အခန်း (၄၁၇-၄၁၈)
Vol. 30 Ch. 417-418
အခန်း ( ၄၁၇ ) - ယွဲ့လင်၏ တောင်းဆိုမှုမှာ ကောင်းကင်တက်ရသကဲ့သို့ ခက်ခဲပြီး ဆုလာဘ်မှာလည်း မလုံလောက်ပေ
ကုချန်၏ စိတ်မရှည်သော လေသံကို ကြားသောအခါ ယွဲ့လင်အင်မော်တယ်ဘုရင်မှာ တုံ့ဆိုင်းကာ တွေဝေနေဆဲဖြစ်၏။
သူ ကုချန်ကို လှမ်းခေါ်လိုက်ခြင်းမှာ အကူအညီ တောင်းချင်သောကြောင့် ဖြစ်သည်။ သို့သော် ကုချန်အား ဤကိစ္စကို ပြောပြသင့်၊ မပြောပြသင့် သူ သေချာမသိသေးပေ။ သူ တောင်းဆိုချင်သည့် အရာမှာ နတ်ဆိုးနယ်မြေရှိ ချီလျန်မျိုးနွယ်နှင့် ပတ်သက်သည့် သတင်းများကို စုံစမ်းပေးရန်ပင် ဖြစ်လေသည်။
စောစောက ကုချန်နှင့် ရှေးဟောင်းမကောင်းဆိုးဝါး အင်မော်တယ်ဘုရင်တို့ တိုက်ခိုက်ခဲ့စဉ်က ရှေးဟောင်းမကောင်းဆိုးဝါးအင်မော်တယ်ဘုရင်သည် စကားအနည်းငယ်သာ ပြောဆိုခဲ့သော်လည်း ယွဲ့လင်အင်မော်တယ်ဘုရင်မှာ အကြမ်းဖျင်း ရိပ်မိခဲ့၏။
ဤသူ၏နောက်ခံကို မသိရသော်လည်း ထိုသူသည် အောက်ကမ္ဘာရှိ အင်မော်တယ်ဘုရင်တစ်ပါးနှင့် ပတ်သက်ဆက်နွှယ်နေသည်မှာ သေချာ၏။ ထို့အပြင် ရှေးဟောင်းမကောင်းဆိုးဝါး အင်မော်တယ်ဘုရင်၏ အင်မော်တယ်ဘုရင် အမိန့်တော်သည်လည်း လက်ရှိတွင် ဤသူ၏ လက်ထဲ၌ ရှိနေလေသည်။
ယွဲ့လင်အင်မော်တယ်ဘုရင်အနေဖြင့် ချီလျန်မျိုးနွယ်၏ သတင်းများကို စုံစမ်းရန် ကိုယ်တိုင် အောက်ကမ္ဘာသို့ မသွားခဲ့ခြင်းမှာ သူသည် အင်မော်တယ်တံခါးကို ဖန်တီးခဲ့သော အင်မော်တယ်ဘုရင်များထဲတွင် မပါဝင်ခဲ့သောကြောင့် ဖြစ်သည်။ ထိုအချိန်က အင်မော်တယ်တံခါးကို ဖန်တီးခဲ့သော အင်မော်တယ်ဘုရင် တစ်ပါးစီတိုင်းတွင် အင်မော်တယ်ဘုရင် အမိန့်တော် တစ်ခုစီ ရှိကြ၏။
ထိုအမိန့်တော်ဖြင့် သူတို့၏ လက်အောက်ငယ်သားများကို နယ်မြေဖြတ်ကျော်ခွင့် ပြုနိုင်သည်။ သို့သော် ယွဲ့လင်အင်မော်တယ်ဘုရင်မှာကား ကွာခြားလေသည်။ အကယ်၍ သူ အောက်ကမ္ဘာသို့ သွားလိုပါက အတင်းအကျပ် နယ်မြေဖြတ်ကျော်ရန်သာ ရှိ၏။ သို့သော်လည်း ထိုသို့ပြုလုပ်ပါက အခြားသော အင်မော်တယ်ဘုရင်များ၏ အာရုံစိုက်မှုကို သေချာပေါက် ဆွဲဆောင်နိုင်လိမ့်မည်။
ထိုအချိန်ကျလျှင် သူသည် ချီလျန်မျိုးနွယ်ဝင်တစ်ဦး ဖြစ်သည်ဆိုသော လျှို့ဝှက်ချက်ကို ဖုံးကွယ်ထားနိုင်တော့မည် မဟုတ်ချေ။ အကယ်၍ ထိုအခြေအနေသို့သာ ဆိုက်ရောက်သွားပါက ချန်းရှီအင်မော်တယ်ဘုရင် တစ်ပါးတည်းကသာ သူ့ကို လိုချင်တပ်မက်နေမည် မဟုတ်တော့ပေ။
သို့သော် သူ၏ရှေ့ရှိ ဤသူသည် အောက်ကမ္ဘာမှ အင်မော်တယ်ဘုရင်နှင့် ပတ်သက်နေသည်ဟု သံသယရှိရုံသာမက အင်မော်တယ်တံခါးကို ဖြတ်ကျော်နိုင်မည့် နည်းလမ်းကိုလည်း ပိုင်ဆိုင်ထားရာ ချီလျန်မျိုးနွယ်၏ သတင်းများကို စုံစမ်းရာတွင် သူ့ကို ကူညီပေးရန် အသင့်တော်ဆုံးသူ ဖြစ်နေလေသည်။
သို့တိုင် ယွဲ့လင်အင်မော်တယ်ဘုရင်မှာ တုံ့ဆိုင်းနေဆဲပင်။ သူ တုံ့ဆိုင်းနေရခြင်းမှာ ဤအရေးကြီးသော ကိစ္စကို ကုချန်အား အပ်နှံသင့်၊ မအပ်နှံသင့် ဆိုသည့်အချက်ပင် ဖြစ်သည်။
ဤသူသည် တုံးအမနေပါက သူ၏တောင်းဆိုချက်ကို ကြားသည်နှင့်တစ်ပြိုင်နက် သူသည် ချီလျန်မျိုးနွယ်နှင့် ပတ်သက်နေကြောင်း အလွယ်တကူ ခန့်မှန်းသိရှိသွားနိုင်သည်မှာ ထင်ရှားလှသည်။ သူနှင့် ဤသူမှာ လုံးဝ သူစိမ်းများဖြစ်ကြရာ ဤအချက်အလက်များကို ထုတ်ဖော်ရန် စွန့်စားသင့်ပါသလော။
မျက်စိတစ်မှိတ်အတွင်းမှာပင် ယွဲ့လင်အင်မော်တယ်ဘုရင်၏ စိတ်ထဲတွင် ပြင်းထန်စွာ လွန်ဆွဲနေလျက် ခဏတာမျှ မည်သို့ရွေးချယ်ရမည်ကို မသိတော့ချေ။
တုံ့ဆိုင်းတွေဝေနေသော ယွဲ့လင်အင်မော်တယ်ဘုရင်၏ မျက်နှာကို ကြည့်လျက် ကုချန်မှာ လုံးဝ နားမလည်နိုင်ဖြစ်နေ၏။ ဤအမျိုးသမီး ဘာတွေးနေမှန်း မသိသောကြောင့် သူ ချက်ချင်း ထွက်ခွာရန် ပြင်လိုက်လေသည်။
ရှေးဟောင်းမကောင်းဆိုးဝါးအင်မော်တယ်ဘုရင် သေဆုံးသွားမှုကြောင့် ဖြစ်ပေါ်လာသော လှိုင်းဂယက်များသည် ပတ်ဝန်းကျင် ကောင်းကင်ဘုံများဆီသို့ ပျံ့နှံ့သွားရန် အချိန်သိပ်ကြာမည်မဟုတ်ရာ ခဏချင်းပင် အခြားအင်မော်တယ်ဘုရင်များ၏ အာရုံစိုက်မှုကို ဆွဲဆောင်နိုင်လိမ့်မည်။
ကုချန်သည် ဤအင်မော်တယ်ဘုရင်များကို မကြောက်ရွံ့သော်လည်း ဤကိစ္စကြောင့် ပြဿနာမတက်ချင်သည်ဖြစ်ရာ အမြန်ဆုံး ထွက်သွားခြင်းက အကောင်းဆုံးပင်။
ကုချန် ထွက်သွားရန် ပြင်လိုက်သည်ကို မြင်သောအခါ ယွဲ့လင်အင်မော်တယ်ဘုရင်သည် နောက်ဆုံးတွင် ဆုံးဖြတ်ချက်ချလိုက်ဟန်ဖြင့် အံကိုကြိတ်ကာ ရုတ်တရက် ပြောဆိုလိုက်၏။
" ပွင့်ပွင့်လင်းလင်း ပြောရရင် တာအိုရောင်းရင်းဆီက အကူအညီတောင်းချင်တဲ့ ကိစ္စတစ်ခု ရှိလို့ပါ... တာအိုရောင်းရင်းအနေနဲ့ ချီလျန်မျိုးနွယ်အကြောင်း ကြားဖူးပါသလား "
ချီလျန်မျိုးနွယ်?
ကုချန်သည် အနည်းငယ် အံ့အားသင့်သွား၏။ ကောင်းကင်ဘုံတစ်ခုလုံးတွင် လက်ရှိအချိန်၌ သူ့လောက် ချီလျန်မျိုးနွယ်အကြောင်း နားလည်သူ ရှိမည်မထင်ပေ။ သို့သော် ယွဲ့လင်အင်မော်တယ်ဘုရင်သည် အဘယ်ကြောင့် ချီလျန်မျိုးနွယ်အကြောင်းကို ရုတ်တရက် ထုတ်မေးရသနည်း။ သူနှင့် ချီလျန်မျိုးနွယ်မှာ ဘာတွေများ ပတ်သက်နေသနည်း။
မေးခွန်းထုတ်ကာ အကဲခတ်နေသော ကုချန်၏အကြည့်ကို မြင်သောအခါ ယွဲ့လင်အင်မော်တယ်ဘုရင်၏ စိတ်ထဲတွင် လေးလံသွားသော်လည်း တစ်ချိန်တည်းမှာပင် ရှောင်လွှဲ၍မရနိုင်ကြောင်း ခံစားလိုက်ရသည်။
ကုချန်၏အမူအရာကို ကြည့်ရုံဖြင့် ဤသူသည် ချီလျန်မျိုးနွယ်နှင့် ပတ်သက်၍ အနည်းငယ် နားလည်ထားကြောင်း သူ သိလိုက်ရ၏။ ထို့ကြောင့် သူ ချီလျန်မျိုးနွယ်၏ သတင်းများကို မေးမြန်းလိုက်သည်နှင့် သူ၏ကိုယ်ပိုင်အကြောင်းကို ချက်ချင်း သံသယဝင်သွားခဲ့ပြီ ဖြစ်သည်။
" ပွင့်ပွင့်လင်းလင်း ပြောရရင် လွန်ခဲ့တဲ့အချိန်... ချီလျန်မျိုးနွယ်က အင်မော်တယ်နယ်မြေကို သစ္စာမဖောက်ခင်က သူတို့မျိုးနွယ်ထဲက 'ချီယွဲ့' ဆိုတဲ့သူက ကျွန်မရဲ့ မိတ်ဆွေဟောင်းပါ... ဒါပေမယ့် အင်မော်တယ်နယ်မြေကို သစ္စာမဖောက်ခင် ညမှာ သူက ကျွန်မအတွက် အရမ်းအရေးကြီးတဲ့ အမြင့်မြတ်ဆုံး ရတနာတစ်ခုကို ခိုးယူသွားခဲ့တယ်.....
နောက်ပိုင်းမှာ သူက ချီလျန်မျိုးနွယ်နဲ့အတူ နတ်ဆိုးနယ်မြေဆီ ပုန်ကန်ထွက်ပြေးသွားတော့ ကျွန်မလည်း သူ့ကို ရှာစရာနေရာ မရှိတော့ဘူး.....
ဒီနှစ်တွေထဲမှာ ဒီရတနာကို ပြန်ယူချင်လို့ ချီလျန်မျိုးနွယ်ရဲ့ သတင်းတွေကို စုံစမ်းဖို့ ဘယ်တော့မှ လက်မလျှော့ခဲ့ပါဘူး... အဲဒါကြောင့် တာအိုရောင်းရင်းအနေနဲ့ ချီလျန်မျိုးနွယ်အကြောင်း သိထားရင် ချီယွဲ့ရဲ့ သတင်းကိုများ စုံစမ်းပေးနိုင်မလားလို့ မေးချင်တာပါ "
ယွဲ့လင်အင်မော်တယ်ဘုရင်သည် ဖြည်းညင်းစွာ ပြောဆိုလိုက်သည်။ သူ၏စကားများထဲတွင် ချီယွဲ့အပေါ် မသိမသာ နာကြည်းမုန်းတီးမှုများ ပါဝင်နေ၏။
ယွဲ့လင်အင်မော်တယ်ဘုရင်သည် သူကိုယ်တိုင်က ချီလျန်မျိုးနွယ်ဝင်တစ်ဦး ဖြစ်ကြောင်း ကုချန်အား တိုက်ရိုက် မပြောနိုင်ပေ။ ယင်းအစား ချီလျန်မျိုးနွယ်မှ တစ်စုံတစ်ယောက်နှင့် ရန်ငြိုးရှိပြီး ထိုသူက သူ၏ရတနာကို ခိုးယူသွားသောကြောင့် ချီလျန်မျိုးနွယ်၏ သတင်းကို စုံစမ်းလိုခြင်းဖြစ်ကြောင်း ပါးနပ်စွာ အကြောင်းပြချက် ဖန်တီးလိုက်ခြင်း ဖြစ်သည်။ ဤသို့သော အကြောင်းပြချက်သည် ယုတ္တိရှိ၍ အခြားသူများ၏ သံသယကိုလည်း ဖြစ်ပေါ်စေမည် မဟုတ်ချေ။
ချီယွဲ့?
ကုချန်သည် သူ၏စိတ်ထဲတွင် ဤနာမည်ကို ရှာဖွေကြည့်သော်လည်း ချီလျန်မျိုးနွယ်ဝင်များစွာထဲတွင် ဤနာမည်ကို မကြားဖူးကြောင်း တွေ့ရသဖြင့် စုံစမ်းကြည့်ရန် လိုအပ်ပေလိမ့်မည်။
သို့သော် ယွဲ့လင်အင်မော်တယ်ဘုရင် ပေးသော အကြောင်းပြချက်ကို ကုချန် အပြည့်အဝ မယုံကြည်ပေ။
ချီလျန်မျိုးနွယ်မှ အင်မော်တယ်နယ်မြေကို သစ္စာဖောက်ခဲ့သည်မှာ နှစ်သောင်းပေါင်း မည်မျှကြာခဲ့ပြီနည်း။ ထိုအချိန်က ယွဲ့လင်အင်မော်တယ်ဘုရင်သည် အင်မော်တယ်ဘုရင်အဆင့်သို့ပင် ရောက်ရှိသေးမည် မဟုတ်ချေ။ ချီလျန်မျိုးနွယ်မှ တစ်စုံတစ်ယောက်က ရတနာတစ်ခုကို ခိုးယူသွားခဲ့လျှင်တောင်မှ ယခုအချိန်တွင် အရေးပါတော့မည် မဟုတ်ပေ။
အင်မော်တယ်ဘုရင်အဆင့် တည်ရှိမှုတစ်ခုအနေဖြင့် တစ်ဖက်လူကို ရှာဖွေရန် ကျယ်ဝန်းလှသော ကောင်းကင်ဘုံများကို ဖြတ်ကျော်ရသည့် တန်ဖိုးပေးပြီး ဤမျှလောက် အာရုံစိုက် မှတ်သားထားရန် တန်ပါသလော။
" ငါကိုယ်တော်က ချီယွဲ့ရဲ့ သတင်းကို စုံစမ်းပေးလို့ရပါတယ်... ဒါပေမယ့် မင်းက ဘယ်လို ဆုလာဘ်မျိုး ပေးမှာလဲ "
ကုချန်သည် တည်ငြိမ်သော အမူအရာဖြင့် မေးမြန်းလိုက်၏။
ဒီလူက တကယ် သဘောတူလိုက်တာလား။
ကုချန်မှ စုံစမ်းပေးရန် ရည်ရွယ်ထားသည်ကို မြင်သောအခါ ယွဲ့လင်အင်မော်တယ်ဘုရင်၏ စိတ်ထဲတွင် ဝမ်းသာမှုများ ချက်ချင်း ပြည့်နှက်သွားတော့၏။
ကုချန်က သူ့အား လှည့်စားမည်ကို သူ မကြောက်ရွံ့ပေ။ အကြောင်းမှာ ချီယွဲ့ဆိုသော နာမည်သည် သူ ချက်ချင်း လုပ်ကြံဖန်တီးထားခြင်း မဟုတ်သောကြောင့်ပင်။ ကုချန်သည် သူ့အတွက် ချီလျန်မျိုးနွယ်၏ သတင်းများကို အမှန်တကယ် စုံစမ်းပေးမည်ဆိုပါက ကုချန်၏ အဖြေတွင် အမှားအမှန်ကို သူ ကျိန်းသေပေါက် ခွဲခြားနိုင်မည် ဖြစ်သည်။
ပေးဆပ်ရမည့် တန်ရာတန်ကြေးအတွက်မူ.....
" အင်မော်တယ်ဘုရင် လက်နက်တစ်ခု ဖန်တီးဖို့ လိုအပ်တဲ့ အင်မော်တယ် ပစ္စည်းတစ်ခုကို ပေးဖို့ ဆန္ဒရှိပါတယ် "
ယွဲ့လင်အင်မော်တယ်ဘုရင်မှ တုံ့ဆိုင်းမှုမရှိဘဲ ပြောဆိုလိုက်၏။
အင်မော်တယ်ဘုရင် လက်နက်တစ်ခု ဖန်တီးဖို့ အင်မော်တယ် ပစ္စည်းတစ်ခု?
ယွဲ့လင်အင်မော်တယ်ဘုရင် ကမ်းလှမ်းသော ဆုလာဘ်ကို ကြားသောအခါ ကုချန်မှာ ရယ်မောမိလုနီးပါး ဖြစ်သွား၏။
" ဒီလောက်လေးပဲလား... လုံးဝ မလုံလောက်သေးဘူး "
ကုချန်မှ ဖြည်းညင်းစွာ ခေါင်းခါလိုက်သည်။
အင်မော်တယ်ဘုရင် လက်နက်တစ်ခု ဖန်တီးဖို့ အင်မော်တယ် ပစ္စည်းတစ်ခုတဲ့လား။ ယွဲ့လင်အင်မော်တယ်ဘုရင်က စိတ်ကူးယဉ်လွန်းနေလေပြီ။
သူသည် ချီလျန်မျိုးနွယ်၏ အရှင်သခင်ဖြစ်ရာ ချီလျန်မျိုးနွယ်၏ သတင်းများကို အလိုရှိသလို သဘာဝကျကျ စုံစမ်းနိုင်လေသည်။ သို့သော် အခြားသူများအတွက်မူ ချီလျန်မျိုးနွယ်၏ သတင်းများကို စုံစမ်းရန်မှာ ကောင်းကင်သို့ တက်ရသည်ထက်ပင် ခက်ခဲပေလိမ့်မည်။
အင်မော်တယ်နှင့် နတ်ဆိုးနယ်မြေတို့သည် အဆုံးမဲ့ ဟွမ်သွမ့်ပင်လယ်ကြီးဖြင့် ခြားနားထား၍ သူတို့ကြားတွင် မည်သည့် ဆက်သွယ်မှုမျှ မရှိချေ။ အင်မော်တယ်နယ်မြေအတွင်း ချီလျန်မျိုးနွယ်နှင့် ပတ်သက်သော သတင်းများ ရရှိရန်ဆိုသည်မှာ အင်မော်တယ်နယ်မြေမှ ထွက်ခွာနိုင်၍ အဆုံးမဲ့ ဟွမ်သွမ့်ပင်လယ်ကြီးကို ဖြတ်ကျော်ကာ နောက်ဆုံးတွင် နတ်ဆိုးနယ်မြေသို့ ဝင်ရောက်နိုင်ပြီးမှ ချီလျန်မျိုးနွယ်နှင့် ပတ်သက်သည့် အချက်အလက်များကို ရှာဖွေနိုင်မည် ဖြစ်သည်။
အဆင့်တစ်ဆင့်ချင်းစီ၏ အခက်အခဲမှာ အခြားသူများ လုပ်ဆောင်နိုင်ရန် မပြောနှင့် အင်မော်တယ်ဘုရင်တစ်ပါးပင်လျှင် လုပ်ဆောင်နိုင်မည် မဟုတ်ချေ!
ကောင်းကင်သို့ တက်ရသည်ထက် ခက်ခဲသော ဤမျှခက်ခဲသည့် တာဝန်အတွက် သူသည် အင်မော်တယ်ဘုရင် လက်နက် ဖန်တီးရန် အင်မော်တယ် ပစ္စည်းတစ်ခုကိုသာ ဆုလာဘ်အဖြစ် ပေးရန် တွေးတောနေသည်လော။ တကယ့်ကို အချည်းနှီး စိတ်ကူးယဉ်မှုပင်။
ကုချန်၏ ပြတ်သားသော ငြင်းဆန်မှုကို မြင်သောအခါ ယွဲ့လင်အင်မော်တယ်ဘုရင်မှာ ပထမဆုံး လန့်ဖျပ်သွားပြီးနောက် သူ ကမ်းလှမ်းသော ဆုလာဘ်သည် တာဝန်၏ အခက်အခဲနှင့် မညီမျှကြောင်း သဘောပေါက်သွားဟန်ဖြင့် သွားကိုကြိတ်ကာ ပြောလိုက်လေသည်။
" အင်မော်တယ်ဘုရင် လက်နက်တစ်ခု ဖန်တီးဖို့ လိုအပ်တဲ့ အင်မော်တယ် ပစ္စည်းတွေ အားလုံးကို ပေးဖို့ ကျွန်မ ဆန္ဒရှိပါတယ် "
ဤအခြေအနေကို ကမ်းလှမ်းလိုက်ချိန်တွင် ယွဲ့လင်အင်မော်တယ်ဘုရင် ကိုယ်တိုင်ပင် ရင်ထဲ၌ နာကျင်သွားရ၏။
အဘယ်ကြောင့်ဆိုသော် ယခုအချိန်အထိ သူကိုယ်တိုင်ပိုင်ဆိုင်သော အင်မော်တယ်ဘုရင် လက်နက်တစ်ခုမျှ မရှိသေးသောကြောင့်ပင်။ နှစ်ပေါင်းများစွာ ရှာဖွေပြီးနောက် နောက်ဆုံးတွင် လိုအပ်သော အင်မော်တယ် ပစ္စည်းအားလုံးကို စုဆောင်းနိုင်ခဲ့သော်လည်း စတင်မဖန်တီးရသေးမီမှာပင် ၎င်းတို့အားလုံးကို အခြားတစ်ယောက်လက်သို့ လွှဲပြောင်းပေးရတော့မည် ဖြစ်ရာ ယွဲ့လင်အင်မော်တယ်ဘုရင်မှာ သဘာဝကျကျပင် နာကျင်ခံစားရလေတော့သည်။
အခန်း ( ၄၁၈ ) - ငါကိုယ်တော်က မင်းကို လိုချင်တယ်၊ သတ်မှတ်ချက်များ ကိုက်ညီသွားခြင်း၊ ချန်းရှီ ကြောက်ရွံ့လာခြင်း
အင်မော်တယ်ဘုရင် လက်နက်တစ်ခုလား။
ယွဲ့လင်အင်မော်တယ်ဘုရင် ကမ်းလှမ်းလာသော ဒုတိယ သတ်မှတ်ချက်ကို ကြားသော်လည်း ကုချန်သည် ခေါင်းခါနေဆဲပင်။
ရှေးဟောင်းမကောင်းဆိုးဝါးအင်မော်တယ်ဘုရင်ထံမှ ယခုလေးတင် လုယူထားသော အင်မော်တယ်ဘုရင် တိုက်ပွဲဝင်ရတနာကို ပေါ့ပေါ့ပါးပါး ထုတ်ယူပြလိုက်ရင်း သူ ပြောဆိုလိုက်သည်။
" ဒီအင်မော်တယ်ဘုရင် တိုက်ပွဲဝင်ရတနာတောင် ငါကိုယ်တော်အတွက် အရေးမကြီးဘူး... သာမန် အင်မော်တယ်ဘုရင် လက်နက်လေး တစ်ခုနဲ့ကတော့ မလုံလောက်သေးဘူး "
" ရှင်...!? "
သူ၏ကမ်းလှမ်းမှုကို ကုချန်မှ ထပ်မံငြင်းပယ်လိုက်သည်ကို မြင်သောအခါ ယွဲ့လင်အင်မော်တယ်ဘုရင်မှာ အနည်းငယ် ရှက်ဒေါသ ထွက်သွားရလေသည်။
အင်မော်တယ်ဘုရင် လက်နက်တစ်ခုနှင့်ပင် မလုံလောက်သေးဘူးလော။ ဤအင်မော်တယ် ပစ္စည်းများကို ရှာဖွေရန် သူ နှစ်သောင်းပေါင်း မရေမတွက်နိုင်အောင် အချိန်ကုန်ခံခဲ့ရသည်လေ။
သို့သော် ကုချန်၏လက်ထဲရှိ အင်မော်တယ်ဘုရင် တိုက်ပွဲဝင်အလံကို မြင်သောအခါ သူ အနည်းငယ် စိတ်ဓာတ်ကျသွားမိ၏။ အင်မော်တယ်ဘုရင် တိုက်ပွဲဝင်ရတနာတစ်ခုကို ပိုင်ဆိုင်ထားသူတစ်ယောက်အနေဖြင့် အင်မော်တယ်ဘုရင် လက်နက်တစ်ခုကို အထင်အမြင်သေးပိုင်ခွင့် ရှိသည်ကို သူ ဝန်ခံရပေမည်။
" ဒါဆို ရှင် ဘာလိုချင်တာလဲ "
ယွဲ့လင်အင်မော်တယ်ဘုရင်မှ စိတ်ပျက်လက်ပျက်ဖြင့် မေးမြန်းလိုက်၏။
အင်မော်တယ်ဘုရင် လက်နက်တစ်ခု ဖန်တီးရန် လိုအပ်သော အင်မော်တယ်ပစ္စည်းများ အားလုံးဆိုသည်မှာ သူ ပေးနိုင်သမျှထဲတွင် အကြီးမားဆုံးသော ဆုလာဘ်ပင် ဖြစ်သည်။ ဤအရာကပင် ကုချန်ကို မဆွဲဆောင်နိုင်ပါက သူ ဘာထပ်ပေးရမည်ကို အမှန်တကယ် မသိတော့ချေ။
" ငါကိုယ်တော် လိုချင်တာက..... "
ကုချန်၏အကြည့်သည် ယွဲ့လင်အင်မော်တယ်ဘုရင်အပေါ် ကျရောက်သွားရာ စူးရှသော အကြည့်များကြောင့် ယွဲ့လင်၏စိတ်ထဲတွင် သတိပေးခေါင်းလောင်းသံများ ချက်ချင်း ထွက်ပေါ်လာလေသည်။
ဒီလူ ဘာကို ကြည့်နေတာလဲ။ သူ့အပေါ်များ မကောင်းတဲ့ စိတ်ကူးတွေ ရှိနေတာလား။
ထိုသို့တွေးမိပြီး သူ့အပေါ် မကောင်းကြံရန် မစဉ်းစားရန် သတိပေးစကား ပြောတော့မည့်ဆဲဆဲမှာပင် ကုချန်၏စကားကြောင့် သူ လုံးဝ မှင်သက်သွားရတော့သည်။
" ငါကိုယ်တော် လိုချင်တာက မင်းကိုပဲ... မင်းလက်ထဲမှာရှိတဲ့ ဒီလဝိညာဉ် ကောင်းကင်ဘုံကို လိုချင်တာ "
ကုချန်မှ သူ၏သတ်မှတ်ချက်ကို ပြောဆိုလိုက်၏။ သူ့အတွက်တော့ ယွဲ့လင်အင်မော်တယ်ဘုရင်နှင့် ပတ်သက်၍ အစိတ်ဝင်စားဆုံးအရာမှာ သူ ထိန်းချုပ်ထားသော လဝိညာဉ် ကောင်းကင်ဘုံပင် ဖြစ်သည်။ အင်မော်တယ်ဘုရင်အဆင့်သို့ ရောက်ရှိပါက ကောင်းကင်ဘုံတစ်ခုကို ထိန်းချုပ်နိုင်လေသည်။
နတ်ဆိုးနယ်မြေရှိ ကုချန်၏ကိုယ်ပွားသည် အဆုံးမဲ့ ကောင်းကင်ဘုံကို ထိန်းချုပ်ထားရာ ကောင်းကင်ဘုံတစ်ခု၏ စွမ်းအားကို ထိန်းချုပ်ခြင်းက ' ကောင်းကင်ဘုံအလုံးစုံ အမှန်တရား နားလည်ခြင်း ' ကို လေ့လာရာတွင် များစွာ အထောက်အကူ ပြုလေသည်။
အကယ်၍ ဤလဝိညာဉ် ကောင်းကင်ဘုံကိုသာ သူ ရယူနိုင်ပါက ' ကောင်းကင်ဘုံအလုံးစုံ အမှန်တရား နားလည်ခြင်း ' ကို ခွဲခြမ်းစိတ်ဖြာရန် သေချာပေါက် ပိုမိုမြန်ဆန်လာမည် ဖြစ်သည်။
" ရှင်... ရှင်က ကျွန်မရဲ့ လဝိညာဉ် ကောင်းကင်ဘုံကို လိုချင်တာလား "
ကုချန်၏တောင်းဆိုချက်ကို ကြားသောအခါ သူသည် ကုချန်၏ဆိုလိုရင်းကို အထင်လွဲခဲ့မိကြောင်း သဘောပေါက်သွားသဖြင့် ယွဲ့လင်အင်မော်တယ်ဘုရင်၏ မျက်နှာမှာ နီမြန်းသွား၏။ သို့သော် ချက်ချင်းပင် သူ ဒေါသထွက်လာလေသည်။
ဒီလူက ဘယ်လိုလုပ် ဒီလောက်တောင် လောဘကြီးရတာလဲ။ ငါ့ရဲ့ လဝိညာဉ် ကောင်းကင်ဘုံကို တိုက်ရိုက် တောင်းဆိုရဲတယ်ပေါ့လေ။
ဤလဝိညာဉ် ကောင်းကင်ဘုံသည် သူ အင်မော်တယ်ဘုရင်အဆင့်သို့ ရောက်ရှိပြီးနောက် လက်ရှိအခြေအနေသို့ ရောက်လာစေရန် အချိန်ကြာမြင့်စွာ ပြုစုပျိုးထောင်ထားခဲ့ရခြင်း ဖြစ်သည်။ ယခု ဤသူသည် စကားတစ်ခွန်းတည်းဖြင့် လွယ်လွယ်ကူကူ ယူသွားချင်သည်လော။ ဤသည်မှာ အခွင့်အရေးယူ အမြတ်ထုတ်နေခြင်းပင်။
" ငါကိုယ်တော်က လဝိညာဉ် ကောင်းကင်ဘုံကို စိတ်မဝင်စားပါဘူး... မင်းအနေနဲ့ ဒီကောင်းကင်ဘုံကို ဆက်အုပ်ချုပ်ပြီး အထဲမှာရှိတဲ့ သက်ရှိတွေနဲ့ အရင်းအမြစ်အားလုံးကို ဆက်ပြီး စီမံလို့ရပါတယ်... ဒီလဝိညာဉ် ကောင်းကင်ဘုံရဲ့ ကောင်းကင်နှလုံးသား အမှတ်အသားကို ငါကိုယ်တော်ဆီ လွှဲပေးဖို့ပဲ လိုတာပါ "
ကုချန်မှ အေးဆေးတည်ငြိမ်စွာ ပြောဆိုလိုက်၏။
သူသည် ဤနယ်မြေ၏ ကောင်းကင်နှလုံးသားနှင့် ပေါင်းစပ်ကာ ' ကောင်းကင်ဘုံအလုံးစုံ အမှန်တရား နားလည်ခြင်း ' ကို အရှိန်အဟုန်ဖြင့် ခွဲခြမ်းစိတ်ဖြာနိုင်ရန်အတွက်သာ လဝိညာဉ် ကောင်းကင်ဘုံကို အလိုရှိခြင်းဖြစ်သည်။ လဝိညာဉ် ကောင်းကင်ဘုံအတွင်းရှိ အခြား မည်သည့်အရာကိုမျှ ကုချန် စိတ်မဝင်စားချေ။
လဝိညာဉ် ကောင်းကင်ဘုံရဲ့ ကောင်းကင်နှလုံးသား အမှတ်အသားကိုပဲ လိုချင်တာလား။
ဤတောင်းဆိုချက်မှာလည်း အလွန် လွန်ကဲလွန်းလှသည်။ လဝိညာဉ် ကောင်းကင်ဘုံ တစ်ခုလုံးကို ယူသွားခြင်းထက် အနည်းငယ် ပိုကောင်းသည် ဆိုသော်လည်း တန်ဖိုးမှာကြီးမားလွန်းဆဲသာ ဖြစ်၏။
အင်မော်တယ်ဘုရင်အဆင့် တည်ရှိမှုတိုင်းက အဘယ်ကြောင့် ကောင်းကင်ဘုံတစ်ခုကို ထိန်းချုပ်ကြသနည်း။ အကြောင်းမှာ ထိုကောင်းကင်ဘုံ၏ ကောင်းကင်နှလုံးသားနှင့် ပေါင်းစပ်ကာ သူတို့၏ နတ်ဝိညာဉ်ကို ကောင်းကင်နှင့်မြေကြီးတွင် အပ်နှံ၍ အဆုံးမဲ့ တာအိုများကို နားလည်သဘောပေါက်စေပြီး သူတို့၏စွမ်းအားကို လျင်မြန်စွာ မြှင့်တင်နိုင်သောကြောင့်ပင် ဖြစ်သည်။
ယခု သူသာ ဤကောင်းကင်ဘုံ၏ ကောင်းကင်နှလုံးသားကို လက်လွှတ်လိုက်ရပါက ဤလဝိညာဉ် ကောင်းကင်ဘုံကို သူ ဆက်လက်ထိန်းချုပ်နေခြင်းက ဘာအဓိပ္ပာယ် ရှိတော့မည်နည်း။
သို့သော် ဤသူသာ သူ့ထံသို့ ချီလျန်မျိုးနွယ်နှင့် ပတ်သက်သည့် သတင်းကောင်းကို အမှန်တကယ် ယူဆောင်လာပေးနိုင်မည်ဆိုပါက လဝိညာဉ် ကောင်းကင်ဘုံကို ပေးလိုက်ရခြင်းကလည်း လုံးဝ မဖြစ်နိုင်သည့် ကိစ္စတော့ မဟုတ်ပေ။
ယွဲ့လင်အင်မော်တယ်ဘုရင်မှာ တွေဝေသွားသော်လည်း ကုချန်မှာ သူ့အား အချိန်အများကြီးပေးရန် ရည်ရွယ်မထားကြောင်း ထင်ရှားလှ၏။ တဲ့တိုးပြောရလျှင် သူသည် ချီလျို၏အရှိန်အဝါ အနည်းငယ်ကို ရုတ်တရက် ထုတ်လွှတ်လိုက်ကာ အေးစက်စွာ ပြောဆိုလိုက်၏။
" ဆုံးဖြတ်ဖို့ မင်းမှာ အသက်သုံးခါရှူချိန်ပဲ အချိန်ရမယ် "
ဒါက.....
ကုချန် ထုတ်လွှတ်လိုက်သော အရှိန်အဝါကို ခံစားလိုက်ရချိန်တွင် ယွဲ့လင်အင်မော်တယ်ဘုရင်၏ သူငယ်အိမ်များမှာ ချက်ချင်း ကျုံ့သွားတော့၏။
ထိုအရှိန်အဝါလေးထံမှ သူသည် ပျောက်ဆုံးနေသည်မှာ ကြာပြီဖြစ်သော ရင်းနှီးကျွမ်းဝင်မှုတစ်ခုနှင့် သွေးကြောနက်ရှိုင်းရာမှ တုန်ခါမှုတစ်ခုကို အမှန်တကယ် ခံစားလိုက်ရ၏။ ဤရင်းနှီးမှုမှာ ထိုအရှိန်အဝါ၏ပိုင်ရှင်ကို သူ သိနေ၍မဟုတ်ဘဲ နှစ်ဦးစလုံး၏ အရှိန်အဝါများမှာ မြစ်ဖျားခံရာ တူညီနေပြီး နှစ်ဦးစလုံး ချီလျန်မျိုးနွယ်ဝင်များ ဖြစ်နေသောကြောင့်ပင်။
ဒီလူဆီမှာ ဘာလို့ ချီလျန်မျိုးနွယ်ရဲ့ အရှိန်အဝါ ရှိနေရတာလဲ။
ယွဲ့လင်အင်မော်တယ်ဘုရင်မှာ အံ့သြသွားကာ မယုံနိုင်အောင်ပင် ဖြစ်သွားရလေသည်။
ကုချန်မှ ထိုအရှိန်အဝါကို ထုတ်လွှတ်ပြခြင်းမှာ သူသည် ချီလျန်မျိုးနွယ်နှင့် ဆက်သွယ်နိုင်စွမ်းရှိကြောင်း သူ့အား သက်သေပြရန်ဖြစ်သည်ကို သူ သိသည်။ သို့သော် ထိုသူသည် ချီလျန်မျိုးနွယ်နှင့် မည်သို့ ဆက်သွယ်နိုင်ခဲ့သနည်း။
" အချိန်ပြည့်သွားပြီ... မင်းရဲ့ အဖြေကို ပြောတော့ "
အသက်သုံးခါရှူချိန်မျှ ကုန်လွန်သွားချိန်တွင် ကုချန်မှ ချက်ချင်းပင် မေးမြန်းလာ၏။
" ကျွန်မ... သဘောတူတယ် "
စိတ်ထဲမှ တွေဝေမှုများ ချက်ချင်း ရပ်တန့်သွားလျက် ယွဲ့လင်အင်မော်တယ်ဘုရင်သည် အံကိုကြိတ်ကာ ဆုံးဖြတ်ချက်ချလိုက်၏။ သူ၏ ဤဆုံးဖြတ်ချက် မှန်သလား မှားသလား သူ မသိသော်လည်း ဆုံးဖြတ်ပြီးသည်နှင့် နောင်တရရန် အခွင့်အရေး မရှိတော့ချေ။
" ကောင်းပြီ... သေချာတဲ့ သတင်းရပြီးရင် ငါကိုယ်တော်က မင်းကို ဆက်သွယ်လိုက်မယ် "
ကုချန်မှ ယွဲ့လင်အင်မော်တယ်ဘုရင်အား စူးရှစွာ တစ်ချက်ကြည့်လိုက်ပြီးနောက် လေဟာနယ်ကို ဆွဲဖြဲကာ ၎င်းအတွင်းသို့ တိုက်ရိုက်လှမ်းဝင်၍ ထိုနေရာမှ ထွက်ခွာသွားလေသည်။
စိတ်ရှုပ်ထွေးနေဆဲဖြစ်သော ယွဲ့လင်အင်မော်တယ်ဘုရင်သာ ငေးမောစွာ ရပ်ကျန်ခဲ့လေ၏။
ကုချန် ထွက်ခွာသွားသည်နှင့် ရှေးဟောင်းမကောင်းဆိုးဝါးအင်မော်တယ်ဘုရင် ကျဆုံးခြင်းကို ကိုယ်စားပြုသော ကြက်သွေးရောင် သွေးမိုးများကလည်း ကောင်းကင်ယံမှ သဲကြီးမဲကြီး ရွာသွန်းလာကာ ကောင်းကင်နှင့်မြေကြီးကို ကြက်သွေးရောင်အဖြစ် ဆိုးဆေးချယ်လိုက်တော့လေသည်။
" ဘုန်း! "
အသက်ရှူချိန် အနည်းငယ်အတွင်းမှာပင် ချန်းရှီအင်မော်တယ်ဘုရင်၏ ပုံရိပ်သည် လေဟာနယ်ထဲမှ ထွက်ပေါ်လာ၍ အရပ်မျက်နှာအနှံ့ ဖိတ်စင်နေသော သွေးမိုးများကို ကြည့်ကာ သူ၏မျက်လုံးထဲတွင် သံသယနှင့် မသေချာမှုများ ပြည့်နှက်နေလေသည်။
" ယွဲ့လင်... ခုနက ဒီမှာ ဘယ်တာအိုရောင်းရင်း ကျဆုံးသွားတာလဲ "
အင်မော်တယ်ဘုရင်တစ်ပါး ကျဆုံးသွားသည့် အရှိန်အဝါကို ခံစားလိုက်ရချိန်တွင် လဝိညာဉ် ကောင်းကင်ဘုံနှင့် အနီးဆုံးဖြစ်သော ချန်းရှီ ကောင်းကင်ဘုံ၏ အရှင်သခင်အနေဖြင့် ချန်းရှီအင်မော်တယ်ဘုရင်သည် ငြိမ်မနေနိုင်ဘဲ စုံစမ်းရန် ချက်ချင်း ပြေးလာခဲ့ခြင်း ဖြစ်သည်။
သို့သော် သူ ရောက်လာချိန်တွင် ထိုနေရာ၌ ယွဲ့လင်အင်မော်တယ်ဘုရင်ကိုသာ မြင်တွေ့ခဲ့ရ၏။
" ငါအရှင်လည်း မသိဘူး "
ယွဲ့လင်အင်မော်တယ်ဘုရင်သည် အေးတိအေးစက် ပြောဆိုလိုက်၏။
" အင်မော်တယ်ဘုရင်တစ်ပါး ကျဆုံးသွားတဲ့ အရှိန်အဝါကို ခံစားမိလို့ ငါအရှင်လည်း ပြေးလာခဲ့တာပဲ... ဒါပေမယ့် ဘယ်သူ့ကိုမှ မတွေ့ဘူး "
မင်းလည်း မသိဘူးလား။ ငါအရှင်ကို အရူးလို့ ထင်နေတာလား။ ဒါက မင်းရဲ့ လဝိညာဉ် ကောင်းကင်ဘုံ နယ်မြေလေ။ လဝိညာဉ် ကောင်းကင်ဘုံထဲမှာ ဘာဖြစ်သွားလဲဆိုတာကို မသိဘူးလို့ ငါ့ကို လာပြောနေတာလား။
ယွဲ့လင်အင်မော်တယ်ဘုရင် ပြီးစလွယ် ဖြေနေမှန်း ချန်းရှီအင်မော်တယ်ဘုရင် သိလိုက်၏။သူသည် အကြည့်များ တဖျပ်ဖျပ် လက်သွားလျက် အရိပ်အမြွက် ပြောဆိုလိုက်၏။
" ယွဲ့လင်... မင်းဆီမှာ ဒီလို ဖဲချပ်မျိုး ရှိနေလိမ့်မယ်လို့ ငါ မထင်ထားခဲ့ဘူး "
ချန်းရှီအင်မော်တယ်ဘုရင်၏ အမြင်တွင် လဝိညာဉ် ကောင်းကင်ဘုံအတွင်း အင်မော်တယ်ဘုရင်တစ်ပါး ကျဆုံးသွားခြင်းသည် ဤကောင်းကင်ဘုံ၏ အရှင်သခင်ဖြစ်သော ယွဲ့လင်အင်မော်တယ်ဘုရင်နှင့် သေချာပေါက် ပတ်သက်နေရမည် ဖြစ်သည်။
သို့သော် အင်မော်တယ်ဘုရင်တစ်ပါးကို သတ်ဖြတ်ခြင်းမှာ ယွဲ့လင် တစ်ယောက်တည်း လုပ်နိုင်သည့် ကိစ္စမဟုတ်ကြောင်း ထင်ရှားလှရာ သူ့အား လျှို့ဝှက်စွာ ကူညီပေးနေသော အခြား အင်မော်တယ်ဘုရင်များ ရှိနေရမည်။
အကယ်၍ ထိုသို့သာဆိုလျှင် ယွဲ့လင်အင်မော်တယ်ဘုရင်ကို ထပ်မံ ပစ်မှတ်ထားလိုပါက သူ ပို၍ သတိထားရမည်ဖြစ်ပြီး အလွန်အကျွံ ဖိအားမပေးမိစေရန် ဆင်ခြင်ရပေလိမ့်မည်။
မျက်စိတစ်မှိတ်အတွင်းမှာပင် ချန်းရှီအင်မော်တယ်ဘုရင်၏ စိတ်ထဲတွင် အကျိုးအပြစ်များကို ချိန်ဆကာ အကြောင်းအရာ များစွာကို တွေးတောလိုက်လေသည်။
ချန်းရှီအင်မော်တယ်ဘုရင်၏ အံ့သြကာ သတိထားနေသော အမူအရာကို မြင်လိုက်ရသောအခါ ကုချန်၏ ' အပြတ်အသတ် ခေါင်းပုံဖြတ်ခြင်း ' ကို ခံလိုက်ရ၍ စိတ်တိုနေသော ယွဲ့လင်အင်မော်တယ်ဘုရင်၏ စိတ်အခြေအနေမှာ ချက်ချင်းပင် အတော်လေး ကောင်းမွန်သွားတော့သည်။
ချန်းရှီအင်မော်တယ်ဘုရင် တစ်ခုခုကို အထင်လွဲသွားပြီဆိုတာကို သူ သိလိုက်၏။ သို့သော် ယွဲ့လင်အင်မော်တယ်ဘုရင်မှာ ဤအထင်လွဲမှုကို ဖြေရှင်းပေးရန် ရည်ရွယ်ချက် လုံးဝ မရှိခဲ့ချေ။