အခန်း (၈၂၉-၈၃၁)

အပိုင်း ၈၂၉ : ဒီစူပါအာကာသယာဉ်က လေအေးပေးစနစ် သိပ်မကောင်းဘူး

"ဒါနဲ့ မင်းကြားပြီးပြီလား။ တလောတုန်းက ငါတို့အိုင်ဇက်မျိုးနွယ်စုဆီကို ထိပ်သီးပုဂ္ဂိုလ်တစ်ယောက် ရောက်နေတယ်ဆိုတာလေ"

"တကယ်လား"

"လွန်ခဲ့တဲ့ရက်ပိုင်းက ငါတို့ဂြိုဟ်ပေါ်မှာ ရုတ်တရက်ပေါ်လာတဲ့ အားကောင်းတဲ့ စွမ်းအင်ကြီးကို မင်း မှတ်မိသေးလား"

"မှတ်မိတာပေါ့။ အဲ့ဒီနေ့က အချိန်နဲ့ ဟင်းလင်းပြင်ကြီးတစ်ခုလုံး အေးခဲသွားသလို ခံစားရတာ။ ငါ့အဖေဆိုရင် ခဏလောက်မိန်းမောသွားလို့ ကားတောင်တိုက်မလို ဖြစ်သွားသေးတယ်"

"အဆင့်ငါးထက်ကျော်တဲ့ သက်ရှိတွေပဲ ဒီလိုအရှိန်အဝါမျိုး ထုတ်လွှတ်နိုင်တာလို့ ငါ့ဆရာကပြောတယ်။ ဒါပေမဲ့ ငါ့ဆရာက အဆင့်သုံးသက်ရှိပဲ ရှိသေးတာဆိုတော့ အဆင့်ခြောက်သက်ရှိက ဘယ်လိုမျိုးလဲဆိုတာ သူလည်းမသိဘူး"

"ငါ့ရဲ့အမျိုးတစ်ယောက်က အရှင်သခင်ရဲ့ လက်အောက်မှာ အလုပ်လုပ်တယ်လေ။ သူပြောတာတော့ အဲ့ဒီနေ့က ငါတို့ဂြိုဟ်ပေါ်ကို အဆင့်ငါးမျိုးနွယ်စုရဲ့ စစ်သင်္ဘောတပ်ဖွဲ့တစ်စုတောင် ရောက်လာခဲ့တယ်တဲ့"

"ဒါဆို ငါတို့ဂြိုဟ်ပေါ်မှာ ထိပ်သီးပုဂ္ဂိုလ်တစ်ယောက် တကယ်ရောက်နေတာပေါ့"

ဤ'စတားဂေဇာ'အာကာသယာဉ် ပေါ်ထွက်လာသောကြောင့် အနီးအနားရှိ လူများအကြား လွန်ခဲ့သည့်ရက်ပိုင်းက ဖြစ်ရပ်များနှင့်ပတ်သက်၍ ဆွေးနွေးမှုများမှာ ဝေဝေဆာဆာ ထွက်ပေါ်လာသည်။ သူတို့လို သာမန်အဆင့်နှစ်မျိုးနွယ်စုတစ်ခုက မည်သည့်အတွက်ကြောင့် ဤမျှအထိ အာရုံစိုက်ခံနေရသလဲ။

သူတို့သည် ဤ'စတားဂေဇာ'ကို မည်သူ ဝယ်ယူခဲ့ကြောင်း သိလိုကြသဖြင့် ပတ်ဝန်းကျင်ကို ဝေ့ဝဲကြည့်ရှုနေကြသည်။

"အစ်ကိုကျန်း.. ဒါကို အစ်ကို တကယ်ဝယ်လိုက်တာလား"

အိုင်ရင်းခမျာ မနာလိုအားကျစွာ ငေးကြည့်လျက် မေးလိုက်သည်။ ဤကဲ့သို့သော စူပါ အာကာသယာဉ်မျိုးကို ပိုင်ဆိုင်ရန်မှာ သူ တစ်ခါမှ အိပ်မက်မမက်ဖူးသော အရာပင်။ အကယ်၍ ထိုကဲ့သို့သော မိသားစုမျိုးတွင် မွေးဖွားမလာခဲ့ပါက တစ်သက်လုံးကြိုးစားလျှင်ပင် ရရှိနိုင်မည့်အရာ မဟုတ်ပေ။

"မဟုတ်ရင် ဘယ်သူရှိဦးမှာလဲ"

ကျန်းမုန့်လောင်က ရယ်မောလျက် လျှောက်လာသည်။

သယ်ယူပို့ဆောင်ရေးယာဉ်ပေါ်မှ လူတချို့ ဆင်းလာကြသည်။ ထိုလူတို့မှာ ပစ္စည်းပို့ဆောင်ရေးတာဝန်ခံ ဝန်ထမ်းများသာ ဖြစ်ကြသော်လည်း သူတို့ထံမှ ထွက်ပေါ်နေသော အရှိန်အဝါမှာ အဆင့်ငါးသက်ရှိအဆင့်များ ဖြစ်ကြလေသည်။ ဤအာကာသယာဉ်မှာ အဆင့်ငါးမျိုးနွယ်စုများ၏ တန်ဖိုးထက်ပင် ပိုတန်ဖိုးကြီးလှသဖြင့် လန်းစလော့ကုမ္ပဏီမှာ အလွန်သတိထား၍ ကိုင်တွယ်ခဲ့သည်။ ထို့ပြင် အာကာသယာဉ်၏ ပိုင်ရှင်မှာ ကုမ္ပဏီ၏ ရှယ်ယာရှင်တစ်ဦး ဖြစ်ကြောင်းကိုလည်း အထူးတလည် အကြောင်းကြားထားပြီးဖြစ်၏။

"မစ္စတာကျန်းမုန့်လောင်လား"

ဝန်ထမ်းများမှာ ကျန်းမုန့်လောင်ကို တရိုတသေ ဦးညွှတ်လိုက်ကြသည်။ ကုမ္ပဏီ၏ အကြီးဆုံးရှယ်ယာရှင်မှာ ဤမျှအထိ ငယ်ရွယ်သူတစ်ဦးဖြစ်နေသောကြောင့် သူတို့လည်း အံ့အားသင့်နေကြသည်။

"ဟုတ်ပါတယ်။ ကျွန်တော်ပါပဲ"

"ကျေးဇူးပြုပြီး ဒီမှာ လက်မှတ်ထိုးပေးပါ။ လက်မှတ်ထိုးပြီးတာနဲ့ ဒီ'စတားဂေဇာ'ကို ဆရာ့စိတ်ကြိုက် အသုံးပြုနိုင်ပါပြီ"

"ကျေးဇူး"

ကျန်းမုန့်လောင် သူ့စကြဝဠာနိုင်ငံသားစိစစ်ရေးကတ်ဖြင့် လက်မှတ်ထိုးလိုက်ပြီးနောက် ကြီးမားလှသော ပို့ဆောင်ရေးယာဉ်ကြီးမှာ အလိုအလျောက်စနစ်ဖြင့် ပြန်လည်ထွက်ခွာသွားသည်။

"အတွင်းထဲကို ဝင်ကြည့်လို့ရမလား"

အိုင်ရင်းက တစ်စုံတစ်ခု ထိခိုက်သွားမည်ကို စိုးရိမ်သဖြင့် တုံ့ဆိုင်းစွာ မေးလိုက်သည်။

"လာလေ"

ကျန်းမုန့်လောင်က ရယ်မောလျက် ဆက်ပြောလိုက်ပြန်သည်။

"ဒါက ပျက်လွယ်တဲ့ပစ္စည်းမှ မဟုတ်တာ"

အိုင်ရင်းခမျာ စိတ်လှုပ်ရှားစွာဖြင့် ထိန်းချုပ်ခန်းထဲသို့ လှမ်းဝင်လိုက်သည်။

"ဝိုး... ဒါက အမှာစာနဲ့ သီးသန့်လုပ်ထားတဲ့ 'ခရမ်းရင့်ရောင်'ဗားရှင်းပဲ"

"ဟား... အမြန်နှုန်း၂၄ဆပါပြီး အချိန်ကြန့်ကြာမှုမရှိတဲ့ ဟိုလိုဂရပ်ဖစ်ထိန်းချုပ်စနစ်ကြီးပါလား"

"ဟင်းလင်းပြင်ချဲ့ထွင်မှု ဆယ်ဆတောင်လား"

"ဘာပစ္စည်းကို သုံးထားတာလဲ"

အိုင်ရင်းမှာ ဤအရာကို မဝယ်နိုင်သော်လည်း ကမ္ဘာပေါ်ရှိ စူပါကား ဝါသနာအိုးများကဲ့သို့ အချက်အလက်များကိုမူ အသေးစိတ်သိရှိထားသည်။

ပိုက်ဆံမရှိသူများမှာ အရာအားလုံးကို သိတတ်ကြစမြဲဖြစ်လေရာ အိုင်ရင်းကလည်း ထိုသို့သောလူစားမျိုးပင်။

"မူလသတ္တုစပ်လေ"

"မူလသတ္တုစပ် ဟုတ်လား"

အိုင်ရင်း၏မျက်လုံးများ ပြူးကျယ်သွားသည်။

"အဲ့ဒီပစ္စည်းက တစ်ဂရမ်ကို မျိုးနွယ်စုတစ်ခုရဲ့ တန်ဖိုးလောက် ရှိတာလေ။ ဒါကြီးက မင်းသားတစ်ပါးလို သုံးဖြုန်းနေတာပဲ။ ရောနှောမှုအချိုးအစားက ဘယ်လောက်လဲ"

"အင်း... အစ်ကိုကျန်းအကြောင်း သိပြီးသားပါ။ အမြင့်ဆုံး၁.၅ရာခိုင်နှုန်းနေမှာပေါ့"

အိုင်ရင်းက သူ့ဘာသာသူ ပြန်ဖြေလိုက်သည်။

"ဟားဟား.. အမှန်တော့ ငါက ၁၀၀ရာခိုင်နှုန်းမူလသတ္တုစပ်နဲ့ပဲ လုပ်ချင်တာ။ ဒါပေမဲ့ အဲ့ဒီလောက်အများကြီး မရနိုင်လို့ အလျှော့ပေးလိုက်ရတာ"

"အစ်ကိုက တကယ်ပြောရဲလိုက်တာ"

အိုင်ရင်း ဘာပြောရမှန်းမသိတော့ပေ။

"ကျွန်တော့်ရဲ့ အမှိုက်လိုသင်္ဘောနဲ့ဆိုရင် ဒါကို နှိုင်းယှဉ်လို့တောင် မရဘူး။ ကျွန်တော့်ဟာက ကျိုးပဲ့နေတဲ့ ကစားစရာလေးတစ်ခုလိုပဲ"

"အစ်ကို့ရဲ့ ဒီလိုအပြင်အဆင်မျိုးဆိုရင် အပြီးအစီးဈေးက အနည်းဆုံး ကြယ်ဆယ်ပွင့်လောက်တော့ ကုန်မယ်ထင်တယ်"

အိုင်ရင်း စိတ်ထဲမှ တွက်ချက်ကြည့်လိုက်သည်။ အမှန်အတိုင်းပြောရလျှင် သူသည် ဤ'စတားဂေဇာ'၏ ဈေးနှုန်းကို ကောင်းကောင်းနားလည်ထားသူ ဖြစ်၏။

"လက်ထဲရောက်တဲ့အချိန်မှာတော့ ၁၂ပွင့်လောက် ရှိမယ်"

ကျန်းမုန့်လောင်က ဆိုလာလေသည်။

"ဒါပေမဲ့ ငါ တစ်ပြားမှ မကုန်လိုက်ပါဘူး"

"ပိုက်ဆံမသုံးရဘူး ဟုတ်လား.. ဘယ်လိုလုပ်ဖြစ်နိုင်မှာလဲ.."

အိုင်ရင်းခမျာ မျက်လုံးပြူးသွားပြန်သည်။

"အစ်ကိုကျန်းက သူတို့ရဲ့ရှယ်ယာရှင်လား"

လန်းစလော့ကုမ္ပဏီ၏ ရှယ်ယာရှင်တစ်ဦးမှသာ ဤကဲ့သို့သော အဆင့်မြင့်အာကာသယာဉ်ကို ပိုက်ဆံမပေးဘဲ ရရှိနိုင်မည်ဖြစ်၏။ အထူးသဖြင့် အကြီးဆုံး ရှယ်ယာရှင်မျိုးပင်။ ကျန်းမုန့်လောင်၏ ရိုးသားလှသော မျက်နှာအမူအရာကို မြင်လိုက်ရသောအခါ အိုင်ရင်းခမျာ ဆွံ့အသွားလေသည်။

"အစ်ကိုကျန်းက လန်းစလော့ရဲ့ ရှယ်ယာရှင်တစ်ယောက်လို့တော့ မပြောနဲ့နော်.."

"စိတ်မကောင်းပါဘူး။ မင်းပြောတာ အမှန်ပဲ"

ကျန်းမုန့်လောင်က ပွင့်ပွင့်လင်းလင်း ဝန်ခံလိုက်သည်။

"ပြီးတော့ အကြီးဆုံးရှယ်ယာရှင်ဆိုလည်း ဟုတ်တယ်.."

"ဘုရားရေ"

ကံဆိုးချင်တော့ အိုင်ရင်းခမျာ မည်သည့်စကားလုံးဖြင့် ဖော်ပြရမှန်းမသိတော့ပေ။

"အမှန်အတိုင်းပြောရရင် ငါလည်း ပိုက်ဆံပေးဝယ်မလို့ပါပဲ"

ကျန်းမုန့်လောင်က ရှင်းပြလိုက်သည်။

"ငါ့ဘိုးဘေးတွေရဲ့ ပိုင်ဆိုင်မှုတွေကို အစက ငါမသိဘူးလေ။ ဒါပေမဲ့ အရောင်းဝန်ထမ်းက အများကြီးရှင်းပြပေးတော့ သူတို့ရမယ့် ကော်မရှင်ခတွေလည်း ရသင့်တယ်လို့ ငါထင်ခဲ့တာ။ ဒါပေမဲ့ သူတို့က တန်းစီရတာက တော်တော်ကြာမယ်လို့ပြောတော့ ငါကလည်း လက်လျှော့လိုက်ရော"

"အဲ့ဒီနောက်မှာမှ ငါက လန်းစလော့ရဲ့ အကြီးဆုံးရှယ်ယာရှင်ဆိုတာ မတော်တဆသိသွားတာပဲ"

"မတော်တဆ ဟုတ်လား... အစ်ကိုကျန်းက ဘာလို့ ဒီလောက်တောင် ပေါ့ဆရတာလဲ။ မိသားစုထဲမှာ ဘယ်လောက်ပိုင်ဆိုင်မှု ရှိလဲဆိုတာ မသိဘူးလား"

အိုင်ရင်းက ကျန်းမုန့်လောင် သူ့ကို တစ်ဖက်လှည့်နှင့် ကြွားလုံးထုတ်နေသည်ဟု ခံစားလိုက်ရသည်။

"အင်း... ငါ တကယ်မသိဘူး"

ကျန်းမုန့်လောင်က ပေါ့ပေါ့ပါးပါးပင် ဆိုချေသည်။

"ငါသိတာက ငါတို့မှာ စကြဝဠာဘဏ်၊ စကြဝဠာမဟာမိတ်အဖွဲ့နဲ့ စကြဝဠာသိုင်းပညာရှင်အသင်းတွေမှာ ရှယ်ယာတွေရှိတယ်ဆိုတာပဲ။ ကျန်တာတွေကိုတော့ သေချာမကြည့်ရသေးဘူး"

"အဟွတ်.. အဟွတ်.. အဟွတ်"

အိုင်ရင်းခမျာ အိပ်မက်မက်နေသလားဟုပင် ထင်မှတ်သွားတော့သည်။ သူ စေတနာအရင်းခံပြီး ကူညီခဲ့မိသူက စကြဝဠာအဆင့် ထိပ်သီးပုဂ္ဂိုလ်တစ်ယောက် ဖြစ်နေလေသလား။

"အဲ့ဒီနောက်မှ ဒုတိယအကြီးဆုံးရှယ်ယာရှင်ကလည်း 'စတားဂေဇာ'တစ်စီး မှာထားတာနဲ့ တိုက်ဆိုင်သွားရော.. ငါက သူ့ကို ပေးဖို့ပြောလိုက်တော့ သူက ပိုက်ဆံမယူဘူးလို့ အတင်းငြင်းနေတာနဲ့ တစ်ပြားမှမကုန်ဘဲ ဒီယာဉ်ကို ရလိုက်တာပဲ"

"ကျွန်တော်ဖြင့် မနာလိုဖြစ်လွန်းလို့ သေချင်စော်နံသွားပြီ"

အိုင်ရင်းမှာ 'စတားဂေဇာ'ကို ချစ်ရသူတစ်ဦးကို ထိတွေ့နေသည့်အလား အသာအယာ ပွတ်သပ်ရင်း ဆိုလာသည်။

"ကျွန်တော့်မှာသာ ဒါမျိုးတစ်စီးရှိရင် ဒီနေရာမှာတင် ချက်ချင်းသေပစ်လိုက်ဖို့လည်း ဝန်မလေးဘူး"

"အဲ့ဒီလောက်အထိတော့ မလိုပါဘူး။ ဒီလိုစူပါအာကာသယာဉ်တွေက မင်းထင်သလောက်လည်း မကောင်းပါဘူးကွာ"

ကျန်းမုန့်လောင်က ဆိုပြန်သည်။

"ဥပမာတစ်ခုပြောရရင် ဒီကောင်ရဲ့ အပူချိန် ထိန်းညှိတဲ့စနစ်က သိပ်မကောင်းဘူး"

"မဖြစ်နိုင်တာ"

အိုင်ရင်းက အံ့ဩတကြီး ပြောလိုက်သည်။

"'စတားဂေဇာ'က ပုံသေသတ်မှတ်ထားတဲ့ အပူချိန်အတိုင်း ဒီဇိုင်းထုတ်ထားတာလေ။ အစ်ကိုကျန်း ကြယ်တစ်လုံးထဲကို ပျံဝင်သွားရင်တောင် ယာဉ်က ပျက်စီးမှာမဟုတ်သလို ထိန်းချုပ်ခန်းထဲက အပူချိန်ကလည်း ဘာမှပြောင်းလဲသွားမှာ မဟုတ်ဘူး"

"မနေ့ညက ငါ လန်းစလော့ရဲ့စမ်းသပ်နယ်မြေမှာ စမ်းကြည့်ခဲ့သေးတယ်"

ကျန်းမုန့်လောင်မှာ ဤကဲ့သို့သော ယာဉ်မျိုးကို တစ်ခါမှမမောင်းဖူးသဖြင့် အရင်ရင်းနှီးအောင် လုပ်ရသည်။ 'စတားဂေဇာ'၏ ပိုင်ရှင်အနေနှင့် သူ၏ သီးသန့်ဝန်ဆောင်မှုအဖွဲ့ကလည်း ရှိနေသည်မဟုတ်ပါလော။

"ပြောရဦးမယ်။ လန်းစလော့က အမျိုးသမီးဝန်ထမ်းတွေ ယာဉ်ပေါ်တက်လာတော့ သူတို့တွေ အရမ်းပူတယ်ဆိုပြီး အဝတ်အစားတွေ ချွတ်နေကြတာ။ မင်းပဲပြောကြည့်။ ဒါက လေအေးပေးစနစ်မကောင်းတာ မဟုတ်ဘူးလား"

"ဒါတင် မကသေးဘူး။ ယာဉ်ရဲ့ သန့်ရှင်းရေးကလည်း သိပ်မကောင်းဘူး။ သူတို့တွေအားလုံး ယားတယ်လို့ ညည်းနေကြတာ။ သေချာတယ်။ ဖုန်တွေပိုးမွှားတွေအပြည့်ရှိနေတာဖြစ်မယ်"

အိုင်ရင်း : "သူတို့ တကယ်ပူနေကြတာ သေချာလို့လား"

"ပြီးတော့ ဒီယာဉ်တွေက သိပ်ပြီးတော့လည်း သက်သောင့်သက်သာ မရှိဘူး"

ကျန်းမုန့်လောင်က ဆက်ပြောပြန်သည်။

"ဒါက သီးသန့်သုံးစူပါအာကာသယာဉ် တစ်စီးဆိုပေမယ့် ထူးခြားတဲ့ လုပ်ဆောင်ချက်တွေ မရှိသလို နေရာကလည်း နည်းနည်း ကျဉ်းတော့ တစ်ခါတလေကျရင် သိပ်ပြီး သက်သောင့်သက်သာ မရှိသလိုပဲ"

"အစ်ကိုကျန်း... အစ်ကိုသာ ဒီလို အာကာသယာဉ်မျိုးနဲ့ စကြဝဠာထဲမှာ လှည့်လည်သွားလာမယ်ဆိုရင် ယာဉ်က သက်သောင့်သက်သာမရှိရင်တောင်မှ တစ်ယောက်ယောက်က အစ်ကို့ကို သက်သောင့်သက်သာဖြစ်အောင် လုပ်ပေးလိမ့်မယ်လို့ ကျွန်တော်အာမခံရဲတယ်"

အိုင်ရင်းက နောက်ပြောင်လေဟန် အမူအရာဖြင့် ရယ်မောလျက် ဆက်ပြောသည်။

"အစ်ကို့ကို စကြဝဠာကိုဩဒိနိတ်တချို့ ပေးရမလား။ အဲ့ဒီနေရာတွေမှာ နတ်သူငယ်မျိုးနွယ်တွေ နတ်မိမယ်မျိုးနွယ်တွေလိုမျိုး ဆွဲဆောင်မှုရှိတဲ့မျိုးနွယ်စုတွေ စုဝေးနေကြတာ..."

"မင်း ဘာတွေပြောနေတာလဲ။ ငါ ဘာမှ နားမလည်တော့ဘူး"

ကျန်းမုန့်လောင်က အရှက်မရှိ ပြန်ပြောလိုက်သည်။

"ဟန်မဆောင်ပါနဲ့ဗျာ"

"ဟားဟားဟား"

"လူတွေ ထပ်ရောက်လာကြပြီထင်တယ်"

ကျန်းမုန့်လောင်သည် ယာဉ်၏အပြင်ဘက်တွင် လူများ ပြည့်နှက်နေပြီး 'စတားဂေဇာ'ကို ကိရိယာများဖြင့် အသည်းအသန် ရိုက်ကူးနေကြကြောင်း သတိပြုမိလိုက်သည်။

အမြွှာဝေလငါးစကြဝဠာအင်ပါယာတစ်ခုလုံးအတွက် ဤအရာမှာ သတင်းထူးကြီးတစ်ခု ဖြစ်ပေလိမ့်မည်။ အင်ပါယာ၏ဘုရင်ပင် 'စတားဂေဇာ'တစ်စီးကို ဝယ်နိုင်ရန်မှာ ခက်ခဲလှပေရာ ဤသည်မှာ သာမန်ကိစ္စမဟုတ်သည်မှာ သေချာလှသည်။

သူတို့နှစ်ယောက်သား တစ်ယောက်ကိုတစ်ယောက်ကြည့်ကာ အားမလိုအားမရဟန်ဖြင့် ရယ်မောလိုက်ကြသည်။

"မနက်ဖြန်ကျရင် ငါတို့နှစ်ယောက်စလုံး အမြွှာဝေလငါးမျိုးနွယ်စုရဲ့ ရေပန်းအစားဆုံး သတင်းစာရင်းထဲမှာ ထိပ်ဆုံးကနေ ပါလာတော့မယ်ထင်တယ်"

*****************

အခန်း ၈၃၀ - ကျွန်တော့်နာမည်က ဂျက်မားပါ

"အမြွှာဝေလငါး စကြာဝဠာအင်ပါယာမှာ စတားဂေဇာဝါသနာရှင်တွေအတွက် ပထမဆုံးသော သီးသန့်အဆင့်မြင့်ကိုယ်ပိုင်အာကာသယာဉ် ပေါ်လာပြီဟေ့"

"ဂလက်ဆီမျိုးနွယ်စုတွေထဲက အဆင့်သုံးနယ်မြေမှာရှိတဲ့ အိုင်ဇက်မျိုးနွယ်စုက အဆင့်နှစ်မျိုးနွယ်စုပဲ ရှိပါသေးတယ်။ ဒီလောက်များပြားတဲ့ ချမ်းသာကြွယ်ဝမှုကို ဘယ်သူကများ ပိုင်ဆိုင်ထားတာလဲ"

"ဒီအဆင့်မြင့်ကိုယ်ပိုင်အာကာသယာဉ်ရဲ့ အခြေခံစျေးနှုန်းက စကြာဝဠာဒင်္ဂါး ၈၈ထရီလီယံရှိပြီး အဆင့်ငါးမျိုးနွယ်စုတစ်ခုလုံးရဲ့ ပိုင်ဆိုင်မှုနီးပါး တန်ကြေးရှိတယ်တဲ့။ လောလောဆယ် အစီးရေနှစ်ရာကျော်ပဲ ရောင်းချရသေးတယ်။ ပိုင်ရှင်တွေအားလုံးကလည်း စကြာဝဠာထဲက နာမည်ကြီးလုပ်ငန်းရှင်တွေနဲ့ သိုင်းပညာရှင်တွေချည်းပဲ"

"အာကာသယာဉ်ပိုင်ရှင်ရဲ့ဓာတ်ပုံနဲ့ ဗီဒီယိုမှတ်တမ်းတွေကို တချို့လူတွေက ရိုက်ကူးနိုင်ခဲ့တယ်တဲ့။ လောလောဆယ် ဒီလူက ဘယ်သူဘယ်ဝါဆိုတာ မသိရသေးပေမဲ့ သူနဲ့အတူ ခရီးသွားနေသူကတော့ အိုင်ဇက်မျိုးနွယ်စုခေါင်းဆောင်ရဲ့ သားပဲ။ တလောတုန်းက အိုင်ဇက်မျိုးနွယ်စုအပါအဝင် အဆင့်နှစ်မျိုးနွယ်စုဆယ်ခုက ဒီလူရဲ့အမည်ပေါက်အောက်ကို ​ရောက်သွားတယ်လို့ တချို့က ဖွင့်ဟထားတယ်။ ဒီကိစ္စက အာကာသယာဉ်ပိုင်ရှင်နဲ့ ဆက်စပ်နေတယ်လို့လည်း သံသယရှိနေကြတယ်"

"အိုင်ဇက်မျိုးနွယ်စုနယ်မြေထဲမှာ အမြွှာဝေလငါးအာကာသနိုင်ငံတော်ရဲ့ ရေယာဉ်တပ်စုကိုလည်း တွေ့ခဲ့သေးတယ်တဲ့"

"အိုင်ဇက်မျိုးနွယ်စုမှာ အဆင့်ခြောက်သက်ရှိနှစ်ဦး ပေါ်ထွက်လာတယ်တဲ့။ ဒီမျိုးနွယ်စုမှာ ဘာတွေများဖြစ်ပျက်နေတာလဲ"

အဆင့်မြင့်အာကာသယာဉ်ကြီး ပေါ်ထွက်လာပြီး တစ်နာရီမပြည့်ခင်မှာပင် အိုင်ဇက်မျိုးနွယ်စုတစ်ခုလုံး သတင်းများ ပွက်လောရိုက်သွားသလို အမြွှာဝေလငါးစကြာဝဠာအင်ပါယာ၏ မီဒီယာများအထိပါ တုန်လှုပ်သွားခဲ့သည်။

ဤသည်မှာ ရှောင်လွှဲ၍ မရနိုင်ပေ။ အင်အားကြီးနိုင်ငံတစ်ခု၏ သမ္မတက နိုင်ငံငယ်လေးတစ်ခုကို လာလည်သလိုပင်။ သူတို့၏ကိုယ်ပိုင်အာကာသယာဉ်မှာ စကြာဝဠာအင်ပါယာတစ်ခု၏ အရှင်သခင်က သူပိုင်သမျှ အကုန်ရောင်းလျှင်ပင် ဝယ်နိုင်မည်မဟုတ်သောအရာမျိုး ဖြစ်နေသောကြောင့် ဟိုးလေးတကျော်ကျော် မဖြစ်ဘဲ ဘယ်နေမည်နည်း။

အမြွှာဝေလငါးစကြာဝဠာအင်ပါယာ၏ အရှင်သခင်ကိုယ်တိုင်ပင် လျှို့ဝှက်ဆန်းကြယ်လှသော ဤဝယ်ယူသူမှာ မည်သူဖြစ်ကြောင်း အလွန်စိတ်ဝင်စားနေခဲ့သည်။

ခဏတွင်းချင်းမှာပင် အမြွှာဝေလငါးစကြာဝဠာအင်ပါယာအောက်ရှိ မျိုးနွယ်စုအသီးသီးမှာ အိုင်ဇက်မျိုးနွယ်စုဆီသို့ အလုအယက်ရောက်လာကြသလို ဘေးပတ်ဝန်းကျင်ရှိ စကြာဝဠာအင်ပါယာအချို့ကလူများပါ အုတ်အော်သောင်းနင်း ဖြစ်ကုန်ကြသည်။

အမြွှာဝေလငါးစကြာဝဠာအင်ပါယာ၏ နယ်စားများသာမက သူတို့၏ဘုရင်ကိုယ်တိုင်ပင် ဤအာကာသယာဉ်ကို မဝယ်နိုင်ပေ။ ဆင်းရဲသားတစ်သိုက်ကတော့ အမြင်ကျယ်အောင် လာကြည့်သင့်သည်။

သို့သော် ထိုအချိန်မှာမူ ကျန်းမုန့်လောင်နှင့် အိုင်းရင်းတို့မှာ ပစ္စည်းသိမ်းပြီး အိုင်ဇက်မျိုးနွယ်စုက ထွက်ခွာသွားကြလေပြီ။ သူတို့သည် လူအများ၏အာရုံစိုက်မှုကို ခံနေရပြီဖြစ်ရာ ဤနေရာတွင်ဆက်နေပြီး နောက်ထပ်ပြဿနာများ မတက်ချင်တော့ပေ။

"ဘဝမှာ ကျွန်တော့်နာမည်က ကျွန်တော်တို့အမြွှာဝေလငါးစကြာဝဠာအင်ပါယာရဲ့ နံပါတ်တစ်မီဒီယာမှာ ပါလာလိမ့်မယ်လို့ တစ်ခါမှ မတွေးဖူးဘူး"

အိုင်ဇက်က အင်တာနက်ပေါ်ရှိ သတင်းများကို စိတ်လှုပ်ရှားစွာ ဖတ်နေပေသည်။ သူ့အတွက်တော့ ဤအရာမှာ ဘိုးဘေးဘီဘင်များအတွက်ပါ ဂုဏ်တက်စေသော ကိစ္စမျိုးပင်။

"အခုလောလောဆယ်တော့ မင်း ပျော်နေလို့ရသေးတာပေါ့"

ကျန်းမုန့်လောင်က ရယ်မောရင်း ပြောလိုက်သည်။

"မင်း အိမ်ပြန်ရောက်တဲ့အခါကျရင်တော့ ဒုက္ခတွေအပုံလိုက်ကြီး မင်းကို စောင့်နေလိမ့်မယ်"

ကမ္ဘာပေါ်တွင် သတင်းထောက်များနှင့် နောက်ယောင်ခံလိုက်သော ပရိတ်သတ်များက ဘယ်လောက်စိတ်ပျက်ဖို့ကောင်းကြောင်း ကျန်းမုန့်လောင်သိသည်။ စကြာဝဠာအဆင့်မျိုးနွယ်စုများထဲတွင် ထိုလူများနှင့် အဖွဲ့အစည်းများမှာ ပိုဆိုးရွားလာလိမ့်မည်ဟု သူ ခန့်မှန်းမိသည်။

"အနာဂတ်အကြောင်းကတော့ နောက်မှပဲ ပြောတာပေါ့"

အိုင်းရင်းကမူ ဘာမှဂရုမစိုက်လေဟန်ဖြင့် ပြောလိုက်သည်။ သူသည် အာကာသယာဉ်၏အပြင်ဘက်ရှိ ရှုခင်းများကို ကြည့်လိုက်၏။

"E4အဆင့် အမြန်နှုန်းက အရမ်းအားရတာပဲ။ ဒီအရှိန်နဲ့ဆိုရင် စတားရှာ့ခ်စကြာဝဠာအင်ပါယာကို သုံးရက်မပြည့်ခင်မှာတင် ရောက်နိုင်တယ်"

"ဒါနဲ့ ဒီကုန်စည်ပြပွဲမှာ လိုက်နာရမယ့် စည်းကမ်းတွေ ဒါမှမဟုတ် ရှောင်ကြဉ်ရမယ့်အရာတွေ ရှိလား"

ကျန်းမုန့်လောင်က ရုတ်တရက် တစ်စုံတစ်ခုကို သတိရသွားသည်။

"ဒါက တရားမဝင် မှောင်ခိုစျေးကွက်ဆိုတော့ မရိုးသားတဲ့ကိစ္စတွေ ဖြစ်လာနိုင်မလား။ ဥပမာ သစ္စာဖောက်တာမျိုး ဒါမှမဟုတ် မရိုးသားတဲ့နည်းလမ်းတွေ သုံးတာမျိုးတွေပေါ့"

"သေချာပေါက် ရှိတာပေါ့"

အိုင်းရင်းက ဆို၏။

"ဒီကုန်စည်ပြပွဲက ဒုစရိုက်လောကတစ်ခုပဲ။ အတွင်းထဲက အေးချမ်းတဲ့လေထုကို ကြည့်ပြီး အရူးအဖြစ်မခံနဲ့။ ပြပွဲကနေ ထွက်လိုက်တာနဲ့ လူသတ်တာ၊ လုယက်တာတွေက နေရာတိုင်းမှာရှိနေတာ။ လေလံပွဲမှာ ပစ္စည်းတစ်ခုကို စျေးကြီးပေးပြီး အနိုင်ရခဲ့ရင်တောင် အစ်ကိုကျန်းကို ကာကွယ်ပေးမယ့်လူမရှိရင် ဒုက္ခရောက်မှာပဲ"

"ဒါပေမဲ့ ရပါတယ်။ ဒီလိုနေရာမျိုးမှာ လူတော်တော်များများက နောက်ပိုင်း တခြားလူတွေဆီက ဒုက္ခပေးတာမျိုးမခံရအောင် သူတို့ရဲ့ကိုယ်ရေးအချက်အလက်တွေကို ဖုံးကွယ်ဖို့ နည်းမျိုးစုံသုံးကြတယ်"

အိုင်းရင်းက ပစ္စည်းတစ်ခုကို ထုတ်လိုက်သည်။

"အစ်ကိုကျန်းကို မှော်ဝင်ပစ္စည်းတစ်ခု ပြမယ်"

"ဒါက မျက်နှာဖုံးမဟုတ်ဘူးလား"

"ဒါက သာမန်မျက်နှာဖုံး မဟုတ်ဘူး"

အိုင်းရင်းက ရှင်းပြလိုက်သည်။

"ပုံမှန်ဆိုရင် ကျွန်တော်တို့က လူတစ်ယောက်ကိုခွဲခြားဖို့ သူ့ရဲ့စွမ်းအင်လှိုင်းကို အားကိုးကြတာ။ ဒါပေမဲ့ ဒီဟာကိုတပ်လိုက်တာနဲ့ အစ်ကိုကျန်းရဲ့စွမ်းအင်လှိုင်းက အမြဲပြောင်းလဲနေမှာ။ အဲ့ဒါကြောင့် တစ်ယောက်ယောက်ကို အပြစ်ပြုမိရင်တောင် အစ်ကိုကျန်းကို လွယ်လွယ်နဲ့ မှတ်မိမှာမဟုတ်ဘူး"

"စိတ်ဝင်စားစရာပဲ"

ကျန်းမုန့်လောင်က ထိုပစ္စည်းကို ယူကြည့်လိုက်သည်။

"တစ်ခုတည်းလား"

"ဟီးဟီး... အစ်ကိုကျန်းနဲ့ဆုံမယ်လို့ ကြိုမသိထားတော့ တစ်ခုပဲမှာထားမိတာ။ အစကတော့ တခြားသူငယ်ချင်းတစ်ယောက်ကို ခေါ်လာဖို့ စီစဉ်ထားတာလေ"

အိုင်းရင်းက ဆို၏။

"ရိုးရိုးရှင်းရှင်းပုံစံကိုကြည့်ပြီး အထင်မသေးလိုက်နဲ့။ ဒါကိုမှာဖို့ ခြောက်လကြိုတင်ပြီး ရက်ချိန်းထားရတာ"

"ကျစ်... ငါကတော့ မဝယ်နိုင်ဘူးဆိုတာ မယုံဘူး"

ကျန်းမုန့်လောင်က စကြာဝဠာစူပါမားကတ်ကို ဖွင့်လိုက်သည်။ ထိုနေရာတွင် ဝယ်မရနိုင်သော အရာဟူ၍ မရှိသလောက်ပင်။

"ဟားဟားဟား... ရှာမနေနဲ့။ ဝယ်လို့ရမှာမဟုတ်ဘူး"

အိုင်းရင်းက ဂုဏ်ယူဝင့်ကြွားစွာ ပြောလိုက်သည်။

"ဒါက နည်းပညာမြင့်ထုတ်ကုန် မဟုတ်ဘူး။ သိုင်းလက်နက်တွေဖန်တီးတဲ့ လက်မှုပညာနဲ့ လုပ်ထားတာ။ ကျွန်တော်တို့ ဂလက်ဆီမျိုးနွယ်စုတစ်ခုလုံးမှာ ဒီလိုအရည်အချင်းမျိုးရှိတဲ့ အဂ္ဂိရတ်ပညာရှင်ဆိုလို့ တစ်ယောက်ပဲ ရှိတာ"

"ဒါပေမဲ့ စိတ်မပူပါနဲ့"

အိုင်းရင်းက ထပ်ပြောလိုက်၏။

"ကုန်စည်ပြပွဲတိုင်းမှာ ဒီလိုပစ္စည်းမျိုးတွေ လာရောင်းတဲ့ အဂ္ဂိရတ်ပညာရှင်တွေ ရှိတယ်လို့ ကြားဖူးတယ်။ တချို့ကတော့ ပိုက်ဆံရှာဖို့ လာကြတာ။ တချို့ကတော့ သူတို့ကို အရင်းအမြစ်တွေ ထောက်ပံ့ပေးမယ့် မျိုးနွယ်စုကြီးတွေကို ရှာဖို့လာကြတာ။ သူတို့က များသောအားဖြင့် အဆင့်သုံး ဒါမှမဟုတ် အဆင့်လေး အဂ္ဂိရတ်ပညာရှင်တွေပါပဲ"

"ဒီလောက်အဆင့်နိမ့်တဲ့ အဂ္ဂိရတ်ပညာရှင်လား"

ကျန်းမုန့်လောင်က သူ့ကို အထင်သေးလေဟန်အကြည့်ဖြင့် ကြည့်လိုက်သည်။

"ဒါဆိုရင်တော့ ဒီကုန်စည်ပြပွဲက အကြီးကြီးမဟုတ်တဲ့ပုံပဲ"

"အစ်ကိုကျန်း နားမလည်ပါဘူး"

အိုင်းရင်းက ရှင်းပြလိုက်သည်။

"အဂ္ဂိရတ်ပညာရှင်ဆိုတာ အရမ်းမြင့်မြတ်တဲ့ အသက်မွေးဝမ်းကြောင်းတစ်ခုဗျ။ အဆင့်ငါး ဒါမှမဟုတ် အဆင့်ခြောက်ရှိတဲ့ အရှင်သခင်တွေတောင် သူတို့ကို ဘိုးဘေးတွေလို ဆက်ဆံကြရတာ။ သူတို့လိုချင်တာကို ဝယ်နေစရာတောင် မလိုဘူး။ စကားတစ်ခွန်းဟလိုက်ရုံပဲ။ မရေမတွက်နိုင်တဲ့လူတွေက အလုအယက်တောင် လာပေးကြမှာ"

"တော်တော်ရေပန်းစားတာပဲ"

ကျန်းမုန့်လောင်လည်း တစ်ကိုယ်တည်း ခပ်တိုးတိုးရေရွတ်လိုက်သည်။

သူ့ဆရာအိုယဲ့ကျီဆီက သင်ထားသော အဂ္ဂိရတ်ပညာမှာ ဤစကြာဝဠာမျိုးနွယ်စုထဲတွင် ဘယ်အဆင့်လောက်ရှိမလဲဆိုသည်ကို သူ စဉ်းစားနေမိသည်။

"ဒါပေမဲ့ ပြပွဲကျင်းပတဲ့နေရာမှာ ဒီလိုမျက်နှာဖုံးမျိုးရဲ့စျေးနှုန်းက ငါးဆခြောက်ဆ ဒါမှမဟုတ် ဆယ်ဆလောက်အထိ တက်သွားနိုင်တယ်။ အဲ့ဒါကြောင့် ကြိုတင်ပြင်ဆင်ထားဖို့တော့ လိုမယ်"

"ငါ့မှာ ပိုက်ဆံမရှားပါဘူး"

ကျန်းမုန့်လောင်က ပြောလိုက်၏။ သူသည် စုတ်ပြတ်သတ်နေသော ဤမျက်နှာဖုံးကို လုံးဝအလေးမထားပါချေ။

"ဒါပေမဲ့ မင်းရဲ့ဒီဟာက တော်တော်ရုပ်ဆိုးတာပဲ။ ဒီထက်ပိုပြီး ဆန်းဆန်းပြားပြားပုံစံလေးတွေ မရှိဘူးလား"

"ဒါကိုရတာတောင် ကံကောင်းလှပြီ။ အစ်ကိုကျန်းကတော့ တော်တော်လောဘကြီးတာပဲ"

အိုင်းရင်းက ညည်းညူလိုက်ချေသည်။

အာကာသယာဉ်မှာ မြန်မြန်ဆန်ဆန် ပျံသန်းနေလေသည်။ ကျန်းမုန့်လောင်နှင့် အိုင်းရင်းတို့မှာ နှစ်ရက်ခန့် ဂိမ်းကစားပြီးနောက် စတားရှာ့ခ်စကြာဝဠာအင်ပါယာနယ်မြေထဲသို့ ရောက်လာပြီဖြစ်ကြောင်း အာကာသယာဉ်၏စနစ်က အကြောင်းကြားလာသည်။

ဤတစ်ကြိမ်မှာတော့ ပွဲစီစဉ်သူများမှာ စတားရှာ့ခ်စကြာဝဠာအင်ပါယာ၏ အစွန်အဖျားရှန လူသူကင်းသော နယ်မြေတစ်ခုကို ငှားရမ်းထားသည်။ သို့သော် ပွဲစီစဉ်သူများမှာ အင်အားကြီးလှသော အဆင့်ငါးမျိုးနွယ်စုတစ်ခု ဖြစ်သောကြောင့် သူတို့သာအလိုရှိလျှင် ဆိုးရွားလွန်းသော ဂြိုဟ်တစ်လုံးကိုပင် နေချင်စဖွယ်နေရာတစ်ခုဖြစ်အောင် ခဏတွင်းချင်း ပြောင်းလဲပစ်နိုင်သည်။

ဤနယ်မြေတစ်ခုလုံးမှာ ဂြိုဟ်ပေါင်း သောင်းဂဏန်းခန့် ရှိလိမ့်မည်ဟု ခန့်မှန်းရပြီး အကုန်လုံးနီးပါးကလည်း ဂျူပီတာဂြိုဟ်အရွယ်အစားခန့်ရှိ၏။ နယ်မြေ၏အလယ်ဗဟိုတွင်မူ ကြီးမားလှသော လူလုပ်ကြယ်ကြီးတစ်လုံးရှိပြီး ဤဂြိုဟ်သောင်းဂဏန်းမှာ ထိုကြယ်ကြီးကို ဗဟိုပြုပြီး အလွန်ညီညွတ်သောနှုန်းထားဖြင့် ဖြည်းဖြည်းချင်း လှည့်ပတ်နေကြသည်။

"ဒါဟာ သိပ္ပံပညာရဲ့ အထွတ်အထိပ်ပါလား"

ကျန်းမုန့်လောင်က အံ့ဩတကြီး ရေရွတ်လိုက်သည်။ ကမ္ဘာသူကမ္ဘာသားများအတွက်တော့ ဤသည်မှာ အိပ်မက်ပင်မမက်ရဲသော အရာမျိုးပင်။

"ဒါက အထင်ကြီးစရာလား"

အိုင်းရင်းက ဆိုလေသည်။

"ဂြိုဟ်တွေကိုရွှေ့တာက အဆင့်နှစ်မျိုးနွယ်စုတောင် လုပ်နိုင်တာပဲ။ လူလုပ်ကြယ်တွေ ဖန်တီးတာကတော့ အဆင့်လေးမျိုးနွယ်စုတိုင်းလုပ်နိုင်တဲ့ သာမန်ကိစ္စလေးပါ"

"ဒါကို သေချာမှတ်ထား။ ငါက အဆင့်တစ်မျိုးနွယ်စုက လာတာ။ အဲဒါကြောင့် ဒါက ငါ့အတွက် တော်တော်အံ့ဩစရာကောင်းနေတာ ဟုတ်ပြီလား"

ကျန်းမုန့်လောင်က မျက်လုံးလှန်ပြီး ပြောလိုက်သည်။

ကုန်စည်ပြပွဲက တရားဝင် မစတင်သေးသော်ငြား စကြာဝဠာအရပ်ရပ်က လာရောက်ကြသူများမှာ တစ်ယောက်ပြီးတစ်ယောက် ရောက်လာနေကြသဖြင့် ပြပွဲဝင်ပေါက်တွင် အာကာသယာဉ်များဖြင့် ပိတ်ဆို့နေလေသည်။

ထိုအချိန်မှာ ကျန်းမုန့်လောင်ကတော့ သူ့ဝီချက်မှာ တစ်ခုခုတင်ချင်လာသည်။

"မင်းတို့ကတော့ ယုံမှာမဟုတ်ပေမဲ့ ငါ အခု အာကာသထဲမှာ အာကာသယာဉ်မောင်းရင်း ယာဉ်ကြောပိတ်ဆို့မှုကြောင့် ပိတ်မိနေတယ်"ဟုပင်။

"သောက်ကျိုးနည်း... စတားဂေဇာအဆင့်မြင့်အာကာသယာဉ်ကြီးပါလား"

"ဒီသူဌေးကြီးက ဘယ်သူလဲဟ"

"အရမ်းလန်းတာပဲ"

လာရောက်သူများမှာ စကြာဝဠာအရပ်ရပ်ကဖြစ်ပြီး အများစုကလည်း အလွန်အမင်းချမ်းသာကြွယ်ဝသူများ ဖြစ်သော်ငြား ဤစတားဂေဇာကိုတော့ မနာလိုအားကျလေဟန် အကြည့်များဖြင့် ကြည့်နေကြသည်။

"မင်္ဂလာပါ။ အာကာသယာဉ်ကို ဒီမှာပါကင်ထိုးပေးပါ။ ပြပွဲထဲမှာတော့ အာကာသယာဉ်တွေကို မောင်းနှင်ခွင့်မပြုပါဘူး"

လက်မှတ်များကို စစ်ဆေးပြီးနောက် သူတို့နှစ်ယောက်သား အာကာသယာဉ်ဆိပ်ကမ်းကြီးတစ်ခုထဲသို့ ဝင်လာခဲ့လိုက်သည်။

ဝန်ထမ်းမှာ အလွန်ချောမောလှပသော မိန်းကလေးတစ်ဦးဖြစ်ပြီး အိုင်းရင်းကလည်း ဤသည်မှာ နတ်သူငယ်များနှယ် အလှအပကို အထူးတန်ဖိုးထားသော မျိုးနွယ်စုဖြစ်ကြောင်း ကျန်းမုန့်လောင်ကို ပြောပြလေသည်။

အာကာသယာဉ်ကို အထင်ကြီးသွားဟန်တူသည့် ထိုမိန်းကလေးက သူတို့နှစ်ယောက်ကို ကလူကျီစယ်နေချေသည်။

"ဒီနေရာက အကြီးကြီးပဲ။ အာကာသယာဉ် မရှိဘဲနဲ့ ဘယ်လိုသွားလာကြမလဲ"

"စိတ်မပူပါနဲ့။ ဂြိုဟ်တိုင်းမှာ ကူးပြောင်းရေးစခန်းတွေ ထားပေးထားပါတယ်။ ဂြိုဟ်တိုင်းမှာ မြန်နှုန်းမြင့်အများသုံးသယ်ယူပို့ဆောင်ရေးတွေလည်း ရှိပါတယ်။ သီအိုရီအရတော့ ပြပွဲရဲ့ဘယ်နေရာကိုမဆို နာရီဝက်အတွင်း ရောက်နိုင်တယ်"

"ကျစ် ကျစ်... သူတို့ တကယ်အကုန်အကျခံထားတာပဲ"

ကျန်းမုန့်လောင်က မှတ်ချက်ပေးလိုက်သည်။

"အခု ရှင်တို့နှစ်ယောက်အတွက် နာမည်ကတ်တွေ လုပ်ပေးပါ့မယ်။ နာမည်လေးတွေ သိပါရစေ"

"ကျွန်တော့်နာမည်က အီဘတ်ပါ"

အိုင်းရင်းက ပြောလိုက်လေသည်။

"ဘာဖြစ်တာလဲ။ ဒါက မင်းရဲ့ နာမည်ပြောင်လား"

"ရှူး..."

အိုင်းရင်းက တိုးတိုးလေး ပြောလိုက်၏။

"ဒီမှာ နာမည်အစစ်နဲ့ စာရင်းသွင်းစရာမလိုဘူး။ လူကို အရှင်လတ်လတ် ဝါးစားမယ့် ဒီလိုနေရာမျိုးမှာ ဘယ်သူက နာမည်အစစ် သုံးမှာလဲ။ အကုန်လုံးက အချက်အလက်အတုတွေပဲ သုံးကြတာ"

"ဒါလည်း ဟုတ်တာပဲ"

ကျန်းမုန့်လောင်က ခေါင်းညိတ်ပြလိုက်၏။

"မင်္ဂလာပါ။ ကျွန်တော့်နာမည်က ဂျက်မားပါ"

****************

အခန်း ၈၃၁ - မင်းတို့ကို ငါ အထင်မသေးပါဘူး

"ဂျက်မားဆိုတာ ဘာကိုပြောတာလဲ"

အိုင်ရင်းက သိလိုစိတ်ဖြင့် မေးလိုက်သည်။

"ကြားရတာ တော်တော်လန်းမယ့်ပုံပဲ"

"ဒါဆို မင်းရဲ့ရီပုခဲ့ကရော ဘယ်မှာလဲ"

ကျန်းမုန့်လောင်က ပြန်လည်ချေပလိုက်သည်။

"ကျွန်တော်တို့အိုင်ဇက်မျိုးနွယ်စုရဲ့ ဘာသာစကားမှာတော့ ရီပုခဲ့ဆိုတာက ကံကောင်းခြင်းရဲ့ သင်္ကေတလေ။ ကျွန်တော့်ရဲ့ ဂိမ်းအကောင့်နာမည်တွေအားလုံးက အဲ့ဒါပဲ"

"ဪ... ငါတို့မျိုးနွယ်စုမှာတော့ ဂျက်မားဆိုတာ ချမ်းသာကြွယ်ဝမှုရဲ့ သင်္ကေတပဲ... ဘယ်လောက်တောင် ချမ်းသာလဲဆိုရင် ပိုက်ဆံကိုတောင် စိတ်မဝင်စားတော့တဲ့ အဆင့်မျိုးပေါ့"

.....

"လူကြီးမင်းတို့ခင်ဗျာ လူကြီးမင်းတို့ရဲ့ အထောက်အထားကတ်တွေ အဆင်သင့်ဖြစ်ပါပြီ"

ဝန်ထမ်းက သူတို့ထံသို့ ချစ်ပ်ပြားအသေးလေးတစ်ခု ကမ်းပေးလိုက်သည်။

"ပြပွဲထဲက ဘယ်အဆောက်အအုံကိုမဆို အသုံးပြုချင်တယ်ဆိုရင် ဒီကတ်ကို ပြလိုက်ရုံပါပဲ။ အများသုံးအဆောက်အအုံတွေအတွက် အခကြေးငွေထပ်မံပေးဆောင်စရာ မလိုပါဘူး။ အခကြေးငွေအားလုံးက လက်မှတ်ခထဲမှာ ပါဝင်ပြီးသားပါ"

"ကျေးဇူး"

သူတို့နှစ်ယောက်သား အထောက်အထားကတ်ကိုယူပြီး အချက်အလက်များကို သူတို့၏ ဉာဏ်ရည်တုစနစ်အတွင်းသို့ ထည့်သွင်းလိုက်ကြသည်။

"ဒီအာကာသယာဉ်က ဘယ်သူပိုင်တာလဲဗျ.. ယာဉ်ရပ်နားခနဲ့ ပြုပြင်ထိန်းသိမ်းခအတွက် စကြဝဠာဒင်္ဂါးပြားတစ်ရာပေးဆောင်ရပါမယ်"

"အရမ်းဈေးကြီးတာပဲ"

စကြဝဠာဒင်္ဂါးပြားတစ်ရာဆိုသည်မှာ များလွန်းလှသည်မဟုတ်သော်ငြား အိုင်ဇက်မျိုးနွယ်စု၏ ကုန်ဈေးနှုန်းနှင့် နှိုင်းယှဉ်လျှင်မူ ဤဈေးနှုန်းမှာ ဓားပြတိုက်နေသည်နှင့်ပင် တူလှသည်။

"ဒါကြောင့်လည်း ပုံမှန်ဆိုရင် သူဌေးတွေပဲ ဒီပြပွဲကို လာကြတာလေ"

အိုင်ရင်းက ရယ်မောလျက် ဆိုလာလေသည်။

"အစ်ကိုကျန်းသာ ကျွန်တော်နဲ့အတူ မပါလာဘူးဆိုရင် ကျွန်တော် ဒီကိုလာဖို့ သတ္တိရှိမှာ မဟုတ်ဘူး။ လာဖြစ်ခဲ့ရင်တောင် အများသုံးသယ်ယူပို့ဆောင်ရေးယာဉ်နဲ့ပဲ လာရမှာ"

"လူကြီးမင်း..လူကြီးမင်းက အရမ်းချမ်းသာတာပဲ။ ဒါက လန်းစလော့ကုမ္ပဏီကထုတ်တဲ့ စတားဂေဇာ မဟုတ်လား"

ဝန်ထမ်းက ငွေပေးချေမှုကို ဆောင်ရွက်ပေးရင်း မေးလိုက်၏။

"အမှန်အတိုင်းပြောရရင် ငါက ပိုက်ဆံကို သိပ်စိတ်မဝင်စားပါဘူး"

ကျန်းမုန့်လောင်က ပုခုံးတွန့်ပြ၍ ပြန်ဖြေလိုက်သည်။

"ငါကိုယ်တိုင် ပိုက်ဆံကိုင်တာတောင် တော်တော်ရှားတယ်"

"ဟဲဟဲ... လူကြီးမင်းက အရမ်းစိတ်ဝင်စားဖို့ကောင်းတာပဲ"

ဝန်ထမ်းက လုပ်ငန်းစဉ်များကို အပြီးသတ်ပေးလိုက်သည်။

"အားလုံးပြီးပါပြီ.. ပြပွဲရဲ့ အချက်အလက်တွေကို အထောက်အထားကတ်ထဲမှာ ကြည့်ရှုနိုင်ပါတယ်။ ဒါကတော့ ကျွန်မရဲ့ဆက်သွယ်ရန်လိပ်စာပါ။ တကယ်လို့ လိုအပ်တာတစ်ခုခုရှိရင် အချိန်မရွေးဆက်သွယ်လို့ရပါတယ်"

ပြောပြီးသည်နှင့် ထိုမိန်းကလေးက ကျန်းမုန့်လောင်ကို လျှာထုတ်ပြ၍ စနောက်သွားသည်။

"အစ်ကိုကျန်း... ကျွန်တော်ကြည့်ရသလောက်တော့ အဲ့ဒီကောင်မလေးက အစ်ကို့ကို သဘောကျနေတာ သေချာတယ်"

"ငါကလည်း ငယ်ငယ်ရွယ်ရွယ်နဲ့ အရမ်းချမ်းသာနေတော့ အခက်သား"

"ဟားဟားဟား တကယ်လို့ ညဘက်မှာ အထီးကျန်တယ်လို့ ခံစားရရင် ဖျော်ဖြေဖို့ တစ်ခုခုရှာလို့ရပါတယ်"

အိုင်ရင်းက ရယ်မောလျက် ဆိုလေ၏။

"မျိုးနွယ်စုတော်တော်များများမှာ ဒီလိုလုပ်ငန်းတွေက တရားဝင်တယ်လေ။ အထူးသဖြင့် ဒီလိုအဆင့်မြင့်ပြပွဲမျိုးမှာပေါ့။ အစ်ကို့မှာ ပိုက်ဆံရှိသရွေ့ ဘယ်မျိုးနွယ်စုက မိန်းကလေးကိုမဆို ရှာလို့ရတယ်။ အုပ်စုလိုက်ဖျော်ဖြေမှုတွေတောင် ဖြစ်နိုင်တယ်"

"တော်ပါပြီ။ ငါ့ရည်းစားသိရင် ငါ့ကို သတ်လိမ့်မယ်"

ကျန်းမုန့်လောင်တွင် ထိုသို့သော အတွေးမျိုး ရှိသော်လည်း လုပ်ရဲသည့်သတ္တိမူ မရှိပေ။

"ရည်းစားလား။ အဲ့ဒါက ဘယ်လိုသက်ရှိမျိုးလဲ"

အိုင်ဇက်မျိုးနွယ်စုတွင် 'ရည်းစား'ဟူသည့် အယူအဆမျိုး မရှိပေ။

"ငါတို့မျိုးနွယ်စုမှာတော့ အရမ်းကြောက်စရာကောင်းတဲ့ သက်ရှိတစ်မျိုးပေါ့"

ကျန်းမုန့်လောင်က ဆိုသည်။

"သူတို့က အရေအတွက်လည်း အရမ်းများသလို စိတ်နေစိတ်ထားကလည်း လုံးဝခန့်မှန်းလို့မရဘူး။ ဒေါသပေါက်ကွဲလာပြီဆိုရင် သူတို့ရဲ့တိုက်ခိုက်နိုင်စွမ်းက ကြောက်စရာကောင်းတယ်။ သူတို့ရဲ့စိတ်ခံစားချက်ကို ထိန်းညှိဖို့ဆိုရင် 'အိတ်'လို့ခေါ်တဲ့ ရတနာတစ်မျိုးကို သုံးပေးရတယ်"

"အဲ့ဒီလောက်တောင် ကြောက်စရာကောင်းတာလား"

အိုင်ရင်းမှာ ကျန်းမုန့်လောင်၏ ပြက်လုံးကြောင့် လုံးဝကြောင်အသွားချေသည်။

"ဒါဆို အစ်ကိုတို့မျိုးနွယ်စုက ဘယ်လိုမျိုး အသက်ရှင်အောင် ရှင်သန်နေကြတာလဲ"

ကျန်းမုန့်လောင်သည် လွန်ခဲ့သည့်ရက်ပိုင်းက အဆင့်ခြောက်သက်ရှိ၏ အင်အားကို ပြသခဲ့ပြီး အလွန်အစွမ်းထက်သော လက်နက်တစ်ခုကို အသုံးပြု၍ အခြားအဆင့်ခြောက်သက်ရှိတစ်ဦးကိုပင် အနိုင်ယူပစ်လုနီးပါးပင်။

အိုင်ရင်း၏ခန့်မှန်းချက်အရ ကျန်းမုန့်လောင်၏အစွမ်းမှာ အနည်းဆုံး အဆင့်ခုနစ်ရှိရမည်ဖြစ်၏။

ထိုကဲ့သို့သော လူတစ်ယောက်က 'အသတ်ခံရမည်'ကို ကြောက်နေရလေသလော။

'ဒါဟာ နည်းပညာပိုင်းမှာ နိမ့်ကျပေမဲ့ သက်ရှိအဆင့်အတန်းမှာတော့ အရမ်းမြင့်မားတဲ့ဂြိုဟ်တစ်လုံးပဲ ဖြစ်ရမယ်'

အိုင်ရင်းက စိတ်ထဲမှ မှတ်ချက်ချလိုက်သည်။

စကြဝဠာမျိုးနွယ်စုများအတွင်း ဤကဲ့သို့သော ထူးခြားချက်များ ရှိတတ်သည်။ အချို့မျိုးနွယ်စုများကို ရှာဖွေတွေ့ရှိသည့်အခါ ၎င်းတို့မှာ ကျောက်ခေတ်ဦးကာလတွင်သာ ရှိနေသေးသော်လည်း နယ်ချဲ့သူများက ထိုဂြိုဟ်များကို သိမ်းပိုက်ရန် ကြိုးစားသောအခါ ဒေသခံများ၏ ပြန်လည်တိုက်ခိုက်မှုကြောင့် အထိနာခဲ့ကြရဖူးသည်။

"ဒီ'ရည်းစား'လို့ခေါ်တဲ့ သက်ရှိတွေမှာ လတိုင်း အားနည်းတဲ့ရက်တွေ ရှိတတ်တယ်။ ငါတို့က အဲ့ဒီအချိန်ကို အခွင့်ကောင်းယူပြီး ပြန်လည်တိုက်ခိုက်ရင်း အင်အားဖြည့်တင်းရင်းနဲ့ ဒီနေ့အထိ ရှင်သန်လာခဲ့ကြတာပေါ့"

"အရမ်းကြောက်စရာကောင်းတာပဲ။ အခွင့်အရေးရရင် အဲ့ဒီသက်ရှိကို သေချာပေါက် ကြည့်ချင်သေးတယ်"

ကျန်းမုန့်လောင်ကို သတ်ပစ်နိုင်သည့် သက်ရှိအပေါ် အိုင်ရင်း အလွန်စိတ်ဝင်စားသွားသည်။

'ဒီအိုင်ရင်းက နည်းနည်းတော့ တုံးအအနိုင်တာလားပဲ'

အထူးလေ့ကျင့်ထားသော ကျန်းမုန့်လောင်သည် ရယ်ချင်စိတ်ပြင်းပြင်းပြပြမဖြစ်လျှင် ပုံမှန်အားဖြင့် ရယ်မောလေ့မရှိပေ။

သူသည် မတူညီသော မျိုးနွယ်စုများကြားရှိ ယဉ်ကျေးမှုနှင့် အတွေးအခေါ်ကွာခြားချက်များမှာ ကြီးမားလှကြောင်း သိထားသည်။ သိပ္ပံစိတ်ကူးယဉ်ဝတ္ထုများထဲရှိ ထရိုင်ဆိုလာရန်များကဲ့သို့ ဖုံးကွယ်ခြင်း သို့မဟုတ် လှည့်ဖြားခြင်းကို နားမလည်ကြသော်လည်း အဆင့်နှစ်မျိုးနွယ်စုမှ လူများမှာ ပြက်လုံးတစ်ခု၏ အဓိပ္ပာယ်ကိုပင် နားမလည်နိုင်သည်မှာ စင်စစ်ထူးဆန်းလှသည်။

"ဟေး... ကျွန်တော် အစ်ကိုကျန်းကို လူတချို့နဲ့ မိတ်ဆက်ပေးမယ်"

အိုင်ရင်း၏အမူအရာမှာ ရုတ်ခြည်း အလွန်စိတ်လှုပ်ရှားသွားပြီး ကျန်းမုန့်လောင်မှာမူ အချစ်၏ရနံ့တချို့ကို ရလိုက်သလို ခံစားလိုက်ရသည်။

"ကျွန်တော်သူငယ်ချင်းတွေက အနားမှာရှိတဲ့ အဆင့်သုံးအန်ဒရိုမီဒါမျိုးနွယ်စုက လာကြတာ"

"ဒါက ရိုးရိုးသူငယ်ချင်းထက်တော့ ပိုမယ်ထင်တယ်"

ကျန်းမုန့်လောင်က ပြုံးစိစိဖြင့် မေးလိုက်လေသည်။

"အစ်ကို... အစ်ကိုက ဘယ်လိုလုပ်သိတာလဲ"

အိုင်ရင်း၏မျက်နှာကား ချက်ချင်းနီရဲသွားတော့သည်။

"မင်းမျက်နှာမှာ 'အချစ်နွေဦး နလန်ထနေပြီ'လို့ ရေးထားတာလေ"

ကျန်းမုန့်လောင်က ရယ်မောလျက် ဆိုသည်။

"အခုမှပဲ မင်း ဘာလို့ ဒီပြပွဲကို လာချင်ရလဲဆိုတာ ငါ နားလည်သွားတော့တယ်"

အမှန်အတိုင်း ပြောရလျှင် ဤပြပွဲမှာ အိုင်ရင်း တတ်နိုင်သည့် အနေအထားတွင် မရှိပေ။ သူသည် ဤနေရာသို့ လာနိုင်ရန်အတွက် ဂြိုဟ်အချို့ကိုပင် ရောင်းချခဲ့ရသည်။ ထိုဂြိုဟ်များမှာ အိုင်ရင်း အမည်ပေါက်ပိုင်ဆိုင်သမျှ အရာအားလုံးပင်။

အဓိကအချက်မှာ အိုင်ရင်းသည် လက်မှတ် နှစ်စောင် ရရှိထားခြင်းပင်။ အိုင်ရင်းတွင် ကြိုတင်သိမြင်နိုင်စွမ်း ရှိသည်ဟု သူ မယုံကြည်သဖြင့် ဤလက်မှတ်မှာ သူ့အတွက် ရည်ရွယ်ထားခြင်း မဟုတ်သည်မှာ သေချာပေသည်။

ခဏတွင်းချင်းမှာပင် ကျန်းမုန့်လောင်သည် ပဟေဠိကို အဖြေထုတ်လိုက်နိုင်ပြီ ဖြစ်၏။ ဤသည်မှာ မျက်နှာချိုသွေးသူတစ်ယောက်၏ ဇာတ်လမ်းပင်။

"ငါ ထင်တာမမှားဘူးဆိုရင် ကျန်တဲ့လူတွေက သူငယ်ချင်းတွေတင် မဟုတ်ဘဲ... မင်းရဲ့ပြိုင်ဘက်တွေလည်း ဖြစ်နိုင်တယ် မဟုတ်လား"

"အစ်ကို မှန်သွားပြန်ပြီ"

အိုင်ရင်းသည် ကျန်းမုန့်လောင်၏ ခန့်မှန်းချက်ကို ဝန်ခံလိုက်ရသည်။

"အစ်ကိုကျန်းက စွမ်းရည်တင် မကဘူး။ ဒီနယ်ပယ်မှာလည်း အတွေ့အကြုံတော်တော်များတာပဲ"

"ဒါက အချစ်ဝတ္ထုတွေထဲကအတိုင်းပဲ"

ကျန်းမုန့်လောင်က ပုခုံးတွန့်၍ ပြောလိုက်သည်။

"သွားကြစို့။ မင်းရဲ့သူငယ်ချင်းတွေကို သွားတွေ့ရအောင်"

"သူတို့က ဟိုဘက်မှာ ရှိနေတာ။ ကျွန်တော် အစ်ကို့ကို သူနဲ့ မိတ်ဆက်ပေးမယ်"

အိုင်ရင်းက ထိုသို့ပြောရင်း လျှောက်သွားတော့သည်။

"ကျွန်တော်တို့ ကျောင်းတုန်းက ဌာနအချင်းချင်း ဖလှယ်ရေးအစီအစဉ်မှာ တွေ့ခဲ့ကြတာ..."

ဆိပ်ကမ်းတွင် သွားလာရေးယာဉ်များ ရှိနေသဖြင့် သူတို့သည် သက်ဆိုင်ရာနေရာသို့ အလျင်အမြန် ရောက်ရှိသွားကြသည်။ ထိုနေရာတွင် လူငယ်အချို့က အနီရင့်ရောင် အာကာသယာဉ်တစ်စီးပေါ်က ဆင်းလာကြသည်ကို တွေ့ရသည်။

"အဲ့ဒါလည်း လန်းစလော့ကုမ္ပဏီက ထုတ်တဲ့ အာကာသယာဉ်ပဲ"

အိုင်ရင်းက မနာလိုလေဟန်ဖြင့် ဆိုလာသည်။ ၎င်းမှာ ကျန်းမုန့်လောင်၏ စတားဂေဇာနှင့် နှိုင်းယှဉ်လျှင် အဝေးကြီးလိုသေးသော်လည်း အဆင့်သုံးမျိုးနွယ်စုသင်္ဘောများထဲတွင်မူ ထိပ်တန်းအဆင့်ပင်။

ယာဉ်ပေါ်မှ လူငယ်ငါးယောက် ဆင်းလာကြသည်။ အမျိုးသားသုံးယောက်နှင့် အမျိုးသမီးနှစ်ယောက်ဖြစ်ပြီး လူသားများနှင့် ဆင်တူသော်လည်း ရုပ်ရည်မှာ ပိုလှပကြသည်။

"ရှာယန်နာ"

အိုင်ရင်းက ထိုအုပ်စုကို လက်ဝှေ့ယမ်းပြလိုက်သည်။ အန်နီမေးထဲမှ ဇာတ်ကောင်တစ်ဦးကဲ့သို့ စိမ်းနုရောင်ဆံပင်ရှိသော မိန်းကလေးမှာ သူတို့ဘက်သို့ လှည့်ကြည့်လာသည်။

"သြော်... မျှော်လင့်ချက်ရှိသားပဲ!"

မိန်းကလေးက အိုင်ရင်းကို မြင်လိုက်ရသည့်အခါ မျက်လုံးထဲတွင် အံ့အားသင့်သွားလေဟန် အမူအရာတစ်ခု ပေါ်ပေါက်လာကြောင်း ကျန်းမုန့်လောင် မြင်လိုက်ရသည်။

အိုင်ရင်းကတော့ ချက်ချင်းပင် အပြေးအလွှားသွားတော့သည်။

'ဟင်း... တကယ့်မျှော်လင့်ချက်မရှိတဲ့ မျက်နှာချိုသွေးသူလေးပဲ'

ကျန်းမုန့်လောင်က အိုင်ရင်းကို ကြည့်ကာ စိတ်ပျက်စွာ ခေါင်းခါယမ်းလိုက်သည်။ အချစ်နယ်ပယ်ထဲရှိ တကယ့်ဆရာကြီးများကတော့ သူ့လို အေးအေးဆေးဆေးသာ နေကြသည်။

"အိုင်ရင်း.. နင် ဒီပြပွဲကို လာဖြစ်မယ်လို့ မထင်ထားဘူး"

"ဟားဟားဟား.. မင်း နာမည်ပေါက် ပိုင်ဆိုင်သမျှဂြိုဟ်တွေကို ရောင်းပြီးမှ လာတာမဟုတ်လား"

"ဒီပြပွဲကိုလာဖို့ မင်းပေးဆပ်ရတဲ့ တန်ဖိုးက တော်တော်မြင့်တာပဲ။ မင်းအဖေက မင်းကို ရိုက်မှာ မကြောက်ဘူးလား"

လူငယ်သုံးဦးမှာ အိုင်ရင်းကို လှောင်ပြောင်လိုက်ကြသည်။

သို့သော် အိုင်ရင်းအတွက်မူ သူတို့မှာ လေအလားပင်။

"ရှာယန်နာ...မတွေ့ရတာကြာပြီနော်"

"မင်း ငါ့ကို မိတ်ဆက်မပေးတော့ဘူးလား"

ကျန်းမုန့်လောင်လည်း ထိုအချိန်တွင် ရှေ့သို့ တက်လှမ်းလာခဲ့သည်။

"ဪ... ဟုတ်သားပဲ။ ကျွန်တော် မိတ်မဆက်ပေးရသေးဘူး"

အိုင်ရင်းက ပြောလေသည်။

"သူတို့က အိမ်နီးချင်းအန်ဒရိုမီဒါမျိုးနွယ်စုကပါ။ ဒါကတော့ မော့စ်... ခီရာဒယ်နဲ့ လီဒက်ပါ။ သူတို့က အန်ဒရိုမီဒါမျိုးနွယ်စုက နာမည်ကျော်ပုဂ္ဂိုလ်တွေလေ"

"ဒါကတော့ ရှာယန်နာနဲ့ ရှာဇီနာပါ။ သူတို့က အန်ဒရိုမီဒါမျိုးနွယ်စု အရှင်သခင်ရဲ့ သမီးတော်တွေပေါ့"

"ဒါကတော့..."

"မင်းရဲ့သူငယ်ချင်းကို မိတ်ဆက်ပေးဖို့ မလိုပါဘူး"

မော့စ်ဟုအမည်ရသော လူငယ်က ကြားဖြတ်ပြောလိုက်သည်။

"ကိစ္စမရှိပါဘူး"

ကျန်းမုန့်လောင်က ပြုံးလျက် ဆိုလေသည်။

"မင်းတို့ ဘာမှစိတ်ပူစရာ မလိုပါဘူး။ ငါက သူငယ်ချင်းဖွဲ့တဲ့နေရာမှာ အဆင့်အတန်း ခွဲခြားတတ်တဲ့လူ မဟုတ်ပါဘူး။ မင်းတို့က အိုင်ရင်းရဲ့ သူငယ်ချင်းတွေဆိုတော့ ငါ မင်းတို့ကို အထင်မသေးပါဘူး"