အခန်း (၂၁၉-၂၂၀)

အခန်း ၂၁၉

- အပိုင်း ၄၁ - တော်လှန်ရေးသမားအစစ် (၅)

ယူဂျွန်ဟော့သည် ‘လျှို့ဝှက်လှုပ်ရှားမှု’ နှင့် ‘ကိုယ်ပျောက်ဝတ်ရုံ’ ကို အသုံးပြု၍ စက်မှုဇုန်အတွင်းသို့ ဝင်ရောက်လာခဲ့သည်။

[သင်သည် ပင်မဇာတ်ဝင်ခန်း နယ်မြေအသစ်သို့ ဝင်ရောက်လာပါပြီ။]

မိစ္ဆာနယ်မြေ၏ စက်မှုဇုန်။ သူသည် ဒုတိယအကြိမ် နောက်ပြန်ဆုတ်စဉ်က မိစ္ဆာနယ်မြေသို့ လာရောက်ဖူးသော်လည်း ဤတစ်ခေါက်နောက်ပြန်ဆုတ်မှုအတွင်း ရောက်ရှိလာခြင်းမှာမူ ပထမဆုံးအကြိမ်ပင် ဖြစ်သည်။

သူသည် ပတ်ဝန်းကျင်ကို ဖြည်းညှင်းစွာ ဝေ့ဝိုက်ကြည့်ရှုလိုက်ရာ ထိုနယ်မြေတွင် လှည့်လည်သွားလာနေကြသော မြို့သူမြို့သားများကို မြင်တွေ့ရသည်။ သူတို့၏ မျက်နှာများတွင် ဇာတ်ဝင်ခန်းကို စွန့်လွှတ်လိုက်ကြပြီး ကမ္ဘာကြီးအပေါ် စိတ်ပျက်အားငယ်နေသည့် အရိပ်အယောင်များ ထင်ဟပ်နေ၏။

ထိုမြင်ကွင်းမှာ ယူဂျွန်ဟော့အနေဖြင့် အခြားသူများနှင့် သံယောဇဉ် တွယ်ရန် ခဲယဉ်းရသည့် အကြောင်းရင်းများထဲမှ တစ်ခုပင် ဖြစ်သည်။ သူသည် ထိုသို့သော စိတ်ပျက်အားငယ်မှုမျိုးကို မဝေမျှလိုပေ။ ဤခံစားချက်မှာ နောက်ပြန်ဆုတ်သူတစ်ဦးအတွက် အဆိပ်အတောက်အဖြစ်ဆုံး စိတ်ခံစားမှုတစ်ခု ဖြစ်ပေသည်။

'ငါ ထင်ထားတာထက် ပိုငြိမ်နေပါလား။ ကင်ဒေါ့ဂျာကြောင့် နယ်မြေတစ်ခုလုံး ဗရုတ်သုတ်ခတွေ ဖြစ်နေမယ်လို့ ထင်ထားတာ'

သူသည် ပတ်ဝန်းကျင်ကို ဝေ့ဝိုက်ကြည့်ရှုလိုက်သော်လည်း ကင်ဒေါ့ဂျာဟု ထင်ရသူကို မတွေ့ရပေ။ ကင်ဒေါ့ဂျာသာ ရှိနေပါက သူ၏ ပုံမှန်မဟုတ်သော အပြုအမူများကြောင့် အလွယ်တကူ သတိပြုမိနိုင်ပေလိမ့်မည်။

ယူဂျွန်ဟော့သည် ကင်ဒေါ့ဂျာ အမှန်တကယ် အသက်ရှင်လျက် ရှိမရှိကိုပင် တွေးတောမိသွားသည်။

"...စိတ်ရှုပ်စရာပဲ။ အရမ်းကြီးလွန်းနေတယ်"

[‘မိစ္ဆာကဲ့သို့ မီးလျှံတရားစီရင်သူ’ နက္ခတ်က သင်သည် မလိုအပ်သော စွန့်လွှတ်အနစ်နာခံမှုမျိုး မပြုလုပ်ရန် မျှော်လင့်နေပါသည်။]

သူသည် ခေါင်းကို လှည့်ကြည့်လိုက်ရာ ပါးဖောင်းနေသော ယူရီအယ် အရုပ်လေးကို မြင်လိုက်ရသည်။ ယူဂျွန်ဟော့သည် သက်ပြင်းသဲ့သဲ့ ချလိုက်ရင်း ပတ်ဝန်းကျင်ကို အာရုံစူးစိုက်ကာ ကြည့်ရှုလိုက်သည်။ သူသည် နတ်ခေါင်ချုပ်၏ ကိုယ်စားပြု ခန္ဓာကိုယ်နှင့်အတူ ဤနေရာသို့ ရောက်ရှိလာခြင်း ဖြစ်သောကြောင့် သူ၏ လုပ်ဆောင်ချက်များမှာ အကန့်အသတ် ရှိနေသည်။

'မြို့သူမြို့သား တစ်ယောက်ယောက်ကို ဖမ်းမေးရင် ကောင်းမလား...'

သူသည် အာရုံများကို စုစည်းလိုက်စဉ် မြို့သူမြို့သားများအကြား ပုန်းအောင်းနေသော မဟူရာစွမ်းအင်တစ်ခုကို ခံစားလိုက်ရသည်။ ထိုစွမ်းအင်မှာ မိစ္ဆာများ၏ ဝိသေသလက္ခဏာပင် ဖြစ်သည်။ အကယ်၍ မိစ္ဆာတစ်ဦး ဖြစ်နေပါက နတ်ခေါင်ချုပ်အနေဖြင့် ဘာမှ ပြောစရာ ရှိတော့မည် မဟုတ်ပေ။

'သူတို့ဆီမှာ သတင်းအချက်အလက် အများကြီး ရှိနေမှာပဲ'

ဟုတ်ပေသည်။ မိစ္ဆာတစ်ဦးမှာ အင်အားကြီးမားလှသည်။ သို့သော်လည်း ယူဂျွန်ဟော့မှာမူ အဆင့်ကျော်လွန်သူတစ်ဦး ဖြစ်၏။ သူသည် သူ၏ ထောက်ပံ့သူထံမှ စွမ်းအားကို ငှားရမ်းခြင်း မပြုဘဲ ဤနယ်ပယ်သို့ တက်လှမ်းလာနိုင်ခဲ့သူ ဖြစ်သည်။ နက္ခတ်တစ်ခုနှင့် အဆင့်တူညီသူ မဟုတ်ပါက ယူဂျွန်ဟော့ကို ခြိမ်းခြောက်နိုင်သူ အလွန်နည်းပါးလှ၏။

'ဟိုတစ်ယောက်ကိုဖမ်းမေးရင် အဆင်ပြေလောက်မယ်ထင်တယ်'

ယူဂျွန်ဟော့သည် စီးဆင်းနေသော ရေကဲ့သို့ပင် အရိပ်များအကြား လှုပ်ရှားသွားပြီး သူ အလိုရှိသော ပစ်မှတ်ကို လျင်မြန်စွာ ရှာဖွေတွေ့ရှိသွားသည်။ လန့်ဖျန့်သွားသော မိစ္ဆာအမတ်မှာ အော်ဟစ်ရန် ကြိုးစားသော်လည်း ယူဂျွန်ဟော့က စွမ်းအင်ကို အရင်ဆုံး အသက်သွင်းလိုက်သည်။

[သီးသန့်စွမ်းရည် ‘အသံလှိုင်းတားဆီးခြင်း’ အဆင့် ၁၀ အသက်ဝင်လာပါပြီ။]

မိစ္ဆာအမတ်၏ လည်ပင်းမှာ အဖမ်းခံလိုက်ရသည်။ ယူဂျွန်ဟော့က ပါးစပ်ကို ဖွင့်ကာ ပြောလိုက်သည်။

"အခုကစပြီး ငါ့မေးခွန်းတွေကို သေသေချာချာ ဖြေမယ်ဆိုရင် မင်းကို အသက်ချမ်းသာပေးမယ်"

အမှန်စင်စစ် သူသည် မိစ္ဆာကို အသက်ချမ်းသာပေးရန် ရည်ရွယ်ချက် မရှိသော်လည်း ဤသို့သာ ပြောလိုက်ခြင်း ဖြစ်သည်။ ဤသို့ပြောခြင်းက ပိုမို ထိရောက်ကြောင်းကို သူ၏ အတွေ့အကြုံများအရ သိရှိထားသောကြောင့်ပင်။

ဇဝေဇဝါ ဖြစ်နေသော မိစ္ဆာအမတ်က အော်ဟစ်လိုက်သည်။

"မင်း... မင်းက ဘယ်သူလဲ..."

"အားးးး။ အဲဒါက..."

ရက်ရက်စက်စက် တိုက်ခိုက်မှုများက မိစ္ဆာအမတ်ထံသို့ ကျရောက်သွားပြီး သူ၏ ခန္ဓာကိုယ်မှာ ခဏချင်းအတွင်းမှာပင် စုတ်ပြတ်သတ်သွားခဲ့သည်။ မိစ္ဆာအမတ်သည် မဟူရာသွေးများကို အန်ထုတ်ရင်း ကျိန်ဆဲမှု အမျိုးမျိုးကို ပြုလုပ်နေခဲ့သည်။ သို့သော်လည်း ငါးမိနစ်မပြည့်မီမှာပင် သူ၏ လေသံမှာ ပြောင်းလဲသွားခဲ့သည်။

"မေး... မေးပါ။ မင်း သိချင်တာ အကုန်မေးပါ"

ထိုအခါမှ ယူဂျွန်ဟော့က မေးခွန်းစလိုက်သည်။

"ကင်ဒေါ့ဂျာ..."

ယူဂျွန်ဟော့ စကားပြောနေရင်းမှ တစ်စုံတစ်ခုကို ရုတ်တရက် သတိရသွားသည်။ ‘ကင်ဒေါ့ဂျာ’ သည် ဤနေရာတွင် သူ၏ အမည်ရင်းကို သေချာပေါက် ထုတ်ပြောလိမ့်မည် မဟုတ်ပေ။ ထို့ကြောင့် ယူဂျွန်ဟော့က မေးခွန်းကို ပြောင်းလဲလိုက်သည်။

"ယူဂျွန်ဟော့ ဘယ်မှာလဲ"

[တစ်စုံတစ်ယောက်က ‘ယူဂျွန်ဟော့ ကြေညာချက်’ ကို ပြုလုပ်လိုက်ပါပြီ။]

[တစ်စုံတစ်ယောက်က ‘ယူဂျွန်ဟော့ ကြေညာချက်’ ကို ပြုလုပ်လိုက်ပါပြီ။]

မြောက်မြားလှစွာသော မြို့သူမြို့သားများက ‘ယူဂျွန်ဟော့’ ဟူသော အမည်ကို အော်ဟစ်နေကြသည်။ စက်မှုဇုန်တစ်ခုလုံး ‘ယူဂျွန်ဟော့’ များဖြင့် ပြည့်နှက်သွားသကဲ့သို့ပင်။ ကျနော် သတိပြန်ကပ်ကြည့်လိုက်မိချိန်တွင် စက်ရုံကြီးဆီသို့ ချီတက်နေကြသော ရေတွက်၍မရသည့် ‘ယူဂျွန်ဟော့’ များကို မြင်တွေ့လိုက်ရသည်။

"ငါက ယူဂျွန်ဟော့ပဲ"

"ငါက အစစ်အမှန် ယူဂျွန်ဟော့ကွ"

ကျနော်သည်လည်း သူတို့ကြားထဲတွင် လှုပ်ရှားသွားလာရင်း လက်တစ်ဖက်ကို မြှောက်လိုက်သည်။

"ယူဂျွန်ဟော့…ဝိုး..."

ယူဂျွန်ဟော့သာ ဤမြင်ကွင်းကို မြင်လိုက်ရရင် သိပ်ကောင်းမှာပဲ။

သူသာ ဤနေရာမှာ ရှိနေခဲ့လျှင် ဘယ်လိုမျက်နှာထားမျိုး ဖြစ်နေမလဲဆိုသည်ကို ကျနော် သိချင်မိသည်။

[‘တော်လှန်ရေးသမား ယူဂျွန်ဟော့’ ၏ အမည်မှာ ၇၃ ခုမြောက် မိစ္ဆာနယ်မြေအတွင်း ကျယ်ပြန့်စွာ ပျံ့နှံ့နေပါသည်။]

ကြယ်တာရာ ရုပ်သံထုတ်လွှင့်မှု ဆိုသည်မှာ ဇာတ်လမ်းများ၏ ကမ္ဘာပင် ဖြစ်သည်။ ဤနေရာရှိ မြို့သူမြို့သား အမြောက်အမြားက ယူဂျွန်ဟော့၏ အမည်ကို ဟစ်ကြွေးနေကြသောကြောင့် သူသည် အတော်အတန် အဆင့်ရှိသော ဇာတ်လမ်းများကို ရရှိနေပေလိမ့်မည်။ မြို့သူမြို့သားတွေ ဘာစိတ်ကူးပေါက်ပြီး ထအော်နေကြမှန်း ကျနော်မသိသော်လည်း သူကတော့ဖြင့် အလျှံပယ် စားသုံးနေရချေပြီ။

ထိုစဉ် ထူးဆန်းသော မက်ဆေ့ချ်တစ်ခုကို ကြားလိုက်ရသည်။

[သင်၏ ကျော်ကြားမှု မြင့်တက်လာနေပါသည်။]

ဟင်

[၇၃ ခုမြောက် မိစ္ဆာနယ်မြေအတွင်း ‘ကင်ဒေါ့ဂျာ’ ၏ ကျော်ကြားမှုမှာ လျင်မြန်စွာ မြင့်တက်နေပါသည်။]

မက်ဆေ့ချ်များမှာ ဆက်တိုက် ထွက်ပေါ်နေသည်။

...ဒါက ဘယ်လို အခြေအနေကြီးလဲ။ ငါက ငါ့နာမည်ကို တစ်ခါမှ ထုတ်မပြောခဲ့​ဘူးလေ

[ဒီ... ဒီအသုံးမကျတဲ့ကောင်တွေကတော့ကွာ...]

တစ်ဖက်တွင်မူ စော်ဘွား စစ်ဝစ်ဇ်သည် အလုံးအရင်းနှင့် တက်လာသော လူအုပ်ကြီးကြောင့် ဝေခွဲမရ ဖြစ်နေသည်။

[နောက်ဆုံး ကွပ်မျက်သူ သေဆုံးသွားပါပြီ။]

[စော်ဘွား စစ်ဝစ်ဇ်၏ ‘အုပ်စိုးသူ’ အာနိသင် ရပ်ဆိုင်းသွားပါပြီ။]

ထိုအခါမှ ဂျန်ဟာယောင်းသည် သူ၏ တာဝန်ကို အောင်မြင်စွာ ထမ်းဆောင်နိုင်ခဲ့ပြီ ဖြစ်ကြောင်း ကျနော် သိလိုက်ရသည်။

[စက်မှုဇုန်အတွင်းရှိ ကွပ်မျက်သူအားလုံး သေဆုံးသွားပါပြီ။]

[စက်မှုဇုန်အတွင်းရှိ လူတိုင်းသည် အုပ်စိုးသူအား ‘စီရင်ပိုင်ခွင့်’ ရရှိသွားပါပြီ။]

[ယခုအချိန်မှစ၍ ‘တော်လှန်ရေးည’ စတင်ပါပြီ။]

တော်လှန်ရေးည။ မြို့သူမြို့သားများသည် သူတို့ဘဝတွင် ပထမဆုံးအကြိမ် ကြားဖူးသည့် ဤမက်ဆေ့ချ်ကြောင့် စိတ်လှုပ်ရှားနေကြသည်။ စော်ဘွားကို စီရင်ပိုင်ခွင့်။ သူတို့တွင် အုပ်စိုးသူကို တိုက်ရိုက် အပြစ်ပေးနိုင်သည့် စွမ်းအား ရှိလာခဲ့ပြီ ဖြစ်သည်။

"ယေး…. သွားကြမယ်ဟေ့"

ကျောက်ဆောင်များကို ရိုက်ခတ်သည့် လှိုင်းလုံးကြီးများကဲ့သို့ပင် မြို့သူမြို့သားများသည် စက်ရုံကြီးဆီသို့ စုပြုံတိုးဝှေ့သွားကြသည်။ မြို့သူမြို့သားများမှာ သွေးသံရဲရဲ ဖြစ်နေပြီး များစွာသော လူတို့မှာ စက်ရုံကြီး၏ နင်းခြေခြင်းကို ခံနေရသော်လည်း ထိုသို့ဖြစ်နေခြင်းကပင် မြို့သူမြို့သားတို့၏ စိတ်ဓာတ်ကို ပိုမို တောက်လောင်စေခဲ့သည်။

"ဒါကို ဖျက်ဆီးပစ်ကြ"

ဤသံပုံကြီးကို ဖျက်ဆီးပစ်ရုံသာ လိုအပ်သည်ဟု မြို့သူမြို့သားများက တွေးနေကြသည်။ ဤသံမဏိ တံတိုင်းကို ကျော်ဖြတ်နိုင်ရုံနှင့် စော်ဘွားကို အပိုင်းပိုင်း ဆွဲဖြတ်ပစ်နိုင် ပေလိမ့်မည်။

「 သို့သော် မြို့သူမြို့သားများ မသိရှိကြသည်မှာ - ဤစက်ရုံကြီးသည် ဤတော်လှန်ရေး၏ အကြီးမားဆုံးသော အတားအဆီး ဖြစ်နေခြင်းပင်။ 」

ဧရာမ ကြိတ်စက်ကြီးက စတင် လည်ပတ်လာပြီး မျက်စိတစ်မှိတ်အတွင်းမှာပင် မြို့သူမြို့သားများမှာ အပိုင်းပိုင်း ပြတ်တောက်သွားကြသည်။

"အားးးးး"

"နောက်ဆုတ်ကြ"

တော်လှန်ရေး ဇာတ်ဝင်ခန်းတွင် တော်လှန်ရေးည ဆိုသည်မှာ စော်ဘွား အားအနည်းဆုံး အချိန်ဖြစ်သည်။ အဘယ်ကြောင့်ဆိုသော် စက်မှုဇုန်ရှိ မြို့သူမြို့သားတိုင်း စော်ဘွားကို သတ်နိုင်သည့် စွမ်းအား ရရှိသွားသောကြောင့်ပင်။ သို့သော်လည်း ကန့်သတ်ချက်များ ရှိနေ၏။ စော်ဘွားသည် စက်ရုံကြီးအတွင်းမှ ထွက်လာရန် လိုအပ်သည်။

"ချီး။ ဒါက အရမ်းမာလွန်းတယ်"

စက်ရုံကြီး၏ အခွံမှာ မည်မျှပင် ထုရိုက်ပါစေ ပျက်စီးသွားခြင်း မရှိပေ။ စော်ဘွားက ရယ်မောလိုက်သည်။

[မိုက်မဲလိုက်ကြတာ]

တစ်ချိန်က သူသည်လည်း တော်လှန်ရေးသမား တစ်ဦး ဖြစ်ခဲ့ဖူးသည်။ ထို့ကြောင့် သူသည် ဤကဲ့သို့သော နေ့ရက်မျိုးအတွက် ဘယ်သောအခါမှ မတွေးထားခဲ့ပေ။ တော်လှန်ရေးည ဆိုသည်မှာ စော်ဘွားတစ်ဦးအတွက် အန္တရာယ်အရှိဆုံး အချိန်ဖြစ်သည်။ သို့သော်လည်း စက်ရုံကြီးထဲက ထွက်မလာသရွေ့ စော်ဘွားသည် အကြွင်းမဲ့ လုံခြုံနေပေလိမ့်မည်။

[ဒီစက်ရုံကို ဖျက်ဆီးနိုင်တဲ့အရာ ဘာမှ မရှိဘူး]

ထို့ကြောင့်ပင် စော်ဘွားသည် သူ၏ စက်ရုံကို ကမ္ဘာပေါ်တွင် အမာကျောဆုံး ပုံစံဖြင့် တည်ဆောက်ထားခြင်း ဖြစ်သည်။ စက်ရုံကို ငရဲပြည်ရှိ ဘီလူးစစ်သည်တော်ကို အခြေခံ၍ တည်ဆောက်ထားခြင်း ဖြစ်သည်။ ကြောက်မက်ဖွယ်ကောင်းသော ဤဇာတ်လမ်း လက်နက်ကို မြို့သူမြို့သားများ၏ စွမ်းအားနှင့် ဖျက်ဆီးရန်မှာ မဖြစ်နိုင်ပေ။

စော်ဘွား၏ လှုပ်ရှားမှုများတွင် ကရုဏာတရား အနည်းငယ်မျှ မပါချေ။ ကြိတ်စက်ကြီး လှုပ်ရှားလိုက်တိုင်း မြို့သူမြို့သားများ၏ ခန္ဓာကိုယ်များမှာ အပိုင်းပိုင်း ပြတ်ထွက်ကုန်သည်။ ကောင်းကင်ယံမှ သွယ်ဝိုက်သော မက်ဆေ့ချ်များမှာ မိုးရေစက်များကဲ့သို့ ရွာသွန်းလာသည်။

[‘နုဗာရစ်ချ် ဆရာမြွေကြီး’ နက္ခတ် သည် သွေးချောင်းစီးနေသော စစ်မြေပြင်တွင် ယစ်မူးနေပါသည်။]

[‘လက်သည်းစား ကြွက်’ နက္ခတ် သည် လူသတ်ပွဲကြောင့် စိတ်လှုပ်ရှားနေပါသည်။]

မြို့သူမြို့သားများ၏ တပ်စုများ ပြိုကွဲသွားသည်နှင့်အမျှ ဒင်္ဂါး မက်ဆေ့ချ်များမှာလည်း တရစပ် ဝင်လာသည်။

"အားးးးး"

ဖျက်ဆီး၍မရနိုင်သော ခိုင်မာသည့် အပြင်ဘက်တံတိုင်းကြီးရှေ့တွင် တော်လှန်ရေးကြီးမှာ ပြိုလဲလုနီးပါး ဖြစ်နေချေပြီ။

"အိုင်လင်း။ အားလုံး အဆင်သင့်ဖြစ်ပြီလား"

"ယာယီ ပြုပြင်တာတွေတော့ ပြီးသွားပြီ။ ဒါပေမဲ့ တိုက်ပွဲက..."

"ရပါတယ်။ ငါ တစ်ကြိမ်လောက် လှုပ်ရှားဖို့ပဲ လိုတော့တာပါ"

ကျနော်က ခပ်ပြတ်ပြတ်ပင် ပြန်ပြောကာ မတ်တပ်ရပ်လိုက်သည်။ ဤသည်က ဇာတ်လမ်းပြုပြင်မှုဖြင့် ကျနော် တောင့်ခံနိုင်သည့် အကန့်အသတ်ပင် ဖြစ်ပေလိမ့်မည်။

[ဘယ်မှာ ပုန်းနေကြတာလဲ။ မာနထောင်လွှားတဲ့ တော်လှန်ရေး ကြေညာချက်ကို နောက်တစ်ခါ ထပ်ရွတ်ပြကြစမ်းပါဦး]

စော်ဘွား၏ အသံကို နားထောင်ရင်း ရှေ့သို့ ကျနော်တိုးထွက်လိုက်သည်။ ‘မကျိုးပဲ့နိုင်သောယုံကြည်မှု’ဓါး ကို မြဲမြံစွာ ဆုပ်ကိုင်လျက် ခြေတစ်လှမ်းချင်း လှမ်းလာခဲ့သည်။ လွန်ကဲသော ဖြစ်နိုင်စွမ်း အသုံးပြုမှုကြောင့် စက်ရုံကြီး၏ အပြင်ဘက်အခွံ ပတ်ပတ်လည်တွင် လျှပ်စစ်မီးပွားများ ထွက်ပေါ်လာသည်။ စက်ရုံကြီးသည် သိသာထင်ရှားစွာပင် ဇာတ်ဝင်ခန်း၏ ပြင်ပမှ စွမ်းအားတစ်ခု ဖြစ်နေသည်။ တရားမျှတမှုမရှိသော ဤဇာတ်ဝင်ခန်းကို ထောက်ပံ့နေကြသူများမှာ နက္ခတ်များပင် ဖြစ်သည်။

「 ကင်ဒေါ့ဂျာက တွေးနေမိသည် - တကယ်လို့ စော်ဘွားက ဇာတ်ဝင်ခန်းပြင်ပက စွမ်းအားနဲ့ လူတွေကို နှိပ်စက်နေတာဆိုရင် ငါလည်း အဲဒီလို လုပ်နိုင်ရမှာပဲ 」

"ဘီယူ"

ပုန်းအောင်းနေသော ဘီယူသည် [ဘတ်] ဟူသော အသံနှင့်အတူ ထွက်ပေါ်လာသည်။

"ရုပ်သံလိုင်းရဲ့ လှိုင်းနှုန်းကို ငရဲပြည်အထိ ချဲ့လိုက်စမ်း"

ယခုလက်ရှိ ဘီယူအတွက်မူ ဤသည်မှာ ခက်ခဲကောင်း ခက်ခဲနိုင်သော်လည်း ဤသို့မလုပ်ဆောင်ပါက ကျနော် ဤနည်းလမ်းကို အသုံးပြုနိုင်မည် မဟုတ်ပေ။

"နင် လုပ်နိုင်မလား"

ဘီယူသည် ပင်ပန်းနွမ်းနယ်နေပုံ ရသော်လည်း ခေါင်းငြိမ့်ပြရှာသည်။

[ဘတ်]

ဤသည်မှာ အမှန်တကယ်ပင် နောက်ဆုံးလက်နက် ဖြစ်သည်။ ကျနော် ငရဲပြည်သို့ ဒုတိယအကြိမ် ရောက်ရှိခဲ့စဉ်က မှတ်ဉာဏ်များကို ပြန်လည် အမှတ်ရမိသည်။

— ဒါက ဧရာမ စစ်သည်တော်တစ်ယောက်ကို ဖန်တီးဖို့အတွက် သော့ချက်ပဲ။ နားလည်လား။

— အိုး... ဒီလိုကိုး။ ဟေ့... တကယ် ကျေးဇူးတင်ပါတယ်။

— ကောင်းပြီလေ။ တကယ် ကျေးဇူးတင်တယ်ဆိုရင် ထုတ်လုပ်သူနေရာမှာ ငါ့နာမည်ကို ထည့်ပေးပါ။

ကျနော်သည် ဤဇာတ်လမ်းလက်နက်ကို ယခုအချိန်အထိ အသုံးမပြုခဲ့ခြင်းမှာ ထိုလက်နက်သည် အလွန်ကြီးမားသော ဖြစ်နိုင်စွမ်းကို ဝါးမျိုသောကြောင့် ဖြစ်၏။ ထိုဇာတ်လမ်းလက်နက်သည် ဆင့်ခေါ်လိုက်ရုံမျှဖြင့် ဖြစ်နိုင်စွမ်း မုန်တိုင်းကို ဖြစ်ပေါ်စေနိုင်သည့် လက်နက်မျိုး ဖြစ်သည်။ ထို့ကြောင့် ‘ဂိုင်ဂန်တိုမာခီယာ’ ဇာတ်ဝင်ခန်း မဟုတ်ပါက ဤလက်နက်မှာ ဖြစ်နိုင်စွမ်းအားဖြင့် ကန့်သတ်ခံထားရလေသည်။ ကျနော့်တွင် အစွမ်းထက်ဆုံးသော ဓါး ရှိနေလျှင်ပင် ဤလက်နက်ကို ဆင့်ခေါ်ရန်မှာ မဖြစ်နိုင်ပေ။

"ရွှေခေါင်းကွင်း၏အကျဉ်သား"

သို့သော် ကျနော် တစ်ယောက်တည်း မဟုတ်ပါက ဇာတ်လမ်းမှာ အနည်းငယ် ပြောင်းလဲသွားပေလိမ့်မည်။

[‘ရွှေခေါင်းကွင်း၏အကျဉ်သား’ နက္ခတ်က သင့်ကို ကြည့်နေပါသည်။]

"ကျနော့်ကို ကူညီပေးပါဦး"

ကောင်းကင်တစ်မျှ မဟာပညာရှိ၏ အကူအညီနှင့်ပင် ထိုလက်နက်ကို ဆင့်ခေါ်နိုင်ရုံသာ ရှိသေးသည်။ သို့သော်လည်း ထိုလက်နက်ကို ဆင့်ခေါ်နိုင်ရုံမျှဖြင့် ကျနော် အနိုင်ရရှိနိုင်လေသည်။

[‘ရွှေခေါင်းကွင်း၏အကျဉ်သား’ နက္ခတ်က ဤသည်မှာ ဇာတ်ဝင်ခန်း၏ တရားမျှတမှုကို ဆန့်ကျင်နေသည်ဟု ဆိုပါသည်။]

"ကျနော်က ဒီဇာတ်ဝင်ခန်းကို ပြောင်းလဲပစ်ချင်လို့ပါ"

ကျနော် စကားပြောခြင်းကို ရပ်တန့်လိုက်ပြီး လျှပ်စစ်မီးပွားများ ပျံ့လွင့်နေသော စက်ရုံကြီးကို လှမ်းကြည့်လိုက်သည်။ မြို့သူမြို့သားများသည် စီရင်ပိုင်ခွင့်များကြောင့် အစွမ်းတိုးလာနိုင်သော်လည်း စော်ဘွားကိုမူ လက်ဖျားနှင့်ပင် မထိနိုင်ကြသေးပေ။ အကယ်၍ ဤအတိုင်းသာ ဆက်သွားနေပါက စက်မှုဇုန်ရှိ လူဦးရေအားလုံးမှာ နောက်ထပ် မိနစ်အနည်းငယ်အတွင်း သုတ်သင်ခံရပေလိမ့်မည်။

"ပြီးတော့ ဒီဇာတ်ဝင်ခန်းက တရားမျှတမှု မရှိတော့တာ တော်တော်ကြာနေပြီ မဟုတ်ဘူးလား"

[‘ရွှေခေါင်းကွင်း၏အကျဉ်သား’ နက္ခတ်သည် စိတ်အနှောင့်အယှက် ဖြစ်နေပါသည်။]

ချီး။ ငါတို့ နည်းနည်း ပိုပြီးရင်းနှီးသွားပြီလို့ ထင်ထားတာ။

မူလကပင် ကောင်းကင်တစ်မျှ မဟာပညာရှိသည် ဤကဲ့သို့သော ကိစ္စရပ်များတွင် အလွယ်တကူ ပါဝင်ပတ်သက်တတ်သူ မဟုတ်ပေ။ သူ ကျနော့်စကားကို နားထောင်နေခြင်းမှာပင် အံ့ဖွယ်တစ်ခု ဖြစ်နေနိုင်ပါသည်။

"ဒီကောင်တွေကို ဒီအတိုင်းပဲ လွှတ်ထားတော့မှာလား။ သူတို့က ဖြစ်နိုင်စွမ်းကို အရင်ဆုံး လုယူခဲ့တဲ့သူတွေလေ"

[‘နုဗာရစ်ချ် ဆရာမြွေကြီး’ နက္ခတ်သည် ရောထွေးနေသော အခြေအနေကြောင့် ဝမ်းမြောက်နေပါသည်။]

"သူတို့ကို တားဆီးဖို့ ဒီမှာ ဒိုကဲဘီတွေလည်း မရှိဘူး"

ကောင်းကင်တစ်မျှ မဟာပညာရှိသည် တိတ်ဆိတ်နေသည်။ ပြန်စဉ်းစားကြည့်လျှင် သူသည် ‘ဘုရင်မဲ့ကမ္ဘာ၏ဘုရင်’ ဇာတ်လမ်းစဉ်အတွင်းမှာပင် ကျနော့်ကို ဖြစ်နိုင်စွမ်း ငှားရမ်းပေးခဲ့ခြင်း မရှိပေ။ နောက်ဆုံးတွင် ကျနော်သည် တားမြစ်ချက်တစ်ခုကို ချိုးဖောက်လိုက်ရတော့သည်။

"အစောပိုင်းက ထူးဆန်းတဲ့ မက်ဆေ့ချ်တစ်ခု လက်ခံရရှိခဲ့သေးလား"

[‘ရွှေခေါင်းကွင်း၏အကျဉ်သား’ နက္ခတ်က သင် ဘာကို ဆိုလိုသနည်းဟု မေးမြန်းနေပါသည်။]

"ကျနော်လည်း အသေးစိတ်တော့ မသိဘူး၊ ဒါပေမဲ့ ပျောက်ဆုံးနေတဲ့ အမွေးအမျှင်တွေအကြောင်းလို့ ထင်တာပဲ —"

ကောင်းကင်ယံမှ ထစ်ချုန်းနေသော အရှိန်အဝါတစ်ခုကို ခံစားလိုက်ရသည်။ ၎င်းမှာ ကောင်းကင်တစ်မျှ မဟာပညာရှိ၏ အမျက်ဒေါသပင် ဖြစ်သည်။

ကျနော်က ထိုအမျက်ဒေါသကို ပြန်လည် အော်ဟစ်လိုက်သည်။

"ဟုတ်တယ်။ အဲဒါကို ပို့လိုက်တဲ့သူတွေက သူတို့ပဲ"

[‘နုဗာရစ်ချ် ဆရာမြွေကြီး’ နက္ခတ်က သင့်ကို အံ့အားသင့်စွာ စိုက်ကြည့်နေပါသည်။]

[‘လက်သည်းစား ကြွက်’ နက္ခတ်သည် မျှော်လင့်မထားသော အခြေအနေကြောင့် လက်သည်းများကို ကိုက်နေပါသည်။]

[‘ရွှေခေါင်းကွင်း၏အကျဉ်သား’ နက္ခတ်သည် အလွန်အမင်း ဒေါသထွက်နေပါသည်။]

ထိုခဏမှာပင် ကျနော့်အိတ်ကပ်ထဲတွင် ကျန်ရှိနေသော ကောင်းကင်တစ်မျှ မဟာပညာရှိ၏ အမွေးအမျှင်မှာ လေထဲသို့ ပျံတက်သွားသည်။ ကျနော်က သက်ပြင်းတစ်ချက်ချရင်း ပြန်ပြောလိုက်သည်။

"...ကျနော် ဒါကို ကောင်းကောင်း အသုံးချပါ့မယ်"

ကျနော်သည် ထိုအမွေးအမျှင်ကို ဆုပ်ကိုင်လိုက်ရာ ထဲထဲဝင်ဝင် စုစည်းနေသော ဇာတ်လမ်းတစ်ပုဒ်၏ စွမ်းအားကို ခံစားလိုက်ရသည်။ ထိုအမွေးအမျှင်ထဲတွင် မွေးရာပါ စွမ်းအင်များ ပါရှိနေသည်။ ကောင်းကင်တစ်မျှ မဟာပညာရှိ၏ အစွမ်းကို တိုင်းတာရန် ကျနော့်အတွက် ခက်ခဲလှသည်။ အရေးကြီးဆုံးအချက်မှာ...

ကျနော် ခေတ္တမျှ တွေဝေသွားပြီးမှ ကောင်းကင်ယံကို ကြည့်ကာ ‘စတင်ခြင်း စကားလုံးများ’ ကို ရွတ်ဆိုလိုက်သည်။

"... အိပ်မောကျနေသော ဘီလူးကြီးကို ခုတ်ဖြတ်ရန် ဒီဇိုင်းထုတ်ထားသည့် ဓါး"

ကျနော် ပထမဆုံး စကားလုံးများကို စတင်ရွတ်ဆိုလိုက်သည်နှင့် ကောင်းကင်ယံ၏ အရောင်မှာ ပြောင်းလဲလာသည်။ တိမ်တိုက်များသည် ပုံမှန်မဟုတ်သော လက္ခဏာများကို ပြသနေပြီး နိမိတ်မကောင်းသော အရှိန်အဝါအသစ်တစ်ခုက ညကောင်းကင်ယံကို လွှမ်းမိုးသွားသည်။

[မိစ္ဆာနယ်မြေ၏ နက္ခတ်များသည် သင်၏ တည်ရှိမှုကို သတိပြုမိသွားပါပြီ။]

ဟုတ်ပေသည်။ ကျနော် အမိခံလိုက်ရပြီ ဖြစ်သည်။ သတိမပြုမိပါက ပို၍ပင် ထူးဆန်းနေပေလိမ့်မည်။ သို့သော်လည်း မတတ်နိုင်ပေ။ ပါစီဖုန်းနှင့် ဟေးဒီးစ်တို့က ကျနော့်ကို ကြည့်ရှုစောင့်ရှောက်ပေးလိမ့်မည်ဟု ကျနော် မျှော်လင့်မိသည်။

"ကဲ... ဒီကို ဆင်းသက်ခဲ့တော့"

အရောင်ပြောင်းနေသော ကောင်းကင်ကြီးမှာ နှစ်ခြမ်းကွဲသွားသည်။ ထိုအက်ကြောင်းကြားတွင် ဧရာမ မျက်လုံးနှစ်လုံးက ကျနော့်ကို စိုက်ကြည့်နေသည်။

[ဧရာမ စစ်သည်တော် ‘ပလူတို’ သည် သင်၏ ဆင့်ခေါ်မှုကို တုံ့ပြန်လိုက်ပါသည်။]

ပြင်းထန်လှသော ဖြစ်နိုင်စွမ်း လျှပ်စီးမီးစများက ကျနော့်ခန္ဓာကိုယ်ကို တုန်ခါသွားစေသည်။ ကျနော်သည် လျှပ်စစ်လိပ်ပြာတစ်ကောင်ကဲ့သို့ တွန့်လိမ်သွားပြီး ကျနော့်မျက်လုံးများမှ သွေးနီရောင်များ စီးကျလာသည်။ ကျနော် အော်ဟစ်ချင်သော်လည်း အော်ဟစ်ခွင့်ပင် မပေးသော နာကျင်မှုမျိုး ဖြစ်နေ၏။

[‘ရွှေခေါင်းကွင်း၏အကျဉ်သား’ နက္ခတ်သည် သင်၏ ဖြစ်နိုင်စွမ်းကို ခွဲဝေယူနေပါသည်။]

ကျနော့်၏ စုတ်ပြတ်နေသော ခန္ဓာကိုယ်မှာ ချက်ချင်း ပြိုကွဲမသွားခြင်းမှာ ကောင်းကင်တစ်မျှ မဟာပညာရှိက ကျနော့်အစား ထိုပေးဆပ်မှုကို ဝေမျှခံစားပေးနေသောကြောင့်ပင်။

[မိစ္ဆာနယ်မြေမှ မိစ္ဆာဘုရင်များသည် ရုတ်တရက် ဖြစ်ပေါ်လာသော ဖြစ်နိုင်စွမ်း မုန်တိုင်းကြောင့် အံ့အားသင့်နေကြပါသည်။]

[နက္ခတ်အချို့မှာ ဇာတ်ဝင်ခန်းအတွင်းရှိ ပုံမှန်မဟုတ်သော အခြေအနေများကြောင့် အံ့သြနေကြပါသည်။]

ကောင်းကင်ယံကို ဖုံးလွှမ်းသွားသော အခြား ဧရာမ အရိပ်ကြီးတစ်ခု ရှိနေသည်။ မြို့သူမြို့သား အချို့မှာ သတိပြုမိသွားပြီး ကောင်းကင်ကို စိုက်ကြည့်နေကြ၏။ ထို့နောက် သူတို့၏ မျက်လုံးများမှာ ဖြည်းဖြည်းချင်း ပြူးကျယ်လာသည်။

"က... ကပ်ဘေးကြီး..."

စော်ဘွားသည်လည်း ယခုမှ သတိပြုမိသွားပြီး အထက်သို့ မော့ကြည့်လိုက်သည်။ ကွဲအက်နေသော ကောင်းကင်ယံမှ မဟူရာ ဓာတ်ငွေ့များ ထွက်ပေါ်လာသည်။ ထိုအရာ၏ အခွံမှာ မဟူရာနဂါး၏ အကြေးခွံများကဲ့သို့ ကြောက်မက်ဖွယ်ကောင်းသော တောက်ပမှုမျိုး ရှိနေသည်။ စော်ဘွားသည် ထိုအရာ၏ ပုံသဏ္ဌာန်ကို မြင်လိုက်ရသောအခါ တုန်လှုပ်ချောက်ချားစွာ အော်ဟစ်လိုက်သည်။

[ဒါ... ဒါက... ဘယ်လိုလုပ်ပြီး...]

သူ၏ မျက်နှာတွင် ထိတ်လန့်မှုများ ပြည့်နှက်သွားသည်။

[ဒါက မပြည့်စုံသေးဘူးလို့ ငါ ကြားထားတာလေ]

တစ်ချိန်ကတော့ မပြည့်စုံခဲ့တာ မှန်သည်။ အတိအကျ ပြောရလျှင် ကျနော် ငရဲပြည်သို့ မသွားရောက်မီ အချိန်အထိပေါ့။

「 ငရဲဘုရင်၏ လျှို့ဝှက်လက်နက်၊ ဧရာမ စစ်သည်တော် ‘ပလူတို’ 」

နောက်ဆုံးတွင် အမြင့် ၃၀ မီတာရှိသော ဧရာမ သံချပ်ကာ လက်နက်ကြီးသည် ကောင်းကင်ယံမှ ဆင်းသက်လာခဲ့တော့သည်။

အခန်း ၂၂၀

- အပိုင်း ၄၁ - တော်လှန်ရေးသမားအစစ် (၆)

ဟိန်းဟောက်သံကြီးနှင့်အတူ ဧရာမ စစ်သည်တော်၏ ခန္ဓာကိုယ်ကြီး ထွက်ပေါ်လာခဲ့သည်။ မူရင်းဝတ္ထုထဲတွင် ထိုဘီလူး စစ်သည်တော်ကြီးမှာ ငရဲဘုရင်၏ လက်နက်ဖြစ်သော်လည်း ဒုတိယပိုင်းတွင်မူ ယူဂျွန်ဟော့က စတင်၍ အလေးအနက် အသုံးပြုခဲ့သည်။ ဒဏ္ဍာရီများထဲမှ ဘီလူးကြီးကို နှိမ်နင်းခဲ့သည့် အစွမ်းထက်ဆုံး လက်နက်မှာ ကောင်းကင်တစ်မျှ မဟာပညာရှိနှင့် ကျနော် ဝေမျှလိုက်သော ဖြစ်နိုင်စွမ်းကြောင့် ကျနော့်ရှေ့မှောက်သို့ ရောက်ရှိလာခဲ့ပြီ ဖြစ်သည်။

ဝေဝါးတုန်ရီနေသော မြင်ကွင်းထဲမှ သွေးများ စီးကျနေရင်း ‘ပလူတို’ကို ကျနော် မော့ကြည့်လိုက်သည်။

[သင်၏ ကိုယ်စားလှယ် ခန္ဓာကိုယ်မှာ အကန့်အသတ်သို့ ရောက်ရှိနေပြီ ဖြစ်သည်။]

[သင်၏ ကိုယ်စားလှယ် ခန္ဓာကိုယ်မှာ အကန့်အသတ်သို့ ရောက်ရှိနေပြီ ဖြစ်သည်။]

ပါးစပ်ပိတ်ထားစမ်း။ ငါ အသိစိတ်ကို ဆက်လက် ထိန်းထားရမယ်။ အနည်းဆုံးတော့ သူ့ကို အမိန့်တစ်ခု မပေးရသေးခင်အထိ ထိန်းထားရမယ်။

[ဘာလဲဟ။ ဒါက ဘယ်နေရာကြီးလဲ]

ထိုစဉ် အသံတစ်ခုကို ကျနော် ကြားလိုက်ရသည်။ ထိုအသံမှာ ကျနော် တစ်ကြိမ်တစ်ခါက ကြားဖူးခဲ့သည့် အသံဖြစ်သည်မှာ သေချာလှသည်။ ဤကောင်သည် သူ၏ ‘ဝိညာဉ်’ ကို နောက်ဆုံးပါဝင်ပစ္စည်းအဖြစ် အသုံးပြုခဲ့ခြင်းပင်။ ကျနော်က ထိုကောင်၏ အမည်ကို ခေါ်လိုက်သည်။

"ကင်နမ်ဝန်"

ထိုအခါ ပလူတို၏ ထူထဲသော ခန္ဓာကိုယ်ကြီးက ဤဘက်သို့ လှည့်ကြည့်လာသည်။

[...မြေအောက်ရထားက နှံကောင်လေးလား]

"...ဟုတ်တယ်"

ကင်နမ်ဝန်သည် အရာအားလုံးကို သဘောပေါက်သွားသည့်အလား ရယ်မောလိုက်သည်။

[ဟားဟားဟား။ ဘာလဲဟ။ မင်း တကယ်ပဲ အဲဒီ စတင်ခြင်း စကားလုံးတွေကို သုံးလိုက်တာလား]

ဧရာမ စစ်သည်တော်ကို ဆင့်ခေါ်ရန် စတင်ခြင်း စကားလုံးများကို ကင်နမ်ဝန်က ကျနော့်ကို ပေးခဲ့ခြင်း ဖြစ်သည်။

— နားလည်လား။ ဒီစတင်ခြင်း စကားလုံးတွေကို ထည့်သုံးထားမှာမို့လို့ သေသေချာချာ မှတ်ထားပါ။ စတင်ခြင်းစကားလုံးတွေကို မှန်မှန်ကန်ကန် ခေါ်နိုင်ရင် ခင်ဗျားကို ကျုပ် တစ်ကြိမ်လောက် ကူညီပေးနိုင်လိမ့်မယ်။

သူသည် ထိုစကားလုံးများကို စတင်ခြင်း စကားလုံးအဖြစ် အမှန်တကယ် အသုံးပြုလိမ့်မည်ဟု ကျနော် မထင်ခဲ့ပေ။ သို့သော်လည်း သူ၏ ပင်ကိုယ်စရိုက်မှာ သေဆုံးသွားရုံနှင့် ပြောင်းလဲသွားခြင်း မရှိချေ။

"မင်း တိုက်ရိုက် ဝင်လိုက်တာလား။"

[ဟားဟားဟား။ ဒါပေါ့။ ဒီခံစားချက်ကို ကျုပ် သဘောကျတယ်]

မူလက ဧရာမ စစ်သည်တော်အတွင်း၌ ထည့်သွင်းထားသော ဝိညာဉ်အားလုံးကို ပင်မစနစ်က ကြီးကြပ်ကွပ်ကဲခြင်း ဖြစ်သည်။ ယခုမူ ကင်နမ်ဝန်သည် ဧရာမ စစ်သည်တော်၏ ဆော့ဖ်ဝဲလ်ထဲတွင် သူ၏ ကိုယ်ပိုင်ဝိညာဉ်ကို ထည့်သွင်းလိုက်ခြင်း ဖြစ်ပေသည်။

[ကောင်းပြီလေ။ ဒါကတော့ အထူးဝန်ဆောင်မှုပဲ။ ဦးလေးကြီး သေသေချာချာ ကြည့်ထားလိုက်။ ကျုပ် အကောင်းဆုံး ပြကွက်တစ်ခု ပြမယ်]

"စိတ်မကောင်းပါဘူး၊ ဒါပေမဲ့ ငါ့မှာ အဲဒီလိုကြည့်နေဖို့ ခွန်အားမရှိတော့ဘူး..."

[ဘာလဲ။ ဘာဖြစ်လို့လဲ]

ကျနော်သည် ခွန်အားမရှိတော့သော လက်ညှိုးကို မြှောက်ကာ တစ်နေရာသို့ ညွှန်ပြလိုက်သည်။ ပလူတို၏ အကြည့်မှာ ကျနော့်လက်ညှိုးနောက်သို့ လိုက်ပါသွားပြီး သူ၏ ပါးစပ်မှာ စပ်စုလိုစိတ်ဖြင့် လှုပ်ရှားသွားသည်။ ကျနော်က ပါးစပ်ကို ဖွင့်ကာ ပြောလိုက်သည်။

"အဲ့ဒါကို အဆုံးသတ်ပေးပါ"

ဖြစ်နိုင်စွမ်းအရ ဧရာမ စစ်သည်တော်ကို တစ်မိနစ်ထက်မနည်းသော အချိန်သာ ဆင့်ခေါ်ထားနိုင်မည် ဖြစ်သည်။ ယခုမူ စက္ကန့် ၃၀ ခန့်သာ ကျန်ရှိတော့ပေလိမ့်မည်။

ထိတ်လန့်တုန်လှုပ်နေသော စော်ဘွားသည် စက်ရုံကြီးကို ဤဘက်သို့ လှည့်လာသည်။

[ဒါ... ဒါက မဖြစ်နိုင်ဘူး။ ဘာလို့…ဘာလို့ အစစ်အမှန် ဧရာမ စစ်သည်တော်က ရောက်လာရတာလဲ]

ပြင်းထန်စွာ လည်ပတ်နေသော ကြိတ်စက်ကြီးသည် ပလူတို၏ အပြင်ဘက်အခွံကို ရိုက်ခတ်သွားသည်။

[ဒါက ဘာအမှိုက် အရုပ်ကြီးလဲ]

စော်ဘွား ဂုဏ်ယူနေသည့် ကြိတ်စက်ကြီးမှာ ပလူတို၏ လက်တစ်ဖက်ကို ရိုးရိုးရှင်းရှင်း ဝေ့ယမ်းလိုက်ရုံမျှဖြင့် ပျက်စီးသွားခဲ့သည်။

ဝှေ့ယမ်းလိုက်ပုံမှာ စက္ကူတစ်ရွက်ကို ဆွဲဖြတ်လိုက်သကဲ့သို့ ပေါ့ပါးသော လက်ဟန်တစ်ခုသာ ဖြစ်သည်။

[ခင်ဗျားက ကျုပ်ကို ဒီလိုအရာမျိုး ဖျက်ဆီးဖို့ ခေါ်တာလား။ ဒါက တကယ်ကို လွန်လွန်းတယ်]

...ဆင့်ခေါ်မှု ရပ်ဆိုင်းရန် ၂၅ စက္ကန့်သာ ကျန်တော့သည်။

[စိတ်ရှုပ်စရာပဲ]

ပလူတိုသည် မြည်တွန်တောက်တီးနေသော်လည်း တည်ငြိမ်စွာပင် လှုပ်ရှားနေသည်။

၂၀ စက္ကန့်။ သူသည် ဆန့်ထုတ်လိုက်သော လက်သီးတစ်ချက်ဖြင့် စက်ရုံကြီး၏ လက်မောင်းများကို ရိုက်ခွဲလိုက်သည်။

၁၅ စက္ကန့်။ သူ၏ လက်ဝါးဓားချက်က စက်ရုံကြီး၏ လုပ်ဆောင်ချက်များကို လုံးဝ ရပ်တန့်သွားစေခဲ့သည်။

၁၀ စက္ကန့်။ ရိုးရှင်းသော ကန်ချက်တစ်ချက်က စက်ရုံကြီး၏ ပင်မစွမ်းအင်ထုတ်စက်ကို ချေမှုန်းလိုက်သည်။

မြောက်မြားလှစွာသော ဇာတ်လမ်းများကို ဝါးမျိုထားသည့် ကြောက်မက်ဖွယ်ကောင်းသော စက်ရုံကြီးမှာ ပြိုလဲသွားခဲ့သည်။ စက်ရုံအတွင်းရှိ စော်ဘွားမှာ အသက်ရှင်လျက် ရှိမရှိကို မသိနိုင်တော့ပေ။ ပလူတို၏ ခန္ဓာကိုယ်မှာ ကျနော့်ဘက်သို့ လှည့်လာသည်။

[အခု ပြီးသွားပြီ။ ဟားဟား… ဒါဆိုရင် အခု ဘာလုပ်ကြမလဲ]

"..."

[ဦးလေးကြီး။ အခုတော့ ခင်ဗျား ကျုပ်နဲ့အတူ ဟိုနေရာကို လိုက်ရ...]

ထိုစဉ် ပြင်းထန်လှသော ဖြစ်နိုင်စွမ်း မုန်တိုင်းတစ်ခုက ပလူတိုကို လွှမ်းမိုးသွားသည်။ အချိန်နှင့် အာကာသကို ဆွဲဖြတ်လိုက်သကဲ့သို့ ဟိန်းဟောက်သံကြီးက ကင်နမ်ဝန်၏ အသံကို ဖုံးလွှမ်းသွားခဲ့သည်။ ဧရာမ စစ်သည်တော် ပလူတို၏ ခန္ဓာကိုယ်မှာ အငွေ့ပျံသွားသကဲ့သို့ အမှုန့်များအဖြစ် ပျောက်ကွယ်သွားတော့သည်။ ဖြစ်နိုင်စွမ်းမှာ ကုန်ဆုံးသွားပြီ ဖြစ်သောကြောင့် သူသည် အတင်းအကျပ် ပြန်သွားရခြင်းပင် ဖြစ်သည်။

...၁ စက္ကန့်။

[ချီးထုတ်ငရဲပြည်။ ငါက...]

မအေဘေး။ ငါ ငရဲပြည်ကို လိုက်စရာလား။ ငတုံး။

[‘ဧရာမ စစ်သည်တော် ပလူတို’ကို ဆင့်ခေါ်မှု ရပ်ဆိုင်းသွားပါပြီ။]

ဧရာမ စစ်သည်တော်မှာ ပျောက်ကွယ်သွားသော်လည်း လူများမှာမူ တုံ့ပြန်ရန် ခက်ခဲနေကြဆဲ ဖြစ်သည်။ မြို့သူမြို့သား အများစုမှာ ထိတ်လန့်မှုကြောင့် မှင်တက်နေကြပြီး မျက်လုံးဖွင့်နိုင်သူ များမှာလည်း ရူးသွပ်လုနီးပါး ဖြစ်နေကြပြီ ဖြစ်သည်။ ထိုသို့ဖြစ်နေခြင်းမှာ သဘာဝပင်။ ဤနေရာရှိ ကိုယ်စားလှယ်များသည် ကမ္ဘာပေါ်တွင် အကြီးကျယ်ဆုံးသော မရဏနတ်ဘုရားကို မြင်တွေ့လိုက်ရခြင်း ဖြစ်သည်။

ကျနော်သည် ခေါင်းကို လှည့်ကာ စက်ရုံကြီး၏ အပျက်အစီးများကို ကြည့်လိုက်သည်။ ကျနော့်၏ လျှပ်စစ်ဓါတ် အားဖြည့်ခြင်းဖြင့်ပင် မပျက်စီးနိုင်ခဲ့သော အပြင်ဘက်အခွံမှာ ယခုမူ ကြောက်မက်ဖွယ်ကောင်းသော သားရဲကြီး၏ တိုက်ခိုက်ခြင်းကို ခံထားရသကဲ့သို့ စုတ်ပြတ်သတ်နေချေပြီ။ စက်ရုံကြီး၏ အဆစ်များ ကျိုးပဲ့သွားပြီး စွမ်းအင်အပိုင်း ပျက်စီးသွားသောကြောင့် မည်သည့်လှုပ်ရှားမှုမှ မရှိတော့ပေ။ စက်ရုံကြီးမှာ ဧရာမ စစ်သည်တော်၏ လက်ချက်ဖြင့် စက္ကန့် ၃၀ မပြည့်မီမှာပင် ပျက်စီးသွားခဲ့ရခြင်း ဖြစ်သည်။

ကျနော်သည် စက်ရုံကြီးပေါ်သို့ ဖြည်းညှင်းစွာ တက်သွားပြီး မောင်းနှင်ခန်းထဲတွင် ထိုင်နေသော လူကို ရှာဖွေလိုက်သည်။ မောင်းနှင်ခန်း၏ အဖုံးမှာ ပွင့်ထွက်နေပြီး ထိုနေရာတွင် ထိုင်နေသော မိစ္ဆာမှာလည်း သွေးအိုင်ထဲတွင် နစ်နေသည်။

"အဟွတ်။ အဟွတ်"

မောင်းနှင်သူမှာ စော်ဘွား စစ်ဝစ်ဇ်ပင် ဖြစ်သည်။ စော်ဘွားသည် မယုံကြည်နိုင်သော မျက်လုံးများဖြင့် ကျနော့်ကို မော့ကြည့်လာသည်။

"မင်း... မင်း။ မင်းက ဘာလဲ..."

စက်ရုံကြီးမှာ စော်ဘွား၏ ပင်မဇာတ်လမ်း ဖြစ်သည်။ ထိုဇာတ်လမ်းမှာ ပျက်စီးသွားပြီ ဖြစ်သောကြောင့် စော်ဘွားမှာလည်း လုံခြုံမှု မရှိတော့ပေ။ ကျနော်သည် မကျိုးပဲ့နိုင်သောယုံကြည်မှုဓါးကို စော်ဘွားဆီသို့ ချိန်ရွယ်လိုက်သည်။ စော်ဘွားက ပါးစပ်ကို ဖွင့်ကာ ပြောလိုက်သည်။

"အကျိတ်နဲ့လူတွေဆီက... ငါ မင်းအကြောင်း ကြားဖူးတယ်"

စော်ဘွားသည် သူ၏ အဆုံးသတ်ကို ကြိုတင်သိမြင်သွားသည့်အလား တတွတ်တွတ် ပြောဆိုနေတော့သည်။

"ကံဆိုးတဲ့ နက္ခတ်ပဲ၊ ငါ့ကို သတ်ရင် မင်း ဘယ်တော့မှ အသက်ရှင်မှာ မဟုတ်ဘူး... ဘာလို့လဲဆိုတော့ မင်းက―"

ကျနော်သည် ဝေခွဲမနေဘဲ သူ၏ နှလုံးသားကို ထိုးစိုက်လိုက်သည်။ ကျနော့်တွင် ခွန်အားအနည်းငယ်မျှ မကျန်တော့သောကြောင့် သူ၏ ခန္ဓာကိုယ်နှင့်အတူ စက်ရုံကြီးပေါ်မှ လိမ့်ကျသွားခဲ့သည်။ ကြောက်မက်ဖွယ်ကောင်းသော နာကျင်မှုကြောင့် ကျနော် အသက်ကို လုရှူရင်း ကောင်းကင်ယံကို မော့ကြည့်လိုက်မိသည်။ အိုင်လင်းက ကျနော့်ကို တွဲကူရန် ပြေးလာသည်။

"...စော်ဘွားကော"

"သူ သေသွားပြီ"

ထိုစဉ် စနစ်၏ မက်ဆေ့ချ်များ တက်လာခဲ့သည်။

[မိစ္ဆာစော်ဘွား စစ်ဝစ်ဇ်ကို အောင်နိုင်ခဲ့ပါသည်။]

[ဒင်္ဂါး ၂၀၀,၀၀၀ ရရှိပါသည်။]

ကျနော်က အားမပါဘဲ ရယ်မောလိုက်သည်။ သို့သော်လည်း စိတ်လျှော့ရမည့် အချိန် မဟုတ်သေးပေ။

[သင်သည် စက်မှုဇုန်၏ ‘အုပ်စိုးသူ’ ကို အောင်နိုင်ခဲ့ပါသည်။]

[သင်သည် ‘တော်လှန်ရေးသမား’ မဟုတ်ပါ။]

[ပုံမှန် ဇာတ်ဝင်ခန်း လမ်းကြောင်းအတိုင်း မလိုက်နာခဲ့သောကြောင့် ‘အုပ်စိုးသူ’ ဆက်ခံခွင့်ကို ပယ်ဖျက်လိုက်ပါသည်။]

[ဆက်ခံခွင့်ကို လက်ရှိ ဇာတ်ဝင်ခန်းအတွင်း ဂုဏ်သတင်း အကြီးမားဆုံးသူထံသို့ အလိုအလျောက် လွှဲပြောင်းပေးပါမည်။]

[လက်ရှိ ‘ဝှက်ထားသော ဇာတ်ဝင်ခန်း’ ကို လုပ်ဆောင်နေဆဲ ဖြစ်ပါသည်။]

[အဓိကဇာတ်ဝင်ခန်းသို့ ဝင်ရောက်ရန် ‘အစစ်အမှန် တော်လှန်ရေးသမား’ ကို သတ်ဖြတ်ပါ။]

...မျှော်လင့်ထားသည့်အတိုင်းပင်။ စော်ဘွားကို သတ်လိုက်ရုံနှင့် ကျနော့်ကို ဇာတ်ဝင်ခန်းထဲ ဝင်ခွင့်မပြုပေ။ ကျနော်က ယူဂျွန်ဟော့၏ အမည်ကို အသုံးချခဲ့သောကြောင့် စက်မှုဇုန်၏ ဆက်ခံပိုင်ခွင့်မှာ ယူဂျွန်ဟော့ထံသို့ ရောက်ရှိသွားခြင်း ဖြစ်ကောင်းဖြစ်နိုင်ပါသည်။

"...ငါ့ အခြေအနေက ဘယ်လိုရှိလဲ"

အိုင်လင်းသည် ကျနော့်ဇာတ်လမ်းကို ပြုပြင်ပေးနေရင်းမှ နှုတ်ခမ်းကို တင်းတင်းစေ့ထားသည်။

"ရပါတယ်။ ကျမ ပြန်ပြင်ပေးပါ့မယ်"

"...ငါ့မှာ အချိန် ဘယ်လောက် ကျန်သေးလဲ"

အိုင်လင်းက ပြန်မဖြေပေ။

"မြန်မြန် ပြောစမ်းပါ"

"၁၀ မိနစ်။ မဟုတ်ဘူး... ၅ မိနစ်"

ကျနော့်၏ အာရုံငါးပါးမှာ ထုံထိုင်းလာချေပြီ။ နှုတ်ခမ်းများမှာ ကျနော့်အမိန့်ကို မနာခံတော့ဘဲ လက်ဖျားများမှ ခံစားမှုမှာလည်း တဖြည်းဖြည်း ပျောက်ကွယ်သွားသည်။ စနစ်၏ မက်ဆေ့ချ်များကိုလည်း မကြားရတော့ပေ။ ကျနော့်ခန္ဓာကိုယ်မှာ ပြုပြင်၍မရနိုင်တော့လောက်အောင် ပျက်စီးသွားပြီ ဖြစ်ကောင်းဖြစ်နိုင်ပါသည်။ မိစ္ဆာနယ်မြေသို့ ရောက်ရှိလာခဲ့သော်လည်း အဘယ်ကြောင့် ဤမျှအထိ ဆင်းရဲဒုက္ခခံနေရသည်ကို ကျနော် မသိတော့ပေ။ အိုင်လင်း၏ အသံမှာ တုန်ရီနေသည်။

"ရှင်က တော်လှန်ရေးသမားကို ရှာနေတယ်လို့ ပြောခဲ့တယ်နော်..."

"ဟုတ်တယ်"

"ဘာဖြစ်လို့လဲ"

"အဓိက ဇာတ်ဝင်ခန်းထဲ ဝင်ဖို့ဆိုရင် တော်လှန်ရေးသမားကို သတ်ရမှာမလို့ပဲ"

ဖုံးကွယ်ထားရန် အကြောင်းမရှိသောကြောင့် ကျနော် အမှန်အတိုင်းပင် ဖြေလိုက်သည်။ ထိုအခါ အိုင်လင်းက ကျနော့်ကို စိုက်ကြည့်လာသည်။

"ဒါဆိုရင်လည်း..."

အိုင်လင်းသည် တစ်စုံတစ်ခုကို ဆုံးဖြတ်ချက် ချလိုက်ပုံရသည်။

"ရှင် အသက်ရှင်နိုင်ပါတယ်။ ဘာလို့လဲဆိုတော့ ကျမက..."

"စောစောက လူအုပ်ထဲမှာ တော်လှန်ရေးသမား ရှိနေတယ်မဟုတ်လား။ ဟုတ်တယ်မလား"

ကျနော်က အိုင်လင်း၏ ခက်ခဲစွာ ပြောနေသော စကားကို ဖြတ်ပြောလိုက်သည်။

"နင်က ပုန်းနေချင်ခဲ့သလို ထွက်ပြေးချင်ခဲ့တာပဲ"

"..."

"ဒါပေမဲ့လည်း နင်က ထွက်လာပြီးတော့ အစွမ်းကုန် တိုက်ပွဲဝင်ခဲ့တယ်"

အိုင်လင်းသည် ကျနော့်ကို ခေတ္တခဏမျှ ကြည့်နေပြီးမှ ခေါင်းကို လွှဲသွားသည်။ အိုင်လင်း မည်သို့သော မျက်နှာထားမျိုး ဖြစ်နေသည်ကို ကျနော် ကြည့်စရာမလိုဘဲ သိနိုင်လေသည်။

"မငိုပါနဲ့။ ငါ မသေပါဘူး"

ကျနော်က အားမရှိသော်လည်း ရယ်မောလိုက်သည်။

「 ကင်ဒေါ့ဂျာက တွေးနေမိသည် - တကယ်လို့ ငါသာ ဒီမှာ တော်လှန်ရေးသမားကို သတ်လိုက်ရင် ငါ စုဆောင်းထားတဲ့ ဇာတ်လမ်းတွေက အဓိပ္ပာယ်မဲ့သွားလိမ့်မယ် 」

ကျနော် ‘တော်လှန်ရေးသမား’ မဖြစ်လာခဲ့ရင်တောင် တခြားနည်းလမ်း ရှိနေလိမ့်မည်။ ယခုအချိန်အထိ အမြဲတမ်း ဤသို့သာ ဖြစ်ခဲ့ဖူးသည်သာ။

"အိုင်လင်း။ ငါနင့်ကိုလုပ်ခိုင်းခဲ့တဲ့ပစ္စည်းရပြီလား"

အိုင်လင်းက တစ်စုံတစ်ခုကို ထုတ်လိုက်သည်။ ၎င်းမှာ မျက်နှာပြင်ပါဝင်သော လေးထောင့်ပုံစံ ဆက်သွယ်ရေး ကိရိယာတစ်ခု ဖြစ်သည်။ ကျနော် သူမကို ထုတ်လုပ်ခိုင်းထားသည့် စမတ်ဖုန်းပင် ဖြစ်သည်။

"ဒါကို ဖွင့်ပေးပါဦး..."

မျက်နှာပြင် ပွင့်လာသည်နှင့် မက်ဆေ့ချ်တစ်ခု အလိုအလျောက် ပေါ်လာသည်။

[ကိရိယာအသစ်တစ်ခုကို ရရှိထားပါသည်။ ချိတ်ဆက်မှု စတင်နေပါပြီ။]

ချိတ်ဆက်မှု ပြီးဆုံးသွားပြီး မျှော်လင့်ထားသည့်အတိုင်းပင် ဖိုင်တစ်ခုမှာ မျက်နှာပြင်ပေါ်တွင် ပေါ်လာသည်။ ကျနော့်မျက်လုံးများမှာ ဝေဝါးနေဆဲ ဖြစ်ပြီး သေသေချာချာ မမြင်ရသော်လည်း စာသားများမှာ ‘Ways of Survival’ ၏ စာသားများ ဖြစ်နေမည်မှာ သေချာလှပါသည်။

「 ကင်ဒေါ့ဂျာက တွေးနေမိသည် - ငါက ‘စာဖတ်သူ’ တစ်ယောက်ပဲ။ အဖြေအားလုံးက ဒီမှာ ရှိနေတယ်။ 」

ကျနော် အတင်းအကျပ် မျက်လုံးဖွင့်ကာ စာသားများကို ကြည့်လိုက်သည်။ သို့သော်လည်း ကျနော့်အမြင်အာရုံမှာ ဝေဝါးနေပြီး ဘာမှ မမြင်ရပေ။ ‘Ways of Survival’ ကို ဖတ်ရှုပြီး ဤအခြေအနေကို ကျော်ဖြတ်ရန် နည်းလမ်းရှာရမည် ဖြစ်သော်လည်း ရယ်စရာကောင်းသည်မှာ ကျနော် စာသားများကို မဖတ်နိုင်တော့ခြင်းပင်။

「 ကင်ဒေါ့ဂျာသည် ပထမဆုံးအကြိမ်အဖြစ် တွေးတောမိလိုက်သည်။ 」

...ချီးပဲ။

「 ဒါက အဆုံးသတ်ပဲ 」

နောက်ဆုံးတွင် အိုင်လင်း၏ မျက်နှာပင် ဝေဝါးသွားခဲ့ချေပြီ။

[ဝှက်ထားသော ဇာတ်ဝင်ခန်း ‘မိမိကိုယ်ကိုယ် တော်လှန်ရေးသမားဟု ကြေညာသူ’ ကို ပြီးမြောက်အောင်မြင်ပါသည်။]

ထိုအသံမှာ နားထဲတွင် ကြားလိုက်ရသည့် ထင်ယောင်ထင်မှား အသံတစ်ခု ဖြစ်ပေလိမ့်မည်။

[သင်သည် တော်လှန်ရေးသမား တစ်ဦး ဖြစ်လာပါပြီ။]

ကျနော်ကတော့ အမှန်တကယ်ပင် ထင်ယောင်ထင်မှား ဖြစ်နေသည်ဟု တွေးလိုက်မိသည်။

[ဂုဏ်ယူပါသည်။ သင်သည် အဓိက ဇာတ်ဝင်ခန်းသို့ တရားဝင် ဝင်ရောက်နိုင်ခဲ့ပြီ ဖြစ်သည်။]

[ထုတ်ပယ်ခြင်း ပြစ်ဒဏ် ပြီးဆုံးပါပြီ။]

[သင်၏ ကိုယ်စားလှယ် ခန္ဓာကိုယ်မှာ အလိုအလျောက် ပြန်လည် ကောင်းမွန်လာနေပါသည်။]

[ပြိုလဲနေသော သင်၏ ဇာတ်လမ်းများ ပြန်လည် နာလန်ထူလာနေပါသည်။]

ဒါက မဖြစ်နိုင်တာပဲ။

ကျနော့်ရဲ့ အာရုံငါးပါးက ပြန်လည်နိုးထလာပြီး ကွယ်ပျောက်လုနီးပါး ဖြစ်နေတဲ့ အမြင်အာရုံတွေကလည်း ပြန်လည်ထင်ရှားလာသည်။ ကျနော်က မျက်လုံးအစုံကို ပြူးကျယ်စွာဖြင့် ပတ်ဝန်းကျင်ကို ဝေ့ကြည့်လိုက်မိသည်။ အိုင်လင်းက ဘေးကင်းလုံခြုံစွာ ရှိနေဆဲပင်။ ဂျန်ဟာယောင်းနှင့် မာ့ခ်တို့လည်း ထိုနည်းတူပင် ဖြစ်သည်။ သူတို့ထဲက ဘယ်သူမှ သေဆုံးမသွားကြသေးပေ။

ဒါဆိုရင် ဘာဖြစ်လို့လဲ...။

ဒါက အဆုံးသတ် မဟုတ်သေးဘူးပဲ။

[၇၃ ခုမြောက် မိစ္ဆာနယ်မြေအတွင်း၌ ‘ကင်ဒေါ့ဂျာ’ ဆိုသည့် အမည်မှာ ကျယ်ပြန့်စွာ ပျံ့နှံ့နေပြီ ဖြစ်သည်။]

[ဂီလိုဘတ် စက်မှုဇုန်ရှိ မိစ္ဆာအားလုံးက သင့်အမည်ကို ကြောက်ရွံ့နေကြပါသည်။]

[ဂီလိုဘတ် စက်မှုဇုန်ရှိ မြို့သူမြို့သားများက သင်၏ တော်လှန်ရေးတွင် ပူးပေါင်းပါဝင်လာကြပါသည်။]

ကျနော် ခဏမျှ နားကြားမှားသည်ဟု ထင်မှတ်လိုက်မိသည်။

...ဂီလိုဘတ် စက်မှုဇုန် ဟုတ်လား။ ဒါက... စစ်ဝစ်ဇ် စက်မှုဇုန် မဟုတ်ဘူးလား။

[ဂီလိုဘတ် စက်မှုဇုန်အတွင်း၌ ‘ကင်ဒေါ့ဂျာ’ ကို သူရဲကောင်းတစ်ဦးအဖြစ် သတ်မှတ်သူများ ထွက်ပေါ်လာခဲ့ပြီ ဖြစ်သည်။]

ဂီလိုဘတ် စက်မှုဇုန်ဆိုသည်မှာ စစ်ဝစ်ဇ် စက်မှုဇုန်နှင့် အတော်အတန် ဝေးကွာသော နေရာတွင် ရှိသည်။ ကျနော့်အမည်က ထိုနေရာအထိ ပဲ့တင်ထပ်သွားစရာ အကြောင်းမရှိပေ။ တစ်ဆက်တည်း တက်လာသော မက်ဆေ့ချ်များကို နားထောင်ရင်း မရေမရာသော ဖြစ်နိုင်စွမ်းအချို့ကို ကျနော် တွေးတောမိလိုက်သည်။ ထိုသို့ဆိုလျှင်ပင် ဤဖြစ်နိုင်စွမ်းမှာ အလွန်ပင် သေးငယ်လှပေသည်။

[တစ်စုံတစ်ဦးက ဂီလိုဘတ် စက်မှုဇုန်၏ ‘အုပ်စိုးသူ’ ကို သတ်ဖြတ်လိုက်ပြီ ဖြစ်သည်။]

[သင်သည် လက်ရှိတွင် ဂီလိုဘတ် စက်မှုဇုန်အတွင်း၌ ဂုဏ်သတင်း အကြီးမားဆုံးသူ ဖြစ်သည်။]

[ဇာတ်ဝင်ခန်း ဖြစ်နိုင်စွမ်းအရ သင်သည် ဂီလိုဘတ် စက်မှုဇုန်၏ ပိုင်ရှင် ဖြစ်လာပါပြီ။]

ဒါက မဖြစ်နိုင်တာပဲ။ ဒါက လုံးဝ ဖြစ်မလာနိုင်တဲ့ ကိစ္စမျိုးပင်။

"ဟားဟား..."

ရင်ထဲက လှိုက်တက်လာတဲ့ စိတ်သက်သာရာရမှုကြောင့် အငိုက်မိစွာ ရယ်မောလိုက်မိသည်။

ဘာဖြစ်လို့ပါလိမ့်။

ထိုခဏမှာပင် အိုင်လင်းရဲ့ လက်ပတ်နာရီကို ကျနော် လှမ်းကြည့်လိုက်မိသည်။

နာရီက နောက်ပြန်လှည့်မသွားပေ။ အချိန်တွေက နောက်ပြန်မဆုတ်ဘဲ ရှေ့သို့သာ မှန်မှန်ကန်ကန် ဆက်လက်ရွေ့လျားနေသည်။ နာရီလက်တံက နောက်ပြန်လှည့်နိုင်သော်လည်း အချိန်ဆိုသည်မှာ ပြန်မလာနိုင်တော့ပေ။

"...သူ ရောက်လာပြီ။"

ကျနော်က သူ့နာမည်ကို ခေါ်ထုတ်ချင်စိတ် ပေါက်လာတဲ့အထိ အလွန်အမင်း ဝမ်းသာသွားမိသည်။

"ဟင်။ ရှင် ဘာတွေ ပြောနေတာလဲ"

ကျနော်က ပြုံးလိုက်ပြီး " ယူဂျွန်ဟော့အစစ် ရောက်လာပြီ" ဟု ပြောလိုက်သည်။

ကျနော် မမြင်ရသလို မကြားရသော်လည်း ခံစားလို့တော့ ရနေသည်။ ထိုလူက ဤကမ္ဘာထဲကို အမှန်တကယ် ရောက်ရှိနေပြီ ဖြစ်သည်။ ကောင်းကင်ခွဲဓါးဖြင့် အစွမ်းထက်သော မိစ္ဆာတစ်ကောင်ကို သုတ်သင်လိုက်သည့် ထိုလူက မိုးကုတ်စက်ဝိုင်းရဲ့ အလွန်ကနေ ရောက်ရှိလာခဲ့ပြီ။ ကျနော်သည် ဤထူးခြားသော ခံစားချက်များထဲတွင် နစ်မျောနေမိပြီး ကျနော့် စမတ်ဖုန်းကိုပင် မေ့လျော့နေမိသည်။

「 ကင်ဒေါ့ဂျာက စမတ်ဖုန်းကို အရင်ဆုံး စစ်ဆေးသင့်သည်။ 」

Fourth Wall ၏ စကားကို ကြားလိုက်ရသဖြင့် ကျနော်က ပြုတ်ကျနေတဲ့ ဖုန်းကို အလိုအလျောက် ကောက်ယူလိုက်မိသည်။ ထုံးစံအတိုင်း စာသားဖိုင်ရဲ့ ခေါင်းစဉ်က မျက်နှာပြင်ပေါ်မှာ ပေါ်လာသည်။ ထိုအခါမှ ကျနော် တစ်စုံတစ်ခုကို သတိထားမိသွားပြီး ရင်ထဲမှာ ထိတ်ခနဲဖြစ်သွားရသည်။ တစ်စုံတစ်ခုက ပြောင်းလဲသွားချေပြီ။ အတိအကျ ပြောရလျှင် စာသားဖိုင်၏ ခေါင်းစဉ်မှာ ထူးဆန်းတဲ့ စကားလုံးတွေ ကပ်ပါလာခြင်းပင်။

— ပျက်စီးသွားသော ကမ္ဘာကြီးတွင် ရှင်သန်ရန် နည်းလမ်း သုံးသွယ် (ပထမအကြိမ် ပြင်ဆင်ချက်).txt