ရေခဲချီစွမ်းအင်နဂါး၏ အသား‌နှင့်သွေး အထောက်အပံ့များကြောင့် နှင်းဝံပုလွေအုပ်စုတစ်ခု‌လုံး ထပ်မံတိုးတက်လာနေကြခြင်း(၁)

ချိုင့်ဝှမ်းတစ်ခုလုံး ပျက်စီးရှုပ်ပွနေသည်။

ဧရာမ ရေခဲချိုင့်ကွက်ကြီးများ၊ အေးခဲနေသော ချော်ရည်အစအနများနှင့် နေရာအနှံ့ ပြန့်ကျဲနေသော ရေပြာရောင် အကြေးခွံများက ယခုလေးတင် ပြီးဆုံးသွားသည့် ဘုရင်အဆင့် သူသေကိုယ်သေတိုက်ပွဲ၏ ပြင်းထန်မှုကို သက်သေပြနေကြသည်။

လေထုထဲတွင် သွေးနံ့များ ရောနှောနေသော စူးရှသည့် ကန့်ငွေ့ရနံ့များ ပြည့်နှက်နေပြီး တိုက်ပွဲအနိုင်ရသူ၏ နက်ရှိုင်းကျယ်ပြန့်သော ဖိအားတစ်ရပ်ကလည်း ကွင်းပြင်ကို လွှမ်းခြုံနေသည်။

လင်းထျန်းလုံသည် ချိုင့်ဝှမ်း၏ အလယ်ဗဟိုတွင် မားမားမတ်မတ် ရပ်တည်နေသည်။

သူ၏ ခန့်ညားထည်ဝါသော မိုးပြာနက်ရောင် ခန္ဓာကိုယ်ကြီးက ရေခဲသလင်းများ၏ တောက်ပသော အလင်းရောင်အောက်တွင် ရှေးဟောင်း ရေခဲပန်းပုရုပ်တုကြီးတစ်ခုအလား လင်းလက်နေခဲ့သည်။

ဖြည်းညင်းစွာ အသက်ရှူသွင်း အသက်ရှူထုတ် လုပ်လိုက်တိုင်း ချီနဂါး၏ လက်သည်းချက်ကြောင့် ရင်ဘတ်တွင် ရရှိခဲ့သော ဒဏ်ရာများမှာ အလိုအလျောက် သက်သာလာနေခဲ့သည်။

အမွေးအသစ်များ၏ အရောင်က ပတ်ဝန်းကျင်ထက်ပင် ပိုမိုနက်မှောင်နေပြီး ထာ၀ရတိုက်ပွဲဝိညာဉ်နှင့် ဘုရင်အဆင့် ခန္ဓာကိုယ်၏ အစွမ်းထက်သော ပြန်လည်ကုသနိုင်စွမ်းကို ပြသနေသည်။

“ဖေဖေ၊ ဘယ်လိုနေသေးလဲ...”

ရှောင်ယင်း၏ အသံလေးမှာ မသိမသာ တုန်ယင်နေပြီး သူမ၏ လက်သေးသေးလေးဖြင့် လင်းထျန်းလုံ၏ ရှေ့ခြေထောက်ပေါ်ရှိ အနာဖေးတက်နေသော ဒဏ်ရာများကို ညင်သာစွာ ပွတ်သပ်ပေးနေသည်။

ရှောင်လန်ကမူ စကားမပြောသော်ငြား သူမ၏ ကြည်လင်သော မျက်လုံးလေးများဖြင့် လင်းထျန်းလုံကို မျက်တောင်မခတ်တမ်း စူးစိုက်ကြည့်နေပြီး စိုးရိမ်ပူပန်မှုများနှင့် အကင်းမသေသေးသော ကြောက်ရွံ့မှုများ ပြည့်နှက်နေသည်။

လင်းထျန်းလုံ ခေါင်းငုံ့လိုက်ပြီး ကလေးငယ်နှစ်ဦး၏ ခေါင်းလေးများကို သူ၏ နှာခေါင်းဖြင့် ညင်သာစွာ ပွတ်သပ်ပေးလိုက်ကာ နူးညံ့ပြီး ခိုင်မာသော အတွေးတစ်ခုကို ပေးပို့လိုက်လေသည်။ “ဘာမှမဖြစ်ပါဘူး၊ ဒဏ်ရာအသေးစားလေးပါ၊ ခဏနေရင် ကောင်းသွားမှာပါ...”

ထို့နောက် မိုးပြာနက်နဲဘုရင်မျက်ဝန်းများဖြင့် စစ်တလင်းတစ်ခုလုံးကို ခြုံငုံကြည့်လိုက်သည်။

ဝံပုလွေအုပ်စုမှာ ရန့်မြဲ့နှင့် ထျန်းပင်းတို့၏ တိုးညှင်းသော အမိန့်ပေးသံများအောက်တွင် ဒဏ်ရာများကို လျှာဖြင့်လျက်ရင်း လေထုထဲတွင် လုံးဝ မပျောက်ကွယ်သွားသေးသော သန့်စင်သည့် စွမ်းအင်များကို စနစ်တကျ စုပ်ယူနေကြသည်။

သူတို့အားလုံး ဒဏ်ရာကိုယ်စီ ရထားကြသော်လည်း စိတ်ဓာတ်ခွန်အားများ အလွန်အမင်း မြင့်မားနေကာ သူ့အား ကြည့်လာသော အကြည့်များထဲတွင် ရူးသွပ်လုမတတ် ကြည်ညိုလေးစားမှုများ ပြည့်နှက်နေကြသည်။

“စစ်မြေပြင်ကို ရှင်းလင်းလို့ ပြီးပါပြီ ဘုရင်မင်းမြတ်၊ တန်ဖိုးရှိတဲ့ အကြေးခွံတွေနဲ့ အရိုးအပိုင်းအစအားလုံးကို စုဆောင်းထားပြီးပါပြီ၊ အမိန့်အတိုင်း အဓိက စစ်ပွဲကရတဲ့ ပစ္စည်းတွေကို ဘုရင်မင်းမြတ်ဆီမှာပဲ စုစည်းထားပါတယ်...”

ရန့်မြဲ့ ရှေ့သို့တက်လာပြီး တည်ငြိမ်သော အတွေးဖြင့် သတင်းပို့လိုက်လေသည်။

အဓိကပစ္စည်းဆိုသည်မှာ စွမ်းအင်များ ပြည့်ဝနေသော ချီနဂါးဝိညာဉ်အနှစ်သာရနှင့် အမာကျောဆုံး မိစ္ဆာနဂါး ပြောင်းပြန်အကြေးခွံကို ရည်ညွှန်းခြင်း ဖြစ်သည်။

လင်းထျန်းလုံ ခေါင်းကို အနည်းငယ် ညိတ်ပြလိုက်ပြီး သေဆုံးသွားသော်ငြား ဖိအားများ ခပ်ရေးရေး ထုတ်လွှတ်နေဆဲဖြစ်သော နဂါးအကြွင်းအကျန်များဆီသို့ အကြည့်ရောက်သွားသည်။

ဝိညာဉ်အနှစ်သာရနှင့် ပြောင်းပြန်ကြေးခွံတို့အပြင် ဘုရင်အဆင့် ရေခဲနဂါးကြီး၏ အလောင်းကိုယ်တိုင်က ဧရာမ ရတနာသိုက်ကြီး တစ်ခုပင် ဖြစ်သည်။

၎င်း၏ အရွတ်များ၊ အရိုးများနှင့် အသားများက နှင်းဝံပုလွေမျိုးနွယ်စုအတွက်၊ အထူးသဖြင့် အဆင့်သစ်သို့ ထိုးဖောက်ဝင်ရောက်ခါစဖြစ်သော ရန့်မြဲ့နှင့် ထျန်းပင်းတို့ကဲ့သို့ အဓိက အဖွဲ့ဝင်များအတွက် အကောင်းဆုံးသော အားဆေးများပင် ဖြစ်သည်။

“ထျန်းပင်း...”

“အမိန့်ရှိပါ ဘုရင်မင်းမြတ်...” ထျန်းပင်း ချက်ချင်း ရှေ့သို့ တက်လာသည်။

သူ၏ အမွေးအမှင်များအောက်တွင် နက်မှောင်သော ရွှေရောင် ပုံသဏ္ဍာန်များက ခပ်ရေးရေး စီးဆင်းနေပြီး မျက်လုံးများထဲတွင် တိုက်ခိုက်လိုစိတ်များ မပြယ်သေးဘဲ နဂါးသွေးစွမ်းအင်အချို့ကို စုပ်ယူထားခြင်းကြောင့် ပို၍ပင် ရိုင်းစိုင်းကြမ်းတမ်းနေပုံပေါ်သည်။

“ဒီရေခဲနဂါး အသားတွေမှာ သွေးနဲ့ လေ စွမ်းအင်တွေ အများကြီး ပါဝင်တယ်၊ ဒါတွေကို ခွဲဝေပေးဖို့ မင်းတာဝန်ယူရမယ်၊”

“ဒဏ်ရာရထားတဲ့သူတွေနဲ့ အဆင့်တက်ဖို့ နီးစပ်နေတဲ့ သူတွေကို ဦးစားပေးပါ၊ အရိုးတွေနဲ့ အရွတ်တွေမှာ နဂါးစွမ်းအားတွေ ပါဝင်တယ်၊”

“ အထူးသဖြင့် အဓိက အရိုးအပိုင်းအစတွေကို မင်းတို့ကိုယ်တိုင် ဝါးမျိုပြီး လက်သည်းတွေနဲ့ သွားတွေကို ပိုထက်မြက်လာအောင် လုပ်လို့ရတယ်၊ ကျန်တဲ့ ကြေးခွံတွေ၊ အရိုးတွေနဲ့ အရွတ်တွေကို လောလောဆယ် သိမ်းဆည်းထားလိုက်...”

“နားလည်ပါပြီ...”

ထျန်းပင်းက တိုးညှင်းစွာ ဟိန်းဟောက်လိုက်ပြီး နဂါးအလောင်းကို ခုတ်ထစ်ပိုင်းဖြတ်ရန် သန်မာသော နှင်းဝံပုလွေ အနည်းငယ်ကို ချက်ချင်း ခေါ်ယူလိုက်သည်။ ဝံပုလွေအုပ်စုထံမှ စိတ်လှုပ်ရှားဖွယ် ဟိန်းဟောက်သံများ ဆူညံစွာ ထွက်ပေါ်လာကြတော့သည်။

ဘုရင်အဆင့် သားရဲဘုရင်တစ်ပါး၏ အသားနှင့် သွေးများက သူတို့အတွက် ဆွဲဆောင်မှု အပြည့်အဝ ရှိနေလေသည်။

“ရှောင်လန်၊ ရှောင်ယင်း...” လင်းထျန်းလုံက သူ၏သမီးငယ်နှစ်ဦးဘက်သို့ လှည့်လိုက်သည်။

“သမီးတို့နှစ်ယောက်လည်း အသန့်စင်ဆုံး ရေခဲစွမ်းအင်သ‌လင်း အချို့ကို သွားယူလိုက်ကြ၊ ဒီနေရာက ကြွယ်၀တဲ့ ဝိညာဉ်စွမ်းအင်တွေကို သုံးပြီး အမြန်ဆုံး ကျင့်ကြံကြ၊ အခြေခံကို ခိုင်မာအောင် လုပ်ထားရမယ်...”

“ဟုတ်ကဲ့ ဖေဖေ...”

ရှောင်ယင်းက ချက်ချင်း ခေါင်းညိတ်လိုက်ပြီး ရှောင်လန်ကို ဆွဲကာ ပစ္စည်းများ ထားရှိရာဘက်သို့ ပြေးသွားသည်။

မလှည့်ထွက်သွားခင်တွင် ရှောင်လန်၏ အကြည့်မှာ နဂါးအကြွင်းအကျန်များအပေါ် နောက်တစ်ကြိမ် ဖြတ်ပြေးသွားပြီး ပျက်စီးနေသော နဂါးခေါင်းနှင့် ပြောင်းပြန်ကြေးခွံတို့အပေါ်တွင် တစ်ခဏမျှ ရပ်တန့်သွားကာ စိတ်ထဲမှ တွေးလိုက်သည်။

“ဒီရေခဲနဂါးကြီးရဲ့ သွေးမျိုးဆက်က တော်တော်ထူးဆန်းတယ်၊ ရေခဲနဲ့မီး စွမ်းအားနှစ်ခုစလုံးကို တစ်ပြိုင်နက်တည်း ထိန်းချုပ်နိုင်တယ်၊"

“ဒုတိယတစ်ခုက မူလစွမ်းအားကို လောင်ကျွမ်းပြီး အတင်းအဓမ္မ ထုတ်ယူခဲ့တာ ဆိုပေမယ့် သူ့ရဲ့ နဂါးဝိညာဉ် အနှစ်သာရက... ဝံပုလွေဖေဖေ အသစ်ပေါင်းစပ်ထားတဲ့ စွမ်းအားနဲ့ သိမ်မွေ့တဲ့ ပဲ့တင်ထပ်မှုတစ်ခု ရှိနေသလိုပဲ...”

ဤအတွေးက ဖြတ်ကနဲ ပေါ်လာခြင်းသာဖြစ်ပြီး သူမ ဆက်လက်၍ အချိန်ဆွဲမနေတော့ပေ။ ယခုအချိန်တွင် အရေးကြီးဆုံးအရာမှာ မိမိကိုယ်ကို တိုးတက်အောင် လုပ်ဆောင်ရန်ပင် ဖြစ်သည်။

ဝံပုလွေအုပ်စု အလုပ်များနေချိန်တွင် လင်းထျန်းလုံ ဖြည်းညင်းစွာ လှဲချလိုက်သည်။

မျက်လုံးများ မှိတ်ထားကာ အနားယူနေပုံရသော်လည်း လက်တွေ့တွင်မူ သူ၏ အသိစိတ်က ခန္ဓာကိုယ်အတွင်းသို့ နစ်ဝင်နေပြီ ဖြစ်သည်။

အဆင့် ၃၁ ပထမဘုရင်အဆင့် ကနဦးသို့ ထိုးဖောက်ဝင်ရောက်ခါစဖြစ်ပြီး ရှေးဟောင်း ငွေပြာဝံပုလွေသွေးအဆီအနှစ်နှင့် နှင်းခဲဝိညာဉ်မသေမျိုး၏ အပိုင်းအစများကို ပေါင်းစပ်လိုက်ရသဖြင့် သူ၏ စွမ်းအားများက တရက်ဆက် တိုးပွားနေခဲ့သည်။

ထို့ကြောင့် ၎င်းတို့ကို သေချာ နားလည်သဘောပေါက်ပြီး တည်ငြိမ်အောင် လုပ်ဆောင်ရန် လိုအပ်နေသည်။

ပထမဦးစွာ အသွင်ပြောင်းသွားသော မိုးပြာနက်နဲရေခဲ ဝံပုလွေသွေးမျိုးဆက်ကို သူ စစ်ဆေးကြည့်လိုက်သည်။

အတွေးတစ်ချက်ဖြင့် ယခင်ကထက် များစွာ သာလွန်ပြီး မသေမျိုးဖြစ်တည်မှု၏ အရိပ်အယောင်များ ပါဝင်နေသော ကျယ်ပြန့်ပြီး သန့်စင်သည့် စွမ်းအားတစ်ခု သူ၏ သွေးကြောများထဲတွင် စီးဆင်းသွားသည်။

၎င်းက ဂုဏ်သတ္တိအားလုံး အဆမတန် တိုးပွားလာခြင်းမျိုး သက်သက်သာမဟုတ်ဘဲ လောကကြီးအတွင်းရှိ ရေခဲစွမ်းအင်များအပေါ် ရင်းနှီးကျွမ်းဝင်မှုနှင့် ထိန်းချုပ်နိုင်စွမ်းက လုံးဝ အဆင့်သစ်တစ်ခုသို့ ရောက်ရှိသွားကြောင်း ပိုမိုရှင်းလင်းစွာ သိမြင်လိုက်ရသည်။

ယခင်က ရေခဲစွမ်းအင်များကို ငှားရမ်းသုံးစွဲခဲ့ရသည်ဆိုလျှင် ယခုအခါ ၎င်းတို့က သူ၏ ထိန်းချုပ်မှုအောက်မှ အစိတ်အပိုင်းတစ်ခု ဖြစ်လာသကဲ့သို့ပင်။

ထို့နောက် ထာ၀ရတိုက်ပွဲဝိညာဉ်ပင် ဖြစ်သည်။ ၎င်းက ဒဏ်ရာရလာသောအခါ ပိုမိုသန်မာလာရုံလောက် ရိုးရှင်းသော ကိစ္စမျိုးမဟုတ်ဘဲ ဝိညာဉ်အနက်ထဲမှလာသော မလျှော့သော ဇွဲလုံ့လနှင့် ခိုင်မာသော စိတ်ဓာတ်မျိုး ဖြစ်သည်။

သူ၏ စိတ်ဝိညာဉ်မှာ အကြိမ်တစ်ထောင်မက ပုံသွင်းခံထားရသော နက်နဲရေခဲများအလား ပိုမိုစုစည်းသိပ်သည်းလာပြီး ဝိညာဉ်စွမ်းအင် တိုက်ခိုက်မှုများကို ခုခံနိုင်စွမ်း အလွန်အမင်း အားကောင်းလာကြောင်း ခံစားမိသည်။

တစ်ချိန်တည်းမှာပင် “ဒဏ်ရာပိုပြင်းလေ၊ တန်ပြန်တိုက်ခိုက်မှု ပိုအားကောင်းလေ” ဆိုသည့် ဂုဏ်သတ္တိမှာ မျက်ကန်းတစ္ဆေ အင်အားသုံးခြင်းမျိုး မဟုတ်ဘဲ အဓိက မူလအရင်းအမြစ်ကို ကာကွယ်ရင်း ပိုမိုနက်ရှိုင်းသော အလားအလာများကို နှိုးဆွပေးခြင်းသာ ဖြစ်သည်။

မိုးပြာနက်နဲဘုရင်မျက်ဝန်းများ၏ ထိုးဖောက်မြင်နိုင်စွမ်းကလည်း ပိုမိုတိုးတက်လာပြီး စွမ်းအင်စီးဆင်းမှုများကို မြင်နိုင်ရုံသာမက ပိုမိုအခြေခံကျသော ဥပဒေသမျဉ်းကြောင်း အချို့ကိုပါ ခပ်ရေးရေး ဖမ်းယူနိုင်လာသည်။

ချန်ရွှမ်းမိုးကြိုးရေခဲလက်သ်း နှင့် နက်နဲရေခဲကောင်းကင်ဆုတ်ဖြဲလက်သည်း တို့၏ စွမ်းအားများမှာ ပြောစရာပင် မလိုတော့ပေ။ ယခင် တိုက်ပွဲက အရာအားလုံးကို စမ်းသပ်ပြီးသွားပြီ ဖြစ်သည်။

နောက်ဆုံးတွင် သူ၏ အသိစိတ်က အသစ်ဖွင့်လှစ်ထားသော အသိစိတ်နေရာလွတ် အပေါ် ကျရောက်သွားသည်။

၅ ကုဗမီတာခန့်ရှိသော ဟင်းလင်းပြင်အတွင်းတွင် ချီနဂါးဝိညာဉ်အနှစ်သာရက အပြာရောင် နေမင်းငယ်လေးတစ်စင်းအလား ဖြည်းညင်းစွာ လည်ပတ်နေပြီး သန့်စင်သော ဝိညာဉ်စွမ်းအင်များနှင့် ရေခဲဥပဒေသလှိုင်းများကို ထုတ်လွှတ်နေသည်။

မိစ္ဆာနဂါး ပြောင်းပြန်အကြေးခွံသည် ဖျက်ဆီး၍မရနိုင်သည့်ဟန်ဖြင့် တိတ်ဆိတ်စွာ လွင့်မျောနေပြီး ပုန်ကန်လိုသော ဥပဒေသများ၏ ထူးဆန်းသည့် အရှိန်အဝါကို ခပ်ရေးရေး ထုတ်လွှတ်နေသည်။

နဂါးသွေးအရိုးအပိုင်းအစ သုံးခုနှင့် ရေခဲပင်မသလင်းကျောက် အမြောက်အမြားကို ဘေးတစ်ဖက်တွင် ပုံထားသည်။

အတွေးတစ်ချက်ဖြင့် ရေခဲပင်မသလင်းတုံး တစ်တုံးက သူ၏ လက်သည်းဘေးတွင် ပေါ်လာပြီး နောက်ထပ် အတွေးတစ်ချက်ဖြင့် နေရာလွတ်ထဲသို့ ပြန်ရောက်သွားသည်။ မိမိ၏ လက်ကို လှုပ်ရှားရသကဲ့သို့ပင် အလွန်အမင်း လွယ်ကူအဆင်ပြေလှသည်။

“ဒီ အသိစိတ်နေရာလွတ်ရဲ့ အသုံးဝင်မှုက အဆုံးမရှိဘူး၊ သိုလှောင်ရေး ပြဿနာကို ဖြေရှင်းပေးနိုင်ရုံတင်မကဘူး၊ အနာဂတ်မှာ တခြား အသုံးပြုပုံတွေကိုပါ ရှာဖွေနိုင်လောက်တယ်...” လင်းထျန်းလုံ စိတ်ထဲမှ တွေးလိုက်မိသည်။

တစ်ချိန်တည်းမှာပင် ဝိညာဉ်အနှစ်သာရနှင့် ပြောင်းပြန်ကြေးခွံ နှစ်ခုစလုံး၏ တန်ဖိုးကို ကောင်းကောင်း အသုံးချနိုင်ရန်အတွက် သေချာလေ့လာရန် အချိန်အများအပြား လိုအပ်ကြောင်းကိုလည်း သိရှိလိုက်သည်။

အထူးသဖြင့် ထို ချီနဂါးဝိညာဉ်အနှစ်သာရပင် ဖြစ်သည်။

အတွင်းတွင်ပါဝင်သော ဘုရင်အဆင့် နဂါးဝိညာဉ် မူလစွမ်းအားနှင့် ရေခဲဥပဒေသ အပိုင်းအစများကို ဖြည်းဖြည်းချင်း စုပ်ယူသန့်စင်နိုင်မည်ဆိုပါက သူ၏ ဝိညာဉ်စွမ်းအင်နှင့် ရေခဲဥပဒေသအပေါ် ကြီးမားသော အကျိုးကျေးဇူးများ ဖြစ်ထွန်းလာမည်မှာ သေချာလှသည်။

လင်းထျန်းလုံ မိမိ၏ စွမ်းအားများကို စည်းစနစ်ကျအောင် လုပ်ဆောင်နေချိန်တွင် အပြင်ဘက် ကင်းလှည့်ရန် တာဝန်ယူထားသော ယင်းဖုန်းက မီးခိုးငွေ့အလား တိတ်ဆိတ်စွာ ပြန်ရောက်လာသည်။

“ဘုရင်ကြီး၊ ချိုင့်ဝှမ်းရဲ့ အနောက်ဘက်အစွန်က ရေခဲချောက်ကမ်းပါး အက်ကွဲကြောင်းအနီးမှာ ခြေရာလက်ရာအချို့ကို တွေ့ခဲ့ပါတယ်၊ သားရဲတွေ သွားလာထားတဲ့ ခြေရာတွေ မဟုတ်ဘဲ... အသိဉာဏ်ရှိတဲ့ အရာတစ်ခုခုက အဲဒီနေရာကို တမင်သက်သက် စူးစမ်းထားသလိုမျိုးပါပဲ၊”