အခန်း (၄၂၃-၄၂၄)
Vol. 31 Ch. 423-424
အခန်း ( ၄၂၃ ) - အားလုံးက အထင်လွဲမှုတွေပါ။ အတိတ်က ဘာတွေဖြစ်ခဲ့တာလဲ။ သူရဲ့ နောက်ခံက ဘာလဲ
ချီလျိုမှ ကုချန်အား ချီလျန်မျိုးနွယ်၏ လက်ရှိ အရှင်သခင်ဟု ပြောလိုက်သောအခါ ယွဲ့လင်အင်မော်တယ်ဘုရင်၏ စိတ်ထဲတွင် ဖြစ်နိုင်ချေကို ချက်ချင်း တွေးမိလိုက်၏။ ထိုအရာမှာ ဤသူသည် ချီလျန်မျိုးနွယ်တစ်ခုလုံးကို အတင်းအကျပ် အစေခံအဖြစ် သစ္စာခံခိုင်းထားခြင်း ဖြစ်ရမည်။
ချီလျန်မျိုးနွယ်မှ ဆန္ဒအလျောက် အညံ့ခံလိမ့်မည်ဟု ယွဲ့လင်အင်မော်တယ်ဘုရင် လုံးဝ မတွေးခဲ့မိပေ။
ရှေးဟောင်းခေတ်က ချီလျန်မျိုးနွယ်သည် အဘယ်ကြောင့် ကြီးမားသော အန္တရာယ်ကို ရင်ဆိုင်ကာ အင်မော်တယ်နယ်မြေကို သစ္စာဖောက်ကာ နတ်ဆိုးနယ်မြေသို့ ဝင်ရောက်ခဲ့သနည်း။ အင်မော်တယ်ဘုရင်များထံ အညံ့မခံလိုဘဲ အခြားသူများ၏ဖိနှိပ်မှုကို မခံလိုသောကြောင့် မဟုတ်ပါလော။
သို့သော် ယခုအခါ ချီလျန်မျိုးနွယ်မှာ အတင်းအကျပ် အစေခံအဖြစ်ခိုင်းခံနေရရာ ယွဲ့လင်အင်မော်တယ်ဘုရင်မှာ မည်သို့ ဒေါသမထွက်ဘဲ နေမည်နည်း။ ချီလျို၏မျက်နှာပေါ်ရှိ ရိုးသားစွာ ကြည်ညိုလေးစားနေသော အမူအရာကိုမူ ယွဲ့လင်အင်မော်တယ်ဘုရင် လုံးဝ မယုံကြည်ခဲ့ပေ။
အင်မော်တယ်ဘုရင်အဆင့် တည်ရှိမှုတစ်ခုအတွက် အင်မော်တယ်ဘုရင်အောက် အဆင့်ရှိသူကို အညံ့ခံစေရန်မှာ အလွန်လွယ်ကူလှ၏။ သူတို့၏ ဝိညာဉ်အမှတ်အသားကို ထိန်းချုပ်လိုက်ရုံဖြင့် ဝိညာဉ်အမှတ်အသား အထိန်းချုပ်ခံရသူသည် တစ်ဖက်လူကို သူတို့၏ အမြင့်မြတ်ဆုံး အရှင်သခင်အဖြစ် သဘာဝကျကျ မှတ်ယူသွားမည် ဖြစ်သည်။
ငါ့ရဲ့ ချီလျန်မျိုးနွယ်က ဒီလောက်အထိ ရုန်းကန်ခဲ့ရတာတောင် နောက်ဆုံးမှာ ဒီလိုအဆုံးသတ်မျိုးနဲ့ ရင်ဆိုင်ရလိမ့်မယ်လို့ မထင်ထားခဲ့ဘူး။
ယွဲ့လင်အင်မော်တယ်ဘုရင်၏ မျက်လုံးများထဲတွင် နက်ရှိုင်းစွာ မြှုပ်နှံထားသော ဝမ်းနည်းမှုများ ပေါ်လာ၏။ သူသည် အလွန်အမင်း ရင်နာနေသော်လည်း သူ၏ အထောက်အထား အစစ်အမှန်ကိုမူ မဖော်ပြရဲသေးပေ။
" ဘိုးဘေး... အထင်လွဲနေပါပြီ "
ယွဲ့လင်အင်မော်တယ်ဘုရင်မှာ တိတ်ဆိတ်နေလျက် သတ်ဖြတ်လိုစိတ် အနည်းငယ် ထွက်ပေါ်လာသည်ကို ခံစားလိုက်ရသောအခါ ချီလျိုသည် ဤဘိုးဘေး တစ်ခုခု အထင်လွဲနေပြီဖြစ်ကြောင်း ချက်ချင်း သဘောပေါက်သွား၏။ ထို့ကြောင့် သူသည် အလျင်အမြန် ရှင်းပြလိုက်၏။
" အရှင်သခင်ကို ကျွန်မတို့ ချီလျန်မျိုးနွယ်ရဲ့ အရှင်သခင်အဖြစ် တင်မြှောက်တာက... အရှင်သခင်က အတင်းအကျပ် ဖိအားပေးလို့ မဟုတ်ပါဘူး... ချီလျန်မျိုးနွယ် တစ်ခုလုံး တိုင်ပင်ဆွေးနွေးပြီး စုပေါင်းဆုံးဖြတ်ခဲ့ကြတာပါ... တကယ်လို့ အရှင်သခင်သာ မရှိခဲ့ရင် ချီလျန်မျိုးနွယ်ဟာ ပျက်သုဉ်းသွားတာ ကြာပါပြီ... ဒီနေ့အထိတောင် ရှင်သန်နိုင်ခဲ့မှာ မဟုတ်ပါဘူး "
ချီလျန်မျိုးနွယ် ယနေ့တိုင် ရှင်သန်နေနိုင်ခြင်းနှင့် လက်ရှိ အဆင့်အတန်းကို ရရှိထားခြင်းမှာ ကုချန်ကြောင့်သာ ဖြစ်ကြောင်း ချီလျိုသည် ရှင်းလင်းစွာ သိထား၏။
အကယ်၍ ချီမုန်သာ ထိုအချိန်က ပါးနပ်စွာဖြင့် ဤအရှင်သခင်ကို အသိအမှတ်မပြုခဲ့ဘဲ ချီလျန်မျိုးနွယ်အတွက် အလှည့်အပြောင်းတစ်ခု မယူဆောင်လာပေးခဲ့ပါက လက်ရှိ ချီလျန်မျိုးနွယ်သည် ရှီမိုကောင်းကင်အရှင်၏ သွယ်ဝိုက်သော ခွင့်ပြုချက်ဖြင့် နယ်မြေအသီးသီးမှ နတ်ဆိုးအရှင်များ၏ ဝါးမျိုခြင်းကို ခံရကာ အရိပ်အယောင်ပင် ကျန်ရစ်မည်မဟုတ်ချေ။
အရှင်သခင် ရှိနေခြင်းကြောင့်သာ ချီလျန်မျိုးနွယ်သည် အဆုံးမဲ့ ကောင်းကင်ဘုံအတွင်း အကြီးဆုံး မျိုးနွယ်စု ဖြစ်လာရုံသာမက တစ်ချိန်က အရပ်ရှစ်မျက်နှာသို့ ထွက်ပြေးပုန်းအောင်းခဲ့ရသော ချီလျန်မျိုးနွယ်ဝင်များ အားလုံးလည်း ချီလျန်မျိုးနွယ်ထံ ပြန်လာကာ မျိုးနွယ်စုဝင်များနှင့် ပြန်လည်ဆုံဆည်းနိုင်ခဲ့ကြသည်။
ဤအရာအားလုံးမှာ အရှင်သခင်၏ စွမ်းအားအပေါ် လုံးလုံးလျားလျား မှီခိုနေရခြင်း ဖြစ်သည်။
ဤအခြေအနေများအောက်တွင် လက်ရှိအချိန်၌ ချီလျိုနှင့် ချီမုန် သားအမိနှစ်ယောက်တည်းကသာ ကုချန်အား သူတို့၏ ဝိညာဉ်အမှတ်အသားများကို အမှန်တကယ် ပေးအပ်ကာ အရှင်သခင်အဖြစ် အသိအမှတ်ပြုထားသော်ငြား အခြားသော ချီလျန်မျိုးနွယ်ဝင် အားလုံးမှာလည်း ကုချန်ကို ရိုးသားစွာ ယုံကြည်လေးစားကြ၍ ချီလျန်မျိုးနွယ်၏ အရှင်သခင်ဆိုသော ကုချန်၏ ဂုဏ်ပုဒ်ကို မည်သည့် မျိုးနွယ်စုဝင်ကမျှ မေးခွန်းထုတ်ခြင်း မရှိကြချေ။
ထို့ကြောင့် ချီလျို ပြောခဲ့သကဲ့သို့ပင်။
ကုချန်အား သစ္စာခံခြင်းမှာ ချီလျန်မျိုးနွယ် တစ်ခုလုံး၏ စုပေါင်းဆုံးဖြတ်ချက်ဖြစ်ပြီး အတင်းအကျပ် ဖိအားပေးမှု မဟုတ်ပေ။
" မင်းက ချီလျန်မျိုးနွယ်ကို အထင်ကြီးလွန်းနေပြီ... အင်မော်တယ်ဘုရင် တစ်ပါးတောင် မရှိတဲ့ မျိုးနွယ်စုတစ်ခုကို ငါကိုယ်တော်က ဘာကိစ္စ အတင်းအကျပ် သစ္စာခံခိုင်းနေရမှာလဲ "
ကုချန်မှ အေးဆေးစွာ ပြောလိုက်သော်လည်း သူ၏အသံသည် ယွဲ့လင်အင်မော်တယ်ဘုရင်၏ နားထဲသို့ ရောက်သွားသောအခါ သူ့အား ရုတ်တရက် တုန်လှုပ်သွားစေ၏။
ကုချန်၏စကားက စောစောက သူ၏အတွေးများမှာ မှားယွင်းနေကြောင်း သဘောပေါက်သွားစေခဲ့သည်။
စိုးရိမ်စိတ်က သူ၏ဆင်ခြင်တုံတရားကို ဖုံးလွှမ်းသွားခဲ့၏။ သူ၏စိတ်ထဲတွင် ချီလျန်မျိုးနွယ်၏ အဆင့်အတန်းသည် ပြိုင်ဘက်ကင်းကာ အခြား မည်သည့်အရာနှင့်မျှ နှိုင်းယှဉ်၍မရပေ။
သို့သော် အမှန်တကယ်တွင် သူ့ကို မထည့်သွင်းဘဲ စဉ်းစားလျှင် လက်ရှိ ချီလျန်မျိုးနွယ်၌ ထျန်းကျွင်းအဆင့် အနည်းငယ် ရှိနေလျှင်ပင် အခြေနေ ကောင်းလှပြီ ဖြစ်သည်။
ထို့ပြင် သူ၏ရှေ့ရှိ ဤသူသည် အင်မော်တယ်ဘုရင်များထဲမှ ဘီလူးကြီးတစ်ပါးဖြစ်သော ရှေးဟောင်းမကောင်းဆိုးဝါးအင်မော်တယ်ဘုရင်ကိုပင် ယခုလေးတင် သတ်ဖြတ်ခဲ့သူ ဖြစ်သည်။ ဤသို့သော တည်ရှိမှုက အားနည်းသော မျိုးနွယ်စုတစ်ခုကို အတင်းအကျပ် သစ္စာခံခိုင်းရန် အဘယ်ကြောင့် လိုအပ်မည်နည်း။
တစ်ခုတည်းသော ဖြစ်နိုင်ချေမှာ ချီလျန်မျိုးနွယ်သည် ကံကြမ္မာ၏ အလှည့်အပြောင်းတစ်ခုကြောင့် ဤစွမ်းအားရှင်ကို မှီခိုနိုင်ခဲ့ခြင်းသာ ဖြစ်ရမည်။
ဤအချက်ကို သဘောပေါက်သွားသောအခါ ယွဲ့လင်အင်မော်တယ်ဘုရင်၏ ရင်ထဲရှိ သတ်ဖြတ်လိုစိတ်များသည် ဒီရေကျသကဲ့သို့ ချက်ချင်း ဆုတ်ခွာသွားကာ အရိပ်အယောင်မျှပင် မကျန်တော့ချေ။
သူသည် ချီလျိုအား စူးရှစွာ ကြည့်လျက် ပြောဆိုလိုက်၏။
" နတ်ဆိုးနယ်မြေကို ရောက်ကတည်းက ချီလျန်မျိုးနွယ် ကြုံတွေ့ခဲ့ရသမျှ အရာအားလုံးကို ငါ သိချင်တယ် "
ထိုစကားကို ကြားသောအခါ ချီလျိုသည် ကုချန်၏ ခွင့်ပြုချက်ကို တောင်းခံရန် သူ့အား ထပ်မံကြည့်လိုက်၏။
" သူ့ကို ပြောပြလိုက်ပါ "
ကုချန်မှ အေးဆေးစွာ ပြောဆိုလိုက်၏။
ယွဲ့လင်အင်မော်တယ်ဘုရင်အား အရာအားလုံး ပြောပြလိုက်လျှင်လည်း ကိစ္စမရှိပေ။ သူ နောက်ဆုတ်သွားမည်ကိုလည်း သူ လုံးဝ မကြောက်ရွံ့ချေ။
နတ်ဆိုးနယ်မြေနှင့် အင်မော်တယ်နယ်မြေ နှစ်ခုလုံးတွင် သူ၏ကိုယ်ပွားများ ရှိနေသည့်ကိစ္စကိုမူ ယွဲ့လင်အင်မော်တယ်ဘုရင်မှတစ်ဆင့် ပေါက်ကြားသွားစေမည်ကို သူ ပို၍ပင် မကြောက်ပေ။ သူကိုယ်တိုင်က ချီလျန်မျိုးနွယ်ဝင် တစ်ဦးဆိုသော အရောင်မပြရဲသည့် လျှို့ဝှက်ချက်တစ်ခု ရှိနေရာ ကုချန်နှင့် ပတ်သက်သည့် အချက်အလက်များကို မည်သို့ ပေါက်ကြားရဲမည်နည်း။
ချီလျန်မျိုးနွယ် တစ်ခုလုံး၏ သေရေးရှင်ရေးသည် လက်ရှိတွင် ကုချန်၏လက်ထဲ၌ ရှိနေလေ၏။
ကုချန်၏ညွှန်ကြားချက်ကို ရရှိပြီးနောက် ချီလျိုသည် သူ၏အတွေးများကို စုစည်းကာ ချီလျန်မျိုးနွယ် ပုန်ကန်၍ နတ်ဆိုးနယ်မြေသို့ ဝင်ရောက်ခဲ့သည့် ရှေးဟောင်းခေတ်မှ စတင်ကာ ပြောပြလေတော့သည်။
ချီလျိုသည် အသေးစိတ် အချက်အလက်တိုင်းကို မပြောဘဲ အဓိက အချိန်ကာလများရှိ အဖြစ်အပျက်ကြီးများကိုသာ ရွေးချယ်ပြောပြခဲ့၏။
သို့သော် ထိုသို့ဖြစ်စေကာမူ ချီလျန်မျိုးနွယ်သည် ရှီမိုကောင်းကင်အရှင်၏ တိတ်တဆိတ်ရော၊ ပေါ်ပေါ်ထင်ထင်ပါ ပစ်မှတ်ထားခြင်းကို ခံရကာ အခက်အခဲများနှင့် ကြုံတွေ့ခဲ့ရပုံကို ပြောပြချိန်တွင် ယွဲ့လင်အင်မော်တယ်ဘုရင်၏ မျက်နှာပေါ်၌ ထိန်းမရသော ဒေါသများ ထွက်ပေါ်လာပြီး ရှီမိုကောင်းကင်အရှင်ကို သွားရောက်တိုက်ခိုက်ချင်နေသည့်အလား ဖြစ်နေလေသည်။
ထို့နောက် ဘိုးဘေးချီရှောင် အင်မော်တယ်ဘုရင်အဆင့်သို့ တက်လှမ်းရန် ကြိုးစားစဉ် ကျရှုံးကာ ကျဆုံးသွားခဲ့ရသည့် သတင်းကို ချီလျိုမှ ပြောပြသောအခါ ယွဲ့လင်အင်မော်တယ်ဘုရင်၏ လှပသော မျက်နှာပေါ်တွင် ဝမ်းနည်းမှု အရိပ်အယောင်များ ပေါ်လာ၏။
" ဘိုးဘေးချီရှောင်... တကယ်ပဲ ကျဆုံးသွားခဲ့တာလား "
ချီလျန်မျိုးနွယ် အင်မော်တယ်နယ်မြေကို မပုန်ကန်မီကတည်းက ချီရှောင်သည် ချီလျန်မျိုးနွယ်၏ ထျန်းကျွင်းအဆင့် ဘိုးဘေးများထဲမှ တစ်ပါး ဖြစ်ခဲ့သည်။
နောက်ပိုင်းတွင် ချီလျန်မျိုးနွယ် နတ်ဆိုးနယ်မြေသို့ ပုန်ကန်ထွက်ပြေးသည့် လုပ်ငန်းစဉ်အတွင်း အခြား ဘိုးဘေးများအားလုံး ကျဆုံးသွားခဲ့ကာ ချီရှောင် တစ်ဦးတည်းကသာ ချီလျန်မျိုးနွယ်ကို ဦးဆောင်၍ နတ်ဆိုးနယ်မြေသို့ ဝင်ရောက်နိုင်ခဲ့သည်။
သူ အားနည်းချိန်က ဘိုးဘေးချီရှောင် မည်မျှ ညင်သာစွာ လမ်းညွှန်ပြသပေးခဲ့သည်ကို ယွဲ့လင်အင်မော်တယ်ဘုရင် မှတ်မိနေသေး၏။ သို့သော် ဘိုးဘေးချီရှောင် သေဆုံးသွားခဲ့ပြီ။
" ဒီကိစ္စက အဲဒီရှီမိုကောင်းကင်အရှင်နဲ့ သေချာပေါက် ပတ်သက်နေရမယ် "
ယွဲ့လင်အင်မော်တယ်ဘုရင်သည် တည်ငြိမ်စွာ ပြောလိုက်သော်လည်း သူ၏ရင်ထဲတွင်တော့ သတ်ဖြတ်လိုစိတ်များ ဆူပွက်နေလေသည်။
ဘိုးဘေးချီရှောင်၏ ကျင့်ကြံမှုမှာ နက်နဲလှသည်။ နတ်ဆိုးနယ်မြေသို့ ပုန်ကန်ရောက်ရှိလာ၍ ပြန်လည်ကျင့်ကြံပြီးနောက်တွင်ပင် အင်မော်တယ်ဘုရင်အဆင့်သို့ တက်လှမ်းရန် နီးကပ်နေသည့် အဆင့်အထိ ရောက်ရှိနိုင်ခဲ့၏။
သူ၏ အင်မော်တယ်ဘုရင်အဆင့်သို့ တက်လှမ်းမှု ကျရှုံး၍ ၎င်းကြောင့် ဒဏ်ရာရနိုင်သော်လည်း သေဆုံးသွားရန်မှာ ဖြစ်နိုင်ချေ အလွန်နည်းပါးလှသည်။
အကြီးမားဆုံး ဖြစ်နိုင်ချေမှာ ရှီမိုကောင်းကင်အရှင်မှ ဝင်ရောက်စွက်ဖက်ခဲ့ခြင်းကြောင့် ဘိုးဘေးချီရှောင် ဝမ်းနည်းဖွယ် ကျဆုံးသွားခဲ့ရခြင်း ဖြစ်သည်။
ဒေါသထွက်စရာ၊ မုန်းတီးစရာကောင်းလိုက်တာ!
အကယ်၍ အင်မော်တယ်နှင့် နတ်ဆိုးနယ်မြေတို့ ယခုတိုင် စစ်ပွဲဖြစ်ပွားနေဆဲဆိုပါက ဘိုးဘေးချီရှောင်အတွက် လက်စားချေရန် ရှီမိုကောင်းကင်အရှင်ကို ရှာဖွေ၍ အဆုံးအဖြတ် တိုက်ပွဲဆင်နွှဲရန် သူ ရှေ့တန်းသို့ သေချာပေါက် သွားရောက်မည် ဖြစ်သည်။
ဘိုးဘေးချီရှောင် သေဆုံးမှုက အဲဒီရှီမိုကောင်းကင်အရှင်နဲ့ ပတ်သက်နေတာလား။
ဤစကားကို ကြားသောအခါ ချီလျိုမှာ လန့်ဖျပ်သွားသော်ငြား ယွဲ့လင်အင်မော်တယ်ဘုရင်၏ မျက်လုံးများထဲရှိ အတက်အကျဖြစ်နေသော သတ်ဖြတ်လိုစိတ်ကို မြင်သောအခါ သူ မနေနိုင်စွာ ပြောဆိုလိုက်မိ၏။
" ဘိုးဘေး... အရမ်း ဒေါသမထွက်ပါနဲ့... ရှီမိုကောင်းကင်အရှင်က နောက်ပိုင်းမှာ အရှင်သခင်ရဲ့ သတ်ဖြတ်တာကို ခံလိုက်ရပါပြီ... ပြီးတော့ အဲဒီရှီမိုကောင်းကင်ကလည်း အခု အဆုံးမဲ့ ကောင်းကင်ဘုံ ဖြစ်သွားပြီလေ "
ချီလျို၏ ရိုးရှင်းသော စကားအနည်းငယ်သည် ယွဲ့လင်အင်မော်တယ်ဘုရင်၏ ရင်ထဲတွင် ကြီးမားသော မုန်တိုင်းတစ်ခုကို ဖန်တီးလိုက်လေသည်။
ရှီမိုကောင်းကင်အရှင် သေသွားပြီ... ပြီးတော့ ဒီလူက သတ်လိုက်တာတဲ့လား!
ယွဲ့လင်အင်မော်တယ်ဘုရင်၏ အကြည့်များမှာ ကုချန်ထံသို့ အလိုအလျောက် ရောက်ရှိသွား၏။
သူက နတ်ဆိုးနယ်မြေမှာ ရှီမိုကောင်းကင်အရှင်ကို သတ်ခဲ့ပြီး အင်မော်တယ်နယ်မြေမှာလည်း ရှေးဟောင်းမကောင်းဆိုးဝါးအင်မော်တယ်ဘုရင်ကို သတ်ခဲ့တယ်။
ဒီလူ... ဒီလူမှာ တကယ်ပဲ ဘယ်လို နောက်ခံမျိုး ရှိနေတာလဲ!
အခန်း ( ၄၂၄ ) - ရန်ငြိုးနှင့် ရှုပ်ထွေးမှုများ၊ အရမ်းကောင်းတယ်၊ ကောင်းကင်နှလုံးသားကို ရရှိခြင်း
အင်မော်တယ်နယ်မြေနှင့် နတ်ဆိုးနယ်မြေတို့၏ ကောင်းကင်နှင့်မြေကြီး နိယာမများမှာ လုံးဝ ကွဲပြားခြားနားလှပေသည်။
အင်မော်တယ်နယ်မြေမှ အင်မော်တယ်ဘုရင်တစ်ပါး နတ်ဆိုးနယ်မြေသို့ ဝင်ရောက်ပါက သူ၏စွမ်းအားမှာ ထက်ဝက်ကျော် ဖိနှိပ်ခံရမည် ဖြစ်၏။
အဆင့်တူ အင်မော်တယ်ဘုရင်တစ်ပါးကို သတ်ဖြတ်ရန်မဆိုထားနှင့်၊ ကိုယ်တိုင် အသတ်မခံရလျှင်ပင် တော်လှပြီ ဖြစ်သည်။
သို့ဆိုလျှင် ဤသူသည် နတ်ဆိုးနယ်မြေ၌ အင်မော်တယ်ဘုရင်တစ်ပါးကို မည်သို့ သတ်ဖြတ်နိုင်ခဲ့သနည်း။
ထို့အပြင် အင်မော်တယ် ဝိညာဉ်ချီများ ပြည့်နှက်နေသော သူ့လိုလူမျိုးသည် နတ်ဆိုးနယ်မြေ၌ နေမင်းကြီးကဲ့သို့ ထင်ရှားနေမည်သာ ဖြစ်သည်။ သူသာ လှုပ်ရှားလိုက်ပါက မရေမတွက်နိုင်သော အင်မော်တယ်ဘုရင်များ၏ အာရုံစိုက်မှုကို သေချာပေါက် ဆွဲဆောင်မိပေမည်။
သူ တကယ်ပဲ ဘယ်လို လုပ်ခဲ့တာလဲ။
ယွဲ့လင်အင်မော်တယ်ဘုရင်မှာ လုံးဝ နားမလည်နိုင်ဖြစ်နေ၏။ သူ၏မျက်လုံးထဲတွင် ကုချန်မှာ ပို၍ပင် လျှို့ဝှက်ဆန်းကြယ်လာပုံရလေသည်။
သို့သော် ချီလျို၏ရှင်းပြချက်ကို ကြားပြီးနောက် သူသည် ကုချန်အား အမှန်တကယ် အထင်လွဲခဲ့မိကြောင်း ယွဲ့လင်အင်မော်တယ်ဘုရင် သဘောပေါက်သွား၏။
ဤသူသာ မရှိခဲ့ပါက ချီလျန်မျိုးနွယ်သည် ပျက်သုဉ်းသွားသည်မှာ ကြာပြီဖြစ်၏။ ယခုကဲ့သို့သော အဆင့်အတန်းမျိုးကိုလည်း သေချာပေါက် ရရှိမည် မဟုတ်ချေ။
" ရှင် ခန့်မှန်းတာ မှန်ပါတယ်... ကျွန်မက တကယ်ပဲ ချီယွဲ့ပါ "
ချီလျို ပြောသမျှကို ကြားပြီးနောက် ယွဲ့လင်အင်မော်တယ်ဘုရင်သည် နောက်ဆုံးတွင် အလျှော့ပေးကာ သူ၏ အထောက်အထား အစစ်အမှန်ကို ထုတ်ဖော်လိုက်လေသည်။
" အဲဒီတုန်းက ချီရှောင်နဲ့ တခြား ဘိုးဘေးတွေက ချီလျန်မျိုးနွယ်ကို အင်မော်တယ်နယ်မြေကနေ ခေါ်ထုတ်ပြီး နတ်ဆိုးနယ်မြေဆီ သွားဖို့ ဆုံးဖြတ်ခဲ့ကြတယ် "
" ဒါပေမယ့် အနာဂတ်မှာ ဘာဖြစ်လာမလဲ မသိနိုင်တဲ့အတွက်... ချီလျန်မျိုးနွယ်ကို ချောက်ကမ်းပါးထဲ ဆွဲခေါ်သွားမိမှာကို သူတို့ စိုးရိမ်ခဲ့ကြတယ်... ဒါကြောင့် မထွက်ခွာခင်မှာ လောကကြီးနဲ့ တစ်ခါမှ မထိတွေ့ဖူးသေးတဲ့ ချီလျန်မျိုးနွယ်ရဲ့ ပါရမီရှင်တချို့ကို လျှို့ဝှက်ချန်ထားရစ်ခဲ့ပြီး... အင်မော်တယ်နယ်မြေထဲမှာ အောင်းနေတဲ့ မျိုးစေ့တွေအဖြစ် ထားခဲ့ကြတယ် "
" ကျွန်မက အဲဒီမျိုးစေ့တွေထဲက တစ်ယောက်ပါပဲ "
" ဒီအချက်ကို လျှို့ဝှက်ထားဖို့အတွက် ချီရှောင်နဲ့ တခြား ဘိုးဘေးနည်းနည်းကပဲ သိခဲ့တယ်... အဲဒီခေတ်က မျိုးနွယ်စုခေါင်းဆောင်တောင် မသိခဲ့ပါဘူး "
" နောက်ပိုင်း အင်မော်တယ်နဲ့ နတ်ဆိုး စစ်ပွဲ ငြိမ်သက်သွားပြီးတဲ့နောက်မှာ... ကျွန်မက အင်မော်တယ်နယ်မြေမှာ တခြား မျိုးနွယ်စုဝင်တွေရဲ့ သဲလွန်စတွေကို ရှာဖွေခဲ့တယ်... ဒါပေမယ့် ကျွန်မကလွဲရင် ကျန်တဲ့ မျိုးနွယ်စုဝင်တွေ အားလုံး ကျဆုံးသွားခဲ့ပြီဖြစ်လို့ ကျွန်မတစ်ယောက်တည်းပဲ ကျန်တော့တယ်ဆိုတာ တွေ့ခဲ့ရတယ် "
ယွဲ့လင်အင်မော်တယ်ဘုရင်၏ တည်ငြိမ်ဟန်ရှိသော ပြောစကားများကို နားထောင်ကာ ချီလျို၏ရင်ထဲတွင် ဝမ်းနည်းမှုများ မလွှမ်းမိုးဘဲ မနေနိုင်တော့ချေ။
ဤချီယွဲ့ဘိုးဘေးသည် သူ့ထက် အတိုင်းအဆမရှိ အသက်ကြီးသော်လည်း ချီလျန်မျိုးနွယ် တစ်ခုလုံး နတ်ဆိုးနယ်မြေသို့ ရွှေ့ပြောင်းသွားချိန်တွင် သူ တစ်ယောက်တည်းသာ အင်မော်တယ်နယ်မြေ၌ ကျန်ရစ်ခဲ့၍ ဆွေမျိုးသားချင်း ကင်းမဲ့ကာ တစ်ကောင်ကြွက် ဖြစ်နေခဲ့ရသည်။
နောက်ပိုင်းတွင် သူနှင့်အတူ ကျန်ရစ်ခဲ့သော အခြား ချီလျန်မျိုးနွယ် ပါရမီရှင်များအားလုံး ကျဆုံးသွားခဲ့ကြောင်း သိရှိခဲ့ရပြီး ကျယ်ပြောလှသော လောကကြီးထဲတွင် သူ တစ်ယောက်တည်းသာ ကျန်ရစ်ခဲ့လေသည်။
ဤကဲ့သို့သော အထီးကျန်ဆန်မှုနှင့် နာကျင်မှုမျိုးကို သာမန်လူတစ်ယောက်က ခံနိုင်ရည်ရှိမည် မဟုတ်ပေ။
ထို့ကြောင့်ပင် ယွဲ့လင်အင်မော်တယ်ဘုရင်သည် သူ၏အထောက်အထား ပေါ်ပေါက်မည့် အန္တရာယ်ရှိနေလျှင်တောင်မှ ချီလျန်မျိုးနွယ်၏ သတင်းများကို စုံစမ်းရန် မည်သည့်အခါမျှ လက်မလျှော့ခဲ့ခြင်း ဖြစ်၏။
ယခု အရှင်သခင်နှင့် တွေ့ဆုံခွင့်ရခြင်းမှာ ကံကြမ္မာ၏ ဖေးမမှုတစ်ခုဟု သတ်မှတ်နိုင်ကာ အရာအားလုံးမှာလည်း ရေစက်ပင် ဖြစ်လေသည်။
" တာအိုရောင်းရင်းကို ကျွန်မ အထင်လွဲခဲ့မိတယ် "
ယွဲ့လင်အင်မော်တယ်ဘုရင်သည် ကုချန်အား ကြည့်လိုက်၏။ သူ၏လေသံမှာ ပျော့ပျောင်းသွားလျက် ငြင်သာစွာ ပြောဆိုလိုက်သည်။
" ကျွန်မက အင်မော်တယ်နယ်မြေမှာ တာအိုကို ရရှိခဲ့တာဆိုတော့ ကောင်းကင်ဘုံရဲ့ အတားအဆီးတွေကြောင့် နတ်ဆိုးနယ်မြေကို သွားလို့မရဘူး... နတ်ဆိုးနယ်မြေမှာရှိတဲ့ ကျွန်မတို့ မျိုးနွယ်စုဝင်တွေရဲ့ လုံခြုံရေးက တာအိုရောင်းရင်းအပေါ်မှာပဲ အများကြီး မူတည်နေလိမ့်မယ် "
ယွဲ့လင်အင်မော်တယ်ဘုရင်၏ လေသံမှာ အနည်းငယ် ရှုပ်ထွေးနေ၏။
အကြောင်းမှာ ချီလျန်မျိုးနွယ် တစ်ခုလုံးက ကုချန်ကို အရှင်သခင်အဖြစ် သစ္စာခံထားပြီဖြစ်ရာ ချီလျန်မျိုးနွယ်ဝင် တစ်ယောက်အနေဖြင့် သူကိုယ်တိုင်လည်း ထိုသူ့အား အရှင်သခင်ဟု ခေါ်ဆိုရမည်လောဟု ရုတ်တရက် တွေးလိုက်မိသောကြောင့်ပင်။
ဤကိစ္စကို ဖွင့်ပြောရန် ယွဲ့လင်အင်မော်တယ်ဘုရင်အတွက် ခက်ခဲလှသည်မှာ သဘာဝပင်။ ထို့ကြောင့် သူသည် ဘာမျှမသိသလို ဟန်ဆောင်လိုက်ကာ ဤကိစ္စကို ထပ်မပြောတော့ချေ။
" တာအိုရောင်းရင်း စိတ်ချပါ... လဝိညာဉ် ကောင်းကင်ဘုံရဲ့ ကောင်းကင်နှလုံးသားကို ပေးမယ်လို့ ပြောခဲ့ပြီးမှတော့ ကျွန်မ စကားမတည်တာမျိုး လုပ်မှာ မဟုတ်ပါဘူး... ဒါပေမယ့်..... "
ယွဲ့လင်အင်မော်တယ်ဘုရင်၏ အသံမှာ တုံ့ဆိုင်းနေကာ အနည်းငယ် အားနာနေပုံရ၏။ သို့သော် ခဏရပ်ပြီးနောက် ကုချန်အား ဆက်၍ပြောဆိုလေသည်။
" အင်မော်တယ်နယ်မြေမှာ ချန်းရှီ ကောင်းကင်ဘုံက ကျွန်မရဲ့ လဝိညာဉ် ကောင်းကင်ဘုံနဲ့ ကပ်လျက် ရှိနေတာပါ "
" အရင်က ကျွန်မ ချီလျန်မျိုးနွယ်ရဲ့ သတင်းတွေကို စုံစမ်းတုန်းက မတော်တဆ သတင်းတွေ ပေါက်ကြားသွားခဲ့တယ်... အဲဒီကနေ ချန်းရှီအင်မော်တယ်ဘုရင်က ကျွန်မရဲ့ အထောက်အထားကို ရိပ်မိသွားပြီး လဝိညာဉ် ကောင်းကင်ဘုံကို အမြဲတမ်း ဖိအားပေးနေခဲ့တာပါ "
" ရှင် လဝိညာဉ် ကောင်းကင်ဘုံရဲ့ ကောင်းကင်နှလုံးသားကို ရယူပြီးသွားရင်... ချန်းရှီအင်မော်တယ်ဘုရင် ပြဿနာရှာတာကို ရှင် ရှောင်လွှဲလို့မရဘဲ ရင်ဆိုင်ရလိမ့်မယ်... အဲ့ဒါတော့ ကျွန်မ စိုးရိမ်မိတယ် "
ယခင်က ကုချန်နှင့် သဘောတူညီမှု ရယူစဉ်က ယွဲ့လင်အင်မော်တယ်ဘုရင်သည် ကုချန်၏ နောက်ခံအစစ်အမှန်ကို မသိခဲ့သောကြောင့် ဤအရေးကြီးသော အချက်အလက်ကို သဘာဝကျကျ ဖုံးကွယ်ထားခဲ့ခြင်း ဖြစ်သည်။
သူ၏အမြင်တွင် ကုချန်မှ ချီလျန်မျိုးနွယ်နှင့် ပတ်သက်သည့် သတင်းများကို အမှန်တကယ် ရှာတွေ့ခဲ့၍ လဝိညာဉ် ကောင်းကင်ဘုံ၏ ကောင်းကင်နှလုံးသားကို ပေးအပ်လိုက်ခြင်းရက အဆင်ပြေပေသည်။ အကြောင်းမှာ သူ၏ဖိအားအချို့ကို မျှဝေခံစားပေး၍ ချန်းရှီအင်မော်တယ်ဘုရင်ကို ပူးပေါင်းခုခံမည့်သူ တစ်ယောက် ရရှိလိုက်ခြင်းနှင့် ညီမျှသောကြောင့်ပင်။
ထို့ကြောင့်ပင် ယွဲ့လင်အင်မော်တယ်ဘုရင်သည် ထိုစဉ်က ကုချန် တောင်းဆိုခဲ့သော သတ်မှတ်ချက်များကို ကြားပြီးနောက် သိပ်မတုံ့ဆိုင်းတော့ဘဲ ချက်ချင်း သဘောတူခဲ့ခြင်း ဖြစ်လေသည်။
သို့သော် ယခုအခါ ကုချန်၏ အစစ်အမှန် နောက်ခံနှင့် ချီလျန်မျိုးနွယ်အပေါ် သူထားရှိသော ကျေးဇူးတရားကို သိရှိသွားပြီဖြစ်ရာ တစ်ဖက်လူ နောက်ပိုင်းတွင် အထင်မလွဲစေရန် ဤအရာအားလုံးကို ကုချန်အား ကြိုတင်ရှင်းပြထားရပေမည်။
" ဒီကိစ္စကို ကြိုတင်မရှင်းပြခဲ့တာက ကျွန်မရဲ့ ပေါ့ဆမှုပါ... တာအိုရောင်းရင်း မကျေနပ်ဘူးဆိုရင် ရှင်ကျေနပ်စေဖို့ တခြား လျော်ကြေးတစ်ခုခု ပေးဖို့ ကျွန်မ နည်းလမ်းရှာပါ့မယ် "
နောက်ဆုံးတွင် ယွဲ့လင်အင်မော်တယ်ဘုရင်မှ သွားကိုကြိတ်ကာ ထပ်လောင်းပြောလိုက်၏။
ယခုအခါ ချီလျန်မျိုးနွယ် တစ်ခုလုံး၏ သေရေးရှင်ရေးမှာ ကုချန်၏လက်ထဲ၌ ရှိနေပြီဖြစ်သည်။ ယွဲ့လင်အင်မော်တယ်ဘုရင်သည် သူ၏ ကိုယ်ပိုင်ပြဿနာကြောင့် ထိုသူ့အား မကျေမနပ်ဖြစ်စေ၍ ချီလျန်မျိုးနွယ်အပေါ် ပြင်းထန်စွာ ဆက်ဆံလာမည်ကို မလိုလားချေ။
ချန်းရှီအင်မော်တယ်ဘုရင်?
ယွဲ့လင်အင်မော်တယ်ဘုရင် မထင်မှတ်ထားသည်မှာ သူ၏ရှင်းပြချက်ကို ကြားပြီးနောက် ကုချန်မှ မကျေနပ်ကြောင်း မပြသည့်အပြင် သူ၏မျက်လုံးများပင် အနည်းငယ် လင်းလက်သွားခြင်း ဖြစ်၏။
" မင်းဆိုလိုတာက ချန်းရှီအင်မော်တယ်ဘုရင်နဲ့ မင်းကြားက ရန်ငြိုးကို ပတ်ဝန်းကျင် ကောင်းကင်ဘုံတွေက အားလုံး သိနေကြတယ်လို့ ပြောချင်တာလား "
" ဟုတ်ပါတယ် "
ယွဲ့လင်အင်မော်တယ်ဘုရင်မှာ အနည်းငယ် လန့်ဖျပ်သွား၏။ ကုချန်မှ ဤကဲ့သို့ မေးလိမ့်မည်ဟု သူ မထင်ထားခဲ့သော်လည်း ရိုးသားစွာပင် ပြန်ဖြေလိုက်သည်။
" ချန်းရှီအင်မော်တယ်ဘုရင်က ကျွန်မကို တိတ်တဆိတ် လိုချင်တပ်မက်နေခဲ့တာပါ... ဒါပေမယ့် ကျွန်မရဲ့ အထောက်အထား အစစ်အမှန်ကို တခြား အင်မော်တယ်ဘုရင်တွေ သိသွားမှာကိုလည်း သူ မလိုလားဘူး... ဒါကြောင့် သူက သူ့ရဲ့ ချန်းရှီ ကောင်းကင်ဘုံနဲ့ လဝိညာဉ် ကောင်းကင်ဘုံကြားက ပွတ်တိုက်မှုတွေကို ဟန်ပြအနေနဲ့ပဲ ဖန်တီးထားခဲ့တာပါ "
" ဒါပေမယ့် တခြား အင်မော်တယ်ဘုရင်တွေရဲ့ အမြင်မှာတော့ ချန်းရှီအင်မော်တယ်ဘုရင်နဲ့ ကျွန်မ ရန်သူတွေ ဖြစ်နေကြတယ်ဆိုတာ အမှန်ပါပဲ "
" အရမ်းကောင်းတယ် "
ကုချန်မှ အနည်းငယ် ခေါင်းညိတ်လိုက်၏။
ချန်းရှီအင်မော်တယ်ဘုရင်နှင့် ယွဲ့လင်အင်မော်တယ်ဘုရင်ကြားရှိ ရန်ငြိုးကို ဤအင်မော်တယ်ဘုရင်များ အားလုံး သိထားကြသည်ဆိုလျှင် နောက်ပိုင်းတွင် ချန်းရှီအင်မော်တယ်ဘုရင်မှ ပြဿနာလာရှာရဲပါက သူ့ကို 'တန်ပြန်သတ်ဖြတ်' လိုက်ရန်မှာ သဘာဝကျသော ကိစ္စတစ်ခု ဖြစ်သွားပေလိမ့်မည်။
သူထိန်းချုပ်ထားသော ကောင်းကင်ဘုံ အရေအတွက် မလုံလောက်၍ 'ကောင်းကင်ဘုံအလုံးစုံ အမှန်တရား နားလည်ခြင်း' အား ခွဲခြမ်းစိတ်ဖြာမှုကို အရှိန်နှေးနေမည်ကိုသာ ကုချန် စိုးရိမ်နေခဲ့ခြင်း ဖြစ်သည်။
အကယ်၍ ချန်းရှီအင်မော်တယ်ဘုရင်မှ ပြဿနာလာရှာရဲလောက်အောင် အကင်းမပါးပါက သူ၏ ချန်းရှီကောင်းကင်ဘုံကိုပါ သိမ်းပိုက်ရမည်ဖြစ်၍ ကုချန်သည် ကျိန်းသေ ဝမ်းမြောက်နေမည် ဖြစ်လေသည်။
" ..... "
ကုချန်၏အဖြေကြောင့် ယွဲ့လင်အင်မော်တယ်ဘုရင်မှာ လုံးဝ ဇဝေဇဝါ ဖြစ်သွားရတော့သည်။
သူ ပြောလိုက်သည်မှာ သတင်းကောင်းမဟုတ်သော်လည်း ဤလူသည် လွန်စွာ ကောင်းမွန်သော သတင်းကြီးတစ်ခု ကြားလိုက်ရသကဲ့သို့ အဘယ်ကြောင့် ဖြစ်နေရသည်ကို သူ နားမလည်နိုင်ချေ။
သို့သော် သူ သိပ်အများကြီး မတွေးတော့ချေ။ သူ၏နတ်ဝိညာဉ်အာရုံကို အသုံးပြု၍ နတ်ဝိညာဉ် နက်ရှိုင်းရာနေရာမှ အင်မော်တယ် နိယာမများ တောက်ပနေသည့် အလင်းတန်းတစ်ခုကို တိုက်ရိုက် ထုတ်ယူကာ ကုချန်အား ကမ်းပေးလိုက်လေသည်။
ဤအလင်းတန်းသည် လဝိညာဉ် ကောင်းကင်ဘုံ၏ ကောင်းကင်နှလုံးသား အမှတ်အသားကို ကိုယ်စားပြု၏။ ဤကောင်းကင်နှလုံးသား အမှတ်အသားနှင့် ပေါင်းစပ်လိုက်သည်နှင့် ကျယ်ပြောလှသော လဝိညာဉ် ကောင်းကင်ဘုံတွင် မိမိ၏တာအိုကို အပ်နှံ၍ ကောင်းကင်နှင့်မြေကြီး၏ တာအိုကို နားလည်သဘောပေါက်နိုင်မည် ဖြစ်သည်။
ကုချန်မှ ချန်းရှီအင်မော်တယ်ဘုရင် ရှိနေခြင်းနှင့် ပတ်သက်၍ ကြီးကြီးမားမား မကျေနပ်မှု မပြသောကြောင့် ယွဲ့လင်အင်မော်တယ်ဘုရင်သည် ဤကောင်းကင်နှလုံးသား အမှတ်အသားကို ချက်ချင်းပင် ပေးအပ်လိုက်ခြင်း ဖြစ်လေသည်။
အရမ်းကောင်းတယ်။
ယွဲ့လင်အင်မော်တယ်ဘုရင် ပေးအပ်လာသော လဝိညာဉ် ကောင်းကင်ဘုံ၏ ကောင်းကင်နှလုံးသားကို ကြည့်ကာ ကုချန်၏မျက်လုံးများထဲတွင် ကျေနပ်သည့် အမူအရာ ပေါ်လာ၏။ သူသည် တုံ့ဆိုင်းမနေဘဲ လက်ဆန့်ထုတ်ကာ လဝိညာဉ် ကောင်းကင်ဘုံ၏ ကောင်းကင်နှလုံးသားကို သိမ်းယူလိုက်လေသည်။
အဆုံးမဲ့ ကောင်းကင်ဘုံပြီးနောက် ဒုတိယမြောက် ကောင်းကင်ဘုံ၏ ကောင်းကင်နှလုံးသားကိုပါ ရရှိသွားလေပြီ။