အခန်း (၁၀၃-၁၀၄)

Vol. 11 Ch. 103-104

Chapter 103

အခန်း ၁၀၃

ချောင်မူသည် မကြုံစဖူး အဆင့် A ရခဲ့၍ အသက်ခြောက်ဆယ်အရွယ်သို့ ရောက်သွား၏ ။

သူ မျက်လုံးမှိတ်ထားပြီး အိမ်မက်ထဲတွင် လေ့ကျင့်ရသည်များကို ပြန်ခံစားကြည့်နေသည် ။

' သိုင်းပညာ လေ့ကျင့်တယ်ဆိုတာ မလွယ်ဘူး.. ဒီအခြေအနေကို ရောက်ဖို့ တစ်နေ့ပြီးတစ်နေ့ ဇွဲလုံ့လနဲ့ ချွေးသံတရွှဲရွှဲ ကြိုးစားခဲ့ရတာ.. '

' ဒီလို ကြိုးစာခဲ့လို့လဲ ဒီလို အောင်မြင်နိုင်တာပေါ့..'

' ဟူးးး.. ငါလေး ပင်ပန်းသွားပြီ ..'

လက်ရှိတွင် ချောင်မူ ၏ သက်ရှည်လက်သီးသိုင်းသည် ချောင်စန်းရွှယ် သင်ကြားပေးခဲ့သော အခြေခံအဆင့်တွင် ရှိနေဆဲပင် ။ စိတ်ဝိညာဥ်သန့်စင်ခြင်း အဆင့်သို့ ဝင်ရောက်ရန် နည်းလမ်း မရှိ၍ တစ်ဆို့သွားလေပြီ ။

ရှေးဟောင်းကျင့်စဥ်ဖြစ်သော အဆုံးမဲ့သန့်စင်သောယန် ကျင့်စဥ်မှာလည်း အဆင့်သုံးသို့ ရောက်သွား၏ ။

သူ၏ သိုင်းအကုန်လုံးမှာ အဆင့်တခုအထိ တိုးတက်လာခဲ့သဖြင့် အားနည်းချက်ဟူ၍ မရှိသလောက် ဖြစ်သွားသည် ။

ချောင်မူ ၏ အာရုံကို ဖမ်းစားနိုင်ခဲ့သည်က သိုင်းကျမ်းနှစ်ခုထဲသာဖြစ်၏ ။

ပထမ တစ်ခုမှာ ကောင်းကင်နတ်ဆိုးပြိုကွဲခြင်း သိုင်းဖြစ်သည် ။ ဤသည်မှာ ချောင်မူ၏ အားအထားရဆုံး သိုင်းပင် ။ အကြိမ်ပေါင်းများစွာ အသုံးပြုပြီးနောက်ကျွမ်းကျင့်အဆင့်သိူ့ ရောက်နိုင်မည်ဟု မည်သူထင်ပါမည်နည်း ။

ချောင်စန်းရွှယ် သင်ပေးခဲ့သော ရည်ရွယ်ချက်မှာ အသတ်ဘေးမှ လွတ်မြောက်နိုင်ရန်ဖြစ်သော်လည်း ချောင်မူသည် ကိုယ်ပိုင်ဟန်ရသည်အထိ ကျွမ်းကျင်လာခဲ့သည် ။

ကောင်းကင်နတ်ဆိုးပြိုကွဲခြင်းသိုင်းသည် အတွင်းအင်္ဂါနှင့် အရိုးများမှ စွမ်းအင်များကို အတွင်းအားဖြင့် ပေါင်းကူးပြီး ထုတ်ယူခြင်းဖြစ်၏ ။ သို့ရာတွင် ချောင်မူ ၏ သိုင်းမှာမူ သွေးနှင့် ချီများမှ စွမ်းအားများကိုပါ ထုတ်ယူ၍ ရနေလေပြီ ။ ဝူချင်းရှင်း က လီမီးတောက်ဖြင့် ရှို့ခဲ့သော အချိန်တွင် သွေးနှင့်ချီများကို လောင်စာ အဖြစ် တွန်းအားပေးခဲ့ခြင်းကြောင့် သူ ကျွမ်းကျင်သွား၏ ။

ဒုတိယသိုင်းကျမ်းမှာ ထပ်ဆင့်လှိုင်းခွန်အား ဖြစ်သည် ။ ချောင်စန်းရွှယ်၏ အပြောအရ ချောင်မိသားစုအကြီးအကဲပင်လျှင် အဆင့် ၃ အထိသာ ရောက်ခဲ့ဘူးသည် ။ ယခု ချောင်မူသည် အဆင့် ၂ နှစ်ထပ်လှိုင်းသို့ ရောက်နေလေပြီ ။

သေဆုံးမှုအကဲဖြတ်ချက် မြင့်မားလေလေ အချိန်ကို အသုံးချရာတွင် ပိုကောင်းလေလေဖြစ်၍ ဤဆယ့်ခြောက်နှစ်တာ ကာလအတွင်း အကျိုးအရှိဆုံးမှာ သိုင်းကျမ်းများ၏ တိုးတက်မှုပင်ဖြစ်သည် ။

' စန်းရွှယ် ခုဘယ်လိုနေလဲ မသိဘူး.. သူ အင်မော်တယ်လမ်းစဥ်ကို စလျှောက်နေလောက်ပြီလား..'

' အချိန်တွေကုန်တာ မြန်လိုက်တာ.. ငါ့အသက်က ခြောက်ဆယ်တောင် ရှိသွားပြီ.. အင်မော်တယ်လမ်းစဥ်က သိုင်းလမ်းစဥ်ထက် ပိုတိုးတက်တာမြန်တယ်ဆိုတော့ နောက်တစ်ခါတွေ့ အကူအညီတောင်းဖို့ အခွင့်အရေး မရှိလောက်တော့ဘူး ..'

ချောင်မူသည် အသက်ကြီးလာသဖြင့် သူ၏ ဆယ်ကျော်သက်ဘဝမှ မိတ်ဆွေဟောင်းများကို ပြန်စဥ်းစားမိနေ၏ ။ ချောင်စန်းရွှယ် ဟူသည်က သူ၏ လမ်းကိုညွှန်ပြပေးခဲ့သူ တစ်ယောက်ပင် ။ ယနေ့ ချောင်မူ သည်ကျင့်ကြံသူများနှင့် ပထမဆုံး တိုက်ခိုက်ဖူးသည်ကလည်း ချောင်မိသားစုခြံဝင်းဟောင်းတွင် ဖြစ်၏ ။

ချောင်မူ မျက်လုံးမှိတ်ပြီး သူ့ဝမ်းဗိုက်အောက်ပိုင်းကို အာရုံစိုက်လိုက်သည် ။

မျှော်လင့်ထားသည့်အတိုင်း သူ့ဝမ်းဗိုက်အောက်ပိုင်း၏ စွမ်းအင်ပင်လယ်သည် တစ်ဖန် လျင်မြန်စွာ ကျယ်ပြန့်လာပြန်သည် ။

သိုင်းပညာရှင်အဆင့် ၆ မှ အဆင့် ၄ အထိ ခုန်တက်လာခဲ့၏ ။

' အမ်.အဆင့် ၄ တောင်ရောက်သွားပြီပဲ.. နောက်တစ်ဆင့်တက်ရင် စိတ်ဝိညာဉ်သန့်စင်ခြင်းအဆင့်ဖြစ်လိမ့်မယ်..'

ချောင်မူသည် သူ၏ ခန္ဓာကိုယ်တစ်ခုလုံးကို ကျေနပ်အားရသည်အထိ စစ်ဆေးပြီးသည့်နောက် အပြင်သို့ ထွက်လာခဲ့၏ ။ အသက်ကြီးလာသည်က စိတ်နေစိတ်ထား တစ်မျိုးပြောင်းလာသည်ကို သူခံစားမိပြီး ပျော်ရွှင်နေလေသည် ။ ရုတ်တရက် သူတွေးမိသွား၏ ။

' ငါ သက်ရှည်လက်သီးသုတ္တန် ဒုတိယတွဲ မရရင် အဆင့် ၃ ကို ရောက်မှာမဟုတ်ဘူး.. ' ( သက်ရှည်လက်သီးသုတ္တန်က တစ်ခုလုံးကို ခေါ်တာဗျ.. သက်ရှည်လက်သီးသိုင်းက ရှေ့ပိုင်းတင်မို့ အဲ့လိုသုံးလိုက်တာ.. )

ချောင်မူသည် သက်ရှည်လက်သီးသိုင်း၏ အရှေ့ပိုင်းကို ကျွမ်းကျင်အဆင့်အထိ တက်မြောက်ပြီးသည့်အတွက် အသက်ခြောက်ဆယ်အရွယ်၌ပင် ကြံ့ခိုင်သန်မာနေသေး၏ ။ သို့ရာတွင် နောက်ဆက်တွဲ သိုင်းကျမ်း မရဘဲ အသက်ပိုကြီးလာပါက မည်သို့ ဖြစ်သွားနိုင်သည်ကို သူ မသိပေ ။

' ဝူကျိအသင်းကကောင်တွေ ဘယ်မှာ ပုန်းနေကြတာလဲ မသိဘူး ဒုတိယတွဲကို မြန်မြန်ရှာနိုင်မှ ဖြစ်မယ်.. '

ချောင်မူသည် ကုံးမျိုးရိုး မိတ်ဆွေဟောင်းကိုပင် သတိရမိသွား၏ ။ ထိုသူက အလွန်ရက်ရောကာ မိတ်ဆွေများကို ကူညီတက်သူဖြစ်သည် ။

နေမင်းကြီးက အနောက်ဘက်သို့ ငုတ်လျိုးသွား၍ အမှောင်ထုက ဖုံးလွှမ်းသွားလေပြီ ။

ချောင်မူက လမ်းဘေးတွင် ရပ်နေပြီး မီးများလင်းထိန်နေသော ရွှမ်ထျန်းဘုရားကျောင်းကို ကြည့်နေ၏ ။

ဘုရားကျောင်းတစ်ခုလုံး မီးများလင်းထိန်နေပြီး ကြက်ပျံမကျ စည်ကားလျက်ရှိသည် ။ ယနေ့မနက်တွင် ဖြစ်ခဲ့သော အဖြစ်အပျက်က မဖြစ်ဘူးသကဲ့သို့ပင် ။

ချောင်မူက ဘုရားကျောင်းအနောက်ဘက်ရှိ တောင်ပေါ်သို့ ခေါင်းမော့ကြည့်လိုက်လျှင် နှလုံးသားထဲမှ ထူးဆန်းသော ခံစားချက်ကို ခံစားမိလိုက်သည် ။

' ရွှမ်ထျန်းဂိုဏ်းရဲ့ သူတော်စင်မ ဝူချင်းရှင်း.. သူဘာလို့ ဝူကျိအသင်းနဲ့ ပက်သက်နေတာ.. '

ချောင်မူ တွေးနေစဥ် ရုတ်တရက် ခန္ဓာကိုယ်တောင့်တင်းသွား၏ ။ သူ၏ ဗီဇ အာရုံခံအရ ဝူချင်းရှင်းကဲ့သို့သော နောက်တစ်ယောက်သည် ဟဲရန်မြို့ပြင်တွင် ရောက်ရှိနေလေသည် ။

' ဝူကျိအသင်းက လူ ဖြစ်နိုင်မလား..'

ချောင်မူက ရွှမ်ထျန်းဘုရားကျောင်းကို ပြန်ကြည့်ပြီးနောက် အကြည့်လွဲလိုက်တော့သည် ။ မနက်ခင်းတွင် သေခဲ့ရသည်မှ ကျင့်ကြံသူများ၏ စွမ်းအားကို အနည်းငယ်နားလည်လာခဲ့သည် ။

အဆင့် ၆ သိုင်းပညာရှင် တစ်ယောက်ပင် ဂိတ်စောင့်ဖြစ်နေသည့် ကျင့်ကြံသူများအား သူ ရင်မဆိုင်ချင်သေးချေ ။ သူ သေရမည်ကို မကြောက်သော်လည်း အကျိုးမရှိဘဲ မသေချင် ။ လူသားမီးရှူးတိုင် ထွန်းသည်က ဤမှောင်မိုက်သော ကမ္ဘာကို အများကြီး အလင်းပေးနိုင်စွမ်းမရှိ ။

' ငါအာရုံခံမိတဲ့ မြို့ပြင်ကလူက ဝူကျိအသင်းဝင်လားဆိုတာကို အရင်သွားကြည့်ရမယ်.. '

ယခုအချိန်၌ ချောင်မူသည်လည်း သိုင်းသူတော်စင်စိတ်ဝိညာဥ်ကျမ်း၏ ထူဆန်းမှုကို ယောင်ဝါးဝါး သဘောပေါက်လာပြီ ဖြစ်သည် ။

Chapter 104

အခန်း ၁၀၄

နောက်တစ်နေ့...

မြို့အနောက်ဘက်ခြမ်းရှိ လျှို့ဝှက်ဆန်းကြယ်သော စံအိမ်တော်ကြီး တစ်ခုတွင်...

ယုံဟဲဧကရာဇ်သည် ပက်လက်ကုလားထိုင်ပေါ်တွင် လှဲလျောင်းပြီး မျက်စိမှိတ်ကာ မှိန်းနေ၏ ။ သူကျားမြီးကို ဆွဲမိထား၍ သာမန်ပြည်သူများ၏ လူနေမှုဘဝကို လျှောက်ကြည့်ရန် အားမရှိတော့ပေ ။ ဗျူဟာကျကျ တန်ပြန်နိုင်ရန် အတွက် စဥ်းစားနေရတော့သည် ။

" အရှင်မင်းကြီး.. ချောင်ပိုင်ဖူ ပြောတဲ့ ချောင်မိသားစုအကြောင်း သတင်းရလာပါပြီ.."

အစောင့်ချူးက နောက်တွင် ပေါ်လာပြီး သတင်းပို့လိုက်၏ ။

ငါးပျံအစောင့်တပ်သည် ဧကရာဇ်၏ လှုံခြုံရေးအတွက်သာမက သူလျိုအလုပ်များအပြင် သတင်းစုဆောင်းရန်လည်း တာဝန်ရှိ၏ ။

ငါးပျံအစောင့်တပ်သည် ချောင်ပိုင်ဖူ၏ နောက်ကြောင်းကို စုံစမ်းနေသည်မှာ ကြာပြီဖြစ်သည် ။

အစပိုင်းတွင် ယုံဟဲဧကရာဇ်၏ စိတ်ဝင်စားမှုသည် ဝမ်စုန့်ဟဲ ကြောင့်သာဖြစ်ပြီး ။ ဝမ်စုန့်ဟဲ သက်ရှိထင်ရှား ရှိမရှိ စစ်ဆေးလို၍ပင် ။ သို့သော်လည်း နောက်ပိုင်းတွင် ချောင်ပိုင်ဖူ ကိုယ်တိုင်ကပါ စိတ်ဝင်စားစရာကောင်းလာ၍ စုံစမ်းသည်ကို ပို၍ အားထည့်ခဲ့၏ ။

" ချောင်ပိုင်ဖူက သိုင်းသူတော်စင် သုတ်သင်ရှင်းလင်းခဲ့တဲ့ ဟဲရန်မြို့က ချောင်မိသားစုနဲ့ ဆက်စပ်နေလား.. "

ယုံဟဲ ဧကရာဇ်က မေးလိုက်၏ ။ ချောင်မျိုးရိုးနာမည်သည် ဤကမ္ဘာပေါင်တွင် မထူးခြားသဖြင့် များစွာ ရှိ၏ ။ နာမည်ကြီး ချောင်မိသားစု ဆိုပါမူ အဖျက်ဆီးခံလိုက်ရသော ဟဲရန်မြို့မှ ချောင်မိသားစုသာ ရှိပေသည် ။

" အရှင်မင်းကြီး.. သိုင်းသူတော်စင်က ကြင်နာတက်သူမဟုတ်လို့ ချောင်ပိုင်ဖူလို လူမျိုးကို ချန်ထားမှာ မဟုတ်ပါဘူး..ချောင်ပိုင်ဖူရဲ့ ချောင်မျိုးနွယ်က သပ်သပ် ပါ.. "

" ချောင်ပိုင်ဖူက ဟဲရန်မြို့မှာ ကျောက်တုံးထဲက ခုန်ထွက်လာတဲ့မျောက်လိုပါပဲ ရိုးရှင်းပုံရပေမဲ့ သူ့နောက်ခံက အတော်လေး ဆန်းကြယ်နေတယ်.. "

" ရှန်းချင်ဟယ်ရဲ့ အခြေအနေကို ကျွန်တော်တို့ စုံစမ်းစစ်ဆေးပြီးပါပြီ.. ရှန်းချင်ဟယ်က ချောင်ပိုင်ဖူအကြောင်းကို သိတာကအတော်လေး အကန့်အသတ်ရှိတယ်ဆိုတာ အတည်ပြုနိုင်ပါတယ်.. ကျွန်တော်မျိုးတို့လောက်တောင် သိမှာ မဟုတ်ပါဘူး.. "

ချူးရှင်း၏ အမူအရာက မသက်မသာဖြစ်နေ၏ ။ သူပိုစုံစမ်းလေ ကြောက်ရွံ့မိလေ ဖြစ်သည် ။ မဟာယန်အင်ပါယာသည် ကျဆင်းနေသော်လည်း အင်ပါယာ ဖြစ်နေသေးသည် ။ ငါးပျံအစောင့်တပ်ဟူသည်က အင်ပါယာအတွင်း အပ်ပျောက်သည်ကိုပင် ရှာနိုင်သော်လည်း ချောင်မိသားစုအကြောင်း သဲလွန်စပင် မတွေ့ရသဖြင့် ကြောက်ရွံ့လာမိ၏ ။

ချောင်ပိုင်ဖူသည် သာမန်လူမဟုတ်ပေ ။ ကျင့်ကြံသူတစ်ယောက်ကြောင့် ဒဏ်ရာပြင်းထန်စွာ ရခဲ့သဖြင့် စိတ်ဝိညာဥ်သန့်စင်ခြင်း အဆင့်မှ သိုင်းပညာရှင်အဆင့် ၆ သို့ ကျဆင်းသွားသူဖြစ်၏ ။ ထို့ကြောင့် ချောင်ပိုင်ဖူ၏ နောက်ကွယ်ရှိ ချောင်မိသားစုသည်လည်း သာမန်မဖြစ်နိုင်ပေ ။

ထို့ကြောင့် ဖြစ်နိုင်သည်က ချောင်မိသားစုသည် လျှို့ဝှက်ဆန်းကြယ်လွန်းနေ၍ ငါးပျံအစောင့်တပ်သည်ပင် ရှာမတွေ့နိုင်ခြင်း ဖြစ်ပေမည် ။

" ပြီးတော့ အနားက ယန်မြို့မှာလည်း ချောင်မိသားစု သားအဖအကြောင်း သတင်းတွေပြန့်နေလို့ စုံစမ်းကြည့်တာ ချောင်ပိုင်ဖူနဲ့ ဆက်နွယ်နေတာကို တွေ့ရပါတယ်.. "

" ယန်မြို့မှာ ကျော်ကြားတဲ့ ချောင်မိသားစုရဲ့ ဆောင်ပုဒ်က မှန်ကန်တဲ့ နည်းလမ်းနဲ့ သေဆုံးခြင်းတဲ့.. ယန်မြို့မှာ ချောင်သားအဖ တွေက ဖြောင့်မတ်သူတွေအဖြစ် တော်တော်လေး နာမည်ကြီးပါတယ် .."

" ပြီးတော့ ချောင်ပိုင်ဖူ ပြောခဲ့တဲ့ဆောင်ပုဒ်က ..ဒီကမ္ဘာကြီးက ဘယ်လိုအခြေအနေမျိုး ရောက်နေနေ ပုခုံးထမ်းထားဖို့က လူသားတွေရဲ့ တာဝန်ပဲတဲ့.. ပါ.. "

ယုံဟဲဧကရာဇ်သည် ဝမ်းနည်းဟန်ဖြင့် နားထောင်နေပြီး..

" ဒီလို ဆောင်ပုဒ်နှစ်ခုကို လက်ဆင့်ကမ်းခဲ့တဲ့ သူတို့ဘိုးဘေးတွေက ဘယ်လိုလူမျိုးလဲ ဆိုတာ ငါသိချင်မိသား.. "

သူ သက်ပြင်းချလိုက်၏ ။ ထို့နောက် ထပ်မေးလိုက်သည် ။

" နောက်ထပ် ဆက်နွယ်မှုတွေရော ရှိသေးလား.. "

" ရှိပါတယ်.."

အစောင့်ချူးက ပြန်ဖြေလိုက်သည် ။

" ယန်မြို့က အဖေ ချောင်စန်း.. သားနှစ်ယောက် ချောင်မူနဲ့ ချောင်လင်း.. ဟဲရန်မြို့က ချောင်ပိုင်ဖူ.. သူတို့အားလုံးက ကောင်းကင်နတ်ဆိုးပြိုကွဲခြင်းသိုင်းကို အသုံးပြုကြပါတယ်.. "

ယုံဟဲဧကရာဇ်..."....."

သူ ဆွံ့အစွာ တွေးလိုက်မိ၏ ။

' အဲ့တာက ဆက်နွယ်နေတယ်လို့ ပြောလို့ရလို့လား..'

ချူးရှင်းက ဆက်ပြောသည် ။

" ကောင်းကင်နတ်ဆိုးပြိုကွဲခြင်းသိုင်းတစ်ခုထဲရင် ဆက်နွယ်တယ်ပြောဖို့ မလုံလောက်ပေမဲ့ သဲလွန်စတွေကို ပေါင်းစပ်စဥ်းစားပြီး ကျွန်တော်မျိုး ကောက်ချက်ချနိုင်ခဲ့ပါတယ်.. "

" ဒီ လျှို့ဝှက်ဆန်းကြယ်ပြီး ထူးဆန်းတဲ့ ချောင်မိသားစုက ဆောင်ပုဒ်နှစ်အပြင် ကောင်းကင်နတ်ဆိုးပြိုကွဲခြင်းသိုင်းကိုလည်း လက်ဆင့်ကမ်းခဲ့ကြပါတယ်.."

ယုံဟဲဧကရာဇ် ရူးချင်စိတ်ပင် ပေါက်သွား၏ ။

ဟဲရန်မြို့ရှိ သိုင်းလောကထိပ်သီး ချောင်မိသားစု မျိုးရိုးစဥ်ဆက် လက်ဆင့်ကမ်းခဲ့သည်က သက်ရှည်လက်သီးသုတ္တန်ဖြစ်သည် ။

ချောင်ပိုင်ဖူ၏ ချောင်မိသားစု လက်ဆင့်ကမ်းလာသည်က မိမိကိုယ်ကို သတ်သေနည်းဖြစ်သည့် ကောင်းကင်နတ်ဆိုးပြိုကွဲခြင်းသိုင်း ဖြစ်နေသည်လော ။ မျိုးရိုးစဥ်ဆက်ပြတ်သွားမည်ကို မစိုးရိမ်သော မိသားစုမျိုး ရှိနေသည်လော ။

သူကိုယ်တိုင် ချောင်ပိုင်ဖူ၏ သေဆုံးမှုကို မမြင်ခဲ့ရပါလျှင် ဤသို့သော မိသားစုမျိုး ရှိသည်ကို ယုံနိုင်မည်မထင် ။

မိသားစုတိုင်းသည် ၎င်းတို့၏ သားစဥ်မြေးဆက် ဖွံ့ဖြိုးတိုးတက်ရေးအတွက်ကိုသာ ရှေးရှုကြ၏ ။ ချောင်ပိုင်ဖူကဲ့သို့သော အဆင့် ၃ အထိ ရောက်ဖူးသူ ပေါ်ထွက်လာသည့် မိသားစုမှာ သာမန်မိသားစုမျိုး မဖြစ်နိုင်ချေ ။

" ဒါဆိုရင်.. ဆက်ပြီး စုံစမ်းပါ.."

ယုံဟဲ ဧကရာဇ်က အမိန့်ပေးလိုက်သည် ။

" ချောင်ပိုင်ဖူ သေသွားပေမဲ့ ချောင်မိသားစုထဲမှာ ချောင်ပိုင်ဖူလိုမျိုး လူတွေ အများကြီး ရှိမယ်ဆိုရင် ..သူတို့က မဟာယန်ကို ကာကွယ်ဖို့ ဆန္ဒရှိမယ်ဆိုရင်.. နှစ်ပေါင်းတစ်ထောင်အတွင်းမှာ အင်မော်တယ်လမ်းစဥ်ထက် မနိမ့်ကျတဲ့ သိုင်းလမ်းစဥ်ကို ငါတို့ ရှာဖွေနိုင်မှာ သေချာပါတယ်.."

ဤ စကားကိုကြားလျှင် အဆင့်၃ စိတ်ဝိညာဥ်သန့်စင်ခြင်းအဆင့် ချူးရှင်း အနည်းငယ် ဝမ်းနည်းမိသွား၏ ။

သိုင်းလမ်းစဥ်သည် အင်မော်တယ်လမ်းစဥ်ကို ယှဥ်ပြိုင်နိုင်မည်လော ။

ဤကြီးမားသော ရည်မှန်းချက်သည် ရှေ့တွင်မှုန်ဝါးဝါးမြင်နေရသော တံလျှပ်နှင့်တူ၏ ။ မြင်နေရသော်လည်း ရောက်ရှိရန် မဖြစ်နိုင်ချေ ။

ကျင့်ကြံသူများ မဟာယန်အင်ပါယာသို့ မဝင်ရောက်မီက သိုင်းပညာရှင်များသည် မဟာယန်အင်ပါယာရုံးတော်၏ အဓိက အင်အားစုများဖြစ်သည် ။ မဟာယန်ရုံးတော်သည် သိုင်းပညာရှင်များအပေါ် မှီခိုနေရသည်ဆိုပါက လွန်မည်မထင် ။

သို့သော်လည်း လူ့ခန္ဓာကိုယ်တွင် ကန့်သတ်ချက်များ ရှိလေသည် ။ သိုင်းပညာရှင်များ၏ လေ့ကျင့်မှုသည် ထိုကန့်သတ်ချက်များအား ချိုးဖျက်နိုင်ရန်ဟု ဆိုနိုင်သော်လည်း ထိုသည်က အတိုင်းအတာတစ်ခု အထိသာဖြစ်၏ ။

အဆင့် ၄ ဟူသည်က သိုင်းပညာရှင်၏ ဒန်တျန် ကန့်သက်ချက်ဖြစ်သည် ။ အဆင့်၄ မတိုင်မီအထိ အဆင့်တက်တိုင်း အတွင်းအား နှစ်ဆကျော် တိုးလာနိုင်သော်လည်း အဆင့် ၃ သို့ ရောက်လျှင် အတွင်းအား သိသိသာသာ တိုးမလာတော့ပေ ။

အဆင့် ၄ သို့ ရောက်ပြီးနောက် သိုင်းပညာရှင်၏ အတွင်းအားနှင့် ခွန်အားမှာ လူ့ခန္ဓာကိုယ်၏ အမြင့်ဆုံးကန့်သတ်ချက်သို့ ရောက်သွားလေပြီ ။ မတိုးတက်တော့ဟု ဆို၍မရသော်လည်း အတွင်းအား အကန့်အသတ်ကို ချိုးဖောက်ချင်လျှင် နှစ်ပေါင်းများစွာကြာအောင် စုဆောင်းရပေတော့မည် ။ အောင်မြင်သွားလျှင်လည်း ယခင်အဆင့်များကဲ့သို့ အများကြီး တိုးမလာနိုင်တော့ ။

ဤအကြောင်းကြောင့်ပင်… ယခင် သိုင်းပညာရှင်များသည် အတွင်းအားကို မိုက်မဲစွာ ဆက်လက်စုဆောင်းနေမည့်အစား အတွင်းအား လေ့ကျင့်ခြင်း၏ အဆုံးစွန်သို့ ရောက်ရှိပြီးနောက် စိတ်ဝိညာဉ်သန့်စင်နည်းလမ်းကို တဖြည်းဖြည်း ရှာဖွေတွေ့ရှိခဲ့ကြသည် ။

စိတ်ဝိညာဉ် သန့်စင်ခြင်း နည်းလမ်းသည် အတွင်းအားကို စုဆောင်းခြင်းထက် ပိုမိုအားကောင်း၏ ။

သို့ရာတွင် ကျင့်ကြံသူတစ်ယောက်၏ ရှေ့တွင် ဆိုလျှင်တော့.......

ချူးရှင်းသည် ထိုအကြောင်းကို တွေးနေစဥ် သူ၏ ခွန်အားထက် အဆမတန်သာလွန်သော ခြိမ်းခြောက်မှုတစ်ခုကို ခံစားမိလိုက်၏ ။ ဤသည်က စိတ်ဝိညာဥ်သန့်စင်ပြီးသော သိုင်းပညာရှင်တစ်ယောက်၏ ဆဋ္ဌမ အာရုံပင် ။

" လုပ်ကြံသူလား.. ဟမ်..မဟုတ်ဘူး ..ကျင့်ကြံသူဟ.."

ချူးရှင်း တိုးတိုးလေး ပြောလိုက်သည် ။

မျက်လုံးမှေးထားသော ဧကရာဇ်က မျက်လုံးဖွင့်ကြည့်လိုက်၏ ။ နောက်ဆုံးတွင်တော့ ရောက်လာလေပြီ ။ ချူးရှင်း၏ ဓားပျံကြောင့် ဖြေရှင်းချက် တောင်းမည့် ကျင့်ကြံသူ လာမည်မှန်း သူသိထားသည် ။

ယုံဟဲဧကရာဇ်က နှလုံးသားထဲတွင် တိတ်တဆိတ်သက်ပြင်းချလိုက်သော်လည်း အပြင်ပန်းတွင်မူ မတ်တပ်ထရပ်ကာ ကျောကို ဖြောင့်ဖြောင့် ဆန့်ထားလိုက်၏ ။

ကျင့်ကြံသူများ မည်မျှပင် အစွမ်းထက်စေကာမူ မဟာယန်အင်ပါယာ၏ ဧကရာဇ် တစ်ယောက်အနေဖြင့် ဂုဏ်သိက္ခာဆုံးရှုံး၍ မရနိုင် ။ လဝက်အကြာတွင် အစီအစဥ်အရ ချင်းမင်တောင်ပေါ်ရှိ ချင်းယွင်ဘုရားကျောင်းမှအင်မော်တယ်ရုပ်ထုများကို ဂါရဝပြုရမည်ဆိုလျှင်ပင် ယခု ဂုဏ်သိက္ခါအား ထိန်းထားရပေအုံးမည် ။