အခန်း (၆၁၀-၆၁၂)

Chapter 610: ရွှေရောင်စာလိပ်

ယင်းစန်းဟွာကို အနှောင့်အယှက် အပေးနိုင်ဆုံးအရာမှာ ချန်ယွီနှင့် လော့ယန်တို့အား အပြတ်မရှင်းနိုင်ခြင်းပင် ဖြစ်သည်။

ဤမိန်းကလေးနှစ်ဦးမှာ အမြဲတမ်း စိတ်အနှောင့်အယှက် ပေးနေကြသူများ ဖြစ်၏။ နာခံသလိုလိုနှင့် အမိန့်ကို ဖီဆန်တတ်ကြပြီး ကိစ္စတိုင်းတွင် ဝင်ရောက် စွက်ဖက်တတ်ကြသည်။ သူတို့သာ မရှိပါက သူ့အနေဖြင့် ရွှေစာမျက်နှာကို ရှာတွေ့ပြီးသား ဖြစ်ပေလိမ့်မည်။ သူမ၏ မျက်လုံးထဲတွင် ထိုနှစ်ယောက်မှာ သေသင့်သည်မှာ ကြာလှပြီဖြစ်၏။

သို့သော် ချန်ယွီနှင့် လော့ယန်တို့မှာ ဂိုဏ်း၏ အမာခံ ပညာရှင်များ ဖြစ်ကြသည်။

ဒုတိယဂူအရှင်သခင်မှ သူတို့ကို လွှတ်ရဲသည်ဆိုကတည်းက သူတို့အတွက် အသက်ကယ်လက်နက်များ သေချာပေါက် ပေးထားပြီးသား ဖြစ်ပေလိမ့်မည်။ အကယ်၍ သူသာ ထိုမိန်းကလေးများကို သတ်လိုက်လျှင် ဒုတိယဂူအရှင်သခင်မှ သေချာပေါက် သိသွားမည်ဖြစ်ပြီး ထိုအချက်ကို အသုံးချကာ သူ့ကို ပြန်ဒုက္ခပေးပေလိမ့်မည်။

"တခြားသူရဲ့ လက်ကို သုံးရမှာပဲ..."

ယင်းစန်းဟွာ၏ စိတ်ထဲတွင် အတွေးတစ်ခု လျှပ်ခနဲ ဖြတ်ပြေးသွားသည်။

ထိုစဉ် သူ၏ စိတ်အစဉ်မှာ ရုတ်တရက် တုန်ခါသွားပြီး မျက်ဝန်းထဲတွင် အလင်းရောင်တစ်ခု ဖျတ်ခနဲ ပေါ်လာသည်။

ဝိညာဉ်အာရုံ အမှတ်အသား!

စောစောက ရွှေစာမျက်နှာပေါ်က စိတ်ဝိညာဉ်အာရုံ အမှတ်အသားကို သူ ခံစားမိလိုက်ခြင်း ဖြစ်သည်။ ထိုစာမျက်နှာမှာ မူလက ရွှေယင်ဂူအတွင်း သိမ်းဆည်းထားသော ရွှေစာမျက်နှာ လေးခုထဲမှ တစ်ခု ဖြစ်သည်။ ရွှေစာမျက်နှာတစ်ခုစီတွင် ပထမဂူအရှင်သခင် ကိုယ်တိုင် ခတ်နှိပ်ထားသော ထူးခြားသည့် စိတ်ဝိညာဉ်အာရုံ အမှတ်အသား တစ်ခုစီ ရှိကြ၏။

လွန်ခဲ့သော နှစ်အနည်းငယ်ခန့်က ရွှေစာမျက်နှာ လေးခုစလုံးမှာ နက်နဲစွာ ပျောက်ဆုံးသွားခဲ့သည်။ ထို့နောက် ဂိုဏ်းအတွင်းမှ အကြီးအကဲတစ်ဦး သစ္စာဖောက်ကာ ထိုစာမျက်နှာများကို ခိုးယူထွက်ပြေးသွားခဲ့ခြင်း ဖြစ်ကြောင်း အတည်ပြုနိုင်ခဲ့၏။

ယင်းစန်းဟွာ၏ အမြင်အရ သွေးနတ်ဘုရား နတ်ဆိုးနန်းတော်၊ ကောင်းကင်အင်းကျမ်းဂိုဏ်း နှင့် မီးလျှံနဂါးဆောင် တို့သည်လည်း ဤကိစ္စတွင် ပါဝင်ပတ်သက်နိုင်ခြေ ရှိသည်။ အခြားသော ထိပ်တန်းအင်အားစုများ၏ ကျောထောက်နောက်ခံ မပါဘဲ ထိုအကြီးအကဲသည် ရွှေယင်ဂူကို သစ္စာဖောက်ရန် မည်သို့မျှ ရဲတင်းမည် မဟုတ်ပေ။

နောက်ပိုင်းတွင် ယင်းစန်းဟွာသည် ထိုအကြီးအကဲကို ခြေရာခံမိခဲ့ပြီး သူ၏ ဝိညာဉ်နှင့် မှတ်ဉာဏ်များကို ထုတ်ယူကာ ရွှေစာမျက်နှာ သုံးခုကို ပြန်လည် သိမ်းဆည်းနိုင်ခဲ့လေ၏။ သို့သော် နောက်ဆုံးတစ်ချပ်မှာမူ ယနေ့တိုင် ပျောက်ဆုံးနေဆဲ ဖြစ်သည်။ ယင်းစန်းဟွာသည် ထိုစာမျက်နှာကို မည်သို့ပင်ဖြစ်စေ ပြန်လည် ရယူနိုင်ရန် သစ္စာဆိုခဲ့သည်။ သူ၏ ရှာဖွေမှုမှာ နောက်ဆုံးတွင် လော့ရှင်း ပင်လယ်ပြင်သို့ ဦးတည်လာခဲ့ခြင်း ဖြစ်သည်။

ယခုအခါ သူ ထိုရွှေစာမျက်နှာ၏ စိတ်ဝိညာဉ်အာရုံ အမှတ်အသားကို မည်သူထက်မဆို ပို၍ ရင်းနှီးနေပြီ ဖြစ်သည်။

သူ့အကြည့်မှာ သီးသန့်အခန်း၏ ဖန်နံရံကို ဖြတ်ကျော်ကာ နောက်ဆုံးတွင် မြေကမ္ဘာအဆင့် အခန်းတစ်ခုပေါ်သို့ ကျရောက်သွားသည်။ ရတနာမဟာမိတ်၏ သီးသန့်အခန်းများကို မည်သည့် စူးစမ်းစစ်ဆေးမှုမျိုးကိုမဆို တားဆီးနိုင်ရန် တည်ဆောက်ထားခြင်း ဖြစ်သည်။ အထွတ်အထိပ်အဆင့် ပညာရှင်တစ်ဦး ကိုယ်တိုင် ဝင်ရောက် မစွက်ဖက်သရွေ့ အခန်းအတွင်းရှိ အခြေအနေကို အပြင်မှနေ၍ မြင်နိုင်ရန် မဖြစ်နိုင်ပေ။ ဓမ္မအမှတ်အသား ၈၀ သာရှိသော နိဗ္ဗာန်အဆင့် ယင်းစန်းဟွာသည်လည်း ၎င်းကို မလုပ်ဆောင်နိုင်ပေ။ သူ ထိုအခန်းကို ခဏမျှ စူးစိုက်ကြည့်ကာ မှတ်သားလိုက်ပြီးနောက် မျက်လုံးပြန်မှိတ်ကာ နားနေလိုက်သည်။

ချန်ယွီနှင့် လော့ယန်တို့မှာမူ သူ့ အကြည့်ကို သတိမပြုမိကြဘဲ ဒုတိယဂူအရှင်သခင် ပေးထားသော တာဝန်များကိုသာ သစ္စာရှိစွာ ဆက်လက် ထမ်းဆောင်နေကြ၏။

မြေကမ္ဘာအဆင့် သီးသန့်အခန်းအတွင်းမှာမူ ရှန်မိုသည် ရှိထျန်းဟောက်၏ ကံကြမ္မာစနစ်ကို စဉ်းစားဟန်ဖြင့် အကဲခတ်နေသည်။

[မကြာမီ ကြုံတွေ့ရမည့် အခွင့်အရေး ၁ - လော့ရှင်းပင်လယ်ပြင် မဟာလေလံပွဲ၏ နောက်ဆုံးပစ္စည်းဖြစ်သော အဆင့်နိမ့် ခံစစ်နတ်ဘုရားလက်နက် ကြက်သွေးရောင် နေမင်းကျမ်းကို ကောင်းကင်အင်းကျမ်းဂိုဏ်းမှ ကျင့်ကြံသူ ယွဲ့ရှင်းလူ က လေလံအောင်သွားလိမ့်မည်။ ယင်းစန်းဟွာက ၎င်းကို အတင်းအကျပ် လုယူရန် ကြိုးစားမည်ဖြစ်သည်။ သူတို့ တိုက်ခိုက်နေစဉ်အတွင်း ရှိထျန်းဟောက်က ကြက်သွေးရောင် နေမင်းကျမ်းကို တိတ်တဆိတ် ယူဆောင်ကာ ချက်ချင်း ထွက်ပြေးလိမ့်မည်။ ထိုကျမ်းအတွင်း၌ အထွတ်အထိပ် ချင်းလောင် ၏ ဂူဗိမာန်မြေပုံ ပါဝင်သော ရွှေစာမျက်နှာ ကိုးခုထဲမှ တစ်ခု ရှိနေသည်။]

[မကြာမီ ကြုံတွေ့ရမည့် အခွင့်အရေး ၂ - ထွက်ပြေးနေစဉ်တွင် ယင်းစန်းဟွာ၏ လိုက်လံဖမ်းဆီးခြင်းကို ခံရမည်။ သူသည် နဂါးကျွန်းသို့ ထွက်ပြေးတိမ်းရှောင်မည်ဖြစ်ပြီး သူ၏ နဂါးသွေးမျိုးဆက်ကို အသုံးပြုကာ နဂါးသားရဲများကို နှိုးဆွပြီး လိုက်လံမှုကို ဟန့်တားလိမ့်မည်။ ဂူတစ်ခုကို ဖြတ်ကျော်စဉ်တွင် သူ၏ နဂါးသွေးကို သန့်စင်ပေးနိုင်သော အဆင့်နိမ့် နတ်ဘုရားဆေးဖက်ဝင်ပစ္စည်း ကိုးယင်နဂါးသွားရည်မြက်ကို မတော်တဆ တွေ့ရှိလိမ့်မည်။]

[မကြာမီ ကြုံတွေ့ရမည့် အပြောင်းအလဲ - ထွက်ပြေးစဉ်အတွင်း လွင့်မျောနေသော တိမ်တိုက်ကျွန်းကို ဖြတ်ကျော်မည်။ ယင်းစန်းဟွာက သူ့ကို မှီသွားပြီး ကျွန်းသခင် ရှန့်ကျိဖေးကို သူ့အား ဟန့်တားထားရန် လှည့်ဖျားလိမ့်မည်။ ရှန့်ကျိဖေးမှ သူ့ကို ရှောင်ရှားလိမ့်မည်။ ရှိထျန်းဟောက်သည် သေခြင်းတရားမှ တစ်ကြိမ် ကာကွယ်ရန် သူ၏ နွေဦးရုပ်သေးကို အသုံးပြုလိုက်ရမည်။]

[မကြာမီ ကြုံတွေ့ရမည့် အခွင့်အရေး ၃ - ဆက်လက် ထွက်ပြေးရင်း အမည်မသိ နတ်ဆိုးနယ်မြေတစ်ခုသို့ ဝင်ရောက်သွားမည်။ ယင်းစန်းဟွာမှာ နတ်ဆိုးစွမ်းအင်များကို ကြောက်ရွံ့သဖြင့် အထဲသို့ လိုက်မလာရဲပေ။ သူသည် နဂါးသားရဲအရေခွံ တစ်ခုကို အသုံးပြုကာ နတ်ဆိုးသားရဲများကို ရှောင်ကွင်းပြီး လွတ်မြောက်သွားမည်။ ပုလဲကျွန်းကို ဖြတ်ကျော်စဉ်တွင် ကျွန်းသခင်ဟောင်း လျိုယွန့်ချွေး ၏ မြေအောက်ဘဏ္ဍာတိုက်ကို လုယက်ရန် အခွင့်အရေး ရလိမ့်မည်။]

[မကြာမီ ကြုံတွေ့ရမည့် အခွင့်အရေး ၄ - ကြက်သွေးရောင် နေမင်းကျမ်း အတွင်းရှိ ရွှေစာမျက်နှာကို အသုံးပြုကာ အထွတ်အထိပ် ချင်းလောင် ၏ ဂူဗိမာန်တည်နေရာကို အကြမ်းဖျင်း ခြေရာခံမိမည်ဖြစ်ပြီး နေလဂိုဏ်းအတွင်းသို့ ပုံဖျက်ဝင်ရောက်ရန် ပြင်ဆင်လိမ့်မည်။ ကြက်သွေးရောင် နေမင်းကျမ်းကို သူ၏ ကိုယ်ပိုင်အဖြစ် သန့်စင်နေစဉ်တွင် သူ၏ နဂါးသွေးမျိုးဆက်ကို အသုံးပြုကာ နတ်ဘုရားအဆင့် သိုင်းပညာ တောက်လောင်သွေး နဂါးလက်သီးကို နားလည်သဘောပေါက်သွားလိမ့်မည်။]

[မကြာမီ ကြုံတွေ့ရမည့် အခွင့်အရေး ၅ - ...]

ရှိထျန်းဟောက်၏ ရှေ့ပြေးအခွင့်အရေးများကို ဖတ်ရှုပြီးနောက် ရှန်မိုသည် မိမိကိုယ်တိုင်၊ လျိုယွန့်ထျန်းနှင့် အခြားနှစ်ဦးတို့၏ အခွင့်အရေးများကိုပါ ဆက်လက် စစ်ဆေးလိုက်သည်။

"ဒီလိုကိုး… ယင်းစန်းဟွာက ရှိထျန်းဟောက် နောက်ကို လူကိုယ်တိုင် လိုက်နေတာပဲ… သူ့ရဲ့ လက်အောက်က အမြွှာညီအစ်မတွေကတော့ ငါတို့နောက်ကို လိုက်လာကြလိမ့်မယ်..."

သူ အံ့ဩစွာဖြင့် ရေရွတ်လိုက်သည်။

ထင်ထားသည့်အတိုင်းပင် ကံကြမ္မာကို ဆန့်ကျင်သူများမှာ အားလုံး ထွက်ပြေးနေရသူများသာ ဖြစ်ကြသည်။

သို့သော် ရှန်မိုတို့အဖွဲ့ အသက်လု ထွက်ပြေးနေရချိန်တွင် ရှိထျန်းဟောက်မှာမူ ထွက်ပြေးရင်းနှင့် ရတနာများကို တစ်ခုပြီးတစ်ခု ရရှိနေခြင်း ဖြစ်သည်။ ဤကဲ့သို့သော ကံတရားမျိုးမှာ အမှန်တကယ်ပင် အားကျစရာ ကောင်းလှသည်။

ရွှေယင်ဂူ၏ ရောက်ရှိလာမှုမှာ ခဏတာ အနှောင့်အယှက်မျှသာ ဖြစ်သည်။ လေလံပွဲ၏ အခြေအနေမှာ ကျိုးဟုန်း၏ လှုံ့ဆော်မှုအောက်တွင် ချက်ချင်းပင် ပြန်လည် အရှိန်ရလာခဲ့သည်။ ဤအတောအတွင်း ရှန်မိုမှာ မည်သည့်ဈေးမျှ ထပ်မံ မပေးတော့ပေ။ အမှန်တကယ်တွင်လည်း သူ၏ မျက်စိထဲတွင် သဘောကျလောက်စရာ ဘာမှမရှိတော့ခြင်း ဖြစ်သည်။

နာရီအနည်းငယ် ထပ်မံ ကုန်ဆုံးသွားပြီးနောက် မဟာလေလံပွဲမှာ ပြီးဆုံးလုနီးပြီ ဖြစ်သည်။ ကျင့်ကြံသူအားလုံးမှာ နောက်ဆုံးပစ္စည်းကို တင်ဆက်လာမည့်အချိန်အား စိတ်လှုပ်ရှားစွာ စောင့်ဆိုင်းနေကြ၏။ လေလံပွဲ မစတင်မီကပင် ရတနာမဟာမိတ်က လေလံတင်မည့် ပစ္စည်းစာရင်းအပြည့်အစုံကို ထုတ်ပြန်ထားပြီးသား ဖြစ်သည်။ ထိုအထဲတွင် အထွတ်အထိပ် ချင်းလောင် အသုံးပြုခဲ့ဖူးသော နတ်ဘုရားလက်နက်များဖြစ်သည့် ကြက်သွေးရောင် မီးလျှံလှံ နှင့် ကြက်သွေးရောင် နေမင်းကျမ်း တို့မှာ အာရုံအစိုက်ခံရဆုံး ဖြစ်သည်။ ၎င်းတို့ကြောင့်ပင် နဂါးပုန်းကျွန်း၊ နေလဂိုဏ်း၊ နေသွေးဓားဂိုဏ်း နှင့် ငါးမိုးကြိုးတောင်ဂိုဏ်း တို့မှ ကျင့်ကြံသူများ စုရုံးလာကြခြင်း ဖြစ်သည်။

နတ်ဘုရားလက်နက် ဆိုသည်မှာ နှစ်ပေါင်း ထောင်နှင့်ချီ၍ ပေါ်မလာခဲ့သော ရတနာများ ဖြစ်သည်။ ၎င်းမှာလည်း အထွတ်အထိပ် ချင်းလောင် ကိုယ်တိုင် အသုံးပြုခဲ့သည့် အရာများ ဖြစ်နေသေး၏။ ဤကဲ့သို့သော ပစ္စည်းမျိုးကို ကိုယ်တိုင် မပိုင်ဆိုင်နိုင်လျှင်ပင် ရန်သူ့လက်ထဲသို့ လုံးဝ ရောက်မသွားစေရန် တားဆီးရပေမည်။ ယခုအခါ ကြက်သွေးရောင် မီးလျှံလှံမှာ ပေါ်ထွက်ခဲ့ပြီးပြီ ဖြစ်သော်လည်း ကြက်သွေးရောင် နေမင်းကျမ်းမှာမူ ပေါ်မလာသေးပေ။ ၎င်းမှာ လေလံပွဲတစ်ခုလုံး၏ အထွတ်အထိပ် ဖြစ်မည့် နောက်ဆုံးပစ္စည်း ဖြစ်မည်မှာ သံသယဖြစ်ဖွယ် မရှိပေ။

ကျိုးဟုန်းသည် (၁၀) နာရီကျော်ကြာ တင်ဆက်နေခဲ့ခြင်း ဖြစ်၏။ နိဗ္ဗာန်အဆင့် ကျင့်ကြံသူ ဖြစ်သော်လည်း သူ့တွင် မောပန်းသော အရိပ်အယောင်များ ပေါ်နေပြီ ဖြစ်သည်။ သူ့ကျင့်ကြံမှုမှာ တိုက်ပွဲများဖြင့် တည်ဆောက်ခဲ့ခြင်း မဟုတ်ဘဲ ဝမ်ချန်ဖူနှင့် အတူတကွ ကျင့်ကြံခြင်းမှတစ်ဆင့် လျင်မြန်စွာ မြှင့်တင်ခဲ့ခြင်း ဖြစ်သည်။ ထို့ကြောင့် သူ၏ တိုက်ပွဲဝင် အတွေ့အကြုံ၊ စိတ်ဝိညာဉ်လက်နက်များနှင့် သိုင်းပညာများမှာ အဆင့်တူ ကျင့်ကြံသူများထက် များစွာ နိမ့်ကျလှသည်။ သာမန် ကိုယ်ပွားအဆင့် ကျင့်ကြံသူများကိုမူ သူ ရင်ဆိုင်နိုင်သော်လည်း တကယ့် နိဗ္ဗာန်အဆင့် ကျင့်ကြံသူနှင့် တွေ့လျှင်မူ အားနည်းသူ ဖြစ်သွားပေလိမ့်မည်။

ယခုအခါ လေလံစင်မြင့်ပေါ်တွင် ရပ်ကာ နောက်ဆုံးပစ္စည်းကို မည်သည့် ဝိညာဉ်အာရုံ စူးစမ်းမှုမှ မခံရအောင် ကာကွယ်ထားရင်း စကားပြောနေရသဖြင့် အတော်လေး မောပန်းနေခြင်းမှာ သဘာဝပင်။

သို့သော် လေလံပွဲမှာ ပြီးဆုံးတော့မည်ဟူသော အသိက သူ့ကို အင်အားများ ပြန်လည် ရရှိစေသည်။ "အားလုံးပဲ... နောက်ဆုံး လေလံပစ္စည်းက ဘာဖြစ်မလဲဆိုတာ ရှင်တို့ အားလုံး ခန့်မှန်းမိကြမှာပါ… ဒါကြောင့် ကျွန်မ အချိန်ဆွဲမနေတော့ပါဘူး… အခုပဲ ဖွင့်ပြလိုက်ပါ့မယ်"

ကျိုးဟုန်းသည် အနီရောင်အဝတ်ကို အမြန်ပင် ဆွဲဖယ်လိုက်ရာ လေထဲတွင် အသာအယာ ဝဲပျံနေသော ကြက်သွေးရောင် စာလိပ်တစ်ခု ပေါ်ထွက်လာသည်။ စာလိပ်၏ ဘေးနှစ်ဖက်တွင် နီရဲတောက်လောင်နေသော နဂါးအကြေးခွံများကို ထွင်းထုထား၏။

"ဒါကတော့ အထွတ်အထိပ် ချင်းလောင် အသုံးပြုခဲ့တဲ့ ခံစစ်နတ်ဘုရားလက်နက် ကြက်သွေးရောင် နေမင်းကျမ်းပဲ ဖြစ်ပါတယ်"

ကျိုးဟုန်းမှ ပြုံးရွှင်စွာဖြင့် ကြေညာလိုက်သည်။

ကျင့်ကြံသူအားလုံး၏ မျက်လုံးများမှာ ထိုအရာဆီသို့ ရောက်သွားကြသည်။ ထိုခဏမှာပင် ထိုလက်နက်၏ တောက်ပမှုအောက်တွင် လူတိုင်း မှင်တက်သွားရလေ၏။

နတ်ဘုရားလက်နက်တစ်ခု၏ ဆွဲဆောင်မှုကို မည်သည့် ကျင့်ကြံသူမှ မတွန်းလှန်နိုင်ပေ။ ယင်းစန်းဟွာပင်လျှင် ပါဝင်ပေသည်။

"အထွတ်အထိပ် ချင်းလောင် ကိုယ်တိုင် အသုံးပြုခဲ့တဲ့ အဆင့်နိမ့် ခံစစ်နတ်ဘုရားလက်နက်တစ်ခု ဖြစ်တာမို့ ၎င်းရဲ့ တန်ဖိုးကို ကျွန်မ ရှင်းပြနေစရာ မလိုတော့ပါဘူး"

ကျိုးဟုန်းမှ ပြုံးလိုက်ပြီး

"၎င်းရဲ့ အနိမ့်ဆုံး လေလံဈေးကတော့ ထိပ်တန်းအဆင့် ဝိညာဉ်ကျောက်တုံး ကိုးသန်း ဖြစ်ပါတယ်… တစ်ကြိမ် တိုးဈေးဟာ နှစ်သိန်းထက် မနည်းရပါဘူး… အခုပဲ နောက်ဆုံး လေလံပွဲကို စတင်လိုက်ပါပြီ"

သူ့ အသံမှာ ငြိမ်သက်နေသော ရေကန်ထဲကို ကျောက်တုံးကြီး တစ်တုံး ပစ်ချလိုက်သကဲ့သို့ ရှိတော့သည်။ ထိုကျောက်တုံးတစ်တုံးက လှိုင်းပေါင်း ထောင်ချီကို ဖြစ်ပေါ်စေခဲ့၏။

ကျင့်ကြံသူတစ်ဦးမှ ပထမဆုံး အော်ဟစ်လိုက်သည်။

"ဆယ်သန်း!"

နောက်တစ်ယောက်မှ ချက်ချင်း လိုက်လာသည်။

"၁၂ သန်း!"

"၁၅ သန်း!"

အသံများမှာ ခန်းမတစ်ခုလုံးတွင် ပြည့်နှက်သွားတော့သည်။ သို့သော် အင်အားကြီးဂိုဏ်းများ ဖြစ်ကြသော နဂါးပုန်းကျွန်း၊ နေလဂိုဏ်း၊ နေသွေးဓားဂိုဏ်း နှင့် ငါးမိုးကြိုးတောင်ဂိုဏ်း တို့မှာမူ တိတ်ဆိတ်နေကြဆဲ ဖြစ်သည်။ သူတို့မှာ ဤမျှ စောစီးစွာ ဈေးပြိုင်ရန် ရည်ရွယ်ချက် မရှိကြပေ။

မကြာမီမှာပင် ဈေးနှုန်းမှာ ထိပ်တန်းအဆင့် ဝိညာဉ်ကျောက်တုံး သန်း (၃၀) အထိ ရောက်ရှိသွားခဲ့သည်။

ထိုအခါမှသာ ရင့်ထျန်းဟောက်သည် လက်ဖက်ရည်တစ်ငုံ သောက်လိုက်ပြီးနောက် တည်ငြိမ်စွာပင်

"၃၅ သန်း"

Chapter 611: အထွတ်အထိပ် စိတ်ဝိညာဉ်ကျောက်တုံး

ဤဈေးနှုန်းကြောင့် ကျင့်ကြံသူအများအပြားမှာ အံ့ဩလွန်း၍ တောက်ခေါက်မိကြတော့သည်။ တစ်ကြိမ်တည်းနှင့် (၅) သန်းအထိ တိုးမြှင့်လိုက်ခြင်းမှာ လော့ရှင်းပင်လယ်ပြင်၏ အင်အားကြီးသုံးခုထဲမှ တစ်ခုဖြစ်သည့် ဂုဏ်ပုဒ်နှင့် အမှန်တကယ်ပင် ထိုက်တန်လှပေသည်။

အမှန်တကယ်ပင် ကြွယ်ဝလှသော ဥစ္စာဓနပါတကား!

သို့သော် နဂါးပုန်းကျွန်းက (၃၅) သန်းဟု ဈေးခေါ်လိုက်သည်နှင့် တစ်ပြိုင်နက် နေလဂိုဏ်း၏ သီးသန့်အခန်းဆီမှ တည်ငြိမ်သောအသံတစ်သံ ထွက်ပေါ်လာသည်။

"ကျွန်းသခင်ရင့်ကတော့ တော်တော်လေး ကပ်စေးနည်းတာပဲ… ဒါက အထွတ်အထိပ် ချင်းလောင် အသုံးပြုခဲ့တဲ့ နတ်ဘုရားလက်နက်ပဲလေ… ၃၅ သန်းဆိုတဲ့ဈေးက ဒါနဲ့ တန်ပါ့မလား"

ထိုသူက ပြောဆိုပြီးနောက် အေးအေးလူလူပင် ဆက်ပြောလိုက်သည်။

"နေလဂိုဏ်းက သန်း (၅၀) ပေးမယ်"

ရှူး...

ပွဲခင်းတစ်ခုလုံးတွင် အသက်ရှူသံပြင်းပြင်းများဖြင့် ဆူညံသွားတော့သည်။

ဖြစ်မှဖြစ်ရလေ။

သူတို့သည် ကြက်သွေးရောင် နေမင်းကျမ်းကို မည်သို့ပင်ဖြစ်စေ ရရှိရန် ဆုံးဖြတ်ထားပုံရသည်။ ထိပ်တန်းအဆင့် စိတ်ဝိညာဉ်ကျောက်တုံး သန်း (၅၀) တိတိ။

နေလဂိုဏ်းသည် စီးပွားရေးနှင့် ကုန်သွယ်မှုကို အခြေခံသည့် ရတနာမဟာမိတ်ကဲ့သို့ မဟုတ်သည်ကို သိထားရမည်။ ကျင့်ကြံသူအချို့က တိတ်တဆိတ် တွက်ချက်ကြည့်ကြရာ နေလဂိုဏ်း ထိန်းချုပ်ထားသော လုပ်ငန်းအားလုံးကို ပေါင်းလိုက်လျှင်ပင် တစ်နှစ်တာ စုစုပေါင်း ထုတ်လုပ်မှုမှာ သန်း (၂၀) ခန့်သာ ရှိသည်။ ယခုတစ်ကြိမ်တွင်မူ နေလဂိုဏ်းသည် ကြက်သွေးရောင် နေမင်းကျမ်းကို ရရှိရန်အတွက် ရှိသမျှ အင်အားအကုန် ထုတ်သုံးနေပုံရ၏။

"ကြက်သွေးရောင် နေမင်းကျမ်းက ငါတို့ နေသွေးဓားဂိုဏ်းနဲ့ ကံပါပြီးသားပါ… ဒါကို လော့ရှင်းပင်လယ်ပြင်မှာ ဆက်ထားဖို့ မလိုတော့ဘူး… ငါတို့ (၅၅) သန်း ပေးမယ်"

နေသွေးဓားဂိုဏ်းမှ ကျင့်ကြံသူနှစ်ဦးက မောက်မာစွာ ပြောဆိုလိုက်ပြီး လော့ရှင်းပင်လယ်ပြင်မှ ကျင့်ကြံသူများကို သိသိသာသာ မထီမဲ့မြင် ပြုမူလိုက်ကြသည်။ ဤကဲ့သို့သော အပြုအမူကြောင့် လူအများ၏ ဒေါသကို ချက်ချင်း ဆွပေးလိုက်သကဲ့သို့ ဖြစ်သွားသည်။ သို့သော် နေသွေးဓားဂိုဏ်းမှာ ထိုက်ဖိန်ပင်လယ်ပြင်၏ အရှင်သခင်ဖြစ်ပြီး တစ်ဦးချင်း ယှဉ်မည်ဆိုပါက နဂါးပုန်းကျွန်း၊ နေလဂိုဏ်း သို့မဟုတ် ရတနာမဟာမိတ်တို့ထက် သာလွန်သည်။ မည်သူမျှ ဤကြမ်းတမ်းပြီး ခန့်မှန်းရခက်သော ဂိုဏ်းကို မနှောက်ယှက်ရဲကြပေ။

"ငါတို့ ငါးမိုးကြိုးတောင်ဂိုဏ်းကလည်း ပါဝင်ချင်တာပေါ့… ဟဲဟဲ... ပျော်စရာကောင်းအောင် သန်း (၆၀) လောက် ပေးလိုက်ရအောင်"

ငါးမိုးကြိုးတောင်ဂိုဏ်း၏ သီးသန့်အခန်းထဲမှ အမျိုးသမီးတစ်ဦး၏ နောက်ပြောင်ကျီစယ်သော ရယ်သံ ထွက်ပေါ်လာသည်။

ယခုအခါ ရောက်ရှိနေသော အင်အားကြီး လေးခုစလုံးမှာ ဈေးပြိုင်ပေးခဲ့ကြပြီ ဖြစ်၏။ တစ်ခုထက်တစ်ခု ဈေးနှုန်းမှာ ပိုမိုမြင့်မားလာပြီး တစ်ကြိမ်တိုးလျှင် အနည်းဆုံး ငါးသန်းခန့် တိုးနေကြသည်။ သူတို့၏ ပါဝင်ပတ်သက်မှုကြောင့် ကြက်သွေးရောင် နေမင်းကျမ်း အတွက် တိုက်ပွဲမှာ ချက်ချင်းပင် အရှိန်အဟုန် အထွတ်အထိပ်သို့ ရောက်ရှိသွားတော့သည်။

ဝမ်ချန်ဖူသည် သူ၏ဗိုက်ကို ပုတ်ကာ ပျော်ရွှင်စွာ ရယ်မောနေ၏။ ဤအင်အားကြီးဂိုဏ်းများ အပြန်အလှန် ဈေးပြိုင်နေကြသဖြင့် နောက်ဆုံးဈေးနှုန်း မြင့်မားလေလေ ရတနာမဟာမိတ်အနေဖြင့် ကော်မရှင်ခ ပိုမိုရရှိလေလေ ဖြစ်သည်။ ထို့ကြောင့် သူ့ကို များစွာ ကျေနပ်စေလေ၏။

သို့သော်လည်း... ဝမ်ချန်ဖူသည် ရွှေယင်ဂူမှ အေးစက်လှသော ဂူအရှင်သခင်ရှိရာ အထူးသီးသန့်အခန်းဘက်သို့ မကြည့်ဘဲ မနေနိုင်ပေ။ ဤဂူအရှင်သခင်က ဝင်ရောက် နှောက်ယှက်မည်ကို သူ စိုးရိမ်နေဆဲ ဖြစ်သည်။ ကြက်သွေးရောင် နေမင်းကျမ်းမှာ အထွတ်အထိပ် ချင်းလောင် အသုံးပြုခဲ့သော နတ်ဘုရားလက်နက် ဖြစ်သဖြင့် ဂူအရှင်သခင်လည်း စိတ်ဝင်စားနိုင်သည် မဟုတ်ပါလား။

ယုတ္တိအရဆိုလျှင် ရွှေယင်ဂူ၏ အရှင်သခင်သည် အတင်းအကျပ် လုယူခြင်းမျိုးကို မလုပ်သင့်ပေ။ ထိုသို့လုပ်ဆောင်ခြင်းက ရွှေယင်ဂူ၏ ဂုဏ်သိက္ခာကို ညှိုးနွမ်းစေနိုင်သည်။ ထို့အပြင် ရွှေယင်ဂူ၏ လက်အောက်ခံ ဂိုဏ်းငယ်လေးများကိုလည်း ကြောက်ရွံ့သွားစေပြီး သူတို့ကို စွန့်ခွါသွားစေနိုင်လေ၏။

သို့သော်... ရွှေယင်ဂူသည် ရွှေယင်ဂူသာ ဖြစ်သည်။ အကယ်၍ ထိုဂူအရှင်သခင်က တကယ်ပင် အလိုရှိနေပါက မည်သူကမျှ ဆန့်ကျင်ဘက် စကားပြောရဲမည် မဟုတ်ပေ။ နောက်ဆုံးတွင်မူ သူ ယူသွားသည်ကို လက်ပိုက်ကြည့်နေရုံသာ ရှိပေလိမ့်မည်။

"(၈၉) သန်း!"

အကြာကြီး ဈေးပြိုင်ပေးပြီးနောက် အင်အားကြီး လေးခုမှ အသံများမှာ သိသိသာသာ အက်ကွဲလာခဲ့သည်။ နေသွေးဓားဂိုဏ်းမှ ကျင့်ကြံသူများက မယုံနိုင်စရာ ဈေးနှုန်းကို ခေါ်ဆိုလိုက်သည့်အခါ မည်သူမျှ ထပ်မံ၍ ဈေးမတိုးကြတော့ပေ။

နဂါးပုန်းကျွန်း၊ နေလဂိုဏ်း နှင့် ငါးမိုးကြိုးတောင်ဂိုဏ်း တို့သည် ကြက်သွေးရောင် နေမင်းကျမ်း အတွက် ထိပ်တန်းအဆင့် စိတ်ဝိညာဉ်ကျောက်တုံး သန်း (၉၀) နီးပါး သုံးစွဲရန် ထိုက်တန်မှု ရှိ၊ မရှိကို တွန့်ဆုတ်ကာ တွက်ချက်နေကြသည်။

စိတ်ဝိညာဉ်ကျောက်တုံး သန်း (၉၀)။

၎င်းမှာ သူတို့၏ ဘဏ္ဍာတိုက်ကို လုံးဝနီးပါး ပြောင်သလင်းခါသွားစေနိုင်သည်။ သူတို့ ကြိုတင်ပြင်ဆင်လာခဲ့ကြသော်လည်း ဤပမာဏမှာ ပေါ့ပေါ့ပါးပါး ပေးနိုင်သော ပမာဏမျိုး မဟုတ်ပေ။

ဂိုဏ်းတစ်ခုဆိုသည်မှာ အမြဲတမ်း တစ်သားတည်း မဟုတ်ပေ။

စိတ်ဝိညာဉ်ကျောက်တုံးများမှာ ကျင့်ကြံသူများကို ဂိုဏ်းအပေါ် သစ္စာရှိစေရန် ဆွဲဆောင်ထားသည့် အဓိက အရာဖြစ်၏။ အကယ်၍ ဥစ္စာဓန မရှိတော့ပါက ကျင့်ကြံသူများမှာ အစုလိုက်အပြုံလိုက် ထွက်ခွာသွားကြမည်ဖြစ်ပြီး ဂိုဏ်းမှာလည်း လျင်မြန်စွာ ပျက်သုဉ်းသွားပေလိမ့်မည်။

နေသွေးဓားဂိုဏ်းမှ ကျင့်ကြံသူများမှာ အောင်နိုင်သူ၏ အပြုံးများဖြင့် ပြုံးနေကြတော့သည်။ နောက်ဆုံးတွင် အောင်ပွဲမှာ သူတို့ဆီသို့ ရောက်လာခဲ့ပြီ ဖြစ်သည်။ သို့သော် ထိုစဉ်မှာပင် တစ်ချိန်လုံး တိတ်ဆိတ်နေခဲ့သော အလွတ်တန်း ကျင့်ကြံသူ လူငယ်တစ်ဦးက တည်ငြိမ်သောအသံဖြင့် ရုတ်တရက် ပြောလိုက်သည်။

"အထွတ်အထိပ် စိတ်ဝိညာဉ်ကျောက်တုံး (၁) တုံး… ကြက်သွေးရောင် နေမင်းကျမ်းကို ငါ ယူမယ်"

အထွတ်အထိပ် စိတ်ဝိညာဉ်ကျောက်တုံး။

ဤစကားလုံး လေးလုံးသည် ကျင့်ကြံသူအားလုံး၏ နှလုံးသားကို ကောင်းကင်ဘုံမှ ခေါင်းလောင်းကြီး တစ်လုံး တီးလိုက်သကဲ့သို့ တုန်ခါသွားစေသည်။

သူတော်စင်အဆင့် ရတနာများကို နတ်ဘုရားပစ္စည်းများဟု ခေါ်ဆိုကြပြီး သူတော်စင်အဆင့် စိတ်ဝိညာဉ်လက်နက်များကို နတ်ဘုရားလက်နက်များဟု ခေါ်ဆိုကြသည်။ သူတော်စင်အဆင့် ကျင့်စဉ်နှင့် သိုင်းပညာများကို နတ်ဘုရားကျင့်စဉ်နှင့် နတ်ဘုရားသိုင်းပညာများဟု ခေါ်ဆိုကြလေ၏။ ၎င်းတို့မှာ ကျင့်ကြံသူများအကြား ရှေးယခင်ကတည်းက သတ်မှတ်ထားသော အစဉ်အလာများ ဖြစ်သည်။ ထို့ကြောင့် အထွတ်အထိပ် စိတ်ဝိညာဉ်ကျောက်တုံး ဆိုသည်မှာ သူတော်စင်အဆင့် စိတ်ဝိညာဉ်ကျောက်တုံး ၏ အတိုကောက် နာမည်ပင် ဖြစ်သည်။

အထွတ်အထိပ် စိတ်ဝိညာဉ်ကျောက်တုံး တစ်တုံးတွင် ပါရှိသော စိတ်ဝိညာဉ်စွမ်းအင်မှာ ထိပ်တန်းအဆင့် စိတ်ဝိညာဉ်ကျောက်တုံးထက် အဆပေါင်း သန်းနှင့်ချီ၍ ပိုမိုများပြားသည်။ ပို၍ အဖိုးတန်သည်မှာ ၎င်းအတွင်း၌ မဟာဓမ္မ၏ အငွေ့အသက် အနည်းငယ် ပါဝင်နေခြင်း ဖြစ်သည်။ ၎င်းမှာ အထွတ်အထိပ်အဆင့်ရှိ ကျင့်ကြံသူများ အလိုအပ်ဆုံးအရာ ဖြစ်လေ၏။ အဘယ်ကြောင့်ဆိုသော် အထွတ်အထိပ်အဆင့်တွင် အထွတ်အထိပ် အရိုးကို သွန်းလောင်းရသောကြောင့် ဖြစ်သည်။ ခန္ဓာကိုယ်မှာ ကြေးနီ၊ လောကမှာ ဖို၊ ဓမ္မမှာ လောင်စာ ဖြစ်ပြီး မဟာဓမ္မ၏ အငွေ့အသက်မှာ အထွတ်အထိပ်အရိုးကို သွန်းလောင်းရာတွင် မရှိမဖြစ် လိုအပ်သော အရာပင်။ ထို့ပြင် အထွတ်အထိပ် စိတ်ဝိညာဉ်ကျောက်တုံးအတွင်းမှ ထိုအငွေ့အသက်မှာ ရယူရန် အလွယ်ကူဆုံး ဖြစ်သည်။

ဤအချက်များအားလုံး ပေါင်းစပ်လိုက်သည့်အခါ အထွတ်အထိပ် စိတ်ဝိညာဉ်ကျောက်တုံး၏ တန်ဖိုးမှာ မယုံနိုင်စရာပင်။ အထွတ်အထိပ် စိတ်ဝိညာဉ်ကျောက်တုံး တစ်တုံးကို ထိပ်တန်းအဆင့် ဝိညာဉ်ကျောက်တုံး သန်း ၈၀ မှ ၉၀ ခန့်နှင့် လဲလှယ်နိုင်၏။ ထိုသို့ လဲလှယ်နိုင်လျှင်ပင် ဈေးဖြတ်၍မရသော အရာဖြစ်ပြီး ရရှိရန်မှာလည်း အလွန်ခဲယဉ်းလှသည်။ အထွတ်အထိပ်အဆင့်ရှိ ကျင့်ကြံသူအချို့သည် သူတို့၏ ဥစ္စာဓနအားလုံးကို ပုံအောကာ ထိပ်တန်းအဆင့် ဝိညာဉ်ကျောက်တုံး သန်းတစ်ရာပေး၍ တစ်တုံးတည်းကိုသာ ဝယ်ယူရန် ကမ်းလှမ်းခဲ့ဖူးသည်။ ထိုသို့ပေးလျှင်ပင် ရရှိနိုင်ရန် မသေချာပေ။

အကြောင်းမှာ ၎င်းတို့ လုံးဝ မရှိတော့လောက်အောင် ရှားပါးနေခြင်းကြောင့် မဟုတ်ပေ။ အတွင်းပင်လယ်ရှိ အင်အားကြီး ငါးခုစလုံးသည် အထွတ်အထိပ် စိတ်ဝိညာဉ်ကျောက်တုံး သတ္တုကြော တစ်ခု သို့မဟုတ် တစ်ခုထက်မကကို ထိန်းချုပ်ထားကြသည်။ သို့သော် ထိုကဲ့သို့သော ရတနာများကို သူတို့၏ ဂိုဏ်းပြင်ပသို့ အလွယ်တကူ ထွက်ခွင့် မပြုကြပေ။

ဤသို့ဖြင့် အင်အားကြီး ငါးခုအကြား တိတ်ဆိတ်သော သဘောတူညီချက်အရ အထွတ်အထိပ် စိတ်ဝိညာဉ်ကျောက်တုံးမှာ အပြင်သို့ ထွက်လာခဲလှသည်။ အပြင်ပင်လယ်တွင် တွေ့ရသော အရာများမှာမူ သဘာဝအလျောက် ဖြစ်ပေါ်နေသော သတ္တုကြောငယ်များမှ ရရှိခြင်းသာ ဖြစ်သည်။ တူးဖော်ရန် ခက်ခဲပြီး သန့်စင်မှုလည်း နည်းပါးသဖြင့် အင်အားကြီး ငါးခုက ဂရုမစိုက်ဘဲ ထားခဲ့ကြခြင်း ဖြစ်သည်။

ထို့ကြောင့်ပင် အထွတ်အထိပ် စိတ်ဝိညာဉ်ကျောက်တုံး ဆိုသော စကားကို ကြားလိုက်ရသည့်အခါ ကျင့်ကြံသူအားလုံး တုန်လှုပ်သွားကြခြင်း ဖြစ်သည်။ ဤကဲ့သို့သော အရာမျိုးမှာ... လော့ရှင်းပင်လယ်ပြင်က လေလံပွဲမှာ ပေါ်လာသည်ဆိုသည်မှာ အနည်းငယ် မယုံနိုင်စရာ ဖြစ်မနေဘူးလား။

ယုတ္တိအရဆိုလျှင် ၎င်းမှာ အတွင်းပင်လယ်ရှိ အထွတ်အထိပ်အဆင့် ကျင့်ကြံသူများသာ အသုံးပြုသော ငွေကြေး မဟုတ်ပါလား။

ရတနာမဟာမိတ်၏ ခေါင်းဆောင် ဝမ်ချန်ဖူသည် ထိုစကားကို ကြားသည်နှင့် ချက်ချင်းပင် မတ်တပ်ရပ်လိုက်သည်။

သူ အသံကျယ်ကျယ်ဖြင့် အော်ဟစ်လိုက်၏။

"မင်းက ဘယ်သူလဲ… စည်းကမ်းမရှိ ဈေးခေါ်တာရဲ့ အကျိုးဆက်ကို မင်း သိရဲ့လား”

ကျင့်ကြံသူအချို့လည်း သတိပြန်ဝင်လာကြသည်။ အမှန်တကယ်ပင် ယခင်က လေလံပွဲကြီးများတွင် မဟုတ်မမှန်သော ဈေးနှုန်းများဖြင့် လာရောက် ဈေးပြိုင်ပေးခဲ့ကြသော ရဲတင်းသူအချို့ ရှိခဲ့ဖူးသည်။ သူတို့၏ ကံကြမ္မာမှာမူ အလွန်ပင် ဝမ်းနည်းစရာ ကောင်းလှသည်။ ချွင်းချက်မရှိသလောက်ပင် နောက်တစ်နေ့တွင် သူတို့ ပျောက်ကွယ်သွားကြသည်။ အသတ်ခံရသည်ဖြစ်စေ၊ သေဆုံးသွားသည်ဖြစ်စေ နောက်ဆုံးတွင်မူ အသက်ပျောက်သွားကြသည်သာ။

လူတိုင်း၏ အကြည့်အောက်တွင် ထိုဝတ်ရုံဖြူနှင့် ကျင့်ကြံသူသည် ဖြည်းညှင်းစွာ မတ်တပ်ရပ်လိုက်၏။ သူ ပြုံးလျက် ပြောလိုက်သည်။

"ငါက ယွဲ့ရှင်းလူ ပါ"

ယွဲ့ရှင်းလူ။

လူတိုင်းက ထိုနာမည်ကို တိုးတိုးလေး ရေရွတ်လိုက်ကြသည်။ ရင့်ထျန်းဟောက်သည် ရုတ်တရက် မှင်တက်သွားပြီးနောက် အံ့ဩတကြီးဖြင့် အော်ဟစ်လိုက်၏။

"အင်းကျမ်းဘုရင်လေးလား"

သူသည် အလွန်အမင်း အံ့ဩသွားသဖြင့် အသံကိုပင် မထိန်းနိုင်တော့ပေ။

ရှူး...

လူအုပ်ကြားတွင် အသက်ရှူသံများ ထပ်မံ ထွက်ပေါ်လာပြန်သည်။ နေလဂိုဏ်းမှ ကျင့်ကြံသူများ၏ မျက်နှာမှာ ပို၍ပင် ရှုပ်ထွေးသွားကြတော့သည်။ အထူးသဖြင့် သူတို့ကို ဦးဆောင်လာသော အမျိုးသား ကျင့်ကြံသူမှာ ပို၍ ဆိုးသည်။ အင်းကျမ်းဘုရင်လေး ယွဲ့ရှင်းလူသည် တစ်ချိန်က နေလဂိုဏ်းသို့ စတင်ဝင်ရောက်စဉ်က အဆင့်နိမ့် ကျင့်ကြံသူတစ်ဦးမျှသာ ဖြစ်ခဲ့သည်။ ထိုစဉ်က တပည့်ရွေးချယ်ပွဲကို ကြီးကြပ်ခဲ့သူမှာ ဤအမျိုးသားပင် ဖြစ်သည်။ ထို့ပြင် ယွဲ့ရှင်းလူ ဂိုဏ်းမှ ထွက်ခွာသွားသည်ကို ကြည့်နေခဲ့သူမှာလည်း သူပင် ဖြစ်သည်။ ယခု နှစ်ပေါင်း သုံးရာအကြာတွင် ယွဲ့ရှင်းလူသည် ကောင်းကင်အင်းကျမ်းဂိုဏ်း၏ မျိုးဆက်သစ် ခေါင်းဆောင်တစ်ဦး ဖြစ်လာခဲ့လေပြီ။ ဤကဲ့သို့သော ဘဝအလှည့်အပြောင်းမှာ အားလုံးကို များစွာ စိတ်မကောင်း ဖြစ်စေသည်။

"ငါးမိုးကြိုးတောင်ဂိုဏ်းက အင်းကျမ်းဘုရင်လေးကို နှုတ်ခွန်းဆက်ပါတယ်"

ငါးမိုးကြိုးတောင်ဂိုဏ်းမှ ကျင့်ကြံသူ ငါးဦးစလုံး တစ်ပြိုင်နက်တည်း အော်ဟစ် နှုတ်ဆက်လိုက်ကြသည်။

ယွဲ့ရှင်းလူ ခပ်ပါးပါး ပြုံးလိုက်ပြီး "ငါးမိုးကြိုးတောင်ဂိုဏ်းက ကျင့်ကြံဖော်တွေကို ကျေးဇူးတင်ပါတယ်"

ငါးမိုးကြိုးတောင်ဂိုဏ်းသည် ကောင်းကင်အင်းကျမ်းဂိုဏ်းနှင့် အမြဲတမ်း ခင်မင်ရင်းနှီးမှု ရှိခဲ့ကြ၏။

နဂါးပုန်းကျွန်း၊ နေလဂိုဏ်း နှင့် နေသွေးဓားဂိုဏ်း တို့မှာ မည်သည့် လှုပ်ရှားမှုမျှ မရှိကြပေ။

ဝမ်ချန်ဖူမှာမူ ကြောက်ရွံ့လွန်းသဖြင့် တုန်လှုပ်နေတော့သည်။

အမလေး။

လော့ရှင်းပင်လယ်ပြင်က လေလံပွဲလေးတစ်ခု၌ ရွှေယင်ဂူ ရော၊ ကောင်းကင်အင်းကျမ်းဂိုဏ်း ပါ ရောက်နေကြသည်မှာ အရှင်သခင်ကြီး နှစ်ပါး ပေါ်လာသကဲ့သို့ပင် ဖြစ်နေတော့သည်။

Chapter 612: တိုက်ပွဲစနေပြီ

ယွဲ့ရှင်းလူသည် လှည့်ကြည့်လိုက်ပြီး ခန်းမထဲရှိ အမြင့်ဆုံးအဆင့် သီးသန့်အခန်းဘက်သို့ လှမ်းကြည့်လိုက်သည်။ ထိုအခါမှသာ ရှန်မို သူ၏မျက်နှာကို ရှင်းရှင်းလင်းလင်း မြင်လိုက်ရသည်။ ယွဲ့ရှင်းလူသည် အလွန်အမင်း ခန့်ညားချောမောလှသော လူငယ်တစ်ဦး မဟုတ်ပေ။ ထိုအစား သူသည် ခိုင်မာပြတ်သားပြီး တည်ငြိမ်သော လူလတ်ပိုင်းအရွယ် အမျိုးသားတစ်ဦး၏ ရုပ်ရည်မျိုး ရှိသည်။ သူ့ ရုပ်ရည်မှာ အလွန်ပင် သာမန်ဖြစ်သည်ဟုသာ ဆိုရပေလိမ့်မည်။

သို့သော် မျက်ဝန်းများမှာမူ တောင်ကြီးများကဲ့သို့ တည်ငြိမ်ပြီး လျှပ်စီးများကဲ့သို့ လျင်မြန်လှသည်။ ၎င်းတို့သည် ဝိညာဉ်ကို တုန်လှုပ်စေနိုင်သော ဖိအားများကို ဆောင်ကြဉ်းပေး၏။

သူ ထိုနေရာတွင် ရပ်နေရုံမျှဖြင့် အနီးနားရှိ ကျင့်ကြံသူများကို အနားမကပ်ရဲလောက်အောင် ကြောက်ရွံ့သွားစေသည်။ ထိုနေရာတွင် ရပ်နေသည်မှာ ယွဲ့ရှင်းလူ မဟုတ်ဘဲ နတ်ဘုရား သို့မဟုတ် မသေမျိုးတစ်ဦး ရပ်နေသကဲ့သို့ပင်။

ရှန်မိုသည် ထိုသူ့ကို တစ်ချက်ဝေ့ကြည့်လိုက်ပြီး သူ၏ ကံကြမ္မာစနစ်ကို အမြန်ဖတ်ရှုလိုက်သည်။

[အမည်] ယွဲ့ရှင်းလူ။

[အဆင့်] နိဗ္ဗာန်အဆင့်၊ ဓမ္မအမှတ်အသား (၈၃) ခု။

[ကံကြမ္မာ လက္ခဏာများ] တံငါသည်မျိုးရိုး နှောင်းမှပွင့်သောပန်း အင်းကျမ်းလမ်းစဉ်၏ ဆက်ခံသူ အင်းကျမ်းဘုရင်လေး ကံကောင်းခြင်းကြယ်ပွင့်များ၏ စောင့်ရှောက်မှုကို ခံရသူ အလှူအတန်း ရက်ရောသူ ကောင်းကင်အင်းကျမ်းကျမ်းစာ၏ သန့်စင်သောခန္ဓာကိုယ်။

[ကံကြမ္မာ] ယခုမှ နှစ်ပေါင်းတစ်ထောင်အကြာတွင် သူသည် ကောင်းကင်အင်းကျမ်းဂိုဏ်း၏ ဂိုဏ်းချုပ်ရာထူးကို ဆက်ခံမည်ဖြစ်ပြီး အင်းကျမ်းဘိုးဘေး၏ တပည့် ဖြစ်လာလိမ့်မည်။ နှစ်ပေါင်းများစွာ ခါးသီးစွာ ကျင့်ကြံပြီးနောက် သူသည် အထွတ်အထိပ်အဆင့်၏ အထွက်အထိပ်သို့ ရောက်ရှိမည်ဖြစ်သော်လည်း သူတော်စင်အဆင့်သို့ ဝင်ရောက်ရန်မူ မအောင်မြင်ပေ။ သူသည် အိုမင်းရင့်ရော်ကာ သေဆုံးသွားလိမ့်မည်။

ရှန်မို ခေါင်းအသာငြိမ့်လိုက်သည်။

ယွဲ့ရှင်းလူသည် ထင်ရှားသော ပါရမီရှင်တစ်ဦး ဖြစ်သည်မှာ သေချာ၏။ သို့သော် နောက်ဆုံးတွင်မူ သူ ရှိထျန်းဟောက်နှင့် ယှဉ်နိုင်မည် မဟုတ်ပေ။ အဘယ်ကြောင့်ဆိုသော် ရှိထျန်းဟောက်၏ ကံကြမ္မာမှာ နတ်ဘုရားလျှို့ဝှက်လောကကို ကျော်လွန်ကာ စကြဝဠာတစ်ခုလုံးတွင် လွတ်လပ်စွာ လှည့်လည်သွားလာနိုင်သူ ဖြစ်သောကြောင့်ပင်။ ယွဲ့ရှင်းလူမှာမူ သူတော်စင်အဆင့်သို့ပင် မရောက်ရှိနိုင်ခဲ့ပေ။

ထိုစဉ် ယွဲ့ရှင်းလူသည် သီးသန့်အခန်းဘက်သို့ ကြည့်ကာ တည်ငြိမ်စွာ ပြောလိုက်သည်။

"ရွှေယင်ဂူရဲ့ (၁၈) ပါးမြောက် ဂူအရှင်သခင်... ဘာလို့ ကိုယ်ထင်မပြဘဲ စကားပြောနေရတာလဲ"

အေးစက်သော အမျိုးသမီးအသံတစ်သံ သီးသန့်အခန်းထဲမှ ထွက်ပေါ်လာသည်။

"ငါ ကိုယ်ထင်ပြပြ၊ မပြပြ အဲဒါ မင်းနဲ့ ဘာဆိုင်လို့လဲ"

ယွဲ့ရှင်းလူ ပြုံးလိုက်ပြီး

"ဒါဆိုရင်လည်း ကျွန်တော် ကြက်သွေးရောင် နေမင်းကျမ်းကို အထွတ်အထိပ် စိတ်ဝိညာဉ်ကျောက်တုံး တစ်တုံးနဲ့ ဝယ်လိုက်ပါ့မယ်… ဂူအရှင်သခင်ယင်း... ကျွန်တော်တို့ နောက်တစ်နေ့မှ ပြန်ဆုံကြတာပေါ့"

ထိုသို့ပြောပြီးနောက် သူသည် စင်ပေါ်ရှိ ကျိုးဟုန်းကို လှည့်ကြည့်လိုက်သည်။

"စီမံခန့်ခွဲသူကျိုး... တခြားသူတွေ ဈေးမပေးကြတော့ဘူး… ရလဒ်ကို ကြေညာနိုင်ပါပြီ"

ကျိုးဟုန်းမှာ ထိုအချိန်အထိ ငေးမောနေခဲ့ခြင်း ဖြစ်၏။ ယွဲ့ရှင်းလူ၏ စကားကို ကြားလိုက်ရမှ သူ သတိပြန်ဝင်လာတော့သည်။

သူ အမြန်ပင် ကြေညာလိုက်သည်။

"အထွတ်အထိပ် စိတ်ဝိညာဉ်ကျောက်တုံး တစ်တုံး… ပထမအကြိမ်… အထွတ်အထိပ် စိတ်ဝိညာဉ်ကျောက်တုံး တစ်တုံး… ဒုတိယအကြိမ်… အထွတ်အထိပ် စိတ်ဝိညာဉ်ကျောက်တုံး တစ်တုံး… တတိယအကြိမ်"

"ရောင်းချပြီး…"

သူမ နောက်ဆုံးစကားလုံးကို မပြောနိုင်မီမှာပင် လေလံစင်မြင့်အောက်မှ ပြင်းထန်သော ပေါက်ကွဲမှုတစ်ခု ဖြစ်ပွားသွားသည်။

ကျိုးဟုန်း၏ စကားများမှာ ပြတ်တောက်သွားပြီး သူ့ ခန္ဓာကိုယ်မှာ လေထဲသို့ လွင့်စင်သွားတော့သည်။

သူ နံရံကို အရှိန်ဖြင့် ရိုက်မိသွားပြီး နံရံအတွင်းသို့ မြုပ်ဝင်သွားကာ အသားများမှာလည်း ကြည့်မကောင်းအောင် စုတ်ပြတ်သတ်သွား၏။

လေလံခန်းမအတွင်းတွင် ထူထပ်သော မီးခိုးများ ချက်ချင်းပင် ဖုံးလွှမ်းသွားတော့သည်။

စူးရှသော အော်ဟစ်သံများ၊ သရဲတစ္ဆေများ၏ ငိုကြွေးသံများ... အသံပေါင်းစုံ ရောထွေးနေ၏။ ၎င်းမှာ စိတ်ဓာတ် အခိုင်မာဆုံး ကျင့်ကြံသူကိုပင် နာကျင်စွာဖြင့် စိတ်ပျက်အားလျော့သွားစေရန် လုံလောက်လှသည်။

ဝမ်ချန်ဖူ တိုးတိုးလေး ဆဲရေးလိုက်သည်။

"တောက်... ကိစ္စကတော့ စပြီ… ပြေးကြဟေ့”

လေလံပွဲမှာ ဆက်လက်လုပ်ဆောင်ရန် မဖြစ်နိုင်တော့ခြင်းမှာ ထင်ရှားလှ၏။

ရွှေယင်ဂူ နှင့် ကောင်းကင်အင်းကျမ်းဂိုဏ်း ၁၈ ပါးမြောက် ဂူအရှင်သခင် နှင့် အင်းကျမ်းဘုရင်လေး။

နတ်ဆိုးလမ်းစဉ်နှင့် တရားသောလမ်းစဉ်မှ ဤအင်အားကြီး နှစ်ခုမှာ ထိပ်တိုက်တွေ့ကြတော့မည် ဖြစ်သည်။

လျိုယွန့်ထျန်း ကြောက်ကြောက်လန့်လန့်ဖြင့် တံတွေးမျိုချလိုက်ပြီး

"ငါတို့လည်း ပြေးသင့်ပြီ”

ကျန်းချန်ဟိန်းမှ လေသံနှိမ့်ကာ

"တကယ် ပြေးသင့်တာနော်… ဒီနှစ်ယောက်က သေချာပေါက် တိုက်ကြတော့မှာ… ငါတို့ ကြားညှပ်လို့ မဖြစ်ဘူး"

ဝေကျင်ချန်သည် ဘာမှမပြောသော်လည်း သူ၏ ခန္ဓာကိုယ်မှာ နေသွေးဓားဂိုဏ်း ရှိရာ သီးသန့်အခန်းဘက်သို့ တိတ်တဆိတ် ရွေ့လျားသွား၏။ ရှိထျန်းဟောက်သည်လည်း တိတ်ဆိတ်နေပြီး တစ်ဖက်သို့ ခြေတစ်လှမ်း ဆုတ်လိုက်ကာ အရပ်မျက်နှာ အနှံ့မှ အန္တရာယ်များကို အမြဲ သတိထားနေသည်။

ရှန်မိုကလည်း ဘာမှမပြောဘဲ တိုက်ပွဲဖြစ်မည့်နေရာကိုသာ စိုက်ကြည့်နေလေ၏။ ဤပေါက်ကွဲမှုမှာ ယင်းစန်းဟွာ၏ စီစဉ်မှုဖြစ်ဖို့ များပြီး အခြေအနေကို ရှုပ်ထွေးသွားစေကာ တိုက်ခိုက်ရန် အခွင့်အရေး ဖန်တီးလိုက်ခြင်းသာ ဖြစ်ပေလိမ့်မည်။ သို့သော် အင်းကျမ်းဘုရင်လေးဟု အမည်တွင်သော ယွဲ့ရှင်းလူကဲ့သို့သော သူသည် ဤမျှလွယ်လွယ်နှင့် ယင်းစန်းဟွာ၏ လက်ချက်ဖြင့် အဆုံးသတ်သွားမည်ဟု ရှန်မို မယုံကြည်ပေ။

သူ့တွင် သေချာပေါက် အားကိုးစရာ တစ်ခုခု ရှိနေပေလိမ့်မည်။

ဖောက်! ဒိုင်း!

ရုတ်တရက် မီးခိုးများထဲမှ ပေါက်ကွဲသံများ ထွက်ပေါ်လာပြီး မြူများမှာ ချက်ချင်းပင် လွင့်စင်သွားတော့သည်။ ထိုအခါမှသာ ရှန်မို ဘာဖြစ်နေသလဲဆိုသည်ကို မြင်လိုက်ရ၏။ ယွဲ့ရှင်းလူမှာ တစ်ချက်မျှပင် ထိခိုက်ဒဏ်ရာ ရခြင်း မရှိပေ။

သူ လက်ကို တစ်ချက် ဝေ့ယမ်းလိုက်ရုံဖြင့် အင်းကျမ်းဆယ်ခု ထွက်ပေါ်လာပြီး ချန်ယွီနှင့် လော့ယန်တို့၏ တိုက်ခိုက်မှုများကို အသာလေးပင် ခုခံလိုက်သည်။ သူ တကယ် သတိထားရမည့်သူမှာ ယင်းစန်းဟွာသာ ဖြစ်သည်။

"ငါးမိုးကြိုးတောင်ဂိုဏ်းက ကူညီပေးပါ့မယ်”

ထိုစဉ်မှာပင် ငါးမိုးကြိုးတောင်ဂိုဏ်းမှ အဖွဲ့ဝင် ငါးဦး တပြိုင်နက်တည်း အော်ဟစ်ကာ တိုက်ပွဲအတွင်းသို့ ဝင်ရောက်လာကြသည်။ သူတို့ အသုံးပြုသော သိုင်းပညာများမှာ အားလုံးနီးပါး လျှပ်စီးပညာရပ်များ ဖြစ်ကြ၏။ မျက်စိတစ်မှိတ်အတွင်းမှာပင် ရတနာဆောင်တစ်ခုလုံးမှာ လျှပ်စီးများ၊ မိုးကြိုးများဖြင့် ပြည့်နှက်သွားပြီး မျက်စိကျိန်းလောက်အောင် လင်းထိန်သွားတော့သည်။

ချန်ယွီနှင့် လော့ယန်တို့သည် ထိုကျင့်ကြံသူ ငါးဦး၏ လက်ချက်ဖြင့် ချက်ချင်းပင် နောက်သို့ ဆုတ်သွားရပြီး သူတို့၏ မျက်နှာတွင် အရှက်ရမှုနှင့် ဒေါသတို့ ရောယှက်နေသည်။

"ကျားဖြူတံခါး မှ လျိုယွီ... ကူညီဖို့ ရောက်လာပါပြီ” "ရွှေနဂါးဂိုဏ်း မှ ရှုဖုန်း... ကောင်းကင်အင်းကျမ်းဂိုဏ်းရဲ့ အမိန့်ကို နာခံဖို့ အဆင်သင့်ပါပဲ"

"ဓားရူးမဟာမိတ် မှ လီကျိချွမ်း... နတ်ဆိုးဂိုဏ်းကို ကျင့်ကြံဖော်တို့နဲ့အတူ ဆန့်ကျင်ပါ့မယ်”

ချန်ယွီနှင့် လော့ယန်တို့ အားနည်းသွားသည်နှင့် တစ်ပြိုင်နက် အရပ်မျက်နှာ အနှံ့မှ အသံများ ထွက်ပေါ်လာတော့သည်။

လူပေါင်း ဆယ်ဂဏန်းကျော်မှာ အရပ်ရပ်မှ ထွက်ပေါ်လာပြီး တိုက်ပွဲအတွင်း ပါဝင်လာကြသည်။ ဤဂိုဏ်းငယ်လေးများသည် လော့ရှင်းပင်လယ်ပြင်နှင့် မုန်တိုင်းမိုးကြိုးပင်လယ်ပြင်မှ ဖြစ်ကြပြီး အားလုံးနီးပါးမှာ တရားသောလမ်းစဉ်ဘက်မှ ဖြစ်ကြသလို ကောင်းကင်အင်းကျမ်းဂိုဏ်းနှင့်လည်း ရင်းနှီးကြသူများ ဖြစ်သည်။ ထို့အပြင် ရွှေယင်ဂူ၏ ဗိုလ်ကျစိုးမိုးတတ်သော အမူအရာကြောင့် သူတို့ဘက်က ရပ်တည်ပေးမည့်သူမှာ အလွန်ပင် ရှားပါးလှ၏။

ထို့အပြင် ကောင်းကင်အင်းကျမ်းဂိုဏ်းသည် ဂိုဏ်းငယ်အများစုနှင့် အမြဲတမ်း ရင်းနှီးသော ဆက်ဆံရေး ရှိထားသည်။ လူအများ၏ စိတ်ကို သိမ်းကျုံးယူထားသည်ဟုပဲ ဆိုဆို၊ သူတို့၏ နာမည်ဂုဏ်သတင်းကြောင့်ပင် လူအများက ကူညီကြခြင်း ဖြစ်သည်။ ဤအခြေအနေတွင် ကောင်းကင်အင်းကျမ်းဂိုဏ်းဘက်က ရပ်တည်ပေးခြင်းမှာ ကိစ္စရပ်များ ပြီးဆုံးသွားသည့်အခါ ရက်ရောသော ဆုလာဘ်များကို သေချာပေါက် ရရှိစေမည် ဖြစ်သည်။ သို့သော် ရွှေယင်ဂူကို ကူညီမည်ဆိုပါကမူ... ထိုသို့သော ဆုလာဘ်မျိုး ရဖို့ဆိုသည်မှာ စိတ်ကူးယဉ်ရုံသာ ရှိပေလိမ့်မည်။

ထို့ကြောင့် ဤကဲ့သို့သော အခြေအနေ ဖြစ်ပေါ်လာခြင်းပင်။

ယွဲ့ရှင်းလူက လှုပ်ရှားလိုက်သည်နှင့် တခြားသူများမှာလည်း ချက်ချင်းပင် သူ၏ ဘေးနားတွင် စုရုံးလာကြသည်။

"ကြည့်ရတာ ဒီဂူအရှင်သခင်အတွက် အခြေအနေက မကောင်းလှဘူးပဲ"

လျိုယွန့်ထျန်းမှ တိုးတိုးလေး ပြောသည်။

ရှန်မို ပြုံးလိုက်ပြီး

"ဒါက ဒီလောက် မရိုးရှင်းဘူးလို့ ငါ ထင်တယ်… ရွှေယင်ဂူက သူတို့မှာ အင်အားအစစ်အမှန် ရှိလို့သာ ဒီလောက် ဗိုလ်ကျနေတာ… ဒီလူက ဂူအရှင်သခင် ၁၈ ပါးထဲက တစ်ယောက် ဖြစ်နေတာပဲ… သူ့မှာ အားကိုးစရာ တစ်ခုခု ရှိနေမှာ အသေအချာပဲ"

သူ ပြောပြီးသည်နှင့် တစ်ပြိုင်နက် အမြင့်ဆုံး သီးသန့်အခန်းဆီမှ အေးစက်သော နှာခေါင်းရှုံ့သံတစ်သံ ထွက်ပေါ်လာသည်။

"သေချင်နေကြတာပဲ"

ထိုစကားလုံးများနှင့်အတူ အေးစက်သော အငွေ့အသက်များက နေရာလပ်တစ်ခုလုံးကို ဖုံးလွှမ်းသွားတော့သည်။ ရတနာဆောင်အတွင်းရှိ အပူချိန်မှာ အနည်းဆုံး ၁၀ ဒီဂရီခန့် ချက်ချင်း ကျဆင်းသွားသည်။ အသက်ရှူလိုက်လျှင်ပင် ရေခဲမှုန်များ ဖြစ်သွားလောက်သည့် အခြေအနေသို့ ရောက်ရှိသွားခဲ့ပြီ ဖြစ်၏။ လော့ရှင်းပင်လယ်ပြင်မှာ ပုံမှန်အားဖြင့် တစ်နှစ်ပတ်လုံး နွေးထွေးနေတတ်သည်။ ဆောင်းရာသီမှာပင် ရေခဲဆိုသည်မှာ မြင်ရခဲလှ၏။ သို့သော် ယင်းစန်းဟွာ တကယ်တမ်း မလှုပ်ရှားရသေးမီမှာပင် သူ့ ပတ်ဝန်းကျင်မှာ ဤမျှအထိ ပြောင်းလဲသွားခြင်း ဖြစ်သည်။

၎င်းမှာ သူ မည်မျှ အင်အားကြီးကြောင်းကို ပြသနေခြင်းပင်။

ယွဲ့ရှင်းလူသည် ပတ်ဝန်းကျင်ကို သတိကြီးစွာဖြင့် စောင့်ကြည့်နေပြီး သူ၏ ခန္ဓာကိုယ်အတွင်းမှ စိတ်ဝိညာဉ်စွမ်းအားများကို စုစည်းကာ အချိန်မရွေး တိုက်ခိုက်ရန် ပြင်ဆင်ထားသည်။ ယင်းစန်းဟွာ၏ ကြောက်မက်ဖွယ် နာမည်ဂုဏ်သတင်းကို သူ ကြားဖူးသည်မှာ နှစ်ပေါင်းများစွာ ရှိပြီဖြစ်သော်လည်း ယခုမှာ သူနှင့် တိုက်ရိုက် ရင်ဆိုင်ရခြင်းမှာ ပထမဆုံးအကြိမ် ဖြစ်သည်။ ထို့ကြောင့် သူ အလွန်အမင်း သတိထားနေခြင်း ဖြစ်သည်။

သူ၏ သတိထားနေသော အမူအရာကို မြင်ရသည့်အခါ တခြား ကျင့်ကြံသူများသည်လည်း အသက်အန္တရာယ်နှင့် ရင်ဆိုင်နေရသကဲ့သို့ ခံစားရပြီး သူတို့၏ စိတ်အစဉ်များမှာ တင်းမာနေကြတော့၏။

"ပန်းပွင့်တွေ... ပန်းပွင့်တွေ ကြွေနေတယ်!"

ရုတ်တရက် ကျင့်ကြံသူတစ်ဦးက အော်ဟစ်လိုက်သည်။

လူတိုင်း အပေါ်သို့ မော့ကြည့်လိုက်ကြရာ ကောင်းကင်တစ်ခုလုံးတွင် လွင့်မျောနေသော ရေခဲပြာရောင် ပန်းပွင့်များကို မြင်တွေ့လိုက်ရသည်။

အလွန်ပင် လှပလွန်းလှသည်။

ကျင့်ကြံသူတစ်ဦးက သိလိုစိတ်ဖြင့် ထိုပန်းပွင့်များကို ထိရန် လက်လှမ်းလိုက်သည်။

ယွဲ့ရှင်းလူ ရုတ်တရက် တစ်ခုခုကို သတိရသွားပြီး မျက်နှာပျက်ကာ အော်ဟစ်လိုက်၏။

"ပန်းပွင့်တွေကို ရှောင်ကြ… အဲဒါတွေက အန္တရာယ်ရှိတယ်”

တခြားသူများမှာ ထိတ်လန့်သွားပြီး အမြန်ပင် ရှောင်တိမ်းလိုက်ကြသည်။ ထိုကျင့်ကြံသူသည် သူ၏လက်ကို ပြန်ရုပ်ရန် ကြိုးစားသော်လည်း အချိန်နှောင်းသွားခဲ့ပြီ ဖြစ်၏။ ရေခဲပြာရောင် ပန်းပွင့်လေး တစ်ပွင့်မှာ သူ၏ လက်ထိပ်ပေါ်သို့ ကျရောက်သွားခဲ့ပြီ ဖြစ်သည်။

နောက်တစ်ခဏမှာပင် ထိုပန်းပွင့်လေးမှာ ကွဲအက်သွားပြီး ရေခဲစပေါင်း များစွာအဖြစ် ချက်ချင်း ပြောင်းလဲသွားတော့၏။ မျက်စိတစ်မှိတ်အတွင်းမှာပင် ထိုလူ၏ ခန္ဓာကိုယ်တစ်ခုလုံးမှာ ရေခဲများ ဖုံးလွှမ်းသွားသည်။ ပြန်ကြည့်လိုက်သည့်အခါ သူသည် ရေခဲရုပ်တုတစ်ခုအဖြစ် ပြောင်းလဲသွားခဲ့လေပြီ။ သူ၏ မျက်နှာတွင် အနည်းငယ် ပြုံးနေသော အမူအရာမှာ သက်ရှိထင်ရှား ရှိနေသကဲ့သို့ပင် တည်ငြိမ်နေသည်။ သို့သော် ဝိညာဉ်အာရုံဖြင့် အသေအချာ စစ်ဆေးကြည့်ပါက သူ၏ အသက်ဓာတ်အားလုံး ကွယ်ပျောက်သွားခဲ့ပြီ ဖြစ်ကြောင်း သိနိုင်မည် ဖြစ်သည်။

လူအုပ်ကြီးမှာ ထိတ်လန့်တုန်လှုပ်သွားကြ၏။ ထိုသူမှာ ကျားဖြူဂိတ်မှ ဂိုဏ်းချုပ် လျိုယွီ ဖြစ်ပြီး ဓမ္မအမှတ်အသား ၁၃ ခု ရှိသော နိဗ္ဗာန်အဆင့် ကျင့်ကြံသူ ဖြစ်သည်။ ဆယ်ခုနှင့်အထက် ရှိသူများထဲတွင် သူသည် အတော်လေး နာမည်ကျော်သူ ဖြစ်သည်။

မည်သို့ပင်ဖြစ်စေ သူ ထွက်ပြေးရန် အခွင့်အရေး ရလိမ့်မည်ဟု လူတိုင်း ထင်မှတ်ထားခဲ့ကြသည်။ သို့သော် ပေါ့ပေါ့ပါးပါး ထိတွေ့လိုက်ရုံမျှဖြင့် သူ၏ အသက်မှာ ပျောက်ဆုံးသွားခဲ့ပြီ ဖြစ်သည်။ ထိုပန်းပွင့်များအတွင်း ဖုံးကွယ်ထားသော သတ်ဖြတ်နိုင်စွမ်းမှာ မည်မျှအထိ ကြောက်စရာကောင်းကြောင်း စဉ်းစားကြည့်ရုံနှင့်ပင် သိနိုင်ပါသည်။