အခန်း (၂၅၅-၂၅၆)

အခန်း (၂၅၅) - သားရဲတစ်သောင်းတောင်တန်းကြီးတွင် စာရင်းသွင်းခြင်း၊ ကျဲ့အက္ခရာ လျှို့ဝှက်ချက်(၁)

အကြီးအကဲ ကျန်းသည် အာဏာရှင်လက်သီး၏ ဒဏ်ကို ဆက်လက်၍ မခံနိုင်တော့ပေ။

ကောင်းကင်ပြာဧကရာဇ်၏ အာဏာရှင်သွေးဖြင့် အသက်သွင်းလိုက်သော ဝူယွမ်၏ အာဏာရှင်လက်သီးသည် ပြိုင်ဘက်၏ ဆန်းကြယ်ရှင်ခြင်း စွမ်းအားများကိုပင် ပြန့်ကျဲသွားစေနိုင်လောက်အောင် ကြီးမားလွန်းသော စွမ်းအားကို ထုတ်လွှတ်ပေးနိုင်လေသည်။

အာဏာရှင်သွေး၏ စွမ်းအားသည် ဆန်းကြယ်ရှင်ခြင်း စွမ်းအားထက် များစွာ ပိုမိုအားကောင်းပြီး ကြီးစိုးနိုင်စွမ်း ရှိပေသည်။

ထို့ကြောင့် စွမ်းအားပိုင်းအရ ယှဉ်ကြည့်မည်ဆိုလျှင် ဝူယွမ်က အပြတ်အသတ် အသာစီးရနေခဲ့၏။

ထို့အပြင် ချယ် အက္ခရာ လျှို့ဝှက်ချက်မှ ၁၀ ဆ အားပြင်းတိုက်ခိုက်မှုက အကြီးအကဲ ကျန်းကို အလွန်အမင်း မသက်မသာ ဖြစ်သွားစေခဲ့သည်။

တိုက်ပွဲအလယ်တွင် ၁၀ ဆ ပျက်စီးဆုံးရှုံးမှုကို ဖြစ်ပေါ်စေသည့် ပြင်းထန်သော တိုက်ခိုက်မှုတစ်ခုကို မည်သူက ခံနိုင်ရည်ရှိမည်နည်း။

သို့သော် ယွမ်ဂိုဏ်း၏ အကြီးအကဲတစ်ဦးအနေဖြင့် သူသည် ဤမျှ လွယ်လွယ်ကူကူဖြင့် အရှုံးပေးမည် မဟုတ်ပေ။ ယွမ်ဂိုဏ်း၏ အားကောင်းလှသော သိုင်းပညာရပ်များက သူ့အား အချိန်တိုအတွင်း စွမ်းအားများ ပေါက်ကွဲထွက်လာစေရန် ထောက်ပံ့ပေးထားလေသည်။

“နတ်ဆိုးယွမ် ကျိန်စာသင့်ခန္ဓာကိုယ်...”

သူက အရှုံးမပေးလိုသော စိတ်ဖြင့် ဟိန်းဟောက်လိုက်လေသည်။ ယွမ်စွမ်းအင်များက လှိုင်းတံပိုးများအလား သူ၏ ခန္ဓာကိုယ်မှ ပျံ့နှံ့ထွက်ပေါ်လာပြီး ယခင်က ယောင်းလင်း အသုံးပြုခဲ့သော သိုင်းပညာရပ်နှင့် ဆင်တူပေသည်။

သူ၏ ခန္ဓာကိုယ်မှာ တဖြည်းဖြည်း ကြီးထွားလာပြီး ကြွက်သားများက ဖောင်းကြွလာကာ သွေးကြောအပြာများက မြွေငယ်လေးများအလား ယှက်နွယ်နေကြ၏။

သို့သော်ငြားလည်း အကြီးအကဲကျန်း၏ သိုင်းပညာရပ်မှာ များစွာ ပိုမိ အားကောင်းလှပေသည်။ သူ၏ ခန္ဓာကိုယ်မျက်နှာပြင်ပေါ်တွင် ခိုင်မာသော အနက်ရောင်ပုံသဏ္ဍာန်များ ထွက်ပေါ်လာ၏။

ဤပုံစံများသည် သူ၏ အသားနှင့် သွေးများထဲမှ ထွက်ပေါ်လာသော ရူန်းစာလုံးများနှင့် ဆင်တူပြီး ခန္ဓာကိုယ်နှင့် ပေါင်းစပ်သွားသကဲ့သို့ ဖြစ်နေကာ သူ့ကို အလွန်အမင်း ထူးဆန်းကြောက်မက်ဖွယ်ကောင်းသော အသွင်အပြင်ကို ပေးစွမ်းနေခဲ့သည်။

အကြီးအကဲကျန်း၏ ခန္ဓာကိုယ်မှာ အဆပေါင်းများစွာ ကြီးထွားလာပြီး ကြောက်မက်ဖွယ်ကောင်းသော လူထွားကြီး တစ်ဦးအလား ဖြစ်နေခဲ့၏။

အနက်ရောင် ရူန်းစာလုံးများက သူ၏ ခန္ဓာကိုယ်ပေါ်တွင် လင်းလက်နေပြီး သူ၏ မျက်လုံးများမှာ သွေးရောင်လွှမ်းသွားကာ ရှေးဟောင်း အရိုင်းအစိုင်း သားရဲကြီး တစ်ကောင်အလား ဖြစ်နေခဲ့လေသည်။

သူ၏ အရှိန်အဝါများမှာ လှိုင်းတံပိုးများအလား မြင့်တက်လာပြီး ယခင်ကထက် စွမ်းအား နှစ်ဆနီးပါး ပိုမိုအားကောင်းလာခဲ့၏။

ယွမ်ဂိုဏ်း၏ အမြင့်ဆုံးသော ပညာရပ်တစ်ခုပီပီ ဤစွမ်းအား ပေါက်ကွဲထွက်လာမှုက သူ၏ စွမ်းအားကို ဆန်းကြယ်ရှင်ခြင်းအဆင့် အထွတ်အထိပ်နှင့်ပင် ယှဉ်ပြိုင်နိုင်စွမ်း ရှိလာစေခဲ့သည်။

“သေစမ်း...”

အကြီးအကဲကျန်း၏ မျက်နှာမှာ ရက်စက်ကြမ်းကြုတ်နေပြီး သူက လက်သီးများကို ပစ်သွင်းလိုက်လေသည်။ သွေးရောင် ပုံစံများ ပါဝင်သော ဧရာ လက်သီးရာကြီးများက ဝူယွမ်ထံသို့ ပြင်းထန်စွာ တိုး၀င်လာခဲ့၏။

“လမ်းခြောက်သွယ် ဝင်စားခြင်းလက်သီး...”

ဝူယွမ်သည် အနည်းငယ် လေးနက်သွားပြီး သူ ကနဦး နားလည်သဘောပေါက်ထားသော လက်သီး သိုင်းပညာရပ်ကို ထုတ်လွှတ်လိုက်လေသည်။

လမ်းခြောက်သွယ် ဝင်စားခြင်းလက်သီးကို ထုတ်လွှတ်လိုက်သည်နှင့်တစ်ပြိုင်နက် ပတ်ဝန်းကျင်ရှိ နေရာလပ်မှာ တွန့်လိမ်ကောက်ကွေးသွားခဲ့၏။

လေဟာနယ်ထဲတွင် မရေမတွက်နိုင်သော ထူးဆန်းသည့် ဖြစ်စဉ်များ ပေါ်ထွက်လာသည်။

အစစ်အမှန် နဂါးများ လှည့်ပတ်နေပြီး ဖီးနစ်ငှက်များ ကောင်းကင်ယံကို ရောင်ပြန်ဟပ်နေကာ အစိမ်းရောင် ကြာပန်းများက မြေပြင်ပေါ်တွင် ပွင့်လန်းနေပြီး မသေမျိုး အရိပ်များပင် ထွက်ပေါ်လာခဲ့လေသည်။

ဝင်စားခြင်း၏ ရည်ရွယ်ချက်ကို အားဖြည့်ပေးလိုက်သောအခါ ဝူယွမ်၏ လက်သီးရိပ်များမှာ ကြောက်မက်ဖွယ်ကောင်းလောက်အောင် အားကောင်းလာခဲ့တော့သည်။

“ဘန်း...”

လက်သီးများ အချင်းချင်း တိုက်မိသွားကြပြီး ပြင်းထန်လွန်းသော ယွမ်စွမ်းအင် မုန်တိုင်းကြီးကြောင့် မိစ္ဆာအသံတောင်တန်းကြီး တစ်ခုလုံးမှာ မုန်တိုင်းတစ်ခု တိုက်ခတ်သွားသည့်အလား ပေါက်ကွဲထွက်သွားခဲ့တော့သည်။

မုန်တိုင်း၏ အလယ်ဗဟိုတွင် အကြီးအကဲကျန်း၏ လက်မောင်းများမှာ အပိုင်းပိုင်းအစစ ကျိုးပဲ့ကြေမွသွားခဲ့၏။

သူ၏ ခန္ဓာကိုယ်သည်လည်း ကြောက်မက်ဖွယ်ကောင်းသော အမြန်နှုန်းဖြင့် ပြိုကွဲသွားခဲ့လေသည်။

သူ၏ မျက်နှာပေါ်တွင် ထိတ်လန့်မှုများ ပြည့်နှက်နေပြီး ဝူယွမ်က ဤမျှ ကြောက်မက်ဖွယ်ကောင်းသော စွမ်းအားကို ထုတ်လွှတ်နိုင်လိမ့်မည်ဟု သူ လုံးဝ မယုံကြည်နိုင်အောင် ဖြစ်နေခဲ့သည်။

“ဝင်... စား... ခြင်း...”

သူသည် ထိတ်လန့်တကြားဖြင့် စကားလုံး နှစ်လုံးကိုသာ ရေရွတ်လိုက်နိုင်လေသည်။ သေဆုံးခါနီး အချိန်တွင် သူ၏ မျက်ဝန်းများထဲ၌ မကျေမနပ်ဖြစ်မှုများ ပြည့်နှက်နေခဲ့၏။

ထိုကောင်လေးသည် နိဗ္ဗာန်အဆင့် ၈ တွင်သာ ရှိသေးသော ကောင်လေး တစ်ယောက်သာ ဖြစ်သည် မဟုတ်လော ဝင်စားခြင်း၏ အစစ်အမှန် ရည်ရွယ်ချက်ကို သူက မည်သို့ ‌နားလည်နေနိုင်ခဲ့သနည်း။

“သေချာ သွားပြီး ပြန်ဝင်စားလိုက်ပါ အဘိုးကြီးရာ...”

ဝူယွမ်သည် အကြီးအကဲကျန်း၏ ဝိညာဉ်ကို ဖမ်းယူလိုက်ပြီးနောက် ချိတ်ပိတ်ခြင်းရူန်း တစ်ခုဖြင့် ဖိနှိပ်ထားလိုက်လေသည်။

အကြီးအကဲကျန်း၏ ဝိညာဉ်မှာ အတော်လေး ကောင်းမွန်ပြီး ယခင်က ကျန်းကျုံး၏ ဝိညာဉ်ထက်ပင် ပိုမိုအားကောင်းသေးသည်။ အကြီးအကဲကျန်း၏ ဝိညာဉ်ကို စုပ်ယူလိုက်ခြင်းက သူ၏ ဝိညာဉ်စွမ်းအင်ကို သေချာပေါက် သိသိသာသာ တိုးတက်လာစေမည် ဖြစ်သည်။

အခြားတစ်ဖက်တွင်မူ ရှောင်တျောင်းသည်လည်း သူ၏ တိုက်ပွဲကို အဆုံးသတ်ပြီးခဲ့ပြီ ဖြစ်သည်။ သူသည် ရွှေတစ္ဆေဇီးကွက်၏ ခန္ဓာကိုယ်ကို ဆုတ်ဖြဲလိုက်ပြီး ၎င်း၏ နတ်ဆိုးဝိညာဉ်ကို ထုတ်ယူလိုက်လေသည်။

“ရှောင်ယန်၊ ဒီနတ်ဆိုးဝိညာဉ်ကို ယူထားလိုက်... မင်း နိဗ္ဗာန်အဆင့် ၉ ကို ထိုးဖောက်ဝင်ရောက်ဖို့အတွက် လုံလောက်လောက်ပါတယ်...”

ရှောင်တျောင်းက နတ်ဆိုးဝိညာဉ်ကို ရှောင်ယန်ထံသို့ ပေါ့ပေါ့ပါးပါးပင် ပစ်ပေးလိုက်လေသည်။

သူ၏ စွမ်းအားမှာ အပြည့်အဝနီးပါး ပြန်လည်ပြည့်ဖြိုးလာပြီဖြစ်ပြီး သူထက် အားနည်းသော ဤနတ်ဆိုးဝိညာဉ်များက သူ့အတွက် အကူအညီ သိပ်မဖြစ်စေသဖြင့် သူက ၎င်းကို ရှောင်ယန်အား ရက်ရောစွာ ပေးကမ်းလိုက်ခြင်း ဖြစ်သည်။

“အစ်ကိုကြီး၊ အစ်ကိုကြီးက တကယ်ကို အားကောင်းလွန်းတယ်... ဆန်းကြယ်ရှင်ခြင်းအဆင့် အထွတ်အထိပ်က အဲဒီ အဘိုးကြီးက အစ်ကိုကြီးရဲ့ လက်သီးတစ်ချက်တည်းနဲ့တင် အမှုန့်ဖြစ်သွားတာပဲ...”

ရှောင်တျောင်းက တံတွေးမြိုချလိုက်ပြီး ဝူယွမ်ကို လေးစားအားကျစွာဖြင့် ကြည့်ကာ ပြောလိုက်လေသည်။

“ဒီအဆင့်မှာ ဝင်စားခြင်း စွမ်းအားရဲ့ အမျှင်တန်းလေး တစ်ခုကို ထုတ်လွှတ်နိုင်တယ်ဆိုတော့... အစ်ကိုကြီးက သူ့ရဲ့ အတိတ်ဘဝက မှတ်ဉာဏ်တချို့များ ပြန်လည်နိုးထလာတာများလား...”

ရှောင်တျောင်းက သူ၏ စိတ်ထဲမှ မှန်းဆတွေးတောလိုက်လေသည်။

သူ၏ အစ်ကိုကြီးသည် အားကောင်းသော ဝင်စားသူ တစ်ဦးဖြစ်ကြောင်းကို သူ အမြဲတစေ ယုံကြည်ထားခဲ့သဖြင့် အစ်ကိုကြီးက ဤမျှ ကြီးမားလှသော စွမ်းအားကို ထုတ်လွှတ်နိုင်ခြင်းအား သူ လက်ခံနိုင်ပေသည်။

“သူက ဒီလောက်တောင် အားနည်းလိမ့်မယ်လို့ ငါလည်း မထင်ထားခဲ့မိဘူး...”

ဝူယွမ်က ခေါင်းခါလိုက်လေသည်။ ဤသည်မှာ လမ်းခြောက်သွယ် ဝင်စားခြင်း လက်သီးကို သူ ဒုတိယအကြိမ်မြောက် အသုံးပြုခြင်းသာ ဖြစ်သည်။

လက်သီး၏ ရည်ရွယ်ချက်ကို သူ မကျင့်ကြံရသေးဘဲ ဝင်စားခြင်း၏ အရိပ်အယောင်လေး တစ်ခုကိုသာ တုပနိုင်ခြင်း ဖြစ်သည်။

လမ်းခြောက်သွယ်လမ်းခြောက်သွယ် ဝင်စားခြင်း လက်သီး၏ အစစ်အမှန် နက်နဲမှုကို နားလည်သဘောပေါက်ရန်အတွက် သူ များစွာ လိုအပ်နေသေး၏။

သို့သော် ထိုသို့ဖြစ်လင့်ကစား လမ်းခြောက်သွယ် ဝင်စားခြင်း လက်သီး၏ စွမ်းအားက သူ့ကို အံ့ဩသွားစေနိုင်ခဲ့သည်။ ဆန်းကြယ်ရှင်ခြင်းအဆင့် အထွတ်အထိပ်ရှိ အားကောင်းသော ကျင့်ကြံသူတစ်ဦးပင်လျှင် ၎င်းကို ခံနိုင်ရည်မရှိခဲ့ပေ။

ဝူယွမ်က ယင်းဟွမ်ဟွမ်ကို အပြင်သို့ ထုတ်ပေးလိုက်လေသည်။ ဤအချိန်တွင် မိစ္ဆာအသံတောင်တန်းကြီး တစ်ခုလုံးမှာ အပျက်အစီးများကြားတွင် လုံးဝ တိတ်ဆိတ်ငြိမ်သက်နေခဲ့ပြီ ဖြစ်သည်။

“ပြီးသွားပြီလား...”

ယင်းဟွမ်ဟွမ်သည် ပတ်ဝန်းကျင်ကို ဝေ့ကြည့်ရင်း အံ့ဩတကြီး မေးလိုက်လေသည်။

အကြီးအကဲတစ်ဦးနှင့် ဝိညာဉ်စစ်သူကြီး နှစ်ဦးတို့မှာ သူတို့၏ လက်ချက်ဖြင့် ဤမျှ လွယ်လွယ်ကူကူ ရှင်းလင်းခံလိုက်ရလေသည်။

“ဒီတစ်ခေါက်တော့ ယွမ်ဂိုဏ်းက အကြီးအကျယ် ဆုံးရှုံးသွားပြီပဲ...”

လင်းတုန်က ရယ်မောရင်း သေဆုံးသွားသူများထံမှ သိုလှောင်အိတ်အားလုံးကို လိုက်လံ သိမ်းဆည်းလိုက်လေသည်။

တိုက်ပွဲအပြီးတွင် ပစ္စည်းများကို သိမ်းဆည်းခြင်း..

၎င်းမှာ ကောင်းမွန်သော အကျင့်တစ်ခုပင် ဖြစ်သည်။

ထို့နောက် ရှောင်ယန်သည် ဗာမီလီယံငှက် အစစ်အမှန် မီးတောက်တစ်ခုကို ထုတ်လွှတ်လိုက်ပြီး အလောင်းများနှင့် အထောက်အထားများကို ဖျက်ဆီးပစ်လိုက်လေသည်။

သတ်ဖြတ်ခြင်း၊ ရတနာများကို လုယူခြင်းနှင့် အထောက်အထားများကို ဖျက်ဆီးခြင်း၊ လုပ်ငန်းစဉ်များကို ဤမျှကျွမ်းကျင်ပိုင်နိုင်စွာ ကိုင်တွယ်သွားမှုက ယင်းဟွမ်ဟွမ်ကို အနည်းငယ် ဆွံ့အသွားစေခဲ့၏။

ဝူယွမ်တို့ အဖွဲ့မှာ အလွန်ကျွမ်းကျင်နေပုံရပြီး သူတို့သည် ဤကဲ့သို့သော ကိစ္စမျိုးကို မကြာခဏ လုပ်ဆောင်လေ့ရှိမှန်း ထင်ရှားလှပေသည်။

“ဘာလို့ကြောင်ကြည့်နေတာလဲ... ကြောက်သွားလို့လား...”

ဝူယွမ်က ယင်းဟွမ်ဟွမ်၏ ပခုံးလေးကို ခပ်ဖွဖွ ပုတ်ရင်း မေးလိုက်လေသည်။

“ဘာကို ကြောက်ရမှာလဲ... ဒီမိန်းမပျိုလေးက နည်းနည်းလေးတောင် မကြောက်ပါဘူးနော်...” ယင်းဟွမ်ဟွမ်သည် ခေါင်းလေးမော့ကာ ရင်ကော့ပြီး မာနကြီးစွာဖြင့် ပြောလိုက်လေသည်။

“သွားကြစို့... မြေကမ္ဘာအူတိုင် သန့်စင်အရည်ကို သွားရှာကြမယ်၊ အဲ့ဒါကို တွေ့တာနဲ့ ငါတို့ ချက်ချင်း ထွက်သွားကြတာပေါ့... ရှောင်ယန်၊ မင်း လမ်းမှတ်မိသေးလား...”

ရှောင်တျောင်းက ခေါင်းအနည်းငယ် ခါယမ်းလိုက်ပြီးနောက် ပြုံးရင်း မေးလိုက်လေသည်။

“သေချာပေါက် မှတ်မိတာပေါ့...”

ရှောင်ယန်က ခေါင်းညိတ်ပြလိုက်ပြီး သူ၏ ခန္ဓာကိုယ်ကို လှုပ်ရှားကာ ဧရာမမိစ္ဆာအသံတောင်တန်းကြီးဆီသို့ ပျံသန်းသွားခဲ့လေသည်။ ဝူယွမ်နှင့် အခြားသူများကလည်း ချက်ချင်း လိုက်ပါသွားကြ၏။

သူတို့ငါးဦးလုံး မိစ္ဆာအသံ တောင်တန်းကြီး အတွင်းသို့ ပျံသန်းဝင်ရောက်သွားကြသည်။

ရှောင်ယန်၏ လမ်းပြမှုဖြင့် သူတို့သည် အနောက်ဘက်တောင်ကြောသို့ လျင်မြန်စွာ ရောက်ရှိလာခဲ့ကြ၏။

ထို့နောက် အလွန် ကွယ်ဝှက်နေသော ကျောက်နံရံတစ်ခုနှင့် မှောင်မိုက်နေသော ဧရာမဂူပေါက်ကြီး တစ်ခုကို သူတို့ တွေ့ရှိလိုက်ကြသည်။

ဤအချိန်တွင် အလင်းတန်းအစီအရင် တစ်ခုက ဂူပေါက်ကို ဖုံးလွှမ်းထားပြီး ၎င်းမှာ ရွှေတစ္ဆေဇီးကွက် ပြုလုပ်ထားသော ချိတ်ပိတ်မှု တစ်ခုဖြစ်သည်မှာ ထင်ရှားလှပေသည်။

“ဒီနေရာပဲ...” ရှောင်ယန်က ဂူပေါက်ကို လက်ညှိုးထိုးပြလိုက်လေသည်။

ရှောင်တျောင်းက စကားများပြီး အချိန်မဖြုန်းနေတော့ပေ။ သူက တိုက်ရိုက်ပင် လက်သီးဆုပ်လိုက်ရာ ကြမ်းတမ်းလွန်းသော ခရမ်းနှင့် အနက်ရောင်များ ရောယှက်နေသည့် စွမ်းအင်တန်းတစ်ခု ထွက်ပေါ်လာပြီး အလင်းတန်း အစီအရင်ကို ချက်ချင်းပင် ဖြိုခွဲပစ်လိုက်လေသည်။

မူလက ဝူယွမ်သည် ၎င်းကို မန္တန်တစ်ခုဖြင့် ဖျက်ဆီးရန် ရည်ရွယ်ထားသော်လည်း ရှောင်တျောင်းက ရုပ်ပိုင်းဆိုင်ရာ နည်းလမ်းကို ရွေးချယ်ပြီးဖြစ်လေသည်။

ဂူပေါက်ကို ဖွင့်လိုက်ပြီးနောက် ရှောင်တျောင်းသည် နတ်ဆိုးမြွေပါတစ်ကောင်ပီပီ ရှေ့ဆုံးဦးဆောင်ကာ ခရမ်းရောင် အလင်းတန်းတစ်ခုအဖြစ်သို့ ပြောင်းလဲပြီး အတွင်းသို့ ပျံသန်းဝင်ရောက်သွားခဲ့၏။

လမ်းကြောင်းမှာ တောင်ကြီး၏ နက်ရှိုင်းသော အပိုင်းသို့ ဆက်သွယ်ထားပုံရသည်။ သူတို့သည် လမ်းကြောင်းအတိုင်း မိနစ်အနည်းငယ်ခန့် ပျံသန်းသွားပြီးနောက် အောက်ဘက်တွင် မှေးမှိန်သော အလင်းရောင်တစ်ခု ပေါ်ထွက်လာခဲ့လေသည်။

သူတို့ နီးကပ်သွားသည်နှင့်အမျှ အလင်းရောင်မှာ ပိုမိုတောက်ပလာပြီး ကျဉ်းမြောင်းနေသော မြင်ကွင်းမှာလည်း ရုတ်တရက် ကျယ်ဝန်းသွားခဲ့၏။

နောက်ဆုံးတွင် အတွင်း၌ ရှိနေသော အရာကို သူတို့ မြင်တွေ့လိုက်ကြရသည်။ ၎င်းမှာ ဧရာမဂူကြီး တစ်ခု ဖြစ်လေသည်။

ဂူကြီးမှာ တောင်ကြီး၏ အလယ်ဗဟိုတွင် ရှိနေပြီး ထူးဆန်းသော ကျောက်တုံးများဖြင့် ပြည့်နှက်နေသော်လည်း အံ့ဩစရာကောင်းလောက်အောင် ကြွယ်ဝလှသော စွမ်းအင်များက ၎င်းအတွင်းတွင် လှိုင်းတံပိုးများအလား ပြန့်နှံ့နေခဲ့သည်။

အခန်း (၂၅၆) - သားရဲတစ်သောင်းတောင်တန်းကြီးတွင် စာရင်းသွင်းခြင်း၊ ကျဲ့အက္ခရာ လျှို့ဝှက်ချက်(၂)

ရွှေရောင် အလင်းတန်းများ တောက်ပလာသည်နှင့်အမျှ ဂူကြီး၏ အလယ်ဗဟို တည့်တည့်တွင် ကျန်းအနည်းငယ်ခန့် ကျယ်ဝန်းသော ကျောက်ကန်ကြီး တစ်ခု ရှိနေသည်ကို သူတို့ ချက်ချင်း သတိပြုမိလိုက်ကြ၏။ ထိုကျောက်ကန်ကြီးထဲတွင် ရွှေရောင် အရည်များ ပြည့်နှက်နေလေသည်။

“မြေကမ္ဘာအူတိုင် သန့်စင်အရည်လား...”

ကျောက်ကန်ကြီး၏ အစွန်းသို့ ပျံသန်းသွားချိန်တွင် သူတို့၏ မျက်နှာများပေါ်၌ ဝမ်းသာပျော်ရွှင်မှုများ ပေါ်လွင်နေခဲ့၏။ ကျောက်ကန်ကြီးမှာ မနက်ရှိုင်းလှဘဲ အောက်ခြေကိုပင် မြင်တွေ့နိုင်လေသည်။

ရွှေရောင်အရည်များက ကျောက်ကန်အတွင်းတွင် လှိုင်းထနေပြီး အလွန်အမင်း ဆွဲဆောင်မှုရှိကာ သိမ်မွေ့လွန်းသော ရနံ့လေးတစ်ခုက ကျောက်ကန်ထံမှ ထွက်ပေါ်နေခဲ့သည်။

ထိုရနံ့မှာ ယစ်မူးဖွယ်ကောင်းလွန်းပြီး လူတစ်ယောက်ကို အပြည့်အဝ လန်းဆန်းသွားစေနိုင်စွမ်း ရှိလေသည်။ ခန္ဓာကိုယ်သာမက ဝိညာဉ်ကိုပါ ဤအရှိန်အဝါဖြင့် ပြုစုပျိုးထောင်ပေးနိုင်ပေသည်။

ယင်းဟွမ်ဟွမ်၏ နက်မှောင်ပြီး တောက်ပသော မျက်လုံးများမှာ လင်းလက်သွားခဲ့၏။ သူမ၏ အကန့်အသတ်ရှိသော ဗဟုသုတများဖြင့် သူမက ရှင်းပြလိုက်လေသည်။

“ဒီရွှေရောင် အရည်တွေက မြေကမ္ဘာရဲ့ အူတိုင်ကနေ တစ်စက်ချင်း ညှစ်ထုတ်လိုက်တဲ့ စွမ်းအင်တွေပဲ... အရည်အများစုက ညှစ်ထုတ်နေတဲ့ လုပ်ငန်းစဉ်အတွင်းမှာ ပျောက်ကွယ်သွားတတ်ကြတယ်၊ ဒီလို နေရာမျိုးလို အထူး နေရာတချို့မှာပဲ စုစည်းနေနိုင်တာ...”

“ဒါပေမယ့် ဒါကို မြေကမ္ဘာအူတိုင် သန့်ရှင်းသော ရေလို့ပဲ ခေါ်လို့ရသေးတယ်... ဘာလို့လဲဆိုတော့ အဲ့အရေထဲမှာ စုစည်းပြီး ဖိသိပ်ရမယ့် အဆင့်တစ်ခု လိုအပ်နေသေးလို့ပဲ၊ ဒါပေမယ့် ဒီအဆင့်ကိုတော့ လူကိုယ်တိုင် လုပ်ဆောင်လို့ ရပါတယ်...”

“နင် ဒီလောက် အများကြီး သိလိမ့်မယ်လို့ ကျွန်တော် မထင်ထားခဲ့မိဘူး...” ဝူယွမ်က ချီးကျူးလိုက်လေသည်။

သူ၏ အမြင်တွင် ယင်းဟွမ်ဟွမ်မှာ စောင်းတီးရုံကလွဲ၍ ဘာမှမသိသော ‘စာမသင်ချင်သော ကလေးမလေး’ တစ်ယောက်သာ ဖြစ်သည် မဟုတ်ပါလား။

“ဟွန့်၊ ငါ သိတာတွေ အများကြီး ရှိသေးတယ်... ဒါ့အပြင် ဒီရွှေရောင်ရေတွေက ရွှေရောင် အရည်တွေအဖြစ်ကို ပြောင်းလဲသွားတယ်ဆိုတာ သာမန် ဗဟုသုတလေး တစ်ခုပါပဲ၊ နင်ကသာ ဘာမှမသိတာ... နင့်ကို ဝူယွမ်လို့ မခေါ်သင့်ဘူး၊ ‘ဘာမှမသိတဲ့ ဝူ’ လို့ ခေါ်သင့်တာ...”

ယင်းဟွမ်ဟွမ်က ဂုဏ်ယူစွာဖြင့် ပြောလိုက်ပြီး သူမ၏ ကျေနပ်နေသော အမူအရာမှာ သူမတွင်သာ အမြီးပါမည်ဆိုလျှင် ကောင်းကင်ယံအထိပင် လှုပ်ရမ်းနေမည်မှာ သေချာပေသည်။

“အင်း...”

ရှောင်တျောင်းမှာ အနည်းငယ် အံ့ဩသွားခဲ့၏။ “ဒီကောင်မလေးက အစ်ကိုကြီးကို ဒီလို ပြောရဲတယ်လား... အစ်ကိုကြီးက သူ့ကို ကိုင်တွယ်ဖြေရှင်းမှာ သူမ မကြောက်ဘူးလား...”

သူသည် သူ၏ ရင်ထဲတွင် အစ်ကိုကြီးကို အမြဲတစေ လေးစားအားကျခဲ့ပြီး အစ်ကိုကြီးကို စကားဖြင့်ပင် မစော်ကားရဲခဲ့ပေ။ သို့သော် ဤကောင်မလေး၏ စကားများမှာ တကယ်ကို ပွင့်လင်းလွန်းလှပေသည်။

“ဖြန်း...”

ဝူယွမ်က ယင်းဟွမ်ဟွမ်၏ တင်ပါးကို ရိုက်လိုက်လေသည်။ “မင်းက မင်းကိုယ်မင်း အများကြီး သိတယ်လို့ ထင်နေတာလား... ဒါဆိုရင် နောက်ဆုံး အဆင့်ကို နင်ပဲသွားလုပ်လိုက်လေ...”

“နင်...”

ယင်းဟွမ်ဟွမ်၏ မျက်နှာလေးမှာ ချက်ချင်းပင် နီရဲသွားခဲ့၏။ “ငါ မလုပ်တတ်ဘူး... နင် လုပ်တတ်လို့လား...”

“အစ်ကိုကြီး၊ မရီး... မငြင်းကြပါနဲ့တော့၊ ကျနော်ပဲ လုပ်လိုက်ပါ့မယ်... ဒီလို ကိစ္စသေးသေးလေးအတွက် အစ်ကိုကြီးတို့ ဝင်ပါစရာ မလိုပါဘူး...”

ရှောင်တျောင်းက လျင်မြန်စွာ ပြောလိုက်ပြီး သူ၏ လက်များမှာ ခရမ်းရောင် အလင်းတန်းများဖြင့် တောက်ပနေခဲ့၏။

သူ၏ လက်ဖဝါးကို တစ်ချက်လှည့်လိုက်ရာ ရွှေရောင် ကျောက်ကန်ကြီး၏ အထက်တွင် ခရမ်းနှင့် အနက်ရောင် ရောယှက်နေသော ရေဝဲကြီးတစ်ခု ဖြစ်ပေါ်လာခဲ့သည်။

ထို့နောက် ကြမ်းတမ်းသော စွမ်းအားတစ်ခု ပေါက်ကွဲထွက်လာပြီး ကျောက်ကန်ကြီးကို ပြင်းထန်စွာ လှိုင်းထသွားစေခဲ့၏။ ရွှေရောင် အရည်တန်းများသည် အထက်သို့ ဒေါင်လိုက်ပင့်တက်သွားကြပြီး ခရမ်းနှင့် အနက်ရောင် ရောယှက်နေသော ရေဝဲကြီးထဲသို့ စီးဝင်သွားကြလေသည်။

အစ်ကိုကြီးက ဤကောင်မလေးကို တမင်တကာ စနောက်နေခြင်းဖြစ်ကြောင်းကို သူ သဘောပေါက်ပြီး ဖြစ်လေသည်။ မဟုတ်လျှင် အစ်ကိုကြီး၏ ဂုဏ်သတင်းဖြင့် မိန်းကလေး တစ်ယောက်ကို ဤသို့ စနောက်စရာ အကြောင်းမရှိပေ။

ယင်းဟွမ်ဟွမ်မှာ ဆို့နင့်သွားပြီး မည်သို့ ပြန်လည်ချေပရမည်ကို မသိတော့ပေ။ အရေးကြီးဆုံးအချက်မှာ ‘မရီး’ ဟူသော အခေါ်အဝေါ်လေးမှာ ကြားလို့ အတော်လေး ကောင်းနေခြင်းပင် ဖြစ်သည်။

ဤအချိန်တွင် ခရမ်းနှင့် အနက်ရောင် ရောယှက်နေသော ရေဝဲကြီးထဲမှ မှေးမှိန်သော ရွှေရောင် အလင်းတန်းများ အဆက်မပြတ် ထွက်ပေါ်နေခဲ့၏။

ရေဝဲကြီးထဲတွင် ရွှေရောင် အရည်များမှာ အံ့ဩဖွယ်ကောင်းသော အမြန်နှုန်းဖြင့် စုစည်းသွားကြသည်။ စုစည်းမှုများ ပိုမိုပြင်းထန်လာသည်နှင့်အမျှ ရွှေရောင် အရည်များမှာလည်း ပိုမိုစေးပျစ်လာခဲ့လေသည်။

အချိန်တိုလေးအတွင်းမှာပင် ၎င်းသည် ပုံသဏ္ဍာန် စတင် ပေါ်ထွက်လာခဲ့၏။

အလင်းရောင်များ စုစည်းသွားသောအခါ လက်သီးဆုပ်အရွယ်အစားခန့်ရှိသော ရွှေရောင် စေးပျစ်သည့် အရာလေးခုမှာ အံ့ဩစရာကောင်းလောက်အောင် ကလေးငယ် ပုံသဏ္ဍာန်လေးဖြင့် ပေါ်ထွက်လာခဲ့လေသည်။

၎င်းတို့ထံမှ ရွှေရောင် အလင်းတန်းများ ဖြာထွက်နေပြီး အလွန်အမင်း နက်နဲဆန်းကြယ်သည့် အသွင်အပြင်ကို ပေးစွမ်းနေခဲ့၏။

“မြေကမ္ဘာအူတိုင် သန့်စင်အရည်က ကလေးငယ်ပုံစံနဲ့ ထွက်ပေါ်လာတာ... ဝိညာဉ်ကို ပြန်လည်တည်ဆောက်ခြင်းရဲ့ ရည်ရွယ်ချက်ကို ကိုယ်စားပြုတယ်၊ ဒီအရာက အရှေ့ဘက် ရွှမ်းဒေသရဲ့ လေလံရုံကြီးတွေမှာတောင် ရှားပါးပြီး လူကြိုက်များတဲ့ ရတနာတစ်ခုပဲ...”

ယင်းဟွမ်ဟွမ်ကလည်း ရွှေရောင် ကလေးငယ်လေးဦးကို ထူးဆန်းသော အကြည့်များဖြင့် စိုက်ကြည့်ရင်း ပြောလိုက်လေသည်။

“ငါ့ကို မရိုက်နဲ့နော်... ငါက အံ့ဩလွန်းလို့ ရေရွတ်မိရုံလေးပါ...” ယင်းဟွမ်ဟွမ်က သူမ၏ တင်ပါးကို အလျင်အမြန် ကာကွယ်လိုက်လေသည်။

ရှောင်တျောင်းက သူ၏ လက်ကို ပြန်လည်ရုပ်သိမ်းလိုက်ရာ ခရမ်းနှင့် အနက်ရောင် ရောယှက်နေသော ရေဝဲကြီးမှာ ပျောက်ကွယ်သွားခဲ့၏။

ထို့နောက် ရွှေရောင်ကလေးငယ် အလင်းတန်းအစုအဝေး လေးခုသည် သူတို့ထံသို့ ဖြည်းညင်းစွာ ပျံဝဲလာပြီး သူတို့၏ အရှေ့တွင် ရပ်တန့်နေခဲ့လေသည်။

“ကွက်တိ လေးခုပဲ... အကိုကြီးတို့ တစ်ယောက် တစ်ခုစီ ယူလိုက်ကြ၊ ဒီအရာက ကျွန်တော့်အတွက် သိပ်ပြီး အကူအညီ မဖြစ်ဘူး၊ အကိုကြီးတို့အတွက် ပိုပြီး အသုံးဝင်လိမ့်မယ်...”

“ဟင်... ငါတော့ မလိုပါဘူးနော်...”

ယင်းဟွမ်ဟွမ်မှာ အနည်းငယ် အံ့ဩသွားခဲ့၏။ သူမက အဖော်အဖြစ် လိုက်ပါလာရုံမျှသာ ဖြစ်သည် မဟုတ်လော။

“ယူထားလိုက်ပါ... မင်းရဲ့ ကောင်းကင်ဖီးနစ် စောင်းသာ မပါလာခဲ့ရင် ငါတို့ ဇီးကွက် အသံအစီအရင်ကို ဖျက်ဆီးဖို့ အတော်လေး ဒုက္ခရောက်နေမှာ...” ဝူယွမ်က ပြုံးရင်း ပြောလိုက်လေသည်။

သူမသည် တောင်ဂိုဏ်း၏ မင်းသမီးလေး ဖြစ်သည် မဟုတ်လော။ သူက လိုက်ပါလာပြီဆိုမှတော့ သူမကို အကျိုးအမြတ် အချို့ ပေးသင့်ပေသည်။ ဘယ်သူသိနိုင်မလဲ

မည်သူသိနိုင်မည်နည်း... သူမ၏ဖခင် ဂိုဏ်းချုပ်ကြီးက လျှို့ဝှက်စွာ စောင့်ကြည့်နေလျှင်လည်း စောင့်ကြည့်နေနိုင်သေး၏။

ဤစကားကို ကြားသောအခါ ယင်းဟွမ်ဟွမ်က အနည်းငယ် တုံ့ဆိုင်းသွားခဲ့သည်။ ထို့နောက် သူမ၏ လှပသော မျက်လုံးဝိုင်းဝိုင်းကြီးများက လခြမ်းလေးများအလား ကွေးညွတ်သွားပြီး သူမ၏ လှပသော ခေါင်းလေးကို ညိတ်ပြလိုက်လေသည်။

ထို့နောက် သူမက ကျောက်စိမ်းရောင် လက်ချောင်းလေးများကို ဆန့်တန်းကာ ရွှေရောင်ကလေးငယ် အလင်းတန်းအစုအဝေးလေး တစ်ခုကို ယူလိုက်၏။

ရွှေရောင် အလင်းတန်းက သူမ၏ လှပနုနယ်သော မျက်နှာလေးပေါ်သို့ ရောင်ပြန်ဟပ်နေပြီး သူမကို ယှဉ်ပြိုင်၍ မရနိုင်အောင် လှပတင့်တယ်သွားစေခဲ့သည်။

ဝူယွမ်ကလည်း အားနာမနေတော့ဘဲ သူ၏ ရွှေရောင် ကလေးငယ် အလင်းတန်းအစုအဝေးကို သိမ်းဆည်းလိုက်လေသည်။

ရှောင်တျောင်းက သူ၏ ညီဖြစ်ပြီး သူ့ကို ပြန်လည် ပေးဆပ်ရန် နည်းလမ်းပေါင်း ထောင်နှင့်ချီ၍ ရှိနေလေသည်။ မြေကမ္ဘာအူတိုင် သန့်စင်အရည်သည် လက်ရှိအချိန်တွင် သူတို့အတွက် အမှန်တကယ် ပို၍အထောက်အကူ ဖြစ်စေပေသည်။

သူသည် ရှောင်တျောင်းကို အခြားအရာများဖြင့် လျော်ကြေးပေးနိုင်သေးလေသည်။

“ဒီတစ်ခေါက်တော့ ငါလည်း မင်းကို သင်ပေးချင်တဲ့ လျှို့ဝှက်နည်းလမ်း တစ်ခု ရှိတယ်...” ဝူယွမ်က ရှောင်တျောင်းကို ပြုံးပြရင်း ပြောလိုက်လေသည်။

ရှင်းအက္ခရာ လျှို့ဝှက်ချက်...

ကောင်းကင်မြွေပါ မျိုးနွယ်စုသည် မွေးရာပါ အမြန်နှုန်းတွင် ကျွမ်းကျင်သူများ ဖြစ်ကြသည်။ ရှင်းအက္ခရာ လျှို့ဝှက်ချက်၏ အကူအညီဖြင့် ရှောင်တျောင်း၏ စွမ်းအားမှာ ပို၍ပင် ကြောက်မက်ဖွယ်ကောင်းလာနိုင်ပေသည်။

“အို... အစ်ကိုကြီး ပေးတာဆိုမှတော့ ကောင်းတဲ့အရာ ဖြစ်မှာ သေချာတယ်...”

ရှောင်တျောင်းက ဝူယွမ်ကို မျှော်လင့်တကြီး ကြည့်လိုက်လေသည်။ ခန္ဓာကိုယ်ကျမ်း၏ ‘ယင်’ စာလုံးက သူ့အား အကျိုးအမြတ်များစွာ ရရှိစေခဲ့ပြီး လေဟာနယ်ကိုပင် ဖြတ်သန်းနိုင်လောက်အောင်လျင်မြန်သည့် အလွန်အမင်း အားကောင်းသည့် ရုပ်ပိုင်းဆိုင်ရာ ခန္ဓာကိုယ် တစ်ခုကို ကျင့်ကြံနိုင်စေခဲ့သည်။

“ရွှစ်...”

ဝူယွမ်က သူ၏ ဝိညာဉ်စွမ်းအင်ကို အသုံးပြု၍ ရှင်းအက္ခရာ လျှို့ဝှက်ချက်၏ အချက်အလက်များကို ရှောင်တျောင်းထံသို့ ထည့်သွင်းပေးလိုက်လေသည်။

ရှောင်တျောင်းသည် နေရာတွင်ပင် ကြီးမားလွန်းသော အချက်အလက်များကို ချက်ချင်း စတင် စုပ်ယူလိုက်တော့သည်။

ဤအချိန်တွင် ဝူယွမ်သည်လည်း စနစ်ထံမှ အသိပေးချက် တစ်ခုကို လက်ခံရရှိလိုက်၏။

[ဒင်... သားရဲတစ်သောင်း တောင်တန်းကြီးသို့ ရောက်ရှိပါပြီ။ ဆိုင်းအင်၀င်မည်လော။]

“ဆိုင်းအင်၀င်မယ်...”

[ဒင်... အောင်မြင်ပါသည်။ ဆုလာဘ် ရရှိပါသည် - ကျယ် အက္ခရာ လျှို့ဝှက်ချက်။]

[ကျဲ့ အက္ခရာ လျှို့ဝှက်ချက် - အသက်ရှည်ခြင်း ကောင်းကင်ဘုံရှင် ဖန်တီးထားသော ကုသခြင်း လျှို့ဝှက်နည်းလမ်း တစ်ခု။ ဒဏ်ရာ မည်မျှပင် ပြင်းထန်စေကာမူ ချက်ချင်း ပြန်လည် ကောင်းမွန်လာစေနိုင်သည်။]

လျှို့ဝှက်နည်းလမ်း တစ်ခုကို မျှဝေပြီးသည်နှင့် တစ်ပြိုင်နက် နောက်ထပ် လျှို့ဝှက်နည်းလမ်းတစ်ခုကို သူ ချက်ချင်း ရရှိလိုက်လေသည်။ ဝူယွမ်မှာ ချက်ချင်းပင် ဝမ်းသာအားရ ဖြစ်သွားခဲ့၏။

ဤကျဲ့အက္ခရာ လျှို့ဝှက်ချက်သည် သတ်၍မသေနိုင်သော ပိုးဟပ်တစ်ကောင်နှင့်ပင် တူနေတော့သည်။

အကယ်၍ သူသာ ဤအရာကို သင်ယူတတ်မြောက်သွားမည်ဆိုပါက သူ၏ ခုခံနိုင်စွမ်းမှာ ရန်သူများကို သေချာပေါက် စိတ်ပျက်ချင်းကြောင့် သေဆုံးသွားစေနိုင်ပေလိမ့်မည်။

ပြိုင်ဘက်က သူ့ကို ချက်ချင်း မသတ်ပစ်နိုင်သရွေ့ သူက ပြိုင်ဘက်များကို အဆက်မပြတ် ဖိအားပေးနိုင်လေသည်။

[ဒင်... ဆိုင်းအင်၀င်ရန် မစ်ရှင်အသစ် ထွက်ပေါ်လာပါပြီ။ နောက်ထပ် ဆိုင်းအင်၀င်ရမည့် နေရာ - လောင်ကျွမ်းကောင်းကင် ရှေးဟောင်းရတနာသိုက်။】

... သို့သော် ဝူယွမ်နှင့် အခြားသူများက မြေကမ္ဘာအူတိုင် သန့်စင်အရည်ကို ရရှိလိုက်၍ ဝမ်းသာပျော်ရွှင်နေကြချိန်တွင် ယွမ်ဒေသရှိ ယွမ်ဂိုဏ်း၏ အဝေးတစ်နေရာတွင်မူ တစ်စုံတစ်ယောက်က မျက်မှောင်ကြုတ်နေခဲ့လေသည်။

ယွမ်ဒေသ၏ အလယ်ဗဟို တည့်တည့်တွင် တောင်သုံးလုံးက လေထုထဲ၌ ပျံဝဲနေကြ၏။ တောင်များထံမှ ထွက်ပေါ်လာသော အလင်းရောင်များက ယွမ်ဂိုဏ်း တစ်ခုလုံးကို လင်းထိန်နေစေခဲ့သည်။

ဤတောင်သုံးလုံးသည် မရေမတွက်နိုင်သော ယွမ်ဂိုဏ်း တပည့်များ၏ ရင်တွင်းရှိ မြင့်မြတ်သော နေရာများ ဖြစ်ကြသည်။ အဘယ်ကြောင့်ဆိုသော် ၎င်းတို့မှာ ယွမ်ဂိုဏ်း၏ ကြီးမြတ်သော ဂိုဏ်းချုပ်ကြီး သုံးပါး တံခါးပိတ် ကျင့်ကြံရာ နေရာများ ဖြစ်သောကြောင့်ပင်။

ဤအချိန်တွင် တောင်တစ်လုံးပေါ်တွင် ခရမ်းနှင့် ရွှေရောင် ရောယှက်နေသော ဝတ်ရုံကို ဝတ်ဆင်ထားသည့် ငွေရောင် ဆံပင်နှင့် အမျိုးသား တစ်ဦးက မျက်လုံးများကို ဖွင့်လိုက်လေသည်။

သူ၏ မျက်ဝန်းများထဲတွင် လောကဓံနှင့် နက်နဲမှုများ ပြည့်နှက်နေပြီး သူ၏ မျက်နှာမှာ ကလေးငယ် တစ်ဦးအလား ဖြူစင်နေခဲ့၏။

သူက မျက်မှောင်ကြုတ်လိုက်ပြီး သူ၏ ဝတ်ရုံလက်ထဲမှ လက်တစ်ဖက် ဖြည်းညင်းစွာ ထွက်ပေါ်လာခဲ့လေသည်။ သူ၏ လက်ဖဝါးထဲတွင် အက်ကွဲနေသော ကျောက်စိမ်းပြား သုံးခု ရှိနေ၏။

ကျောက်စိမ်းပြားများပေါ်တွင် လူမျက်နှာ သုံးခု ခပ်ရေးရေး ပေါ်လွင်နေသည်... ၎င်းတို့မှာ ဝူယွမ်၏ လက်ချက်ဖြင့် သေဆုံးသွားခဲ့သော လူသုံးဦး၏ မျက်နှာများပင် ဖြစ်သည်။

ငွေရောင် ဆံပင်များနှင့် အမျိုးသား၏ နက်နဲလွန်းသော မျက်ဝန်းများထဲတွင် အလင်းတန်း တစ်ခု လင်းလက်သွားခဲ့၏။ “ငါ့ရဲ့ ယွမ်ဂိုဏ်းအကြီးအကဲကို သတ်ရဲတယ်ပေါ့... ဘယ်သူကများ ဒီလောက် သတ္တိကောင်းနေလဲဆိုတာ ငါကြည့်ချင်သေးတယ်...”

ရွှေရောင် အလင်းတန်း တစ်ခုက သူ၏ မျက်ခုံးနှစ်ခုကြားမှ ထွက်ပေါ်လာပြီး သူ့အရှေ့ရှိ လေဟာနယ်ကို ချက်ချင်းပင် ဆွဲဖြဲလိုက်လေသည်။

ထို့နောက် ရွှေရောင်အလင်းတန်းသည် အရိပ်တစ်ခုအဖြစ်သို့ ပြောင်းလဲသွားကာ လေဟာနယ် အက်ကွဲကြောင်း အတွင်းသို့ တိုးဝင်သွားလေတော့သည်။

မိစ္ဆာအသံတောင်တန်းကြီး...

ရှင်းအက္ခရာ လျှို့ဝှက်ချက်ကို ရရှိလိုက်သော ရှောင်တျောင်းနှင့် မြေကမ္ဘာအူတိုင် သန့်စင်အရည်ကို ရရှိလိုက်ကြသော ဝူယွမ်နှင့် အခြားသူများသည် ဂူထဲမှ ကျေနပ်စွာဖြင့် ထွက်ခွာလာခဲ့ကြပြီး အဝေးသို့ လျှောက်သွားခဲ့ကြလေသည်။

ယခုလေးတင် တိုက်ပွဲကြီး တစ်ခု ဖြစ်ပွားခဲ့ပြီး ယွမ်ဂိုဏ်းမှ လူသုံးဦးကို သူတို့ သတ်ဖြတ်ခဲ့ကြသည် မဟုတ်းလော။

ထို့‌ေကြာင့် ဤနေရာတွင် သူတို့ အချိန်အကြာကြီး ဆက်နေ၍ မရနိုင်တော့ပေ။ ယွမ်ဂိုဏ်းသည် အရှေ့ဘက် ရွှမ်ဒေသ၏ အုပ်စိုးသူဖြစ်ပြီး ရန်စ၍ ရနိုင်သော အရာမဟုတ်ပေ။

ဝူယွမ်နှင့် အခြားသူများ ထွက်ခွာသွားပြီးသည်နှင့်တစ်ပြိုင်နက် ရွှေရောင်အလင်းတန်းများ ၀န်းရံနေသော လူရိပ်သည် မိစ္ဆာအသံတောင်တန်းကြီးဆီသို့ ရောက်ရှိလာခဲ့လေတော့သည်။