အခန်း (၁၃၇၁-၁၃၇၂)

အခန်း (၁၃၇၁) - ဝူရှန့်ငရဲဘုံ

ငွေဖြူရောင်... စစ်ဆေးပွဲမှာ ငွေဖြူရောင် ကျောက်စိမ်းပြား ရဖို့ဆိုတာ ဘယ်လောက်ခက်ခဲလဲဆိုတာ ဖန့်ချန် ကောင်းကောင်းသိသည်။

အကယ်၍ သူ့မှာ ဝှက်ဖဲတွေသာ မရှိဘဲ သာမန် တာအိုပေါင်းစည်းခြင်းအဆင့် မဟာပြီးပြည့်စုံခြင်း တစ်ဦးသာဆိုလျှင် ကြာနီနတ်မိမယ်ငယ်ရဲ့ ရှေ့မှာတောင် သုံးချက် ငါးချက်ထက် ပိုခံနိုင်မှာ မဟုတ်ဘူး။

အကယ်၍ တာအိုပေါင်းစည်းခြင်းအဆင့် မဟာပြီးပြည့်စုံခြင်းကို အဆင့် ၁၀ ဆင့် ခွဲခြားလိုက်မယ်ဆိုရင်

ကြာနီနတ်မိမယ်ငယ်က အဆင့် ၇ မှာ ရှိနေလိမ့်မယ်။

ကြေးနီရောင် ကျောက်စိမ်းပြား ရတဲ့သူတွေက အဆင့် ၈။

ငွေဖြူရောင် ကျောက်စိမ်းပြားကတော့ အဆင့် ၉။

ရွှေရောင် ကျောက်စိမ်းပြားဆိုရင် အဆင့် ၁၀။

ခရမ်းရောင် ကျောက်စိမ်းပြား အဆင့်ကို ရောက်တဲ့ တာအိုပေါင်းစည်းခြင်းအဆင့် ကျင့်ကြံသူကတော့ ဘေးဒုက္ခဖြတ်ကျော်ခြင်းအဆင့်ကို တစ်ယောက်ချင်း ယှဉ်တိုက်ဖို့တောင် မခဲယဉ်းတော့တာမို့ ဒီအဆင့်သတ်မှတ်ချက်ထဲမှာ မပါဝင်တော့ဘူး။

ဖန့်ချန်ရဲ့ ကိုယ်ပိုင်အစွမ်းကတော့ အဆင့် ၁၀ ရဲ့ အပြင်ဘက်ကို ကျော်လွန်နေပြီ ဖြစ်သည်။

ကျွယ်မင်နန်းတော်ဟာ အထက်နယ်မြေသုံးခုရဲ့ ထိပ်တန်းအင်အားစု ဖြစ်ပေမဲ့ နှစ်ပေါင်းများစွာအတွင်းမှာ ခရမ်းရောင် ကျောက်စိမ်းပြား ရရှိသူ အလွန်နည်းပါးခဲ့သည်။

ဤသည်မှာ ထိုအဆင့်သည် လူသားဘုံကိုးခုလုံးတွင် ထိပ်တန်းအဆင့်ဖြစ်ကြောင်းနှင့် ကျွယ်မင်နန်းတော် အမာခံတပည့် ၉၉ ရာခိုင်နှုန်းထက် သာလွန်ကြောင်း သက်သေပြနေခြင်းပင်။

တကယ်လို့ ဖန့်ချန်သာ စစ်ဆေးပွဲမှာ သူ့အစွမ်းကုန်ထုတ်သုံးပြီး ခရမ်းရောင်ကျောက်စိမ်းပြားကို ယူခဲ့မယ်ဆိုရင် ချက်ချင်း အမာခံတပည့် ဖြစ်သွားနိုင်ပေမဲ့... အဲဒီလိုဆိုရင်တော့ သူဟာ မီးမောင်းထိုးခံထားရသလို ဖြစ်သွားပြီး ဝမ်ချုံစန်းလို လူတွေအပါအဝင် မရေမတွက်နိုင်တဲ့ မျက်လုံးတွေက သူ့ဆီ ကျရောက်လာမှာ ဖြစ်သည်။

ဒီ ယွီထျန်းကော်က ငွေဖြူရောင် ကျောက်စိမ်းပြား ရထားတာဆိုတော့ ကျွယ်မင်နန်းတော်ရဲ့ အမာခံတပည့် (ရွှေရောင်ကျောက်စိမ်းပြား) ဖြစ်ဖို့ တစ်လှမ်းပဲ လိုတော့တာ ဖြစ်သည်။

သူ့ရဲ့ ပါရမီနဲ့ နောက်ခံကတော့ သေးမှာမဟုတ်တာ သေချာသည်။

"ကျုပ် ခင်ဗျားအကြောင်း ကြားဖူးပါတယ် ဖန့်မိတ်ဆွေ။ ကျုပ်တို့ အသုတ်မှာ ကြေးနီရောင် ကျောက်စိမ်းပြား ရခဲ့တဲ့ ပါရမီရှင် ၂၃ ယောက်ပဲ ရှိတာ၊ ခင်ဗျားက အဲဒီထဲက တစ်ယောက်ပဲ"

ယွီထျန်းကော်က ပြုံးရွှင်စွာ ပြောလိုက်ပြီးနောက် သူ့နောက်က မသေမျိုးလှေတွေကို လက်ညှိုးထိုးပြလိုက်သည်။

ထိုအခါမှ လူတိုင်း သတိထားမိကြသည်မှာ ထိုလှေများပေါ်တွင် ဘေးဒုက္ခဖြတ်ကျော်ခြင်းအဆင့် ကျင့်ကြံသူ အများအပြား ရှိနေပြီး လူတိုင်းရဲ့ ကျောက်စိမ်းပြားမှာ ကြေးနီရောင် အလင်းတန်းတွေ ထွက်နေခြင်းပင်။

ရှစ်ဦး၊ ကိုးဦးခန့်အထိ ရှိနေသည်။

"အဖွဲ့ခေါင်းဆောင်... သူတို့ ကျုပ်တို့ကို သိမ်းသွင်းချင်နေတာ ထင်တယ်"

လင်းယွမ်က တိုးတိုးလေး သတိပေးသည်။

ဖန့်ချန်က အရေးမလုပ်ဟန်ဖြင့် ယွီထျန်းကော်ကို နှုတ်ဆက်လိုက်ပြီး

"ယွီမိတ်ဆွေ... ဒီကို ဘာကိစ္စနဲ့ လာခဲ့တာလဲ "

"ကျုပ်ကို ဗဟိုပြုတဲ့ ယာယီအဖွဲ့ငယ်တစ်ခု ဖွဲ့ချင်လို့ပါ"

ယွီထျန်းကော်က ပွင့်ပွင့်လင်းလင်းပင် ပြောလိုက်သည်

"ဒီတစ်ခေါက် ရှေးဟောင်းတားမြစ်နယ်မြေမှာ ကိစ္စကြီးတစ်ခု ဖြစ်နေတယ်။ ကျုပ်တို့အတွက်တော့ အဓိက ကိစ္စရပ်တွေကို လက်လှမ်းမမီနိုင်ပေမဲ့ အပြင်စည်းကနေ အကြွင်းအကျန်လေးတွေ ရရင်တောင် ပုံမှန် စူးစမ်းရှာဖွေမှု ဆယ်ကြိမ်ထက်မက အကျိုးအမြတ် ရနိုင်တယ်"

" ခုနက ခင်ဗျား အဆင့် ၄ နတ်ဆေးပင် တစ်ပင် ရထားတာ ကျုပ် မြင်လိုက်တယ်။ ခင်ဗျားမှာ ကံတရား ရှိတာပဲ။ အစွမ်းလည်းရှိ၊ ကံတရားလည်း ပါတဲ့သူက ကျုပ်အဖွဲ့ထဲ ဝင်လိုက်ရင် အကာအကွယ် တစ်ခု ပိုရသွားပြီး ဒီလို အရုန်းအယင်းတိုက်ပွဲကြားမှာ ပိုပြီး ဘေးကင်းနိုင်တာပေါ့။ ဒါက မကောင်းဘူးလား "

"ကောင်းပြီလေ... ကျုပ် ဝင်မယ်"

ဖန့်ချန်က ခေါင်းညိတ်ပြီး ပြတ်ပြတ်သားသားပင် သဘောတူလိုက်သည်။

ယွီထျန်းကော်မှာ ခေတ္တမျှ ကြောင်အသွားသည်။

ဖန့်ချန်က ဤမျှ ပြတ်သားလိမ့်မည်ဟု သူ မထင်ထားမိချေ။

အရင်က သူ အခြားသူတွေကို စည်းရုံးစဉ်က ကြေးနီရောင်ကျောက်စိမ်းပြား ရထားတဲ့ ပါရမီရှင်တွေမို့ မာနလေးတွေရှိကြပြီး အနည်းငယ် မူနေတတ်ကြသည် မဟုတ်ပါလား။

ယွီထျန်းကော်က ဖန့်ချန်ကို ကြည့်တဲ့ အကြည့်မှာ ပိုပြီး နွေးထွေးသွားသည်။

ဤကဲ့သို့ အခြေအနေကို သုံးသပ်ပြီး ပြတ်သားတဲ့ မိတ်ဆွေမျိုးကို သူ အလွန်ခင်မင်လိုသည်။

ထို့နောက်တွင် သူသည် ဖန့်ချန်ကို သူ၏မသေမျိုးလှေပေါ်သို့ ဖိတ်ခေါ်လိုက်ပြီး အခြားသူများကိုပါ ခေါ်ယူလိုက်သည်။

အားလုံးက ယွီထျန်းကော်ကိုတော့ အောက်ကျို့ကြသော်လည်း အချင်းချင်းမှာတော့ ကြေးနီရောင်ရသူချင်းမို့ အနည်းငယ် အားပြိုင်ချင်စိတ်ရှိနေကြကာ အကြည့်ချင်းမှာ စိန်ခေါ်မှုများ ပါဝင်နေကြသည်။

ယွီထျန်းကော်က အစည်းအဝေးတိုလေးတစ်ခု လုပ်ကာ အားလုံးရဲ့ မသေမျိုးလှေတွေကို နယ်မြေတစ်ခုတည်းမှာ စုပေါင်းမောင်းနှင်ခိုင်းသည်။

တကယ်လို့ သူတို့ပါ တိုက်ပွဲဝင်ရမယ့် အခြေအနေ ရောက်လာရင် ယွီထျန်းကော်ကို ဗဟိုပြုပြီး အစီရင်ခင်းကျင်း တုံ့ပြန်ကြဖို့ ဖြစ်သည်။

သူတို့တွေဟာ လမ်းခရီးမှာတင် ဘေးဒုက္ခဖြတ်ကျော်ခြင်းအဆင့်ကို တက်လှမ်းထားသူတွေမို့ ဘေးဒုက္ခဖြတ်ကျော်ခြင်းအဆင့် အုပ်စုတစ်စုက တာအိုပေါင်းစည်းခြင်းအဆင့် အုပ်စုတစ်စုကို ဦးဆောင်ထားခြင်းသည် အဖွဲ့ကြီးထဲမှာ အထင်ကရ မဟုတ်ပေမဲ့ အသေးစား တိုက်ပွဲငယ်လေးတွေမှာတော့ မိမိကိုယ်ကို ကာကွယ်နိုင်စွမ်း ရှိပေလိမ့်မည်။

ဖန့်ချန်သည် မသေမျိုးလှေပေါ် ပြန်ရောက်သောအခါ အစည်းအဝေးအချက်အလက်များကို ပြောပြရာ အားလုံးက ကန့်ကွက်ခြင်း မရှိကြချေ။

"ဒီ ယွီမိတ်ဆွေမှာ ငွေဖြူရောင် ကျောက်စိမ်းပြား ရှိနေတာဆိုတော့ သူက မကြာခင်မှာ အင်အားကြီးတဲ့ အဖွဲ့တစ်ခုကို တည်ဆောက်နိုင်တော့မှာ။ ဒါက ကျုပ်တို့အတွက်တော့ အကျိုးရှိရင်ရှိမယ်၊ အန္တရာယ်တော့ မရှိနိုင်ဘူး"

မုံချင့်လင်သည် ယွီထျန်းကော်က အခြားသူတွေကို ထပ်မံစည်းရုံးနေတာကို ကြည့်ရင်း သူ့ခါးက ကျောက်စိမ်းပြားကို မကြာခဏ လှမ်းကြည့်နေမိသည်။

"ကဲ... အခု ကျုပ်တို့ အရှိန်အပြည့်နဲ့ ရှေ့ဆက်မယ်။ နံပါတ် (၁၅၇) တားမြစ်နယ်မြေရဲ့ ဗဟိုချက်ဖြစ်တဲ့ ဝူရှန့်ငရဲဘုံ ကို သွားကြမယ်"

နဂါးနက်လှေပေါ်မှ လီရှမ်းဇီ၏ အသံ ထွက်ပေါ်လာသည်။

အားလုံး တုံ့ပြန်ရန် အချိန်မရခင်မှာပင် နဂါးနက်လှေမှ ကြီးမားလှသော အလင်းအကာအကွယ်တစ်ခု တက်လာပြီး ထိုနေရာရှိ မသေမျိုးလှေ ထောင်ပေါင်းများစွာကို တစ်ခဏချင်းအတွင်း လွှမ်းခြုံလိုက်တော့သည်။

"ကျမတို့ မသေမျိုးလှေကို ထိန်းချုပ်လို့ မရတော့ဘူး "

ကြာနီနတ်မိမယ်ငယ်က တိုးတိုးလေး အော်လိုက်သည်။

လူတိုင်း၏ မျက်နှာပျက်သွားကြသည်။

ဖန့်ချန်သည် ယွမ်လုံနံပါတ်လှေ၏ အစီရင်ဗဟိုချက်ကို ကြည့်လိုက်သောအခါ ၎င်း၏ စွမ်းအင်များသည် နဂါးနက်လှေနှင့် ချိတ်ဆက်သွားသည်ကို တွေ့လိုက်ရသည်။

ကြည့်ရတာ အပြင်စည်းက လူတွေရဲ့ မသေမျိုးလှေတွေဟာ အမာခံတပည့်တွေ အချိန်မရွေး သိမ်းသွင်းအသုံးပြုနိုင်အောင် လုပ်ထားတာပဲ။ ဒါတွေ မထုတ်လုပ်ခင်ကတည်းက အမာခံတပည့်တွေ ပိုင်ဆိုင်တဲ့ မသေမျိုးလှေရဲ့ အစိတ်အပိုင်းတစ်ခုအနေနဲ့ ဖန်တီးထားတာကိုး...

ယွမ်လုံနံပါတ်လှေသည် ထိန်းချုပ်မှုမရှိတော့ဘဲ အနီးနားရှိ မသေမျိုးလှေများနှင့် တင်းကြပ်စွာ ကပ်သွားပြီး နောက်ဆုံးတွင် နဂါးနက်လှေကို ဗဟိုပြု၍ အရုပ်ဆက် များကဲ့သို့ ဧရာမ မသေမျိုးလှေကြီးတစ်ခုအဖြစ် ပေါင်းစည်းသွားတော့သည်။

နောက်တစ်ခဏတွင်တော့ မရေမတွက်နိုင်သော မသေမျိုး များသည် သူတို့၏ ကိုယ်တွင်းရှိ မသေမျိုးစွမ်းအား များကို စတင်ထုတ်လွှတ်လိုက်ကြပြီး ထိုစွမ်းအားများသည် နဂါးနက်လှေထဲသို့ တရဟော စီးဝင်သွားသည်။

မသေမျိုးအဆင့်အောက်ရှိ ကျင့်ကြံသူများသည် မျက်စိများ ဝေဝါးသွားပြီး နားထဲတွင် အူသွားကာ ခေတ္တမျှ မိန်းမောသွားကြသည်။

ပြန်လည် သတိဝင်လာချိန်တွင်တော့ ပတ်ဝန်းကျင်ရှိ ကြယ်တာရာများမှာ သိသိသာသာ ပြောင်းလဲသွားပြီ ဖြစ်သည်။

"ကျုပ်... ကျုပ်တို့ ခုနက နေရာမှာ မဟုတ်တော့ဘူး..."

လင်းယွမ်က ထစ်ထစ်ငေါ့ငေါ့ ပြောရှာသည်။

"ဒါက ကျွယ်မင်နန်းတော် အမာခံတပည့်တွေရဲ့ မသေမျိုးလှေမှာ ပါတဲ့ ထူးခြားတဲ့ စွမ်းရည်ပဲ တွန်းအားအလင်း လို့ ခေါ်တယ်"

ယွီထျန်းကော်၏ အသံ ထွက်ပေါ်လာသည်။

သူသည် နဂါးနက်လှေကို မျှော်လင့်ချက်အပြည့်ဖြင့် လှမ်းကြည့်ရင်း

"တွန်းအားအလင်းလို့ ခေါ်ရတာက သူ့ရဲ့အရှိန်က အလင်းထက်တောင် မြန်လို့ပဲ။ တကယ်လို့ နေရာနှစ်ခုက သိပ်မဝေးဘူးဆိုရင် ဒါဟာ တည်နေရာရွှေ့ပြောင်းခြင်း အစီရင် နဲ့တောင် ယှဉ်နိုင်တယ်"

"ဟား..."

လူတိုင်း အသက်ရှူမှားသွားကြသည်။

တည်နေရာ ရွှေ့ပြောင်းခြင်းအစီရင်က အချက်အချာ နှစ်ခု ချိတ်ဆက်ထားဖို့ လိုအပ်ပေမဲ့ အာကာသဟင်းလင်းပြင်ထဲမှာ အဲဒီလို အခြေခံ အဆောက်အအုံ မရှိတော့ ရွှေ့ပြောင်းခြင်းအစီရင် တည်ဆောက်လို့ မရဘူး။

မသေမျိုးလှေရဲ့ အရှိန်က အစီရင်နဲ့ ယှဉ်နိုင်တယ်ဆိုတာ ဘယ်လောက်တောင် ကြောက်ဖို့ကောင်းတဲ့ အဓိပ္ပာယ်လဲ မိမိသွားချင်တဲ့ အရပ်မျက်နှာတိုင်းကို စိတ်ကြိုက်သွားနိုင်တဲ့ ရွှေ့ပြောင်းခြင်းအစီရင်တစ်ခုလိုပဲ မဟုတ်ပါလား

မြန်တော့ မြန်သားပဲ... ဒါပေမဲ့ အထက်နယ်မြေသုံးခုသာ အပိတ်မခံထားရဘူး၊ ပြီးတော့ ဖူထူလောက နဲ့ ယင်လောကငယ် သာ တစ်သားတည်း ဖြစ်သွားမယ်ဆိုရင် ငါ့ရဲ့အရှိန်က တွန်းအားအလင်း ထက်တောင် ပိုမြန်ဦးမှာ ဖန့်ချန်က စိတ်ထဲမှ တိတ်တဆိတ် တွေးတောလိုက်သည်။

"ယွီမိတ်ဆွေ... ဝူရှန့်ငရဲဘုံအကြောင်း ခင်ဗျား ဘယ်လောက် သိထားလဲ "

ယွီထျန်းကော်က အကြောင်းအရာတွေကို ပိုသိပုံရသဖြင့် တစ်စုံတစ်ယောက်က လှမ်းမေးလိုက်သည်။

ထိုသူသည် ငွေဖြူရောင် ကျောက်စိမ်းပြားကြောင့် အခွင့်ထူးများစွာ ရရှိထားပြီး အချက်အလက်အချို့ကို ကြိုတင်သိထားဟန်ရှိသည်။

ဤသည်မှာ ယွီထျန်းကော်ရှိရာ နယ်မြေကြယ်စုကို စောင့်ကြပ်နေသည့် အဆင့် ၅ မသေမျိုးနှင့်လည်း သက်ဆိုင်ပေလိမ့်မည်။

ထိုသူသည် လင်းတုန်းထက် များစွာ ပိုမို အစွမ်းထက်သူ ဖြစ်သည်။

"အများကြီးတော့ မသိဘူး။ ဒီနေရာက နံပါတ် (၁၅၇) တားမြစ်နယ်မြေရဲ့ ဗဟိုချက်ဖြစ်ပြီး၊ ဒီနေရာကို အပိုင်သိမ်းနိုင်မှသာ တစ်ခုလုံးကို အပိုင်ရမယ်ဆိုတာပဲ သိတယ်"

ယွီထျန်းကော်က အေးအေးဆေးဆေး ပြောလိုက်ပြီးနောက် ခဏရပ်၍

"ပစ္စည်းတစ်ခုကိုတော့ သတိထားရမယ်၊ အဲဒါက ဝူရှန့်ဟင်းလင်းပြင်သားရဲ ပဲ။ သူတို့တွေက ဝူရှန့်ငရဲဘုံထဲမှာ အန္တရာယ်အရှိဆုံး အရာတွေပဲ"

"ဒါဆို... ကျုပ်တို့တွေ တားမြစ်နယ်မြေ လုပွဲကြီး နဲ့ တိုးနေတာလား ဒီနေရာက ဖော်ထုတ်ပြီးသလောက် ဖြစ်နေပြီဆိုတော့ အခုက ပိုင်ဆိုင်ခွင့်အတွက် ဆုံးဖြတ်တော့မှာလား "

တစ်စုံတစ်ယောက်က ထိတ်လန့်တကြား ရေရွတ်လိုက်လေတော့သည်။

အခန်း (၁၃၇၂) - တောက်ပသောလောက မသေမျိုးလမ်းစဉ်

“ဖန့်မိတ်ဆွေ... ဝူရှန့်ငရဲဘုံကို ရောက်တဲ့အခါ တစ်ခုခု အန္တရာယ်ကြုံလာရင် ကျမနဲ့အတူ လိုက်ခဲ့လို့ရတယ်”

ကြာနီနတ်မိမယ်ငယ်က ရုတ်တရက် အသံလွှင့်ကာ ပြောလိုက်သည်။

ဖန့်ချန်၏ စိတ်အနည်းငယ် လှုပ်ရှားသွားပြီး ချက်ချင်းပင် ခေါင်းညိတ်ပြလိုက်ကာ

“ကောင်းပြီ... ဘာပဲဖြစ်ဖြစ် ကျုပ် ခင်ဗျားနဲ့အတူ လိုက်ခဲ့ပါ့မယ်”

ကြာနီနတ်မိမယ်ငယ်က ဆက်လက်စကားမဆိုတော့ချေ။

သို့သော် ဖန့်ချန်ကမူ သူမပြောသော စကား၏ ဆိုလိုရင်းကို တွေးတောနေမိသည်။

သူမသည် ဝူရှန့်ငရဲဘုံ၌ ဘာတွေဖြစ်ပျက်နေသည်ကို သိရှိထားပုံရပြီး အန္တရာယ်နှင့် ကြုံတွေ့ရပါက ဖြေရှင်းနိုင်မည့် နည်းလမ်းရှိသည်ဟု ယုံကြည်မှုရှိနေခြင်း ဖြစ်သည်။

ဝမ်ချုံစန်းက ဝူရှန့်ငရဲဘုံမှာ ရှိနေတာလား

ဖန့်ချန်သည် ကြာနီနတ်မိမယ်ငယ်ကို မသိမသာ တစ်ချက်ကြည့်လိုက်သည်။

ရက်အနည်းငယ် ကြာပြီးနောက်... လူတိုင်းသည် အာကာသဟင်းလင်းပြင်ထဲတွင် မိုင်ပေါင်း မည်မျှသောင်းချီ ခရီးနှင်ခဲ့သည်ကို မသိကြတော့ဘဲ ပတ်ဝန်းကျင်ရှိ ကြယ်တာရာများသည် အလွန်စိမ်းသက်နေသည်ကိုသာ သတိပြုမိကြတော့သည်။

“ကျုပ် ရုတ်တရက် စိုးရိမ်လာမိတယ်... တကယ်လို့ ဟိုပုဂ္ဂိုလ်က ကျုပ်တို့ကို ပြန်မခေါ်သွားဘူးဆိုရင် ကျုပ်တို့ ဒီဟင်းလင်းပြင်ထဲမှာ လမ်းပျောက်ကျန်ရစ်ခဲ့မှာပဲ”

လင်းယွမ်က တိုးတိုးလေး ပြောရှာသည်။

“မင်း လမ်းပျောက်မှာကို စိုးရိမ်နေမယ့်အစား အသက်ရှင်လျက် ပြန်နိုင်ပါ့မလားဆိုတာကို အရင်စိုးရိမ်တာက ပိုလက်တွေ့ကျလိမ့်မယ်”

ယွီဝူရှီးက အေးစက်စွာ ဆိုလိုက်သည်

“မင်းစိုးရိမ်နေတာတွေက အဓိပ္ပာယ်မရှိတဲ့ ကိစ္စတွေပဲ”

လင်းယွမ်က ပြန်လည်ချေပရန် ပြင်လိုက်စဉ်မှာပင် သူတို့အဖွဲ့ထက် ပိုမိုကြီးမားသော အဖွဲ့တစ်ဖွဲ့က အနားသို့ ရောက်ရှိလာသည်။

နဂါးနက်လှေသည် သိသိသာသာ အရှိန်လျှော့လိုက်ပြီး ထိုအဖွဲ့ဆီသို့ ချဉ်းကပ်သွားရာ ထိုအဖွဲ့ကလည်း နဂါးနက်လှေရှိရာသို့ ဦးတည်လာသည်။

“ကြည့်ရတာ... နောက်ထပ် နဂါးနက်လှေ တစ်စင်းလား ကျွယ်မင်နန်းတော်ရဲ့ နောက်ထပ် အမာခံတပည့် တစ်ယောက်လား ”

လူတိုင်း စိတ်ထဲမှ မှန်းဆနေကြပြီး အနည်းငယ် ဝမ်းသာသွားကြသည်။

မိမိတို့ဘက်က လူများလေလေ ဘေးကင်းဖို့ အခွင့်အရေး ပိုများလေလေ မဟုတ်ပါလား။

အဖွဲ့နှစ်ခု အလွန်နီးကပ်သွားသောအခါ ထိုနဂါးနက်လှေပေါ်မှ ပုံရိပ်ပေါင်း ဒါဇင်နှင့်ချီ၍ ပျံသန်းထွက်ပေါ်လာပြီး လီရှမ်းဇီကလည်း လူတစ်စုကို ဦးဆောင်ကာ တက်ကြွစွာ ကြိုဆိုလိုက်သည်။

“ကျုပ် ခဏလောက် တရားထိုင်ပြီး စွမ်းအားပြန်ထိန်းညှိလိုက်ဦးမယ်”

ဖန့်ချန်က အေးအေးလူလူ ပြောလိုက်သည်။

သူသည် ရင်းနှီးသော ပုံရိပ်တစ်ခုကို မြင်လိုက်ရခြင်း ဖြစ်သည်။

... ...

နဂါးနက်လှေပေါ်ရှိ အလယ်ဗဟိုတွင် အဖွဲ့နှစ်ခုမှ လူများ ထိုင်နေကြပြီး လက်ဖက်ရည်နှင့် နတ်သီး များ ရှိနေသည်။

အပြင်ဘက်ရှိ မှောင်မည်းနေသော ဟင်းလင်းပြင်ကြီးကိုသာ မကြည့်မိပါက သာယာလှပသော နတ်တောင်တစ်တောင်ပေါ်တွင် ရောက်နေသည်ဟုပင် ထင်မှတ်ရပေလိမ့်မည်။

လင်းတုန်းသည်လည်း ထိုစဉ်က နဂါးနက်လှေပေါ်တွင် ရှိနေသော်လည်း အစွန်ဘက်၌သာ ရပ်နေရသည်။

လီရှမ်းဇီနှင့်အတူ ဧည့်သည်ကို ကြိုဆိုနိုင်သူများမှာ အဆင့် ၄ နှင့် အဆင့် ၅ မသေမျိုး များသာ ဖြစ်ကြသည်။

“စီနီယာအစ်ကို... ကျုပ် သတင်းရရချင်း ပထမဆုံးအကြိမ် ထွက်လာခဲ့တာ၊ လမ်းမှာ စီနီယာနဲ့ ဆုံမယ်လို့ မထင်ထားဘူး။ သိပ်ကောင်းတာပဲ၊ ကျုပ်တို့ အတူတူ သွားကြစို့”

လီရှမ်းဇီ၏ တည့်တည့်တွင် ထိုင်နေသူမှာ တက်ကြွရွှင်လန်းသော လူငယ်လေးတစ်ဦး ဖြစ်သည်။

သူ၏ကျင့်ကြံခြင်းမှာ အဆင့် ၁ မသေမျိုး မျှသာ ရှိပြီး သူ၏မျက်ဝန်းများကို ကြည့်ခြင်းဖြင့် ထိုလူငယ်သည် အတွေ့အကြုံ သိပ်မရှိသေးဘဲ အနည်းငယ် အပြစ်ကင်းစင်ဟန်ရှိကြောင်း သိနိုင်သည်။

လီရှမ်းဇီက ခပ်တိုးတိုး သက်ပြင်းချလိုက်ကာ

“ကျိညီလေး... ဒီတစ်ခေါက် မင်းပါ လိုက်လာလိမ့်မယ်လို့ ငါမထင်ထားဘူး။ တကယ်တော့ မင်းက နန်းတော်ထဲမှာပဲ ကျင့်ကြံနေလို့ ရတာပဲ၊ ဒီကိစ္စထဲ ဝင်ပါစရာ မလိုပါဘူး”

လူငယ်က အလျင်အမြန် ပြန်ပြောသည်

“စီနီယာအစ်မကြီးက ထိုက်ယီမသေမျိုးဂိုဏ်း ၊ ဝမ်ရှင်းနန်းတော် ၊ သွေးသားနတ်ကျောင်း ၊ ရုက္ခစိုးကျောင်းတော် ၊ ဝိညာဥ်နတ်ဘုရားဂိုဏ်း နဲ့ ဝိညာဥ်သုတ်သင်ခြင်းဌာန တို့က အမာခံတပည့်တွေနဲ့ အကျိတ်အနယ် တိုက်ပွဲဖြစ်နေပြီး အကျအဆုံး များနေတယ်လို့ ကြားရလို့ ကျုပ် ချက်ချင်း လိုက်လာခဲ့တာပါ။ ဒါက ကျုပ်တို့ ကျွယ်မင်နန်းတော်ရဲ့ ပြင်ပစစ်ပွဲပဲ၊ တားမြစ်နယ်မြေ လုပွဲပဲလေ။ အမာခံတပည့်တစ်ယောက်အနေနဲ့ ကျုပ်လည်း အင်အားတစ်ခုအနေနဲ့ ပါဝင်ရမှာပေါ့”

တကယ်ပဲ တားမြစ်နယ်မြေ လုပွဲကြီးလား

ဖန့်ချန်၏ စိတ်ထဲ လှုပ်ရှားသွားသည်။

သို့သော် ဤတားမြစ်နယ်မြေ လုပွဲတွင် တစ်ခုခု မမှန်ကန်သည်မှာ သေချာသလောက်ပင်။

မဟုတ်လျှင် အဘယ်ကြောင့် ထူးခြားသူ များ ပေါ်လာရမည်နည်း အဘယ်ကြောင့် ကျိထျန်းကျွင်း က ထိုနေရာသို့ ရောက်နေရမည်နည်း။

သူ၏ အကြည့်သည် ထိုလူငယ်လေးနောက်ကွယ်မှ လူငယ်တစ်ဦးဆီသို့ ကျရောက်သွားသည်။

ထိုသူမှာ ဖန့်ချန်နှင့် တစ်ကြိမ်ဆုံတွေ့ဖူးသော ကျိထျန်းကျွင်း ပင် ဖြစ်သည်။

သူ၏ ပုံစံကို ဖန့်ချန် မမေ့နိုင်ချေ။

ယခုအခါ ကျိထျန်းကျွင်းသည် လူငယ်လေး၏ နောက်ကွယ်တွင် တိတ်ဆိတ်စွာ ရပ်နေပြီး စကားတစ်ခွန်းမျှ မဟချေ။

လူငယ်လေး၏ အဖွဲ့တွင်လည်း အဆင့် ၅ မသေမျိုးများ ပါဝင်နေပြီး ကျိထျန်းကျွင်းသည် ထိုအဆင့် ၅ မသေမျိုးနှင့်အတူ ရပ်နေနိုင်ခြင်းမှာ သူတို့၏ အဆင့်အတန်းသည် တန်းတူဖြစ်ကြောင်း ဖော်ပြနေသည်။

ဤသည်မှာ မသေမျိုးလောကငယ် နောက်ခံကြောင့် ဖြစ်နိုင်သော်လည်း ဖန့်ချန်၏ အမြင်အရ ထိုလူငယ်လေးကြောင့် ဖြစ်ဖို့ ပိုများသည်။

လီရှမ်းဇီက သူ့ကို ကျိညီလေး ဟု ခေါ်ဆိုပြီး မျိုးရိုးအမည်မှာလည်း ကျိ ပင် ဖြစ်ရာ ကျိထျန်းကျွင်းနှင့် သွေးသားတော်စပ်မှု ရှိနိုင်ပေသည်။

ဖန့်ချန်သည် ကျိထျန်းကျွင်းကို တိတ်တဆိတ် အကဲခတ်နေလိုက်သည်။

သူ၏ကျင့်ကြံခြင်းသည် အဆင့် ၂ မှ အဆင့် ၃ သို့ တိုးတက်သွားပြီဖြစ်ပြီး အောက်နယ်မြေခြောက်ခုတွင် အတွေ့ရများသော အဆင့် ၃ လွတ်လပ်သေမသေမျိုး တစ်ဦး ဖြစ်သည်။

ရှင်းလင်းသည်မှာ... သူသည် အညစ်ကြေးကင်းစင်သော မသေမျိုး လမ်းစဉ်ကို လျှောက်လှမ်းရန် ကြိုးစားသော်လည်း ကျရှုံးခဲ့ပုံရသည်။

ကျိထျန်းတုနှင့် ဆူယာသခင်မတို့ ပြောခဲ့သည်မှာ မမှန်ပေ။

ကျိထျန်းကျွင်း၏ မသေမျိုးလောကငယ်မှ နောက်ခံသည် တကယ်တမ်းတွင်မူ အထင်ကြီးလောက်စရာ မရှိလှချေ။

အထက်နယ်မြေသုံးခုတွင် ဝမ်ရွှမ်ကဲ့သို့ ပုဂ္ဂိုလ်မျိုးပင် ထိုက်ယီမသေမျိုး လမ်းစဉ်ကို တိုက်ရိုက် လျှောက်လှမ်းနိုင်သော်လည်း ကျိထျန်းကျွင်းမှာမူ လွတ်လပ်သောမသေမျိုး လမ်းစဉ်ကိုသာ အရင်လျှောက်လှမ်းရပြီး အဆင့် ၃ ရောက်မှသာ မသေမျိုးလမ်းစဉ်သစ်ကို ရှာဖွေရခြင်း ဖြစ်သည်။

ဤသည်မှာ သူ၏ အခြေခံ နောက်ခံ မခိုင်မာခြင်းကြောင့် ဖြစ်နိုင်သလို၊ သူသည် အခြားမသေမျိုးလမ်းစဉ်ကို မသွားလိုဘဲ အညစ်ကြေးကင်းစင် မသေမျိုး လမ်းစဉ်ကိုသာ သွားလိုခြင်းကြောင့်လည်း ဖြစ်နိုင်သည်။

ဒီလူကသာ မိစ္ဆာ ဖြစ်နေမယ်ဆိုရင် ဒီကို ရောက်လာတာက တကယ်ကို စဉ်းစားစရာပဲ ဖန့်ချန် တွေးနေမိသည်။

ယခုအခါ သူ၏ တစ်ခုတည်းသော ဝှက်ဖဲမှာ နယ်နိမိတ်ဘူးသီး ထဲမှ ဟွမ်ဝူကျီ ပင် ဖြစ်သည်။

ဤကဲ့သို့ ကြီးမားလှသော အခြေအနေတွင် ထိုဝှက်ဖဲမှာ အလွန်အမင်း အားကောင်းသည်ဟု မဆိုနိုင်ချေ။

ထို့ကြောင့် သူသည် ဘေးမှသာ စောင့်ကြည့်သူအဖြစ် နေရန် ဆုံးဖြတ်လိုက်သည်။

စောင့်ကြည့်ခြင်းအားဖြင့် ဤနံပါတ် (၁၅၇) တားမြစ်နယ်မြေ၏ ကိစ္စရပ်များသည် မိစ္ဆာများနှင့် ပတ်သက်မှု ရှိ၊ မရှိ သိနိုင်ပေလိမ့်မည်။

တစ်ဆက်တည်းမှာပင် ကျိထျန်းကျွင်းကိုလည်း တိတ်တဆိတ် အကဲခတ်နိုင်မည် ဖြစ်သည်။

“ကျိညီလေး... ပွင့်ပွင့်လင်းလင်းပဲ ပြောကြရအောင်။ ငါတို့အားလုံးက ကျွယ်မင်နန်းတော်ရဲ့ အမာခံတပည့်တွေပဲ။ ငါက ပဉ္စမစီနီယာအစ်ကိုနောက်ကို လိုက်တာ၊ မင်းက တတိယစီနီယာအစ်မနောက်ကို လိုက်တာ။ စီနီယာအစ်မကြီး သာ ဒုက္ခရောက်လေလေ ငါတို့အတွက် အကျိုးရှိလေလေပဲ။ မင်းလည်း တောက်ပသောလောက မသေမျိုး လမ်းစဉ်ကို လက်ဝါးကြီးအုပ်ချင်နေတာ မဟုတ်လား”

လီရှမ်းဇီ၏ လေသံမှာ ရုတ်တရက် ပြောင်းလဲသွားပြီး အနည်းငယ် စူးရှသွားသည်။

တောက်ပသောလောက မသေမျိုး လမ်းစဉ်လား

ဖန့်ချန်၏ မျက်ဝန်းများ လှုပ်ရှားသွားသည်။

လီရှမ်းဇီက ထိုအမည်ကို မြွက်ဟလိုက်သောအခါ ကျိထျန်းကျွင်း၏ မျက်ဝန်းထဲတွင် သတိပြုမိရန် ခဲယဉ်းသော အလင်းတန်းတစ်ခု ဖြတ်ခနဲ လက်သွားသည်ကို သူ တွေ့လိုက်ရသည်။

“လီစီနီယာ... စီနီယာက အဆင့် ၄ ကို တက်လှမ်းပြီးပြီပဲ၊ လျှောက်လှမ်းနေတာက ကောင်းကင်မသေမျိုး လမ်းစဉ် မဟုတ်လား တောက်ပသောလောက မသေမျိုး လမ်းစဉ်က စီနီယာ့အတွက် ဘာအကျိုးမှ ရှိမှာမဟုတ်တော့ဘူး”

လူငယ်လေး၏ မျက်ဝန်းထဲမှ အပြစ်ကင်းစင်မှုများ ပျောက်ကွယ်သွားပြီး အေးစက်သော လေသံ ထွက်ပေါ်လာသည်။

“တောက်ပသောလောက မသေမျိုး ဆိုတာ ဘယ်သူ့အတွက်မဆို အကျိုးရှိတာပဲ။ ငါကိုယ်တိုင် အဲဒီလမ်းစဉ်ကို မလျှောက်နိုင်ပေမဲ့ တခြားလူတွေ မလျှောက်နိုင်ဘူးလို့ မဆိုလိုဘူး”

လီရှမ်းဇီက အေးစက်စွာ ဆိုသည်

“ပျက်သုဉ်းခြင်း ကပ်ကမ္ဘာတွေရဲ့ စွမ်းအားကို စုပ်ယူနိုင်တဲ့ ဒီလို ထူးခြားတဲ့ မသေမျိုးလမ်းစဉ်ဟာ မပြည့်စုံဘူးဆိုရင်တောင် ကောင်းမွန်တဲ့ ဈေးနှုန်းတစ်ခုနဲ့ ရောင်းထွက်နိုင်တာပဲ”

“အရောင်းအဝယ်တစ်ခု လုပ်ကြရအောင်”

လူငယ်လေးက ရုတ်တရက် ပြောလိုက်သည်

“ဒီတစ်ခေါက် ဝူရှန့်ငရဲဘုံက တကယ်ကို သက်ဝင်လှုပ်ရှားနေမှာပဲ။ လီစီနီယာက ကျွယ်မင်နန်းတော် အမာခံတပည့်တွေထဲမှာ အဆင့်သတ်မှတ်ချက် မရှိသေးဘူးဆိုတော့ ကျုပ်တို့ ပူးပေါင်းကြတာ ပိုကောင်းမယ်။ တကယ်လို့ တောက်ပသောလောက မသေမျိုး လမ်းစဉ်ရဲ့ နတ်ဆေးပင်ကို ရခဲ့ရင် စီနီယာ့ကို မသေမျိုးကျောက်တုံး အမြောက်အမြား ပေးပါ့မယ်။ အပြင်... မသေမျိုးလောကငယ် ဝင်ခွင့်နေရာ တစ်ခုပါ ထပ်ပေးမယ်”

မသေမျိုးလောကငယ် ဝင်ခွင့်နေရာ ဟုတ်လား

ထိုနေရာရှိ မသေမျိုးများစွာ၏ မျက်နှာတွင် ထူးဆန်းသော အရိပ်အယောင်များ ပေါ်လာကြသည်။

သူတို့အတွက် တောက်ပသောလောက မသေမျိုး လမ်းစဉ်ထက် မသေမျိုးလောကငယ် ဝင်ခွင့်နေရာက ပို၍ အဖိုးတန်ပုံရသည်။

“မသေမျိုးလောကငယ်ကို သွားရုံနဲ့ စစ်မှန်သော မသေမျိုး လမ်းစဉ်ကို လျှောက်လှမ်းနိုင်မယ်လို့ မဆိုလိုပါဘူး။ မင်းနဲ့ မင်းရဲ့ ဝမ်းကွဲအစ်ကိုက သက်သေပဲ မဟုတ်လား”

လီရှမ်းဇီက လှောင်ပြုံးတစ်ချက် ပြုံးလိုက်ပြီးနောက်

“ဒါပေမဲ့... မင်းပေးတဲ့ မသေမျိုးကျောက်တုံးက လုံလောက်မယ်ဆိုရင်တော့ ငါ မင်းကို ကူညီပေးလို့ ရတာပေါ့”

ထို့နောက်တွင် သူတို့နှစ်ဦးမှာ အသံလွှင့်၍သာ ဆွေးနွေးကြတော့သဖြင့် အခြားသူများ မကြားရတော့ချေ။

ဆွေးနွေးပြီးသွားသောအခါ အဖွဲ့နှစ်ခုစလုံးသည် ဝူရှန့်ငရဲဘုံဆီသို့ အတူတကွ ချီတက်သွားကြတော့သည်။

ဖန့်ချန်၏ စိတ်ဝိညာဉ်သည် ကိုယ်တွင်းသို့ ပြန်ဝင်လာသည်။

အဖွဲ့ကြီး ချီတက်နေစဉ်အတွင်း သူသည် စိတ်ဝိညာဉ် အပြင်သို့ မထွက်ဝံ့ချေ။

အကယ်၍ မတော်တဆ မိမိ၏ ရုပ်ကလာပ်ကို အဝေးသို့ သယ်ဆောင်သွားခံရပါက သူသည် သေဆုံးသွားသူနှင့် ထူးခြားမည် မဟုတ်ပေ။

တောက်ပသောလောက မသေမျိုး... ကျိထျန်းကျွင်းက အညစ်ကြေးကင်းစင်သော မသေမျိုး လမ်းစဉ်ကို မသွားတော့ဘဲ တောက်ပသောလောက မသေမျိုး လမ်းစဉ်ကို သွားဖို့ ပြင်နေတာလား ဒါက ဘယ်လို မသေမျိုးလမ်းစဉ်မျိုးလဲ၊ ဘာလို့ အရင်က တစ်ခါမှ မကြားဖူးရတာလဲ ဖန့်ချန် စိတ်ထဲတွင် အတွေးများ နက်နဲနေမိသည်။

ဘာပဲဖြစ်ဖြစ်... အခွင့်အရေး ရခဲ့မယ်ဆိုရင်တော့ သူသည် ကျိထျန်းကျွင်း၏ ဆန္ဒကို လွယ်လွယ်နှင့် အကောင်အထည်ဖော်ခွင့် ပေးမည် မဟုတ်သည်မှာ သေချာလှပေသည်။