ကောင်းကင်အောက် နံပါတ်တစ် တိုက်ပွဲ

ချင်းရှောင်ဂိုဏ်း၏ အပြာရောင်ဝတ်ရုံကို ဝတ်ဆင်ထားသော ရှန်ယွဲ့က ကျယ်ဝန်းသော လှေကားထစ်များပေါ်သို့ လျှောက်တက်သွားရာ ချင်းရှောင်ဂိုဏ်း တပည့်တစ်စုက အနီးကပ် လိုက်ပါသွားကြသည်။ အောက်သို့ ငုံ့ကြည့်လိုက်လျှင် သိုင်းလောကမှ လူများစွာလည်း နောက်မှ လိုက်ပါလာကြသည်ကို မြင်တွေ့နိုင်သည်။

ထိုသိုင်းလောကသားများမှာ ပွဲဝင်ကြည့်ရန် ရောက်လာကြခြင်းသာ ဖြစ်၏။ ချင်းရှောင်ဂိုဏ်းက အလွယ်တကူ လက်လျှော့မည် မဟုတ်ကြောင်း ၎င်းတို့ ခန့်မှန်းထားကြပြီး မျှော်လင့်ထားသည့်အတိုင်း ဓားနတ်ဘုရား ကိုယ်တိုင် ရောက်လာသည်ကို မြင်တွေ့ရသဖြင့် အလွန်အမင်း စိတ်လှုပ်ရှားနေကြသည်။

ဤကျယ်ဝန်းသော လှေကားတွင် အထစ်ပေါင်း တစ်ရာကျော် ရှိပြီး ထျန်းရွှမ်တောင်၏ တောင်တံခါးဆီသို့ ဦးတည်နေသည်။ တောင်တံခါးမှာ မြင့်မားမတ်စောက်စွာ တည်ရှိနေပြီး ထျန်းရွှမ်ကျိန့်ကျုံး ဟူသော စာလုံးလေးလုံးကို ရဲရင့်သော စုတ်ချက်များဖြင့် ရေးထွင်းထားသည့် ဆိုင်းဘုတ်တစ်ခု ရှိကာ သန့်စင်သောနယ်မြေ၏ ကြွယ်ဝသော အမွေအနှစ်ကို ပြသနေ၏။

ထျန်းရွှမ်တောင် တပည့် ဒါဇင်ပေါင်းများစွာသည် တောင်တံခါးအောက်တွင် စုရုံးနေကြပြီ ဖြစ်သည်။

ထျန်းရွှမ်တောင်သည် လောကီနယ်ပယ်နှင့် များစွာ ကင်းကွာနေပြီး ထိုနေရာတွင် ဉာဏ်ပညာ ကြီးမားသူများ သိပ်မများလှသော်လည်း ကြွယ်ဝသော သမိုင်းဝင် အမွေအနှစ်များ ရှိနေသည်။ တောင်ပေါ်တွင် ဉာဏ်ပညာ ကြီးမားသူ သုံးလေးရာခန့် ရှိသော်လည်း ခမ်းနားထည်ဝါသော ထျန်းရွှမ်တောင်ကြီးနှင့် ယှဉ်လျှင် ဤအရေအတွက်မှာ တောင်ကြီး၏ ခြောက်ကပ်မှုကို ဖယ်ရှားရန် မလုံလောက်ချေ။

ထျန်းရွှမ်တောင် တပည့်များ၏ အကြည့်အားလုံးက ရှန်ယွဲ့အပေါ်သို့ ကျရောက်သွားကြပြီး ၎င်းတို့၏ အမူအရာများမှာ ရှုပ်ထွေးနေကြသည်။

ရှန်ယွဲ့က ဓားကို ဆွဲမထုတ်ထားသော်လည်း လှုပ်ရှားမှုများက ထက်မြက်ပြီး တောက်ပနေသော ဓားတစ်လက်နှင့် တူနေကာ ဤအရည်အသွေးမျိုးမှာ လီရန်၊ ယန်တုန်းနှင့် အခြားသူများထံတွင် မရှိခဲ့သော အရာဖြစ်သည်။

ထျန်းရွှမ်တောင်သည် လောကီနယ်ပယ်နှင့် ကင်းကွာနေသဖြင့် သိုင်းလောကအကြောင်း သတင်းအချက်အလက်ရရှိမှု အတော်လေး နှေးကွေးသည်။ သို့သော်လည်း ထိုသို့ နှေးကွေးမှုကြောင့်ပင် ဓားနတ်ဘုရားဟူသော အမည်နာမ၏ ကျန်ရစ်နေသော အရှိန်အဝါက ၎င်းတို့၏ နှလုံးသားများကို လွှမ်းမိုးထားဆဲပင်။

ဤသူသည် လွန်ခဲ့သော နှစ်တစ်ရာအတွင်း သိုင်းပညာ ဒဏ္ဍာရီနှင့် အနီးစပ်ဆုံးသူ ဖြစ်ပြီး တစ်ချိန်က အငြင်းပွားဖွယ်မရှိသော ကောင်းကင်အောက် နံပါတ်တစ် ဖြစ်ခဲ့ဖူးသည်။

လီချင်းချိုးမှာ အလွန် အစွမ်းထက်သော်လည်း လူအများစုအတွက် သူ့နာမည်မှာ အသစ်လွန်းနေသေးသည်။ ရှန်ယွဲ့မှာမူ ကွာခြားသည်။ သူသည် ဆယ်စုနှစ်များစွာကြာ သိုင်းလောကတွင် လေးစားလောက်သော အင်အားစုတစ်ခု ဖြစ်ခဲ့သည်။ သူ့ရဲ့ ကောင်းကင်အောက် နံပါတ်တစ် ဟူသော ဂုဏ်ပုဒ်မှာ လူအများ၏ စိတ်နှလုံးနှင့် ပိုမို ကိုက်ညီနေပေသည်။ ရှန်ယွဲ့ ချင်းရှောင်ဂိုဏ်းသို့ ဝင်ရောက်လာခြင်းကြောင့်ပင် ချင်းရှောင်ဂိုဏ်းရှိ ကောင်းကင်အောက် နံပါတ်တစ် ဟူသော ဂုဏ်ပုဒ်ကို လူအများက ပိုမို အသိအမှတ်ပြုလာကြခြင်း ဖြစ်သည်။

ထျန်းရွှမ်တောင် တပည့်များ အားလုံးမှာ ရှန်ယွဲ့ အဘယ်ကြောင့် ရောက်လာကြောင်းကို သိရှိထားကြပြီး ဤတိုက်ပွဲအတွက် စိတ်လှုပ်ရှားမှုရော စိုးရိမ်ပူပန်မှုပါ ဖြစ်နေကြသည်။

အကယ်၍ ဂိုဏ်းချုပ်က ရှန်ယွဲ့ကို မယှဉ်နိုင်ခဲ့လျှင် သိုင်းပညာအပေါ် ၎င်းတို့၏ နောက်ဆုံးကျန်ရှိနေသော ယုံကြည်မှုလေး ပြိုလဲသွားပေလိမ့်မည်။

သို့သော်လည်း ယန်တောက်ကျုံး၏ ခွန်အားကို တွေးမိသောအခါ ၎င်းတို့၏ မျက်လုံးများတွင် စိတ်ထက်သန်မှုများ လင်းလက်သွားကြပြန်သည်။

အကယ်၍ သူတို့သာ ဓားနတ်ဘုရားကို အနိုင်ယူနိုင်ခဲ့လျှင် ယန်တောက်ကျုံးမှာ လောကတွင် ဒုတိယ အကောင်းဆုံး ဖြစ်လာမည် ဖြစ်ပြီး ကောင်းကင်အောက် နံပါတ်တစ် နေရာအတွက်ပင် ယှဉ်ပြိုင်နိုင်ပေလိမ့်မည်။

လီချင်းချိုးကိုပါ အနိုင်ရခဲ့လျှင်တော့...

ထျန်းရွှမ်တောင် တပည့်များမှာ ပို၍ စိတ်လှုပ်ရှားလာကြပြီး ၎င်းတို့၏ မျက်လုံးများက ရှန်ယွဲ့နှင့် အခြားသူများထံတွင် စူးစိုက်နေကြသည်။

ချင်းရှောင်ဂိုဏ်း တပည့်များမှာလည်း ရှန်ယွဲ့အပေါ် ယုံကြည်မှု အပြည့် ရှိနေကြပြီး ယန်တောက်ကျုံး ရှုံးနိမ့်သွားသည်ကို မြင်တွေ့ရန် မစောင့်နိုင်အောင် ဖြစ်နေကြသည်။

ထိုစဉ် ဓားကျင့်စဉ်အကြီးအကဲက တောင်တံခါးနောက်ဘက်ရှိ လှေကားထစ်များပေါ်တွင် ပေါ်လာ၏။ သူက အဝေးမှနေ၍ ရှန်ယွဲ့ကို လက်မြှောက် အရိုအသေပေးကာ….

"စီနီယာရှန်... ကျွန်တော်တို့ရဲ့ ဂိုဏ်းချုပ်က ချိုးတောက်ချောက်ကမ်းပါးမှာ သင့်ကို စောင့်နေပါပြီ... ကျွန်တော့်နောက်ကို လိုက်ခဲ့ပါ..."

ရှန်ယွဲ့က ခေါင်းအနည်းငယ် ညိတ်ပြလိုက်ပြီးမှ ဓားကျင့်စဉ်အကြီးအကဲလည်း လှည့်ထွက်သွားတော့သည်။

ချိုးတောက်ချောက်ကမ်းပါးမှာ တောင်နောက်ဘက်တွင် တည်ရှိပြီး လူစုတစ်ခုလုံး ထိုနေရာသို့ ရောက်ရန် အမွှေးတိုင် တစ်ဝက်ခန့် အချိန်ယူခဲ့ရသည်။

ချင်းရှောင်ဂိုဏ်း တပည့်များလည်း တောအုပ်ထဲမှ ထွက်လာကြရာ ထိပ်တွင် ချောက်ကမ်းပါးတစ်ခုရှိသော တောင်စောင်းတစ်ခုနှင့် ရင်ဆိုင်လိုက်ရသည်။

ယန်တောက်ကျုံးက ချောက်ကမ်းပါးပေါ်တွင် ၎င်းတို့ကို ကျောခိုင်း၍ ရပ်နေသည်။

ခြေသံများကို ကြားလိုက်ရသဖြင့် ယန်တောက်ကျုံး လှည့်ကြည့်လိုက်ရာ နှစ်ဘက်လူများမှာ ပေတစ်ရာနီးပါး ကွာဝေးနေသည်။

ယန်တောက်ကျုံး၏ အကြည့်က ရှန်ယွဲ့အပေါ်သို့ ချက်ချင်း ကျရောက်သွား၏။ ထိုသူမှာ ရှန်ယွဲ့ဖြစ်ကြောင်း အလိုအလျောက် သိစိတ်က ပြောနေပြီး ထိုကြောက်မက်ဖွယ်ကောင်းသော ဓားဆန္ဒကို လုံးဝ ဖုံးကွယ်ထား၍ မရနိုင်ချေ။

တစ်ချက်ကြည့်လိုက်ရုံဖြင့်ပင် ယန်တောက်ကျုံးမှာ စိတ်ထဲတွင် သက်ပြင်းမချဘဲ မနေနိုင်တော့ချေ။

"ဓားနတ်ဘုရားဆိုတဲ့အတိုင်း သူ့ရဲ့ နာမည်ဂုဏ်သတင်းက တကယ်ပဲ ထိုက်တန်ပါပေတယ်..." ဟု စိတ်ထဲမှ တွေးလိုက်မိသည်။

ရှန်ယွဲ့က လက်မြှောက်၍ တပည့်များကို ရပ်တန့်ရန် အချက်ပြလိုက်ပြီး ချိုးတောက်ချောက်ကမ်းပါးပေါ်ရှိ ယန်တောက်ကျုံးဆီသို့ တစ်ယောက်တည်း လျှောက်သွားလိုက်သည်။

သူတို့၏ အကြည့်များက ပေရာချီ အကွာအဝေးမှနေ၍ အကြည့်ချင်းဆုံသွားကြပြီး စကားတစ်ခွန်းမှ ပြောစရာ မလိုဘဲ တစ်ယောက်၏ တိုက်ခိုက်လိုစိတ်ကို အခြားတစ်ယောက်က ခံစားမိနေကြသည်။

တောအုပ်ထဲမှ ထွက်လာကြသော သိုင်းလောကသားများလည်း ချက်ချင်းပင် စိတ်လှုပ်ရှားသွားကြသည်။

"ရောက်ရောက်ချင်းပဲ တိုက်ပွဲစကြတော့မလို့လား..."

"ဒါက ပြိုင်ဘက်ကင်း အရှင်သခင် တစ်ယောက်ရဲ့ ပုံစံပဲ... တစ်ချက် ကြည့်လိုက်ရုံနဲ့ တစ်ယောက်ရဲ့ တိုက်ခိုက်လိုစိတ်ကို တစ်ယောက်က သိနိုင်တယ်... လီချင်းချိုးသာ မရှိဘူးဆိုရင် ဒါက ကောင်းကင်အောက် နံပါတ်တစ် နေရာအတွက် တိုက်ပွဲ ဖြစ်လာမှာ သေချာတယ်..."

"ဟုတ်တယ်... ဒီနေ့ခေတ် သိုင်းလောကကို ကြည့်မယ်ဆိုရင် ချင်းရှောင်ဂိုဏ်းကို ယှဉ်နိုင်တာ ထျန်းရွှမ်တောင် တစ်ခုပဲ ရှိတော့တယ်... ဒီယန်တောက်ကျုံးက သမိုင်းမှာ အရင်က မရှိခဲ့ဖူးတဲ့ ပါရမီရှင်တစ်ယောက်လို့ ပြောကြတယ်... သူသာ နိုင်သွားရင် ချင်းရှောင်ဂိုဏ်းက လီချင်းချိုး တစ်ယောက်ပဲ သူ့ကို ကောင်းကင်အောက် နံပါတ်တစ် နေရာကို ရောက်မလာအောင် တားနိုင်တော့မှာ..."

"ဓားနတ်ဘုရားကလည်း သာမန်လူတော့ မဟုတ်ဘူး... သူသာ လီချင်းချိုးနဲ့ မတွေ့ဘဲ ကွယ်လွန်သွားခဲ့မယ်ဆိုရင် နောင်လာနောက်သားတွေက သူ့ကို သိုင်းပညာ ဒဏ္ဍာရီလို့ ခေါ်ကြမှာပဲ..."

"ရှန်ယွဲ့က လူသတ်တာ နည်းလွန်းလို့ လူတွေက သူ့ကို သိုင်းပညာ ဒဏ္ဍာရီရဲ့ လွှမ်းမိုးနိုင်တဲ့ စိတ်ဓာတ်မျိုး မရှိဘူးလို့ ထင်နေကြတာ... လွန်ခဲ့တဲ့ နှစ်တစ်ရာက သိုင်းပညာ ဒဏ္ဍာရီတွေက သွေးချောင်းစီးမှုတွေကနေတစ်ဆင့် သူတို့ရဲ့ ဂုဏ်သတင်းကို ရယူခဲ့ကြတာလေ..."

ချင်းရှောင်ဂိုဏ်း တပည့်များနှင့် ထျန်းရွှမ်တောင် တပည့်များမှာလည်း အချင်းချင်း ဆွေးနွေးနေကြပြီး ယန်တောက်ကျုံးထံ ရှန်ယွဲ့ ချဉ်းကပ်သွားသောအခါ အားလုံး စိုးရိမ်တကြီး ဖြစ်လာကြသည်။

ဓားကျင့်စဉ်အကြီးအကဲက တောအုပ်အစပ်တွင် တစ်ယောက်တည်း ရပ်နေပြီး ရှန်ယွဲ့နှင့် ယန်တောက်ကျုံးတို့ကို ကြည့်နေသော သူ့ရဲ့ မျက်နှာမှာ မည်းမှောင်နေသည်။

"ကျစ်... ကိစ္စတွေက ဒီလောက်ထိ ကြီးကျယ်သွားရတယ်လို့..."

ဘယ်သူ နိုင်သည်ဖြစ်စေ ရှုံးသည်ဖြစ်စေ ဤအရာမှာ ဓားကျင့်စဉ်အကြီးအကဲ မြင်တွေ့လိုသော အခြေအနေ မဟုတ်ချေ။

"ယန်တောက်ကျုံး... မင်းက သိုင်းလောကမှာ လမ်းစဉ်သို့ ဝင်ရောက်နိုင်ခဲ့တဲ့ တစ်ဦးတည်းသော သိုင်းပညာရှင်ပဲ... မင်းရဲ့ ပါရမီနဲ့ နားလည်သဘောပေါက်နိုင်စွမ်းကို ယှဉ်နိုင်မယ့်သူ မရှိဘူး... မင်းက ထျန်းရွှမ်တောင်ပေါ်မှာပဲ နေမယ်ဆိုရင်တော့ နှမြောစရာပဲ..."

ရှန်ယွဲ့၏ အသံ ရုတ်တရက် ထွက်ပေါ်လာပြီး ချိုးတောက်ချောက်ကမ်းပါး တစ်ခွင်လုံး ပဲ့တင်ထပ်သွားကာ လူတိုင်း ရှင်းလင်းစွာ ကြားနိုင်လောက်အောင် ကျယ်လောင်ပြတ်သားနေသည်။

"ကျွန်တော့်အတွက်တော့ သစ်ရွက်တစ်ရွက်တည်းကနေ ဆောင်းဦးရာသီ တစ်ထောင်ကို မြင်နိုင်သလို တောင်တစ်လုံးတည်းကနေ ကောင်းကင်နဲ့ မြေကြီးရဲ့ အနှစ်သာရကို သိနိုင်ပါတယ်... ဘယ်နေရာမှာပဲ ရှိနေရှိနေ အားလုံး အတူတူပါပဲ..."ဟု ယန်တောက်ကျုံးက ပြန်ဖြေလိုက်သည်။

သူ့လေသံမှာ ဓားကျင့်စဉ်အကြီးအကဲနှင့် ရင်ဆိုင်ရစဉ်ကကဲ့သို့ အေးစက်စက် မဟုတ်ဘဲ ဓားနတ်ဘုရားအပေါ် လေးစားမှုကို ပြသနေသည်။

သူ အလွန် ငယ်ရွယ်စဉ်ကတည်းက ဆရာသခင်က ရှန်ယွဲ့အကြောင်း ပြောပြသည်ကို သူ ကြားဖူးခဲ့ပြီး ဆရာသခင်၏ စကားများမှာ ချီးကျူးမှုများဖြင့် ပြည့်နှက်နေသည်ကို သူ ယခုတိုင် ကွက်ကွက်ကွင်းကွင်း မှတ်မိနေသေးသည်။

ရှန်ယွဲ့ကို အနိုင်ယူခြင်းက သူ့ရဲ့ သိုင်းပညာ မည်မျှ အစွမ်းထက်ကြောင်း သက်သေပြရုံသာမက သူ့ရဲ့ဆန္ဒကိုပါ ပြည့်ဝစေမည် ဖြစ်သည်။

အဘယ်ကြောင့်ဆိုသော် သူ့ရဲ့ ဆရာသခင်က သူ ရှန်ယွဲ့ကို စိန်ခေါ်မည့်နေ့ကို မြင်တွေ့ချင်ခဲ့သော်လည်း အခွင့်အရေး မရခဲ့သောကြောင့်ပင်။

"ယန်တောက်ကျုံး... ငါတို့ လောင်းကြေးတစ်ခု လုပ်ကြမလား..."

ရှန်ယွဲ့က ထပ်ပြောလိုက်သော်လည်း ခြေလှမ်းများမှာ ယန်တောက်ကျုံးထံသို့ ပို၍ နီးကပ်သွားသည်အထိ တစ်ချက်မျှ မတုံ့ဆိုင်းသွားခဲ့ပေ။

"ဘယ်လို လောင်းကြေးမျိုးလဲ..."

"ငါ နိုင်ရင် မင်း ငါနဲ့အတူ တောင်ပေါ်က ဆင်းပြီး ချင်းရှောင်ဂိုဏ်းထဲ ဝင်ရမယ်... ငါ ရှုံးရင် ငါ့ရဲ့ ဓားဆန္ဒ အပါအဝင် ငါ တတ်ကျွမ်းသမျှ ပညာအားလုံးကို ထျန်းရွှမ်တောင်ပေါ်မှာ ထားခဲ့မယ်..."

ထိုစကားကို ကြားသောအခါ ချင်းရှောင်ဂိုဏ်း တပည့်များ၊ ထျန်းရွှမ်တောင် တပည့်များနှင့် သိုင်းလောကသားများအားလုံး အုတ်အော်သောင်းနင်း ဖြစ်သွားကြပြီး ရှန်ယွဲ့က ဤမျှ ကြီးမားသော လောင်းကြေးမျိုးကို ပြုလုပ်ရဲလိမ့်မည်ဟု မည်သူမျှ မထင်မှတ်ထားခဲ့ကြပေ။

ဤသည်က ရှန်ယွဲ့၏ အကြွင်းမဲ့ ယုံကြည်မှုကို ပြသနေခြင်းလည်း ဖြစ်သည်။

"ကောင်းပြီ..."

ယန်တောက်ကျုံးကလည်း မဆိုင်းမတွ သဘောတူလိုက်သည်။ သူ့အဖြေမှာ ခိုင်မာပြတ်သားလှပြီး သူ့ရဲ့ ဆုံးဖြတ်ချက်နှင့် ယုံကြည်မှုကို လူတိုင်း ခံစားသွားရစေသည်။

ထျန်းရွှမ်တောင် တပည့်များကတော့ စိုးရိမ်ပူပန်သွားကြသည်။ဤလောင်းကြေးက တရားမျှတမှု မရှိဟု ၎င်းတို့ ခံစားရသည်။ အကယ်၍ ချင်းရှောင်ဂိုဏ်း ရှုံးနိမ့်ခဲ့လျှင် ဓားနတ်ဘုရား၏ အမွေအနှစ်များကိုသာ ဆုံးရှုံးရမည် ဖြစ်သော်လည်း ၎င်းတို့ ရှုံးနိမ့်ခဲ့လျှင်မူ ဂိုဏ်းချုပ်ကို ဆုံးရှုံးရမည် ဖြစ်သည်။

သို့သော်လည်း ၎င်းတို့ ဝင်ရောက် မဟန့်တားနိုင်မီမှာပင် ရှန်ယွဲ့က ခါးမှ ဓားကို ဆွဲထုတ်လိုက်ရာ ရှင်းလင်းပြတ်သားသော ဓားအသံက လောကတစ်ခုလုံး ပဲ့တင်ထပ်သွားတော့သည်။

သစ်သားဓားတစ်လက်မှ သံမဏိဓားတစ်လက်၏ အသံမျိုး ထွက်ပေါ်လာသဖြင့် လူတိုင်း ထိတ်လန့်တကြား စိုက်ကြည့်နေကြသည်။

ရှန်ယွဲ့ ချောက်ကမ်းပါးထက်သို့ ပြေးတက်သွားရာ သူ့ရဲ့ အမြန်နှုန်းမှာ ပုံရိပ်ယောင်များ ကျန်ရစ်ခဲ့သည်အထိ မြန်ဆန်လာသည်။

ယန်တောက်ကျုံးကလည်း ဓားကို ဆွဲထုတ်၍ တောင်စောင်းအောက်သို့ ပြေးဆင်းလာနေပြီ။

သူ လှုပ်ရှားလိုက်သည်နှင့် တစ်ပြိုင်နက် ရှန်ယွဲ့၏ အမြန်နှုန်းက ရုတ်တရက် ပိုမြန်လာသည်။

ဤသို့ဖြင့် သူတို့ နှစ်ဦး ငှက်နှစ်ကောင်ကဲ့သို့ မယုံနိုင်လောက်အောင် အမြန်နှုန်းဖြင့် ဝင်တိုက်မိသွားကြလေသည်။

ချွင်...

ဓားနှစ်လက် ထိခိုက်မိသွားပြီး အစွမ်းထက်သော ဓားစွမ်းအင် နှစ်ခု ထွက်ပေါ်လာကာ ချောက်ကမ်းပါးများကို တုန်လှုပ်သွားစေပြီး ပေတစ်ရာ အကွာရှိ သစ်ပင်များပင် လေပြင်းကြောင့် နောက်သို့ လွင့်ထွက်သွားကြသည်။

သူတို့ နှစ်ဦး၏ အရှိန်အဝါက လူတိုင်းကို ကြီးမားလှသော ဖိနှိပ်မှု ခံစားချက်ကို ယူဆောင်လာပေးနေသည်။

၎င်းကို မြင်သောအခါ လီရန်မှာ စိတ်ထဲတွင် အံ့အားသင့်သွားပြီး အသက်ရှူရပ်လုနီးပါး ထိတ်လန့်သွားတော့သည်။ အခြားသူများကလည်း လှိုင်းဒဏ်မှ ကာကွယ်ရန် ၎င်းတို့၏ လက်နက်များကို အလျင်အမြန် အသုံးပြုလိုက်ကြရသည်။

အားလုံး စောင့်ကြည့်နေစဉ်မှာပင် ရှန်ယွဲ့နှင့် ယန်တောက်ကျုံးတို့မှာ တစ်ပြိုင်နက်တည်း လေထဲသို့ ခုန်ထွက်သွားကြပြီး ဓားအလင်းတန်း နှစ်ခုအဖြစ် ပြောင်းလဲကာ လေထဲတွင် မည်သူမျှ သေချာ မမြင်နိုင်လောက်အောင် မြန်ဆန်သော အမြန်နှုန်းဖြင့် အကြိမ်ကြိမ် ဝင်တိုက်မိနေကြသည်။

ထိုနှစ်ဦးမှာ အပေါ်သို့ ပျံတက်သွားလိုက်၊ ပြန်ဆင်းလာလိုက်နှင့် တောင်စောင်းတွင် ဖုန်တိမ်တိုက် တစ်ခုပင် ဖြစ်ပေါ်လာစေခဲ့သည်။ မြေပြင်ပေါ်တွင် အက်ကွဲကြောင်းများ ပေါ်လာပြီး ဖုန်မှုန့်များ နေရာအနှံ့ လွင့်စင်သွားသည်။

ရှန်ယွဲ့က ဓားကို သွက်လက်စွာ ဝှေ့ယမ်းလိုက်ရာ ဓား၏ အားအဟုန်က ယန်တောက်ကျုံးအပေါ်သို့ မုန်တိုင်းတစ်ခုကဲ့သို့ ဖိချလာသည်။

ယန်တောက်ကျုံး၏ လှုပ်ရှားမှုများမှာ မြန်ဆန်သော်လည်း ဓားရေးက ရှန်ယွဲ့နှင့် ယှဉ်လျှင် ပို၍ နှေးကွေးသည်။ သို့သော် နှေးကွေးသော ဓားသိုင်းက ရှန်ယွဲ့၏ သိုင်းကွက်တိုင်းကို ပိတ်ဆို့ ကာကွယ်နိုင်စွမ်း ရှိနေသည်။

သိုင်းကွက် ဒါဇင်ပေါင်းများစွာ အပြီးတွင် လူရိပ်နှစ်ခု ဖြတ်သန်းသွားကြသည်။ ရှန်ယွဲ့က ချိုးတောက်ချောက်ကမ်းပါးပေါ်တွင် ဆင်းသက်လိုက်ပြီး ယန်တောက်ကျုံးမှာ တောင်စောင်းအောက်သို့ ပေနှစ်ဆယ်ခန့် လျှောကျသွားကာ ဖုန်တိမ်တိုက်ကြီးတစ်ခု ထောင်းထောင်းထသွားစေခဲ့သည်။

ထိုနှစ်ဦးမှာ ကျောချင်းကပ်လျက် ရပ်နေကြပြီး ၎င်းတို့၏ ဓားဆန္ဒများကတော့ လှိုင်းထနေပြီ ဖြစ်သည်။

သိုင်းကွက် ဒါဇင်ပေါင်းများစွာဟု ဆိုသော်လည်း စောင့်ကြည့်နေသူများအဖို့မူ အသက်ရှူကြိမ် အနည်းငယ်မျှသာ ကြာမြင့်ခဲ့ပေသည်။

"အရမ်းမြန်တာပဲ..."

ယန်တုန်းက ယန်တောက်ကျုံးကို စိုက်ကြည့်နေပြီး သူ့ မျက်နှာတွင် ချွေးအေးများ စီးကျနေ၏။ ယန်တောက်ကျုံး၏ သိုင်းကွက် တစ်ကွက်ကိုပင် သူ မခုခံနိုင်ခဲ့သည်မှာ အံ့သြစရာ မဟုတ်တော့ပေ။

လီရန်သည်လည်း ရှုံးနိမ့်မှုကို ပြန်လည် အမှတ်ရသွားခဲ့သည်။နဂါးဝိညာဉ်၏ စွမ်းအားနှင့်ပင် သူသည် ယန်တောက်ကျုံး၏ သိုင်းကွက်ကို သေချာစွာ မမြင်နိုင်ခဲ့ချေ။

ဤမျှ မြန်ဆန်သော လှုပ်ရှားမှုနှင့် တိုက်ခိုက်မှု အမြန်နှုန်းကို ကာကွယ်ရန်မှာ အမှန်တကယ်ပင် ခက်ခဲလှသည်။

ကျန်းဖိန်ကတော့ စိုးရိမ်တကြီးဖြင့် ဟိုဟိုဒီဒီ ကြည့်လိုက်သည်။

တစ်စုံတစ်ခုက ၎င်းတို့ကို စောင့်ကြည့်နေသည်ဟု သူ ခံစားရပြီး ကျောချမ်းသွားစေသည်။ သူ လုပ်နိုင်သည်မှာ ရှန်ယွဲ့ မရှုံးနိမ့်စေရန် ဆုတောင်းပေးခြင်းသာ ဖြစ်သည်။အကယ်၍ ရှန်ယွဲ့သာ ရှုံးနိမ့်သွားပါက အလွန် ကြောက်မက်ဖွယ်ကောင်းသော အရာတစ်ခု ဖြစ်လာတော့မည် ဖြစ်သည်။

ရှန်ယွဲ့နှင့် ယန်တောက်ကျုံးတို့ တစ်ပြိုင်နက်တည်း လှည့်ကြည့်လိုက်ကြရာ ၎င်းတို့၏ နေရာများမှာ မတိုက်ခိုက်မီကအတိုင်း ဖြစ်သော်လည်း ယခုအခါ အရပ်မျက်နှာ ပြောင်းသွားကြခြင်းသာ ဖြစ်၏။

ယန်တောက်ကျုံးက မျက်နှာပေါ်တွင် အပြုံးတစ်ခုနှင့်အတူ ရှန်ယွဲ့ကို မော့ကြည့်လိုက်သည်။ သူက ညာဘက်လက်ဖြင့် ဓားကို မြှောက်လိုက်ရာ မျက်စိဖြင့် မြင်နိုင်သော လေပြင်းတစ်ခုက ဓားသွားတဝိုက်တွင် လည်ပတ်နေသည်။ သူ့ ဆံစများ လွင့်ဝဲနေပြီး မျက်လုံးများမှာ စိတ်လှုပ်ရှားမှုကြောင့် တောက်ပနေသည်။

ရှန်ယွဲ့က ဓားကို ကိုင်လျက် မတ်တပ်ရပ်နေပြီး ယန်တောက်ကျုံးကို ငုံ့ကြည့်နေကာ သူ့ မျက်လုံးများတွင်လည်း ထိုသို့သော စိတ်လှုပ်ရှားမှုမျိုး ရှိနေပြီး ချီးကျူးမှုများပင် ရောယှက်နေသည်။

ထိုနှစ်ဦးသည် တစ်ချိန်တည်းမှာပင် လျှပ်စီးလက်သကဲ့သို့ အမြန်နှုန်းဖြင့် တစ်ယောက်ဆီသို့ တစ်ယောက် ပြေးဝင်သွားကြပြန်သည်။ ၎င်းတို့ ရပ်နေသည့် နေရာမှ ဖုန်မှုန့်များ ထသွားသော်လည်း ဖုန်မှုန့်များ ပေဝက်ခန့်ပင် မမြင့်တက်မီမှာပင် ထိုနှစ်ဦး ထပ်မံ ဝင်တိုက်မိကြပြန်သည်။

ဤတစ်ကြိမ်တွင်မူ ၎င်းတို့ အတည်တကျ တိုက်ခိုက်နေကြပြီ ဖြစ်သည်။ ဓားစွမ်းအင်များ ထွက်ပေါ်လာပြီး ချိုးတောက်ချောက်ကမ်းပါးကို ဖျက်ဆီးပစ်တော့မည့်အလားပင်။

ချောက်ကမ်းပါးများမှာ ပိုမို ပြင်းထန်စွာ တုန်လှုပ်လာပြီး ကျောက်တုံးများက အစွန်းများမှ အဆက်မပြတ် ပြုတ်ကျလာပြီး ချင်းရှောင်ဂိုဏ်း တပည့်များ၊ ထျန်းရွှမ်တောင် တပည့်များနှင့် သိုင်းလောကသားများအားလုံး ထျန်းရွှမ်တောင် တစ်ခုလုံး တုန်ခါနေသည်ကို ခံစားလိုက်ကြရသည်။

ဘုန်း...

ရှန်ယွဲ့က ကြီးမားကျယ်ပြန့်သော ဓားချက်တစ်ချက်ကို ထုတ်လွှတ်လိုက်ရာ ယန်တောက်ကျုံးကို ပေပေါင်းများစွာ နောက်သို့ ဆုတ်သွားစေခဲ့သည်။ သူ ခြေပြန်ချမိသည်နှင့် တစ်ပြိုင်နက် ရှန်ယွဲ့က သူ့ဘေးတွင် ပေါ်လာပြီး ဓားဖြင့် အလျားလိုက် ခုတ်ပိုင်းလိုက်သည်။

ချက်ချင်းဆိုသလိုပင် ယန်တောက်ကျုံး၏ အမြန်နှုန်းက ရုတ်တရက် မြန်ဆန်လာပြီး ခန္ဓာကိုယ်ကို နောက်သို့ ကိုင်းညွတ်၍ ရှန်ယွဲ့၏ ဓားရမ်းသည့် အရှိန်ထက် ပိုမြန်သော အမြန်နှုန်းဖြင့် ရှောင်တိမ်းလိုက်သည်။ ထို့နောက် ခြေထောက်ကို လွှဲ၍ ကန်လိုက်ရာ ရှန်ယွဲ့က လက်မောင်းကို မြှောက်၍ ကာကွယ်လိုက်ရသည်။

ဘုန်း...

ရှန်ယွဲ့မှာ အကန်ခံလိုက်ရသဖြင့် လွင့်ထွက်သွားသော်လည်း လေထဲတွင် အလျင်အမြန် ဂျွမ်းပြန်၍ အားအဟုန်ကို လျှော့ချကာ ဆင်းသက်လိုက်သော်လည်း အတန်အသင့် ဝေးကွာသော နေရာအထိ လျှောတိုက်ပါသွားဆဲပင်

သူ မျက်မှောင်ကြုတ်လိုက်မိသည်။ ယန်တောက်ကျုံး၏ ခွန်အားက ဤမျှ ကြီးမားလိမ့်မည်ဟု သူ မထင်မှတ်ထားခဲ့ပေ။

ဤသူသည် ဓားသမား တစ်ယောက်ထက် အများကြီး ပိုပါပေသည်!

သူ ထပ်မတွေးနိုင်မီမှာပင် ယန်တောက်ကျုံး သူ့ထံ ရောက်ရှိလာကာ ညာဘက်လက်က ရှေ့တွင် ဓားကို ကိုင်ထားပြီး ဘယ်ဘက်လက်က ခါးမှနေ၍ မြင့်တက်လာကာ ဓားချီများက အလျားလိုက် ဖြန့်ကျက်နေပြီး လက်ဝါးစွမ်းအားများ ထုတ်လွှတ်ရန် အသင့်ဖြစ်နေသည်။

ရှန်ယွဲ့မှာ ရှောင်တိမ်းရန် အချိန်မရှိတော့ပေ။ထိုစဉ် သူ့လက်ထဲရှိ သစ်သားဓားမှ ဓားဝိညာဉ်တစ်ခု ချက်ချင်း ခုန်ထွက်လာပြီး ယန်တောက်ကျုံး၏ တားဆီးမရနိုင်သော ဓားချီကို ကာကွယ်ရန် ဓားအရိပ်တစ်ခုကို ဝှေ့ယမ်းလိုက်လေသည်။

ဘုန်း…….

သူတို့ ခြေထောက်အောက်ရှိ မြေပြင်ပေါ်တွင် အက်ကွဲကြောင်းများ အလျင်အမြန် ပေါ်လာပြီး ကျောက်စလင်းများ လွင့်စင်သွားသော်လည်း ထိုနှစ်ဦးမှာ မြေကြီးပေါ်တွင် ရပ်မနေသကဲ့သို့ မလှုပ်မယှက် ရှိနေကြသည်။

သူတို့၏ အကြည့်များ ဆုံတွေ့သွားကြပြီး တစ်ဖက်လူ၏ ခွန်အားကို အသီးသီး အံ့အားသင့်သွားကြ၏။

ယန်တောက်ကျုံးမှာ ဓားဝိညာဉ်ကို ပထမဆုံးအကြိမ် မြင်ဖူးခြင်း ဖြစ်သဖြင့် အလွန်တရာ အံ့အားသင့်သွားသည်။

ရှန်ယွဲ့ကလည်း ယန်တောက်ကျုံး၏ လက်ဝါးရိုက်ချက်တွင် တောင်များနှင့် မြစ်များကိုပင် တုန်လှုပ်စေနိုင်သော စွမ်းအားများ ပါဝင်နေပြီး ဓားဝိညာဉ်၏ စွမ်းအားကိုပင် ခံနိုင်ရည် ရှိနေကြောင်း ခံစားလိုက်ရသည်။

အကယ်၍ ဤသည်က ယန်တောက်ကျုံး လုပ်နိုင်သမျှ အားလုံးဆိုလျှင်တော့ မလုံလောက်သေးပေ!

ထိုစဉ် ရှန်ယွဲ့၏ မျက်လုံးများ ကျဉ်းမြောင်းသွားပြီး ဓားဝိညာဉ်ထံမှ ရုန်းထွက်ကာ ယန်တောက်ကျုံးထံသို့ သူ၏ ဓားကို ဝှေ့ယမ်းလိုက်သည်။

ဓားဝိညာဉ်၏ ဖမ်းချုပ်မှုကို ခံထားရသော ယန်တောက်ကျုံး၏ သူငယ်အိမ်များ ကျယ်လာပြီး ခြေကို ဆောင့်နင်းလိုက်ရာ ချောက်ကမ်းပါးကို တစ်ချက်တည်းနှင့် ကြေမွသွားစေပြီးနောက် လေထဲသို့ ခုန်တက်လိုက်သည်။ ဓားဝိညာဉ်၏ လက်ထဲရှိ ဓားအရိပ်က နောက်မှ လိုက်ပါလာပြီး တောင်ကို နှစ်ခြမ်းခွဲကာ ချိုးတောက်ချောက်ကမ်းပါး တစ်ခုလုံးကို နှစ်ခြမ်း ကွဲသွားစေခဲ့သည်။

ထိုကြောက်မက်ဖွယ်ကောင်းသော ဓားချီက အဝေးရှိ ကျင့်ကြံသူများနှင့် သိုင်းပညာရှင်များကို အကြောက်တရားများဖြင့် ပြည့်နှက်သွားစေသည်။

လေထဲတွင် ရပ်တန့်နေသော ယန်တောက်ကျုံးသည် ဆံထုံး ပြတ်တောက်သွားသည်ကို ဖျတ်ခနဲ မြင်လိုက်ရပြီး သူ့ အကြည့်က အောက်ဘက်ရှိ လူရိပ်ထံသို့ ဆွဲဆောင်ခံလိုက်ရချေပြီ။

ဓားဝိညာဉ်၏ အောက်တွင် ရပ်နေသော ရှန်ယွဲ့မှာ သာမန်မျှသာ ဖြစ်ပုံရသော်လည်း ယန်တောက်ကျုံးအပေါ် ကြီးမားသော ဖိအားများ သက်ရောက်နေစေသည်။

ထိုစဉ် လွင့်ပျံနေသော ဖုန်မှုန့်များကြားမှ ဓားအလင်းတန်းတစ်ခု ရုတ်တရက် ထိုးဖောက်ထွက်လာပြီး လမ်းတစ်လျှောက်ရှိ ကျောက်တုံးများကို ကြေမွသွားစေကာ ယန်တောက်ကျုံးထံသို့ အရှိန်အဟုန်ဖြင့် ပြေးဝင်လာပြန်သည်။

ယန်တောက်ကျုံးက ခုခံရန် ဓားကို မြှောက်လိုက်ပြီး စိတ်နှလုံးကျင့်ကြံခြင်းနည်းလမ်းကို အသက်သွင်းလိုက်သည်။ သူ၏ ကြွက်သားများနှင့် အရိုးများထဲသို့ အတွင်းအားများ ဖြည့်သွင်းလိုက်ပြီး အရိုးများကို အတွင်းအားဖြင့် ကာကွယ်ကာ ခန္ဓာကိုယ်ကို ဓားချီဖြင့် ကာကွယ်လိုက်ရသည်။

သို့သော်လည်း လေထဲတွင် ဓားအလင်းတန်း တစ်ချက် လင်းလက်သွားပြီး ယန်တောက်ကျုံးမှာ တိုက်ရိုက် ခုတ်ပိုင်းခံလိုက်ရကာ ချောက်ကမ်းပါးထဲသို့ ပြုတ်ကျသွားတော့သည်။

ထိုအခိုက်တွင် ယန်တောက်ကျုံးမှာ ခန္ဓာကိုယ်ရှိ အရိုးများအားလုံး ကျိုးပဲ့သွားသကဲ့သို့ ခံစားလိုက်ရပြီး သူ့ကို အလွန် ထိတ်လန့်သွားစေသည်။ သူက အပေါ်သို့ ခုန်တက်နိုင်စွမ်း မရှိတော့ဘဲ ကျောက်စကျောက်နများနှင့်အတူ အောက်သို့ ပြုတ်ကျသွားရုံသာ ရှိတော့သည်။

သူ ရှုံးသွားပြီ!

သူ့ကို စောင့်ကြိုနေသည်မှာ တစ်စစီ ကြေမွသွားမည့် ကံကြမ္မာပင် ဖြစ်သည်။

ဖြန်း...

ထိုစဉ် ရုတ်တရက် လက်တစ်ဖက်က သူ့ ဘယ်ဘက် လက်ကောက်ဝတ်ကို ဆွဲဖမ်းလိုက်၏။

ရှန်ယွဲ့က သူ့ ခေါင်းပေါ်ရှိ ကျောက်တုံးတစ်တုံးပေါ်တွင် ပေါ်လာပြီး သူ့ကို လက်တစ်ဖက်ဖြင့် လှမ်းဆွဲပေးထားခြင်းပင်ဖြစ်သည်။

နေရောင်ခြည်က ဖြာကျနေပြီး ယန်တောက်ကျုံးမှာ ရှန်ယွဲ့၏ မျက်နှာကို သေချာ မမြင်ရဘဲ သူ ပြောလိုက်သော စကားကိုသာ ကြားလိုက်ရ၏။

"ဒီဓားက အစက ငါတို့ ဂိုဏ်းချုပ်အတွက် သုံးဖို့ ရည်ရွယ်ထားတာ... ဒါပေမဲ့ မင်းက အဲဒါကို အတင်းထုတ်သုံးအောင် လုပ်လိုက်တာပဲ..."