အခန်း (၁၆၈၇-၁၆၈၉)

အခန်း (၁၆၈၇) ဘေးအန္တရာယ်ကြားမှ ရရှိသော စည်းစိမ်များ

ဤရိုးရှင်းသော သိုင်းကွက်သည် အလွန်တရာ ကြောက်မက်ဖွယ်ကောင်းလှသည်။ တောင်တန်းချုပ်နှောင်ချိပ်စည်း၏ အစွမ်းပကားသည် ချူးယွင်ဖန်း၏လက်ထဲတွင် အထွတ်အထိပ်သို့ ရောက်ရှိနေသည်။ သူ၏ပြိုင်ဘက်သည် သာမန်အတွင်းစည်းတပည့်တစ်ဦး မဟုတ်ဘဲ အတွင်းစည်းတပည့်များကြားတွင် နာမည်ကျော်လှသော စုဟုန်ချင်းဖြစ်သည်။ သို့သော် အဆုံးသတ်တွင် စုဟုန်ချင်းသည် ချူးယွင်ဖန်း၏ ဤသိုင်းတစ်ကွက်ကိုပင် မခုခံနိုင်ခဲ့ပေ။ မြင်ကွင်းတစ်ခုလုံး အလွန်တိတ်ဆိတ်သွားသည်။

"သူက တော်တော်သန်မာတာပဲ… ကြောက်စရာကောင်းလိုက်တာ" တစ်စုံတစ်ဦးက မယုံကြည်နိုင်စွာ ပြောလိုက်သည်။

"ချူးယွင်ဖန်းက ဘယ်လောက်တောင် သန်မာတာလဲ" နောက်တစ်ဦးက မေးလိုက်သည်။

"ချူးယွင်ဖန်းနဲ့ ဟွာရှန်းယွမ်တို့က အတွင်းစည်းတပည့်ပြိုင်ပွဲရဲ့ ပထမနေရာအတွက် တိုက်ခိုက်ဖို့ သဘောတူထားကြတာလေ။ ကြည့်ရတာတာတော့ သူတို့တွေ နောက်ပြောင်နေတာ မဟုတ်ဘူးပဲ"

အချို့လူများသည် ချူးယွင်ဖန်းနှင့် ဟွာရှန်းယွမ်တို့ကြားက ကတိကဝတ်ကို ပြန်သတိရသွားကြသည်။ ထိုစဉ်က လူအများအပြားသည် ၎င်းကို မယုံကြည်ခဲ့ကြပေ။ ၎င်းတို့နှစ်ဦးသည် စုဟုန်ချင်း ပြောခဲ့သည့်အတိုင်း ကောင်းကင်နှင့် မြေကြီး၏ အတိုင်းအဆကို မသိသေးသော လူသစ်နှစ်ယောက်ဟုသာ လူတိုင်း ထင်မှတ်ခဲ့ကြသည်။ သို့သော် ယခုမူ အခြေအနေများသည် ထင်သလောက် မရိုးရှင်းကြောင်း ပေါ်လွင်လာသည်။ ချူးယွင်ဖန်းသည် စုဟုန်ချင်းကို သိုင်းကွက်တစ်ကွက်တည်းဖြင့် ဖြေရှင်းနိုင်ခဲ့သည်။

"သူ ဒြပ်မဲ့လေ့လာသူအဆင့်ကို မရောက်လောက်သေးပါဘူးနော်။ တစ်နှစ်ခွဲလောက်အတွင်း ဒီအဆင့်ထိ ရောက်တက်လာတာက တကယ့်ကို ထိတ်လန့်စရာပဲ" လူတစ်ဦးက အံ့ဩတုန်လှုပ်စွာ ပြောလိုက်သည်။

"ချူးယွင်ဖန်းက ဒီလောက် ကြောက်စရာကောင်းနေရင် ဟွာရှန်းယွမ်ကလည်း သိပ်အားနည်းလောက်မယ် မထင်ဘူး"

လူအများအပြားက ဟွာရှန်းယွမ်နှင့်ပတ်သက်၍ တွေးမိသွားကြသည်။ ၎င်းတို့၏ အမြင်တွင် လက်ရှိ ဟွာရှန်းယွမ်၏ ခွန်အားသည် ချူးယွင်ဖန်းနှင့် သိပ်ကွာခြားမည် မဟုတ်ပေ။

"အသုံးမကျတဲ့ကောင်။ ကျုပ်ရှေ့မှာ လာမောက်မာရဲရတယ်လို့။ ကိုယ့်အဆင့်ကိုယ် မသိဘူးပဲ" ချူးယွင်ဖန်းက စုဟုန်ချင်းကို ကြည့်ကာ ပြောလိုက်သည်။

ချူးယွင်ဖန်း၏ စကားကို ကြားသောအခါ စုဟုန်ချင်းသည် အလွန်ဒေါသထွက်သွားသဖြင့် သွေးတစ်ပွတ် ထပ်မံထွေးထုတ်ပြီးနောက် သတိလစ်သွားသည်။ စုဟုန်ချင်းသည် ရန်လိုသော အပြုအမူဖြင့် ရောက်လာခဲ့သော်လည်း ချူးယွင်ဖန်း၏ လျှပ်စီးအလား မြန်ဆန်သော သိုင်းကွက်ကြောင့် ရှုံးနိမ့်သွားရသည်။ သူသည် ချူးယွင်ဖန်းကို အနည်းငယ်မျှပင် ခြိမ်းခြောက်မှု မပေးအပ်နိုင်ခဲ့ပေ။ ဤသည်မှာ သူ မျှော်လင့်ထားသော ရလဒ်မဟုတ်ပေ။ ဤတိုက်ပွဲရလဒ်သည် ကြယ်ကြွေကောင်းကင်ဂိုဏ်း တစ်ဂိုဏ်းလုံးသို့ လျင်မြန်စွာ ပျံ့နှံ့သွားသည်။ အထူးသဖြင့် အတွင်းစည်းတပည့်ပြိုင်ပွဲကို စိတ်ဝင်စားသူများကြားတွင် ပို၍ပင် ဂယက်ထသွားလေသည်။ ထူးခြားသော လူငယ်တစ်ဦး ပေါ်ထွက်လာ၍ စုဟုန်ချင်းကို ခဏအတွင်း အနိုင်ယူလိုက်ကြောင်း လူတိုင်း သိသွားကြသည်။ လူတိုင်းသည် ထိုလူငယ်ကို ကွဲပြားသော အမြင်သစ်ဖြင့် ကြည့်လာကြသည်။

"ဒီလိုမျိုး တကယ်ဖြစ်သွားတာလား။ ချူးယွင်ဖန်းက တပည့်သစ် မဟုတ်ဘူးလား။ တပည့်သစ်တွေက ဒီလောက်တောင် သန်မာနေကြပြီလား"

"ဟုတ်မယ်ထင်တယ်။ ဟွာရှန်းယွမ်ရဲ့ ခွန်အားလည်း တိုးတက်လာတယ်လို့ ကျုပ် ကြားတယ်။ ဒီနှစ်အတွင်းစည်းတပည့် ပြိုင်ပွဲကတော့ အတော်လေး စည်ကားတော့မယ်ထင်တယ်"

"ချူးယွင်ဖန်းရဲ့ အစွမ်းက ကြောက်စရာပဲ..."

"ပါရမီရှိတော့ ဘာများထူးမှာလဲ။ ကျုပ်သိသလောက်တော့ သူက စီနီယာ ဝမ်ယိဖန်ကို စော်ကားထားတာတဲ့။ စီနီယာဝမ်ကို စော်ကားပြီးရင် ဘယ်လိုအဆုံးသတ်မျိုး ဖြစ်မလဲဆိုတာ မင်းတို့ မသိဘူးလား"

"ဟုတ်တယ်၊ စီနီယာဝမ်က တပည့်အရင်းတစ်ယောက်။ ချူးယွင်ဖန်းက ဘာမို့လို့လဲ"

လူတိုင်းက အားတက်သရော ဆွေးနွေးနေကြသော်လည်း ချူးယွင်ဖန်းနှင့် ဟွာရှန်းယွမ်တို့သည် ထိုဆွေးနွေးမှုများကို ဂရုမစိုက်ကြပေ။ ၎င်းတို့သည် ပြင်ပလောကကို မတုံ့ပြန်သည့်အပြင် စီနီယာတပည့်အချို့၏ ရန်စမှုများကိုလည်း လျစ်လျူရှုထားကြသည်။ ချူးယွင်ဖန်းသည် ကျင့်ကြံမှုအဆင့် ခိုင်မြဲစေရန်အတွက် ဒြပ်မဲ့လေ့လာသူအဆင့်သို့ မတက်လှမ်းမီ လူတစ်ဦး သူ၏နေအိမ်သို့ ရောက်ရှိလာသည်။

"ကျွန်တော် ယုချူးယွမ်ပါ။ ကျွန်တော့်ကို အချိန်နည်းနည်းလောက်ပေးနိုင်မလား စီနီယာချူး"

"ဝင်ခဲ့ပါ" ချူးယွင်ဖန်း၏ အသံသည် ခြံဝင်းအတွင်းမှ ထွက်ပေါ်လာသည်။

ယုချူးယွမ်သည် ခြံဝင်းအတွင်းသို့ အလျင်အမြန်ဝင်သွားခဲ့ရာ နောက်ဖေးခြံထဲရှိ ကျောက်ခုံတစ်ခုပေါ်တွင် ထိုင်နေသော လူရိပ်တစ်ခုကို တွေ့လိုက်ရသည်။ ချူးယွင်ဖန်းသည် ထိုနေရာတွင် ငြိမ်သက်စွာ ထိုင်နေသည်။ ယုချူးယွမ်၏အရှေ့တွင် တောင်ကြီးတစ်စင်း ငြိမ်သက်စွာ ရပ်တည်နေသကဲ့သို့ ကြောက်မက်ဖွယ် ဖိအားတစ်ခုကို ပေးစွမ်းနေသည်။ ချူးယွင်ဖန်းက ခြေသံများ ကြားလိုက်သောအခါ ခေါင်းလှည့်ကြည့်လိုက်သည်။ ထိုအခါ အရပ်ရှည်ရှည်နှင့် သွယ်လျသော လူငယ်တစ်ဦး သူဆီ တည့်တည့်လျှောက်လာကြောင်း မြင်တွေ့လိုက်ရသည်။

"ဂါရဝပြုပါတယ် စီနီယာချူး"

ဤလူငယ်သည် ချူးယွင်ဖန်းထက် အသက်ကြီးသော်လည်း ချူးယွင်ဖန်းကို သူ၏စီနီယာအဖြစ် မဆိုင်းမတွ အသိအမှတ်ပြုလိုက်သည်။ ဤလောကတွင် ခွန်အားကြီးမားသူသည်သာ လေးစားခံရပေသည်။

"ယုချူးယွမ် ဟုတ်လား" ချူးယွင်ဖန်းက ထိုအမျိုးသားကို တစ်ချက်ကြည့်လိုက်သည်။

"အကြောင်းကိစ္စမရှိဘဲ ဘုရားကျောင်းကို မလာကြဘူးဆိုတဲ့ စကားပုံရှိတဲ့အတိုင်း ခင်ဗျား ပြောစရာရှိရင် တည့်တည့်ပဲ ပြောပါ"

"ကောင်းပါပြီ။ စီနီယာက ပွင့်လင်းတဲ့သူဆိုတော့ ကျွန်တော်လည်း လိုရင်းကိုပဲ ပြောပါ့မယ်။ ကျွန်တော် စီနီယာ့လက်အောက်မှာ အမှုထမ်းချင်ပါတယ်" ယုချူးယွမ်က မဆိုင်းမတွ ပြောလိုက်သည်။

ချူးယွင်ဖန်းသည် အနည်းငယ် အံ့အားသင့်သွားသည်။ ဤသည်မှာ ယုချူးယွမ်၏ ရည်ရွယ်ချက်ဖြစ်လိမ့်မည်ဟု သူ မထင်မှတ်ထားပေ။

"ပြောပါဦး၊ ခင်ဗျားက ဘာလို့ ကျုပ်လက်အောက်ကို ဝင်ချင်ရတာလဲ။ ဝမ်ယိဖန်က ကျုပ်ကို ရှင်းချင်နေတာ လူတိုင်း သိတယ်။ ဒီလိုအချိန်မှာ ကျုပ်ဘက်က ရပ်တည်မယ်ဆိုရင် ခင်ဗျားလည်း ပစ်မှတ်ထားခံရလိမ့်မယ်" ချူးယွင်ဖန်းက ဆိုလိုက်သည်။

"ဘေးအန္တရာယ်ကြားကနေ စည်းစိမ်တွေ ရလာနိုင်တဘ်ဆိုတဲ့ စကားပုံရှိသလိုပဲ စီနီယာပြသခဲ့တဲ့ ပါရမီတွေအရ စီနီယာက အနှစ်တစ်ရာမှာ တစ်ယောက်သာ ပေါ်ထွက်လာတဲ့ ပါရမီရှင်ဆိုတာ သက်သေပြနေတယ်လေ။ စီနီယာရဲ့ အောင်မြင်မှုတွေက တပည့်အရင်အဆင့်ထက် ပိုပြီးမြင့်မားလာလိမ့်မယ်လို့ ကျွန်တော် ယုံကြည်ပါတယ်" ယုချူးယွမ်က ပြောလိုက်သည်။

"ဝမ်ယိဖန်ရဲ့ အရှိန်အဝါကြောင့် လူအများအပြားက စီနီယာနဲ့ နီးစပ်ဖို့ မဝံ့ရဲကြပေမယ့် သူ့ကို မကြောက်တဲ့လူတွေလည်း ရှိပါတယ်၊ စီနီယာ" ယုချူးယွမ်က ယုံကြည်မှုရှိရှိ ပြောလိုက်သည်။

ချူးယွင်ဖန်းက ယုချူးယွမ်ကို တစ်ချက်စိုက်ကြည့်လိုက်သည်။ ယုချူးယွမ်သည် ဒြပ်မဲ့လေ့လာသူအဆင့်သို့ ရောက်ရှိနေသည်မှာ ကြာမြင့်ပြီဖြစ်၍ သူ၏ခွန်အားသည် အလွန်ကောင်းမွန်လှသည်။ သူ၏ကျင့်ကြံမှုသည် အလယ်အလတ်အဆင့်တွင် ရှိနေသောကြောင့် ချူးယွင်ဖန်းထက်ပင် တစ်ဆင့်မြင့်မားပေသည်။ သို့သော် တိုက်ခိုက်ရေးစွမ်းရည်တစ်ခုတည်းဖြင့်ဆိုလျှင် ချူးယွင်ဖန်းသည် ဤအဆင့်ရှိသော စစ်သည်တစ်ရာကို လက်တစ်ဖက်တည်းနှင့် နှိမ်နင်းနိုင်သည်။ ဤကဲ့သို့သော တပည့်တစ်ဦးသည် အတွင်းစည်းတပည့်များကြားတွင် အကောင်းဆုံးမဟုတ်သော်လည်း ယုချူးယွမ်သည် ထိပ်တန်းစာရင်းဝင် တပည့်တစ်ဦးဖြစ်ပေသည်။

ကနဦးတွင် ယုချူးယွမ်သည် အဘယ်ကြောင့် မိမိလက်အောက်တွင် ခိုလှုံရန် ရောက်လာသနည်းဟု ချူးယွင်ဖန်း သိချင်နေခဲ့သော်လည်း ယခု စဉ်းစားကြည့်သောအခါ ချက်ချင်း နားလည်သဘောပေါက်သွားသည်။ အကြောင်းမှာ ယုချူးယွမ် ပြောခဲ့သော ဘေးအန္တရာယ်ကြားမှ ရရှိလာသော စည်းစိမ်ဟူသည့် ရိုးရှင်သောစကားဖြစ်သည်။

လူအများစုသည် ဝမ်ယိဖန်ကြောင့် သူနှင့် မပတ်သက်ချင်ကြသော်လည်း သာမန်ဘဝတွင် မနေလိုဘဲ စွန့်စားလိုသူများရှိနေဆဲဖြစ်သည်။ သမိုင်းတစ်လျှောက်တွင်လည်း ဤကဲ့သို့သော အဖြစ်အပျက်များစွာရှိခဲ့သည်။ လူတစ်ဦး အောင်မြင်မှုရသောအခါ သူနှင့် ပတ်သက်သူများပင် အကျိုးကျေးဇူးများ ခံစားရတတ်သည်ဟူသော စကားပုံရှိသည့်အတိုင်း ချူးယွင်ဖန်း အောင်မြင်သည်နှင့် သူ၏နောက်လိုက်များသည်လည်း အောင်မြင်ဖြစ်ထွန်းပေလိမ့်မည်။ ကြယ်ကြွေကောင်းကင်ဂိုဏ်းသည် အလွန်ကြီးမား၍ အတွင်းစည်းတပည့် အမြောက်အမြားရှိသည့်အတွက် လူတိုင်းသည် ဝမ်ယိဖန်နှင့် တစ်လေသံတည်း ရှိနေကြသည် မဟုတ်ပေ။

"ဝမ်ယိဖန်က ခင်ဗျားကို ပစ်မှတ်ထားလာမှာကို မကြောက်ဘူးလား" ချူးယွင်ဖန်းက မေးလိုက်သည်။

"မကြောက်ပါဘူး။ အောင်မြင်နေတဲ့သူကို ကူညီပေးတာက လွယ်ကူပေမယ့် ဒုက္ခရောက်နေချိန် အကူအညီပေးတာက ပိုခက်ခဲပါတယ်။ ဒါ့အပြင် ကျွန်တော် သိရသလောက်တော့ စီနီယာက စီနီယာယီယွင်ယောင်နဲ့ ရင်းနှီးတဲ့ ဆက်ဆံရေးရှိတယ်လေ။ စီနီယာဝမ်ယိဖန်က စီနီယာချူးကို နှိမ်နင်းဖို့ ကြံစည်နေတာကို စီနီယာယီယွင်ယောင်က ဒီအတိုင်း ကြည့်နေမယ်လို့တော့ ကျွန်တော် မထင်ဘူး" ယုချူးယွမ်သည် မည်သည်ကိုမျှ ဖုံးကွယ်မထားဘဲ ပြောလိုက်သည်။ သူသည် ဤနေရာသို့ မလာမီ အရာအားလုံးကို ကြိုတင်စုံစမ်းထားခြင်းကြောင်း သိသာထင်ရှားသည်။

အခန်း (၁၆၈၈) အတွင်းစည်းတပည့်ပြိုင်ပွဲအတွက် ဆုလာဘ်များ

ယုချူးယွမ်သည် ဤနေရာသို့ မလာမီက ဘေးအန္တရာယ်ကို ကြိုတင်ဆန်းစစ်ခဲ့ပြီးဖြစ်သည်။ ချူးယွင်ဖန်းသည် ဝမ်ယိဖန်၏ ပစ်မှတ်ထားမှုကြောင့် အန္တရာယ်ရှိသော အခြေအနေတွင်ရှိနေပုံရသော်လည်း ဝမ်ယိဖန်သည် စိတ်အလိုကျ လွယ်ကူစွာ တိုက်ခိုက်နိုင်မည်မဟုတ်ပေ။ ထို့ပြင် ချူးယွင်ဖန်းတွင် အစစ်အမှန်တပည့်တစ်ဦးဖြစ်သည့် ယီယွင်ယောင်၏ ထောက်ခံမှုရှိနေခြင်းကြောင့် ဝမ်ယိဖန်၏ ခြိမ်းခြောက်မှုသည် အနည်းဆုံးအဆင့်သို့ လျှော့ကျသွားသည်။ အန္တရာယ်ရှိနေဆဲဖြစ်သော်လည်း ချူးယွင်ဖန်းအနေဖြင့် အနိုင်ရရှိရန် မဖြစ်နိုင်ခြင်း မဟုတ်ပေ။

"ဒါဆို ခင်ဗျားကို ကျုပ်က ဘာလို့ လက်ခံသင့်တာလဲဆိုတာ ပြောပါဦး။ ခင်ဗျား ကျုပ်အတွက် ဘာလုပ်ပေးနိုင်လဲ" ချူးယွင်ဖန်းသည် ယုချူးယွမ်ကို အပြုံးဖျော့ဖျော့ဖြင့် ကြည့်၍ မေးလိုက်သည်။

"စီနီယာက သန်မာတယ်ဆိုပေမယ့် တချို့အရာတွေမှာ အတူတူလက်တွဲလုပ်တာ ပိုကောင်းပါတယ်။ ကျွန်တော် စီနီယာ့အတွက် လုပ်ပေးနိုင်တာတွေ အများကြီး ရှိပါတယ်။ သတင်းအချက်အလက်တွေ စုဆောင်းပေးနိုင်သလို နောင်တစ်ချိန် စီနီယာ တပည့်အရင်းဖြစ်လာတဲ့အခါ တောင်ပေါ်စံအိမ်ကို စီမံခန့်ခွဲရာမှာလည်း ကူညီပေးနိုင်ပါတယ်။ အဲဒါတင်မကသေးပါဘူး၊ အတွင်းစည်းတပည့်ပြိုင်ပွဲပြီးရင် ထိပ်တန်းတပည့်တစ်ယောက်ဖြစ်လာဖို့ဆိုတာ စီနီယာအတွက် အချိန်အတိုင်းအတာတစ်ခုပဲ လိုမှာပါ။ စာပေပညာနဲ့ပဲဖြစ်ဖြစ်၊ သိုင်းပညာနဲ့ပဲဖြစ်ဖြစ် စီနီယာက ကြီးမြတ်တဲ့တရှရဲ့ တော်ဝန်နန်းတော်ကို ဧကန်မုချ ဝင်မှာပါ။ အဲဒီအခါ စီနီယာ့ကို ကူညီဖို့ ကိုယ်ပိုင်လူယုံတွေ လိုအပ်လာလိမ့်မယ် မဟုတ်လား" ယူချူးဘွင်က ပြောလိုက်သည်။

"အရေးကြီးဆုံးကတော့ စီနီယာသာ ဂိုဏ်းခေါင်းဆောင်ရာထူးအတွက် ယှဉ်ပြိုင်ဖို့ ရည်ရွယ်ချက်ရှိမယ်ဆိုရင် ကျွန်တော့်ဘက်က အရှိန်အဝါရအောင် ကူညီပေးရုံတင်မကဘဲ အင်အားကြီးမားတာ မကြီးမားတာကို သက်သေပြဖို့ တပည့်အရင်းတိုင်းရဲ့ စီမံခန့်ခွဲမှုစွမ်းရည်ကိုလည်း စစ်ဆေးကြမှာလေ။ ဘာပဲဖြစ်ဖြစ် ကြယ်ကြွေကောင်းကင်ဂိုဏ်းကို ကျင့်ကြံမှုပဲ သိထားတဲ့ သိုင်းသမားတစ်ယောက်ရဲလက်ထဲကို ထည့်မှာမဟုတ်ဘူးလေ"

ယုချူးယွမ်​၏ ပွင့်လင်းသော စကားများကြောင်း ချူးယွင်ဖန်းက ခေါင်းညိတ်ပြလိုက်သည်။ ကြယ်ကြွေကောင်းကင်ဂိုဏ်း၏ ဂိုဏ်းခေါင်းဆောင်များသည် စာပေပညာနှင့် သိုင်းပညာ နှစ်ရပ်လုံးတွင် ထူးချွန်ကြသူများဖြစ်ကြောင်း သူ နားလည်ထား၏။ ၎င်းတို့သည် ကျင့်ကြံခြင်းနှင့် မည်သို့ တိုက်ခိုက်ရမည်ကိုသာ သိထားသည့် သိုင်းသမားများသာ မဟုတ်ကြပေ။ အစစ်အမှန်တပည့်များသည် ၎င်းတို့၏ လက်အောက်ခံအင်အားစုများကို မည်မျှကောင်းမွန်စွာ စီမံနိုင်သနည်းဟူသည့်အချက်သည်လည်း အရေးကြီးသော ဆန်းစစ်မှုတစ်ခုဖြစ်သည်။ မှန်သည်၊ အချို့လူများကမူ ဤအချက်ကို ဂရုမစိုက်ဘဲ သိုင်းပညာတိုးတက်မှုကိုသာ အာရုံစိုက်လေ့ရှိသည်။

"ကောင်းပြီလေ" ချူးယွင်ဖန်းက ခေါင်းညိတ်၍ ယုချူးယွမ်ကို ကြည့်လိုက်သည်။

ယုချူးယွမ် စကားပြောနေစဉ်အတွင်း လိမ်ညာခြင်း ရှိ၊ မရှိ သေချာစေရန် ချူးယွင်ဖန်းသည် သေချာ စိုက်ကြည့်နေခဲ့သည်။ ချူးယွင်ဖန်း၏ လက်ရှိစွမ်းရည်ဖြင့်ပင် မမြင်တွေ့နိုင်ပါက ယုချူးယွမ်၏ သရုပ်ဆောင်မှုသည် အလွန်ကောင်းမွန်သည်ဟုသာ ဆိုရပေလိမ့်မည်။ သို့သော်လည်း ဤအကြောင်းအရာများကို သူ ဂရုမစိုက်ပေ။ အဘယ်ကြောင့်ဆိုသော် ယုချူးယွမ်က ပြန်လည်တိုက်ခိုက်လိုလျှင်ပင် သူ၏ တစ်ချက်တည်းသော တိုက်ခိုက်မှုကို တောင့်ခံနိုင်မည်မဟုတ်ကြောင်း ယုံကြည်ထားသောကြောင့်ဖြစ်သည်။ ယုချူးယွမ်၏ စကားများသည် အဓိပ္ပာယ်ရှိပေသည်။ ချူးယွင်ဖန်းအနေဖြင့် ကိုယ်ပိုင်အဖွဲ့ဝင်အချို့ ပျိုးထောင်ရန် လိုအပ်၏။

"ဒါဆိုရင် ခင်ဗျား အခုကစပြီး ကျုပ်နောက်ကို လိုက်လို့ရပြီ။ နောင်တစ်ချိန် ကျုပ် ကံကောင်းလို့ အကျိုးအမြတ်တွေရတဲ့အခါ ခင်ဗျားလည်း ဝေစုတစ်ခုရမှာပါ" ချူးယွင်ဖန်းက ပြောလိုက်သည်။

"ကျေးဇူးတင်ပါတယ် စီနီယာအစ်ကို" ယုချူးယွမ်က ဆိုသည်။

ချူးယွင်ဖန်းသည် စကားပြောနေစဥ် လက်ချောင်းကို ဝေ့ယမ်းလိုက်ရာ ယုချူးယွမ်၏ လက်ထဲသို့ ဆေးလုံးတစ်လုံး ရောက်ရှိလာသည်။

"ဒါက ဒြပ်မဲ့ယန်ဆေးလုံး။ ဒြပ်မဲ့အဆင့် ကျင့်ကြံခြင်းအတွက် အရမ်းအကျိုးရှိတယ်။ ဒီဆေးက ခင်ဗျားကို ဒြပ်မဲ့လေ့လာသူအဆင့် နောက်ဆုံးအဆင့်ထိ ရောက်အောင် ကူညီပေးလိမ့်မယ်။ နှုတ်ဆက်လက်ဆောင်လို့ပဲ သဘောထားလိုက်ပါ"

ဤဆေးများသည် ကောင်းကင်နတ်ဆိုးဆေးလုံးကို ဖော်စပ်စဉ်က ကျန်ရစ်ခဲ့သော အပိုင်းအစများဖြစ်သည်။ မှန်ကန်စွာပြောရမည်ဆိုလျှင် သူ့တွင် ဤဆေးလုံးများစွာရှိသည်။ သာမန်ဒြပ်မဲ့အဆင့် ကျင့်ကြံသူများအတွက် အကျိုးသက်ရောက်မှု ကောင်းမွန်သော်လည်း သူ၏အင်အားသည် သာမန်ထက် အဆပေါင်းများစွာ သာလွန်နေသဖြင့် ၎င်းသည် သူ့အတွက် အကျိုးသက်ရောက်မှုမရှိပေ။

ထို့ကြောင့် သူသည် ဤဆေးလုံးများကို နောင်တွင် လက်အောက်ငယ်သားများကို ဆုချရန် ဖော်စပ်ထားခြင်းဖြစ်သည်။ ဤမျှလျင်မြန်စွာ အသုံးပြုရလိမ့်မည်ဟု သူ မထင်မှတ်ထားခဲ့ပေ။ ထိပ်တန်းတပည့်ဖြစ်ချိန်မှ အသုံးဝင်လိမ့်မည်ဟု သူ ယူဆထားခဲ့သည်။ ဤဆေးလုံးများသည် ဘေးထွက်ပစ္စည်းများဖြင့် ဖော်စပ်ထားခြင်းဖြစ်သော်လည်း သာမန်အတွင်းစည်းတပည့်များအတွက် အလွန်ရှားပါးသော ဆေးများဖြစ်သည်။

"ကျေးဇူးတင်ပါတယ်၊ စီနီယာချူး" ယုချူးယွမ် ချက်ချင်းပင် ဝမ်းသာအားရဖြစ်သွားသည်။

လူအများအပြားသည် မည်သို့ကြောင့် အင်အားကြီးမားသူများကို ခစားချင်ရသနည်း။ အဆိုပါ ပါရမီရှင်များအရှေ့တွင် အလုပ်အကျွေးပြု၍ ဦးညွှတ်ရလျှင်ပင် အကျိုးကျေးဇူးများစွာရရှိနိုင်သောကြောင့်ဖြစ်သည်။ ၎င်းပါရမီရှင်များ မလိုအပ်သည့် ပစ္စည်းတစ်ခုလျှင်ပင် သာမန်လူများအတွက် ရှားပါးလှသော ရတနာတစ်ခုဖြစ်နေတတ်သည်။

ကြယ်ကြွေကောင်းကင်ဂိုဏ်းသို့ မဝင်ရောက်မီက မည်မျှမာန်မာနကြီးခဲ့ပါစေ၊ ဂိုဏ်းအတွင်းသို့ ရောက်ရှိသွားသည်နှင့် ထိုမာန်မာနများ လုံးလုံးလျားလျား ကျန်ရှိတော့မည်မဟုတ်ပေ။ တစ်ဦးတစ်ယောက်ချင်းစီ၏ မာနတရားတို့သည် ချောမွေ့သည်အထိ ပွတ်တိုက်ခံလိုက်ရသကဲ့သို့ ပျောက်ကွယ်သွားရစမြဲဖြစ်သည်။

ယုချူးယွမ်သည် သူ၏ဇာတိရပ်ရွာတွင် ကျော်ကြားသော ပါရမီရှင်တစ်ဦးဖြစ်ခဲ့ဖူး၏။ သို့သော် ကြယ်ကြွေကောင်းကင်ဂိုဏ်းအနက် သူကဲ့သို့သော ပါရမီရှင်များကို နေရာတိုင်း၌ တွေ့နိုင်ရုံသာမကဘဲ ထူးကဲဆန်းပြားသည့် မွန်းစတားကဲ့သို့ ပါရမီရှင်များပင် အလျှံပယ်ရှိနေသည်။ ထိုလူများသည် ကောင်းကင်ဘုံ၏ စစ်မှန်သော မျက်နှာသာပေးမှုကို ခံထားရသူများဖြစ်သည့်အတွက် ၎င်းတို့နှင့် ယှဉ်ပြိုင်ရန် လုံးလုံးလျားလျား ဖြစ်နိုင်မည်မဟုတ်ပေ။

ဆယ်စုနှစ်တစ်ခုစာ အတွေ့အကြုံများသည် သူ့ကို သင်ခန်းစာတစ်ခု ပေးခဲ့သည်။ အကျိုးမရှိသော အရာများကို တွေးတောနေမည့်အစား ပါရမီထူးချွန်သည့် မွန်းစတားတစ်ကောင်ကိုသာ ရိုးရိုးသားသား အမှီသဟဲပြုနေခြင်းက ပို၍ကောင်းမွန်ကြောင်း သူ နားလည်သွားသည်။ ထိုသို့ပြုလုပ်ခြင်းဖြင့် သူ၏ ကျင့်စဉ်တိုးတက်မှုသည် ပိုမိုမြန်ဆန်လာမည်ဖြစ်သည်။ ၎င်းသည် အကျိုးအရှိဆုံးနည်းလမ်းတစ်ခု မဟုတ်လေသလော။

အကယ်၍သာ ဤဒြပ်မဲ့ယန်ဆေးလုံး မရှိဘဲ မိမိဘာသာ အားထုတ်ရမည်ဆိုပါက ဒြပ်မဲ့လေ့လာသူအဆင့်၏ နောက်ဆုံးအဆင့်သို့ တက်လှမ်းရန် အနည်းဆုံးလျှင် တစ်နှစ်ခန့် အချိန်ယူရမည်ဖြစ်သည်။ ယခုမူ အဆင့်ဖြတ်ကျော်ရန် အများဆုံး တစ်လသာ လိုအပ်တော့သည်။ ဒြပ်မဲ့လေ့လာသူအဆင့်၏ နောက်ဆုံးအဆင့်သို့ ရောက်ရှိခြင်းသည် အတွင်းစည်းတပည့်များအတွင်းပင် ထူးချွန်သူအဖြစ် သတ်မှတ်ခံရမည်ဖြစ်ရာ ဤသည်မှာ အစပျိုးရုံမျှသာဖြစ်သည်။

"နောင်တစ်ချိန် စီနီယာ့အတွက်ဆိုရင် မီးထဲပဲဖြစ်ဖြစ်၊ ရေထဲပဲဖြစ်ဖြစ် ဖြတ်ကျော်ဖို့ အဆင်သင့်ပါပဲ" ယုချူးယွမ်က အလျင်အမြန် ကတိပြုလိုက်သည်။

"မီးထဲရေထဲ ဖြတ်ကျော်ဖို့ မလိုပါဘူး။ လောလောဆယ် ကျုပ်သိချင်တာ တစ်ခုပဲရှိတယ်။ ဒီနှစ် အတွင်းစည်းတပည့်ပြိုင်ပွဲမှာ ကျုပ်ဘယ်သူတွေကို သတိထားရမလဲ။ ခင်ဗျားက ဂိုဏ်းမှာနေတာ ကြာပြီဆိုတော့ ကျုပ်ထက် ပိုသိမှာပေါ့။ ပြီးတော့ ဒီနှစ်ပြိုင်ပွဲအတွက် ဆုတွေက အရင်ကထက် ပိုများတယ်လို့ ကြားထားတယ်၊ အဲ့ဒါဟုတ်လား" ချူးယွင်ဖန်းက ပြုံး၍ ပြောလိုက်သည်။

ယုချူးယွမ်က အလျင်အမြန် ခေါင်းညိတ်ပြလိုက်သည်။

"ဟုတ်ပါတယ်၊ အရင်က အတွင်းစည်းပြိုင်ပွဲအတွက် ဆုတွေက သာမန်ပါပဲ။ ဒါပေမယ့် ဒီတစ်ခါတော့ မတူတော့ဘူး။ စီနီယာဝမ်ယိဖန်က ဆုတွေကို အရင်ကထက် ပိုပေးဖို့ အကြံပြုထားတယ်လို့ ကျွန်တော် ကြားတယ်။ အလယ်အလတ်အဆင့် ဝိညာဉ်ကျောက်တုံး တစ်သန်းတင်မကဘဲ ကြယ်ကြွေကောင်းကင်အသီးနဲ့ အစွမ်းထက်တဲ့ ထိပ်တန်းအဆင့် ဝိညာဉ်လက်နက်တစ်ခုလည်း ပါဝင်ပါတယ်"

ချူးယွင်ဖန်းသည် သူသိထားသော အချက်အလက်များနှင့် နှိုင်းယှဥ်ကြည့်လိုက်ရာ ဆုလာဘ်များသည် အမှန်တကယ် ယခင်ကထက် များပြားလှပေသည်။ ယခင်နှစ်များတွင် အနိုင်ရရှိသူသည် အလယ်အလတ်အဆင့် ဝိညာဥ်ကျောက်တုံး ၂၀၀၀၀၀ သာ ရရှိလေ့ရှိသော်လည်း ဤနှစ်တွင်မူ ဝိညာဥ်ကျောက်တုံး တစ်သန်းပေးမည်ဟု သတ်မှတ်ထားခဲ့သည်။ ဤသည်မှာ အမှန်တယ် များပြားသော ပမာဏဖြစ်သည်။

"ကြယ်ကြွေကောင်းကင်အသီးဆိုတာက ဘာလဲ" ချူးယွင်ဖန်းက မေးလိုက်သည်။

"အဲဒီအသီးက ဂိုဏ်းရဲ့ ပင်မတောင်ထိပ်မှာရှိတဲ့ နတ်သစ်ပင်ကနေ သီးတဲ့အသီးပါ။ ၃၆ နှစ်မှာ တစ်ခါပဲ ပွင့်ပြီး အသီး ၃၆ လုံးပဲ ထွက်တာ။ ဂိုဏ်းရဲ့ မဟာအကြီးအကဲတွေပဲ စားသုံးခွင့်ရှိတဲ့ အသီးမျိုးပါ။ အဲဒါက သွေးကြောတွေကို သန့်စင်ပေးပြီး ကျင့်ကြံမှုအဆင့်အပြင် အရည်အချင်းကို မြှင့်တင်ပေးနိုင်ပါတယ်။ ဝယ်လို့ရတဲ့အရာမျိုး မဟုတ်ဘူး။ ဒါပေမယ့် ဘာလို့ ဒီနှစ်မှာ ဆုအဖြစ် ပေးတာလဲဆိုတာတော့ ကျွန်တော်လည်း စဉ်းစားလို့မရဘူးဖြစ်နေတယ်..." ယုချူးယွမ်က တွေးတောကာ ပြောလိုက်သည်။

အခန်း (၁၆၈၉) တစ်လအကြာ၊ အတွင်းစည်းတပည့်ပြိုင်ပွဲ စတင်ခြင်း

ဤနှစ် အတွင်းစည်းတပည့်ပြိုင်ပွဲ၏ ဆုလာဘ်များသည် အလွန်ကောင်းမွန်လှရာ မည်သည့်ဆုမျိုးမဆို ချူးယွင်ဖန်းအတွက် အရေးတကြီး လိုအပ်နေသော အရာများဖြစ်သည်။

"ကြည့်ရတာ ဝမ်ယိဖန်က ဒီပြိုင်ပွဲမှာ အနိုင်ရဖို့ သေချာပေါက် ဆုံးဖြတ်ထားပုံပဲ" ချူးယွင်ဖန်းက ဆိုသည်။

"ဒီလိုဆုတွေ အများကြီးပေးတာ အရင်က ရှိဖူးလား"

"ရှိဖူးပါတယ်။ အရင်ကလည်း တပည့်အရင်းတစ်ယောက်က သူယုံကြည်တဲ့ တပည့်တစ်ယောက်ကို ပြိုင်ပွဲဝင်ခိုင်းတဲ့အခါ သူဩဇာကိုသုံးပြီး ဆုတွေကို တိုးမြှင့်ခိုင်းလေ့ ရှိပါတယ်" ယုချူးယွမ်က ရှင်းပြသည်။

ချူးယွင်ဖန်းက ပြုံးလိုက်မိသည်။ ဤအခြေအနေသည် အတော်စိတ်ဝင်စားဖွယ်ကောင်းလှ၏။ ယုချူးယွမ်​၏ ပြောပြချက်အရ ဤကိစ္စသည် လူမသိသူမသိ လက်ခံထားကြသည့် အစဉ်အလာတစ်ခုဖြစ်နေပုံရသည်။ ယခုပြိုင်ပွဲသည် အစစ်အမှန်တပည့်များ၏ အာရုံစိုက်မှုကို မရရှိသည့်အပြင် ဂိုဏ်း၏ အထက်လူကြီးများသည်လည်း အနည်းငယ်ပင် ဂရုမစိုက်ကြပေ။

အပြင်စည်းတပည့်များနှင့် အတွင်းစည်းတပည့်များသည် ဂိုဏ်းတစ်ခု၏ အခြေခံအုတ်မြစ်ဖြစ်သည့်အတွက် အရေအတွက် များပြားလေ ပို၍ကောင်းမွန်လေဖြစ်သည်။ သို့သော် အကြီးအကဲများ၏ အသိအမှတ်ပြုမှုကို အမှန်တကယ် ရရှိနိုင်ရန် အနည်းဆုံးလျှင် အထူးချွန်ဆုံးတပည့်အဆင့် သို့မဟုတ် ထိုထက် မြင့်မားသည့်အဆင့်သို့ရောက်ရှိရန် လိုအပ်ပေသည်။ ဤအချက်ကြောင့် အစစ်အမှန်တပည့်များ ကြားဝင်စွက်ဖက်ရန် အခွင့်အရေးများရရှိလာစေသည်။

ကြယ်ကြွေကောင်းကင်ဂိုဏ်း၏ အထက်လူကြီးများသည် ဤအခြေအနေကို သိရက်နှင့် မျက်ကွယ်ပြုထားခြင်းဖြစ်ကြောင်း ချူးယွင်ဖန်း အလွယ်တကူ ခန့်မှန်းမိလိုက်သည်။ အစစ်အမှန်တပည့်များက ၎င်းတို့၏ ကိုယ်ပိုင်အင်အားစုများကို ဗြောင်ကျကျ ပျိုးထောင်နေခြင်းနှင့်ပတ်သက်၍ အကြီးအကဲများက ဂရုမစိုက်ကြချေ။ ဤသည်မှာ စမ်းသပ်မှုတစ်ခု၏ တစ်စိတ်တစ်ပိုင်းဖြစ်ပေလိမ့်မည်။ ကြယ်ကြွေကောင်းကင်ဂိုဏ်း၏ ဂိုဏ်းခေါင်းဆောင်အဆင့်သည် တစ်ဦးတစ်ယောက်တည်း ရုန်းကန်နိုင်သည့် ရာထူးမျိုး မဟုတ်ဘဲ နောက်ကွယ်တွင် ထောက်ပံ့ပေးမည့် ကျွမ်းကျင်သူအမြောက်အမြား ရှိနေရန် လိုအပ်သည်။

"တချို့ နှစ်တွေမှာဆိုရင် တပည့်အရင်း စီနီယာ နှစ်ယောက်၊ သုံးယောက်လောက်က ပြိုင်ပွဲထဲကို တစ်ပြိုင်နက်တည်း ဝင်ရောက်စွက်ဖက်တာမျိုးတောင် ရှိတတ်တယ်။ အဲလိုဖြစ်လာပြီဆိုရင်တော့ ပြိုင်ပွဲက ပိုပြီးတော့တောင် ပြင်းထန်လာတတ်တယ်" ယုချူးယွမ်က ပြောလိုက်သည်။

"ဒါပေမယ့် အဲဒီလို အခြေအနေမျိုးက ခဏခဏတော့ သိပ်မဖြစ်ဘူး။ တပည့်အရင်းတွေအတွက် အတွင်းစည်းတပည့်တွေဆိုတာ နိမ့်ကျလွန်းသေးတယ်။ သူတို့ တကယ် မျက်စိကျတဲ့သူမျိုး မဟုတ်ရင် ဒီလိုအဆင့်နိမ့်ပြိုင်ပွဲမျိုးထဲကို ဝင်စွက်ဖက်လေ့မရှိကြဘူး။ နောက်ပြီးတော့ သူတို့အနေနဲ့ စိတ်ထင်တိုင်း ဝင်စွက်ဖက်နေရင် အရင်းအမြစ်တွေ အများကြီး ကုန်ဆုံးသွားနိုင်တယ်လေ"

ဤကိစ္စ၏ နောက်ကွယ်တွင် ရှုပ်ထွေးလှသည့် အကျိုးစီးပွား ဖလှယ်မှုများ ရှိနေရမည်ဖြစ်ကြောင်း ချူးယွင်ဖန်း ချက်ချင်း နားလည်လိုက်သည်။ သို့မဟုတ်ပါက အထက်လူကြီးများက ကြယ်ကြွေကောင်းကင်အသီးကို အဘယ်ကြောင့် ဆုလာဘ်အဖြစ် ပေးအပ်ကြမည်နည်း။ အကျိုးစီးပွား တစ်ခုခုနှင့် လဲလှယ်ထားခြင်းသာ ဖြစ်ပေလိမ့်မည်။ ဝမ်ယိဖန်သည်လည်း ယခုနှစ်ပြိုင်ပွဲတွင် တစ်စုံတစ်ယောက်ကို အနိုင်ရရှိရန် လောင်းကြေးထပ်ထားခြင်းဖြစ်ပေလိမ့်မည်။

ယုချူးယွမ်၏ ရှင်းပြချက်ကို နားထောင်ပြီးနောက် ချူးယွင်ဖန်းသည် ကြယ်ကြွေကောင်းကင်ဂိုဏ်း၏ အထက်အောက် စနစ်ယန္တရားများကို ပိုမို ရှင်းလင်းစွာ သဘောပေါက်သွားသည်။ ဤလောကသည် ပြင်းထန်သည့် တိုက်ပွဲများဖြင့် ပြည့်နှက်နေ၍ ဂိုဏ်းအတွင်း၌လည်း အုပ်စုအမျိုးမျိုးဖြင့် ကွဲပြားလျက်ရှိသည်။ အစစ်အမှန်တပည့်များနှင့် အကြီးအကဲများသည် အုပ်စုငယ်များဖြစ်ကြ၍ ထိုအုပ်စုငယ်များ စုစည်းပြီးနောက် ကြယ်ကြွေကောင်းကင်ဂိုဏ်း၏ ကြီးမားလှသော အခြေခံအုတ်မြစ်များ ဖြစ်လာပေလိမ့်မည်။

"စိတ်ဝင်စားဖို့ကောင်းသားပဲ။ ဒါဖြင့်ရင်တော့ ကျုပ် ဒီနှစ်ပြိုင်ပွဲမှာ အနိုင်ရမှဖြစ်တော့မယ်" ချူးယွင်ဖန်းက လှောင်ပြုံးပြုံးသည်။

"ဝမ်ယိဖန် မြှောက်ပင့်ပေးနေတဲ့ တပည့်ကို ခင်ဗျား သိလား"

"စီနီယာဝမ်ယိဖန် မြှောက်ပင့်နေတဲ့သူက ယွီဝမ်ရှင်းပါ။ သူက စီနီယာ့ထက် တစ်သုတ်စောပြီး လွန်ခဲ့တဲ့ သုံးနှစ်က ဂိုဏ်းထဲကို င်လာတာပါ။ သူက အရမ်းပါရမီရှိပြီး ကျင့်ကြံမှုကလည်း လွန်ခဲ့တဲ့ သုံးနှစ်ကတည်း တော်တော်လေး ပြိုင်ဘက်ကင်းတယ်လို့ ပြောကြပါတယ်။ ဒီနှစ်မှာ သူ အနိုင်ရဖို့ ရည်မှန်းထားပုံပဲ။ သာမန်အတွင်းစည်း ဒြပ်မဲ့လေ့လာသူအဆင့်တောက် သူနဲ့ ယှဉ်နိုင်လောက်မယ် မထင်ဘူး။ စီနီယာဝမ်က တပည့်အရင်းဖြစ်တာ သိပ်မကြာသေးတော့ သူ့ဆီမှာ အရည်အချင်းရှိတဲ့တပည့်တော့ အများကြီးမရှိဘူး” ယုချူးယွမ်က သတင်းပို့ပြီးနောက် ဆက်မေးလိုက်သည်။

“ယွီဝမ်ရှင်းရဲ့ သိုင်းပညာတွေအကြောင်း ကျွန်တော် စုံစမ်းပေးရမလား၊ စီနီယာချူး”

ချူးယွင်ဖန်းက ခေါင်းခါလိုက်သည်။

"မလိုပါဘူး။ ယွီဝမ်ရှင်းက ဘယ်သူပဲဖြစ်ဖြစ် ကျုပ်ဂရုမစိုက်ဘူး။ ဘာတွေပဲဖြစ်ဖြစ် ဝမ်ယိဖန်ကို နှစ်ခါရှုံးအောင် လုပ်ပြမယ်။ ခင်ဗျားလည်း ဒီအတောအတွင်း သေချာကျင့်ကြံထားဦး။ အချိန်ကျရင် ခင်ဗျားလည်း ပြိုင်ပွဲ ရလဒ်ကောင်းတွေ ရလိမ့်မယ်"

"ဟုတ်ကဲ့ စီနီယာချူး"

ယုချူးယွမ်သည် သူ၏စိတ်ထဲရှိ စိတ်လှုပ်ရှားမှုများကို ထိန်းချုပ်လိုက်သည်။ ချူးယွင်ဖန်းလက်အောက်သို့ ခိုလုံခြင်းသည် အချိန်အတော်ကြာ စဥ်စားပြီးနောက် ပြုလုပ်ခဲ့သည့် ဆုံးဖြတ်ချက်ဖြစ်သည်။ မည်သူထံမဆို ဝင်ရောက်ခိုလုံနိုင်သော်လည်း နှင်းတောထဲတွင် မီးသွေး ပေးကမ်းခြင်းသည် ဘိုကိတ်ဝတ်ရုံပေါ်တွင် ပန်းပွင့်များရေးဆွဲခြင်းထက် ပို၍ ကောင်းမွန်ပေသည်။ ယုချူးယွမ် ထွက်ခွာသွားပြီးနောက် ချူးယွင်ဖန်းသည် သီးသန့်ကျင့်ကြံရန် ဆက်လက်လုပ်ဆောင်လိုက်သည်။ အခြားလူများ၏ အမြင်တွင် သူသည် ဝမ်ယိဖန်ကို စိန်ခေါ်ထားသဖြင့် သေလူတစ်ဦးကဲ့သို့ဖြစ်နေသော်လည်း ချူးယွင်ဖန်း ကိုယ်တိုင်သာလျှင် သူ၏ရန်သူအစစ်အမှန်သည် လီရှန်ယွမ်ဖြစ်ကြောင်း သိထားသည်။

"စီယွီ၊ ကိုယ်လာနေပါပြီ..." ချူးယွင်ဖန်းက လက်သီးကို ကျစ်ကျစ် ဆုပ်ပြီးနောက် ပြန်လွှတ်ချလိုက်သည်။ ပြီးနောက် မျက်လုံးမှိတ်၍ ကျင့်ကြံမှုအတွင်းသို့ နစ်မြုပ်သွားလေသည်။

အချိန်များ တစ်ရက်ပြီးတစ်ရက် ကုန်ဆုံးသွား၍ တစ်လအကြာတွင် အတွင်းစည်းတပည့်ပြိုင်ပွဲ ကျင်းပမည့်နေ့သို့ ရောက်ရှိလာခဲ့သည်။ ကောင်းကင်ယံမှ ခေါင်းလောင်းသံများ ဆက်တိုက် ထွက်ပေါ်လာသည်။ ပြိုင်ပွဲစတင်တော့မည်ဖြစ်ကြောင်း လူတိုင်း သိလိုက်ကြသည်။ ဂိုဏ်း၏ အလယ်ဗဟိုတွင် ရွှေရောင်အလင်းတန်းကြီးတစ်ခု ပေါ်ပေါက်လာ၍ တံခါးတစ်ခုအဖြစ် ပြောင်းလဲသွားသည်။ ၎င်းသည် ပြိုင်ပွဲကျင်းပမည့် နယ်မြေငယ်တစ်ခုဆီ ဦးတည်နေသော တံခါးဖြစ်သည်။

ကြယ်ကြွေကောင်းကင်ဂိုဏ်း၏ နယ်မြေသည် အလွန်ကျယ်ပြောလှသော်လည်း လက်တွေ့တွင် အပြင်ပန်းမှ မြင်တွေ့ရသည်ထက် အဆပေါင်း ပိုမိုကြီးမားပေသည်။ ကြယ်ကြွေကောင်းကင်ဂိုဏ်း၏ ဗဟိုနန်းဆောင်ကို အလယ်ဗဟိုပြု၍ သေးငယ်သော ကမ္ဘာငယ်အမြောက်အမြားဖြင့် ချိတ်ဆက်ထားသောကြောင့် လူအများသည် တယ်လီပို့လမ်းကြောင်းများကို အသုံးပြုကာ သွားလာလှုပ်ရှားရသည်။ ကြယ်ကြွေကောင်းကင်ဂိုဏ်းတွင် ထိုကဲ့သို့ အတိုင်းအဆမဲ့သည် ကမ္ဘာငယ်ပေါင်း မည်မျှရှိသည်ကို မည်သူမျှ မသိကြပေ။

ယခုတစ်ကြိမ်တွင် ဖွင့်လှစ်လိုက်သည့် နယ်မြေသည် အတွင်းစည်းတပည့် ပြိုင်ပွဲကျင်းပမည့် နယ်မြေဖြစ်သည်။ ကြိုတင်ပြင်ဆင်ထားကြသည့် အတွင်းစည်းတပည့်ပေါင်းများစွာသည် အလင်းတန်းများကို နင်းလျှောက်၍ ထိုအလင်းတံခါးရှိရာ အရပ်ဆီသို့ ဦးတည်သွားကြလေသည်။

တစ်ချိန်တည်းမှာပင် ကောင်းကင်ယံ၌ ကြီးမားသော မျက်နှာပြင်ကြီးတစ်ခု ပေါ်ပေါက်လာသည်။ ထိုမျက်နှာပြင်ပေါ်တွင် နယ်မြေငယ်အတွင်းမှ မြင်ကွင်းများကို တိုက်ရိုက်ထုတ်လွှင့်ပြသနေသည်။ တပည့်ပေါင်းများစွာသည် ဤအလင်းမျက်နှာပြင်များမှတစ်ဆင့် ပြိုင်ပွဲကို စောင့်ကြည့်နိုင်ကြသည်။ အထူးသဖြင့် ပြိုင်ပွဲဝင်ရန် အစီအစဉ်မရှိကြသည့် အပြင်စည်းတပည့်များနှင့် အတွင်းစည်းတပည့်များအတွက်မူ ဤကဲ့သို့သော တိုက်ပွဲမျိုးကို အချိန်တိုင်း မြင်တွေ့နိုင်ကြမည် မဟုတ်ပေ။ ၎င်းတို့သည် ထိုတိုက်ပွဲများကို စောင့်ကြည့်လေ့လာခြင်းဖြင့် တိုက်ခိုက်မှုအတွေ့အကြုံများနှင့် တိုက်ပွဲဆိုင်ရာ နားလည်သဘောပေါက်မှုများကို တိုးတက်အောင် လုပ်ဆောင်နိုင်ကြသည်။

ကောင်းကင်ယံတွင် အလင်းတန်းများ ပေါ်ထွက်လာ၍ ကောင်းကင်တစ်ခုလုံးကို ဖုံးလွှမ်းသွားသည့် အလင်းလိုက်ကာကြီးတစ်ခုအသွင် ဖြစ်ပေါ်လာသောကြောင့် အလွန်ပင် ခန့်ညားထည်ဝါလှပေသည်။ ထိုအခါ အလင်းမျက်နှာပြင်အမြောက်အမြားနှင့် မလှမ်းမကမ်းတွင် လာရောက်ကြည့်ရှုကြသည့် တပည့်များစွာ ပေါ်ပေါက်လာကြသည်။