အာကာသ၀င်ပေါက် ပွင့်လာခဲ့ခြင်း၊ နောက်ဆုတ်မည်လော၊ ရှေ့ဆက်တိုးမည်လော(၄)

ကျန်ရှိနေသော ရေခဲအစောင့်အရှောက်များမှာ ခေါင်းမာနေဆဲ ဖြစ်သော်ငြား.....

ခေါင်းဆောင် ကျဆုံးသွားခြင်း၊ ရုတ်တရက် ထိုးတက်သွားသော ခွန်အားများဖြင့် စစ်သူကြီးသုံးဦးနှင့် စောင့်ကြည့်နေသော လင်းထျန်းလုံတို့ကို ရင်ဆိုင်ရခြင်းတို့ကြောင့်၊ သူတို့၏ ခုခံမှုမှာ အချည်းနှီး ဖြစ်လာလေတော့သည်။

တိုတောင်းလွန်းသော မိနစ်အနည်းငယ် အတွင်းမှာပင် တိုက်ပွဲပြီးဆုံးသွားခဲ့လေသည်။

ရေခဲအစောင့်အရှောက် အကောင်သုံးဆယ်ကျော်လုံးမှာ မြေပြင်ပေါ်ရှိ ရေခဲသလင်း အပိုင်းအစများ အဖြစ်သို့ ပြောင်းလဲသွားကြသည်။

သူတို့၏ မျက်တွင်းများထဲရှိ ဝိညာဉ်မီးတောက်များမှာလည်း တစ်ခုပြီးတစ်ခု ငြိမ်းသတ်သွားကာ၊ မြေပြင်ပေါ်တွင် ပြန့်ကျဲနေသော သန့်စင်သည့် ရေခဲဒြပ်စင် စွမ်းအင် အမြုတေ အချို့သာ ကျန်ရစ်ခဲ့လေသည်။

ဝံပုလွေအုပ်စုသည် အောင်ပွဲခံသည့် အနေဖြင့် တိုးညှင်းသော ဟိန်းဟောက်သံများကို ထုတ်လွှတ်လိုက်ကြသည်။

တိုက်ပွဲကို အနိုင်ရခဲ့ပြီးသော်ငြား၊ သူတို့၏ သတိဝီရိယကိုတော့ မလျှော့ချခဲ့ဘဲ၊ ရေပြာကြေးခွံအစောင့်အရှောက်များ၏ ဦးဆောင်မှုအောက်တွင် စစ်မြေပြင်ကို ရှင်းလင်းရန်နှင့် ပတ်ဝန်းကျင်ကို သတိဝီရိယဖြင့် စောင့်ကြည့်ရန် ချက်ချင်း စတင်လိုက်ကြလေသည်။

လင်းထျန်းလုံသည် အရှိန်အဝါများ သိသိသာသာ ပိုမိုအားကောင်းလာခဲ့ပြီဖြစ်သော သူ၏ အရည်အချင်းရှိ လက်အောက်ငယ်သား သုံးဦးကို ကြည့်ရင်း ငွေပြာရောင် ‌မျက်လုံးများထဲတွင် ကျေနပ်အားရမှု အရိပ်အယောင်တစ်ခု လျှပ်တစ်ပြက် ပေါ်လာခဲ့သည်။

ဤတိုက်ပွဲမှ ရိတ်သိမ်းရရှိမှုမှာ သူ၏ မျှော်လင့်ချက်ထက် များစွာ သာလွန်နေလေသည်။

သူ ကိုယ်တိုင် ထိုစွမ်းအင် အမြုတေများကို လိုက်လံစုဆောင်းလိုက်သည်... ၎င်းတို့မှာ ရေခဲဒြပ်စင် မိစ္ဆာသားရဲများအတွက် ကောင်းမွန်သော စွမ်းအင်ဖြည့်စွက်စာများ ဖြစ်ကြလေသည်။

“ဖေဖေ... ဦးလေးရန့်မြဲ့တို့က အရမ်း အစွမ်းထက်လာတာပဲနော်...” ရှောင်ယင်းက ရန့်မြဲ့နှင့် အခြားသူများကို စိတ်လှုပ်ရှားစွာ ကြည့်ရင်း ပြောလိုက်သည်။

ရှောင်လန်သည်လည်း ခေါင်းညိတ်ပြလိုက်ပြီး၊ ရန့်မြဲ့၏ ရေခဲချပ်ဝတ်ပေါ်ရှိ သတ္တုအလင်းတန်းနှင့် ထျန်းပင်း၏ ပိုမိုကြမ်းတမ်းလာသော အရှိန်အဝါတို့ကို တွေးတော အကဲခတ်နေလေသည်။

နှင်းဝံပုလွေအုပ်စု ခွန်အား တိုးတက်လာခြင်းက သူတို့၏ လုံခြုံရေး ပိုမိုကောင်းမွန်လာရန် အာမခံနိုင်ကြောင်း ဆိုလိုခြင်းပင် ဖြစ်လေသည်။

စစ်မြေပြင်ကို ရှင်းလင်းပြီးနောက်၊ ဝံပုလွေအုပ်စု၏ အကြည့်များမှာ ရေခဲသလင်း တောအုပ်အနက်ထဲရှိ မှုန်ဝါးဝါး ပေါ်နေသော ထိုယဇ်ပလ္လင်ဆီသို့ နောက်တစ်ကြိမ် လှည့်သွားကြလေသည်။

ဤတိုက်ပွဲအပြီးတွင် ရှေ့ဆက်သွားရမည့်လမ်းမှာ အနည်းငယ် ပိုမိုရှင်းလင်းလာပုံ ရသော်လည်း၊ နက်ရှိုင်းပြီး ရှေးကျလွန်းသော ဖိအားမှာ အနည်းငယ်မျှပင် လျော့ကျမသွားခဲ့ပေ။

“ရှေ့ဆက်သွားမယ်... သတိထားကြ...” လင်းထျန်းလုံက အမိန့်ပေးလိုက်သည်။ ယဇ်ပလ္လင်မှာ ဤဧရိယာ၏ ဗဟိုချက်ဖြစ်ကြောင်း သူ ခံစားနေရလေသည်။

ဝံပုလွေအုပ်စုမှာ နောက်တစ်ကြိမ် ခရီးဆက်ခဲ့ကြသည်။ ဤတစ်ကြိမ်တွင် အဖွဲ့၏ အရှိန်အဟုန်မှာ ပိုမိုအားကောင်းနေခဲ့လေသည်။

စစ်သူကြီးသုံးဦးမှာ အဆင့်တက်လှမ်းမှုများအပြီးတွင် ယုံကြည်မှုအပြည့် ရှိနေကြပြီး၊ သူတို့၏ စူးရှသော မျက်လုံးများဖြင့် အန္တရာယ် ပုန်းကွယ်နေနိုင်သည့် ရေခဲတိုင်များနှင့် အရိပ်တိုင်းကို စစ်ဆေးနေကြလေသည်။

နောက်ဆုံးတွင် ရေခဲတိုင်များ ထူထပ်လွန်းသော ဧရိယာကို သူတို့ ဖြတ်ကျော်သွားသောအခါ၊ သူတို့ရှေ့ရှိ မြင်ကွင်းမှာ ရုတ်တရက် ရှင်းလင်းသွားခဲ့လေသည်။

ဧရာမ စက်ဝိုင်းပုံစံ ကွင်းပြင်တစ်ခု၏ အလယ်ဗဟိုတွင် နှစ်ပေါင်းတစ်သောင်းသက်တမ်းရှိ ရေခဲများဖြင့် တည်ဆောက်ထားသော ရှေးဟောင်း ယဇ်ပလ္လင်ကြီး တစ်ခု မားမားမတ်မတ် တည်ရှိနေလေသည်။

ယဇ်ပလ္လင်မှာ ဆယ်မီတာခန့် မြင့်မားပြီး၊ ဝိညာဉ်နယ်မြေအတွင်းမှ စွမ်းအင်များ ပဲ့တင်ထပ်နေကာ မှိန်ဖျော့ဖျော့ အပြာရောင် အလင်းတန်းများ ထုတ်လွှတ်နေသည့် နားလည်ရခက်သော ရှေးဟောင်း ရူန်းအက္ခရာများဖြင့် ဖုံးလွှမ်းနေလေသည်။

ယဇ်ပလ္လင်၏ အထွတ်အထိပ်တွင် အရည်ပုံစံ နီလာကျောက်တစ်လုံးနှင့် တူသည့် နက်ရှိုင်းသော အလင်းစက်လုံး တစ်ခု အဆက်မပြတ် လည်ပတ်နေပြီး လွင့်မြောနေလေသည်။

နှလုံးခုန်မြန်သွားစေနိုင်လောက်သည့် ထိုရှေးဟောင်းဖိအားကြီးမှာ ဤအလင်းစက်လုံးထံမှ ထွက်ပေါ်နေခြင်းပင် ဖြစ်လေသည်။

[စနစ် အသိပေးချက်] ။ ။ ရှေးဟောင်း ရေခဲယဇ်ပလ္လင်ကို ရှာဖွေတွေ့ရှိပါသည်။ အလွန်အမင်း သိပ်သည်းနေသော ရေခဲဒြပ်စင် မူလစွမ်းအင်များကို ထောက်လှမ်းတွေ့ရှိရပါသည်။

စွမ်းအင် တုံ့ပြန်မှု - ??? (အလွန်အမင်း မြင့်မားသော ခြိမ်းခြောက်နိုင်စွမ်းရှိ)

လင်းထျန်းလုံ၏ အမိန့်ကိုပင် မလိုအပ်ဘဲ၊ ဝံပုလွေအုပ်စုမှာ ယဇ်ပလ္လင်နှင့် မီတာတစ်ရာအကွာတွင် အလိုအလျောက် ရပ်တန့်သွားကြပြီး၊ ကာကွယ်ရေး ဖွဲ့စည်းပုံတစ်ခုကို အလိုအလျောက် ဖွဲ့စည်းလိုက်ကြလေသည်။

အဆင့်တက်ထားခါစဖြစ်သော ရန့်မြဲ့၊ ထျန်းပင်းနှင့် ယင်းဖုန်းတို့ အပါအဝင် နှင်းဝံပုလွေများ အားလုံးသည် ထိုအလင်းစက်လုံးထံမှ ယခင်က တစ်ခါမှ မခံစားရဖူးသော ဖိအားတစ်ခုကို ခံစားလိုက်ကြရသည်။

၎င်းမှာ သူတို့၏ တည်ရှိမှုနှင့် အသက်ဇီ၀အဆင့်မှနေ၍ မြစ်ဖျားခံလာသော ရိုသေလေးစားမှုနှင့် သတိဝီရိယ တစ်မျိုးပင် ဖြစ်လေသည်။

ရှောင်လန်နှင့် ရှောင်ယင်းတို့သည်လည်း စွတ်ဖားပေါ်တွင် မတ်တတ်ထရပ်လိုက်ကြသည်။

သူတို့၏ လက်သေးသေးလေးများဖြင့် လက်ရန်းများကို တင်းကျပ်စွာ ဆုပ်ကိုင်ထားကာ၊ သူတို့၏ မျက်လုံးကြီးများက ယဇ်ပလ္လင်ထိပ်ရှိ အလင်းစက်လုံးကို မျက်တောင်မခတ်တမ်း စူးစိုက်ကြည့်နေကြလေသည်။

“ဖေဖေ... အဲဒီ အပြာရောင် အလုံးကြီးက... ကြည့်ရတာ အရမ်း ကြောက်စရာကောင်းပေမဲ့... အရမ်းလည်း ဆွဲဆောင်မှု ရှိတယ်နော်...”

ရှောင်ယင်းက စိတ်၀င်စားမှုများ ပြည့်နှက်နေသည့် လေသံဖြင့် တိုးညှင်းစွာ ပြောလိုက်လေသည်။

ရှောင်လန်၏ အာရုံခံစားနိုင်စွမ်းမှာမူ ပို၍ပင် ရှင်းလင်းနေသည်...

သူမသည် ဗလာဟင်းလင်းပြင်နယ်ပယ် ပင်ကိုစွမ်းရည်ကြောင့် ရေခဲမြစ်တစ်ခု လှိုင်းထနေသည့်အလား ထိုအလင်းစက်လုံး အတွင်းမှ ထွက်ပေါ်လာနေသည့် တိုးညှင်းပြီး ကြီးမားကျယ်ပြန့်လှသော စွမ်းအင်စည်းချက်ကို ခပ်သဲ့သဲ့ “ကြား” နေရလေသည်။

“အထဲမှာ... တစ်ခုခုရှိနေတယ်... အရမ်း ရှေးကျပြီး အရမ်း အစွမ်းထက်လွန်းတယ်...”

လင်းထျန်းလုံသည် သူ၏ ငွေပြာဘုရင်မျက်၀န်းများကို အမြင့်ဆုံး ကန့်သတ်ချက်အထိ တွန်းတင်လိုက်သည်။

ရေခဲပြာရောင် အလင်းတန်းများမှာ ရုပ်ဝတ္ထုတစ်ခုအဖြစ်သို့ ပြောင်းလဲသွားလုနီးပါးပင်။

သူသည် ထိုအလင်းစက်လုံး၏ အရင်းအမြစ်ကို ထိုးဖောက်မြင်ရန် ကြိုးစားလိုက်သော်လည်း၊ သူ၏ အကြည့်များ စက်လုံးအတွင်းသို့ ဝင်ရောက်သွားသည်နှင့်၊ အဆုံးအစမရှိသော အပြာရောင် ချောက်နက်ကြီးတစ်ခုအတွင်း ကျရောက်သွားသည့်အလား ခံစားလိုက်ရလေသည်။

ပင်လယ်ပြင်ကဲ့သို့ ကျယ်ပြောလွန်းသော ရေခဲဒြပ်စင် မူလစွမ်းအင်များကို ခံစားနိုင်ခဲ့ရုံမှလွဲ၍၊ အခြား အသုံးဝင်မည့် မည်သည့် သတင်းအချက်အလက်ကိုမျှ သူ မရရှိနိုင်ခဲ့ပေ။

စနစ်ကပင်လျှင် ရှင်းလင်းသော သတ်မှတ်ချက်ကို မပေးနိုင်ဘဲ၊ “အလွန်အမင်း မြင့်မားသော ခြိမ်းခြောက်နိုင်စွမ်းနှင့်” နှင့် “အမည်မသိ” ဟုသာ မှတ်သားထားလေသည်။

သူ အနည်းငယ်မျှပင် ပေါ့ပေါ့ဆဆ မနေဝံ့ပေ။ ဤယဇ်ပလ္လင်နှင့် ပလ္လင်အပေါ်ရှိ အလင်းစက်လုံးမှာ၊ ရေခဲသလင်း တောအုပ်ကြီး၏ ဗဟိုချက်ဖြစ်ကြောင်း ထင်ရှားလှပေသည်။

ယင်းယဇ်ပလ္လင်၏ အန္တရာယ်မှာ ယခင်က ရေခဲနဂါးလေးနှင့် ရေခဲအစောင့်အရှောက်များ ထက် များစွာ သာလွန်နေနိုင်ပေသည်။

လင်းထျန်းလုံသည် အာရုံစိုက်အခဲခတ်နေရင်း နည်းဗျူဟာတစ်ခုကို စဉ်းစားနေစဉ်မှာပင်၊ နောက်ထပ် အပြောင်းအလဲတစ်ခု ဖြစ်ပေါ်လာခဲ့သည်။

ယဇ်ပလ္လင်၏ အောက်ခြေတစ်ဝိုက်ရှိ ငြိမ်သက်နေသော ရှေးဟောင်း ရူန်းအက္ခရာများမှာ၊ လျှပ်စီပတ်လမ်းတစ်ခုနှင့် ဆက်သွယ်လိုက်သကဲ့သို့ မျက်စိကျိန်းမတတ် တောက်ပသော အလင်းရောင်များဖြင့် ရုတ်တရက် ပိုမိုလင်းထိန်လာခဲ့သည်။

အလင်းရောင်များမှာ အပေါ်သို့ လျင်မြန်စွာ ပြန့်နှံ့လာပြီး၊ နောက်ဆုံးတွင် အလင်းအားလုံးမှာ ထိပ်ရှိ အပြာရောင် အလင်းစက်လုံး အတွင်းသို့ စုစည်းသွားကြလေတော့သည်။

ဝီ... ....

အလင်းစက်လုံးမှာ ပြင်းထန်စွာ တုန်ခါသွားပြီး၊ ရှေးဟောင်းကာလမှ ထွက်ပေါ်လာသကဲ့သို့သော တိုးညှင်းသည့် အသံတစ်ခုကို ထုတ်လွှတ်လိုက်လေသည်။

အလွန်အမင်း သိပ်သည်းနေသော အပြာရောင် အလင်းတန်းတစ်ခုမှာ အလင်းစက်လုံး ထံမှ ရုတ်တရက် ထွက်ပေါ်လာသည်။

ထိုအလင်းတန်းမှာ ဝံပုလွေအုပ်စုကို တိုက်ခိုက်ခြင်း မဟုတ်ဘဲ၊ လူတိုင်း၏ ခေါင်းပေါ်ရှိ အရောင်အသွေး စုံလင်ပြီး အဆက်မပြတ် တွန့်လိမ်ပြောင်းလဲနေသော ဝိညာဉ်နယ်မြေ၏ ကောင်းကင်ကြီးဆီသို့ တည့်တည့်မတ်မတ် ဦးတည်သွားခြင်း ဖြစ်လေတော့သည်။

အလင်းတန်း ထိမှန်သွားသော ကောင်းကင်ကြီးမှာ၊ ငြိမ်‌သက်နေသော ရေမျက်နှာပြင်ပေါ် ကျောက်တုံးကြီးတစ်ခု ပစ်ချလိုက်သည့်အလား ပြင်းထန်စွာ တွန့်လိမ်လည်ပတ်လာပြီး၊ နောက်ဆုံးတွင် အချင်း ဆယ်မီတာခန့်ရှိသော နက်ရှိုင်းသည့် အပြာရောင် ဝဲဂယက်ကြီးတစ်ခု ပေါ်လာလေတော့သည်။

ဝဲဂယက်၏ ဗဟိုချက်မှာ အလွန်အမင်း နက်ရှိုင်းလှပြီး၊ အခြား အာကာသတစ်ခုနှင့် ဆက်သွယ်ထားသကဲ့သို့ ရှိလေသည်။

၎င်းထံမှ ပိုမိုသန့်စင်ပြီး ပိုမိုရှေးကျသော အအေးဓာတ်တစ်ခု ပြန့်နှံ့လာပြီး၊ ထိုထဲတွင်... သက်ရှိသတ္တဝါတစ်ကောင်၏ အရှိန်အဝါ အရိပ်အယောင်လေးတစ်ခုပင် ရောနှောနေသလို ခံစားနေရလေသည်။

[စနစ် အသိပေးချက်] ။ ။ ပြင်းထန်သော အာကာသလှိုင်းဂယက်များကို ထောက်လှမ်းတွေ့ရှိရပါသည်။ ရှေးဟောင်း ယဇ်ပလ္လင်သည် အာကာသ လမ်းကြောင်းတစ်ခုကို အသက်သွင်းနေပါသည်။

လမ်းကြောင်းတည်ငြိမ်မှု - ???

ဆက်သွယ်ထားသော နေရာ - ???

“အာကာသလမ်းကြောင်းလား...” လင်းထျန်းလုံ တုန်လှုပ်သွားခဲ့သည်။ “ဤယဇ်ပလ္လင်မှာ အမှန်တကယ်ပင် လေဟာနယ်ကူးပြောင်းခြင်း တံခါးတစ်ခုဖြစ်နေသည်လော။

“ဒီလမ်းကြောင်းက ဘယ်ကို ဦးတည်သွားမှာလဲ၊ ပိုကြီးမားတဲ့ အခွင့်အရေးတစ်ခုဆီကိုလား၊ ဒါမှမဟုတ် လမ်းဆုံးနေတဲ့ ထောင်ချောက်တစ်ခုဆီကိုလား”

နက်ရှိုင်းသော အပြာရောင် ဝဲဂယက်ကြီးမှာ လေထဲတွင် တွဲလောင်းကျနေသည့် ဧရာမမျက်လုံးကြီး တစ်လုံးသဖွယ်ဖြစ်လာကာ ဖြည်းညင်းစွာ တည်ငြိမ်သွားပြီး၊ အောက်ဘက်ရှိ ဝံပုလွေအုပ်စုကို အေးစက်စွာ စောင့်ကြည့်နေလေသည်။

လမ်းကြောင်း၏ အခြားတစ်ဖက်တွင် အဆုံးအစမရှိ အေးခဲနေသည့် ကမ္ဘာတစ်ခု ရှိနေပြီး၊ ရေခဲမြစ်များနှင့် ဆက်တိုက်ဆိုသလို တိုက်ခတ်နေသော နှင်းမုန်တိုင်းများကို ဝေဝါးဝေဝါး မြင်တွေ့နေရသည်။

လက်ရှိ လူတိုင်းရောက်ရှိနေသည့် ဝိညာဉ်နယ်မြေ နှင်းကွင်းပြင် မြင်ကွင်းနှင့် လုံးဝ ကွဲပြားခြားနားနေလေသည်။

ခက်ခဲသော ရွေးချယ်မှုတစ်ခု လင်းထျန်းလုံ၏ အရှေ့တွင် ရောက်ရှိလာခဲ့သည်...

ဤအမည်မသိ လမ်းကြောင်းအတွင်းသို့ စွန့်စားဝင်ရောက်ပြီး စူးစမ်းလေ့လာမည်လော။ သို့မဟုတ် ဤနေရာတွင်ပင် ရပ်တန့်လိုက်ပြီး လုံခြုံသော ဧရိယာတစ်ခုသို့ ဆုတ်ခွာမည်လော။

သူသည် တိုက်ပွဲများကို ဆက်တိုက်ဆိုသလို ဖြတ်သန်းထားခဲ့ရပြီး၊ အဆင့်တက်လှမ်းထားသော်ငြား အနားယူရန် လိုအပ်နေသေးသော ဝံပုလွေအုပ်စုကို နောက်လှည့်ကြည့်လိုက်သည်။

ထို့နောက် သူ၏ ဘေးရှိ သိချင်စိတ်များနှင့် စိတ်မအေးချမ်းမှု အရိပ်အယောင်လေးတစ်ခု ရောနှောနေသည့် မျက်လုံးများနှင့် သူ၏ သမီးလေးများကို ကြည့်လိုက်သည်။

ထို့နောက် သူ၏ အကြည့်များမှာ ထိုနက်ရှိုင်းသော လမ်းကြောင်း အဝင်ဝဆီသို့ လှည့်သွားလေတော့သည်။

ဘုရင်၏ ဆုံးဖြတ်ချက်က မျိုးနွယ်စုတစ်ခုလုံး၏ ကံကြမ္မာနှင့် သက်ဆိုင်သည့် အခိုက်အတန့်သို့ ရောက်ရှိနေလေတော့သည်။