အခန်း (၄၀၇-၄၀၈)
Vol. 30 Ch. 407-408
အခန်း ( ၄၀၇ ) - နောက်ဆုံးတွင် တကယ်ဖြစ်လာသော နတ်ဘုရား၏ စွမ်းအား၊ လွှမ်းမိုးနိုင်စွမ်းရှိပြီး ပြိုင်ဘက်ကင်းခြင်း
ဧကရာဇ်အဆင့်တံခါးကြီးမှာ သူတို့မျက်စိရှေ့တွင် ရှင်းလင်းစွာ ရှိနေပြီဖြစ်ရာ တာအိုကို ရယူရန် ခြေတစ်လှမ်းသာ လိုတော့သည်။
သို့သော် ဤခြေတစ်လှမ်းသည် ကောင်းကင်နှင့် မြေကြီး၏ အစွန်းနှစ်ဖက်ကို ပိုင်းခြားထားသကဲ့သို့ဖြစ်နေကာ ကျော်လွှား၍မရနိုင်သော အတားအဆီးတစ်ခု ဖြစ်နေခဲ့သည်။
ဤရှန်းဟိုင်းအဖွဲ့မှ ဧကရာဇ်တစ်ပိုင်းများအား ပို၍ ထိတ်လန့်စိုးရိမ်စေခဲ့သည်မှာ သူတို့ ဧကရာဇ်မဖြစ်နိုင်ခြင်းသည် ကောင်းကင်ဘုံအရှင်သခင်၏ အမိန့်တော်နှင့် အမှန်တကယ် ပတ်သက်နေနိုင်သလား ဟူသောအချက်ပင် ဖြစ်သည်။
ထိုသူမှ အမိန့်တစ်ခွန်း ပေးလိုက်ရုံဖြင့် သူတို့သည် တာအိုကိုရယူ၍ ဧကရာဇ်များ ဖြစ်မလာနိုင်တော့ဘူးတဲ့လော။ ဤသည်က မည်မျှ ကြီးမားလှသော စွမ်းအားမျိုးနည်း။
" ငါ မယုံဘူး... ကောင်းကင်ဘုံအရှင်သခင်က ဘယ်လောက်ပဲ အစွမ်းထက်နေပါစေ... ငါတို့ တာအိုရယူမယ့် လမ်းကြောင်းကို ဒီလိုနည်းနဲ့ ပိတ်ဆို့ပစ်ဖို့ဆိုတာ မဖြစ်နိုင်ဘူး "
ရှန်းဟိုင်းအဖွဲ့မှ ဧကရာဇ်တစ်ပိုင်းအိုကြီးမှ မကျေမနပ်ဖြင့် ပြောဆိုလိုက်၏။ သူ တာအိုမရယူနိုင်ခြင်းမှာ ကောင်းကင်ဘုံအရှင်သခင်ကြောင့် ဖြစ်သည်ဆိုခြင်းကို သူ ယုံကြည်နိုင်ခြင်း မရှိသေးချေ။
သမိုင်းတစ်လျှောက်တွင် ထိုသို့သောအရာမျိုးကို တစ်ခါမျှ မကြားဖူးခဲ့ချေ။
" ဒါဆို အကြောင်းရင်းက ဘာများလဲ..... "
အခြား ဧကရာဇ်တစ်ပိုင်းများသည်လည်း တိုးညင်းသောအသံများဖြင့် ပြောဆိုလာကြ၏။ သူတို့သည်လည်း ဤအရာအားလုံးကို မယုံကြည်ချင်ကြပေ။
သို့သော် အမှန်တရားမှာ သူတို့၏ရှေ့တွင် ရှိနေခဲ့လေသည်။
ရှန်းဟိုင်းအဖွဲ့မှ ဧကရာဇ်တစ်ပိုင်း တစ်ဦး၊ နှစ်ဦးခန့်သာ တာအိုမရယူနိုင်ခဲ့ပါက သူတို့၏အပြစ်ဟု ရှင်းပြ၍ ရနိုင်သေးသည်။
သို့သော် ယခုအခါ ရှန်းဟိုင်းအဖွဲ့မှ ဧကရာဇ်တစ်ပိုင်း ကိုးပါးစလုံး တာအိုကို မရယူနိုင်ခြင်းမှာ သူတို့၏အပြစ်ကြောင့်ဟု ပြောရန် အလွန် ခက်ခဲသွားစေခဲ့ပြီ ဖြစ်သည်။
ရှန်းဟိုင်းအဖွဲ့မှ ဧကရာဇ်တစ်ပိုင်းများ ထိတ်လန့်စိုးရိမ်နေကြစဉ်မှာပင်.....
အဆုံးမဲ့ကမ္ဘာ စကြာဝဠာ၏ နက်ရှိုင်းသောနေရာ၌ ခရမ်းရောင်ဝတ်ရုံဝတ်မဟာဧကရီသည် ဤမြင်ကွင်းကို ကြည့်ရှုနေ၏။ သူ၏မျက်လုံးများထဲတွင်လည်း သံသယနှင့် မသေချာမှု အရိပ်အယောင်များ ပေါ်လွင်နေလေသည်။
" တာအိုကို မရယူနိုင်ဘူးလား... ဒါ ဘယ်လိုလုပ် ဖြစ်နိုင်မှာလဲ "
ခရမ်းရောင်ဝတ်ရုံဝတ်မဟာဧကရီသည် မယုံကြည်နိုင်စွာဖြင့် တီးတိုး ရေရွတ်လိုက်၏။
ကုချန်မှ ဆက်လက် တံခါးပိတ်ကျင့်ကြံနေခြင်း သို့မဟုတ် ဝင်ရောက်စွက်ဖက်ကာ တားဆီးခြင်း စသော ဖြစ်နိုင်ခြေများစွာကို သူ စဉ်းစားခဲ့ပြီးဖြစ်သည်။
သို့သော် သူ လုံးဝ မမျှော်လင့်ထားခဲ့သောအရာမှာ ကုချန်သည် ပေါ့ပေါ့ပါးပါး စကားတစ်ခွန်းဖြင့် ရှန်းဟိုင်းအဖွဲ့မှ ဧကရာဇ်တစ်ပိုင်း ကိုးပါးစလုံးအတွက် ဧကရာဇ်အဆင့်သို့ သွားရာလမ်းကို အပြည့်အဝ ဖြတ်တောက်လိုက်ခြင်းပင် ဖြစ်သည်။
ဤသည်မှာ ကောင်းကင်ဘုံအရှင်သခင်၏ စစ်မှန်သော စွမ်းအားပင်လော။
ဤအခိုက်အတန့်တွင် ခရမ်းရောင်ဝတ်ရုံဝတ်မဟာဧကရီ၏ စိတ်နှလုံးထဲ၌ မသိမသာ စိုးရိမ်ပူပန်မှုတစ်ခု တဖြည်းဖြည်း မြင့်တက်လာခဲ့၏။
သူသည် ကုချန်၏ တိုက်ခိုက်ရေးစွမ်းအားကို အထင်လွဲမှားခဲ့မိသည်ဟု ခံစားလိုက်ရသည်။
သို့သော် ရှန်းဟိုင်းအဖွဲ့မှ ဧကရာဇ်တစ်ပိုင်းများ၏ ကိုယ်တွင်း၌ အမြစ်တွယ်နေသော အင်မော်တယ်မျိုးစေ့များကို မြင်လိုက်ရသောအခါ အနည်းငယ် ထိတ်လန့်နေသော သု၏စိတ်နှလုံးမှာ တဖြည်းဖြည်း ငြိမ်သက်သွားလေသည်။
မှန်သည်။ ကုချန် မည်မျှပင် အစွမ်းထက်နေပါစေ သူသည် အဆုံးမဲ့ကမ္ဘာကိုသာ အုပ်စိုးနေသူဖြစ်ရာ အင်မော်တယ်နယ်မြေမှ နည်းလမ်းများကို သူ မည်သို့ ခုခံနိုင်မည်နည်း။
ကုချန်သည် မည်သည့် မိစ္ဆာပညာမျိုး အသုံးပြုခဲ့သည်ကို သူ မသိသော်လည်း ဤအင်မော်တယ်မျိုးစေ့ ကိုးစေ့ ရှိနေသရွေ့ အစပြုခွင့်မှာ သူ၏လက်ထဲတွင် ရှိနေဆဲပင် ဖြစ်သည်။
...
" ဒါက... . "
" ရှန်းဟိုင်းအဖွဲ့က ဧကရာဇ်တစ်ပိုင်းတွေက တကယ်ပဲ တာအိုကို မရယူနိုင်တော့ဘူးလား "
" ရှေးဟောင်းသမိုင်းမှတ်တမ်းတွေအရဆိုရင် တာအိုရယူခြင်း ကပ်ဘေးကို ဖြတ်ကျော်ပြီးသွားရင် အခုလောက်ဆို တာအိုရယူဖို့ အောင်မြင်နေသင့်ပြီ... ဒါပေမယ့်..... "
ရှန်းဟိုင်းအဖွဲ့မှ ဧကရာဇ်တစ်ပိုင်းများအားလုံး တာအိုမရယူနိုင်သည့် မြင်ကွင်းသည် အဆုံးမဲ့ကမ္ဘာရှိ သန်းထောင်ချီသော သက်ရှိများ၏ မျက်လုံးထဲသို့လည်း ကျရောက်သွားခဲ့၏။
မျက်တောင်တစ်ခတ်အတွင်း မူလက ဝမ်းမြောက်ဝမ်းသာ အောင်ပွဲခံသံများသည် လျင်မြန်စွာ မှေးမှိန်သွားလျက် တိတ်ဆိတ်သွားလေတော့သည်။
မရေမတွက်နိုင်သော လူသားမျိုးနွယ်ဝင်များ၏ မျက်လုံးများထဲတွင် မယုံကြည်နိုင်မှုများ ပြည့်နှက်နေလေသည်။
ကောင်းကင်ဘုံအရှင်သခင်က စကားတစ်ခွန်း ပြောလိုက်ရုံနဲ့ ရှန်းဟိုင်းအဖွဲ့က ဧကရာဇ်တစ်ပိုင်း ကိုးပါးစလုံး တာအိုကို မရယူနိုင်တော့ဘူးလား။ ဘယ်လို မိစ္ဆာပညာမျိုးလဲ။
" ဒါက ကောင်းကင်ဘုံအရှင်သခင်ပဲလေ..... "
လူသားမျိုးနွယ်မှ လူအိုကြီးများနှင့် သက်ရှိကျောက်ဖြစ်ရုပ်ကြွင်းအချို့မှ တီးတိုး ရေရွတ်လိုက်ကြ၏။ ဤရလဒ်အတွက်လည်း အံ့အားသင့်နေပုံ မရချေ။
သူသည် တစ်ချိန်က အဆုံးမဲ့ကမ္ဘာတစ်ခုလုံးကို ထိတ်လန့်ကြောက်ရွံ့စေခဲ့သော တည်ရှိမှုတစ်ခုဖြစ်ကာ ကျူးကျော်လာသော နတ်ဆိုးနယ်မြေမှ သက်ရှိများကိုပင် သူ၏ရှေ့မှောက်၌ တုန်ယင်သွားစေလောက်အောင် ကြောက်မက်ဖွယ်ကောင်း၍ ရိုသေလေးစားရသော တည်ရှိမှုတစ်ခု ဖြစ်လေသည်။
ဧကရာဇ်တစ်ပိုင်းများ၏ လမ်းကြောင်းကို ဖြတ်တောက်ရန်ဆိုသည်မှာ ဆိုဖွယ်ရာပင် မရှိတော့ချေ။
ဧကရာဇ်အဆင့်သို့ တက်လှမ်းပြီးသားသူများပင်လျှင် သူ၏ရိုက်သတ်ခြင်းကို ခံရမည့် ကံကြမ္မာမှ မလွတ်မြောက်နိုင်ခဲ့ကြပေ။
လောကသားများသည် ကောင်းကင်ဘုံအရှင်သခင်၏ ခမ်းနားကြီးကျယ်မှုကို မမြင်တွေ့ခဲ့ရသည်မှာ အလွန်ကြာမြင့်နေပြီဖြစ်ရာ သူသည် အမှန်တကယ် မည်မျှ ကြောက်မက်ဖွယ်ကောင်းသော တည်ရှိမှုတစ်ခုဖြစ်ကြောင်းကို မေ့လျော့သွားစေခဲ့သည်ဟုသာ ဆိုရပေမည်။
...
အထက်ကောင်းကင် တားမြစ်နယ်မြေအတွင်း၌.....
တာအိုမရယူနိုင်ဖြစ်နေသော ရှန်းဟိုင်းအဖွဲ့၏ ဧကရာဇ်တစ်ပိုင်းများကို ကြည့်လျက် ကုချင်းရွဲ့၊ ယဲ့ယင်းယင်းနှင့် အခြားသူများ၏ မျက်လုံးများထဲတွင် 'ထင်တဲ့အတိုင်းပဲ' ဟူသော အရိပ်အယောင်များ ပေါ်လွင်နေလေသည်။
" ဆရာပြောတဲ့အတိုင်းပဲ... ဘိုးဘေးရဲ့ ခွင့်ပြုချက်မပါဘဲ ဒီရှန်းဟိုင်းအဖွဲ့က ဧကရာဇ်တစ်ပိုင်းတွေ တာအိုကို လုံးဝ မရယူနိုင်ဘူး "
ကုချင်းရွဲ့မှ တိုးတိတ်စွာ ရေရွတ်လိုက်၏။
အရာအားလုံးမှာ ဆရာပြောခဲ့သည့်အတိုင်းပင် ဖြစ်သည်။ ဘိုးဘေးသည် ကိုယ်ထင်ပြခြင်းပင် မရှိဘဲ ပေါ့ပေါ့ပါးပါး အမိန့်တစ်ခုဖြင့် ဤရှန်းဟိုင်းအဖွဲ့မှ ဧကရာဇ်တစ်ပိုင်းများ၏ လမ်းကြောင်းများကို ပိတ်ဆို့လိုက်ပြီ ဖြစ်သည်။
ဤမျှ နက်နဲ၍ ခန့်မှန်းရခက်သော စွမ်းအားမှာ တကယ့်ကို ရိုသေလေးစားဖွယ် ကောင်းလှပေသည်။
" ဒါက ဘာများ အရေးပါလို့လဲ..... "
ကောင်းကင်နတ်သမီး ရှောင်းယွဲ့သည် ခေါင်းအနည်းငယ် ယမ်းလိုက်သော်လည်း စကားများများစားစား မပြောခဲ့ချေ။
ကုမိသားစုဝင်များသည် သူတို့၏ဘိုးဘေး အလွန်အစွမ်းထက်ကြောင်း သိထားသော်ငြား ကုချန် မည်မျှ စွမ်းအားကြီးမားကြောင်းကိုတော့ သူတို့ စိတ်ကူးဖြင့်ပင် မှန်းဆနိုင်မည်မဟုတ်ကြောင်း သူ နားလည်ထားလေသည်။
ကမ္ဘာတစ်ခု၏ နှလုံးသားကို ထိန်းချုပ်ရန်မှာ စစ်မှန်သော အင်မော်တယ် ကျင့်ကြံမှု လိုအပ်ပေသည်။
ထို့အပြင် ကောင်းကင်နတ်သမီး ရှောင်းယွဲ့သည် ကုချန်မှ အင်မော်တယ်အရှင်သခင်အဆင့် တည်ရှိမှုတစ်ခုအား သတ်ဖြတ်ခဲ့သည်ကို ကိုယ်တိုင် မျက်မြင်တွေ့ရှိခဲ့ဖူးလေသည်။
ကုချန်၏စွမ်းအားဖြင့်ဆိုလျှင် သူ၏လက်တစ်ဖက်ကို လှန်လိုက်ရုံဖြင့် အဆုံးမဲ့ကမ္ဘာတစ်ခုလုံးကို ဖျက်ဆီးပစ်ရန်မှာ ခက်ခဲသောကိစ္စ မဟုတ်ဟုပင် ဆိုနိုင်ပေသည်။
" ဟွန်းဟွန်း... နောက်ဆုံးတော့ ပြီးသွားပြီပဲ "
ကုမိသားစုဝင်များ အံ့အားသင့်ကာ စိတ်လှုပ်ရှားနေကြစဉ်မှာပင်.....
အထက်ကောင်းကင် ပင်မနန်းဆောင်အတွင်းမှ ညင်သာတည်ငြိမ်သော ရယ်မောသံတစ်ခု ထွက်ပေါ်လာလေသည်။
ရယ်မောသံ ကြားရရာ နေရာတိုင်းရှိ လူတိုင်း၏ စိတ်နှလုံးထဲတွင် အဆုံးမဲ့ ဝမ်းမြောက်မှုများ ချက်ချင်း ဖြစ်ပေါ်လာခဲ့၏။
လူတိုင်းသည် အထက်ကောင်းကင် ပင်မနန်းဆောင်ဆီသို့ ကြောင်ငေးကြည့်လိုက်ကြလေသည်။
ထိုနေရာမှာ ကုချန် တံခါးပိတ်ကျင့်ကြံနေသော နေရာဖြစ်သည်။
ဘိုးဘေးရဲ့ စွမ်းအားက ထပ်တိုးလာပြန်တာလော။
ချက်ချင်းဆိုသလိုပင် ဤခန့်မှန်းချက်သည် ကုဝူရှန့်နှင့် အခြားသူများ၏ စိတ်ထဲသို့ ရုတ်တရက် ဝင်ရောက်လာခဲ့သည်။
ကုချင်းရွဲ့နှင့် ယဲ့ယင်းယင်းတို့သည် အချင်းချင်း အကြည့်ချင်းဖလှယ်လိုက်ကြရာ နှစ်ဦးစလုံး၏ မျက်လုံးများထဲတွင် အကူအညီမဲ့မှု အရိပ်အယောင်တစ်ခုကို တွေ့လိုက်ရသည်။
သူတို့၏စိတ်နှလုံးထဲတွင် ထုတ်မပြောသော်လည်း သူတို့သည် ကုချန်အား သူတို့၏ စံပြပုဂ္ဂိုလ်နှင့် လိုက်နာကြိုးစားရမည့် ပန်းတိုင်အဖြစ် အမြဲတစေ သတ်မှတ်ထားခဲ့ကြသည်။
သို့သော် ရလဒ်မှာ သူတို့ဘိုးဘေး၏ စွမ်းအားသည် သူတို့ထက်များစွာ သာလွန်နေခြင်းဖြစ်ရာ သူ၏တိုးတက်မှုအရှိန်မှာ သူတို့ကို လုံးဝ ဖိနှိပ်ခြေမွနေခြင်းပင်။
" အင်မော်တယ်အရှင်သခင်အဆင့်ကို အောင်မြင်စွာ တက်လှမ်းနိုင်ပြီ "
အထက်ကောင်းကင် ပင်မနန်းဆောင်အတွင်း၌ ကုချန်သည် ထိုနက်နဲသော ခေါင်းတလားထဲမှ ကျက်သရေရှိစွာ ထွက်ပေါ်လာခဲ့၏။
အင်မော်တယ်အရှင်သခင်အဆင့်သို့ တက်လှမ်းရန် ကြိုးစားချိန်တွင် ဆူညံလှုပ်ရှားမှုများ အလွန်အမင်း ဖြစ်ပေါ်လာမည်ကို စိုးရိမ်သောကြောင့် ကုချန်သည် သူ၏ကိုယ်တွင်းမှ ပေါက်ကွဲထွက်လာနိုင်သည့် မည်သည့်လှိုင်းဂယက်ကိုမဆို ဖယ်ခွဲဖိနှိပ်ရန်အတွက် ဤနက်နဲသော ခေါင်းတလားထဲသို့ အထူးတလည် 'ပြောင်းရွှေ့' ခဲ့ခြင်း ဖြစ်သည်။
အထက်ကောင်းကင်ကို မဆိုထားနှင့် အဆုံးမဲ့ကမ္ဘာတစ်ခုလုံးပင် ထိုစွမ်းအားကြောင့် ချက်ချင်း ဖျက်ဆီးခံရ၍ မြေကြီးနှင့် တစ်သားတည်း ဖြစ်သွားနိုင်ပေသည်။
ထို့ကြောင့် ကုချန်သည် ၎င်းကို အလွန်အမင်း သတိထား၍ ကိုင်တွယ်ရုံမှတစ်ပါး အခြားရွေးချယ်စရာ မရှိခဲ့ချေ။
သို့သော် အဆင့်တက်လှမ်းသည့် လုပ်ငန်းစဉ်မှာ မျှော်လင့်မထားလောက်အောင် ချောမွေ့နေခဲ့သည်။ အချိန်မြစ်၏အဆုံးတွင် သူ နားလည်သဘောပေါက်ခဲ့သော အဆုံးမဲ့တာအို စွမ်းအား အကြွင်းအကျန်များကို အားကိုးခြင်းဖြင့် သူ၏ ပင်မကိုယ်ခန္ဓာသည် ပြီးပြည့်စုံသော စစ်မှန်သည့် အင်မော်တယ်အဆင့်မှ အင်မော်တယ်အရှင်သခင်အဆင့်သို့ တက်လှမ်းနိုင်ခဲ့၏။
ဤအင်မော်တယ်အရှင်သခင်အဆင့်မှာ သဘာဝကျကျပင် သာမန် အင်မော်တယ်အရှင်သခင်တစ်ပါးနှင့် မတူညီချေ။
ကုချန်သည် သူ၏ကိုယ်တွင်းရှိ စွမ်းအားများကို သေချာစွာ အာရုံခံလိုက်ပြီးသည်နှင့် သူ၏နှုတ်ခမ်းထက်တွင် ကျေနပ်အားရသော အပြုံးတစ်ခု ပေါ်လာခဲ့လေသည်။
သူ ပြီးပြည့်စုံသော စစ်မှန်သည့် အင်မော်တယ်အဆင့်တွင် ရှိစဉ်က အင်မော်တယ်ဘုရင်တစ်ပါးနှင့် ယှဉ်ပြိုင်နိုင်စွမ်း ရှိခဲ့သည်။
ယခု သူသည် အင်မော်တယ်အရှင်သခင်အဆင့်သို့ တက်လှမ်းသွားပြီဖြစ်ရာ သူ၏ တိုက်ခိုက်ရေးစွမ်းအားမှာ သိသိသာသာ မြင့်တက်လာခဲ့ပြီ ဖြစ်သည်။
ကုချန်၏ခန့်မှန်းချက်အရ ချီတစ်ခုမှ သန့်စင်သူသုံးပါး ခွဲထွက်ခြင်း ကျင့်စဉ်၏ စွမ်းအားမပါဘဲ သူ၏ပင်မကိုယ်ခန္ဓာ တစ်ခုတည်းကိုသာ အားကိုးမည်ဆိုလျှင်ပင် သူသည် ပြိုင်ဘက်ကင်းနေပြီဖြစ်ကာ အင်မော်တယ်ဘုရင်အဆင့်ရှိ အရာအားလုံးကို လှဲကျင်းပစ်နိုင်စွမ်း ရှိနေပြီ ဖြစ်သည်။
အခန်း ( ၄၀၈ ) - လွှမ်းမိုးနိုင်သော စွမ်းအား၊ ရှေးဟောင်းအမျက်ဒေါသနှင့် နယ်မြေဖြတ်ကျော်လာသော လက်မောင်း
ငါ့ရဲ့ပင်မကိုယ်ခန္ဓာဟာ ပြိုင်ဘက်ကင်းပြီး အင်မော်တယ်ဘုရင်အဆင့်ကို လှဲကျင်းပစ်နိုင်စွမ်းရှိတယ်။
ငါ့ရဲ့ ဒုတိယနဲ့တတိယကိုယ်ပွားတို့ကလည်း သာမန်အင်မော်တယ်ဘုရင်တွေကို ကျော်လွန်တဲ့ စွမ်းအားတွေကို အသီးသီး ပိုင်ဆိုင်ထားကြ
တယ်။
ဒီကိုယ်ခန္ဓာသုံးခုသာ ပေါင်းစည်းလိုက်မယ်ဆိုရင် ဘယ်လောက်တောင် ကြောက်မက်ဖွယ်ကောင်းလိုက်မလဲ။
အင်မော်တယ်ဧကရာဇ် မဟုတ်လျှင် နတ်ဆိုးဧကရာဇ်အဆင့်ရှိ တည်ရှိမှုတစ်ခုကိုပင် သူ ယှဉ်ပြိုင်နိုင်နေပြီဖြစ်သည်။
" အခုတော့ အင်မော်တယ်နယ်မြေနဲ့ နတ်ဆိုးနယ်မြေမှာ ကိုယ့်ကိုယ်ကိုယ် ကာကွယ်နိုင်တဲ့ စွမ်းအားရှိသွားပြီပဲ "
ကုချန်သည် ကျေနပ်စွာ ခေါင်းညိတ်လိုက်၏။
သူ၏လက်ရှိအခြေခံဖြင့် ကံကြမ္မာပြောင်းပြန်လှန်အမွှေးတိုင်၏ အကူအညီမပါဘဲပင် အင်မော်တယ်ဧကရာဇ်နှင့် နတ်ဆိုးဧကရာဇ်အဆင့်ရှိ တည်ရှိမှုများကို ယှဉ်ပြိုင်နိုင်စွမ်း ရှိနေပြီဖြစ်သည်။
အင်မော်တယ်နယ်မြေနှင့် နတ်ဆိုးနယ်မြေ တစ်ခုလုံးကို ခြုံကြည့်လျှင် သူသည် ပြိုင်ဘက်ကင်း မဟုတ်သေးသော်လည်း အင်မော်တယ်ဘုရင်များကို အထက်စီးမှကြည့်ကာ အရပ်မျက်နှာအားလုံးကို ကြီးကြပ်ကွပ်ကဲနိုင်စွမ်း သေချာပေါက် ရှိနေပြီဖြစ်သည်။
သေချာသည်မှာ ကုချန်၏အတွေးများကိုသာ အင်မော်တယ်နယ်မြေ သို့မဟုတ် နတ်ဆိုးနယ်မြေရှိ အင်မော်တယ်ဘုရင်များ သိရှိသွားပါက သူတို့သည် သေချာပေါက် အလွန်အမင်း ဆွံ့အသွားကြမည် ဖြစ်သည်။
အင်မော်တယ်ဘုရင်များကို လုံးဝ ကျော်လွန်သွားသော တိုက်ခိုက်ရေးစွမ်းအားသည် 'ကိုယ့်ကိုယ်ကိုယ် ကာကွယ်ရန်' သက်သက်သာလော။ ကိုယ့်ကိုယ်ကိုယ် ကာကွယ်ရန်သာဆိုလျှင် စံနှုန်း အနည်းငယ် မြင့်မားလွန်းနေသည် မဟုတ်ပါလော။
အင်မော်တယ်နယ်မြေနှင့် နတ်ဆိုးနယ်မြေ တစ်ခုလုံးကို ရှာဖွေကြည့်လျှင်ပင် ထိုသို့သော 'ကိုယ့်ကိုယ်ကိုယ် ကာကွယ်နိုင်သည့်' စွမ်းအားရှိသော တည်ရှိမှုများ များများစားစား ရှိမည်မဟုတ်ပေ။
ပြီးပြည့်စုံသော အင်မော်တယ်အရှင်သခင်အဆင့်သို့ တက်လှမ်းပြီးနောက် ကုချန်၏အကြည့်များသည် ရှန်းဟိုင်းအဖွဲ့မှ ဧကရာဇ်တစ်ပိုင်းများနှင့် သူတို့၏နောက်ကွယ်ရှိ ခရမ်းရောင်ဝတ်ရုံဝတ်မဟာဧကရီထံသို့ ကျရောက်သွားလေတော့သည်။
" ပုရွက်ဆိတ်တချို့ပါလား... မင်းတို့နောက်ကွယ်မှာ ဘယ်သူတွေရှိနေသေးလဲဆိုတာ ငါကိုယ်တော် ကြည့်ရသေးတာပေါ့ "
ကုချန်သည် တီးတိုး ရေရွတ်လိုက်၏။
အစောပိုင်းက ဆူညံသောင်းကျန်းနေသော ဤရှန်းဟိုင်းအဖွဲ့မှ ဧကရာဇ်တစ်ပိုင်းများကို သူ ဂရုမစိုက်ခဲ့ခြင်းမှာ သူသည် အင်မော်တယ်အရှင်သခင်အဆင့်သို့ တက်လှမ်းရန် အရေးကြီးသော အလှည့်အပြောင်းတွင် ရှိနေ၍ ဤမျှသေးငယ်သော ကိစ္စရပ်များကြောင့် အာရုံမလွှဲချင်သောကြောင့် ဖြစ်သည်။ ထို့ကြောင့် သူသည် အတွေးတစ်ချက်ဖြင့် အဆုံးမဲ့တာအို ကောင်းကင်နှလုံးသားကို လှုပ်ရှားစေကာ ဤရှန်းဟိုင်းအဖွဲ့မှ ဧကရာဇ်တစ်ပိုင်းများ၏ ရှေ့ဆက်ရမည့် လမ်းကြောင်းကို ဖြတ်တောက်လိုက်ခြင်းသာ ဖြစ်သည်။
ယခု အဆင့်တက်ခြင်း ပြီးမြောက်သွားပြီဖြစ်ရာ သူသည် ဤပုရွက်ဆိတ်များကို ဆက်လက် အလိုလိုက်ထားမည် မဟုတ်တော့ချေ။
ပုရွက်ဆိတ်များသည် ကောင်းကင်ကြီးကို အော်ဟစ်နေသော်လည်း ကောင်းကင်ကြီးမှာ တုန်လှုပ်ခြင်း မရှိပေ။
သို့သော် ပုရွက်ဆိတ်များ ဖြစ်သည့်အလျောက် သူတို့သည် တန်ဖိုးပေးဆပ်ရမည် ဖြစ်သည်။
" ဝှီး...! "
မမြင်ရသော လှိုင်းဂယက်တစ်ခုသည် အထက်ကောင်းကင် တားမြစ်နယ်မြေအတွင်းမှ ထွက်ပေါ်လာကာ အဆုံးမဲ့စကြာဝဠာ ကြယ်တာရာ ကောင်းကင်ယံကို ချက်ချင်း လွှမ်းခြုံသွားလျက် ဧရာမကောင်းကင်ကြီး ပြိုကျလာသကဲ့သို့ ရှန်းဟိုင်းအဖွဲ့မှ ဧကရာဇ်တစ်ပိုင်း ကိုးပါးအပေါ် ဖိကျလာလေသည်။
စကြာဝဠာများ၊ နေ နှင့် လတို့ ပြောင်းပြန်ဖြစ်သွားသကဲ့သို့ ဖြစ်သွားကာ ထိုကြောက်မက်ဖွယ် စွမ်းအားသည် အဆုံးမဲ့ကမ္ဘာရှိ သက်ရှိအားလုံးကို အရာတစ်ခုအား ချက်ချင်း သဘောပေါက်သွားစေခဲ့၏။
ကောင်းကင်ဘုံအရှင်သခင်သည် နောက်ဆုံးတွင် လှုပ်ရှားလိုက်ပြီ ဖြစ်သည်။
" ကောင်းကင်ဘုံအရှင်သခင် "
ရှန်းဟိုင်းအဖွဲ့မှ ဧကရာဇ်တစ်ပိုင်း ကိုးပါး၏ နှုတ်မှ ထိတ်လန့်ဒေါသထွက်နေသော အော်ဟစ်သံများ ထွက်ပေါ်လာလေသည်။
သို့သော် သူတို့နှင့် ကုချန်ကြားရှိ စွမ်းအားကွာဟချက်မှာ ကြီးမားလွန်းလှပေသည်။
ကုချန်၏ ဖိနှိပ်နိုင်စွမ်းရှိသော အရှိန်အဝါ အနည်းငယ်မျှဖြင့်ပင် ဤရှန်းဟိုင်းအဖွဲ့မှ ဧကရာဇ်တစ်ပိုင်း ကိုးပါးသည် တုံ့ပြန်ရန် အခွင့်အရေးပင် မရလိုက်ဘဲ ကြယ်တာရာ ကောင်းကင်ယံတွင် တစ်ဦးပြီးတစ်ဦး ပေါက်ကွဲသွားကာ ဖုန်မှုန့်များအဖြစ်သို့ ပြောင်းလဲသွားကြလေသည်။
" ကုချန်! "
ကြယ်တာရာ ကောင်းကင်ယံ၏ အဝေးဆုံး တစ်ဖက်စွန်းရှိ ခရမ်းရောင်ဝတ်ရုံဝတ်မဟာဧကရီသည်လည်း ဤမြင်ကွင်းကြောင့် လန့်ဖြန့်သွားခဲ့ရ၏။
ကုချန်ဟာ ဤမျှ မြန်ဆန်ကာ ကြောက်မက်ဖွယ်ကောင်းအောင် လှုပ်ရှားလိမ့်မည်ဟု သူ မမျှော်လင့်ထားခဲ့ချေ။ ဖိနှိပ်သောအရှိန်အဝါ အနည်းငယ်မျှဖြင့် ဧကရာဇ်တစ်ပိုင်း ကိုးပါးစလုံးကို ချက်ချင်းပင် အမှုန့်ကြိတ်ကာ အမြစ်ပြတ်ချေမှုန်းလိုက်ခြင်း ဖြစ်သည်။
ခရမ်းရောင်ဝတ်ရုံဝတ်မဟာဧကရီသည် စိတ်များ လှုပ်ရှားသွားကာ အင်မော်တယ်မျိုးစေ့ ကိုးစေ့ကို အသုံးပြု၍ ပြန်လည်တိုက်ခိုက်ရန် အလျင်အမြန် ကြိုးစားလိုက်လေသည်။
သို့သော် ထိုအခိုက်၌ သူ့အား မှင်သက်ထိတ်လန့်သွားစေမည့် မြင်ကွင်းတစ်ခု ပေါ်ပေါက်လာခဲ့လေသည်။
ရှန်းဟိုင်းအဖွဲ့မှ ဧကရာဇ်တစ်ပိုင်း ကိုးပါး၏ ကိုယ်ခန္ဓာများ ပေါက်ကွဲသွားသည်နှင့် သူတို့ကိုယ်တွင်းရှိ အင်မော်တယ်မျိုးစေ့ ကိုးစေ့မှာ စကြာဝဠာ ကြယ်တာရာ ကောင်းကင်ယံတွင် သေချာစွာ ပေါ်လွင်လာခဲ့၏။
သို့သော် ခရမ်းရောင်ဝတ်ရုံဝတ်မဟာဧကရီမှ ၎င်းတို့ကို မထိန်းချုပ်နိုင်မီမှာပင် ကုချန်၏ ဖိနှိပ်သော အရှိန်အဝါသည် အင်မော်တယ်မျိုးစေ့ ကိုးစေ့စလုံးကို လွှမ်းခြုံသွားကာ မျက်တောင်တစ်ခတ်အတွင်း ပြာအဖြစ် ချေမွပစ်လိုက်လေသည်။
ဤအင်မော်တယ်မျိုးစေ့ ကိုးစေ့သည် အင်မော်တယ်နယ်မြေ၏ နည်းလမ်းတစ်ခု ဖြစ်ပေသည်။
ဝမ်လုံအင်မော်တယ်အရှင်၏ အရှင်များကို ရိတ်သိမ်းစားသုံးသည့် နည်းလမ်းနှင့် ကွာခြားသော်လည်း သူတို့၏ရည်ရွယ်ချက်မှာ တူလေသည်။
ပထမတစ်ခုက ထိုအရှင်များကို ကြီးထွားရန် အချိန်ပေး၍ ရင့်မှည့်လာသောအခါ အားလုံးကို ရိတ်သိမ်းစားသုံးခြင်းဖြစ်သည်။
နောက်တစ်ခုကမူ သူတို့ အားနည်းနေချိန်တွင် ကိုယ်တွင်း၌ စိုက်ပျိုးထားကာ သူတို့နှင့်အတူ ကြီးထွားလာပြီး နောက်ပိုင်းတွင် ကိုယ်ခန္ဓာကို လုယူ၍ သခင်အဖြစ် နေရာယူလျက် သူတို့၏ အနှစ်သာရအားလုံးကို အပြည့်အဝ လုယူစုပ်ယူပြီး ကိုယ်ခန္ဓာအခွံချည်းသာ ချန်ထားခဲ့ခြင်း ဖြစ်သည်။
ထို့နောက် အင်မော်တယ်မျိုးစေ့ကို စိုက်ပျိုးသူမှ ပြန်လည်ရယူသွားမည် ဖြစ်သည်။
ကုချန်၏ စွမ်းအားဖြင့်ဆိုလျှင် အင်မော်တယ်မျိုးစေ့ကို အာရုံခံမိသည်နှင့် ၎င်းကို သိရှိပြီးဖြစ်ရာ ထပ်မံစုံစမ်းနေစရာမလိုတော့ဘဲ မျက်တောင်တစ်ခတ်အတွင်း ချေမွပစ်လိုက်ခြင်း ဖြစ်သည်။
သို့သော် ဤမြင်ကွင်းကို မြင်လိုက်ရသောအခါ ခရမ်းရောင်ဝတ်ရုံဝတ်မဟာဧကရီမှာ ဆွံ့အသွားခဲ့ရသည်။
ကြောက်ရွံ့ခြင်း ဟူသော ခံစားချက်တစ်ခုသည်လည်း သူ၏ကိုယ်တွင်း၌ ရူးသွပ်စွာ ကြီးထွားလာခဲ့၏။
ထိုအရှင်သခင် ပေးသနားထားသော အင်မော်တယ်မျိုးစေ့များသည် ဤမျှ အလွယ်တကူ ဖျက်ဆီးခံလိုက်ရသည်လော။
ခရမ်းရောင်ဝတ်ရုံဝတ်မဟာဧကရီ၏ စိတ်များမှာ ဂယောက်ဂယက် ဖြစ်သွားခဲ့၏။
ဤအင်မော်တယ်မျိုးစေ့ ကိုးစေ့သည် ကုချန်ကို ဆန့်ကျင်ရာတွင်သုံးမည့် သူ၏ဝှက်ဖဲချပ် ဖြစ်သည်။
သို့သော် ယခုအခါ သူ၏ အဂုဏ်ယူရဆုံး
ဝှက်ဖဲချပ်မှာ ကုချန်နှင့် ရင်ဆိုင်ရန် အခွင့်အရေးပင် မရလိုက်ဘဲ တစ်ဖက်လူ၏ အလွယ်တကူ ချေမွခြင်းကို ခံလိုက်ရလေပြီ။
ထွက်ပြေး.....
ထိတ်လန့်ကြောက်ရွံ့မှုများကြားတွင် ခရမ်းရောင်ဝတ်ရုံဝတ်မဟာဧကရီသည် တစ်စုံတစ်ရာကို တွေးမိသွားဟန်ဖြင့် အလိုအလျောက် ထွက်ပြေးလိုစိတ် ပေါက်သွားခဲ့၏။
သို့သော် ဤတစ်ကြိမ်တွင် သူသည် ယခင်အကြိမ်ကကဲ့သို့ ကံကောင်းမှုမျိုး မရှိတော့ချေ။
ပြီးခဲ့သည့်အကြိမ်က သူသည် ရှေ့တန်းတွင် မည်သည့်အခါမျှ မရပ်တည်ခဲ့သောကြောင့် ကုချန်၏အာရုံစိုက်မှုကို မရရှိခဲ့ခြင်း ဖြစ်သည်။
သို့သော် ဤတစ်ကြိမ်တွင် ကုချန်အား ထောင်ချောက်ဆင်ရန် ဤရှန်းဟိုင်းအဖွဲ့မှ ဧကရာဇ်တစ်ပိုင်းများကို နယ်ရုပ်များအဖြစ် အသုံးပြုရန် ဆုံးဖြတ်လိုက်ချိန်တွင် သူ လွတ်မြောက်နိုင်စွမ်း မရှိတော့ချေ။
" ထွက်ပြေးမလို့လား... ငါအရှင်က မင်းကို ထွက်သွားခွင့်ပြုလို့လား "
ခရမ်းရောင်ဝတ်ရုံဝတ်မဟာဧကရီ၏ နားထဲတွင် တည်ငြိမ်သောအသံတစ်ခု ထွက်ပေါ်လာ၏။ ထိုအခိုက်၌ သူသည် တစ်ကိုယ်လုံး အေးစက်သွား၍ သွေးကြောထဲရှိ သွေးများပင် စီးဆင်းမှု ရပ်တန့်သွားသကဲ့သို့ ခံစားလိုက်ရလေသည်။
သူ ထွက်ပြေးချင်သော်လည်း နေရာအနှံ့၌ ရှိနေသော ထိုဖိနှိပ်သည့် အရှိန်အဝါသည် သူ၏ကိုယ်ခန္ဓာကို အပြည့်အဝ ချုပ်နှောင်ထားပြီးဖြစ်ကာ အသံထွက်၍ပင် မရတော့ချေ။
" ချီ..... "
ခရမ်းရောင်ဝတ်ရုံဝတ်မဟာဧကရီ၏ ကိုယ်ခန္ဓာသည် နောက်ဆုံး၌ အစိတ်စိတ်အမွှာမွှာ ကွဲအက်သွားလေတော့သည်။
ခရမ်းရောင်ဝတ်ရုံဝတ်မဟာဧကရီ ကျဆုံးသွားသည့် အခိုက်အတန့်တွင် ကုချန်၏နတ်ဘုရားအာရုံသည် သူ၏အသိဉာဏ်ပင်လယ်ကို ရှာဖွေပြီးဖြစ်ကာ ခရမ်းရောင်ဝတ်ရုံဝတ်မဟာဧကရီထံ၌ ဖြစ်ပျက်ခဲ့သမျှ အရာအားလုံးကို သိရှိသွားခဲ့လေတော့သည်။
" ရှေးဟောင်းမကောင်းဆိုးဝါး အင်မော်တယ်ဘုရင်..... "
ကုချန်သည် တီးတိုး ရေရွတ်လိုက်၏။
ခရမ်းရောင်ဝတ်ရုံဝတ်မဟာဧကရီ၏ မှတ်ဉာဏ်များကို စူးစမ်းရှာဖွေပြီးနောက် သိရှိလိုက်ရသည်များမှာ ကုချန် မျှော်လင့်ထားသည်ထက် ကျော်လွန်နေသော်လည်း အဆင်ပြေပြေ ရှိနေဆဲပင် ဖြစ်သည်။
ခရမ်းရောင်ဝတ်ရုံဝတ်မဟာဧကရီ ရရှိခဲ့သော 'ကံကြမ္မာအထောက်အပံ့' ဆိုသည်မှာ ရှေးဟောင်းမကောင်းဆိုးဝါး အင်မော်တယ်ဘုရင်၏ လက်အောက်ခံ အင်အားစုများထံမှပင် ဖြစ်လေသည်။
အတိတ်က ဝမ်လုံအင်မော်တယ်၏ အင်မော်တယ်တစ်သောင်းမျှော်စင် ကဲ့သို့ပင် ဖြစ်သည်။
ဤရှေးဟောင်းမကောင်းဆိုးဝါး အင်မော်တယ်ဘုရင်သည် တစ္ဆေတစ်ကောင်ကဲ့သို့ အမှန်တကယ်ပင် ရစ်ဝဲနေတော့၏။
ကုချန်သည် ခေါင်းမယမ်းဘဲ မနေနိုင်ခဲ့ချေ။ အင်မော်တယ်တစ်သောင်းမျှော်စင်မှသည် ယခု ခရမ်းရောင်ဝတ်ရုံဝတ်မဟာဧကရီအထိ အရာအားလုံးသည် ထိုရှေးဟောင်းမကောင်းဆိုးဝါး အင်မော်တယ်ဘုရင်နှင့် ဆက်စပ်နေလေသည်။
ပို၍တိုက်ဆိုင်သည်မှာ ရှေးဟောင်းမကောင်းဆိုးဝါး အင်မော်တယ်ဘုရင်၏ အောက်ကမ္ဘာရှိ အစီအစဉ်အားလုံးမှာ ကုချန်၏ဖျက်ဆီးခြင်းကို ခံခဲ့ရခြင်းပင် ဖြစ်သည်။
…..
" သေချင်နေတာပဲ...! တကယ်ကို သေချင်နေတာပဲ! "
အင်မော်တယ်နယ်မြေ၏ တစ်နေရာမှ ဒေါသတကြီး ဟိန်းဟောက်သံကြီးတစ်ခု ပဲ့တင်ထပ်လာလေ၏။
ကြီးမားလှသော ကြက်သွေးရောင် မျက်လုံးကြီးတစ်ခုသည် လေဟာနယ်ကို နောက်တစ်ကြိမ် ဆုတ်ဖြဲလိုက်၍ ၎င်း၏ရှေ့ရှိ အင်မော်တယ်ဂိတ်တံခါးဆီသို့ ကြည့်လိုက်၏။ ၎င်း၏အကြည့်များထဲတွင် အဆုံးမဲ့ ဒေါသတရားများ လည်ပတ်နေလေသည်။
အင်မော်တယ်တစ်သောင်းမျှော်စင် ကိစ္စနှင့် ပတ်သက်၍ မည်သည့် သဲလွန်စမျှ မတွေ့ရသေးချိန်တွင် ရှေးဟောင်းမကောင်းဆိုးဝါး အင်မော်တယ်ဘုရင်သည် အောက်ကမ္ဘာ၌ သူချန်ထားခဲ့သော အင်မော်တယ်မျိုးစေ့များ အမြစ်ပြတ်ချေမှုန်းခံလိုက်ရကြောင်း အာရုံခံမိသွားခဲ့
၏။
ထိုကဲ့သို့ ဆက်တိုက်ဆိုသလို 'ထိုးနှက်ချက်' များမှာ ရှေးဟောင်းမကောင်းဆိုးဝါး အင်မော်တယ်ဘုရင်အား အတိုင်းအဆမသိ ဒေါသထွက်သွားစေခဲ့လေသည်။
တစ်ယောက်ယောက်က သူ့ကို တမင်သက်သက် ဆန့်ကျင်နေတာလား။
" ငါအရှင်က မင်းကို ဘယ်တော့မှ လွှတ်မပေးဘူး... ဘယ်တော့မှ..... "
ရှေးဟောင်းမကောင်းဆိုးဝါး အင်မော်တယ်ဘုရင်သည် တီးတိုး ပြောဆိုလိုက်၏။ သူ၏ တည်ငြိမ်နေပုံရသော အသံထဲတွင် ဖုံးကွယ်ထား၍မရသော အမုန်းတရား အရိပ်အယောင်တစ်ခု ပါဝင်နေလေသည်။
" ဝုန်း! "
ကြီးမားသော ကြက်သွေးရောင် မျက်လုံးကြီးသည် ရုတ်တရက် ပြူးကျယ်သွား၍ အလွန်မြန်ဆန်လှသော သွေးစွန်းနေသည့် လက်မောင်းတစ်ဖက်သည် ထိုမျက်လုံးထဲမှ ရုန်းထွက်လာကာ အင်မော်တယ်ဂိတ်တံခါး ရှိရာသို့ လှမ်းသွားလေတော့သည်။
ရှေးဟောင်းမကောင်းဆိုးဝါး အင်မော်တယ်ဘုရင်သည် အင်မော်တယ်မျိုးစေ့၏ အရှိန်အဝါ ပျောက်ကွယ်သွားရာ နေရာကို အာရုံခံမိပြီး ဖြစ်လေသည်။
သူသည် ဤလက်မောင်းဖြင့် နယ်မြေဖြတ်ကျော်ကာ အောက်ကမ္ဘာသို့ တိုက်ရိုက်ဝင်ရောက်လျက် သူ့ကို အကြိမ်ကြိမ် ဆန့်ကျင်ဝံ့သူကို ရှာဖွေ၍ အသေအချာ ချေမွသတ်ဖြတ်ပစ်ရန် ရည်ရွယ်ထားလေသည်။