အခန်း (၃၄၃-၃၄၄)

အခန်း (၃၄၃) - ဖုန်းတူး ၊ ပူဇော်သက္ကာပြုခြင်း အတတ် ၊ အလောင်းထိန်းအတတ် ၊ ကြေးနီဓားမြှောင်

"ဘာတွေ အပိုပြောနေတာလဲ "

"ဒီအမျိုးသမီးအလောင်း ရှိနေလို့ မင်းကိုယ်မင်း သတ္တိတွေ တက်နေတာလား"

လီယန်ချူက အေးစက်စက် လှောင်ပြောင်လိုက်သည်။

လယ်သမားအိုကြီး၏ နှုတ်ခမ်းများမှာ တဆတ်ဆတ် တုန်ရီသွားပြီး မျက်ဝန်းအစုံတွင် ဒေါသအဟုန်များ ပေါ်ပေါက်လာ၏ သူ သတိမထားမိလိုက်သည်မှာ... သူ၏ရှေ့တွင်ရှိသော အသိစိတ်ကင်းမဲ့နေရမည့် ထိုကြောက်မက်ဖွယ် အမျိုးသမီးအလောင်း၏ နှုတ်ခမ်းအစုံမှာ အနည်းငယ် ကွေးညွတ်သွားပြီး ပြုံးနေသကဲ့သို့ ဖြစ်သွားခြင်းပင်။

အကယ်၍ လယ်သမားအိုကြီးသာ မြင်လိုက်လျှင် ထိတ်လန့်တုန်လှုပ်သွားပေလိမ့်မည် ထိုအလောင်းမှာ သာမန်ဖုတ်ကောင် သို့မဟုတ် လမ်းလျှောက်အလောင်း မဟုတ်ပေ၊ အသိစိတ် ရှိနေရန်မှာ လုံးဝ မဖြစ်နိုင်သလို၊ ရှိလည်း မရှိသင့်ပေ သို့မဟုတ်ပါက အလွန်တရာ ကြောက်မက်ဖွယ်ကောင်းသော အခြင်းအရာများ ဖြစ်ပျက်လာနိုင်ပေသည်။

နှမြောစရာကောင်းသည်မှာ ထိုထောင့်မှနေ၍ လီယန်ချူတစ်ယောက်သာ မြင်လိုက်ရသဖြင့် သူ မျက်မှောင်ကြုတ်လိုက်မိသည်။

ဒီအမျိုးသမီးအလောင်းမှာ အသိစိတ် ရှိနေတာလား

"ငါက လူလာရှာတာ၊ သံမဏိဓားတစ်လက် ကိုင်ထားတဲ့ အမျိုးသမီးတစ်ယောက်ကို မင်း မြင်မိသေးလား "

လီယန်ချူက လေးနက်သော အသံဖြင့် မေးလိုက်သည်။

လယ်သမားအိုကြီးသည် မျက်လုံးကို အသာစေ့လိုက်ပြီး မျက်နှာမှာ ချက်ချင်းဆိုသလို မည်းမှောင်သွားတော့သည်။

"မင်းက အဲ့ဒီမိန်းမနဲ့ တစ်ဖွဲ့တည်းလား "

သူသည် လက်သီးကို တင်းတင်းဆုပ်လိုက်ပြီး မျက်ဝန်းအစုံမှ ဒေါသများမှာ အပြင်သို့ ပန်းထွက်လာတော့မည့်အလား ရှိနေသည်။

"ဟင်"

လီယန်ချူ ခဏမျှ ကြောင်သွားသည်။

ထိုမြေခွေးအိုကြီးက ဖန့်ချင်းလန်အပေါ် ထားရှိသော နာကျည်းမှုမှာ မိမိထက်ပင် ပိုကြီးမားနေသလို ခံစားနေရသောကြောင့် ဖြစ်၏။

လယ်သမားအိုကြီး၏ မျက်နှာထားမှာ မကောင်းလှပေ။

လီယန်ချူအနေဖြင့် မည်သည့် အသုံးဝင်သော သတင်းအချက်အလက်မှ ရတော့မည်မဟုတ်ဟု ထင်မှတ်နေစဉ်မှာပင်၊ လယ်သမားအိုကြီးက ရုတ်တရက် အေးစက်စက် ပြုံးလိုက်သည်။

"အဲ့ဒီ မိန်းမယုတ်လား... သူက တစ်ယောက်တည်း ဖုန်းတူး ကို သွားတိုက်နေပြီ၊ မင်း သူ့ကို ရှာချင်ရင် ဖုန်းတူးကို သွားလို့ရတယ် "

"ဘယ်လိုလဲ... ငါပြောတာကို မင်း ယုံရဲ့လား "

သူ၏ အကြည့်များမှာ လှောင်ပြောင်သရော်မှုများဖြင့် ပြည့်နှက်နေသည်။

ဖုန်းတူးဆိုသည်မှာ လူရှင်များအတွက် တားမြစ်နယ်မြေ ဖြစ်သည်။

အကယ်၍ တစ်ဖက်လူက ယုံကြည်ပြီး ဖုန်းတူးသို့ သွားမည်ဆိုလျှင် မိမိကိုယ်မိမိ သေတွင်းထဲ ဆင်းသွားခြင်းပင် ဖြစ်လိမ့်မည်။

အကယ်၍ မသွားလျှင်လည်း စိတ်ဝိညာဉ်တွင် ဟာကွက်ဖြစ်ပေါ်လာပြီး မကြာမီ စိတ်မိစ္ဆာ များ၏ ဝါးမြိုခြင်းကို ခံရပေလိမ့်မည်။

"ဖုန်းတူး "

လီယန်ချူ မျက်မှောင်ကြုတ်လိုက်သည်။

"အဲ့ဒါ ဘယ်လိုနေရာမျိုးလဲ "

လယ်သမားအိုကြီးမှာ - "..."

သူ ဆဲပင် ဆဲလိုက်ချင်တော့သည်။

တစ်ဖက်လူမှာ ယူမင်တောင် ကိုတောင် မကြားဖူးသည့် လူရိုင်းတစ်ယောက် ဖြစ်နေသည်ကို သူ မေ့သွားခဲ့သည်။

"တာအိုဘာသာမှာ မင်္ဂလာရှိတဲ့ နယ်မြေ ခုနစ်ဆယ် ရှိသလို၊ သရဲလမ်းစဉ် မှာလည်း ရှိတာပေါ့ "

"ဖုန်းတူးဆိုတာ သရဲနယ်မြေ တစ်ခုပဲ၊ ရှေးဟောင်းပြီး ကြောက်မက်ဖွယ်ကောင်းတဲ့ ဖြစ်တည်မှုတွေ ကိန်းအောင်းနေတဲ့ နေရာပေါ့၊ အဲ့ဒီမိန်းမက အဘိုးကြီးရဲ့ ယင်ကုသိုလ်ဒင်္ဂါး ကို လုယူပြီး တစ်စုံတစ်ရာသော ရတနာကို ရှာဖို့ ဖုန်းတူးကို သွားပြီ "

လယ်သမားအိုကြီးက ရှင်းပြလိုက်သည်။

သူ၏ အသံမှာ အက်ရှရှနှင့် နိမ့်ဆင်းနေ၏။

"ဘယ်လိုလဲ... မင်း သွားချင်ရင် ငါ လမ်းညွှန်ပေးနိုင်တယ်၊ ဒါမှမဟုတ် မင်း မယုံဘူးဆိုရင်လည်း အဲ့ဒီမိန်းမကို သူ့ဘာသာသူ အသေခံခိုင်းလိုက်ပေါ့ "

လယ်သမားအိုကြီး၏ အသံမှာ အလွန်ပင် ဆွဲဆောင်ဖြားယောင်းမှု ရှိနေပြီး လီယန်ချူကို လှောင်ကြည့်ကြည့်နေသည်။

သူသည် လူ့သဘာဝကို ကစားရသည်ကို အနှစ်သက်ဆုံး မဟုတ်ပါလား

"မိစ္ဆာလမ်းစဉ်ကကောင်... ငါ့ရဲ့ တာအိုစိတ်ဓာတ်ကို ရှုပ်ထွေးအောင် လုပ်ချင်နေတာလား "

"မင်းပြောတာ အမှန်ပဲဖြစ်ဖြစ်၊ အမှားပဲဖြစ်ဖြစ်... ငါက မိစ္ဆာတွေနဲ့ ဘယ်တော့မှ အပေးအယူ မလုပ်ဘူး "

လီယန်ချူ၏ အကြည့်မှာ အေးစက်လှသည်။

သူ အရင်က ရုပ်ရှင်တွေကြည့်လျှင် အမုန်းဆုံး ဇာတ်ကွက်မှာ ဗီလိန်က မင်းသမီးကို ဖမ်းပြီး ခြိမ်းခြောက်ကာ မင်းသားကို လက်နက်ချခိုင်းသည့် အခန်းများ ဖြစ်သည်။

ရလဒ်အနေဖြင့် နုံးချိဖွယ်ရာ ဇာတ်ကွက်များသာ ဖြစ်လာတတ်သည်။

ထိုသို့ မြင်ရတိုင်း လီယန်ချူမှာ တီဗီကိုပင် ရိုက်ခွဲပစ်ချင်စိတ် ပေါက်ခဲ့သည်။

ယခု သူပေးလိုက်သော အဖြေမှာ အလွန်ပင် ရိုးရှင်းပါသည်။

ချွင်

တောက်ပလှသော ဓားအလင်းတန်း တစ်ခု ပေါ်ထွက်လာကာ လေထုကိုပင် ဆွဲဖြတ်သွားတော့သည်။

နောက်တစ်စက္ကန့်တွင် လယ်သမားအိုကြီး၏ ရှေ့သို့ ရောက်ရှိလာသည်။

ဒေါင်

ကြောက်မက်ဖွယ် အမျိုးသမီးအလောင်းမှာ သူမ၏ ရုပ်ခန္ဓာဖြင့် ထိုဓားအလင်းတန်းကို ထပ်မံ ခုခံလိုက်ပြန်သည်။

"မင်း ရူးနေပြီလား "

"အဲ့ဒီမိန်းမက ဖုန်းတူးလျှို့ဝှက်နယ်မြေထဲ တကယ်ဝင်သွားတာ၊ မင်း ငါ့ကို သတ်လိုက်ရင် ဘယ်သူမှ ဖုန်းတူးဝင်ပေါက်ကို ဖွင့်ပေးနိုင်မှာ မဟုတ်ဘူး "

လယ်သမားအိုကြီး၏ အကြည့်မှာ အံ့သြတုန်လှုပ်မှုများ ပြည့်နေသည်။

"ငါက ငါ့ကို လာပြီး ဈေးဆစ်တာကို အမုန်းဆုံးပဲ "

"အထူးသဖြင့် လူသတ်တာကို ဝါသနာပါတဲ့ မင်းလို မိစ္ဆာကောင်မျိုးကိုပေါ့ "

"မင်းမှာ အရည်အချင်း မရှိဘူး "

လီယန်ချူသည် တောက်ပသော ရှေးဟောင်းတံဆိပ်တစ်ခုကို တိုက်ရိုက် ထုတ်သုံးလိုက်သည်။

ကျောက်ထျန်းတံဆိပ်

ပြင်းထန်လှသော အရှိန်အဝါတစ်ခု သူ၏ကိုယ်ပေါ်မှ ပျံ့နှံ့လာသည်။

နတ်ဘုရားမီး အရှိန်အဝါ

လယ်သမားအိုကြီး၏ မျက်နှာမှာ အကြီးအကျယ် ပျက်သွားတော့သည်။

ထိြကြောက်မက်ဖွယ်ကောင်းသော အရှိန်အဝါမှာ အသက်ရှူပင် ကျပ်စေသည်။

ဒီတာအိုဆရာလေးက ဘယ်သူလဲ ဘာလို့ ဒီလောက် စွမ်းအားကြီးတဲ့ မှော်လက်နက်တွေ ရှိနေရတာလဲ

ဝူး

ကောင်းကင်အပြည့် နတ်ဘုရားမီးများမှာ ဟုန်းခနဲ တောက်လောင်သွားပြီး လယ်သမားအိုကြီးနှင့် အမျိုးသမီးအလောင်းကို တိုက်ရိုက် လွှမ်းခြုံသွားတော့သည်။

နေမင်းကြီး ကောင်းကင်ကို လောင်ကျွမ်းစေခြင်း

နက်ရှိုင်းပြီး စိမ်းမြနေသော ကန်ရေများပင်လျှင် ထိုနေရာမှ ပြင်းထန်သော အပူရှိန်ကြောင့် အငွေ့ပျံကုန်ကာ လေထုမှာလည်း ကွေးကောက်နေသကဲ့သို့ ရှိသည်။

"အား "

နာကျင်စွာ အော်ဟစ်သံနှင့်အတူ အမျိုးသမီးအလောင်း၏ ကိုယ်ပေါ်မှ အလွန်ပြင်းထန်သော အလောင်းစိမ်းအရှိန်အဝါများ ပွင့်ထွက်လာသည်။

အလွန်အေးစက်လှသော ၎င်းအရှိန်အဝါမှာ ထူးဆန်းပြီး ခိုင်ခံ့သော ကာကွယ်ရေးတစ်ခုအဖြစ် ပြောင်းလဲသွားကာ လယ်သမားအိုကြီးကို အကာအကွယ် ပေးလိုက်သည်။

သို့သော်လည်း ကျောက်ထျန်းတံဆိပ်၏ နတ်ဘုရားမီးမှာ အလွန်ပင် ရိုင်းစိုင်းပြင်းထန်လှရာ၊ အမျိုးသမီးအလောင်းမှ ထွက်ပေါ်လာသော ထိုအေးစက်သည့် အရှိန်အဝါကို တစ်ခဏအတွင်းမှာပင် ဖျက်ဆီးပစ်လိုက်သည်။

ကောင်းကင်အပြည့် တောက်လောင်နေသော နတ်ဘုရားမီးများမှာ လယ်သမားအိုကြီးနှင့် အမျိုးသမီးအလောင်းကို ဝါးမြိုထားဆဲ ဖြစ်သည်။

အလွန်ထူထပ်သော မီးတောက်များကြားတွင် လယ်သမားအိုကြီးမှာ မီးလောင်ဒဏ်ရာများဖြင့် နာကျင်စွာ အော်ဟစ်နေရသည်ကို ရေးရေးမျှ မြင်နေရသည်။

သို့သော်လည်း ထိုအမျိုးသမီးအလောင်းမှာမူ လှုပ်ရှားမှု မရှိဘဲ ငြိမ်သက်နေဆဲပင်။

သူမ၏ ခန္ဓာကိုယ်အတွင်းရှိ တစ်စုံတစ်ရာသော အစွမ်းက ထိုမီးတောက်များကို တားဆီးထားသည့်အလား ရှိသည်။

နတ်ဘုရားမီးများ ပျောက်ကွယ်သွားပြီးနောက်...

လယ်သမားအိုကြီး၏ အခြေအနေမှာ အလွန်ပင် သနားစဖွယ် ဖြစ်သွားရသည်။

တစ်ကိုယ်လုံးတွင် မီးလောင်ဒဏ်ရာများနှင့် အရည်ကြည်ဖုများ ပြည့်နှက်နေကာ အဝတ်အစားများမှာလည်း စုတ်ပြတ်နေပြီ ဖြစ်သည်။

သူ၏လက်ထဲတွင်မူ ရှေးဟောင်းဒင်္ဂါးပြား တစ်ပြားကို တင်းတင်းဆုပ်ထား၏။

အကယ်၍ ထိုဒင်္ဂါးပြားသာ မရှိလျှင် သူသည် လီယန်ချူ၏ နတ်ဘုရားမီးများအောက်တွင် ပြာအဖြစ် ပြောင်းလဲသွားလောက်ပြီ ဖြစ်သည်။

"သူ့ကို သတ်ပစ်စမ်း "

လယ်သမားအိုကြီးက အမျိုးသမီးအလောင်းကို နာကျင်စွာဖြင့် အော်ဟစ်အမိန့်ပေးလိုက်သည်။

ကရက်

သူ၏ ခန္ဓာကိုယ်အတွင်းမှ အရိုးများ ကျိုးကြေသွားသည့် အသံများ ထွက်ပေါ်လာသည်။

လယ်သမားအိုကြီး၏ မျက်နှာကို ကြည့်ရသည်မှာ ပြောမပြနိုင်လောက်အောင် နာကျင်နေပုံရ၏။

တစ်ချိန်တည်းမှာပင် ဘေးရှိ အမျိုးသမီးအလောင်းမှာ လီယန်ချူဆီသို့ ဝုန်းခနဲ ပြေးဝင်လာတော့သည်။

လေထဲတွင် အရိပ်တစ်ခုသာ ကျန်ရစ်ခဲ့ပြီး ယခင်ကထက် နှစ်ဆခန့် ပိုမိုမြန်ဆန်လာခြင်း ဖြစ်သည်။

'ဒါက ပူဇော်သက္ကာပြုတဲ့ အတတ် မျိုးလား '

လီယန်ချူ မျက်မှောင်ကြုတ်လိုက်မိသည်။

သူသည် ပြင်းထန်သော အရှိန်အဝါတစ်ခုကို ရှင်းလင်းစွာ ခံစားလိုက်ရသဖြင့် မှော်လက်နက်ကို လှုပ်ရှားလိုက်သည်။

မီးနဂါး ငါးကောင်မှာ ဟိန်းဟောက်လျက် ပျံသန်းလာကာ အမျိုးသမီးအလောင်းကို တိုက်ရိုက် ဝိုင်းရံလိုက်တော့သည်။

မီးနဂါးငါးကောင်စက်ဝန်း ၎င်းမှာ ဒဏ္ဍာရီလာ မှော်လက်နက်ကို အတုယူထားခြင်း ဖြစ်သည်။

မီးနဂါး ငါးကောင်မှာ ဆန်းကြယ်သော အစီအရင်တစ်ခုအဖြစ် ချိတ်ဆက်သွား၏။

အမျိုးသမီးအလောင်း၏ ဆံပင်နက်ရှည်ကြီးများမှာ လေထဲတွင် မြွေဟောက်ကြီးများအလား ကခုန်နေပြီး မီးနဂါးများနှင့် ရင်ဆိုင်တိုက်ခိုက်နေသဖြင့် ဆူညံသံများမှာ ဟိန်းထွက်နေသည်။

လယ်သမားအိုကြီး၏ မျက်နှာမှာ ဖြူလျော်နေပြီး လက်ဖြင့် အဆောင်အယောင်များ ပြုလုပ်ကာ... အေးစက်စက် အလင်းများ ထွက်ပေါ်နေသော ကြေးနီဓားမြှောင် တစ်လက်ကို ရင်ဘတ်ထဲမှ ထုတ်ယူလိုက်သည်။

ဓားအရှိန်အဝါမှာ အလွန်ပင် အေးစက်လှသည်

၎င်းမှာ အမှန်တကယ်ပင် စနစ်တကျ ကျင့်ကြံထားသော ဓားပျံအတတ် ပင် ဖြစ်သည် ကြေးနီဓားမြှောင်ပေါ်မှ နတ်ဘုရားအလင်းများ ထွက်ပေါ်လာကာ လယ်သမားအိုကြီး၏ ဘေးတွင် ငြိမ်သက်စွာ ဝဲပျံနေသည်။

ပတ်ဝန်းကျင်ရှိ လေထုနှင့် မြေပြင်မှာပင် ထိုဓားအရှိန်ကြောင့် ပြတ်တောက်တော့မည့်အလား ရှိနေသည်။

"သွား "

လယ်သမားအိုကြီးက အေးစက်စွာ အော်ဟစ်လိုက်သည်။

ကြေးနီဓားမြှောင်မှာ ဓားအလင်းတစ်ခုအဖြစ် ပြောင်းလဲသွားကာ လီယန်ချူ၏ လည်ပင်းဆီသို့ ဦးတည်၍ အရှိန်အဟုန်ဖြင့် ပြေးဝင်သွားတော့သည်။

လယ်သမားအိုကြီးမှာ အသက်ပင် မရှူရဲဘဲ စောင့်ကြည့်နေသည်။

သူသည် ယူမင်တောင်မှ ဖြစ်သဖြင့် အတွေ့အကြုံ အလွန်များသူဖြစ်သည်။

ထိုတာအိုဆရာလေးမှာ ပြတ်သားရိုင်းစိုင်းသလို လက်ထဲက မှော်လက်နက်တွေကလည်း ကြောက်စရာကောင်းသည်ကို သူ သိသည်။

အမှားအယွင်း တစ်ခုရှိလျှင် မိမိ သေသွားနိုင်သည်။

ထို့ကြောင့် သူသည် လီယန်ချူ၏ ပြင်းထန်လှသော ရုပ်ခန္ဓာအကာအကွယ်ကို ဖျက်ဆီးရန်အတွက် ထိုကြေးနီဓားမြှောင်ကို ထုတ်သုံးလိုက်ခြင်း ဖြစ်သည်။

သို့သော်လည်း... လီယန်ချူ၏ ကိုယ်ပေါ်တွင် ငါးရောင်ခြည် နတ်ဘုရားအလင်းများ ပေါ်ထွက်လာသည်။

ဒင်

ထိုကြေးနီဓားမြှောင်မှာ မြေပြင်ပေါ်သို့ တိုက်ရိုက် ပြုတ်ကျသွားတော့သည်။

နောက်တစ်စက္ကန့်တွင် ဆန်းကြယ်သော အင်အားတစ်ခု၏ ဆွဲခေါ်မှုကို ခံလိုက်ရကာ ပျောက်ကွယ်သွားတော့သည်။

ကျောက်စိမ်းပေတံ ၊ တာအိုအတတ် အဝေးမှ ပစ္စည်းကို ယူခြင်း

လီယန်ချူ၏ အကြည့်မှာ အေးစက်လှပြီး လယ်သမားအိုကြီး၏ ကြေးနီဓားမြှောင်ကို တစ်ချက်တည်းနှင့် သိမ်းယူလိုက်ခြင်း ဖြစ်သည်။

ယူမင်တောင်မှ လယ်သမားအိုကြီးမှာ အကြီးအကျယ် ထိတ်လန့်သွားတော့သည်။

မှော်လက်နက်တွေကို သိမ်းယူတဲ့ အတတ်လားသူ၏ စိတ်ထဲတွင် ဆဲဆိုလိုက်မိသည်။

ထိုကြေးနီဓားမြှောင်မှာ သူ အမြတ်တနိုး ထားရှိသော ရတနာဖြစ်ပြီး ပြင်းထန်သော ဓားအရှိန်အဝါ ရှိကာ မည်မျှပင် ခိုင်ခံ့သော ရုပ်ခန္ဓာကိုမဆို ဖျက်ဆီးနိုင်စွမ်း ရှိသည်။

သို့သော်လည်း ထုတ်သုံးရုံရှိသေးသည်တွင် တစ်ဖက်လူ၏ သိမ်းယူခြင်းကို ခံလိုက်ရလေပြီ။

သူသည် သက်ပြင်းတစ်ချက်ချကာ လက်ကို လက်သီးအဖြစ် ပြောင်းလဲလိုက်သည်။

ဗြုန်း

သူသည် မိမိ၏ ရင်ညွန့် ကို လက်သီးဖြင့် ထိုးလိုက်ရာ၊ သွေးတစ်လုပ်မှာ ဝေါခနဲ ထွက်လာတော့သည်။

ထိုသွေးများမှာ လေထဲတွင်ပင် ပျောက်ကွယ်သွား၏။

လှပချောမောသော အမျိုးသမီးအလောင်း၏ နှုတ်ခမ်းများမှာ ပိုမို၍ နီရဲကာ ဆွဲဆောင်မှု ရှိလာသည်။

သူမ၏ ကိုယ်ပေါ်မှ အလောင်းစိမ်းအရှိန်အဝါများမှာလည်း ပြန်လည် ပြင်းထန်လာကာ မီးနဂါးများကိုပင် အတင်းအဓမ္မ တွန်းထုတ်ပစ်လိုက်တော့သည်။

"အဆင့်မရှိတဲ့ မိစ္ဆာအတတ်တွေပါလား၊ မင်းမှာ သွေးဘယ်လောက်တောင် စီးထွက်စရာ ကျန်သေးလဲဆိုတာ ငါ ကြည့်ချင်သေးတယ် "

လီယန်ချူက လှောင်ပြောင်လိုက်သည်။

ဤသည်မှာ လူသတ်ရုံသာမက စိတ်ဓာတ်ကိုပါ ချိုးနှိမ်ခြင်း ပင် ဖြစ်သည်။

ငယ်ရွယ်သော တာအိုဆရာလေး တစ်ဦး၏ လှောင်ပြောင်မှုကို ခံလိုက်ရသဖြင့် လယ်သမားအိုကြီး၏ မျက်နှာမှာ အလွန်ပင် ကြည့်ရဆိုးနေတော့သည်။

အခန်း (၃၄၄) - ယင်ကုသိုလ်စက္ကူငွေ ၊ ဝိညာဉ်ခေါ်အတတ် ၊ ဖုန်းတူးလမ်းကြောင်း ၊ အလှည့်အပြောင်း

လယ်သမားအိုကြီးသည် သူ၏ရင်ဘတ်ထဲမှ စက္ကူငွေတစ်ရွက်ကို ထုတ်ယူလိုက်ရာ ထိုစက္ကူငွေပေါ်တွင် ဆန်းကြယ်သော အင်အားတစ်ရပ် ကိန်းအောင်းနေသည်။

"ကောင်းပြီ "

"အဆင့်မရှိတဲ့ မိစ္ဆာအတတ်တွေဆိုတာ ဒါမျိုးကို ပြောတာပဲ "

သူသည် အလွန်အမင်း ဒေါသထွက်သွားရာမှ ရယ်မောလိုက်သော်လည်း ထိုရယ်သံမှာ အလွန်ပင် ထူးဆန်းချောက်ချားဖွယ် ကောင်းလှသည်။

သူသည် ထိုရိုင်းစိုင်းပြတ်သားလှသော တာအိုဆရာလေးကို ဖုန်းတူး ထဲသို့ ပို့ဆောင်ပစ်ရန် ကြံစည်နေခြင်း ဖြစ်သည် သွေးလေနုပျိုပြီး အသက်ဓာတ်ပြည့်ဝလွန်းသော လူရှင်တစ်ယောက်အတွက် ဖုန်းတူးထဲသို့ ရောက်သွားခြင်းမှာ ဆူပွက်နေသော ဆီအိုးထဲသို့ ရေခဲရေ လောင်းထည့်လိုက်သကဲ့သို့ပင် ဖြစ်ပြီး ချက်ချင်းဆိုသလို ပေါက်ကွဲသွားပေလိမ့်မည်။

လီယန်ချူ မျက်မှောင်ကြုတ်လိုက်မိသည်။

ထိုစက္ကူငွေ၏ အရှိန်အဝါမှာ တစ်နေရာရာတွင် ရင်းနှီးနေသလို သူ ခံစားလိုက်ရသောကြောင့် ဖြစ်သည်။

သူသည် ဝိညာဥ်မျက်စိအတတ် ကို အသုံးပြုလိုက်ရာ မျက်ဝန်းအစုံမှ တရားသော အလင်းတန်းများ ဖျတ်ခနဲ ပေါ်ထွက်လာသည်။

"စိုက်ကြည့်နေဖို့ မလိုပါဘူး တာအိုဆရာလေး၊ ဒါက ယင်ကုသိုလ်စက္ကူငွေ ပဲ "

"ဒါက သေပြီးသားလူတွေအတွက် သီးသန့် မီးရှို့ပေးရတာမျိုးလေ "

လယ်သမားအိုကြီးက အေးစက်စက် လှောင်ပြောင်လိုက်သည်။

ယင်ကုသိုလ်

လီယန်ချူ မျက်ခုံးပင့်လိုက်မိသည်။

"ဒီယင်ကုသိုလ်စက္ကူငွေ ရှိမှသာ ဖုန်းတူးရဲ့ ဝင်ပေါက်ကို ဖွင့်နိုင်မှာ "

လယ်သမားအိုကြီးက စက္ကူငွေကို မီးညှိလိုက်သည်။

ဝူး

စက္ကူငွေပေါ်တွင် မြစိမ်းရောင် မီးတောက်များ တောက်လောင်လာပြီး သူ၏မျက်နှာမှာလည်း တစ်ခဏချင်းမှာပင် ဖြူလျော့သွားတော့သည်။

နက်ရှိုင်းသော ကန်ရေပြင်မှာ ဘေးနှစ်ဖက်သို့ ဖြည်းညှင်းစွာ ကွဲထွက်သွားပြီး နက်မှောင်မှောင် လမ်းကြောင်းကြီးတစ်ခု ပေါ်ထွက်လာသည်။

လယ်သမားအိုကြီး၏ အရေပြားများမှာ လက်မအလိုက် ကွဲအက်ကုန်ကာ သွေးများ စီးကျလာတော့သည်။

ကြည့်ရသည်မှာ အလွန်ပင် စက်ဆုပ်ဖွယ် ကောင်းလှသည် သူသည် ဖုန်းတူးဝင်ပေါက်ကို ဖွင့်ရုံသာမက လီယန်ချူကိုပါ အတင်းအဓမ္မ ဆွဲသွင်းရန် ကြိုးစားနေခြင်းဖြစ်သဖြင့် အလွန်ပြင်းထန်သော တန်ပြန်ဒဏ် ကို ခံစားနေရခြင်း ဖြစ်သည်။

"ဖုန်းတူးရဲ့ ဝင်ပေါက်က ဒီကန်ခြေမှာ ဖုံးကွယ်ထားတာလား "

လီယန်ချူ မျက်မှောင်ကြုတ်လျက်၊ အရှိန်အဝါ ကြောက်မက်ဖွယ်ကောင်းလှသော အမျိုးသမီးအလောင်းကို မသိမသာ ကြည့်လိုက်မိသည်။

ဤအမျိုးသမီးအလောင်းကရော ဖုန်းတူးထဲမှ ထွက်ပေါ်လာသည့် တားမြစ်ထားသော ဖြစ်တည်မှုတစ်ခုလား

"ဒါက ဖုန်းတူးဝင်ပေါက်ပဲ၊ တာအိုဆရာလေး... ဘာကို စောင့်နေတာလဲ "

လယ်သမားအိုကြီး၏ အသံမှာ ငရဲနက်ကြီးထဲမှ ထွက်ပေါ်လာသကဲ့သို့ ရှိနေပြီး ဝိညာဉ်ကို ညှို့ယူဖမ်းစားနိုင်သော စွမ်းအားများ ပါဝင်နေသည်။

ထိုကဲ့သို့သော ယင်ကုသိုလ်စက္ကူငွေမှာ သူ၏လက်ထဲတွင် သုံးရွက်သာ ရှိပြီး ဖုန်းတူးဝင်ပေါက်ကို ဖွင့်နိုင်သည်။

သို့သော်လည်း... တစ်ရွက်မှာမူ ယခင်က ဓားကိုင်ထားသော အမျိုးသမီး၏ လုယူခြင်းကို ခံလိုက်ရလေပြီ နာကျည်းစရာပင်

လီယန်ချူ၏ အမူအရာမှာ တည်ငြိမ်နေဆဲဖြစ်သည်။

သူ၏ ရင်ထဲတွင် ဖြောင့်မတ်သော စိတ်ဓာတ် ကိန်းအောင်းနေပြီး ကိုယ်ပေါ်မှ နတ်ဘုရားအလင်းတန်းများကြောင့် လယ်သမားအိုကြီး၏ ညှို့ယူဖမ်းစားသည့် အတတ်မှာ အနည်းငယ်မျှပင် သက်ရောက်မှု မရှိဘဲ ပျက်ပြယ်သွားတော့သည်။

"မသွားသေးဘဲ ဘာလုပ်နေတာလဲ "

လယ်သမားအိုကြီးသည် စူးရှစွာ အော်ဟစ်လိုက်ရာ မျက်စိ၊ နှာခေါင်း၊ နား၊ ပါးစပ် မှ သွေးများ စီးကျလာတော့သည်။

ယူမင်တောင်၏ သီးသန့်အတတ်ပညာများက ယခုအချိန်တွင် စွမ်းဆောင်လာပြီ ဖြစ်ကာ သူ၏ပါးစပ်မှ ဖောက်ထွင်းမြင်ရသော လှိုင်းတွန့်များ ဝေါခနဲ ထွက်ပေါ်လာသည်။

၎င်းက တစ်စုံတစ်ရာသော တားမြစ်ချက်ကို လှုပ်နှိုးလိုက်သကဲ့သို့ပင် နက်မှောင်သော လမ်းကြောင်းကြီးအတွင်းမှ ခုခံနိုင်စွမ်းမရှိသော ဆွဲငင်အားတစ်ခု ဝုန်းခနဲ ပေါ်ထွက်လာတော့သည်။

လီယန်ချူ၏ ခန္ဓာကိုယ်မှာ ထိုအားကြောင့် ယိမ်းထိုးသွားကာ ဖုန်းတူးလမ်းကြောင်းဆီသို့ လွင့်ပါသွားတော့သည်။

ဒါက လောကနိယာမ တစ်ခုလို ခံစားချက်မျိုးပင်။

လီယန်ချူအတွက် ထိုခံစားချက်မှာ ရင်းနှီးနေပြီး နတ်ဘုရား နယ်မြေ များအတွင်းသို့ ဝင်ရောက်ရသကဲ့သို့ပင် ဖြစ်သည်။

လယ်သမားအိုကြီး၏ နှုတ်ခမ်းထောင့်တွင်မူ ထူးဆန်းသော အပြုံးတစ်ခု ပေါ်လာသည်။

ဖုန်းတူးဆိုသည်မှာ ရှေးအစဉ်အဆက် လူရှင်များ မဝင်ရသော နေရာဖြစ်ပြီး၊ ထိုနေရာတွင် ကိုးသွယ်သော ငရဲမြစ် နှင့် သေလွန်သူတို့၏ နာကျည်းချက်များ စုဝေးနေသော ထူးဆန်းသည့် ကိစ္စရပ်များစွာ ရှိနေသည်။

ထို့အပြင် ကြောက်မက်ဖွယ် ရှေးဟောင်းတားမြစ်ချက်များလည်း ပိတ်လှောင်ထားသည့် နေရာပင်။

ထိုတာအိုဆရာလေးမှာ သွေးချီပြင်းထန်လွန်းလှသဖြင့် ဝင်သွားသည်နှင့် သေဖို့သာ ရှိတော့သည်။

သူသည် လီယန်ချူကို အေးစက်စက် ကြည့်ရင်း ရင်ထဲတွင် ကျေနပ်အားရနေတော့သည်။

မင်းလက်ထဲမှာ ယင်ဓာတ်တွေကို စုပ်ယူနိုင်တဲ့ ရတနာရှိရင်တောင်၊ ဖုန်းတူးထဲကနေ အသက်ရှင်လျက် ပြန်ထွက်လာနိုင်မှာ မဟုတ်ဘူး

ကြီးမားသော ကံကြမ္မာ အထောက်အပံ့ ရှိရင်တောင် အပိုပင်။

ဖုန်းတူးဆိုသည်မှာ ယင်ကုသိုလ်နှင့် ကုသိုလ်တရားကိုသာ အသိအမှတ်ပြုသည့် နေရာ ဖြစ်သည်။

သမုဒ္ဒရာကဲ့သို့ ကုသိုလ်တရား ကြီးမားသော တရားသောလမ်းစဉ်မှ ပုဂ္ဂိုလ်ကြီးများသာ ဖုန်းတူးထဲမှ အသက်ရှင်လျက် ထွက်လာနိုင်ခြေ ရှိသည်။

ယခုအချိန်တွင် လယ်သမားအိုကြီး၏ မျက်လုံးထဲ၌ လီယန်ချူမှာ သေလူတစ်ယောက်နှင့် မခြားတော့ပေ လီယန်ချူ၏ ပုံရိပ်မှာ နက်မှောင်သော လမ်းကြောင်းအတွင်း ပျောက်ကွယ်တော့မည့် အချိန်တွင် လယ်သမားအိုကြီးမှာ မသိမသာ အသက်ပင် အောင့်ထားလိုက်မိသည်။

ရုတ်တရက်

ပြင်းထန်လှသော ဆွဲငင်အားတစ်ခု ပြန်လည် ထွက်ပေါ်လာတော့သည်။

သန်မာလှသော အမျိုးသမီးအလောင်းပင်လျှင် ထိုဆွဲအားကြောင့် လီယန်ချူဆီသို့ တရွတ်တိုက် ပါသွားရရာ၊ လယ်သမားအိုကြီးဆိုလျှင် ပြောနေစရာပင် မလိုတော့ပေ

လီယန်ချူသည် ထျန်းကန်းလက်ဝါး ကို အသုံးပြုလိုက်ခြင်း ဖြစ်သည် သူသည် ပြင်းထန်သော အရှိန်အဝါများဖြင့် လယ်သမားအိုကြီးနှင့် အမျိုးသမီးအလောင်းကို အတင်းအဓမ္မ ဆွဲယူလိုက်ခြင်း ဖြစ်သည်။

လယ်သမားအိုကြီးမှာ တုံ့ပြန်ရန် အချိန်မရလိုက်ဘဲ သူ၏လက်မောင်းကို တစ်စုံတစ်ယောက်က ဖမ်းဆုပ်လိုက်သည်ဟု ခံစားလိုက်ရပြီး၊ ခုခံနိုင်စွမ်းမရှိသော ခွန်အားကြီးတစ်ခုကြောင့် ဖုန်းတူးလမ်းကြောင်းဆီသို့ တရကြမ်း ပါသွားတော့သည်။

"မင်းအဖေကိုလိုး..."

လယ်သမားအိုကြီး အော်ဟစ်လိုက်စဉ်မှာပင် သူ၏ပုံရိပ်မှာ ပျောက်ကွယ်သွားတော့သည်။

အမျိုးသမီးအလောင်းနှင့်အတူ သူတို့သုံးဦးလုံး ဖုန်းတူးသို့ ဦးတည်သော လမ်းကြောင်းအတွင်းသို့ တပြိုင်နက်တည်း ပျောက်ကွယ်သွားကြသည်။

လီယန်ချူသည် ပြင်းထန်သော မူးဝေမှုကို ခံစားလိုက်ရကာ မျက်စိရှေ့တွင် အမှောင်ကျသွားပြီးနောက်... ထူးဆန်းသော အာကာသနယ်မြေတစ်ခုသို့ ရောက်ရှိသွားတော့သည်။

ကောင်းကင်ယံမှာ မှောင်မှောင်အုံ့အုံ့ ရှိနေပြီး မြေပြင်မှာလည်း အဆုံးအစ မရှိလှပေ။

တစ်ကမ္ဘာလုံးမှာ တိတ်ဆိတ်ခြောက်ကပ်နေပြီး သေလွန်သူတို့၏ အဖြူအမဲ ကမ္ဘာတစ်ခုကဲ့သို့ ရှိနေသည်။

လယ်သမားအိုကြီးနှင့် အမျိုးသမီးအလောင်းမှာလည်း သူနှင့်အတူ ပါလာကြသည်။

"မင်းရဲ့ ရှစ်ဆက်မြောက် ဘိုးဘေးတွေကိုပါ ယိုးလိုက်မယ် "

လယ်သမားအိုကြီးသည် မျက်နှာပျက်လျက် ဆဲဆိုတော့သည်။

ထိုခွေးသူတောင်းစား တာအိုဆရာက သူ့ကို ဖုန်းတူးထဲအထိ ဆွဲသွင်းခဲ့သည် မဟုတ်ပါလား ဤနေရာမှာ လူရှင်များ မလာရသော နေရာဖြစ်သလို၊ သရဲလမ်းစဉ် ကျင့်ကြံသူများအတွက်ပင် အသက်အန္တရာယ် အလွန်များလှသော နေရာပင် ဖြစ်သည်။

"ထပ်ချမလား "

"မင်းပြောတဲ့ အဲ့ဒီ ကြောက်စရာကောင်းတဲ့ ဖြစ်တည်မှုတွေကို ငါတို့ တိုက်ပွဲနဲ့ ဆွဲခေါ်ကြည့်ရအောင်လေ"

လီယန်ချူက အေးစက်စက် ရယ်မောလိုက်သည်။

လယ်သမားအိုကြီး၏ အမူအရာမှာ တစ်ခဏချင်း တောင့်ခဲသွားကာ ပတ်ဝန်းကျင်ကို ထိတ်လန့်တကြား ကြည့်လိုက်မိသည်။

ထိုတာအိုဆရာလေးမှာ လူစိတ်မရှိပေ သို့သော် သူပြောသည်မှာ မှန်နေသည်။

အကယ်၍ သူတို့နှစ်ယောက်သာ လက်နက်ချင်း ထိခိုက်ပြီး ဆူညံသံများ ထွက်လာပါက ကြောက်မက်ဖွယ်ရာ အခြင်းအရာများကို ဆွဲခေါ်လာမိပေလိမ့်မည်။

လယ်သမားအိုကြီး ပါးစပ်ပိတ်လိုက်ရတော့သည်။

"မင်း... တကယ် ရက်စက်တာပဲ "

သူက အံကြိတ်ကာ လေသံနှိမ့်၍ ပြောလိုက်သည်။

လီယန်ချူကတော့ ဘာမှမပြောဘဲ ပြုံးနေရုံသာ။

သူသည် ထိုနယ်မြေကို သေချာ အာရုံခံကြည့်လိုက်ရာ ယင်ဓာတ် များမှာ အလွန်ပင် ထူထပ်နေသည်။

နေရာတိုင်းတွင် အလောင်းဓာတ်၊ သေခြင်းဓာတ်၊ အမင်္ဂလာဓာတ်နှင့် နာကျည်းချက်များ ပြည့်နှက်နေသော်လည်း ထူးဆန်းသည်မှာ လီယန်ချူ၏ စိတ်ထဲတွင် ကြောက်ရွံ့ခြင်း အလျဉ်းမရှိပေ။

'ငါ အရင်က ကျန်းထင်ရှန်း နဲ့ ချင်းယွဲ့ထန် နယ်မြေတွေကို ဝင်ခဲ့ဖူးလို့လား'

သူ တွေးလိုက်မိသည်။

ချင်းယွဲ့ထန်နယ်မြေမှာ တော်သေးသည်၊ အနည်းဆုံးတော့ ဝိညာဉ်စွမ်းအင် များ ကြွယ်ဝသည်။

သို့သော် ကျန်းထင်ရှန်းနယ်မြေမှာမူ ကောင်းကင်ယံ မှောင်မိုက်နေပြီး လူ့ငရဲဘုံတစ်ခုကဲ့သို့ ရှိနေသဖြင့် ထိုဖုန်းတူးနှင့် သိပ်မကွာလှပေ။

ထိုအချက်ကို တွေးမိသောအခါ လီယန်ချူ၏ နှုတ်ခမ်းမှာ တွန့်သွားသည်။

'အဲ့ဒီ ကျန်းထင်ရှန်း နယ်မြေကလည်း ဒီလိုမျိုး ငရဲဘုံလို နေရာမျိုး ဖြစ်နေမှာလား မသိဘူး '

သူ အများကြီး မတွေးရသေးခင်မှာပင်၊ ဘေးရှိ လယ်သမားအိုကြီးမှာ နှစ်ပေါင်း ရာချီသက်တမ်းရှိသော အလောင်းဆီ များကို ထုတ်ယူကာ မိမိကိုယ်ပေါ်တွင် လိမ်းကျံနေတော့သည်။

ထို့ပြင် ကြေးနီရောင် သန်းနေသော ရှေးဟောင်းဒင်္ဂါးပြားကိုလည်း ရင်ဘတ်တွင် ချိတ်ဆွဲထား၏။

ကြည့်ရသည်မှာ အလွန်ပင် အလောတကြီး ရှိနေသည်။

လယ်သမားအိုကြီးမှာ အလောင်းဆီများကို အသုံးပြု၍ မိမိ၏ လူနံ့ကို ပိတ်ဆို့နေခြင်း ဖြစ်သည်။

သို့မှသာ ဖုန်းတူးအတွင်းရှိ မကောင်းဆိုးဝါးများက သူ့ကို သတိမပြုမိနိုင်မည် ဖြစ်သည်။

ဖုန်းတူးထဲက ဘယ်လိုအရာတွေ ထွက်လာမလဲဆိုတာ ဘယ်သူသိမှာလဲ

သူသည် လီယန်ချူကို ကြည့်ရင်း လှောင်ပြောင်လိုက်မိသည်။

တာအိုဆရာတစ်ယောက်ဖြစ်ပြီး ကိုယ်ခံပညာကိုပါ ပူးတွဲကျင့်ကြံထားသဖြင့် သွေးလေပြင်းထန်လွန်းသော လီယန်ချူမှာ ထိုဖုန်းတူးထဲတွင် မီးမောင်းထိုးထားသကဲ့သို့ပင် ထင်ရှားနေပေလိမ့်မည်။

အသက်ရှင်ဖို့ဆိုတာ မဖြစ်နိုင်ဘဲ ကြောက်စရာကောင်းသည့် အရာများကိုသာ ဆွဲဆောင်မိပေလိမ့်မည်။

သို့သော် လယ်သမားအိုကြီးက လောလောဆယ်တွင် ဘာမှမလုပ်ရဲသေးပေ။

ဤတာအိုဆရာလေးမှာ ပုံမှန်အတိုင်း လုပ်တတ်သူ မဟုတ်သဖြင့် အကယ်၍ မိမိသာ ထွက်ပြေးရန် ကြိုးစားလျှင် ချက်ချင်းဆိုသလို တိုက်ခိုက်လာမည်မှာ သေချာသည်။

'တောက် သောက်ကျိုးနည်း တာအိုဆရာ '

လယ်သမားအိုကြီး စိတ်ထဲမှ ကျိန်ဆဲနေတော့သည်။

ထို့နောက် လီယန်ချူသည် ခြေရာခံ တာအိုအတတ်ကို စမ်းသပ်ကြည့်ရာ ဖန့်ချင်းလန်၏ အရှိန်အဝါကို ထပ်မံ တွေ့ရှိလိုက်ရပြန်သည်။

"တွေ့ပြီ "

သူ၏ မျက်လုံးများ တောက်ပသွားသည်။

အားလုံးပြီးဆုံးသွားသောအခါ သူသည် လယ်သမားအိုကြီးကို အေးစက်စက် လှမ်းကြည့်လိုက်သည်။

လယ်သမားအိုကြီးမှာ ပြင်းထန်သော အရှိန်အဝါတစ်ခု မိမိဆီသို့ ထိုးဝင်လာသကဲ့သို့ ခံစားလိုက်ရပြီး အလွန်အမင်း အန္တရာယ်ရှိသည်ဟု ယူဆလိုက်မိသည်။

သူ နောက်သို့ ခြေလှမ်းအနည်းငယ် ဆုတ်လိုက်ကာ ရန်သူကို အကဲခတ်နေတော့သည်။

"မင်းလို လူငယ်က တကယ်ပဲ အစမသိ အဆုံးမသိ ဖြစ်နေတာပဲ၊ ဒါက ဖုန်းတူး လျှို့ဝှက်နယ်မြေကွ၊ မင်းသာ လက်ရဲဇာတ်ရဲ လုပ်ရင် တားမြစ်ထားတဲ့ ဖြစ်တည်မှုတွေကို ဆွဲခေါ်မိလိမ့်မယ် "

လယ်သမားအိုကြီးက ပြောလိုက်သည်။

ဤသည်မှာ လီယန်ချူ သူ့ကို ယခင်က ခြိမ်းခြောက်ခဲ့သော စကားများပင် ဖြစ်သည်။

သို့သော် ယခုအချိန်တွင် လီယန်ချူမှာ သူနှင့် စနောက်နေရန် စိတ်မပါတော့ပေ။

ထိုမြေခွေးအိုကြီးမှာ နည်းလမ်းပေါင်းစုံ လှည့်ပတ်တတ်လွန်းလှသည်။

ယူမင်တောင် ဆိုသည်မှာလည်း မည်သို့သော နေရာမျိုးမှန်း မသိရဘဲ သူတို့၏ အတတ်ပညာများမှာ အလွန်ပင် ဆန်းကြယ်လွန်းနေသည်။

'သူ့ကို သတ်ရမယ် '

လီယန်ချူ၏ စိတ်ထဲတွင် အေးစက်လှသော သတ်ဖြတ်လိုစိတ်များ ပေါ်ပေါက်လာသည်။

ဤကဲ့သို့သော လူစားမျိုးကို ချန်ထားလျှင် နောင်တွင် ဘေးဒုက္ခများစွာ ပေးနိုင်သည် မဟုတ်ပါလား

လယ်သမားအိုကြီး၏ မျက်နှာမှာ အကြီးအကျယ် ပျက်သွားတော့သည်။

ဒီတာအိုဆရာလေးက ရူးနေတာလား ဒီနေရာမှာတောင် တိုက်ခိုက်တော့မှာလား။

ဖောက်

လယ်သမားအိုကြီး၏ ရင်ဘတ်မှာ တစ်ခုခု၏ ထိုးဖောက်ခြင်းကို ခံလိုက်ရသည်။

သေးသွယ်သော လက်တစ်ဖက်မှာ သူ၏ရင်ဘတ်ကို ဖောက်ထွက်ကာ နှလုံးသားကို ဆုပ်ကိုင်ထားသည်။

ဤအလှည့်အပြောင်းမှာ မြန်လွန်းလှသည် သူသည် အစားထိုးကောက်ရိုးရုပ်အတတ်ကိုပင် သုံးရန် အချိန်မရလိုက်ပေ သူသည် မယုံကြည်နိုင်စွာဖြင့် နောက်သို့ လှည့်ကြည့်လိုက်ရာ...

အမျိုးသမီးအလောင်းမှာ ဆံပင်များ ဖရိုဖရဲဖြစ်နေလျက်၊ ရဲရဲနီသော နှုတ်ခမ်းထောင့်တွင် ဆွဲဆောင်မှုရှိသော အပြုံးတစ်ခု ပေါ်နေသည်။

"ကောင်လေး... ဝူဆန်းမြေခွေးအို ရဲ့ မျိုးဆက်က တကယ့်ကို သတ္တိကောင်းတာပဲ၊ ငါ့ရဲ့ ကိုယ်ခန္ဓာကိုတောင် အသုံးချဖို့ ကြံရဲတယ်ပေါ့လေ "

အမျိုးသမီးအလောင်း၏ အသံမှာ အေးစက်လှပြီး ပြင်းထန်လှသော ဖိအားတစ်ခု ကိန်းအောင်းနေတော့သည်။