အခန်း (၅၂၅-၅၂၆)

အခန်း (၅၂၅) နက်နဲသောနယ်မြေအတွက် ကျောင်းတော်၏ ယဇ်ပူဇော်ပွဲ

​"လောကကြီးရဲ့ ရက်စက်ကြမ်းကြုတ်မှုကို မင်းတို့ကို သိစေချင်တယ်။ ဒီကျောင်းတော်ထဲမှာတင် မကောင်းတဲ့အရာတွေ အများကြီး ဖြစ်ပျက်နေတာကို မင်းတို့ မြင်ဖူးကြမှာပါ၊ ဒါပေမဲ့ ဒီနေ့မှာတော့ အဲဒါထက် တစ်ဆင့်ပိုမြင့်တဲ့ အရာကို ငါတို့ လုပ်ကြမယ်" ရွှမ်ယီက သူမရှေ့ရှိ တပည့်များကို ကြည့်ကာ ပြောလိုက်သည်။

​"ကျောင်းတော်ရဲ့ ယဇ်ပူဇော်ပွဲ နီးနေပြီဆိုတာ မင်းတို့ သိကြမှာပါ။ အဲဒီအချိန်မှာ တခြားအရာတွေလည်း တစ်ပြိုင်နက်တည်း ဖြစ်ပျက်လာလိမ့်မယ်။ ဆယ်စုနှစ်ပေါင်းများစွာအတွင်း မဖြစ်ပေါ်ခဲ့ဖူးတဲ့ နက်နဲသောနယ်မြေရဲ့ အပျက်အစီးများဆီ သွားရာလမ်းဟာလည်း ပွင့်လာတော့မှာ ဖြစ်ပြီး ဒါဟာ တကယ့်ကို ကြီးမားတဲ့ ဖြစ်ရပ်တစ်ခုပဲ။ ပြီးတော့ ငါတို့ရဲ့ အကြီးအကဲ အများစုဟာလည်း အဲဒီနေရာကို စူးစမ်းဖို့ သွားကြလိမ့်မယ်။ သူတို့နဲ့အတူ တစ္ဆေကျောင်းတော်ရဲ့ အနာဂတ်အတွက် မျှော်လင့်ချက် အလင်းတိုင်ဖြစ်မယ့် တပည့်တစ်ဦးစီကိုလည်း ခေါ်သွားကြလိမ့်မယ်"

​"အဆင့်မြင့်အရာရှိတွေကတော့ ယဇ်ပူဇော်ပွဲရဲ့ အောင်နိုင်သူဟာ အခြားသူတွေ မမြင်နိုင်တဲ့အရာတွေကို မြင်တွေ့နိုင်ဖို့ အကြီးအကဲတွေနဲ့အတူ နက်နဲသောနယ်မြေထဲကို လိုက်ပါခွင့်ရမယ်လို့ ဆုံးဖြတ်ထားပြီးပြီ။ မင်းတို့ထဲက တစ်ယောက်ဟာ အဲဒီလူ ဖြစ်လာနိုင်တယ်။ ဒါဟာ တစ်သက်မှာ တစ်ခါမှသာ ရနိုင်တဲ့ အခွင့်အရေးပဲ"

​"ဒီယဇ်ပူဇော်ပွဲဟာ တခြားသူတွေရှေ့မှာ ကြွားဝါဖို့ ကျင်းပတဲ့ ပြိုင်ပွဲတစ်ပွဲ မဟုတ်ဘူး၊ ဒါဟာ ရရှိနိုင်တဲ့ အခွင့်အရေးတွေထဲမှာ အကောင်းဆုံးလူကို ရွေးချယ်ဖို့ ကျင်းပတာ ဖြစ်တယ်။ ဒါဟာ တစ်ကမ္ဘာလုံးကို ပြောင်းလဲစေမယ့် ဖြစ်ရပ်တစ်ခုရဲ့ အစဖြစ်ပြီး၊ မင်းတို့သာ ယဇ်ပူဇော်ပွဲမှာ ကောင်းကောင်း စွမ်းဆောင်နိုင်ရင် အဲဒီဖြစ်ရပ်ရဲ့ အစိတ်အပိုင်းတစ်ခု ဖြစ်လာနိုင်တယ်" သူမက တပည့်များကို ပြောလိုက်သည်။

​'ယဇ်ပူဇော်ပွဲ ဟုတ်လား။ နောက်ထပ် နယ်မြေတစ်ခုလား။ အဲဒါက ဘာလဲ' လုံချန်းက သူမ၏ စကားများကို ကြားသောအခါ အံ့သြနေမိသည်။

​'သူမက နောက်ထပ် ကမ္ဘာတစ်ခုအကြောင်း ပြောနေတာလား၊ ဒါမှမဟုတ် တခြားလူတစ်ယောက် ဖန်တီးထားတဲ့ ဟင်းလင်းပြင် အလွှာတစ်ခုအကြောင်း ပြောနေတာလား' သူ တွေးနေမိသည်။

​"ဒါပေမဲ့ အဲဒီမှာ ကန့်သတ်ချက် တစ်ခုတော့ ရှိတယ်။ ဂိုဏ်းထဲမှာ တပည့်တွေ အများကြီး ရှိနေတာကို မင်းတို့ သိပါတယ်။ ယဇ်ပူဇော်ပွဲမှာ သူတို့ရဲ့ အသက်အန္တရာယ် ရှိနေပေမယ့်လည်း သူတို့က ပါဝင်ဖို့ ဆုံးဖြတ်ကြလိမ့်မယ်။ သူတို့အားလုံးကို ပါဝင်ခွင့် ပေးလိုက်ရင် ဒါဟာ ငတုံးလုပ်ရပ်ဖြစ်သလို အရင်းအမြစ်နဲ့ အချိန်တွေကို ဖြုန်းတီးရာ ရောက်လိမ့်မယ်။ အဲဒါကြောင့်ပဲ ယဇ်ပူဇော်ပွဲမှာ ပါဝင်မယ့်သူတွေကို မဟာအကြီးအကဲတွေကပဲ ရွေးချယ်ပေးရမှာ ဖြစ်တယ်။ အတန်းတစ်တန်းစီကနေ ယဇ်ပူဇော်ပွဲကို တက်ရောက်ဖို့ လူနှစ်ယောက်ပဲ စေလွှတ်ခွင့် ရှိတယ်" သူမက ရှင်းပြသည်။

​"သေဆုံးနိုင်တဲ့ အန္တရာယ်က ဘယ်လိုမျိုးလဲ။ သူတို့က အသက်ကယ်ဆေး သုံးပြီး အသက်ကို မကယ်နိုင်ဘူးလား" တပည့်တစ်ဦးက မေးလိုက်သည်။ လုံချန်းတွင်လည်း ထိုမေးခွန်း ရှိနေသည်။ အသက်ကုသဆေးများကို ဤမှ ပေါပေါများများ သုံးနေသည့် ဂိုဏ်းမှာ အသက်ကယ်ဆေးများလည်း အများကြီး ရှိရမည်ဟု သူ ယုံကြည်ထားသည်။

​"ဟက်... ကြေညာချက် မထုတ်ပြန်သေးလို့ နင်တို့က အဲဒီလို ထင်နေတာပဲ။ ယဇ်ပူဇော်ပွဲမှာ နင်တို့သာ ရှုံးနိမ့်သွားရင် နင်တို့ရဲ့ ဝိညာဉ်တွေက ချက်ချင်း ဖျက်ဆီးခံရမှာ ဖြစ်တဲ့အတွက် အသက်ကယ်ဆေးတွေတောင် အလုပ်ဖြစ်မှာ မဟုတ်ဘူး" ရွှမ်ယီက ခေါင်းခါရင်း ပြန်ဖြေသည်။

​သူမ၏ အဖြေကို ကြားလိုက်ရသောအခါ တပည့်များအားလုံး တုန်လှုပ်သွားကြသည်။

​"ကျွန်တော်တို့ရဲ့ ဝိညာဉ်တွေက ဖျက်ဆီးခံရမယ် ဟုတ်လား။ အဲဒါ ဘာကို ဆိုလိုတာလဲဆိုတာ ရှင်းပြပေးနိုင်မလား" ရူရှင်က သူမကို မေးလိုက်သည်။

​"အဲဒါကို မကြာခင်မှာ မင်းတို့ သိလာရမှာပါ၊ ဒါပေမဲ့ အဲဒီမတိုင်ခင် ငါ ဒီမေးခွန်းကို အရင်မေးပါရစေ။ အဲဒီမှာ သေသွားရင် ပြန်လာလမ်း မရှိဘူးဆိုတာ သိနေရင်တောင် မင်းတို့ထဲက ဘယ်နှစ်ယောက်က ပါဝင်ချင်ကြသေးလဲ" ရွှမ်ယီက တပည့်အားလုံး၏ မျက်နှာများနှင့် အမူအရာများကို ဝေ့ကြည့်ရင်း မေးမြန်းလိုက်သည်။

​သူမ စကားဆုံးသည်နှင့် တပြိုင်နက် တပည့်တိုင်းနီးပါး လက်မြှောက်လိုက်ကြပြီး ယဇ်ပူဇော်ပွဲတွင် ပါဝင်ရန် အသင့်ဖြစ်နေကြောင်း ပြသလိုက်ကြသည်။

​"ဒီယဇ်ပူဇော်ပွဲက ခွန်အားအပေါ်မှာပဲ မူတည်နေတာ မဟုတ်ဘူးလို့ ကျွန်တော် ကြားဖူးတယ်၊ အဲဒါကြောင့် ဒီအခွင့်အရေးကို လက်မလွှတ်နိုင်ဘူး။ ဒါဟာ တကယ့် အထွတ်အထိပ်ကို ရောက်ဖို့နဲ့ ဂိုဏ်းမှာ ရာထူးတက်ဖို့ အခွင့်အရေးကောင်းပဲ" တပည့်တစ်ဦးက ဆိုသည်။

​"ကျွန်တော် တကယ် သေလိမ့်မယ်လို့ မယုံဘူး။ ဒါက သတ္တိရှိတဲ့သူတွေပဲ ပါဝင်အောင် ကျွန်တော်တို့ကို ခြောက်လှန့်နေတာ ဖြစ်နိုင်တယ်။ ကျွန်တော် ပါဝင်ချင်တယ်" နောက်တစ်ဦးက ဆက်ပြောသည်။

​"ကျွန်တော့်ကိုယ်ကျွန်တော် ယုံကြည်မှု ရှိတယ်။ ကျွန်တော် နိုင်နိုင်တယ်" နောက်တစ်ဦးက ဆိုသည်။

​"ဆုလာဘ်တွေက အံ့သြစရာကောင်းတယ်လို့ ကျွန်တော် ကြားထားတယ်။ အဲဒါတွေကို သေချာပေါက် ရအောင် ယူမယ်"

​"ကျွန်တော် လက်မလွှတ်နိုင်ဘူး"

​တစ်ယောက်ပြီးတစ်ယောက် တပည့်အားလုံးမှာ ပါဝင်လိုစိတ် ရှိကြောင်း ပြသကြသည်။

​လုံချန်းမှလွဲ၍ တပည့်တိုင်းနီးပါး ခေါင်းမော့ထားကြသည်။ လုံချန်းကတော့ ပါဝင်လိုစိတ် မရှိပေ။ သူသည် တစ်ခုခုထဲကို ခေါင်းမစိုက်မီ အခြေအနေများကို အရင် သိချင်သည်။

​ကွင်းပြင်ထဲတွင် လက်မမြှောက်ထားသူ နှစ်ဦးသာ ရှိသည်။ တစ်ဦးမှာ လုံချန်း ဖြစ်ပြီး နောက်တစ်ဦးမှာ ရွှမ်ယီ ဖြစ်သည်။

​"ငါ ပြောခဲ့သလိုပဲ၊ လူတွေ တကယ် သေလိမ့်မယ်လို့ ရှင်းရှင်းလင်းလင်း ပြောနေတာတောင် မင်းတို့ထဲက အများစုက ပါဝင်ကြဦးမှာပဲ။ ဒါဟာ ငါတို့ရဲ့ အချက်ကို သက်သေပြလိုက်တာပဲ။ အဲဒါကြောင့်ပဲ ယဇ်ပုရောဟိတ်တွေက အတန်းတိုင်းမှာ အတွင်းပိုင်း ရွေးချယ်မှု လုပ်ဖို့ ဆုံးဖြတ်လိုက်ကြတာ။ မင်းတို့လည်း ရွေးချယ်မှု လုပ်ငန်းစဉ်ကို ဖြတ်ကျော်ရမှာ ဖြစ်ပြီး နောက်ဆုံးမှာ မင်းတို့ထဲက နှစ်ယောက်ပဲ ရွေးချယ်ခံရလိမ့်မယ်။ ငါတို့က အရာအားလုံးကို တကယ့် အခြေအနေအတိုင်း ဖြစ်အောင် လုပ်နေတာဆိုတော့ မင်းတို့ထဲက အများစုက ဒီနေရာမှာတင် သေဆုံးသွားနိုင်တယ်" ရွှမ်ယီက ကြေညာလိုက်သည်။

​"ပါဝင်ဖို့ အသင့်ဖြစ်ပြီလား" သူမက အားလုံးကို မေးလိုက်သည်။ "သေဖို့ တကယ် ပြင်ဆင်ထားတဲ့ သူတွေပဲ သဘောတူကြပါ"

​"ကျွန်တော် အသင့်ဖြစ်ပါပြီ" ရူရှင်က ပထမဆုံး ပြန်ဖြေသည်။

​အခြားသူများကလည်း ထိုနည်းတူပင် ပြန်ဖြေကြသည်။

​ရွှမ်ယီက သူတို့အားလုံး၏ မျက်နှာများကို ကြည့်ကာ ခေါင်းညိတ်လိုက်သည်။ လုံချန်းက ပါဝင်လိုစိတ် မရှိသည်ကို သူမ မြင်သော်လည်း သူက ထူးခြားသူဖြစ်သည့်အပြင် ၎င်းမှာ မိမိသဘောဆန္ဒအလျောက် လုပ်ရမည့် အရာဖြစ်သဖြင့် ထိုဆုံးဖြတ်ချက်ကို သူမ လက်ခံပေးလိုက်သည်။

​"ကောင်းပြီ... ဒါက ဘယ်လို ဖြစ်လာမလဲဆိုတာ ငါ ပြောပြမယ်။ ပါဝင်ချင်တဲ့ မင်းတို့ တစ်ယောက်ချင်းစီဟာ သီးခြား တာဝန်တစ်ခုစီ ရရှိလိမ့်မယ်။ အဲဒီ တာဝန်တွေ အားလုံးဟာ မင်းတို့ကို သေစေနိုင်တဲ့ အရာတွေ ဖြစ်ပြီး တာဝန်မှာ ကျရှုံးတဲ့သူတွေကို ပယ်ထုတ်သွားမယ်။ တကယ်လို့ မင်းတို့ထဲက တစ်ယောက်ပဲ အောင်မြင်ခဲ့ရင် ဒီအတန်းထဲက တစ်ယောက်ပဲ ယဇ်ပူဇော်ပွဲကို တက်ရောက်ခွင့် ရလိမ့်မယ်" ရွှမ်ယီက တပည့်များကို ပြောလိုက်သည်။

​"တကယ်လို့ အောင်မြင်တဲ့သူ တစ်ယောက်မှ မရှိရင်တော့ မင်းတို့ထဲက ဘယ်သူ့ကိုမှ ပါဝင်ခွင့် ပေးမှာ မဟုတ်ဘူး။ အောင်မြင်တဲ့သူက နှစ်ယောက်ထက် ပိုနေမယ်ဆိုရင်တော့ လူနှစ်ယောက် ဒါမှမဟုတ် နှစ်ယောက်အောက်ပဲ ကျန်တဲ့အထိ ဒီလိုမျိုး နောက်ထပ် အစီအစဉ်တစ်ခုကို ထပ်လုပ်သွားမယ်" သူမက ထပ်လောင်း ပြောကြားသည်။

​သူမသည် သူမ၏ သိုလှောင်လက်စွပ်ထဲမှ တစ်စုံတစ်ခုကို ထုတ်ယူကာ သူမ၏ ခြေထောက်ရှေ့တွင် ချထားလိုက်သည်။

​"ဒီသေတ္တာထဲမှာ မင်းတို့ လုပ်ရမယ့် အတွင်းပိုင်း စမ်းသပ်မှုအတွက် တာဝန်တွေ ရှိတယ်။ မင်းတို့ တစ်ယောက်ချင်းစီ ရှေ့ထွက်လာပြီး တာဝန်စာရွက်တစ်ရွက်စီ နှိုက်ယူရမယ်၊ ပြီးရင် အဲဒီစာရွက်ကို ငါ့ကို ပြရင်း အသံကျယ်ကျယ်နဲ့ ဖတ်ပြရမယ်။ အောင်နိုင်သူ ဖြစ်ဖို့အတွက် အဲဒီတာဝန်ကို အပြီးသတ်ရမယ်" သူမက ကြေညာလိုက်သည်။

​"ပြီးခဲ့တဲ့ အခါက အစီအစဉ်အတိုင်းပဲ စတင် ထွက်လာနိုင်တယ်" သူမက ဆိုသည်။

​ထိုသေတ္တာမှာ ယခင်က စာရွက်လိပ်လေးများ ထည့်ထားသည့် သေတ္တာနှင့် အရွယ်အစား အတူတူပင် ဖြစ်သည်။ သေတ္တာ၏ အပေါ်ဘက်တွင် လက်ထည့်၍ ရနိုင်သော အပေါက်တစ်ပေါက် ပါရှိလေသည်။

အခန်း (၅၂၆) ပထမဆုံး သေဆုံးမှု

​မိန်းကလေးတစ်ဦးသည် မတ်တပ်ရပ်ကာ ရွှမ်ယီထံသို့ လျှောက်သွားလိုက်သည်။ သူမသည် သေတ္တာထဲသို့ လက်နှိုက်ကာ ခေါက်ထားသော စာရွက်တစ်ရွက်ကို ထုတ်ယူလိုက်သည်။

​"ဖွင့်ပြီး ဖတ်လိုက်" ရွှမ်ယီက ထိုမိန်းကလေးကို ပြောလိုက်သည်။

​မိန်းကလေးသည် စာရွက်ကို ဖြန့်လိုက်ပြီး ပါရှိသော အကြောင်းအရာကို စတင်ဖတ်ရှုသည်။

​"သွားပြီး... အ... အ... အကြီးအကဲ..." မိန်းကလေးသည် ပထမဆုံး စကားလုံး လေးလုံးကို ဖတ်ပြီးနောက် မှင်တက်သွားသည်။ သူမ၏ မျက်နှာမှာ ဖြူလျော်သွားပြီး ဆက်ပင် မဖတ်နိုင်တော့ပေ။

​"ဖတ်စမ်း" ရွှမ်ယီက ဟိန်းဟောက်လိုက်သည်။

​မိန်းကလေးမှာ စာရွက်နှင့် ရွှမ်ယီ၏ မျက်နှာကို အပြန်ပြန်အလှန်လှန် ကြည့်ရင်း ချွေးများပင် ပြန်နေပြီ ဖြစ်သည်။

​"အကြီးအကဲ ကန်းကို သွားပြီး ပြင်းပြင်းထန်ထန် ရိုက်နှက်ပါ" သူမက နောက်ဆုံးတွင် ဖတ်လိုက်တော့သည်။

​"ဒါကို ရတာလား။ အဲဒါက တကယ့်ကို အခက်ခဲဆုံး တာဝန်တွေထဲက တစ်ခုပဲ။ ဒါပေမဲ့ နင်က အန္တရာယ်ကို သိသိကြီးနဲ့ ပါဝင်ဖို့ လက်မြှောက် ဆုံးဖြတ်ခဲ့တာဆိုတော့ ဒါကို လုပ်ကိုလုပ်ရမယ်။ ထွက်ပြေးဖို့ လမ်းမရှိတော့ဘူး။ အကြီးအကဲကန်းကို တိုက်ခိုက်ပြီး အသက်ရှင်လျက် ပြန်လာရမယ်။ မဟုတ်ရင် နင် ကျရှုံးပြီပဲ" ရွှမ်ယီက ခေါင်းခါရင်း ရှင်းပြသည်။

​"ကျ... ကျွန်မ မလုပ်ချင်တော့ဘူး။ အမည်စာရင်း ပြန်ရုပ်သိမ်းပါရစေ။ ယဇ်ပူဇော်ပွဲမှာ မပါဝင်ချင်တော့ဘူး" မိန်းကလေးက ထစ်ထစ်ငေါ့ငေါ့ဖြင့် ပြောလိုက်သည်။

​ရွှမ်ယီသည် ထိုမိန်းကလေးကို ကြည့်လိုက်ရာ သူမ၏ သတ်ဖြတ်လိုသော အငွေ့အသက်များ ထွက်ပေါ်လာပြီး မိန်းကလေးအား လွှမ်းခြုံသွားသည်။ မိန်းကလေးမှာ မြေပြင်ပေါ်သို့ ခွေကျသွားပြီး ရိုးတွင်းခြင်ဆီအထိ အေးစိမ့်သွားသော ကြောက်ရွံ့မှုကြောင့် တုန်ရင်နေတော့သည်။

​"မဖြစ်နိုင်ဘူး။ နင် လက်မြှောက်ခဲ့ပြီးပြီ၊ အခု နင် ဒါကို လုပ်ရမယ်။ မဟုတ်ရင် နင့်ကို ငါကိုယ်တိုင် သတ်ပစ်မယ်။ ဒီနေရာက ပြောတဲ့အတိုင်း လုပ်ဖို့ သတ္တိတောင်မရှိတဲ့ လူကြောက်တွေအတွက် နေရာမဟုတ်ဘူး" ရွှမ်ယီက မိန်းကလေးကို စိုက်ကြည့်ရင်း အမျက်ဒေါသဖြင့် ဟိန်းဟောက်လိုက်သည်။

​"ကျွန်... ကျွန်မ လုပ်ပါ့မယ်။ ကျေးဇူးပြုပြီး ရပ်ပေးပါ" မိန်းကလေးသည် မျက်ရည်များ ဝဲလျက် အော်ဟစ်လိုက်ရသည်။

​ရွှမ်ယီသည် သူမ၏ သတ်ဖြတ်လိုသော အငွေ့အသက်ကို ပြန်လည် ရုပ်သိမ်းလိုက်သည်။

​"ကောင်းပြီ။ လာ... ငါ နင့်ကို အကြီးအကဲကန်း ဆီ ခေါ်သွားမယ်။ တခြားသူတွေ အားလုံးကလည်း နင် တာဝန်ထမ်းဆောင်တာကို စောင့်ကြည့်ရမယ်" ထိုသို့ ဆိုကာ ရွှမ်ယီသည် တာဝန်သေတ္တာကို သိုလှောင်လက်စွပ်ထဲ ပြန်ထည့်ကာ သူမ၏ သားရဲအိတ်ထဲမှ ဧရာမကျားငန်းဖြူအား ထုတ်လိုက်သည်။

​တပည့်များ အားလုံးသည် ရွှမ်ယီ၏ အမိန့်အရ ပျံသန်းတတ်သော သားရဲကြီးပေါ်သို့ တက်လိုက်ကြသည်။ သားရဲကြီးသည် ပျံသန်းသွားပြီး အလားတူ အရွယ်အစားရှိသည့် အခြား လေ့ကျင့်ရေးကွင်းတစ်ကွင်း၏ အပြင်ဘက်တွင် ဆင်းသက်လိုက်သည်။

​သက်လတ်ပိုင်း အမျိုးသားတစ်ဦးသည် လေ့ကျင့်ရေးကွင်း၏ အလယ်ဗဟိုတွင် မျက်လုံးမှိတ်လျက် ထိုင်နေသည်။ သူသည် ထိုအချိန်တွင် ကျင့်ကြံနေပုံရသည်။

​"အထဲကိုသွားပြီး သူ့ကို တိုက်ခိုက်လိုက်။ အသက်ရှင်လျက် ပြန်ထွက်လာနိုင်ရင် နင် အောင်မြင်ပြီပဲ" ရွှမ်ယီက တာဝန်ရထားသော မိန်းကလေးကို ပြောလိုက်သည်။

​မိန်းကလေးသည် စာရွက်ကို လက်ထဲတွင် ကိုင်ထားရင်း တိုက်ကွင်းထဲတွင် တစ်ဦးတည်း ထိုင်နေသော အကြီးအကဲဆီသို့ စတင် လျှောက်သွားသည်။ သူမ၏ ခြေထောက်များမှာ တုန်ယင်နေပြီး နှလုံးမှာလည်း ရူးမတတ် ခုန်နေတော့သည်။

​အကြီးအကဲကန်းသည် ထိုအချိန်တွင် ကျင့်ကြံနေခြင်း ဖြစ်သည်။ သူသည် နေ့ခင်းဘက်တွင် အိမ်ထဲ၌ ကျင့်ကြံခြင်း မပြုဘဲ သူ၏ အိမ်ရှေ့ဝင်းပြင်၌ ကျင့်ကြံရခြင်းကို နှစ်သက်သော အကြီးအကဲတစ်ဦး ဖြစ်သည်။

​မိန်းကလေးသည် အကြီးအကဲ၏ အနီးသို့ ရောက်သွားသည်။ အကြီးအကဲကန်းမှာ ကျင့်ကြံနေခြင်း ဖြစ်သလို မိန်းကလေးတွင်လည်း အကြီးအကဲအပေါ် အမှန်တကယ် သတ်ဖြတ်လိုသော ဆန္ဒ မရှိသဖြင့် သူမ ရောက်နေသည်ကို အကြီးအကဲ မသိပေ။

​မိန်းကလေးသည် တုန်ယင်နေသော လက်သီးကို မြှောက်လိုက်သည်။ သူမသည် သွားကို တင်းတင်းစေ့ကာ အကြီးအကဲကန်း၏ ပခုံးကို ဖြည်းညှင်းစွာ ထိုးလိုက်သည်။

​လက်သီးတစ်ချက်သည် အကြီးအကဲကန်း၏ ပခုံးပေါ်သို့ တတ်နိုင်သမျှ အညင်သာဆုံး ဆင်းသက်သွားသည်။

​လက်သီးသည် အကြီးအကဲကန်းကို ထိလိုက်သည်နှင့် တပြိုင်နက် သူ၏ ခန္ဓာကိုယ်မှ အစွမ်းထက်သော အငွေ့အသက်တစ်ခု ထွက်ပေါ်လာပြီး မိန်းကလေးကို ငါးမီတာခန့် လွင့်ထွက်သွားစေသည်။ မိန်းကလေးမှာ သွေးတစ်လုပ် အန်ထုတ်လိုက်ရပြီး မြေပြင်ပေါ်သို့ ပြုတ်ကျသွားသည်။

​"ရဲတင်းလှချည်လား ကောင်မလေး" အကြီးအကဲကန်းက မျက်လုံးများကို ဖွင့်ရင်း ဟိန်းဟောက်လိုက်သည်။ အကြီးအကဲကန်း၏ သွေးဆာနေသော အကြည့်များက သူမအပေါ် ကျရောက်လာသည်နှင့် မိန်းကလေးမှာ ချက်ချင်းပင် တောင့်ခဲသွားသည်။ သူမသည် အလွန်အမင်း ကြောက်လန့်သွားသဖြင့် ပါးစပ်ပင် ဟ၍ မရတော့ပေ။

​အကြီးအကဲကန်းသည် သူ၏ ပညာရပ်တစ်ခုကို အသုံးပြုကာ ကောင်းကင်ဘက်သို့ လက်အား မြှောက်လိုက်သည်။

​မိန်းကလေး၏ ရင်ဘတ်အထက် ကောင်းကင်ယံတွင် ရွှေရောင် လက်ဝါးငယ်တစ်ဖက် ပေါ်လာသည်။ ထိုလက်ဝါးသည် မိန်းကလေးပေါ်သို့ ဆင်းသက်လာပြီး သူမ၏ ရင်ဘတ်ကို ရိုက်ချလိုက်သည်။ မိန်းကလေး၏ ရင်ဘတ်မှာ ချိုင့်ဝင်သွားပြီး ရင်ဘတ်ရိုးများ ကျိုးကြေသွားသည်။ မိန်းကလေးမှာ ချက်ချင်းပင် အသက်ပျောက်သွားတော့သည်။

​အကြီးအကဲကန်းသည် လက်ကို နောက်တစ်ကြိမ် ထပ်မြှောက်လိုက်ရာ မိန်းကလေး၏ အပေါ်တွင် နောက်ထပ် ရွှေရောင်လက်ဝါးကြီးတစ်ဖက် ထပ်ပေါ်လာပြန်သည်။ ယခုတစ်ကြိမ် ရွှေရောင်လက်ဝါးမှာ မိန်းကလေးထက် အများကြီး ပိုမို ကြီးမားနေသည်။ ၎င်းမှာ အလျား ၁၀ မီတာခန့် ရှိသည်။ အကယ်၍ ထိုလက်ဝါးသာ မိန်းကလေးပေါ် ကျရောက်သွားပါက သူမ၏ အရိုးများ အားလုံးမှာ အမှုန့်ဖြစ်သွားရန် လွယ်ကူလှသည်။ အကြီးအကဲကန်းကတော့ မိန်းကလေး သေသွားသည်ကို ဂရုမစိုက်ပေ။ သူ ကျင့်ကြံနေစဉ် လာရောက် နှောင့်ယှက်သည့် အပြစ်အတွက် သူမ၏ ရုပ်အလောင်းကိုပါ ဖျက်ဆီးပစ်ချင်နေခြင်း ဖြစ်သည်။

​လက်ဝါးသည် မိန်းကလေး၏ ခန္ဓာကိုယ်ပေါ်သို့ မကျရောက်မီမှာပင် သူမ၏ ပတ်ပတ်လည်တွင် အကာအကွယ် ဝင်္ကပါတစ်ခု ပေါ်လာသည်။ ရွှေရောင်လက်ဝါးကြီးမှာ ထိုအကာအကွယ်ကို သွားရောက် ထိမှန်သည်။ ရွှေရောင်လက်ဝါးနှင့် အကာအကွယ် ဝင်္ကပါ နှစ်ခုလုံးမှာ အင်အားတူညီကြသဖြင့် တစ်ခုနှင့်တစ်ခု ထိတွေ့မိသည်နှင့် ပျက်စီးသွားကြသည်။ မိန်းကလေး၏ ရုပ်အလောင်းမှာတော့ မြေပြင်ပေါ်တွင် ဘေးကင်းစွာ ရှိနေဆဲပင်။

​"ရွှမ်ယီ... မင်း ဘာလုပ်နေတာလဲ" အကြီးအကဲကန်းသည် ကောင်းကင်သို့ မော့ကြည့်လိုက်ရာ မိန်းကလေး၏ အပေါ်တွင် ပျံသန်းနေသော ရွှမ်ယီကို မြင်လိုက်ရသဖြင့် အော်ဟစ်လိုက်သည်။

​"စိတ်အေးအေးထားပါ ကန်း... ဒါက ယဇ်ပူဇော်ပွဲအတွက် ငါ့အတန်းရဲ့ အတွင်းပိုင်း စမ်းသပ်မှုတစ်ခုပါ။ ဒီတာဝန်တွေကို အထက်လူကြီးတွေက ရွေးချယ်ပေးထားတာဆိုတာ နင် သိပါတယ်။ ဒီမိန်းကလေး ရတဲ့ တာဝန်က နင့်ကို ရိုက်ပြီး အသက်ရှင်လျက် ပြန်လာဖို့ပဲ။ သူကတော့ သေသွားပြီ၊ အားလုံး ပြီးသွားပါပြီ။ သူ့ရဲ့ ရုပ်အလောင်းကို ဖျက်ဆီးဖို့ မလိုတော့ဘူး၊ မဟုတ်ရင် ငါ သူ့ကို အသက်ကယ်ဆေးနဲ့တောင် ကုပေးနိုင်တော့မှာ မဟုတ်ဘူး" အကြီးအကဲ ရွှမ်ယီက ရှင်းပြလိုက်သည်။

​"အတွင်းပိုင်း စမ်းသပ်မှု ဟုတ်လား။ အဲဒါကြောင့်ကိုး။ ငါ့ကို ရိုက်ရမယ့် တာဝန်ကို ရတဲ့အတွက် ဒီမိန်းကလေးကတော့ ကျရှုံးဖို့ ကံပါလာတာပဲ။ ဒါဟာ တပည့်တွေရဲ့ ပါးနပ်မှုကို စမ်းသပ်တဲ့ တာဝန် ဖြစ်သင့်တာ၊ သူမက ငါ့ကို ရိုက်ပြီးတဲ့နောက် တစ်လုံးမှတောင် ဟမပြောသွားဘူး။ တကယ့် ငတုံးမလေးပဲ။ ကဲ... သူမကို ပြန်ခေါ်သွားတော့" ထိုသို့ ဆိုကာ အကြီးအကဲကန်းသည် သူ၏ နေရာသို့ ပြန်လျှောက်သွားပြီး အိမ်ရှေ့ဝင်း၌ ပြန်ထိုင်လိုက်သည်။

​ရွှမ်ယီသည် မြေပြင်ပေါ်သို့ ဆင်းသက်လိုက်သည်။ သူမသည် မိန်းကလေး၏ ပါးစပ်ကို ဟကာ အသက်ကယ်ဆေး တိုက်ကျွေးလိုက်သည်။ မိန်းကလေး၏ ခန္ဓာကိုယ်မှာ လုံးဝ ပြန်လည် ကောင်းမွန်သွားတော့သည်။

​မိန်းကလေးမှာ မျက်လုံးများကို ဖြည်းညှင်းစွာ ဖွင့်လိုက်သည်။

​အခြားတပည့်များသည် အပြင်ဘက်မှနေ၍ အရာအားလုံးကို စောင့်ကြည့်နေကြသည်။ မိန်းကလေး သေသွားသည်ကို မြင်ခဲ့ကြရသလို ရွှမ်ယီက သူမကို နောက်မှ ပြန်လည် အသက်သွင်းပေးသည်ကိုလည်း မြင်လိုက်ကြရသည်။

​"တွေ့လား၊ အတန်းချိန်အတွင်း ငါတို့ကို အသေခံခိုင်းမှာ မဟုတ်ပါဘူး။ သူမက ငါတို့ကို ခြောက်နေတာပါ။ သေမယ့် အန္တရာယ် မရှိပါဘူး" တပည့်တစ်ဦးက တိုးတိုးလေး ရေရွတ်လိုက်သည်။

​"ရှိတယ်။ တကယ်လို့ အကြီးအကဲကန်းက ဒုတိယ တိုက်ကွက်ကို အရင် သုံးလိုက်မယ်ဆိုရင် သူ ပြန်ပြင်လို့မရအောင် သေသွားလိမ့်မယ်။ သူ တကယ် သေသွားမှာ။ သူ အရမ်း ကံကောင်းသွားတာ" မီလောင်က ခေါင်းခါရင်း မှတ်ချက်ပေးလိုက်သည်။

​လုံချန်းမှာမူ အကယ်၍ သူသာ ထိုမိန်းကလေး၏ နေရာတွင် ရှိနေပါက ထိုတာဝန်ကို မည်သို့ ကိုင်တွယ်မည်နည်းဟု တွေးရင်း ထိုနေရာတွင် ရပ်နေမိသည်။ အကြီးအကဲကန်းမှာ ကောင်းကင်ဘုံအဆင့် ကျင့်ကြံသူ ဖြစ်သဖြင့် သူ့ကို တိုက်ခိုက်ခြင်းမှာ မိုက်မဲရာ ရောက်သလို အကြောင်းမရှိဘဲ သူ၏ အထောက်အထားကိုလည်း ဖော်ထုတ်ပြသရာ ရောက်ပေလိမ့်မည်။

​'ငါဆိုရင်တော့ အကြီးအကဲကို ရပ်တန့်ဖို့ စကားလုံးတွေကိုပဲ သုံးမှာပဲ။ အဲဒါက တစ်ခုတည်းသော ရွေးချယ်စရာ ဖြစ်ပုံရတယ်' လုံချန်းက တွေးတောလိုက်လေတော့သည်။