အခန်း (၁၃၂၅-၁၃၂၆)

အခန်း (၁၃၂၅) - သွယ်ဝိုက်သောအကာအကွယ်

ရွှီနန်ကွေ့က အေးစက်စွာ တစ်ချက်နှာခေါင်းရှုံ့လိုက်သည်။

သူ၏ မျက်ဝန်းများတွင် မာန်မာနတို့ ဝေစီနေပြီး ခပ်အေးအေးပင် ဆိုလိုက်သည်

"ငါ ငြင်းတယ်"

ဖန့်ချန်က လက်ကိုမြှောက်ကာ ယင်စစ်သည် ဘွဲ့နှင်းခန့်အပ်ခြင်း အစီရင်ခံစာတစ်ခုကို ရေးသားလိုက်ပြီး ရွှီနန်ကွေ့၏ ခန္ဓာကိုယ်ထဲသို့ တိုက်ရိုက် ရိုက်သွင်းလိုက်လေသည်။

"ဒါ... ဒါက ဘာလဲ "

ရွှီနန်ကွေ့မှာ ထိတ်လန့်တုန်လှုပ်မှုနှင့်အတူ ဒေါသများ အပြင်းအထန် ထွက်ပေါ်လာတော့သည်။

နဂါးအိုကြီးမှာ ကျွမ်းကျင်လှစွာပင် ရှေ့သို့တက်၍ ရွှီနန်ကွေ့ကို ဖိနှိပ်ချုပ်ကိုင်ထားလိုက်ရာ သူသည် ဘွဲ့နှင်းခန့်အပ်ခြင်းကို ပိုမိုမြန်ဆန်ပြီး ထိရောက်စွာ လက်ခံနိုင်သွားတော့သည်။

နင်ပေ့ယိုနှင့် လင်အန်းလန်တို့မှာ ဖန့်ချန်က ရုတ်တရက် လက်ဦးမှုယူ တိုက်ခိုက်လိမ့်မည်ဟု မထင်ထားကြသဖြင့် ၎င်းတို့၏ မျက်ဝန်းများတွင် လေးနက်တည်ကြည်မှုများ အသီးသီး ပေါ်ပေါက်လာသည်။

ခေတ္တမျှ ကြာပြီးနောက်တွင် ရွှီနန်ကွေ့၏ ဘွဲ့နှင်းခန့်အပ်ခြင်း ပြီးဆုံးသွားခဲ့ပြီ ဖြစ်သည်။

"ဖန့်လို့ခေါ်တဲ့ကောင်... မင်း ငါ့အပေါ် ဘာတွေလုပ်လိုက်တာလဲ "

ရွှီနန်ကွေ့သည် သူ၏ ရင်ထဲမှ ဒေါသများကို အတင်းအကျပ် ဖိနှိပ်ထားလိုက်သည်။

အရာအားလုံးက ဖြစ်ပျက်သွားခဲ့ပြီဖြစ်ရာ ယခု သူသိချင်သည်မှာ မိမိခန္ဓာကိုယ်တွင် ဘာတွေဖြစ်ပျက်သွားသနည်း၊ ၎င်းကို ဖြေဖျောက်ရန် နည်းလမ်း ရှိသလော ဆိုသည်ကိုပင်။

ခုနက ထိုလျှို့ဝှက်ဆန်းပြားသော စွမ်းအားမှာ သူ၏ ဝိညာဉ်နှင့် လုံးဝဥဿုံ တစ်သားတည်း ပေါင်းစည်းသွားသကဲ့သို့ ခံစားလိုက်ရသည်။

"နေဦး..."

နင်ပေ့ယိုက ရွှီနန်ကွေ့ ဆက်ပြောမည့် စကားကို ရုတ်တရက် တားဆီးလိုက်သည်။

သူက ဖန့်ချန်ကို လေးနက်စွာ စိုက်ကြည့်နေရင်း အံ့ဩတုန်လှုပ်စွာဖြင့် ဆိုလိုက်သည်

"မင်း ခုနက ရေးလိုက်တာက... ရှေးယခင်ကတည်းက ငရဲမင်းအနွယ်ဝင်တွေပဲ ရေးထိုးနိုင်တဲ့ ဘွဲ့နှင်းခန့်အပ်ခြင်း လား "

"ငရဲမင်း"

ရွှီနန်ကွေ့၏ စိတ်အာရုံမှာ လှုပ်ခတ်သွားပြီး သူ နှစ်ပေါင်းများစွာ စုဆောင်းခဲ့သော သတင်းအချက်အလက် အမျိုးမျိုးမှာ ဦးနှောက်ထဲတွင် ပေါ်လာတော့သည်။

ထိုအထဲမှ ငရဲမင်းနှင့် ပတ်သက်သည့် အပိုင်းအစများကို ထုတ်ယူကာ ဖန့်ချန် အစောပိုင်းက ပြောခဲ့သော ယင်လောကတရားဝင်နတ်ဘုရား ဆိုသည့် အဓိက စကားလုံးနှင့် ပေါင်းစပ်ကြည့်လိုက်သောအခါ... လူကို ကြက်သီးထသွားစေလောက်သည့် နိဂုံးတစ်ခုကို ရရှိလိုက်တော့သည်။

"နင်မိတ်ဆွေက ဒီလမ်းစဉ်အကြောင်းကို တော်တော်လေး သိထားတာပဲ၊ ငါ ခုနက ရေးလိုက်တာက တကယ်ပဲ ဘွဲ့နှင်းခန့်အပ်ခြင်းပါပဲ"

ဖန့်ချန်က ခေါင်းညိတ်ပြလိုက်သည်။

နင်ပေ့ယို၏ မျက်ဝန်းများတွင် မယုံနိုင်စရာ အရိပ်အယောင်များ ပေါ်လာတော့သည်

"လူ့လောကကိုးခုမှာ ယင်လောကကူးသူ ဘယ်နှယောက်လောက်က ဖူထူလောက ထဲမှာ ငရဲမင်းအနွယ်ဝင်တွေရဲ့ အမွေအနှစ်ကို ရှာဖို့ ကြိုးစားနေကြလဲ မင်းသိလား "

"အများကြီး ရှိမှာပေါ့"

ဟု ဖန့်ချန်က ဆိုသည်။

"အများကြီးတင် ဘယ်ကမလဲ... ဒါဟာ လူ့လောကကိုးခုမှာ အစွမ်းအထက်ဆုံး နတ်ဘုရားဆုံစည်းမှု တွေထဲက တစ်ခုလို့ အားလုံးက သတ်မှတ်ထားကြတာ။ အောက်ခြေနယ်မြေ ခြောက်ခုမှာဆိုရင် အင်အားကြီးအဖွဲ့အစည်း အမြောက်အမြားက ဒီကိစ္စအတွက် လူအင်အားနဲ့ စွမ်းအင်တွေ အများကြီး သုံးစွဲနေကြတာ "

"ဖူထူလောကထဲမှာ ဘာလို့ ဒီလောက် ယင်လောကကူးသူတွေ များနေရတာလဲ ယင်သက်တမ်းက ငါတို့ရဲ့ ကျင့်ကြံခြင်းအတွက် အကျိုးရှိလို့၊ မသေမျိုးကျောက်တုံးတွေရဲ့ အာနိသင်ကို အစားထိုးနိုင်လို့ ဆိုတာအပြင်... ငရဲမင်းအမွေအနှစ် ဆိုတာက ငါတို့ အလိုအပ်ဆုံးအရာပဲ "

"အထက်သုံးနယ်မြေက ထိပ်တန်းဂိုဏ်းကြီးအချို့ဆိုရင် ဒီကိစ္စအတွက် နှစ်ပေါင်း သောင်းနဲ့ချီပြီးတောင် ကြိုးစားနေခဲ့ကြတာ အောက်ခြေနယ်မြေ ခြောက်ခုက ကျင့်ကြံသူ အတော်များများဟာ သူတို့ရဲ့ ညွှန်ကြားချက်အရ ဖူထူလောကထဲမှာ ငရဲမင်းအမွေအနှစ်ရဲ့ အစအနကို ရှာဖွေနေကြတာပဲ"

နင်ပေ့ယို၏ အမူအရာမှာ တည်ကြည်လေးနက်နေပြီး ဖန့်ချန်ကို ကြည့်နေသည့် သူ၏ အကြည့်များမှာ အံ့ဩရုံသာမက စူးစမ်းလိုစိတ်နှင့် ဝမ်းသာအားရမှုတို့ပါ ရောယှက်နေသည်။

သူက ဆက်ပြောသည်မှာ

"ဝိညာဥ်နတ်ဘုရားဂိုဏ်းက ဒီကိစ္စကို အလေးထားရုံတင်မကဘူး၊ ဝိညာဉ်သုတ်သင်ခြင်းဌာန ထဲမှာလည်း ဒီကိစ္စကို တာဝန်ယူရတဲ့ သီးသန့်ကျင့်ကြံသူတွေ ရှိတယ်"

"ဘာလို့ ငါ မသိရတာလဲ "

ရွှီနန်ကွေ့က အလိုအလျောက် မေးလိုက်မိသည်။

ယခုအခါ သူသည် မိမိခန္ဓာကိုယ်ထဲရှိ ထိုဘွဲ့နှင်းခန့်အပ်ခြင်းက ဘာကို ကိုယ်စားပြုသနည်း ဆိုသည်ကို တဖြည်းဖြည်း နားလည်လာပြီ ဖြစ်သည်။

သို့သော် အပြည့်အဝတော့ မသေချာသေးချေ။

"ဘာလို့လဲဆိုတော့ ဝိညာဉ်သုတ်သင်ခြင်းဌာနမှာ မင်းရဲ့ ရာထူးက နင်မိတ်ဆွေလောက် မမြင့်လို့လေ"

"ငါ့အထင်တော့ နင်မိတ်ဆွေက ချင်းကျွဲမိတ်ဆွေရဲ့ အမိန့်ကို နာခံပြီး ငါတို့နဲ့အတူ ရှဲ့ကျစ် လုပ်နေတာဆိုပေမဲ့၊ သူ့ရဲ့ တကယ့်အဆင့်အတန်းက ငါတို့ထက် ပိုမြင့်ရမယ်။ နန်ချင်းကြယ်တာရာနယ်မြေရဲ့ ရှုံးနိမ့်မှုထဲက အသေးစိတ်အချက်အလက်တွေကိုတောင် သူက ငါတို့ထက် ပိုသိနေလိမ့်မယ်"

ဟု ဖန့်ချန်က ပြုံးလျက် ဆိုသည်။

"မဟုတ်ပါဘူးလား တကယ်ပဲလား "

ရွှီနန်ကွေ့က နင်ပေ့ယိုကို အလိုအလျောက် လှမ်းကြည့်လိုက်သည်။

"တကယ်တော့ ငါ့အဆင့်အတန်းကလည်း အဲလောက် မမြင့်ပါဘူး၊ ငါက အထက်သုံးနယ်မြေက လာတာဖြစ်ပြီး အခု အောက်ခြေနယ်မြေ ခြောက်ခုမှာ လေ့ကျင့်နေတာမို့ သိထားတဲ့ အကြောင်းအရာတွေက နည်းနည်း ပိုများနေရုံပါပဲ"

ဟု နင်ပေ့ယိုက ခပ်ပေါ့ပေါ့ပင် ပြောလိုက်သည်။

ရွှီနန်ကွေ့ ချက်ချင်းပင် စကားမဟတော့ချေ။

တစ်ဖက်လူက အထက်သုံးနယ်မြေက လာသည်ဆိုကတည်းက သူ့ရဲ့ အဆင့်အတန်းက သာမန်မဟုတ်တော့သလို ဟွမ်ချင်းကျွဲကတောင် ရှဲ့ကျစ်ထဲ ထည့်သွင်းထားရသည်ဆိုလျှင်... ဤသူမှာ ဝိညာဉ်သုတ်သင်ခြင်းဌာန၏ တကယ့် အထက်လူကြီးတစ်ဦး၏ သားသမီး သို့မဟုတ် အနွယ်ဝင် ဖြစ်နေပေလိမည်။

"ယင်လောကတရားဝင်နတ်ဘုရားတွေဟာ ဒဏ္ဍာရီအရဆိုရင် မသေနိုင်၊ မပျက်နိုင်ဘူး၊ ယင်သက်တမ်းသာ လုံလောက်ရင် ကမ္ဘာတည်သရွေ့ ရှင်သန်နိုင်ကြတယ် "

နင်ပေ့ယိုက ဆက်ပြောသည်

"ဒါတင်မကသေးဘူး၊ နတ်ဘုရားဝိညာဉ်တွေက လူ့လောကကိုးခုမှာလည်း သွားလာနိုင်ကြတယ်အခြေခံက ယင်လောကမှာ ဖြစ်နေတာကလွဲရင် ကျန်တာအားလုံးက လေလွင့်မသေမျိုး တွေနဲ့ ဘာမှမခြားနားဘူး "

သူက ဖန့်ချန်ကို ကြည့်ကာ

"ငါ ပြောတာ မှန်သလား၊ မှားသလား "

"ဒီလိုပဲ နားလည်လို့ ရပါတယ်"

ဖန့်ချန်က ခေါင်းညိတ်ပြလိုက်သည်။

နင်ပေ့ယိုက လက်အုပ်ချီ ဂါရဝပြုလိုက်ရင်း

"ဒါဆိုရင် ဖန့်မိတ်ဆွေ... ကျေးဇူးပြုပြီး ငါ့ကိုလည်း ဘွဲ့နှင်းခန့်အပ်ပေးပါ၊ ငါ ယင်လောက ဝိညာဉ်သုတ်သင်ခြင်းဌာနကို ဝင်ချင်ပါတယ်"

နင်ပေ့ယိုအတွက် ဘွဲ့နှင်းခန့်အပ်ခြင်းက ပိုလွယ်ကူသွားသည်။

သူက မခုခံသည့်အပြင် လိုလိုလားလား ရှိနေသဖြင့် ခဏချင်းမှာပင် အောင်မြင်သွားတော့သည်။

သူ၏ ဝိညာဉ်နှင့် ယခင်ကွာခြားချက်ကို ပြန်လည်ခံစားနေစဉ်အတွင်း ဖန့်ချန်၏ အကြည့်က လင်အန်းလန်ဆီသို့ ရောက်သွားသည်။

"ငါလည်း ရွေးချယ်စရာ မရှိတော့ဘူး ထင်တယ်"

လင်အန်းလန်က အေးအေးဆေးဆေးပင် ပြုံးလိုက်ရင်း

"ဖန့်မိတ်ဆွေ... ကျေးဇူးပြုပြီး ဘွဲ့နှင်းခန့်အပ်ပေးပါ"

နာရီဝက်ခန့် ကြာပြီးနောက်...။

သုံးဦးစလုံးသည် ယင်လောကတရားဝင်နတ်ဘုရားနှင့် ပတ်သက်၍ အမြင်သစ်များ ရရှိသွားကြသည်။

ရွှီနန်ကွေ့သည် ဤဘွဲ့နှင်းခန့်အပ်ခြင်းက သူ၏ ကျင့်ကြံခြင်းကို မထိခိုက်စေရုံသာမက၊ သူသေဆုံးသွားပြီးလျှင်တောင် နတ်ဘုရားဝိညာဉ်အဖြစ် ဆက်လက် ကျင့်ကြံနိုင်မည်ကို သိလိုက်ရသောအခါ သူ၏ ရင်ထဲမှ မကျေနပ်မှုများမှာ လွင့်စင်ပျောက်ကွယ်သွားတော့သည်။

ထိုဘွဲ့နှင်းခန့်အပ်ခြင်းက သူ၏ အပေါ်တွင် ကန့်သတ်ချက်တစ်ခု ထပ်တိုးလိုက်သကဲ့သို့ ဖြစ်နေသော်လည်း ရရှိမည့် အကျိုးကျေးဇူးများနှင့် ယှဉ်လျှင် ထိုကန့်သတ်ချက်မှာ ပြောပလောက်စရာ မဟုတ်တော့ချေ။

"ဒါဆို ငါက သွယ်ဝိုက်တဲ့နည်းနဲ့... ထာဝရအသက်ကို ရလိုက်တာပေါ့၊ ရှေးခေတ်တုန်းက နတ်ဘုရားလောကထဲကို ပျံတက်သွားသလိုပဲ၊ နတ်ဘုရားစွမ်းအား တွေအတွက်လည်း ပူစရာ မလိုတော့ဘူး"

ရွှီနန်ကွေ့က တိုးညင်းစွာ ရေရွတ်ရင်း ကျေနပ်နေမိသည်။

"နင်မိတ်ဆွေ... မင်းအကြောင်းကို မိတ်ဆက်ပေးပါဦး"

ဖန့်ချန်က နင်ပေ့ယိုကို ကြည့်ကာ ပြုံးလျက် ဆိုသည်။

နင်ပေ့ယိုသည် သူ၏ ခန္ဓာကိုယ်အတွင်း စီးဝင်နေသော ယင်စွမ်းအားများ၏ သာယာမှုကို ခံစားနေရင်းမှ ခေါင်းညိတ်ပြကာ

"နင်ပေ့ယို... အထက်သုံးနယ်မြေ ဖန့်ချွန့် က နင်မျိုးနွယ်စုဝင်ပါ။ ငါတို့မျိုးနွယ်စုထဲမှာ အဆင့် (၉) ဘိုးဘေးကြီး ကိုယ်တိုင် ရှိပါတယ်"

"အဆင့် (၉) ဘိုးဘေးကြီး "

ရွှီနန်ကွေ့မှာ အသက်ရှူမှားမတတ် အံ့ဩသွားပြီး နင်ပေ့ယိုကို တစ်ခါမှ မမြင်ဖူးသူကဲ့သို့ ကြောင်ကြည့်နေမိသည်။

လင်အန်းလန်၏ မျက်နှာတွင်လည်း တုန်လှုပ်ခြောက်ခြားသော အရိပ်အယောင်များ ပေါ်လာတော့သည်။

နင်ပေ့ယို၏ နောက်ခံမှာ ဤမျှအထိ ကြောက်မက်ဖွယ်ကောင်းနေလိမ့်မည်ဟု မထင်ထားခဲ့ကြချေ။

သူ၏နောက်ကွယ်တွင် အဆင့် (၉) မသေမျိုး ရှိနေသည်လား...။

လူ့လောကကိုးခုလုံးမှာ အဆင့် (၉) ကျင့်ကြံသူ ဘယ်နှယောက်များ ရှိလို့လဲ

အဆင့် (၉) ထားပါဦး၊ အောက်ခြေနယ်မြေ ခြောက်ခုမှာဆိုရင် အဆင့် (၈) မသေမျိုးရဲ့ အစအနလေးတောင် မြင်တွေ့ဖို့ မဖြစ်နိုင်ဘူး။

ဟွမ်မျိုးနွယ်စုဟာ သိုင်းဝိညာဥ်နယ်မြေမှာ ဩဇာအာဏာ အလွန်ကြီးမားပြီး ဝိညာဉ်သုတ်သင်ခြင်းဌာနကို လက်ဝါးကြီးအုပ်ထားတယ်ဆိုပေမဲ့ သူတို့နောက်ကွယ်မှာ အဆင့် (၇) ရှေးဟောင်းမသေမျိုး တစ်ဦးပဲ ရှိတာလေ။

"ဒါကြောင့်မို့လို့ သခင်လေးက မင်းရဲ့ အဆင့်အတန်းက သာမန်မဟုတ်ဘူး၊ ငါတို့ထက် ပိုသိတယ်လို့ ပြောတာကိုး"

ရွှီနန်ကွေ့က တံတွေးတစ်ချက် မျိုချရင်း တိုးတိုးလေး ရေရွတ်လိုက်သည်။

"ဒီတစ်ခေါက် နန်ချင်းကြယ်တာရာနယ်မြေမှာ ဘာတွေ ပြဿနာတက်ခဲ့တာလဲ ငါတို့ရဲ့ တကယ့်ပစ်မှတ်က ဘယ်သူလဲ "

ဖန့်ချန်က နင်ပေ့ယိုကို ကြည့်ကာ မေးလိုက်သည်။

နင်ပေ့ယိုက ရှင်းပြသည်မှာ

"ငါတို့က နှစ်ယောက်တစ်တွဲစီ ခွဲပြီး ဒါယူး မသေမျိုးအရှင်၊ လုံဖူ မသေမျိုးအရှင်၊ ကျိတူခုံးယွမ် ၊ ဖေးလု မသေမျိုးအရှင်၊ ချန်ခုန်း မသေမျိုးအရှင် တို့ကို စောင့်ကြည့်ခဲ့ကြတယ် "

"ပိုနေတဲ့ တစ်ယောက်ကတော့ တန့်ဌာနမှူး ပေါ့၊ သူ့ရဲ့ ပစ်မှတ်က ထိုက်ရွှီမသေမျိုးအရှင် ပဲ။ ပြီးတော့ ထိုက်ရွှီမသေမျိုးအရှင်ဟာ ချင်းကျွဲမိတ်ဆွေရဲ့ ဒီတစ်ခေါက် တကယ့်ပစ်မှတ်ပဲ ဖြစ်တယ်"

"ထိုက်ရွှီမသေမျိုးအရှင် "

ရွှီနန်ကွေ့နှင့် လင်အန်းလန်တို့မှာ တစ်ဦးကိုတစ်ဦး ကြည့်လိုက်ကြပြီးနောက် မှင်သက်သွားကြသည်။

နန်ချင်ကြယ်တာရာနယ်မြေက ရှေးဟောင်းမသေမျိုး တစ်ပိုင်း ဖြစ်တဲ့ ထိုက်ရွှီကလည်း ဝိညာဉ်သုတ်သင်ခြင်းဌာန ကျင့်ကြံသူပဲလား

သူက နန်ချင်းကြယ်တာရာနယ်မြေရဲ့ ဝိညာဉ်သုတ်သင်ခြင်းဌာန ဌာနမှူးလား

"ရှေးဟောင်းနယ်မြေရဲ့ ဝိညာဉ်သုတ်သင်ခြင်းဌာနဟာ ပရမ်းပတာ ဖြစ်နေတာ နှစ်တော်တော်ကြာပြီ ဒါဟာ ရှေးဟောင်းနယ်မြေမှာ အခြေစိုက်တဲ့ ဝိညာဉ်သုတ်သင်ခြင်းဌာနရဲ့ အဆင့် (၇) ရှေးဟောင်းမသေမျိုး ရုတ်တရက် ပျောက်ဆုံးသွားတာနဲ့ အများကြီး ပတ်သက်နေတယ် "

နင်ပေ့ယိုက လေးနက်သောအသံဖြင့် ဆက်ပြောသည်

"ချင်းကျွဲမိတ်ဆွေ ရထားတဲ့ သဲလွန်စတွေအရဆိုရင် ဒီကိစ္စဟာ ထိုက်ရွှီမသေမျိုးအရှင်နဲ့ ပတ်သက်နိုင်တယ်လို့ သူ ယူဆထားတယ် "

"ဒါပေမဲ့ ရှေးဟောင်းမသေမျိုး တစ်ပိုင်း တစ်ယောက်ကို စုံစမ်းဖို့ဆိုတာ ငါတို့ ရှဲ့ကျစ်ရဲ့ လုပ်ပိုင်ခွင့်နဲ့ဆိုရင် ဘယ်လိုမှ မလုံလောက်ဘူး။ ဒါကြောင့် ငါက အထက်သုံးနယ်မြေနဲ့ ဆက်သွယ်နိုင်အောင် ဒါယူး မသေမျိုးအရှင်ကို ကူပြီး အကူအညီ တောင်းပေးခဲ့ရတာ။ အဲဒီလိုနဲ့ပဲ အခု အခွင့်အရေးကို ရခဲ့တာပါ "

"ဒါပေမဲ့ အထက်သုံးနယ်မြေဘက်က ရှင်းရှင်းလင်းလင်း ပြောထားပြီးသား၊ တကယ်လို့ ဒီစစ်ဆင်ရေးက ပေါက်ကြားသွားပြီး ဘာသက်သေမှ မပြနိုင်ဘူးဆိုရင် သူတို့က ဒီကိစ္စကို အသိအမှတ်ပြုမှာ မဟုတ်ဘူး။ အကျိုးဆက်အားလုံးကို ငါတို့ ရှဲ့ကျစ်တွေပဲ ခံရလိမ့်မယ်။ ထိုက်ရွှီမသေမျိုးအရှင်က ရှေးဟောင်းမသေမျိုး တစ်ပိုင်း ဖြစ်သလို ကျွယ်မင်နတ်နန်းတော်နဲ့လည်း ရင်းနှီးတာကြောင့် အထက်သုံးနယ်မြေအတွက်ဆိုရင် သူ့ရဲ့ အရေးပါမှုက ငါတို့လို ရှဲ့ကျစ်တွေထက် အများကြီး ပိုမြင့်မားတယ်လေ"

"ငါက ဒါယူး မသေမျိုးအရှင်က သစ္စာဖောက် လို့ ထင်နေတာ..."

ရွှီနန်ကွေ့က တိုးတိုးလေး ရေရွတ်လိုက်မိသည်။

ကြာလာတော့မှ... တစ်ဖက်လူက ရှဲ့ကျစ်ကို ဖျက်သိမ်းလိုက်ပြီး သူတို့ရဲ့ ရာထူးတွေကို ရုပ်သိမ်းလိုက်တာဟာ သွယ်ဝိုက်တဲ့နည်းနဲ့ သူတို့ကို အကာအကွယ်ပေးလိုက်တာ ပါလား ဆိုတာကို သူ နားလည်သွားတော့သည်။

အခန်း (၁၃၂၆) - ခြေကုပ်ယူနိုင်ခြင်း၏ အခြေခံအရင်းခံ

"နေဦး... မင်းပြောပုံအရဆိုရင် ဌာနမှူးတန့် ဟာ ထိုက်ရွှီမသေမျိုးအရှင်ရဲ့ လက်ချက်နဲ့ သေဆုံးသွားခဲ့တာပေါ့ ဟုတ်လား"

ရွှီနန်ကွေ့က အလောတကြီး မေးမြန်းလိုက်သည်

"ဒါဆိုရင် ဝိညာဉ်သုတ်သင်ခြင်းဌာနက သူ့ကို ဘာလို့ အရေးမယူတာလဲ ဒါဟာ ထိုက်ရွှီမသေမျိုးအရှင်မှာ တစ်ခုခု မရိုးသားဘူးဆိုတာ သက်သေပြနေတာပဲ မဟုတ်လား"

နင်ပေ့ယိုက ခါးသီးစွာ ပြုံးလျက် ခေါင်းခါယမ်းလိုက်သည်

"ကိစ္စတွေက မင်းထင်သလောက် မရိုးရှင်းဘူး ရွှီမိတ်ဆွေ...။ ရှဲ့ကျစ်အဖွဲ့အနေနဲ့ အခိုင်အမာ ခြေကုပ်ယူနိုင်ဖို့ဆိုရင် ခိုင်လုံတဲ့ သက်သေအထောက်အထား လိုအပ်တယ်၊ ခန့်မှန်းချက်တွေ ဒါမှမဟုတ် အပေါ်ယံ သံသယတွေနဲ့တင် တစ်ယောက်ယောက်ကို အပြစ်ပေးလို့ မရဘူး။ ငါတို့ ဒီနှစ်တွေမှာ စုံစမ်းအရေးယူခဲ့တဲ့ ဌာနမှူးတွေထဲမှာ ဘယ်သူကများ အထက်အောက် သက်သေကွင်းဆက် ခိုင်ခိုင်မာမာ မရှိဘဲနဲ့ အရေးယူခံခဲ့ရလို့လဲ"

"ဒါကတော့ ဟုတ်ပါပြီ... ဒါပေမဲ့ တချို့အချိန်တွေမှာလည်း အခြေအနေအရ ပြောင်းလဲ လုပ်ဆောင်သင့်တာပေါ့"

ဟု ရွှီနန်ကွေ့က တိုးညင်းစွာ ဆိုသည်။

နင်ပေ့ယိုက သက်ပြင်းတစ်ချက်ကို ခပ်ဖွဖွချလိုက်ရင်း

"ဒါဟာ ရှဲ့ကျစ်အဖွဲ့ရဲ့ ခြေကုပ်ယူနိုင်ခြင်း အခြေခံအရင်းခံပဲ၊ ချင်းကျွဲမိတ်ဆွေကလည်း ဒါကိုသုံးပြီး အထက်လူကြီးတွေကို သူ့ရဲ့ စိတ်ရင်းနဲ့ ရပ်တည်ချက်ကို ပြသခဲ့တာ။ ဒါဟာ ဘယ်လိုမှ လှုပ်ခါလို့မရတဲ့ အခြေခံမူပဲ။ ဒီလို တိကျတဲ့ စည်းမျဉ်းရှိနေလို့သာ အထက်လူကြီးတွေက ငါတို့ကို အားပေးကူညီကြတာ၊ မဟုတ်ရင် ငါတို့ကို တစ်စုံတစ်ယောက်ရဲ့ ရှင်းလင်းရေး ကိရိယာတစ်ခုလိုပဲ မြင်ကြလိမ့်မယ်"

"ဒီတစ်ခေါက်မှာတော့ ဌာနမှူးတန့်ဟာ ထိုက်ရွှီမသေမျိုးအရှင်နဲ့ ဝိညာဥ်နတ်ဘုရားဂိုဏ်းတို့ ပူးပေါင်းကြံစည်နေတဲ့ သက်သေကိုရော၊ ရှေးဟောင်းနယ်မြေမှာ အခြေစိုက်တဲ့ အဆင့် (၇) ရှေးဟောင်းမသေမျိုး ပျောက်ဆုံးမှုဟာ ထိုက်ရွှီမသေမျိုးအရှင်နဲ့ ပတ်သက်နေတယ်ဆိုတဲ့ သက်သေကိုရော ရှာမတွေ့ခဲ့ဘူး ထင်တယ်"

နင်ပေ့ယိုက ဆက်ပြောသည်

"ဌာနမှူးတန့်ဟာ ထိုက်ရွှီမသေမျိုးအရှင်ရဲ့ လက်ချက်နဲ့ သေဆုံးသွားတာကို အထက်လူကြီးတွေ ကျိန်းသေပေါက် သိကြလိမ့်မယ်၊ ဒါပေမဲ့ သူတို့က ထိုက်ရွှီမသေမျိုးအရှင်ကို ဘာမှလုပ်မှာ မဟုတ်ဘူး။ ဘာလို့လဲဆိုတော့ ငါတို့ ရှဲ့ကျစ်ရဲ့ ဒီတစ်ခေါက် စစ်ဆင်ရေးဟာ သူ့ဘာသာသူ လုပ်ပိုင်ခွင့်ကို ကျော်လွန်နေခဲ့လို့ပဲ"

"ချင်းကျွဲမိတ်ဆွေက အဆင့် (၂) ပဲ ရှိသေးတာ၊ ငါတို့ အဆင့် (၂)၊ အဆင့် (၃) နဲ့ အဆင့် (၄) မသေမျိုး တစ်သိုက်ကို ခေါ်ပြီး ရှေးဟောင်းမသေမျိုး တစ်ပိုင်း တစ်ယောက်ကို သွားစုံစမ်းတာလေ"

"ဒီလိုကိစ္စမျိုးသာ အပြင်ကို ပေါက်ကြားသွားရင် ဌာနအတွင်းက တခြားသော ရှေးဟောင်းမသေမျိုး တစ်ပိုင်းတွေနဲ့ အဆင့် (၇) ရှေးဟောင်းမသေမျိုးတွေရဲ့ မကျေနပ်မှုကို ဖြစ်စေလိမ့်မယ်။ အားလုံးရဲ့ ဒေါသကို ဆွပေးသလို ဖြစ်သွားရင် အထက်လူကြီးတွေတောင် ကြားညှပ်သွားနိုင်တယ်"

"ဒါကြောင့် ဌာနမှူးတန့်ရဲ့ သေဆုံးမှုဟာ ထိုက်ရွှီမသေမျိုးအရှင်က ပြလိုက်တဲ့ သဘောထားတစ်ခုပဲ။ ဒါယူး မသေမျိုးအရှင်က ရှဲ့ကျစ်ကို ဖျက်သိမ်းပြီး ငါတို့ရဲ့ ရာထူးတွေကို ရုပ်သိမ်းလိုက်တာဟာ ထိုက်ရွှီမသေမျိုးအရှင်ကို အဖြေတစ်ခု ပေးလိုက်တာပဲ"

"နှစ်ဖက်စလုံးက တစ်စုံတစ်ရာသော ဟန်ချက်ကို ထိန်းသိမ်းထားနိုင်မှသာ ရှေးဟောင်းနယ်မြေအတွင်းက ယာယီ ငြိမ်သက်မှုဟာ ပျက်ပြားမသွားမှာ ဖြစ်တယ်။ ထိုက်ရွှီမသေမျိုးအရှင်ဟာ ငါတို့ ဝိညာဉ်သုတ်သင်ခြင်းဌာနရဲ့ ကျင့်ကြံသူအဖြစ် ဆက်ရှိနေဦးမှာဖြစ်သလို ဝိညာဉ်သုတ်သင်ခြင်းဌာနအတွက်လည်း ဆက်ပြီး အလုပ်လုပ်နေဦးမှာပဲ"

ရွှီနန်ကွေ့က မထိတထိ ရယ်မောလိုက်ရင်း

"ဆိုလိုတာကတော့ အထက်လူကြီးတွေကလည်း ထိုက်ရွှီမသေမျိုးအရှင်မှာ ပြဿနာရှိမှန်း သိတယ်၊ ငါတို့လည်း သိတယ်။ ဒါပေမဲ့ အခြေအနေ အရပ်ရပ်ကြောင့် ခိုင်လုံတဲ့ သက်သေမရှိသရွေ့ ဘယ်သူမှ သူ့ကို မထိရဲဘူးပေါ့ ဟုတ်လား"

"ဟုတ်တယ်"

ဟု နင်ပေ့ယိုက ခေါင်းညိတ်သည်။

"ဒါဆိုရင် ဌာနမှူးတန့်ယွမ်က အလကား သေသွားတာပေါ့"

ရွှီနန်ကွေ့က အေးစက်သောအသံဖြင့် ဆိုသည်။

နင်ပေ့ယိုက သက်ပြင်းချလိုက်သည်

"အလကား သေသွားတာလို့တော့ ပြောလို့မရပါဘူး။ ချင်းကျွဲမိတ်ဆွေက အထက်သုံးနယ်မြေကို သွားပြီလေ၊ သူ့ရဲ့ စရိုက်အရဆိုရင် ဒီကိစ္စက ဒီအတိုင်း အဆုံးသတ်သွားမှာ မဟုတ်ဘူး။ သူ အထက်သုံးနယ်မြေမှာ တစ်ခုခု သဲလွန်စ ရှာတွေ့နိုင်ကောင်းရဲ့"

"အောက်ခြေနယ်မြေ ခြောက်ခုမှာတောင် ရှာမတွေ့တဲ့ သဲလွန်စကို အထက်သုံးနယ်မြေရောက်မှ ရှာတွေ့နိုင်ပါ့မလား"

ရွှီနန်ကွေ့က အနည်းငယ် သံသယဝင်နေသည်။

"အထက်သုံးနယ်မြေမှာ ထိတွေ့ရတဲ့ ကျင့်ကြံသူတွေက မတူဘူးလေ၊ ချင်းကျွဲမိတ်ဆွေ အနေနဲ့ ဒီကိစ္စကို အောက်ခြေနယ်မြေမှာ ဆက်လက် စုံစမ်းခွင့်ရဖို့ တစ်ခုခုတော့ နည်းလမ်းရှာနိုင်မှာပါ။ အဲဒီအချိန်ကျရင်တော့ နန်ချင်းကြယ်တာရာနယ်မြေတုန်းကလို လက်တွဲခြေတွဲ အတားအဆီး ခံနေရမှာ မဟုတ်တော့ဘူး"

ဟု နင်ပေ့ယိုက ဆိုသည်။

"မင်းပြောချင်တာက... ချင်းကျွဲမိတ်ဆွေက အထက်သုံးနယ်မြေကို သွားပြီး ဝိညာဉ်သုတ်သင်ခြင်းဌာန အထက်လူကြီးတွေနဲ့ ဆက်ဆံရေး ကောင်းအောင် ကြိုးစားမယ်ပေါ့ ဟုတ်လား"

ရွှီနန်ကွေ့၏ မျက်လုံးများ တောက်ပသွားသည်။

"အင်း"

နင်ပေ့ယိုက ခပ်ဖွဖွ ခေါင်းညိတ်လိုက်သည်

"ငါနဲ့ ဒါယူး မသေမျိုးအရှင်တို့ရဲ့ မိတ်ဆက်ပေးမှု၊ ပြီးတော့ သူ့ရဲ့ ကိုယ်ပိုင်နောက်ခံနဲ့ပါ ပေါင်းလိုက်ရင် သူ့ရဲ့ အရည်အချင်းအရ အထက်သုံးနယ်မြေမှာ စိတ်တူကိုယ်တူ မိတ်ဆွေတွေ ကျိန်းသေပေါက် ရလာမှာပါ"

၎င်းတို့နှစ်ဦးမှာ ဝိညာဉ်သုတ်သင်ခြင်းဌာနနှင့် ဝိညာဥ်နတ်ဘုရားဂိုဏ်းတို့အကြား ကိစ္စရပ်များကို ဆွေးနွေးနေကြခြင်း ဖြစ်သည်။

ဖန့်ချန်ကမူ ထိုက်ရွှီမသေမျိုးအရှင်သည် ဝိညာဉ်သုတ်သင်ခြင်းဌာန ကျင့်ကြံသူဖြစ်ကြောင်း ကြားသိရပြီးနောက်၊ သူနှင့် ကျွယ်မင်နတ်နန်းတော်တို့၏ ပတ်သက်မှုကို စဉ်းစားနေမိသည်။

စုန့်ကျီလီ ပြောပြချက်အရ ဝမ်ချုံစန်း သည် တစ်ခါက ကျွယ်မင်နတ်နန်းတော်သို့ သွားရောက်ခဲ့ပြီးနောက်မှ ထိုက်ယီမသေမျိုးလမ်းစဉ် ကို ရရှိခဲ့ပြီး ကျင့်ကြံခြင်း အဆင့်အတန်းများ အရှိန်အဟုန်ဖြင့် မြင့်တက်လာခဲ့ခြင်း ဖြစ်သည်။

အကယ်၍ သူသည် ထိုအချိန်မှာပင် မိစ္ဆာသန္ဓေသား ကို တတ်မြောက်သွားခဲ့သည် ဆိုပါက... ထိုကျွယ်မင်နတ်နန်းတော်သည် အပေါ်ယံ မြင်ရသည်ထက် အများကြီး ပိုပြီး နက်နဲနေပေလိမည်။

၎င်းသည် ရှေးဟောင်းမိစ္ဆာဂိုဏ်း နှင့် ပတ်သက်မှု ရှိနေသလော ထို မိစ္ဆာ များနှင့် ဆက်သွယ်မှု ရှိနေသလော

ထိုက်ရွှီမသေမျိုးအရှင်က ကျွယ်မင်နတ်နန်းတော်နှင့် ရင်းနှီးကျွမ်းဝင်နေခြင်းမှာ ထိုကိစ္စများနှင့် ပတ်သက်နေနိုင်သလား

ဝိညာဉ်သုတ်သင်ခြင်းဌာနမှ ရှေးဟောင်းနယ်မြေတွင် ထားရှိသော အဆင့် (၇) ရှေးဟောင်းမသေမျိုး ပျောက်ဆုံးသွားမှုသည် ထိုက်ရွှီမသေမျိုးအရှင်နှင့် တကယ် ပတ်သက်နေမည်ဆိုလျှင်... ဤကိစ္စမှာ ဖြစ်နိုင်ခြေ နှစ်ခု ရှိသည်။

၁။ ထိုက်ရွှီမသေမျိုးအရှင်နှင့် ဝိညာဥ်နတ်ဘုရားဂိုဏ်းတို့ ပူးပေါင်းကြံစည်ခြင်း။

၂။ ထို (မိစ္ဆာနှင့် ပတ်သက်သော) ကိစ္စရပ်များအတွင်း ပါဝင်ပတ်သက်နေခြင်း။

"နင်မိတ်ဆွေ... ရှေးဟောင်းနယ်မြေမှာ အခြေစိုက်တဲ့ အဆင့် (၇) ရှေးဟောင်းမသေမျိုးက ဘယ်အချိန်တုန်းက ပျောက်ဆုံးသွားတာလဲ "

ဟု ဖန့်ချန်က မေးလိုက်သည်။

နင်ပေ့ယိုက ခဏတာ စဉ်းစားလိုက်ပြီးမှ ခါးသီးစွာ ခေါင်းခါပြလိုက်သည်

"အဲဒီ ပုဂ္ဂိုလ်ကြီး ဘယ်တုန်းက ပျောက်သွားလဲဆိုတာ ဘယ်သူမှ မသိကြဘူး။ ဒီလို တည်ရှိမှုမျိုးတွေက တစ်ခါတလေ တရားထိုင်တာတင် နှစ်ပေါင်း ရာနဲ့ချီ ကြာတတ်တာလေ။ သူ ပျောက်ဆုံးနေမှန်း သိလိုက်ရတာကလည်း... အထက်လူကြီးတွေက ရှေးဟောင်းနယ်မြေ ဝိညာဉ်သုတ်သင်ခြင်းဌာနဟာ ဝိညာဥ်နတ်ဘုရားဂိုဏ်းနဲ့ တိုက်ခိုက်တဲ့အခါတိုင်းမှာ အမြဲတမ်း အရေးနိမ့်နေတာကို ရုတ်တရက် သတိပြုမိသွားလို့ပဲ"

" စုံစမ်းစစ်ဆေးကြည့်ပြီးမှပဲ အဲဒီ ရှေးဟောင်းမသေမျိုး ပျောက်ဆုံးနေပြီဆိုတာ အတည်ပြုနိုင်ခဲ့ကြတာ။ ခေါင်းဆောင်မရှိတဲ့ ဝိညာဉ်သုတ်သင်ခြင်းဌာနဟာ ဝိညာဥ်နတ်ဘုရားဂိုဏ်းကို ဘယ်လိုလုပ် ယှဉ်နိုင်ပါ့မလဲ "

"အခုတော့ မတူတော့ဘူးပေါ့... ငါတို့မှာ ထူးခြားတဲ့ အဆင့်အတန်း ရှိလာပြီ၊ နောက်ကွယ်မှာလည်း ယင်လောကငယ် က ရှိနေပြီဆိုတော့၊ ဝိညာဥ်နတ်ဘုရားဂိုဏ်းနဲ့ တိုက်ခိုက်တဲ့အခါ လက်တွဲခြေတွဲ ချုပ်ခံထားရစရာ မလိုတော့ဘူး။ လျှို့ဝှက်စောင့်ရှောက်ရေးဌာန ကလည်း ငါတို့အတွက် အချိန်မရွေး နောက်ကွယ်ကနေ ကူညီပေးနေမှာပဲ"

ရွှီနန်ကွေ့က အပြုံးကလေးဖြင့် ဆိုလိုက်သော်လည်း သူ၏ မျက်ဝန်းများတွင်မူ အေးစက်သော အရိပ်အယောင်များ ဖြတ်ပြေးသွားသည်

"အလင်းထဲကနေ အမှောင်ထဲကို ရောက်သွားတာဟာ တစ်ချို့လူတွေကို ဒုက္ခအကြီးအကျယ် ပေးဖို့ လုံလောက်ပါတယ်"

"မင်းတို့ သုံးယောက်အနေနဲ့ ရှေ့တန်းကနေ တိုက်ရိုက် တိုက်ခိုက်တာမျိုး မလုပ်ပါနဲ့ဦး။ မင်းတို့ရဲ့ အဆင့်အတန်းအရဆိုရင် အမှောင်ထဲမှာ ပုန်းအောင်းပြီး တဖြည်းဖြည်းချင်း အစီအစဉ်ဆွဲ တိုက်ခိုက်တာက ပိုပြီး သင့်တော်ပါတယ်"

ဟု ဖန့်ချန်က ဆိုသည်။

ရွှီနန်ကွေ့မှာ ခဏတာ မှင်သက်သွားပြီး

"ဖန့်သခင်လေး... မင်း ငါတို့ကို ဘွဲ့နှင်းခန့်အပ်တာက ငါတို့ရဲ့ တိုက်ခိုက်ရေး စွမ်းရည်ကို သဘောကျလို့ မဟုတ်ဘူးလား "

နင်ပေ့ယိုက မနေနိုင်ဘဲ ရယ်မောလိုက်ရင်း

"ဖန့်သခင်လေးရဲ့ ဘေးမှာ အဆင့် (၄) မသေမျိုးတွေတောင် ရှိနေတာ၊ ငါတို့ရဲ့ တိုက်ခိုက်ရေး စွမ်းရည်ကို ဘယ်မှာ သဘောကျမှာလဲ"

ဖန့်ချန်က ခေါင်းညိတ်ပြလိုက်သည်

"ငါ သဘောကျတာက မင်းတို့ ကိုယ်တိုင်ကိုပဲ။ မင်းတို့ဟာ နောင်တစ်ချိန်မှာ အဆင့် (၄)၊ အဆင့် (၅)၊ အဆင့် (၆) အထိ တက်လှမ်းနိုင်မယ်၊ ရှေးဟောင်းမသေမျိုး တောင် ဖြစ်လာနိုင်တယ်လို့ ငါ ယူဆတယ်"

"မင်းတို့ရဲ့ ပါရမီကလည်း မဆိုးသလို ဦးနှောက်ကလည်း သုံးတတ်တယ်၊ ပြီးတော့ မင်းတို့ မိသားစုထဲက လူကြီးတွေကလည်း မင်းတို့ကို အစွမ်းကုန် ပြုစုပျိုးထောင်ပေးကြမှာပဲ။ မင်းတို့ရဲ့ ကျင့်ကြံခြင်းလမ်းစဉ်ဟာ သာမန်ကျင့်ကြံသူတွေထက် အများကြီး ပိုပြီး ချောမွေ့လိမ့်မယ်"

"အဲဒီအချိန်ကျရင် မင်းတို့ရဲ့ ကျင့်ကြံခြင်း အဆင့်အတန်းနဲ့ မင်းတို့ရဲ့ လူမှုဆက်ဆံရေး ကွန်ရက်တွေကို ပေါင်းစပ်ပြီး လုပ်ဆောင်နိုင်တဲ့ အခန်းကဏ္ဍက ရှေ့တန်းကနေ တိုက်ခိုက်နေတဲ့ စစ်သားငယ်လေးတွေထက် အများကြီး ပိုပြီး ထိရောက်လိမ့်မယ်"

"ဖန့်သခင်လေးက ငါ့ကို ဒီလောက်တောင် အထင်ကြီးနေတာလား"

ရွှီနန်ကွေ့က အနည်းငယ် ရှက်ကိုးရှက်ကန်းဖြင့် ဆိုသည်

"ဒါပေမဲ့ မင်းလည်း သိတဲ့အတိုင်း ငါ့မိသားစုထဲမှာ ဝိညာဥ်နတ်ဘုရားဂိုဏ်းဝင် ကျင့်ကြံသူတွေ အများကြီး ရှိနေတာလေ။ သူတို့က ငါ့ရဲ့ အဆင့်အတန်းကို တစ်စုံတစ်ရာ ရိပ်မိထားကြလို့ ငါ့ကို သတိထားနေကြတာ၊ ငါ့ကို အရင်းအမြစ်တွေ အများကြီး ပေးမှာ မဟုတ်ဘူး။ ဝိညာဉ်သုတ်သင်ခြင်းဌာန ဘက်မှာလည်း... ငါတို့ အခု ဘာရာထူးမှ မရှိတော့တော့ ငါတို့ကို အရင်းအမြစ်တွေ အများကြီး ပေးတော့မှာ မဟုတ်ဘူး"

"အနည်းဆုံးတော့ အဆင့် (၃) ကနေ အဆင့် (၄) ကို တက်လှမ်းဖို့ လိုအပ်တဲ့ နတ်ဆေးပင်တွေကို ငါ အခွင့်အရေးရရင် ရှာပေးပါ့မယ်။ အကယ်လို့ မင်းတို့က မသေမျိုးစစ်စစ် လမ်းစဉ်ကို လျှောက်လှမ်းချင်တယ်ဆိုရင်လည်း ငါ အဲဒီဘက်က ဆေးပင်တွေကို သတိထားကြည့်ပေးပြီး မင်းတို့ကိုပဲ ဦးစားပေး ရောင်းပေးပါ့မယ်"

ဟု ဖန့်ချန်က ပြုံးလျက် ဆိုသည်။

၎င်းတို့ သုံးဦးစလုံးသည် ရောင်းပေးပါ့မယ် ဆိုသည့် စကားလုံးကို ချက်ချင်းပင် မေ့ပျောက်သွားကြပြီး မသေမျိုးစစ်စစ် ဆိုသည့် စကားလုံးအပေါ်တွင်သာ အာရုံရောက်သွားကြတော့သည်။

"ဖန့်သခင်လေးဆီမှာ မသေမျိုးအစစ်မှန် လမ်းစဉ်တောင် ရှိတာလား "

နင်ပေ့ယိုမှာ အလွန်အမင်း အံ့ဩသွားတော့သည်။

"အထက်သုံးနယ်မြေမှာရှိတဲ့ ဂိုဏ်းပေါင်း ဘယ်နှဂိုဏ်းလောက်က မသေမျိုးအစစ်မှန် လမ်းစဉ်ကို ပိုင်ဆိုင်ထားကြသလဲ "

ဟု ဖန့်ချန်က မေးလိုက်သည်။

နင်ပေ့ယိုက ခေါင်းခါပြလိုက်သည်

"မရှိပါဘူး... မသေမျိုးအစစ်မှန် လမ်းစဉ်ကို မသေမျိုးလောကငယ် ကပဲ အမြဲတမ်း လက်ဝါးကြီးအုပ် ထိန်းချုပ်ထားတာပါ။ ဒီလမ်းစဉ်နဲ့ ပတ်သက်တဲ့ သတင်းအချက်အလက် မှန်သမျှက အထူးလျှို့ဝှက်ချက်တွေပဲ၊ နတ်ရိုသေနန်းတော် မှာတောင် ဒီဘက်က သတင်းတွေ မရှိနိုင်ဘူး"

"ဒါဆိုရင် အခု မသေမျိုးလောကငယ် အပြင်ဘက်မှာ မသေမျိုးအစစ်မှန် လမ်းစဉ်အကြောင်း သိတဲ့သူ တစ်ယောက် တိုးလာပြီပေါ့"

ဖန့်ချန်က ပြုံးလျက် ဆိုလိုက်သည်။

၎င်းတို့ သုံးဦးစလုံး၏ ရင်ထဲတွင် တုန်လှုပ်သွားကြပြီး မသေမျိုးအစစ်မှန် လမ်းစဉ်ကိုပင် သိထားသည်ဆိုလျှင် ၎င်းတို့၏ စိတ်ထဲ၌ ငရဲမင်းအမွေအနှစ်အပေါ် ထားရှိသော ကြောက်ရွံ့ရိုသေမှုမှာ ပိုမို တိုးပွားလာခဲ့တော့သည်။