အခန်း (၄၂၇-၄၂၈)

အပိုင်း(၄၂၇) ချိုးကုံရုံ၏ အတွေ့အကြုံ

လင်းယွမ်က ခဏမျှ စဉ်းစားလိုက်ပြီး ဤလူက ချိုးရင်ယွဲ့၏ ဖခင် ဖြစ်နိုင်ခြေရှိသည်ကို တွေးမိသွားသောကြောင့် ခိုးကြောင်ခိုးဝှက် တိုက်ခိုက်မည့် အကြံကို လက်လျှော့လိုက်သည်။

လက်ရှိတွင် ဤနေရာ၌ သူတို့နှစ်ယောက်တည်းသာ ရှိပြီး ထွက်သွားနိုင်သည့် တစ်ခုတည်းသော ထွက်ပေါက်မှာလည်း သူ ဝင်လာခဲ့သော ဥမင်ဝသာ ရှိသည်။

ထို့နောက် သူက ခန္ဓာကိုယ်ကို တစ်ချက် ရွှေ့လျားလိုက်ပြီး ရေခဲဂူထဲမှ ခုန်ထွက်လာခဲ့သည်။

"ခေါင်းဆောင်ချိုးရဲ့ လက်စွမ်းတွေက မဆိုးဘူးပဲ"

"ဘယ်သူလဲ"

ခေါင်းဆောင်ချိုးက ရုတ်တရက် လှည့်ကြည့်လိုက်ပြီး သူ၏ အနောက်ဘက်ရှိ လင်းယွမ်ကို မျက်နှာပြင်ထက်တွင် သတိထားမှုအပြည့်ဖြင့် ကြည့်လိုက်သည်။

လင်းယွမ်ကို မြင်လိုက်ရသည့် တစ်ခဏအတွင်း သူက မနေနိုင်ဘဲ အံ့သြသွားကာ မင်သက်စွာဖြင့် မေးလိုက်သည်။ "မင်း အသက်ရှင်နေသေးတာလား"

လင်းယွမ်က ခပ်ဖွဖွ ရယ်မောလိုက်သည်။ "ဘာလဲ... ခေါင်းဆောင်ချိုးက ကျွန်တော် သေစေချင်နေတာလား"

ခေါင်းဆောင်ချိုး၏ မျက်နှာအမူအရာက အကြိမ်အနည်းငယ် ပြောင်းလဲသွားပြီးနောက် နောက်ဆုံးတွင် ရယ်မောလိုက်သည်။ "ညီလေးက ဘာတွေပြောနေတာလဲ... မင်း အသက်ရှင်နေသေးတာကို မြင်ရလို့ ငါ ဝမ်းသာလို့တောင် မဆုံးသေးဘူး"

"ဒါပေမဲ့ စောစောက ချန်ယွင်တောက် လုပ်သွားတဲ့ တိုက်ကွက်က သေးသေးလေးမှ မဟုတ်တာ... ညီလေးက ဒီဘေးဆိုးကြီးကနေ ဘယ်လိုများ လွတ်မြောက်လာခဲ့တာလဲဆိုတာကိုတော့ ငါ တကယ် မသိဘူး"

လင်းယွမ်က ပြုံးစိစိဖြင့် ပြောလိုက်သည်။ "ကျွန်တော်လည်း အဲဒါကို သိချင်နေတာပဲ... ခေါင်းဆောင်ချိုးကရော အဲဒီရေခဲတောင် ဖိချလာတဲ့အထဲကနေ ဘယ်လို လွတ်မြောက်လာခဲ့တာလဲ"

ခေါင်းဆောင်ချိုး၏ မျက်နှာအမူအရာက မကျေမနပ် ဖြစ်သွားပြီး ပြောလိုက်သည်။ "ညီလေး... ငါက မင်းကို အရင် မေးတာနော်"

လင်းယွမ်က ပြုံးလိုက်ပြီး ပတ်ဝန်းကျင်ကို ဟိုဟိုဒီဒီ ကြည့်ရှုရင်း ပြောလိုက်သည်။ "ချန်ယွင်တောက်က မြေမိခင်ဂိုဏ်းက မျိုးရိုးဗီဇမျိုးစေ့ အစွမ်းပိုင်ရှင်တွေကို လိုက်သတ်ဖို့ သွားတာဆိုတော့... မကြာခင် ပြန်ရောက်လာတော့မှာ သေချာတယ်"

"ခေါင်းဆောင်ချိုးက ဒီနေရာမှာ ကျွန်တော်နဲ့ ဒီအကြောင်းတွေ ဆက်ပြောနေချင်သေးလို့လား"

ခေါင်းဆောင်ချိုး၏ မျက်နှာအမူအရာက ချက်ချင်း အနည်းငယ် ပြောင်းလဲသွားပြီး ချက်ချင်း မေးလိုက်သည်။ "မင်းမှာ ဒီကထွက်နိုင်မယ့် နည်းလမ်း ရှိလို့လား"

"ဟက်ဟက်" လင်းယွမ်က ရယ်မောလိုက်သော်လည်း ဘာမှ ပြန်မပြောပေ။

ခေါင်းဆောင်ချိုးက ဆွံ့အသွားပြီး မယုံကြည်နိုင်စွာဖြင့် ပြောလိုက်သည်။ "မင်းမှာ တကယ် ရှိနေတာလား... ညီလေး ငါ မင်းကို အထင်သေးတာတော့ မဟုတ်ဘူး... ပတ်ဝန်းကျင်က သွေးကြောလမ်းကြောင်းတွေ အကုန်လုံး အပိတ်ခံထားရပြီ"

"ချန်ယွင်တောက်က နှလုံးအမြူတေကို သန့်စင်ပြီးသွားပြီဆိုတော့ ဒီရေပေါ်ကျွန်းအပေါ်မှာ အကြွင်းမဲ့ ထိန်းချုပ်နိုင်စွမ်း ရှိနေပြီ"

"ဒီကနေ ထွက်နိုင်ဖို့က အဲဒီလောက် လွယ်မှာ မဟုတ်ဘူး"

လင်းယွမ်က ဟက်ဟက်ပက်ပက် ရယ်မောလိုက်ပြီး ပြောလိုက်သည်။ "ခေါင်းဆောင်ချိုးက ဒီမြူခိုးမြို့တော် သခင်ကြီးအကြောင်းကို တော်တော်လေး သိနေတဲ့ပုံပဲ... ဒီမြူခိုးမြို့တော် သခင်ကြီးက တကယ်တမ်း ဘယ်ကနေ ရောက်လာတာလဲဆိုတာ ကျွန်တော့်ကို ပြောပြလို့ ရမလား"

ခေါင်းဆောင်ချိုးက လင်းယွမ်ကို တစ်ချက် ကြည့်လိုက်ပြီး ခေါင်းခါယမ်းလိုက်သည်။ "ငါ ဘယ်လိုလုပ် သိမှာလဲ"

လင်းယွမ်က ထိုစကားကို ကြားသောအခါ ချက်ချင်း ခပ်ဖွဖွ ရယ်မောလိုက်ပြီး ရုတ်တရက် မေးလိုက်သည်။ "ခင်ဗျား ချိုးရင်ယွဲ့ကို သိလား"

"ဘာ"

ခေါင်းဆောင်ချိုးက မျက်လုံးများကို ပြူးကျယ်သွားအောင် ဖွင့်လိုက်ပြီး လင်းယွမ်ကို စိုက်ကြည့်လိုက်သည်။

လင်းယွမ်က ချက်ချင်းပင် စိတ်ထဲတွင် သဘောပေါက်သွားသည်။ ဤခေါင်းဆောင်ချိုးက တကယ်ပဲ ချိုးရင်ယွဲ့ကို သိနေတာပဲ။

ခေါင်းဆောင်ချိုးက မျက်လုံးများကို မှေးစင်းလိုက်ပြီး အေးစက်သော အသံဖြင့် မေးလိုက်သည်။ "မင်းက ဘယ်သူလဲ"

"ဟက်ဟက်... ကျွန်တော်က လူတစ်ယောက် အကူအညီတောင်းလို့... ချိုး ဆိုတဲ့ မျိုးရိုးနာမည်နဲ့ လူတစ်ယောက်ကို လာရှာတာ... သူက အရင်တုန်းက လီရွှေဥယျာဉ်မှာ နေခဲ့တာ... လီရွှေဥယျာဉ်ရဲ့ ခေါင်းဆောင်ပဲ"

"လွန်ခဲ့တဲ့လအနည်းငယ်က... အဲဒီ ခေါင်းဆောင်ချိုးဆိုတဲ့လူက ပစ္စည်းတွေ ရှာဖို့ လှေနဲ့ ထွက်သွားခဲ့ရာကနေ အခုချိန်ထိ ပြန်မလာတော့ဘူး"

"သနားစရာကောင်းတဲ့ သူ့သမီးလေးကတော့ တစ်ယောင်တည်း အထီးကျန်စွာနဲ့ လီရွှေဥယျာဉ်က ခွေးအ,တွေ ကျားတွေလို ရက်စက်တဲ့ အစွမ်းပိုင်ရှင်တွေကို ရင်ဆိုင်နေရရှာတယ်"

"မင်း အဓိပ္ပါယ်မရှိတာတွေ လျှောက်ပြောမနေနဲ့"

လင်းယွမ်၏ စကားသံ ဆုံးသွားသည်နှင့် ခေါင်းဆောင်ချိုးက ချက်ချင်း ဒေါသတကြီး အော်ဟစ်လိုက်ပြီး လင်းယွမ်ကို ဒေါသတကြီး စိုက်ကြည့်ကာ ပြောလိုက်သည်။ "ငါ့သမီးက လျှပ်စီးဓာတ် အစွမ်းပိုင်ရှင်အဖြစ် အစောကြီးကတည်းက နိုးထလာခဲ့တာ... သူက လီရွှေဥယျာဉ်က အဲဒီ အမှိုက်ကောင်တွေကို ဘယ်လိုလုပ် မနှိမ်နင်းနိုင်ဘဲ နေမှာလဲ"

"မင်း ဒီနေရာမှာ လာပြီး ခြောက်လုံးလှန့်လုံးတွေ လာပြောမနေနဲ့... ပြောစမ်း မင်းက တကယ်တမ်း ဘယ်သူလဲ"

ခေါင်းဆောင်ချိုးက အရိုးတူကို လှမ်းကိုင်လိုက်ပြီး လင်းယွမ်ကို အေးစက်စွာ စိုက်ကြည့်လိုက်သည်။

လင်းယွမ်က အော်ဟစ် ရယ်မောလိုက်သည်။ "ဒီလိုဆိုတော့ ခင်ဗျားက ချိုးရင်ယွဲ့ရဲ့ အဖေပေါ့"

"ရွှမ်း"

ခေါင်းဆောင်ချိုးက ရုတ်တရက် လှုပ်ရှားလိုက်ပြီး သူ၏ ခန္ဓာကိုယ်က တစ်ချက် ရွှေ့လျားသွားကာ လင်းယွမ်၏ အနီးသို့ အတင်း တိုးကပ်လာခဲ့သည်။

လင်းယွမ်က အပြုံးကို ရုပ်သိမ်းလိုက်ပြီး ရေခဲပြင်ပေါ်သို့ ခြေလှမ်း တစ်ချက် နင်းချလိုက်သည်။

"ဒုန်း"

သူ၏ ခန္ဓာကိုယ်က တစ္ဆေအရိပ်တစ်ခုအဖြစ် ပြောင်းလဲသွားပြီး အလွန် လျင်မြန်သော အရှိန်ဖြင့် ရှောင်တိမ်းသွားသည်။

တစ်ခဏချင်းအတွင်း မူလနေရာတွင် ပေါက်ကွဲသံကြီး တစ်သံ ထွက်ပေါ်လာခဲ့သည်။

အရိုးတူကြီး ကျဆင်းလာသည်ကို မြင်လိုက်ရပြီး တုန်ခါမှု ပါဝင်သော ထိုတူကြီးက ဧရာမ ရေခဲဂူကြီး တစ်ခုကို တိုက်ရိုက် ထုခွဲလိုက်ခြင်း ဖြစ်သည်။

ရေခဲဂူထဲတွင် ရေခဲစများ လွင့်စဉ်သွားပြီး အားပြင်းသော လေတိုက်ခတ်သံများ ထွက်ပေါ်နေသည်။

ခေါင်းဆောင်ချိုး၏ အကြည့်များက ရေလို အေးစက်နေပြီး လင်းယွမ်ကို သေချာ စိုက်ကြည့်နေသည်။

"မင်းက အလျင်အမျိုးအစား အစွမ်းပိုင်ရှင်လား"

စောစောက တိုက်ခိုက်မှုတွင် သူက အလွန် ရုတ်တရက် လှုပ်ရှားခဲ့ခြင်း ဖြစ်သော်လည်း တစ်ဖက်လူ၏ အလျင်ကို မမီလိုက်ခြင်းက တစ်ဖက်လူ၏ အလျင်သည် သူ၏ထက် အများကြီး သာလွန်နေကြောင်းကို ပြသနေသည်။

သို့သော် ပြဿနာမှာ သူကိုယ်တိုင် မျိုးရိုးဗီဇမျိုးစေ့ကို နိုးထလာခြင်း မရှိသေးသော်လည်း သူ၏ စိတ်စွမ်းအင် အမှတ်က အမှတ် ငါးဆယ်အထိ ရောက်ရှိကာ ပြည့်စုံသွားပြီ ဖြစ်သည်။

အခြားသော အဓိက အရည်အသွေးမှတ်များကလည်း ဤအဆင့်တွင် စဉ်ဆက်မပြတ် လေ့ကျင့်မှုများကြောင့် တိုးတက်လာခဲ့ပြီ ဖြစ်သည်။

ယုတ္တိကျကျပြောရလျှင် သာမန် အစွမ်းပိုင်ရှင်များက သူ၏ ပြိုင်ဘက် ဖြစ်လာနိုင်ခြေ လုံးဝ မရှိပေ။

တစ်ခုတည်းသော ရှင်းလင်းချက်မှာ တစ်ဖက်လူက မည်သည့် အရည်အသွေးမှတ်တွင်မဆို သူ့ထက် သာလွန်နေခြင်းသာ ဖြစ်ရမည်။

အလျင်ဆိုသည်မှာ သူ၏ အားနည်းချက်များထဲမှ တစ်ခု ဖြစ်သည်။

သို့သော်လည်း ချိုးကုံရုံက မည်သည့် စိုးရိမ်ပူပန်မှုမျိုးကိုမှ မပြသဘဲ အေးစက်စက် ပြုံးလိုက်သည်။

အဓိက အရည်အသွေး လေးမျိုးထဲတွင် တိုက်ခိုက်ရေး နည်းလမ်းများနှင့် ပတ်သက်လာလျှင် အလျင်နှင့် ခွန်အားအသားပေး အစွမ်းပိုင်ရှင် နှစ်မျိုး၏ နည်းလမ်းများက အခြားသော အစွမ်းပိုင်ရှင် အမျိုးအစားများလောက် ကောင်းမွန်ခြင်း မရှိပေ။

ချိုးကုံရုံက လိုက်မသွားသည်ကို မြင်လိုက်ရပြီး သူ၏ အရိုးတူကို ရုပ်သိမ်းလိုက်သည့် တစ်ခဏအတွင်း ရုတ်တရက် လေချွန်လိုက်သည်။

"ရွှီ"

လေချွန်သံ ထွက်ပေါ်လာသည်နှင့်အမျှ ချက်ချင်းပင် ပုံသဏ္ဌာန်မဲ့သော လှိုင်းလုံးများက ရူးသွပ်စွာ ပျံ့နှံ့သွားသည်။

မလှမ်းမကမ်းရှိ လင်းယွမ်က မျက်ခုံးပင့်လိုက်ပြီး အနည်းငယ် အံ့သြသွားသည်။ "စိတ်စွမ်းအင်နဲ့ တိုက်ခိုက်တာလား"

သူက စိတ်စွမ်းအင်ဖြင့် လိပ်ခွံစွမ်းအင်အကာအကွယ်ကို ချက်ချင်း ဖော်ထုတ်လိုက်သည်။

"ဝုန်း"

ထက်မြက်သော လေချွန်သံ လှိုင်းများက စိတ်စွမ်းအင်များနှင့် ပေါင်းစပ်သွားကာ ကြောက်မက်ဖွယ်ကောင်းသော ရိုက်ခတ်လှိုင်းတစ်ခုအဖြစ် လင်းယွမ်၏ ဦးနှောက်ဆီသို့ ချက်ချင်း ဝင်ရောက်သွားသည်။

ကံဆိုးစွာဖြင့် လိပ်ခွံစွမ်းအင်အကာအကွယ်၏ ခံစစ်က ပေါက်ကွဲထွက်လာပြီး ချက်ချင်းပင် ဤရိုက်ခတ်လှိုင်းကို အပြင်ဘက်တွင် တားဆီးထားနိုင်ခဲ့သည်။

နောက်တစ်ခဏတွင် လင်းယွမ်၏ ခန္ဓာကိုယ်က တစ်ချက် ရွှေ့လျားသွားပြီး ချိုးကုံရုံအနီးသို့ အတင်း တိုးကပ်သွားသည်။

ချိုးကုံရုံ၏ မျက်နှာအမူအရာက အကြီးအကျယ် ပြောင်းလဲသွားသည်။

"မဖြစ်နိုင်ဘူး... မင်း မင်းက တစ်ချိန်တည်းမှာပဲ စိတ်စွမ်းအင် အစွမ်းပိုင်ရှင်ပါ ဖြစ်နေတာလား"

လင်းယွမ်က အနီးသို့ ရောက်ရှိလာပြီး ချိုးကုံရုံကို လက်တစ်ဖက်ဖြင့် အတင်း ဖမ်းဆွဲလိုက်သည်။

ချိုးကုံရုံက ထိတ်လန့်သွားပြီး အလျင်အမြန် ရှောင်တိမ်းလိုက်သည်။

သို့သော်လည်း သူ၏ အလျင်က လင်းယွမ်ကို ဘယ်လိုလုပ် မီနိုင်မည်နည်း။ သူက ခန္ဓာကိုယ်ကို လှည့်ရန် ကြိုးစားလိုက်ရုံသာ ရှိသေးသော်လည်း ဧရာမ လက်ကြီးတစ်ဖက်က သူ၏ လည်ပင်းကို ချက်ချင်း ဖမ်းညှစ်လိုက်သည်။

နောက်တစ်ခဏတွင် ပြိုင်ဘက်ကင်းသော ဧရာမ ခွန်အားတစ်ခုက သူ့ကို ရုတ်တရက် ဆွဲမ လိုက်သည်။

"ခေါင်းဆောင်ချိုး... ကျွန်တော်တို့ သေချာလေး စကားပြောသင့်တယ်လို့ မထင်ဘူးလား"

ချိုးကုံရုံက ချက်ချင်းပင် လှုပ်ရှား၍ မရတော့ဘဲ သူ၏ မျက်နှာထက်တွင် အံ့သြမှုနှင့် ဒေါသများ ပြည့်နှက်နေသည်။

သူ၏ လက်ထဲရှိ အိတ်နှင့်တူသော အရာကို လင်းယွမ်က ဆွဲယူလိုက်သည်။

၎င်းကို ချထားပြီးနောက် လင်းယွမ်က သူ၏ စိတ်စွမ်းအင်များကို ထိုအိတ်ထဲသို့ အလျင်အမြန် စေလွှတ်လိုက်သည်။

ဤစစ်ဆေးမှုက သူ့ကို ချက်ချင်း အံ့သြသွားစေသည်။

လက်ဖဝါးအရွယ်အစားသာ ရှိပုံရသော ဤအိတ်ငယ်လေး၏ အတွင်းပိုင်းသည် အိမ်တစ်ဝက်စာလောက် ကြီးမားနေသည်ကို မြင်လိုက်ရသည်။

လင်းယွမ်က အလွန် အံ့သြသွားသည်။ ၎င်းအထဲတွင် သွေးရေခဲ အမြောက်အမြားကို ထည့်ထားရုံသာမကဘဲ အစားအသောက် အမျိုးမျိုး၊ အရိုးလက်နက်များ စသည်တို့လည်း ပါဝင်နေသည်။

"ဒါက... ဟင်းလင်းပြင်နေရာလား"

လင်းယွမ်က ခေါင်းကို ချက်ချင်း မော့ကာ ချိုးကုံရုံကို ကြည့်လိုက်သည်။

ချိုးကုံရုံက သူ၏ လက်မောင်းကို ပုတ်လိုက်မှသာ လင်းယွမ်က သူသည် တစ်ဖက်လူ၏ လည်ပင်းကို ညှစ်ထားဆဲ ဖြစ်ကြောင်း သတိပြုမိသွားသည်။

ထို့နောက် သူက တစ်ဖက်လူကို လွှတ်ပေးလိုက်ပြီး ပြောလိုက်သည်။ "ခေါင်းဆောင်ချိုး... ကျွန်တော်နဲ့ ခင်ဗျားရဲ့ သမီးကလည်း မိတ်ဆွေကောင်းတွေလို့ ပြောလို့ရတယ်... သူသေကိုယ်သေ တိုက်ခိုက်နေစရာ မလိုပါဘူး"

"ဟူး... အဟွတ် အဟွတ် အဟွတ်... ငါ့အိတ် ပြန်ပေး" ချိုးကုံရုံက ချောင်းဆိုးရင်း လင်းယွမ်၏ လက်ထဲရှိ အိတ်ကို ကြည့်လိုက်သည်။

လင်းယွမ်က သူ၏ လက်ထဲရှိ အိတ်ကို မြှောက်ပြလိုက်ပြီး မေးလိုက်သည်။ "စိတ်ချပါ... ခင်ဗျားရဲ့ ပစ္စည်းကို ကျွန်တော် မယူပါဘူး... အရင်ဆုံး ဒါက ဘာလဲဆိုတာ ပြောပြပါဦး"

ချိုးကုံရုံက လေကို ပြင်းပြင်း တစ်ချက် ရှူသွင်းလိုက်ပြီး ဘာမှ မပြောသေးဘဲ မေးလိုက်သည်။ "မင်း ငါ့သမီးကို တကယ် သိတာလား"

"သေချာတာပေါ့"

"ငါ့သမီး အခု ဘယ်မှာလဲ"

"မြူခိုးမြို့တော်မှာပဲ ရှိနေတယ်"

"သူက ဘာလို့ ဒီကို ရောက်လာတာလဲ" ချိုးကုံရုံက မနေနိုင်ဘဲ မေးလိုက်သည်။

လင်းယွမ်က ထိုစကားကို ကြားသောအခါ ပို၍ပင် အံ့သြသွားသည်။ "ခင်ဗျား သူ့ကို သတင်းပေးလိုက်တာ မဟုတ်ဘူးလား"

"ဟင်... ငါကလား"

ချိုးကုံရုံက ကြက်သေသေသွားပြီးနောက် ချက်ချင်း ပြောလိုက်သည်။ "မဖြစ်နိုင်ဘူး... ငါက လဝက်လောက်မတိုင်ခင်ကတည်းက ဒီမှာ ပိတ်မိနေတာ... အပြင်ကို တစ်ခေါက်တောင် မထွက်ရသေးဘူး... သူ့ကို ဘယ်လိုလုပ် ဆက်သွယ်နိုင်မှာလဲ"

လင်းယွမ်၏ မျက်နှာအမူအရာက အံ့သြသွားပုံရပြီး မျက်မှောင်ကြုတ်ကာ ပြောလိုက်သည်။ "သူက ခင်ဗျားဆီက စာကို တကယ် လက်ခံရခဲ့တာ... ခင်ဗျားက ဒီမှာ ရှိနေပြီး ပစ္စည်းတွေ လိုက်ရှာနေတယ်တဲ့... ခင်ဗျားက ဒီမှာ အခြေချ နေထိုင်နိုင်ဖို့အတွက် အဆက်အသွယ်တွေ လိုက်ရှာနေတာလို့ ပြောတယ်"

"သောက်ကျိုးနည်း... ဒါက အိမ်ဝယ်ရင် အိမ်ထောင်စုစာရင်း ပေးတာမျိုးမှ မဟုတ်တာ... ဘယ်က အဆက်အသွယ်တွေကို လိုက်ရှာရမှာလဲ"

ချိုးကုံရုံက မနေနိုင်ဘဲ ဒေါသတကြီး ကျိန်ဆဲလိုက်သည်။

"ဒါဆို တစ်ယောက်ယောက်က ခင်ဗျား နာမည်ကို အသုံးချပြီး ချိုးရင်ယွဲ့ကို အပြင်မှာ လှည့်စားခဲ့တာပေါ့... ဒါပေမဲ့ သူက ခင်ဗျားရဲ့ လက်ရေးနဲ့စာ ရှိတယ်လို့ ပြောတယ်"

ချိုးကုံရုံက ကြက်သေသေသွားပြီးနောက် တစ်ခုခုကို တွေးမိသွားကာ သူ၏ မျက်နှာအမူအရာက ချက်ချင်း ကြည့်ရဆိုးသွားသည်။

"ငါ သိပြီ... အဲ့ဒါ ပိရမစ်စနစ်လူလိမ်တွေ ဖြစ်ရမယ်"

"ပိရမစ်စနစ်လူလိမ်တွေလား"

လင်းယွမ်က အံ့သြသွားသည်။ ကမ္ဘာ့ရေလွှမ်းမိုးမှုကြီး ဖြစ်ပွားပြီးကတည်းက ဤစကားလုံးသည် သူ့အတွက် အလွန် အလှမ်းဝေးနေပုံပေါ်သည်။

ဤကဲ့သို့သော စကားလုံးမျိုးကို သူမကြားရသည်မှာ မည်မျှ ကြာပြီဆိုသည်ကို သူ မှတ်တောင် မမှတ်မိတော့ပေ။

တစ်ခဏတာမျှ သူက အနည်းငယ် စိမ်းသက်နေသည်ဟု ခံစားလိုက်ရသည်။

သို့သော်လည်း ချိုးကုံရုံက မှုန်ကုပ်ကုပ်ဖြင့် ပြောလိုက်သည်ကို ကြားလိုက်ရသည်။ "မြူခိုးမြို့တော်ထဲမှာ လူတစ်စု တကယ် ရှိတယ်... ခေါင်းဆောင်က မာရွေ့လို့ ခေါ်တယ်... ဒီလူက ရေလွှမ်းမိုးမှုကြီး မဖြစ်ခင်တုန်းက ပိရမစ်စနစ်လူလိမ်တစ်ယောက်ပဲ"

"ရေလွှမ်းမိုးမှုကြီး ပြီးတဲ့နောက်မှာ သူက ပိရမစ်စနစ်ကနေ သင်ယူခဲ့တဲ့ ဦးနှောက်ဆေးတဲ့ နည်းလမ်းတွေကို အသုံးပြုပြီး အောင်မြင်နေခဲ့တာ... အရင်တုန်းက လီရွှေဥယျာဉ်မှာတုန်းကလည်း စွမ်းအင်ကျောက်တုံး အများကြီးကို လိမ်သွားခဲ့ဖူးတယ်"

"နောက်ပိုင်း အဲ့ဒီ စွမ်းအင်ကျောက်တုံးတွေကို အားကိုးပြီး မြူခိုးမြို့တော်ထဲကို ဝင်လာတာ... အစတုန်းက ငါ အပြင်ထွက်ပြီး ပစ္စည်းတွေကို မကြာမကြာ ရှာဖွေခဲ့ရတဲ့ အကြောင်းရင်း တစ်စိတ်တစ်ပိုင်းကလည်း သူ့ကို ရှာဖို့ပဲ"

"အဲဒါဆို ခင်ဗျားရဲ့ လက်ရေးကို အတုခိုးပြီး... " လင်းယွမ်က ချက်ချင်း ခေါင်းခါယမ်းလိုက်ပြီး ဆက်မေးရန် မလိုတော့ဘူးဟု ခံစားလိုက်ရသည်။

တကယ်တော့ အစွမ်းပိုင်ရှင်များ၏ စိတ်စွမ်းအင်များ အားကောင်းလာပြီးနောက် လက်ရေးကို အတုခိုးခြင်းကဲ့သို့သော အရာများသည် အလွန် ရိုးရှင်းသော ကိစ္စရပ်တစ်ခု ဖြစ်သည်။

သူကိုယ်တိုင်လည်း လုပ်နိုင်စွမ်း ရှိသည်။

ကြည့်ရသည်မှာ ချိုးရင်ယွဲ့သည် တစ်ယောက်ယောက်၏ လှည့်စားခြင်းကို ခံလိုက်ရပြီး ဤနေရာသို့ ရောက်လာခဲ့ခြင်း ဖြစ်သည်။

လင်းယွမ်က လက်ထဲရှိ အိတ်ကို တစ်ချက် ဝှေ့ယမ်းပြလိုက်ပြီး မေးလိုက်သည်။ "အခု ဒါလေးအကြောင်း ပြောပြလို့ ရပြီလား"

ချိုးကုံရုံက သက်ပြင်းတစ်ချက် ချလိုက်သည်။ သူကိုယ်တိုင်က လင်းယွမ်၏ ပြိုင်ဘက် မဟုတ်ကြောင်းကို သိရှိသောကြောင့် ယခုအချိန်တွင် ပူးပေါင်းဆောင်ရွက်ရန်သာ တတ်နိုင်တော့သည်။

"ဒါက ချိုးခုံငါးလို့ ခေါ်တဲ့ သတ္တဝါတစ်မျိုးရဲ့ အူခွံနဲ့ ပြုလုပ်ထားတဲ့ အိတ်ပဲ"

"ချိုးခုံငါးဟုတ်လား... အဲ့ဒါ ဘယ်လိုငါးလဲ"

"သန္ဓေပြောင်း ငါးတစ်မျိုးပဲ... ဟင်းလင်းပြင်အမျိုးအစား သတ္တဝါပေါ့"

ချိုးကုံရုံက ပြောလိုက်သည်။ "ဒီငါးမျိုးက တော်တော်လေး ရှားပါးတယ်... ခန္ဓာကိုယ် အရွယ်အစားက မကြီးပေမယ့် စားနိုင်သောက်နိုင်စွမ်းကတော့ အံ့သြစရာကောင်းလောက်အောင်ပဲ... များသောအားဖြင့် တစ်ခါ ဗိုက်ဝသွားရင် ဆယ်ရက်လောက် ဘာမှ မစားဘဲ နေနိုင်တယ်"

"ငါ အပြင်ဘက်မှာ ပစ္စည်းတွေ ရှာနေတုန်းက မတော်တဆ ဒီငါးမျိုးနဲ့ ကြုံခဲ့တာ"

"အဲဒီတုန်းက သိပ်ပြီး ဂရုမစိုက်မိလိုက်ဘူး... ဒါပေမဲ့ အဲဒီ ချိုးခုံငါးက ချက်ချင်း ပါးစပ်ဟလိုက်ပြီး လူရော လှေပါမကျန် ငါတို့ အကုန်လုံး သူ့ရဲ့ မျိုချတာကို ခံလိုက်ရလိမ့်မယ်လို့ ထင်မထားခဲ့ဘူး"

လင်းယွမ်က ထိုစကားကို ကြားသောအခါ မနေနိုင်ဘဲ စိတ်ထဲတွင် အံ့သြသွားသည်။

ဤရေလွှမ်းမိုးမှုကြီးထဲတွင် ဤကဲ့သို့သော ထူးဆန်းအံ့သြဖွယ်ကောင်းသည့် သတ္တဝါမျိုး တကယ် ရှိနေတာလား။

သူက မနေနိုင်ဘဲ မေးလိုက်သည်။ "ပြီးတော့ရော... ခင်ဗျားတို့ နောက်ပိုင်း ဘယ်လိုလုပ် ထွက်လာခဲ့တာလဲ"

ချိုးကုံရုံက ချက်ချင်း အေးစက်စွာ ရယ်မောလိုက်သည်။ "သေချာပေါက် ဒီငါးကို သတ်လိုက်တာပေါ့"

"အဲဒီတုန်းက ငါတို့ သူ့ရဲ့ အူထဲကို ကျသွားပြီးနောက်မှာ... ပတ်ဝန်းကျင်ကနေ ပုပ်သိုးဆွေးမြည့်စေနိုင်တဲ့ အကျိအချွဲတွေ အများကြီး ချက်ချင်း ထွက်လာပြီး... ငါတို့ရဲ့ လှေက မြန်မြန်ဆန်ဆန်ပဲ စားသွားတာကို ခံလိုက်ရတယ်"

"အဲဒီတုန်းက ငါ ချက်ချင်းပဲ ကြိမ်နှုန်းမြင့် တုန်ခါတဲ့တူကို သုံးပြီး ဒီတိရစ္ဆာန်ရဲ့ အရိုးတွေကို အရှင်လတ်လတ် ထုခွဲပစ်လိုက်တယ်... သူ့ကို ရိုက်သတ်ပြီးတော့မှ ဗိုက်ကို ခွဲပြီး ဒီကနေ တိုးထွက်လာခဲ့တာ"

"ဒါပေမဲ့ အပြင်ကို ထွက်လာပြီးမှ ငါ သိလိုက်ရတာက... ငါတို့ လှေကို မျိုချသွားတဲ့ အဲဒီငါးက သောက်ကျိုးနည်း သုံးပေကျော်လောက်ပဲ ရှည်တာ"

"အဲဒီတုန်းက ငါ တစ်ခုခု မှားနေပြီလို့ ခံစားလိုက်ရတယ်... သူ့ကို ဆယ်ယူပြီးနောက် ဗိုက်ခွဲပြီး ခန္ဓာကိုယ်ကို ခွဲစိတ်ကြည့်လိုက်တော့ သူ့ရဲ့ အူတွေက ဟင်းလင်းပြင်နေရာ ပါဝင်နေတာကို တွေ့လိုက်ရတယ်"

"ဒီဟင်းလင်းပြင်နေရာရဲ့ အတိုင်းအတာကို မင်း မြင်တဲ့အတိုင်းပဲ... အိမ်တစ်ဝက်စာလောက် ကျယ်တယ်... ပစ္စည်းတွေကို ထည့်ထားလို့ ရရုံသာမကဘဲ အသက်ရှင်နေတဲ့ အကောင်တွေကိုလည်း ထည့်ထားလို့ ရတယ်"

"ဒါ့အပြင် အူခွံ မပေါက်ပြဲသရွေ့ ဒီဟင်းလင်းပြင်အိတ်ထဲက ပစ္စည်းတွေက ပျက်စီးမသွားဘူး"

"စောစောက မင်း ငါ့ကို ချန်ယွင်တောက်ရဲ့ ရေခဲတောင် ဖိချလာတဲ့အထဲကနေ ဘယ်လို လွတ်မြောက်လာခဲ့တာလဲလို့ မေးတယ်မလား... ဟက်ဟက်... အခု သိပြီလား"

လင်းယွမ်က ရုတ်တရက် သဘောပေါက်သွားသည်။ "ခင်ဗျားက ဒီအထဲမှာ ဝင်ပုန်းနေတာလား"

"အမှန်ပဲ... ဘယ်လိုလဲ... ဒီလို ရတနာမျိုးကို မင်း ငါ့ကို ပြန်ပေးချင်သေးလား" ချိုးကုံရုံက လင်းယွမ်ကို စိုက်ကြည့်ရင်း လှောင်ပြောင် သရော်လိုက်သည်။

ဆက်ရန်...

အပိုင်း(၄၂၈) မျိုးရိုးဗီဇ အမွေအနှစ် အချက်အလက်

"ဘယ်လိုလဲ... ဒီလို ရတနာမျိုးကို မင်း ငါ့ကို ပြန်ပေးချင်သေးလား"

လင်းယွမ်က ထိုစကားကို ကြားသောအခါ ခပ်ဟဟ ရယ်မောလိုက်ပြီးနောက် အိတ်ကို လှမ်းပစ်ပေးလိုက်သည်။

"ဟားဟား... ခင်ဗျားအတွက်တော့ အဖိုးတန်ရတနာလို ဖြစ်နေပေမယ့် ကျွန်တော့်အတွက်တော့ ဘာမှမဟုတ်ပါဘူး"

"ဘာ"

ချိုးကုံရုံက အိတ်ကို ဖမ်းဆုပ်လိုက်ပြီး သူ၏ မျက်နှာပေါ်တွင် အံ့အားသင့်မှုများ အပြည့်ဖြင့် လင်းယွမ်ကို နားမလည်နိုင်စွာ ကြည့်လိုက်သည်။ "မင်း... တကယ်ပဲ လက်လွှတ်ရက်တယ်ပေါ့"

လင်းယွမ်က ခပ်ဟဟ ရယ်မောလိုက်ပြီး မြေပြင်ပေါ်ရှိ ကြီးမားသော ရေခဲတုံးကြီး တစ်တုံးကို ကောက်ကိုင်လိုက်သည်။

"ဝှစ်"

ထိုရေခဲတုံးကြီးက သူ၏ လက်ထဲတွင် ချက်ချင်း ပျောက်ကွယ်သွားတော့သည်။

ဤမြင်ကွင်းကြောင့် ချိုးကုံရုံက ချက်ချင်း မျက်လုံးပြူးသွားပြီး မယုံကြည်နိုင်သော အမူအရာ ထွက်ပေါ်လာသည်။

"မင်း... မင်း..."

သူက သရဲတစ္ဆေကို မြင်လိုက်ရသကဲ့သို့ ဖြစ်သွားပြီး ထိုရေခဲတုံးကြီး ဘယ်ရောက်သွားသလဲဆိုတာကို ဘယ်ညာ လိုက်ရှာနေတော့သည်။

ခဏအကြာမှ သူက သတိပြန်ဝင်လာပြီး မေးလိုက်သည်။ "မင်းဆီမှာလည်း ဟင်းလင်းပြင်အိတ် ရှိနေတာလား"

လင်းယွမ်က ချက်ချင်း ခေါင်းခါယမ်းလိုက်သည်။ "ဟင်းလင်းပြင်အိတ်... ကျွန်တော် အမြင်မမှားဘူးဆိုရင် ခင်ဗျားရဲ့ ဟင်းလင်းပြင်အိတ်က ပစ္စည်းတော်တော်များများကို ထည့်နိုင်ပေမယ့် အလေးချိန်ကတော့ သိပ်ပြီး ပြောင်းလဲသွားပုံ မရဘူးမလား"

ချိုးကုံရုံက ထိုစကားကို ကြားသောအခါ မျက်ခုံးပင့်လိုက်သည်။ "မဟုတ်ဘူး... အဲဒါက မူလ အလေးချိန်ရဲ့ ဆယ်ပုံတစ်ပုံအထိ လျှော့ချပေးနိုင်တယ်"

တကယ်တမ်းတွင် သူ၌ ဟင်းလင်းပြင်အိတ် နှစ်လုံး ရှိသည်။ ယခင် ဟင်းလင်းပြင်အိတ်၏ နေရာအကျယ်အဝန်းကလည်း မသေးငယ်သော်လည်း အလေးချိန်ကိုတော့ များများစားစား မလျှော့ချပေးနိုင်ဘဲ မူလပစ္စည်း အလေးချိန်၏ ငါးပုံတစ်ပုံအထိသာ လျှော့ချပေးနိုင်ခဲ့သည်။

ဆိုလိုသည်မှာ ၁၁ ပေါင်ခန့်ရှိသော ပစ္စည်းတစ်ခုကို ယခင် ဟင်းလင်းပြင်အိတ်ထဲသို့ ထည့်လိုက်ပါက ၂ ပေါင်ခန့်သာ လေးတော့မည် ဖြစ်သည်။

သို့သော် ယခု သူ၏ လက်ထဲရှိ အိတ်ကတော့ ၁၁ ပေါင် အလေးချိန်ကို ၁ ပေါင်အထိ လျှော့ချပေးနိုင်စွမ်း ရှိသည်။

ထို့ကြောင့် သူ၏ လက်ထဲရှိ ဟင်းလင်းပြင်အိတ်ကသာ အကောင်းစား ဖြစ်သည်။ အလေးချိန် လျှော့ချပေးနိုင်စွမ်းက နှစ်ဆ ပိုကောင်းရုံသာမက သိုလှောင်နိုင်သည့် နေရာကလည်း နှစ်ဆ ပိုကျယ်ဝန်းပေသည်။

သူ၏ လက်ထဲရှိ ဤဟင်းလင်းပြင်အိတ်ကို ချိုးခုံငါး၏ အစာအိမ်ဖြင့် ပြုလုပ်ထားခြင်း ဖြစ်ပြီး သူပြောခဲ့သလို အူဖြင့် ပြုလုပ်ထားခြင်း မဟုတ်ပေ။

စောစောက ဖုံးကွယ်ထားခဲ့ခြင်းမှာ လင်းယွမ်ကို ဤရတနာ၏ ကောင်းကျိုးများအကြောင်း မသိစေချင်၍ပင် ဖြစ်သည်။

သို့သော် လင်းယွမ်တွင်လည်း ပစ္စည်းသိုလှောင်သည့် ကိရိယာ ရှိနေသည်ကို မျက်မြင်ကိုယ်တွေ့ မြင်လိုက်ရသောကြောင့် သူက မနေနိုင်တော့ဘဲ အမှန်အတိုင်း ပြောပြကာ သေချာ မေးမြန်းချင်သွားခဲ့သည်။

လင်းယွမ်က ထိုစကားကို ကြားသောအခါ အေးစက်စက် ပြုံးလိုက်သည်။ "ဆယ်ပုံတစ်ပုံ... ဒါဆိုရင် အစွမ်းပိုင်ရှင် တစ်ယောက်က ပစ္စည်းဘယ်လောက်တောင် သယ်နိုင်မှာမို့လို့လဲ"

ချိုးကုံရုံက ချက်ချင်း မနေနိုင်ဘဲ မေးလိုက်သည်။ "မင်းရဲ့ အစွမ်းကိရိယာက အလေးချိန်ကို ထည့်တွက်စရာ မလိုတာလား"

လင်းယွမ်က ခေါင်းခါယမ်းလိုက်သည်။ "ကျွန်တော့်ဆီမှာ ကိရိယာ မရှိပါဘူး"

"ဘာ"

"ကျွန်တော်က ကိုယ့်ကိုယ်ကိုယ် အားကိုးတာ"

လင်းယွမ်က သူ၏ ဟင်းလင်းပြင် အစွမ်းပိုင်ရှင်ဆိုသော အထောက်အထားကို ထပ်မံ ထုတ်သုံးလိုက်သည်။

"ကျွန်တော်က ဟင်းလင်းပြင် အစွမ်းပိုင်ရှင်ပဲ"

ချိုးကုံရုံက ထပ်မံ ကြက်သေသေသွားပြီး လင်းယွမ်ကို မယုံကြည်နိုင်စွာ ကြည့်လိုက်သည်။ "မင်း... ခမင်း ဘာပြောလိုက်တယ်"

"အင်းပါ... အံ့သြမနေနဲ့တော့... ကျွန်တော်တို့ ဒီမှာ စကားတွေ အများကြီး ပြောနေတာ... ချန်ယွင်တောက် ပြန်ရောက်လာရင် ဒုက္ခရောက်မယ်... ကျွန်တော် အခု ဒီမှာရှိတဲ့ သွေးရေခဲတွေကို အကုန် သယ်သွားမှာမို့လို့ ခင်ဗျားဆီမှာ ဟင်းလင်းပြင်အိတ် ရှိနေတာနဲ့ အတော်ပဲ... ကျွန်တော်ကို ကူပြီး ထည့်ပေး... အကုန်ထည့်ပြီးရင် ကျွန်တော်ကို ပေးခဲ့"

လင်းယွမ်က အချိန်မဆွဲချင်တော့သဖြင့် တစ်ခွန်း တိုက်တွန်းလိုက်ပြီးနောက် သွေးရေခဲများကို ဆက်လက် သယ်ဆောင်ရန်အတွက် ချက်ချင်း ပြေးသွားလိုက်သည်။

ချိုးကုံရုံက သူ့ကို သိပ်မယုံကြည်သဖြင့် ချက်ချင်း နောက်မှ လိုက်သွားခဲ့သည်။

ထို့နောက် ထိုကြီးမားသော သွေးရေခဲကြီးများကို လင်းယွမ်က လက်လှမ်း၍ ထိလိုက်သည်နှင့် အကြောင်းပြချက် မရှိဘဲ ပျောက်ကွယ်သွားသည်ကို သူ ကိုယ်တိုင် မျက်မြင်ကိုယ်တွေ့ မြင်လိုက်ရသည်။

ထိုအခါမှ သူက မယုံဘဲ မနေနိုင်တော့ပေ။

ချက်ချင်းပင် ချိုးကုံရုံက စိတ်လှုပ်ရှားသွားပြီး အော်ပြောလိုက်သည်။ "ငါ့ရဲ့ ဟင်းလင်းပြင်အိတ်ထဲက သွေးရေခဲတွေကို အရင် သိမ်းပေး... ငါ တခြားဟာတွေကို ကူသယ်ပေးမယ်"

လင်းယွမ်က ရယ်မောလိုက်သည်။ "မြန်မြန်လုပ်"

သူက လက်တစ်ချက် ဝှေ့ယမ်းလိုက်ရာ ချိုးကုံရုံ၏ အိတ်ထဲရှိ သွေးရေခဲများ အားလုံး ချက်ချင်း ရှင်းလင်းသွားတော့သည်။

ချိုးကုံရုံက အသံကျယ်ကျယ်ဖြင့် ရယ်မောလိုက်ပြီး သွေးရေခဲများကို အလျင်အမြန် စတင် ထည့်သွင်းရင်း ပြောလိုက်သည်။ "ခဏနေ အပြင်ရောက်ရင် ငါ လေးပုံ လိုချင်တယ်"

လင်းယွမ်က ခေါင်းပင် လှည့်မကြည့်ပေ။ "အိမ်မက် မက်မနေနဲ့"

ချိုးကုံရုံက ဒေါသတကြီးဖြင့် ပြောလိုက်သည်။ "ငါက ချန်ယွင်တောက် ပြန်လာလို့ အသတ်ခံရနိုင်တဲ့ အန္တရာယ်ကို စွန့်ပြီး မင်းကို ကူညီနေတာနော်"

လင်းယွမ်က အေးအေးဆေးဆေးပင် ပြောလိုက်သည်။ "ခင်ဗျားမှာ အခု အပြင်ထွက်ဖို့ နည်းလမ်း ရှိလို့လား"

"ငါ... မင်း..."

ချိုးကုံရုံက ချက်ချင်း စကားဆွံ့အသွားပြီး တစ်ခဏမျှ ဘာပြန်ပြောရမှန်း မသိဖြစ်သွားသည်။

လင်းယွမ်က ပြောလိုက်သည်။ "ကျွန်တော့်ကို သွေးရေခဲတွေ ကူထည့်ပေး... ကျွန်တော် အပြင်ထွက်တဲ့အခါ ခင်ဗျားကို ခေါ်သွားပေးမယ်... အဲဒါက အကျိုးအမြတ်ပဲ... ခင်ဗျား သဘောတူရင် လုပ်... သဘောမတူရင် အခုပဲ ထွက်ပေါက် သွားရှာတော့"

ချိုးကုံရုံ၏ မျက်နှာအမူအရာက တစ်ချက် ပြောင်းလဲသွားပြီးနောက် မေးလိုက်သည်။ "မင်း အပြင်ထွက်နိုင်ဖို့ ဘယ်လောက်တောင် သေချာလို့လဲ"

"ဟားဟား... ရာခိုင်နှုန်းပြည့်ပဲ"

ချိုးကုံရုံက မျက်မှောင်ကြုတ်သွားပြီး သူက ဘာကြောင့် ဒီလောက် ယုံကြည်မှု ရှိနေရသလဲဆိုတာကို နားမလည်နိုင်ဘဲ မနေနိုင်စွာ ပြောလိုက်သည်။

"ဒီရေပေါ်ကျွန်း အလောင်းကောင်ကြီးက သာမန် သန္ဓေပြောင်း သားရဲ မဟုတ်ဘူး... ကမ္ဘာပေါ်က သက်ရှိ ဟုတ်ရဲ့လားလို့တောင် ငါ် သံသယရှိတယ်... သူ့ရဲ့ သွေးသားတွေက အလွန်တရာ မာကျောလွန်းပြီး ငါ သိထားတဲ့ ဘယ်လိုအရာဝတ္ထုမျိုးထက်မဆို ပိုနေတာ... မင်း အမှားမလုပ်မိစေနဲ့နော်"

"စိတ်ချပါ... ကျွန်တော် နားလည်ပါတယ်"

ချိုးကုံရုံက သူ ဘာပြောပြော လက်မခံသည်ကို မြင်သောအခါ မတတ်နိုင်တော့ပေ။ သူ ကိုယ်တိုင်လည်း စောစောက နည်းလမ်းပေါင်းစုံကို စမ်းသပ်ကြည့်ခဲ့သော်လည်း အပြင်သို့ ထွက်မရနိုင်ခဲ့ပေ။

ယခုအချိန်တွင် လင်းယွမ်ကို ယုံကြည်ရန်သာ ရွေးချယ်စရာ ရှိတော့သည်။

မကြာမီ လူနှစ်ယောက်က ဆယ်မိနစ်ပင် အချိန်မယူလိုက်ရဘဲ ဤနေရာရှိ သွေးရေခဲများကို အကုန်အစင် ရှင်းလင်းပစ်လိုက်ကြသည်။

ထိုအချိန်တွင် ချိုးကုံရုံကလည်း သူ၏ ပစ္စည်းသိုလှောင်အိတ်ထဲသို့ တစ်ဝက်ကျော်ခန့် ထည့်ပြီးသွားရာ ချက်ချင်း မေးလိုက်သည်။ "ထွက်ပေါက်က ဘယ်မှာလဲ"

"ခင်ဗျား အပြည့် မထည့်တော့ဘူးလား"

"မထမ်းနိုင်တော့ဘူး... " ချိုးကုံရုံက မတတ်နိုင်စွာဖြင့် ပြောလိုက်သည်။

ဟင်းလင်းပြင်အိတ်က အလေးချိန်၏ ဆယ်ပုံတစ်ပုံကို လျှော့ချပေးနိုင်သော်လည်း သူက စိတ်စွမ်းအင် အစွမ်းပိုင်ရှင် ဖြစ်ပြီး ခွန်အားအသားပေး အမျိုးအစား မဟုတ်ပေ။ အမြင့်ဆုံး ပင်မ အရည်အသွေးမှတ်မှာ စိတ်စွမ်းအင် ဖြစ်သောကြောင့် အပြည့်ထည့်ထားသော အိတ်ကို လုံးဝ မထမ်းနိုင်ပေ။

လင်းယွမ်က ပြုံးလိုက်သည်။ "ဒါဆိုရင် ကျွန်တော် အားမနာတော့ဘူးနော်"

ထိုသို့ပြောရင်း သူက ကျန်နေသေးသော အပိုင်းအစ သွေးရေခဲများကိုပါ တိုက်ရိုက် သိမ်းယူသွားလိုက်သည်။

ထို့နောက် ကိုယ်ကိုလှည့်ကာ ရေခဲလှိုဏ်ခေါင်းထဲမှ ထွက်လာခဲ့သည်။

ချိုးကုံရုံက အလျင်အမြန် နောက်မှ လိုက်လာပြီး တိုက်တွန်းလိုက်သည်။ "မင်းမှာ ဘာနည်းလမ်း ရှိလို့လဲ... မြန်မြန် လုပ်ပါ... ဒီအလောင်းကောင်ကြီးရဲ့ ခန္ဓာကိုယ်တွင်းက ရှုပ်ထွေးတယ်ဆိုပေမယ့် ချန်ယွင်တောက်က နှလုံးအမြူတေနဲ့ ဦးနှောက်အမြူတေကို သန့်စင်ပြီးသွားပြီဆိုတော့ မျိုးရိုးဗီဇ အမွေအနှစ် အချက်အလက်ကို လက်ခံရရှိသွားလောက်ပြီ... သူက ဒီနေရာအကြောင်းကို လက်ခုပ်ထဲက ရေလို သိနေလောက်ပြီ... ငါတို့ အချိန်ဆွဲနေလို့ မဖြစ်တော့ဘူး"

လင်းယွမ်က လာစဉ်က ဖြတ်သန်းခဲ့သော နံရံပေါက်ဆီသို့ ခြေလှမ်းကျဲကြီးများဖြင့် လျှောက်သွားလိုက်ပြီး ပြောလိုက်သည်။ "ခင်ဗျားရဲ့ ကြိန်နှုန်းမြင့်တူကို သုံးပြီး ဒီက ရေခဲတုံးတွေကို ခွဲချလိုက်"

"ထွက်ပေါက်က ဒီမှာလား... ဒီမှာ သွေးကြောလမ်းကြောင်း ရှိနေလို့လား... မဖြစ်နိုင်တာ... ဒီမှာရှိတယ်လို့ ငါ မမှတ်မိပါဘူး"

ချိုးကုံရုံက သံသယဝင်သွားသော်လည်း အလျင်အမြန်ပင် လုပ်ဆောင်လိုက်သည်။

တစ်ချိန်တည်းမှာပင် သူက မေးမြန်းလိုက်သည်။ "မျိုးရိုးဗီဇ အမွေအနှစ်ဆိုတာ ဘာကြီးလဲ"

"မင်းက မျိုးရိုးဗီဇ အမွေအနှစ်ကို မသိဘူးလား" ချိုးကုံရုံက အံ့သြသွားသည်။

လင်းယွမ်က မျက်မှောင်ကြုတ်လိုက်သည်။ "ကျွန်တော် သိရမှာလား"

"မင်းရဲ့ အရည်အသွေးမှတ်က ၅၀ မှတ် ရောက်နေပြီမလား... အရည်အသွေးမှတ် ၅၀ ရောက်သွားပြီဆိုရင် မင်းရဲ့ မျိုးရိုးဗီဇ သိပ်သည်းဆက သတ်မှတ်ထားတဲ့ အတိုင်းအတာတစ်ခုအထိ ရောက်နေပြီး မျိုးရိုးဗီဇမျိုးစေ့ နိုးထလာမယ့် အဆင့်ကို ရောက်တော့မယ်ဆိုတဲ့ အဓိပ္ပာယ်ပဲ"

"ဒီအချိန်မှာ မင်းရဲ့ မျိုးရိုးဗီဇထဲက သတင်းအချက်အလက်တွေ အများကြီးက... မင်းရဲ့ စိတ်အာရုံကို လွှမ်းမိုးလာလိမ့်မယ်... ဒါဆိုရင် မင်းက မသိမသာနဲ့ ဆင့်ကဲပြောင်းလဲနိုင်မယ့် နည်းလမ်းကို သွားရှာဖွေလိမ့်မယ်"

"အရည်အသွေးမှတ်တစ်ခုက ၅၀ အထိ ရောက်သွားတဲ့အခါ... မျိုးရိုးဗီဇမျိုးစေ့ တည်ရှိနေတာနဲ့ မျိုးရိုးဗီဇမျိုးစေ့ကို ဘယ်လို သန့်စင်ရမလဲဆိုတာ သဘာဝအလျောက် သိလာလိမ့်မယ်... ဒါက မင်းရဲ့ မျိုးရိုးဗီဇထဲမှာ နက်နက်ရှိုင်းရှိုင်း မြှုပ်နှံထားတဲ့ မှတ်ဉာဏ်ပဲ... မျိုးဆက်ပေါင်း မရေမတွက်နိုင်အောင် လက်ဆင့်ကမ်းလာခဲ့တဲ့ မျိုးရိုးဗီဇတွေ ချန်ရစ်ခဲ့တဲ့ အမှတ်အသားပဲ"

"ကြောင်တစ်ကောင် မွေးလာတာနဲ့ ကြွက်ကို ဖမ်းတတ်သလိုမျိုး တခြားလူ သင်ပေးစရာ မလိုဘူး... ဒါက မျိုးရိုးဗီဇထဲမှာ ပါလာတဲ့ ဗီဇမှတ်ဉာဏ်ပဲ"

"မင်းက တကယ်ကြီး မသိဘူးပေါ့... မင်းရဲ့ အဓိက အရည်အသွေးမှတ် လေးခုစလုံးက ၅၀ မရောက်သေးလို့များလား"

ချိုးကုံရုံ၏ မျက်နှာတွင် အံ့အားသင့်မှုများနှင့် သံသယများ ပြည့်နှက်နေပြီး မယုံကြည်နိုင်ဖြစ်နေသည်။

လင်းယွမ်ကလည်း ချက်ချင်း သံသယဝင်သွားသည်။ သူ၏ အဓိက အရည်အသွေးမှတ် လေးခုစလုံးက ၅၀ မှတ်သို့ ရောက်ရှိနေသည်မှာ ကြာပြီ ဖြစ်သော်လည်း မျိုးရိုးဗီဇ မှတ်ဉာဏ်ဆိုသည်ကို တစ်ခါမှ မကြုံဖူးခဲ့ပေ။

"ပင်မ အရည်အသွေးမှတ်က ၅၀ ရောက်သွားရင် အဲ့ဒီလို အကျိုးကျေးဇူး ရှိတာလား... ကျွန်တော်ကတော့ မျိုးရိုးဗီဇမျိုးစေ့အဆင့်ကို ရောက်နေပြီ"

ချိုးကုံရုံက ထိုစကားကို ကြားသောအခါ တစ်ဖန် အံ့အားသင့်သွားပြန်သည်။ "မင်းက မျိုးရိုးဗီဇမျိုးစေ့အဆင့်ကို ရောက်သွားပြီလား... မင်းက အမှတ် ၅၀ မရောက်ခင်မှာ အဆင့်တက်လိုက်တာတော့ မဟုတ်ပါဘူးနော်"

သူက တစ်ခုခုကို ရုတ်တရက် တွေးမိသွားသဖြင့် ချက်ချင်း ထပ်မေးလိုက်သည်။

လင်းယွမ်က မေးလိုက်သည်။ "ဘာဖြစ်လို့လဲ"

ချိုးကုံရုံက လင်းယွမ်ကို တစ်ချက်ကြည့်လိုက်ပြီး အနည်းငယ် သနားသွားဟန်ဖြင့် ပြောလိုက်သည်။

"ပင်မ အရည်အသွေးမှတ်က ၅၀ အပြည့် မရောက်ခင်မှာ မျိုးရိုးဗီဇမျိုးစေ့ကို အလျင်စလို စုစည်းလိုက်ရင်... မျိုးရိုးဗီဇမျိုးစေ့ အဆင့်ရဲ့ တိုက်ခိုက်ရေးစွမ်းအားကို မြန်မြန်ဆန်ဆန် ရရှိသွားနိုင်တယ် ဆိုပေမယ့်..."

"အဲ့ဒီလို လုပ်လိုက်တဲ့အတွက်... မျိုးရိုးဗီဇ အမွေအနှစ်ကို ရရှိနိုင်မယ့် အခွင့်အရေး ဆုံးရှုံးသွားလိမ့်မယ်... ဒါ့အပြင် ဒီလိုအခြေအနေမျိုးမှာ ပင်မ အရည်အသွေးမှတ်က အပြည့်အဝ သန့်စင်မှု မရှိတဲ့အတွက်... မျိုးရိုးဗီဇမျိုးစေ့ကို စုစည်းတဲ့အချိန်မှာ အခြားအရောအနှော မျိုးရိုးဗီဇတွေထဲမှာ ပါနေတဲ့ သတင်းအချက်အလက်တွေရဲ့ တိုက်ခိုက်ခြင်းကို ခံရလိမ့်မယ်"

"ဒီလိုအခြေအနေမျိုးမှာ မျိုးရိုးဗီဇမျိုးစေ့ကို စုစည်းတာက အသက်အန္တရာယ် အလွန်ကြီးမားရုံသာမကဘဲ... မျိုးရိုးဗီဇထဲက မရေမတွက်နိုင်တဲ့ သတင်းအချက်အလက်တွေက... အသိစိတ်ကို အချိန်မရွေး ဖျက်ဆီးပစ်သွားနိုင်တယ်"

"ဒါ့အပြင် ကံကောင်းလို့ မျိုးရိုးဗီဇမျိုးစေ့ကို အောင်အောင်မြင်မြင် စုစည်းနိုင်ခဲ့ရင်တောင်မှ... မင်းရဲ့ အစွမ်းက အရည်အသွေးမှတ် ၅၀ ပြည့်ပြီးမှ မျိုးရိုးဗီဇမျိုးစေ့ကို စုစည်းထားတဲ့ အစွမ်းပိုင်ရှင်လောက် မြင့်မှာ မဟုတ်တာ သေချာသွားပြီ"

"ကွမ်ဖူဘက်မှာတော့... ပင်မ အရည်အသွေးမှတ် ၅၀ မရောက်ခင် မျိုးရိုးဗီဇမျိုးစေ့အဆင့် တက်ခဲ့တဲ့သူတွေကို... မျိုးရိုးဗီဇမျိုးစေ့တစ်ပိုင်းအဆင့်လို့ ခေါ်ကြတယ်... တချို့ကလည်း မျိုးမစစ် လို့ လှောင်ပြောင်ပြီး ခေါ်တတ်ကြတယ်"

ထိုနေရာအထိ ပြောပြီးသောအခါ ချိုးကုံရုံက လင်းယွမ်ကို ကြည့်လိုက်ရာ သူ၏ မျက်နှာပေါ်တွင် နှမြောတသဖြစ်နေသော အရိပ်အယောင်များ အထင်အရှား ပေါ်လွင်နေသည်။

သူက လင်းယွမ်ကို ထိုသို့သော မျိုးရိုးဗီဇမျိုးစေ့တစ်ပိုင်းအဆင့် အစွမ်းပိုင်ရှင်မျိုးဟု ထင်မှတ်သွားခဲ့သည်။

လင်းယွမ်၏ မျက်နှာအမူအရာက ပြောင်းလဲသွားခြင်း မရှိပေ။ သူ၏ အခြေအနေကို သူကိုယ်တိုင် အသိဆုံး ဖြစ်ပြီး သူက အစစ်အမှန် မျိုးရိုးဗီဇမျိုးစေ့အဆင့်ဖြစ်သည်မှာ သေချာလှပေသည်။

သို့သော် ကိုယ်တိုင် ဘာကြောင့် မျိုးရိုးဗီဇမျိုးစေ့၏ အမွေအနှစ် အချက်အလက်များကို လက်မခံရရှိခဲ့သနည်း ဆိုသည်ကို သူ နားမလည်နိုင်ဖြစ်နေသည်။

လင်းယွမ်က ချိုးကုံရုံကို ကြည့်ကာ မေးလိုက်သည်။ "ပင်မ အရည်အသွေးမှတ်က ၅၀ ရောက်သွားပေမယ့်... မျိုးရိုးဗီဇ အမွေအနှစ် အချက်အလက်တွေကို လက်မခံရရှိတဲ့ အခြေအနေမျိုးရော ရှိလား"

ချိုးကုံရုံက ချက်ချင်း ခေါင်းခါယမ်းလိုက်သည်။ "ဒါ မဖြစ်နိုင်ပါဘူး... ကွမ်ဖူ စစ်တပ်ရဲ့ သုတေသနပြုချက်တွေအရဆို... မျိုးရိုးဗီဇထဲမှာ ပါလာတဲ့ မျိုးရိုးဗီဇ အချက်အလက်တွေ အများစုက အပိုင်းအစလေးတွေပဲ ဖြစ်နေတာ... အစွမ်းတစ်မျိုးမျိုး နိုးထလာပြီးတဲ့အခါမှသာ... လူ့ခန္ဓာကိုယ်က အဲ့ဒီအစွမ်းနဲ့ သက်ဆိုင်တဲ့ မျိုးရိုးဗီဇကို အလိုအလျောက် ရှာဖွေဖော်ထုတ်တာပဲ"

"ဒီဖြစ်စဉ်အတွင်းမှာ ငါတို့က သန္ဓေပြောင်း သတ္တဝါတွေရဲ့ အသွေးအသားတွေကို အဆက်မပြတ် စားသုံးပြီး... အဲ့ဒီအသွေးအသားထဲမှာရှိတဲ့ တူညီတဲ့ မျိုးရိုးဗီဇတွေကို စုပ်ယူပြီး... ဒီမျိုးရိုးဗီဇ အပိုင်းအစလေးတွေကို ပြည့်စုံအောင် ဖြည့်ဆည်းကြရတယ်"

"အရည်အသွေးမှတ် တစ်ခုခုက ၅၀ ကို ရောက်သွားရင်... ငါတို့ရဲ့ ဒီမျိုးရိုးဗီဇ အမျိုးအစားက ကနဦး ရလဒ်တစ်ခုအဖြစ် ပြည့်စုံသွားပြီလို့ သတ်မှတ်လို့ရတယ်... အဲ့ဒီအခါ မျိုးရိုးဗီဇရဲ့ နက်ရှိုင်းတဲ့ နေရာကနေ လာတဲ့ အမွေအနှစ် သတင်းအချက်အလက်တွေကို ငါတို့ လက်ခံရရှိကြတယ်"

"မင်းပြောတဲ့ အခြေအနေမျိုးကတော့... လုံးဝကို မဖြစ်နိုင်ဘူး"

"မျိုးရိုးဗီဇ အမွေအနှစ် အချက်အလက်ကို ရချင်ရင်... ခန္ဓာကိုယ်ထဲက မျိုးရိုးဗီဇ အပိုင်းအစတွေကို ပြည့်စုံအောင် ဖြည့်ဆည်းရမယ်... ဒီလုပ်ငန်းစဉ်က အစွမ်းကို နက်နက်ရှိုင်းရှိုင်း တူးဖော်တာဖြစ်ပြီး ရလဒ်ကတော့ ပင်မ အရည်အသွေးမှတ်ကို ၅၀ အထိ မြှင့်တင်ပေးလိုက်တာပဲ"

"မင်းရဲ့ ပင်မ အရည်အသွေးမှတ်က ၅၀ ရောက်သွားပေမယ့်... မျိုးရိုးဗီဇ အပိုင်းအစတွေကို ပြည့်စုံအောင် မဖြည့်ဆည်းရသေးဘူးဆိုရင်... အဲဒါက လုပ်ငန်းစဉ်ကို မပြီးမြောက်ဘဲ ရလဒ်ကို ရသွားတာနဲ့ အတူတူပဲ မဟုတ်ဘူးလား"

လင်းယွမ်က ထိုနေရာအထိ ကြားသောအခါ ရုတ်တရက် မေးလိုက်သည်။ "မျိုးရိုးဗီဇ အပိုင်းအစတွေကို ဖြည့်ဆည်းဖို့ဆိုတာ... သန္ဓေပြောင်း သတ္တဝါတွေရဲ့ အသွေးအသားတွေကို စားမှပဲ ရတာလား"

"ဒါပေါ့... မဟုတ်ရင် မင်း ကိုယ်ထဲက မျိုးရိုးဗီဇက ဒီလောက်ပဲ ရှိတာကို... သူတို့ကိုဘယ်ကသွားပြီး ဖြည့်ဆည်းမှာလဲ"

"သန္ဓေပြောင်းတာ ကျရှုံးသွားတဲ့ အရူးတွေကို ကြည့်လိုက်လေ... သူတို့ဆီမှာ ဗီဇစိတ်ပဲ ကျန်တော့တာ... အဲဒါကြောင့် သူတို့က တခြားလူတွေကို အရူးလို စားသောက်နေကြတာ မဟုတ်ဘူးလား"

"အဲ့ဒါ သူတို့ရဲ့ မျိုးရိုးဗီဇက သူတို့ကို... ပြင်ပမျိုးရိုးဗီဇတွေ အသက်လု စုပ်ယူပြီး... သူတို့ကိုယ်သူတို့ ဖြည့်ဆည်းဖို့ လှုံ့ဆော်အားပေးနေတာပဲ"

လင်းယွမ်က တိတ်ဆိတ်သွားသည်။

သူ၏ အရည်အသွေးမှတ်များ တိုးတက်လာခြင်းမှာ သန္ဓေပြောင်း သတ္တဝါများ၏ သွေးသားကို စားသုံး၍ တိုးတက်လာခြင်း မဟုတ်ပေ။

လုံးဝကို အမှတ်ပေါင်းထည့်ခြင်းဖြင့်သာ တိုးတက်လာခြင်း ဖြစ်သောကြောင့် မျိုးရိုးဗီဇ အမွေအနှစ် အချက်အလက်ဆိုသည်ကို မရရှိခဲ့သည်မှာ မဆန်းပေ။

ရုတ်တရက် လင်းယွမ်က ရန်မေ အစွမ်းနိုးထလာစအချိန်တွင် မကြာခဏ ထွက်ပေါ်လာတတ်သော ရေခဲနတ်ဘုရားမ စရိုက်လက္ခဏာကို ပြန်တွေးမိသွားသည်။

"ဒါဆို အမမေ အဲ့ဒီတုန်းက အစွမ်းနိုးထလာချိန်မှာ... မျိုးရိုးဗီဇရဲ့ နက်ရှိုင်းတဲ့ နေရာက မှတ်ဉာဏ် အချက်အလက်တွေကို လက်ခံရရှိခဲ့တာများလား... သူ့ရဲ့ နောက်ဆုံး ဆင့်ကဲပြောင်းလဲမယ့် လမ်းကြောင်းက ရေခဲနတ်ဘုရားမလား"

"နောက်ပိုင်း ငါက သူ့ကို တတ်နိုင်သမျှ သန္ဓေပြောင်း သတ္တဝါတွေရဲ့ အသားကို ပေးမစားဘဲ... စနစ်ကနေ လဲလှယ်ထားတဲ့ အသားတွေကိုပဲ ငါနဲ့အတူ စားစေခဲ့တာ... သူ့ရဲ့ ခန္ဓာကိုယ်ထဲမှာ ရေခဲနတ်ဘုရားမနဲ့ သက်ဆိုင်တဲ့ မျိုးရိုးဗီဇ အပိုင်းအစတွေ တိုးမလာတော့လို့... အချိန်ကြာလာတာနဲ့အမျှ အဲ့ဒီစရိုက်လက္ခဏာက ထပ်ပေါ်မလာတော့တာပဲနေမယ်"

လင်းယွမ်၏ စဉ်းစားတွေးခေါ်မှုက အလွန်မြန်ဆန်လှပြီး အချို့သော အကြံဉာဏ်များကို ချက်ချင်း ခန့်မှန်းတွေးဆနိုင်ခဲ့သည်။

တစ်ချိန်တည်းမှာပင် သူ၏ ဘေးနားရှိ သူငယ်ချင်းများ၏ စွမ်းအားတိုးတက်မှုက အဘယ်ကြောင့် ဤမျှ နှေးကွေးနေပြီး အပြင်ဘက်တွင်မူ အစွမ်းထက်သော အစွမ်းပိုင်ရှင်များချည်း ဖြစ်နေရသနည်းဆိုသည်ကိုလည်း သူ နောက်ဆုံးတွင် နားလည်သွားတော့သည်။

တကယ်တမ်းတွင် ထိုလူများအားလုံးက သန္ဓေပြောင်း သားရဲများ၏ သွေးသားများကို ရူးသွပ်စွာ စားသုံးကာ မျိုးရိုးဗီဇ ချို့ယွင်းချက်များကို ဖြည့်ဆည်းပြီး မိမိကိုယ်ပိုင် စွမ်းအားကို မြှင့်တင်နေခဲ့ကြခြင်း ဖြစ်သည်။

သူ၏ ဘေးနားရှိ လူအများစုမှာ သူ လဲလှယ်ပေးထားသော အစားအစာများကိုသာ စားသုံးနေကြသဖြင့် မိမိကိုယ်ပိုင် မျိုးရိုးဗီဇကို မဖြည့်ဆည်းနိုင်ဘဲ အလျင်အမြန် မတိုးတက်နိုင်ကြသည်မှာ သဘာဝပင် ဖြစ်သည်။

လင်းယွမ်က ချိုးကုံရုံကို ကြည့်ကာ ရုတ်တရက် မေးလိုက်သည်။ "ခင်ဗျား ပြောပုံအရဆိုရင် သန္ဓေပြောင်း သတ္တဝါတွေရဲ့ သွေးသားကို စားမှပဲ ကိုယ်ပိုင် မျိုးရိုးဗီဇကို ဖြည့်ဆည်းနိုင်မယ်ဆိုရင်... သန္ဓေပြောင်း သတ္တဝါတွေရဲ့ သွေးသားကို မစားဘူးဆိုရင် မဖြစ်နိုင်တော့ဘူးလား"

"ဒါပေါ့... မစားဘဲနဲ့ မင်းက ပြင်ပမျိုးရိုးဗီဇကို ဘယ်လိုလုပ် စုပ်ယူမှာလဲ"

"လေထုထဲမှာ သန္ဓေပြောင်းစွမ်းအင်တွေ ရှိနေတာ မဟုတ်ဘူးလား" လင်းယွမ်က ရုတ်တရက် ပြောလိုက်သည်။

ချိုးကုံရုံက ကြောင်အသွားပြီးနောက် ရယ်မောလိုက်သည်။ "သဘာဝတရားကြီးထဲမှာ သန္ဓေပြောင်းစွမ်းအင်တွေ ရှိနေတာ အမှန်ပဲ... ဒီစွမ်းအင်တွေက လူ့ခန္ဓာကိုယ်ရဲ့ မျိုးရိုးဗီဇကို ကြီးထွားလာအောင် ပျိုးထောင်ပေးနိုင်တယ် ဆိုပေမယ့်... လက်ရှိ ခန္ဓာကိုယ်ထဲမှာ ရှိနေတဲ့ မျိုးရိုးဗီဇ အစိတ်အပိုင်းတွေကိုပဲ ကြီးထွားလာစေတာ... လိုအပ်နေတဲ့ မျိုးရိုးဗီဇ အပိုင်းအစတွေကိုတော့ ဖြည့်ဆည်းပေးမှာ မဟုတ်ဘူး"

"မျိုးရိုးဗီဇက မပြည့်စုံဘူးဆိုရင်... အမွေအနှစ် အချက်အလက်ကို ရဖို့ဆိုတာ မဖြစ်နိုင်ဘူး"

"ပြီးတော့ မင်းက မတွေးတတ်ဘူးလား... လေထဲမှာရှိတဲ့ စွမ်းအင်လေး နည်းနည်းကို စုပ်ယူပြီး ကိုယ့်ကိုယ်ကိုယ် အစွမ်းထက်လာအောင် လုပ်မယ်ဆိုရင် ဘယ်နှစ်နှစ်လောက် အချိန်ယူရမှာလဲ"

"မင်း အစွမ်းထက်လာတဲ့အချိန်ဆိုရင် အပြင်ဘက်မှာ သန္ဓေပြောင်း ဘီလူးတွေရဲ့ ကမ္ဘာကြီး ဖြစ်နေလောက်ပြီ"

လင်းယွမ်က ငြင်းခုံခြင်း မရှိပေ။ အကယ်၍ သူသာ ထိုက်ယန်တောင် မျိုးရိုးဗီဇ နိုးထခြင်း ကျင့်စဉ် ကို ဖန်တီးမထားခဲ့ပါက ကောင်းကင်နှင့် မြေကြီး၏ စွမ်းအင်များကို အသိစိတ်မဲ့စွာ စုပ်ယူသည့် ဤနည်းလမ်းဖြင့် မည်သည့်အချိန်မှ တိုးတက်လာမည်ကို အမှန်တကယ်ပင် မသိနိုင်ပေ။

သို့သော် မျိုးရိုးဗီဇ နိုးထခြင်း ကျင့်စဉ် ရှိနေသည့်အတွက် စုပ်ယူမှုနှုန်းက အလွန်တရာ မြင့်တက်လာပြီး ထိုက်ယန်တောင်မှ လူများ၏ ကျင့်ကြံမှု အရှိန်က နှေးကွေးမည် မဟုတ်ပေ။

ထို့အပြင် ထိုက်ယန်တောင်ပေါ်တွင် သူ၏ ဘေးနားရှိ လူများသာ သန္ဓေပြောင်း သတ္တဝါများ၏ သွေးသားကို စားသုံးမှု နည်းပါးခြင်း ဖြစ်ပြီး အခြားလူများက မစားကြသည်မှ မဟုတ်ပေ။

သို့သော် မျိုးရိုးဗီဇ အမွေအနှစ်ကို မရရှိနိုင်ခြင်းကတော့ အတော်လေး ဒုက္ခရောက်မည့် ကိစ္စပင်။

သူက အချိန်အတော်ကြာအောင် သန္ဓေပြောင်း သတ္တဝါများ၏ သွေးသားကို မစားရန် တင်းခံထားခဲ့ခြင်းမှာ မှားယွင်းသော ရွေးချယ်မှုများ ဖြစ်နေခဲ့သလား။

ယခင်က သူ၏ စိတ်ထဲတွင် အမြဲတမ်း မလုံခြုံသည့် ခံစားချက်မျိုး ရှိနေခဲ့ပြီး သန္ဓေပြောင်း သတ္တဝါများ၏ သွေးသားများက မသန့်ရှင်းဟု အမြဲ ခံစားနေခဲ့ရသည်။

အဲ့ဒါတွေ အားလုံးက ထင်ယောင်ထင်မှား ဖြစ်မှုတွေပဲလား။

လင်းယွမ်က မျက်မှောင်ကို တင်းတင်းကြုတ်လိုက်ပြီး ရုတ်တရက် မေးလိုက်သည်။ "စောစောက ခင်ဗျား ပြောသွားတဲ့ အရောအနှော မျိုးရိုးဗီဇတွေဆိုတာ ဘာအဓိပ္ပာယ်လဲ"

ချိုးကုံရုံက သူ၏ အရှေ့ရှိ ရေခဲတုံးများကို ခွဲချလိုက်ပြီ ဖြစ်ရာ ပါးလွှာသော အသားနံရံ တစ်လွှာကို မြင်လိုက်ရသည်။

သူက ချက်ချင်း ဝမ်းသာသွားပြီး အသားနံရံ၏ အက်ကွဲကြောင်းကို အလျင်အမြန် ဆွဲဖြဲလိုက်ကာ ပြောလိုက်သည်။ "ဒီနေရာက ထွက်ပေါက်လား"

လင်းယွမ်က ခေါင်းညိတ်လိုက်ပြီး ထပ်မေးလိုက်သည်။ "ခင်ဗျား ကျွန်တော်ကို မဖြေရသေးဘူးလေ"

ချိုးကုံရုံက ခေါင်းပင် လှည့်မကြည့်ဘဲ အလျင်စလို ဝင်ရောက်သွားကာ တစ်ချိန်တည်းမှာပင် ပြန်ဖြေလိုက်သည်။ "ဒါက ဘာနားမလည်စရာ ရှိလို့လဲ... အရောအနှော မျိုးရိုးဗီဇတွေဆိုတာ မင်းရဲ့ ပင်မ အစွမ်းနဲ့ မသက်ဆိုင်တဲ့ မျိုးရိုးဗီဇတွေပဲပေါ့"

"ဥပမာ ရေဓာတ် အစွမ်းပိုင်ရှင် တစ်ယောက်ရဲ့ ခန္ဓာကိုယ်ထဲမှာရှိတဲ့ မီးဓာတ်လိုမျိုး မျိုးရိုးဗီဇတွေက အခြားရောနှော မျိုးရိုးဗီဇတွေလို့ သတ်မှတ်လို့ ရတယ်"

"လူ့ခန္ဓာကိုယ်ထဲမှာ မျိုးရိုးဗီဇ အမျိုးအစားက သိန်းသန်းချီပြီး ရှိတယ်... ခရိုမိုဆုန်း တစ်စုံထဲမှာတင် မျိုးရိုးဗီဇ အမျိုးအစားတွေ အများကြီး ရှိနေတာ... သွေးတစ်စက်ထဲမှာရော မျိုးရိုးဗီဇ ဘယ်လောက်တောင် ရှိနေမလဲ... လူ့ခန္ဓာကိုယ်ထဲမှာ သွေးဘယ်လောက်တောင် ရှိလဲ"

"မင်း စဉ်းစားကြည့်လေ... မင်းရဲ့ ခန္ဓာကိုယ်ထဲမှာ အရောအနှော မျိုးရိုးဗီဇတွေ ဘယ်လောက်တောင် ရှိနေမလဲဆိုတာ"

"အစွမ်းပိုင်ရှင်တွေ ဆင့်ကဲပြောင်းလဲတဲ့ လုပ်ငန်းစဉ်ဆိုတာ... ကိုယ်တိုင် နိုးထလာတဲ့ အဲ့ဒီမျိုးရိုးဗီဇ အစိတ်အပိုင်းကို... အဆက်မပြတ် ကြီးထွားလာအောင် လုပ်ဆောင်နေတာပဲ"

"မဟုတ်ဘူး... မင်း ရွေးချယ်လိုက်တဲ့ မျိုးရိုးဗီဇ အစိတ်အပိုင်းလို့ ပြောရမှာပေါ့"

"လူအများစုရဲ့ အစွမ်းနိုးထလာတဲ့အချိန်မှာ ရလိုက်တဲ့အစွမ်းတွေက... တကယ်တမ်းကျတော့ အဲ့ဒီအချိန်မှာ သူတို့ အလိုချင်ဆုံး ဆန္ဒတွေနဲ့ သက်ဆိုင်နေတာ"

"အဲ့ဒီဆန္ဒက တကယ်တော့... အဲ့ဒီအချိန်မှာ မင်းက... အဲ့ဒီအအစွမ်းကို ကိုယ်စားပြုတဲ့ မျိုးရိုးဗီဇကို ရွေးချယ်ပြီး နိုးထစေခဲ့တာပဲ"

"အဲ့ဒီမျိုးရိုးဗီဇက တကယ်တော့ မင်းရဲ့ ခန္ဓာကိုယ်ထဲမှာ (၁) ရာခိုင်နှုန်းတောင် မပြည့်ဘူး... ကျန်တဲ့ ကိုးဆယ့်ကိုး ရာခိုင်နှုန်းက အရောအနှော မျိုးရိုးဗီဇတွေချည်းပဲ"

"အနာဂတ် ဆင့်ကဲပြောင်းလဲမယ့် လမ်းကြောင်းပေါ်မှာ မင်းက ဒီတစ်ရာခိုင်နှုန်းသော မျိုးရိုးဗီဇကိုပဲ အဆက်မပြတ် ကြီးထွားလာအောင် လုပ်ဖို့ လိုအပ်တာ... ဒီမျိုးရိုးဗီဇတွေကို ဖြည့်ဆည်းပြီး နောက်ဆုံး မျိုးရိုးဗီဇမျိုးစေ့ကို စုစည်းလိုက်တာနဲ့... မျိုးရိုးဗီဇကွင်းဆက်အဖြစ် ဆင့်ကဲပြောင်းလဲပြီး မင်းနဲ့ သက်ဆိုင်တဲ့ မျိုးရိုးဗီဇမြေပုံကို ရေးဆွဲနိုင်တာပဲ"

ဤအချိန်တွင် ချိုးကုံရုံက အခြားတစ်ဖက်ရှိ နှလုံးခန်းထဲသို့ လုံးဝ ဝင်ရောက်သွားခဲ့ပြီ ဖြစ်သည်။

လင်းယွမ်ကလည်း သူ၏ နောက်မှ လိုက်ဝင်သွားခဲ့သည်။

သူက ဝင်ရောက်လာပြီးနောက် အသားနံရံကို ပြန်ပိတ်ရန် မမေ့လျော့ခဲ့ဘဲ တစ်ချိန်တည်းမှာပင် စိတ်စွမ်းအင်ကို အသုံးပြုကာ အပြင်ဘက်ရှိ ရေခဲတုံးများကို ထိန်းချုပ်ပြီး ဤနေရာကို ပြန်ပိတ်ဆို့လိုက်သည်။

ဤနှလုံးခန်းဘက်သို့ ဝင်ရောက်လာပြီးမှ လင်းယွမ်က မေးလိုက်သည်။ "ဒါဆိုရင် နောက်ဆုံးမှာ... ဒီကိုးဆယ့်ကိုး ရာခိုင်နှုန်းရှိတဲ့ အရောအနှော မျိုးရိုးဗီဇတွေက... ဘယ်ရောက်သွားတာလဲ"

"ပြီးတော့ အရောအနှော မျိုးရိုးဗီဇတွေက ကျွန်တော်တို့အပေါ် ဘာသက်ရောက်မှုတွေ ရှိလို့လဲ"

(စာဖတ်သူတွေ နားလည်အောင် ရှင်းပြရမယ်ဆိုရင် လူ့ခန္ဓာကိုယ်ထဲမှာ မျိုးရိုးဗီဇတွေအရောအနှောတွေက သိန်းသန်းကုဋေချီပြီးရှိတယ်၊ လူတစ်ယောက်က အစွမ်းနိုးတော့ ကိုယ်ဖြစ်ချင်တဲ့စိတ်ဆန္ဒက အဲ့ဒီ အရောအနှောမျိုးရိုးဗီဇတွေထဲက ကိုယ့်ဆန္ဒနဲ့ကိုက်ညီတဲ့ တစ်ခုကို လှုံ့ဆော်လိုက်တယ်။ ဥပမာ မီးအစွမ်းလိုချင်နေတဲ့သူက မီးဓာတ်မျိုးရိုးဗီဇလေးကို သွားလှုံ့ဆော်လိုက်တယ်။ အဲ့ဒီမီးဓာတ်မျိုးရိုးဗီဇလေးက အရောအနှောတွေထဲကနေ ရွေးချယ်ခံလိုက်ရပြီး ပင်မ မျိုးရိုးဗီဇဖြစ်လာတယ်။ ဒါပေမဲ့အဲ့ဗီဇလေးက ခန္ဓာကိုယ်မှာ ၁ ရာခိုင်နှုန်းပဲရှိတာ။ သူ့ကို ၁၀၀ ရာခိုင်နှုန်းဖြစ်လာဖို့အတွက် လေထဲက စွမ်းအင်တွေစုပ်ယူပြီး ဖြည့်ဆည်းလို့ရသလို၊ သန္ဓေပြောင်းသတ္တဝါတွေရဲ့ အသွေးအသားတွေကိုစားပြီးလည်း ဖြည့်ဆည်းလို့ရတယ်။ အသားတွေစားပြီး ဖြည့်ဆည်းတာက အမြန်ဆုံးနည်းလမ်းပဲ။ စားတဲ့သူက မီးအစွမ်းပိုင်ရှင်ဆိုရင် အဲ့ဒီအသားတွေမှာပါတဲ့ မျိုးရိုးဗီဇအရောအနှောတွေထဲကနေ သူ့ခန္ဓာကိုယ်က မီးဓာတ်မျိုးရိုးဗီဇကို အလိုလိုဆွဲငင်ပြီးစုပ်ယူလိုက်တာပဲ။ အဲ့နည်းနဲ့သူ့ရဲ့မီးဓာတ်မျိုးရိုးဗီဇက တစ်ဖြည်းဖြည်းမြင့်တက်လာပြီး ဗီဇမျိုးစေ့ စုစည်းနိုင်တဲ့အခြေအနေရောက်သွားတာပဲ)

ဆက်ရန်...