အခန်း (၇၂၇-၇၂၉)

အခန်း (၇၂၇) - နက်ရှိုင်းသော မိန်းမပျို ဂိုဏ်းမှ မိတ်ဟောင်းဆွေဟောင်း (အပိုင်း ၃)

~စစ်ခုန်လန် ၏ မျက်နှာသွင်ပြင်သည် တစ်ဖန် .. ပြောင်းလဲသွားလေ၏။

သူက နောက်သို့ ချာခနဲ လှည့်ကာ မိမိ၏ စစ်တပ်ကြီးကို အာရုံ ပို့လွှတ်လိုက်သည်။ သူတို့ကလည်း သူ့ကို စိမ်းစိမ်းကြည့်နေကြသည်။

စစ်ခုန်လန် ၏ ခေါင်းထဲတွင် အတွေးများ ချာချာလည်နေပြီး ဂိုဏ်းအသီးသီးမှ ခေါင်းဆောင်များထံသို့ အသံလွှင့်ကာ လှမ်းမေးလိုက်၏။

“အကယ်လို့ ခင်ဗျားတို့ အားလုံး တပ်စုခွဲခံရမယ် ဆိုရင်တောင် လိုအပ်လာတဲ့အခါ ကျွန်တော့်အမိန့်ကို နာခံကြဦးမှာလား”

“စိတ်ချပါ အစ်ကို စစ်ခုန် ရယ်... ကျွန်တော်တို့ အားလုံးက ဂိုဏ်းအသစ်တွေချည်းပဲလေ... ဟို ရှေးဟောင်း ဂိုဏ်းကြီးတွေဆီကနေ အစာလုစားခဲ့ရတဲ့ ဘဝတူတွေဆိုတော့ သေချာပေါက် စည်းလုံးရမှာပေါ့”

ထို အာမခံချက်ကို ကြားလိုက်ရမှသာ စစ်ခုန်လန် တစ်ယောက် စိတ်အေးသွားတော့၏။

အကယ်၍သာ သူတို့က တရားမျှတမှုအကြောင်းကို လာပြောနေမည် ဆိုပါက စစ်ခုန်လန် အနေဖြင့် သူတို့ကို လုံးဝ ယုံကြည်မည် မဟုတ်ချေ။

သို့သော် အကျိုးအမြတ်အကြောင်း ပြောလာလျှင်မူ အထူးသဖြင့် ရှေးဟောင်း ဂိုဏ်းကြီးများ၏ ပါးစပ်ထဲမှ အစာကို လုယူလိုသော တူညီသည့် လောဘသားကောင် စိတ်ဓာတ်မျိုး ရှိနေကြသဖြင့် စစ်ခုန်လန် သူတို့ကို ယုံကြည်လိုက်၏။

အကြောင်းမူကား ဤဂိုဏ်းများ အားလုံးသည် အသစ် တည်ထောင်ထားကြသူများ ဖြစ်ပြီး ရှေးဟောင်း ဂိုဏ်းကြီးများ၏ ချုပ်ချယ်မှုကို မခံလိုကြပေ။ လွတ်လပ်မှုကို လိုလားကြသောကြောင့်သာ စိမ်းပြာ နက်ရှိုင်း အင်မော်တယ်ဂိုဏ်း နှင့် ပူးပေါင်းကာ မဟာမိတ် ဖွဲ့ခဲ့ကြခြင်း ဖြစ်သည်။

“ဒါဆိုရင်လည်း လောလောဆယ် ခင်ဗျားတို့ကို ဒုက္ခပေးရတော့မယ်ဗျာ... အောက်ခြေက လူတွေကို သေချာလေး ချော့မော့ပြောဆိုပြီး ထိန်းထားပေးကြပါဦး”

“ကျွန်တော်တို့ နားလည်ပါတယ် အစ်ကို စစ်ခုန်”

ထိုအခါမှသာ စစ်ခုန်လန် က ရှေ့သို့ ပြန်လှည့်လိုက်သည်။ သူ၏ မျက်နှာပေါ်တွင် နွေဦးရာသီပမာ ခပ်ပြုံးပြုံး အမူအရာက တစ်ဖန် ပြန်လည် ပေါ်ပေါက်လာပြီး ချီခယ်ချင်း ကို ပြောလိုက်၏။

“ကျွန်တော် သူတို့နဲ့ တိုင်ပင်ပြီးသွားပါပြီ... ကျွန်တော်တို့ အားလုံး စီနီယာအစ်မကြီး ချီ ရဲ့ စစ်တပ်ထဲကို ဝင်ဖို့ ဆန္ဒရှိပါတယ်ဗျ... ဒါပေမဲ့ စည်းကမ်းချက် တစ်ခုတော့ ရှိတယ်... စီနီယာအစ်မကြီး ချီ အနေနဲ့ ကျွန်တော့်ကို အချိန်မရွေး ပြန်ထွက်ခွင့် ပြုနိုင်မလား... ပြီးတော့ အကြံဉာဏ် ပေးခွင့်ရော ရနိုင်မလားဗျ”

ချီခယ်ချင်း က သူ့ကိုရော သူ၏ နောက်ကွယ်ရှိ စစ်တပ်ကြီးကိုပါ မမှိတ်မသုန် စိမ်းစိမ်းကြည့်လိုက်၏။

ဖူယောင် နယ်မြေ ၏ ဒုတိယမြောက် အင်မော်တယ် ဂိုဏ်း ဖြစ်သည့် စိမ်းပြာ နက်ရှိုင်း အင်မော်တယ်ဂိုဏ်း နှင့် ၎င်းတို့နောက်မှ ထောက်ခံနေသော ဂိုဏ်းငယ်များ၏ အင်အားမှာ မနည်းလှပေ။ ဖူယောင် နယ်မြေ တစ်ခုလုံးရှိ စစ်ရေးအင်အား၏ (၃၀) ရာခိုင်နှုန်းခန့်ကို နေရာယူထား၏။

ဤ (၃၀) ရာခိုင်နှုန်းသော အင်အားကို ရရှိခြင်းက ချီခယ်ချင်း အတွက် သေချာပေါက် မက်မောစရာ ဖြစ်နေသည်မှာ ယုံမှားဖွယ်မရှိချေ။

ထို့ကြောင့် ချီခယ်ချင်း က အချိန်အတော်ကြာ တိတ်ဆိတ်သွားပြီးနောက်မှ ခေါင်းညိတ်ကာ ဆိုလိုက်၏။

“ရတယ်လေ”

ချီခယ်ချင်း က ဤလူများ သူမ၏ စစ်တပ်ထဲသို့ ဝင်ရောက်လာပါက အများစုကို သူမဘက် ပါလာအောင် သိမ်းသွင်းနိုင်မည်ဟု မိမိကိုယ်ကိုယ် ယုံကြည်ချက် အပြည့် ရှိနေ၏။

စစ်ခုန်လန် ၏ အကြံပြုချက်များ ဆိုသည်မှာကား... အကယ်၍ သူမ၏ လိုအပ်ချက်များနှင့် ကိုက်ညီနေလျှင် သေချာပေါက် လက်ခံပေးမည် ဖြစ်ပြီး၊ မကိုက်ညီလျှင်တော့ လေထဲလွှင့်ပစ်လိုက်ရုံသာ ရှိတော့မည် မဟုတ်ပါလော။

တဆက်တည်း၌ပင် စစ်ခုန်လန် ဦးဆောင်သော စိမ်းပြာ နက်ရှိုင်း အင်မော်တယ်ဂိုဏ်း စစ်တပ်ကြီးကို တပ်စုခွဲလိုက်ပြီး ချီခယ်ချင်း ၏ ကျောက်စိမ်းအလင်း အင်မော်တယ်ဂိုဏ်း စစ်တပ်ကြီးထဲသို့ ပေါင်းထည့်လိုက်တော့သည်။

ချီခယ်ချင်း က လေးစားမှု ပြသသည့် အနေဖြင့် သူမ၏ ဘေးတွင် စစ်ခုန်လန် အတွက် နေရာတစ်နေရာ ပေးထားလိုက်၏။

စစ်ခုန်လန် နေရာယူပြီးသည်နှင့် တစ်ပြိုင်နက် မေးလိုက်သည်။

“စီနီယာအစ်မကြီး ချီ တို့ကရော ဆုံမှတ် ဘယ်နှခုလောက် သိမ်းပိုက်ပြီးပြီလဲဗျ”

ထိုအခါ ၊ ချီခယ်ချင်း က တည်ကြည်လေးနက်စွာ ဖြေလိုက်၏။

“ငါတို့ ကံကောင်းထောက်မစွာနဲ့ အကြီးစား ဆုံမှတ် တစ်ခုကို သိမ်းပိုက်နိုင်ခဲ့တယ်”

ထိုစကားကို ကြားလိုက်ရသောအခါ စစ်ခုန်လန် ၏ မျက်လုံးများက မနာလိုမှုကြောင့် အရောင်ပင် ပြောင်းသွား၏။

သူက ပေါ့ပေါ့ပါးပါးလေး မေးလိုက်ခြင်း ဖြစ်သော်လည်း တစ်ဖက်လူက ဤမျှအထိ လွှမ်းမိုးနိုင်စွမ်း ရှိနေလိမ့်မည်ဟု လုံးဝ ထင်မှတ်မထားခဲ့ချေ။

စစ်ခုန်လန် က ဖွင့်ဟဝန်ခံလိုက်သည်။

“စီနီယာအစ်မကြီး ချီ က တကယ်ကို ကံကောင်းတာပဲ... အစ်မကြီးဆီ လာပူးပေါင်းတာ မှန်ကန်တဲ့ ဆုံးဖြတ်ချက် ဖြစ်သွားပြီဗျာ”

ချီခယ်ချင်း က ပြန်မေးလိုက်၏။

“မင်းတို့ကရော”

“ကျွန်တော်တို့ အသေးစား ဆုံမှတ် တစ်ခု သိမ်းပိုက်နိုင်ခဲ့တယ်... နောက်ပိုင်း အလယ်အလတ်အဆင့် ဆုံမှတ် တစ်ခု ထပ်တွေ့ခဲ့သေးတယ်ဗျ... ဒါပေမဲ့ ကျယ်ပြန့်တဲ့ ကမ္ဘာ က ကျင့်ကြံသူတွေက ကျွန်တော်တို့ထက် အရင် ရောက်နေပြီး သိမ်းပိုက်ဖို့ ကြိုးစားနေကြတယ်လေ... သူတို့အင်အားက ကျွန်တော်တို့ထက် များနေတော့ အဲဒါကြောင့် စီနီယာအစ်မကြီး ချီ ကို လာရှာရတာပါပဲ”

ချီခယ်ချင်း မျက်မှောင်ကြုတ်သွားသည်။

“ဒီလောက် အရေးကြီးတဲ့ ကိစ္စကို ဘာလို့ စောစောကတည်းက မပြောတာလဲ... အချိန်တွေ အလကား ကုန်သွားတာပဲ”

စစ်ခုန်လန် စိတ်ထဲမှ လျှို့ဝှက် ညည်းတွားလိုက်သည်။

'စောစော ပြောရမလား... ခင်ဗျားရဲ့ စိတ်နေသဘောထားကို မသိရသေးဘဲနဲ့ ခင်ဗျားကို အမြတ်ထုတ်ခွင့် ပေးလိုက်ရင် ကျွန်တော်က စိမ်းပြာ နက်ရှိုင်း အင်မော်တယ်ဂိုဏ်း ရဲ့ တရားခံ ဖြစ်သွားမှာပေါ့'

သို့သော် အပြင်ပန်းတွင်မူ ချော့မော့ပြောဆိုလိုက်၏။

“စိတ်မပူပါနဲ့ စီနီယာအစ်မကြီး ချီ ရယ်... ကျွန်တော် အဲဒီကို ခေါ်သွားပေးပါ့မယ်... အဲဒီ ဆုံမှတ် မှာ နယ်မြေများ ပင်လယ် က ကြမ်းကြုတ်သားရဲတွေ အများကြီး ရှိနေတာ... ကျယ်ပြန့်တဲ့ ကမ္ဘာ က ကျင့်ကြံသူတွေလည်း လောလောဆယ် အဲဒီနေရာကို သိမ်းနိုင်မှာ မဟုတ်သေးပါဘူး”

“အခုချက်ချင်း လမ်းပြစမ်း”

စစ်ခုန်လန် သည် စစ်တပ်ကြီးထဲမှနေ၍ အရိပ်တစ်ခု ပျံတက်သွားသည့်နှယ် ထွက်ခွာသွားပြီး အရပ်မျက်နှာ တစ်ခုဆီသို့ တန်းတန်းမတ်မတ် ဦးတည်သွား၏။

စစ်တပ်ကြီးကလည်း ချက်ချင်း လမ်းကြောင်းပြောင်းကာ သူ၏ နောက်မှ ဒရောသောပါး လိုက်ပါသွားကြတော့သည်။

စစ်ခုန်လန် က ရှေ့ဆုံးမှ ပျံသန်းနေရင်း ချီခယ်ချင်း ထံသို့ လျှို့ဝှက် အသံလွှင့်ကာ မေးလိုက်၏။

“စီနီယာအစ်မကြီး ချီ... ဒီ ဆုံမှတ် ကို ကျွန်တော်တို့က အရင် တွေ့ခဲ့တာ ဆိုတော့လေ... အကယ်လို့ သိမ်းပိုက်ပြီးသွားရင် ကျွန်တော်တို့ကို ဆုလာဘ် (၁၀) ရာခိုင်နှုန်းလောက် ပိုပေးလို့ ရမလားဗျ”

ချီခယ်ချင်း ၏ မျက်လုံးများ အနည်းငယ် ကျဉ်းမြောင်းသွားသည်။

သို့သော် သူမက စကားတစ်ခွန်းတည်းသာ ပြန်ဖြေလိုက်၏။

“ရတယ်”

သူမသည် အမြဲတမ်း သဘောထား ကြီးမြတ်သူ ဖြစ်ပြီး စစ်ခုန်လန် ကဲ့သို့ အပ်ပေါက်လောက် အကျိုးအမြတ်လေးကိုပင် အသေအချာ တွက်ချက်နေသူမျိုး လုံးဝ မဟုတ်ပေ။

...

ထိုအခိုက်အတန့်၌ ချီခယ်ချင်း တို့ စစ်တပ်ကြီးသည် စစ်ခုန်လန် ရှာဖွေတွေ့ရှိခဲ့သော ဆုံမှတ် ဆီသို့ ချီတက်သွားနေချိန်...

နင်ချီ ကလည်း သူ၏ စစ်တပ်ကြီးကို ဦးဆောင်ကာ ထို ဆုံမှတ် ဆီသို့ တန်းတန်းမတ်မတ် ချီတက်နေတော့၏။

စစ်ခုန်လန် သည် ထို ဆုံမှတ် ကို အရင်ဆုံး ရှာတွေ့ခဲ့သည် မှန်သော်လည်း တစ်ကိုယ်တော် အင်အားဖြင့် မသိမ်းပိုက်နိုင်သဖြင့် နေရာအနှံ့ အကူအညီ လိုက်လံ ရှာဖွေနေခဲ့ရာ အချိန် အတော်များများ ကုန်ဆုံးသွားခဲ့သည်။

ထို့ကြောင့် နင်ချီ ၏ နက်ရှိုင်းသော သစ္စာတရား နယ်မြေ စစ်တပ်ကြီးက ယခုအခါ အနီးဆုံး နေရာသို့ ရောက်ရှိနေပြီး အသာစီး ရနေခဲ့တော့၏။

ဝိညာဉ်ရှာဖွေရေး သံလိုက်အိမ်မြှောင် ၏ လမ်းညွှန်မှုနှင့်အတူ နင်ချီ နှင့် သူ၏ အဖွဲ့သည် ကိုယ်ယောင်ဖျောက် အခင်းအကျင်း ကို တစ်ဖန် ပြန်လည် အသက်သွင်းလိုက်ကြပြီး ဆုံမှတ် အနီးသို့ လျှို့ဝှက် ချဉ်းကပ်သွားကြတော့၏။

သူတို့က တစ်ချက် အာရုံ ပို့လွှတ်လိုက်ရာ ကျယ်ပြန့်သော ကမ္ဘာ မှ ကျင့်ကြံသူများသည် နယ်မြေများ ပင်လယ် မှ ကြမ်းကြုတ်သားရဲများနှင့် သည်းကြီးမည်းကြီး တိုက်ခိုက်နေကြဆဲ ဖြစ်သည်ကို မြင်လိုက်ရသဖြင့် အားလုံး၏ နှုတ်ခမ်းထောင့်များတွင် အပြုံးများ ပေါ်လာကြတော့သည်။

ဓားဘိုးဘေးကြီး က ဝမ်းသာအားရ ဆိုလိုက်၏။

“ငါတို့ ကံကောင်းတာပဲ... အလယ်အလတ်အဆင့် ဆုံမှတ် နောက်တစ်ခု ထပ်တွေ့ရပြီ... ပြီးတော့ ကျယ်ပြန့်တဲ့ ကမ္ဘာ က ကျင့်ကြံသူတွေလည်း မသိမ်းပိုက်ရသေးဘူးလေ... ဘယ်အချိန် ဝင်တိုက်ကြမလဲ”

ယခင် ဆုံမှတ် များကို သိမ်းပိုက်ခဲ့သော အတွေ့အကြုံများကြောင့် နက်ရှိုင်းသော သစ္စာတရား နယ်မြေ မှ ဂိုဏ်းများ အားလုံးသည် နင်ချီ ၏ ကွပ်ကဲမှုနှင့် စနစ်တကျ အကွက်ချမှုများ အပေါ် အပြည့်အဝ ယုံကြည်မှု ရှိနေကြတော့၏။

သူတို့အားလုံးက နင်ချီ ၏ ဆုံးဖြတ်ချက်ကို နားစွင့်ကာ တိတ်ဆိတ်စွာ စောင့်ဆိုင်းနေကြသည်။

နင်ချီ ကမူ လုံးဝ အလျင်စလို မရှိဘဲ တည်ငြိမ်စွာ ပြောလိုက်၏။

“ကျွန်တော်တို့ အရင်ဆုံး စောင့်ကြည့်ကြတာပေါ့”

သူက ဝိညာဉ်အာရုံ စွမ်းအားများကို ဖြန့်ကျက်လိုက်ပြီး အတွင်းပိုင်းရှိ အခြေအနေကို သေချာစွာ စူးစမ်း အကဲခတ်လိုက်သည်။

ထို နယ်မြေများ ပင်လယ် မှ ကြမ်းကြုတ်သားရဲများ၏ အရှိန်အဝါကို အာရုံခံရန် အလွန် လွယ်ကူလှသည်။ အကြောင်းမူကား ၎င်းတို့သည် မိမိတို့၏ အရှိန်အဝါကို ဖုံးကွယ်ထားလိုသည့် ရည်ရွယ်ချက် လုံးဝ မရှိဘဲ မိမိတို့၏ ကျင့်ကြံခြင်း အဆင့်အတန်းကို အရှိအတိုင်း ထုတ်ဖော် ပြသထားသောကြောင့်ပင်။

စူးစမ်းကြည့်ပြီးနောက်တွင်မူ ထိုကြမ်းကြုတ်သားရဲများမှာ ဧရာမ ပျားတူကြီးများနှင့် ဆင်တူနေပြီး ၎င်းတို့ထဲမှ အစွမ်းအထက်ဆုံး ကောင်များမှာ ပေါင်းစည်းခြင်း နယ်ပယ် နှောင်းပိုင်းအဆင့်တွင် ရှိနေကြောင်း နင်ချီ တွေ့ရှိလိုက်ရ၏။

ဤအရာက ပျားအုပ်ကြီး တစ်အုပ် ဖြစ်နေသည်မှာ ထင်ရှားလှသည်။ ၎င်းတို့ထဲတွင် ပေါင်းစည်းခြင်း နယ်ပယ် ရှိ ပျားမိစ္ဆာ (၁၀) ကောင်၊ ဟင်းလင်းပြင် လမ်းစဉ် နယ်ပယ် အဆင့် ရာနှင့်ချီပြီး ပါဝင်ကာ မူလဝိညာဉ် နယ်ပယ် အဆင့် ထောင်နှင့်ချီ၍ ပါဝင်နေသည်။

သူတို့က ဆုံမှတ်ပုလဲ ကို ဝန်းရံထားပြီး ပျားအုံနှင့် တူသော အဆောက်အအုံ တစ်ခုကို တည်ဆောက်ထားကြသည်။ ထိုအရာက အဝါရောင် အလင်းတန်းများ တောက်ပစွာ ဖြာထွက်နေ၏။

ရံဖန်ရံခါတွင် ကျယ်ပြန့်သော ကမ္ဘာ မှ ကျင့်ကြံသူများဘက်ရှိ အထွတ်အထိပ် ဘိုးဘေးကြီး များ၏ တိုက်ခိုက်မှုများက ပျားအုံကြီးပေါ်သို့ ကျရောက်လာတတ်သော်လည်း လုံးဝ စုပ်ယူခံလိုက်ရပြီး ပြန့်ကျဲ ပျောက်ကွယ်သွား၏။

ဤပျားအုံကြီးသည် ကြောက်မက်ဖွယ် ကာကွယ်ရေး စွမ်းအားများကို ပိုင်ဆိုင်ထားရုံသာမက အခြားသော လုပ်ဆောင်ချက်များလည်း ရှိနေသည်မှာ ယုံမှားဖွယ်မရှိပေ။

နင်ချီ က ထိုပျားအုံကြီးကို သေချာစွာ အာရုံခံကြည့်လိုက်ရာ ၎င်း၏ တည်ဆောက်ပုံမှာ သာမန် ပျားအုံများနှင့် ဆင်တူပြီး ဆဋ္ဌဂံပုံစံ အခန်းငယ် မြောက်မြားစွာဖြင့် ဖွဲ့စည်းထားကြောင်း တွေ့လိုက်ရသည်။

သို့ဖြစ်သော်ငြားလည်း ထိုအရာဆီမှ အခင်းအကျင်း တစ်ခု၏ စွမ်းအားကို နင်ချီ ခံစားလိုက်ရသဖြင့် သူ့ကို အနည်းငယ် အံ့အားသင့်သွားစေသည်။

ပုံမှန်အားဖြင့် မိစ္ဆာသားရဲများသည် အခင်းအကျင်းများ တည်ဆောက်ရာတွင် ကျွမ်းကျင်မှု မရှိကြချေ။ သို့သော် ဤ ပေါင်းစည်းခြင်း နယ်ပယ် ပျားအုပ်ကြီးကမူ ချွင်းချက် တစ်ခု ဖြစ်နေသည်မှာ ထင်ရှားသည်။ သူတို့က မွေးရာပါ အခင်းအကျင်း သခင်များ ဖြစ်နေကြတော့၏။

အခန်း (၇၂၈) - နက်ရှိုင်းသော မိန်းမပျို ဂိုဏ်းမှ မိတ်ဟောင်းဆွေဟောင်း (အပိုင်း ၄)

~ဤအရာများအပြင် ထိုပျားအုံကြီးထံမှ အခြားသော အရာများကိုလည်း နင်ချီ အာရုံခံမိလိုက်သေးသည်။

ပျားအုံကြီး၏ အတွင်းပိုင်း၌ မှေးမှိန်သော်လည်း သန်စွမ်းလှသော သက်စောင့်စွမ်းအင်တစ်ခု စီးဆင်းနေသည်။ ထိုအရာက အတွင်းဘက်တွင် ကြောက်မက်ဖွယ် တည်ရှိမှုကြီး တစ်ခု ရှိနေကြောင်း သက်သေပြနေလေ၏။

နင်ချီ၏ အကြည့်များက ကျယ်ပြန့်သော ကမ္ဘာ မှ ကျင့်ကြံသူများကို သည်းကြီးမည်းကြီးတိုက်ခိုက်နေသော ပျားအုပ်ကြီးများနှင့် ပျားအုံထဲမှ ရံဖန်ရံခါ ထွက်ပေါ်လာတတ်သည့် ပျားမိစ္ဆာ တပ်ဖွဲ့များအပေါ်သို့ ဝေ့ဝဲ ကျရောက်သွားသည်။

ရုတ်တရက် နင်ချီ သဘောပေါက်သွားတော့၏။ ထိုပျားအုံကြီးထဲတွင် ပျားဘုရင်မကြီး တစ်ကောင် သေချာပေါက် ရှိနေရမည်။ ထိုပျားဘုရင်မကြီးက ကျယ်ပြန့်သော ကမ္ဘာ မှ ကျင့်ကြံသူများကို တိုက်ခိုက်ရန် ပျားမိစ္ဆာများကို အဆက်မပြတ် မွေးဖွား ထုတ်လုပ်ပေးနေခြင်း ဖြစ်သည်။

ဤမြင်ကွင်းကို ကြည့်ရင်း နင်ချီ နှုတ်ခမ်းထောင့်များ ကွေးတက်သွားကာ ခပ်ပြုံးပြုံး ဖြစ်သွားတော့၏။

ကျယ်ပြန့်သော ကမ္ဘာ မှ ကျင့်ကြံသူများ အနေဖြင့် ဤ ဆုံမှတ် ကို သိမ်းပိုက်ရန် အချိန်အတော်ကြာ ယူနေရသည်မှာ မဆန်းတော့ပေ။ အကြောင်းမူကား သူတို့သည် အသည်းထိတ်ဖွယ် ပျားအုပ်ကြီးနှင့် ရင်ဆိုင်နေရသောကြောင့်ပင်။

သူက ဝိညာဉ်အာရုံကို ကျယ်ပြန့်သော ကမ္ဘာ မှ ကျင့်ကြံသူများဆီသို့ ဖြန့်ကျက်လိုက်သည်။ သူတို့၏ စစ်တပ်အင်အားမှာ နက်ရှိုင်းသော သစ္စာတရား နယ်မြေ ၏ စစ်တပ်နှင့် ယှဉ်လျှင် အရေအတွက်ပိုင်း၌ များစွာ ကွာဟနေဆဲပင်။ နက်ရှိုင်းသော သစ္စာတရား နယ်မြေ အင်အား၏ သုံးပုံတစ်ပုံခန့်သာ ရှိ၏။

ဤအချက်က ဗျိုင်းဖြူအင်မော်တယ်ဂိုဏ်း ထံမှ နင်ချီ ကြိုတင် သိရှိထားခဲ့သည့် အချက်အလက်များနှင့် လုံးဝ ကိုက်ညီနေ၏။

ကျယ်ပြန့်သော ကမ္ဘာ မှ ကျင့်ကြံသူများသည် ဤစစ်မြေပြင်နယ်မြေ အတွင်း တောင်နှင့် ပင်လယ် ကမ္ဘာ မှ ဝင်ရောက်လာသူများမှာ အရေးမပါသော အညတရ ဝိညာဉ်နယ်မြေ ကျင့်ကြံသူများသာ ဖြစ်ပြီး ဂရုစိုက်စရာ မလိုဟု ထင်မှတ်ထားပုံရသည်။ ထို့ကြောင့်ပင် သူတို့က ဂိုဏ်းအသီးသီး ခွဲထွက်ကာ ဆုံမှတ် များကို သီးခြားစီ တိုက်ခိုက်နေကြခြင်း ဖြစ်သည်။

မီးတောက်များပမာ နီရဲတောက်ပနေပြီး အထက်တန်းကျ၍ လှပချောမော သော ကျယ်ပြန့်သော ကမ္ဘာ မှ ကျင့်ကြံသူများ၏ ဝတ်စုံများပေါ်သို့ နင်ချီ၏ အကြည့်များ ကျရောက်သွားသည်။

ဗျိုင်းဖြူအင်မော်တယ်ဂိုဏ်း ထံမှ ရရှိထားသော သတင်းအချက်အလက်များနှင့် တိုက်ဆိုင် စစ်ဆေးကြည့်လိုက်သောအခါ ဤကျင့်ကြံသူများ၏ ဇာစ်မြစ်ကို လျင်မြန်စွာပင် ခွဲခြား သိရှိသွားတော့၏။

ဤကျင့်ကြံသူများသည်လည်း ဝိညာဉ်ငှက်နယ်မြေ မှ လာကြသူများ ဖြစ်ပြီး မီးလျှံငှက် အင်မော်တယ်ဂိုဏ်း သို့ သက်ဝင်ယုံကြည်ကြသူများ ဖြစ်သည်။ မီးလျှံငှက် အင်မော်တယ်ဂိုဏ်းသည် ဗျိုင်းဖြူအင်မော်တယ်ဂိုဏ်း ထက် ပိုမို အစွမ်းထက်ပြီး ဝိညာဉ်ငှက်နယ်မြေ တစ်ခုလုံးကို လောကကို အုပ်စိုး ထားသည့် ထိပ်သီးဂိုဏ်းကြီး တစ်ခု ဖြစ်၏။

ဝိညာဉ်ငှက်နယ်မြေ ၏ နယ်မြေအရှင်သခင် သည်လည်း မီးလျှံငှက် အင်မော်တယ်ဂိုဏ်း မှ ပုဂ္ဂိုလ်တစ်ဦးပင် ဖြစ်သည်။ နင်ချီက မီးလျှံငှက် အင်မော်တယ်ဂိုဏ်း မှ လူများကို လျှို့ဝှက် အကဲခတ်ကြည့်လိုက်ရာ သူတို့အထဲတွင် ဝိညာဉ်ငှက်နယ်မြေ ၏ နယ်မြေအရှင်သခင် ပါဝင်မနေကြောင်း သတိပြုမိလိုက်၏။

နယ်မြေအရှင်သခင် ကဲ့သို့သော ထူးခြားသည့် တည်ရှိမှုမျိုးကို နင်ချီ အနေဖြင့် အလွယ်တကူ အာရုံခံ သိရှိနိုင်စွမ်း ရှိသည်။ ၎င်းမှာ နယ်မြေအရှင်သခင် များ အချင်းချင်း ကြားတွင်သာ ရှိသော အထူး အာရုံခံနိုင်စွမ်း တစ်ရပ် ဖြစ်သည်။ ထို့အပြင် နင်ချီသည် အစစ်အမှန်သိုင်း ကမ္ဘာ့အရှင်သခင် ဖြစ်နေသည့်အတွက် နယ်မြေအရှင်သခင်များအပေါ် အာရုံခံနိုင်စွမ်းမှာ အတပ်သိ၊ ပြိုင်ဘက်ကင်းသလောက် ပင် ထက်မြက်လှ၏။

ယခုကဲ့သို့ ဝိညာဉ်ငှက်နယ်မြေ ၏ နယ်မြေအရှင်သခင် နှင့် မဆုံတွေ့လိုက်ရခြင်းက အနည်းငယ် စိတ်ပျက်အားငယ် စရာ ဖြစ်သော်လည်း ဆက်လက် ရှာဖွေသွားမည် ဆိုပါက တစ်ချိန်ချိန်တွင် သေချာပေါက် ဆုံတွေ့ရမည်သာ ဖြစ်သည်။

နင်ချီက ရှေ့ဘက်ရှိ မီးလျှံငှက် အင်မော်တယ်ဂိုဏ်း မှ ကျင့်ကြံသူများအပေါ် ..အာရုံစူးစိုက်လိုက်သည်။

သူ၏ ဝိညာဉ်အာရုံဖြင့် တစ်ချက် ဝေ့ကြည့်လိုက်သည်နှင့် သူတို့၏ ခွန်အား အဆင့်အတန်းများကို ချက်ချင်း အကဲဖြတ်နိုင်ခဲ့၏။

ဤကျင့်ကြံသူများမှာ အမှန်တကယ်ပင် အစွမ်းထက်လှသည်။

ပေါင်းစည်းခြင်း နယ်ပယ် အဆင့်ရှိသူ (၃၀) ဦး ပါဝင်ပြီး၊ အထွတ်အထိပ် ဘိုးဘေးကြီး (၃) ယောက်၊ ထိပ်တန်း ဘိုးဘေးကြီး (၅) ယောက် နှင့် သာမန် ဘိုးဘေးကြီး (၁၀) ယောက် အပြင်၊ ၎င်းတို့၏ လက်အောက်တွင် ထိပ်တန်း ကျင့်ကြံသူ အများအပြား ပါဝင်နေကြ၏။

အုပ်စုလိုက် တိုက်ခိုက်ရာတွင် ကျွမ်းကျင်ပြီး အခင်းအကျင်း၏ အထောက်အပံ့ ပါဝင်နေသော နယ်မြေများ ပင်လယ် မှ ပျားမိစ္ဆာများကို ရင်ဆိုင်ရာတွင် သူတို့က ပျားအုပ်ကြီးများကို ဖိနှိပ်ထားနိုင်စွမ်း ရှိကြသည်။ အပေါ်ယံ ကြည့်မည်ဆိုပါက သူတို့၏ အင်အားက နက်ရှိုင်းသော သစ္စာတရား နယ်မြေ စစ်တပ်ကြီးထက်ပင် အနည်းငယ် သာလွန်နေသယောင် ရှိသည်။

မည်သို့ပင်ဆိုစေ နက်ရှိုင်းသော သစ္စာတရား နယ်မြေ ၏ စစ်တပ်ကြီးထဲတွင် ပေါင်းစည်းခြင်း နယ်ပယ် မှ အစစ်အမှန်ဧကရာဇ် တစ်ပါးတစ်လေမျှပင် မပါဝင်သည် မဟုတ်ပါလော။

အခြေအနေ အရပ်ရပ်ကို နားလည် သဘောပေါက်သွားပြီးနောက် နင်ချီ ငိုင်၍ စဉ်းစားခန်း ဝင်သွား၏။

နှစ်ဖက်စလုံး၏ အင်အားမှာ မညံ့ကြချေ။ ဤတိုက်ပွဲသာ ဆက်လက် ဖြစ်ပွားနေမည် ဆိုပါက တစ်ဖက်ဖက်က အပြတ်အသတ် ရှုံးနိမ့်သွားရန် အချိန်မည်မျှ ကြာမည်ကို ခန့်မှန်းရ ခက်ခဲလှသည်။

'ငါ ဝင်ပါမယ် ဆိုရင်လည်း အင်အား စိုက်ထုတ်ရဦးမယ်... နောက်ထပ် ဆုံမှတ် တစ်ခုက ဘယ်နေရာမှာ ရှိမလဲ ဆိုတာကို အရင် စစ်ကြည့်ပြီးမှ ဒီနှစ်ဖက်စလုံး အထိနာသွားတဲ့ အချိန်ကျမှ ပြန်လာရင် ကောင်းမလား...'

နင်ချီက သူ၏ လက်ထဲရှိ ဝိညာဉ်ရှာဖွေရေး သံလိုက်အိမ်မြှောင် ကို ငုံ့ကြည့်လိုက်ပြီး နောက်ထပ် ဆုံမှတ် ကို ရှာဖွေရန် စွမ်းအင်ပို့လွှတ်လိုက်သည်။

မကြာမီမှာပင် ဝိညာဉ်ရှာဖွေရေး သံလိုက်အိမ်မြှောင် ထံမှ တုံ့ပြန်မှု ရရှိလာ၏။

၎င်း၏ အပ်တံလေးမှာ အရှေ့မြောက် အရပ်ဆီသို့ တုန်တုန်ယင်ယင်ဖြင့် ညွှန်ပြနေသည်။ ဤအရာက ထို ဆုံမှတ် မှာ အလွန် ဝေးကွာလွန်းလှသဖြင့် အပ်တံလေးပင်လျှင် တိကျသော နေရာကို မခန့်မှန်းနိုင်ကြောင်း ဖော်ပြနေခြင်းပင် ဖြစ်သည်။

နင်ချီ၏ ကိုယ်တွင်းမှ စွမ်းအင်များသည် ဝိညာဉ်ရှာဖွေရေး သံလိုက်အိမ်မြှောင် ထဲသို့ တဟုန်ထိုး စီးဝင်သွားလေရာ ဝိညာဉ်ချီများက အပ်တံလေး၏ ထိပ်ဖျားတွင် စုပြုံသွားပြီး မထင်မှတ်ထားဘဲ ဂဏန်းတစ်ခု ပေါ်လာတော့၏။

"(၁၀,၃၂၄)"

ဤအရာမှာ နင်ချီက ဝိညာဉ်ရှာဖွေရေး သံလိုက်အိမ်မြှောင် တွင် အသစ် ထပ်မံ ထည့်သွင်းထားသော လုပ်ဆောင်ချက် အသစ် ဖြစ်သည်။ ၎င်းက အနီးဆုံး ဆုံမှတ် ၏ ခန့်မှန်းခြေ အကွာအဝေးကို 'လီ' (တရုတ် အကွာအဝေး တိုင်းတာမှု ယူနစ်။ ၁ လီ တွင် ခန့်မှန်းခြေ မိုင်ဝက်ခန့်) ဖြင့် တိုင်းတာ ဖော်ပြပေးနိုင်ခြင်း ဖြစ်၏။

နောက်ထပ် ဆုံမှတ် မှာ သူ၏ လက်ရှိ နေရာမှ (၁၀,၃၂၄) လီ ကွာဝေးနေ၏။ တကယ်ကို ဝေးလွန်းလှသည်။

ဤ ဝိညာဉ်ရှာဖွေရေး သံလိုက်အိမ်မြှောင် ၏ လုပ်ဆောင်ချက်မှာ လုံးဝ ပြည့်စုံ ကောင်းမွန်နေခြင်းတော့ မဟုတ်သေးပေ။ ၎င်းသည် နောက်ထပ် ဆုံမှတ် ၏ အရွယ်အစား သို့မဟုတ် ဆုံမှတ် အများအပြားကို တစ်ပြိုင်နက်တည်း ထောက်လှမ်းနိုင်စွမ်း မရှိသေးချေ။

နင်ချီ အနေဖြင့် ဆုံမှတ် များများကို သိမ်းပိုက်ပြီးနောက်မှသာ လက်ရှိ အချက်အလက်များအပေါ် အခြေခံ၍ ဤကိရိယာကို တဖြည်းဖြည်း အဆင့်မြှင့်တင်နိုင်မည် ဖြစ်သည်။

လောလောဆယ်တွင်မူ နင်ချီ၌ ရွေးချယ်စရာ လမ်းနှစ်သွယ်သာ ရှိတော့၏။ ဤနေရာရှိ ဆုံမှတ် ကို သိမ်းပိုက်မည်လား၊ သို့မဟုတ် လီတစ်သောင်းကျော် ကွာဝေးသော ဆုံမှတ် ဆီသို့ ချီတက်မည်လား။

'ဒါပေမဲ့ လီတစ်သောင်းကျော် အကွာက ဆုံမှတ် မှာရော တခြားလူတွေ မရှိဘူးလို့ ဘယ်သူ အာမခံနိုင်မလဲ...'

သူက ခေါင်းခဲမတတ် စဉ်းစားလိုက်သည်။

သို့ဖြစ်၍ နင်ချီက ရှေ့ဘက်သို့ အာရုံ ပို့လွှတ်လိုက်ပြီး နောက်ဆုံးတွင် ဤနေရာရှိ ဆုံမှတ် ကိုသာ အရင်ဆုံး သိမ်းပိုက်ရန် ဆုံးဖြတ်လိုက်တော့၏။

အခန်း (၇၂၉) - ပျားမိစ္ဆာဘုရင်မ

~ဆုံးဖြတ်ချက်ချပြီးသည်နှင့် နင်ချီက နောက်သို့ ချာခနဲ လှည့်ထွက်ကာ နက်ရှိုင်းသော သစ္စာတရား နယ်မြေမှ လူများနှင့် တိုင်ပင်ဆွေးနွေးရန် စတင်လိုက်၏။

"ဒီကနေ လီတစ်ထောင်အတွင်းမှာ ဆုံမှတ်တစ်ခု ရှိနေတာကို ငါ ထောက်လှမ်းမိတယ်။ နောက်တစ်နေရာကို သွားမယ့်အစား ဒီနေရာကို အရင်ဆုံး စနစ်တကျ အကွက်ချ ကြံစည်ပြီး သိမ်းပိုက်လိုက်ရင် မကောင်းဘူးလား" ဟု သူက မေးလိုက်သည်။

ထိုစကားကို ကြားလိုက်ရသောအခါ ဓားဘိုးဘေးကြီးက "ဒီအစီအစဉ်အတိုင်းပဲ သွားကြတာပေါ့" ဟု ထောက်ခံလိုက်၏။

နျူတင်းထျန် အပါအဝင် ဂိုဏ်းအကြီးအကဲများ အားလုံးကလည်း သဘောတူကြောင်း ပြိုင်တူ လွှတ်ခနဲ အော်ဟစ်လိုက်ကြသည်။

သို့သော် သူတို့က ရှေ့ဘက်ရှိ မီးလျှံငှက် အင်မော်တယ်ဂိုဏ်းနှင့် ပျားမိစ္ဆာအုပ်ကြီးကို ကြည့်ကာ အနည်းငယ် တုံ့ဆိုင်းသွားကြ၏။

"မဟာမိတ် ခေါင်းဆောင်ကြီး... ကျုပ်တို့ ဘယ်အချိန်လောက် ဝင်တိုက်ကြမလဲ" ဟု နျူတင်းထျန်က မေးလိုက်သည်။

မီးလျှံငှက် အင်မော်တယ်ဂိုဏ်း ဖြစ်စေ၊ ပျားမိစ္ဆာအုပ်ကြီး ဖြစ်စေ ယခင်က သူတို့ ရင်ဆိုင်ခဲ့ရသော ဗျိုင်းဖြူ အင်မော်တယ်ဂိုဏ်းထက် လုံးဝ မညံ့ကြချေ။ လောလောဆယ်တွင် နှစ်ဖက်စလုံးက အထိနာသေးဘဲ သည်းကြီးမည်းကြီး တိုက်ခိုက်နေကြဆဲ ဖြစ်ရာ ယခုအချိန် ဝင်ပါရန်မှာ အကောင်းဆုံး အချိန်တော့ မဟုတ်သေးပေ။

နင်ချီက ခပ်ပြုံးပြုံးဖြင့် ဆိုလိုက်သည်။

"ကျွန်တော်က မဟာမိတ် ခေါင်းဆောင်ကြီး ဆိုပေမဲ့ အရာအားလုံးကို တစ်ယောက်တည်း ဆုံးဖြတ်လို့ မရဘူးလေ။ ခင်ဗျားတို့ဆီမှာ အကြံကောင်း ဉာဏ်ကောင်းတွေ ရှိရင် မြန်မြန် ထုတ်ပြောကြ ပေါ့"

ထိုစကားကို ကြားလိုက်ရသည်နှင့် ကျင့်ကြံသူများ၏ မျက်လုံးများ အရောင်လက်သွားတော့၏။ သူတို့က မဟာမိတ် ခေါင်းဆောင်ကြီးသည် သူတို့ကို လုပ်ပိုင်ခွင့် ပေးအပ်ကာ တိုက်ပွဲ ဆုံးဖြတ်ချက်များတွင် ပါဝင်ခွင့် ပေးနေမှန်း သဘောပေါက်သွားကြ၏။

လူတိုင်းက အချင်းချင်း မျက်နှာချင်းဆိုင် ကြည့်လိုက်ကြပြီး မိမိတို့ဂိုဏ်းမှ ကျင့်ကြံသူများနှင့် တိုင်ပင်ဆွေးနွေးလိုက်ကြသည်။

နက်ရှိုင်းသော သစ္စာတရား နယ်မြေ၏ စစ်တပ်ကြီးထဲတွင် ကျင့်ကြံသူ အများအပြား ပါဝင်ပြီး၊ မူလဝိညာဉ် နယ်ပယ်နှင့် ဟင်းလင်းပြင် လမ်းစဉ် နယ်ပယ် ကျင့်ကြံသူများမှာ မရေမတွက်နိုင်အောင် ရှိလှသည်။ နင်ချီ၏ ဦးဆောင်မှုအောက်တွင် ပေါင်းစည်းခြင်း နယ်ပယ် ကျင့်ကြံသူများပင် နှစ်ကာလများအတွင်း တစ်ဟုန်ထိုး တိုးတက် များပြားလာခဲ့သည် မဟုတ်ပါလော။

ထို့ကြောင့် စစ်တပ်ကြီးထဲတွင် စကားထွက်ပြောမည့်သူတိုင်းသည် လုံလောက်သော ဩဇာအာဏာ ရှိရပေမည်။ ဂိုဏ်းတစ်ခုစီတွင် ဂိုဏ်းချုပ် သို့မဟုတ် ဘိုးဘေးကြီး ကဲ့သို့သော စကားပြောခွင့်ရှိသူ တစ်ဦးတည်းသာ ရှိ၏။

လူတိုင်းက စစ်ရေးဗျူဟာတွင် မကျွမ်းကျင်ကြသဖြင့် ဂိုဏ်းထဲရှိ အမြော်အမြင် အရှိဆုံး ကျင့်ကြံသူများနှင့် တိုင်ပင်ကာ အသေးစိတ် ဆွေးနွေးပြီးမှ မဟာမိတ် ခေါင်းဆောင်ကြီးထံ သူတို့၏ အကြံပြုချက်များကို တင်ပြကြရသည်။

မကြာမီမှာပင် လူတစ်ယောက်က စတင် စကားပြောလာ၏။ ကောင်းကင်တာရာ အဆင့်မြင့်ဂိုဏ်း၏ ဂိုဏ်းချုပ် ရှရှင်းက တည်ကြည်လေးနက်စွာဖြင့် ပြောလိုက်သည်။

"မဟာမိတ် ခေါင်းဆောင်ကြီး... ရှေ့ဆက်ရမယ့် တိုက်ပွဲတွေမှာလည်း အရင်တိုက်ပွဲတွေက ဗျူဟာအတိုင်း ရန်သူကို အငိုက်ဖမ်းပြီး မျိုးတုံး သတ်ဖြတ်ပစ်လို့ ရပါသေးတယ်။ ဒါပေမဲ့ အချက်တစ်ချက်တော့ ဖြည့်စွက်ချင်တယ်။ ပျားမိစ္ဆာအုပ်ကြီးနဲ့ မီးလျှံငှက် အင်မော်တယ်ဂိုဏ်းကို တန်ပြန်နိုင်မယ့် အထူးတပ်ဖွဲ့တွေကို ဖွဲ့စည်းသင့်တယ်။ ဒါမှ သူတို့က အစပိုင်းမှာ ရန်သူကို ထိန်းထားနိုင်ပြီး တခြားသူတွေက အနောက်ကနေ လိုက်ဝင်လို့ ရမှာပါ"

ရှရှင်း၏ စကားကို ကြားလိုက်ရသောအခါ အလားတူ တွေးထားသူ အများအပြားမှာ ချက်ချင်း နှုတ်ဆိတ်သွားကြ၏။

ရှရှင်းသည် နက်ရှိုင်းသော သစ္စာတရား နယ်မြေ စစ်တပ်ကြီးထဲတွင် ထင်ပေါ်ကျော်ကြားသူ ဖြစ်ပြီး မဟာမိတ် ခေါင်းဆောင်ကြီး၏ တန်ဖိုးထားမှုကိုလည်း ရရှိထားသူ ဖြစ်ရာ မည်သူကမျှ သူ၏ ဗျူဟာကို မချေပရဲကြချေ။

နင်ချီက ခေါင်းညိတ်လိုက်ပြီး "ပိုပြီး ရှင်းလင်းအောင် ပြောပြပါဦး" ဟု ဆိုလိုက်သည်။

ရှရှင်းက ခပ်ပြုံးပြုံးဖြင့် အရိုအသေပေးကာ ဆက်ပြောလာပါ၏။

"မီးလျှံငှက် အင်မော်တယ်ဂိုဏ်းက ကျင့်ကြံသူတွေက နာမည်နဲ့ လိုက်အောင် မီးသဘာဝ မှော်ပညာတွေမှာ ကျွမ်းကျင်ကြတယ်။ သူတို့ရဲ့ မီးကို တန်ပြန်ဖို့ ကျွန်တော်တို့က ရေ သို့မဟုတ် ရေခဲသဘာဝ ကျင့်ကြံသူတွေနဲ့ ဖွဲ့စည်းထားတဲ့ တပ်ဖွဲ့တစ်ခုကို ကြိုတင် ပြင်ဆင်ထားလို့ ရတယ်။ ပျားမိစ္ဆာအုပ်ကြီးကိုတော့ ရေနဲ့ဖြစ်ဖြစ်၊ မီးနဲ့ဖြစ်ဖြစ် နှိမ်နင်းလို့ ရတဲ့အတွက် ရေ-ရေခဲ သဘာဝ ကျင့်ကြံသူတွေရဲ့ တပ်ဖွဲ့ကို သူတို့ကို တိုက်ခိုက်ဖို့လည်း အသုံးချနိုင်ပါတယ်"

ထိုနေရာရှိ လူအားလုံးက သူ၏ စကားကို သဘောတူကြောင်း ဖော်ပြကြသည်။

ထိုအခိုက်အတန့်၌ နျူတင်းထျန်က ရုတ်တရက် ဝင်ပြောလိုက်သည်။

"ကျုပ်မှာလည်း အကြံပြုစရာလေး တစ်ခု ရှိသေးတယ်"

လူတိုင်း၏ အာရုံက သူ့ထံသို့ စုပြုံ ကျရောက်သွားတော့သည်။

နျူတင်းထျန်က ဆက်ပြောသည်။ "နွားမိစ္ဆာ အဆင့်မြင့်ဂိုဏ်းက နက်ရှိုင်းသော သစ္စာတရား နယ်မြေထဲမှာ တစ်ခုတည်းသော မိစ္ဆာမျိုးနွယ်ဝင် ဂိုဏ်းလေ။ ကျွန်တော်တို့ ဂိုဏ်းထဲမှာလည်း ပျားမိစ္ဆာတွေနဲ့ ဆင်တူတဲ့ သတ္တဝါတွေ ရှိတယ်။ ဒါကြောင့် ကျွန်တော့်အကြံကတော့ ပျားအုံထဲက ပျားဘုရင်မကိုသာ အငိုက်ဖမ်းပြီး ဖမ်းဆီးနိုင်ခဲ့ရင် ပျားမိစ္ဆာ သားရဲတွေ အားလုံးကို ထိန်းချုပ်ဖို့ သေချာပေါက် အထောက်အကူ ဖြစ်လိမ့်မယ်လို့ ယုံကြည်တယ်"

လူတိုင်းက ခေါင်းညိတ် ထောက်ခံကြသည်။

လော့ထျန်း အဆင့်မြင့်ဂိုဏ်း၏ ဂိုဏ်းချုပ် လော့ဖေးဝေါသည် (သူ၏ သားဖြစ်သူ ကျွမ်ချန် ဟုလည်း သိကြသော လော့ဖေးဝေါ၏ တိုက်တွန်းမှုကြောင့်) ရှေ့သို့ ထွက်လာပြီး ပြောလိုက်သည်။

"ဒါပေမဲ့ အဲဒီ ပျားဘုရင်မကြီးက အထွတ်အထိပ် ဘိုးဘေးကြီး အဆင့် ခွန်အားတွေ ပိုင်ဆိုင်ထားပြီး ကာကွယ်ရေး အခင်းအကျင်းတွေ ထူထပ်တဲ့ ပျားအုံထဲမှာ နေတာလေ။ ဘယ်သူက သူ့ကို သွားဖမ်းနိုင်မှာလဲ"

လူတိုင်းက နင်ချီကို အကူအညီမဲ့စွာ အာရုံ ပို့လွှတ်လိုက်ကြ၏။

"ကျွန်တော်တို့ရဲ့ ခွန်အားတွေက အကန့်အသတ် ရှိနေတော့ မဟာမိတ် ခေါင်းဆောင်ကြီး ကိုယ်တိုင် ပါဝင်ပေးဖို့ပဲ တောင်းဆိုရတော့မှာပါ" ဟု ပြိုင်တူ…ဆိုလိုက်ကြ၏။

"ဒါ ကျွန်တော့်တာဝန် ထားလိုက်ပါ"

နင်ချီက ခပ်အေးအေးပင် တုံ့ပြန်လိုက်သည်။

ထို့နောက် သူက လူတိုင်းရှေ့တွင် ပစ္စည်းတစ်ခုကို ရုတ်တရက် ထုတ်ယူလိုက်၏။ ၎င်းမှာ ပထမဆုံး ဆုံမှတ်တွင် သူ ဖမ်းဆီးခဲ့သော နဂါးနက်ကြီးပင် ဖြစ်၏။ နဂါးနက်ကြီးကို နင်ချီက မသတ်ခဲ့ပေ။ ၎င်းကို ယဉ်ပါးအောင် ဆုံးမထားခဲ့သည်မှာ ကြာလှပြီ ဖြစ်သည်။

ယခုအချိန်တွင်မူ ၎င်းက ပိုးကောင်လေး တစ်ကောင်ပမာ နင်ချီ၏ လက်ဝါးပေါ်တွင် အသာတကြည် ဝပ်စင်းနေ၏။

"သခင်!" နဂါးနက်ကြီးက ရိုသေစွာ နှုတ်ဆက်လိုက်သည်။

လူတိုင်း တစ်ခဏမျှ အံ့အားသင့်ကာ ငိုင်သွားကြတော့၏။ ထိုအချိန်က နဂါးနက်ကြီးကို သူတို့ သတိမထားမိခဲ့ကြသလို၊ မဟာမိတ် ခေါင်းဆောင်ကြီးက ၎င်းကို အကူအညီ အဖြစ် ယဉ်ပါးအောင် ဆုံးမထားလိမ့်မည်ဟုလည်း ထင်မှတ်မထားခဲ့ကြပေ။

နင်ချီက ပြောလိုက်သည်။

"စစ်မြေပြင်နယ်မြေထဲမှာ နယ်မြေများ ပင်လယ်က လာတဲ့ ကြမ်းကြုတ်သားရဲတွေ အများကြီး ရှိတယ်။ သူတို့ကို ဖမ်းဆီးတာက ကျွန်တော်တို့အတွက် အထောက်အကူ ဖြစ်စေတယ်။ အစွမ်းထက်တဲ့ ပျားမိစ္ဆာတွေကိုလည်း ယဉ်ပါးအောင် ဆုံးမဖို့ ရည်ရွယ်ထားတယ်"

"နဂါးလေး... မင်းလည်း တိုက်ပွဲထဲ ဝင်ပါချေ"

နင်ချီ၏ လက်ထဲမှ နဂါးနက်လေးက မတ်တတ်ထရပ်ကာ ပါဝင်တိုက်ခိုက်ရန် လိုလိုလားလားပင် တောင်းဆိုလိုက်၏။

ဤမြင်ကွင်းကို ကြည့်ရင်း လူတိုင်း ဝမ်းသာသွားကြ၏။ မဟာမိတ် ခေါင်းဆောင်ကြီး၏ စနစ်တကျ အကွက်ချ ကြံစည်မှုများက တကယ်ကို အဆင့်မြင့်လှသည်။ နယ်မြေများ ပင်လယ်မှ ကြမ်းကြုတ်သားရဲများကို အကူအညီ အဖြစ် သိမ်းသွင်းရန် သူ ကြိုတင် ရည်ရွယ်ထားခဲ့သည် မဟုတ်ပါလော။ ဤလမ်းစဉ်အတိုင်း သွားမည်ဆိုပါက သူတို့၏ အသေအပျောက်များ လျော့ကျသွားမည် ဖြစ်သည့်အပြင် အင်အားလည်း တိုးပွားလာမည် ဖြစ်ရာ တကယ့်ကို အံ့မခန်းပင် ဖြစ်ချေတော့၏။

"ကောင်းပြီ... ခဏနေရင် မင်းက မီးသဘာဝ ကျင့်ကြံသူတွေရဲ့ တပ်ဖွဲ့ထဲကို ဝင်ရမယ်" နင်ချီက နဂါးနက်ကြီးကို အမိန့်ပေးလိုက်သည်။

သူက လက်ကို ညင်သာစွာ တစ်ချက် ခါယမ်းလိုက်ရာ နဂါးနက်ကြီး လွတ်ထွက်သွားပြီး လူတစ်ရပ်စာ အရွယ်အစားအထိ ကြီးမားလာကာ လူတိုင်းကို ၎င်း၏ လက်သည်းများဖြင့် အရိုအသေပေးလိုက်၏။

နဂါးနက်ကြီးသည် ၎င်း၏ မူလဝိညာဉ် စွမ်းအားကို နင်ချီထံ အပ်နှင်းထားပြီး ဖြစ်ရာ နင်ချီ၏ အမိန့်ပေးမှုအောက်တွင်သာ လှုပ်ရှားရမည် ဖြစ်သဖြင့် ပုန်ကန်မည့် အန္တရာယ်ကို စိုးရိမ်ရန် မလိုတော့ပေ။

ယခင်က ဗျိုင်းဖြူ အင်မော်တယ်ဂိုဏ်းနှင့် တိုက်ပွဲတွင် ၎င်း ထုတ်လွှတ်ခဲ့သော မီးတောက်နက်များမှာ သာမန် မီးသဘာဝ ကျင့်ကြံသူများထက် များစွာ အစွမ်းထက်ခဲ့ပြီး ယခုကဲ့သို့ အကြီးစား တိုက်ပွဲကြီးတွင် ကြီးမားသော အခန်းကဏ္ဍမှ ပါဝင်လာမည်မှာ သေချာလှ၏။

နင်ချီက လူတိုင်းကို အကဲခတ်ကြည့်လိုက်သည်။

"တခြား ဖြည့်စွက်စရာ ရှိသေးလား" ဟု သူက မေးလိုက်၏။

ထိုစဉ် စိမ်းပြာရောင် မြူခိုး အဆင့်မြင့်ဂိုဏ်းမှ လူတစ်ယောက် မတ်တတ်ထရပ်လိုက်သည်။ ထိုသူမှာ ဂိုဏ်းချုပ် မဟုတ်၊ ဘိုးဘေးကြီး မဟုတ်သော်ငြားလည်း သူ့ကို လူတိုင်း သိကြ၏။

သူကတော့ တာအိုဆရာ ပိုင်ရှန် ပင် ဖြစ်၏။ စိမ်းပြာရောင် မြူခိုး ဂိုဏ်းချုပ်က သူ၏ သမီးနှင့် အတင်းအကျပ် လက်ထပ်ခိုင်းခဲ့သည့် ဇာတ်လမ်းမှာ နက်ရှိုင်းသော သစ္စာတရား နယ်မြေ တစ်ခုလုံးတွင် ကျော်ကြားလှသည်။

တာအိုဆရာ ပိုင်ရှန် ထွက်လာသည်ကို မြင်လိုက်ရသောအခါ အများစုက သူ့ကို ရယ်ပွဲဖွဲ့သော အကြည့်များဖြင့် ကြည့်လိုက်ကြ၏။

သူ့ကို တွေးမိသည်နှင့် တောင်တန်းကြီးတစ်ခုအလား ဧရာမ ခန္ဓာကိုယ်နှင့် စိမ်းပြာရောင် မြူခိုး ဂိုဏ်းချုပ်၏ သမီးကို ပြေးမြင်မိသွားကြတော့၏။ သူတို့က တာအိုဆရာ ပိုင်ရှန် ၏ ဘေးပတ်လည်ကို အကဲခတ်ကြည့်လိုက်ရာ၊ တံခါးပေါက် တစ်ခုစာလောက် ကျယ်ဝန်းသော အမျိုးသမီး တစ်ဦးက သူ့ကို ချစ်ရည်ရွှန်းလဲ့သော မျက်လုံးများဖြင့် ငေးကြည့်နေသည်ကို အမှန်တကယ်ပင် တွေ့လိုက်ရသည်။

လူတိုင်း.. မနေနိုင်တော့ဘဲ ပြုံးစိစိ ဖြစ်သွားကြ၏။

ပိုင်ရှန် ထွက်လာသည်ကို မြင်လိုက်ရသဖြင့် နင်ချီ၏ မျက်နှာပေါ်တွင်ပင် သိမ်မွေ့သည့် အပြုံးတစ်ချက် ဖြတ်ပြေးသွား၏။

တာအိုဆရာ ပိုင်ရှန်က အဆိုပြုလိုက်သည်။

"မဟာမိတ် ခေါင်းဆောင်ကြီးအတွက် အကြံပြုချက် တစ်ခု ရှိပါတယ်"

"ပြောပါ"

ထိုအခါ၊ တာအိုဆရာ ပိုင်ရှန် က အနည်းငယ် မကျေမနပ် ဖြစ်နေသော လေသံဖြင့် "အကယ်လို့ ကျွန်တော်တို့က ရေတိုက်ခိုက်မှုတွေကို အသုံးပြုမယ် ဆိုရင် မိုးကြိုးစွမ်းအားတွေနဲ့ပါ တွဲဖက် အသုံးပြုသင့်တယ်။ အဲဒီ နှစ်ခုကို ပေါင်းစပ်လိုက်မယ်ဆိုရင် ရန်သူတွေကို သေချာပေါက် အငိုက်ဖမ်းနိုင်လိမ့်မယ်ဗျ" ဟု ပြောလိုက်တော့၏။