အခန်း (၄၀၃-၄၀၄)
Vol. 41 Ch. 403-404
အခန်း(403)
လော်ပင်းက ရှုပ်ထွေးနေပြီး သူမ၏ စကားကို ယုံကြည်နေပုံရကြောင်းကို မြင်ချိန်တွင်မှ တုန်လိလိလည်း သက်ပြင်းချနိုင်တော့သည်။
ထို့နောက် လင်းကျန်းဖူအား စူးစူးရဲရဲ စိုက်ကြည့်လိုက်ပြီး လော့်ပင်းနှင့်အတူ အမြန်ဆုံး ထွက်ခွာရန် ပြင်ဆင်လိုက်လေသည်။
သူမ ဤနေရာတွင် ဆက်မနေရဲတော့ပါချေ။ သို့မဟုတ်ဘဲ လင်းကျန်းဖူကသာ ဆက်လက် ပြောဆိုနေမည်ဆိုလျှင် သူမ၏ လျှို့ဝှက်ချက်များ အားလုံး ပေါက်ကြားသွားမည်ကို စိုးရိမ်နေရသည်။
“လော်ပင်း... တော်လိုက်တော့၊ လင်းကျန်းဖူဆိုတဲ့ ဒီအရူးမနဲ့ စကားဆက်မပြောနေနဲ့တော့၊ ကျွန်မ ထင်တာတော့ သူမက ကလေးမမွေးနိုင်လို့ ရူးသွားတာဖြစ်ရမယ်၊
ဒါကြောင့် ကျွန်မတို့ရဲ့ ကလေးကို အေးအေးဆေးဆေး မွေးမလာနိုင်အောင် နှောင့်ယှက်နေတာပဲ၊
သူမက တကယ့်ကို စိတ်ထားပုတ်သိုးနေတဲ့ မိန်းမပဲ၊ မြန်မြန် သွားကြရအောင်.. ကျွန်မတို့ရဲ့ ကလေးအတွက် တွေးပြီး သူမနဲ့ ဝေးဝေးမှာ နေကြရအောင်!”
သူမ စကားပြောဆိုပြီးသည့်အချိန်တွင်ပင် တစ်ဖက်ရှိ အမျိုးသမီး ဆရာဝန်မကြီး၏ စားပွဲဆီမှ အသံတစ်သံက ရုတ်တရက် ထွက်ပေါ်လာခဲ့လေသည်။
“မင်းရဲ့ စစ်ဆေးချက် ရလဒ်တွေက အကုန်လုံး အကောင်းအတိုင်းပါပဲ၊ ရဲဘော်လင်းကျန်းဖူ... မင်းရဲ့ ကလေးမွေးဖွားနိုင်စွမ်းက ဘာပြဿနာမှ မရှိဘူး”
အခန်းထဲတွင်ရှိနေသော လူများအားလုံးက အမျိုးသမီးဆရာဝန်ထံသို့ မသိစိတ်ဖြင့် လှမ်းကြည့်လိုက်ကြလေ၏။
လင်းရန်က မည်သည့်အချိန်ကတည်း လင်းကျန်းဖူ၏ အာထရာဆောင်းစစ်ဆေးချက်ရလဒ်များကို ဆရာဝန်မကြီးထံသို့ သွားရောက်ပေးအပ်၍ စစ်ဆေးခိုင်းထားသည်ကိုမသိပါချေ။
လက်ရှိတွင် ဆရာဝန်မကြီးက ဆေးစစ်ချက်များကို စစ်ဆေးပြီးဖြစ်ကြောင်း သတိပြုမိသွားကြလေသည်။
“ဒေါက်တာ...ကျွန်မတစ်ခုလောက် မေးပါရစေ.. ကျွန်မရဲ့ဒေါ်လေးမှာ ဘာပြဿနာမှ မရှိဘူးဆိုရင် သူတို့ဘာလို့ ဒီလောက်နှစ်အကြာကြီး ကလေးမရခဲ့ကြတာလဲ”
လင်းရန်က မည်သည်ကိုမျှ မသိနားမလည်သကဲ့သို့ ဟန်ဆောင်၍ မေးမြန်းလိုက်သည်။
အမျိုးသမီးဆရာဝန်မကြီးသည်လည်း လင်းရန်၏ မျက်လုံးထဲမှ အပြုံးရိပ်များကို ကြည့်လိုက်လေ၏။ ဤမိန်းကလေးက မည်သည်ကို ကြံစည်နေခြင်းဖြစ်ကြောင်းကို သူမ သေချာပေါက် ရိပ်မိသွားခဲ့သည်။
သို့သော်လည်း ဆရာဝန်တစ်ဦး၏ တာဝန်ဝတ္တရားအရဖြစ်စေ၊ ကျိုးကျယ်ပင်းနှင့်လည်း ရင်းနှီးသည့် စီနီယာတစ်ဦးအနေဖြင့် ဖြစ်စေ သူမက သဘာဝကျစွာဖြင့် လင်းရန်တို့ဘက်မှ ရပ်တည်ပေးရလိမ့်မည်။
သို့ဖြစ်၍ သူမက လော်ပင်းအား အဓိပ္ပာယ်ရှိစွာဖြင့် တစ်ချက်ကြည့်လိုက်ပြီးနောက် ရှင်းပြလိုက်လေသည်။
“ခုနက ဒေါက်တာကျိုး ပြောသွားသလိုပါပဲ ၊ ဇနီးမောင်နှံနှစ်ဦးက သားဆက်ခြားတဲ့ နည်းလမ်းတွေကို တကူးတက အသုံးမပြုဘဲ နှစ်အတော်ကြာအောင် ကလေးမရဘူးဆိုရင် အမျိုးသားမှာရော အမျိုးသမီးမှာပါ ပြဿနာရှိနိုင်တယ်ဆိုတာကို ထည့်သွင်းစဉ်းစားရလိမ့်မယ်”
“အခု မင်းရဲ့ဒေါ်လေးအတွက် အခြေအနေက ရှင်းသွားပြီ၊ သူမမှာ ဘာပြဿနာမှ မရှိသလို ကလေးမွေးဖွားနိုင်စွမ်းကလည်း ပုံမှန်ပါပဲ၊ ဒါကြောင့် ပြဿနာက တစ်ဖက်လူမှာပဲ ရှိနိုင်ပါလိမ့်မယ်”
ထိုတစ်ဖက်လူမှာ မည်သူဖြစ်မည်နည်းဟူသည်ကတော့ မေးစရာမလိုပါချေ။
လော်ပင်းသာလျှင် ဖြစ်ပေ၏။
“မဖြစ်နိုင်တာ! ငါ့မှာ ဘာလို့ ပြဿနာရှိရမှာလဲ ငါက အကောင်းအတိုင်းရှိနေတာလေ!”
လော်ပင်းက ထိုစကားကိုပင် ထပ်ခါတလဲလဲ ပြောဆိုနေပြီး သူတွင် ပြဿနာရှိနေသည်ဟူသောစကားကို ပြတ်ပြတ်သားသား ငြင်းဆိုနေခဲ့သည်။
သို့သော်လည်း အမျိုးသမီးဆရာဝန်၏ စကားများကြောင့် သူ၏စိတ်ထဲတွင် ရူးသွပ်မတတ် စိုးရိမ်ထိတ်လန့်မှုများ စတင်ပေါ်ပေါက်လာခဲ့ရသည်။
အကယ်၍ ဆရာဝန်တစ်ဦးကသာ ဤသို့ပြောလျှင် ကျိုးကျယ်ပင်းမှ သူ့အား တမင်ခြောက်လှန့်နေခြင်းဖြစ်သည်ဟု ဆိုနိုင်သော်လည်း ယခုဆရာဝန်မကြီးမှာ သူနှင့် မည်သည့်ရန်ငြိုးမျှမရှိပါချေ။
ထို့အပြင် လွန်ခဲ့သော နှစ်ဝက်အတွင်း တုန်လိလိအား ကိုယ်ဝန်ဆောင်စစ်ဆေးမှုများ လာရောက်ပြသခဲ့ဖူးသည့်အတွက် ဤဆရာဝန်မကြီးမှာ ဆေးကုသမှု ကျွမ်းကျင်ရုံသာမက ဆရာဝန်ကျင့်ဝတ်နှင့်လည်း ညီညွတ်သူဖြစ်ကြောင်း သူ ကောင်းစွာသိရှိထားခဲ့သည်။
ထို့ကြောင့် သူမက လိမ်ညာပြောဆိုနေရန် အကြောင်းမရှိပါချေ။
သို့ဆိုလျှင် ပြဿနာမှာ လင်းကျန်းဖူကြောင့် မဟုတ်ဘဲ သူကြောင့်သာ အမှန်တကယ် ဖြစ်နေမည်လား။
ဤမျှနှစ်ပေါင်းများစွာ ကြာသည်အထိ သူတို့မိသားစုတစ်ခုလုံး လင်းကျန်းဖူအား အပြစ်တင်ခဲ့ခြင်း၊ သူမအား သရော်သည့်စကားဖြင့် နှိပ်စက်ခဲ့ခြင်းနှင့် ဒေါသပုံချခဲ့ခြင်းများက လုံးဝမှားယွင်းနေခဲ့သည်ဟု ဆိုလိုသည်လား။
လင်းကျန်းဖူအား ကလေးမရအောင် ပြုလုပ်ခဲ့သူက သူကိုယ်တိုင်ဖြစ်နေသည်လား။
မဟုတ်ဘူး... မဖြစ်နိုင်ဘူး!
သူသည်က ပုံမှန်ယောကျ်ားတစ်ယောက်သာဖြစ်သည်။
ပြည့်စုံသော ယောကျ်ားတစ်ယောက်ဖြစ်၍ ကလေးမရနိုင်စရာ အကြောင်းမရှိပါချေ!
“မဖြစ်နိုင်တာ... ငါ့ဆီမှာ အခုတောင် ကလေးရှိနေပြီလေ၊ ငါ့မှာ ပြဿနာရှိစရာလား ဟုတ်တယ်မလား လိလိ... မင်းရဲ့ဗိုက်ထဲက ကလေးက အရာအားလုံးကို သက်သေပြနိုင်တယ်!”
လော်ပင်းက နောက်ဆုံးကျန်ရှိသော မြက်ပင်တစ်ပင်ကို ဆွဲကိုင်လိုက်သည့်အလား တုန်လိလိ၏လက်ကို အတင်းအဓမ္မ ဆုပ်ကိုင်လိုက်မိသောကြောင့် တုန်လိလိတစ်ယောက် နာကျင်လွန်းသောကြောင့် အော်ဟစ်လိုက်ရလေတော့သည်။
“အား... ရှင် ကျွန်မကို သတ်နေတာလား!”
သို့သော်လည်း လော်ပင်းက မည်သည့်စကားကိုမျှမကြားတော့သကဲ့သို့ တုန်လိလိအား မျက်လုံးအပြူးသားဖြင့်သာ စိုက်ကြည့်နေခဲ့ပေသည်။
“မြန်မြန်ပြောစမ်းပါ .. ငါ အကောင်းကြီးပဲလို့ မြန်မြန်ပြောလိုက်!”
တုန်လိလိအနေဖြင့် လော်ပင်းအား ယခုကဲ့သို့ စိတ်လွတ်ကိုယ်လွတ်ဖြင့် ရူးသွပ်နေသည့်ပုံစံမျိုး တစ်ခါမျှ မမြင်ဖူးခဲ့ပါချေ။
သူမက အလွန်အမင်း ထိတ်လန့်သွားသောကြောင့် လက်မှ နာကျင်မှုများကိုပင် ဂရုမစိုက်နိုင်တော့ဘဲ ခေါင်းကိုသာ ဆက်တိုက် ညိတ်ပြနေခဲ့ရသည်။
“ဟုတ်တယ်... ဟုတ်တယ်၊ ရှင့်ပြဿနာ မဟုတ်ပါဘူး..ဒါ လင်းကျန်းဖူရဲ့ ပြဿနာပဲ၊ သူတို့တွေ ပေါင်းပြီး ရှင့်ကို လိမ်နေကြတာ ကြည့်လေ.. ကျွန်မရဲ့ ဗိုက်ထဲမှာ ကလေးရှိနေတာပဲ ဒီကလေးက သက်သေပဲလေ!”
တုန်လိလိ၏ စကားကို ကြားရချိန်တွင် လော်ပင်းမှာ စိတ်သက်သာရာ ရသွားသင့်သော်လည်း ဆန့်ကျင်ဘက်အနေဖြင့် ပို၍ပင် ထိတ်လန့်လာကာ စိတ်မရှည်ခြင်းနှင့် မလုံခြုံခြင်းများသာ တိုးပွားလာခဲ့ပေသည်။
အထူးသဖြင့် တုန်လိလိနှင့် အတူရှိခဲ့သည့် ထိုအချိန်က သူ အလွန်အမင်း မူးယစ်နေခဲ့ကြောင်းကို ရုတ်တရက် သတိရမိသွားသည်။
ထိုညက မည်သို့သော အခြေအနေမျိုး ဖြစ်ခဲ့ကြောင်းကို သူ လုံးဝပင် မမှတ်မိပါချေ!
အကယ်၍ ဤကလေးကသာ သူ၏ကလေး အစစ်အမှန် မဟုတ်ခဲ့လျှင် သူက အမှန်တကယ်ပင်...
ထိုအချိန်မှာပင် လင်းရန်က ဘေးမှနေ၍ အေးဆေးတည်ငြိမ်စွာ စကားဆိုလိုက်လေသည်။
“အာ... တကယ်တော့ ဒီကိစ္စကို အဖြေရှာဖို့က အရမ်းလွယ်ပါတယ်၊ စစ်ဆေးမှုတစ်ခု သွားလုပ်လိုက်ရုံပါပဲ၊ ဒေါက်တာလည်း ဒီလိုပဲ ထင်တယ်မလား”
အမျိုးသမီးဆရာဝန်မကြီးက ခေါင်းညိတ်လိုက်သည်။
“ကျွန်မတို့ ဆေးရုံရဲ့ လက်ရှိ စက်ကိရိယာတွေက အတော်လေး ပြည့်စုံပါတယ်၊ တကယ်လို့ ရှင်တို့ စစ်ဆေးချင်တယ်ဆိုရင် စစ်ဆေးလို့ ရတယ်၊ ကျွန်မရဲ့ အကြံပြုချက်ကလည်း အဲလိုပဲ၊ စိတ်ချရအောင် စစ်ဆေးကြည့်တာက အကောင်းဆုံးပါပဲ ဘာပဲဖြစ်ဖြစ်...”
သူတစ်ပါး၏ ကလေးကို ကျွေးမွေးပြုစုနေရခြင်းမှာ ကြီးမားသော ပြဿနာတစ်ခုပင် မဟုတ်ပါလား။
အထူးသဖြင့် လော်ပင်းသည်က တုန်လိလိ ဗိုက်ထဲက ကလေးကို မည်မျှအထိ တန်ဖိုးထားကြောင်း သူမ ကောင်းစွာ သိရှိထားပေသည်။
သို့သော် ထိုကလေးမှာ သူ၏ကလေး ဖြစ်နေမှသာ ဖြစ်ပေလိမ့်မည်။
ပြန်လည်စဉ်းစားကြည့်လျှင် အကယ်၍ ထိုကလေးကသာ သူ၏ကလေး မဟုတ်ခဲ့ပါက လော်ပင်းမှာ အမှန်တကယ်ပင် သနားစရာ ကောင်းလွန်းပေလိမ့်မည်။
“ဘာစစ်ဆေးမှုလဲ.. စစ်စရာ မလိုပါဘူး လော်ပင်းမှာ ဘာပြဿနာမှ မရှိဘူးဆိုတာ ကျွန်မ သိတယ်၊ ရှင့်တို့ ဆေးရုံကတော့ ပိုက်ဆံရဖို့ဆိုရင် ဘယ်လိုစကားကိုမဆို ပြောနေတော့တာပဲ!”
လူတိုင်းက လော်ပင်းအား စစ်ဆေးမှု လုပ်ရန် တိုက်တွန်းနေကြသည်ကို မြင်ချိန်တွင် တုန်လိလိ၏ စိတ်ထဲတွင် အထိတ်ထိတ်အပြာပြာဖြစ်သွားရသည်။
အကယ်၍သာ လော်ပင်းက မြုံနေသူဖြစ်ကြောင်း အမှန်တကယ် စစ်ဆေးတွေ့ရှိသွားခဲ့လျှင် သူမ၏ ဝမ်းဗိုက်ထဲမှ ကလေးအကြောင်းမှာ အလိုလို ပေါက်ကြားသွားတော့မည် မဟုတ်ပါလား။
မည်သို့ပင်ဖြစ်စေ ကလေးမရနိုင်သော အမျိုးသားတစ်ဦး၏ ဇနီးက ကိုယ်ဝန် ရရှိနိုင်မည်မဟုတ်ပေ။
ထိုသည်မှာ သူမ ဝမ်းဗိုက်ထဲက ကလေးက သူ၏ကလေး မဟုတ်ဘဲ တခြားလူ၏ ကလေးဖြစ်ကြောင်းကို တိုက်ရိုက် သက်သေပြနေခြင်းပင် ဖြစ်ပေလိမ့်မည်။
သို့ဖြစ်၍ သူမက လော်ပင်းအား စစ်ဆေးမှု မလုပ်နိုင်အောင် တားဆီးရမည်ဖြစ်ပြီး အဖြစ်မှန်ကို သိရှိမသွားစေရန် လုံးဝ တားမြစ်ရမည် ဖြစ်ပေသည်။
တုန်လိလိက ပြောနေရင်းဖြင့် လော်ပင်း၏ လက်ကို ဆွဲကာ အပြင်သို့ ထွက်ရန် လုပ်ခဲ့လေတော့သည်။
“လော်ပင်း... သူတို့ရဲ့ စကားတွေကို နားမယောင်နဲ့၊ ယောကျ်ားတွေ ကလေးမရနိုင်ဘူးဆိုတာ ကျွန်မ တစ်ခါမှ မကြားဖူးပါဘူး
သူတို့က ပိုက်ဆံညှစ်ချင်လို့ ပြောနေတာ၊ နောက်ဆို ဒီလို စုတ်ပြတ်သတ်နေတဲ့ ဆေးရုံမျိုးကို ကျွန်မတို့ မလာတော့ဘူး အားလုံးက လိမ်ညာနေကြတာ!”
လော်ပင်း၏ စိတ်နှလုံးမှာ တုန်လိလိ၏ စကားများကြောင့် ယိုင်နဲ့လာခဲ့ရသည်။
အကယ်၍ သူသာ အမှန်တကယ် စစ်ဆေးမှု လုပ်ပြီးနောက် ဤကဲ့သို့ ရလဒ်မျိုး ထွက်လာခဲ့လျှင် သူ မည်သို့ လုပ်ဆောင်မည်နည်း။
သူ၏ ယောကျ်ားတစ်ဦးအနေဖြင့် သိက္ခာနှင့် မာန်မာနများ အားလုံး ပျက်စီးသွားရရုံသာမက လအတော်ကြာ မျှော်လင့်စောင့်စားခဲ့ရသော ကလေးမှာလည်း သူ၏ကလေး မဟုတ်ကြောင်း သိရှိသွားရမည် မဟုတ်ပါလား။
ဒါပေမဲ့ သူ မစစ်ဆေးခဲ့ရင်ရော...
တကယ်လို့ တုန်လိလိက သူ့အပေါ် ဖောက်ပြန်နေခဲ့မယ်ဆိုရင်...
လော်ပင်း ဝေခွဲမရ ဖြစ်နေချိန်မှာပင် လင်းရန်၏ စကားများက သူ၏ ဆုံးဖြတ်ချက်ကို ခိုင်မာသွားစေခဲ့လေတော့သည်။
“ဒေါက်တာ...ကျွန်မ ကြားဖူးတာတစ်ခု ရှိတယ် ၊ ကလေးမွေးပြီးရင် အဲဒီကလေးက မိဘတွေရဲ့ ကလေးအစစ် ဟုတ်၊ မဟုတ်ကို အရင်ခေတ်တုန်းက သွေးစစ်သလိုမျိုး ခွဲခြားလို့ ရတယ်ဆိုတာ ဟုတ်လား၊ အဲဒါက သိပ္ပံနည်းကျ ဖြစ်နိုင်လောက်လား”
ဆရာဝန်မကြီးက ခေါင်းညိတ်ပြလိုက်၏။
“အမှန်ပဲ၊ မြို့တော်က ကျွန်မရဲ့ သူငယ်ချင်းတွေဆီက ကြားရတာတော့ ‘မျိုးဗီဇ စစ်ဆေးခြင်း’ လို့ ခေါ်တဲ့ နည်းပညာတစ်ခုကို အခု စမ်းသပ်နေကြပြီတဲ့ နောက်ပိုင်းကျရင် ဒီနည်းပညာကို သုံးပြီး လူနှစ်ယောက်ကြားက သွေးသားတော်စပ်မှုကို ခွဲခြားနိုင်လိမ့်မယ်လို့ ဆိုကြတယ်”
လင်းရန်က ရုတ်တရက် သဘောပေါက်သွားဟန်ဖြင့် ပြောလာသည်။
“ဒါဆိုရင် ကလေးမွေးပြီးတဲ့အချိန် ကလေးကို ခေါ်လာပြီး မျိုးဗီဇ စစ်ဆေးလိုက်ရုံပဲပေါ့၊ အဲဒီကျရင် ကိုယ့်ရဲ့ကလေး ဟုတ်၊ မဟုတ်ဆိုတာ သိရမှာပေါ့နော်”
“ရဲဘော် လော်ပင်း... ရှင်က အခု စစ်ဆေးမှု မလုပ်ချင်ဘူးဆိုရင်တော့ စောင့်နေလို့ရတာပဲလေ၊ ကလေးမွေးပြီးတဲ့အချိန်မှပဲ သေသေချာချာ သွားစစ်လိုက်ပေါ့၊ ဒါပေမဲ့ နောက်ထပ် တစ်လကျော်လောက်တော့ စောင့်ရဦးမဲ့ပုံပဲနော်”
*
အခန်း(404)
လင်းရန်က ထိုစကားကို ရည်ရွယ်ချက်ရှိရှိ ပြောဆိုလိုက်ခြင်း ဖြစ်ပေသည်။ သူမက လော်ပင်းကို အနှေးနှင့်အမြန် ဤ ‘မျိုးရိုးစစ်ဆေးခြင်း’ ကို လုပ်ဆောင်ရမည်ဖြစ်ကြောင်း သိစေချင်ခြင်းသာ ဖြစ်လေ၏။
အကယ်၍ ထိုသို့သာဆိုလျှင် စောစောစီးစီး စစ်ဆေးလိုက်ခြင်းကသာ သူတစ်ပါးကလေးကို နောက်ထပ် တစ်လကြာအောင် အလကား ပြုစုနေရမည့် ဘဝမှ ကယ်တင်နိုင်မည် မဟုတ်ပါလား။
လော်ပင်းမှာ လင်းရန်၏ စကားကို ကြားချိန်တွင် သူ၏ စိတ်ထဲမှ ချိန်ခွင်လျှာမှာ ယခုချက်ချင်းစစ်ဆေးမှု ပြုလုပ်မည့်ဘက်သို့ မသိစိတ်ဖြင့် ယိမ်းယိုင်သွားခဲ့လေသည်။
မည်သို့ပင်ဖြစ်စေ လင်းကျန်းဖူ၏ စကားများနှင့် တုန်လိလိ၏ တုံ့ပြန်မှုများကြောင့် သူသည်က တုန်လိလိ ဝမ်းဗိုက်ထဲမှ ကလေးမှာ သူ၏ကလေး အစစ်အမှန် ဟုတ်၊ မဟုတ်ကို သံသယ ဝင်နေပြီ ဖြစ်ပေသည်။
သို့သော် သူ၏ ယောကျ်ားမာနကြောင့်သာ အတည်မပြုခဲ့ခြင်း ဖြစ်လေ၏။
သို့သော်လည်း အကယ်၍ ဤကလေးမှာ သူ၏ကလေး မဟုတ်ခဲ့ပါက သူ့အနေဖြင့် တုန်လိလိနှင့် သူမ၏နောက်ကွယ်မှ အရိုင်းအစိုင်းကောင်အတွက် နောက်ထပ် တစ်လကြာအောင် အလကား ပြုစုပေးနေရဦးမည် မဟုတ်ပါလား။
အရှက်ရခြင်းထက် သူတစ်ပါး၏ကလေးကို နောက်ထပ် တစ်လကြာအောင် ပြုစုပေးနေရမည်ကို သူ ပို၍ပင် လက်မခံနိုင်ဖြစ်နေခဲ့သည်။
စစ်ဆေးမှုမှာ အနှေးနှင့်အမြန် ပြုလုပ်ရမည်ဖြစ်၍ ယခုချက်ချင်း စစ်ဆေးလိုက်ခြင်းက ပို၍ကောင်းသည်မဟုတ်ပါလား။
လော်ပင်းတစ်ယောက် ဆုံးဖြတ်ချက် ချလိုက်သည့်အချိန်၌ပင် ဘေးနားရှိ တုန်လိလိမှာ ထိုသတင်းစကားကြောင့် လုံးဝ ထိတ်လန့်တုန်လှုပ်သွားရလေတော့သည်။
ဘာလဲ... ကလေးမွေးပြီးတာနဲ့ အရင်းအချာ ဟုတ်၊ မဟုတ်ကို ခွဲခြားလို့ရတယ်ဟုတ်လား။
သူမက သူမ၏ချစ်သူကို အလုပ်အကိုင် အဆင်ပြေသည်အထိ အရင်ဆုံးစောင့်ဆိုင်းပြီးမှ သူအောင်မြင်လာလျှင် လော်ပင်းကို ကွာရှင်းကာ ကလေးကိုခေါ်ပြီး ချစ်သူ၏နောက်သို့ လိုက်ရန် ကြံစည်ထားခြင်း ဖြစ်ပေသည်။
အကယ်၍သာ ကလေးမွေးပြီးသည်နှင့် လော်ပင်းက ထိုအစုတ်အပြတ် စစ်ဆေးမှုမျိုးကို လုပ်ဆောင်လိုက်ပါက အရာအားလုံးမှာ ချက်ချင်း ပေါက်ကြားသွားတော့မည် မဟုတ်ပါလား။
ထိုသို့ဆိုလျှင် လော်ပင်းက သူမတို့ သားအမိကို အဘယ်ကြောင့် ရိုးရိုးသားသား ပြုစုစောင့်ရှောက်ပါဦးမည်နည်း။
ထိုအချိန်ကျလျှင် သူမ၏ မီးနေကာလပင် မပြီးသေးမီမှာ သူမနှင့် ကလေးကို လော်မိသားစုက အိမ်ပေါ်မှ နှင်ထုတ်ပစ်လိမ့်မည်။
တုန်လိလိအနေဖြင့် ခေါင်းငုံ့ပြီး သူမ၏ ဝမ်းဗိုက်ကို ပွတ်သပ်ရင်းဖြင့် နောက်ထပ် တစ်လခန့်ဆိုလျှင် ကလေးမွေးတော့မည်ဟု ဆရာဝန် ပြောခဲ့သည်ကို ပြန်လည် တွေးတောနေမိသည်။
တစ်လပဲလိုတော့တာဆိုတော့ အခုမှ ကလေးကို ဖျက်ချဖို့ ကြိုးစားရင်လည်း မရလောက်တော့ဘူး။
သို့ဖြစ်၍ သူမ၏မိဘများက သဘောမတူသော ထိုအမျိုးသားနှင့် ရရှိထားသည့် ကလေးကို အိမ်သို့ ပြန်ခေါ်သွားလျှင်ပင် သူမ၏မိဘများမှာ မည်မျှ လက်မခံချင်နေလျှင်ပင် နောက်ဆုံးတွင် လက်ခံကြရလိမ့်မည်။
ဘာပဲဖြစ်ဖြစ် မွေးခါနီးဖြစ်နေတဲ့သမီးဖြစ်သူကို အိမ်ပေါ်ကတော့ နှင်မထုတ်ရက်လောက်ပါဘူး။ ဟုတ်တယ်မလား။
သူမက လော်ပင်းနှင့် လက်ထပ်ခဲ့ရခြင်းမှာလည်း တကယ်တမ်းတွင် မိဘများ၏ မျက်စိကို လိမ်ရန်နှင့် ကလေးကို ဘေးကင်းစွာ မွေးဖွားနိုင်ရန်အတွက် လော်ပင်းအား အသုံးချခဲ့ခြင်းသာ ဖြစ်ပေသည်။
ထိုအချိန်က သူမ၏မိဘများမှ ကလေးကို ဖျက်ချရန် အဆက်မပြတ် ပြောဆိုနေခဲ့ကြပြီး ဆေးရုံသို့ပင် အတင်းခေါ်သွားရန် ကြံစည်ခဲ့ကြသောကြောင့် ဖြစ်ပေ၏။ သူမအနေဖြင့် မည်သို့ လက်လျှော့နိုင်ပါမည်နည်း။
ထို့ကြောင့် နောက်ပိုင်းတွင် သူမ၏ရင်သွေးကို ပြုစုပေးမည့် တခြားအမျိုးသားတစ်ဦးကို ရှာဖွေရန်အတွက် အကြံရလာခဲ့ခြင်း ဖြစ်ပေသည်။
သို့သော် ယခုအချိန်တွင် ကလေးက မွေးဖွားတော့မည်ဖြစ်၍ ဖျက်ချရန် နည်းလမ်းမရှိတော့ပါချေ။ အိမ်သို့ပြန်ရောက်လျှင် အဆိုးဆုံးအနေဖြင့် မိဘများ၏ ပြင်းထန်သော ဆုံးမမှုကို ခံရရုံသာ ရှိပေလိမ့်မည်။
ထို့နောက်တွင်တော့ သူမ၏မိဘများက သူမအား ကူညီ၍ ကလေးကိုပြုစုပေးကြမည်ဖြစ်သောကြောင့် ဤသည်မှာလည်း မဆိုးသော ရလဒ်တစ်ခုပင် ဖြစ်ပေသည်။
ထိုသို့ဆိုလျှင် လော်ပင်းရှိနေရန် မလိုအပ်တော့သည့်ပုံရပေ၏။
ဤသည်ကို တွေးမိချိန်တွင် တုန်လိလိက စိတ်ကို တင်းလိုက်ပြီး လော်ပင်းနှင့် တရားဝင် ထိပ်တိုက်ရင်ဆိုင်ရန် ဆုံးဖြတ်လိုက်လေတော့သည်။
သူမက ခေါင်းကိုမော့ကာ စစ်ဆေးမှုပြုလုပ်ရန် ဆုံးဖြတ်ချက်ချထားသော လော်ပင်းအား ကြည့်လျက် တိုက်ရိုက်ပင် ပြောဆိုလိုက်လေသည်။
“လော်ပင်း... ကျွန်မတို့ ကွာရှင်းကြရအောင်”
“အခြေအနေတွေက ဒီလိုဖြစ်လာပြီဆိုတော့ ကျွန်မ ရှင့်ကို အမှန်အတိုင်း ပြောပြဖို့ မကြောက်တော့ပါဘူး၊ ကျွန်မရဲ့ဗိုက်ထဲက ကလေးက တကယ်ပဲ ရှင့်ကလေး မဟုတ်ဘူး
ကျွန်မ ရှင့်အပေါ် မှားခဲ့တယ်ဆိုတာ သိပေမဲ့ ကျွန်မမှာလည်း ကိုယ်ပိုင် အကြောင်းပြချက်တွေ ရှိတယ်၊ ဒါကြောင့် ရှင် ဒေါသထွက်တာကို ကျွန်မ နားလည်ပေးနိုင်တယ်
ဒါပေမဲ့ ရှင် ကျွန်မကို လက်ထပ်ခဲ့တုန်းကလည်း ကျွန်မရဲ့မိသားစုက အခြေအနေတွေ ကောင်းလို့ လက်ထပ်ခဲ့တာ မဟုတ်ဘူးလား
နောက်ပိုင်းမှာလည်း ကျွန်မတို့မိသားစုရဲ့ အဆက်အသွယ်တွေကြောင့်ပဲ ရှင် အလုပ်ကောင်းကောင်း ရခဲ့တာလေ၊ ဒါကြောင့် ကျွန်မတို့က တစ်ယောက်ကိုတစ်ယောက် အပြန်အလှန် အသုံးချခဲ့ကြတာပဲ
ဘယ်သူကမှ ဘယ်သူ့ကို အကြွေးမတင်ပါဘူး၊ အခုတော့ ပြီးပြတ်လိုက်ကြတာပေါ့”
“ဒီနေ့ပဲ ပြန်ပြီး ကွာရှင်းကြရအောင်၊ နောက်ဆိုရင် ကိုယ့်ဘဝနဲ့ကိုယ် အေးအေးဆေးဆေး နေကြတာပေါ့”
တုန်လိလိ၏ စကားလုံးအနည်းငယ်မှာ လေးလံလွန်းသော တူကြီးတစ်လက်နှင့် ထုနှက်လိုက်သကဲ့သို့ လော်ပင်းအား ပြင်းထန်စွာ ထိမှန်သွားခဲ့လေသည်။
သူ၏ မျက်စိများက ပြာဝေသွားရကာ သတိမေ့လဲလုနီးပါးပင် ဖြစ်သွားခဲ့ရသည်။
တုန်လိလိ ဘာပြောလိုက်တာလဲ!
သူမရဲ့ ဗိုက်ထဲက ကလေးက သူနဲ့ မဆိုင်ဘူးတဲ့လား...
သူ့ကလေး မဟုတ်ဘူး!
ဒါဆို သူမက သူ့ကွယ်ရာမှာ တကယ်ကြီး ဖောက်ပြန်နေခဲ့တာပေါ့!
မဟုတ်သေးဘူး!
သူမက အစကတည်းက သူနဲ့ ကောင်းကောင်းနေထိုင် ပေါင်းသင်းဖို့ စိတ်ကူးမရှိခဲ့တာပဲ။ သူမက အဲဒီအရိုင်းအစိုင်းကောင်နဲ့ အမြဲတမ်း အဆက်အသွယ် ရှိနေခဲ့တာပဲ။
ဒီကလေးကတောင် ထိုအဲဒီအရိုင်းအစိုင်းကောင်နဲ့ ရလာပြီးမှ သူ့ဆီကို ရောက်လာခဲ့တာ!
သူက ဦးထုပ်စိမ်းအဆောင်းခံလိုက်ရရုံတင် မကဘူး။
တစ်ဖက်သတ် အသုံးချခံလိုက်ရတာပဲ!
အဓိကအချက်က သူ့အနေဖြင့် ဤမျှကြာမြင့်သော အချိန်တစ်ခုလုံး မည်သည်ကိုမျှမသိဘဲ အရူးလုပ်ခံနေရခြင်းပင်။
တုန်လိလိနှင့် သူမ၏ ချစ်သူတို့က သူ့၏ကွယ်ရာတွင် မည်မျှကြာအောင် လှောင်ပြောင်နေခဲ့ကြသည်ကို မည်သူ သိပါမည်နည်း။
တုန်လိလိက သူ့အပေါ် ဘာလို့ ဒီလိုမျိုး လုပ်ရဲတာလဲ!
လော်ပင်းတစ်ယောက် မယုံကြည်နိုင်စွာဖြင့် မျက်လုံးများ ပြူးကျယ်သွားရကာ တုန်လိလိအား တစ်စစီ ဆွဲဖြဲပစ်တော့မည့်အလား ဒေါသတကြီး စိုက်ကြည့်လိုက်လေသည်။
“တုန်! လိ! လိ!!! မင်း... မင်း... မိန်းမယုတ်! ငါ မင်းကို သတ်ပစ်မယ်၊ ငါ မင်းကို အခုချက်ချင်း သတ်ပစ်မယ်!”
လော်ပင်းတစ်ယောက် ပြောနေရင်းဖြင့် စိတ်ထဲမှ ဒေါသများကို မထိန်းချုပ်နိုင်တော့ဘဲ တုန်လိလိထံသို့ ဒေါသတကြီး ခုန်အုပ်လိုက်လေတော့သည်။
သူသည်က ယခုအချိန်တွင် ဒေါသကြောင့် လုံးဝ စိတ်လွတ်နေပြီဖြစ်ကာ သူကိုယ်သူ မထိန်းချုပ်နိုင်တော့ပါချေ။
သူ၏စိတ်ထဲတွင် အတွေးတစ်ခုသာ ရှိနေသည်။
သူ့အား အရူးတစ်ယောက်ကဲ့သို့ ဆက်ဆံခဲ့သော တုန်လိလိကို သတ်ပစ်ရန်နှင့် ထိုလူယုတ်မာကိုပါ သတ်ပစ်ရန်သာ ဖြစ်ပေသည်။
လော်ပင်း၏ လှုပ်ရှားမှုမှာ အလွန်ပင် မြန်ဆန်လွန်းသောကြောင့် ဘေးနားရှိ ကျိုးကျယ်ပင်းပင် အချိန်မီ မတုံ့ပြန်နိုင်ခဲ့ပါချေ။
ကိုယ်ဝန်ဗိုက်ကြီးဖြင့် တုန်လိလိသည်ကား ပြောစရာပင်မလိုတော့ချေ။
“လော့... လော်ပင်း... ရှင် ဘာလုပ်တာလဲ ! တော်တော့... ရပ်လိုက်တော့!”
တုန်လိလိမှာ ထိတ်လန့်တကြားဖြင့် မျက်လုံးများ ပြူးသွားရကာ လော်ပင်း သူမထံသို့ ပြေးဝင်လာသည်ကို ငေးကြည့်နေခဲ့ရသည်။
ထို့နောက် လော်ပင်းက သူမ၏ ဝမ်းဗိုက်ကို အားအပြည့်ဖြင့် ထိုးနှက်လိုက်လေသည်။ တုန်လိလိက မသိစိတ်ဖြင့် ဝမ်းဗိုက်ကို ကာကွယ်လိုက်သော်လည်း လော်ပင်း၏ အားကို မခုခံနိုင်ခဲ့ပါချေ။
နောက်ဆုံးတွင် သူမက လော်ပင်း၏ လက်သီးကြောင့် နောက်သို့ အရှိန်ဖြင့် လန်သွားကာ မြေပြင်ပေါ်သို့ ဘန်းခနဲ လဲကျသွားခဲ့ရလေသည်။
သို့သော် သူမအား မြေပြင်ပေါ်သို့ ထိုင်ရက်လဲကျရသည့် နာကျင်မှုထက် ပို၍ ထိတ်လန့်စေသည်မှာ သူမ၏ ဝမ်းဗိုက်အတွင်းမှ ပြင်းထန်လွန်းသော နာကျင်မှုပင် ဖြစ်ပေသည်။
“ဗိုက်... ဗိုက်ထဲက... အား... ဗိုက်ထဲက အရမ်းနာတယ်၊ ကယ်ကြပါဦး... ကယ်ကြပါဦး!”
အမျိုးသမီးဆရာဝန်မှာ ထိုသည်ကို မြင်ချိန်တွင် တုန်လိလိအား ရွံမုန်းနေလျှင်ပင် ဝမ်းဗိုက်ထဲမှ ကလေးတွင် ပြဿနာ ဖြစ်ပွားနေသည်ကို ကြည့်မနေနိုင်တော့ပါချေ။
ယခု အခြေအနေမှာ အလွန်ပင် အန္တရာယ်ကြီးလှပေသည်။
အကယ်၍သာ သတိမထားပါက မိခင်ကိုရောကလေးကိုပါ အသက်ဆုံးရှုံးနိုင်ချေ ရှိနေခဲ့သည်။
သို့ဖြစ်၍ သူမက အလျှင်အမြန်ပင် ထရပ်လိုက်ပြီး ကျိုးကျယ်ပင်းအား တည်ငြိမ်သော မျက်နှာဖြင့် လော်ပင်းအား ချုပ်ထားရန် ခိုင်းစေလိုက်လေသည်။
တစ်ချိန်တည်းမှာပင် တုန်လိလိ၏ လက်ရှိ အခြေအနေကို စိုးရိမ်တကြီး စစ်ဆေးလိုက်လေသည်။
“ဒေါက်တာကျိုး... ဒီလူကို အရင်ဆုံး ဖယ်လိုက်ဦး၊ သူ နောက်ထပ် ဘာကိုမှ မလုပ်မိပါစေနဲ့၊ မဟုတ်ရင် လူသေမှု ဖြစ်သွားလိမ့်မယ်! ရဲဘော်လင်းတို့ နှစ်ယောက်... မြန်မြန်သွားပြီး ကျွန်မတို့ရဲ့ သူနာပြုတွေကို အထဲကိုဝင်လာဖို့ ခေါ်ပေးကြပါဦး!”
ကျိုးကျယ်ပင်း၊ လင်းရန်နှင့် လင်းကျန်းဖူတို့မှာလည်း ကိစ္စရပ်၏ ပြင်းထန်မှုကို ရိပ်မိသွားကြသောကြောင့် ချက်ချင်းပင် လှုပ်ရှားခဲ့ကြလေသည်။
လင်းရန်နှင့် လင်းကျန်းဖူတို့မှာ သူနာပြုများကို အကူအညီတောင်းရန် အပြင်သို့ ပြေးထွက်သွားကြပြီး ကျိုးကျယ်ပင်းကတော့ လော်ပင်း၏ လက်များကို မလှုပ်နိုင်အောင် တင်းကျပ်စွာ ချုပ်ကိုင်ထားခဲ့လေသည်။
လော်ပင်းမှာ တုန်လိလိအား ထပ်မံ၍ မတိုက်ခိုက်နိုင်တော့သော်လည်း ဒေါသမလျှော့နိုင်စွာ ဆက်လက် အော်ဟစ်နေဆဲပင်။
“ငါ့ကို မတားနဲ့၊ ငါ့ရှေ့က ဖယ်ကြစမ်း! ငါ တုန်လိလိနဲ့ ဗိုက်ထဲက အဲဒီလူယုတ်မာရဲ့ကလေးကို သတ်ပစ်မယ်၊ ဖယ်ကြစမ်း!”
နောက်ဆုံးတွင် သူနာပြုများနှင့် အပြင်မှ လူများ ရောက်ရှိလာကြပြီး ရှုပ်ထွေးနေသော အခြေအနေကို ဝိုင်းဝန်း ဖြေရှင်းပေးခဲ့ကြလေသည်။
လော်ပင်းအား လူအများက ဝိုင်းဝန်းချုပ်နှောင်ထားသောကြောင့် သူ၏ လှုပ်ရှားမှုများကို ခေတ္တမျှ ထိန်းချုပ်နိုင်ခဲ့ပြီး တုန်လိလိကိုတော့ ခွဲစိတ်ခန်းသို့ အမြန် ပို့ဆောင်လိုက်ရလေတော့သည်။
ဆရာဝန်မကြီးက သူမအား စစ်ဆေးပြီးနောက် လက်ရှိ အခြေအနေမှာ အလွန်ပင် စိုးရိမ်ရပြီး ကလေးမှာ လမစေ့ဘဲ မွေးဖွားရတော့မည်ကို သိရှိလိုက်သည်။
ထို့ကြောင့် မွေးဖွားရန် တစ်လခန့် လိုသေးသော်လည်း အခြေအနေအရ ကလေးကို အရင် မွေးထုတ်ရန်သာ ဆုံးဖြတ်လိုက်ရတော့သည်။
*