အခန်း (၁၈၅-၁၈၆)

အခန်း ၁၈၅ - တွက်ချက်သူက ချက်ချင်း ပေါက်ကွဲပြီး သေသွားတယ်

"လင်းမိသားစု ခေါင်းဆောင်... မင်း လာရတဲ့ ရည်ရွယ်ချက်ကို ပြောပါဦး..."

တစ်ချိန်တည်းမှာပင် လင်းထျန်းအန်ကလည်း ရူဖုန်းစံအိမ်သို့ လုံလောက်သော သယံဇာတများကို ယူဆောင်လာခဲ့ပြီ ဖြစ်၏။ ရူဖုန်းစံအိမ်မှ သံတမန်သည် လင်းထျန်းအန်၏ ရှေ့တွင် ထိုင်နေပြီး အနက်ရောင် ဝတ်ရုံကို ဝတ်ဆင်ထားကာ သူ၏ ခန္ဓာကိုယ်ကို မှောင်ရိပ်ထဲတွင် ဖုံးကွယ်ထားသဖြင့် သူ၏ လိင်ကို ခွဲခြား၍ မရနိုင်ချေ။

လင်းထျန်းအန်သည် ထိုအရာများကို ဂရုမစိုက်ခဲ့ပေ။ ရူဖုန်းစံအိမ်မှ သံတမန်တိုင်းသည် အလွန်ပင် လျှို့ဝှက်ဆန်းကြယ်ကြပြီး တရားဝင် မဟုတ်သော သမိုင်းကြောင်းများအရ ရူဖုန်းစံအိမ်သည် မဟာမြင့်မြတ်နယ်မြေ ငါးခုကိုပင် မကြောက်ရွံ့ကြောင်း သိရှိထား၏။

"လူနှစ်ယောက်ရဲ့ အထောက်အထားကို တွက်ချက်ပေးစေချင်တယ်... ပြီးတော့ ဒါတွေက သူတို့ရဲ့ ပုံတူ ပန်းချီကားတွေပဲ..."

လင်းထျန်းအန်သည် ပုံတူ ပန်းချီကား နှစ်ချပ်ကို ချက်ချင်း ထုတ်ပြလိုက်ရာ ၎င်းတို့ထဲတွင် တွမ့်သယ်နှင့် ဝူယီဖန်တို့ကို ရှင်းလင်းစွာ ပုံဖော်ထား၏။ ၎င်းတို့သည် ဤကာလအတွင်း ဝူယီဖန်နှင့် တွမ့်သယ်တို့အကြောင်း လင်းမိသားစုမှ စုဆောင်းထားသော အချက်အလက်များ ဖြစ်သည်။

တွမ့်သယ်နှင့် ဝူယီဖန်တို့၏ ပုံတူ ပန်းချီကားများကို မြင်ပြီးနောက် ရူဖုန်းစံအိမ်မှ သံတမန်က တိုးညင်းစွာ ပြောလိုက်၏။

"လင်းမိသားစု ခေါင်းဆောင်... ငါတို့ ရူဖုန်းစံအိမ်ရဲ့ စည်းကမ်းတွေကို မင်း သိထားသင့်တယ်... အကယ်၍ ပုံတူ ပန်းချီကား တစ်ခုတည်းကနေ တွက်ချက်စေချင်တယ်ဆိုရင် မင်း ပေးဆပ်ရမယ့် တန်ဖိုးက အလွန်တရာ ကြီးမားပြီး အနည်းဆုံး အဆင့်မြင့် အင်မော်တယ်ဝိညာဉ်ကျောက်တုံး ငါးသိန်း ကုန်ကျလိမ့်မယ်..."

သံတမန်၏ စကားကို ကြားသောအခါ လင်းထျန်းအန်သည် ကြိုတင် ပြင်ဆင်ထားသော်လည်း သူ၏ မျက်နှာပေါ်တွင် ဖြစ်ပေါ်လာသော နာကျင်မှု အရိပ်အယောင် ကိုတော့ မဖုံးကွယ်နိုင်ခဲ့ချေ။ သို့သော်လည်း သူသည် အလျင်အမြန် သွားကြိတ်ကာ ခေါင်းငြိမ့်သဘောတူလိုက်သည်။

"ဒါနဲ့... တစ်ဖက်လူက အခု အင်မော်တယ် ဧကရာဇ် အဆင့်ရှိတဲ့ စွမ်းအားရှင်တွေကိုတောင် သတ်နိုင်နေပြီဆိုတော့ တွက်ချက်တဲ့အခါ သတိထားဖို့တော့ မမေ့နဲ့ဦး..."

လင်းထျန်းအန်က တစ်စုံတစ်ခုကို သတိရသွားပုံဖြင့် သတိပေးလိုက်၏။

ဤစကားကို ကြားသောအခါ ရူဖုန်းစံအိမ်မှ သံတမန်၏ အမူအရာကို မမြင်နိုင်သော်လည်း သူ၏ လေသံတွင် အထင်အမြင်သေးမှုများ ပြည့်နှက်နေကြောင်း ရှင်းလင်းစွာ သိနိုင်ပေသည်။

"လင်းမိသားစု ခေါင်းဆောင်... မင်းက အင်မော်တယ် ဝိညာဉ်ကျောက်တုံးတွေကိုပဲ ပြင်ဆင်ထားဖို့ လိုတယ်... ရူဖုန်းစံအိမ်က တွက်ချက်လို့ မရတဲ့ လူတွေဆိုတာ လုံးဝ မရှိဘူး..."

လင်းထျန်းအန်သည် သေချာ စဉ်းစားကြည့်ပြီးနောက် သဘောတူလိုက်၏။ မည်သို့ပင်ဆိုစေကာမူ၊ ရူဖုန်းစံအိမ်သည် ၎င်း၏ ကြောက်မက်ဖွယ်ကောင်းသော တွက်ချက်မှု စွမ်းရည်များကြောင့် အထက်ကမ္ဘာတွင် အကြီးမားဆုံးသော ထောက်လှမ်းရေး ပွဲစားအဖြစ် နာမည်ကြီးသည် မဟုတ်လော။

ဤသို့ တွေးမိသောအခါ လင်းထျန်းအန်သည် လှောင်ရယ် ရယ်လိုက်သည်။

ဝူယီဖန်နဲ့ တွမ့်သယ်... မင်းတို့တော့ သေပြီသာ မှတ်တော့..

မကြာမီ လင်းထျန်းအန်ကို ဧည့်ခံရန် တာဝန်ယူထားသော အင်မော်တယ် အရှင်မြတ် အထွတ်အထိပ်အဆင့် တစ်ဦးသည် သူ့ထံသို့ ရောက်ရှိလာခဲ့သည်။ သူသည် တွမ့်သယ်၏ ပုံတူ ပန်းချီကားကို အရင်ဆုံး တစ်ချက်ကြည့်လိုက်ပြီးနောက် မျက်လုံးများကို မှိတ်ကာ စတင် တွက်ချက်တော့သည်။ မိနစ်အနည်းငယ် ကြာပြီးနောက် သူသည် မျက်လုံးများကို ဖွင့်ကာ ဖြည်းညင်းစွာ ပြောလိုက်၏။

"ဒီကောင်က မျိုးဖြုတ်ခံလိုက်ရတဲ့ တွမ့်မိသားစုရဲ့ သခင်လေး တွမ့်သယ်ပဲ... အခုလောလောဆယ် သူက တောင်ပိုင်းဒေသ၊ နေဝင်ချိန် နယ်မြေငယ်က ကွေ့ကျုံးမြို့မှာ ပုန်းအောင်းနေတယ်..."

အထက်ကမ္ဘာသည် အလွန်တရာ ကျယ်ပြောလှပြီး အောက်ကမ္ဘာထက် အဆပေါင်းများစွာ ပိုမို ကြီးမား၏။ ၎င်းကို အဓိက နယ်မြေကြီး ငါးခုအဖြစ် ခွဲခြားထားပြီး ထိုနယ်မြေကြီး ငါးခု၏ အောက်တွင် အလယ်အလတ် နယ်မြေ သုံးရာ ရှိသည်။ အလယ်အလတ် နယ်မြေ သုံးရာ၏ အောက်တွင် နယ်မြေငယ် သုံးရာ ရှိပြီး နယ်မြေငယ်များ၏ အရွယ်အစားက အောက်ကမ္ဘာနှင့် တူညီသည်။

တစ်ဖက်လူ ပြောသည်ကို ကြားသောအခါ လင်းထျန်းအန်သည် ခေါင်းညိတ်လိုက်ပြီး တွမ့်သယ်ကို ဖမ်းဆီးရန် မျိုးနွယ်စုအတွင်းရှိ အင်မော်တယ် အရှင်မြတ် စွမ်းအားရှင်များကို ဆက်သွယ်လိုက်၏။

တွမ့်သယ်၏ တည်နေရာကို တွက်ချက်ပြီးနောက် အင်မော်တယ် အရှင်မြတ် အထွတ်အထိပ်အဆင့် စွမ်းအားရှင်သည် ဝူယီဖန်၏ ပုံတူ ပန်းချီကားကို တစ်ချက် ကြည့်လိုက်ပြီးနောက် မျက်လုံးများကို မှိတ်ကာ စတင် တွက်ချက်တော့သည်။

မကြာမီ သူသည် မျက်လုံးများကို ဖွင့်လိုက်ပြီး အနည်းငယ် အံ့အားသင့်နေပုံဖြင့် မပြောဘဲ မနေနိုင်အောင် ဖြစ်သွား၏။

"စိတ်ဝင်စားစရာပဲ... ငါ့ရဲ့ တွက်ချက်မှုတွေနဲ့တောင် တွက်ချက်လို့ မရနိုင်တဲ့ သူတစ်ယောက်နဲ့ တကယ်ပဲ တွေ့ရတယ်ပေါ့လေ... အဲဒီလိုဆိုရင်တော့ ငါ အလေးအနက်ထားပြီး လုပ်တာကို အပြစ်မတင်နဲ့တော့..."

ထိုသို့ ပြောပြီးနောက် သူသည် ပါကွ သံလိုက်အိမ်မြှောင် တစ်ခုကို ထုတ်ယူလိုက်၏။ ၎င်းကို ထုတ်ယူလိုက်သည်နှင့် ပါကွ သံလိုက်အိမ်မြှောင်ပေါ်ရှိ ညွှန်တံသည် ဝူယီဖန်၏ အခြေအနေကို တွက်ချက်ရန် ရူးသွပ်စွာ လည်ပတ်နေတော့သည်။

သို့သော်လည်း မကြာမီ အင်မော်တယ် အရှင်မြတ် အထွတ်အထိပ်အဆင့်သည် ထိတ်လန့်တကြားဖြင့် မျက်လုံးများ ပြူးကျယ်သွားပြီး မယုံနိုင်စွာဖြင့် အော်ဟစ်လိုက်၏။

"ရွေးချယ်ခံရသူက တွက်ချက်မှုထက် ကျော်လွန်နေတယ်... ကြောက်စရာကောင်းတဲ့ အလားအလာပဲ... မဖြစ်ဘူး..."

လင်းထျန်းအန်နှင့် ရူဖုန်းစံအိမ်၏ သံတမန်တို့မှာ တုံ့ပြန်ရန် အချိန်မရလိုက်မီမှာပင် ၊ နောက်တစ်စက္ကန့်တွင် အင်မော်တယ် အရှင်မြတ် အထွတ်အထိပ်အဆင့်ရှိ ထိုအနှီပုဂ္ဂိုလ်မှာ သူတို့၏ မျက်စိရှေ့တွင်ပင် ပေါက်ကွဲသွားပြီး ၊ သူ၏ ခန္ဓာကိုယ်သည် အစအနပင် မကျန်တော့ဘဲ သူ၏ ပါကွ သံလိုက်အိမ်မြှောင် ပင်လျှင် အပိုင်းပိုင်း ကွဲထွက်သွားတော့သည်။

လင်းထျန်းအန်နှင့် ရူဖုန်းစံအိမ်၏ သံတမန်တို့ နှစ်ဦးစလုံးသည် အင်မော်တယ် အရှင်မြတ် အထွတ်အထိပ်အဆင့်ရှိ ထိုပုဂ္ဂိုလ်မှ ပြောခဲ့သည်များကို ကြားလိုက်ရပြီး သူတို့၏ အမူအရာများသည် အတော်လေး ကြည့်ရဆိုးသွားသည်။

အထူးသဖြင့် ရူဖုန်းစံအိမ်မှ တွက်ချက်၍ မရနိုင်သော လူများ လုံးဝ မရှိကြောင်း ယခုလေးတင် ပြောခဲ့သော ရူဖုန်းစံအိမ်၏သံတမန်မှာ သူ မှားယွင်းသွားကြောင်း ချက်ချင်း သက်သေပြခံလိုက်ရသည်။

သို့သော်လည်း ဤကိစ္စ၏ အရေးပါမှုကို သူ သိရှိထားပြီး ဤသည်က ရူဖုန်းစံအိမ် ဝင်ရောက်စွက်ဖက်၍ မရနိုင်သော ကိစ္စဖြစ်ရာ ၎င်းကို လျစ်လျူရှုလိုက်ခြင်းက အကောင်းဆုံး ဖြစ်ကြောင်း သူ သိလိုက်သည်။

ဤသို့ တွေးမိသောအခါ ရူဖုန်းစံအိမ် သံတမန်သည် လင်းထျန်းအန်ကို တိုက်ရိုက် ကြည့်လိုက်ပြီး သူ၏ လေသံမှာ ယခင်ကလောက် စိတ်အားထက်သန်မှု မရှိတော့ချေ။

"လင်းမိသားစု ခေါင်းဆောင်... ဒီကိစ္စက ရူဖုန်းစံအိမ် ဝင်ရောက်စွက်ဖက်နိုင်တဲ့ စွမ်းရည်ထက် ကျော်လွန်နေပါတယ်... ဒါကြောင့် ကျေးဇူးပြုပြီး ထွက်သွားပေးပါ..."

ထိုသို့ ပြောပြီးနောက် သူသည် လင်းထျန်းအန် ယခင်က ကမ်းလှမ်းခဲ့သော သယံဇာတများ အားလုံးကို သိမ်းယူလိုက်၏။

ဤသည်ကို မြင်သောအခါ လင်းထျန်းအန်သည် ချက်ချင်း စိုးရိမ်တကြီး ဖြစ်သွားသည်။

"မဖြစ်ဘူး... ဒါက လွန်လွန်းတယ်... မင်းက လက်ဆောင်တွေကိုတော့ ယူထားပြီး ဘာမှ မလုပ်ပေးဘူးပေါ့... အကယ်၍ ဒီသတင်းသာ ပျံ့သွားရင် မင်းတို့ ရူဖုန်းစံအိမ်ရဲ့ ဂုဏ်သတင်းကို ထိခိုက်မှာ မကြောက်ဘူးလား..."

"ဟွန့်... ဂုဏ်သတင်း... မင်းကြောင့် ငါတို့ ရူဖုန်းစံအိမ်ရဲ့ အင်မော်တယ် အရှင်မြတ် အထွတ်အထိပ်အဆင့် ဧည့်သည်တော် အကြီးအကဲ တစ်ယောက် သေဆုံးသွားခဲ့ရတာလေ... ဒီလောက် သယံဇာတ ပမာဏက မင်းအတွက် လျော်ကြေးအနေနဲ့တောင် တန်နေပြီ... မင်းမှာ ပြောစရာ တစ်ခုခု ရှိသေးလား..."

"ပြီးတော့ မင်းရဲ့ မိသားစု ကိစ္စတွေကို အမြန်ဆုံး ဖြေရှင်းဖို့ ပြန်သွားဖို့ ငါ အကြံပေးချင်တယ်..."

သံတမန် စကားဆုံးပြီးနောက် သူသည် လင်းထျန်းအန်ကို ထွက်သွားရန် တိုက်ရိုက် တောင်းဆိုလိုက်၏။

ဤစကားကို ကြားသောအခါ လင်းထျန်းအန်၏ အမူအရာသည် အတော်လေး ကြည့်ရဆိုးသွားသော်လည်း နောက်ဆုံးတွင် သူ ဘာမှမပြောခဲ့ချေ။ တစ်ဖက်လူ ပြောသည်မှာ မှန်ပေသည်။ လက်ရှိ အရေးအကြီးဆုံး ကိစ္စမှာ ပြန်သွားပြီး ဤကိစ္စကို မည်သို့ ဖြေရှင်းရမည်နည်း ဆိုသည်ကို သူ၏ မျိုးနွယ်စုနှင့် ဆွေးနွေးရန်ပင် ဖြစ်၏။

တစ်ချိန်တည်းမှာပင် လွတ်မြောက်လာသော ဝူယီဖန်သည် နောက်ဆုံးတွင် သက်ပြင်းတစ်ချက် ချနိုင်သွားပြီး သူ၏ အမူအရာသည် အလွန် လေးနက်တည်ကြည်နေ၏။

"ငါ့ကံက ဒီလောက် ဆိုးလိမ့်မယ်လို့ ငါ မျှော်လင့်မထားခဲ့ဘူး... အင်မော်တယ် အရှင်မြတ် တစ်ပါးနဲ့ တကယ်ကြီး တွေ့ခဲ့ရတာပဲ... ဒါပေမဲ့ ငါက ခြေတစ်လှမ်း စောနေသေးလို့ လွတ်လာတာပဲ... ကြည့်ရတာ ရှေးဟောင်း မြင့်မြတ်ခန္ဓာကိုယ်ကို မဟာတာအိုဖွင့်လှစ်ခြင်း ကောင်းကင်ခန္ဓာ အဖြစ် အဆင့်မြှင့်တင်ဖို့ အချိန်ရောက်ပြီ..."

"ငါ မသိတာက... တွမ့်သယ်ရဲ့ ဘက်မှာ အခြေအနေ ဘယ်လို ရှိလဲ ဆိုတာပဲ..."

ဤအခိုက်အတန့်တွင်မှ ဝူယီဖန်သည် တွမ့်သယ်၏ တည်ရှိမှုကို သတိရသွားပြီး အင်မော်တယ် ကျောက်တုံးကို ထုတ်ယူကာ တွမ့်သယ်ကို ဆက်သွယ်လိုက်၏။

မိနစ်များ ကုန်လွန်လာသည်နှင့်အမျှ ဝူယီဖန်၏ စိုးရိမ်ပူပန်မှုမှာ ကြီးထွားလာသော်လည်း ကံကောင်းစွာဖြင့် နောက်ဆုံးတွင် ချိတ်ဆက်နိုင်ခဲ့သည်။ တွမ့်သယ် အဆင်ပြေကြောင်း ကြားလိုက်ရသဖြင့် ဝူယီဖန်သညိ နောက်ဆုံးတွင် သက်ပြင်းတစ်ချက် ချနိုင်သွား၏။

"ကောင်းပြီ... မင်း အခု မြင့်မြတ်နယ်မြေကို ပြန်သွားလိုက်... ငါလည်း ပြန်လာခဲ့မယ်... ငါတို့ မြင့်မြတ်နယ်မြေမှာ ဆုံကြတာပေါ့..."

ထိုသို့ ပြောပြီးနောက် ဝူယီဖန်သည် ဖုန်းချလိုက်ပြီး ရှေးဟောင်းကန္တာရ မြင့်မြတ်နယ်မြေဆီသို့ ချက်ချင်း ပြန်လည် ထွက်ခွာသွားတော့သည်။ ဤစကားကို ကြားသောအခါ တွမ့်သယ်ကလည်း ချက်ချင်း ထွက်ခွာလာပြီး ရှေးဟောင်းကန္တာရ မြင့်မြတ်နယ်မြေဆီသို့ ဦးတည်သွားတော့၏။

ဝူဟောက်ဘက်တွင်မူ ၊ သူသည် မျက်လုံးများကို ဖွင့်ကာ အလယ်ပိုင်းဒေသဆီသို့ လှမ်းကြည့်လိုက်သည်။ ယခုလေးတင် တစ်စုံတစ်ယောက်က ဝူယီဖန်၏ အချက်အလက်များကို တွက်ချက်နေကြောင်း သူ ခံစားလိုက်ရ၏။ သူသည် ၎င်းကို သတိပြုမိပြီးနောက် အတွေးအာရုံဖြင့် သူ့ကို ချေမှုန်းပစ်လိုက်ခြင်း ဖြစ်သည်။

"ယီဖန်က အင်မော်တယ် အရှင်မြတ်ရဲ့ ပစ်မှတ် ဘယ်လိုလုပ်ဖြစ်လာလဲဆိုတာကို ငါ မသိပေမဲ့ ...ဒါပေမဲ့ အချိန်က အရမ်း စောလွန်းနေတယ်... ဘိုးဘေးကြီး တစ်ယောက်အနေနဲ့ ငါ အဲ့တာကို တားဆီးပေးတာ ယုတ္တိရှိပါတယ်လေ..."

ဝူဟောက်သည် ဖြည်းညင်းစွာ ခေါင်းယမ်းလိုက်ပြီးနောက် စူးချောင်ရန်ကို ဖက်ကာ နောက်တစ်ကြိမ် အိပ်မောကျသွားတော့၏။

သို့သော်လည်း ဤအခိုက်အတန့်တွင် အထက်ကမ္ဘာ၏ အရှေ့ပိုင်းဒေသရှိ ဒြပ်စင်ငါးပါး မြင့်မြတ်နယ်မြေ၌ အချိန်ကြာမြင့်စွာ ခရီးသွားလာပြီးနောက် ဝူကျန်းအဲ့သည် နောက်ဆုံးတွင် ဒြပ်စင်ငါးပါး မြင့်မြတ်နယ်မြေသို့ ရောက်ရှိလာခဲ့သည်။

ထိုအချိန်တွင် ဒြပ်စင်ငါးပါး မြင့်မြတ်နယ်မြေသည် ၎င်း၏ ကိုယ်ပိုင် ဂိုဏ်းကို တည်ထောင်ကာ တပည့်သစ်များကို လက်ခံနေလေ၏။

အခန်း ၁၈၆ - ကံကြမ္မာရွေးချယ်ခံရသူ အားလုံးက သူတော်စင်တွေလား

ဒြပ်စင်ငါးပါး ခေါင်းလောင်းသည် ကိုးကြိမ်တိတိ မြည်ဟည်းသွားသောအခါ ဝူကျန်းအဲ့မှာ အံ့အားသင့်ကာ နေရာတွင်ပင် ကြက်သေသေသွား၏။ သူသည် ဒြပ်စင်ငါးပါး ခေါင်းလောင်းကို ကိုးကြိမ်တိတိ မြည်ဟည်းအောင် လုပ်နိုင်လိမ့်မည်ဟု မျှော်လင့်မထားခဲ့ချေ။

နောက်တစ်စက္ကန့်တွင် ချက်ချင်းဆိုသလိုပင် ဒြပ်စင်ငါးပါး မြင့်မြတ်နယ်မြေ၏ ကာကွယ်ရေး ဖွဲ့စည်းပုံသည် အသက်ဝင်လာပြီး မည်သည့် သတင်းစကားမျှ အပြင်သို့ မထွက်သွားစေရန် ယင်ကောင် တစ်ကောင်တောင်မှ မလွတ်မြောက်နိုင်အောင် တားဆီးလိုက်၏။

ဝူကျန်းအဲ့ သတိပြန်ဝင်လာချိန်တွင် သန်မာလှသော ပုဂ္ဂိုလ် အများအပြားက သူ၏ ရှေ့၌ ထွက်ပေါ်လာကြပြီး ၊ သူတို့အားလုံးသည် ဒြပ်စင်ငါးပါး မြင့်မြတ်နယ်မြေမှ အဆင့်မြင့် အဖွဲ့ဝင်များ ဖြစ်ကြသည်။

"မိတ်ဆွေလေး... မင်းဆီမှာ အင်မော်တယ် ဧကရာဇ် တစ်ပါးရဲ့ အလားအလာကို ငါ မြင်တယ်... ငါ့ရဲ့ တပည့်အဖြစ် ခံယူဖို့ မင်း ဆန္ဒရှိလား... ငါက အင်မော်တယ် ဧကရာဇ် နှောင်းပိုင်းအဆင့်ရှိတဲ့ သန်မာလှတဲ့ ကျင့်ကြံသူ တစ်ဦးပဲ... အကယ်၍ မင်းသာ ငါ့ရဲ့ တပည့် ဖြစ်လာမယ်ဆိုရင် အတိုတောင်းဆုံး အချိန်အတွင်းမှာ အင်မော်တယ် ဧကရာဇ် အဆင့်ကို ဖောက်ထွက်နိုင်အောင် ကူညီပေးမယ်လို့ ငါ အာမခံတယ်..."

ချင်ဇီကျွင်းသည် ဝူကျန်းအဲ့ကို ကြည့်လျက် မျက်လုံးများ အရောင်လက်နေသည်မှာ အဝတ်ဗလာဖြင့် ရှိနေသော အလွန်တရာမျှ လှပသော အမျိုးသမီး တစ်ဦးကို မြင်တွေ့လိုက်ရပြီး သွေးသားဆန္ဒ ပြင်းပြသူ တစ်ဦးနှင့် တူနေ၏။

ဝူကျန်းအဲ့သည် သူ၏ ပြင်းထန်သော အကြည့်များကြောင့် တံတွေးကို အတင်း မြိုချလိုက်ရသည်။

ဒီမသက်မသာ ဖြစ်ရတဲ့ ခံစားချက်ကြီးက ဘာကြီးလဲ...

သို့သော်လည်း သူသည် ဒြပ်စင်ငါးပါး မြင့်မြတ်နယ်မြေသို့ လာရောက်ရခြင်း၏ ရည်ရွယ်ချက်မှာ တပည့် တစ်ဦး ဖြစ်လာရန်မျှသာ ဖြစ်၏။ သူသည် အချိန်အကြာကြီး ကျင့်ကြံလာခဲ့ပြီး အရာအားလုံးကို သူ့ဘာသာသူ အမြဲတမ်း ဖြေရှင်းနေခဲ့ရသည်။ အကယ်၍ အင်မော်တယ် ဧကရာဇ် တစ်ပါးသာ ဆရာ ဖြစ်လာမည်ဆိုလျှင် ယင်းက သူ့အတွက် သေချာပေါက် ကြီးမားသော အကူအညီ ဖြစ်လာပေလိမ့်မည်။

ဤသို့ တွေးမိသောအခါ ဝူကျန်းအဲ့သည် လက်အုပ်ချီကာ ရိုသေလေးစားစွာဖြင့် ဦးညွှတ်လိုက်သည်။

"တပည့် ဝူကျန်းအဲ့က ဆရာ့ကို ဂါရဝပြုပါတယ်..."

"ဟားဟားဟား... တော်တယ်... ဝူကျန်းအဲ့ ဟုတ်လား... ငါက ဒြပ်စင်ငါးပါး မြင့်မြတ်နယ်မြေရဲ့ မြင့်မြတ်အရှင်သခင် ချင်ဇီကျွင်းပဲ... ဒီနေ့ကစပြီး မင်းက ငါ့ရဲ့ ကိုယ်ပိုင်တပည့် ဖြစ်သွားပြီ..."

ဝူကျန်းအဲ့၏ သဘောတူညီချက်ကို ကြားသောအခါ ချင်ဇီကျွင်းသည် အလွန်ပင် ပြုံးရွှင်သွားသဖြင့် သူ၏ မျက်နှာပေါ်ရှိ အရေးကြောင်းများကိုပင် ဖုံးကွယ်ထား၍ မရနိုင်တော့ဘဲ ဂန္ဓမာပန်း တစ်ပွင့်နှင့် တူသွားစေ၏။

အခြား အကြီးအကဲများက ဝူကျန်းအဲ့ကို ချင်ဇီကျွင်း တစ်ယောက် လုယူသွားသည်ကို မြင်သောအခါ ဒေါသထွက်သွားကြသော်လည်း ၊ အတန်ကြာပြီးနောက် မတတ်သာသည့်ဟန်ဖြင့် သက်ပြင်းချလိုက်ကြသည်။ မည်သို့ပင်ဆိုစေကာမူ၊ ချင်ဇီကျွင်းသည် ဒြပ်စင်ငါးပါး မြင့်မြတ်ခန္ဓာကိုယ်နှင့် အင်မော်တယ် ဧကရာဇ် နှောင်းပိုင်းအဆင့် ရှိ ကျင့်ကြံမှုကို ပိုင်ဆိုင်ထားသဖြင့် ဒြပ်စင်ငါးပါး မြင့်မြတ်နယ်မြေတွင် အသန်မာဆုံးသူ ဖြစ်၏။ အမှန်တကယ်ပင် ဝူကျန်းအဲ့၏ ကျင့်ကြံခြင်းကို လမ်းညွှန်ပေးရန် ချင်ဇီကျွင်းထက် ပို၍ သင့်လျော်သောသူ မရှိတော့ချေ။

တစ်ချိန်တည်းမှာပင် အခြားတစ်ဘက်၌ ဝူဟောက်၏ နှင်ထုတ်ခြင်းကို ခံလိုက်ရပြီးနောက် ဝူလီသည် သူ၏ နောက်ထပ် ခြေလှမ်းအတွက် စဉ်းစားနေ၏။ မည်သို့ပင်ဆိုစေကာမူ၊ အစီအစဉ် မရှိသော ဘဝတစ်ခုက... မဟုတ်ဘူး... အင်မော်တယ် ဘဝခရီးလမ်းသည် အန္တရာယ်များဖြင့် ပြည့်နှက်နေပြီး အစီအစဉ် မရှိဘဲ အပြင်ထွက်ရသည်ကို သူ သဘောမကျချေ။

"အင်း... ငါ အစီအစဉ် တစ်ခုတော့ ဆွဲရမယ်... အထက်ကမ္ဘာရဲ့ အခြေအနေကို အရင်ဆုံး စုံစမ်းဖို့ အားနည်းတဲ့ ဂိုဏ်းတစ်ခုကို ရှာကြည့်ကြတာပေါ့..."

ဤသို့ တွေးမိသောအခါ ဝူလီသည် သက်ပြင်းချလိုက်ပြီးနောက် ပတ်ဝန်းကျင်ကို စတင် ရှာဖွေလိုက်ရာ သင့်လျော်သော အဖွဲ့အစည်း တစ်ခုကို အလျင်အမြန် ရှာတွေ့သွား၏။

တစ်ချိန်တည်းမှာပင် ရွှမ်ထျန်းကမ္ဘာ၌။

အချိန်များ ကုန်လွန်လာသည်နှင့်အမျှ ဝူရှန်းနီနှင့် ဝူမိုဝူတို့သည် လူသားအင်မော်တယ် အဆင့်သို့ နောက်ဆုံးတွင် ဖောက်ထွက်သွားခဲ့ကြပြီး အထက်ကမ္ဘာသို့ တစ်ယောက်ပြီး တစ်ယောက် တက်လှမ်းသွားကြ၏။

ဝူရှန်းနီနှင့် ဝူမိုဝူတို့ တက်လှမ်းသွားသည်ကို ကြည့်ကာ ဝူဝမ်တောက်နှင့် ဇနီးဖြစ်သူတို့၏ မျက်လုံးများထဲတွင် လွမ်းဆွတ်မှုများဖြင့် ပြည့်နှက်နေသည်။ မည်သို့ပင်ဆိုစေကာမူ၊ သူတို့ကို ဘယ်အချိန်မှ ပြန်တွေ့ရမည်ကို သူတို့ မသိကြချေ။

"မင်းတို့ အားလုံး ဘာလို့ အဲဒီလောက် စိတ်ဓာတ်ကျနေကြတာလဲ... ဆက်ကြိုးစားကြလေ... မဟာဧကရာဇ် အထွတ်အထိပ်အဆင့်ကို ဖောက်ထွက်ပြီး အမြန်ဆုံး တက်လှမ်းကြစမ်းပါ..."

လူတိုင်း၏ စိတ်ဓာတ်ကျနေသော အမူအရာများကို မြင်ပြီး ဝူရူလုံသည် မိသားစု ခေါင်းဆောင် တစ်ယောက်အနေဖြင့် ရှေ့သို့ ထွက်လာပြီး သူ၏ မဟာဧကရာဇ် နှောင်းပိုင်းအဆင့် ရှိ ကျင့်ကြံမှုများဖြင့် ပေါက်ကွဲထွက်လာကာ ဝူမိသားစုဝင်များကို အားပေးနေသကဲ့သို့ ရှိ၏။

ထို့နောက် နောက်တစ်စက္ကန့်တွင် ဝူချီထျန်းက ရှေ့သို့ ထွက်လာသည်။

"အဖေ... အဖေ့ရဲ့ အားတွေကို ချွေတာထားလိုက်ပါ... ကျင့်ကြံဖို့နဲ့ မဟာဧကရာဇ် အထွတ်အထိပ်အဆင့်ကို ဖောက်ထွက်ဖို့ကိုပဲ အရင် အာရုံစိုက်ကြစို့..."

ဝူချီထျန်းသည် မဟာဧကရာဇ် အထွတ်အထိပ်အဆင့်သို့ ဖောက်ထွက်ပြီးပြီ ဖြစ်ရာ အောက်ကမ္ဘာရှိ ဝူမိသားစုတွင် အငြင်းပွားဖွယ်မရှိ အသန်မာဆုံးသူ ဖြစ်ကြောင်း သက်သေပြနေ၏။

မည်သို့ပင်ဖြစ်စေ ယခုအခါ လူတိုင်းက အင်မော်တယ် ဆေးလုံးများကို စားသုံးနေကြသော်လည်း ပါရမီတွင် အနည်းငယ် ကွာခြားမှုများ ရှိနေသေးသည်။ ဝူရူလုံသည် အင်မော်တယ် ဆေးလုံး၏ ပြုပြင်မွမ်းမံမှုအောက်တွင် သူ၏ ပါရမီသည် အများဆုံး အဆင့်မြင့် ဝိညာဉ်အမြစ် အဖြစ်သို့သာ ရောက်ရှိနိုင်သေး၏။ဝူချီထျန်းသည် သူ၏ ပါရမီကြောင့် ထိပ်တန်းအဆင့် ဝိညာဉ်အမြစ် အဖြစ် ရောက်ရှိထားသည်။

"အဟမ်း... ဘာပဲဖြစ်ဖြစ် အားလုံး ကြိုးကြိုးစားစား ကျင့်ကြံပြီး အထက်ကမ္ဘာကို အမြန်ဆုံး တက်လှမ်းနိုင်အောင် လုပ်ကြ... ပြီးတော့ အထက်ကမ္ဘာမှာ ဝူမိသားစု ကုန်သွယ်ရေးက ဘယ်လို အခြေအနေ ရှိနေလဲဆိုတာ ငါ တကယ် သိချင်တယ်..."

ဤအကြောင်းကို တွေးမိသောအခါ ဝူရူလုံ၏ မျက်လုံးများထဲတွင် လွမ်းဆွတ်မှုနှင့် တမ်းတမှုတို့ ဖြင့် ရှုပ်ထွေးစွာ ပြည့်နှက်သွား၏။ ဝူမိသားစု ကုန်သွယ်ရေးသည် သူ၏ ဘဝတစ်သက်တာ လုပ်ဆောင်ခဲ့သော အလုပ်ဖြစ်ပြီး ၊ ဝူမိသားစု ကုန်သွယ်ရေးသည် ကမ္ဘာမြေ အသီးသီးသို့ ပြန့်နှံ့သွားနိုင်ရန် အခြားသူများထက် သူ ပို၍ မျှော်လင့်မိသည်။

တစ်ချိန်တည်းမှာပင် အလယ်ပိုင်းဒေသ၌ ကပ်ဘေးမိုးကြိုးများ ဆက်တိုက် ပေါ်ထွက်လာပြီး ၎င်း၏ ပစ်မှတ်မှာ လင်းယာဟွမ် ဖြစ်ပေသည်။

ထန်ယန်၏ အကူအညီဖြင့် လင်းယာဟွမ်၏ ပါရမီသည် ယခင်က တစ်ခါမျှ မရှိခဲ့ဖူးသည့်အတိုင်း မြင့်တက်လာခဲ့သည်။ ဤမျှ တိုတောင်းသော အချိန်လေးအတွင်းမှာပင် ဧကရာဇ်တစ်ပိုင်း အထွတ်အထိပ်အဆင့်မှနေ၍ လူသားအင်မော်တယ် အဆင့်သို့ တိုက်ရိုက် တက်လှမ်းသွားခဲ့ပြီး ဝူရူလုံနှင့် အခြားသူများထက်ပင် ပို၍ မြန်ဆန်နေ၏။ ဤသည်က ရွှေရောင်လက်ချောင်း၏ အကူအညီဖြင့် လင်းယာဟွမ် ရောက်ရှိနိုင်သော ပါရမီရှင် အဆင့်ကို ပြသနေသည်။

"ငါတို့ ပန်းတစ်သောင်းမြင့်မြတ်နယ်မြေမှာ အကဲဖြတ်ခံရမယ့် ပထမဆုံးသူက သူမ ဖြစ်လာလိမ့်မယ်လို့ ငါ တကယ်ပဲ မျှော်လင့်မထားခဲ့ဘူး..."

မနီးမဝေးတွင် လင်းထျန်းရိနှင့် အခြားသူများသည် အတူတူ ရပ်ကာ ကပ်ဘေးမိုးကြိုးအောက်ရှိ လင်းယာဟွမ်ကို ကြည့်နေကြပြီး သူတို့၏ အမူအရာများသည် အလွန်တရာ ရှုပ်ထွေးနေ၏။

ပါရမီအရ၊ သူတို့သည် လင်းယာဟွမ်ထက် ပို၍ ပါရမီပါကြောင်းကို သင် သိထားရမည်။ အသန်မာဆုံး ဖြစ်သော လင်းထျန်းရိ ပင်လျှင် မဟာဧကရာဇ် နှောင်းပိုင်းအဆင့်သို့သာ ရောက်ရှိသေးသည်။

မဟာအကြီးအကဲက ဘေးတွင် ရပ်ကာ ပြောလိုက်သည်။

"ဒါပေမဲ့ ဒါကလည်း ကောင်းပါတယ်လေ... ငါတို့ ပန်းတစ်သောင်းမြင့်မြတ်နယ်မြေက ဝူမိသားစု ပြီးရင် တက်လှမ်းနိုင်သူ ရှိတဲ့ ဒုတိယမြောက် အဖွဲ့အစည်းအဖြစ် သတ်မှတ်လို့ ရပြီ... သူတော်စင်မရဲ့ တက်လှမ်းခြင်းက ငါတို့ ပန်းတစ်သောင်းမြင့်မြတ်နယ်မြေအတွက် လမ်းခင်းပေးဖို့ပဲ..."

ဤစကားကို ကြားသောအခါ လင်းထျန်းရိနှင့် အခြားသူများက ခေါင်းငြိမ့်သဘောတူလိုက်ကြသည်။

သို့သော်လည်း လင်းယာဟွမ်သည် ဤအကြောင်းများကို လုံးဝ မသိရှိခဲ့ချေ။ ဤအခိုက်အတန့်တွင် သူမသည် ကပ်ဘေးမိုးကြိုးထဲမှ တက်လှမ်းခြင်းကိုသာ အပြည့်အဝ အာရုံစိုက်နေ၏။ တက်လှမ်းခြင်း ပြီးဆုံးသွားသည်နှင့် ကပ်ဘေးမိုးကြိုးများ ပျောက်ကွယ်သွားပြီး လင်းယာဟွမ်၏ ပုံရိပ်ကလည်း ၎င်းနှင့်အတူ ပျောက်ကွယ်ကာ အထက်ကမ္ဘာသို့ ရောက်ရှိသွားတော့သည်။

တစ်ချိန်တည်းမှာပင် အထက်ကမ္ဘာ၌။

ဝူရှန်းနီ တက်လှမ်းလာပြီး စက္ကန့်ပိုင်း အကြာမှာပင် ဝူမိုဝူက အနောက်မှ လိုက်ပါလာ၏။ သူနှင့်အတူ တက်လာသော ညီမကို ကြည့်ကာ ဝူရှန်းနီသည် အနည်းငယ် မျက်မှောင်ကြုတ်သွားပြီး ညီမဖြစ်သူကို သူမဘာသာသူ ခွဲထွက်သွားအောင် မည်သို့ လုပ်ရမည်ကို တွေးနေမိသည်။ သို့သော်လည်း ဝူမိုဝူက အရင် စကားပြောလာလိမ့်မည်ဟု သူ မျှော်လင့်မထားခဲ့ချေ။

"အစ်ကို... အောက်ကမ္ဘာမှာတုန်းက ငါတို့က အမြဲတမ်း တွဲနေခဲ့ကြတယ်... အဲဒါက ငါတို့ရဲ့ ကြီးထွားမှုအတွက် မကောင်းဘူး... အထက်ကမ္ဘာမှာ ငါတို့ ခွဲသွားကြရင်ရော ဘယ်လိုလဲ... အဲ့တာက ငါတို့ကို ပိုပြီး သန်မာလာစေနိုင်တယ်လေ..."

ညီမဖြစ်သူ၏ စကားများကို ကြားသောအခါ ဝူရှန်းနီသည် ဆုံးဖြတ်ချက် ချပြီးသား ဖြစ်သော်လည်း ၊ သို့သော်လည်း အကြောင်းပြချက် တစ်ခုခုကြောင့် ဤအခိုက်အတန့်တွင် တွန့်ဆုတ်နေမိ၏။

သို့သော်လည်း အလျင်အမြန်ပင် ဝူရှန်းနီက ပြုံးကာ ခေါင်းညိတ်လိုက်သည်။

"ကောင်းပြီလေ... အဲဒီလိုဆိုရင် အထွတ်အထိပ် ရောက်မှပဲ ဆုံကြတာပေါ့..."

"အိုကေ... အထွတ်အထိပ် ရောက်မှ တွေ့မယ်..."

ဝူမိုဝူသည် ပြုံးလိုက်ပြီးနောက် လှည့်ကာ အဝေးသို့ ထွက်ပြေးသွားတော့သည်။ ဝူရှန်းနီကလည်း ဝူမိုဝူနှင့် ဆန့်ကျင်ဘက် အရပ်ဆီသို့ ပြေးသွားကာ သူတို့၏ ဘဝလမ်းကြောင်းများသည် ကွဲကွာသွားသကဲ့သို့ ရှိနေ၏။

"အင်း... ဒါက အထက်ကမ္ဘာမှာ လွှမ်းမိုးမှု ရှိတဲ့ အဖွဲ့အစည်းရဲ့ ပိုင်နက် ဆိုတာ သေချာရဲ့လား... အကယ်၍ မင်းသာ ငါ့ကို လိမ်ရဲရင် အကျိုးဆက်တွေကို မင်း သိထားသင့်တယ်နော်..."

အင်မော်တယ် အရှင်မြတ် အဆင့် သို့မဟုတ် အထက်ရှိ သန်မာလှသော ပုဂ္ဂိုလ်များ ရှိနေသည့် အထက်ကမ္ဘာရှိ အဖွဲ့အစည်းများနှင့် ပတ်သက်သော အချက်အလက်များကို ကိုင်ဆောင်ထားရင်း ဝူလီသည် မနီးမဝေးရှိ မျက်နှာတွင် ညိုမည်းဖူးယောင်နေအောင် အရိုက်ခံထားရသော လူလတ်ပိုင်း တစ်ဦးဘက်သို့ လှည့်ကာ ပြောလိုက်၏။

ထိုလူလတ်ပိုင်းသည် မကောင်းသော အမှတ်တရများကို ပြန်လည် သတိရသွားသကဲ့သို့ ခေါင်းကို အထပ်ထပ် ညိတ်ပြလိုက်သည်။

"အရှင်... ဒါက အထက်ကမ္ဘာရဲ့ အင်အားစုတွေ အားလုံးနဲ့ ပတ်သက်တဲ့ အချက်အလက်တွေပါ... အရှင့်ကို ကျွန်တော် တကယ် မလိမ်ရဲပါဘူး..."

ဤအခိုက်အတန့်တွင် ထျန်းယွီဂိုဏ်း၏ ဂိုဏ်းချုပ် လုထျန်းယွီမှာ စိတ်ထဲမှ ကြိတ်ပြီး ကျိန်ဆဲနေလေ၏။ သူသည် ဂိုဏ်းထဲတွင် ကောင်းမွန်စွာ ကျင့်ကြံနေပြီး စစ်မှန်အင်မော်တယ် အဆင့်သို့ ဖောက်ထွက်ရန် စီစဉ်နေစဉ်မှာပင် လူငယ်တစ်ယောက် ရုတ်တရက် ရောက်လာပြီး အထက်ကမ္ဘာတွင် အင်မော်တယ် အရှင်မြတ် အဆင့်ရှိ စွမ်းအားရှင်များ ရှိနေသော အဖွဲ့အစည်း အားလုံးနှင့် ပတ်သက်သည့် အချက်အလက်များကို လာရောက် တောင်းခံခဲ့သည်။

လုထျန်းယွီသည် မာနကြီးပြီး မောက်မာသော သူတစ်ယောက် ဖြစ်ကာ ဤကဲ့သို့သော အရှက်ခွဲခံရမှုမျိုးကို တစ်ခါမှ မကြုံဖူးသဖြင့် သူသည် ချက်ချင်းပင် တိုက်ခိုက်ခဲ့သည်။

သို့သော်လည်း နှစ်မိနစ်ခွဲ အကြာတွင် ဝူလီသည် သူ့ကို လုံးလုံးလျားလျား အနိုင်ယူသွားခဲ့လေသည်။