ဒုတိယ ဘုရင်အဆင့် ကနဦးသို့ ရောက်ရှိသွားသော ရေခဲချီစွမ်းအင်နဂါး၊ အသိစိတ်ဟင်းလင်းပြင် ဖြစ်တည်လာခြင်း(၂)

ကောင်းကင်နှင့် မြေကြီးကို တိုက်ခိုက်ကာ ဘယ်တော့မှ အရှုံးမပေးသော အစွမ်းထက် စိတ်ဆန္ဒတစ်ခုက သူ၏ ဝိညာဉ်နှင့် ခန္ဓာကိုယ်ကို ထောက်ပံ့ပေးလိုက်သည်။

တစ်ချိန်တည်းမှာပင် မိုးပြာနက်နဲရေခဲ ဝံပုလွေသွေးမျိုးဆက်က ယခင်က တစ်ခါမှ မရှိခဲ့ဖူးသော အမြန်နှုန်းဖြင့် ပွက်ပွက်ဆူလာခဲ့သည်။

ရေခဲနဂါးကြီး၏ တိုက်ကွက်ကို သူ ရှောင်တိမ်းရန် မရွေးချယ်ခဲ့ပေ။

ယင်းအစား သူ၏ ခြေလေးဖက်ဖြင့် ရေခဲပြင်ကို ဆောင့်ကန်လိုက်ရာ ဘုရင်အဆင့် စွမ်းအား၏ တွန်းအားကြောင့် အစွန်းရောက်အရိပ်လျှပ်စီးခြေလှမ်းက အသံ၏အမြန်နှုန်းကိုပင် ကျော်လွန်သွားလေသည်။

သာမန်မျက်စိဖြင့် ဖမ်းယူရန် မဖြစ်နိုင်သလောက်ဖြစ်သော မိုးပြာအလင်းတန်းတစ်ခုအဖြစ် ပြောင်းလဲသွားကာ ထိုအဖျက်စွမ်းအားကောင်းသော နဂါးးသက်ပြင်း တိုက်ကွက်ဆီသို့ ထိပ်တိုက် ပြေးဝင်သွားတော့သည်။

ပြေးဝင်သွားစဉ်အတွင်း သူ၏ ညာဘက်လက်သည်းကို မြှောက်ထားပြီးဖြစ်ကာ ချန်ရွှမ်းမိုးကြိုးရေခဲလက်သည်း စွမ်းအင်၏ စွမ်းအားများက ကြောက်မက်ဖွယ် အရှိန်အဟုန်ဖြင့် စုစည်းသိပ်သည်းလာခဲ့သည်။

၎င်းက ရိုးရှင်းသော ဖုံးလွှမ်းမှုမျိုး မဟုတ်တော့ဘဲ လျှပ်စီးတန်းများနှင့် နက်နဲရေခဲ စွမ်းအားများအားလုံးက လက်သည်းထိပ်ဖျားရှိ တစ်နေရာတည်းဆီသို့ ရူးသွပ်စွာ ဖိသိပ်စုစည်းသွားခြင်း ဖြစ်သည်။

ထိုနေရာရှိ အလင်းတန်းက အဆုံးစွန်အထိ တောက်ပနေပြီး သေးငယ်သော ကြယ်လေးတစ်ပွင့်အလား ပတ်ဝန်းကျင်ရှိ အလင်းရောင်များကိုပင် မှေးမှိန်သွားစေနိုင်သော ကြောက်မက်ဖွယ် လှိုင်းတစ်ခုကို ထုတ်လွှတ်နေသည်။

“ဆုတ်ဖြဲစမ်း...”

နဂါးသက်ပြင်း တိုက်ကွက်နှင့် တိုက်မိတော့မည့် အခိုက်အတန့်တွင် လင်းထျန်းလုံသည် ဟိန်းဟောက်လိုက်ပြီး စွမ်းအားများ အဆုံးစွန် စုစည်းထားသော လက်သည်းထိပ်ဖျားဖြင့် ရှေ့သို့ ပြင်းထန်စွာ ရိုက်ချလိုက်သည်။

“ရှပ်”

လူအများ မျှော်လင့်ထားသလို ကမ္ဘာမြေကို တုန်လှုပ်သွားစေမည့် ပေါက်ကွဲသံကြီး ထွက်ပေါ်မလာဘဲ ဟင်းလင်းပြင် ဆုတ်ဖြဲခံလိုက်ရသကဲ့သို့ အလွန်စူးရှသော အသံကြီး ထွက်ပေါ်လာသည်။

အဆုံးမဲ့ အင်အားများ ပါဝင်နေသော ထိုရေခဲနှင့်မီး နဂါးသက်ပြင်း တိုက်ကွက်ကြီးမှာ အစွန်းရောက်မိုးပြာနက်နဲအလင်းတန်းလေးကြောင့် အလယ်မှနေ၍ အမှန်တကယ်ပင် ထက်ပိုင်းခွဲခြင်း ခံလိုက်ရသည်။

ပူလောင်နေသော ဓားတစ်လက်ဖြင့် ထောပတ်ကို လှီးဖြတ်လိုက်သကဲ့သို့ နဂါးသက်ပြင်း စွမ်းအင်များမှာ လမ်းကြောင်းပြောင်းရန် ဖိအားပေးခံလိုက်ရသည်။

ရေခဲနှင့်မီး စွမ်းအင်များမှာ လင်းထျန်းလုံ၏ ခန္ဓာကိုယ် တစ်ဖက်တစ်ချက်စီမှ လေချွန်သံနှင့်အတူ ဖြတ်သန်းသွားကာ သူ၏ နောက်ကွယ်ရှိ ရေခဲချောက်ကမ်းပါးကြီးများကို ရေခဲမှုန်များနှင့် ချော်ရည်များ ရောနှောနေသော နေရာတစ်ခုအဖြစ် ချက်ချင်း ပြောင်းလဲပစ်လိုက်သည်။

လင်းထျန်းလုံ၏ အရှိန်က အနည်းငယ်မျှပင် လျော့ကျမသွားခဲ့ချေ။

နှစ်ခြမ်းကွဲသွားသော နဂါးသက်ပြင်းကို ဖြတ်သန်းသွားပြီးနောက် ရေခဲစွမ်းအင်မိစ္ဆာနဂါး၏ ဧရာမဦးခေါင်းကြီးရှေ့သို့ ချက်ချင်း ရောက်ရှိသွားသည်။

သူသည် မိုးပြာနက်နဲဘုရင်မျက်ဝန်းများဖြင့် ပြောင်းပြန်ကြေးခွံအောက်ရှိ မျက်ခုံးနှစ်ခုကြားမှ စွမ်းအင်စီးဆင်းမှု၏ အဓိကအချက်အချာနေရာကို ပစ်မှတ်ထားလိုက်‌လေသည်။

“သေစမ်း...”

နက်နဲရေခဲကောင်းကင်ဆုတ်ဖြဲလက်သည်း။

ဤတစ်ကြိမ်တွင် မျက်စိဖြင့်မမြင်နိုင်သော ဟင်းလင်းပြင် ဆုတ်ဖြဲမှုမျိုး မဟုတ်တော့ဘဲ မရေမတွက်နိုင်သော အနက်ရောင် လျှပ်စီးတန်းများသဖွယ် ထင်ရှားသော ဟင်းလင်းပြင် အက်ကွဲကြောင်းကြီးတစ်ခု ဖြစ်ပေါ်လာသည်။

သူ၏ လက်သည်းချက်နှင့်အတူ ထိုအချက်အချာနေရာဆီသို့ ရက်စက်စွာ ဆုတ်ဖြဲလိုက်တော့သည်။

“ဖတ်...”

လက်သည်းများ အသားထဲသို့ စိုက်ဝင်သွားသော အသံက သွားကျိန်းမတတ်ပင်။

ရေခဲစွမ်းအင်မိစ္ဆာနဂါးမှာ ယခင်က တစ်ခါမှ မရှိခဲ့ဖူးလောက်အောင် စူးရှစွာ အော်ဟစ်လိုက်ပြီး မျက်ခုံးများကြားတွင် ဧရာမဒဏ်ရာကြီးတစ်ခု ဖြစ်ပေါ်သွားကာ ရွှေနီရောင် နဂါးသွေးများက ရေတံခွန်တစ်ခုအလား ပန်းထွက်လာခဲ့သည်။

ထွက်ပေါ်လာသော ဟင်းလင်းပြင် အက်ကွဲကြောင်းများ၏ ရိုက်ခတ်မှုကြောင့် ရေခဲနဂါး၏ အဝါရောင် ဒေါင်လိုက်မျက်ဝန်းတစ်ဖက်ပင် ချက်ချင်း မှေးမှိန်သွားကာ ပေါက်ကွဲသွားတော့သည်။

နဂါးအတုအသွင်ပြောင်းခြင်း အခြေအနေမှာ မူလကတည်းက အလွန်မတည်မငြိမ် ဖြစ်နေခြင်းဖြစ်သည်။

ဤသို့ ပြင်းထန်သော တိုက်ခိုက်မှုကို ခံလိုက်ရသောအခါ ရေခဲစွမ်းအင်မိစ္ဆာနဂါး အတွင်းရှိ စွမ်းအင်များမှာ ချက်ချင်း ထိန်းချုပ်မှု ကင်းမဲ့သွားပြီး ရူးသွပ်သောင်းကျန်းလာတော့သည်။

၎င်း၏ ဧရာမခန္ဓာကိုယ်ကြီးက လေထဲတွင် ရူးသွပ်စွာ တွန့်လိမ်တုန်ခါနေပြီး ခန္ဓာကိုယ်အတွင်းမှ ရွှေနီရောင်နှင့် ရေပြာရောင် အလင်းတန်းများ ကမောက်ကမ လင်းလက်နေကာ အချိန်မရွေး ပေါက်ကွဲထွက်တော့မည့်အလား ဖြစ်နေသည်။

တိုက်ခိုက်မှု အောင်မြင်သွားပြီးနောက် လင်းထျန်းလုံက တစ်ခဏမျှပင် ရပ်တန့်မနေခဲ့ပေ။ ချက်ချင်းပင် နောက်သို့ ဆုတ်ခွာလိုက်ပြီး မိုးပြာနက်နဲဘုရင်မျက်ဝန်းများဖြင့် ရန်သူ၏ နောက်ဆုံး အဆုံးသတ်ကို တည်ငြိမ်စွာ စောင့်ကြည့်နေလိုက်သည်။

“ဝုန်း...”

အသက်ရှူကြိမ် အနည်းငယ်အကြာတွင် မျှော်လင့်ချက်ကင်းမဲ့ပြီး မကျေမနပ်ဖြစ်နေသော ကမ္ဘာမြေကိုပင် တုန်လှုပ်သွားစေမည့် ပေါက်ကွဲသံကြီးနှင့်အတူ ရေခဲစွမ်းအင်မိစ္ဆာနဂါး၏ ခန္ဓာကိုယ်ကြီးမှာ ထိန်းချုပ်မှုကင်းမဲ့နေသော စွမ်းအင်များကြောင့် လုံးဝ အပိုင်းပိုင်းအစစ ပေါက်ကွဲထွက်သွားသည်။

ထိုပေါက်ကွဲမှုမှတစ်ဆင့် ချိုင့်ဝှမ်းတစ်ခုလုံးကို လွှမ်းခြုံသွားသည့် စွမ်းအင်မုန်တိုင်းကြီးတစ်ခုအဖြစ် ပြောင်းလဲသွားတော့သည်။

မုန်တိုင်းပြီးဆုံးသွားပြီးနောက် ယခင်ကထက် ပိုမိုတောက်ပနေပြီး အတွင်းတွင် နဂါးပုံရိပ်တစ်ခု ကူးခတ်နေဟန်ရသည့် အပြာရောင် မိစ္ဆာသားရဲအမြုတေ တစ်ခုနှင့်အတူ အမာကျောဆုံး ရွှေနီရောင် နဂါးအရိုး အပိုင်းအစ အနည်းငယ်သာ ကျန်ရစ်ခဲ့ကာ ကောင်းကင်ထက်မှ ဖြည်းညင်းစွာ ကျဆင်းလာကြသည်။

လင်းထျန်းလုံ မြေပြင်ပေါ်သို့ ဖြည်းညင်းစွာ ဆင်းသက်လိုက်သည်။

သူ၏ အရှိန်အဝါ အနည်းငယ် ကမောက်ကမ ဖြစ်နေသော်လည်း မိုးပြာနက်နဲဘုရင်မျက်ဝန်း များထဲရှိ အလင်းတန်းများက ပိုမိုနက်နဲလာသည်။

ထိုမိစ္ဆာသားရဲအမြုတေနှင့် နဂါးအရိုး အပိုင်းအစများကို ကြည့်ရင်း ဤကြေကွဲဖွယ်ကောင်းလှသော ဘုရင်အဆင့် တိုက်ပွဲကြီးမှာ နောက်ဆုံးတွင် အောင်ပွဲဖြင့် အဆုံးသတ်သွားပြီဖြစ်ကြောင်း သိလိုက်သည်။

စွတ်ဖားလှည်းပေါ်ရှိ သူ၏ သမီးငယ်လေးများနှင့် အံ့ဩထိတ်လန့်မှုများ ပြီးဆုံးသွားပြီးနောက် ဘေးအန္တရာယ်မှ လွတ်မြောက်သွားခြင်းအတွက် ဝမ်းသာအားရ အော်ဟစ်လိုက်ကြပြီး ဝံပုလွေဘုရင်အပေါ် အဆုံးမဲ့ ကြည်ညိုလေးစားမှုများ ဖြစ်ပေါ်လာကြသည်။

ချိုင့်ဝှမ်းကြီးမှာ ရှုပ်ပွနေသည်။ မူလက ကြည်လင်နေသော ရေခဲပြင်ကြီးမှာ အက်ကွဲကြောင်းများ၊ မီးလောင်ကျွမ်းထားသော အရာများနှင့် အေးခဲနေသော ချော်ရည်များဖြင့် ဖုံးလွှမ်းနေလေသည်။

လေထုထဲတွင် တိုက်ပွဲတုန်းက စွမ်းအင်များ၏ အကြွင်းအကျန်များနှင့် ကန့်ငွေ့ရောနေသော သွေးနံ့များ ပြည့်နှက်နေသည်။

တိုတောင်းသော်လည်း ဝိညာဉ်ကိုပင် တုန်လှုပ်သွားစေနိုင်သော ထို ဘုရင်အဆင့် သေမင်းတမန် တိုက်ပွဲကြီးက နက်ရှိုင်းသော အမှတ်အသားများကို ချန်ရစ်ခဲ့ချေပြီ။

လင်းထျန်းလုံ အသက်ပြင်းပြင်း တစ်ချက် ရှူသွင်းလိုက်ပြီး စွမ်းအားများကို အလွန်အကျွံ အသုံးပြုလိုက်ခြင်းကြောင့် ခန္ဓာကိုယ်အတွင်း ပွက်ပွက်ဆူနေသော သွေးများကို ဖိနှိပ်လိုက်ရသည်။

ထာ၀ရတိုက်ပွဲဝိညာဉ် ပင်ကိုယ်စွမ်းရည်၏ အကျိုးသက်ရောက်မှုမှာ ဆက်လက် အလုပ်လုပ်နေပြီး ရုပ်ပိုင်းဆိုင်ရာ ပြန်လည်ကောင်းမွန်မှုကို အရှိန်မြှင့်ပေးရုံသာမက ထိုးဖောက်ဝင်ရောက်ထားသော အဆင့်အသစ်ကိုပါ အလျင်အမြန် တည်ငြိမ်သွားစေခဲ့သည်။

အတွေးတစ်ခုနှင့်အတူ အဆင့်တက်ထားသော အလယ်အလတ် စိတ်ချင်းဆက်သွယ်ခြင်း နှင့် အလယ်အလတ် စိတ်ထိန်းချုပ်ခြင်း တို့ကို တစ်ပြိုင်နက်တည်း အသုံးပြုရန် ကြိုးစားလိုက်သည်။

တိုက်ပွဲအတွင်း အလုပ်များနေသဖြင့် သေချာ မခံစားကြည့်နိုင်ခဲ့သော်လည်း ယခုအချိန်တွင် တည်ငြိမ်စွာဖြင့် အာရုံခံကြည့်လိုက်သောအခါ ကွာခြားချက်ကို ချက်ချင်း သိရှိလိုက်ရသည်။

ထိုနှစ်ခု၏ ပေါင်းစပ်မှုက အံ့ဩဖွယ်ကောင်းသော အရည်အသွေးပြောင်းလဲမှု တစ်ခုကို ဖြစ်ပေါ်စေသကဲ့သို့ပင်။

သူ၏ စိတ်စွမ်းအင်များက ပိုမိုစုစည်းလာပြီး စွမ်းအင်များအပေါ် ထိန်းချုပ်မှုက အလွန်အမင်း အသေးစိတ်ကျလာသည်။ ထိုအချိန်မှာပင် သူ၏ အသိစိတ်အနက်ထဲတွင် ယခင်က တစ်ခါမှ မရှိခဲ့ဖူးသော အာရုံခံစားမှုတစ်ခု ပေါ်ထွက်လာသည်။

၎င်းမှာ သူ၏ အနှစ်သာရ အချက်အချာနေရာအနီးတွင် တိတ်ဆိတ်စွာ လွင့်မျောနေပြီး အစစ်အမှန်နှင့် လေဟာနယ်ကြားတွင် တည်ရှိကာ ထုထည် ကုဗမီတာ အနည်းငယ်ခန့်ရှိသော မီးခိုးရောင် တည်ငြိမ်သည့် ဟင်းလင်းပြင်တစ်ခုပင် ဖြစ်သည်။

“ဒါက... အသိစိတ်ဟင်းလင်းပြင်လား။ တကယ်ပဲ ရုပ်လုံးပေါ်လာပြီး ပစ္စည်းတွေသိမ်းဖို့ သုံးလို့ရတာလား...”

လင်းထျန်းလုံ၏ စိတ်ထဲတွင် နားလည်သဘောပေါက်သွားလေသည်။

ဤသည်က စနစ်မှ ပေးအပ်သော စွမ်းရည်တစ်ခု မဟုတ်ဘဲ သူ၏ ဝိညာဉ်စွမ်းအား စိတ်ချင်းဆက်သွယ်ခြင်းနှင့် ထိန်းချုပ်နိုင်စွမ်း စိတ်ထိန်းချုပ်ခြင်း နှစ်ခုစလုံးက အလယ်အလတ်အဆင့်သို့ ရောက်ရှိသွားသဖြင့် သဘာဝအလျောက် ပွင့်လာသော စွမ်းရည်တစ်ခု ဖြစ်သည်။

နေရာအကျယ်အဝန်း သိပ်မကြီးမားသေးဘဲ သက်မဲ့ပစ္စည်းများကိုသာ သိမ်းဆည်းနိုင်သေးသော်ငြား အရင်းအမြစ် အမြောက်အမြားကို မကြာခဏ သယ်ဆောင်သွားရမည့် သူ့အတွက်မူ ကိုယ်ပိုင်ပစ္စည်းများ သိမ်းဆည်းရန် ပြဿနာကို ဖြေရှင်းပေးလိုက်သဖြင့် အချိန်ကိုက် အကူအညီတစ်ခု ဖြစ်နေသည်မှာ သေချာလှသည်။

[စနစ်အသိပေးချက်]။ ။ပိုင်ရှင်၏ အလယ်အလတ် စိတ်ချင်းဆက်သွယ်ခြင်းနှင့် အလယ်အလတ် စိတ်ထိန်းချုပ်ခြင်းတို့သည် ပေါင်းစပ်အကျိုးသက်ရောက်မှုတစ်ခုကို ဖြစ်ပေါ်စေပြီး အသိစိတ်ဟင်းလင်းပြင် (အစောပိုင်းအဆင့်) ကို အောင်မြင်စွာ ဖွင့်လှစ်နိုင်ခဲ့ပါပြီ။

လက်ရှိ နေရာအကျယ်အဝန်း - ၅ ကုဗမီတာ။ သက်မဲ့ပစ္စည်းများကို သိမ်းဆည်းရန် အသုံးပြုနိုင်သည်။

သူ ဆက်လက်၍ တွန့်ဆုတ်မနေတော့ပေ။ မိုးပြာနက်နဲဘုရင်မျက်ဝန်းများက မြေပြင်ပေါ်ရှိ စစ်ပွဲမှရသော ပစ္စည်းများအပေါ်သို့ ဖြတ်ပြေးသွားပြီးနောက် အလယ်အလတ် စိတ်ထိန်းချုပ်ခြင်းဖြင်ပ ၎င်းတို့ကို တိကျစွာ ရစ်ပတ်လိုက်ကာ သူ၏ စိတ်စွမ်းအင်များဖြင့် လမ်းညွှန်လိုက်သည်။

စွမ်းအင်များ ပြည့်ဝနေသော ရေခဲချီစွမ်းအင်နဂါး ဝိညာဉ်အနှစ်သာရ၊ မာကျောလွန်းသော မိစ္ဆာနဂါး ပြောင်းပြန်ကြေးခွံနှင့် နဂါးသွေးအရိုး အပိုင်းအစ သုံးခုတို့မှာ ချက်ချင်းပင် ပျောက်ကွယ်သွားတော့သည်။

နောက်တစ်ခဏတွင် ၎င်းတို့က သူ၏ အသိစိတ်အနက်ထဲရှိ မီးခိုးရောင် ဟင်းလင်းပြင်ထဲတွင် တိတ်ဆိတ်စွာ လွင့်မျောနေကြလေပြီ။

သိမ်းဆည်းခြင်းနှင့် ထုတ်ယူခြင်း လုပ်ငန်းစဉ်ကို အတွေးတစ်ချက်ဖြင့်ပင် ပြီးမြောက်နိုင်သဖြင့် အလွန်အမင်း အဆင်ပြေလှသည်။

ထို့နောက် အစောပိုင်း တိုက်ပွဲအတွင်း စိတ်ထိန်းချုပ်ခြင်းဖြင့် သူ၏ဘေးတွင် လွင့်မျောနေစေခဲ့သော အရေးကြီး ပစ္စည်းများကိုလည်း သိမ်းဆည်းလိုက်သည်။

၎င်းတို့မှာ ရေခဲပင်မသတ္တုကြောဝိညာဉ် ထံမှ သူ လဲလှယ်ရယူခဲ့သော အဖိုးတန် ရေခဲပင်မစွမ်းအင်သလင်း အမြောက်အမြားပင် ဖြစ်သည်။

အရေးကြီး ပစ္စည်းများအားလုံးကို တစ်နေရာတည်း စုစည်းကာ လုံခြုံစိတ်ချရသော အသိစိတ် ဟင်းလင်းပြင် ထဲတွင် သိမ်းဆည်းပြီးသွားသောအခါ လင်းထျန်းလုံ ရုတ်တရက် အလွန် ပေါ့ပါးသွားသကဲ့သို့ ခံစားလိုက်ရပြီး စိုးရိမ်ပူပန်မှုများ မရှိတော့ပေ။

ဤအချိန်တွင် ရန့်မြဲ့နှင့် ထျန်းပင်းတို့ ဦးဆောင်သော ဝံပုလွေအုပ်စုက သတိကြီးစွာဖြင့် ချဉ်းကပ်လာကြသည်။

၎င်းတို့က လင်းထျန်းလုံကို ကြည့်ရာတွင် အသက်ရှင်ခဲ့သည့်အတွက် စိတ်လှုပ်ရှားမှုများ၊ ဘုရင်ကြီး၏ ကြီးမားလွန်းသော စွမ်းအားအပေါ် အဆုံးမဲ့ ကြောက်ရွံ့ရိုသေမှုများနှင့်အတူ တိုက်ပွဲအပြီး ပင်ပန်းနွမ်းနယ်နေသည့် အရိပ်အယောင်များလည်း ပါဝင်နေသည်။

အစောပိုင်းက နဂါးအရှိန်အဝါနှင့် စွမ်းအင် ရိုက်ခတ်မှုများကြောင့် နှင်းဝံပုလွေ အများအပြားမှာ ဒဏ်ရာအသေးစားလေးများ ရရှိထားကြသည်။

​“စစ်မြေပြင်ကို ရှင်းလင်းမယ်၊ ဒီနေရာမှာ အမြင့်ဆုံး သတိအနေအထားနဲ့ နေပြီး တစ်လှည့်စီ အနားယူရင်း အင်အားပြန်ဖြည့်ကြ...” လင်းထျန်းလုံက အမိန့်ပေးလိုက်သည်။

သူ၏ အသံက တည်ငြိမ်နေပြီး ငြင်းဆန်၍မရနိုင်သော အာဏာစက် ပါဝင်နေသည်။

ဝံပုလွေအုပ်စုက တိုးညှင်းသော ဟိန်းဟောက်သံများဖြင့် ချက်ချင်း အမိန့်ကို လိုက်နာကြပြီး စနစ်တကျ လူစုခွဲကာ သူတို့၏ ဒဏ်ရာများကို လျှာဖြင့်လျက်ရင်း အင်အားပြန်လည်ပြည့်ဖြိုးစေရန် လေထုထဲတွင် လုံးဝ မပျောက်ကွယ်သွားသေးသော သန့်စင်သည့် စွမ်းအင်များကို စုပ်ယူလိုက်ကြသည်။

​စွတ်ဖားလှည်းကိုလည်း ရန့်မြဲ့က ဆွဲယူလာခဲ့သည်။ ရှောင်လန်နှင့် ရှောင်ယင်းတို့က စွတ်ဖားလှည်းရောက်သည်ကို မစောင့်နိုင်တော့ဘဲ လှည်းပေါ်မှဆင်းကာ သူတို့၏ ခြေတိုတိုလေးများဖြင့် လင်းထျန်းလုံ၏ ဘေးသို့ ပြေးသွားကြသည်။

​“ဖေဖေ... အဆင်ပြေရဲ့လား။ သမီးကို ခုနက အရမ်းလန့်သွားအောင် လုပ်လိုက်တာပဲ...” ရှောင်ယင်းက လင်းထျန်းလုံ၏ တုတ်ခိုင်သော ရှေ့ခြေထောက်ကို ဖက်ထားပြီး သူမ၏ မျက်နှာလေးကို မော့ကာ ကြည့်လိုက်သည်။

သူမ၏ မျက်လုံးလေးများက နီရဲနေဆဲပင်။

​ရှောင်လန်က စကားမပြောသော်လည်း အနီးကပ် ရပ်နေကာ လင်းထျန်းလုံ၏ ခန္ဓာကိုယ်ပေါ်ရှိ ပြန်လည်ကောင်းမွန်လာနေသော ဒဏ်ရာများကို သေချာ စစ်ဆေးနေရင်း သူမ၏ ကြည်လင်သော မျက်လုံးများထဲတွင် စိုးရိမ်ပူပန်မှုများနှင့် ကျန်ရစ်နေသေးသော ကြောက်ရွံ့မှုအရိပ်အယောင်များ ပြည့်နှက်နေသည်။

​လင်းထျန်းလုံ ခေါင်းငုံ့လိုက်ပြီး ကလေးငယ်နှစ်ဦး၏ ခေါင်းလေးများကို သူ၏ နှာခေါင်းဖြင့် ညင်သာစွာ ပွတ်သပ်ပေးလိုက်ကာ နူးညံ့ပြီး ခိုင်မာသော အတွေးတစ်ခုကို ပေးပို့လိုက်သည်။

“အခု အဆင်ပြေသွားပါပြီ၊ ရန်သူကိုလည်း နှိမ်နင်းပြီးသွားပြီ၊ သမီးတို့ကို စိတ်ပူအောင် လုပ်မိသွားတယ်...”

​သူ၏ အကြည့်များက ရှုပ်ပွနေသော ချိုင့်ဝှမ်းကြီးအပေါ် ဖြတ်ပြေးသွားပြီးနောက် စွမ်းအင်လှိုင်းများ ပျောက်ကွယ်သွားပြီဖြစ်သော ချိုင့်ဝှမ်းအဆုံးရှိ ဂူဆီသို့ ရောက်သွားသည်။

သူ၏ မိုးပြာနက်နဲဘုရင်မျက်ဝန်းများထဲတွင် နက်ရှိုင်းသော အလင်းတန်းတစ်ခု လင်းလက်သွားခဲ့သည်။

ဤတစ်ကြိမ် ဖြတ်သန်းလာရသည့် တိုက်ပွဲမှာ အန္တရာယ်များ ပြည့်နှက်နေသော်လည်း ရရှိလိုက်သော ဆုလာဘ်များမှာလည်း အလွန် ကြီးမားလှပေသည်။

သူသည် ဘုရင်အဆင့်သို့ ထိုးဖောက်ဝင်ရောက်နိုင်ခဲ့ပြီး သွေးမျိုးဆက် ဆင့်ကဲပြောင်းလဲမှုကို ပြီးမြောက်ခဲ့ရုံသာမက ရှေးဟောင်းငွေပြာဝံပုလွေ သွေးအဆီအနှစ်နှင့် ရေခဲချီစွမ်းအင်နဂါးထံမှ ကျန်ရစ်သော အဖိုးတန် ပစ္စည်းများကိုပါ ရရှိခဲ့သည်။

​“အရင်ဆုံး အပြည့်အဝ ပြန်ကောင်းအောင် လုပ်မယ်၊ ပြီးတော့မှ... ဒီတစ်ခေါက် ခရီးကနေ ရလာတာတွေကို သေချာ ချေဖျက်ပြီးမှ နောက်တစ်ဆင့်အတွက် အစီအစဉ်ဆွဲရမယ်...” လင်းထျန်းလုံ စိတ်ထဲမှ တွေးလိုက်သည်။

ထျန်းစန်းတောင်တန်းရှိ ဝိညာဉ်နယ်မြေကို စူးစမ်းရှာဖွေခြင်းက အဆုံးသတ်ရန် အလှမ်းဝေးနေသေးပေသည်။