အခန်း (၁၁၁-၁၁၂)

Vol. 12 Ch. 111-112

Chapter 111

အခန်း ၁၁၁

ကြယ်သံတမန်က ချောင်မူ၏ မျက်နှာကို ကြည့်နေစဉ် အခန်းထဲက လေထုက တဖြည်းဖြည်း တင်းမာလာသည် ။

ချောင်မူနှင့် အနီးဆုံးတွင် ထိုင်နေသော မုတ်ဆိတ်မွှေးထူထူနှင့် ဓားသမားသည်လည်း မျက်နှာအမူအရာ အနည်းငယ်ပြောင်းလဲသွားပြီး သူ့လက်ကို ခါးစွပ်ပေါ်တွင် တိတ်တဆိတ်တင်လိုက်သည် ။

ချောင်မူ တစ်ယောက်ထဲသာ တည်ငြိမ်နေ၏ ။

" ကျုပ်နာမည် ချောင်ကျန့်ပါ.. သူတော်စင်ဝူချင်းရှင်းကို အမဲလိုက်ပွဲ ရှိတယ်လို့ ဒီရေနားစွင့် မျှော်စင်က ပြောလိုက်လို့ ကျုပ်လာခဲ့တာ.. အရင်မပြောပြမိတာ ကျုပ်အမှားပါ.. "

ချောင်မူသည် သူတော်စင်ဝူချင်းရှင်းအပေါ် စစ်မှန်သော မေတ္တာပြသနိုင်ရန် သစ္စာရှိသော ကျန့် အမည်ကို အသုံးပြုရန် ဆုံးဖြတ်လိုက်၏ ။ တစ်ချိန်တည်းမှာပင် ဒီရေနားစွင့်မျှော်စင်အား ဒိုင်းအဖြစ် အသုံးပြုရန် မမေ့ခဲ့ပေ ။

ဒီရေနားစွင့်မျှော်စင်သည် ဝူကျိအသင်း၏ ရန်သူဖြစ်ပါက မီးထဲသို့ ထင်းထည့်ပေးနိုင်မည် ။

ဤ နှစ်ဖွဲ့သည် ကောင်းမွန်သော ဆက်ဆံရေးရှိလျှင် သူအလွယ်တကူ ဝင်ရောက်ရောနှောနိုင်၏ ။

ထို့ကြောင့် ချောင်မူက စကားပြောပြီးသည်နှင့် တခြားသူများ၏ အမူအရာကို အကဲခတ်ကြည့်လိုက်၏ ။

လျှို့ဝှက်ကြယ်သံတမန်သည် မျက်နှာဖုံးစွပ်ထားသဖြင့် အမူအရာကို မြင်ရရန် မဖြစ်နိုင်ချေ ။ သို့ရာတွင် သံတမန်၏ နောက်တွင် ရပ်နေသည့် သက်လတ်ပိုင်းအရွယ် သန်မာသည့် သူက စကားစပြောလိုက်သည် ။

" သံတမန်ကြီး.. ကျုပ် သူ့ရဲ့ ခွန်အားကို စမ်းကြည့်လိုက်ရမလား.. "

သူက ပြောပြီးသည်နှင့် ချက်ချင်း မတ်တပ်ရပ်လိုက်ကာ ချောင်မူထံသို့ ခုန်အုပ်ပြီး ရင်ဘက်ကို လက်သီးဖြင့်ထိုးလိုက်၏ ။

ချောင်မူက ရှောင်တိမ်းရန် ရည်ရွယ်ချက်မရှိ ။ ချက်ချင်း မတ်တပ်ထရပ်လိုက်ပြီး ရွှေခေါင်းလောင်းဒိုင်းသိုင်းကို အသုံးပြုကာ ထိုလူ၏ လက်သီးကို ရှောင်ဖယ်ခြင်းမရှိဘဲ ထိုလူ၏ ဝမ်းဗိုက်ကိုသာ ပြန်ထိုးလိုက်၏ ။

' မင်းလည်းထိုး.. ငါလည်းထိုးမယ်.. ဘယ်သူပိိုအားကောင်းလဲ ကြည့်ရအောင်.. ငါ့ကို အနိုင်ယူနိုင်ရင် ပိုတောင်ကောင်းသေး.. '

သန်မာသောလူက ဆွံ့အသွား၏ ။ သို့ရာတွင် လေထဲသို့ ရောက်နေသဖြင့် သူ၏ လှုပ်ရှားမှုကို မပြောင်းလဲနိုင်တော့ပေ ။

" ဖုန်း...ဖုန်း.."

အသံခပ်တိုးတိုး နှစ်ခုထွက်လာပြီး ချောင်မူ၏ ဝတ်ရုံသည် လေပြင်းကြောင့် အနည်းငယ် လှုပ်ခပ်သွားကာ သူ၏ ရင်ဘက်တွင် လက်သီးရာတစ်ခု ထင်ကျန်ခဲ့သည် ။ တစ်ဘက်လူ၏ ခွန်အားသည် မသေးသဖြင့် ခြေလှမ်းအနည်းငယ် နောက်ဆုတ်လိုက်ရ၏ ။

ချောင်မူသည် ရွှေခေါင်းလောင်းဒိုင်းနှင့် သံချပ်ဝတ် သိုင်းနှစ်ခုကို ကျွမ်းကျင့်သဖြင့် အဆင့် ၅ များ၏ လက်သီးချက်ကို ရင်ကော့ခံနိုင်၏ ။ ယခု အဆင့် ၄ သိုင်းပညာရှင်၏ လက်သီးချက်သည် အနည်းငယ် နာကျင်စေရုံသာရှိသည် ။

သန်မာသောလူက လေထဲတွင် ပြန်လွင့်ထွက်သွားပြီး လဲကျမလို ဖြစ်သွား၏ ။ သူ အရေးနိမ့်ကြောင်း သိသားသွားလေသည် ။

" ခင်ဗျားက အပြင်သိုင်းပညာရှင်လား.. အသက် ၆၀ အထိ အသက်ရှင်နိုင်တာ တကယ်ကို ရှားတယ်.. "

သန်မာသောလူက ခန္ဓာကိုယ်ကို ဟန်ချက်ပြန်ထိန်းလိုက်ပြီး ဘာမှမဖြစ်သလို လှည့်ပြီး စကားပြောလိုက်၏ ။

သူက ချောင်မူကို နောက်ကျောပေးပြီး ဆောင့်တက်လာသော သွေးများကို မသိမသာ မျိုချလိုက်သည် ။ သူနှင့် ချောင်မူသည် အတွင်းအားချင်း မကွာသဖြင့် အစစ်အမှန်တိုက်ပွဲတွင် မည်သူ နိုင်မည်ကို ပြောရခက်ပေသည် ။

သို့သော်လည်း ချောင်မူက မရှောင်ဘဲ အပြင်သိုင်းနှစ်ခုကို အားကိုးပြီး ထိပ်တိုက်ရင်ဆိုင်ခဲ့သဖြင့် သူအနည်းငယ် အရေးနိမ့်သွားခြင်းပင် ။ သူ အပြင်သိုင်း လေ့ကျင့်မထား ။

" ဒါဆို ခင်ဗျားက အပြင်သိုင်းပညာရှင်ပေါ့.. အပြင်သိုင်းပညာရှင်က ဒီအရွယ်အထိ အားကောင်းနေသေးတာ အံ့သြစရာပဲ.. "

သန်မာသောလူက ပြုံးပြီး ပြောလိုက်သည် ။ ကြယ်သံတမန်ရှေ့တွင် သူ၏ ခွန်အားကို အသိအမှတ် အပြုခံချင်ယုံသာ ဖြစ်၍ သေသည်အထိ တိုက်ခိုက်မည် မဟုတ် ။ ထို့ကြောင့် တစ်ချက် တိုက်ပြီးနောက် နောက်ဆုတ်လိုက်တော့၏ ။

" ခင်ဗျားက သန်မာပေမဲ့ ကျုပ်တို့လို သိုင်းပညာရှင်တွေကိုပဲ တိုက်ခိုက်လို့ရမယ်.. "

" ခင်ဗျားရဲ့ ရုပ်ပိုင်းဆိုင်ရာ ကြံ့ခိုင်မှုက အရိုးစား လီမီးတောက်နဲ့ တွေ့ရင် မီးလောင်မှုအားကောင်းတဲ့ ထင်းလိုပဲ.. "

အခြားသူများက ထောက်ခံဟန်ဖြင့် ခေါင်းညိတ်လိုက်ကြ၏ ။

" ဒီအခန်းထဲမှာ အတွင်းအား အဆင့် ၄ ရောက်နေတဲ့သူ တော်တော်များများ ရှိတယ်.. "

" ရှေးခေတ်တုန်းက ဆိုရင်တော့ အဆင့် ၄ တွေကို ဆရာကြီးလို့ သတ်မှတ်လို့ရတာပေါ့.. ဝူကျိအသင်း ပေါ်လာပြီးနောက်မှသာ အဆင့်၄ ရောက်တဲ့သူတွေ ပိုများလာခဲ့တာ.. "

သန်မာသောလူက ဘေးတွင် ရှိသော လျှို့ဝှက်ကြယ် သံတမန်ကို မြှောက်ပင့်ပေးလိုက်ပြီး...

" ဒါပေမဲ့ စိတ်ဝိညာဥ်သန့်စင်ခြင်း ပြီးထားတဲ့ အဆင့် ၃ သိုင်းပညာရှင်တောင်မှ အတွင်းအားကို တစ်ခုတည်းကို အားကိုးပြီး လီမီးတောက်ကို ရင်မဆိုင်နိုင်ဘူး.. "

အကုန်လုံး၏ ရင်ထဲတွင် မသက်မသာ ဖြစ်သွား၏ ။ ဝူကျိအသင်း၏ လျှို့ဝှက်ကြယ်သံတမန်ပင် ခေါင်းညိတ်လိုက်ပြီး...

" ဟုတ်တယ်.. ဝူချင်ရှင်းရဲ့ အဆောင်တွေကို သတိထားရမယ်.. "

" လီမီးတောက်နဲ့တွေ့ရင် ရှောင်တိမ်းရုံက လွဲပြီး ဘာမှမတက်နိုင်ဘူး .. ကိုယ်ဖော့သိုင်းသုံးပြီး ရှောင်နိုင်ဖို့သာ ကြိုးစားကြပါ.. "

" တကယ်ပဲ အဲ့လောက်အထိ ကြောက်စရာ ကောင်းတာလား.. "

ချောင်မူက ထပ်မေးလိုက်ပြန်၏ ။

ကြယ်သံတမန်က ချောင်မူကို ကြည့်လိုက်ပြီး...

" လီမီးတောက်ကို ထိလိုက်မိတာနဲ့..

အသား..အရိုး..အရေပြားနဲ့.. သွေး အကုန်လုံး ပြာဖြစ်တဲ့အထိ လောင်ကျွမ်းသွားလိမ့်မယ်.. "

" လီမီးတောက်ကို ရေနဲ့ ငြိမ်းလို့ မရသလို မြေကြီးနဲ့လည်း ငြိမ်းလို့မရဘူး.. တစ်ခုတည်းသော တက်နိုင်တာက အတွင်းအား သုံးပြီး ဖိနှိပ်ထားရုံပဲ..အတွင်းအားကုန်တာနဲ့ သေမှာပဲ.. "

Chapter 112

အခန်း ၁၁၂

" သိုင်းပညာရှင် တစ်ယောက်က လီမီးတောက်နဲ့ ထိမိသွားပြီဆိုရင် ရွေးချယ်စရာ နှစ်ခုပဲ ရှိတယ်.. အသက်ရှင်ဖို့ ထိတဲ့နေရာကို ချက်ချင်းဖြတ်မလား.. အသက်အသေခံမလား.. ဒါပဲ.. တတိယ ဖြစ်နိုင်ချေ မရှိဘူး.. "

" ဒါပေမဲ့ တစ်ကိုယ်လုံး မီးထဲ ရောက်သွားရင်တော့ သေရုံကလွဲပြီး ဘာမှ မရှိတော့ဘူးပေါ့.. ဒါကြောင့် ကိုယ်ဖော့သိုင်းသုံးပြီး သတိထား ရှောင်ကြပါ.. "

အကုန်လုံး၏ တဆက်ဆက်ညိတ်နေကြသော ခေါင်းများကို ကြည့်ပြီး ချောင်မူ သံသယ ဝင်သွား၏ ။ သူ မှားယွင်းသော လမ်းကြောင်းကို ရွေးချယ်မိခဲ့သည်လော ။

ချောင်မူသည် ကောင်းကင်နတ်ဆိုးပြိုကွဲခြင်း သိုင်းအပါအဝင် ကျွမ်းကျင်မှု အများစုမှာ အပြင်သိုင်းများသာ ဖြစ်၏ ။

ဝူတန်၏ အဆုံးမဲ့သန့်စင်သောယန်ကျမ်းစာသည်ပင် အတွင်းနှင့် အပြင်နှစ်ခုလုံးကို မြှင့်တင်ပေးသဖြင့် တဝက်အပြင်သိုင်း ဟု ခေါ်ဆိုနိုင်သည် ။ သူအပြင်သိုင်းများစွာကို လေ့ကျင့်ထားသဖြင့် အဆင့်တူ သိုင်းပညာရှင်အား ကြောက်စရာမလိုအပ်ပေ ။

ချောင်မူ ရင်ဆိုင်ခဲ့ရသော တိုက်ပွဲများအားလုံးသည်လည်း ရုပ်ပိုင်းဆိုင်ရာဖြင့် တိုက်ခိုက်ခြင်းသဖြင့် ကြံ့ခိုင်သည့် ခန္ဓာကိုယ်ရှိမှသာ ကြာကြာခံနိုင်မည်ဟု မှတ်ယူထားခဲ့သည် ။ လွန်ခဲ့သော ရက်အနည်းငယ်က ချန်ချန်ပေးသော အရိပ်ခြေလှမ်းသာ မရှိလျှင် သူ့တွင် ကိုယ်ဖော့သိုင်း မရှိပေ ။

" မင်းရဲ့ အပြင်အားကလည်း မဆိုးဘူး.. ကျွမ်းကျင်မှုတွေကလည်း ကောင်းတယ်.. အတွင်းအားကလည်း အဆင့် ၄ ရောက်နေပြီ.."

ကြယ်သံတမန်က ချောင်မူကို ကြည့်ပြီး မှတ်ချက်ပေးလိုက်သည် ။

" ပြီးတော့ သိုင်းသူတော်စင်စိတ်ဝိညာဥ်ကျမ်း လေ့ကျင့်ထားတာ ဆိုတော့ ဝူကျိအသင်းဝင် တဝက်လို့ ပြောလို့ရတာပေါ့.. မင်းက ဖိတ်ခေါ်မထားဘဲ ရောက်လာပေမဲ့ ငါတို့ လက်ခံနိုင်ပါတယ်.. "

ဒီရေနားစွင့်မျှော်စင်မှ လူဆိုးထိန်းခေါင်းဆောင် အတုပြောခဲ့သည့်အတိုင်းပင် ချောင်မူ၏ အရည်အချင်းများကိုမြင်လျှင် ချက်ချင်းလက်ခံလိုက်၏ ။

လျှို့ဝှက်ကြယ်သံတမန်သည် သိုင်းသူတော်စင်စိတ်ဝိညာဥ်ကျမ်း၏ လျှို့ဝှက်ချက်များကို သိပေသည် ။ ဤမမျှော်လင့်ထားပဲ ရောက်လာသော ချောင်ကျန့်သည့် မည်သို့သော ရည်ရွယ်ချက်ဖြင့် ရောက်လာစေကာမူ တချိန်တွင် သိုင်းသူတော်စင်အတွက် အဟာရသာ ဖြစ်လာမည်ဖြစ်၍ သိပ်အာရုံမစိုက်ချေ ။

" ကောင်းပြီ..ကောင်းပြီ.. ဒါဆိုလည်း သွားကြတာပေါ့.. "

ကြယ်သံတမန်က...

" မင်းတို့ ရှစ်ယောက်ထဲမှာ အဆင့် ၄ လေးယောက်နဲ့ အဆင့် ၅ လေးယောက် ရှိတယ်.. မင်းတို့ ရုံးတော်ကို ဝင်ရင် အဆင့်မြင့် အရာရှိဖြစ်လာနိုင်တာပေါ့.. ခု မင်းတို့ထဲမှာ ဝူကျိအသင်းဝင်တွေရော အပြင်လူတွေရောပါတယ်.. ဒါပေမဲ့ ကိစ္စမရှိဘူး .. နောက်ခံအခြေအနေ.. ဇစ်မြစ် ဘာပဲဖြစ်နေ ဖြစ်နေ ဝူချင်းရှင်းကို သတ်နိုင်ရင် လူတိုင်း ဆုကောင်းကောင်းချီးမြင့်ခံရမယ်.. ဒါ သိုင်းသူတော်စင် အမိန့်ပေးလိုက်တာပဲ.. "

ကြယ်သံတမန်က ခဏရပ်လိုက်ပြီး ဆက်ပြော၏ ။

" ရှုချန်က ဟိုမှာရောက်နေပြီ.. သူ သိုင်းသူတော်စင်စိတ်ဝိညာဥ်ကျမ်းကို လေ့ကျင့်ထားသော ဝူချင်းရှင်းရဲ့ နေရာကို အာရုံခံနိုင်တယ်.. "

" ခုနကပဲ သူအချက်ပြထားတာဆိုတော့ သဲလွန်စ ရှာတွေ့သွားပြီထင်တယ်.. အချိန်မဖြုန်းဘဲ မြန်မြန်သွားရအောင်.. "

လျှို့ဝှက်ကြယ်သံတမန် အပါအဝင် လူကိုးဦးအဖွဲ့သည် တည်းခိုခန်းမှ ထွက်ခွာပြီး ကြိုတင်ပြင်ဆင်ထားသော မြင်းများကိုစီးကာ ထွက်ခွာသွားကြသည်။

……….

ဤသို့ဖြင့် ချောင်မူနှင့် အခြားသူများသည် အနောက်ဘက်တံခါးမှတစ်ဆင့် မြို့မှ ထွက်ခွာသွားကြသည် ။

" ဟူးကြီး.. ကြယ်သံတမန်ပြောတဲ့ ဝိညာဥ်ချိတ်ရှုချန်က ဘယ်လောက် သန်မာလဲ သိလား.. "

ချောင်မူသည် သူနှင့် ရင်နှီးသော မုတ်ဆိတ်ရှည်ဓားသမားနှင့် အတူယှဥ်၍ မြင်းစီးလာ၏ ။

မုတ်ဆိတ်ရှည်ဓားသမားက နာမည်အပြည့်အစုံ မပြောဘဲ သူ့ကိုယ်သူ မျိုးရိုးနာမည် ဟူး ဟုသာ မိတ်ဆက်ပေးခဲ့သဖြင့် ထိုသို့သာ ခေါ်လိုက်သည် ။

ကျန်လူများကလည်း ထိုသို့ မခြားမနားပင် ။ မျိုးရိုး နာမည်ပြောသူရှိသလို ကျောက်စိမ်းလက် ၊ ကျောက်စိမ်းမျက်နှာနဂါး ကဲ့သို့သော သိုင်းလောက နာမည်ပြောင်များကို ပြောသူလည်း ရှိ၏ ။ နာမည် အပြည့်အစုံ ပြောသူမှာ ချောင်မူ တစ်ယောက်ထဲသာ ဖြစ်လေသည် ။

" ဝိညာဥ်ချိတ်ရှုချန်က ခင်ဗျားလိုပဲ နာမည်ကြီး အဆင့် ၄ သိုင်းပညာရှင်လေ.. တစ်ခါတုန်းက သူ့ကို အဆင့်၄ သိုင်းပညာရှင်နှစ်ယောက် ဝိုင်းတိုက်တာ တစ်ယောက်သေပြီး နောက်တစ်ယောက်က လွတ်သွားတာတောင် ဒဏ်ရာပြင်းပြင်းထန်ထန်ရသွားတယ်တဲ့.. "

ဓားသမားက ပြောလိုက်သည် ။

" စိတ်ဝိညာဥ် သန့်စင်ခြင်း အဆင့်ကို မရောက်သေးရင် အတွင်းအား ဘယ်လောက်ရှိရှိ အဆင့် ၄ လို့ သတ်မှတ်ထားတော့ အဆင့်၄ အချင်းချင်း ကြားမှာလဲ အတွင်းအား ကွာခြားချက်တွေ ရှိတယ်လေ.. ရှုချန်ကတော့ အဆင့် ၄ ရဲ့ အသန်မာဆုံးတွေထဲက တစ်ယောက်ပေါ့.. "

" ကျုပ်တို့ထဲမှာ သူက နာမည်အကြီးဆုံးပဲ ..သူက ကျုပ်တို့ထဲမှာ အသန်မာဆုံး မဟုတ်ရင်တောင်မှ သူ့ထက်သန်မာတဲ့သူ မရှိဘူး.. "

" သိုင်းသူတော်စင်စိတ်ဝိညာဥ်ကျမ်းက သိုင်းသူတော်စင် ကိုယ်တိုင်ဖန်တီးထားတဲ့ လျှို့ဝှက်ဆန်းကြယ်တဲ့ ကျင့်စဥ်တစ်ခုလေ.. အဲ့တာကို ကျွမ်းကျင်အဆင့်အထိကျင့်နိုင်တဲ့သူတွေက စိတ်ဝိညာဥ်သန့်စင်ခြင်း အဆင့်ကို အောင်မြင်နိုင်ချေများတယ်.. ရှူချန် နဲ့ ခင်ဗျား ရောပေါ့.. "

ဓားသမားသည် အာဝဇ္ဇန်း ကောင်းလှသဖြင့် ချောင်မူလည်း သိုင်းလောကအကြောင်း ဗဟုသုတများစွာ ရလိုက်၏ ။

ဆယ်မိုင်ခန့်အထိ မြင်းဒုန်းစိုင်း လာကြပြီး ရှေ့ဆုံးမှ ကြယ်သံတမန်က မြင်းဇာတ်ကြိုးကို ရုတ်တရက်ဆွဲပြီး သတိထားရန် အချက်ပြလိုက်သည် ။

သူတို့ရှေ့ရှိ လမ်းဘေးတွင် မီးပုံကြီး တစ်ခု ရှိနေပေသည် ။

သူတို့အားလုံးက သတိထား၍ ချဥ်းကပ်လာကြပြီး အနီးသို့ ရောက်သည်နှင့် မီးလျှံအတွင်းမှ လူသားပုံရိပ်ကို တွေ့လိုက်ကြလေသည် ။

ထိုပုံရိပ်ကို သစ်သားချွန် တစ်ချောင်းဖြင့် အောက်မှ အထက်သို့ ထိုးဖောက်ပြီး လမ်းဘေးတွင် စိုက်ထူထား၏ ။

" ကျုပ်တို့ စိတ်အာရုံအတိုင်း လိုက်လာတာပဲ.. ဒီလူသေတာ မကြာသေးဘူး.. "

ကျောင်စိမ်းမျက်နှာနဂါး က မျက်မှောင်ကြုတ်ကာ ပြောလိုက်သည် ။

" သူက ရှုချန်လား.. "

သူတို့အဖွဲ့သည် မီးတိုင်ဘေးတွင် စုရုံးနေကြပြီး မျက်နှာမသာမယာ ဖြစ်နေကြသည် ။

" ကျုပ်တို့ထွက်လာကာစ ရှိသေးတယ် ဝိညာဥ်ချိတ်ရှုချန်သေသွားပြီ.. ခုထိ ဝူချင်းရှင်းကို မြင်တောင်မမြင်ရသေးဘူး.. "

ဓားသမားက သက်ပြင်းချလိုက်၏ ။

" ဝူချင်းရှင်းက သူတော်စင်လိုပဲ ရက်စက်လိုက်တာ.. "

ဝူချင်းရှင်း၏ လုပ်ရပ်က သူတို့ကို ခြိမ်းခြောက်ဖို့ရန်မှန်း အားလုံးနားလည်ကြ၏ ။ ကျွမ်းကျင်သူ တစ်ဦး၏ သေဆုံးမှု ၊ အထူးသဖြင့် ရက်ရက်စက်စက် အသတ်ခံလိုက်ရသော ကျွမ်းကျင်သူတစ်ဦးကို မြင်ရသည်မှာ ကြောက်ရွံမှုကို ဖြစ်ပေါ်စေနိုင်သည် ။

" ဒီလူက မီးလောင်လို့ သေတာ မဟုတ်ဘူး.. ကျုပ်တို့ မြင်အောင် တမင်သတ်ပြီးမှ အချိန်ဆွဲ့ပြီး မီးရှို့ထားတာ.. "

ချောင်မူက သူ၏ အတွေ့အကြုံအရ မှတ်ချက်ပေးလိုက်၏ ။

" အင်း.. ဝူချင်းရှင်းကို ကိုယ်တွယ်ဖို့ ငါတို့ ပိုပြီး သတိထားရမယ် .."

ကြယ်သံတမန်က သတိပေးလိုက်သည် ။

" ငါတို့ သတိမထားရင် ရှုချန်လို ပြာဖြစ်သွားမယ်.. "

" ရှုချန်က သူ့ကိုယ်သူ အထင်ကြီးလွန်းတယ်.. ငါသူ့ကို ပြောထားတာက ဝူချင်းရှင်းကို အချိန်ဆွဲလို့ ရရင် ဆွဲထားလို့.. ခုတော့သေပြီ.. "

ရှုချန်သေဆုံးသွားသော်လည်း အဖွဲ့ထဲတွင် သိုင်းသူတော်စင်စိတ်ဝိညာဥ် လေ့ကျင့်ထားသူများ ကျန်နေသေး၍ စိတ်အာရုံအတိုင်း ထွက်ခွာလာကြသည် ။

ဝူချင်းရှင်း ပေးခဲ့သည် ကြောက်ရွံ့မှုက သူတို့ကို ပြန်လှည့်စေရန် မလုံလောက်ပေ ။ သွေးမမြင်ဖူးသည့် သိုင်းလောကသားဟူ၍ အဘယ်တွင် ရှိနိုင်ပါမည်နည်း ။