အခန်း (၁၆၈၁-၁၆၈၃)

အခန်း (၁၆၈၁) မစ်ရှင်များ အရူးအမူး ထမ်းဆောင်ခြင်း

ရာသီခွင်မိစ္ဆာများသည် နတ်ဆိုးကျင့်စဉ်ကို ကျင့်ကြံထားကြသူများဖြစ်ကြသောကြောင့် လူမကျ တစ္ဆေမကျသော အခြေအနေသို့ ရောက်ရှိနေကြသည်။ ၎င်းတို့ခန္ဓာကိုယ်အတွင်းရှိ နတ်ဆိုးစွမ်းအင်များ အလွန်မြင့်တတ်နေသောကြောင့် သာမန်နတ်ဆိုးကြီးများနှင့် ယှဉ်လျှင်ပင် အားမနည်းလှပေ။ သို့သော် ယခုအခါ ချူးယွင်ဖန်း၏ ဟုတ်သားရဲနှင့် တွေ့ဆုံချိန်တွင် ၎င်းတို့အားလုံး ကံဆိုးမိုးမှောင်ကျသွားခဲ့သည်။ ၎င်းတို့သည် ရန်သူအစစ်အမှန်နှင့် တွေ့ဆုံသွားခြင်းဖြစ်သည်။

"မင်း အကြာကြီး တောင့်ခံနိုင်မယ်လို့ ကျုပ် မယုံဘူး"

ချူးယွင်ဖန်းသည် သူ၏ ရဲဘော်အချို့ကို အချိန်တိုအတွင်း သတ်ဖြတ်လိုက်သဖြင့် ဒေါသစိတ်ကြောင့် နဂါးမိစ္ဆာ၏ မျက်လုံးများ ချက်ချင်း နီရဲလာသည်။ ချူးယွင်ဖန်းတွင် အလွန်မြင့်မားသော အသွင်ပြောင်းလဲမှု သိုင်းပညာတစ်ခုရှိနေခြင်းကို သူ မြင်တွေ့နိုင်သည်။ ၎င်းသည် တိုက်ခိုက်ရေး စွမ်းရည်ကို မြှင့်တင်ပေးနိုင်သည့် သိုင်းပညာတစ်ခုဖြစ်သည်။ ချူးယွင်ဖန်းသည် မိမိကဲ့သို့ လူမဟုတ် တစ္ဆေမဟုတ်သည့် ကြီးမားသော ဘေးထွက်ဆိုးကျိုးကို ခံစားရပုံ မပေါ်ပေ။ ထိုအချက်ကို သိလိုက်ရသည်နှင့် နဂါးမိစ္ဆာ၏ မျက်လုံးများသည် ပို၍ပင် နီမြန်းလာသည်။ သူသည် ဤကဲ့သို့ ရေနဂါးအသွင်သဏ္ဌာန်ကို ကျွမ်းကျင်ပိုင်နိုင်စေရန်အတွက် များစွာ ပင်ပန်းဆင်းရဲခံခဲ့ရ၍ မိမိကိုယ်ကိုယ် နတ်ဆိုးတစ်ကောင်အဖြစ်ပင် ပြောင်းလဲခဲ့ရသည်။ ဤဂိုဏ်းကြီးများရှိ တပည့်များသည် အတွင်းစည်းတပည့်များသာဖြစ်ကြသော်လည်း ဤမျှ ကောင်းမွန်သော နတ်ကျင့်စဉ်များကို အမှန်တကယ် ပိုင်ဆိုင်ထားနိုင်ကြသည်။

‘ဘာလို့လဲ၊ ဘာလို့လဲ’ သူ၏နှလုံးသားထဲတွင် ဒေါသနှင့် မနာလိုမှုများ လောင်မြိုက်နေသည်။

ချူးယွင်ဖန်း၏ အသွင်ပြောင်းသိုင်းပညာသည် ကြယ်ကြွေကောင်းကင်ဂိုဏ်းမှ ဆင်းသက်လာသော သိုင်းပညာဟု ထင်မှတ်သောကြောင့် နဂါးမိစ္ဆာသည် မနာလိုဖြစ်နေသည်။ ဤဂိုဏ်းကြီးများမှ တပည့်များသည် များပြားလှသော အခွင့်အရေးများရှိကြသည်။ ၎င်းတို့သည် နတ်ဆိုးလမ်းစဉ်ကို လျှောက်လှမ်းနေသည့် လေလွင့်ကျင့်ကြံသူများဖြစ်သော ၎င်းတို့နှင့် နှိုင်းယှဉ်၍မရနိုင်ပေ။

"ခင်ဗျားကို သတ်ဖို့အတွက်တော့ ကျုပ်ခွန်အားက လုံလောက်တာထက်တောင် ပိုပါသေးတယ်"

ချူးယွင်ဖန်းက လှောင်ပြုံးပြုံး၍ သူ၏ ကြီးမားသော လက်သည်းများဖြင့် မြွေမိစ္ဆာကို မြေပြင်ပေါ်သို့ ဖိချလိုက်သည်။ ပြင်းထန်သော အရှိန်အဟုန်ဖြင့် ဆွဲဖဲ့လိုက်သောအခါ ဧရာမမြွေကြီး နှစ်ပိုင်းကွဲထွက်သွားသည်။ မြွေကြီးသည် အနည်းငယ် ရုန်းကန်ပြီးနောက် မကြာမီ အသက်ရှူရပ်သွားခဲ့သည်။

ချူးယွင်ဖန်းသည် စကားပြောပြီးနောက် အရူးအမူး သတ်ဖြတ်မှုများ စတင်လိုက်သည်။ ဤရာသီခွင်မိစ္ဆာများသည် သူ၏ အရှိန်ကို မမီနိုင်သောကြောင့် ခဏအတွင်း အားလုံး အသတ်ခံလိုက်ရသည်။ အဓိကအချက်မှာ ချူးယွင်ဖန်း၏ သတ်ဖြတ်မှုနှုန်းသည် အလွန် မြန်ဆန်နေခြင်းဖြစ်သည်။ သူသည် ရန်သူတစ်ဦးကို တစ်ချက်တည်းဖြင့် သတ်ဖြတ်နိုင်သည်။ ဟုတ်သားရဲ၏ ခွန်အားကို ရင်ဆိုင်ရာတွင် ရာသီခွင်မိစ္ဆာများ နတ်ဆိုးအသွင်သို့ မပြောင်းလဲလျှင် ကိစ္စမရှိသော်လည်း နတ်ဆိုးအသွင်သို့ ပြောင်းလဲလိုက်သည်နှင့် ၎င်းတို့၏ မျိုးရိုးအရ ဖိနှိပ်ချုပ်ချယ်မှုများ ပို၍ ပြင်းထန်လာသည်။

ဟုတ်သားရဲသားရဲဟူသည် အစာကွင်းဆက်၏ ထိပ်ဆုံးတွင် ရပ်တည်နေသော ကြောက်မက်ဖွယ် ဖြစ်တည်မှုတစ်ခုဖြစ်သည်။ အတိအကျပြောရလျှင် ဤမိစ္ဆာများသည် ဟုတ်သားရဲ၏ အစာအဖြစ် သတ်မှတ်ခံထားရသူများဖြစ်သည်။ ထိုမျိုးရိုးဖိနှိပ်မှုသည် မည်မျှ ထိတ်လန့်စရာကောင်းမည်ကို ခန့်မှန်းကြည့်နိုင်သည်။ မကြာမီတွင် နဂါးမိစ္ဆာတစ်ဦးတည်းသာ ကျန်ရစ်တော့သည်။ သူသည် ဒေါသထွက်နေသော်လည်း ချူးယွင်ဖန်း၏ အရှိန်အဟုန်ကို မလိုက်နိုင်ပေ။ သူသည် ချူးယွင်ဖန်းကို ရံဖန်ရံခါ တိုက်ခိုက်နိုင်သော်လည်း တောင်မြစ်ဆေးမီးဖိုကြောင့် အချည်းနှီးသာဖြစ်ခဲ့ရသည်။ သူ၏ တိုက်ခိုက်မှုများကို ထိုဆေးမီးဖိုကြောင့် ဗလာနတ္ထိအဖြစ်သို့ ပျောက်ကွယ်သွားလေသည်။

"ရပ်စမ်း၊ ချီးပဲ" နဂါးမိစ္ဆာက ဟိန်းဟောက်လိုက်သည်။

ချူးယွင်ဖန်းက ရပ်တန့်ပြီးနောက် နဂါးမိစ္ဆာကို ကြည့်ကာ လှောင်ရယ်လိုက်သည်။

“စိတ်မပူပါနဲ့၊ အခု ခင်ဗျားအလှည့်ပဲ"

နဂါးမိစ္ဆာသည် အရှေ့သို့ ဟိန်းဟောက်၍ ပြေးဝင်လာစဉ် ဟုတ်သားရဲအသွင် ပြောင်းလဲထားသော ချူးယွင်ဖန်းက မတ်တတ်ရပ်၍ အံ့ဖွယ်လက်သီးရှစ်ချက်ကို ထုတ်လွှတ်လိုက်သည်။

ဘန်း

နဂါးမိစ္ဆာ ပြင်းထန်စွာ လွင့်ထွက်သွားသည်။ သူ၏ ခန္ဓာကိုယ်တစ်ခုလုံး သွေးများဖြင့် ဖုံးလွှမ်းသွား၍ အကြေးခွံများလည်း ကြေမွသွားသည်။ သူသည် ဒဏ်ရာ အလွန်ပြင်းထန်သော အခြေအနေသို့ ရောက်ရှိသွားသည်။ တစ်ချက်တည်းသော တိုက်ခိုက်မှုဖြင့် အခြားရာသီခွင်မိစ္ဆာများ ချူးယွင်ဖန်းအရှေ့တွင် အဘယ်ကြောင့် ဤမျှ အားနည်းနေရသည်ကို နဂါးမိစ္ဆာ နားလည်သွားသည်။ ၎င်းတို့သည် အမှန်တကယ်ပင် အဆင့်အတန်းချင်း မတူညီကြပေ။

အခြားရာသီခွင်မိစ္ဆာများသည် ဒြမ်မဲ့ကျွမ်းကျင်အဆင့်သို့ပင် မရောက်သေးသောကြောင့် ဤမျှ ကြောက်မက်ဖွယ်ကောင်းသော ချူးယွင်ဖန်းကို မည်သို့မျှ တားဆီးနိုင်ကြမည်နည်း။ ချူးယွင်ဖန်း အဘယ်ကြောင့် ဤမျှသန်မာနေသည်ကို မသိသော်လည်း သူသည် ယခုကဲ့သို့ အရှုံးပေးရန် ဆန္ဒမရှိပေ။ ချူးယွင်ဖန်းသည် ဤအသွင်သဏ္ဌာန်ကို အချိန်ကြာကြာ ထိန်းချုပ်ထားနိုင်မည်မဟုတ်ကြောင်း သူ သိနေသည်။ ထို့ကြောင့် ချူးယွင်ဖန်း၏ အသွင်ပြောင်းလဲမှု ပြီးဆုံးသွားသည့်အချိန်အထိ သူ အချိန်ဆွဲရန် ကြံစည်လိုက်သည်။ သို့သော် ချူးယွင်ဖန်းသည် သူ့ကို ထို့သို့သော အခွင့်အရေးမျိုးပေးမည် မဟုတ်ပေ။ ချူးယွင်ဖန်း​၏ ကြီးမားသော ခန္ဓာကိုယ်သည် လေပေါ်သို့ မြင့်တတ်သွားပြီးနောက် အောက်သို့ ပြင်းထန်စွာ နင်းချလာသည်။

"ငရဲကိုးထပ်ခြေလှမ်း"

အဆုံးမဲ့သော ငရဲပြည်၏ ရေလှိုင်းများ ထိုနင်းချက်နှင့်အတူ ထွက်ပေါ်လာ၍ နဂါးမိစ္ဆာကို ပြင်းထန်စွာ လွှမ်းခြုံသွားသည်။

ဘန်း

နဂါးမိစ္ဆာသည် မတ်တတ်ထရန် ပြင်ဆင်နေချိန် ကြီးမားသော ကျင်းကြီးတစ်ခုဖြစ်သွားသည်အထိ မြေကြီးထဲသို့ နင်းချခံလိုက်ရသည်။ ထိုအခါ သူ့ခန္ဓာကိုယ်ရှိ အရိုးအားလုံး ကျိုးကြေသွားသည်။ အံ့ဖွယ်လက်သီးရှစ်ချက်နှင့် ငရဲကိုးထပ်ခြေလှမ်းသည် နဂါးမိစ္ဆာ ခုခံနိုင်သော သာမန်သိုင်းပညာများ မဟုတ်ကြပေ။ ထိုကဲ့သို့သော သိုင်းပညာများနှင့် နှိုင်းယှဉ်လျှင် နဂါးမိစ္ဆာ သင်ယူထားသော သိုင်းပညာများသည် အမှိုက်များသရိုက်များဖြစ်ကြသည်။

"ကျုပ် လက်မခံဘူး"

နဂါးမိစ္ဆာသည် ရုန်းထရန် ကြိုးစားသော်လည်း လေထဲတွင် ဓားအလင်းရောင်တစ်ခု ပေါ်ပေါက်လာကြောင်း မြင်တွေ့လိုက်ရသည်။ ထိုဓားအလင်းရောင်သည် လျှပ်စီးများဖြင့် တဖျတ်ဖျတ် တောက်ပနေ၍ သူ၏ဦးခေါင်းကို ချက်ချင်းပင် ဖြတ်တောက်ပစ်လိုက်သည်။ နဂါးမိစ္ဆာ၏ အလွန်ကြီးမားသော နဂါးခေါင်းကြီးပေါ်ရှိ မျက်လုံးများ ပြူးကျယ်နေဆဲဖြစ်သည်။ သူသည် အခြေအနေကို မယုံကြည်နိုင်ဖြစ်နေပုံပေါ်သည်။ ဤသေးနုတ်သော အတွင်းစည်းတပည့်သည် အလွန်ကြောက်မက်ဖွယ်ကောင်းလှသည်။ အမျိုးမျိုးသော နတ်သိုင်းပညာများနှင့် ထူးခြားသော စွမ်းရည်များသည် နဂါးမိစ္ဆာကို မျက်စိလည်သွားစေရန် လုံလောက်ပေသည်။ သူသည် အမှန်တကယ် ရှုံးနိမ့်သွားခဲ့သည်။ အကယ်၍ ဤအခြေအနေကို ကြိုသိခဲ့လျှင် ကြယ်ကြွေကောင်းကင်ဂိုဏ်း၏ အနီးအနားသို့ ထွက်ပြေးလာခဲ့မည် မဟုတ်ပေ။

နဂါးမိစ္ဆာကို သတ်ပြီးနောက် ချူးယွင်ဖန်းသည် လူသားအသွင်သို့ ပြန်ပြောင်းလိုက်သည်။ သူ၏ ခန္ဓာကိုယ်သည် ချွေးများဖြင့် စိုရွှဲနေသည်။ ဟုတ်သားရဲအဖြစ် အသွင်ပြောင်းခြင်းသည် စွမ်းအင်များစွာ ကုန်ဆုံးစေသော်လည်း ယခင်အကြိမ်နှင့် နှိုင်းယှဉ်လျှင် စွမ်းအင်ကုန်ဆုံးမှုများ ပို၍နည်းပါးလာသည်။ သူ၏ ခွန်အား တိုးတက်လာ၍ အတွေ့အကြုံများ တိုးပွားလာသည်။ သို့သော် ဤသည်မှာ ချူးယွင်ဖန်း၏ ဝှက်ဖဲဖြစ်သောကြောင့် အခြားလူများအရှေ့တွင် အလွယ်တကူ ထုတ်ဖော်ပြသမည် မဟုတ်ပေ။

မည်သို့ဆိုသော် သူ့တွင် ရန်သူ အလွန်များပြားလွန်းသဖြင့် ရန်သူများကို အလစ်အငိုက် ဖမ်းဆီးရန် လိုအပ်သည်။ အကယ်၍ အခြားလူများသာ သူ၏ဝှက်ဖဲကို သိရှိသွားပါက ပစ်မှတ်ထားခြင်း ခံရနိုင်ပေသည်။ ချူးယွင်ဖန်းသည် တာဝန်ပြီးမြောက်ကြောင်း သက်သေအဖြစ် လူသားအသွင် ပြန်ပြောင်းသွားသော ရာသီခွင်မိစ္ဆာများ၏ ဦးခေါင်းများကို ဖြတ်ယူလိုက်သည်။ ပြီးနောက် လွန်းပျံယာဥ်တစ်ခုလုံးကို မီးရှို့ပစ်လိုက်သည်။ နတ်ဆိုးများ ကျက်စားရာ အသိုက်အမြုံသည် တဟုန်းဟုန်းတောက်လောင်နေသော မီးတောက်များအတွင်း ပြာအဖြစ်သို့ ပြောင်းလဲသွားလေသည်။

တာဝန်ပြီးဆုံးပြီးနောက် ချူးယွင်ဖန်းသည် ဂုဏ်ပြုမှတ်တမ်းဆောင်သို့ အမြန်ပြန်သွားခဲ့ရာ အစောပိုင်းက တပည့်နှင့်ပင် တွေ့ဆုံခဲ့သည်။ ချူးယွင်ဖန်းသည် တစ်ရက်ပင် မပြည့်သေးဘဲ ပြန်ရောက်လာကြောင်း မြင်သောအခါ ထိုတပည့်သည် သူ၏အတွေးများ မှန်ကန်သည်ဟု ထင်မှတ်သွားသည်။ ချူးယွင်ဖန်းသည် ကြိုတင်စုံစမ်းစစ်ဆေးမှု မပြုလုပ်ခဲ့ဘဲ လက်လျှော့၍ ပြန်လာခြင်းဖြစ်မည်ဟု သူ သတ်မှတ်လိုက်သည်။ မည်သို့ပင်ဆိုစေကာမူ ရာသီခွင်မိစ္ဆာများကို တစ်ရက်အတွင်း ရှာဖွေခြင်းသည် မလွယ်ကူလှပေ။

"ဘယ်လိုလဲ။ မစ်ရှင်ကို လက်လျှော့တော့မှာလား" ထိုတပည့်က မေးလိုက်သည်။

"မဟုတ်ပါဘူး၊ မစ်ရှင်ပြီးမြောက်ကြောင်း လာသတင်းပို့တာ" ချူးယွင်ဖန်းက စကားပြောနေစဥ် ရာသီခွင်မိစ္ဆာများ၏ ဦးခေါင်းများကို ကောင်တာပေါ်သို့ ပစ်တင်လိုက်သည်။

"ဘာ။ မစ်ရှင်ပြီးဆုံးပြီ ဟုတ်လား" ထိုတပည့်သည် ချူးယွင်ဖန်းကို အံ့အားသင့်စွာ စိုက်ကြည့်လိုက်သည်။

သူသည် အတည်ပြုရန်အတွက် ဦးခေါင်းများကို ချက်ချင်း ယူသွားလေသည်။ တပည့်သည် ခဏအကြာတွင် ရလဒ်များနှင့်အတူ ပြန်ထွက်လာသည်။ ၎င်းတို့သည် အမှန်တကယ်ပင် ရာသီခွင်မိစ္ဆာများ၏ ဦးခေါင်းများဖြစ်ကြသည်။ ထိုတပည့်သည် ချူးယွင်ဖန်းကို အံ့ဩတုန်လှုပ်စွာ ကြည့်နေမိသည်။ ချူးယွင်ဖန်းသည် ဤအတွင်းစည်းတပည့်အနက် အထူးချွန်ဆုံးတပည့်များပင် မလုပ်ဆောင်နိုင်သည့် တာဝန်ကို အမှန်တကယ် လုပ်ဆောင်နိုင်ခဲ့သည်။

"စီနီယာ၊ မစ်ရှင်ကို အတည်ပြုပြီးပါပြီ။ ဒီမှာ အလယ်အလတ်အဆင့် ဝိညာဉ်ကျောက်တုံး ၁၀၀၀ ပါ"

ထိုတပည့်သည် အိတ်တစ်အိတ်ကို အမြန်လက်ကမ်းပေးလိုက်သည်။ ထိုအိတ်ထဲတွင် အလယ်အလတ်အဆင့် ဝိညာဉ်ကျောက်တုံး ၁၀၀၀ ရှိနေသည်။ ချူးယွင်ဖန်းသည် အိတ်ကို လက်ခံပြီးနောက် လည်ပတ်နေသော မစ်ရှင်ဘုတ်ပြားကို ညွှန်ပြ၍ ပြောလိုက်သည်။ "ကျေးဇူးပြုပြီး၊ ဒီမစ်ရှင် ကျုပ်ကို ပေးပါ၊ ပြီးတော့ ဒါကိုရောပဲ"

အခန်း (၁၆၈၂) နှစ်လတာကာလ၊ ကျင့်ကြံမှု ပြီးပြည့်စုံခြင်း

မျက်စိတစ်မှိတ်အတွင်း နှစ်လကုန်လွန်သွားခဲ့သည်။ စည်ကားနေသော ဂုဏ်ပြုမှတ်တမ်းဆောင် အပြင်ဘက်တွင် ပုံရိပ်တစ်ခု ဖြည်းညင်းစွာ လမ်းလျှောက်လာသောကြောင့် ဂုဏ်ပြုမှတ်တမ်းဆောင်ရှိ တပည့်များစွာ ချက်ချင်း အာရုံစိုက်လာကြသည်။

"အနောက်တောင်တန်း မိစ္ဆာအိုကြီးကို သတ်ဖြတ်တဲ့ မစ်ရှင် ပြီးဆုံးပါပြီ" ချူးယွင်ဖန်းသည် မစ်ရှင်ပြီးမြောက်မှုများကို မှတ်တမ်းတင်နေသည့် တပည့်ထံသို့ လမ်းလျှောက်၍ ရုပ်ဆိုးလှသော ဦးခေါင်းတစ်ခုကို လက်ကမ်းပေးလိုက်သည်။

ထိုတပည့်သည် ခေတ္တမှင်သက်သွားပြီးနောက် အလျင်အမြန် ပြန်ပြောလာသည်။

"ကျွန်တော်တို့ အခုချက်ချင်း အတည်ပြုပေးပါ့မယ်"

အားလုံးက ဝိုင်းကြည့်နေကြသည်။ ဤနှစ်လအတွင်း ချူးယွင်ဖန်း၏ အမည်သည် ဂုဏ်ပြုမှတ်တမ်းဆောင်တွင် အလွန်ကျော်ကြားနေခဲ့သည်။ သူသည် မစ်ရှင်များ အရူးအမူး လုပ်ဆောင်သူတစ်ဦးဖြစ်သည်။ နှစ်လအတွင်း သူသည် ရာနှင့်ချီသော မစ်ရှင်များကို ဆောင်ရွက်နိုင်ခဲ့သည်။ သူသည် ပျမ်းမျှအားဖြင့် တစ်ရက်လျှင် မစ်ရှင်တစ်ခု ပြီးမြောက်အောင် လုပ်ဆောင်ခြင်းဖြစ်ရာ ၎င်းသည် သာမန်အတွင်းစည်းတပည့်တစ်ဦး နှစ်ပေါင်းများစွာကြာ ထမ်းဆောင်ရမည့် မစ်ရှင်များနှင့် ညီမျှပေသည်။ ဤသည်မှာ အလွန်ပင် ထိတ်လန့်ဖွယ်ကောင်းလှသည်။

ကနဦးတွင် ချူးယွင်ဖန်းကို လူအများအပြား မသိကြသော်လည်း ဤဖြစ်ရပ်များအပြီးတွင် အတွင်းစည်းတပည့်များအနက် မစ်ရှင်များ အရူးအမူး လုပ်ဆောင်သူတစ်ဦးရှိနေကြောင်း လူတိုင်း သိသွားကြသည်။ ထိုမစ်ရှင်များထဲတွင် ဒြမ်မဲ့ကျွမ်းကျင်အဆင့် ကျင့်ကြံသူများ ပါဝင်နေသဖြင့် အတွင်းစည်းတပည့်များ လက်မခံရန် တားမြစ်ထားသော မစ်ရှင်များပါရှိသည်။ ပုံမှန်အားဖြင့် ဤမစ်ရှင်များကို အထူးချွန်ဆုံးတပည့်များသာ လုပ်ဆောင်လေ့ရှိသော်လည်း ချူးယွင်ဖန်းက ၎င်းတို့ကို လက်ခံခဲ့သည်အပြင် အားလုံးကို ပြီးမြောက်အောင် လုပ်ဆောင်နိုင်ခဲ့သည်။

ဤဖြစ်စဥ်သည် ထိုလူများအတွက် မည်မျှ ထိတ်လန့်စရာကောင်းမည်ကို ခန့်မှန်းကြည့်နိုင်သည်။ အချို့က တွက်ချက်ကြည့်ကြရာ လွန်ခဲ့သော နှစ်လအတွင်း ချူးယွင်ဖန်းသည် အမျိုးမျိုးသော မစ်ရှင်များမှ အလယ်အလတ်အဆင့် ဝိညာဉ်ကျောက်တုံး ၂၀၀၀၀၀ ကျော် ရရှိခဲ့သည်ဟု ဆိုကြသည်။ သူသည် ယခုအခါ အလွန်ချမ်းသာသူဖြစ်သည်။ အလယ်အလတ်အဆင့် ဝိညာဉ်ကျောက်တုံး ၂၀၀၀၀၀ ဟူသည် အပြင်စည်းတပည့်များအတွက် မတွေးဝံ့ဖွယ် ချမ်းသာကြွယ်ဝမှုဖြစ်သည်။

၎င်းသည် အတွင်းစည်းတပည့်များအတွက်လည်း များပြားလှသော ပမာဏဖြစ်သည်။ အထူးချွန်ဆုံးတပည့်များအတွက်ပင် ထိုမျှများပြားသော ဝိညာဉ်ကျောက်တုံး ပမာဏသည် အမြင်ပြောင်းလဲစေရန် လုံလောက်ပေသည်။ ချူးယွင်ဖန်းနှင့် ပတ်သက်သော သတင်းအမျိုးမျိုး ပျံ့နှံ့နေသည်။ လူများစွာသည် သူနှင့်ပတ်သက်သော အကြောင်းအရာအမျိုးမျိုးကို ဆွေးနွေးနေကြသည်။ သူ၏ အရှိန်အဝါကြောင့် အချို့လူများသည် ဂုဏ်ပြုမှတ်တမ်းဆောင်၏ မစ်ရှင်သတ်မှတ်ချက် စံနှုန်းများကိုပင် သံသယဝင်လာကြသည်။ အတွင်းစည်းတပည့်များ လက်မခံရန် သတ်မှတ်ထားသော မစ်ရှင်များစွာသည် အတွင်းစည်းတပည့်များ လုပ်ဆောင်နိုင်မည်ဟု ၎င်းတို့ တွေးထင်လာကြသည်။

ချူးယွင်ဖန်းကဲ့သို့ အထူးချွန်ဆုံးတပည့်များ၏ မစ်ရှင်များကို လက်ခံရန် ကြိုးစားသော ဝါရင့်အတွင်းစည်းတပည့်များစွာ ရှိခဲ့သော်လည်း ရလဒ်အနေဖြင့် ၎င်းတို့အားလုံး ပြင်းထန်စွာ အထိနာသွားကြသည်။ ၎င်းတို့သည် ထိုမစ်ရှင်များကို ပြီးမြောက်အောင် လုပ်ဆောင်နိုင်စွမ်း လုံးလုံးလျားလျား မရှိကြပေ။ လူများစွာသည် ထွက်ပြေးရန်ပင် မစွမ်းဆောင်နိုင်ဘဲ မစ်ရှင်ဆောင်ရွက်နေစဉ် ပျက်သုဥ်းသွားကြသည်။

ဤအချက်သည် လူများစွာကို လက်လျှော့သွားစေသည်။ ဂုဏ်ပြုမှတ်တမ်းဆောင်၏ တာဝန်သတ်မှတ်ချက် စံနှုန်းများတွင် ပြဿနာရှိနေခြင်း မဟုတ်ဘဲ ချူးယွင်ဖန်းတွင် မစ်ရှင်များကို ပြီးမြောက်အောင် လုပ်ဆောင်နိုင်သည့် ထူးခြားသော အရည်အချင်းများရှိနေခြင်းဖြစ်ကြောင်း လူတိုင်း နားလည်သွားကြသည်။ သို့သော်လည်း ၎င်းကို အထောက်အထားဖြင့် သက်သေပြရန် မည်သူမျှ မပြုလုပ်နိုင်ကြပေ။ ချူးယွင်ဖန်းသည် အရာအားလုံးကို သေချာ ကိုင်တွယ်ဖြေရှင်းကာ မည်သည့်အစအနမျှ ချန်မထားခဲ့ပေ။ ထို့ကြောင့် ချူးယွင်ဖန်းတွင် တောင်မြစ်ပန်းချီကားရှိနေကြောင်းနှင့် ဟုတ်သားရဲအဖြစ် အသွင်ပြောင်းနိုင်သည့် စွမ်းရည်ရှိခြင်းကို မည်သူမျှ မသိရှိကြပေ။

ချူးယွင်ဖန်းသည် သူ၏ မစ်ရှင်တိုင်းတွင် အမြဲတမ်း အောင်မြင်ခဲ့သူဖြစ်သည်။ လူအများအပြားသည် သူ၏ ကျင့်ကြံမှုအဆင့်ကို ကြည့်ကာ သူ့ကို အထင်သေးလေ့ရှိကြသည်။ ထိုအခါ ၎င်းတို့သည် သူ၏ တစ်ချက်တည်းသော တိုက်ခိုက်မှုဖြင့် သတ်ဖြတ်ခံလိုက်ရသည်။ ဤအချက်သည်လည်း ချူးယွင်ဖန်းသည် မစ်ရှင်များကို ဤမျှ မြန်မြန်ဆန်ဆန် ပြီးမြောက်နိုင်သည့် အကြောင်းရင်းတစ်ခုဖြစ်သည်။ သူသည် ကြယ်ကြွေကောင်းကင်ဂိုဏ်းနှင့် နီးစပ်သော ပြည်နယ်များရှိ အမဲလိုက်မစ်ရှင်အမျိုးမျိုးကို ပြီးမြောက်အောင် လုပ်ဆောင်ခဲ့သော်လည်း ဝေးလံသော အရပ်ဒေသများသို့ သွားရောက်ခြင်း မရှိခဲ့ပေ။ သူ၏ မစ်ရှင်ပြီးမြောက်မှု စွမ်းရည်သည် အလွန်မြင့်မားလှသဖြင့် လူများ အချိန်မီတုံ့ပြန်ရန် ခက်ခဲလှသည်။

မကြာမီတွင် ဂုဏ်ပြုမှတ်တမ်းဆောင်၏တပည့်သည် အတည်ပြုခြင်းလုပ်ငန်းစဉ်ကို အပြီးသတ်ကာ ချူးယွင်ဖန်းထံ အိတ်တစ်အိတ် ပေးလိုက်သည်။

"စီနီယာချူး၊ ဒီထဲမှာ အလယ်အလတ်အဆင့် ဝိညာဉ်ကျောက်တုံး ၂၀၀၀ ရှိပါတယ်။ ဒါက အနောက်တောင်တန်း မိစ္ဆာအိုကြီးကို သတ်ဖြတ်မှုအတွက် ဆုလာဘ်ပါ"

"ကျေးဇူးပါ" ချူးယွင်ဖန်းက ခေါင်းငြိမ့်ပြကာ ဝိညာဉ်ကျောက်တုံးများကို လက်ခံလိုက်သည်။

ထိုနေရာရှိ အပြင်စည်းနှင့် အတွင်းစည်းတပည့်အများအပြားသည် အားကျသော မျက်နှာထားများရှိနေကြသည်။ လူအများ၏ အမြင်တွင် ချူးယွင်ဖန်း​၏အပြုအမူသည် သူဌေးကြီးတစ်ဦး၏ အနေအထားမျိုးဖြစ်သည်။ သို့သော် သူ၏ အိတ်ကပ်ထဲတွင် ဗလာနတ္တိဖြစ်နေခြင်းကိုမူ ၎င်းတို့ မသိကြပေ။ သူသည် ဝိညာဉ်ကျောက်တုံးများကို လျင်မြန်စွာ ရှာဖွေနိုင်သော်လည်း သုံးစွဲရာတွင်လည်း ထိုမျှပင် လျင်မြန်လှသည်။ သူ ရရှိခဲ့သော ဝိညာဉ်ကျောက်တုံးအားလုံးသည် ရရှိသည်နှင့် တစ်ပြိုင်နက် ကုန်ဆုံးသွားလေ့ရှိသည်။ သူသည် ၎င်းတို့ကို ကောင်းကင်နတ်ဆိုးဆေးလုံး ဖော်စပ်ရန်အတွက် ဆေးဖက်ဝင်အပင်များ ဝယ်ယူရန် သို့မဟုတ် ကိုယ်တိုင် ကျင့်ကြံရန်အတွက် အသုံးပြုခဲ့သည်။ ဆေးဖက်ဝင်အပင်တောင်တန်းကို ထိန်းသိမ်းခြင်း၊ ဗြဟ္မာသစ်ပင် ကြီးထွားလာစေရန် ပြုလုပ်ခြင်း စသည်တို့လည်း ရှိနေသေးသည်။ ဤအရာအားလုံးအတွက် အလယ်အလတ်အဆင့် ဝိညာဉ်ကျောက်တုံး အမြောက်အမြား လိုအပ်သည်။ ထို့ကြောင့် ဤအလယ်အလတ်အဆင့် ဝိညာဉ်ကျောက်တုံး ၂၀၀၀ မှလွဲလျှင် ချူးယွင်ဖန်းတွင် မည်သည်မျှ မကျန်ရစ်ပေ။

လူအများကို ထူးဆန်းစေသည့်အချက်မှာ မစ်ရှင်အရူးအမူး လုပ်ဆောင်သူသည် ဤမစ်ရှင်အပြီးတွင် အခြားမစ်ရှင်တစ်ခုကို ထပ်မံ လက်မခံတော့ခြင်းဖြစ်သည်။ ဤသည်မှာ လူများစွာကို မှင်သက်သွားစေသည်။ ဤဖြစ်ရပ်သည် ၎င်းတို့စိတ်ထဲရှိ ချူးယွင်ဖန်းနှင့် ကိုက်ညီမှု မရှိပေ။

'ကောင်းကင်နတ်ဆိုးဆေးလုံး ဖော်စပ်ဖို့ အချိန်တန်ပြီ'

သူသည် လွန်ခဲ့သည့် နှစ်လအတွင်း မစ်ရှင်များကို အရူးအမူး လက်ခံခဲ့သည်။ ၎င်းသည် ဝိညာဉ်ကျောက်တုံး ၂၀၀၀၀၀ ရရှိရန်သာ မဟုတ်ပေ။ ထိုမစ်ရှင်များသည် မိမိကိုယ်ကို စစ်ဆေးသည့် သဘောလည်း သက်ရောက်ပေသည်။ ဤသည်မှာ မစ်ရှင်များစွာအနက် ဒြမ်မဲ့ကျွမ်းကျင်အဆင့် ကျင့်ကြံသူများကို သတ်ဖြတ်ရသည့် မစ်ရှင်များကိုသာ ရွေးချယ်ခဲ့ရသည့် အကြောင်းရင်းဖြစ်သည်။

ဤသည်မှာ သူ့အတွက် အလွန်ရှားပါးသော အတွေ့အကြုံဖြစ်သည်။ အချို့အရာများစွာကို တိုက်ပွဲအတွင်းသာ နားလည်သဘောပေါက်နိုင်သည်။ တိုက်ပွဲတွင် မဟုတ်ပါက ၎င်းကို နားလည်ရန် မဖြစ်နိုင်ပေ။ အမျိုးမျိုးသော သိုင်းပညာများကို ကျွမ်းကျင်လာပြီးနောက် သူသည် တောင်မြစ်ဆေးမီးဖိုကို အသုံးပြုရာတွင် ပိုပို၍ ကျွမ်းကျင်လာခဲ့သည်။ အရေးကြီးဆုံးအချက်မှာ ဟုတ်သားရဲအဖြစ် အသွင်ပြောင်းလဲနိုင်သည့် အရှိန်နှုန်း တဖြည်းဖြည်း မြင့်တက်လာ၍ ထိုအသွင်သဏ္ဌာန်ကို ပိုမိုကြာရှည်စွာ ထိန်းထားနိုင်လာခြင်းဖြစ်သည်။ မူလက ဆယ်မိနစ်ခန့်သာ ထိန်းထားနိုင်သော်လည်း ယခုအခါ ဆယ့်ငါးမိနစ်အထိ ထိန်းထားနိုင်ပြီဖြစ်သည်။ ဟုတ်သားရဲ၏ ခွန်အားအပေါ် သူ၏ ထိန်းချုပ်နိုင်မှုသည် များစွာတိုးတက်လာသည်။ ဤအရာများသည် ဝယ်ယူ၍မရနိုင်သော အတွေ့အကြုံများဖြစ်သည်။

ထိုကဲ့သို့သော အခြေအနေမျိုးတွင် သူ၏ ကျင့်ကြံမှုသည် နှောင်းပိုင်းဒြမ်မဲ့အဆင့်သို့ ရောက်ရှိလာသည်။ ယခုအခါ သူသည် နောက်ထပ် ခြေတစ်လှမ်း တက်လှမ်းရန် အချိန်ကျရောက်ပြီဖြစ်၍ အတွင်းစည်းတပည့် ပြိုင်ပွဲသည်လည်း နှစ်လသာ လိုအပ်တော့သည်။

'ငါ သေချာပေါက် ချန်ပီယံဖြစ်မှရမယ်။ ချန်ပီယံ မဖြစ်နိုင်ရင် ဝင်ပြိုင်နေလည်း ဘာအဓိပ္ပာယ်မှ မရှိဘူး' ချူးယွင်ဖန်းက တွေးလိုက်သည်။

လွန်ခဲ့သော နှစ်လတွင် ငြိမ်းချမ်းမှုဟူ၍ မရှိခဲ့ပေ။ မှန်ကန်စွာပြောရမည်ဆိုလျှင် ကြယ်ကြွေကောင်းကင်ဂိုဏ်း၏ အတွင်းနှင့် အပြင်တွင် လှုပ်ခတ်မှုများစွာရှိခဲ့သည်။ ချူးယွင်ဖန်းသည် ချောင်းမြောင်းတိုက်ခိုက်ခံရသည့် အကြိမ်အရေအတွက်ကိုပင် မမှတ်မိတော့ပေ။

ချူးယွင်ဖန်းတွင် ခရမ်းရောင်မိုးကြိုးဓားဂိုဏ်း၏ အမွေအနှစ်များ ရှိနေနိုင်သည်ဟူသော သတင်းများ ပျံ့နှံ့သွားပြီးနောက် လူများစွာသည် မနာလိုဖြစ်လာကြသည်။ လှုပ်ရှားမှု မပြုနိုင်သူများစွာ ရှိသော်လည်း အလိုရှိစာရင်းတွင် ပါဝင်နေသူများစွာသည် နည်းလမ်းအမျိုးမျိုးဖြင့် ချူးယွင်ဖန်းကို လိုက်လံ ရှာဖွေနေကြသည်။ ထိုလူများ၏ နောက်ကွယ်တွင် မည်သူရှိနေသည်ကို အခြားလူများ မသိသော်လည်း ၎င်းတို့သည် ချူးယွင်ဖန်း၏ တံခါးကို တစ်ယောက်ပြီးတစ်ယောက် လာခေါက်ခဲ့ကြသည်။

သို့သော် ချူးယွင်ဖန်းသည် ရောက်ရှိလာသူ အားလုံးကို သတ်ပစ်ခဲ့သည်။ ၎င်းတို့အနက် လူအများအပြားသည် အလိုရှိစာရင်းတွင် ပါဝင်သော ဓားပြများဖြစ်ကြသည်။ ဤဖြစ်စဥ်ကြောင့် သူ၏ မစ်ရှင်များသည် လွယ်ကူမြန်ဆန်စွာ ပြီးမြောက်သွားလေသည်။

အခန်း (၁၆၈၃) ကောင်းကင်နတ်ဆိုးဆေးလုံး ဖော်စပ်ခြင်းနှင့် သီးသန့်ကျင့်ကြံခြင်း

ချူးယွင်ဖန်းသည် နှစ်လအတွင်း မစ်ရှင်ပေါင်း တစ်ရာကျော်ကို ပြီးမြောက်ခဲ့ရာ ၎င်းအနက် ထက်ဝက်ခန့်သည် ဤနည်းလမ်းကြောင့်ဖြစ်သည်။ ထိုသူများထဲတွင် အလွန်အစွမ်းထက်သော ကျွမ်းကျင်သူများ ပါဝင်သောကြောင့် ဟုတ်သားရဲအဖြစ် ပြောင်းလဲထားသော ချူးယွင်ဖန်းပင် ၎င်းတို့ကို တိုက်ရိုက်ရင်ဆိုင်နိုင်စွမ်း မရှိခဲ့ပေ။ သို့သော် သူသည် ထိပ်တိုက်ရင်ဆိုင်ခြင်း မပြုလုပ်ဘဲ တောင်မြစ်ပန်းချီကားထဲတွင် ပုန်းအောင်းနေခဲ့သည်။ သူ ပန်းချီကားထဲတွင် ပုန်းအောင်းနေလျှင် မည်သူကမျှ သူ့ကို ရှာတွေ့နိုင်မည် မဟုတ်ပေ။

ဤနှစ်လအတွင်း ချူးယွင်ဖန်းသည် သူ၏ ကျင့်ကြံမှုများ ခိုင်မာလာစေရန် ကြိုးစားအားထုတ်ခဲ့သောကြောင့် ယခုအခါ ရလဒ်များကို ရယူရန် အချိန်တန်ပြီဖြစ်သည်။ ချူးယွင်ဖန်းသည် ကြယ်ကြွေကောင်းကင်ဂိုဏ်းရှိ သူ၏ နေအိမ်သို့ ပြန်သွားကာ တောင်မြစ်ပန်းချီကားထဲသို့ ဝင်လိုက်သည်။ လွန်ခဲ့သော နှစ်လအတွင်း နည်းလမ်းအမျိုးမျိုးဖြင့် ဝယ်ယူခဲ့သော ဆေးဘက်ဝင်အပင်များသည် တောင်တစ်ခုသဖွယ် ပုံအောင်းနေသည်။

ဂုဏ်ပြုမှတ်တမ်းဆောင်၏ စနစ်ကို အသုံးပြု၍ သူ​၏လိုအပ်ချက်များကို အမည်မဖော်ဘဲ အခြားလူများကို ထိုဆေးပင်များ စုဆောင်းခိုင်းခဲ့သည်။ သူသည် ယခုအခါ လူအများ၏ ပစ်မှတ်ဖြစ်နေသည့်အပြင် ထိုကောလာဟလများကြောင့် လူအများက သူ့ကို ပြဿနာရှာရန် ဝန်လေးနေမည် မဟုတ်ပေ။ ချူးယွင်ဖန်းသည် ထိုသို့သော အခြေအနေမျိုးတွင် အလွန်သတိထားရမည်ဖြစ်သည်။ ကောင်းကင်နတ်ဆိုးဆေးလုံး ဖော်စပ်ရာတွင် လုံးလုံးလျားလျား ကျရှုံးရန် မဖြစ်ပေ။ ထို့ကြောင့် သူသည် မစ်ရှင်များကို အမည်မဖော်ဘဲ တင်၌ ဆေးဘက်ဝင်အပင်များကို တစ်ခုပြီးတစ်ခု ဝယ်ယူခဲ့ခြင်းဖြစ်သည်။

ချူးယွင်ဖန်းသည် လက်ကို ဆန့်ထုတ်၍ တောင်မြစ်အိုး(ဆေးမီးဖို) ကို ဆင့်ခေါ်လိုက်သောအခါ ၎င်းက သူ့အရှေ့သို့ တိတ်ဆိတ်စွာ ပျံဝဲလာသည်။ ဆေးမီးဖိုပေါ်ရှိ ရှေးကျ၍ ရှုပ်ထွေးလှသော အင်းစာလုံးများကို ကြည့်နေစဥ် ၎င်းသည် အချိန်မည်မျှကြာအောင် ဆေးကြောသန့်စင်မှု ခံယူခဲ့သနည်းဟု သူ စဉ်းစားနေမိသည်။

သူသည် လက်ဟန်တစ်ခု ပြုလုပ်လိုက်သောအခါ လေဟာနယ်ထဲမှ မီးတောက်တစ်ခု ထွက်ပေါ်လာသည်။ ၎င်းသည် သူ ကျင့်ကြံထားသော ဆေးဖော်စပ်ရာတွင် အသုံးပြုသည့် မီးတောက်ဖြစ်သည်။ မီးတောက်၏ အရောင်သည် နှင်းများကဲ့သို့ ဖြူဖွေးနေသော်လည်း နှင်းများ မဟုတ်ပေ။ ဆန့်ကျင်ဘက်အနေဖြင့် ၎င်း၏ အပူချိန်သည် အလွန် မြင့်မားလှသည်။ ကျင့်ကြံမှု အဆင့်မြင့်မားသော ဆေးပညာရှင်တစ်ဦးဖြစ်သည့် ချူးယွင်ဖန်းသည် ဆေးလုံးဖော်စပ်ရန် သာမန်မီးတောက်များကို အသုံးပြုမည် မဟုတ်ပေ။

ချူးယွင်ဖန်းသည် သူ၏ မှတ်ဉာဏ်ထဲရှိ ကောင်းကင်နတ်ဆိုးဆေးလုံး ဖော်စပ်နည်းအတိုင်း ဆေးမီးဖိုထဲသို့ ဆေးပင်များကို စတင်ထည့်သွင်းလိုက်သည်။ သူ၏ နတ်စွမ်းအင် ထက်ဝက်ခန့်သည် မိနစ်ပိုင်းအတွင်း ကုန်ဆုံးသွားခဲ့သည်။ ဤဆေးဖော်စပ်ခြင်း မီးတောက်ကို ထိန်းသိမ်းခြင်းသည် နတ်စွမ်းအင်ကို အလွန်ကုန်ဆုံးစေသဖြင့် ကုသဆေးအချို့ကို အလျင်အမြန် မျိုချလိုက်သည်။ ပြန်လည်ဖြည့်တင်းမှုနှုန်းသည် သုံးစွဲမှုနှုန်းနှင့် ညီမျှသွားကြောင်း ခံစားလိုက်ရသောအခါ သူ စိတ်အေးသွားသည်။

ဤသည်မှာ တောင်မြစ်ဆေးမီးဖိုကို အသုံးပြု၍ ဆေးဖော်စပ်သည့် ချူးယွင်ဖန်း၏ ပထမဆုံးအကြိမ်ဖြစ်သည်။ ၎င်း၏ အရှိန်အဟုန်သည် မယုံကြည်နိုင်ဖွယ် မြန်ဆန်လှကြောင်း သူ တွေ့ရှိလိုက်ရသည်။ ယခင်က သာမန်ဆေးမီဖိုကို အသုံးပြုစဉ် သူ၏ စွမ်းဆောင်ရည်သည် တောင်မြစ်ဆေးမီးဖိုကို အသုံးပြုသည့် တစ်ရာခိုင်နှုန်းကိုပင် မမှီခဲ့ပေ။

ကောင်းကင်နတ်ဆိုးဆေးလုံး ဖော်စပ်ခြင်းသည် အလွန်လွယ်ကူသည့်အပြင် တောင်မြစ်ဆေးမီးဖို၏ အကူအညီကြောင့် ဤလုပ်ငန်းစဉ်သည် ပို၍ပင် လျင်မြန်သွားသည်။ ဆေးဖော်စပ်သည့် ပါဝင်ပစ္စည်းများကို တစ်ခုပြီးတစ်ခု ထည့်သွင်း၍ ရောနှောပေါင်းစပ်လိုက်သည်။ စက္ကန့်နှင့် မိနစ်များ ကုန်လွန်သွား၍ ချူးယွင်ဖန်းသည် ဆေးဖော်စပ်ရန် နေ့ညမပြတ် ကြိုးစားလုပ်ဆောင်ခဲ့သည်။ နောက်ဆုံးတွင် ဆေးမီးဖိုအဖုံး ပွင့်လာချိန်၌ ပြင်းထန်သော ဆေးရနံ့များ တိုးထွက်လာသည်။ သူသည် ထိုဆေးရနံ့ထဲတွင် ချက်ချင်း နစ်မျောသွားကာ ခန္ဓာကိုယ်ရှိ ချွေးပေါက်များအားလုံး ပွင့်သွားသကဲ့သို့ ခံစားလိုက်ရသည်။

သူ၏ နတ်စွမ်းအင်များ ပိုမိုနက်ရှိုင်း၍ ထူးကဲလာသည်။ ချူးယွင်ဖန်းသည် ဆေးမီးဖိုထဲတွင် ကောင်းကင်နတ်ဆိုးဆေးလုံး နှစ်လုံးကို တွေ့လိုက်ရသည်။ ဤကောင်းကင်နတ်ဆိုးဆေးလုံး နှစ်လုံးသည် သာမန်ဆေးလုံးများနှင့် မတူပေ။ ၎င်းတို့သည် နတ်ဆိုးပုံသဏ္ဌာန်ရှိ၍ ချူးယွင်ဖန်းသည် ၎င်းတို့၏ မျက်နှာများကိုပင် ရေးတေးတေး မြင်နေရသည်။ သို့သော်လည်း ချူးယွင်ဖန်းသည် ၎င်းကို ကိစ္စကြီးတစ်ခုဟု မမှတ်ယူခဲ့ပေ။ ဆေးဧကရာဇ် ဖော်စပ်ခဲ့သော ဆေးလုံးများစွာလည်း ဤကဲ့သို့ပင်ဖြစ်သည်။ ၎င်းတို့သည် သာမန်ဆေးလုံးနှင့် မတူပေ။ အချို့သော ဆေးလုံးများသည် ဖော်စပ်ပြီးသည်နှင့် သက်ရှိများအဖြစ် ပြောင်းလဲလိုကြသဖြင့် မိုးကြိုးကပ်ဘေးများကိုပင် စတင်ရင်ဆိုင်ကြလေသည်။

ဤဆေးလုံးများသည် သဘာဝတရား၏ ဝိညာဉ်စွမ်းအင်များကို စုပ်ယူထားသောကြောင့် ကမ္ဘာပေါ်တွင် အကောင်းဆုံးဆေးများဖြစ်ကြသည်။ ချူးယွင်ဖန်းသည် ဆေးဧကရာဇ်၏ မှတ်ဉာဏ်များတွင် ရက်စက်ကြမ်းကြုတ်သော သားရဲပုံသဏ္ဌာန်ဆေးများ၊ လူသားပုံသဏ္ဌာန်ဆေးများနှင့် အပင်ပုံသဏ္ဌာန် ဆေးလုံးများကို အကြိမ်ကြိမ် မြင်တွေ့ဖူးသဖြင့် ၎င်းကို ကောင်းစွာ နားလည်ထားသည်။ ချူးယွင်ဖန်းသည် ဆေးစွမ်းအင်များ ယိုစိမ့်မသွားစေရန် ဆေးတစ်လုံးကို ကျောက်စိမ်းသေတ္တာထဲသို့ ထည့်ပြီးနောက် အခြားဆေးတစ်လုံးကို မျိုချလိုက်သည်။ သူသည် တောင်မြစ်ဆေးမီးဖိုကို ကြည့်လျက် အံ့အားသင့်စွာ စုတ်သပ်မိသွားသည်။ ဤဆေးမီးဖို၏ အကူအညီကြောင့်သာ မဟုတ်ပါက ကောင်းကင်နတ်ဆိုးဆေးလုံး ဖော်စပ်ရန် အနည်းဆုံးလျှင် တစ်လခန့် ကြာမြင့်ပေလိမ့်မည်။ ယခုမူ ကြာချိန်သည် များစွာ တိုတောင်းသွားခဲ့သည်။

ဆေးဧကရာဇ် ဉာဏ်အလင်းမရမီက အသုံးပြုခဲ့သော မှော်လက်နက်ဟူသည့်အတိုင်း ၎င်းသည် အလွန်အံ့ဩဖွယ်ကောင်းလှသည်။ ခရမ်းရောင်မိုးကြိုးဓားဂိုဏ်းသည် တောင်မြစ်ဆေးမီးဖိုကို ၎င်းတို့ဂိုဏ်း၏ ဆက်ခံမှုအတွက် မရှိမဖြစ်ပစ္စည်းတစ်ခုအဖြစ် သတ်မှတ်ခဲ့ခြင်းသည် အကြောင်းမဲ့ မဟုတ်ပေ။ ချူးယွင်ဖန်းသည် ကောင်းကင်နတ်ဆိုးဆေးလုံးကို မျိုချပြီးနောက် တင်ပျဉ်ခွေထိုင်လိုက်သည်။ သူ၏ ခန္ဓာကိုယ်ထဲသို့ လူပုလေးတစ်ယောက် ဝင်လာသကဲ့သို့ ခံစားရ၍ ဆေးလုံးကို ချေဖျက်ခြင်းသည် မလွယ်ကူလှပေ။ သူသည် ဧကရာဇ်ကျင့်စဉ်နှင့် ကောင်းကင်ဝါးမျိုခြင်းသိုင်းပညာကို လှည့်ပတ်ကာ ကောင်းကင်နတ်ဆိုးဆေးလုံးကို စတင် သန့်စင်လိုက်သည်။

နောက်ဆုံးတွင် ကောင်းကင်နတ်ဆိုးဆေးလုံးသည် လှိုင်းလုံးကြီးတစ်ခုအဖြစ် ပြောင်းလဲသွားကာ ချူးယွင်ဖန်း၏ ဆဲလ်များအတွင်းသို့ တိုးဝင်သွားသည်။ စွမ်းအင်လှိုင်းတစ်ခုသည် သူ၏ စိတ်အာရုံထဲသို့ တိုက်ရိုက် တိုးဝင်သွားခဲ့ရာ၊ ၎င်းသည် အန္တရာယ်အရှိဆုံး အဆင့်ဖြစ်သည်။ ဤသည်မှာ ဒြပ်မဲ့အဆင့်၏ အခက်ခဲဆုံး အဆင့်ဖြစ်သည်။ ဒြပ်မဲ့အဆင့် မတိုင်မီ ကျင့်ကြံမှုအားလုံးသည် ရုပ်ခန္ဓာနှင့် သက်ဆိုင်သော်လည်း ဒြပ်မဲ့အဆင့်၏ ကျင့်ကြံမှုသည် စိတ်အာရုံနှင့် သက်ဆိုင်သည်။ သဘာဝတရား၏ နိယာမများကို ပိုမိုနားလည်နိုင်ရန်အတွက် ဦးနှောက်ကို လှုံ့ဆော်၍ ၎င်း၏ စွမ်းရည်များကို မြှင့်တင်ရန် လိုအပ်သည်။ ဤအရာအားလုံးသည် အလွန် အန္တရာယ်များလှသည်။ ဦးနှောက်သည် အလွန်လျှို့ဝှက်ဆန်းကြယ်လှရာ အနည်းငယ်မျှ သတိလွတ်သွားသည်နှင့် အရူးတစ်ယောက်ဖြစ်သွားနိုင်သည်။

ကံကောင်းထောက်မစွာဖြင့် ထိုအချိန်တွင် ချူးယွင်ဖန်း၏ စိတ်ထဲရှိ နတ်ဘုရားဝိညာဉ်သည် မှိန်ဖျော့သော အလင်းရောင်ကို ထုတ်လွှတ်လာကာ ထိုစွမ်းအင်များကို သူ၏ ဦးနှောက်ထဲသို့ လမ်းညွှန်ပေးခဲ့သည်။ သူသည် ဉာဏ်အလင်းရရှိသော အခြေအနေသို့ ရောက်ရှိသွားကြောင်း ချက်ချင်း ခံစားလိုက်ရကာ ခန္ဓာကိုယ်တစ်ခုလုံး လျှို့ဝှက်ဆန်းပြားသော အခြေအနေသို့ ရောက်ရှိသွားလေသည်။ ချူးယွင်ဖန်းသည် တာအိုကို ဆက်လက်ကျင့်ကြံကာ ဒြပ်မဲ့အဆင့်၏ အတားအဆီးကို ချိုးဖျက်နေစဉ် အချိန်များ လျင်မြန်စွာ ကုန်ဆုံးသွားခဲ့သည်။

တစ်ချိန်တည်းမှာပင် အံ့ဖွယ်တိမ်တိုက်တောင်ထိပ်၏ ပင်မခန်းမ၌ ဝမ်ယိဖန်သည် သူ၏ တပည့်များထံမှ အစီရင်ခံစာကို နားထောင်နေစဉ် မျက်နှာတစ်ခုလုံး ပြာနှမ်းနေသည်။ သူသည် သီးသန့်ကျင့်ကြံနေခဲ့သော်လည်း တပည့်များ​​၏ လှုပ်ရှားမှုများကို မရပ်တန့်ခဲ့ပေ။ ချူးယွင်ဖန်းသည် ကြယ်ကြွေကောင်းကင်ဂိုဏ်းမှ ထွက်ခွာကာ သေကြောင်းကြံစည်လိုကြောင်း ကြားသိရသောအခါ ၎င်းတို့ အလွန်ဝမ်းသာသွားကြသည်။ ၎င်းတို့သည် လူများစွာကို တိတ်တဆိတ်သော်လည်းကောင်း ပွင့်လင်းစွာသော်လည်းကောင်း စေလွှတ်ခဲ့ကြသည်။ ၎င်းအနက် ကြယ်ကြွေကောင်းကင်ဂိုဏ်း​၏ ယခင်တပည့်များအပြင် ကြီးမြတ်သောတရှ၏ အလိုရှိဆုံးစာရင်းတွင် ပါဝင်နေသူအချို့လည်း ပါရှိခဲ့သည်။ ထိုလူတစ်ဦးချင်းစီသည် နာမည်ကျော်ကြား၍ ရာဇ၀တ်မှုကြီးများ ကျူးလွန်ထားသူများဖြစ်သည့်အပြင် ဝမ်ယိဖန်နှင့် ပူးပေါင်းဆောင်ရွက်နေသူများဖြစ်သည်။

မည်သို့ပင်ဆိုစေကာမူ ထိုဥပဒေမဲ့သူများသည် ကြီးမြတ်သောတရှသည် ၎င်းတို့ကို ရုတ်တရက် လာရောက်သုတ်သင်မည်ကို ကြောက်ရွံ့ကြသည်။ ၎င်းတို့အတွက် တည်ငြိမ်သော သတင်းအချက်အလက် လမ်းကြောင်းတစ်ခု လိုအပ်သည့်အပြင် ဝမ်ယိဖန်သည်လည်း ၎င်းတို့ကို ကိုင်တွယ်ဖြေရှင်းစေလိုသည့် သမာသမတ်မကျသော ကိစ္စအချို့ရှိနေသည်။ ထို့ကြောင့် နှစ်ဖက်စလုံး အပေးအယူတည့်လာ၍ အချိန်ကြာမြင့်စွာ လက်တွဲလာခဲ့ကြခြင်းဖြစ်သည်။ သို့သော်လည်း စေလွှတ်လိုက်သော ကျွမ်းကျင်သူများသည် ချူးယွင်ဖန်းကို အမှန်တကယ် မထိခိုက်နိုင်ခဲ့ကြပေ။ ချူးယွင်ဖန်းသည် နှစ်လကျော်အတွင်း မစ်ရှင်ပေါင်း တစ်ရာကျော်ကို လွယ်ကူစွာ လုပ်ဆောင်နိုင်ခဲ့သည်။