အခန်း (၁၃၄၇-၁၃၄၈)

အခန်း (၁၃၄၇) - ယန်ကွန်းတာအိုဂိုဏ်း

"ဝမ်ချုံးစန်းလား"

ဖန့်ချန်၏ အကြည့်တို့မှာ အနည်းငယ် ဝေဝါးသွားဟန်ရှိသော်လည်း စိတ်ထဲတွင်မူ အနည်းငယ် လှုပ်ခတ်သွားသည်။

ဝမ်ချုံးစန်းက အထက်နယ်မြေသုံးခုမှာ ဒီလောက်တောင် နာမည်ကြီးနေတာလား

ချင်းယွီမသေမျိုးသည် ထိုခေတ်က လူတစ်ယောက် မဟုတ်သည်မှာ ထင်ရှားလှပြီး ဝမ်ချုံးစန်း၏ ရှေ့တွင်ဆိုလျှင် မိမိကိုယ်ကို မျိုးဆက်သစ်ဟုပင် ခေါ်ဆိုရမည့်သူ ဖြစ်ပါလျက်နှင့် သူ၏အကြောင်းကို သိနေပါလား။

"မင်းမသိတာလည်း မဆန်းပါဘူး၊ သူက အောက်ခြေနယ်မြေခြောက်ခုမှာတော့ သိပ်နာမည်မရှိလှဘူး၊ အဓိကကတော့ သူ့ရဲ့ ကျင့်ကြံခြင်းလမ်းစဉ်ဟာ အဖြတ်တောက်ခံလိုက်ရလို့ပဲ"

ချင်းယွီမသေမျိုးက ခပ်အေးအေး ပြုံးကာ

"ဒါပေမဲ့ ငါတို့လို လူတွေရဲ့ မျက်လုံးထဲမှာတော့ ဝမ်ချုံးစန်းဟာ စံပြပုဂ္ဂိုလ်တစ်ဦးပဲ။ အောက်ခြေနယ်မြေခြောက်ခုကနေ အထက်နယ်မြေသုံးခုကို ရောက်လာကြတဲ့ ကျင့်ကြံသူတွေထဲမှာ သူဟာ ကံအကောင်းဆုံး ပုဂ္ဂိုလ်ပဲလို့ ဆိုရမယ်"

"အကယ်၍သာ သူက အရမ်းထင်ပေါ်မနေဘဲ မယူသင့်တဲ့အရာကို မယူခဲ့ဘူးဆိုရင်၊ အခုအချိန်မှာ သူဟာ အောက်ခြေနယ်မြေခြောက်ခုမှာ အနည်းဆုံးတော့ နာမည်အထိုက်အလျောက် ရှိနေဦးမှာပဲ။ အခုလို လူမေ့ခံလိုက်ရမှာ မဟုတ်ဘူး"

"ဘိုးဘေး... အသေးစိတ်လေး မိန့်ကြားပေးပါဦး"

ဖန့်ချန်က ရိုသေစွာ လက်အုပ်ချီ၍ မေးလိုက်သည်။

ချင်းယွီမသေမျိုးက ခေါင်းညိတ်ကာ

"ဝမ်ချုံးစန်းအကြောင်း ပြောမယ်ဆိုရင် ကြာနီနတ်ဘုရားဂိုဏ်းအကြောင်းကိုလည်း ထည့်ပြောရမယ်။ အဲဒီတုန်းက ဝမ်ချုံးစန်း ဒီကိုရောက်လာတော့ ကြာနီနတ်ဘုရားဂိုဏ်းကပဲ တာဝန်ယူ ကြိုဆိုခဲ့တာ။ အဲဒီအချိန်တုန်းက သူဟာ အောက်ခြေနယ်မြေခြောက်ခုက လာတာဖြစ်တဲ့အတွက် မင်းကြုံတွေ့ခဲ့ရသလိုမျိုး ကိစ္စတွေကို သူလည်း ကြုံခဲ့ရတယ်"

"တောင်လုပွဲတွေကတစ်ဆင့် သူဟာ ကိုယ့်ကိုယ်ကိုယ် သက်သေပြနိုင်ခဲ့လို့ ကြာနီနတ်ဘုရားဂိုဏ်းရဲ့ အနှစ်သုံးဆယ်မှာ တစ်ကြိမ်ပဲရတဲ့ အခွင့်အရေးကို ရရှိခဲ့ပြီး ကျွယ်မင်နတ်ဘုရားနန်းတော်ရဲ့ အပြင်စည်းတပည့် ရွေးချယ်ပွဲကို ပါဝင်ခွင့် ရခဲ့တာပဲ"

ကြာနီနတ်ဘုရားဂိုဏ်း

ဝမ်ချုံးစန်း

ကြာနီနတ်မိမယ်ငယ်

ပြန့်ကျဲနေတဲ့ သဲလွန်စတွေဟာ တဖြည်းဖြည်း ပြန်လည် ပေါင်းစပ်လာသလိုပင်။

ဒီကြာနီနတ်မိမယ်ငယ်ဆိုတာ တကယ်ပဲ ဝမ်ချုံးစန်းရဲ့ လက်ချက်လား နတ်မိမယ်ယွီ လိုမျိုးပဲ သူမကိုလည်း မိစ္ဆာသန္ဓေသား အသွင်းခံရပြီး အတိတ်ဘဝ အမှတ်ရမှုတွေ နိုးထလာအောင် အလုပ်ခံထားရတာလား။

နှမြောစရာကောင်းတာက ဒီနေရာမှာ ယင်လောက ထဲကို ကူးပြောင်းလို့ မရတာပဲ။

မဟုတ်ရင်တော့ မြွေကို ချုံပုတ်ခေါက်သလို ဖြစ်သွားမှာကို စိုးရိမ်ရပေမဲ့လည်း၊ ဖန့်ချန်ဟာ သူမကို ယင်လောကထဲ ပို့ပြီး သေချာ စစ်ဆေးမေးမြန်းမိမှာ သေချာသည်။

"အဲဒီနှစ်မှာ ဝမ်ချုံးစန်းဟာ ကျွယ်မင်နတ်ဘုရားနန်းတော်ရဲ့ အပြင်စည်းတပည့် ဖြစ်လာခဲ့ပြီး ရှေးဟောင်းတားမြစ်နယ်မြေတွေကို စူးစမ်းရှာဖွေရင်း တစ်ကြိမ်ပြီးတစ်ကြိမ် ကောင်းမှုတွေ အများကြီး ပြုနိုင်ခဲ့တယ်"

ချင်းယွီမသေမျိုးက သက်ပြင်းချရင်း

"သူ့ရဲ့ ကျင့်ကြံမှုအဆင့်ကလည်း တဟုန်ထိုး တိုးတက်လာလိုက်တာ ဘက်ပေါင်းစုံက လူတွေတောင် တုန်လှုပ်ကုန်ကြတယ်။ နောက်ဆုံးမှာတော့ သူဟာ ရှေးဟောင်းမသေမျိုးတစ်ပိုင်း အဆင့်အထိတောင် ရောက်သွားခဲ့တယ်"

"ရှေးဟောင်းမသေမျိုးတစ်ပိုင်း "

ဖန့်ချန်က သင့်တော်သည့် အမူအရာဖြင့် တုန်လှုပ်သွားဟန် ပြလိုက်သည်။

အမှန်တကယ်ပင် ဤအဆင့်သို့ ရောက်ရှိသွားပါက အထက်နယ်မြေဖြစ်စေ၊ အောက်ခြေနယ်မြေဖြစ်စေ ကျင့်ကြံခြင်းလောကတွင် မည်သူမျှ မမှီနိုင်သော၊ လေးစားအားကျရသော တည်ရှိမှုမျိုး ဖြစ်ပေသည်။

ကျယ်ပြောလှသော ရှေးဟောင်းနယ်မြေ ကြီးထဲမှာတောင် ရှေးဟောင်းမသေမျိုး ဆိုတာ လက်ချိုးရေလို့ ရသည်။

ရှေးဟောင်းမသေမျိုးတစ်ပိုင်း ဆိုလျှင်လည်း အလွန်ဆုံးရှိလှမှ ရာဂဏန်းခန့်သာ ရှိပေလိမ့်မည်။

လျီုဝှက်စောင့်ရှောက်ရေးဌာန ရဲ့ အင်အားတွေ ပြန့်နှံ့လာတာနဲ့အမျှ နောင်ကျရင် ဒီအချက်အလက်တွေက ပိုတိကျလာမှာ ဖြစ်ပေမဲ့ အချိန်တော့ ပေးရဦးမည်။

"ဟုတ်တယ်၊ ရှေးဟောင်းမသေမျိုးတစ်ပိုင်း... မသေမျိုးစာရင်းဝင်ခွင့် ရတာနဲ့ ရှေးဟောင်းမသေမျိုး အဆင့်ကို ဝင်နိုင်ပြီ။ ကြားဖူးတာတော့ အဲဒီအဆင့်ဟာ အဆင့် ၆ မသေမျိုးနဲ့ လုံးဝမတူဘဲ သက်ရှိအဆင့်အတန်းတစ်ခုလုံး တစ်ဟုန်ထိုး မြင့်မားသွားတာမျိုးတဲ့"

ချင်းယွီမသေမျိုး၏ မျက်လုံးထဲတွင် အားကျရိပ်များ ပေါ်လာသည်။

သူသည် အဆင့် ၁ မသေမျိုးသာ ဖြစ်သဖြင့် ရှေးဟောင်းမသေမျိုးတစ်ပိုင်းနှင့် အဆင့် ၇ ရှေးဟောင်းမသေမျိုးများတွင် မည်သို့သော အစွမ်းအစများ ရှိသည်ကို စိတ်ကူးကြည့်ရန် ခက်ခဲလှသည်။

သို့သော်လည်း ဝက်သားမစားဖူးရင်တောင် ဝက်ပြေးတာတော့ မြင်ဖူးသည် မဟုတ်ပါလား။

ရှေးဟောင်းမသေမျိုးတစ်ပိုင်း၏ လင်းကွေ့ကြယ်တာရာနယ်မြေရှိ အဆင့်အတန်းမှာ အထွတ်အထိပ်ပင်။

သူကဲ့သို့ အဆင့် ၁ မသေမျိုးမှာ ထိုသူတို့နှင့် သီးသန့်တွေ့ဆုံခွင့်ပင် မရှိချေ။

"ဝမ်ချုံးစန်းဟာ အပြင်စည်းတပည့် တစ်ယောက်အနေနဲ့ ဒီအဆင့်အထိ ရောက်နိုင်ခဲ့တာဟာ ကံတရား အလွန်ကောင်းလွန်းလို့ပဲ။ ဒါပေမဲ့ နှမြောစရာကောင်းတာက သူဟာ မထိသင့်တဲ့အရာကို သွားထိမိခဲ့တယ်။ သူ ဘယ်လိုနည်းနဲ့ ရခဲ့လဲတော့ မသိဘူး၊ ထိုက်ယီမသေမျိုး ရဲ့ မသေမျိုးလမ်းစဉ်ကို သူ ရသွားခဲ့တယ်"

"ကြားရတာတော့ အဲဒီလမ်းစဉ်ဟာ အဆင့် ၇ အထိ သွားနိုင်တယ်တဲ့"

ချင်းယွီမသေမျိုးက ပြုံးလိုက်ရင်း

"ဒီမတိုင်ခင်တုန်းက အထက်နယ်မြေသုံးခုရဲ့ ထိပ်တန်းအင်အားစုတွေတောင်မှ ဒီလောက် ပြည့်စုံတဲ့ ထိုက်ယီမသေမျိုး လမ်းစဉ်ကို မပိုင်ဆိုင်ထားကြဘူး။ ဒါကြောင့် ကျွယ်မင်နတ်ဘုရားနန်းတော်ဘက်က အဲဒီလမ်းစဉ်ကို အပ်နှံဖို့ သူ့ကို တောင်းဆိုခဲ့တယ်"

"အဲဒီ ဝမ်စီနီယာက အပ်မပေးခဲ့ဘူးလား "

"သေချာတာပေါ့၊ ဒီ လမ်းစဉ်ရဲ့ တန်ဖိုးက ငါတို့ စိတ်ကူးထားတာထက် အများကြီး ပိုပါတယ်။ အကယ်၍သာ ကောင်းကောင်း စီမံနိုင်မယ်ဆိုရင် နောင်တစ်ချိန်မှာ ကျင့်ကြံခြင်း ရင်းမြစ်တွေအတွက် ဘယ်တော့မှ ပူစရာ မလိုတော့ဘူး"

"တစ်ချက်ပဲ ပြောရရင် ထိုက်ယီမသေမျိုးရဲ့ နောက်ဆက်တွဲ နတ်ဆေးပင် တွေအကြောင်း ဘယ်သူမှ မသိတဲ့ အခြေအနေမှာ သူကပဲ အဲဒီဆေးပင်တွေကို လက်ဝါးကြီးအုပ်ထားနိုင်မှာ။ ဘယ်သူမှ သူ့ကို လုလို့မရတော့ဘူး။ ဒါဟာ ဘယ်လောက် ကြောက်စရာကောင်းလဲ "

ချင်းယွီမသေမျိုးက ဆက်ပြောသည်

"ဒါကြောင့်လည်း အထက်နယ်မြေက အင်အားစု အတော်များများဟာ သူ့ကို တိုက်ခိုက်ခဲ့ကြတယ် ကျွယ်မင်နတ်ဘုရားနန်းတော်လည်း အပါအဝင်ပေါ့။ သူက အောက်ခြေနယ်မြေခြောက်ခုကို ထွက်ပြေးခဲ့ပေမဲ့ အောက်ခြေနယ်မြေထဲမှာတောင် သူ့ကို တိုက်ခိုက်မယ့်သူတွေ ရှိနေတယ်လို့ ကြားရတယ် "

"နောက်မှ သိရတာကတော့ ဝမ်ချုံးစန်းရဲ့ မူရင်းဂိုဏ်းဟာ ဝိညာဥ်နတ်ဘုရားဂိုဏ်း ရဲ့ လက်အောက်ခံ ဖြစ်နေလို့ပဲ။ အောက်ခြေနယ်မြေမှာ သူ့ကို တိုက်ခိုက်တဲ့ ကျင့်ကြံသူ အများစုဟာလည်း ဝိညာဥ်နတ်ဘုရားဂိုဏ်းက ကျင့်ကြံသူတွေပဲ"

"ဘက်ပေါင်းစုံက ဝိုင်းတိုက်ကြတဲ့အခါမှာ ဝမ်ချုံးစန်းရဲ့ ကျင့်ကြံမှုတွေ အဖျက်ဆီးခံလိုက်ရသလို၊ ထိုက်ယီမသေမျိုး လမ်းစဉ်ကိုလည်း အပ်နှံလိုက်ရတယ်။ နောက်ဆုံးတော့ ဝိညာဥ်နတ်ဘုရားဂိုဏ်းနဲ့ ကျွယ်မင်နတ်ဘုရားနန်းတော်တို့က သူ့ကို အမြစ်ပြတ် သတ်မပစ်ခဲ့ဘဲ သူ့ကံကြမ္မာအတိုင်းပဲ ပစ်ထားလိုက်ကြတယ် "

ချင်းယွီမသေမျိုးက

"ဒီလောက် နှစ်တွေအကြာကြီး ကုန်ဆုံးသွားပြီဆိုတော့ အဲဒီစီနီယာကြီး အသက်ရှင်သေးရဲ့လားတောင် မသိတော့ပါဘူး"

အသက်ရှင်ရုံတင်မကဘူး၊ တစ်ခုခုကိုတောင် ကြံစည်နေသေးတာဗျ ဟု ဖန့်ချန်က စိတ်ထဲမှ ပြန်ဖြေလိုက်သည်။

ချင်းယွီမသေမျိုးဆီက ကြားရတဲ့ သတင်းတွေဟာ ဒီတစ်ခါတော့ သူ့အတွက် တကယ်ကို အထောက်အကူ ဖြစ်စေခဲ့သည်။

ဒါဟာ မျှော်လင့်မထားတဲ့ ဝမ်းမြောက်စရာ သတင်းတစ်ခုပဲ။

အနည်းဆုံးတော့ နောက်တစ်ကြိမ် ကြာနီနတ်မိမယ်ငယ်နဲ့ တွေ့တဲ့အခါ ဒီသတင်းအချက်အလက်တွေကို သုံးပြီး စကားလမ်းကြောင်းကို စမ်းသပ်ကြည့်လို့ ရနိုင်မည်။

ရက်အနည်းငယ်အကြာတွင် ချင်းယွီမသေမျိုးသည် ဖန့်ချန်ကို ခေါ်ဆောင်ကာ ဤနယ်မြေရှိ အဆင့် ၁ မသေမျိုး ဆယ်ဂဏန်းခန့်နှင့် သွားရောက်ပူးပေါင်းခဲ့သည်။

အားလုံးသည် အဆင့် ၁ မသေမျိုး တစ်ဦး၏ လှေ ကို ပြောင်းစီးခဲ့ကြသည်။

ထိုလှေမှာ ဝိညာဉ်လက်နက် ဖြစ်ပုံရပြီး အရှိန်မှာ များစွာ ပိုမိုမြန်ဆန်လှသည်။

ထိုအဆင့် ၁ မသေမျိုးများမှာ ချင်းယွီမသေမျိုးကဲ့သို့ပင် အင်အားကြီးဂိုဏ်းများ၏ ဘိုးဘေးများ ဖြစ်ကြပြီး၊ ၎င်းတို့အထဲတွင် ကြာနီနတ်ဘုရားဂိုဏ်းမှ အဆင့် ၁ မသေမျိုးလည်း ပါဝင်သည်။

သူတို့ စုဝေးကာ စကားပြောနေကြစဉ် ကြာနီနတ်မိမယ်ငယ်သည်လည်း ဖန့်ချန်၏ အနားသို့ လျှောက်လာပြီး စကားစမြည် ပြောဆိုခဲ့သည်။

"ဖန့်မိတ်ဆွေ... ရှင်က အောက်ခြေနယ်မြေခြောက်ခုက လာတာလို့ ကြားတယ်။ အကယ်၍ နောင်ကျရင် ကျမ အဲဒီကို သွားဖို့ အခွင့်အရေးရခဲ့ရင် ဖန့်မိတ်ဆွေက လမ်းပြပေးနိုင်မလား "

ကြာနီနတ်မိမယ်ငယ်က အမှတ်မထင် မေးလိုက်သည်။

"ဒီကို ရောက်လာဖို့တောင် မနည်းကြိုးစားခဲ့ရတာ။ အထက်နယ်မြေကနေ ထွက်သွားဖို့ဆိုရင်လည်း ကြီးမားတဲ့ ပေးဆပ်မှုတွေ လုပ်ရမယ်လို့ ကြားတယ်။ လွတ်လပ်သောမသေမျိုး အဆင့်ကို မရောက်မချင်းတော့ ကျုပ် ပြန်နိုင်မှာ မဟုတ်ဘူးထင်တယ်"

ဖန့်ချန်က ပြုံးလျက် ဆိုလိုက်သည်။

"ဟုတ်ပါတယ်"

ကြာနီနတ်မိမယ်ငယ်က ခပ်သာသာ ခေါင်းညိတ်လိုက်ပြီးနောက် လင်းကွေ့ကြယ်တာရာနယ်မြေရှိ ကောလာဟလအချို့ကို ပြောပြခဲ့သည်။

"ကျမ ကြားတာတော့ ဒီတစ်ကြိမ် တာအိုပေါင်းစပ်ခြင်းအဆင့် ကျင့်ကြံသူတွေထဲမှာ ကျမလိုမျိုး ထူးခြားတဲ့ ခန္ဓာကိုယ်ပိုင်ရှင်တွေ အယောက် ၁၀၀ ထက်မနည်း ရှိနေတယ်တဲ့။ အဲဒီထဲမှာ ဖန့်မိတ်ဆွေ အထူးသတိထားရမယ့်သူ အချို့ ရှိတယ်။ ကျမကိုယ်တိုင် သူတို့နဲ့ တိုးရင်တောင် တစ်ကွက်တည်းနဲ့ ရှုံးသွားနိုင်တယ်"

"ဟုန်မိတ်ဆွေ... မိန့်ကြားပေးပါဦး"

ဖန့်ချန်က လက်အုပ်ချီလိုက်သည်။

"ယန်ကွန်းတာအိုဂိုဏ်း ပါ။ ဒီဂိုဏ်းက ယန်ကွန်းနတ်ဘုရား မျက်လုံး လို့ ခေါ်တဲ့ ထူးခြားတဲ့ မျက်လုံးပညာရပ်မှာ ကျွမ်းကျင်ကြတယ်။ ဒီပညာရပ်က သူတို့ကို သူတို့ရဲ့ အကန့်အသတ်ထက် ကျော်လွန်တဲ့ ဓာတ်ကြီးငါးပါး စွမ်းအားတွေကို အသုံးပြုနိုင်စေတယ် "

"ဒီမျိုးဆက် ယန်ကွန်းတာအိုဂိုဏ်း မှာ အပြစ်အနာအဆာကင်းမဲ့သော တာအိုခန္ဓာ ပိုင်ဆိုင်တဲ့ ပါရမီရှင်တစ်ယောက် ပေါ်ထွက်လာတယ်။ သူက မွေးကတည်းက တာအိုပညာရပ်တွေနဲ့ အလွန်ရင်းနှီးကျွမ်းကျင်ပြီး သူ့လက်ထဲက တာအိုပညာရပ်တွေဟာ အစွမ်းထက်မှု အဆပေါင်းများစွာ တိုးသွားတတ်တယ်။ ယန်ကွန်းနတ်ဘုရားမျက်လုံးနဲ့သာ ပေါင်းစပ်လိုက်ရင် သူ့ရဲ့ နည်းစနစ်တွေဟာ ခန့်မှန်းရခက်လောက်အောင် နက်နဲသွားလိမ့်မယ်"

"ယန်ကွန်းတာအိုဂိုဏ်း ဟုတ်လား "

ဖန့်ချန်၏ စိတ်က လှုပ်ရှားသွားသည်။

ထူးခြားမှု မရှိလျှင် ဤသည်မှာလည်း တာအိုသုံးထောင်ဂိုဏ်း ရဲ့ ပျက်စီးနေတဲ့ အမွေအနှစ်တွေကို ဆက်ခံထားတဲ့ တာအိုကျင့်ကြံသူ ဂိုဏ်းတစ်ခု ဖြစ်ပေလိမ့်မည်။

ဒါပေမဲ့ တစ်ဖက်လူ ရထားတဲ့ အမွေအနှစ်က ကျုံးကျိုး က ဂိုဏ်း တို့ထက် အများကြီး ပိုစွမ်းပုံရသည်။

ဒါက တိုက်ရိုက်ကြီးကို ယန်သားရဲ ရဲ့ ယန်ကွန်းနတ်ဘုရားမျက်လုံးပဲ မဟုတ်ပါလား။

"ဟုန်မိတ်ဆွေ ပြောတဲ့သူကို ကျုပ် တစ်ခါ တွေ့ဖူးတယ်။ သူက ယန်ကွန်းတာအိုဂိုဏ်းလက ယွီဝူရှီး ပဲ။"

"သူ့ရဲ့ နည်းစနစ်တွေက တကယ်ကို အံ့မခန်းပါပဲ။ အနည်းဆုံးတော့ တာအိုပေါင်းစပ်ခြင်းအဆင့်မှာဆိုရင် ကျယ်ပြောလှတဲ့ လင်းကွေ့ကြယ်တာရာနယ်မြေကြီးထဲမှာ သူ့ကို အနိုင်ယူနိုင်တဲ့သူက လက်ချိုးရေလို့ ရပါလိမ့်မယ်"

တာအိုပေါင်းစပ်ခြင်းအဆင့် ကျင့်ကြံသူ အချို့သည် ဤနေရာသို့ တိုးကပ်လာကြသည်။

စကားပြောလိုက်သူ၏ အကြည့်က ဖန့်ချန်၏ ကိုယ်ပေါ်သို့ တစ်ချက်ဝဲသွားပြီးမှ ကြာနီနတ်မိမယ်ငယ်ထံသို့ ကျရောက်သွားကာ၊ မျက်လုံးထဲတွင် စိတ်အားထက်သန်မှု အရိပ်အယောင်အချို့ တိတ်တဆိတ် ဖြတ်ပြေးသွားခဲ့သည်။

အခန်း (၁၃၄၈) - ဂူမသေမျိုး

ကြာနီနတ်မိမယ်ငယ်က ရောက်လာသူကို တစ်ချက်ကြည့်လိုက်ပြီး ခပ်အေးအေးပင် ခေါင်းညိတ်ပြကာ

"ချင်းမိတ်ဆွေက ယွီဝူရှီးနဲ့ တွေ့ဖူးတာလား"

ချင်းကျန်းက ခေါင်းကို အသာအယာ ညိတ်လိုက်ပြီး နွေးထွေးစွာ ပြုံးလျက်

"လွန်ခဲ့တဲ့ အနှစ်ငါးဆယ်တုန်းက ယွီဝူရှီးနဲ့ လက်ဖက်ရည်ဆိုင် တစ်ဆိုင်တည်းမှာ အတူတူ လက်ဖက်ရည် သောက်ခဲ့ဖူးတယ်လေ"

"ချင်းမိတ်ဆွေက ယွီဝူရှီးနဲ့တောင် သိကျွမ်းနေလိမ့်မယ်လို့ မထင်ထားဘူး"

"ဒီယွီဝူရှီးရဲ့ စရိုက်က ဘယ်လိုမျိုးလဲမသိဘူး၊ ဆက်ဆံရတာရော လွယ်ကူရဲ့လား"

ဤနေရာတွင် ယခုတစ်ကြိမ် စစ်ဆေးမှု၏ ရေပန်းစားနေသော လူရွေးချယ်မှုများအကြောင်း ဆွေးနွေးနေကြသည်ကို ကြားသောအခါ လူအတော်များများမှာ စုရုံးရောက်ရှိလာကြသည်။

ချင်းယွီမသေမျိုးနှင့် အခြားသူများမှာမူ ဤဘက်သို့ တစ်ချက်မျှသာ ဝေ့ကြည့်လိုက်ပြီး ဆက်လက်၍ အရေးမစိုက်တော့ချေ။

လူတိုင်းသည် ပြိုင်ဘက်များ ဖြစ်ကြသော်လည်း တစ်နယ်တည်းသားများ ဖြစ်ကြသည့်အတွက် အချင်းချင်း ပိုမိုနှီးနှောဖလှယ်ကြခြင်းမှာ ဆိုးကျိုးမရှိနိုင်ဟု ယူဆပုံရသည်။

ချင်းကျန်းက ပြုံး၍

"ယွီမိတ်ဆွေက စကားပြောရတာ အဆင်ပြေပါတယ် လူကလည်း အတော်လေး ယဉ်ကျေးပျူငှာတယ်"

စကားကို ခဏရပ်လိုက်ပြီးနောက် သူက ကြာနီနတ်မိမယ်ငယ်ကို တစ်ချက်ကြည့်ကာ

"ဟုန်မိတ်ဆွေ... ဒီတစ်ခါ စစ်ဆေးပွဲကျရင် ကျုပ်ကြည့်ပေးပါ့မယ်၊ အကယ်၍ ယွီမိတ်ဆွေနဲ့ တွေ့ခဲ့ရင် မင်းကို မိတ်ဆက်ပေးရမလား"

"မလိုပါဘူး၊ ကျမ နဲ့ သူနဲ့က ဘာမှ ပတ်သက်စရာ မရှိနိုင်ဘူး"

ကြာနီနတ်မိမယ်ငယ်က ခပ်သာသာ ခေါင်းခါလိုက်သည်။

ချင်းကျန်းမှာ ခဏမျှ မှင်တက်သွားသော်လည်း ထိုကိစ္စကို အရေးမစိုက်ဟန်ဖြင့် ခေါင်းညိတ်ပြလိုက်ပြီးနောက် ဆက်ပြောသည်

"ကျုပ်တို့ ခုနကပဲ တိုင်ပင်ထားကြတယ်၊ ဒီတစ်ကြိမ် စစ်ဆေးမှုက ကျုပ်တို့အတွက် သိပ်ကို အရေးကြီးတယ်၊ ဒါပေမဲ့ ပြိုင်ဘက်ကောင်းတွေကလည်း အများကြီးပဲ။ အခြေအနေတွေ မရေရာသေးခင်မှာ ကျုပ်တို့က တစ်နယ်တည်းသားတွေ ဖြစ်ကြတဲ့အပြင် တစ်ယောက်နဲ့တစ်ယောက်လည်း အနည်းနဲ့အများ တွေ့ဖူးကြတာဆိုတော့၊ အားလုံး လက်တွဲပြီး အပြန်အလှန် ကူညီဖေးမသင့်တယ်လို့ ထင်တယ်"

"ချင်းမိတ်ဆွေ ပြောတာ မှန်ကန်လှပါတယ်။ ဟုန်မိတ်ဆွေရော ကျုပ်တို့နဲ့ လက်တွဲဖို့ ဆန္ဒရှိပါသလား"

"အကယ်၍ ကျုပ်တို့သာ စည်းစည်းလုံးလုံး ရှိကြမယ်ဆိုရင် ကျုပ်တို့ထဲက တစ်ယောက်ယောက်ကတော့ ကျွယ်မင်ကျင့်ကြံသူ သေချာပေါက် ဖြစ်လာမှာပါ"

လူအတော်များများက ဝိုင်းဝန်းထောက်ခံကြသည်။

အမှန်စင်စစ် သူတို့ ထိုနေရာသို့ မလာခင်ကတည်းက အချင်းချင်း နှီးနှောဖလှယ်ခဲ့ကြပြီး ဖြစ်သည်။

တစ်ဦးတည်းသော မဆွေးနွေးရသေးသူမှာ ရှေ့မှ ကြာနီနတ်မိမယ်ငယ်နှင့် ချင်းယွီမသေမျိုးဂိုဏ်းမှ လူသာ ဖြစ်သည်။

သူတို့သည် မကြာသေးမီက ဟေးဟွမ်တောင် တောင်လုပွဲများ၏ သတင်းအချက်အလက်များကို ရရှိထားပုံမရဘဲ ဖန့်ချန်၏ အောက်ခြေသမိုင်းကြောင်းကိုလည်း သေချာမသိကြချေ။

ချင်းယွီမသေမျိုးဂိုဏ်းမှ အောက်ခြေနယ်မြေခြောက်ခုမှ လာသော တာအိုပေါင်းစပ်ခြင်းအဆင့် ကျင့်ကြံသူတစ်ဦး ပါလာသည်ဟုသာ သိထားကြသည်။

ထို့ကြောင့် ယခုအချိန်တွင် သူတို့၏ အာရုံစိုက်မှုအားလုံးမှာ ကြာနီနတ်မိမယ်ငယ်ထံတွင်သာ ရှိနေပြီး၊ သူမကို အဖွဲ့ထဲဆွဲသွင်းကာ အားကိုးလိုကြခြင်း ဖြစ်သည်။

ချင်းကျန်းသည် ကြည်လင်သော အကြည့်များဖြင့် ကြာနီနတ်မိမယ်ငယ်၏ အဖြေကို စောင့်ဆိုင်းနေသည်။

တစ်ဖက်လူက အနည်းဆုံးတော့ စဉ်းစားပေးလိမ့်မည်ဟု ထင်ထားသော်လည်း၊ ကြာနီနတ်မိမယ်ငယ်က အလွန်ပြတ်သားစွာ ခေါင်းခါလိုက်ပြီး

"မလိုပါဘူး၊ ကျမ က ဖန့်မိတ်ဆွေနဲ့ မဟာမိတ်ဖွဲ့ပြီးသားပါ။ ဒီတစ်ခါ စစ်ဆေးမှုမှာ သူနဲ့ကျမအပြန်အလှန် ကူညီဖေးမသွားမှာပါ။ နှစ်ယောက်ဆိုရင် လုံလောက်ပါပြီ၊ အဲဒီထက် ပိုလာရင် ကျမတို့နှစ်ယောက်အတွက် ဝန်ထုပ်ဝန်ပိုးပဲ ဖြစ်လိမ့်မယ်"

ဤစကားများသည် ချင်းကျန်းနှင့် အခြားသူများ၏ စွမ်းရည်အပေါ် ကြာနီနတ်မိမယ်ငယ်၏ အထင်အမြင်သေးမှုကို အထင်အရှား ဖော်ပြနေခြင်းပင်။

ချက်ချင်းပင် ထိုနေရာရှိ တာအိုပေါင်းစပ်ခြင်းအဆင့် ကျင့်ကြံသူများ၏ စိတ်ထဲတွင် မသက်မသာ ခံစားချက်များ ပေါ်ပေါက်လာပြီး၊ ကြာနီနတ်မိမယ်ငယ်ကို ကြည့်သော အကြည့်များတွင်လည်း ဒေါသအရိပ်အယောင်များ ပါဝင်လာသည်။

သို့သော် ဒေါသထက် ပိုသည်မှာ သံသယပင် ဖြစ်သည်။

ကြာနီနတ်မိမယ်ငယ်က ဘာဖြစ်လို့ ချင်းယွီမသေမျိုးဂိုဏ်းက ဒီလူနဲ့မှ လက်တွဲရတာလဲ

ချင်းကျန်းသည် ဖန့်ချန်မှာ မျက်လုံးများကို အမြဲပိတ်ထားသည်ကို သတိပြုမိလိုက်ရာ စိတ်ထဲမှ အတွေးတစ်ခု ဝင်လာသည်။

သူသည် စိတ်ထဲက ဒေါသကို အတင်းအကျပ် နှိမ်နင်းလိုက်ပြီး ဖန့်ချန်ကို လက်အုပ်ချီကာ

"ဖန့်မိတ်ဆွေရဲ့ အကြောင်းကို အနည်းနဲ့အများ ကြားဖူးပါတယ်၊ ခုနက နှုတ်မဆက်မိတာကို ဖန့်မိတ်ဆွေအနေနဲ့ စိတ်မရှိပါနဲ့ဦး"

"ကိစ္စမရှိပါဘူး"

ဖန့်ချန်က ပြန်လည် လက်အုပ်ချီလိုက်သည်။

ချင်းကျန်းက ပြုံးလျက်

"ဟုန်မိတ်ဆွေက ဖန့်မိတ်ဆွေနဲ့ပဲ မဟာမိတ်ဖွဲ့ချင်တယ်ဆိုတော့၊ ဒါဟာ ဖန့်မိတ်ဆွေရဲ့ စွမ်းအားကို ဟုန်မိတ်ဆွေက အသိအမှတ်ပြုထားလို့ပဲ ဖြစ်မှာပါ။ ကျုပ်တို့ကျတော့... ဟုန်မိတ်ဆွေရဲ့ မျက်လုံးထဲမှာ ဘာတန်ဖိုးမှ မရှိဘူးဆိုတာ သိရတာ တကယ်ပဲ... စိတ်မကောင်းဖြစ်ရပါတယ်ဗျာ"

ကြာနီနတ်မိမယ်ငယ်က မျက်မှောင်ကြုတ်လိုက်ပြီး ချင်းကျန်းကို အေးစက်စွာ ကြည့်ကာ

"ရှင့်တို့ရဲ့ စွမ်းအားက တန်ဖိုးမရှိတာ မဟုတ်ပါဘူး၊ ကျမတို့ကြားမှာ ကွာခြားချက်က သိပ်ကြီးမားနေလို့ လက်တွဲရင်လည်း လိုက်လျောညီထွေဖြစ်ဖို့ ခက်ခဲလိမ့်မယ်လို့ ပြောတာပါ"

"..."

"ဟုန်မိတ်ဆွေ...ရှင့်စကားက သိပ်ကို အောက်ခြေလွတ်နေပြီ။ ရှင် ဘယ်လောက်ပဲ အစွမ်းထက်ပါစေ၊ တစ်ယောက်တည်းနဲ့ လူတစ်ရာကို အံတုနိုင်လို့လား"

အေးစက်လှပသော တာအိုပေါင်းစပ်ခြင်းအဆင့် အမျိုးသမီးကျင့်ကြံသူတစ်ဦးက အေးစက်စွာ ပြောလိုက်သည်။

သူမသည် ကျိုထုံထပ်တိုက် မှ ဖြစ်ပြီး ထိုဂိုဏ်းမှာ ကြာနီနတ်ဘုရားဂိုဏ်း၊ ချင်းယွီမသေမျိုးဂိုဏ်းတို့နှင့် အခြေခံအင်အားချင်း တူညီသော ဂိုဏ်းတစ်ခု ဖြစ်သည်။

"ကျမနဲ့ ဖန့်မိတ်ဆွေ လက်တွဲရင်တော့... တကယ်ပဲ တစ်ယောက်တည်းနဲ့ လူတစ်ရာကို အံတုနိုင်မှာပါ"

ကြာနီနတ်မိမယ်ငယ်က သူမ၏ မေးခွန်းကို အလွန်လေးနက်စွာ ပြန်ဖြေလိုက်သည်။

တစ်ဖက်လူက သရော်နေခြင်းဖြစ်သည်ကို သူမ လုံးဝ သတိမထားမိသကဲ့သို့ပင်။

ဖန့်ချန်သည် ထိုအသေးစိတ်ကို သတိပြုမိပြီးနောက် စိတ်ထဲမှ အတွေးတစ်ခု ဝင်လာသည်။

ဒီတစ်ယောက်ကတော့... ကြည့်ရတာ နတ်မိမယ်ယွီထက်စာရင် ကိုင်တွယ်ရ ပိုလွယ်မယ့်ပုံပဲ

ယခုအခါ နတ်မိမယ်ယွီမှာ ဘွဲ့နှင်းခြင်း ခံထားရသော်လည်း၊ ဖန့်ချန်အနေဖြင့် သူမ သိထားသည်များကို ပြောပြရန် အသက်အန္တရာယ်ဖြင့် ခြိမ်းခြောက်၍ မရနိုင်သေးချေ။

စီမံကိန်းအရ မယ်တော်စီ ကိုသာ သေချာစောင့်ကြည့်ခိုင်းထားပြီး အခွင့်အရေးကို စောင့်ရပေမည်။

ကြာနီနတ်မိမယ်ငယ်မှာမူ မတူချေ။

အကယ်၍ သူမကို ယင်လောကထဲ ခေါ်သွားနိုင်မည့် အခွင့်အရေးသာ ရှိခဲ့လျှင် တန်ဖိုးရှိသော သတင်းအချက်အလက်များစွာကို မေးမြန်းနိုင်ပေလိမ့်မည်။

"အော်... ဟုတ်လား..."

ချင်းကျန်းက မချိပြုံး ပြုံးလိုက်ရင်း

"ဖန့်မိတ်ဆွေမှာ ဘယ်လိုမျိုး ဂုဏ်ယူစရာကောင်းတဲ့ စွမ်းဆောင်ရည်တွေ ရှိလို့လဲဗျာ ကျုပ်တို့ ဘာလို့ တစ်ခါမှ မကြားဖူးရတာလဲ..."

"ဟုန်မိတ်ဆွေက ကျုပ်ကို မြှောက်ပင့်ပေးလွန်းနေတာပါ။ ကျုပ်က တကယ်တော့ လွတ်မြောက်ခြင်းပညာ လေး နည်းနည်း ထူးခြားတာကလွဲရင်၊ ကျန်တဲ့ နည်းစနစ်တွေမှာတော့ မိတ်ဆွေတို့အားလုံးကို ဘယ်လိုမှ မမီနိုင်ပါဘူး"

ဖန့်ချန်က နှိမ့်ချစွာ လက်အုပ်ချီလိုက်သည်။

ကြာနီနတ်မိမယ်ငယ်မှာ ခဏမျှ မှင်တက်သွားပြီးနောက် ချက်ချင်းပင် ပါးစပ်ကို ပိတ်ထားလိုက်တော့သည်။

ဖန့်ချန်၏ ဆိုလိုရင်းကို သူမ နားလည်သွားပြီ ဖြစ်သည်။

ဖန့်ချန်၏ နှိမ့်ချမှုကြောင့် ထိုနေရာရှိ တာအိုပေါင်းစပ်ခြင်းအဆင့် ကျင့်ကြံသူများမှာ အရှက်ရမည့်ဘေးမှ လွတ်မြောက်သွားကြသည်။

ချင်းကျန်းက အမှတ်မထင် မေးလိုက်သည်

"ဖန့်မိတ်ဆွေက ဘာဖြစ်လို့ မျက်လုံးကို အမြဲမှိတ်ထားရတာလဲ၊ တစ်ခုခု ထူးခြားတဲ့ မျက်လုံးပညာရပ်ကို ကျင့်ကြံနေလို့လား"

လူတိုင်း၏ အကြည့်မှာ ဖန့်ချန်၏ မျက်နှာပေါ်သို့ ကျရောက်လာသည်။

ဖန့်ချန်သည် မျက်လုံးကို ဖွင့်လိုက်ရာ ဖြူဆွတ်နေသော မျက်စိသူငယ်အိမ်များဖြင့် ချင်းကျန်းကို စိုက်ကြည့်လိုက်ပြီး

"ထူးခြားတဲ့ မျက်လုံးပညာရပ် မဟုတ်ပါဘူး၊ မွေးရာပါ မျက်စိမမြင်ရတဲ့ ချို့ယွင်းချက် ရှိနေလို့ပါ"

"အော်..."

လူတိုင်း၏ အမူအရာမှာ အနည်းငယ် ထူးဆန်းသွားသည်။

မျက်စိမမြင်ရဘဲနှင့် ကျင့်ကြံခြင်းလမ်းစဉ်ပေါ် ရောက်လာရုံတင်မက၊ အောက်ခြေနယ်မြေခြောက်ခုကနေ အထက်နယ်မြေသုံးခုအထိ ရောက်လာနိုင်သည်ဆိုကတည်းက သူ၏ နောက်ခံသမိုင်းကြောင်းမှာ မသေးလှသည်မှာ သေချာသည်။

ကြာနီနတ်မိမယ်ငယ်သည် အဘယ်ကြောင့် ဖန့်ချန်နှင့် လက်တွဲလိုသည်ကို သူတို့ ခန့်မှန်းမိသွားကြပြီ။

တစ်ဖက်လူ၏ နောက်ခံကို အလေးထားခြင်း ဖြစ်နိုင်သလို၊ သို့မဟုတ် ထိုသူ၏ ကိုယ်ပေါ်တွင် အစွမ်းထက်သော ရတနာ တစ်ခုခု ရှိနေနိုင်သည်ဟု ယူဆလိုက်ကြသည်။

"ဘာပဲဖြစ်ဖြစ်... ဟုန်မိတ်ဆွေ ထပ်ပြီး စဉ်းစားပေးပါဦး၊ ကျုပ်တို့ ဒီတစ်ခေါက် စစ်ဆေးမယ့် နေရာကို ရောက်ဖို့ အချိန်နည်းနည်းတော့ ကျန်သေးတယ်"

ချင်းကျန်းက ကြာနီနတ်မိမယ်ငယ်ကို တစ်ချက်ကြည့်ကာ လှည့်ထွက်သွားတော့သည်။

အခြားသော တာအိုပေါင်းစပ်ခြင်းအဆင့် ကျင့်ကြံသူများလည်း ထိုနေရာတွင် ဆက်မနေလိုကြတော့သဖြင့် တစ်ဦးပြီးတစ်ဦး လူစုခွဲသွားကြသည်။

"ဖန့်မိတ်ဆွေ... သူတို့ရှေ့မှာ ရှင့်ရဲ့ ကျင့်ကြံမှုကို ဖုံးကွယ်ထားဖို့ မလိုပါဘူး"

ကြာနီနတ်မိမယ်ငယ်က အသံလှိုင်းဖြင့် ပေးပို့လိုက်သည်။

ခဏမျှ ရပ်တန့်လိုက်ပြီးနောက် သူမ စုဆောင်းထားသော သတင်းအချက်အလက်များကို ဖန့်ချန်နှင့် ဆက်လက် ဆွေးနွေးပြန်သည်

"ယန်ကွန်းတာအိုဂိုဏ်းက ယွီဝူရှီးအပြင်၊ မိစ္ဆာဂူမသေမျိုးဂိုဏ်း ကိုလည်း သတိထားရမယ်"

"ဒီဂိုဏ်းက ဂူအတတ် ကို ကျင့်ကြံကြတာ၊ နည်းစနစ်တွေက နည်းနည်း ထူးခြားတယ်။ ဒီတစ်ခါ စစ်ဆေးပွဲကို ပါဝင်မယ့် တာအိုပေါင်းစပ်ခြင်းအဆင့် ကျင့်ကြံသူ ၃၀၀ ကျော် ရှိတဲ့အထဲမှာ လင်းယွမ် ဆိုတဲ့ တစ်ယောက်က ပြီးခဲ့တဲ့ နှစ်အနည်းငယ်ကမှ မိစ္ဆာဂူမသေမျိုးဂိုဏ်းရဲ့ အစွမ်းထက်ဆုံး အသားနှင့်သွေးဂူ ကို ပေါင်းစပ်နိုင်ခဲ့တယ်တဲ့"

ကြာနီနတ်မိမယ်ငယ်နှင့် စကားပြောခြင်းဖြင့် အထက်နယ်မြေသုံးခုတွင် အောက်ခြေနယ်မြေခြောက်ခုက လူတစ်ယောက်မှ မလျှောက်လှမ်းဖူးသေးသော မသေမျိုးလမ်းစဉ်တစ်ခု ရှိကြောင်း ဖန့်ချန် သိလိုက်ရသည်။

၎င်းမှာ ဂူမသေမျိုး ပင်။

နှစ်လခန့် ကြာပြီးနောက် လှေ၏ အရှိန်မှာ တဖြည်းဖြည်း နှေးကွေးသွားသည်။

လူတိုင်းသည် ရှေ့တွင် မိုင်ပေါင်းသောင်းချီ ကျယ်ဝန်းသော အလင်းအကာအကွယ် တစ်ခုကို ဝေဝါးစွာ မြင်တွေ့လိုက်ရသည်။

၎င်းသည် ပြောင်းပြန်လှန်ထားသော အိုးတစ်လုံးကဲ့သို့ မြေပြင်ကြီးကို လွှမ်းခြုံထားသည်။

ဤအနီးအနားတွင် ရေတွက်၍မရနိုင်သော လှေများမှာ ရပ်နားထားကြပြီး ဖြစ်သည်။

ထိုအလင်းအကာအကွယ်၏ အပေါ်တည့်တည့်တွင် တစ်စုံတစ်ဦးက ရွှေဓာတ်စွမ်းအား ကို အသုံးပြုကာ စင်မြင့်တစ်ခု ဖန်တီးထားပြီး၊ ထိုနေရာတွင် လွတ်လပ်သောမသေမျိုး အများအပြား ရပ်နေကြသည်။

"ဒါက ကျွယ်မင်နတ်ဘုရားနန်းတော်က ဒီတစ်ခါ ရွေးချယ်ထားတဲ့ စစ်ဆေးမယ့်နေရာ... သတ်ဖြတ်ခြင်းမိစ္ဆာတောင်တန်း လား "

ချင်းယွီမသေမျိုး၏ အကြည့်မှာ လေးနက်နေသည်။

ဤသတ်ဖြတ်ခြင်းမိစ္ဆာတောင်တန်းထဲတွင် သူကိုယ်တိုင်ပင် အနည်းငယ် ကြောက်ရွံ့ရသော အရာတစ်ခုခု ရှိနေပုံရသည်။

ထိုနေရာရှိ လွတ်လပ်သောမသေမျိုး ဆယ်ဂဏန်းခန့်သည်လည်း တစ်စုံတစ်ခုကို စဉ်းစားနေကြသော်လည်း၊ ရွှေဓာတ်စွမ်းအားဖြင့် ဖန်တီးထားသော စင်မြင့်မြင့်ဆီသို့မူ ချဉ်းကပ်သွားခြင်း မရှိကြချေ။

သူတို့တွင် ထိုအရည်အချင်း မရှိကြပါ။

ယခုအချိန်တွင် ထိုစင်မြင့်မြင့်ပေါ်တွင် ရပ်နေသူများမှာ ကျွယ်မင်နတ်ဘုရားနန်းတော်မှ စေလွှတ်လိုက်သော စစ်ဆေးရေးမှူးများ ဖြစ်ကြသလို၊ လင်းကွေ့ကြယ်တာရာနယ်မြေမှ အင်အားကြီး ပုဂ္ဂိုလ်များလည်း ဖြစ်ကြသည်။

ထိုနေရာတွင် ရှေးဟောင်းမသေမျိုးများပင် ရှိနေနိုင်ပေသည်။