အခန်း (၄၃၃-၄၃၄)
Vol. 31 Ch. 433-434
အခန်း ( ၄၃၃ ) - ဘီလူးကြီးများ၏ တိုက်ပွဲ၊ တိုက်ပွဲအတွင်းမှ သဘောပေါက်နားလည်ခြင်းနှင့် ရှင်းလင်းသွားသော အတွေးများ
" ဘာ...!? "
ကုချန်၏စကားကို ကြားသောအခါ ယွဲ့လင်အင်မော်တယ်ဘုရင်မှာ လန့်ဖျပ်သွားရလေသည်။
ကုချန်သည် အခြေအနေကို ကြည့်၍ ရပ်တန့်ကာ တိုက်ပွဲကို အဆုံးသတ်လိုက်မည်ဟု သူ အစက ထင်မှတ်ထားခဲ့သည်။
မည်သို့ပင်ဆိုစေ ကောင်းကင်ဖုံးလွှမ်း အင်မော်တယ်ဘုရင်သည် သာမန် အင်မော်တယ်ဘုရင်တစ်ပါး မဟုတ်ဘဲ အင်မော်တယ်ဘုရင်အဆင့်များထဲတွင် ဘီလူးကြီးတစ်ပါး ဖြစ်လေသည်။ အင်မော်တယ်ဘုရင် ဘီလူးကြီးတစ်ပါးကို သတ်ဖြတ်ရန်မှာ ပုံမှန် အင်မော်တယ်ဘုရင်တစ်ပါးကို သတ်ဖြတ်ခြင်းထက် အဆပေါင်း ထောင်သောင်းမက ပို၍ ခက်ခဲလေသည်။
ထို့ပြင် ကုချန်သည် ကောင်းကင်ဖုံးလွှမ်း အင်မော်တယ်ဘုရင်နှင့် သေရေးရှင်ရေး တိုက်ခိုက်စရာ အကြောင်းပြချက် မရှိချေ။ အဘယ်ကြောင့်ဆိုသော် သူတို့ကြားရှိ ယခင် သဘောတူညီချက်အရ ယွဲ့လင်အင်မော်တယ်ဘုရင်ကို လက်ရှိ အကျပ်အတည်းမှ လွတ်မြောက်အောင် ကူညီပေးရုံသာ လိုအပ်သောကြောင့်ပင်။
အခြားသော အင်မော်တယ်ဘုရင်တစ်ပါးသာဆိုလျှင် ထိုသူသည် အင်မော်တယ်ဘုရင် ဘီလူးကြီးတစ်ပါး ဖြစ်နေလျှင်တောင်မှ ဤကိစ္စအတွက် ကောင်းကင်ဖုံးလွှမ်း အင်မော်တယ်ဘုရင်နှင့် အသက်စွန့်၍ တိုက်ခိုက်မည် မဟုတ်ပေ။
သဘောတူညီချက် ရရှိပြီးဖြစ်ကာ သူ့ကိုလည်း ကယ်တင်နိုင်ခဲ့ပြီဖြစ်ရာ အင်မော်တယ်ဘုရင် ဘီလူးကြီးတစ်ပါးနှင့် ထိပ်တိုက်တွေ့ရန် အဘယ်ကြောင့် ဤမျှ အန္တရာယ်ခံရမည်နည်း။
သို့သော် ယခုအခါ ကုချန်မှာ ထိုသို့ မရွေးချယ်ခဲ့ချေ။
သူ့ကြောင့်များလား။
ယွဲ့လင်အင်မော်တယ်ဘုရင်၏ ရင်ထဲတွင် နွေးထွေးမှုတစ်ခု ဖြတ်ပြေးသွား၏။
ကုချန်၏လုပ်ရပ်များမှာ သူ့အတွက် ဟုတ်သည်ဖြစ်စေ၊ မဟုတ်သည်ဖြစ်စေ ယွဲ့လင်အင်မော်တယ်ဘုရင်သည် ရင်ထဲ၌ နွေးထွေးသွားသလို ခံစားလိုက်ရကာ ကုချန်ကို သစ္စာခံရခြင်းမှာ ထင်သလောက် ဆိုးရွားမည် မဟုတ်ဟု တွေးလိုက်မိသည်။
တစ်ချိန်တည်းမှာပင် လုံးဝ အလျှော့မပေးသော ကုချန်၏အဖြေကို ကြားပြီးနောက် ကောင်းကင်ဖုံးလွှမ်း အင်မော်တယ်ဘုရင်၏ အကြည့်များမှာ ချက်ချင်း အေးစက်သွားတော့၏။
သူ ကုချန်နှင့် တိုက်ပွဲကို အဆုံးသတ်လိုခြင်းမှာ ကုချန်ကို ကြောက်ရွံ့၍ မဟုတ်ပေ။
ချန်းရှီအင်မော်တယ်ဘုရင် ပေးသော ဆုလာဘ်သည် အင်မော်တယ်ဘုရင် ဘီလူးကြီးတစ်ပါးနှင့် တိုက်ခိုက်ရလောက်အောင် မတန်ဟု သူ ခံစားရသောကြောင့်သာ ဖြစ်သည်။
သို့သော် ယခုအခါ ဤသူသည် လုံးဝ အလျှော့မပေးဘဲ နေနေ၏။
သူ့ကို ကြောက်နေတယ်လို့ ထင်နေတာလား။
" မောက်မာလိုက်တာ...! "
ကိုယ်ခန္ဓာကို အပူတပြင်း ပြန်လည်ဖွဲ့စည်းထားရသော ချန်းရှီအင်မော်တယ်ဘုရင်သည် နှုတ်ခမ်းထောင့်မှ သွေးများကို သုတ်ဖယ်လိုက်ကာ ကုချန်အား မောက်မာလွန်းသည်ဟု ပြောဆိုလိုက်၏။
အင်မော်တယ်နယ်မြေတွင် အင်မော်တယ်ဘုရင် ဘီလူးကြီးတစ်ပါးစီတိုင်းသည် နာမည်ကျော်ကြားကြသည်။
ကုချန်ဆိုသော နာမည်ကို သူ ယခင်က တစ်ခါမှ မကြားဖူးခဲ့ပေ။ ဤအချက်က သူ၏ရှေ့မှ ဤသူသည် မကြာသေးမီကမှ အင်မော်တယ်ဘုရင် ဘီလူးကြီးအဆင့်သို့ တက်လှမ်းလာသော တည်ရှိမှုတစ်ခု ဖြစ်ကြောင်း သက်သေပြနေလေသည်။
အင်မော်တယ်ဘုရင် ဘီလူးကြီးများကြားတွင်လည်း သဘာဝကျကျပင် စွမ်းအား ကွာခြားမှုများ ရှိလေသည်။
ကောင်းကင်ဖုံးလွှမ်း အင်မော်တယ်ဘုရင်ကဲ့သို့ ရှေးခေတ်ကတည်းက တာအိုကို ရရှိခဲ့သော ရှေးဟောင်း အင်မော်တယ်ဘုရင်များသည် မကြာသေးမီကမှ အဆင့်တက်လာသော အင်မော်တယ်ဘုရင် ဘီလူးကြီးများထက် သေချာပေါက် ပို၍ စွမ်းအားကြီးမားကြသည်။
ဤသူသည် လုံးဝ အလျှော့မပေးဘဲ နေနေလေရာ အင်မော်တယ်ဘုရင် ဘီလူးကြီးအဆင့်သို့ တက်လှမ်းလိုက်ရုံဖြင့် သူသည် ဤခေတ်တွင် ပြိုင်ဘက်ကင်းပြီဟု အမှန်တကယ် ယုံကြည်နေခြင်းလော။
သို့သော် ဤသည်ကလည်း ကောင်း၏။ ထိုသူသည် ကောင်းကင်ဖုံးလွှမ်း အင်မော်တယ်ဘုရင်ကို ဒေါသထွက်စေခဲ့ပြီဖြစ်ရာ သူ ရင်ဆိုင်ရမည့် ဖိအားများမှာ သိသိသာသာ လျော့ကျသွားမည် ဖြစ်လေသည်။
ချန်းရှီအင်မော်တယ်ဘုရင်သည် ရင်ထဲတွင် အနည်းငယ် သက်သာရာရသွားကာ ကုချန်၏ မဆင်မခြင် လုပ်ရပ်မှာ အမှန်တကယ်တွင်တော့ ကောင်းသောကိစ္စ ဖြစ်သည်ဟု တွေးလိုက်မိ၏။
" နောက်ပေါက်လေး... ငါလည်း မင်းလိုပဲ အင်မော်တယ်ဘုရင် ဘီလူးကြီးအဆင့်ကို တက်လှမ်းခါစက လောကကြီးမှာ ပြိုင်ဘက်ကင်းပြီလို့ ခံစားခဲ့ဖူးတယ်... ဒါပေမယ့် ကောင်းကင်အထက်မှာ ကောင်းကင်ရှိပြီး လူစွမ်းကောင်းထက် သာတဲ့သူ ရှိသေးတယ်ဆိုတာကို အမှန်တရားက မင်းကို ပြောပြလိမ့်မယ်... မင်း အားကိုးနေတဲ့ တာအိုလေးက ဟာသတစ်ခု သက်သက်ပဲ ဖြစ်နေလိမ့်မယ် "
ကောင်းကင်ဖုံးလွှမ်း အင်မော်တယ်ဘုရင်သည် အေးစက်စွာ ပြောဆိုလိုက်၏။ သူ၏ လေသံမှာ မောက်မာနေကာ မဆင်မခြင် လုပ်တတ်သော လူသစ်တစ်ဦးကို ဆုံးမနေသည့် အတွေ့အကြုံရင့် စီနီယာတစ်ဦးကဲ့သို့ပင်။
သို့သော် ကောင်းကင်ဖုံးလွှမ်း အင်မော်တယ်ဘုရင်၏ ဆုံးမစကားကို ရင်ဆိုင်ရချိန်တွင် ကုချန်သည် စကားပြန်မပြောခဲ့ချေ။ ယင်းအစား သူသည် ဧကရာဇ်လက်သီးကို လွှဲယမ်းကာ လုပ်ရပ်ဖြင့်သာ တုံ့ပြန်လိုက်လေသည်။
" ဘုန်း! "
ကုချန်သည် လက်သီးကို ဆုပ်လိုက်ကာ အပိုအလိုမရှိ ရှေ့သို့ ထိုးချလိုက်သည်မှာ ထက်မြက်၍ ပြတ်သားလှ၏။
သူ လက်သီးထိုးချလိုက်သောအခါ ကောင်းကင်ဘုံများမှာ သူ့ကို တုံ့ပြန်နေသကဲ့သို့ တုန်ခါသွားလေသည်။
' ကောင်းကင်ဘုံအလုံးစုံ အမှန်တရား နားလည်ခြင်း ' သည် တိတ်တဆိတ် လည်ပတ်သွား၍ ထိုလက်သီးကို စွမ်းအားများ ဖြည့်တင်းပေးလိုက်၏။
ကောင်းကင်နှင့်မြေကြီးကြားရှိ မဟာတာအိုကို နှိုးဆွလိုက်သကဲ့သို့ သူ၏ပတ်လည်တွင် စစ်မှန်သော နဂါးများ၊ ဖီးနစ်များ၊ ချီလင်များနှင့် ကျားဖြူများ၏ ပုံရိပ်ယောင်များ ထွက်ပေါ်လာကာ မရပ်မနား လှည့်ပတ်ဟိန်းဟောက်နေကြလေသည်။
ဤအရာများသည် ရိုးရှင်းသော ပုံရိပ်ယောင်များ မဟုတ်ဘဲ အဆုံးမဲ့ တာအိုအက္ခရာများဖြင့် တည်ဆောက်ထားသော ကြောက်မက်ဖွယ် ဖြစ်စဉ်များ ဖြစ်ကြ၍ ၎င်းတို့၏စွမ်းအားမှာ အင်မော်တယ်များထက်ပင် သာလွန်နေလေသည်။ ၎င်းတို့၏ ဟိန်းဟောက်သံသက်သက်ဖြင့်ပင် စစ်မှန်သော အင်မော်တယ်များကို ဖိနှိပ်နိုင်ကာ ၎င်းတို့၏အာဏာစက်မှာ အရပ်လေးမျက်နှာကို တုန်လှုပ်သွားစေ၏။
ထိုမျှမက သူ၏လက်သီး ဖြတ်သန်းသွားရာ နေရာတိုင်းတွင် ညကောင်းကင်ယံသည် ဆုတ်ပြဲသွား၍ တောက်ပသော ရွှေရောင်အလင်းတန်းများ အဆုံးမဲ့ ပေါက်ကွဲထွက်လာကာ ကျယ်ပြောလှသော ဟွမ်သွမ့်ချီများ ဆူပွက်လာ၏။ ကမ္ဘာလောကကို ဖန်ဆင်းသည့် ဖြစ်စဉ်တစ်ခုကို သရုပ်ဖော်နေသကဲ့သို့ မရေမတွက်နိုင်သော ကြယ်များသည် လေဟာနယ်ထဲမှ ထွက်ပေါ်လာလျက် တောက်ပလွန်းလှစွာ ကောင်းကင်ယံသို့ တက်လှမ်းသွားကြလေသည်။
ဤဖြစ်စဉ်များ အားလုံးသည် ကုချန်၏လက်သီးပေါ်တွင် ထပ်ဆင့်ပေါင်းစပ်သွားလျက် သူ၏လက်သီးနှင့်အတူ ရွေ့လျားကာ တစ်ပြိုင်နက်တည်း ပဲ့တင်ထပ်၍ ရှေ့သို့ ဖိနှိပ်သွားတော့သည်။
ကောင်းကင်ဖုံးလွှမ်း အင်မော်တယ်ဘုရင်ပင်လျှင် ဤမြင်ကွင်းကြောင့် တုန်လှုပ်သွားကာ သူ့ပြိုင်ဘက်၏ လုပ်ရပ်များမှာ မောက်မာသော်ငြား စွမ်းအားများမှာတော့ သဘာဝလွန်လွန်းလှသည်ဟု ခံစားလိုက်ရ၏။
ကောင်းကင်ဖုံးလွှမ်း အင်မော်တယ်ဘုရင်မှာ မပေါ့ဆရဲတော့ချေ။
သူသည် သူ၏အင်မော်တယ်ဘုရင် စွမ်းအားများကို အပြည့်အဝ ပေါက်ကွဲထွက်လာစေ၍ မျက်စိတစ်မှိတ်အတွင်း သူ၏ရှေ့ရှိ ကောင်းကင်ဖုံးလွှမ်း နယ်ပယ် တစ်ခုလုံးကို ဆွဲယူကာ ဖျက်ဆီး၍မရနိုင်သော စကြဝဠာ ကြယ်ကောင်းကင် ဒိုင်းကာတစ်ခုအဖြစ် ပြောင်းလဲလိုက်လေသည်။
မရေမတွက်နိုင်သော ကြယ်များသည် ၎င်းအတွင်းသို့ စုစည်းသွားကာ အလွန်အမင်း မှောင်မိုက်နေသော ညကောင်းကင်ယံတွင် အင်မော်တယ် အလင်းတန်းများပင် လွတ်မြောက်နိုင်ခြင်း မရှိဘဲ တိတ်ဆိတ်စွာ မျိုချခံလိုက်ရ၏။
ကုချန်၏အနက်ရောင် ဆံပင်များမှာ လွင့်ခါသွား၍ ဧကရာဇ်လက်သီးကို လွှဲယမ်းကာ ကောင်းကင်ဖုံးလွှမ်း အင်မော်တယ်ဘုရင်ရှေ့ရှိ ညကောင်းကင်ယံ ဒိုင်းကာပေါ်သို့ တိုက်ရိုက် ထိုးချလိုက်ရာ မြေကြီးတုန်ဟည်းပြီး ကောင်းကင်တုန်လှုပ်သွားစေမည့် ပေါက်ကွဲမှုကြီးတစ်ခုကို ဖြစ်ပေါ်စေခဲ့သည်။
မျက်စိတစ်မှိတ်အတွင်းမှာပင် မရေမတွက်နိုင်သော ကြယ်များ ပျက်စီးသွားကာ အဆုံးမဲ့ ညကောင်းကင်ယံကြီး ဆုတ်ပြဲသွားတော့၏။
တိုက်ပွဲ ဗဟိုချက်မှ ထွက်ပေါ်လာသော ကျန်ရစ်သည့် လှိုင်းဂယက်များကပင် ဤကမ္ဘာလောက တစ်ခုလုံးကို ဖျက်ဆီးပစ်တော့မည့်အလား ဖြစ်နေလေသည်။
ခပ်ရေးရေးမျှသာ ပေါ်လာသော မှုန်ဝါးဝါး အချိန်မြစ်တစ်ခုပင် ညကောင်းကင်ယံအထက်တွင် ထွက်ပေါ်လာ၏။
ထိုအရာမှာ ကုချန်နှင့် ကောင်းကင်ဖုံးလွှမ်း အင်မော်တယ်ဘုရင်မှ တမင်သက်သက် ခေါ်ယူလိုက်ခြင်း မဟုတ်ဘဲ သူတို့၏တိုက်ခိုက်မှု လှိုင်းဂယက်များမှာ ပြင်းထန်လွန်းလှသောကြောင့် အလိုအလျောက် ထွက်ပေါ်လာခြင်းသာ ဖြစ်လေသည်။
ကုချန်၏လက်သီး ညကောင်းကင်ယံ ဒိုင်းကာပေါ်သို့ ရိုက်ခတ်သွားသောအခါ သူသည် အဆုံးမဲ့ ဟွမ်သွမ့်လေဟာနယ်ထဲသို့ ထိုးကျသွားသကဲ့သို့ပင် ခံစားလိုက်ရ၏။
ဧကရာဇ်လက်သီး၏အစွမ်းသည် လေထဲတွင်သာ ကျရောက်သွားသကဲ့သို့ ဖြစ်သွားကာ အပြည့်အဝ မထုတ်လွှတ်နိုင်ခဲ့ချေ။
သူနှင့် ကောင်းကင်ဖုံးလွှမ်း အင်မော်တယ်ဘုရင်ကြားတွင် စကြဝဠာ သန်းပေါင်းများစွာ ခြားနားထားသကဲ့သို့ ဖြစ်နေ၏။ ဧရာမ စွမ်းအားကြီးသည် ဤဧရိယာငယ်လေးအတွင်း ပေါက်ကွဲသွားသော်လည်း ကောင်းကင်ဖုံးလွှမ်း အင်မော်တယ်ဘုရင်ထံ အမှန်တကယ် ရောက်ရှိရန် ဝေးကွာလှသော စကြဝဠာ သန်းပေါင်းများစွာကို ထိုးဖောက်သွားရန် လိုအပ်လေသည်။
အင်မော်တယ်ဘုရင် ဘီလူးကြီးတစ်ပါးပီပီ တကယ်ကို လှည့်ကွက်တချို့ ရှိနေတာပဲ။
ကုချန်၏မျက်လုံးများမှာ အနည်းငယ် ကျဉ်းမြောင်းသွားကာ ထက်မြက်သည့် အရိပ်အယောင်တစ်ခု ပေါ်လာ၏။
အကယ်၍ ချန်းရှီအင်မော်တယ်ဘုရင်သာဆိုပါက ကုချန်၏လက်သီးဖြင့် တိုက်ရိုက် သတ်ဖြတ်ခံရမည်ဖြစ်ကာ အော်ဟစ်သံလေးတစ်ခုမျှပင် ထွက်ပေါ်လာနိုင်မည် မဟုတ်ချေ။
သို့သော် ကောင်းကင်ဖုံးလွှမ်း အင်မော်တယ်ဘုရင်သည် သူ့ကို အချိန်တိုအတွင်း ခုခံကာ အကြိတ်အနယ် ယှဉ်ပြိုင်နိုင်စွမ်းရှိရာ သူ၏စွမ်းအားမှာ ချန်းရှီအင်မော်တယ်ဘုရင်ထက် အတိုင်းအဆမရှိ ကြီးမားကြောင်း ပြသနေလေသည်။
သို့သော် ထိုမျှသာ ဖြစ်၏။
စကြဝဠာ သန်းပေါင်းများစွာ ခြားနားထားတယ် ဟုတ်လား။
ဒါဆို အဲဒီ စကြဝဠာ သန်းပေါင်းများစွာလုံးကို သူ ရိုက်ခွဲပစ်လိုက်မယ်!
" ဘုန်း! "
ကုချန်၏လက်သီးမှ ပြိုင်ဘက်ကင်း စွမ်းအားများ နောက်တစ်ကြိမ် ပေါက်ကွဲထွက်လာပြန်သည်။
ညကောင်းကင်ယံတွင် မှုန်ဝါးဝါး ပုံရိပ်ယောင် ဖြစ်စဉ်များ တစ်ခုပြီးတစ်ခု ထွက်ပေါ်လာ၏။
ရှေးဟောင်း သားရဲကြီးများ၊ နတ်ဘုရားသားရဲ လေးပါး၊ မိုင်ဘီလီယံပေါင်းများစွာ အကွာအဝေးမှ ကြယ်များကို ဆွတ်ခူးကာ ငြိမ်းသတ်ပစ်နေသော အင်မော်တယ်ဘုရင်များ၊ ထို့ပြင် မြေပြင်မှ ထွက်ပေါ်လာကာ ကြယ်ကောင်းကင်ယံတွင် ကပ်တွယ်နေသော စိမ်းလန်းသည့် ကြာပန်းတစ်သောင်း၊ ၎င်းတို့၏ ယိမ်းနွဲ့မှုများမှာ လောကကို တုန်လှုပ်စေသော တာအိုဟိန်းဟောက်သံများနှင့် ပဲ့တင်ထပ်နေလေသည်။
ဖြစ်စဉ်အမျိုးမျိုး ဆက်တိုက် ထွက်ပေါ်လာကာ ကောင်းကင်ဖုံးလွှမ်း အင်မော်တယ်ဘုရင်ရှေ့ရှိ ညကောင်းကင်ယံ ဒိုင်းကာကို ဗုံးကြဲတိုက်ခိုက်သကဲ့သို့ တိုက်ခိုက်လေတော့သည်။
တစ်ချိန်တည်းမှာပင် ၎င်းသည် ကုချန်၏ ' ကောင်းကင်ဘုံအလုံးစုံ အမှန်တရား နားလည်ခြင်း ' အပေါ် နားလည်သဘောပေါက်မှုကိုလည်း ပိုမို ချောမွေ့သန့်စင်လာစေ၍ ပိုမို ကျွမ်းကျင်ပိုင်နိုင်လာစေခဲ့သည်။
ထိုခဏလေးအတွင်းမှာပင် ကုချန်၏ ' ကောင်းကင်ဘုံအလုံးစုံ အမှန်တရား နားလည်ခြင်း ' အပေါ် နားလည်မှုသည် ၀.၅ ရာခိုင်နှုန်းနီးပါး တိုးတက်သွားခဲ့၏။
ဤသည်ကား နှစ်တစ်ရာနီးပါး ကြိုးစားပမ်းစား ကျင့်ကြံခဲ့သော်လည်း သူ ဆုပ်ကိုင်နိုင်ခြင်း မရှိခဲ့သော အဆင့်တစ်ခု ဖြစ်လေသည်။
တံခါးပိတ် ကျင့်ကြံနေရုံသက်သက်ဖြင့် မလုံလောက်သည်မှာ အမှန်ပင်။ ကောင်းကင်ဘုံအလုံးစုံ တာအိုကို ပိုမို နက်နက်ရှိုင်းရှိုင်း နားလည်သဘောပေါက်နိုင်ရန် သေရေးရှင်ရေး တိုက်ပွဲများနှင့် ပေါင်းစပ်ရမည် ဖြစ်သည်။
ကုချန်သည် ပိုမို ပြင်းထန်စွာ တိုက်ခိုက်လာလေလေ သူ၏အတွေးများ ရှင်းလင်းလာကာ ပြိုင်ဘက်ကင်းသော ကြည်နူးမှုကို ခံစားလာရလေလေ ဖြစ်သည်။
သို့သော် ကောင်းကင်ဖုံးလွှမ်း အင်မော်တယ်ဘုရင်၏ မျက်နှာမှာကား ပို၍ပို၍ အကျည်းတန်လာတော့၏။
အဘယ်ကြောင့်ဆိုသော် အချိန် အနည်းငယ်လေးအတွင်း သူ၏ရှေ့ရှိ စကြဝဠာ အတော်များများ ရိုက်ခွဲခံရကာ ကုချန်၏လက်သီးမှာ သူ့ထံသို့ ပိုပို၍ နီးကပ်လာသောကြောင့်ပင်။
ဒီလူရဲ့ တိုက်ခိုက်ရေးစွမ်းအားက ဘယ်လိုလုပ် ဒီလောက်တောင် ပြင်းထန်နေရတာလဲ?!
ကောင်းကင်ဖုံးလွှမ်း အင်မော်တယ်ဘုရင်မှာ ထိတ်လန့်သွားရလေသည်။ သူ၏ ညကောင်းကင်ယံ ဒိုင်းကာ၏ ကာကွယ်နိုင်စွမ်းကို လောကတွင် ပြိုင်ဘက်ကင်းသည်ဟု ဆိုနိုင်ကာ အင်မော်တယ်ဘုရင် ဘီလူးကြီးများထဲတွင်ပင် ၎င်းကို ယှဉ်နိုင်သူ အနည်းငယ်သာ ရှိလေသည်။
သို့သော် ယခုအခါ ကုချန်သည် ဧကရာဇ်လက်သီးကိုသာ လွှဲယမ်းနေရုံမျှဖြင့် သူ၏ ညကောင်းကင်ယံ ဒိုင်းကာကို ရိုက်ခွဲပစ်လုနီးပါး ဖြစ်နေပြီဖြစ်သည်။ ဤသည်ကို မြင်သောအခါ ကောင်းကင်ဖုံးလွှမ်း အင်မော်တယ်ဘုရင်မှာ မည်သို့ မအံ့အားသင့်ဘဲ နေမည်နည်း?!
အခန်း ( ၄၃၄ ) - စစ်မှန်သော ရုပ်သွင်ကို ထုတ်ဖော်ခြင်း၊ ညဥ့်ယံကျဆင်းလာခြင်းနှင့် နီးကပ်လာသော သေမင်း
လေဟာနယ်မှာ ပျက်စီးသွားကာ ကောင်းကင်ဘုံများအားလုံးလည်း တုန်လှုပ်သွားလေသည်။
အင်မော်တယ်ဘုရင် ဘီလူးကြီးတစ်ပါး၏ ဧရာမ စွမ်းအားကြီးမှာ သောင်းကျန်းပြန့်နှံ့သွား၏။
အကယ်၍ ကုချန်သာ ဤပေါက်ကွဲအားများကို ကောင်းကင်ဖုံးလွှမ်း နယ်ပယ်အတွင်း၌ တမင်သက်သက် ထိန်းချုပ်မထားခဲ့ပါက အရပ်မျက်နှာအနှံ့မှ အင်မော်တယ်ဘုရင်များ၏ အာရုံစိုက်မှုကို ချက်ချင်း ဆွဲဆောင်မိမည် ဖြစ်သည်။
အင်မော်တယ်ဘုရင် ဘီလူးကြီးများအကြား တိုက်ပွဲမှ လှိုင်းဂယက်များသည် ကျယ်ပြောလှသော ကောင်းကင်ဘုံများ၌ပင် ဖုံးကွယ်ထား၍မရဘဲ အခြား အင်မော်တယ်ဘုရင်များမှ ခံစားသိရှိသွားမည် ဖြစ်လေသည်။
ယခုအချိန်တွင် ကောင်းကင်ဖုံးလွှမ်း အင်မော်တယ်ဘုရင်သည် အန္တရာယ်ရှိသော အခြေအနေသို့ ရောက်ရှိနေပြီ ဖြစ်၏။
အမြဲတမ်း ပြိုင်ဘက်ကင်းခဲ့သော သူ၏ ညကောင်းကင်ယံ ဒိုင်းကာသည် ကုချန်၏ရှေ့တွင် အစွမ်းမဲ့သွားပုံရကာ စကြဝဠာ တစ်ခုပြီးတစ်ခု ရိုက်ခွဲခံလိုက်ရသည်။
နောက်ဆုံးတွင် ထိုလက်သီးသည် ကောင်းကင်ဖုံးလွှမ်း အင်မော်တယ်ဘုရင်၏ ခန္ဓာကိုယ်အနီးသို့ ရောက်ရှိလာကာ အညှာအတာမဲ့စွာ ထိုးချလိုက်လေသည်။
ကောင်းကင်ဖုံးလွှမ်း အင်မော်တယ်ဘုရင်သည် ခက်ခဲစွာ ရှောင်တိမ်းနိုင်ခဲ့သော်လည်း သူ၏ ပခုံးကို အထိုးခံလိုက်ရရာ ပခုံးရိုးမှာ အက်ကွဲသွား၍ လုံးဝ ကျိုးပဲ့လုနီးပါး ဖြစ်သွားတော့သည်။
" အား! "
ကောင်းကင်ဖုံးလွှမ်း အင်မော်တယ်ဘုရင်မှ နာကျင်စွာ အော်ဟစ်လိုက်ရာ သားရဲတစ်ကောင်ကဲ့သို့ နာကျင်သော ဟိန်းဟောက်သံကြီး ထွက်ပေါ်လာ၏။
သူသည် လက်ဝါးများကို ဆက်တိုက် လွှဲယမ်းလိုက်၏။ ထိုအခါ တာအိုအက္ခရာ ရေစီးကြောင်းကြီးတစ်ခု ထွက်ပေါ်လာကာ ကုချန်အား အလယ်ဗဟို၌ ထောင်ချောက်ဆင်ရန် ရည်ရွယ်သည့်အလား တိုးဝင်သွားလေသည်။
သို့သော် ကောင်းကင်ဖုံးလွှမ်း အင်မော်တယ်ဘုရင်၏ နည်းလမ်းများကို ရင်ဆိုင်ရချိန်တွင် ကုချန်သည် ကြောက်ရွံ့ခြင်းကင်းမဲ့စွာ တည်ငြိမ်နေလေသည်။ သူ၏ ရုပ်ခန္ဓာအစစ်အမှန်သည် ညဥ့်ယံအထက်တွင် ရပ်တည်နေ၍ ဧကရာဇ်လက်သီးကို ဆက်တိုက် လွှဲယမ်းကာ တာအိုအက္ခရာများ အားလုံးကို ချေမွပစ်လိုက်၏။
ထို့နောက် အရှိန်မပျက်ဘဲ ကောင်းကင်ဖုံးလွှမ်း အင်မော်တယ်ဘုရင်ကို နောက်တစ်ကြိမ် တိုက်ခိုက်လိုက်ရာ သူ၏လက်သီးသည် ကောင်းကင်ဖုံးလွှမ်း အင်မော်တယ်ဘုရင်၏ ခန္ဓာကိုယ်ကို ပွတ်တိုက်မိသွားသဖြင့် သွေးများ စီးကျလာကာ ထိုသူ၏ခန္ဓာကိုယ်မှာ လုံးဝ ကျိုးပဲ့လုနီးပါး ဖြစ်သွားတော့သည်။
" ဘယ်လိုလုပ် ဖြစ်နိုင်မှာလဲ...!? "
ချန်းရှီအင်မော်တယ်ဘုရင်သည် ဘေးမှရပ်ကာ သူတို့နှစ်ဦး တိုက်ခိုက်နေသည်ကို ကြည့်ရင်း အံ့အားမသင့်ဘဲ မနေနိုင်တော့ချေ။
ယွဲ့လင်အင်မော်တယ်ဘုရင် ခေါ်လာသော အကူအညီသည် ဤမျှအထိ စွမ်းအားကြီးမားလိမ့်မည်ဟု သူ မထင်ထားခဲ့ပေ။
ဤသူသည် အမှန်တကယ်ပင် မကြာသေးမီကမှ အဆင့်တက်လာသော အင်မော်တယ်ဘုရင် ဘီလူးကြီးတစ်ပါး ဟုတ်ပါသလော။ ထိုသို့ဆိုလျှင် ကောင်းကင်ဖုံးလွှမ်း အင်မော်တယ်ဘုရင်ကို တိုက်ခိုက်၍ ဤအခြေအနေထိ မည်သို့ ဖိအားပေးနိုင်သနည်း။
" မင်းရဲ့ စွမ်းရည်က ဒီလောက်လေးပဲလား... ဒါဆိုရင်လည်း မင်းရဲ့ ခေါင်းကို ငါ ဝမ်းမြောက်ဝမ်းသာ လက်ခံလိုက်မယ် "
ကောင်းကင်ဖုံးလွှမ်း အင်မော်တယ်ဘုရင် ဖရိုဖရဲ ဆုတ်ခွာနေရသည်ကို မြင်သောအခါ ကုချန်၏အသံမှာ အရာအားလုံးကို အပေါ်စီးမှ ကြည့်နေသော အမြင့်မြတ်ဆုံး ကောင်းကင်ဧကရာဇ်တစ်ပါးကဲ့သို့ အေးစက်နေလေသည်။
" နောက်ပေါက်လေး... အရမ်း မမောက်မာစမ်းနဲ့... ငါ့ကို ဒီအခြေအနေထိ တွန်းပို့တဲ့အတွက် မင်းကို သေချာပေါက် တန်ရာတန်ကြေး ပေးဆပ်စေရမယ် "
ကောင်းကင်ဖုံးလွှမ်း အင်မော်တယ်ဘုရင်သည် ကြမ်းတမ်းစွာ ပြောဆိုလိုက်၏။ သူ၏မျက်နှာပေါ်တွင် တည်ငြိမ်မှုများ ပျောက်ကွယ်သွား၍ သူ၏အသံမှာ အေးစက်ကာ ကြောက်မက်ဖွယ် ကောင်းနေလေသည်။
သူက ဘယ်သူလဲ။
ရှေးခေတ်ကတည်းက တာအိုကို ရရှိခဲ့သော ရှေးဟောင်း အင်မော်တယ်ဘုရင် ဘီလူးကြီးတစ်ပါး ဖြစ်သည်။ အင်မော်တယ်နှင့် နတ်ဆိုး စစ်ပွဲကာလအတွင်း အရပ်ဆယ်မျက်နှာသို့ နာမည်ကျော်ကြားခဲ့၍ အင်မော်တယ်ဘုရင် အားလုံးကို သတိထားကာ ကြောက်ရွံ့စေခဲ့သူ ဖြစ်သည်။
သို့သော် ယခုအခါ ဘယ်ကမှန်းမသိ ပေါ်လာသော နောက်ပေါက်တစ်ယောက်၏ ဖိအားပေးမှုကို ဤမျှအထိ ခံနေရရာ ကောင်းကင်ဖုံးလွှမ်း အင်မော်တယ်ဘုရင်မှာ မည်သို့ လက်ခံနိုင်မည်နည်း။
" အား! "
ကောင်းကင်ဖုံးလွှမ်း အင်မော်တယ်ဘုရင်မှ ကျယ်လောင်စွာ ဟိန်းဟောက်လိုက်ရာ မှုန်ဝါးဝါး သားရဲကြီးတစ်ကောင်၏ ပုံရိပ်ယောင်
တစ်ခု သူ၏နောက်ကျော၌ ထွက်ပေါ်လာလေသည်။
ထိုသားရဲကြီး၏ ခန္ဓာကိုယ်သည် ဟွမ်သွမ့်ချီများထဲတွင် အလုံးစုံ နစ်မြုပ်နေကာ သူ၏ သွေးချီများနှင့် တာအိုအက္ခရာများဖြင့် လုံးလုံးလျားလျား တည်ဆောက်ထားခြင်း ဖြစ်လေသည်။ ၎င်းသားရဲသည် မှုန်ဝါးဝါးဖြစ်နေ၍ မျက်ဖြူမပါသော ညဥ့်ယံကဲ့သို့ မည်းနက်နေသည့် မျက်လုံးတစ်စုံကိုသာ ပြသနေကာ ကုချန်အား စူးစိုက်ကြည့်နေရာ ကြောက်မက်ဖွယ်ကောင်းကာ ကျောချမ်းစရာ ကောင်းလှ၏။
" ညဥ့်ယံ ကောင်းကင်ဖုံးလွှမ်းခြင်း "
မှုန်ဝါးဝါး သားရဲကြီးမှ ကျယ်လောင်စွာ ဟိန်းဟောက်လိုက်သည်နှင့် အနက်ရောင် အလင်းတန်းတစ်ခု သူ၏မည်းနက်နေသော သူငယ်အိမ်များထဲမှ ရုတ်တရက် ပေါက်ကွဲထွက်လာ၏။ ၎င်း ဖြတ်သန်းသွားရာ နေရာတိုင်းတွင် အရာအားလုံး ပေါက်ကွဲသွားကာ ဝါးမြိုခံလိုက်ရ၏။
ထိုအနက်ရောင် အလင်းတန်းသည် လောကရှိ အပြင်းထန်ဆုံးသော မှောင်မိုက်မှုကို ကိုယ်စားပြုနေပုံရပြီး အရာအားလုံးကို မျိုချနိုင်ကာ အလင်းရောင်ပင်လျှင် လွတ်မြောက်နိုင်ခြင်း မရှိချေ။
ထိုထူထပ်သော မှောင်မိုက်မှုထဲမှ ကုချန်သည် ခြိမ်းခြောက်မှု အရိပ်အယောင်တစ်ခုကို အမှန်တကယ် ခံစားလိုက်ရ၏။ ထိုမှောင်မိုက်မှုတွင် လောကရှိ အပြင်းထန်ဆုံးသော ဖျက်ဆီးခြင်း တာအိုများ ပါဝင်နေကာ အရာအားလုံးကို ဖျက်ဆီးပစ်နိုင်စွမ်း ရှိလေသည်။
" ကောင်းကင်ဖုံးလွှမ်း အင်မော်တယ်ဘုရင်က သူ့ရဲ့ ရုပ်သွင်အစစ်အမှန်ကို တကယ်ပဲ ထုတ်ဖော်လိုက်ပြီ "
ဟွမ်သွမ့်ချီများထဲတွင် မျောလွင့်နေသော မှုန်ဝါးဝါး သားရဲကြီးကို ကြည့်လျက် ယွဲ့လင်အင်မော်တယ်ဘုရင်မှာ အံ့အားမသင့်ဘဲ မနေနိုင်တော့ချေ။
သူသည် ရှေးဟောင်းခေတ် ပြီးနောက်မှသာ အင်မော်တယ်ဘုရင်အဖြစ် တာအိုကို ရရှိခဲ့သော်လည်း ကောင်းကင်ဖုံးလွှမ်း အင်မော်တယ်ဘုရင်အကြောင်းကို ကြားဖူးခဲ့လေသည်။
ဒဏ္ဍာရီများအရ သူ၏ စစ်မှန်သော ရုပ်သွင်မှာ ရှေးဟောင်း ဘီလူး သားရဲဖြစ်ပြီး ကောင်းကင်ဖုံးလွှမ်း နယ်ပယ်မှာလည်း သူ၏ တစ်ခုတည်းသော မွေးရာပါ ပညာရပ်ဖြစ်သည်ဟု ဆိုကြ၏။
ထိုစဉ်က နတ်ဆိုးနယ်မြေမှ အင်မော်တယ်ဘုရင်သည် သူ၏ 'ညဥ့်ယံ ကောင်းကင်ဖုံးလွှမ်းခြင်း' တိုက်ခိုက်မှုအောက်တွင် ကျဆုံးသွားခဲ့သည်ဟု ဆိုကြသည်။
အနက်ရောင် အလင်းတန်းများ တိုက်ခတ်သွားကာ အမှောင်ထုကြီး ကျဆင်းလာသကဲ့သို့ အရာအားလုံးကို ဝါးမျိုသွားလေသည်။
သို့သော် ကုချန်မှာ အလောတကြီး မရှိပေ။ သူသည် ' ကောင်းကင်ဘုံအလုံးစုံ အမှန်တရား နားလည်ခြင်း ' ကို တိတ်တဆိတ် အသက်သွင်းလိုက်ရာ သူ၏ရုပ်ခန္ဓာသည် တောက်ပလာ၍ အနှစ်သာရ သွေးများနှင့် အဖိုးတန် ချီများ ရစ်ပတ်လာ၏။ ထူထပ်ကာ တောက်ပသော အဖြူရောင် အင်မော်တယ် အလင်းတန်းများမှာလည်း သူ၏ပတ်လည်တွင် မြင့်တက်လာကာ စစ်မှန်သော နဂါးတစ်ကောင်ကဲ့သို့ လှည့်ပတ်ကခုန်လျက် သူ၏ခန္ဓာကိုယ်ကို ရစ်ပတ်သွားလေသည်။
လွန်စွာ ထူထပ်လှသော ဖန်ဆင်းခြင်းနှင့် သက်စောင့်စွမ်းအင် အငွေ့အသက်များသည် သူ၏ဘေးမှ ထွက်ပေါ်လာ၏။ လေဟာနယ်ထဲတွင် အင်မော်တယ် ပန်းများ ပွင့်လန်းလာ၍ ရှေးဟောင်း ဆေးပင်များ ပွင့်အာလာကာ သက်စောင့်စွမ်းအင်မှာလည်း အထွတ်အထိပ်သို့ ရောက်ရှိနေလေသည်။
ဤသည်ကား ကုချန်၏ တန်ပြန်ရင်ဆိုင်မည့် နည်းလမ်းပင် ဖြစ်သည်။
သူသည် ကောင်းကင်ဖုံးလွှမ်း အင်မော်တယ်ဘုရင် ထုတ်လွှတ်လိုက်သော ဖျက်ဆီးခြင်း တာအိုကို ယှဉ်ပြိုင်ရန် ' ကောင်းကင်ဘုံအလုံးစုံ အမှန်တရား နားလည်ခြင်း ' ၏ စွမ်းအားကို အသုံးပြု၍ ဖန်ဆင်းခြင်းနှင့် သက်စောင့်စွမ်းအင် တာအိုကို ထုတ်လွှတ်လိုက်ခြင်း ဖြစ်သည်။
ကောင်းကင်ကို ဖုံးလွှမ်းသွားသော ဖန်ဆင်းခြင်း အငွေ့အသက်များသည် အပြင်းထန်ဆုံးသော ဖျက်ဆီးခြင်းကို ကိုယ်စားပြုသည့် အနက်ရောင် အလင်းတန်းနှင့် ဝင်တိုက်မိသွားရာ နေ့နှင့်ည တစ်လှည့်စီ ပြောင်းလဲနေသကဲ့သို့ပင် အမြင့်မြတ်ဆုံး တာအိုကို သရုပ်ဖော်ပြသနေ၏။
ဖျက်ဆီးခြင်းနှင့် ဖန်ဆင်းခြင်း စွမ်းအား နှစ်ခုစလုံးသည် မဟာတာအို သုံးထောင်တွင် အဆင့်ဝင်ကြသည်ဖြစ်ရာ အနိမ့်အမြင့် ကွာခြားမှု မရှိသည့် စွမ်းအား နှစ်မျိုးသာ ဖြစ်လေသည်။
ထို့ကြောင့် ဤသည်မှာ မည်သည့် လှည့်စားမှုမျှ မပါဝင်သော သန့်စင်သည့် တာအို အားပြိုင်မှုတစ်ခု ဖြစ်၍ မည်သူက မဟာတာအိုကို ပိုမို နက်နက်ရှိုင်းရှိုင်း နားလည်သဘောပေါက်သနည်း ဆိုသည့်အပေါ်တွင်သာ လုံးလုံးလျားလျား မူတည်နေလေသည်။
သို့သော် ကောင်းကင်ဖုံးလွှမ်း အင်မော်တယ်ဘုရင်ကို တုန်လှုပ်သွားစေခဲ့သည်မှာ အမြဲတစေ ပြိုင်ဘက်ကင်းခဲ့သော သူ၏ ကောင်းကင်ဖုံးလွှမ်းခြင်း ပညာရပ်သည် ကုချန် ထုတ်လွှတ်လိုက်သော အမြင့်မြတ်ဆုံး ဖန်ဆင်းခြင်း စွမ်းအားနှင့် ထိတွေ့ချိန်တွင် ရေခဲနှင့် နှင်းများကဲ့သို့ အရည်ပျော်သွားခြင်းပင် ဖြစ်သည်။
မူလက ကောင်းကင်၏ နေရာအများစုကို သိမ်းပိုက်ထားခဲ့သော ညဥ့်ယံသည်လည်း ဆုတ်ဖြဲခံလိုက်ရ၍ ကောင်းကင်တွင် နေ့လယ်ခင်းကဲ့သို့ အလင်းစက်များ ထွက်ပေါ်လာ၏။
ဤသည်မှာ သူ၏စွမ်းအား ဖိနှိပ်ခံလိုက်ရခြင်း၏ ရလဒ်ဖြစ်ကြောင်း ကောင်းကင်ဖုံးလွှမ်း အင်မော်တယ်ဘုရင် သိလိုက်သည်။ ဖန်ဆင်းခြင်း စွမ်းအားမှ အသာစီးရသွားသည်ဖြစ်ရာ သူ၏ညဥ့်ယံကို လုံးဝ ဆုတ်ဖြဲပစ်လိုက်သည်မှာ သဘာဝပင်။
" လေဟာနယ် ပျက်သုဉ်းခြင်း "
ကုချန်မှ အေးစက်စွာ အော်ဟစ်လိုက်၏။ သူသည် ဤရှားပါးသော အခွင့်အရေးကို လက်မလွှတ်ဘဲ လေဟာနယ် ရပ်တန့်ခြင်း ပညာရပ်ကို အသုံးပြု၍ နီးကပ်စွာ ချဉ်းကပ်သွားကာ ကောင်းကင်ဖုံးလွှမ်း အင်မော်တယ်ဘုရင်၏ ရှေ့တွင် ချက်ချင်း ပေါ်လာလျက် ထိုသားရဲကြီးဆီသို့ လက်သီးလွှဲယမ်းလိုက်လေသည်။
" ဘန်း! "
လေဟာနယ် ရပ်တန့်ခြင်း ပညာရပ်၏ လွှမ်းမိုးမှုကြောင့် သားရဲကြီးမှာ ရှောင်တိမ်းရန် အချိန်မရလိုက်ဘဲ ကုချန်၏လက်သီးဖြင့် မျက်နှာကို အထိုးခံလိုက်ရကာ ချက်ချင်း လွင့်စဉ်သွား၍ အစွယ်များစွာပင် ကျိုးပဲ့သွားတော့၏။
ကောင်းကင်ဖုံးလွှမ်း အင်မော်တယ်ဘုရင်၏ စစ်မှန်သော ရုပ်ခန္ဓာသည်လည်း ထိခိုက်သွားကာ သွေးလတ်လတ်ဆတ်ဆတ် တစ်လုပ် အန်ထုတ်လိုက်ရလေသည်။
ထိုဘီလူး သားရဲသည် သူ၏မွေးရာပါ ဓမ္မရုပ်သွင် ဖြစ်သည်။ ၎င်း ထိခိုက်ပျက်စီးပါက သူ၏ရုပ်ခန္ဓာ အစစ်အမှန်သည်လည်း ကျိန်းသေပေါက် ထိခိုက်မည် ဖြစ်လေသည်။
" အား! "
ကောင်းကင်ဖုံးလွှမ်း အင်မော်တယ်ဘုရင်မှ နောက်တစ်ကြိမ် ဟိန်းဟောက်လိုက်ပြန်၏။ သူ၏ရုပ်ခန္ဓာ အစစ်အမှန်သည် ဟိန်းဟောက်သံကြီးနှင့်အတူ ပြိုကွဲသွား၍ ဓမ္မရုပ်သွင်နှင့် လုံးဝ ပေါင်းစပ်သွားကာ ဓမ္မရုပ်သွင်ကို အနည်းငယ် ပို၍ ခိုင်မာလာစေခဲ့သည်။ ထို့နောက် သွေးသံရဲရဲ ပါးစပ်ကြီးကို ဟကာ ကုချန်အား ဝါးမျိုရန် တိုးဝင်လာတော့သည်။
" ဘန်း! "
ကုချန်သည် အညှာအတာမဲ့သော နောက်ထပ် လက်သီးတစ်ချက်ကို ထိုးချလိုက်ရာ ဘီလူးသားရဲ၏ ပါးစပ်ထဲသို့ တိုက်ရိုက် ဝင်ရောက်သွားကာ ပြိုင်ဘက်ကင်း စွမ်းအားများသည် ၎င်း၏ပါးစပ်ထဲတွင် မျက်စိတစ်မှိတ်အတွင်း ပေါက်ကွဲသွားလေသည်။ ကုချန်၏ ဧကရာဇ်လက်သီးမှာ အထိအခိုက်မရှိသော်လည်း ဘီလူးသားရဲ၏ ခေါင်းမှာမူ ကုချန်၏လက်သီးမှ ပေါက်ကွဲထွက်လာသော စွမ်းအားကြောင့် လုံးဝ ကျိုးပဲ့လုနီးပါး ဖြစ်သွားတော့၏။
" ညဥ့်ယံ ကောင်းကင်ဖုံးလွှမ်းခြင်း ဟုတ်လား... လှည့်ကွက် သေးသေးလေးပါကွာ "
ကုချန်၏အကြည့်များမှာ အေးစက်ကာ ရက်စက်လှ၏။ သူ၏ဧကရာဇ်လက်သီးကို ဆက်တိုက် လွှဲယမ်းကာ ဘီလူးသားရဲကို မူးဝေသွားသည်အထိ ထိုးကြိတ်ပစ်လိုက်၍ ၎င်း၏ခန္ဓာကိုယ်မှာ လုံးဝ ပြိုကွဲသွားတော့သည်။
ကောင်းကင်ဖုံးလွှမ်း အင်မော်တယ်ဘုရင်သည် ထိုအရာကို ကာကွယ်ရန်အတွက် ညဥ့်ယံ အစိတ်အပိုင်းတစ်ခုကို ခေါ်ယူရန် ကြိုးစားသော်လည်း ကုချန်မှ မျက်တောင်တစ်ချက် မခတ်ဘဲ ဆုတ်ဖြဲပစ်လိုက်လေသည်။
" သေစမ်း! "
ဤတစ်ကြိမ်တွင် ကုချန်၏လက်ချောင်းများသည် ဓားတစ်လက်ကဲ့သို့ ဖြစ်သွားကာ ထိုလျှို့ဝှက်ဆန်းကြယ်သော ခေါင်းတလားဖုံးမှ သင်ယူခဲ့သည့် အင်မော်တယ်ဘုရင် ဓားပညာရပ်ကို အသက်သွင်းလိုက်၏။ ထိုအခါ ကောင်းကင်ကို တိုက်ခတ်သွားမည့် ပြိုင်ဘက်ကင်း ဓားအလင်းတန်းတစ်ခု မျက်စိတစ်မှိတ်အတွင်း ထွက်ပေါ်လာကာ ကောင်းကင်ဖုံးလွှမ်း အင်မော်တယ်ဘုရင်၏ ခန္ဓာကိုယ်ကို အပိုင်းပိုင်းအစစ ဖြတ်တောက်ပစ်လိုက်လေသည်။
" အား!!! "
ဤအခိုက်အတန့်တွင် ကောင်းကင်ဖုံးလွှမ်း အင်မော်တယ်ဘုရင်သည် ကြောက်ရွံ့မှုကို ခံစားလိုက်ရလေပြီ။
ပျောက်ဆုံးနေသည်မှာ ကြာပြီဖြစ်သော သေမင်း၏အငွေ့အသက်ကို သူ ခံစားလိုက်ရ၏။
အကယ်၍ ကုချန်ကိုသာ ဆက်လက်တိုက်ခိုက်ခွင့် ပေးလိုက်ပါက သူ့ကို စောင့်ကြိုနေသည်မှာ သေဆုံးခြင်းသာ ဖြစ်ကြောင်း သူ သိလိုက်လေသည်။