်တစ်ချက် တီးလိုက်ပြီး သူတို့တစ်ဦးချင်းစီအား ယုံကြည်ခြင်း ရတနာအဆောင်တစ်ခုစီ ပေးအပ်လိုက်ကာ
“အားလုံးပဲ... အားလုံးပဲ...ဦးလေးတို့တွေ အများကြီး တွေးမနေကြနဲ့တော့ ကောင်းကင်ကို မော့ကြည့်လိုက်စမ်းပါ။ အနီဖျော့ရောင် အလင်းတွေက ဖုံးအုပ်နေပြီ။ ဦးလေးတို့ ခန္ဓာကိုယ်ထဲက သွေးစွမ်းအင်တွေလည်း တဖြည်းဖြည်း အစုပ်ယူခံနေရပြီ... ဒါက ကြီးမားတဲ့ ခင်းကျင်းချက်ကြီးတစ်ခု အလုပ်လုပ်နေပြီဆိုတဲ့ သဘောပဲ”
“ကျွန်တော်တို့ အရင်ဆုံး ရန်ငြိုးဖွဲ့နတ်ဘုရား စီစဉ်ထားတဲ့ ယဇ်ပလ္လင်ကို ဖျက်ဆီးပစ်ဖို့ လိုတယ်။ မဟုတ်ရင် နောက်တစ်ကြိမ် လေဆာတိုက်ခိုက်မှုက ပိုပြီး ပြင်းထန်လာနိုင်သလို ဟောင်းလောင်းပေါက်ကြီးကလည်း ပိုပြီး ကြီးသွားလိမ့်မယ်”
ရွှီရန်သည် အားလုံးကို မျှော်လင့်ချက်မဲ့နေသော အခြေအနေမှ ဆွဲထုတ်လိုက်သည်။
“ကောင်းကင်မှာ ပေါက်သွားတဲ့ကိစ္စကိုတော့ ခင်းကျင်းချက်ကို ဖျက်ဆီးပြီးမှ ဘယ်လိုပြန်ပိတ်ရမလဲဆိုတာ နည်းလမ်းရှာကြတာပေါ့”
“ကျွန်တော့် ခန့်မှန်းချက်အရတော့ ဒိုင်းလွှားအပြင်ဘက်က နတ်ဘုရားအဆင့် မိစ္ဆာတွေဟာ ကမ္ဘာမြေထဲကို ချက်ချင်းကြီး ဝင်လာနိုင်ဦးမှာ မဟုတ်ပါဘူး။ ကျွန်တော်တို့ဆီမှာ အချိန်ရှိပါသေးတယ်”